ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ01 ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠣᠯᠪᠣᠭᠠ ᠦᠭᠡ ᠪᠠ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠬᠦ
97ᠮᠣᠩᠭᠣᠯ ᠬᠡᠯᠡᠨ ᠦ᠌ ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠦᠭᠡᠰ ᠢ᠋ ᠬᠣᠯᠪᠣᠬᠤ ᠲᠤᠬᠠᠢ ᠳᠦᠷᠢᠮ ᠪᠠ ᠥᠭᠦᠯᠡᠪᠦᠷᠢ ᠪᠦᠲᠦᠬᠦ ᠶ᠋ᠢᠨ ᠲᠤᠬᠠᠢ ᠶᠣᠰᠣ ᠶ᠋ᠢ ᠰᠤᠳᠤᠯᠬᠤ ᠨᠢᠭᠡ ᠰᠠᠯᠪᠤᠷᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ᠋ ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ ᠭᠡᠳᠡᠭ᠃ ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ ᠳ᠋ᠦ᠍ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠣᠯᠪᠣᠭᠠ ᠦᠭᠡ ᠪᠠ ᠥᠭᠦᠯᠡᠪᠦᠷᠢ ᠶ᠋ᠢᠨ ᠲᠤᠬᠠᠢ᠂ ᠥᠭᠦᠯᠡᠪᠦᠷᠢ ᠶ᠋ᠢᠨ ᠭᠡᠰᠢᠭᠦᠨ᠂ ᠥᠭᠦᠯᠡᠪᠦᠷᠢ ᠶ᠋ᠢᠨ ᠲᠥᠷᠥᠯ ᠵᠦᠢᠯ ᠦ᠋ᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢᠨ ᠲᠤᠬᠠᠢ ᠰᠤᠷᠤᠯᠴᠠᠨᠠ᠃
ᠨᠢᠭᠡ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠣᠯᠪᠣᠭᠠ ᠦᠭᠡ ᠪᠠ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠬᠦ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠣᠯᠪᠣᠭᠠ ᠦᠭᠡ ᠭᠡᠳᠡᠭ ᠨᠢ ᠬᠣᠶᠠᠷ ᠪᠤᠶᠤ ᠬᠣᠶᠠᠷ ᠠ᠋ᠴᠠ ᠳᠡᠭᠡᠭᠰᠢ ᠬᠡᠳᠦ ᠬᠡᠳᠦᠨ ᠪᠣᠳᠠᠲᠤ ᠦᠭᠡᠰ᠂ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠶᠠᠮᠠᠷ ᠨᠢᠭᠡᠨ ᠵᠢᠷᠤᠮ ᠢ᠋ᠶ᠋ᠠᠷ ᠬᠡᠯᠪᠡᠷᠢᠵᠢᠨ ᠬᠣᠯᠪᠣᠯᠳᠤᠭᠠᠳ ᠨᠢᠭᠡᠨ ᠲᠣᠭᠲᠠᠭᠰᠠᠨ ᠤᠳᠬᠠ ᠶ᠋ᠢ ᠢᠯᠡᠳᠬᠡᠬᠦ ᠪᠥᠭᠡᠳ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠭᠡᠰᠢᠭᠦᠨ ᠦ᠌ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠳᠡᠭ ᠬᠡᠯᠡᠨ ᠦ᠌ ᠨᠢᠭᠡᠴᠢ ᠪᠣᠯᠤᠨᠠ᠃
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠲᠡᠭᠦᠨ ᠦ᠌ ᠤᠳᠬᠠ ᠶ᠋ᠢᠨ ᠲᠠᠯᠠ ᠪᠠᠷ ᠠᠪᠴᠤ ᠦᠵᠡᠪᠡᠯ ᠬᠥᠮᠦᠨ ᠶᠠᠭᠤᠮᠠ᠂ ᠬᠡᠷᠡᠭ ᠪᠣᠳᠠᠰ᠂ ᠦᠢᠯᠡ ᠬᠥᠳᠡᠯᠭᠡᠭᠡᠨ᠂ ᠦᠵᠡᠭᠳᠡᠯ᠂ ᠰᠢᠨᠵᠢ ᠲᠡᠮᠳᠡᠭ᠂ ᠲᠣᠭᠠ ᠬᠡᠮᠵᠢᠶᠡ ᠵᠡᠷᠭᠡ ᠣᠯᠠᠨ ᠲᠠᠯᠠ ᠶ᠋ᠢᠨ ᠨᠡᠯᠢᠶᠡᠳ ᠨᠠᠷᠢᠨ ᠪᠤᠳᠤᠯᠢᠶᠠᠨ ᠲᠠᠢ ᠤᠬᠠᠭᠳᠠᠬᠤᠨ ᠢ᠋ ᠢᠯᠡᠳᠬᠡᠵᠦ ᠴᠢᠳᠠᠬᠤ ᠪᠥᠭᠡᠳ ᠬᠣᠭᠣᠷᠣᠨᠳᠣ ᠪᠠᠨ ᠤᠳᠬᠠ ᠶ᠋ᠢᠨ ᠲᠠᠯᠠ ᠪᠠᠷ ᠶᠠᠮᠠᠷ ᠨᠢᠭᠡᠨ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠲᠠᠢ ᠪᠠᠢᠵᠤ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠨᠢᠭᠡ ᠯᠡ ᠭᠡᠰᠢᠭᠦᠨ ᠦ᠌ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠷᠠᠳ ᠲᠦᠮᠡᠨ᠂ ᠡᠬᠡ ᠣᠷᠣᠨ᠂ ᠠᠵᠢᠯᠴᠢᠨ᠂ ᠲᠠᠷᠢᠶᠠᠴᠢᠨ᠂ ᠴᠡᠷᠢᠭ᠂ ᠪᠡᠭᠡᠵᠢᠩ᠂ ᠲᠢᠶᠠᠨᠵᠢᠨ᠂ ᠬᠥᠬᠡᠬᠣᠲᠠ; ᠨᠠᠷᠠᠨ ᠬᠤᠸᠠᠷ; ᠦᠬᠡᠷ ᠦ᠋ᠨ ᠨᠢᠳᠦ᠂ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ᠂ ᠰᠣᠨᠢᠨ ᠰᠡᠳᠬᠦᠯ᠂ ᠤᠯᠠᠭᠠᠨ ᠲᠤᠭ ᠰᠡᠳᠬᠦᠯ᠂ ᠠᠷᠠᠳ ᠤ᠋ᠨ ᠡᠳᠦᠷ ᠦ᠋ᠨ ᠰᠣᠨᠢᠨ᠂ ᠠᠵᠤ ᠠᠬᠤᠢ᠂ ᠬᠥᠳᠡᠭᠡ ᠲᠣᠰᠬᠣᠨ᠂ ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠ ᠭᠡᠬᠦ ᠮᠡᠲᠦ᠃
