ᠮᠣᠩᠭᠣᠯ ᠲᠡᠮᠡᠭᠡ-ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠣᠪᠴᠢ ᠲᠠᠨᠢᠯᠴᠠᠭᠤᠯᠭᠠ-ᠳᠣᠯᠣᠳ • ᠨᠠᠮᠵᠢᠯMongol temeeМонгол тэмээ-Таван хушуу малын товч танилчуулга
49
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠣᠪᠴᠢ ᠲᠠᠨᠢᠯᠴᠠᠭᠤᠯᠭᠠ
ᠳᠣᠯᠣᠳ• ᠨᠠᠮᠵᠢᠯ
ᠮᠣᠩᠭᠣᠯ ᠲᠡᠮᠡᠭᠡ᠂ ᠲᠡᠮᠡᠭᠡᠨ ᠦ᠌ ᠡᠭᠦᠯᠳᠡᠷ ᠦ᠋ᠨ ᠠᠩᠭᠢᠯᠠᠯ ᠳ᠋ᠤ᠌᠂ ᠣᠨᠣᠯᠭᠠ᠂ ᠠᠴᠢᠶᠠ᠂ ᠨᠣᠣᠰᠣ ᠨᠣᠯᠤᠤᠷ ᠵᠡᠷᠭᠡ ᠶᠡᠷᠦᠩᠬᠡᠢᠯᠡᠭᠰᠡᠨ ᠡᠳ᠋ᠯᠡᠯ ᠬᠡᠷᠡᠭᠴᠡᠭᠡᠲᠦ ᠬᠣᠣᠰ ᠪᠥᠬᠦᠲᠦ ᠡᠷᠲᠡᠨ ᠦ᠌ ᠡᠭᠦᠯᠳᠡᠷ ᠦ᠋ᠨ ᠬᠠᠷᠢᠶᠠᠨ ᠳ᠋ᠤ᠌ ᠬᠠᠷᠢᠶᠠᠯᠠᠭᠳᠠᠨᠠ᠃
ᠮᠣᠩᠭᠣᠯ ᠲᠡᠮᠡᠭᠡ ᠶ᠋ᠢ ᠮᠣᠩᠭᠣᠯᠴᠤᠳ᠂ᠠᠭᠤᠷ ᠠᠮᠢᠰᠬᠤᠯ ᠡᠷᠡᠰ ᠳᠡᠰ ᠬᠤᠪᠢᠷᠠᠯ ᠶᠡᠬᠡᠲᠡᠢ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠦ᠋ᠨ ᠣᠷᠴᠢᠨ ᠳ᠋ᠠᠬᠢ ᠪᠡᠷᠬᠡ ᠬᠠᠲᠠᠭᠤ ᠪᠠᠢᠭᠠᠯᠢ ᠶ᠋ᠢᠨ ᠨᠥᠬᠥᠴᠡᠯ ᠪᠠᠢᠳᠠᠯ ᠪᠣᠯᠤᠨ ᠭᠠᠩᠳᠠᠮᠠᠯ ᠬᠠᠭᠤᠷᠠᠢ᠂ ᠡᠪᠡᠰᠦ ᠤᠷᠭᠤᠮᠠᠯ ᠲᠠᠴᠢᠷ ᠨᠢᠮᠭᠡᠨ ᠴᠥᠯᠡᠷᠬᠡᠭ ᠭᠠᠵᠠᠷ ᠪᠤᠶᠤ ᠡᠯᠡᠰᠦ ᠮᠠᠩᠬᠠ ᠲᠠᠢ ᠡᠪᠡᠰᠦ ᠪᠡᠯᠴᠢᠭᠡᠷ ᠢ᠋ᠶ᠋ᠡᠷ ᠪᠠᠷᠤᠭᠲᠠᠢ ᠭᠠᠵᠠᠷ ᠨᠤᠲᠤᠭ ᠤ᠋ᠳ ᠲᠤ᠌ ᠵᠢᠯ ᠲᠤᠷᠰᠢ ᠶ᠋ᠢᠨ ᠪᠡᠯᠴᠢᠭᠡᠷ ᠦ᠋ᠨ ᠬᠠᠷᠢᠭᠤᠯᠭᠠ ᠮᠠᠯᠯᠠᠭᠠ ᠪᠠᠷ ᠤᠷᠲᠤ ᠤᠳᠠᠭᠠᠨ ᠬᠤᠭᠤᠴᠠᠭᠠᠨ ᠤ᠋ ᠪᠠᠢᠭᠠᠯᠢ ᠶ᠋ᠢᠨ ᠰᠢᠭᠰᠢᠯᠲᠡ ᠬᠢᠭᠡᠳ ᠰᠠᠨᠠᠭᠠᠴᠢᠯᠭᠠᠲᠣ ᠰᠢᠯᠢᠯᠲᠡ ᠪᠡᠷ ᠪᠣᠢᠵᠢᠭᠤᠯᠤᠭᠰᠠᠨ ᠣᠨᠣᠯᠭᠠ ᠪᠣᠯᠤᠨ ᠠᠴᠢᠶᠠ ᠵᠥᠭᠡᠭᠡᠪᠦᠷᠢ ᠳ᠋ᠦ᠍ ᠵᠣᠬᠢᠴᠠᠭᠰᠠᠨ᠂ ᠨᠣᠣᠰᠣ ᠨᠣᠯᠤᠤᠷ᠂ ᠰᠦ᠂ ᠮᠢᠬᠠ ᠵᠡᠷᠭᠡ ᠣᠯᠠᠨ ᠵᠦᠢᠯ ᠦ᠋ᠨ ᠶᠡᠷᠦᠩᠬᠡᠢᠯᠡᠭᠰᠡᠨ ᠭᠠᠷᠤᠯᠲᠠ ᠲᠠᠢ᠂ ᠣᠯᠠᠨ ᠲᠠᠯᠠ ᠶ᠋ᠢᠨ ᠡᠳ᠋ᠯᠡᠯ ᠬᠡᠷᠡᠭᠴᠡᠭᠡᠲᠦ ᠰᠢᠯᠢᠳᠡᠭ ᠰᠠᠢᠨ ᠬᠣᠣᠰ ᠪᠥᠬᠦᠲᠦ ᠡᠷᠲᠡᠨ ᠦ᠌ ᠡᠭᠦᠯᠳᠡᠷ ᠦ᠋ᠨ ᠲᠡᠮᠡᠭᠡ ᠶᠦᠮ᠃
ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠰᠢᠨᠵᠢ ᠪᠠᠢᠳᠠᠯ᠄ ᠲᠣᠯᠣᠭᠠᠢ ᠨᠢ ᠳᠤᠮᠳᠠ ᠵᠡᠷᠭᠡ᠂ ᠮᠠᠩᠨᠠᠢ ᠥᠷᠭᠡᠨ᠂ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠣᠪᠣᠭᠠ ᠰᠢᠭ᠋ ᠰᠠᠭᠰᠠᠢᠭᠰᠠᠨ ᠪᠣᠰᠤᠭᠠ ᠦᠰᠦ ᠲᠡᠢ᠂ ᠬᠠᠮᠠᠷ ᠤ᠋ᠨ ᠬᠢᠩᠭᠠ ᠨᠢ ᠰᠢᠯᠤᠭᠤᠪᠲᠤᠷ᠂ ᠬᠣᠩᠰᠢᠶᠠᠷ ᠱᠥᠮᠪᠥᠭᠡᠷ᠂ ᠳᠡᠭᠡᠳᠦ ᠤᠷᠤᠭᠤᠯ ᠨᠢ ᠰᠡᠲᠡᠷᠬᠡᠢ᠂ ᠳᠣᠣᠷᠠᠲᠤ ᠤᠷᠤᠭᠤᠯ ᠨᠢ ᠪᠠᠭᠠ ᠵᠡᠷᠭᠡ ᠤᠨᠵᠢᠭᠢᠷ᠂ ᠠᠷᠤᠨᠰᠢ ᠪᠠᠨ ᠳᠡᠯᠳᠡᠭᠡᠷ ᠪᠣᠭᠣᠨᠢᠪᠲᠤᠷ ᠴᠢᠬᠢ ᠲᠡᠢ᠂ ᠬᠦᠵᠦᠭᠦᠦ ᠤᠷᠲᠤᠪᠲᠤᠷ ᠪᠥᠭᠡᠳ ᠭᠡᠳᠡᠷᠭᠡᠨ᠂ ᠵᠣᠭᠳᠣᠷ ᠤᠷᠲᠤ ᠵᠤᠵᠠᠭᠠᠨ᠂ ᠴᠡᠭᠡᠵᠢ ᠥᠷᠭᠡᠨ ᠲᠡᠨᠢᠭᠦᠨ᠂ ᠨᠢᠷᠤᠭᠤ ᠲᠡᠭᠰᠢ ᠥᠷᠭᠡᠨ᠂ ᠪᠣᠰᠤᠭᠠ ᠬᠣᠶᠠᠷ ᠥᠨᠳᠥᠷ ᠪᠦᠬᠦ ᠨᠢ ᠲᠡᠩᠴᠡᠭᠦᠬᠡᠨ ᠵᠠᠢᠲᠠᠢ᠂ ᠶᠡᠬᠡ ᠪᠡᠶᠡ ᠤᠷᠲᠤᠯᠢᠭ᠂ ᠬᠣᠨᠳᠣᠯᠠᠢ ᠲᠠᠰᠢᠭᠤ᠂ ᠤᠭ ᠤᠷᠤᠭᠤ ᠪᠠᠨ ᠪᠦᠳᠦᠭᠦᠪᠲᠦᠷ ᠪᠣᠭᠣᠨᠢ ᠰᠡᠭᠦᠯ ᠲᠡᠢ᠂ ᠳᠥᠷᠪᠡᠨ ᠬᠥᠯ ᠦ᠋ᠨ ᠭᠢᠰᠬᠢᠯᠲᠡ ᠲᠥᠪ ᠬᠦᠴᠦᠯᠢᠭ᠂ ᠡᠪᠦᠳᠦᠭ ᠦ᠋ᠨ ᠦᠰᠦ ᠥᠳᠬᠡᠨ ᠪᠥᠭᠡᠳ ᠤᠷᠲᠤ᠂ ᠬᠥᠯ ᠦᠨ ᠲᠠᠪᠠᠭ ᠨᠢ ᠪᠦᠳᠦᠭᠦᠨ᠂ ᠰᠠᠢᠷ ᠰᠠᠢᠲᠠᠢ᠂ ᠴᠢᠭᠢᠷᠠᠭ ᠪᠡᠶᠡ ᠴᠣᠭᠴᠠᠰ ᠲᠠᠢ᠃
ᠵᠢᠰᠦ᠄ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠣᠯᠠᠩᠬᠢ ᠨᠢ ᠬᠦᠷᠡᠩ᠂ ᠤᠯᠠᠭᠠᠨ᠂ ᠰᠢᠷᠠᠪᠲᠤᠷ᠂ ᠴᠠᠭᠠᠨ ᠵᠡᠷᠭᠡ ᠵᠢᠰᠦᠲᠡᠢ᠂ ᠡᠭᠦᠨ ᠡᠴᠡ ᠥᠭᠡᠷᠡ ᠪᠤᠰᠤᠳ ᠵᠦᠢᠯ ᠦ᠋ᠨ ᠵᠢᠰᠦᠮ ᠲᠡᠢ ᠲᠡᠮᠡᠭᠡᠳ ᠪᠠᠰᠠ ᠪᠣᠢ᠃
ᠲᠠᠷᠬᠠᠯᠲᠠ ᠶ᠋ᠢᠨ ᠬᠡᠪᠴᠢᠶᠡ᠄ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠲᠠᠷᠬᠠᠯᠲᠠ ᠶ᠋ᠢᠨ ᠬᠡᠪᠴᠢᠶᠡ ᠶᠡᠬᠡ ᠥᠷᠭᠡᠨ᠂ ᠲᠣᠭᠠ ᠲᠣᠯᠣᠭᠠᠢ ᠪᠠᠷ ᠣᠯᠠᠨ ᠪᠠᠢᠳᠠᠭ᠃ ᠮᠠᠨ ᠤ᠋ ᠤᠯᠤᠰ ᠲᠤ᠌᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠳ᠋ᠤ᠌ ᠮᠣᠩᠭᠣᠯ ᠲᠡᠮᠡᠭᠡ ᠶ᠋ᠢ ᠨᠡᠢᠳᠡᠮ ᠮᠠᠯᠵᠢᠵᠤ ᠪᠠᠢᠬᠤ ᠠ᠋ᠴᠠ ᠭᠠᠳᠠᠨᠠ᠂ ᠰᠢᠨᠵᠢᠶᠠᠩ᠂ ᠬᠥᠬᠡᠨᠠᠭᠤᠷ᠂ ᠭᠠᠨᠰᠦ᠂ ᠯᠢᠶᠣᠤᠨᠢᠩ᠂ ᠬᠢᠷᠢᠨ᠂ ᠬᠠᠷᠠᠮᠦ᠋ᠷᠡᠨ ᠵᠡᠷᠭᠡ ᠮᠣᠵᠢ ᠣᠷᠣᠨ ᠳ᠋ᠤ᠌ ᠠᠳᠠᠯᠢ ᠪᠤᠰᠤ ᠬᠡᠮᠵᠢᠶᠡ ᠪᠡᠷ ᠮᠠᠯᠵᠢᠵᠤ ᠪᠠᠢᠨᠠ᠃ ᠤᠯᠤᠰ ᠤ᠋ᠨ ᠭᠠᠳᠠᠭᠠᠳᠤ ᠳ᠋ᠤ᠌ ᠮᠣᠩᠭᠣᠯ ᠤᠯᠤᠰ ᠪᠣᠯᠤᠨ ᠣᠷᠣᠰ ᠵᠡᠷᠭᠡ ᠤᠯᠤᠰ ᠣᠷᠣᠨ ᠨᠤᠭᠤᠳ ᠲᠤ᠌ ᠮᠠᠯᠵᠢᠵᠤ ᠪᠠᠢᠨᠠ᠃ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠮᠠᠯᠵᠢᠭᠳᠠᠵᠣ ᠪᠠᠢᠭᠠ ᠭᠠᠵᠠᠷ ᠣᠷᠣᠨ ᠤ᠋ ᠪᠠᠢᠭᠠᠯᠢ ᠶ᠋ᠢᠨ ᠨᠥᠬᠥᠴᠡᠯ ᠪᠠᠢᠳᠠᠯ ᠤ᠋ᠨ ᠠᠳᠠᠯᠢ ᠪᠤᠰᠤ ᠵᠡᠷᠭᠡ ᠣᠯᠠᠨ ᠵᠦᠢᠯ ᠦ᠋ᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠵᠤ᠂ ᠪᠡᠶᠡ ᠪᠢᠯᠳᠠᠷ ᠤ᠋ᠨ ᠶᠡᠬᠡ ᠪᠠᠭᠠ᠂ ᠵᠢᠰᠦ᠂ ᠨᠣᠣᠰᠣ ᠨᠣᠯᠤᠤᠷ ᠤ᠋ᠨ ᠭᠠᠷᠤᠯᠲᠠ ᠵᠡᠷᠭᠡ ᠲᠠᠯᠠ ᠪᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠨᠡᠯᠢᠶᠡᠳ ᠵᠥᠷᠢᠶᠡ ᠲᠡᠢ ᠪᠣᠯᠵᠠᠢ᠃ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠪᠠᠷ ᠵᠢᠱ᠌ᠢᠶᠡᠯᠡᠪᠡᠯ᠂ ᠠᠯᠠᠱᠠ ᠲᠡᠮᠡᠭᠡ᠂ ᠭᠣᠪᠢ ᠶ᠋ᠢᠨ ᠤᠯᠠᠭᠠᠨ ᠲᠡᠮᠡᠭᠡ᠂ ᠰᠥᠨᠢᠳ ᠲᠡᠮᠡᠭᠡ᠂ ᠬᠥᠯᠥᠨ ᠪᠤᠢᠷ ᠲᠡᠮᠡᠭᠡ᠂ ᠰᠢᠨᠵᠢᠶᠠᠩ ᠲᠡᠮᠡᠭᠡ ᠵᠡᠷᠭᠡ ᠠᠰ ᠠᠰ ᠤ᠋ᠨ ᠥᠪᠡᠷᠮᠢᠴᠡ ᠰᠢᠨᠵᠢ ᠣᠨᠴᠠᠯᠢᠭ ᠪᠦᠬᠦᠢ ᠭᠠᠵᠠᠷ ᠣᠷᠣᠨ ᠤ᠋ ᠰᠢᠯᠢᠳᠡᠭ ᠡᠭᠦᠯᠳᠡᠷ ᠦ᠋ᠨ ᠲᠡᠮᠡᠭᠡ ᠨᠦ᠍ᠭᠦᠳ ᠪᠣᠢ᠃
ᠡᠯᠡ ᠭᠠᠵᠠᠷ ᠳᠠᠬᠢ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠪᠡᠶᠡ ᠪᠢᠯᠳᠠᠷ ᠤ᠋ᠨ ᠶᠡᠬᠡ ᠪᠠᠭᠠ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠨᠡᠯᠢᠶᠡᠳ ᠵᠥᠷᠢᠶᠡ ᠲᠡᠢ ᠰᠢᠭ ᠪᠣᠯᠪᠠᠴᠤ᠂ ᠶᠡᠬᠡ ᠲᠥᠯᠥᠪ ᠲᠡᠭᠡᠨ ᠪᠤᠤᠷᠠ ᠶ᠋ᠢᠨ ᠠᠮᠢᠳᠤ ᠶ᠋ᠢᠨ ᠵᠢᠩ ᠨᠢ 500—600 ᠺᠢᠯᠣᠭ᠌ᠷᠠᠮ ᠣᠷᠴᠢᠮ︔ ᠢᠩᠭᠡᠨ ᠦ᠌ ᠠᠮᠢᠳᠤ ᠶ᠋ᠢᠨ ᠵᠢᠩ 400—500 ᠺᠢᠯᠣᠭ᠌ᠷᠠᠮ ᠣᠷᠴᠢᠮ ᠪᠠᠢᠳᠠᠭ᠃ ᠪᠣᠲᠣᠭᠣ᠂ ᠰᠠᠶᠢ ᠪᠣᠳᠣᠭᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠᠬᠢ ᠨᠢᠯᠬᠠ ᠦᠶᠡ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠵᠢᠩ ᠨᠢ 35 ᠺᠢᠯᠣᠭ᠌ᠷᠠᠮ ᠣᠷᠴᠢᠮ᠃
ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠪᠡᠶᠡ ᠶ᠋ᠢᠨ ᠬᠡᠮᠵᠢᠯᠲᠡ ᠶ᠋ᠢᠨ ᠳᠤᠮᠳᠠᠴᠢᠯᠠᠭᠰᠠᠨ ᠬᠡᠮᠵᠢᠭᠳᠡᠯ ᠄
ᠪᠦᠳᠦᠭᠦᠨ ᠪᠤᠤᠷᠠ᠄ ᠪᠡᠶᠡ ᠶ᠋ᠢᠨ ᠥᠨᠳᠥᠷ 175.2 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠶᠡ ᠶ᠋ᠢᠨ ᠲᠠᠰᠢᠭᠤ ᠤᠷᠲᠤ 153.2 ᠰᠡᠨᠲ᠋ᠢᠮᠧᠲ᠋ᠷ᠂ ᠴᠡᠭᠡᠵᠢᠨ ᠪᠦᠰᠡᠯᠡᠭᠦᠷ 210.7 ᠰᠡᠨᠲ᠋ᠢᠮᠧᠲ᠋ᠷ︔
ᠪᠦᠳᠦᠭᠦᠨ ᠢᠩᠭᠡ ᠄ ᠪᠡᠶᠡ ᠶ᠋ᠢᠨ ᠥᠨᠳᠥᠷ 168 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠶᠡ ᠶ᠋ᠢᠨ ᠲᠠᠰᠢᠭᠤ ᠤᠷᠲᠤ 146.9 ᠰᠡᠨᠲ᠋ᠢᠮᠧᠲ᠋ᠷ᠂ ᠴᠡᠭᠡᠵᠢᠨ ᠪᠦᠰᠡᠯᠡᠭᠦᠷ 198 ᠰᠡᠨᠲ᠋ᠢᠮᠧᠲ᠋ᠷ︔
ᠪᠦᠳᠦᠭᠦᠨ ᠠᠳᠠ ᠄ ᠪᠡᠶᠡ ᠶ᠋ᠢᠨ ᠥᠨᠳᠥᠷ 179.3 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠶᠡ ᠶ᠋ᠢᠨ ᠲᠠᠰᠢᠭᠤ ᠤᠷᠲᠤ 163.8 ᠰᠡᠨᠲ᠋ᠢᠮᠧᠲ᠋ᠷ᠂ ᠴᠡᠭᠡᠵᠢᠨ ᠪᠦᠰᠡᠯᠡᠭᠦᠷ 208.5 ᠰᠡᠨᠲ᠋ᠢᠮᠧᠲ᠋ᠷ᠃
ᠣᠨᠣᠯᠭᠠ᠂ ᠠᠴᠢᠶᠠ ᠵᠥᠭᠡᠭᠡᠪᠦᠷᠢ᠄ ᠮᠣᠩᠭᠣᠯ ᠲᠡᠮᠡᠭᠡ ᠶ᠋ᠢ ᠣᠨᠣᠯᠭᠠᠨ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠳ᠋ᠦ᠍ ᠬᠤᠷᠳᠤᠴᠠ ᠰᠠᠢᠲᠠᠢ ᠪᠥᠭᠡᠳ ᠣᠨᠣᠯᠭᠠ ᠪᠠ ᠠᠴᠢᠶᠠ ᠵᠥᠭᠡᠭᠡᠪᠦᠷᠢ ᠳ᠋ᠦ᠍ ᠲᠡᠰᠪᠦᠷᠢ ᠳᠠᠭᠠᠭᠠᠴᠠ ᠨᠢ ᠣᠨᠴᠠᠭᠠᠢ ᠰᠠᠢᠨ ᠪᠠᠢᠳᠠᠭ᠃ ᠲᠡᠮᠡᠭᠡ ᠶ᠋ᠢ ᠤᠨᠤᠵᠤ ᠠᠶᠠᠯᠠᠬᠤ ᠳ᠋ᠤ᠌ ᠬᠤᠷᠳᠤᠴᠠ ᠨᠢ ᠮᠣᠷᠢ ᠲᠠᠢ ᠠᠳᠠᠯᠢᠪᠲᠤᠷ᠂ ᠠᠲᠠᠨ ᠲᠡᠮᠡᠭᠡᠨ ᠳ᠋ᠦ᠍ 150—200 ᠺᠢᠯᠣᠭ᠌ᠷᠠᠮ ᠬᠦᠨᠳᠦ ᠶᠠᠭᠤᠮᠠ ᠠᠴᠢᠭᠠᠳ ᠡᠳᠦᠷ ᠲᠦ᠍ 60—70 ᠺᠢᠯᠣᠮᠧᠲ᠋ᠷ ᠶᠠᠪᠤᠬᠤ ᠳ᠋ᠤ᠌ ᠠᠵᠢᠭ ᠴᠤ᠌ ᠦᠭᠡᠢ ᠶᠠᠪᠤᠵᠤ ᠯᠠ ᠪᠠᠢᠳᠠᠭ᠂ 350—400 ᠺᠢᠯᠣᠭ᠌ᠷᠠᠮ ᠬᠦᠨᠳᠦ ᠲᠡᠭᠡᠭᠡᠰᠢ ᠲᠡᠢ ᠲᠡᠷᠭᠡᠨ ᠳ᠋ᠦ᠍ ᠨᠢᠭᠡ ᠠᠳᠠ ᠬᠥᠯᠦᠭᠡᠳ ᠡᠳᠦᠷᠵᠢᠨ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠵᠥᠭᠡᠭᠡᠪᠦᠷᠢ ᠬᠢᠬᠦ ᠳ᠋ᠦ᠍ ᠶᠡᠷᠦ ᠬᠦᠴᠢᠷᠳᠡᠬᠦ ᠦᠭᠡᠢ ᠪᠠᠢᠳᠠᠭ᠃
