ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠭᠤᠴᠢ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 30
51ᠰᠢᠨᠡ ᠶᠢᠨ ᠳᠥᠷᠪᠡᠨ ᠬᠠᠷᠠ ᠡᠳᠦᠷ
ᠰᠢᠨᠡ ᠶ᠋ᠢᠨ ᠳᠦᠷᠪᠡᠨᠡ ᠪᠠᠯᠳᠠᠨᠴᠡᠷᠢᠩ ᠦᠳᠡ ᠡᠴᠡ ᠬᠣᠢᠰᠢ ᠭᠡᠷ ᠡᠴᠡ ᠭᠠᠷᠤᠨ ᠵᠡᠭᠦᠨ ᠲᠡᠢᠰᠢ ᠶᠠᠪᠤᠯᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠭᠠᠭᠴᠠ ᠬᠦ᠌ ᠮᠠᠷᠭᠠᠰᠢ ᠶ᠋ᠢᠨ ᠶᠠᠪᠤᠳᠠᠯ᠂ ᠪᠣᠭᠳᠠ ᠳ᠋ᠤ᠌ ᠪᠠᠷᠠᠯᠬᠠᠨ ᠵᠠᠷᠯᠢᠭ ᠪᠠᠭᠤᠯᠠᠭᠠᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠨᠢ ᠪᠠᠶᠠᠷ ᠪᠠᠬᠠᠳᠤᠯ ᠪᠣᠯᠤᠨ ᠡᠷᠭᠢᠯᠳᠦᠬᠦ ᠪᠥᠭᠡᠳ ᠶᠡᠷᠦ ᠡᠭᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠣᠶᠤᠨᠳᠠᠷᠢ ᠳ᠋ᠤ᠌ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠭᠡᠷ ᠡᠴᠡ ᠭᠠᠷᠤᠭᠰᠠᠨ ᠠᠵᠢ᠃
ᠲᠩᠷᠢ ᠶ᠋ᠢᠨ ᠪᠠᠢᠳᠠᠯ ᠮᠠᠰᠢ ᠰᠠᠢᠬᠠᠨ᠂ ᠠᠯᠢ ᠥᠷᠯᠥᠭᠡ ᠡᠴᠡ ᠠᠪᠤᠨ ᠳᠡᠭᠡᠷᠡ ᠡᠭᠡᠭᠡᠭᠰᠡᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠣᠷᠣᠨ ᠪᠠᠢᠰᠢᠩ ᠤ᠋ᠨ ᠴᠠᠰᠤ ᠬᠠᠢᠯᠤᠮᠬᠠᠲᠤᠨ ᠬᠠᠪᠤᠷ ᠤ᠋ᠨ ᠠᠭᠤᠷ ᠠᠮᠢᠰᠬᠤᠯ ᠢᠷᠡᠵᠦ ᠪᠠᠢᠨᠠ ᠤᠤ? ᠭᠡᠮᠡᠷ ᠰᠠᠨᠠᠭᠳᠠᠨᠠ᠃ ᠲᠡᠷᠡ ᠳᠤᠮᠳᠠᠭᠤᠷ ᠬᠠᠮᠢᠭᠠ ᠯᠠ ᠪᠣᠯ ᠬᠠᠮᠢᠭᠠ ᠭᠣᠶᠣ ᠭᠠᠩᠭᠠᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠥᠮᠦᠰ ᠬᠡᠳᠦ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠬᠡᠯᠬᠢᠯᠳᠦᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠶᠠᠭᠤᠮᠠ ᠬᠡᠯᠡᠯᠴᠡᠨ ᠶᠠᠪᠤᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠲᠡᠳᠡᠨ ᠦ᠌ ᠳᠤᠮᠳᠠ ᠪᠡᠯᠡᠭ ᠰᠡᠯᠲᠡ ᠶ᠋ᠢᠨ ᠶᠠᠭᠤᠮᠠ ᠪᠠᠷᠢᠭᠠ ᠦᠭᠡᠢ᠂ ᠭᠠᠷ ᠴᠢᠯᠥᠭᠡ ᠲᠡᠢ ᠬᠥᠮᠦᠨ ᠨᠢᠭᠡ ᠴᠦ᠍ ᠦᠭᠡᠢ ᠪᠥᠭᠡᠳ ᠢᠯᠠᠩᠭᠤᠶᠠ ᠬᠡᠦᠬᠡᠳ ᠪᠠᠭᠠᠴᠤᠳ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠠᠢᠯ ᠬᠡᠰᠦᠵᠦ ᠣᠯᠤᠭᠰᠠᠨ ᠪᠡᠯᠡᠭ ᠦ᠋ᠨ ᠢ᠋ᠶ᠋ᠡᠨ ᠶᠠᠭᠤᠮᠠ ᠶ᠋ᠢ ᠡᠪᠦᠷ ᠲᠡᠭᠡᠨ ᠬᠢᠨ ᠬᠡᠰᠦᠭᠰᠡᠭᠡᠷ ᠪᠠᠭᠲᠠᠬᠤ ᠪᠠᠨ ᠪᠣᠯᠢᠬᠤ ᠪᠠᠷ ᠬᠣᠷᠮᠣᠢᠯᠠᠨ ᠭᠦᠶᠦᠵᠦ ᠶᠠᠪᠤᠭᠠ ᠦᠵᠡᠭᠳᠡᠨᠡ᠃ ᠭᠡᠪᠡᠴᠦ ᠰᠡᠳᠬᠢᠯ ᠬᠠᠩᠬᠤ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠪᠣᠯᠤᠯᠲᠠᠢ᠂ ᠨᠢᠭᠡ ᠬᠠᠰᠢᠶᠠᠨ ᠠ᠋ᠴᠠ ᠭᠠᠷᠤᠭᠠᠳ ᠨᠥᠭᠦᠭᠡ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠬᠤ ᠵᠠᠭᠤᠷᠠ ᠤᠨᠠᠨ ᠲᠣᠰᠣᠨ ᠭᠦᠶᠦᠬᠦ ᠠᠵᠢ᠃