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠵᠦ ᠪᠠᠢᠭᠠ ᠦᠭᠡ ᠨᠣᠭᠦᠳ ᠦ᠋ᠨ ᠬᠣᠭᠣᠷᠣᠨᠳᠣ ᠪᠠᠨ ᠴᠥᠮ ᠶᠠᠮᠠᠷ ᠨᠢᠭᠡᠨ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠳᠠᠭ᠃ ᠲᠡᠳᠡᠭᠡᠷ ᠦ᠋ᠨ ᠬᠠᠷᠢᠴᠠᠭᠠ ᠶ᠋ᠢ ᠨᠠᠷᠢᠪᠴᠢᠯᠠᠨ ᠦᠵᠡᠪᠡᠯ᠂ ᠬᠡᠪᠰᠢᠮᠡᠯ ᠬᠣᠯᠪᠣᠭᠠ ᠦᠭᠡ ᠪᠠ ᠴᠢᠯᠥᠭᠡᠲᠦ ᠬᠣᠯᠪᠣᠭᠠ ᠦᠭᠡ ᠭᠡᠵᠦ ᠬᠣᠶᠠᠷ ᠶᠡᠬᠡ ᠬᠡᠰᠡᠭ ᠲᠦ᠍ ᠬᠤᠪᠢᠶᠠᠵᠤ ᠪᠣᠯᠬᠤ ᠪᠥᠭᠡᠳ ᠬᠡᠪᠰᠢᠮᠡᠯ ᠬᠣᠯᠪᠣᠭᠠ ᠦᠭᠡᠨ ᠳ᠋ᠦ᠍᠄ ᠵᠦᠢᠷ ᠦᠭᠡ᠂ ᠰᠡᠴᠡᠨ ᠦᠭᠡ᠂ ᠬᠠᠪᠤᠲᠤ ᠦᠭᠡ᠂ ᠲᠤᠰᠬᠠᠢ ᠨᠡᠷᠡ᠂ ᠥᠪᠡᠷᠮᠢᠴᠡ ᠦᠭᠡ᠂ ᠬᠣᠷᠰᠢᠶᠠ ᠦᠭᠡ ᠵᠡᠷᠭᠡ ᠪᠠᠭᠲᠠᠬᠤ ᠪᠠ ᠴᠢᠯᠥᠭᠡᠲᠦ ᠬᠣᠯᠪᠣᠭᠠ ᠦᠭᠡᠨ ᠳ᠋ᠦ᠍᠄ ᠵᠡᠷᠭᠡᠴᠡᠭᠰᠡᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ᠂ ᠵᠠᠬᠢᠷᠤᠭᠰᠠᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ᠂ ᠢᠵᠢᠯ ᠪᠠᠢᠷᠢ ᠶ᠋ᠢᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ ᠪᠠᠭᠲᠠᠬᠤ ᠪᠥᠭᠡᠳ ᠵᠠᠬᠢᠷᠤᠭᠰᠠᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡᠨ ᠳ᠋ᠦ᠍᠄ ᠥᠭᠦᠯᠡᠭᠳᠡᠬᠦᠨ ᠥᠭᠦᠯᠡᠬᠦᠨ ᠦ᠌ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ᠂ ᠲᠣᠳᠣᠳᠬᠠᠯ ᠲᠣᠳᠣᠳᠬᠠᠭᠤᠯᠤᠭᠴᠢ ᠶ᠋ᠢᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ᠂ ᠦᠢᠯᠡ ᠲᠤᠰᠤᠭᠳᠠᠬᠤᠨ ᠤ᠋ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ᠂ ᠪᠠᠢᠴᠠ ᠥᠭᠦᠯᠡᠬᠦᠨ ᠦ᠌ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ ᠭᠡᠵᠦ ᠬᠤᠪᠢᠶᠠᠨ ᠦᠵᠡᠵᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠭᠤᠯᠠ ᠮᠣᠷᠢ ᠶ᠋ᠢ ᠵᠣᠪᠠᠭᠠᠨᠠ᠂
ᠠᠭᠤᠷ ᠪᠡᠶᠡ ᠶ᠋ᠢ ᠵᠣᠪᠠᠭᠠᠨᠠ᠃
(ᠥᠪᠡᠷᠮᠢᠴᠡ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠡᠷᠡ ᠶ᠋ᠢ ᠪᠦᠦ ᠪᠠᠰᠤ᠂
ᠳᠠᠯᠠᠢ ᠶ᠋ᠢ ᠪᠦᠦ ᠶᠠᠨᠳᠠ᠃
(ᠥᠪᠡᠷᠮᠢᠴᠡ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠠᠢᠯ ᠠ᠋ᠴᠠ ᠡᠷᠢᠬᠦ ᠪᠡᠷ᠂
ᠠᠪᠳᠠᠷᠠ ᠠ᠋ᠴᠠ ᠪᠠᠨ ᠡᠷᠢ᠃
(ᠬᠠᠪᠤᠲᠤ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠨᠠᠮᠤᠷ ᠤ᠋ᠨ ᠰᠢᠷᠣᠢ᠂
ᠬᠠᠪᠤᠷ ᠠᠯᠲᠠ᠃
(ᠰᠡᠴᠡᠨ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠬᠥᠮᠦᠨ ᠬᠥᠮᠦᠨ ᠦ᠌ ᠬᠦᠴᠦᠨ ᠳ᠋ᠦ᠍᠂
ᠵᠢᠭᠠᠰᠤ ᠤᠰᠤᠨ ᠤ᠋ ᠬᠦᠴᠦᠨ ᠳ᠋ᠦ᠍᠃
(ᠰᠡᠴᠡᠨ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠦᠭᠡᠨ ᠳ᠋ᠦ᠍ ᠨᠤᠭᠤᠷᠠᠬᠤ ᠠ᠋ᠴᠠ ᠪᠢᠰᠢ᠂
ᠰᠦᠬᠡᠨ ᠳ᠋ᠦ᠍ ᠨᠤᠭᠤᠷᠠᠬᠤ ᠦᠭᠡᠢ᠃
(ᠬᠠᠪᠤᠲᠤ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠬᠤᠷᠠᠭᠠᠨ ᠤ᠋ ᠦᠰᠦ ᠭᠤᠤᠵᠢᠪᠠ᠂
ᠲᠥᠯᠥᠭᠡᠨ ᠦ᠌ ᠦᠰᠦ ᠲᠥᠯᠵᠢᠪᠡ᠃
(ᠵᠦᠢᠷ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
《ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ》 ᠰᠡᠳᠬᠦᠯ
(ᠲᠤᠰᠬᠠᠢ ᠨᠡᠷᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠰᠤᠷᠭᠠᠨ ᠬᠥᠮᠦᠵᠢᠯ᠂ ᠡᠷᠴᠢ ᠵᠣᠷᠢᠭ᠂ ᠡᠬᠢ ᠠᠳᠠᠭ᠂ ᠬᠠᠲᠠᠭᠤ ᠵᠥᠭᠡᠯᠡᠨ᠂ ᠴᠢᠩᠭᠠ ᠬᠥᠨᠳᠡᠢ᠂ ᠦᠵᠡᠯ ᠰᠠᠨᠠᠭᠠ᠂ ᠡᠷᠳᠡᠮ ᠮᠡᠳᠡᠯᠭᠡ᠂ ᠮᠠᠯᠠᠭᠠᠢ ᠵᠠᠯᠠᠭᠠᠢ᠃
(ᠬᠣᠷᠰᠢᠶᠠ ᠦᠭᠡ— ᠬᠡᠪᠰᠢᠮᠡᠯ ᠬᠣᠯᠪᠣᠭᠠ)
ᠶᠡᠬᠡ ᠵᠣᠣ᠂ ᠤᠯᠠᠭᠠᠨᠴᠠᠪ᠂ ᠰᠢᠯᠢ ᠶ᠋ᠢᠨ ᠭᠣᠣᠯ᠂ ᠪᠠᠶᠠᠨᠨᠠᠭᠤᠷ; ᠠᠵᠢᠯᠴᠢᠨ ᠪᠠ ᠲᠠᠷᠢᠶᠠᠴᠢᠨ; ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠪᠣᠯᠤᠨ ᠰᠤᠷᠭᠠᠨ ᠬᠥᠮᠦᠵᠢᠯ᠂
(ᠵᠡᠷᠭᠡᠴᠡᠭᠰᠡᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ— ᠴᠢᠯᠥᠭᠡᠲᠦ ᠬᠣᠯᠪᠣᠭᠠ)