ᠨᠣᠣᠰᠣ ᠨᠣᠯᠤᠤᠷ ᠤ᠋ᠨ ᠭᠠᠷᠤᠯᠲᠠ᠄ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠨᠣᠯᠤᠤᠷ(ᠨᠣᠯᠤᠤᠷ ᠪᠣᠯᠤᠨ ᠬᠢᠯᠭᠠᠰᠤ᠂ ᠰᠤᠷ) ᠢ᠋ ᠠᠷᠠᠳ ᠤ᠋ᠨ ᠶᠡᠷᠦ ᠶ᠋ᠢᠨ ᠬᠡᠯᠡᠯᠭᠡ ᠪᠡᠷ ᠲᠡᠮᠡᠭᠡᠨ ᠤᠩᠭᠤᠰᠤ ᠭᠡᠵᠦ ᠬᠡᠯᠡᠳᠡᠭ᠃ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠨᠣᠯᠤᠤᠷ ᠤ᠋ᠨ ᠭᠠᠷᠴᠠ ᠶ᠋ᠢᠨ ᠬᠡᠮᠵᠢᠶᠡ ᠨᠢ ᠨᠡᠢᠳᠡᠮ ᠳ᠋ᠡᠭᠡᠨ ᠶᠡᠬᠡ ᠰᠠᠢᠨ᠃ ᠠᠯᠠᠱᠠ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠨᠣᠯᠤᠤᠷ ᠨᠢ ᠬᠠᠷᠢᠴᠠᠩᠭᠤᠢ ᠪᠠᠷ ᠨᠠᠷᠢᠨ᠂ ᠰᠥᠨᠢᠳ ᠲᠡᠮᠡᠭᠡ ᠨᠣᠣᠰᠣ ᠨᠣᠯᠤᠤᠷ ᠤ᠋ᠨ ᠭᠠᠷᠴᠠ ᠪᠠᠷ ᠶᠡᠬᠡ ᠪᠥᠭᠡᠳ ᠪᠡᠶᠡ ᠪᠢᠯᠳᠠᠷ ᠢ᠋ᠶ᠋ᠠᠷ ᠪᠠᠰᠠ ᠪᠦᠳᠦᠭᠦᠨ ᠪᠠᠢᠳᠠᠭ᠃ ᠶᠡᠬᠡᠩᠬᠢ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠨᠣᠯᠤᠤᠷ ᠤ᠋ᠨ ᠭᠠᠷᠴᠠ ᠨᠢ ᠶᠡᠷᠦᠩᠬᠡᠢ ᠳ᠋ᠡᠭᠡᠨ 5—8 ᠺᠢᠯᠣᠭ᠌ᠷᠠᠮ ᠣᠷᠴᠢᠮ ᠪᠠᠢᠵᠤ᠂ 10 ᠺᠢᠯᠣᠭ᠌ᠷᠠᠮ ᠠ᠋ᠴᠠ ᠳᠡᠭᠡᠭᠰᠢ ᠭᠠᠷᠴᠠ ᠲᠠᠢ ᠲᠡᠮᠡᠭᠡ ᠪᠠᠰᠠ ᠨᠡᠯᠢᠶᠡᠳ ᠪᠣᠢ᠃
ᠮᠢᠬᠠᠨ ᠭᠠᠷᠤᠯᠲᠠ᠄ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠮᠢᠬᠠ᠂ ᠡᠯᠳᠡᠪ ᠵᠦᠢᠯ ᠦ᠋ᠨ ᠮᠠᠭᠤᠬᠠᠢ ᠰᠢᠩᠭᠡᠭ ᠦᠨᠦᠷ ᠠᠮᠲᠠ ᠦᠭᠡᠢ᠂ ᠰᠢᠮᠡ ᠲᠡᠵᠢᠭᠡᠯ ᠦ᠋ᠨ ᠠᠭᠤᠯᠠᠭᠳᠠᠴᠠ ᠨᠢ ᠪᠦᠷᠢᠨ ᠲᠡᠭᠦᠯᠳᠡᠷ᠂ ᠢᠳᠡᠬᠦ ᠳ᠋ᠦ᠍ ᠠᠮᠲᠠᠲᠠᠢ᠂ ᠥᠭᠡᠬᠦ ᠪᠠᠭᠠ᠂ ᠬᠠᠷᠠ ᠮᠢᠬᠠ ᠶᠡᠬᠡᠲᠡᠢ᠂ ᠮᠢᠬᠠᠨ ᠳ᠋ᠠᠬᠢ ᠤᠭᠤᠷᠠᠭ ᠤ᠋ᠨ ᠠᠭᠤᠯᠠᠭᠳᠠᠴᠠ ᠨᠢ ᠦᠬᠡᠷ ᠦ᠋ᠨ ᠮᠢᠬᠠ ᠲᠠᠢ ᠣᠢᠷᠠᠯᠴᠠᠭᠠ᠃ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠲᠠᠷᠭᠤ ᠲᠠᠢ ᠠᠲᠠᠨ ᠤ᠋ ᠴᠣᠯ ᠮᠢᠬᠠᠨ ᠤ᠋ ᠭᠠᠷᠴᠠ ᠨᠢ ᠳᠤᠮᠳᠠᠴᠢ ᠪᠠᠷ 200 ᠺᠢᠯᠣᠭ᠌ᠷᠠᠮ ᠣᠷᠴᠢᠮ᠂ ᠰᠠᠢᠨ ᠲᠠᠷᠭᠤ ᠲᠠᠢ ᠪᠦᠳᠦᠭᠦᠨ ᠠᠲᠠᠨ ᠠ᠋ᠴᠠ 400 ᠢᠯᠡᠭᠦᠦ ᠺᠢᠯᠣᠭ᠌ᠷᠠᠮ ᠴᠣᠯ ᠮᠢᠬᠠ ᠭᠠᠷᠤᠭᠰᠠᠨ ᠲᠡᠮᠳᠡᠭᠯᠡᠯ ᠪᠠᠰᠠ ᠪᠣᠢ᠃ ᠨᠢᠲᠤᠯᠭᠠ ᠶ᠋ᠢᠨ ᠭᠠᠷᠴᠠ ᠶᠡᠷᠦ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌ 54% ᠡᠴᠡ ᠳᠡᠭᠡᠭᠰᠢ᠃
ᠰᠦᠨ ᠦ᠌ ᠭᠠᠷᠤᠯᠲᠠ᠄ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠢᠩᠭᠡᠨ ᠰᠦ ᠥᠳᠬᠡᠨ ᠪᠥᠭᠡᠳ ᠤᠭᠤᠷᠠᠭ᠂ ᠲᠣᠰᠣᠯᠢᠭ᠂ ᠡᠷᠦᠳᠡᠰᠦ ᠪᠣᠳᠠᠰ ᠤ᠋ᠨ ᠠᠭᠤᠯᠤᠭᠳᠠᠴᠠ ᠨᠢ ᠦᠨᠢᠶᠡᠨ ᠰᠦᠨ ᠡᠴᠡ ᠥᠨᠳᠥᠷ᠂ ᠰᠦᠨ ᠦ᠌ ᠲᠣᠰᠣᠯᠢᠭ ᠤ᠋ᠨ ᠮᠥᠬᠥᠯᠢᠭ ᠨᠢ ᠵᠢᠵᠢᠭ ᠪᠠᠢᠳᠠᠭ᠃ ᠢᠩᠭᠡᠨ ᠰᠦ ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠶᠡᠬᠡ ᠵᠣᠬᠢᠮᠵᠢᠲᠠᠢ ᠪᠡᠶᠡ ᠲᠡᠩᠬᠡᠵᠢᠭᠦᠯᠬᠦ ᠨᠢᠭᠡᠨ ᠵᠦᠢᠯ ᠦ᠋ᠨ ᠤᠮᠳᠠᠭᠠᠨ ᠪᠣᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠡᠭᠦᠨ ᠢ᠋ᠶ᠋ᠡᠷ ᠣᠯᠠᠨ ᠵᠦᠢᠯ ᠦ᠋ᠨ ᠰᠠᠢᠬᠠᠨ ᠦᠨᠦᠷ ᠠᠮᠲᠠᠲᠤ ᠴᠠᠭᠠᠨ ᠢᠳᠡᠭᠡ ᠬᠢᠵᠦ ᠪᠣᠯᠳᠠᠭ᠃ ᠪᠣᠳᠣᠭᠤᠯᠤᠭᠰᠠᠨ ᠢᠩᠭᠡ ᠶ᠋ᠢ 8—11 ᠰᠠᠷᠠ ᠣᠷᠴᠢᠮ ᠰᠠᠭᠠᠵᠤ ᠪᠣᠯᠤᠨᠠ᠂ ᠨᠢᠭᠡ ᠢᠩᠭᠡᠨ ᠡᠴᠡ ᠡᠳᠦᠷ ᠲᠦ᠍ ᠳᠤᠮᠳᠠᠴᠢ ᠪᠠᠷ 1—1.5 ᠺᠢᠯᠣᠭ᠌ᠷᠠᠮ ᠰᠦ ᠰᠠᠭᠠᠵᠤ ᠳᠡᠢᠯᠦᠨᠡ᠃
ᠦᠷᠡᠵᠢᠯᠲᠡ ᠪᠣᠢᠵᠢᠯᠲᠠ᠄ ᠮᠣᠩᠭᠣᠯ ᠲᠡᠮᠡᠭᠡᠨ ᠦ᠌ ᠦᠷᠡᠵᠢᠯᠲᠡ ᠶ᠋ᠢᠨ ᠨᠣᠷᠮᠠ ᠳᠡᠮᠡᠢ ᠥᠨᠳᠥᠷ ᠪᠢᠰᠢ᠂ ᠶᠡᠷᠦ ᠶ᠋ᠢᠨ ᠵᠢᠯ ᠳ᠋ᠦ᠍᠂ 40% ᠭᠠᠷᠤᠢ ᠯᠠ ᠪᠠᠢᠳᠠᠭ᠃ ᠪᠣᠲᠣᠭᠣᠨ ᠤ᠋ ᠪᠣᠢᠵᠢᠯᠲᠠ ᠶ᠋ᠢᠨ ᠨᠣᠷᠮᠠ ᠶ᠋ᠢᠨ ᠥᠨᠳᠥᠷ ᠡᠰᠡᠬᠦ ᠨᠢ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠪᠠᠢᠭᠠᠯᠢ ᠣᠷᠴᠢᠨ ᠤ᠋ ᠪᠠᠢᠳᠠᠯ ᠪᠣᠯᠤᠨ ᠠᠷᠠᠴᠢᠯᠠᠭᠠ ᠮᠠᠯᠯᠠᠭᠠ ᠲᠠᠢ ᠰᠢᠭᠤᠳ ᠬᠣᠯᠪᠣᠭᠳᠠᠯ ᠲᠠᠢ᠂ ᠶᠡᠷᠦ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌᠂ 90% ᠠ᠋ᠴᠠ ᠳᠡᠭᠡᠭᠰᠢ ᠪᠠᠢᠳᠠᠭ᠃
