ᠠᠵᠢᠷᠭᠠᠨ ᠤ᠋ ᠳᠡᠯ ᠢ᠋ ᠠᠪᠳᠠᠭ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠤᠴᠢᠷAzargany deliig avdaggüi bolsny uchir Азарганы дэлийг авдаггүй болсны учир
453ᠠᠵᠢᠷᠭᠠᠨ ᠤ᠋ ᠳᠡᠯ ᠢ᠋ ᠠᠪᠳᠠᠭ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠤᠴᠢᠷ
ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠳᠣᠮᠣᠭ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠣᠯᠠᠨ ᠠᠳᠤᠭᠤ ᠲᠠᠢ᠂ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠ ᠲᠠᠢ ᠨᠢᠭᠡᠨ ᠠᠳᠤᠭᠤᠴᠢᠨ ᠡᠷᠡ ᠪᠠᠢᠵᠠᠢ᠃ ᠥᠷᠯᠥᠭᠡ ᠪᠦᠷᠢ ᠠᠳᠤᠭᠤᠨ ᠰᠦᠷᠦᠭ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ ᠪᠦᠷᠢᠳᠬᠡᠳᠡᠭ ᠪᠠᠢᠯᠠ᠃
ᠨᠢᠭᠡᠨ ᠥᠷᠯᠥᠭᠡ ᠡᠷᠲᠡᠯᠡᠨ ᠳᠠᠪᠬᠢᠵᠤ ᠣᠴᠢᠪᠠᠯ᠂ ᠠᠳᠤᠭᠤᠨ ᠤ᠋ ᠬᠢᠨᠢ ᠪᠡᠯᠴᠢᠭᠡᠷ ᠲᠦ᠍᠂ ᠨᠢᠭᠡᠨ ᠰᠠᠭᠠᠷᠠᠯ ᠴᠢᠨᠣᠠ ᠦᠬᠦᠴᠢᠬᠡᠭᠰᠡᠨ ᠬᠡᠪᠲᠡᠵᠦ ᠪᠠᠢᠨᠠ ᠭᠡᠨᠡ᠃ ᠮᠠᠨᠢ ᠡᠷᠡ ᠤᠴᠢᠷ ᠢ᠋ ᠡᠰᠡ ᠣᠯᠤᠭᠰᠠᠨ ᠴᠤ᠌ ᠥᠨᠥᠬᠢ ᠴᠢᠨᠣᠠ ᠶ᠋ᠢ ᠭᠠᠨᠵᠤᠭᠠᠯᠠᠭᠠᠳ ᠬᠠᠷᠢᠵᠠᠢ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠢᠷᠡᠬᠦ ᠳ᠋ᠦ᠍ ᠂ ᠳᠠᠬᠢᠨ ᠨᠢᠭᠡ ᠴᠢᠨᠣᠠ ᠦᠬᠦᠭᠰᠡᠨ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠶᠡᠬᠡᠳᠡ ᠭᠠᠢᠬᠠᠵᠤ᠂ ᠴᠣᠬᠣᠮ ᠶᠠᠮᠠᠷ ᠠᠮᠢᠲᠠᠨ ᠢᠩᠭᠢᠵᠦ ᠴᠢᠨᠣᠠ ᠶ᠋ᠢ ᠪᠠᠷᠢᠭᠠᠳ ᠪᠠᠢᠭᠠ ᠤᠴᠢᠷ ᠢ᠋ ᠣᠯᠬᠤ ᠪᠠᠷ ᠠᠳᠤᠭᠤ ᠪᠠᠨ ᠮᠠᠨᠠᠵᠤ ᠬᠣᠨᠣᠵᠠᠢ᠃ ᠲᠡᠭᠡᠲᠡᠯᠡ ᠦᠷ ᠦ᠋ᠨ ᠴᠠᠭᠠᠨ ᠭᠡᠭᠡᠨ ᠢ᠋ᠶ᠋ᠡᠷ ᠬᠡᠳᠦᠨ ᠴᠢᠨᠣᠠ ᠠᠳᠤᠭᠤ ᠤᠷᠤᠭᠤ ᠨᠢ ᠣᠢᠷᠠᠲᠤᠵᠤ ᠢᠷᠡᠬᠦ ᠳ᠋ᠦ᠍᠂ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠ ᠨᠢ ᠠᠳᠤᠭᠤ ᠪᠠᠨ ᠬᠠᠩᠭᠢᠨᠠᠲᠠᠯᠠ ᠬᠤᠷᠢᠶᠠᠭᠠᠳ᠂ ᠥᠨᠥᠬᠢ ᠴᠢᠨᠣᠠ ᠨᠤᠭᠤᠳ ᠲᠠᠢ ᠦᠵᠡᠯᠴᠡᠵᠦ ᠪᠠᠢᠨᠠ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠰᠡᠷᠪᠡᠭᠡᠨ ᠳᠡᠭᠡᠷᠡ ᠨᠢ ᠬᠠᠷᠠᠢᠨ ᠭᠠᠷᠤᠭᠰᠠᠨ ᠴᠢᠨᠣᠠ ᠶ᠋ᠢ ᠤᠷᠲᠤ ᠳᠡᠯ ᠳ᠋ᠡᠭᠡᠨ ᠣᠷᠢᠶᠠᠴᠠᠯᠳᠤᠭᠤᠯᠤᠨ ᠭᠠᠵᠠᠷ ᠰᠠᠪᠠᠵᠤ ᠠᠯᠠᠬᠤ ᠶ᠋ᠢ ᠬᠠᠷᠠᠵᠠᠢ᠃ ᠠᠳᠤᠭᠤᠴᠢᠨ ᠡᠷᠡ ᠳᠠᠬᠢᠨ ᠨᠢᠭᠡ ᠴᠢᠨᠣᠠ ᠭᠠᠨᠵᠤᠭᠠᠯᠠᠭᠠᠳ ᠠᠳᠤᠭᠤ ᠪᠠᠨ ᠳᠠᠭᠤᠨ ᠭᠡᠷ ᠲᠡᠭᠡᠨ ᠬᠠᠷᠢᠵᠠᠢ ᠭᠡᠨᠡ᠃ ᠲᠡᠷᠡ ᠡᠷᠡ ᠴᠢᠨᠣᠠ ᠶ᠋ᠢᠨ ᠠᠪᠠ ᠳ᠋ᠤ᠌ ᠰᠡᠳᠬᠢᠯ ᠨᠢ ᠰᠢᠨᠤᠵᠤ ᠡᠢᠨᠬᠦ ᠪᠣᠳᠣᠵᠠᠢ᠄《ᠴᠢᠨᠣᠠ ᠠᠪᠠᠯᠠᠬᠤ ᠳ᠋ᠤ᠌ ᠠᠵᠢᠷᠭᠠᠨ ᠤ᠋ ᠮᠢᠨᠢ ᠳᠡᠯ ᠨᠢ ᠰᠠᠭᠠᠳ ᠪᠣᠯᠤᠭᠠᠳ ᠪᠠᠢᠳᠠᠭ ᠶᠤᠮ ᠪᠠᠢᠨᠠ᠂ ᠳᠡᠯ ᠢ᠋ ᠨᠢ ᠳᠠᠭᠠᠷᠢᠵᠤ ᠠᠪᠬᠤ ᠬᠡᠷᠡᠭᠲᠡᠢ᠂ ᠲᠡᠭᠡᠪᠡᠯ ᠬᠠᠷᠠ ᠠᠵᠢᠷᠭᠠ ᠮᠢᠨᠢ ᠴᠢᠨᠣᠠ ᠨᠤᠭᠤᠳ ᠢ᠋ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠨᠢ ᠪᠠᠷᠢᠬᠤ ᠶᠤᠮ ᠪᠠᠢᠨᠠ᠃》 ᠭᠡᠮᠡᠨ ᠰᠡᠳᠬᠢᠵᠡᠢ᠃ ᠲᠡᠭᠡᠭᠡᠳ ᠠᠵᠢᠷᠭᠠ ᠪᠠᠨ ᠪᠠᠷᠢᠵᠤ ᠠᠪᠤᠭᠠᠳ ᠳᠡᠯ ᠢ᠋ ᠨᠢ ᠳᠠᠭᠠᠷᠢᠴᠢᠬᠠᠭᠠᠳ ᠠᠳᠤᠭᠤᠨ ᠳ᠋ᠤᠨᠢ ᠪᠤᠴᠠᠭᠠᠨ ᠲᠠᠯᠪᠢᠵᠠᠢ᠃ ᠬᠠᠷᠠ ᠠᠵᠢᠷᠭᠠ ᠮᠢᠨᠢ ᠬᠡᠳᠦᠨ ᠴᠢᠨᠣᠠ ᠪᠠᠷᠢᠭᠰᠠᠨ ᠪᠣᠯ ᠠ᠋! ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠨᠣᠢᠷ ᠨᠢ ᠬᠤᠯᠵᠢᠭᠰᠠᠨ ᠵᠠᠯᠠᠭᠤ ᠂ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠴᠤ ᠠᠳᠤᠭᠤᠨ ᠳᠡᠭᠡᠷᠡ ᠪᠡᠨ ᠳᠠᠪᠬᠢᠨ ᠬᠦᠷᠪᠡᠯ ᠂ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠬᠢᠨᠢ ᠰᠡᠷᠪᠡᠭᠡᠨ ᠳ᠋ᠦ᠍ ᠴᠢᠨᠣᠠ ᠶ᠋ᠢᠨ ᠰᠣᠶᠣᠭᠠ ᠨᠡᠪᠲᠡ ᠣᠷᠣᠵᠤ ᠂ ᠤᠯᠠᠮ ᠢ᠋ᠶ᠋ᠠᠷ ᠠᠵᠢᠷᠭᠠ ᠨᠢ ᠦᠬᠦᠴᠢᠬᠡᠭᠰᠡᠨ ᠪᠠᠢᠵᠠᠢ᠃ ᠤᠴᠢᠷ ᠨᠢ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠭᠠᠭᠴᠠ ᠵᠡᠪᠰᠡᠭ ᠨᠢ ᠲᠡᠭᠦᠨ ᠦ᠌ ᠰᠦᠷ ᠵᠢᠪᠬᠤᠯᠠᠩᠲᠤ ᠳᠡᠯ ᠨᠢ ᠪᠠᠢᠭᠰᠠᠨ ᠪᠠ! ᠳᠡᠯ ᠦ᠋ᠨ ᠢ᠋ᠶ᠋ᠡᠨ ᠠᠴᠢ ᠪᠠᠷ ᠬᠡᠭᠡᠷᠡ ᠶ᠋ᠢᠨ ᠠᠷᠢᠶᠠᠲᠠᠨ ᠨᠤᠭᠤᠳ ᠠ᠋ᠴᠠ ᠢᠵᠢᠯᠢ ᠰᠦᠷᠦᠭ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠵᠤ ᠪᠠᠢᠭᠰᠠᠨ ᠪᠠᠢᠵᠠᠢ᠃ ᠡᠨᠡ ᠶᠠᠪᠤᠳᠠᠯ ᠠ᠋ᠴᠠ ᠬᠣᠢᠰᠢ ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ ᠮᠠᠩᠯᠠᠢ ᠠᠵᠢᠷᠭᠠᠨ ᠤ᠋ ᠳᠡᠯ ᠢ᠋ ᠠᠪᠬᠤ ᠪᠠᠨ ᠪᠣᠯᠢᠭᠰᠠᠨ ᠭᠡᠳᠡᠭ᠃
ᠦᠰᠦᠭ ᠬᠠᠳᠠᠭᠴᠢ᠄ ᠵᠢᠷᠠᠨᠲᠠᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵᠢᠷᠠᠨᠲᠠᠢ
ᠬᠢᠨᠠᠭᠴᠢ᠄ ᠤᠤᠭᠠᠨᠵᠢᠳ