ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠭᠤᠴᠢᠨ ᠨᠢᠭᠡ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 31
119ᠲᠡᠷᠡ ᠰᠥᠨᠢ ᠶᠢᠨ ᠬᠠᠷᠠᠩᠭᠤᠢ ᠳᠤ
ᠬᠣᠭ ᠠ᠋ᠴᠠ ᠭᠠᠷᠤᠭᠠᠳ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠨᠢᠭᠡ ᠶᠠᠭᠤᠮᠠ ᠶ᠋ᠢ ᠤᠯᠠᠭᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠮᠥᠷᠭᠥᠪᠡ᠃ ᠨᠢᠳᠦᠨ ᠡᠴᠡ ᠨᠢ ᠭᠠᠯ ᠪᠤᠲᠠᠷᠠᠨ᠂ ᠬᠠᠮᠠᠷ ᠤ᠋ᠨ ᠬᠢᠨᠢ ᠶᠠᠰᠤ ᠱᠠᠷᠬᠢᠷᠠᠨ ᠤᠬᠠᠭᠠᠨ ᠨᠢ ᠪᠠᠯᠠᠷᠠᠪᠠ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠭᠠᠵᠠᠷ ᠤᠨᠠᠭᠰᠠᠨ ᠦᠭᠡᠢ᠂ ᠨᠢᠭᠡ ᠬᠡᠰᠡᠭ ᠶᠠᠭ ᠵᠣᠭᠰᠣᠨ ᠤᠬᠠᠭᠠᠨ ᠢ᠋ᠶ᠋ᠠᠨ ᠰᠡᠷᠭᠦᠭᠡᠵᠦ ᠪᠠᠢᠭᠠᠳ ᠶᠠᠭᠤ ᠶᠠᠭᠤ ᠮᠥᠷᠭᠥᠭᠰᠡᠨ ᠢ᠋ᠶ᠋ᠡᠨ ᠪᠠᠷᠢᠵᠤ ᠦᠵᠡᠪᠡ᠃ ᠭᠡᠲᠡᠯᠡ ᠲᠡᠷᠡ ᠨᠢ ᠪᠦᠳᠦᠭᠦᠨ ᠭᠡᠭᠴᠢ ᠶ᠋ᠢᠨ ᠱᠣᠩ ᠠᠵᠢ᠃ ᠴᠠᠭᠠᠰᠢ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠯᠠᠪᠯᠠᠨ ᠠᠵᠢᠬᠤ ᠳ᠋ᠤ᠌ ᠬᠣᠢᠨᠠᠬᠠᠨ ᠲᠠᠯᠠ ᠳ᠋ᠤᠨᠢ ᠠᠰᠤᠷᠤ ᠲᠣᠮᠣ ᠬᠠᠭᠠᠯᠭᠠ ᠪᠠᠢᠭᠠ ᠮᠡᠲᠦ ᠦᠵᠡᠭᠳᠡᠪᠡ᠃ ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠪᠣᠭᠳᠠ ᠶ᠋ᠢᠨ ᠣᠷᠳᠣᠨ ᠤ᠋ ᠡᠮᠦᠨᠡ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠰᠠᠶᠢ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠥᠪᠡᠷ ᠦ᠋ᠨ ᠭᠣᠮᠣᠳᠠᠯ ᠬᠡᠴᠢᠨᠡᠭᠡᠨ ᠶᠡᠬᠡ ᠪᠠᠢᠪᠠᠴᠤ ᠪᠣᠭᠳᠠ ᠶ᠋ᠢᠨ ᠡᠮᠦᠨᠡ ᠵᠥᠪᠬᠡᠨ《ᠵᠠ》 ᠭᠡᠵᠦ ᠠᠯᠠᠭᠠ ᠬᠠᠪᠰᠤᠷᠤᠨ ᠮᠡᠬᠦᠢᠬᠦ ᠡᠴᠡ ᠥᠭᠡᠷᠡ ᠶᠠᠮᠠᠷ ᠴᠦ᠍ ᠦᠭᠡᠢ ᠦᠭᠡᠢ ᠪᠡᠨ ᠰᠠᠨᠠᠭᠰᠠᠨ ᠪᠥᠭᠡᠳ ᠬᠠᠷᠢᠨ ᠡᠨᠳᠡ ᠢᠷᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠠᠨᠳᠠᠩ ᠳ᠋ᠠᠬᠢ ᠥᠨᠳᠥᠷ ᠵᠠᠩᠷᠠᠢᠰᠠᠭ᠂ ᠠᠷᠠᠳ ᠣᠯᠠᠨ᠂ ᠬᠥᠮᠦᠨ ᠦ᠌ ᠠᠮᠢ ᠨᠠᠰᠤᠨ ᠳ᠋ᠤ᠌ ᠥᠯᠵᠡᠢ ᠲᠡᠢ ᠭᠡᠳᠡᠭ ᠰᠢᠦ ᠳᠡ ᠭᠡᠵᠦ ᠪᠣᠳᠣᠪᠠ᠃ ᠡᠢᠨ ᠬᠦ᠌ ᠪᠣᠳᠣᠭᠰᠠᠨ ᠪᠣᠳᠣᠯ ᠨᠢ ᠮᠥᠨ ᠯᠡ ᠲᠡᠨᠳᠡ ᠬᠦᠷᠭᠡᠭᠰᠡᠨ ᠠᠵᠢ᠃
ᠶᠡᠬᠡ ᠳᠤᠭᠠᠩ ᠤ᠋ᠨ ᠢᠷᠣᠭᠠᠷ ᠲᠤ ᠣᠴᠢᠭᠠᠳ ᠳᠡᠭᠡᠭᠰᠢ ᠬᠠᠷᠠᠬᠤ ᠳ᠋ᠤ᠌ ᠤᠭ ᠳᠤᠭᠠᠩ ᠤ᠋ᠨ ᠥᠨᠳᠥᠷ ᠰᠦᠷᠲᠡᠢ ᠪᠠᠢᠳᠠᠯ ᠨᠢ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠶ᠋ᠢ ᠳᠣᠣᠷᠠ ᠠ᠋ᠴᠠ ᠨᠢ ᠪᠠᠭᠠᠨᠠᠳᠠᠵᠤ ᠪᠠᠢᠭᠠ ᠰᠢᠭ᠋ ᠰᠦᠨᠳᠡᠷᠯᠡᠨᠡ᠃ ᠨᠠᠷᠢᠪᠴᠢᠯᠠᠨ ᠠᠵᠢᠬᠤ ᠳ᠋ᠤ᠌ ᠳᠡᠭᠡᠳᠦ ᠳᠡᠭᠡᠪᠦᠷ ᠳᠠᠬᠢ ᠥᠨᠴᠥᠭ ᠪᠤᠯᠤᠩ ᠤ᠋ᠳ ᠤ᠋ᠨ ᠬᠢᠨᠢ ᠠᠯᠲᠠᠨ ᠭᠠᠨᠵᠤᠤᠷ ᠢ᠋ᠶ᠋ᠠᠨ ᠣᠨᠴᠠᠭᠠᠢ ᠲᠣᠳᠣᠷᠠᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠡᠨᠳᠡ ᠲᠡᠨᠳᠡ ᠡᠴᠡ ᠨᠢ ᠵᠡᠭᠦᠭᠰᠡᠨ ᠵᠢᠵᠢᠭ ᠰᠢᠷᠡᠮᠦᠨ ᠬᠣᠩᠬᠣ ᠨᠤᠭᠤᠳ ᠦᠯᠦ ᠮᠡᠳᠡᠭᠭᠡᠨ ᠰᠡᠪᠡᠯᠵᠡᠬᠦ ᠰᠠᠯᠬᠢᠨ ᠤ᠋ ᠠᠶᠠᠰ ᠢ᠋ᠶ᠋ᠠᠷ ᠭᠠᠩᠬᠠᠨ ᠡᠭᠡᠯᠵᠢ ᠳᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠵᠢᠩ ᠵᠠᠩ ᠳᠤᠤᠭᠠᠷᠴᠤ ᠪᠠᠢᠯᠠ᠃ ᠳᠣᠲᠣᠷᠠ ᠨᠢ ᠶᠠᠭᠤ ᠪᠠᠢᠳᠠᠭ ᠪᠢᠯᠡ? ᠭᠡᠬᠦ ᠡᠴᠡ ᠭᠤᠷᠪᠠᠨ ᠳᠠᠪᠬᠤᠷ ᠲᠡᠷᠢᠭᠦᠨ ᠲᠡᠢ᠂ ᠵᠢᠷᠭᠤᠭᠠᠨ ᠮᠣᠳᠣᠷ ᠲᠠᠢ ᠨᠠᠶᠠᠨ ᠲᠣᠬᠣᠢ ᠥᠨᠳᠥᠷ ᠮᠢᠴᠢᠳ ᠵᠠᠩᠷᠠᠢᠰᠠᠭ ᠪᠠ ᠲᠡᠭᠦᠨ ᠦ᠌ ᠪᠠᠳᠮᠠ ᠯᠢᠩᠬᠤᠠ ᠴᠡᠴᠡᠭ ᠦ᠋ᠨ ᠬᠡᠯᠪᠡᠷᠢᠲᠦ ᠳᠣᠣᠷᠠᠲᠤ ᠰᠠᠭᠤᠷᠢ ᠶ᠋ᠢᠨ ᠰᠢᠵᠢᠷ ᠠᠯᠲᠠᠨ ᠰᠢᠷᠠᠮᠠᠯ ᠨᠢ ᠨᠢᠳᠦᠨ ᠦ᠌ ᠡᠮᠦᠨᠡ ᠲᠣᠳᠣᠬᠠᠨ ᠲᠣᠰᠣᠨ ᠰᠠᠨᠠᠭᠳᠠᠨᠠ᠃ ᠶᠠᠭᠤᠮᠠ ᠴᠣᠬᠣᠮ ᠥᠨᠳᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠂ ᠦᠨᠡ ᠮᠥᠩᠭᠥ ᠶᠡᠬᠡ ᠣᠷᠣᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠷᠠᠨ ᠬᠥᠮᠦᠨ ᠦ᠌ ᠣᠶᠤᠨ ᠪᠢᠯᠢᠭ᠂ ᠲᠡᠭᠦᠨ ᠦ᠌ ᠤᠷᠠᠨ ᠨᠠᠨᠳᠢᠨ ᠭᠠᠷ ᠢ᠋ᠶ᠋ᠠᠷ ᠪᠦᠲᠦᠭᠡᠭᠳᠡᠭᠡᠳ᠂ ᠡᠭᠡᠯ ᠪᠤᠰᠤ ᠶ᠋ᠢᠨ ᠰᠢᠳᠢᠲᠦ ᠬᠥᠮᠦᠨ ᠦ᠌ ᠠᠷᠠᠪᠨᠠᠢᠯᠠᠭᠰᠠᠨ ᠢ᠋ᠶ᠋ᠠᠷ ᠠᠯᠢᠪᠠ ᠬᠥᠮᠦᠨ ᠦ᠌ ᠭᠠᠢ ᠭᠠᠮᠰᠢᠭ ᠢ᠋ ᠵᠠᠢᠯᠠᠭᠤᠯᠬᠤ ᠬᠤᠲᠤᠭ ᠰᠢᠳᠢ ᠶ᠋ᠢ ᠣᠯᠬᠤ ᠠᠪᠠᠰᠤ ᠡᠨᠡ ᠵᠠᠩᠷᠠᠢᠰᠠᠭ ᠯᠠ ᠪᠠᠢᠬᠤ ᠰᠢᠦ ᠳᠡ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠪᠣᠳᠣᠨ ᠭᠠᠵᠠᠷ ᠰᠤᠨᠤᠨ ᠤᠨᠠᠪᠠ᠃ ᠭᠡᠪᠡᠴᠦ ᠥᠨᠳᠡᠢᠬᠦ ᠳ᠋ᠡᠭᠡᠨ ᠮᠥᠷᠭᠥᠬᠦ ᠮᠠᠨᠢ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠪᠣᠢ? ᠨᠠᠰᠤ ᠪᠠᠷᠠᠭᠰᠠᠨ ᠠᠮᠠᠷᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠭᠡ ᠤᠤ? ᠨᠢᠭᠡᠨᠲᠡ ᠥᠩᠭᠡᠷᠡᠭᠰᠡᠨ ᠢ᠋ ᠨᠢ ᠵᠠᠩᠷᠠᠢᠰᠠᠭ ᠠᠮᠢ ᠣᠷᠣᠭᠤᠯᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠪᠣᠳᠣᠭᠳᠠᠯᠠ᠃ ᠭᠡᠪᠡᠴᠦ ᠳᠠᠬᠢᠨ ᠰᠤᠨᠤᠨ ᠤᠨᠠᠪᠠ᠃ ᠲᠡᠭᠡᠭᠡᠳ ᠥᠨᠳᠡᠢᠬᠦ ᠳ᠋ᠦ᠍ ᠡᠨᠡ ᠵᠠᠩᠷᠠᠢᠰᠠᠭ ᠨᠡᠢᠲᠡ ᠶ᠋ᠢᠨ ᠲᠥᠯᠥᠭᠡ ᠪᠢᠰᠢ᠂ ᠵᠥᠪᠬᠡᠨ ᠪᠣᠭᠳᠠ ᠶ᠋ᠢᠨ ᠨᠢᠳᠦ ᠶ᠋ᠢ ᠡᠪᠡᠳᠴᠢᠯᠡᠪᠡ ᠭᠡᠵᠦ ᠪᠦᠲᠦᠭᠡᠭᠰᠡᠨ ᠪᠢᠰᠢ ᠪᠢᠯᠡ ᠤᠤ? ᠭᠡᠯᠡ ᠴᠦ᠍ ᠨᠢᠳᠦ ᠨᠢ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ ᠰᠣᠬᠣᠷ ᠯᠠ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠦ ᠳᠡ ᠭᠡᠵᠦ ᠪᠤᠳᠤᠭᠳᠠᠨ᠂ ᠰᠦᠰᠦᠭᠯᠡᠨ ᠪᠢᠰᠢᠷᠡᠬᠦ ᠶᠠᠪᠤᠳᠠᠯ ᠣᠷᠣ ᠲᠠᠰᠤ ᠵᠠᠮᠬᠠᠷᠠᠨ ᠠᠷᠢᠯᠤᠯᠠ᠃
ᠰᠥᠨᠢ ᠳᠤᠮᠳᠠ ᠠ᠋ᠴᠠ ᠲᠡᠷᠡ ᠬᠣᠢᠨᠠ ᠪᠠᠯᠳᠠᠨᠴᠡᠷᠢᠩ ᠬᠠᠰᠢᠶᠠᠨ ᠳ᠋ᠠᠭᠠᠨ ᠢᠷᠡᠪᠡ᠃ ᠤᠭ ᠭᠡᠷ ᠲᠡᠭᠡᠨ ᠢᠷᠡᠬᠦ ᠶ᠋ᠢ ᠶᠡᠷᠦ ᠪᠣᠳᠣᠭᠠ ᠦᠭᠡᠢ ᠪᠢᠯᠡ᠃ ᠵᠥᠪᠬᠡᠨ ᠬᠣᠶᠠᠷ ᠬᠥᠯ ᠭᠡᠷ ᠣᠷᠣᠨ ᠢ᠋ ᠨᠢ ᠪᠠᠷᠠᠭᠳᠠᠭᠤᠯᠤᠭᠰᠠᠨ ᠠᠵᠢ᠃ ᠰᠥᠨᠢ ᠲᠤᠷᠰᠢ ᠳᠡᠮᠡᠢ ᠲᠡᠨᠦᠭᠰᠡᠨ ᠳ᠋ᠡᠭᠡᠨ ᠶᠠᠳᠠᠷᠠᠭᠰᠠᠨ ᠨᠢ ᠦᠨᠡᠬᠡᠷ ᠶᠡᠬᠡ᠂ ᠪᠠᠷᠤᠭ ᠡᠴᠦᠰ ᠦ᠋ᠨ ᠢ᠋ᠶ᠋ᠡᠨ ᠴᠢᠳᠠᠯ ᠢ᠋ᠶ᠋ᠠᠷ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠭᠦᠳᠡ ᠶ᠋ᠢ ᠲᠡᠳᠡᠨ ᠣᠷᠣᠯᠠ᠃ ᠱᠠᠪᠢ ᠨᠢ ᠣᠷᠣᠨ ᠠ᠋ᠴᠠ ᠪᠠᠨ ᠥᠨᠳᠡᠢᠨ ᠴᠦᠢᠳᠡᠩ ᠵᠢᠷᠤᠨ ᠯᠠ ᠠᠰᠠᠭᠠᠪᠠ᠃ ᠪᠠᠯᠳ᠋ᠠᠨᠴᠡᠷᠢᠩ ᠡᠭᠡᠭᠡ ᠯᠡ ᠰᠣᠭᠲᠣᠭᠤ ᠬᠥᠮᠦᠨ ᠰᠢᠭ ᠭᠤᠢᠪᠢᠯᠠᠨ ᠣᠷᠣᠨ ᠤ᠋ ᠪᠠᠨ ᠡᠮᠦᠨᠡ ᠣᠴᠢᠪᠠ᠃ ᠭᠡᠲᠡᠯᠡ ᠳᠡᠷᠡᠨ ᠳᠡᠭᠡᠷᠡ ᠪᠡᠨ ᠪᠥᠰᠡᠨ ᠳ᠋ᠦ᠍ ᠬᠠᠪᠴᠢᠭᠤᠯᠤᠭᠳᠠᠵᠤ ᠨᠤᠭᠤᠯᠤᠭᠠᠰᠤ ᠪᠠᠷ ᠨᠢ ᠨᠤᠭᠤᠯᠤᠨ ᠲᠠᠯᠪᠢᠭᠰᠠᠨ ᠲᠡᠯᠢᠩ ᠪᠠ ᠬᠠᠳᠬᠤᠮᠠᠯ ᠪᠤᠭᠤ ᠰᠤᠭᠤ᠂ ᠦᠰᠦᠭ ᠰᠡᠯᠲᠡ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠬᠤ ᠠᠵᠢ᠃ ᠡᠨᠡ ᠳᠠᠷᠤᠢ ᠪᠠᠯᠳᠠᠨᠴᠡᠷᠢᠩ ᠣᠷᠣ ᠪᠠᠨ ᠲᠠᠩᠨᠠᠨ ᠤᠨᠠᠪᠠ᠃ ᠢᠩᠭᠢᠬᠦ ᠪᠡᠷ ᠱᠠᠪᠢ ᠨᠢ ᠪᠠᠭᠰᠢ ᠪᠠᠨ ᠰᠣᠭᠲᠣᠭᠤ ᠢᠷᠡᠪᠡ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠭᠰᠠᠨ ᠦᠭᠡᠢ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ᠂ ᠪᠣᠰᠤᠨ ᠬᠠᠷᠠᠢᠵᠤ ᠳᠡᠪᠡᠯ ᠭᠤᠲᠤᠯ ᠢ᠋ ᠨᠢ ᠲᠠᠢᠯᠤᠨ ᠣᠷᠣ ᠳᠡᠭᠡᠷᠡ ᠨᠢ ᠭᠠᠷᠭᠠᠨ ᠬᠡᠪᠲᠡᠭᠦᠯᠪᠡ᠃ ᠲᠡᠷᠡ ᠵᠠᠭᠤᠷᠠ᠄
— ᠪᠠᠭᠰᠢ ᠮᠢᠨᠢ᠂ ᠲᠠᠨ ᠤ᠋ ᠨᠢᠭᠤᠷ᠂ ᠨᠢᠳᠦ ᠵᠢᠭᠲᠡᠢᠬᠡᠨ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠦᠭᠡᠢ ᠲᠠ ᠬᠠᠮᠢᠭᠠ ᠣᠢᠴᠢᠪᠠ? ᠬᠡᠨ ᠲᠠᠨ ᠢ᠋ ᠪᠣᠯᠭᠠᠵᠤ ᠣᠷᠬᠢᠪᠠ ᠭᠡᠬᠦ ᠮᠡᠲᠦ ᠶᠠᠭᠤᠮᠠ ᠶ᠋ᠢ ᠠᠰᠠᠭᠤᠵᠤ ᠪᠠᠢᠯᠠ᠃ ᠡᠭᠦᠨ ᠢ᠋ ᠨᠢ ᠪᠠᠯᠳᠠᠨᠴᠡᠷᠢᠩ ᠳᠠᠮ ᠲᠣᠮ ᠣᠢᠯᠠᠭᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠨᠢᠭᠤᠷ ᠢ᠋ᠶ᠋ᠠᠨ ᠪᠤᠷᠤᠭᠤᠯᠠᠨ ᠨᠢᠳᠦ ᠪᠡᠨ ᠠᠨᠢᠬᠤ ᠶ᠋ᠢ ᠯᠡ ᠴᠢᠬᠤᠯᠠᠴᠢᠯᠠᠪᠠ᠃