ᠮᠣᠩᠭᠣᠯ ᠲᠡᠮᠡᠭᠡ᠂ ᠰᠥᠷᠦᠭᠴᠢ ᠢᠵᠢᠯᠢᠰᠡᠭ ᠵᠠᠩ ᠴᠢᠨᠠᠷ ᠢ᠋ᠶ᠋ᠠᠷ ᠣᠨᠴᠠᠭᠠᠢ ᠰᠠᠢᠨ ᠪᠠᠢᠳᠠᠭ᠂ ᠵᠠᠷᠢᠮ ᠦᠶᠡ ᠳ᠋ᠦ᠍ ᠲᠡᠮᠡᠭᠡᠨ ᠰᠦᠷᠦᠭ ᠨᠦ᠍ᠭᠦᠳ ᠨᠢᠭᠡᠨ ᠭᠠᠵᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠨᠡᠢᠯᠡᠨ ᠬᠣᠯᠢᠯᠳᠤᠭᠰᠠᠨ ᠴᠤ᠌᠂ ᠰᠠᠯᠤᠨ ᠶᠠᠪᠤᠬᠤ ᠳ᠋ᠠᠭᠠᠨ ᠢᠵᠢᠯᠢ ᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠥᠪᠡᠷ ᠦ᠋ᠨ ᠰᠦᠷᠦᠭ ᠢ᠋ᠶ᠋ᠡᠨ ᠳᠠᠭᠠᠵᠤ ᠢᠯᠭᠠᠷᠠᠵᠤ ᠶᠠᠪᠤᠳᠠᠭ᠂ ᠪᠤᠤᠷᠠ ᠨᠢ ᠬᠤᠷᠢᠶᠠᠭᠰᠠᠨ ᠰᠦᠷᠦᠭ ᠦ᠋ᠨ ᠢ᠋ᠶ᠋ᠡᠨ ᠲᠡᠮᠡᠭᠡᠳ ᠢ᠋ ᠵᠢᠯ ᠲᠤᠷᠰᠢᠲᠠ ᠠᠵᠢᠭᠯᠠᠨ ᠠᠩᠬᠠᠷᠴᠤ᠂ ᠰᠠᠯᠵᠤ ᠪᠤᠲᠠᠷᠠᠬᠤ ᠶ᠋ᠢ ᠰᠡᠷᠡᠮᠵᠢᠯᠡᠨ ᠦᠷᠭᠦᠯᠵᠢ ᠬᠤᠷᠢᠶᠠᠵᠤ᠂ ᠬᠠᠮᠠᠭᠠᠯᠠᠨ ᠶᠠᠪᠤᠳᠠᠭ᠃
ᠮᠣᠩᠭᠣᠯ ᠲᠡᠮᠡᠭᠡ᠂ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠮᠠᠯ ᠵᠣᠬᠢᠴᠠᠬᠤ ᠪᠠᠷ ᠪᠠᠷᠤᠭᠲᠠᠢᠬᠠᠨ ᠰᠢᠭ᠋ ᠭᠠᠩᠳᠠᠮᠠᠯ ᠬᠠᠭᠤᠷᠠᠢ ᠲᠠᠴᠢᠷ ᠨᠢᠮᠭᠡᠨ ᠡᠪᠡᠰᠦ ᠪᠡᠯᠴᠢᠭᠡᠷ ᠲᠡᠢ ᠨᠤᠲᠤᠭ ᠣᠷᠣᠨ ᠵᠢᠴᠢ ᠡᠯᠡᠰᠦᠷᠬᠡᠭ᠂ ᠴᠥᠯᠡᠷᠬᠡᠭ ᠭᠠᠵᠠᠷ ᠣᠷᠣᠨ ᠤ᠋ ᠬᠠᠲᠠᠭᠤ ᠪᠡᠷᠬᠡ ᠣᠷᠴᠢᠨ ᠠᠬᠤᠢ ᠳ᠋ᠤ᠌ ᠲᠤᠢᠯ ᠤ᠋ᠨ ᠲᠡᠰᠪᠦᠷᠢ ᠳᠠᠭᠠᠭᠠᠴᠠ ᠲᠠᠢ ᠪᠠᠷ ᠰᠠᠢᠨ ᠵᠣᠬᠢᠴᠠᠨ᠂ ᠪᠠᠢᠭᠠᠯᠢ ᠶ᠋ᠢᠨ ᠨᠥᠬᠥᠴᠡᠯ ᠬᠡᠳᠦᠢ ᠠᠨᠠᠢ ᠪᠠᠢᠭᠰᠠᠨ ᠴᠤ᠌᠂ ᠵᠢᠯ ᠲᠤᠷᠰᠢᠳᠠ ᠬᠡᠭᠡᠷᠡᠯᠡᠨ ᠬᠣᠯᠠ ᠣᠢᠷᠠ ᠶ᠋ᠢᠨ ᠪᠡᠯᠴᠢᠭᠡᠷ ᠭᠡᠵᠦ ᠢᠯᠭᠠᠯ ᠦᠭᠡᠢ ᠨᠠᠭᠠᠰᠢ ᠴᠠᠭᠠᠰᠢ ᠵᠣᠷᠴᠢᠨ ᠴᠢᠳᠠᠮᠠᠭᠠᠢ ᠰᠠᠢᠬᠠᠨ ᠠᠰᠢᠭᠯᠠᠵᠤ᠂ ᠬᠡᠪ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠰᠴᠦ ᠲᠥᠯᠵᠢᠨ ᠦᠷᠡᠵᠢᠵᠦ ᠪᠠᠢᠳᠠᠭ᠂ ᠲᠡᠭᠦᠨ ᠢ᠋ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠮᠠᠯ ᠲᠠᠢ ᠨᠢᠭᠡᠨ ᠭᠠᠵᠠᠷ ᠨᠤᠲᠤᠭ ᠲᠤ᠌ ᠬᠠᠮᠲᠤ ᠪᠡᠯᠴᠢᠷᠯᠡᠭᠦᠯᠦᠭᠰᠡᠨ ᠴᠦ᠍ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠮᠠᠯ ᠲᠠᠢ ᠡᠪᠡᠰᠦ ᠲᠡᠵᠢᠭᠡᠯ ᠪᠤᠯᠢᠶᠠᠯᠴᠠᠯᠳᠤᠬᠤ ᠦᠭᠡᠢ᠂ ᠬᠠᠷᠢᠨ ᠪᠡᠯᠴᠢᠭᠡᠷ ᠨᠤᠲᠤᠭ ᠲᠠᠬᠢ ᠮᠣᠳᠣᠨ ᠤ᠋ ᠨᠠᠪᠴᠢ ᠮᠥᠴᠢᠷ᠂ ᠪᠤᠲᠠ᠂ ᠪᠤᠳᠤᠷᠭᠠᠨᠠ᠂ ᠰᠢᠷᠠᠯᠵᠢ᠂ ᠬᠠᠮᠬᠤᠤᠯ᠂ ᠬᠠᠷᠭᠠᠨᠠ᠂ ᠬᠠᠯᠠᠭᠠᠢ ᠭᠡᠬᠦ ᠮᠡᠲᠦ ᠶ᠋ᠢᠨ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠮᠠᠯ ᠳᠡᠮᠡᠢ ᠢᠳᠡᠵᠦ ᠠᠰᠢᠭᠯᠠᠳᠠᠭ ᠦᠭᠡᠢ ᠪᠦᠳᠦᠭᠦᠯᠢᠭ ᠪᠤᠶᠤ ᠮᠣᠳᠣᠯᠢᠭ ᠲᠥᠷᠥᠯ ᠵᠦᠢᠯ ᠦ᠋ᠨ ᠡᠪᠡᠰᠦ ᠤᠷᠭᠤᠮᠠᠯ ᠢ᠋ ᠨᠢ ᠭᠣᠯᠣᠬᠤ ᠦᠭᠡᠢ ᠢᠳᠡᠳᠡᠭ᠃
