ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠬᠣᠶᠠᠳᠤᠭᠠᠷ ᠪᠦᠯᠦᠭ᠂ᠥᠯᠵᠡᠢᠵᠢᠷᠭᠠᠯ– ᠭᠢᠯᠠᠯᠵᠠᠭᠰᠠᠨ ᠨᠢᠭᠡ ᠨᠠᠰᠤ7(1) Шинэлам – 2-р бүлэг᠂ Өлзийжаргал– гялалзсан нэг нас 7(1)
13ᠳᠣᠯᠣᠭᠠ᠂ ᠭᠠᠳᠠᠭᠠᠳᠤ ᠳ᠋ᠤ᠌ ᠰᠤᠷᠤᠯᠴᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠨᠢ
(ᠨᠢᠭᠡ) ᠂ ᠠᠶᠠᠨ ᠤ᠋ ᠵᠠᠮ ᠳ᠋ᠠᠭᠠᠨ
1924 ᠣᠨ ᠤ᠋8 ᠰᠠᠷᠠ ᠳ᠋ᠤ᠌ ᠰᠢᠨᠠᠯᠠᠮᠠ ᠪᠡᠭᠡᠵᠢᠩ ᠡᠴᠡ ᠥᠪᠡᠷ ᠦ᠋ᠨ ᠨᠤᠲᠤᠭ ᠭᠠᠯᠠᠭᠤᠲᠤ ᠶ᠋ᠢᠨ ᠪᠤᠵᠠᠢ ᠳ᠋ᠠᠭᠠᠨ ᠪᠤᠴᠠᠨ ᠢᠷᠡᠵᠡᠢ᠃ ᠲᠡᠭᠦᠨ ᠢ᠋ ᠬᠠᠷᠢᠵᠤ ᠢᠷᠡᠬᠦ ᠡᠴᠡ ᠡᠮᠦᠨᠡ ᠨᠤᠲᠤᠭ ᠤ᠋ᠨ ᠬᠢᠨᠢ ᠲᠠᠨᠲᠠᠷ ᠲᠠᠢᠵᠢ ᠭᠡᠭᠴᠢ ᠬᠥᠮᠦᠨ ᠳᠤᠭᠤᠢᠯᠠᠩ ᠠ᠋ᠴᠠ ᠤᠷᠪᠠᠵᠤ ᠦᠦᠰᠢᠨ ᠨᠣᠶᠠᠨ ᠤ᠋ ᠲᠠᠪᠢᠨ ᠴᠡᠷᠢᠭ ᠦ᠋ᠨ ᠲᠣᠮᠢ ᠲᠦᠷᠦᠭᠦᠦ ᠪᠣᠯᠴᠢᠬᠠᠭᠠᠳ ᠰᠢᠨᠠᠯᠠᠮᠠ ᠶ᠋ᠢ ᠬᠠᠷᠢᠵᠤ ᠢᠷᠡᠪᠡᠯ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠪᠠᠷᠢᠪᠴᠢᠯᠠᠬᠤ ᠪᠠᠷ ᠭᠡᠲᠡᠨ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃ ᠰᠢᠨᠡᠯᠡᠮᠡ ᠶ᠋ᠢ ᠢᠷᠡᠮᠡᠭᠴᠡ ᠳᠤᠭᠤᠢᠯᠠᠩ ᠤ᠋ᠨ ᠨᠥᠬᠥᠳ ᠨᠢ ᠡᠨᠡ ᠪᠠᠢᠳᠠᠯ ᠢ᠋ ᠲᠡᠭᠦᠨ ᠳ᠋ᠦ᠍ ᠳᠠᠮᠵᠢᠭᠤᠯᠤᠭᠰᠠᠨ ᠳ᠋ᠤ᠌ ᠰᠢᠨᠡᠯᠡᠮᠡ ᠴᠦ᠍ ᠰᠡᠷᠡᠮᠵᠢ ᠲᠡᠢ ᠪᠠᠢᠵᠤ ᠡᠳᠦᠷ ᠲᠦ᠍ ᠪᠤᠷᠭᠠᠰᠤᠨ ᠳᠥᠭᠥᠮ ᠪᠤᠶᠤ ᠳᠠᠯᠳᠠ ᠭᠠᠵᠠᠷ ᠢ᠋ᠶ᠋ᠠᠷ ᠨᠢᠭᠤᠵᠤ ᠰᠥᠨᠢ ᠨᠢ ᠳᠤᠭᠤᠢᠯᠠᠩ ᠤ᠋ᠨ ᠠᠨᠳᠠ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠭᠡᠷ ᠡᠷᠦᠬᠡ ᠪᠡᠷ ᠨᠢᠭᠤᠨ ᠳᠠᠯᠳᠠᠯᠠᠵᠤ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠬᠡᠷᠬᠢᠨ ᠲᠡᠮᠡᠴᠡᠨ ᠣᠯᠬᠤ ᠬᠤᠪᠢᠰᠬᠠᠯ ᠤ᠋ᠨ ᠲᠤᠬᠠᠢ ᠣᠯᠠᠨ ᠳ᠋ᠠᠭᠠᠨ ᠤᠬᠠᠭᠤᠯᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠠᠯᠬᠠ ᠮᠣᠩᠭᠣᠯ ᠳ᠋ᠤ᠌ ᠬᠤᠪᠢᠰᠬᠠᠯ ᠢᠯᠠᠯᠲᠠ ᠣᠯᠤᠭᠰᠠᠨ ᠲᠤᠯᠠ ᠲᠡᠨᠳᠡ ᠣᠴᠢᠵᠤ ᠰᠤᠷᠤᠯᠴᠠᠬᠤ ᠲᠤᠬᠠᠢ ᠨᠥᠬᠥᠳ ᠲᠡᠢ ᠪᠡᠨ ᠵᠥᠪᠳᠡᠯᠴᠡᠵᠦ᠂ ᠨᠢᠭᠡ ᠪᠦᠯᠦᠭ ᠬᠥᠮᠦᠰ ᠢ᠋ ᠳᠠᠭᠠᠭᠤᠯᠵᠤ ᠶᠠᠪᠤᠬᠤ ᠪᠠᠷ ᠨᠢᠭᠤᠴᠠ ᠪᠠᠷ ᠪᠡᠯᠡᠳᠦᠯᠡ᠃
8 ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠶ᠋ᠢᠨ ᠨᠢᠭᠡᠨ ᠥᠯᠵᠡᠢᠲᠦ ᠡᠳᠦᠷ ᠢ᠋ ᠰᠣᠩᠭᠣᠵᠤ ᠰᠠᠢᠰᠢᠩᠭᠠ᠂ ᠮᠠᠨᠳᠤᠬᠤᠥ᠌ᠯᠵᠠᠢ᠂ ᠴᠣᠭᠲᠤ᠂ ᠰᠠᠷᠪᠠᠵᠠᠪ᠂(ᠬᠠᠯᠵᠠᠨ) ᠪᠠᠯᠳᠠᠨ᠂ ᠨᠢᠮᠠᠷᠢᠨᠴᠢᠨ᠂ ᠳᠠᠷᠢᠮᠠ᠂ ᠰᠡᠷᠡᠩᠷᠤᠯᠮᠠ᠂ ᠳᠠᠨᠽᠠᠨ᠂ ᠰᠠᠮᠪᠤᠤ᠂ ᡀᠠᠮᠥ᠋ᠵᠠᠪ᠂ ᠲᠡᠭᠦᠰᠵᠢᠷᠭᠠᠯᠠᠩ᠂ ᠲᠦᠪᠰᠢᠨ᠂ ᠰᠤᠩᠨᠠᠢ᠂ ᠭᠦᠩᠭᠠ(ᠰᠢᠨᠠᠯᠠᠮᠠ ᠶ᠋ᠢᠨ ᠬᠦᠦ᠂14 ᠨᠠᠰᠤᠲᠠᠢ) ᠪᠣᠯᠤᠨ ᠰᠢᠨᠠᠯᠠᠮᠠ ᠲᠠᠢ ᠨᠡᠢᠲᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠰᠡᠮᠡᠬᠡᠷ ᠰᠢᠨᠡᠯᠡᠮᠡ ᠶ᠋ᠢᠨ ᠭᠡᠷ(ᠥᠨᠥ ᠶ᠋ᠢᠨ ᠭᠠᠯᠠᠭᠤᠲᠤ ᠰᠤᠮᠤᠨ ᠤ᠋ ᠪᠤᠵᠠᠢ ᠭᠠᠴᠠᠭᠠᠨ ᠤ᠋ ᠬᠠᠰᠪᠠᠶᠠᠷ ᠤ᠋ᠨ ᠪᠡᠯᠴᠢᠭᠡᠷ ᠭᠠᠵᠠᠷ ᠲᠤ᠌ ᠪᠠᠢᠭᠠ ᠰᠢᠨᠡᠯᠡᠮᠡ ᠶ᠋ᠢᠨ ᠬᠠᠭᠤᠴᠢᠨ ᠨᠤᠲᠤᠭ) ᠲᠤ᠌ ᠴᠤᠭᠯᠠᠷᠠᠪᠠ᠃ ᠲᠡᠳᠡ ᠠᠶᠠᠨ ᠤ᠋ ᠬᠦᠨᠡᠰᠦ ᠬᠠᠭᠤᠷᠤᠭᠰᠠᠨ ᠠᠮᠤ᠂ ᠴᠥᠷᠮᠡ ᠲᠣᠰᠣ᠂ ᠪᠤᠳᠠᠭᠠ᠂ ᠬᠠᠲᠠᠭᠰᠠᠨ ᠮᠢᠬᠠ ᠵᠡᠷᠭᠡ ᠪᠣᠯᠤᠨ ᠭᠠᠤᠯᠢᠨ ᠲᠣᠭᠣᠭᠠ ᠰᠢᠨᠠᠭᠠ ᠪᠠᠨ ᠮᠣᠷᠢᠨ ᠳ᠋ᠠᠭᠠᠨ ᠭᠠᠨᠵᠤᠭᠠᠯᠠᠵᠤ᠂ ᠰᠢᠨᠡᠯᠡᠮᠡ ᠶ᠋ᠢᠨ ᠭᠡᠷ ᠦ᠋ᠨ ᠵᠡᠭᠦᠨ ᠬᠣᠢᠲᠤᠬᠢ ᠥᠨᠳᠥᠷ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳ᠋ᠠᠬᠢ ᠰᠢᠨᠠᠯᠠᠮᠠ᠂ ᠪᠦᠷᠢᠨᠪᠠᠶᠠᠷ᠂ ᠳᠠᠮᠪᠠᠷᠠᠪᠰᠠᠯ ᠵᠡᠷᠭᠡ ᠡᠷᠦᠬᠡ ᠶ᠋ᠢᠨ ᠲᠠᠬᠢᠵᠤ ᠰᠢᠲᠦᠳᠡᠭ ᠡᠷᠲᠡᠨ ᠦ᠌ ᠮᠣᠩᠭᠣᠯᠴᠤᠳ ᠤ᠋ᠨ ᠪᠥᠬᠡ ᠮᠥᠷᠭᠥᠯ ᠦ᠋ᠨ ᠱᠠᠰᠢᠨ ᠤ᠋ ᠲᠤᠩᠭᠠᠯᠠᠭ ᠤ᠋ᠨ ᠣᠪᠣᠭᠠᠨ ᠳᠡᠭᠡᠷᠡ ᠭᠠᠷᠴᠠᠭᠠᠪᠠ᠃ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠢ ᠭᠦᠷᠦᠨ ᠳ᠋ᠦ᠍ ᠠᠶᠠᠯᠠᠬᠤ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠮᠣᠷᠳᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠨᠤᠲᠤᠭ ᠤᠰᠤᠨ ᠤ᠋ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠳ᠋ᠤ᠌ ᠵᠠᠯᠪᠠᠷᠢᠨ ᠮᠥᠷᠭᠥᠵᠦ ᠳᠠᠭᠠᠳᠬᠠᠯ ᠬᠢᠭᠡᠳ ᠬᠣᠢᠰᠢ ᠮᠣᠷᠳᠠᠵᠠᠢ᠃ ᠲᠡᠳᠡ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠭᠠᠵᠠᠷ ᠠ᠋ᠴᠠ ᠵᠠᠭᠤ ᠭᠠᠷᠤᠢ ᠭᠠᠵᠠᠷ ᠠᠶᠠᠯᠠᠵᠤ ᠣᠲᠣᠭ ᠬᠤᠰᠢᠭᠤᠨ ᠤ᠋ ᠬᠠᠷᠢᠶᠠᠨ ᠭᠠᠵᠠᠷ ᠲᠤ᠌ ᠬᠦᠷᠴᠡᠢ᠃
ᠲᠡᠳᠡ ᠠᠶᠠᠨ ᠵᠠᠮ ᠤ᠋ᠨ ᠲᠤᠷᠰᠢ ᠠᠢᠯ ᠡᠷᠦᠬᠡ ᠳ᠋ᠦ᠍ ᠣᠷᠣᠯ ᠦᠭᠡᠢ ᠬᠠᠭᠤᠷᠠᠢ ᠬᠦᠨᠡᠰᠦ ᠪᠡᠨ ᠢᠳᠡᠵᠦ ᠶᠠᠪᠤᠭᠰᠠᠭᠠᠷ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠥᠨᠳᠥᠷ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ ᠬᠠᠷᠠᠬᠤᠯᠠ ᠵᠡᠷᠭᠡᠯᠡᠳᠡᠭᠡ ᠬᠡᠳᠦᠨ ᠡᠷᠦᠬᠡ ᠶ᠋ᠢᠨ ᠰᠠᠭᠤᠷᠢᠰᠢᠯ ᠠ᠋ᠴᠠ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠰᠤᠭᠤᠨᠠᠭᠯᠠᠨ ᠦᠵᠡᠭᠳᠡᠨᠡ᠃ ᠲᠡᠳᠡᠨᠦᠰ ᠦ᠋ᠨ ᠳᠣᠲᠣᠷᠠ ᠨᠠᠷᠠᠨ ᠭᠠᠷᠤᠭᠰᠠᠨ ᠰᠢᠭ᠋ ᠪᠠᠶᠠᠷᠯᠠᠯᠠ᠂ ᠣᠳᠣ ᠲᠡᠷᠡ ᠠᠢᠯ ᠤ᠋ᠳ ᠲᠤ᠌ ᠣᠴᠢᠪᠠᠯ ᠤᠰᠤ ᠤᠤᠭᠤᠬᠤ ᠪᠠᠢᠲᠤᠭᠠᠢ ᠬᠣᠭᠣᠯᠠ ᠴᠤ᠌ ᠴᠢᠨᠠᠭᠠᠳ ᠪᠡᠯᠡᠳᠬᠡᠴᠢᠬᠡᠭᠰᠡᠨ ᠪᠠᠢᠬᠤ ᠰᠢᠭ᠋ ᠪᠣᠳᠣᠭᠳᠠᠨᠠ᠃ ᠣᠴᠢᠵᠠᠭᠠᠶᠠ ᠭᠡᠵᠦ ᠵᠢᠯᠣᠭᠣ ᠰᠤᠩᠭᠠᠬᠤ ᠳ᠋ᠤ᠌ ᠰᠢᠨᠡᠯᠡᠮᠡ ᠡᠴᠡ᠄《 ᠴᠢ ᠪᠢᠳᠡ ᠬᠠᠲᠤᠨ ᠭᠣᠣᠯ ᠤ᠋ᠨ ᠵᠠᠬᠠ ᠬᠥᠪᠡᠭᠡ ᠳ᠋ᠦ᠍ ᠬᠦᠷᠬᠦ ᠡᠴᠡ ᠡᠮᠦᠨᠡ ᠠᠢᠯ ᠡᠷᠦᠬᠡ ᠳ᠋ᠦ᠍ ᠣᠷᠣᠵᠤ ᠪᠣᠯᠬᠤ ᠦᠭᠡᠢ᠂ ᠤᠴᠢᠷ ᠨᠢ ᠪᠢᠳᠡ ᠪᠤᠷᠤᠭᠤᠯᠠᠨ ᠶᠠᠪᠤᠵᠤ ᠪᠠᠢᠬᠤ ᠲᠤᠯᠠ ᠬᠥᠮᠦᠨ ᠳ᠋ᠦ᠍ ᠮᠡᠳᠡᠭᠳᠡᠴᠢᠬᠡᠪᠡᠯ ᠰᠠᠭᠠᠳ ᠲᠣᠬᠢᠶᠠᠯᠳᠤᠪᠠᠯ ᠶᠠᠭᠠᠬᠢᠨᠠ?》 ᠭᠡᠬᠦ ᠳ᠋ᠦ᠍᠂ ᠲᠦᠪᠰᠢᠨ᠄《 ᠪᠢᠳᠡ ᠦᠦᠰᠢᠨ ᠬᠤᠰᠢᠭᠤᠨ ᠠ᠋ᠴᠠ ᠬᠣᠯᠠᠳᠤᠭᠰᠠᠨ ᠲᠤᠯᠠ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠨᠠ ᠳᠠ? ᠴᠢ ᠪᠢᠳᠡ ᠣᠳᠣ ᠪᠠᠷᠢᠭᠳᠠᠬᠤ ᠠ᠋ᠴᠠ ᠥᠩᠭᠡᠷᠡᠴᠢᠬᠡᠭᠰᠡᠨ ᠰᠢᠦ》 ᠭᠡᠨᠡ᠃ ᠰᠢᠨᠡᠯᠡᠮᠡ ᠢᠨᠢᠶᠡᠮᠰᠦᠭᠯᠡᠨ᠄《ᠳᠤᠭᠤᠢᠯᠠᠩ ᠤ᠋ᠨ ᠳᠠᠢᠰᠤᠨ ᠭᠡᠭᠴᠢ ᠭᠠᠭᠴᠠ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠢᠳᠠᠭ ᠪᠢᠰᠢ ᠰᠢᠦ! ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠡᠪᠴᠢᠶᠡᠨ ᠳ᠋ᠦ᠍ ᠪᠦᠷ ᠯᠡ ᠪᠠᠢᠬᠤ ᠳᠠ᠁》 ᠭᠡᠵᠦ ᠬᠠᠷᠢᠭᠤᠯᠬᠤ ᠳ᠋ᠤ᠌᠂ ᠲᠦᠪᠰᠢᠨ ᠴᠦ᠍ ᠳᠤᠭᠤᠢ ᠪᠣᠯᠵᠤ ᠪᠤᠰᠤᠳ ᠨᠥᠬᠥᠳ ᠴᠦ᠍ ᠤᠴᠢᠷ ᠢ᠋ ᠨᠢ ᠣᠢᠯᠠᠭᠠᠯᠠ᠃
ᠲᠡᠳᠡ ᠠᠶᠠᠯᠠᠯ ᠤ᠋ᠨ ᠵᠠᠮ ᠳ᠋ᠠᠭᠠᠨ ᠭᠠᠵᠠᠷ ᠮᠡᠳᠡᠬᠦ ᠦᠭᠡᠢ᠂ ᠵᠠᠮ ᠴᠦ᠍ ᠲᠠᠨᠢᠬᠤ ᠦᠭᠡᠢ ᠪᠡᠷ ᠵᠦᠭ ᠴᠢᠭ ᠢ᠋ᠶ᠋ᠡᠨ ᠪᠠᠷᠤᠭᠴᠠᠭᠠᠯᠠᠰᠬᠢᠭᠠᠳ ᠶᠠᠪᠤᠵᠠᠭᠠᠨᠠ᠃ ᠣᠯᠠᠩᠬᠢ ᠬᠥᠮᠦᠰ ᠨᠢ ᠡᠷᠦᠬᠡ ᠭᠡᠷ ᠡᠴᠡ ᠪᠡᠨ ᠰᠠᠯᠵᠤ ᠬᠣᠯᠠ ᠶᠠᠪᠤᠵᠤ ᠥᠩᠭᠡᠷᠡᠭᠰᠡᠨ ᠦᠭᠡᠢ ᠲᠤᠯᠠ ᠢᠩᠭᠢᠵᠦ ᠴᠠᠩᠭᠠᠵᠤ ᠵᠦᠳᠡᠷᠡᠬᠦ ᠶᠢ ᠶᠡᠷᠦ ᠦᠵᠡᠭᠡᠳᠦᠢ᠃ ᠬᠣᠭᠣᠯᠠᠢ ᠠᠮᠠ ᠨᠢ ᠬᠠᠲᠠᠭᠠᠳ ᠦᠭᠡ ᠶᠠᠷᠢᠯᠴᠠᠬᠤ ᠴᠤ᠌ ᠳᠤᠷᠠ ᠦᠭᠡᠢ ᠪᠣᠯᠴᠢᠬᠠᠵᠠᠢ᠃ ᠵᠥᠪᠬᠡᠨ ᠥᠯ ᠳᠠᠷᠤᠬᠤ ᠶ᠋ᠢᠨ ᠲᠡᠳᠦᠢ ᠲᠤᠭᠤᠯ ᠤ᠋ᠨ ᠠᠷᠠᠰᠤᠨ ᠲᠤᠯᠤᠮ ᠲᠠᠢ ᠴᠥᠷᠮᠡ ᠬᠠᠭᠤᠷᠤᠭᠰᠠᠨ ᠠᠮᠤ ᠪᠠᠨ ᠪᠠᠭᠠ ᠰᠠᠭᠠ ᠢᠳᠡᠭᠡᠳ《ᠭᠠᠢ ᠳ᠋ᠤ᠌ ᠭᠠᠷᠤᠭᠰᠠᠨ ᠬᠦᠨᠡᠰᠦ ᠪᠡᠨ ᠵᠠᠢ ᠳ᠋ᠤ᠌ ᠭᠠᠷᠴᠤ ᠢᠳᠡᠨᠡ᠁》 ᠭᠡᠵᠦ ᠵᠠᠷᠢᠮ ᠨᠢᠭᠡᠨ ᠨᠢ ᠠᠭᠤᠷ ᠴᠤ᠌ ᠬᠦᠷᠴᠦ ᠶᠠᠪᠤᠨᠠ᠃
ᠲᠡᠳᠡ ᠬᠠᠲᠤᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠶ᠋ᠢ ᠳᠠᠭᠠᠨ ᠶᠠᠪᠤᠭᠰᠠᠭᠠᠷ ᠰᠠᠨ ᠱᠧᠩ ᠬᠦᠩ ᠣᠯᠣᠮ ᠢ᠋ᠶ᠋ᠠᠷ ᠬᠠᠲᠤᠨ ᠭᠣᠣᠯ ᠢ᠋ ᠭᠡᠲᠦᠯᠵᠦ ᠡᠯᠢᠭᠡᠨ ᠬᠠᠢᠷᠠᠲᠤ ᠣᠷᠳᠣᠰ ᠨᠤᠲᠤᠭ ᠠ᠋ᠴᠠ ᠪᠠᠨ ᠠᠶᠠᠷᠯᠠᠯᠠ!
