ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠬᠣᠶᠠᠳᠤᠭᠠᠷ ᠪᠦᠯᠦᠭ᠂ᠥᠯᠵᠡᠢᠵᠢᠷᠭᠠᠯ– ᠭᠢᠯᠠᠯᠵᠠᠭᠰᠠᠨ ᠨᠢᠭᠡ ᠨᠠᠰᠤ5(3) Шинэлам – 2-р бүлэг᠂ Өлзийжаргал– гялалзсан нэг нас 5(3)
17(ᠭᠤᠷᠪᠠ)᠂ ᠰᠢᠨᠡᠯᠡᠮᠡ ᠨᠠᠶᠠᠨ ᠵᠢᠩ ᠦ᠋ᠨ ᠲᠡᠮᠦᠷ ᠭᠢᠨᠵᠢᠨ ᠡᠴᠡ ᠰᠤᠯᠠᠯᠠᠭᠳᠠᠭᠰᠠᠨ ᠨᠢ
ᠰᠢᠨᠡᠯᠡᠮᠡ ᠪᠠᠷᠠᠭᠤᠨ ᠬᠦᠩ ᠨᠣᠶᠠᠨ ᠴᠣᠭᠲᠣᠸᠴᠢᠷ ᠲᠤ᠌ ᠨᠢᠭᠤᠴᠠ ᠤᠳᠬᠠ ᠲᠠᠢ ᠬᠠᠮᠠᠷ ᠢ᠋ᠶ᠋ᠠᠷ ᠠᠮᠢᠰᠬᠤᠭᠤᠯᠬᠤ ᠵᠠᠬᠢᠳᠠᠯ ᠶᠠᠪᠤᠭᠤᠯᠤᠭᠰᠠᠨ ᠠ᠋ᠴᠠ ᠴᠣᠭᠲᠣᠸᠴᠢᠷ ᠨᠠᠰᠤᠨᠪᠠᠲᠤ ᠬᠣᠶᠠᠭᠤᠯᠠ2000 ᠯᠠᠩ ᠮᠥᠩᠭᠥ ᠶ᠋ᠢ ᠳᠠᠯᠠᠳ ᠤ᠋ᠨ ᠮᠠᠰᠢᠳᠡᠯᠭᠡᠷ ᠲᠤᠰᠠᠯᠠᠭᠴᠢ ᠶ᠋ᠢᠨ ᠠᠴᠢᠮᠠᠭ ᠲᠤ᠌ ᠰᠠᠪᠠᠯᠠᠵᠤ ᠥᠭᠴᠡᠢ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠰᠢᠨᠡᠯᠡᠮᠡ ᠶ᠋ᠢ ᠡᠨᠡ ᠤᠳᠠᠭᠠ ᠶ᠋ᠢᠨ ᠴᠢᠭᠤᠯᠭᠠᠨ ᠠ᠋ᠴᠠ ᠠᠮᠢ ᠶ᠋ᠢ ᠨᠢ ᠥᠷᠥᠰᠢᠶᠡᠵᠦ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠨᠠᠶᠠᠨ ᠵᠢᠩ ᠦ᠋ᠨ ᠬᠦᠨᠳᠦ ᠲᠡᠮᠦᠷ ᠭᠢᠨᠵᠢ ᠵᠡᠭᠦᠯᠭᠡᠨ ᠬᠠᠷᠢᠶᠠ ᠰᠤᠮᠤᠨ ᠳ᠋ᠤᠨᠢ ᠲᠤᠰᠢᠶᠠᠵᠤ ᠠᠢᠯ ᠡᠷᠦᠬᠡ ᠳ᠋ᠦ᠍ᠨᠢ ᠶᠠᠯᠠ ᠬᠦᠯᠢᠶᠡᠯᠭᠡᠬᠦ ᠪᠣᠯᠪᠠ᠃ ᠲᠤᠰ ᠵᠢᠯ ᠦ᠋ᠨ ᠡᠪᠦᠯ ᠴᠣᠭᠲᠣᠸᠴᠢᠷ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠱᠠᠨᠪᠧᠢ ᠶ᠋ᠢᠨ ᠰᠤᠬᠠᠢ ᠶ᠋ᠢᠨ ᠪᠠᠢᠰᠢᠩ ᠣᠷᠴᠢᠮ ᠪᠠᠢᠭᠰᠠᠨ ᠳ᠋ᠤᠯᠢ ᠶ᠋ᠢᠨ ᠲᠦᠷᠦᠭᠦᠦ(ᠳᠡᠯᠡᠳ ᠬᠤᠰᠢᠭᠤᠨ ᠤ᠋) ᠭᠠᠷᠵᠢ ᠯᠤᠤ ᠦ ᠭᠡᠳᠡᠭ ᠬᠥᠮᠦᠨ ᠢ᠋ ᠰᠢᠷᠠᠠᠤᠰᠤᠨ ᠭᠣᠣᠯ ᠤ᠋ᠨ ᠶᠡᠬᠡ ᠲᠣᠬᠣᠢ ᠭᠡᠬᠦ ᠭᠠᠵᠠᠷ ᠤᠷᠢᠵᠤ ᠠᠪᠴᠢᠷᠠᠭᠠᠳ᠂《ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠰᠢᠨᠡᠯᠡᠮᠡ ᠭᠡᠳᠡᠭ ᠬᠥᠮᠦᠨ ᠢ᠋ ᠨᠠᠶᠠᠨ ᠵᠢᠩ ᠦ᠋ᠨ ᠭᠠᠪᠠ ᠳᠥᠩᠭᠡ ᠡᠴᠡ ᠠᠪᠤᠷᠠᠨ ᠭᠠᠷᠭᠠᠬᠤ ᠪᠣᠯᠪᠠ ᠤᠤ᠂ ᠠᠷᠪᠠᠨ ᠰᠠᠢᠨ ᠮᠣᠷᠢ ᠪᠠᠷ ᠲᠠᠯᠠᠷᠬᠠᠶᠠ》 ᠭᠡᠵᠦ ᠬᠦᠰᠡᠮᠵᠢᠯᠡᠪᠡ᠃ ᠭᠠᠷᠵᠢ ᠯᠤᠤ ᠦ ᠠᠷᠪᠠᠨ ᠰᠠᠢᠨ ᠮᠣᠷᠢᠨ ᠳ᠋ᠤ᠌ ᠳᠤᠷᠠᠯᠠᠵᠤ ᠥᠪᠡᠷ ᠦ᠋ᠨ ᠲᠠᠯᠠ ᠶ᠋ᠢᠨ ᠰᠢᠷᠬᠠᠲᠤᠭᠰᠠᠨ ᠯᠢᠶᠡᠨᠵᠠᠩ ᠱᠠᠨᠵᠢᠮᠢᠳᠤᠭ ᠢ᠋ ᠦᠯᠡᠳᠡᠭᠡᠵᠦ ᠰᠢᠷᠬᠠ ᠶ᠋ᠢ ᠨᠢ ᠰᠤᠪᠢᠯᠠᠭᠤᠯᠬᠤ ᠪᠠᠷ ᠤᠷᠢᠳᠠᠯ ᠨᠥᠬᠥᠴᠡᠯ ᠪᠣᠯᠭᠠᠨ ᠰᠢᠨᠠᠯᠠᠮᠠ ᠶ᠋ᠢ ᠠᠪᠤᠷᠠᠬᠤ ᠪᠠᠷ ᠪᠣᠯᠪᠠ᠃ ᠲᠡᠭᠡᠭᠡᠳ ᠶᠡᠬᠡ ᠲᠣᠬᠣᠢ ᠶ᠋ᠢᠨ ᠵᠤᠯᠵᠠᠭᠠ ᠭᠡᠳᠡᠭ ᠠᠢᠯ ᠳ᠋ᠤ᠌ ᠱᠠᠨᠵᠢᠮᠢᠳᠤᠭ ᠨᠢᠭᠡ ᠰᠠᠷᠠ ᠰᠤᠪᠢᠯᠠᠭᠠᠳ ᠢᠯᠠᠷᠢ ᠪᠣᠯᠤᠭᠰᠠᠨ ᠲᠤᠯᠠ ᠴᠣᠭᠲᠣᠸᠴᠢᠷ ᠱᠠᠷᠯᠢᠭ ᠤ᠋ᠨ ᠴᠠᠮᠬᠠᠭ ᠤ᠋ᠨ ᠳᠤᠭᠤᠢᠯᠠᠩ ᠤ᠋ᠨ ᠲᠦᠷᠦᠭᠦᠦ ᠪᠥᠭᠡᠳ ᠱᠠᠨᠵᠢᠮᠢᠳᠤᠭ ᠢ᠋ ᠳᠠᠭᠠᠭᠠᠴᠢᠯᠠᠨ ᠠᠪᠤᠭᠰᠠᠨ ᠴᠠᠭᠠᠨ ᠬᠥᠮᠥᠰᠬᠡᠲᠦ ᠪᠠᠶᠠᠨᠳᠡᠯᠭᠡᠷ ᠢ᠋ ᠶᠠᠪᠤᠭᠤᠯᠵᠤ ᠲᠡᠮᠡᠭᠡᠲᠦ ᠬᠣᠲᠠ ᠶ᠋ᠢᠨ ᠣᠷᠴᠢᠮ ᠪᠠᠢᠬᠤ ᠠᠨᠳᠤᠬᠠᠢ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠭᠰᠠᠨ ᠭᠠᠷᠵᠢ ᠯᠤᠤ ᠦ ᠳ᠋ᠦ᠍ ᠱᠠᠨᠵᠢᠮᠢᠳᠤᠭ ᠢ᠋ ᠬᠣᠶᠠᠷ ᠰᠠᠢᠨ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠪᠡᠯᠡᠭ ᠲᠡᠢ ᠬᠦᠷᠭᠡᠵᠦ ᠣᠴᠢᠪᠠ᠃ ᠭᠠᠷᠵᠢ ᠯᠤᠤ ᠦ ᠪᠠᠶᠠᠷᠯᠠᠬᠤ ᠳ᠋ᠠᠭᠠᠨ ᠴᠣᠭᠲᠣᠸᠴᠢᠷ ᠤ᠋ᠨ ᠠᠩᠬᠠ ᠠᠮᠠᠯᠠᠭᠰᠠᠨ ᠠᠷᠪᠠᠨ ᠮᠣᠷᠢᠨ ᠤ᠋ ᠪᠡᠯᠡᠭ ᠡᠴᠡ ᠬᠣᠶᠠᠷ ᠮᠣᠷᠢ ᠶ᠋ᠢ ᠠᠪᠤᠭᠠᠳ ᠪᠤᠰᠤᠳ ᠢ᠋ ᠨᠢ ᠠᠪᠬᠤ ᠦᠭᠡᠢ ᠭᠡᠵᠡᠢ᠃ ᠭᠠᠷᠵᠢ ᠯᠤᠤ ᠦ ᠲᠡᠷᠡ ᠳᠠᠷᠤᠢ ᠳ᠋ᠤᠨᠢ ᠱᠠᠨᠵᠢᠮᠢᠳᠤᠭ ᠲᠤ᠌ ᠰᠢᠨᠡᠯᠡᠮᠡ ᠶ᠋ᠢ ᠠᠪᠤᠷᠠᠬᠤ ᠡᠭᠦᠷᠭᠡ ᠲᠤᠰᠢᠶᠠᠵᠤ ᠬᠡᠳᠦᠨ ᠴᠡᠷᠢᠭ ᠲᠡᠢ ᠶᠠᠪᠤᠭᠤᠯᠵᠠᠢ᠃ ᠲᠡᠳᠡ ᠮᠠᠩᠬᠠᠲᠤ ᠶ᠋ᠢᠨ ᠣᠷᠴᠢᠮ ᠰᠣᠳᠨᠠᠮᠳᠣᠩᠷᠣᠪ᠂ ᠲᠥᠪᠳᠡᠨᠪᠠᠯᠪᠤᠷ ᠵᠡᠷᠭᠡ ᠬᠥᠮᠦᠰ ᠲᠡᠢ ᠬᠠᠷᠢᠯᠴᠠᠵᠤ ᠬᠠᠮᠲᠤᠷᠠᠭᠠᠳ ᠬᠥᠮᠦᠨ ᠳ᠋ᠦ᠍ ᠰᠡᠷᠡᠭᠳᠡᠯ ᠦᠭᠡᠢ ᠪᠡᠷ ᠥᠨᠥ ᠶ᠋ᠢᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠤᠯᠠᠭᠠᠨᠲᠣᠯᠤᠭᠠᠢ ᠰᠤᠮᠤᠨ ᠤ᠋ ᠪᠠᠶᠠᠨ᠌ᠣ᠋ᠪᠤᠭᠠ ᠭᠠᠴᠠᠭᠠᠨ ᠤ᠋ ᠲᠣᠭᠣᠨᠣᠲᠤ ᠶ᠋ᠢᠨ ᠰᠢᠯᠢ ᠶ᠋ᠢᠨ ᠪᠣᠷᠣᠦ᠌ᠬᠢᠨ ᠭᠡᠳᠡᠭ ᠠᠢᠯ ᠳ᠋ᠤ᠌ ᠬᠠᠮᠲᠤ ᠪᠠᠷ ᠭᠡᠨᠡᠳᠲᠡ ᠴᠥᠮᠥᠷᠡᠨ ᠣᠷᠣᠵᠤ᠂ ᠰᠢᠨᠠᠯᠠᠮᠠ ᠶ᠋ᠢ ᠭᠠᠪᠠ ᠭᠢᠨᠵᠢ ᠲᠡᠢ ᠨᠢ ᠠᠪᠴᠤ ᠭᠠᠷᠭᠠᠭᠠᠳ ᠨᠡᠯᠢᠶᠡᠳ ᠬᠣᠯᠠ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠦᠵᠦᠭᠦᠨ ᠳ᠋ᠡᠬᠢ ᠭᠠᠪᠠ ᠭᠢᠨᠵᠢ ᠶ᠋ᠢ ᠨᠢ ᠲᠠᠰᠤᠯᠵᠤ ᠳᠠᠭᠠᠭᠤᠯᠤᠨ ᠶᠠᠪᠤᠵᠠᠢ᠃ ᠬᠣᠵᠢᠮ ᠨᠢ ᠳ᠋ᠤᠯᠢ ᠶ᠋ᠢᠨ ᠳᠡᠭᠡᠷᠡᠮ ᠰᠢᠨᠡᠯᠡᠮᠡ ᠶ᠋ᠢ ᠪᠤᠯᠢᠶᠠᠨ ᠠᠪᠴᠤ ᠶᠠᠪᠤᠴᠢᠬᠠᠵᠠᠢ ᠭᠡᠮᠡᠨ ᠴᠤᠤᠷᠬᠠᠯ ᠦᠭᠡ ᠲᠠᠷᠬᠠᠭᠠᠭᠰᠠᠨ ᠪᠠᠢᠨᠠ᠃
ᠲᠡᠳᠡ ᠰᠢᠷᠠᠤ᠋ᠰᠤᠨ ᠭᠣᠣᠯ ᠤ᠋ᠨ ᠤᠷᠢᠳᠤ ᠪᠡᠶᠡ ᠳ᠋ᠦ᠍ ᠬᠦᠷᠦᠭᠡᠳ ᠦᠦᠰᠢᠨ ᠦ᠌ ᠠᠭᠤᠯᠵᠠᠷ ᠳᠠᠬᠢ ᠵᠠᠩ ᠵᠢᠶᠠ ᠪᠠᠢ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠰᠠᠭᠤᠭᠠᠳ ᠰᠠᠶᠢ ᠴᠣᠭᠲᠣᠸᠴᠢᠷ ᠲᠤ᠌ ᠰᠢᠨᠡᠯᠡᠮᠡ ᠶ᠋ᠢ ᠠᠪᠤᠷᠠᠨ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠡ ᠬᠦᠷᠭᠡᠭᠰᠡᠨ ᠳ᠋ᠦ᠍᠂ ᠲᠡᠷᠡ ᠪᠠᠰᠠ ᠬᠣᠶᠠᠷ ᠮᠣᠷᠢ ᠨᠡᠮᠡᠵᠦ ᠥᠭᠭᠦᠭᠡᠳ ᠰᠢᠨᠡᠯᠡᠮᠡ ᠶ᠋ᠢ ᠦᠷᠭᠦᠯᠵᠢᠯᠡᠨ ᠬᠠᠲᠤᠨ ᠭᠣᠣᠯ ᠢ᠋ᠶ᠋ᠠᠷ ᠳᠠᠭᠠᠭᠤᠯᠵᠤ ᠭᠠᠷᠭᠠᠬᠤ ᠪᠣᠯᠪᠠ ᠤᠤ ᠭᠡᠮᠡᠨ ᠬᠦᠰᠡᠮᠵᠢᠯᠡᠪᠡ᠃ ᠲᠡᠳᠡ ᠬᠠᠩᠭᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠲᠣᠭᠣᠷᠢᠭᠤ ᠵᠠᠮ ᠢ᠋ᠶ᠋ᠠᠷ ᠵᠢᠰᠦ ᠪᠤᠷᠤᠭᠤᠯᠠᠨ ᠶᠠᠪᠤᠭᠠᠳ ᠪᠢᠩᠲᠦ ᠶ᠋ᠢᠨ ᠰᠢᠷᠠ ᠵᠣᠣ ᠠ᠋ᠴᠠ ᠰᠢᠨᠡᠯᠡᠮᠡ ᠶ᠋ᠢ ᠰᠥᠨᠢ ᠪᠡᠷ ᠬᠠᠲᠤᠨ ᠭᠣᠣᠯ ᠢ᠋ᠶ᠋ᠠᠷ ᠭᠠᠷᠭᠠᠯᠭᠠᠪᠠ᠃ ᠢᠩᠭᠢᠭᠡᠳ ᠰᠢᠨᠠᠯᠠᠮᠠ ᠬᠠᠯᠬᠠ ᠮᠣᠩᠭᠣᠯ ᠵᠦᠭ ᠳᠤᠲᠠᠭᠠᠴᠢᠬᠠᠯᠠ ᠭᠡᠵᠦ ᠦᠭᠡ ᠭᠠᠷᠭᠠᠵᠠᠢ᠃ ᠰᠢᠨᠠᠯᠠᠮᠠ ᠬᠠᠲᠤᠨ ᠭᠣᠣᠯ ᠢ᠋ᠶ᠋ᠠᠷ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠤᠭᠤᠲᠤ ᠬᠣᠲᠠ ᠳ᠋ᠤ᠌ ᠣᠴᠢᠵᠤ᠂ ᠲᠡᠨᠳᠡ ᠡᠴᠡ ᠳᠠᠬᠢᠨ ᠬᠠᠲᠤᠨ ᠭᠣᠣᠯ ᠢ᠋ ᠭᠡᠲᠦᠯᠵᠦ ᠦᠦᠰᠢᠨ ᠳ᠋ᠡᠭᠡᠨ ᠨᠢᠭᠤᠴᠠ ᠪᠠᠷ ᠪᠤᠴᠠᠵᠤ ᠢᠷᠡᠵᠦ᠂ ᠵᠠᠮ ᠳ᠋ᠠᠭᠠᠨ ᠵᠠᠰᠠᠭ ᠬᠤᠰᠢᠭᠤᠨ ᠤ᠋ ᠪᠠᠪᠤᠤ ᠮᠡᠢᠷᠡᠨ ᠦ᠌ ᠭᠡᠷ ᠲᠦ᠍ ᠨᠢᠭᠡ ᠬᠤᠭᠤᠴᠠᠭᠠ ᠬᠡᠦᠬᠡᠳ ᠲᠦ᠋ᠨᠢ ᠪᠢᠴᠢᠭ ᠵᠢᠭᠠᠵᠤ ᠪᠡᠶᠡ ᠪᠡᠨ ᠰᠤᠪᠢᠯᠠᠨ ᠳᠠᠯᠳᠠᠯᠠᠪᠠ᠃
ᠰᠢᠨᠡᠯᠡᠮᠡ ᠲᠤᠰ ᠵᠢᠯ ᠦ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠡᠳᠦᠷ ᠪᠠᠪᠤᠤ ᠮᠡᠢᠷᠡᠨ ᠦ᠌ ᠵᠢᠷᠣᠭᠠ ᠴᠣᠬᠣᠷ ᠮᠣᠷᠢ ᠶ᠋ᠢ ᠤᠨᠤᠵᠤ ᠰᠡᠮᠡᠬᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠭᠰᠠᠨ ᠳ᠋ᠤ᠌ ᠵᠢᠷᠠᠨ ᠠᠨᠳᠠ ᠶ᠋ᠢᠨ ᠪᠦᠯᠦᠭ ᠲᠦ᠍ ᠰᠡᠷᠡᠭᠳᠡᠪᠡ᠃ ᠰᠢᠨᠠᠯᠠᠮᠠ ᠳᠥᠩᠭᠡᠵᠦ ᠭᠡᠷ ᠲᠡᠭᠡᠨ ᠴᠠᠭᠠᠨ ᠢᠳᠡᠭᠡ ᠴᠠᠢ ᠠᠮᠰᠠᠭᠠᠳ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠪᠠᠷ ᠤᠰᠠᠩ ᠤ᠋ᠨ ᠰᠠᠭᠤᠷᠢ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠤᠰᠠᠩ ᠲᠠᠯᠪᠢᠵᠤ ᠳᠠᠭᠠᠳᠬᠠᠯ ᠬᠢᠵᠦ ᠮᠥᠷᠭᠥᠴᠢᠬᠡᠭᠡᠳ ᠵᠠᠢᠳᠠᠪᠠ᠃ ᠡᠬᠡᠨᠡᠷ ᠨᠢ᠄《ᠶᠠᠭᠤᠨ ᠳ᠋ᠤ᠌ ᠶᠠᠭᠠᠷᠠᠭᠠᠳ ᠪᠠᠢᠨᠠ᠂ ᠪᠤᠳᠠᠭᠠ ᠬᠣᠭᠣᠯᠠ ᠪᠡᠯᠡᠳᠬᠡᠶᠡ᠂ ᠬᠣᠭᠣᠯᠠ ᠢᠳᠡᠴᠢᠬᠡᠭᠡᠳ ᠶᠠᠪᠤ᠁》 ᠭᠡᠬᠦ ᠳ᠋ᠦ᠍ ᠰᠢᠨᠡᠯᠡᠮᠡ᠄《 ᠪᠢ ᠣᠳᠣ ᠭᠡᠷ ᠡᠴᠡ ᠭᠠᠷᠬᠤ ᠦᠭᠡᠢ ᠪᠣᠯ ᠠᠶᠤᠯ ᠲᠠᠢ ᠪᠠᠢᠨᠠ᠂ ᠲᠡᠢᠮᠦ ᠡᠴᠡ ᠡᠨᠡ ᠴᠠᠭ ᠲᠤ᠌ ᠵᠠᠪᠠᠯ ᠮᠣᠷᠳᠠᠬᠤ ᠴᠢᠬᠤᠯᠠ ᠲᠠᠢ᠁》 ᠭᠡᠳ ᠭᠠᠷᠴᠤ ᠶᠠᠪᠤᠵᠠᠢ᠃
ᠰᠢᠨᠠᠯᠠᠮᠠ ᠤᠳᠠᠯ ᠦᠭᠡᠢ ᠲᠡᠳᠡᠨ ᠦ᠌ ᠭᠡᠷ ᠡᠴᠡ ᠳᠡᠮᠡᠢ ᠬᠣᠯᠠ ᠦᠭᠡᠢ ᠪᠠᠢᠭᠠ ᠳᠤᠭᠤᠢᠯᠠᠩ ᠤ᠋ᠨ ᠢᠳᠡᠪᠬᠢᠲᠡᠨ ᠪᠦᠷᠢᠨᠪᠠᠶᠠᠷ(20 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠳᠥᠴᠢᠭᠡᠳ ᠣᠨ ᠤ᠋ ᠰᠡᠭᠦᠯᠡᠷ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠤᠢᠭᠤᠷᠵᠢᠨ ᠬᠠᠷᠢᠶᠠᠨ ᠤ᠋ ᠵᠠᠯᠠᠨ ᠤ᠋ ᠲᠤᠰᠢᠶᠠᠯ ᠳ᠋ᠤ᠌ ᠪᠠᠢᠪᠠ) ᠶ᠋ᠢᠨ ᠭᠡᠷ ᠲᠦ᠍ ᠬᠦᠷᠪᠡ᠃ ᠲᠡᠷᠡ ᠲᠡᠭᠦᠨ ᠡᠴᠡ ᠳᠤᠭᠤᠢᠯᠠᠩ ᠤ᠋ᠨ ᠨᠥᠬᠥᠳ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠨ ᠣᠢᠯᠠᠭᠠᠬᠤ ᠶ᠋ᠢᠨ ᠳᠠᠭᠠᠤ ᠰᠤᠳᠨᠠᠮᠳᠣᠩᠷᠣᠪ᠂ ᠲᠦᠮᠡᠨᠵᠢᠷᠭᠠᠯ ᠨᠠᠷ ᠲᠤ᠌ ᠴᠢᠬᠤᠯᠠ ᠦᠭᠡ ᠳᠠᠮᠵᠢᠭᠤᠯᠬᠤ ᠶ᠋ᠢ ᠨᠠᠢᠳᠠᠵᠤ᠂ ᠡᠨᠡ ᠲᠡᠷᠡ ᠶ᠋ᠢ ᠵᠣᠭᠣᠭᠳᠠᠭᠰᠠᠭᠠᠷ ᠰᠥᠨᠢ ᠳᠦᠯᠢ ᠪᠣᠯᠴᠢᠬᠠᠵᠠᠢ᠃
