ᠪᠥᠬᠡ ᠪᠤᠭᠤᠷᠤᠯ ᠤ᠋ᠨ ᠳᠣᠮᠣᠭBökh Buuralyn domog Бөх Бууралын домог
1636ᠪᠥᠬᠡ ᠪᠤᠭᠤᠷᠤᠯ ᠤ᠋ᠨ ᠳᠣᠮᠣᠭ
ᠨᠤᠲᠤᠭ ᠤᠰᠤᠨ ᠤ᠋ ᠬᠢᠨ ᠳ᠋ᠦ᠍᠂ ᠪᠥᠬᠡ ᠪᠤᠭᠤᠷᠤᠯ ᠬᠡᠮᠡᠭᠴᠢ ᠡᠳᠦᠭᠡ ᠪᠣᠯᠲᠠᠯᠠ ᠳᠣᠮᠣᠭ ᠬᠡᠯᠡ ᠶᠠᠷᠢᠭᠳᠠᠨ ᠪᠠᠢᠭᠠ ᠭᠠᠢᠬᠠᠮᠰᠢᠭᠲᠤ ᠴᠢᠳᠠᠯ ᠲᠠᠢ ᠡᠨᠡ ᠡᠷᠡ ᠳᠣᠯᠣᠭᠠᠨ ᠬᠣᠰᠢᠭᠤ ᠳᠠᠮᠵᠢᠭᠳᠠᠨ ᠡᠰᠡᠪᠡᠯ ᠠᠷᠪᠠᠨ ᠵᠠᠰᠠᠭ ᠤ᠋ᠨ ᠨᠠᠭᠠᠳᠤᠮ ᠳ᠋ᠤ᠌ ᠪᠠᠷᠢᠯᠳᠤᠨ ᠬᠠᠯᠬᠠ ᠮᠣᠩᠭᠣᠯ ᠳᠠᠶᠠᠭᠠᠷ ᠲᠤ᠌ ᠨᠡᠷᠡ ᠳ᠋ᠦ᠍ ᠭᠠᠷᠴᠤ ᠶᠠᠪᠤᠭᠰᠠᠨ ᠦᠭᠡᠢ ᠴᠦ᠍᠂ ᠨᠤᠲᠤᠭ ᠲᠠᠭᠠᠨ ᠨᠡᠷᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠰᠠᠢᠨ ᠪᠥᠬᠡ ᠪᠠᠢᠭᠰᠠᠨ ᠠᠵᠢ᠃
ᠪᠤᠭᠤᠷᠤᠯ ᠤ᠋ᠨ ᠤᠤᠭᠠᠯ ᠨᠤᠲᠤᠭ ᠤᠬᠢᠶᠠᠭᠰᠠᠨ ᠤᠰᠤ ᠵᠡᠭᠦᠨ ᠠᠮᠪᠠᠨ ᠤ᠋ ᠬᠣᠰᠢᠭᠤ᠂ ᠲᠡᠭᠦᠨ ᠢ᠋ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠨᠢ ᠡᠵᠢ ᠬᠦᠦ ᠬᠣᠶᠠᠷ ᠠᠢᠯ ᠤ᠋ᠳ ᠤ᠋ᠨ ᠵᠠᠬᠠ ᠪᠠᠷᠠᠭᠠᠳᠠᠨ ᠭᠠᠭᠴᠠ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠪᠦᠯᠵᠢᠵᠦ ᠪᠠᠢᠵᠠᠢ᠃ ᠬᠣᠭᠣᠯᠠ ᠬᠦᠨᠡᠰᠦ ᠬᠣᠮᠰᠠ ᠶᠠᠳᠠᠷᠠᠬᠤ ᠶ᠋ᠢᠨ ᠤᠴᠢᠷ ᠪᠤᠭᠤᠷᠤᠯ ᠬᠦᠦ ᠨᠤᠲᠤᠭ ᠤ᠋ᠨ ᠨᠢᠭᠡᠨ ᠪᠠᠶᠠᠨ ᠤ᠋ ᠬᠣᠲᠠᠨ ᠠ᠋ᠴᠠ ᠦᠦᠷ ᠰᠥᠨᠢ ᠶ᠋ᠢᠨ ᠵᠠᠭᠠᠭ ᠢ᠋ᠶ᠋ᠠᠷ ᠰᠤᠪᠠᠢ ᠦᠨᠢᠶᠡ ᠪᠠᠷᠢᠵᠤ᠂ ᠳᠥᠷᠪᠡᠨ ᠬᠥᠯ ᠢ᠋ ᠨᠢ ᠪᠣᠭᠣᠭᠠᠳ ᠡᠭᠦᠷᠴᠦ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠬᠣᠭᠣᠯᠠ ᠲᠠᠢ ᠪᠣᠯᠵᠠᠢ᠃ ᠥᠷᠯᠥᠭᠡ ᠨᠢ ᠦᠬᠡᠷ ᠡᠴᠡ ᠪᠡᠨ ᠨᠢᠭᠡ ᠨᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠮᠡᠳᠡᠭᠰᠡᠨ ᠬᠥᠮᠦᠰ ᠮᠥᠷ ᠮᠥᠰᠬᠢᠭᠰᠡᠨ ᠪᠣᠯᠪᠠᠴᠤ ᠭᠠᠭᠴᠠ ᠶᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠮᠥᠷ ᠬᠣᠲᠠᠨ ᠤ᠋ ᠵᠠᠬᠠ ᠠ᠋ᠴᠠ ᠭᠠᠷᠴᠤ ᠠᠯᠠᠭᠠ ᠪᠣᠯᠵᠤ᠂ ᠦᠬᠡᠷ ᠲᠣᠭᠣᠭᠰᠠᠨ ᠶᠠᠮᠠᠷ ᠴᠤ᠌ ᠤᠯᠠ ᠮᠥᠷ ᠦᠯᠡᠳᠡᠭᠰᠡᠨ ᠦᠭᠡᠢ ᠠᠵᠢ᠃ ᠬᠣᠯᠠ ᠣᠢᠷᠠ ᠠ᠋ᠴᠠ ᠰᠤᠷᠠᠭ ᠯᠠᠪᠯᠠᠭᠰᠠᠨ ᠪᠣᠯᠪᠠᠴᠤ ᠶᠠᠭᠤ ᠴᠤ᠌ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠭᠠᠢᠬᠠᠰᠢ ᠠᠮᠠᠷᠠᠴᠢᠬᠠᠵᠠᠢ᠃ ᠵᠤᠨ ᠨᠢ ᠪᠠᠶᠠᠨ ᠡᠷᠡ᠂ ᠪᠤᠭᠤᠷᠤᠯ ᠤ᠋ᠨ ᠡᠪᠦᠯᠵᠢᠭᠰᠡᠨ ᠭᠠᠵᠠᠷ ᠤ᠋ᠨ ᠬᠠᠪᠢ ᠠ᠋ᠴᠠ ᠠᠯᠳᠠᠭᠰᠠᠨ ᠦᠬᠡᠷ ᠦ᠋ᠨ ᠬᠡᠨ ᠲᠣᠯᠣᠭᠠᠢ᠂ ᠠᠷᠠᠰᠤ᠂ ᠶᠠᠰᠤ ᠶ᠋ᠢ ᠣᠯᠵᠤ ᠦᠵᠡᠭᠡᠳ ᠡᠵᠢ ᠳ᠋ᠦ᠍ ᠨᠢ᠂
— ᠮᠢᠨᠦ ᠦᠬᠡᠷ ᠢ᠋ ᠲᠠᠨᠠᠷ ᠬᠤᠯᠠᠭᠠᠢᠯᠠᠨ ᠠᠪᠴᠠᠢ᠃ ᠶᠠᠮᠠᠷ ᠵᠠᠮ ᠢ᠋ᠶ᠋ᠠᠷ ᠬᠡᠨ ᠲᠠᠨᠠᠷ ᠲᠤ᠌ ᠠᠪᠴᠢᠷᠠᠵᠤ ᠥᠭᠪᠡ? ᠭᠡᠵᠦ ᠠᠰᠠᠭᠤᠵᠠᠢ᠃ ᠪᠤᠭᠤᠷᠤᠯ ᠤ᠋ᠨ ᠡᠬᠡ᠂
— ᠬᠦᠦ ᠪᠢᠳᠡ ᠬᠣᠶᠠᠷ ᠥᠯᠪᠡᠷᠵᠦ ᠦᠬᠦᠬᠦ ᠶ᠋ᠢᠨ ᠲᠤᠯᠠᠳᠠ᠂ ᠦᠬᠡᠷ ᠢ᠋ ᠴᠢᠨᠢ ᠡᠭᠦᠷᠴᠦ ᠢᠷᠡᠭᠰᠡᠨ ᠶᠤᠮ᠃ ᠣᠳᠣ ᠲᠥᠯᠥᠵᠦ ᠥᠭᠬᠦ ᠬᠥᠷᠥᠩᠭᠡ ᠠᠯᠠᠭᠠ᠂ ᠶᠠᠭᠠᠬᠢᠳᠠᠭ ᠪᠢᠯᠡ ᠭᠡᠵᠦ ᠰᠠᠨᠳᠤᠷᠴᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠪᠠᠶᠠᠨ᠂
— ᠵᠠ ᠲᠡᠭᠡᠪᠡᠯ ᠲᠠᠨ ᠤ᠋ ᠬᠣᠶᠠᠷ ᠮᠠᠨ ᠤ᠋ ᠭᠠᠳᠠᠨᠠ ᠪᠠᠭᠤ! ᠮᠠᠨ ᠤ᠋ ᠠᠵᠢᠯ ᠳ᠋ᠤ᠌ ᠬᠠᠮᠵᠢᠯᠴᠠᠵᠤ ᠲᠤᠰᠠᠯᠠᠯᠴᠠᠨ ᠶᠠᠪᠤ! ᠭᠡᠬᠦ ᠳ᠋ᠦ᠍ ᠲᠡᠳᠡ ᠵᠥᠪᠰᠢᠶᠡᠷᠡᠵᠡᠢ᠃
ᠲᠡᠢᠨᠬᠦ ᠪᠠᠶᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠨᠡᠭᠦᠨ ᠣᠴᠢᠵᠤ᠂ ᠭᠡᠷ ᠮᠠᠯ ᠤ᠋ᠨ ᠠᠵᠢᠯ ᠳ᠋ᠤ᠌ ᠨᠢ ᠲᠤᠰᠠᠯᠠᠯᠴᠠᠵᠤ᠂ ᠭᠤᠷᠪᠠᠨ ᠵᠢᠯ ᠥᠩᠭᠡᠷᠡᠵᠦ᠂ ᠪᠤᠭᠤᠷᠤᠯ ᠬᠦᠦ ᠴᠦ᠍ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤ ᠬᠦᠷᠪᠡ᠃ ᠵᠡᠭᠦᠨ ᠠᠮᠪᠠᠨ ᠤ᠋ ᠬᠣᠰᠢᠭᠤ ᠨᠣᠶᠠᠨ᠂ ᠵᠤᠨ ᠤ᠋ ᠡᠬᠢ ᠪᠡᠷ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠠᠯᠠᠭᠤᠰ ᠢ᠋ ᠤᠷᠢᠵᠤ ᠦᠷᠢᠶᠡ ᠳᠠᠭᠠ ᠪᠠᠨ ᠵᠠᠰᠠᠵᠤ ᠬᠥᠩᠭᠡᠯᠡᠬᠦ ᠵᠠᠷ ᠲᠠᠷᠬᠠᠵᠠᠢ᠃ ᠪᠠᠶᠠᠨ ᠡᠨᠡ ᠠᠵᠢᠯ ᠳ᠋ᠤ᠌ ᠣᠴᠢᠬᠤ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠪᠤᠭᠤᠷᠤᠯ ᠢ᠋ ᠳᠠᠭᠠᠭᠤᠯᠤᠨ ᠬᠦᠴᠦ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠬᠤ ᠬᠦᠰᠡᠯ ᠲᠥᠷᠥᠵᠡᠢ᠃ ᠲᠡᠳᠡᠨ ᠢ᠋ ᠣᠴᠢᠬᠤ ᠳ᠋ᠤ᠌ ᠵᠠᠯᠠᠭᠤᠰ ᠴᠤᠭᠯᠠᠷᠠᠵᠤ᠂ ᠰᠣᠷᠣᠨ ᠪᠤᠭᠤᠢᠯᠢ ᠪᠠᠷᠢᠨ ᠠᠷᠳᠠᠭ ᠳᠣᠭᠰᠢᠨ ᠮᠣᠷᠢᠳ ᠲᠠᠢ ᠨᠣᠴᠣᠯᠳᠤᠵᠤ ᠪᠠᠢᠬᠤ ᠪᠠᠢᠵᠠᠢ᠃ ᠪᠤᠭᠤᠷᠤᠯ ᠬᠦᠦ ᠳ᠋ᠦ᠍ ᠪᠤᠭᠤᠢᠯᠢ ᠪᠠᠢᠭᠰᠠᠨ ᠦᠭᠡᠢ᠂ ᠰᠢᠭᠤᠳ ᠯᠠ ᠡᠷᠡ ᠰᠢᠬᠠᠭᠰᠠᠨ ᠠᠳᠤᠭᠤᠨ ᠳᠤᠮᠳᠠ ᠣᠷᠣᠵᠤ᠂ ᠡᠮᠨᠢᠭ ᠦᠷᠢᠶᠡ ᠨᠤᠭᠦᠳ ᠢ᠋ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠴᠢᠬᠢᠳᠡᠨ᠂ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠰᠤᠭᠤᠳᠠᠨ ᠠᠪᠴᠢᠷᠠᠨ ᠲᠡᠪᠡᠷᠢᠵᠦ ᠰᠠᠭᠤᠭᠠᠳ ᠬᠦᠯᠢᠵᠦ ᠡᠬᠢᠯᠡᠬᠦ ᠳ᠋ᠦ᠍᠂ ᠣᠯᠠᠨ ᠪᠦᠭᠦᠳᠡ ᠭᠠᠢᠬᠠᠨ ᠱᠠᠭᠰᠢᠷᠠᠴᠢᠬᠠᠵᠠᠢ᠃ ᠵᠠᠯᠠᠭᠤ ᠬᠦᠦ ᠶ᠋ᠢᠨ ᠬᠦᠴᠦ ᠴᠢᠳᠠᠯ ᠢ᠋ ᠨᠡᠪᠲᠡ ᠦᠵᠡᠵᠦ ᠮᠠᠭᠲᠠᠭᠰᠠᠨ ᠬᠣᠰᠢᠭᠤ ᠨᠣᠶᠠᠨ᠂ ᠬᠠᠮᠢᠭᠠ ᠠ᠋ᠴᠠ ᠢᠷᠡᠭᠰᠡᠨ ᠬᠡᠨ ᠦ᠌ ᠬᠦᠦ ᠪᠣᠯᠬᠤ ᠶ᠋ᠢ ᠠᠰᠠᠭᠤᠵᠤ ᠮᠡᠳᠡᠭᠡᠳ᠂ ᠪᠠᠶᠠᠨ ᠢ᠋ ᠳᠠᠭᠤᠳᠠᠨ ᠨᠤᠲᠤᠭ ᠬᠤᠰᠢᠭᠤᠨ ᠠ᠋ᠴᠠ ᠲᠥᠷᠥᠵᠦ ᠭᠠᠷᠤᠭᠰᠠᠨ ᠡᠢᠮᠦ ᠰᠠᠢᠬᠠᠨ ᠴᠢᠳᠠᠯ ᠲᠠᠢ ᠬᠦᠦ ᠶ᠋ᠢ ᠬᠡᠯᠡᠯᠡ ᠦᠭᠡᠢ ᠨᠢᠭᠤᠪᠠ ᠭᠡᠮᠡᠨ ᠵᠢᠮᠡᠯᠡᠵᠦ᠂ ᠥᠪᠡᠷ ᠦ᠋ᠨ ᠠᠯᠪᠠᠲᠤ ᠪᠣᠯᠭᠠᠨ ᠳᠡᠷᠭᠡᠳᠡ ᠪᠡᠨ ᠠᠪᠤᠨᠠ ᠭᠡᠵᠡᠢ᠃ ᠪᠥᠬᠡ ᠳ᠋ᠦ᠍ ᠳᠤᠷᠠᠲᠠᠢ ᠰᠠᠢᠬᠠᠨ ᠰᠡᠳᠬᠢᠯᠲᠦ ᠡᠪᠦᠭᠡᠨ ᠨᠣᠶᠠᠨ ᠪᠤᠭᠤᠷᠤᠯ ᠳ᠋ᠤ᠌ ᠨᠤᠲᠤᠭ ᠤ᠋ᠨ ᠪᠥᠬᠡᠴᠦᠳ ᠢ᠋ᠶ᠋ᠡᠷ ᠮᠡᠬᠡ ᠵᠢᠭᠠᠯᠭᠠᠵᠤ ᠪᠠᠷᠢᠯᠳᠤᠬᠤ ᠤᠬᠠᠭᠠᠨ ᠰᠤᠷᠭᠠᠵᠤ᠂ ᠡᠵᠢ ᠶ᠋ᠢ ᠨᠢ ᠰᠠᠢᠨ ᠪᠥᠬᠡ ᠪᠣᠯᠬᠤ ᠬᠦᠦ ᠲᠥᠷᠥᠭᠦᠯᠪᠡ ᠭᠡᠵᠦ ᠰᠠᠢᠨ ᠢ᠋ᠶ᠋ᠠᠷ ᠠᠰᠠᠷᠠᠵᠠᠢ᠃
ᠳᠠᠷᠠᠭᠠ ᠵᠢᠯ ᠡᠴᠡ ᠨᠢ ᠡᠬᠢᠯᠡᠨ ᠪᠤᠭᠤᠷᠤᠯ ᠬᠦᠦ ᠶ᠋ᠢ ᠳᠠᠭᠠᠭᠤᠯᠤᠨ᠂ ᠣᠢᠷᠠ ᠬᠣᠯᠠ ᠶ᠋ᠢᠨ ᠨᠠᠭᠠᠳᠤᠮ ᠤ᠋ᠳ ᠲᠤ᠌ ᠪᠠᠷᠢᠯᠳᠤᠭᠤᠯᠵᠠᠢ᠃ ᠪᠤᠭᠤᠷᠤᠯ ᠬᠦᠦ ᠴᠦ᠍ ᠡᠪᠦᠭᠡᠨ ᠨᠣᠶᠠᠨ ᠤ᠋ ᠪᠠᠨ ᠢᠲᠡᠭᠡᠯ ᠢ᠋ ᠠᠯᠳᠠᠭᠰᠠᠨ ᠦᠭᠡᠢ ᠰᠠᠢᠨ ᠪᠥᠬᠡ ᠪᠣᠯᠤᠨ《 ᠪᠥᠬᠡ ᠪᠤᠭᠤᠷᠤᠯ》 ᠭᠡᠮᠡᠨ ᠠᠯᠳᠠᠷᠰᠢᠵᠤ᠂ ᠣᠯᠠᠨ ᠵᠢᠯ ᠨᠠᠭᠠᠳᠤᠮ ᠤ᠋ᠨ ᠲᠦᠷᠦᠭᠦᠦ ᠠᠪᠴᠤ ᠵᠦᠩ ᠣᠯᠠᠨ ᠢ᠋ᠶ᠋ᠠᠨ ᠪᠠᠶᠠᠷᠯᠠᠭᠤᠯᠵᠠᠢ᠃ ᠲᠡᠭᠦᠨ ᠦ᠌ ᠲᠤᠬᠠᠢ ᠳᠣᠮᠣᠭ ᠶᠠᠷᠢᠶᠠ ᠣᠢᠷᠠ ᠬᠠᠪᠢ ᠶ᠋ᠢᠨ ᠬᠣᠰᠢᠭᠤ ᠨᠤᠭᠤᠳ ᠲᠤ᠌ ᠲᠦᠭᠡᠭᠡᠨ ᠳᠡᠯᠭᠡᠷᠡᠵᠦ ᠪᠠᠢᠵᠤ᠂