ᠲᠡᠳᠡ ᠬᠠᠲᠤᠨ ᠭᠣᠣᠯ ᠢ᠋ ᠭᠡᠲᠦᠯᠦᠭᠰᠡᠭᠡᠷ ᠳᠠᠯᠠᠢ ᠶ᠋ᠢᠨ ᠲᠦᠪᠰᠢᠨ ᠡᠴᠡ3500 ᠮᠧᠲ᠋ᠷ ᠥᠨᠳᠥᠷ ᠡᠷᠭᠦᠭᠳᠡᠭᠰᠡᠨ ᠠᠯᠠᠱᠠ ᠠᠭᠤᠯᠠ(ᠾᠧ ᠯᠠᠨ ᠱᠠᠨ ᠠᠭᠤᠯᠠ) ᠶ᠋ᠢᠨ ᠠᠷᠤ ᠶ᠋ᠢ ᠴᠢᠭᠯᠡᠨ ᠠᠯᠠᠱᠠ ᠶᠠᠮᠤᠨ ᠳᠠᠷᠤᠢ ᠳ᠋ᠢᠩ ᠶᠤᠸᠠᠨ ᠶᠢᠩ( ᠬᠣᠯᠠᠳᠠᠬᠢᠨ ᠢ᠋ ᠲᠣᠭᠲᠠᠭᠠᠭᠴᠢ ᠬᠣᠷᠢᠶᠠ) ᠳ᠋ᠤ᠌ ᠬᠦᠷᠬᠦ ᠪᠡᠷ ᠠᠶᠠᠯᠠᠯᠠ᠃ ᠬᠡᠷᠪᠡ ᠤᠯᠠᠭᠠᠨᠪᠠᠭᠠᠲᠤᠷ ᠵᠦᠭ ᠶᠠᠪᠤᠪᠠᠯ ᠵᠡᠭᠦᠨ ᠬᠣᠢᠰᠢ ᠶᠠᠪᠤᠬᠤ ᠲᠦᠳᠡ ᠵᠠᠮ ᠢ᠋ ᠰᠣᠩᠭᠣᠬᠤ ᠤᠴᠢᠷ ᠲᠠᠢ ᠪᠠᠢᠵᠠᠢ᠃
ᠠᠯᠠᠱᠠ ᠶ᠋ᠢᠨ ᠪᠣᠷᠵᠢᠭᠢᠨ ᠣᠪᠣᠭᠲᠤ ᠢᠵᠠᠭᠤᠷᠲᠠᠨ ᠨᠣᠶᠠᠳ ᠨᠢ ᠪᠠᠷᠠᠭᠤᠨ ᠬᠣᠢᠲᠤ ᠶ᠋ᠢᠨ ᠴᠥᠭᠡᠨ ᠲᠣᠭᠠᠲᠤ ᠦᠨᠳᠦᠰᠦᠲᠡᠨ ᠦ᠌ ᠤᠷᠪᠠᠯᠭᠠ ᠶ᠋ᠢ ᠣᠯᠠᠨ ᠤᠳᠠᠭᠠ ᠲᠦᠪᠰᠢᠳᠬᠡᠭᠰᠡᠨ ᠴᠢᠰᠤᠨ ᠭᠠᠪᠢᠶᠠ ᠲᠠᠢ ᠭᠡᠵᠦ ᠮᠠᠨᠵᠤ ᠴᠢᠩ ᠦ᠋ᠨ ᠬᠠᠭᠠᠨ ᠳ᠋ᠤ᠌ ᠰᠠᠢᠰᠢᠶᠠᠭᠳᠠᠭᠰᠠᠨ ᠠ᠋ᠴᠠ ᠠᠯᠠᠱᠠ ᠶ᠋ᠢᠨ ᠬᠣᠶᠠᠳᠤᠭᠠᠷ ᠨᠣᠶᠠᠨ ᠠᠪᠤᠤ ᠠ᠋ᠴᠠ ᠡᠬᠢᠯᠡᠭᠡᠳ ᠬᠠᠮᠤᠭ ᠰᠡᠭᠦᠯᠴᠢ ᠶ᠋ᠢᠨ ᠳ᠋ᠠᠨᠢᠵᠠᠨᠠ ᠬᠦᠷᠲᠡᠯᠡ ᠲᠥᠷᠥ ᠶ᠋ᠢᠨ ᠪᠡᠢᠯᠡ᠂ ᠵᠢᠶᠦ᠋ᠨ ᠸᠠᠩ᠂ ᠴᠢᠨ ᠸᠠᠩ ᠵᠡᠷᠭᠡ ᠬᠠᠢᠷᠠ ᠶ᠋ᠢᠨ ᠲᠤᠰᠢᠶᠠᠯ ᠳ᠋ᠤ᠌ ᠡᠷᠭᠦᠮᠵᠢᠯᠡᠭᠳᠡᠵᠦ᠂ ᠮᠠᠨᠵᠤ ᠴᠢᠩ ᠤᠯᠤᠰ ᠤ᠋ᠨ ᠲᠥᠷᠥ ᠶ᠋ᠢᠨ ᠡᠹᠦ᠋(ᠬᠦᠷᠭᠡᠨ) ᠪᠣᠯᠵᠤ ᠬᠠᠭᠠᠨ ᠤ᠋ ᠭᠦᠩᠵᠦ ᠶ᠋ᠢ ᠪᠠᠭᠤᠯᠭᠠᠨ ᠠᠪᠴᠤ ᠲᠥᠷᠥ ᠶ᠋ᠢᠨ ᠭᠡᠭᠡ(ᠬᠠᠭᠠᠨ ᠤ᠋ ᠣᠢᠷᠠ ᠲᠥᠷᠥᠯ ᠦ᠋ᠨ ᠥᠬᠢᠨ) ᠲᠡᠢ ᠤᠷᠤᠭ ᠬᠣᠯᠪᠣᠭᠰᠠᠭᠠᠷ ᠢᠷᠡᠭᠰᠡᠨ ᠪᠥᠭᠡᠳ ᠠᠯᠠᠱᠠ ᠰᠢᠭᠤᠳ ᠴᠢᠩ ᠤᠯᠤᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠳᠠᠭᠠᠳᠤ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠶ᠋ᠢ ᠵᠠᠰᠠᠬᠤ ᠵᠤᠷᠭᠠᠨ ᠳ᠋ᠤᠷ ᠬᠠᠷᠢᠶᠠᠯᠠᠭᠳᠠᠵᠤ ᠪᠠᠢᠵᠠᠢ᠃ ᠡᠢᠮᠦ ᠡᠴᠡ ᠤᠷᠲᠤ ᠤᠳᠠᠭᠠᠨ ᠲᠡᠦᠬᠡ ᠲᠡᠢ ᠡᠨᠡ ᠬᠦ᠌ ᠳ᠋ᠢᠩ ᠶᠤᠸᠠᠨ ᠶᠢᠩ ᠳ᠋ᠦ᠍ ᠠᠯᠤᠰ ᠪᠡᠭᠡᠵᠢᠩ ᠦ᠋ᠨ ᠴᠢᠮᠡᠭᠡ᠂ ᠤᠯᠤᠰ ᠤ᠋ᠨ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠴᠠᠭ ᠤ᠋ᠨ ᠪᠠᠢᠳᠠᠯ ᠲᠤᠩ ᠲᠦᠷᠭᠡᠨ ᠨᠡᠪᠲᠡᠷᠡᠵᠦ᠂ ᠬᠣᠯᠠ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠵᠢᠭᠤᠯᠴᠢᠳ ᠢᠷᠡᠵᠦ ᠶᠠᠪᠤᠬᠤ ᠨᠢ ᠣᠯᠠᠨ ᠪᠠᠢᠳᠠᠭ ᠲᠤᠯᠠ ᠰᠢᠨᠠᠯᠠᠮᠠ ᠳ᠋ᠢᠩ ᠶᠤᠸᠠᠨ ᠶᠢᠩ ᠳ᠋ᠦ᠍ ᠲᠤᠰᠬᠠᠢ ᠣᠴᠢᠵᠤ ᠪᠠᠢᠳᠠᠯ ᠣᠢᠯᠠᠭᠠᠬᠤ ᠪᠠᠷ ᠣᠴᠢᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃ ᠲᠡᠳᠡ ᠪᠠᠰᠠ ᠬᠥᠬᠡᠨᠠᠭᠤᠷ ᠤ᠋ᠨ ᠭᠦᠮᠪᠦᠮ ᠯᠠᠪᠷᠤᠩ ᠳ᠋ᠤ᠌ ᠮᠥᠷᠭᠥᠯ ᠬᠢᠬᠦ ᠪᠠᠷ ᠶᠠᠪᠤᠵᠤ ᠪᠠᠢᠬᠤ ᠪᠠᠷ ᠬᠡᠯᠡᠵᠦ᠂ ᠡᠨᠡ ᠬᠦ᠌ ᠳ᠋ᠢᠩ ᠶᠤᠸᠠᠨ ᠶᠢᠩ ᠳ᠋ᠦ᠍ ᠨᠢᠭᠡ ᠬᠤᠭᠤᠴᠠᠭᠠ ᠠᠮᠠᠷᠠᠵᠤ ᠪᠡᠶᠡ ᠪᠡᠨ ᠰᠤᠪᠢᠯᠠᠪᠠ᠃