ᠰᠢᠨᠡᠯᠡᠮᠡ ᠢᠩᠭᠢᠵᠦ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠨᠢᠭᠡ ᠡᠳᠦᠷ ᠳᠠᠪᠬᠢᠭᠤᠯᠤᠭᠰᠠᠨ ᠲᠤᠯᠠ ᠮᠣᠷᠢ ᠪᠠᠨ ᠲᠡᠵᠢᠭᠡᠵᠦ ᠰᠠᠢᠨ ᠠᠮᠠᠷᠠᠭᠤᠯᠬᠤ ᠶ᠋ᠢ ᠪᠣᠳᠣᠵᠤ ᠬᠣᠨᠳᠣᠴᠠᠭ ᠤ᠋ᠨ ᠰᠢᠷᠬᠠ ᠨᠢ ᠴᠦ᠍ ᠵᠢᠮᠵᠢᠭᠢᠨᠡᠨ ᠡᠪᠡᠳᠴᠦ ᠪᠠᠢᠬᠤ ᠲᠤᠯᠠ ᠪᠠᠭᠠ ᠠᠮᠠᠷᠠᠵᠤ ᠤᠨᠲᠠᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠵᠠᠢ᠃
ᠭᠡᠲᠡᠯᠡ ᠰᠢᠨᠠᠯᠠᠮᠠ ᠬᠡᠵᠢᠶᠡᠳᠡ ᠬᠡᠷᠡᠭ ᠶᠠᠪᠤᠳᠠᠯ ᠤ᠋ᠨ ᠢᠯᠠᠭᠳᠠᠬᠤ ᠲᠠᠯᠠ ᠶ᠋ᠢ ᠢᠯᠡᠭᠦᠦ ᠪᠣᠳᠣᠯᠬᠢᠯᠠᠵᠤ ᠶᠠᠪᠤᠳᠠᠭ ᠲᠤᠯᠠ ᠪᠠᠢᠨ ᠳᠠᠬᠢᠨ ᠭᠠᠳᠠᠨᠠ ᠭᠠᠷᠴᠤ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠪᠠᠢᠭᠰᠠᠭᠠᠷ ᠭᠡᠨᠡᠳᠲᠡ ᠰᠡᠩᠳᠡ ᠮᠡᠩᠳᠡ᠄
《ᠪᠢ ᠣᠳᠣ ᠶᠠᠪᠤᠯᠠ᠂ ᠨᠠᠮᠠᠶ᠋ᠢ ᠬᠥᠮᠦᠨ ᠨᠡᠬᠡᠮᠵᠢᠯᠡᠵᠦ ᠪᠠᠢᠨᠠ᠂ ᠪᠢ ᠵᠡᠭᠦᠨ ᠦᠨᠡᠰᠦᠨ ᠬᠦᠳᠦᠩ ᠢ᠋ᠶ᠋ᠡᠷ ᠳᠥᠩᠭᠡᠵᠦ ᠭᠠᠷᠬᠤ ᠳ᠋ᠤ᠌ ᠴᠡᠷᠢᠭ ᠢᠷᠡᠪᠡᠯ᠂ ᠨᠠᠮᠠᠶ᠋ᠢ ᠣᠳᠣ ᠵᠡᠭᠦᠨᠰᠢ ᠳᠤᠲᠠᠭᠠᠯᠠ᠂ ᠦᠦᠰᠢᠨᠵᠤᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠬᠦ ᠤᠴᠢᠷ ᠲᠠᠢ ᠭᠡᠵᠦ ᠬᠡᠯᠡᠭᠡᠷᠡᠢ! ᠪᠢ ᠶᠠᠪᠤᠭᠠᠳ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠤ᠋ ᠬᠣᠢᠨᠠ ᠴᠡᠷᠢᠭ ᠢᠷᠡᠭᠡᠳ ᠠᠰᠠᠭᠤᠪᠠᠯ᠂ ᠨᠠᠮᠠᠶ᠋ᠢ ᠶᠠᠪᠤᠭᠠᠳ ᠨᠡᠯᠢᠶᠡᠳ ᠤᠳᠠᠴᠢᠬᠠᠭᠰᠠᠨ᠂ ᠰᠠᠢᠨ ᠵᠢᠷᠣᠭᠠ ᠮᠣᠷᠢ ᠤᠨᠤᠵᠤ ᠪᠠᠢᠬᠤ ᠶᠤᠮ ᠴᠢᠨᠢ ᠣᠳᠣ ᠦᠦᠰᠢᠨᠵᠤᠤ ᠶ᠋ᠢᠨ ᠰᠦᠮᠡ ᠣᠢᠷᠠᠳᠴᠤ ᠪᠠᠢᠬᠠ᠂ ᠦᠦᠰᠢᠨᠵᠤᠤ ᠳ᠋ᠤ᠌ ᠣᠴᠢᠬᠤ ᠤᠴᠢᠷ ᠲᠠᠢ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ ᠭᠡᠵᠦ ᠬᠡᠯᠡᠭᠡᠷᠡᠢ!》 