ᠪᠢᠴᠢᠭ ᠤᠩᠰᠢᠬᠤ; ᠤᠯᠤᠰ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠬᠤ
(ᠦᠢᠯᠡ ᠲᠤᠰᠤᠭᠳᠠᠬᠤᠨ ᠤ᠋ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ— ᠴᠢᠯᠥᠭᠡᠲᠦ ᠬᠣᠯᠪᠣᠭᠠ)
ᠡᠷᠬᠢᠮ ᠳᠡᠭᠡᠳᠦ ᠬᠥᠮᠦᠨ
(ᠲᠣᠳᠣᠳᠬᠠᠯ ᠲᠣᠳᠣᠳᠬᠠᠭᠤᠯᠤᠭᠴᠢ ᠶ᠋ᠢᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ— ᠴᠢᠯᠥᠭᠡᠲᠦ ᠬᠣᠯᠪᠣᠭᠠ)
ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠪᠠᠷ ᠰᠤᠷᠤᠯᠴᠠᠬᠤ᠂ ᠰᠢᠷᠭᠠᠭᠤ ᠪᠠᠷ ᠣᠷᠣᠯᠳᠣᠬᠤ
(ᠪᠠᠢᠴᠠ ᠥᠭᠦᠯᠡᠬᠦᠨ ᠦ᠌ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ— ᠴᠢᠯᠥᠭᠡᠲᠦ ᠬᠣᠯᠪᠣᠭᠠ)
ᠠᠯᠵᠠᠭᠤ ᠨᠢ ᠮᠠᠭᠤ᠂ ᠠᠵᠢᠯᠯᠠᠳᠠᠭ ᠨᠢ ᠰᠠᠢᠨ᠃
(ᠥᠭᠦᠯᠡᠭᠳᠡᠬᠦᠨ ᠥᠭᠦᠯᠡᠬᠦᠨ ᠦ᠌ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ— ᠴᠢᠯᠥᠭᠡᠲᠦ ᠬᠣᠯᠪᠣᠭᠠ)
ᠬᠠᠮᠲᠤ ᠨᠥᠬᠥᠳ ᠲᠠ ᠨᠠᠷ; ᠲᠡᠷᠢᠭᠦᠨ ᠦ᠌ ᠠᠵᠢᠯᠲᠠᠨ ᠲᠡᠭᠦᠰᠪᠠᠶᠠᠷ᠃
(ᠢᠵᠢᠯ ᠪᠠᠢᠷᠢ ᠶ᠋ᠢᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ— ᠴᠢᠯᠥᠭᠡᠲᠦ ᠬᠣᠯᠪᠣᠭᠠ)
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠬᠦ ᠳ᠋ᠦ᠍ ᠣᠯᠠᠨ ᠵᠦᠢᠯ ᠦ᠋ᠨ ᠠᠷᠭᠠ ᠪᠠᠷᠢᠯ ᠪᠠᠢᠳᠠᠭ᠃ ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠᠬᠢ ᠦᠭᠡᠰ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠪᠠᠢᠭᠠ ᠲᠤᠯᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠭᠠ ᠪᠠᠷ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠵᠦ ᠪᠣᠯᠤᠨᠠ᠃ ᠡᠭᠦᠨ ᠳ᠋ᠦ᠍᠄
1. ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠶᠣᠰᠣᠭᠠᠷ ᠬᠡᠯᠪᠡᠷᠢᠵᠢᠭᠦᠯᠵᠦ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠶ᠋ᠢ ᠢᠯᠡᠷᠡᠭᠦᠯᠦᠨ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠨᠡ᠃ ᠢᠩᠭᠢᠬᠦ ᠳ᠋ᠡᠭᠡᠨ ᠵᠠᠬᠢᠷᠤᠭᠰᠠᠨ ᠦᠭᠡ ᠶ᠋ᠢᠨ ᠬᠢᠨᠢ ᠱᠠᠭᠠᠷᠳᠠᠯᠭᠠ ᠪᠠᠷ ᠵᠠᠬᠢᠷᠤᠭᠳᠠᠭᠰᠠᠨ ᠦᠭᠡ ᠶ᠋ᠢ ᠦᠭᠡ ᠬᠤᠪᠢᠯᠭᠠᠬᠤ ᠳᠠᠭᠠᠪᠤᠷᠢ ᠶ᠋ᠢᠨ ᠵᠦᠢᠯ ᠢ᠋ᠶ᠋ᠡᠷ ᠨᠠᠢᠷᠠᠭᠤᠯᠵᠤ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠶ᠋ᠢ ᠢᠯᠡᠷᠡᠭᠦᠯᠵᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠪᠠᠭᠰᠢ ᠠ᠋ᠴᠠ ᠰᠤᠷᠤᠯᠴᠠᠨᠠ᠂
ᠪᠠᠭᠰᠢ ᠮᠢᠨᠢ ᠢᠷᠡᠨᠡ᠂
ᠪᠠᠭᠰᠢ ᠴᠢᠨᠢ ᠢᠷᠡᠪᠡ ᠭᠡᠬᠦ ᠮᠡᠲᠦ᠃
2《ᠳᠠᠭᠠᠪᠤᠷᠢ ᠦᠭᠡ》 ᠦᠭᠡ ᠶ᠋ᠢᠨ ᠵᠦᠢᠯ ᠢ᠋ᠶ᠋ᠡᠷ ᠦᠭᠡ ᠶ᠋ᠢᠨ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠶ᠋ᠢ ᠢᠯᠡᠷᠡᠭᠦᠯᠦᠨ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠨᠡ᠃ ᠢᠩᠭᠢᠬᠦ ᠳ᠋ᠡᠭᠡᠨ ᠵᠠᠬᠢᠷᠤᠭᠰᠠᠨ ᠦᠭᠡ ᠶ᠋ᠢᠨ ᠬᠢᠨᠢ ᠱᠠᠭᠠᠷᠳᠠᠯᠭᠠ ᠪᠠᠷ ᠵᠠᠬᠢᠷᠤᠭᠳᠠᠭᠰᠠᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠵᠣᠬᠢᠬᠤ《ᠳᠠᠭᠠᠪᠤᠷᠢ ᠦᠭᠡ》 ᠶ᠋ᠢ ᠵᠠᠯᠭᠠᠵᠤ᠂ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠶ᠋ᠢ ᠲᠣᠳᠣᠳᠬᠠᠵᠤ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠭᠤᠯᠠ ᠥᠭᠡᠳᠡ ᠠᠪᠠᠷᠢᠪᠠ᠂
ᠠᠰᠠᠷ ᠤ᠋ᠨ ᠡᠮᠦᠨᠡ ᠵᠢᠭᠰᠠᠯᠠ᠂
ᠠᠷᠠᠳ ᠲᠦᠮᠡᠨ ᠦ᠌ ᠲᠥᠯᠥᠭᠡ ᠰᠤᠷᠤᠯᠴᠠᠨᠠ ᠭᠡᠬᠦ ᠮᠡᠲᠦ᠃