ᠰᠢᠨᠡᠯᠡᠮᠡ ᠵᠡᠷᠭᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠦ᠌ ᠮᠣᠩᠭᠣᠯ ᠤᠯᠤᠰ ᠲᠤ᠌ ᠰᠤᠷᠤᠯᠴᠠᠬᠤ ᠪᠠᠷ ᠣᠴᠢᠬᠤ ᠨᠢ ᠵᠠᠮ ᠤ᠋ᠨ ᠦᠵᠦᠭᠦᠷ ᠪᠣᠯᠬᠤ ᠠ᠋ᠴᠠ ᠪᠢᠰᠢ᠂ ᠬᠠᠷᠢᠨ ᠠᠯᠠᠱᠠ ᠳ᠋ᠤ᠌ ᠣᠴᠢᠵᠤ ᠳ᠋ᠢᠩ ᠶᠤᠸᠠᠨ ᠶᠢᠩ ᠢ᠋ᠶ᠋ᠡᠷ ᠵᠢᠭᠤᠯᠴᠢᠯᠠᠬᠤ ᠪᠢᠰᠢ ᠪᠠᠢᠵᠠᠢ᠃ ᠭᠡᠲᠡᠯᠡ ᠶᠠᠭᠤᠨ ᠳ᠋ᠤ᠌ ᠠᠯᠠᠱᠠ ᠶ᠋ᠢᠨ ᠳ᠋ᠢᠩ ᠶᠤᠸᠠᠨ ᠶᠢᠩ ᠳ᠋ᠦ᠍ ᠨᠢᠭᠡᠨ ᠬᠤᠭᠤᠴᠠᠭᠠ ᠰᠠᠭᠤᠬᠤ ᠶ᠋ᠢ ᠶᠡᠷᠦ ᠣᠢᠯᠠᠭᠠᠭᠳᠠᠰᠢ ᠦᠭᠡᠢ ᠪᠢᠯᠡ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠬᠠᠷᠠᠬᠠᠨ ᠪᠠᠢᠭᠤᠯᠤᠭᠳᠠᠭᠠᠳᠤᠢ᠂ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠲᠥᠪ ᠬᠣᠷᠢᠶᠠ ᠶ᠋ᠢᠨ ᠪᠠᠢᠭᠤᠯᠤᠮᠵᠢ1926 ᠣᠨ ᠤ᠋ ᠰᠡᠭᠦᠯᠴᠢ ᠪᠡᠷ ᠪᠤᠭᠤᠲᠤ ᠠ᠋ᠴᠠ ᠢᠷᠭᠠᠢ(ᠶᠢᠩᠴᠤᠸᠠᠨ) ᠳ᠋ᠤ᠌ ᠰᠢᠯᠵᠢᠨ ᠣᠴᠢᠭᠰᠠᠨ ᠨᠢ ᠰᠢᠨᠡᠯᠡᠮᠡ ᠶ᠋ᠢᠨ ᠣᠴᠢᠬᠤ ᠠ᠋ᠴᠠ ᠬᠣᠵᠢᠭᠤ ᠬᠣᠶᠠᠷ ᠵᠢᠯ ᠦ᠋ᠨ ᠳᠠᠷᠠᠭᠠᠬᠢ ᠤᠴᠢᠷ ᠪᠣᠯᠤᠨᠠ᠃ ᠠᠯᠠᠱᠠ ᠬᠤᠰᠢᠭᠤᠨ ᠤ᠋ ᠸᠠᠩ ᠬᠦᠩ ᠦ᠋ᠨ ᠨᠣᠶᠠᠷᠬᠠᠯ ᠢ᠋ ᠡᠰᠡᠷᠭᠦᠴᠡᠭᠰᠡᠨ ᠠᠷᠠᠳᠴᠢᠯᠠᠭᠰᠠᠨ ᠬᠥᠳᠡᠯᠭᠡᠭᠡᠨ《ᠰᠢᠶᠣᠤ ᠰᠠᠨ ᠶᠧ ᠶ᠋ᠢᠨ ᠬᠡᠷᠡᠭ》 ᠨᠢ ᠰᠢᠨᠠᠯᠠᠮᠠ ᠠ᠋ᠴᠠ ᠬᠣᠵᠢᠳ ᠳᠥᠷᠪᠡᠨ ᠵᠢᠯ ᠦ᠋ᠨ ᠳᠠᠷᠠᠭᠠᠬᠢ ᠤᠴᠢᠷ ᠪᠣᠯᠤᠨᠠ᠃ ᠡᠢᠮᠦ ᠡᠴᠡ ᠰᠢᠨᠡᠯᠡᠮᠡ ᠠᠯᠠᠱᠠ ᠬᠤᠰᠢᠭᠤᠨ ᠤ᠋《ᠰᠢᠶᠣᠤ ᠰᠠᠨ ᠶᠧ ᠶ᠋ᠢᠨ ᠬᠡᠷᠡᠭ》 ᠦ᠋ᠨ ᠬᠡᠷᠡᠭ ᠬᠤᠪᠢᠰᠤᠯ ᠤ᠋ᠨ ᠲᠦᠷᠦᠭᠦᠦ ᠠᠯᠠᠱᠠ ᠬᠤᠰᠢᠭᠤᠨ ᠤ᠋ ᠢᠵᠠᠭᠤᠷᠲᠠᠨ ᠰᠢᠶᠣᠤ ᠰᠠᠨ ᠶᠧ(ᠳ᠋ᠸᠴᠢᠨ ᠢᠰᠢᠨᠤᠷᠪᠤ᠂ ᠬᠤᠰᠢᠭᠤᠨ ᠤ᠋ ᠳᠡᠳ᠋ ᠵᠠᠬᠢᠷᠤᠭᠴᠢ)᠂ ᠯᠦ᠍ ᠣᠭ᠌ᠶᠤ(ᠳᠡᠳ᠋ ᠮᠡᠢᠷᠡᠨ)᠂ ᠲᠢᠶᠠᠨ ᠵᠢᠢ ᠵᠡᠷᠭᠡ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯ ᠤ᠋ᠨ ᠦᠵᠡᠯᠲᠡ ᠲᠡᠢ᠂ ᠣᠯᠠᠨ ᠬᠡᠯᠡ ᠳ᠋ᠦ᠍ ᠨᠡᠪᠲᠡᠷᠡᠭᠰᠡᠨ ᠳᠠᠪᠰᠢᠩᠭᠤᠢ ᠰᠡᠬᠡᠭᠡᠲᠡᠨ ᠲᠡᠢ ᠲᠠᠨᠢᠯᠴᠠᠵᠤ ᠨᠥᠬᠥᠷᠰᠡᠭ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠭᠰᠠᠨ ᠴᠤ᠌ ᠪᠣᠯᠪᠠᠤ ᠭᠡᠮᠡᠨ ᠦᠵᠡᠬᠦ ᠡᠴᠡ ᠪᠢᠰᠢ ᠪᠠᠲᠤᠲᠠᠢ ᠲᠡᠦᠬᠡ ᠶ᠋ᠢᠨ ᠡᠰᠢ ᠪᠠᠷᠢᠮᠲᠠ ᠦᠭᠡᠢ ᠲᠤᠯᠠ ᠲᠡᠭᠦᠨ ᠦ᠌ ᠠᠯᠠᠱᠠ ᠳ᠋ᠠᠬᠢ ᠤᠴᠢᠷ ᠨᠢ ᠲᠠᠢᠯᠪᠤᠷᠢᠯᠠᠭᠳᠠᠰᠢ ᠦᠭᠡᠢ ᠣᠨᠢᠰᠣᠭᠠ ᠪᠠᠢᠭᠰᠠᠭᠠᠷ᠃
ᠰᠢᠨᠠᠯᠠᠮᠠ ᠵᠡᠷᠭᠡ ᠬᠥᠮᠦᠰ ᠦ᠋ᠨ ᠤᠨᠤᠵᠤ ᠶᠠᠪᠤᠭᠠ ᠠᠭᠲᠠ ᠮᠣᠷᠢᠳ ᠤ᠋ᠨ ᠣᠯᠠᠩᠬᠢ ᠨᠢ ᠤᠰᠤᠨ ᠵᠢᠷᠣᠭᠠ ᠮᠣᠷᠢ ᠶᠤᠮ᠃ ᠢᠯᠠᠩᠭᠤᠶᠠ ᠳᠠᠨᠽᠠᠨ᠂ ᠲᠦᠪᠰᠢᠨ ᠬᠣᠶᠠᠷ ᠤ᠋ᠨ ᠮᠣᠷᠢ ᠪᠣᠯ ᠣᠨᠴᠠ ᠬᠤᠷᠳᠤᠴᠠ ᠲᠠᠢ ᠣᠷᠳᠣᠰ ᠵᠢᠷᠣᠭᠠ ᠮᠣᠷᠢ ᠪᠣᠯᠬᠤ ᠪᠥᠭᠡᠳ ᠳᠠᠨᠽᠠᠨ ᠪᠣᠯ ᠲᠡᠭᠦᠨ ᠦ᠌ ᠬᠣᠷᠣᠬᠠᠢ ᠲᠠᠢ ᠲᠤᠯᠠ ᠠᠮᠠ ᠨᠡᠭᠡᠭᠡᠪᠡᠯ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠲᠤᠬᠠᠢ ᠶᠠᠷᠢᠵᠤ᠂ ᠮᠣᠷᠳᠠᠪᠠᠯ ᠵᠢᠷᠣᠭᠠ ᠮᠣᠷᠢ ᠪᠠᠨ ᠪᠤᠰᠤᠳ ᠲᠤ᠌ ᠭᠠᠢᠬᠠᠭᠤᠯᠵᠤ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠳᠠᠭ ᠬᠥᠮᠦᠨ ᠪᠠᠢᠭᠰᠠᠨ ᠲᠤᠯᠠ ᠡᠳᠦᠷ ᠪᠦᠷᠢ ᠣᠰᠣᠯᠳᠠᠯ ᠦᠭᠡᠢ ᠬᠤᠷᠳᠤᠨ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠦᠵᠡᠬᠦᠯᠭᠡ ᠬᠢᠵᠦ ᠦᠵᠡᠭᠴᠢᠳ ᠦ᠋ᠨ ᠬᠣᠷᠣᠬᠠᠢ ᠶ᠋ᠢ ᠬᠥᠳᠡᠯᠭᠡᠳᠡᠭ ᠭᠡᠨᠡ᠃ ᠠᠯᠠᠱᠠ ᠶᠠᠮᠤᠨ ᠤ᠋ ᠬᠥᠮᠦᠰ ᠣᠷᠳᠣᠰ ᠵᠢᠷᠣᠭᠠ ᠮᠣᠷᠢ ᠳ᠋ᠤ᠌ ᠲᠤᠩ ᠪᠠᠬᠠᠲᠠᠢ ᠪᠠᠢᠵᠤ᠂ ᠢᠯᠠᠩᠭᠤᠶᠠ ᠳᠠᠨᠽᠠᠨ ᠲᠦᠪᠰᠢᠨ ᠦ᠌ ᠮᠣᠷᠢ ᠨᠢ ᠲᠤᠭᠤᠷᠠᠢ ᠶ᠋ᠢᠨ ᠰᠢᠷᠣᠢ ᠪᠠᠨ ᠮᠡᠨᠡᠷᠡᠲᠡᠯᠡ ᠪᠤᠲᠠᠷᠠᠭᠤᠯᠳᠠᠭ ᠬᠤᠷᠳᠤᠨ ᠵᠢᠷᠣᠭᠠ ᠪᠣᠯᠬᠤ ᠲᠤᠯᠠ ᠬᠥᠮᠦᠰ ᠦ᠋ᠨ ᠨᠢᠳᠦ ᠲᠣᠰᠴᠤ ᠬᠣᠷᠣᠬᠠᠢ ᠶ᠋ᠢ ᠬᠥᠳᠡᠯᠭᠡᠨᠡ᠃