ᠡᠢᠨ ᠬᠦ᠌ ᠪᠦᠬᠦ ᠬᠦᠷᠢᠶᠡ ᠳᠠᠶᠠᠭᠠᠷ ᠶᠡᠬᠡ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠺᠤᠨᠰᠤᠯ ᠳᠡᠨᠵᠢ᠂ ᠮᠠᠢᠮᠠᠢ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠭᠠᠮᠢᠩ ᠤ᠋ᠳ ᠢ᠋ᠶ᠋ᠠᠷ ᠮᠠᠨᠠᠭᠤᠯᠤᠭᠰᠡᠨ ᠪᠠᠬᠠᠨ ᠬᠥᠭᠡᠷᠦᠬᠦᠢ ᠬᠥᠮᠦᠰ ᠬᠣᠭ ᠴᠡᠪᠡᠷᠯᠡᠵᠦ ᠪᠠᠢᠯᠠ᠃ ᠡᠳᠡ ᠪᠣᠯ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠪᠠᠯᠳᠠᠨᠴᠡᠷᠢᠩ ᠲᠡᠢ ᠳᠤᠮᠳᠠ ᠭᠣᠣᠯ ᠤ᠋ᠨ ᠭᠦᠦᠷ ᠳᠡᠭᠡᠷᠡ ᠳᠠᠭᠠᠷᠢᠯᠳᠤᠭᠰᠠᠨ ᠴᠠᠬᠠᠷ ᠴᠡᠷᠢᠭ ᠦ᠋ᠳ ᠪᠥᠭᠡᠳ᠂ ᠡᠳᠦᠭᠡ ᠲᠡᠳᠡ ᠴᠠᠭᠠᠨ ᠰᠠᠷᠠ ᠪᠣᠯᠪᠠ ᠭᠡᠵᠦ ᠬᠥᠮᠦᠨ ᠦ᠌ ᠤᠷᠮᠠ ᠳ᠋ᠤ᠌ ᠭᠠᠭᠴᠠ ᠤᠳᠠᠭᠠ ᠭᠡᠳᠡᠰᠦ ᠴᠠᠳᠤᠭᠰᠠᠨ ᠦᠭᠡᠢ᠂ ᠵᠥᠪᠬᠡᠨ ᠦᠮᠡᠬᠡᠢ ᠵᠣᠭᠣᠷᠢᠨ ᠱᠣᠷᠣᠩ ᠠ᠋ᠴᠠ ᠲᠦᠷ ᠭᠠᠷᠤᠨ᠂ ᠭᠠᠵᠠᠷ ᠱᠦᠭᠦᠷᠳᠡᠬᠦ ᠯᠡ ᠠᠵᠠ ᠵᠠᠪᠰᠢᠶᠠᠨ ᠲᠣᠬᠢᠶᠠᠯᠳᠤᠭᠰᠠᠨ ᠨᠢ ᠲᠡᠷᠡ ᠠᠵᠢ᠃ ᠭᠠᠮᠢᠩ ᠤ᠋ᠳ ᠲᠡᠳᠡᠨ ᠢ᠋ ᠠᠯᠳᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠬᠤ ᠳ᠋ᠠᠭᠠᠨ ᠭᠤᠷᠪᠠ ᠭᠤᠷᠪᠠ ᠪᠠᠷ ᠨᠢ ᠬᠦᠵᠦᠭᠦᠦ ᠬᠣᠯᠪᠣᠨ ᠭᠢᠨᠵᠢᠯᠡᠭᠰᠡᠨ ᠪᠠᠢᠯᠠ᠃ ᠬᠣᠭᠣᠷᠣᠨᠳᠣ ᠶ᠋ᠢᠨ ᠵᠠᠢ ᠨᠢ ᠨᠢᠭᠡ ᠲᠣᠬᠣᠢ ᠤᠴᠢᠷ᠂ ᠶᠣᠰᠣᠲᠠᠢ ᠨᠢᠭᠡ ᠬᠥᠮᠦᠨ ᠰᠢᠭ ᠬᠥᠳᠡᠯᠦᠨᠡ᠃
ᠪᠠᠯᠳᠠᠨᠴᠡᠷᠢᠩ ᠲᠡᠳᠡᠨ ᠦ᠌ ᠳᠤᠮᠳᠠᠭᠤᠷ ᠶᠠᠪᠤᠯᠠ᠃ ᠬᠥᠭᠡᠷᠦᠬᠦᠢ ᠲᠡᠳᠡ᠂ ᠬᠥᠮᠦᠨ ᠥᠭᠡᠳᠡ ᠰᠢᠷᠣᠢ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠬᠦ ᠳ᠋ᠡᠭᠡᠨ ᠭᠠᠵᠠᠷ ᠤ᠋ᠨ ᠱᠦᠭᠦᠷ ᠢ᠋ᠶ᠋ᠡᠨ ᠲᠡᠳᠡᠨ᠂ ᠶᠠᠳᠠᠷᠠᠭᠰᠠᠨ ᠪᠡᠶᠡ ᠪᠡᠨ ᠲᠡᠨᠢᠢᠯᠭᠡᠨ ᠵᠣᠭᠰᠣᠨᠠ᠃ ᠠᠵᠢᠪᠠᠰᠤ᠂ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠨᠢ ᠶᠠᠩᠵᠤ ᠪᠦᠷᠢ ᠪᠣᠯᠪᠠᠴᠤ ᠤᠷᠠᠭᠳᠠᠨ ᠰᠠᠯᠪᠠᠷᠠᠭᠰᠠᠨ ᠨᠢ ᠠᠪ ᠠᠳᠠᠯᠢ᠂ ᠪᠡᠶᠡᠰ ᠨᠢ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠨᠢᠭᠡᠨ ᠵᠢᠭᠳᠡ ᠲᠤᠷᠠᠩᠬᠠᠢ᠂ ᠬᠦᠢᠲᠡᠨ ᠦ᠌ ᠤᠯᠠᠷᠢᠯ ᠳ᠋ᠤ᠌ ᠳᠣᠲᠣᠷᠠ ᠭᠠᠳᠠᠨᠠ ᠬᠣᠶᠠᠷ ᠠ᠋ᠴᠠ ᠪᠠᠨ ᠨᠡᠪᠲᠡ ᠲᠠᠭᠠᠷᠠᠭᠰᠠᠨ ᠵᠢᠪᠡᠬᠡᠢ ᠨᠢᠭᠤᠷ ᠢ᠋ᠶ᠋ᠠᠨ ᠨᠢᠳᠦᠨ ᠳ᠋ᠦ᠍ ᠲᠤᠰᠬᠠᠨ ᠥᠯᠥᠰᠬᠦᠯᠡᠩ ᠳ᠋ᠦ᠍ ᠳᠠᠷᠤᠭᠳᠠᠭᠰᠠᠨ ᠬᠤᠷᠴᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠰᠢᠷᠳᠡᠬᠦ ᠨᠢ ᠶᠡᠷᠦ ᠭᠡᠨᠡᠳᠲᠡ ᠳᠠᠭᠠᠷᠢᠨ ᠪᠠᠷᠢᠵᠤ ᠢᠳᠡᠬᠦ ᠶ᠋ᠢ ᠪᠣᠳᠣᠵᠤ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠮᠡᠷ ᠵᠢᠪᠡᠭᠦᠦ ᠲᠡᠢ ᠦᠵᠡᠭᠳᠡᠨᠡ᠃ ᠭᠡᠲᠡᠯᠡ ᠲᠡᠳᠡᠨ ᠦ᠌ ᠳᠤᠮᠳᠠ ᠪᠤᠰᠤᠳ ᠲᠠᠢ ᠬᠣᠯᠪᠣᠭᠠ ᠦᠭᠡᠢ ᠪᠣᠯᠪᠠᠴᠤ ᠭᠠᠷ ᠬᠥᠯ ᠢ᠋ᠶ᠋ᠡᠨ ᠭᠢᠨᠵᠢᠭᠦᠯᠦᠭᠰᠡᠨ ᠨᠠᠪᠲᠠᠭᠠᠷᠬᠠᠨ ᠪᠡᠶᠡ ᠲᠡᠢ ᠥᠷᠭᠡᠨ ᠴᠡᠭᠡᠵᠢ ᠲᠡᠢ ᠡᠷᠡ ᠪᠠᠢᠯᠠ᠃ ᠲᠡᠷᠡ ᠨᠢ ᠭᠡᠪᠡᠯ ᠪᠦᠷ ᠠᠶᠤᠮᠠᠷ᠂ ᠶᠠᠭ ᠵᠠᠮ ᠳᠡᠭᠡᠷᠡ ᠥᠭᠡᠳᠡ ᠡᠴᠡ ᠬᠠᠷᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠶ᠋ᠢ ᠨᠢ ᠠᠵᠢᠬᠤ ᠳ᠋ᠤ᠌ ᠮᠠᠩᠨᠠᠢ ᠳᠡᠭᠡᠷᠡ ᠪᠡᠨ ᠵᠤᠷᠪᠤᠰ ᠰᠠᠷᠠᠨ ᠤ᠋ ᠬᠡᠯᠪᠡᠷᠢ ᠪᠦᠬᠦᠢ ᠬᠢᠯᠭᠠᠨ ᠰᠣᠷᠪᠢ ᠲᠠᠢ ᠪᠥᠭᠡᠳ ᠲᠡᠷᠡ ᠰᠣᠷᠪᠢ ᠠᠩᠬᠠ ᠡᠳᠡᠭᠡᠷᠡᠬᠦ ᠳ᠋ᠡᠭᠡᠨ ᠮᠠᠩᠨᠠᠢ ᠶ᠋ᠢᠨ ᠪᠦᠬᠦ ᠠᠷᠠᠰᠤ ᠶ᠋ᠢ ᠰᠦᠷᠡᠬᠡᠢ ᠲᠠᠲᠠᠭᠰᠠᠨ ᠪᠣᠯᠤᠯᠲᠠᠢ᠂ ᠬᠣᠶᠠᠷ ᠨᠢᠳᠦ ᠨᠢ ᠴᠢᠨᠣᠠ ᠶ᠋ᠢᠨ ᠬᠢ ᠰᠢᠭ ᠵᠢᠬᠠᠭᠠᠷ᠂ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠦ᠌ ᠭᠠᠮᠢᠩ ᠤ᠋ᠳ ᠲᠤ᠌ ᠣᠨᠴᠠ ᠥᠰᠢᠭᠳᠡᠭᠰᠡᠨ ᠢ᠋ ᠮᠡᠳᠡᠨ ᠶᠡᠬᠡᠳᠡ ᠦᠷᠦ ᠡᠪᠡᠳᠪᠡ᠃ ᠶᠠᠮᠠᠷ ᠨᠢᠭᠡᠨ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠬᠦ ᠰᠠᠨ ᠭᠡᠬᠦ ᠳ᠋ᠡᠭᠡᠨ ᠡᠪᠦᠷ ᠲᠡᠭᠡᠨ ᠭᠠᠷ ᠢ᠋ᠶ᠋ᠠᠨ ᠬᠢᠯᠡ᠃ ᠲᠡᠭᠡᠭᠡᠳ ᠬᠣᠶᠠᠷ ᠶᠠᠩᠴᠢᠶᠠᠨ ᠲᠠᠢ ᠶᠠᠪᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠡ ᠶ᠋ᠢ ᠠᠪᠤᠨ ᠬᠠᠵᠠᠭᠤ ᠪᠠᠷ ᠨᠢ ᠭᠠᠷᠤᠩᠭᠤᠲᠠ ᠪᠠᠨ ᠳᠣᠷᠣᠭᠰᠢ ᠤᠨᠠᠭᠠᠪᠠ᠃ ᠶᠠᠩᠴᠢᠶᠠᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠣᠰᠣᠨ ᠬᠠᠩ ᠶᠠᠩ ᠳᠤᠤᠭᠠᠷᠤᠭᠠᠳ ᠴᠠᠭᠠᠰᠢ ᠥᠩᠬᠥᠷᠢᠨ ᠡᠮᠦᠨᠡ ᠨᠢ ᠬᠦᠷᠬᠦ ᠰᠢᠭ ᠪᠣᠯᠬᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠪᠠᠶᠠᠷᠯᠠᠪᠠ᠃
ᠭᠡᠲᠡᠯᠡ ᠡᠮᠦᠨᠡᠬᠢ ᠡᠷᠡ《ᠬᠥᠶᠢ ᠡᠷᠬᠢᠮ ᠠ᠋!》 ᠭᠡᠵᠦ ᠳᠠᠭᠤᠳᠠᠪᠠ᠃ ᠬᠠᠷᠢᠭᠤ ᠳᠤᠤᠭᠠᠷᠤᠯ ᠦᠭᠡᠢ ᠶᠠᠪᠤᠯᠲᠠ ᠪᠠᠨ ᠬᠤᠷᠳᠤᠰᠬᠠᠬᠤ ᠳ᠋ᠤ᠌᠄
— ᠬᠥᠶᠢ ᠡᠷᠬᠢᠮ ᠠ᠋! ᠲᠠ ᠶᠠᠭᠤᠮᠠ ᠪᠠᠨ ᠭᠡᠭᠡᠯᠡ ᠭᠡᠵᠦ ᠳᠠᠬᠢᠨ ᠳᠠᠭᠤᠳᠠᠨ ᠭᠢᠨᠵᠢ ᠪᠡᠨ ᠬᠠᠵᠢᠭᠢᠨᠠᠭᠤᠯᠤᠨ ᠭᠦᠶᠦᠬᠦ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃
ᠡᠨᠡ ᠳᠠᠷᠤᠢ ᠭᠠᠮᠢᠩ ᠤ᠋ᠳ《ᠬᠠᠢ ᠵᠣᠭᠰᠣ》 ᠭᠡᠵᠦ ᠬᠠᠰᠬᠢᠷᠪᠠ᠃ ᠨᠢᠭᠡ ᠨᠢ ᠪᠦᠷ ᠫᠤᠤ ᠪᠠᠨ ᠮᠥᠷᠦᠨ ᠡᠴᠡ ᠪᠡᠨ ᠠᠪᠤᠨ ᠤᠷᠢᠲᠠᠢ ᠪᠠᠨ ᠪᠠᠷᠢᠨ ᠭᠦᠶᠦᠨ ᠢᠷᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠣᠳᠣ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠭᠠᠮᠢᠩ ᠤ᠋ᠨ ᠭᠠᠷ ᠳᠤ ᠣᠷᠣᠬᠤ ᠶ᠋ᠢ ᠰᠠᠨᠠᠨ ᠡᠷᠭᠢᠨ ᠬᠠᠷᠠᠪᠠ᠃ ᠥᠨᠥᠬᠢ ᠡᠷᠡ᠂ ᠭᠠᠮᠢᠩ ᠳ᠋ᠤ᠌ ᠭᠠᠷ ᠲᠠᠭᠠᠨ ᠪᠠᠷᠢᠭᠰᠠᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠦᠵᠡᠭᠦᠯᠦᠨ᠄《ᠡᠨᠡ ᠬᠥᠮᠦᠨ ᠭᠡᠭᠡᠭᠰᠡᠨ ᠶᠦᠮ》 ᠭᠡᠳ ᠪᠦᠯᠢᠶᠡᠨ ᠠᠪᠬᠤ ᠶ᠋ᠢ ᠵᠠᠪᠳᠤᠬᠤ ᠳ᠋ᠤᠨᠢ᠂
— ᠮᠠᠢ ᠡᠷᠬᠢᠮ ᠠ᠋᠂ ᠡᠨᠡ ᠲᠠᠨ ᠤ᠋ ᠮᠥᠩᠭᠥ ᠭᠡᠵᠦ ᠭᠢᠨᠵᠢᠲᠦ ᠡᠷᠡ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠤᠷᠤᠭᠰᠢ ᠵᠢᠳᠬᠦᠪᠡ᠃《ᠦᠭᠡᠢ ᠴᠢ ᠠᠪ! ᠴᠢᠮᠠᠶ᠋ᠢ ᠠᠪᠤᠭ ᠭᠡᠵᠦ ᠤᠨᠠᠭᠠᠭᠰᠠᠨ ᠶᠤᠮ》 ᠭᠡᠵᠦ ᠬᠡᠯᠡᠶᠡ ᠭᠡᠲᠡᠯᠡ᠂ ᠭᠠᠮᠢᠩ ᠮᠣᠩᠭᠣᠯ ᠬᠡᠯᠡ ᠭᠠᠳᠠᠷᠯᠠᠳᠠᠭ ᠪᠣᠯᠤᠯᠲᠠᠢ᠂ ᠭᠢᠨᠵᠢᠲᠦ ᠡᠷᠡ᠂ ᠲᠡᠭᠦᠨ ᠦ᠌ ᠭᠠᠷ ᠳᠠᠬᠢ ᠶᠠᠩᠴᠢᠶᠠᠨ᠂ ᠪᠠᠯᠳᠠᠨᠴᠡᠷᠢᠩ ᠭᠤᠷᠪᠠ ᠶ᠋ᠢ ᠡᠭᠡᠯᠵᠢᠯᠡᠭᠦᠯᠦᠨ ᠬᠠᠷᠠᠨᠠ᠃
— ᠪᠢ ᠬᠡᠭᠡᠯᠡ ᠭᠡᠵᠢ ᠤᠤ? ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠡᠪᠦᠷ ᠲᠡᠭᠡᠨ ᠭᠠᠷ ᠢ᠋ᠶ᠋ᠠᠨ ᠬᠢᠨ ᠬᠣᠶᠠᠳᠠᠬᠢ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠠᠪᠤᠪᠠ᠃ ᠲᠡᠭᠡᠭᠡᠳ ᠮᠥᠩᠭᠥ ᠦᠭᠡᠢᠯᠡᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠡᠭᠡᠷᠡᠨ ᠲᠡᠢᠮᠦ ᠪᠠᠢᠨᠠ ᠭᠡᠳ ᠠᠪᠤᠭᠰᠠᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠭᠠᠷ ᠳᠡᠭᠡᠷᠡ ᠨᠢ ᠲᠠᠯᠪᠢᠩᠭᠤᠲᠠ ᠪᠠᠨ᠄《ᠠᠳᠬᠤ》 ᠭᠡᠵᠦ ᠬᠡᠯᠡ ᠠᠮᠠ ᠪᠠᠨ ᠵᠢᠮᠢᠢᠪᠡ᠃ ᠬᠥᠭᠡᠷᠦᠬᠦᠢ ᠡᠷᠡ ᠤᠴᠢᠷ ᠢ᠋ ᠣᠢᠯᠠᠭᠠᠯᠠ᠃ ᠭᠠᠷ ᠢ᠋ᠶ᠋ᠠᠨ ᠬᠣᠢᠰᠢ ᠶᠠᠭᠠᠷᠠᠨ ᠲᠠᠲᠠᠪᠠ᠃ ᠴᠢᠷᠠᠢ ᠨᠢ ᠬᠠᠴᠢᠨ ᠪᠣᠯᠤᠨ ᠤᠷᠤᠭᠤᠯ ᠨᠢ ᠴᠡᠴᠡᠬᠢᠨᠡᠨ《ᠮᠢᠨᠦ ᠨᠡᠷᠡ ᠭᠤᠤᠵᠤᠤ ᠪᠠᠭᠠᠲᠤᠷ》 ᠭᠡᠵᠦ ᠬᠡᠯᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠬᠠᠷᠢᠭᠤ ᠳᠤᠤᠭᠠᠷᠤᠯ ᠦᠭᠡᠢ ᠡᠷᠭᠢᠨ ᠶᠠᠪᠤᠯᠠ᠃ ᠨᠡᠯᠢᠶᠡᠳ ᠶᠠᠪᠤᠭᠠᠳ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠭᠤᠤᠵᠤᠤ ᠪᠠᠭᠠᠲᠤᠷ ᠪᠤᠰᠤᠳ ᠨᠤᠭᠤᠳ ᠤ᠋ᠨ ᠢ᠋ᠶ᠋ᠠᠨ ᠰᠢᠷᠣᠢ ᠮᠠᠨᠠᠷᠠᠭᠤᠯᠤᠨ ᠭᠠᠵᠠᠷ ᠱᠦᠭᠦᠷᠳᠡᠵᠦ ᠪᠠᠢᠭᠠ ᠶ᠋ᠢᠨ ᠳᠤᠮᠳᠠ ᠭᠠᠭᠴᠠᠭᠠᠷ ᠵᠣᠭᠰᠣᠨ ᠪᠠᠯᠳᠠᠨᠴᠡᠷᠢᠩ ᠢ᠋ ᠰᠢᠷᠳᠡᠭᠰᠡᠭᠡᠷ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠦᠨᠡᠬᠡᠷ ᠪᠠᠶᠠᠷᠯᠠᠭᠰᠠᠨ ᠤ᠋ ᠰᠢᠨᠵᠢ ᠲᠡᠮᠳᠡᠭ ᠮᠥᠨ ᠦ᠌ ᠤᠴᠢᠷ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠬᠠᠮᠤᠭ ᠤ᠋ᠨ ᠳᠡᠭᠡᠳᠦ ᠶ᠋ᠢᠨ ᠢ᠋ᠶ᠋ᠡᠨ ᠦᠢᠯᠡ ᠶ᠋ᠢ ᠬᠢᠭᠰᠡᠨ ᠰᠢᠭ ᠰᠠᠨᠠᠭᠳᠠᠪᠠ᠃
ᠲᠡᠨᠳᠡ ᠡᠴᠡ ᠪᠠᠯᠳᠠᠨᠴᠡᠷᠢᠩ ᠮᠠᠢᠮᠠᠢ ᠬᠣᠲᠠ ᠤᠷᠤᠭᠤ ᠣᠷᠣᠬᠤ ᠵᠠᠭᠤᠷᠠ ᠪᠠᠨ᠄ ᠣᠶᠤᠨᠳᠠᠷᠢ ᠶ᠋ᠢᠨ ᠰᠠᠭᠤᠳᠠᠭ ᠭᠡᠷ ᠲᠦ᠍ ᠰᠢᠭᠤᠳ ᠣᠷᠣᠵᠤ᠂ ᠬᠡᠷᠪᠡ ᠭᠡᠷ ᠲᠦ᠋ᠨᠢ ᠬᠥᠮᠦᠨ ᠪᠠᠢᠪᠠᠰᠤ ᠠᠢᠯ ᠰᠤᠷᠠᠭᠠᠳ ᠭᠠᠷᠬᠤ᠂ ᠭᠠᠷᠤᠭᠰᠠᠨ ᠬᠣᠢᠨᠠ ᠪᠠᠨ ᠣᠶᠤᠨᠳᠠᠷᠢ ᠶ᠋ᠢ ᠵᠠᠪᠠᠯ ᠭᠠᠷᠴᠤ ᠢᠷᠡᠬᠦ ᠪᠠᠢᠬᠤ ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠪᠦᠲᠦᠮᠵᠢᠲᠡᠢ ᠰᠠᠢᠬᠠᠨ ᠢ᠋ ᠪᠣᠳᠣᠯᠠ᠃ ᠣᠶᠤᠨᠳᠠᠷᠢ ᠶ᠋ᠢᠨ ᠬᠢᠨᠢ ᠰᠠᠭᠤᠳᠠᠭ ᠭᠤᠳᠤᠮᠵᠢ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠬᠠᠰᠢᠶᠠ ᠠ᠋ᠴᠠ ᠨᠢ ᠬᠠᠷᠢᠭᠤ ᠦᠭᠡᠢ ᠮᠠᠭᠤ ᠬᠤᠪᠴᠠᠰᠤ ᠲᠠᠢ ᠡᠪᠦᠭᠡᠨ ᠬᠢᠲᠠᠳ ᠭᠠᠯᠵᠠᠭᠤ ᠮᠡᠲᠦ ᠪᠠᠷᠬᠢᠷᠠᠨ ᠭᠠᠷᠴᠤ ᠢᠷᠡᠪᠡ᠃《ᠠᠶᠠ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠪᠣᠢ? ᠡᠨᠡ ᠶᠢᠷᠲᠢᠨᠴᠦ ᠶᠠᠭᠤᠲᠠᠢ ᠮᠠᠭᠤᠬᠠᠢ᠂ ᠵᠠᠯᠠᠭᠤ ᠪᠠᠢᠬᠤ ᠳ᠋ᠤ᠌ ᠨᠢᠳᠦ ᠮᠢᠨᠢ ᠰᠣᠬᠣᠷᠠᠭᠰᠠᠨ᠂ ᠡᠪᠦᠭᠡᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠳᠠᠬᠢᠨ ᠪᠠᠰᠠ ᠨᠢᠭᠡ ᠰᠣᠬᠣᠷᠠᠯᠠ᠃ ᠠᠶᠠ᠂ ᠠᠶᠠ ᠣᠳᠣ ᠨᠠᠳᠠ ᠣᠷᠴᠢᠯᠠᠩ ᠡᠭᠦᠷᠢᠳᠡ ᠬᠠᠷᠠᠩᠭᠤᠢ ᠪᠣᠯᠤᠯᠠ ᠭᠡᠬᠦ ᠮᠡᠲᠦ ᠶ᠋ᠢᠨ ᠡᠬᠢ ᠠᠳᠠᠭ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠬᠠᠰᠬᠢᠷᠤᠨ ᠬᠡᠯᠡᠵᠦ ᠪᠠᠷᠬᠢᠷᠠᠨ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠪᠡᠨ ᠴᠢᠴᠢᠨ ᠭᠣᠢᠪᠠᠭᠠᠨᠠᠨᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠠᠷᠠᠢ ᠳᠡᠭᠡᠷᠡ ᠬᠤᠪᠴᠠᠰᠤ ᠲᠠᠢ ᠨᠢᠭᠡ ᠯᠤᠤ ᠬᠠᠨ ᠦᠭᠡ ᠳᠠᠭᠤ ᠦᠭᠡᠢ ᠳᠥᠰᠢᠨ ᠵᠡᠭᠦᠨ ᠲᠠᠢᠰᠢ ᠴᠢᠭᠯᠡᠭᠦᠯᠦᠨ ᠶᠠᠪᠤᠨᠠ᠃ ᠬᠠᠰᠢᠶᠠ ᠪᠦᠷᠢ ᠡᠴᠡ ᠬᠥᠮᠦᠨ ᠭᠠᠷᠴᠤ ᠭᠠᠷᠴᠤ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠨ ᠭᠤᠨᠢᠭᠲᠤ ᠴᠢᠷᠠᠢ ᠪᠠᠷ ᠠᠵᠢᠭᠯᠠᠨᠠ᠃ ᠭᠠᠭᠴᠠ ᠬᠦ᠌ ᠣᠶᠤᠨᠳᠠᠷᠢ ᠶ᠋ᠢᠨ ᠬᠠᠰᠢᠶᠠᠨ ᠠ᠋ᠴᠠ ᠯᠠ ᠬᠥᠮᠦᠨ ᠭᠠᠷᠴᠤ ᠢᠷᠡᠬᠦ ᠦᠭᠡᠢ ᠪᠠᠢᠯᠠ᠃ ᠪᠠᠯᠳᠠᠨᠴᠡᠷᠢᠩ ᠣᠶᠤᠨᠳᠠᠷᠢ ᠶ᠋ᠢ ᠭᠠᠷᠴᠤ ᠢᠷᠡᠵᠦ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠨᠢ ᠵᠣᠭᠰᠣᠪᠠ᠃ ᠰᠣᠬᠣᠷ ᠬᠢᠲᠠᠳ ᠭᠤᠳᠤᠮᠵᠢ ᠶ᠋ᠢ ᠰᠢᠪᠲᠤᠷᠠᠨ ᠪᠤᠯᠤᠩ ᠲᠣᠭᠣᠷᠢᠵᠤ᠂ ᠬᠠᠰᠢᠶᠠ ᠠ᠋ᠴᠠ ᠪᠠᠨ ᠭᠠᠷᠤᠭᠰᠠᠨ ᠬᠥᠮᠦᠰ ᠴᠥᠮ ᠡᠷᠭᠢᠨ ᠣᠷᠣᠵᠤ ᠤᠭ ᠭᠤᠳᠤᠮᠵᠢ ᠳᠠᠬᠢᠨ ᠠᠯᠢ ᠬᠤᠯᠡᠢ ᠪᠣᠯᠬᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ᠂ ᠣᠶᠤᠨᠳᠠᠷᠢ ᠶ᠋ᠢᠨ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠶ᠋ᠢ ᠠᠶᠠᠷᠬᠠᠨ ᠢ᠋ᠶ᠋ᠠᠷ ᠲᠦᠯᠬᠢᠨ ᠪᠣᠱᠣᠭᠠ ᠶ᠋ᠢ ᠨᠢ ᠳᠠᠪᠠᠯᠠ᠃ ᠭᠡᠲᠡᠯᠡ ᠣᠶᠤᠨᠳᠠᠷᠢ ᠶ᠋ᠢᠨ ᠰᠠᠭᠤᠳᠠᠭ ᠭᠡᠷ ᠦ᠋ᠨ ᠡᠷᠦᠬᠡ ᠪᠦᠲᠦᠭᠡᠯᠭᠡ ᠲᠡᠢ᠂ ᠣᠭᠣᠰᠣᠷ ᠨᠢ ᠪᠤᠷᠤᠭᠤ ᠲᠠᠯᠠ ᠳ᠋ᠠᠭᠠᠨ ᠤᠶᠠᠭᠠᠰᠤᠲᠠᠢ᠂ ᠡᠭᠦᠳᠡ ᠨᠢ ᠪᠦᠳᠦᠭᠦᠨ ᠬᠠᠷᠠ ᠳᠡᠭᠡᠰᠦ ᠪᠡᠷ ᠳᠠᠷᠤᠭᠤᠯᠤᠭᠠᠰᠤᠲᠠᠢ ᠪᠠᠢᠭᠠ ᠨᠢ ᠦᠵᠡᠭᠳᠡᠭᠰᠡᠨ ᠪᠥᠭᠡᠳ ᠡᠨᠡ ᠪᠣᠯ ᠲᠡᠷᠡ ᠭᠡᠷ ᠲᠦ᠍ ᠨᠠᠰᠤ ᠪᠠᠷᠠᠭᠰᠠᠨ ᠬᠥᠮᠦᠨ ᠪᠠᠢᠭᠠ ᠶ᠋ᠢᠨ ᠲᠡᠮᠳᠡᠭ ᠪᠣᠯᠬᠤ ᠤᠴᠢᠷ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠳᠣᠲᠣᠷᠠ ᠫᠠᠯᠬᠢᠨ ᠠᠮᠢᠰᠬᠤᠯ ᠨᠢ ᠲᠠᠰᠤᠯᠳᠠᠪᠠ᠃ ᠭᠡᠷ ᠲᠦ᠍ ᠪᠠᠯᠳᠠᠨᠴᠡᠷᠢᠩ ᠴᠣᠬᠣᠮ ᠶᠠᠮᠠᠷ ᠤᠬᠠᠭᠠᠨ ᠢ᠋ᠶ᠋ᠠᠷ ᠬᠡᠷᠬᠢᠨ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠢ᠋ᠶ᠋ᠡᠨ ᠦᠯᠦ ᠮᠡᠳᠡᠨᠡ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠦᠷᠦᠭ ᠪᠠᠷᠤᠭ ᠤ᠋ᠨ ᠳᠤᠮᠳᠠ ᠬᠦᠷᠡᠩ ᠮᠣᠳᠣᠨ ᠭᠣᠣ ᠲᠠᠢ ᠵᠢᠷᠤᠮᠠᠯ ᠴᠠᠭᠠᠨ ᠳ᠋ᠠᠷᠢ ᠡᠬᠡ ᠶ᠋ᠢᠨ ᠤᠷᠢᠲᠠᠢ ᠨᠢ ᠭᠠᠭᠴᠠ ᠵᠤᠯᠠ᠂ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠴᠠᠭᠠᠨ ᠳ᠋ᠠᠷᠢ ᠡᠬᠡ ᠤᠭ ᠤ᠋ᠨ ᠢ᠋ᠶ᠋ᠠᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠪᠠᠶᠠᠰᠬᠤᠯᠠᠩᠲᠤ ᠳᠦᠷᠢ ᠪᠡᠷ ᠪᠢᠰᠢ᠂《ᠣᠷᠴᠢᠯᠠᠩ ᠬᠣᠷᠸᠠ ᠭᠡᠵᠦ ᠶᠠᠭᠤ ᠪᠣᠢ? ᠬᠠᠷᠠᠵᠠᠭᠠ! ᠡᠨᠡ ᠪᠠᠢᠨᠠ》 ᠭᠡᠵᠦ ᠣᠢ ᠭᠠᠰᠢᠭᠤᠨ ᠳ᠋ᠤ᠌ ᠳᠠᠷᠤᠭᠳᠠᠨ ᠣᠷᠣᠭᠰᠢ ᠰᠢᠷᠲᠡᠬᠦ ᠮᠡᠲᠦ ᠪᠠᠢᠭᠠ ᠨᠢ ᠨᠢᠳᠦᠨ ᠳ᠋ᠦ᠍ ᠲᠤᠰᠤᠭᠰᠠᠨ ᠪᠥᠭᠡᠳ ᠳᠠᠷᠠᠭᠠ ᠨᠢ ᠲᠡᠭᠦᠨ ᠦ᠌ ᠤᠷᠢᠲᠠᠢ ᠮᠣᠳᠣᠨ ᠬᠠᠰᠢᠯᠭᠠᠲᠤ ᠮᠣᠩᠭᠣᠯ ᠣᠷᠣ᠂ ᠣᠷᠣᠨ ᠳᠡᠭᠡᠷᠡ ᠨᠢᠭᠡ ᠬᠥᠮᠦᠨ᠂ ᠲᠣᠯᠣᠭᠠᠢ ᠨᠢ ᠴᠡᠩᠬᠡᠷ ᠬᠠᠳᠠᠭ ᠢ᠋ᠶ᠋ᠠᠷ ᠪᠥᠲᠡᠭᠡᠯᠭᠡᠰᠦᠲᠠᠢ ᠬᠡᠪᠲᠡᠵᠦ ᠪᠠᠢᠯᠠ᠃ ᠡᠨᠡ ᠪᠣᠯ ᠣᠶᠤᠨᠳᠠᠷᠢ᠂ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠨᠢ ᠤᠯᠠᠭᠠᠨ ᠲᠣᠷᠭᠠᠨ ᠬᠥᠨᠵᠢᠯᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠳᠦ ᠲᠠᠯᠠ ᠶ᠋ᠢ ᠪᠢᠲᠡᠭᠦᠦ ᠪᠦᠷᠬᠦᠨ ᠨᠠᠮᠢᠷᠠᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ? ᠪᠠᠯᠳᠠᠨᠴᠡᠷᠢᠩ ᠡᠷᠡᠭᠡᠯᠡᠨ ᠴᠡᠭᠡᠷᠯᠡᠬᠦ᠂ ᠢᠴᠢᠨ ᠵᠣᠪᠠᠬᠤ ᠪᠦᠭᠦᠳᠡ ᠶ᠋ᠢ ᠮᠠᠷᠲᠠᠨ ᠬᠠᠳᠠᠭ ᠢ᠋ ᠰᠢᠭᠦᠷᠡᠨ ᠠᠪᠤᠯᠠ᠃ ᠣᠶᠤᠨᠳᠠᠷᠢ ᠶ᠋ᠢᠨ ᠵᠢᠰᠦ ᠴᠢᠷᠠᠢ᠂ ᠲᠥᠷᠥᠯᠬᠢ ᠰᠠᠢᠬᠠᠨ ᠢ᠋ᠶ᠋ᠠᠨ ᠠᠯᠲᠠᠨ ᠬᠥᠬᠡᠷᠡᠵᠦ ᠵᠠᠷᠢᠮ ᠭᠠᠵᠠᠷ ᠢ᠋ᠶ᠋ᠠᠨ ᠬᠠᠷᠠ ᠲᠣᠯᠪᠣ ᠨᠤᠭᠤᠳ ᠲᠠᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠭᠡᠪᠡᠴᠦ ᠶᠡᠷᠦ ᠠᠮᠢᠳᠤ᠂ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠨᠣᠢᠷᠰᠤᠵᠤ ᠪᠠᠢᠭᠠ ᠰᠢᠭ᠋ ᠪᠠᠢᠭᠠ ᠨᠢ ᠨᠢᠳᠦᠨ ᠳ᠋ᠦ᠍ ᠲᠤᠰᠤᠨᠠ᠃ ᠡᠭᠦᠨ ᠡᠴᠡ ᠴᠠᠭᠠᠰᠢ ᠨᠢᠭᠡ ᠬᠡᠰᠡᠭ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠡᠯᠳ᠋ᠠᠨᠴᠡᠷᠢᠩ᠂ ᠥᠪᠡᠷ ᠢ᠋ᠶ᠋ᠡᠨ ᠦᠯᠦ ᠮᠡᠳᠡᠨᠡ᠃ ᠨᠢᠭᠡ ᠬᠥᠮᠦᠨ ᠣᠶᠤᠨᠳᠠᠷᠢ ᠶ᠋ᠢᠨ ᠴᠡᠭᠡᠵᠢ ᠶ᠋ᠢ ᠲᠠᠩᠨᠠᠨ ᠤᠨᠠᠭᠰᠠᠨ ᠢ᠋ ᠨᠢ ᠭᠡᠳᠡᠷᠭᠦ ᠲᠡᠳᠡᠨ ᠥᠨᠳᠡᠢᠯᠭᠡᠵᠦ ᠭᠠᠷ ᠲᠤ ᠠᠳᠬᠤᠭᠠᠰᠤᠲᠠᠢ ᠬᠠᠳᠠᠭ ᠢ᠋ ᠠᠪᠤᠨ ᠣᠶᠤᠨᠳᠠᠷᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠳᠠᠬᠢᠨ ᠪᠦᠲᠡᠭᠡᠯᠡ᠃ ᠡᠷᠭᠢᠵᠦ ᠬᠠᠷᠠᠪᠠᠯ ᠬᠥᠲᠥᠴᠢ ᠲᠦᠪᠰᠢᠨ᠂ ᠲᠦᠪᠰᠢᠨ ᠦ᠌ ᠠᠷᠤ ᠳ᠋ᠤ᠌ ᠪᠡᠶᠡ ᠮᠢᠬᠠᠯᠢᠭ ᠪᠣᠯᠪᠠᠴᠤ ᠰᠢᠨᠵᠢ ᠲᠥᠷᠬᠦ ᠪᠡᠷ ᠢ᠋ᠶ᠋ᠡᠨ ᠣᠶᠤᠨᠳᠠᠷᠢ ᠲᠠᠢ ᠲᠥᠰᠲᠡᠢ ᠨᠢᠭᠡ ᠠᠪᠠᠭᠠᠢ ᠴᠠᠪᠴᠢᠯᠭᠠ ᠦᠭᠡᠢ ᠨᠢᠳᠦ ᠪᠡᠷ ᠭᠥᠯᠢᠷᠡᠨ ᠰᠢᠷᠳᠡᠨᠡ᠃ ᠲᠡᠭᠦᠨ ᠦ᠌ ᠳᠡᠭᠡᠳᠦ ᠲᠠᠯᠠ ᠳ᠋ᠤ᠌ ᠭᠡᠷ ᠦ᠋ᠨ ᠬᠣᠢᠮᠣᠷ ᠲᠠᠪᠢ ᠣᠷᠴᠢᠮ ᠨᠠᠰᠤᠨ ᠤ᠋ ᠡᠷᠡ ᠲᠣᠯᠣᠭᠠᠢ ᠤᠨᠵᠢᠭᠤᠯᠤᠨ ᠭᠠᠵᠠᠷ ᠰᠢᠷᠲᠡᠨᠡ᠃ ᠡᠳᠡᠭᠡᠷ ᠦ᠋ᠨ ᠬᠡᠨ ᠪᠣᠯᠬᠤ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠳᠣᠲᠣᠷᠠ ᠪᠠᠨ ᠲᠠᠭᠠᠪᠤᠷᠢᠯᠠᠨ ᠮᠡᠳᠡᠪᠡ᠃ ᠭᠡᠪᠡᠴᠦ ᠬᠡᠯᠡᠬᠦ ᠶᠠᠷᠢᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠲᠣᠯᠣᠭᠠᠢ ᠪᠠᠨ ᠥᠨᠳᠡᠢᠯᠭᠡᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠠᠷᠤ ᠳ᠋ᠤᠨᠢ ᠨᠢᠭᠡ ᠠᠪᠠᠭᠠᠢ《ᠥᠨᠥᠬᠢ ᠨᠢ ᠮᠥᠨ ᠤᠤ?》 ᠭᠡᠵᠦ ᠬᠡᠨ ᠨᠢᠭᠡᠨ ᠡᠴᠡ ᠠᠰᠠᠭᠤᠬᠤ ᠨᠢ ᠳᠠᠮ ᠲᠣᠮ ᠰᠣᠨᠣᠰᠤᠭᠳᠠᠪᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠲᠦᠪᠰᠢᠨ᠄
— ᠮᠥᠨ ᠭᠡᠬᠦ ᠰᠢᠭ ᠪᠣᠯᠤᠯᠠ᠃
ᠪᠠᠯᠳᠠᠨᠴᠡᠷᠢᠩ ᠦᠭᠡ ᠳᠠᠭᠤ ᠦᠭᠡᠢ ᠪᠥᠭᠡᠳ ᠡᠭᠦᠳᠡ ᠤᠷᠤᠭᠤ ᠶᠠᠪᠤᠪᠠ᠃ ᠤᠷᠳᠤᠭᠤᠷ ᠨᠢ ᠥᠨᠥ ᠠᠪᠠᠭᠠᠢ ᠣᠷᠣᠵᠤ ᠢᠷᠡᠨ ᠡᠮᠦᠨᠡ ᠨᠢ ᠵᠣᠭᠰᠣᠪᠠ᠃ ᠪᠠᠯᠳᠠᠨᠴᠡᠷᠢᠩ ᠢ᠋ ᠦᠵᠡᠨ ᠶᠠᠳᠠᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠰᠢᠷᠳᠡᠭᠰᠡᠨ ᠪᠥᠭᠡᠳ᠄
— ᠴᠢ ᠮᠢᠨᠦ ᠭᠠᠭᠴᠠ ᠥᠬᠢᠨ ᠢ᠋ ᠮᠢᠨᠢ ᠠᠯᠠᠭᠰᠠᠨ ᠭᠡᠵᠦ ᠰᠢᠪᠡᠨᠡᠨ ᠠᠮᠢᠰᠬᠤᠭᠠᠳᠠᠪᠠ᠃
ᠪᠠᠯᠳᠠᠨᠴᠡᠷᠢᠩ ᠭᠠᠢᠬᠠᠯᠠ᠃ ᠪᠢ ᠪᠤᠷᠤᠭᠤ ᠳᠤᠭᠤᠯᠪᠠ ᠤᠤ ᠭᠡᠬᠦ ᠳ᠋ᠡᠭᠡᠨ᠄
— ᠲᠠ ᠶᠠᠭᠤ ᠬᠡᠯᠡᠨᠡ ᠪᠣᠢ? ᠶᠠᠭᠠᠬᠢᠭᠠᠳ ᠲᠠ ᠨᠠᠳᠠ ᠡᠢᠮᠦ ᠦᠭᠡ ᠬᠡᠯᠡᠨᠡ ᠪᠣᠢ? ᠭᠡᠳ ᠬᠣᠢᠰᠢ ᠤᠬᠤᠷᠢᠪᠠ᠃
ᠠᠪᠠᠭᠠᠢ ᠨᠢᠭᠤᠷ ᠢ᠋ᠶ᠋ᠠᠨ ᠳᠠᠷᠤᠨ ᠮᠡᠭᠰᠢᠨ ᠢᠩᠭᠢᠨᠡᠪᠡ᠃
— ᠶᠠᠭᠠᠬᠢᠭᠠᠳ ᠪᠢ ᠠᠯᠠᠭᠰᠠᠨ ᠪᠠᠢᠬᠤ ᠶᠤᠮ ᠪᠣᠢ? ᠭᠡᠵᠦ ᠡᠴᠢᠭᠡ ᠡᠴᠡ ᠨᠢ ᠠᠰᠠᠭᠤᠪᠠ᠃
ᠡᠴᠢᠭᠡ ᠳᠠᠭᠤ ᠦᠭᠡᠢ ᠲᠣᠯᠣᠭᠠᠢ ᠤᠨᠠᠭᠠᠨ ᠳᠣᠷᠣᠭᠰᠢ ᠰᠢᠷᠲᠡᠭᠰᠡᠨ ᠢ᠋ᠶ᠋ᠡᠨ ᠴᠦ᠍ ᠡᠰᠡ ᠥᠭᠡᠷᠡᠴᠢᠯᠡᠪᠡ᠃ ᠭᠡᠲᠡᠯᠡ ᠲᠦᠪᠰᠢᠨ᠄
— ᠦᠭᠡᠢ᠂ ᠬᠦᠦ ᠮᠢᠨᠢ᠂ ᠥᠴᠥᠭᠡᠳᠦᠷ ᠡᠨᠡ ᠪᠤᠷᠬᠠᠨ ᠪᠣᠯᠤᠭᠴᠢ ᠴᠢᠨᠢ ᠲᠠᠨ ᠤ᠋ ᠳ᠋ᠤ᠌ ᠣᠴᠢᠭᠰᠠᠨ ᠰᠢᠦ ᠳᠡ ᠭᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠣᠶᠤᠨᠳᠠᠷᠢ ᠶ᠋ᠢᠨ ᠲᠡᠷᠭᠡᠨ ᠳ᠋ᠦ᠍ ᠠᠩᠬᠠ ᠰᠠᠭᠤᠨ ᠲᠠᠨᠢᠯᠴᠠᠭᠰᠠᠨ ᠠ᠋ᠴᠠ ᠠᠪᠤᠭᠠᠳ ᠡᠳᠦᠢ ᠬᠦᠷᠲᠡᠯᠡ ᠪᠤᠰᠤᠳ ᠤ᠋ᠨ ᠬᠠᠰᠢᠶᠠ ᠶ᠋ᠢ ᠥᠪᠡᠷ ᠦ᠋ᠨ ᠪᠣᠯᠭᠠᠨ ᠦᠨᠡᠮᠰᠢᠭᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ ᠨᠢ ᠰᠠᠨᠠᠭᠳᠠᠨ ᠭᠣᠣᠯ ᠨᠢ ᠬᠠᠷᠠᠯᠠᠪᠠ᠃
— ᠥᠴᠥᠭᠡᠳᠦᠷ ᠬᠡᠳᠦᠢ ᠳ᠋ᠦ᠍ ᠪᠣᠢ? ᠭᠡᠬᠦ ᠳ᠋ᠦ᠍ ᠲᠦᠪᠰᠢᠨ᠄
— ᠠ᠋ ᠬᠠᠷᠠᠯᠠ! ᠴᠢ ᠭᠡᠷ ᠲᠡᠭᠡᠨ ᠪᠠᠢᠭᠠ ᠦᠭᠡᠢ ᠶᠦᠮ ᠰᠠᠨ ᠤᠤ? ᠭᠡᠵᠦ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠨᠢᠭᠤᠷ ᠢ᠋ ᠨᠢ ᠰᠢᠷᠲᠡᠭᠡᠳ᠄
— ᠦᠳᠡ ᠡᠴᠡ ᠬᠣᠢᠰᠢᠳᠠ ᠪᠠᠨ ᠭᠡᠵᠦ ᠲᠦᠪᠰᠢᠨ ᠬᠡᠯᠡᠲᠡᠯᠡ᠂
— ᠠ᠋ ᠴᠠᠪᠠᠰᠤ! ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠳᠠᠭᠤ ᠠᠯᠳᠠᠪᠠ᠃ ᠦᠭᠡᠢ ᠶᠠᠭᠠᠬᠢᠬᠤ ᠭᠡᠵᠦ ᠮᠠᠨ ᠤ᠋ ᠬᠢ ᠤᠷᠤᠭᠤ ᠶᠠᠪᠤᠭᠰᠠᠨ ᠶᠤᠮ ᠪᠣᠢ?