ᠮᠣᠩᠭᠣᠯ ᠲᠡᠮᠡᠭᠡ ᠪᠣᠯ ᠠᠷᠠᠴᠢᠯᠠᠭᠠ ᠮᠠᠯᠵᠢᠯᠭᠠ ᠶ᠋ᠢᠨ ᠪᠡᠯᠡ ᠣᠷᠣᠭᠤᠯᠤᠯᠲᠠ ᠲᠤᠩ ᠪᠠᠭᠠ᠂ ᠪᠡᠯᠴᠢᠭᠡᠷ ᠡᠪᠡᠰᠦᠨ ᠳ᠋ᠦ᠍ ᠭᠠᠮᠲᠠᠢ᠂ ᠨᠣᠣᠰᠣ ᠨᠣᠯᠤᠤᠷ᠂ ᠰᠦ᠂ ᠮᠢᠬᠠ ᠵᠡᠷᠭᠡ ᠣᠨᠴᠠ ᠰᠢᠯᠢᠳᠡᠭ ᠰᠠᠢᠨ ᠣᠯᠠᠨ ᠵᠦᠢᠯ ᠦ᠋ᠨ ᠭᠠᠷᠤᠯᠲᠠ ᠲᠠᠢ᠂ ᠮᠠᠯᠵᠢᠬᠤ ᠳ᠋ᠤ᠌ ᠠᠰᠢᠭ ᠣᠯᠵᠠᠪᠤᠷᠢ ᠶᠡᠬᠡᠲᠡᠢ᠂ ᠪᠠᠢᠭᠠᠯᠢ ᠣᠷᠴᠢᠨ ᠠᠬᠤᠢ ᠶ᠋ᠢᠨ ᠨᠥᠬᠥᠴᠡᠯ ᠮᠠᠭᠤᠲᠠᠢ ᠭᠠᠵᠠᠷ ᠣᠷᠣᠨ ᠳ᠋ᠤ᠌ ᠮᠠᠯᠵᠢᠵᠤ ᠪᠣᠯᠬᠤ ᠵᠡᠷᠭᠡ ᠣᠯᠠᠨ ᠠᠷᠪᠢᠨ ᠳᠠᠪᠠᠭᠤᠯᠢᠭ ᠲᠠᠯᠠ ᠲᠠᠢ᠂ ᠳᠡᠯᠡᠬᠡᠢ ᠳ᠋ᠦ᠍ ᠬᠣᠪᠣᠷᠬᠠᠨ ᠰᠢᠯᠢᠳᠡᠭ ᠰᠠᠢᠨ ᠡᠭᠦᠯᠳᠡᠷ ᠦ᠋ᠨ ᠲᠡᠮᠡᠭᠡ ᠪᠣᠯᠬᠣᠷ᠂ ᠬᠣᠢᠰᠢᠳᠠ᠂ ᠲᠡᠭᠦᠨ ᠦ᠌ ᠡᠳᠡᠭᠡᠷ ᠬᠣᠪᠣᠷ ᠨᠠᠨᠳᠢᠨ ᠳᠠᠪᠠᠭᠤᠯᠢᠭ ᠲᠠᠯᠠ ᠶ᠋ᠢ ᠨᠢ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠣᠷᠣᠨ ᠤ᠋ ᠪᠠᠨ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭᠠ ᠳ᠋ᠠᠭᠠᠨ ᠵᠣᠬᠢᠴᠠᠭᠤᠯᠤᠨ ᠤᠯᠠᠮ ᠰᠠᠢᠨ ᠢ᠋ᠶ᠋ᠠᠷ ᠠᠰᠢᠭᠯᠠᠬᠤ ᠶ᠋ᠢ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠴᠤ᠂ ᠡᠭᠦᠯᠳᠡᠷ ᠦ᠋ᠨ ᠳᠣᠲᠣᠷᠠ ᠨᠢ ᠰᠢᠯᠢᠨ ᠰᠣᠩᠭᠣᠵᠤ ᠪᠣᠢᠵᠢᠭᠤᠯᠤᠨ᠂ ᠲᠡᠭᠦᠨ ᠦ᠌ ᠰᠢᠯᠢᠳᠡᠭ ᠰᠠᠢᠨ ᠤᠳᠤᠮᠰᠢᠯ ᠤ᠋ᠨ ᠰᠢᠨᠵᠢ ᠴᠢᠨᠠᠷ ᠢ᠋ ᠨᠢ ᠴᠡᠪᠡᠷ ᠢ᠋ᠶ᠋ᠡᠷ ᠨᠢ ᠬᠠᠮᠠᠭᠠᠯᠠᠨ ᠬᠠᠳᠠᠭᠠᠯᠠᠬᠤ ᠶ᠋ᠢ ᠴᠢᠬᠤᠯᠴᠢᠯᠠᠵᠣ᠂ ᠶᠠᠰᠤ ᠴᠢᠨᠠᠷ ᠢ᠋ ᠨᠢ ᠤᠯᠠᠮ ᠰᠠᠢᠵᠢᠷᠠᠭᠤᠯᠤᠨ ᠰᠢᠯᠢᠳᠡᠭᠵᠢᠭᠦᠯᠵᠦ ᠰᠠᠢᠲᠤᠷ ᠠᠰᠢᠭᠯᠠᠪᠠᠯ ᠵᠣᠬᠢᠨᠠ᠃
ᠮᠣᠩᠭᠣᠯ ᠲᠡᠮᠡᠭᠡ Монгол Тэмээ
ᠬᠢᠲᠠᠳ ᠨᠡᠷᠡ᠄ 蒙古骆驼
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳᠣᠯᠣᠳ • ᠨᠠᠮᠵᠢᠯ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