— ᠡᠢᠮᠦ ᠰᠠᠢᠨ ᠪᠥᠬᠡ ᠪᠣᠯᠬᠤ ᠬᠦᠦ ᠪᠠᠭᠠ ᠳ᠋ᠤ᠌ ᠪᠠᠨ ᠶᠠᠮᠠᠷ ᠬᠡᠦᠬᠡᠳ ᠪᠠᠢᠪᠠ? ᠭᠡᠵᠦ ᠡᠵᠢ ᠡᠴᠡ ᠪᠡᠨ ᠠᠰᠠᠭᠤᠬᠤ ᠳ᠋ᠤ᠌᠂
— ᠪᠢ ᠶᠠᠭᠤ ᠮᠡᠳᠡᠬᠦ ᠪᠣᠢ? ᠭᠠᠭᠴᠠ ᠪᠡᠶᠡ ᠠᠮᠢᠳᠤᠷᠠᠳᠠᠭ ᠶᠠᠳᠠᠭᠤ ᠤᠴᠢᠷ ᠠᠢᠯ ᠠᠮᠢᠲᠠᠨ ᠳ᠋ᠤ᠌ ᠵᠠᠷᠤᠴᠠᠯᠠᠭᠳᠠᠨ ᠨᠠᠰᠤ ᠪᠡᠶᠡ ᠳ᠋ᠦ᠍ ᠬᠦᠷᠦᠭᠰᠡᠨ᠃ ᠭᠤᠷᠪᠠᠨ ᠨᠠᠰᠤ ᠬᠦᠷᠬᠦ ᠳ᠋ᠦ᠍ ᠠᠷᠭᠠᠯ ᠲᠡᠭᠦᠬᠦ ᠪᠡᠷ ᠶᠠᠪᠤᠬᠤ ᠳ᠋ᠠᠭᠠᠨ ᠬᠦᠦ ᠪᠡᠨ ᠥᠯᠥᠭᠡᠢ ᠳ᠋ᠦ᠍ ᠨᠢ ᠣᠷᠬᠢᠳᠠᠭ ᠪᠠᠢᠯᠠ᠃ ᠠᠷᠭᠠᠯ ᠢ᠋ᠶ᠋ᠠᠨ ᠲᠡᠭᠦᠴᠢᠬᠡᠭᠡᠳ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ ᠬᠦᠦ ᠥᠯᠥᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠤᠶᠠᠭᠠ ᠶ᠋ᠢ ᠲᠠᠰᠤᠷᠠᠲᠠᠯᠠ᠂ ᠰᠤᠯᠠᠷᠠᠲᠠᠯᠠ ᠲᠡᠢᠴᠢᠭᠢᠨᠡᠭᠰᠡᠨ ᠪᠠᠢᠳᠠᠭ ᠪᠠᠢᠭᠰᠠᠨ ᠭᠡᠮᠡᠨ ᠶᠠᠷᠢᠭᠰᠠᠨ ᠭᠡᠳᠡᠭ᠃
ᠮᠣᠩᠭᠣᠯ ᠤᠷᠢᠶᠠᠩᠬᠠᠨ ᠠᠮᠠᠨ ᠵᠣᠬᠢᠶᠠᠯ
ᠡᠮᠬᠢᠳᠬᠡᠭᠰᠡᠨ ᠨᠢ ᠳ᠋ᠢ ᠺᠡ ᠲᠤᠤ
ᠤᠯᠠᠭᠠᠨᠪᠠᠭᠠᠲᠤᠷ
ᠬᠣᠶᠠᠷ ᠮᠢᠩᠭᠠ ᠠᠷᠪᠠᠨ ᠨᠢᠭᠡᠨ ᠣᠨ
ᠤᠩᠰᠢᠭᠰᠠᠨ ᠨᠢ ᠠ᠋᠂ ᠪᠠᠲᠤᠳᠣᠷᠵᠢ
ᠬᠣᠶᠠᠷ ᠮᠢᠩᠭᠠ ᠬᠣᠷᠢᠨ ᠲᠠᠪᠤᠨ ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠦᠰᠦᠭ ᠬᠠᠲᠠᠭᠴᠢ᠄ ᠠᠯᠲᠠᠨᠴᠢᠮᠡᠭ