— ᠣᠳᠣ ᠪᠦᠦ ᠮᠡᠳᠡ ᠳᠠ᠂ ᠪᠣᠭᠳᠠ ᠠ᠋ᠴᠠ ᠨᠢᠭᠡ ᠨᠣᠶᠠᠨ ᠤ᠋ ᠬᠦᠦ ᠲᠡᠢ ᠰᠠᠭᠤᠯᠭᠠᠬᠤ ᠭᠡᠰᠡᠨ ᠵᠠᠷᠯᠢᠭ ᠢ᠋ ᠬᠦᠷᠲᠡᠭᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠ ᠯᠠ ᠴᠢᠮᠠ ᠤᠷᠤᠭᠤ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠶᠤᠮ᠂ ᠪᠣᠳᠣᠪᠠᠯ ᠬᠥᠭᠡᠷᠦᠬᠦᠢ ᠮᠢᠨᠢ ᠴᠣᠬᠣᠮ ᠪᠠᠢᠵᠤ ᠶᠠᠳᠠᠬᠤ ᠳ᠋ᠠᠭᠠᠨ ᠯᠠ ᠲᠡᠷᠡ ᠪᠠᠢᠭᠠ᠃
ᠪᠠᠯᠳᠠᠨᠴᠡᠷᠢᠩ ᠰᠣᠢᠪᠣᠨ ᠯᠠᠮᠠ ᠶ᠋ᠢᠨ ᠰᠡᠳᠬᠢᠯ ᠵᠣᠪᠠᠭᠤᠷᠢᠲᠠᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠶᠠᠷᠢᠶᠠᠨ ᠢ᠋ ᠰᠠᠨᠠᠪᠠ᠃ ᠤᠬᠠᠭᠠᠨ ᠨᠢ ᠰᠢᠨᠡ ᠪᠡᠷ ᠪᠠᠯᠠᠷᠳᠠᠨ ᠶᠠᠭᠤ ᠶᠠᠭᠤ ᠦᠭᠡᠢ ᠤᠨᠠᠮᠠᠷ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍᠂ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠡᠷᠭᠦᠨ ᠭᠡᠷ ᠦ᠋ᠨ ᠣᠨᠢ ᠶ᠋ᠢᠨ ᠨᠢᠭᠡ ᠶ᠋ᠢ ᠠᠳᠬᠤᠨ ᠠᠪᠤᠯᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ《ᠪᠣᠭᠳᠠ ᠠᠯᠠᠵᠠᠢ》 ᠭᠡᠳᠡᠭ ᠨᠢᠭᠡ ᠪᠣᠳᠣᠯ ᠣᠷᠣᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠲᠡᠭᠦᠨ ᠢ᠋ᠶ᠋ᠡᠨ ᠪᠠᠷᠢᠵᠤ ᠦᠯᠦ ᠴᠢᠳᠠᠬᠤ ᠠᠵᠢ᠃
— ᠪᠢ ᠪᠢᠰᠢ᠂ ᠪᠣᠭᠳᠠ! ᠪᠣᠭᠳᠠ ᠠᠮᠠᠷᠠᠭ ᠢ᠋ ᠮᠢᠨᠢ ᠠᠯᠠᠵᠠᠢ ᠭᠡᠵᠦ ᠠᠮᠠᠨ ᠠ᠋ᠴᠠ ᠪᠠᠨ ᠭᠠᠷᠭᠠᠨ ᠬᠡᠯᠡᠵᠦ ᠣᠷᠬᠢᠪᠠ᠃ ᠲᠡᠨᠳᠡᠬᠢ ᠬᠥᠮᠦᠰ ᠰᠣᠴᠢᠵᠤ《ᠨᠡᠭᠡᠷᠡᠨ ᠲᠡᠢᠮᠦ!》 ᠭᠡᠬᠦ ᠮᠡᠲᠦ ᠪᠠᠯᠳᠠᠨᠴᠡᠷᠢᠩ ᠢ᠋ ᠬᠠᠷᠠᠪᠠ᠃ ᠳᠠᠷᠠᠭᠠ ᠨᠢ ᠲᠡᠳᠡ᠄《ᠢᠩᠭᠢᠵᠦ ᠬᠡᠯᠡᠵᠦ ᠶᠠᠭᠠᠬᠢᠨ ᠪᠣᠯᠬᠤ ᠪᠢᠯᠡ?》 ᠭᠡᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠵᠠᠭᠠᠨᠠ᠃ ᠳᠤᠮᠳᠠ ᠨᠢ ᠲᠡᠷᠡ ᠡᠬᠡ ᠤᠬᠠᠭᠠᠨ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠠᠶᠤᠬᠤ ᠪᠣᠯᠤᠯᠲᠠᠢ᠂ ᠴᠢᠷᠠᠢ ᠨᠢ ᠴᠠᠢᠷᠠᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠵᠠᠮ ᠢ᠋ ᠲᠠᠭᠯᠠᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠬᠣᠢᠰᠢ ᠤᠬᠤᠷᠢᠪᠠ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠭᠠᠷᠬᠤ ᠭᠡᠬᠦ ᠳ᠋ᠦ᠍ᠨᠢ ᠠᠷᠤ ᠠ᠋ᠴᠠ ᠨᠢ ᠲᠡᠳᠡᠨ᠄《 ᠡᠪᠡᠢ ᠮᠢᠨᠢ!》 ᠭᠡᠵᠦ ᠥᠪᠡᠷ ᠲᠡᠭᠡᠨ ᠥᠭᠦᠯᠡᠭᠡᠳ ᠳᠠᠷᠠᠭᠠ ᠨᠢ᠄
— ᠥᠬᠢᠨ ᠲᠠ ᠬᠣᠶᠠᠷ ᠦᠨᠡᠬᠡᠷ ᠰᠡᠳᠬᠢᠯᠲᠡᠢ ᠪᠠᠢᠭᠰᠠᠨ ᠤᠤ? ᠭᠡᠵᠦ ᠰᠢᠪᠡᠨᠡᠪᠡ᠃
— ᠲᠡᠢᠮᠦ ᠠ᠋᠂ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠰᠡᠳᠬᠢᠯ ᠲᠡᠢ ᠪᠠᠢᠭᠰᠠᠨ᠃
— ᠡᠪᠡᠢ ᠮᠢᠨᠢ᠂ ᠴᠢ ᠲᠡᠭᠦᠨ ᠢ᠋ ᠮᠢᠨᠢ ᠦᠨᠦᠰᠴᠦ ᠪᠠᠢᠭᠰᠠᠨ ᠤᠤ ᠭᠡᠵᠦ ᠴᠢᠬᠢᠨ ᠳ᠋ᠦ᠍ ᠣᠢᠷᠠᠲᠤᠨ ᠰᠢᠪᠡᠨᠡᠪᠡ᠃
— ᠦᠨᠦᠰᠴᠦ ᠪᠠᠢᠭᠰᠠᠨ ᠭᠡᠬᠦ ᠳ᠋ᠦ᠍᠄
— ᠲᠡᠭᠡᠪᠡᠯ ᠪᠢᠳᠡ ᠴᠥᠮ ᠬᠤᠪᠢ ᠵᠠᠶᠠᠭᠠ ᠦᠭᠡᠢ ᠤᠯᠤᠰ ᠶᠤᠮ ᠳᠠ ᠭᠡᠳ ᠠᠪᠠᠭᠠᠢ ᠨᠢᠳᠦ ᠪᠡᠨ ᠠᠨᠢᠨ ᠭᠤᠢᠪᠢᠭᠠᠨᠠᠨᠠ᠃
— ᠲᠡᠢᠮᠦ ᠠ᠋᠂ ᠪᠢᠳᠡ ᠴᠥᠮ ᠬᠤᠪᠢ ᠵᠠᠶᠠᠭᠠ ᠦᠭᠡᠢ ᠤᠯᠤᠰ ᠭᠡᠳ ᠪᠠᠯᠳᠠᠨᠴᠡᠷᠢᠩ ᠭᠡᠷ ᠡᠴᠡ ᠭᠠᠷᠪᠠ᠃ ᠭᠠᠳᠠᠨᠠ ᠲᠠᠭ ᠬᠠᠷᠠᠩᠭᠤᠢ ᠰᠥᠨᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠠᠷᠤ ᠠ᠋ᠴᠠ ᠨᠢ ᠨᠢᠭᠡ ᠬᠥᠮᠦᠨ ᠳ᠋ᠡᠭᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᠮᠥᠨ ᠯᠡ ᠡᠬᠡ᠄
— ᠢᠷᠡᠵᠦ ᠪᠠᠢᠭᠠᠷᠠᠢ! ᠢᠷᠡᠵᠦ ᠪᠠᠢᠭᠠᠷᠠᠢ ᠡᠳᠦᠷ ᠪᠦᠷᠢ ᠢᠷᠡᠵᠦ ᠡᠭᠦᠷᠢᠳᠡ ᠬᠠᠷᠠᠯᠠᠬᠤ ᠭᠣᠣᠯᠲᠤ ᠵᠢᠷᠦᠬᠡ ᠶ᠋ᠢ ᠮᠢᠨᠢ ᠵᠣᠬᠢᠶᠠᠵᠤ ᠪᠠᠢᠭᠠᠷᠠᠢ! ᠭᠡᠵᠦ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠰᠢᠪᠡᠨᠡᠨ ᠢᠩᠭᠢᠨᠡᠨ ᠤᠬᠢᠯᠠᠭᠰᠠᠭᠠᠷ ᠦᠯᠡᠳᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