ᠰᠢᠨᠡᠯᠡᠮᠡ ᠴᠦ᠍ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ᠌ ᠬᠦᠷᠬᠦ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ ᠮᠥᠷᠲᠡᠭᠡᠨ ᠲᠤᠰ ᠵᠢᠯ ᠦ᠋ᠨ ᠡᠪᠡᠰᠦ ᠪᠡᠯᠴᠢᠭᠡᠷ ᠮᠠᠭᠤ ᠭᠠᠩ ᠭᠠᠴᠢᠭ ᠲᠠᠢ ᠲᠠᠴᠢᠷ ᠠᠭᠤᠯᠠ᠂ ᠭᠣᠪᠢ ᠴᠦᠯ᠂ ᠠᠢᠯ ᠡᠷᠦᠬᠡ ᠦᠭᠡᠢ ᠬᠥᠳᠡᠭᠡ ᠬᠡᠭᠡᠷᠡ ᠭᠡᠳᠡᠭ ᠢ᠋ ᠠᠯᠠᠱᠠᠴᠤᠳ ᠠ᠋ᠴᠠ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠪᠣᠷᠳᠣᠭᠠ ᠡᠪᠡᠰᠦᠨ ᠳ᠋ᠦ᠍ ᠠᠷᠪᠢᠲᠠᠢ᠂ ᠬᠦᠴᠦ ᠳᠣᠷᠪᠢᠲᠠᠢ᠂ ᠤᠷᠲᠤ ᠶ᠋ᠢᠨ ᠠᠶᠠᠨ ᠳ᠋ᠤ᠌ ᠲᠡᠰᠪᠦᠷᠢᠲᠡᠢ ᠲᠡᠮᠡᠭᠡ ᠪᠡᠷ ᠮᠣᠷᠢ ᠪᠠᠨ ᠰᠣᠯᠢᠬᠤ ᠪᠣᠳᠣᠯ ᠣᠷᠣᠪᠠ᠃ ᠠᠯᠠᠱᠠ ᠶᠠᠮᠤᠨ ᠤ᠋ ᠬᠥᠮᠦᠰ ᠦ᠋ᠨ ᠰᠠᠨᠠᠭᠠᠨ ᠳ᠋ᠤ᠌ ᠲᠠᠭᠠᠷᠠᠵᠤ《ᠮᠤᠷᠤᠢ ᠬᠠᠯᠪᠠᠭᠠ ᠠᠮᠠᠨ ᠲᠡᠢᠰᠢ》 ᠭᠡᠳᠡᠭᠴᠢᠯᠡᠨ ᠪᠣᠰᠤᠭᠠ ᠪᠥᠬᠡ ᠲᠡᠢ ᠠᠲᠠᠨ ᠲᠡᠮᠡᠭᠡ ᠠᠪᠤᠨᠠ ᠭᠡᠪᠡᠯ ᠪᠣᠰᠤᠭᠠ ᠪᠥᠬᠡ ᠲᠡᠢ ᠰᠠᠢᠨ ᠲᠡᠮᠡᠭᠡ ᠥᠭᠴᠦ᠂ ᠳᠡᠭᠡᠷᠡ ᠨᠢ ᠴᠠᠭᠠᠨ ᠲᠥᠭᠥᠷᠢᠭ ᠨᠡᠮᠡᠵᠦ ᠠᠪᠤᠨᠠ ᠭᠡᠪᠡᠯ ᠴᠠᠭᠠᠨ ᠲᠥᠭᠥᠷᠢᠭ ᠥᠭᠴᠦ᠂ ᠭᠤᠯᠢᠷ ᠲᠤᠲᠤᠷᠭᠠ ᠢᠳᠡᠰᠢ ᠬᠦᠨᠡᠰᠦ ᠪᠣᠯᠤᠨ ᠲᠡᠵᠢᠭᠡᠯ ᠪᠣᠷᠳᠣᠭᠠ ᠶᠠᠭᠤ ᠠᠪᠤᠶᠠ ᠭᠡᠪᠡᠯ ᠠᠮᠠᠨ ᠪᠡᠯᠭᠡ ᠪᠡᠷ ᠪᠠᠢᠬᠤ ᠯᠠ ᠪᠤᠶᠠᠨ᠁ ᠳᠠᠷᠤᠢ ᠳ᠋ᠤᠨᠢ ᠨᠡᠮᠡᠵᠦ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠠᠰᠢᠭᠲᠠᠢ ᠲᠤᠯᠠ ᠬᠠᠨᠴᠤᠨ ᠳᠣᠲᠣᠷᠠ ᠬᠤᠷᠤᠭᠤ ᠬᠥᠳᠡᠯᠭᠡᠬᠦ ᠤᠴᠢᠷ ᠦᠭᠡᠢ ᠠᠷᠠᠯᠵᠢᠶᠠ ᠪᠦᠲᠦᠮᠵᠢᠲᠡᠢ ᠪᠣᠯᠪᠠ᠃
ᠢᠩᠭᠢᠭᠡᠳ ᠲᠡᠮᠡᠭᠡ ᠤᠨᠤᠭᠰᠠᠨ ᠨᠢᠭᠡ ᠪᠦᠯᠦᠭ ᠮᠥᠷᠭᠥᠯᠴᠢᠨ ᠭᠦᠮᠪᠦᠮ ᠯᠠᠪᠷᠤᠩ ᠳ᠋ᠤ᠌ ᠮᠥᠷᠭᠥᠬᠦ ᠪᠡᠷ ᠬᠥᠬᠡᠨᠠᠭᠤᠷ ᠲᠥᠪᠡᠳ ᠦ᠋ᠨ ᠥᠨᠳᠥᠷᠯᠢᠭ ᠵᠦᠭ ᠶᠠᠪᠤᠬᠤ ᠪᠠᠷ ᠪᠡᠯᠡᠳᠬᠡᠨᠡ᠃ ᠦᠨᠡᠨ ᠳ᠋ᠡᠭᠡᠨ ᠯᠠᠩ ᠶᠠ ᠱᠠᠨ ᠠᠭᠤᠯᠠ ᠶ᠋ᠢ ᠴᠢᠭᠯᠡᠨ ᠳ᠋ᠢᠩ ᠶᠤᠸᠠᠨ ᠶᠢᠩ ᠡᠴᠡ ᠵᠡᠭᠦᠨᠰᠢ ᠰᠥᠨᠢ ᠪᠡᠷ ᠠᠶᠠᠯᠠᠭᠰᠠᠨ ᠢ᠋ ᠬᠡᠨ ᠴᠦ᠍ ᠮᠡᠳᠡᠭᠡ ᠦᠭᠡᠢ᠃
ᠦᠨᠡᠨ ᠦᠭᠡ ᠪᠡᠨ ᠨᠢᠭᠡ ᠵᠠᠮ ᠪᠤᠰᠤᠳ ᠲᠤ᠌ ᠯᠡᠪᠡᠷᠡᠭᠦᠯᠳᠡᠭ ᠦᠭᠡᠢ ᠲᠡᠳᠡᠭᠡᠷ ᠬᠥᠮᠦᠰ ᠤᠷᠠᠳ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠣᠴᠢᠭᠰᠠᠨ ᠦᠭᠡᠢ ᠪᠡᠷ ᠯᠠᠩ ᠶᠠ ᠱᠠᠨ ᠤ᠋ ᠵᠡᠭᠦᠨ ᠵᠦᠭ ᠲᠦ᠍ ᠪᠠᠢᠷᠢᠰᠢᠵᠤ ᠪᠠᠢᠭᠠ ᠴᠢᠶᠡᠯᠢ ᠶ᠋ᠢᠨ ᠰᠦᠮᠡ(ᠥᠨᠥ ᠶ᠋ᠢᠨ ᠤᠷᠠᠳ ᠤ᠋ᠨ ᠳᠤᠮᠳᠠᠳᠤ ᠬᠣᠰᠢᠭᠤ) ᠳ᠋ᠤ᠌ ᠬᠦᠷᠪᠡ᠃ ᠲᠡᠨᠳᠡ ᠨᠢᠭᠡ ᠬᠤᠭᠤᠴᠠᠭᠠ ᠤᠨᠤᠭᠠ ᠮᠠᠯ ᠢ᠋ᠶ᠋ᠠᠨ ᠠᠮᠠᠷᠠᠭᠤᠯᠵᠤ᠂ ᠬᠥᠮᠦᠰ ᠨᠢ ᠴᠦ᠍ ᠵᠠᠮ ᠤ᠋ᠨ ᠶᠠᠳᠠᠷᠠᠭᠠ ᠪᠠᠨ ᠲᠠᠢᠯᠵᠤ᠂ ᠭᠤᠲᠤᠯ ᠮᠠᠬᠠᠢ ᠬᠤᠪᠴᠠᠰᠤ ᠬᠤᠨᠠᠷ ᠤᠷᠠᠩᠬᠠᠢ ᠬᠠᠭᠠᠷᠬᠠᠢ ᠪᠠᠨ ᠣᠶᠣᠵᠤ ᠨᠥᠬᠥᠵᠦ ᠦᠷᠭᠦᠯᠵᠢᠯᠡᠨ ᠭᠣᠪᠢ ᠴᠦᠯ ᠢ᠋ᠶ᠋ᠡᠷ ᠬᠦᠴᠢᠷ ᠪᠡᠷᠬᠡᠰᠢᠶᠡᠯᠲᠦ ᠠᠶᠠᠯᠠᠯ ᠬᠢᠬᠦ ᠪᠡᠷ ᠪᠡᠯᠡᠳᠬᠡᠯᠡ᠃ ᠲᠡᠳᠡ ᠡᠨᠡ ᠰᠦᠮᠡ ᠳ᠋ᠦ᠍ ᠠᠮᠠᠷᠠᠯᠲᠠ ᠬᠢᠬᠦ ᠶᠠᠪᠤᠴᠠ ᠳ᠋ᠠᠭᠠᠨ ᠠᠷᠤ ᠮᠣᠩᠭᠣᠯ ᠪᠣᠯᠤᠨ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠬᠢᠯᠢ ᠶ᠋ᠢᠨ ᠵᠠᠭᠠᠭ ᠳᠠᠬᠢ ᠵᠠᠮ ᠱᠤᠭᠤᠮ ᠪᠣᠯᠤᠨ ᠪᠣᠭᠣᠮᠲᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢ ᠣᠢᠯᠠᠭᠠᠵᠤ᠂ ᠡᠭᠦᠳᠡ(ᠥᠨᠥ ᠶ᠋ᠢᠨ ᠡᠷᠢᠶᠡᠨ ᠲᠡᠢ ᠨᠡᠢᠯᠡᠵᠦ ᠪᠠᠢᠭᠠ ᠵᠠᠮ ᠤ᠋ᠨ ᠡᠭᠦᠳᠡ ᠪᠣᠯᠤᠨᠠ)᠂ ᠰᠤᠯᠢᠭᠡᠭᠡᠷᠡ᠂ ᠡᠭᠡᠨᠰᠡᠪᠡᠰᠤᠳᠡᠢ᠂ ᠭᠠᠭᠴᠠ ᠮᠣᠳᠣ ᠪᠠᠷ ᠬᠠᠯᠬᠠ ᠳ᠋ᠤ᠌ ᠶᠠᠪᠤᠬᠤ ᠤᠴᠢᠷ ᠲᠠᠢ ᠲᠤᠯᠠ ᠲᠡᠳᠡ ᠶᠠᠷᠢᠯᠴᠠᠭᠠᠳ ᠤᠷᠠᠳ ᠤ᠋ᠨ ᠬᠣᠢᠲᠤ ᠬᠤᠰᠢᠭᠤᠨ ᠠ᠋ᠴᠠ ᠬᠠᠮᠤᠭ ᠣᠢᠷᠠ ᠪᠥᠭᠡᠳ ᠳᠡ ᠬᠦᠷᠢᠶᠡ(ᠤᠯᠠᠭᠠᠨᠪᠠᠭᠠᠲᠤᠷ) ᠬᠦᠷᠬᠦ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠠᠰᠬᠠᠨ ᠵᠠᠮ ᠪᠣᠯ ᠡᠭᠡᠨᠰᠠᠪᠠᠰᠤᠳᠡᠢ ᠪᠡᠷ ᠶᠠᠪᠤᠪᠠᠯ ᠳᠡᠭᠡᠷᠡ ᠭᠡᠵᠦ ᠰᠣᠩᠭᠣᠯᠠ᠃ ᠲᠡᠳᠡ ᠦᠷᠭᠦᠯᠵᠢᠯᠡᠨ ᠠᠶᠠᠯᠠᠵᠤ ᠱᠠᠭᠠᠵᠠᠭᠠᠢᠲᠤ ᠶ᠋ᠢᠨ ᠳᠠᠪᠠᠭᠠ ᠪᠠᠷ ᠭᠡᠲᠦᠯᠬᠦ ᠳ᠋ᠦ᠍ ᠬᠥᠪᠡᠭᠡ ᠬᠢᠵᠠᠭᠠᠷ ᠨᠢ ᠦᠵᠡᠭᠳᠡᠬᠦ ᠦᠭᠡᠢ ᠭᠣᠪᠢ ᠴᠦᠯ ᠦᠷᠭᠦᠯᠵᠢᠯᠡᠵᠦ ᠠᠢᠯ ᠡᠷᠦᠬᠡ ᠲᠤᠢᠯ ᠤ᠋ᠨ ᠴᠥᠭᠡᠬᠡᠨ ᠪᠠᠢᠯᠠ᠃ ᠭᠡᠨᠡᠳᠲᠡ ᠲᠩᠷᠢ ᠬᠤᠪᠢᠯᠵᠤ ᠲᠡᠭ ᠡᠴᠡ ᠳᠣᠭᠣᠭᠰᠢ ᠳᠥᠴᠢ ᠲᠠᠪᠢᠨ ᠭᠷᠠᠳᠦ᠋ᠰ ᠦ᠋ᠨ ᠬᠦᠢᠲᠡᠨ ᠪᠣᠯᠬᠤ ᠶ᠋ᠢ ᠬᠡᠨ ᠠᠯᠢ ᠨᠢ ᠪᠣᠳᠣᠵᠤ ᠣᠯᠤᠭᠰᠠᠨ ᠦᠭᠡᠢ ᠪᠢᠯᠡ᠃ ᠭᠡᠪᠡᠴᠦ ᠲᠡᠳᠡ ᠡᠪᠦᠯ ᠦ᠋ᠨ ᠳᠡᠪᠡᠯ ᠭᠤᠲᠤᠯ ᠢ᠋ᠶ᠋ᠠᠨ ᠳᠠᠪᠬᠤᠷᠯᠠᠵᠤ ᠤᠮᠠᠷᠠᠲᠤ ᠰᠢᠪᠧᠷᠢᠶᠡ ᠶ᠋ᠢᠨ ᠬᠦᠢᠲᠡᠨ ᠤᠷᠤᠰᠬᠠᠯ ᠢ᠋ ᠰᠥᠷᠦᠨ ᠤᠷᠤᠭᠰᠢᠯᠠᠭᠰᠠᠭᠠᠷ ᠳᠤᠮᠳᠠᠳᠤ ᠮᠣᠩᠭᠣᠯ ᠤ᠋ᠨ ᠬᠢᠯᠢ ᠶ᠋ᠢᠨ ᠱᠤᠭᠤᠮ ᠢ᠋ ᠳᠠᠪᠠᠯᠠ᠃
ᠠᠷᠤ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠠᠢᠯ ᠡᠷᠦᠬᠡ ᠨᠡᠩ ᠴᠥᠭᠡᠬᠡᠨ᠂ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠪᠣᠯᠤᠨ ᠵᠠᠮ ᠱᠤᠭᠤᠮ ᠢ᠋ ᠮᠡᠳᠡᠳᠡᠭ ᠦᠭᠡᠢ ᠡᠳᠡᠭᠡᠷ ᠬᠥᠮᠦᠰ ᠠᠷᠭᠠ ᠪᠤᠰᠤ ᠭᠣᠪᠢ ᠴᠦᠯ ᠢ᠋ᠶ᠋ᠡᠷ ᠬᠣᠨᠣᠭᠯᠠᠵᠤ᠂ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠣᠯᠪᠠᠯ ᠲᠡᠮᠡᠭᠡ ᠪᠡᠨ ᠳᠤᠭᠤᠢᠯᠠᠭᠤᠯᠤᠨ ᠬᠡᠪᠲᠡᠭᠦᠯᠵᠦ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠳᠤᠮᠳᠠ ᠨᠢ ᠳᠡᠪᠡᠯ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠤᠯ ᠦᠭᠡᠢ ᠲᠦᠰᠢᠵᠦ ᠤᠨᠲᠠᠳᠠᠭ ᠪᠣᠯᠪᠠᠴᠤ ᠣᠯᠠᠩᠬᠢ ᠨᠥᠬᠥᠳ ᠨᠣᠢᠷ ᠬᠤᠯᠵᠢᠳᠠᠭ᠃ ᠴᠠᠭᠠᠨ ᠵᠤᠳ ᠤ᠋ᠨ ᠳᠤᠮᠳᠠᠭᠤᠷ ᠣᠯᠠᠩᠬᠢ ᠨᠥᠬᠥᠳ ᠦ᠋ᠨ ᠴᠢᠬᠢ ᠬᠠᠮᠠᠷ᠂ ᠬᠤᠷᠤᠭᠤ ᠨᠢ ᠬᠥᠯᠳᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠵᠠᠷᠢᠮ ᠤ᠋ᠨ ᠬᠢᠨᠢ ᠭᠤᠲᠤᠯ ᠬᠥᠯ ᠲᠡᠢ ᠨᠢ ᠨᠡᠢᠯᠡᠵᠦ ᠬᠥᠯᠳᠡᠴᠢᠬᠡᠭᠰᠡᠨ ᠪᠠᠢᠵᠠᠢ᠃
ᠰᠢᠨᠠᠯᠠᠮᠠ ᠶ᠋ᠢᠨ ᠭᠠᠯᠠᠭᠤᠲᠤ ᠶ᠋ᠢᠨ ᠴᠢᠭᠤᠯᠭᠠᠨ ᠳᠡᠭᠡᠷᠡ ᠬᠦᠨᠳᠦ ᠲᠠᠮᠤᠯᠠᠭᠳᠠᠭᠰᠠᠨ ᠠ᠋ᠴᠠ ᠬᠣᠴᠣᠷᠤᠭᠰᠠᠨ ᠠᠷᠬᠠᠭ ᠰᠢᠷᠬᠠ ᠨᠢ ᠡᠨᠡ ᠬᠦ᠌ ᠴᠠᠭᠠᠨ ᠰᠢᠭᠤᠷᠭᠠᠨ ᠳᠤᠮᠳᠠᠭᠤᠷ ᠬᠡᠭᠡᠷᠡ ᠭᠠᠳᠠᠨᠠ ᠲᠠᠭᠠᠷᠠᠵᠤ ᠬᠣᠨᠣᠭᠯᠠᠭᠰᠠᠭᠠᠷ ᠪᠠᠢᠭᠠᠳ ᠬᠠᠭᠤᠴᠢᠨ ᠬᠡᠨᠡᠭᠡ ᠠᠷᠬᠠᠭ ᠨᠢ ᠤᠷᠪᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠬᠥᠯ ᠨᠢ ᠬᠥᠯᠳᠡᠵᠦ ᠪᠢᠴᠢᠬᠠᠨ ᠬᠦᠦ ᠭᠦᠩᠭᠠ ᠶ᠋ᠢᠨ ᠭᠠᠷ ᠬᠤᠷᠤᠭᠤ ᠬᠥᠯ ᠨᠢ ᠴᠦ᠍ ᠬᠥᠯᠳᠡᠵᠦ ᠰᠢᠷᠬᠠᠲᠤᠵᠠᠢ᠃ ᠲᠡᠭᠡᠪᠡᠴᠦ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠠᠲᠠᠭᠤ ᠵᠣᠷᠢᠭ ᠢ᠋ ᠪᠠᠷᠢᠵᠤ ᠡᠪᠡᠳᠴᠦ ᠲᠠᠭᠠᠷᠠᠬᠤ ᠶ᠋ᠢ ᠲᠡᠰᠪᠦᠷᠢᠯᠡᠵᠦ ᠶᠠᠪᠤᠵᠠᠭᠠᠨᠠ᠃