3《ᠬᠣᠯᠪᠣᠬᠤ ᠦᠭᠡ》 ᠶ᠋ᠢᠨ ᠵᠦᠢᠯ ᠪᠠ《ᠳᠠᠩ ᠴᠠᠭ》 ᠢ᠋ᠶ᠋ᠠᠷ ᠬᠣᠯᠪᠣᠵᠤ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠶ᠋ᠢ ᠢᠯᠡᠷᠡᠭᠦᠯᠦᠨ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠨᠡ᠃ ᠢᠩᠭᠢᠬᠦ ᠳ᠋ᠡᠭᠡᠨ ᠥᠭᠦᠯᠡᠭᠳᠡᠵᠦ ᠪᠠᠢᠭᠠ ᠦᠭᠡ ᠨᠦ᠍ᠭᠦᠳ ᠦ᠋ᠨ ᠬᠣᠭᠣᠷᠣᠨᠳᠣ《ᠬᠣᠯᠪᠣᠬᠤ ᠦᠭᠡ》 ᠪᠤᠶᠤ《ᠳᠠᠩ ᠴᠡᠭ》 ᠲᠠᠯᠪᠢᠵᠤ᠂ ᠵᠡᠷᠭᠡᠴᠡᠭᠰᠡᠨ ᠬᠠᠷᠢᠴᠠᠭᠠ ᠲᠠᠢ ᠬᠣᠯᠪᠣᠭᠠ ᠦᠭᠡ ᠪᠣᠯᠬᠤ ᠶ᠋ᠢ ᠵᠢᠭᠠᠳᠠᠭ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠬᠠᠷᠠᠨᠳᠠ ᠪᠠ ᠴᠠᠭᠠᠰᠤ᠂
ᠰᠣᠨᠣᠰᠤᠭᠰᠠᠨ ᠪᠥᠭᠡᠳ ᠰᠤᠷᠤᠭᠰᠠᠨ᠃
4 ᠦᠭᠦᠯᠡᠭᠳᠡᠵᠦ ᠪᠠᠢᠭᠠ ᠦᠭᠡ ᠨᠦ᠍ᠭᠦᠳ ᠦ᠋ᠨ ᠵᠠᠬᠢᠷᠤᠭᠳᠠᠭᠰᠠᠨ ᠦᠭᠡ ᠶ᠋ᠢᠨ ᠦᠨᠳᠦᠰᠦ ᠶ᠋ᠢ ᠶᠠᠮᠠᠷ ᠴᠦ᠍ ᠬᠤᠪᠢᠯᠤᠯ ᠦᠭᠡᠢ ᠪᠡᠷ ᠵᠠᠬᠢᠷᠤᠭᠰᠠᠨ ᠦᠭᠡᠨ ᠳ᠋ᠦ᠍ ᠰᠢᠭᠤᠳ ᠬᠠᠮᠵᠢᠭᠤᠯᠤᠨ ᠬᠣᠯᠪᠣᠵᠤ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠵᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠯᠲᠠᠨ ᠨᠠᠷᠠ᠂ ᠤᠯᠠᠭᠠᠨ ᠲᠤᠭ᠂ ᠬᠤᠷᠳᠤᠨ ᠬᠦᠯᠦᠭ᠂ ᠬᠤᠷᠴᠠ ᠦᠵᠦᠭ᠂ ᠲᠣᠭᠣᠰᠬᠠᠨ ᠪᠠᠢᠰᠢᠩ᠂ ᠰᠢᠯ ᠴᠣᠩᠬᠣ᠂ ᠥᠨᠳᠥᠷ ᠠᠭᠤᠯᠠ᠂ ᠥᠷᠭᠡᠨ ᠲᠠᠯᠠ ᠭᠡᠬᠦ ᠮᠡᠲᠦ᠃
5 ᠦᠭᠦᠯᠡᠭᠳᠡᠵᠦ ᠪᠠᠢᠭᠠ ᠦᠭᠡᠰ ᠢ᠋ ᠬᠣᠯᠪᠣᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠳᠡᠰ ᠳᠠᠷᠠᠭᠠ ᠮᠠᠰᠢ ᠴᠢᠬᠤᠯᠠ ᠪᠠᠢᠳᠠᠭ ᠶᠤᠮ᠃ ᠦᠭᠡᠰ ᠦ᠋ᠨ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠶ᠋ᠢ ᠢᠯᠡᠷᠡᠭᠦᠯᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠣᠷᠣᠨ ᠪᠠᠢᠷᠢ ᠳᠡᠰ ᠳᠠᠷᠠᠭᠠ ᠶ᠋ᠢ ᠲᠣᠬᠢᠷᠠᠭᠤᠯᠵᠤ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠪᠦᠲᠦᠭᠡᠵᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠴᠠᠰᠤ ᠮᠥᠰᠥ ᠪᠣᠯᠪᠠ᠂ ᠮᠥᠰᠥ ᠴᠠᠰᠤ ᠪᠣᠯᠪᠠ᠂ ᠲᠡᠷᠭᠡ ᠮᠣᠳᠣ ᠪᠠᠨ ᠬᠦᠯᠢᠪᠡ᠂ ᠮᠣᠳᠣᠨ ᠲᠡᠷᠭᠡ ᠪᠡᠨ ᠬᠦᠯᠢᠪᠡ᠂ ᠬᠠᠷᠠ ᠴᠠᠭᠠᠨ ᠪᠣᠯᠪᠠ᠂ ᠴᠠᠭᠠᠨ ᠬᠠᠷᠠ ᠪᠣᠯᠪᠠ ᠭᠡᠬᠦ ᠮᠡᠲᠦ᠃
6 ᠥᠭᠦᠯᠡᠭᠳᠡᠵᠦ ᠪᠠᠢᠭᠠ ᠦᠭᠡᠰ ᠦ᠋ᠨ ᠤᠳᠬᠠ ᠶ᠋ᠢᠨ ᠬᠣᠯᠪᠣᠭᠠ ᠶ᠋ᠢ ᠢᠯᠡᠷᠡᠭᠦᠯᠬᠦ ᠳ᠋ᠦ᠍ ᠬᠡᠯᠡᠬᠦ ᠠᠶᠠᠯᠭᠤ ᠶ᠋ᠢᠨ ᠵᠣᠬᠢᠴᠠᠯ ᠮᠠᠰᠢ ᠴᠢᠬᠤᠯᠠ ᠶᠤᠮ᠃ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠬᠡᠯᠡᠬᠦ ᠠᠶᠠᠯᠭᠤ ᠶ᠋ᠢ ᠵᠣᠬᠢᠴᠠᠭᠤᠯᠬᠤ ᠠᠷᠭᠠ ᠪᠠᠷ ᠬᠣᠯᠪᠣᠬᠤ ᠦᠭᠡ ᠶ᠋ᠢ ᠪᠦᠲᠦᠭᠡᠵᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠲᠡᠮᠦᠷ ᠬᠦᠷᠵᠡ ᠠᠪᠤᠪᠠ᠃
ᠴᠡᠷᠢᠭ ᠮᠠᠯᠠᠭᠠᠢ ᠪᠠᠨ ᠵᠡᠭᠦᠪᠡ ᠭᠡᠬᠦ ᠬᠣᠶᠠᠷ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠲᠡᠮᠦᠷ ᠢ᠋ᠶ᠋ᠡᠷ ᠬᠢᠭᠰᠡᠨ ᠬᠦᠷᠵᠡ ᠠᠪᠤᠭᠰᠠᠨ ᠪᠤᠶᠤ ᠲᠡᠮᠦᠷ ᠭᠡᠳᠡᠭ ᠨᠡᠷᠡ ᠲᠡᠢ ᠬᠥᠮᠦᠨ ᠬᠦᠷᠵᠡ ᠠᠪᠤᠭᠰᠠᠨ ᠶᠤᠮ ᠤᠤ? ᠴᠡᠷᠢᠭ ᠦ᠋ᠨ ᠮᠠᠯᠠᠭᠠᠢ ᠵᠡᠭᠦᠭᠰᠡᠨ ᠪᠤᠶᠤ ᠴᠡᠷᠢᠭ ᠬᠥᠮᠦᠨ ᠮᠠᠯᠠᠭᠠᠢ ᠪᠠᠨ ᠵᠡᠭᠦᠭᠰᠡᠨ ᠤᠤ? ᠭᠡᠳᠡᠭ ᠠᠰᠠᠭᠤᠳᠠᠯ ᠢ᠋ ᠰᠢᠢᠳᠪᠦᠷᠢᠯᠡᠬᠦ ᠳ᠋ᠦ᠍ ᠵᠠᠪᠠᠯ ᠬᠡᠯᠡᠬᠦ ᠠᠶᠠᠯᠭᠤ ᠶ᠋ᠢ ᠰᠠᠢᠨ ᠰᠣᠨᠣᠰᠬᠤ ᠬᠡᠷᠡᠭᠲᠡᠢ ᠪᠣᠯᠤᠨᠠ᠃
7 ᠥᠭᠦᠯᠡᠭᠳᠡᠵᠦ ᠪᠠᠢᠭᠠ ᠪᠡᠶᠡ ᠪᠡᠨ ᠳᠠᠭᠠᠭᠠᠭᠰᠠᠨ ᠭᠣᠣᠯ ᠦᠭᠡᠨ ᠳ᠋ᠦ᠍ ᠰᠤᠯᠠ ᠦᠭᠡ ᠶ᠋ᠢᠨ ᠵᠦᠢᠯ ᠢ᠋ ᠬᠣᠯᠪᠣᠵᠤ᠂ ᠰᠤᠯᠠ ᠦᠭᠡ ᠶ᠋ᠢᠨ ᠲᠤᠰ ᠪᠡᠶᠡ ᠶ᠋ᠢᠨ ᠤᠳᠬᠠ ᠣᠷᠣᠭᠤᠯᠤᠭᠰᠠᠨ ᠬᠣᠯᠪᠣᠭᠠ ᠦᠭᠡ ᠶ᠋ᠢ ᠡᠭᠦᠰᠬᠡᠵᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠮᠡᠳᠡᠪᠡ— ᠮᠡᠳᠡᠪᠡ ᠤᠤ? ᠣᠯᠤᠯᠠ— ᠡᠰᠡ ᠣᠯᠤᠯᠠ᠃ ᠰᠤᠷᠤᠭᠰᠠᠨ— ᠰᠤᠷᠤᠭᠰᠠᠨ ᠴᠤ᠌ ᠦᠭᠡᠢ᠂ ᠣᠴᠢ— ᠪᠢᠲᠡᠭᠡᠢ ᠣᠴᠢ ᠭᠡᠬᠦ ᠮᠡᠲᠦ᠃