ᠲᠡᠳᠡ ᠨᠠᠷ ᠤᠯᠠᠭᠠᠨᠪᠠᠭᠠᠲᠤᠷ ᠵᠦᠭ ᠦᠷᠭᠦᠯᠵᠢᠯᠡᠨ ᠠᠶᠠᠯᠠᠬᠤ ᠵᠠᠮ ᠳ᠋ᠠᠭᠠᠨ ᠵᠠᠷᠢᠮ ᠨᠢᠭᠡᠨ ᠦ᠌ ᠬᠢᠨᠢ ᠤᠨᠤᠭᠠ ᠨᠢ ᠲᠣᠷᠴᠤ ᠲᠡᠭᠡᠭᠯᠡᠬᠦ ᠪᠤᠶᠤ ᠡᠪᠡᠳᠴᠢᠯᠡᠵᠦ ᠬᠣᠷᠣᠭᠳᠠᠯᠠ᠃ ᠭᠡᠪᠡᠴᠦ ᠬᠥᠮᠦᠰ ᠨᠢ ᠦᠨᠳᠦᠰᠦᠨ ᠳ᠋ᠡᠭᠡᠨ ᠡᠷᠡᠭᠦᠯ ᠴᠢᠬᠢᠷᠠᠭ ᠲᠤᠯᠠ ᠠᠪᠴᠤ ᠶᠠᠪᠤᠭᠠ ᠵᠦᠢᠯ ᠢ᠋ᠶ᠋ᠡᠨ ᠪᠤᠰᠤᠳ ᠤᠨᠤᠭᠠ ᠳᠡᠭᠡᠷᠡ ᠪᠡᠨ ᠠᠴᠢᠶᠠᠯᠠᠭᠠᠳ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠪᠤᠶᠤ ᠡᠭᠡᠯᠵᠢᠯᠡᠨ ᠤᠨᠤᠵᠤ ᠶᠠᠪᠤᠵᠠᠭᠠᠨᠠ᠃
ᠲᠡᠳᠡ ᠨᠢᠭᠡ ᠰᠠᠷᠠ ᠰᠢᠬᠠᠮ ᠤ᠋ᠨ ᠠᠶᠠᠯᠠᠯ ᠢ᠋ᠶ᠋ᠠᠷ ᠵᠣᠷᠢᠭᠰᠠᠨ ᠭᠠᠵᠠᠷ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ᠌ ᠬᠦᠷᠦᠯᠡ᠃ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠳ᠋ᠤ᠌ ᠲᠥᠪᠡᠳ ᠮᠣᠩᠭᠣᠯ ᠪᠠᠷᠢᠯᠭᠠ ᠶ᠋ᠢᠨ ᠰᠣᠶᠣᠯ ᠢ᠋ ᠭᠠᠢᠬᠠᠭᠤᠯᠤᠭᠰᠠᠨ ᠰᠢᠵᠢᠷ ᠠᠯᠲᠠᠨ ᠡᠷᠲᠡᠨ ᠦ᠌ ᠰᠦᠮᠡ ᠳᠤᠭᠠᠩ ᠤ᠋ᠳ ᠡᠨᠳᠡ ᠲᠡᠨᠳᠡ ᠰᠦᠨᠳᠡᠷᠯᠡᠵᠦ᠂ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠰᠤᠭᠤᠨᠠᠭᠯᠠᠭᠰᠠᠨ ᠢᠰᠡᠭᠡᠢ ᠴᠠᠭᠠᠨ ᠮᠣᠩᠭᠣᠯ ᠭᠡᠷ ᠦ᠋ᠳ ᠵᠢᠭᠳᠡᠷᠡᠭᠰᠡᠨ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠰᠦᠷᠦᠭ ᠲᠠᠭᠠᠲᠠᠢᠬᠠᠨ ᠢᠳᠡᠰᠢᠯᠡᠭᠰᠡᠨ ᠴᠤᠯᠤ ᠮᠣᠩᠭᠣᠯ ᠬᠣᠲᠠ ᠨᠢ ᠡᠷᠲᠡᠨ ᠦ᠌ ᠮᠣᠩᠭᠣᠯᠴᠤᠳ ᠤ᠋ᠨ ᠰᠣᠶᠣᠯ ᠲᠡᠦᠬᠡ ᠶ᠋ᠢᠨ ᠵᠠᠮᠬᠠᠷᠠᠰᠢ ᠦᠭᠡᠢ ᠦᠨᠡᠲᠦ ᠭᠡᠷᠡᠯ ᠵᠢᠷᠤᠭ ᠤ᠋ᠳ ᠪᠣᠯᠵᠤ᠂ ᠣᠷᠳᠣᠰ ᠠ᠋ᠴᠠ ᠣᠴᠢᠭᠰᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠠᠶᠠᠨ ᠵᠠᠮ ᠤ᠋ᠨ ᠶᠠᠳᠠᠷᠠᠭᠠ ᠴᠢᠯᠡᠭᠡ ᠶ᠋ᠢ ᠠᠷᠢᠯᠭᠠᠨᠠ᠃
— — — —
ᠲᠣᠳᠣᠷᠬᠠᠢᠯᠠᠯ
《ᠰᠢᠨᠡᠯᠡᠮᠡ ᠶ᠋ᠢᠨ ᠬᠤᠪᠢᠰᠬᠠᠯᠲᠤ ᠬᠥᠳᠡᠯᠭᠡᠭᠡᠨ ᠦ᠌ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠡᠮᠬᠢᠳᠬᠡᠯ》 ᠦ᠋ᠨ1 ᠳ᠋ᠦ᠍ᠭᠡᠷ ᠳᠡᠪᠲᠡᠷ ᠦ᠋ᠨ74 ᠳ᠋ᠦ᠍ᠭᠡᠷ ᠨᠢᠭᠤᠷ ᠲᠤ᠌《᠁ ᠭᠦᠩᠭᠠ(14 ᠨᠠᠰᠤᠲᠠᠢ) ᠵᠡᠷᠭᠡ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠬᠠᠮᠲᠤᠪᠠᠷ ᠮᠥᠷᠳᠡᠵᠦ1923 ᠣᠨ ᠤ᠋ ᠡᠪᠦᠯ ᠪᠣᠯᠬᠤ ᠳ᠋ᠤ᠌ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠥᠪ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠳ᠋ᠤ᠌ ᠬᠦᠷᠴᠡᠢ》 ᠭᠡᠵᠦ ᠪᠢᠴᠢᠵᠦ ᠪᠣᠢ᠃ ᠪᠠᠰᠠ ᠨᠡᠯᠢᠶᠡᠳ ᠵᠣᠬᠢᠶᠠᠯ ᠪᠤᠶᠤ ᠮᠠᠲ᠋ᠧᠷᠢᠶᠠᠯ ᠤ᠋ᠳ ᠲᠤ᠌1923 ᠣᠨ ᠪᠤᠶᠤ ᠡᠰᠡᠬᠦᠯᠡ1925 ᠣᠨ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠠᠢᠳᠠᠭ᠃ ᠡᠳᠡᠭᠡᠷ ᠨᠢ ᠪᠦᠷ ᠲᠠᠰᠢᠶᠠᠷᠠᠭᠰᠠᠨ ᠶᠤᠮ᠃
ᠡᠨᠳᠡ ᠪᠢ ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠳᠠᠩᠰᠠ ᠡᠪᠬᠡᠮᠡᠯ ᠦ᠋ᠨ ᠰᠠᠩ ᠳ᠋ᠤ᠌ ᠤᠳᠠᠭᠠᠨ ᠵᠢᠯ ᠳᠠᠷᠤᠭᠠ ᠪᠠᠷ ᠠᠵᠢᠯᠯᠠᠵᠤ ᠶᠠᠪᠤᠭᠰᠠᠨ ᠦᠦᠰᠢᠨ ᠨᠤᠲᠤᠭ ᠲᠠᠢ ᠡᠷᠬᠡᠭᠦᠳ ᠪᠤᠤ ᠰᠠᠨ(ᠸᠠᠩ ᠪᠤᠤ ᠰᠠᠨ) ᠨᠥᠬᠥᠷ ᠦ᠋ᠨ ᠤᠳᠠᠭᠠᠨ ᠵᠢᠯ ᠤᠷᠤᠯᠳᠤᠵᠤ ᠣᠨ ᠲᠣᠭᠠᠯᠠᠯ ᠪᠣᠯᠤᠨ ᠬᠥᠮᠦᠨ ᠬᠡᠷᠡᠭ ᠦ᠋ᠨ ᠲᠤᠬᠠᠢ ᠨᠢᠭᠲᠠᠯᠠᠨ ᠰᠤᠳᠤᠯᠵᠤ ᠬᠠᠷᠢᠴᠠᠭᠤᠯᠤᠨ ᠯᠠᠪᠯᠠᠵᠤ ᠭᠠᠷᠭᠠᠭᠰᠠᠨ ᠤ᠋ ᠰᠡᠭᠦᠯᠡᠷ ᠪᠢᠴᠢᠭᠰᠡᠨ《ᠰᠢᠨᠡᠯᠡᠮᠡ ᠶ᠋ᠢᠨ ᠴᠢᠬᠤᠯᠠ ᠦᠢᠯᠡ ᠶᠠᠪᠤᠳᠠᠯ ᠤ᠋ᠨ ᠲᠣᠪᠴᠢᠶᠠᠨ》(1991 ᠣᠨ ᠤ᠋ ᠬᠡᠪᠯᠡᠯ᠂ ᠣᠷᠳᠣᠰ ᠰᠣᠶᠣᠯ ᠤ᠋ᠨ ᠥᠪ ᠦ᠋ᠨ ᠴᠤᠪᠤᠷᠠᠯ ᠤ᠋ᠨ6 ᠳ᠋ᠤᠭᠠᠷ ᠲᠤ᠌》 ᠶ᠋ᠢᠨ 48 ᠳ᠋ᠤᠭᠠᠷ ᠨᠢᠭᠤᠷ ᠲᠤ᠌(ᠣᠨ ᠳᠠᠷᠠᠭᠠᠯᠠᠭᠰᠠᠨ ᠲᠡᠮᠳᠡᠭᠯᠡᠯ ᠁ 1924 ᠣᠨ(ᠬᠥᠬᠡ ᠬᠤᠯᠤᠭᠠᠨᠠ ᠵᠢᠯ) ᠢᠷᠭᠡᠨ ᠤᠯᠤᠰ ᠤ᠋ᠨ13 ᠣᠨ᠂7 ᠰᠠᠷᠠ᠂ ᠰᠢᠨᠠᠯᠠᠮᠠ ᠠᠷᠤ ᠬᠦᠷᠢᠶᠡᠨ ᠳ᠋ᠦ᠍ ᠣᠴᠢᠵᠤ ᠰᠤᠷᠤᠯᠴᠠᠬᠤ ᠪᠠ ᠲᠤᠰᠠᠯᠠᠮᠵᠢ ᠣᠯᠬᠤ ᠪᠠᠷ ᠲᠣᠭᠲᠠᠪᠤᠷᠢᠯᠠᠵᠤ᠂ ᠪᠡᠭᠡᠵᠢᠩ ᠡᠴᠡ ᠦᠦᠰᠢᠨ ᠳ᠋ᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠣᠯᠠᠨ ᠢ᠋ ᠳᠠᠢᠴᠢᠯᠠᠨ ᠬᠥᠳᠡᠯᠭᠡᠭᠰᠡᠨ ᠳ᠋ᠦ᠍ ᠰᠠᠢᠰᠢᠩᠭᠠ᠂ ᠮᠠᠨᠳᠤᠬᠤᠥ᠌ᠯᠵᠠᠢ᠂ ᠴᠣᠭᠲᠤ᠂ ᠰᠢᠷᠠᠪᠠᠵᠠᠪ᠂ ᠪᠠᠯᠳᠠᠨ᠂ ᠨᠢᠮᠠᠷᠢᠨᠴᠢᠨ᠂ ᠳᠠᠷᠢᠮᠠ(ᠡᠮᠡᠭᠲᠡᠢ)᠂ ᠳᠠᠨᠽᠠᠨ᠂ ᠰᠠᠮᠪᠣ᠂ ᡀᠠᠮᠤᠵᠠᠪ᠂ ᠲᠡᠭᠦᠰᠵᠢᠷᠭᠠᠯᠠᠩ᠂ ᠲᠦᠪᠰᠢᠨ᠂ ᠰᠤᠩᠨᠠᠢ᠂ ᠭᠦᠩᠭᠠ(ᠰᠢᠨᠡᠯᠡᠮᠡ ᠶ᠋ᠢᠨ ᠬᠥᠪᠡᠭᠦᠨ14 ᠨᠠᠰᠤᠲᠠᠢ)᠂ ᠰᠡᠷᠡᠩᠷᠤᠯᠮᠠ(ᠡᠮᠡᠭᠲᠡᠢ) ᠵᠡᠷᠭᠡ15 ᠬᠥᠮᠦᠨ ᠨᠡᠷᠡ ᠪᠡᠨ ᠮᠡᠳᠡᠭᠦᠯᠵᠦ᠂ ᠰᠢᠨᠡᠯᠡᠮᠡ ᠶ᠋ᠢ ᠳᠠᠭᠠᠵᠤ ᠠᠷᠤ ᠬᠦᠷᠢᠶᠡᠨ ᠳ᠋ᠦ᠍ ᠣᠴᠢᠵᠤ ᠰᠤᠷᠤᠯᠴᠠᠬᠤ ᠪᠠᠷ ᠪᠣᠯᠪᠠ》 ᠭᠡᠵᠦ ᠪᠢᠴᠢᠵᠦ ᠪᠣᠢ᠃ ᠡᠨᠳᠡ ᠲᠤᠰ ᠬᠥᠮᠦᠨ ᠦ᠌ ᠬᠡᠯᠡᠯᠭᠡ ᠵᠥᠪ ᠮᠥᠷᠲᠡᠭᠡᠨ ᠦᠨᠡᠨ ᠪᠠᠢᠳᠠᠯ ᠲᠠᠢ ᠨᠡᠢᠴᠡᠨᠡ ᠭᠡᠵᠦ ᠦᠵᠡᠨᠡ᠃
ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠵᠥᠪᠯᠡᠯᠭᠡᠨ ᠦ᠌ ᠰᠣᠶᠣᠯ ᠲᠡᠦᠬᠡ ᠶ᠋ᠢᠨ ᠠᠯᠪᠠᠨ ᠭᠡᠷ ᠡᠴᠡ ᠨᠠᠢᠷᠠᠭᠤᠯᠤᠭᠰᠠᠨ《ᠰᠢᠨᠠᠯᠠᠮᠠ ᠶ᠋ᠢᠨ ᠤᠳᠤᠷᠢᠳᠤᠭᠰᠠᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ》(ᠬᠢᠲᠠᠳ ᠬᠡᠪᠯᠡᠯ) ᠭᠡᠬᠦ ᠥᠭᠦᠯᠡᠯ ᠳ᠋ᠦ᠍《᠁ ᠥᠪᠡᠷ ᠦ᠋ᠨ ᠠᠷᠪᠠᠨ ᠳᠥᠷᠪᠡᠨ ᠨᠠᠰᠤᠲᠠᠢ ᠬᠥᠪᠡᠭᠦᠨ ᠬᠦᠩᠭᠠ ᠲᠠᠢ ᠪᠠᠨ ᠨᠡᠢᠲᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠮᠦᠨ1924 ᠣᠨ ᠤ᠋ ᠡᠪᠦᠯ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠮᠣᠩᠭᠣᠯ ᠠᠷᠠᠳ ᠤᠯᠤᠰ ᠤ᠋ᠨ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ᠌ ᠬᠦᠷᠴᠡᠢ》 ᠭᠡᠵᠦ ᠪᠢᠴᠢᠵᠦ ᠪᠣᠢ᠃ ᠡᠨᠡ ᠵᠣᠬᠢᠶᠠᠯ ᠴᠤ᠌ ᠣᠯᠠᠨ ᠤᠳᠠᠭᠠᠨ ᠤ᠋ ᠬᠢᠨᠠᠯᠲᠠ ᠪᠠᠷ ᠳᠠᠮᠵᠢᠭᠰᠠᠨ ᠲᠤᠯᠠ ᠣᠨ ᠲᠣᠭᠠᠯᠠᠯ ᠪᠠ ᠬᠡᠷᠡᠭ ᠤᠴᠢᠷ ᠨᠢ ᠦᠨᠡᠨ ᠭᠡᠳᠡᠭ ᠢ᠋ ᠢᠲᠡᠭᠡᠬᠦ ᠤᠴᠢᠷ ᠲᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠢᠯᠢᠭ᠌᠂ ᠣᠶᠤᠨᠪᠠᠲᠤ᠂ ᠪᠠᠯ᠂ ᠠᠯᠲᠠᠨᠱᠠ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