ᠭᠡᠳ ᠭᠠᠷᠴᠤ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠴᠢᠬᠠᠯᠠ᠃ ᠲᠡᠭᠡᠲᠡᠯᠡ ᠪᠠᠷᠠᠭᠤᠨ ᠭᠦᠳᠦᠴᠡᠭ ᠦ᠋ᠨ ᠣᠷᠣᠢ ᠪᠠᠷ ᠸᠠᠩᠴᠤᠭᠷᠠᠪᠳᠠᠨ ᠲᠦᠷᠦᠭᠦᠲᠡᠢ ᠠᠷᠪᠠᠭᠠᠳ ᠮᠣᠷᠢᠲᠠᠢ ᠬᠥᠮᠦᠰ ᠭᠠᠳᠠᠨᠠ ᠬᠦᠷᠦᠭᠡᠳ ᠢᠷᠡᠪᠡ᠃ ᠸᠠᠩᠴᠤᠭᠷᠠᠪᠳᠠᠨ᠄
《ᠰᠢᠨᠠᠯᠠᠮᠠ ᠲᠠᠨ ᠤ᠋ ᠳ᠋ᠤ᠌ ᠢᠷᠡᠭᠡᠳ ᠬᠠᠮᠢᠭᠠᠰᠢ ᠶᠠᠪᠤᠪᠠ᠂ ᠬᠤᠷᠳᠤᠨ ᠬᠡᠯᠡ᠁》 ᠭᠡᠵᠦ ᠵᠠᠩᠳᠤᠷᠤᠨ ᠠᠰᠠᠭᠤᠬᠤ ᠳ᠋ᠤ᠌᠂ ᠪᠦᠷᠢᠨᠪᠠᠶᠠᠷ ᠰᠢᠨᠠᠯᠠᠮᠠ ᠶ᠋ᠢ ᠪᠠᠷᠢᠭᠳᠠᠬᠤ ᠠ᠋ᠴᠠ ᠠᠶᠤᠬᠤ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠡᠭ ᠮᠡᠭ ᠭᠡᠵᠦ ᠰᠠᠨᠳᠤᠷᠤᠨᠠ᠃ ᠸᠠᠩᠴᠤᠭᠷᠠᠪᠳᠠᠨ ᠠᠭᠤᠷ ᠬᠦᠷᠴᠦ ᠬᠤᠯᠤᠰᠤᠨ ᠮᠠᠪᠠᠩ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠪᠦᠷᠢᠨᠪᠠᠶᠠᠷ ᠢ᠋ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠦᠭᠡᠢ ᠲᠠᠰᠢᠭᠤᠷᠳᠠᠬᠤ ᠳ᠋ᠤ᠌ ᠲᠡᠷᠡ᠄
《ᠰᠢᠨᠡᠯᠡᠮᠡ ᠥᠨᠥᠬᠡᠨ ᠵᠡᠭᠦᠨᠰᠢ ᠶᠠᠪᠤᠭᠰᠠᠨ᠂ ᠳᠡᠮᠡᠢ ᠬᠣᠯᠠᠳᠠᠭᠰᠠᠨ ᠦᠭᠡᠢ ᠪᠠᠢᠬᠠ᠂ ᠦᠦᠰᠢᠨᠵᠦᠦ ᠳ᠋ᠦ᠍ ᠬᠦᠷᠬᠦ ᠤᠴᠢᠷ ᠲᠠᠢ ᠭᠡᠵᠦ ᠬᠡᠯᠡᠭᠰᠡᠨ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃
ᠰᠢᠨᠠᠯᠠᠮᠠ ᠶ᠋ᠢ ᠪᠠᠷᠢᠭᠳᠠᠴᠢᠬᠠᠯᠠ ᠪᠠ ᠭᠡᠵᠦ ᠪᠦᠷᠢᠨᠪᠠᠶᠠᠷ ᠤ᠋ᠨ ᠭᠡᠷ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠰᠠᠨᠠᠭᠠᠰᠢᠷᠠᠨ ᠵᠣᠪᠠᠵᠤ ᠪᠠᠢᠲᠠᠯᠠ᠂ ᠰᠢᠨᠠᠯᠠᠮᠠ ᠡᠭᠦᠳᠡ ᠪᠡᠷ ᠰᠡᠮᠡᠭᠡᠷᠬᠡᠨ ᠣᠷᠣᠵᠤ ᠢᠷᠡᠯᠡ᠃ ᠪᠦᠷᠢᠨᠪᠠᠶᠠᠷ ᠤ᠋ᠨ ᠬᠢᠨ ᠪᠦᠷ ᠰᠣᠴᠢᠨ ᠭᠠᠢᠬᠠᠵᠤ᠄
《ᠲᠠ ᠶᠠᠭᠠᠬᠢᠭᠠᠳ ᠢᠷᠡᠴᠢᠬᠡᠪᠡ? ᠸᠠᠩᠴᠤᠭᠷᠠᠪᠳᠠᠨ ᠨᠠᠷ ᠴᠢᠮᠠᠶ᠋ᠢ ᠡᠷᠢᠵᠦ ᠪᠠᠢᠨᠠ᠂ ᠬᠤᠷᠳᠤᠨ ᠳᠠᠯᠳᠠᠯᠠ᠁ 》 ᠭᠡᠵᠦ ᠰᠠᠨᠳᠤᠷᠴᠠᠭᠠᠨᠠ᠃
ᠰᠢᠨᠠᠯᠠᠮᠠ ᠣᠭᠲᠣ ᠠᠶᠤᠵᠤ ᠰᠣᠴᠢᠭᠰᠠᠨ ᠪᠠᠢᠳᠠᠯ ᠦᠭᠡᠢ ᠪᠡᠷ᠄
《ᠨᠣᠬᠠᠢ ᠬᠤᠴᠠᠬᠤ ᠪᠠᠷ ᠢ᠋ᠶ᠋ᠠᠨ ᠬᠤᠴᠠ᠂ ᠲᠡᠮᠡᠭᠡ ᠶᠠᠪᠤᠬᠤ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠨᠠ ᠳᠠ! ᠸᠠᠩᠴᠣᠭᠷᠠᠪᠳᠠᠨ ᠨᠠᠷ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠨᠠᠮᠠᠶ᠋ᠢ ᠬᠥᠭᠡᠭᠡᠳ ᠦᠦᠰᠢᠨᠵᠦᠦ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠬᠦ ᠶᠦᠮ᠃ ᠪᠢ ᠲᠠᠨ ᠤ᠋ ᠳ᠋ᠤ᠌ ᠬᠣᠨᠣᠭ ᠪᠠᠷᠢᠵᠤ᠂ ᠮᠣᠷᠢ ᠪᠠᠨ ᠪᠠᠰᠠ ᠲᠡᠵᠢᠭᠡᠯᠭᠡᠵᠦ ᠠᠮᠠᠷᠠᠭᠤᠯᠤᠶᠠ!》 ᠭᠡᠳ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠲᠠᠢᠯᠤᠯ ᠦᠭᠡᠢ ᠪᠡᠷ ᠤᠨᠲᠠᠯᠠ᠂ ᠪᠦᠷᠢᠨᠪᠠᠶᠠᠷ ᠤ᠋ᠨ ᠬᠢᠨ ᠳᠠᠬᠢᠵᠤ ᠬᠥᠮᠦᠨ ᠢᠷᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠰᠥᠨᠢᠵᠢᠨ ᠤᠨᠲᠠᠭᠰᠠᠨ ᠦᠭᠡᠢ ᠭᠠᠳᠠᠨᠠ ᠡᠷᠭᠢᠴᠡᠭᠡᠳ ᠥᠩᠭᠡᠷᠡᠯᠡ᠃
ᠰᠢᠨᠠᠯᠠᠮᠠ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠠᠷᠠ ᠭᠠᠷᠬᠤ ᠠ᠋ᠴᠠ ᠡᠮᠦᠨᠡ ᠵᠠᠰᠠᠭ ᠬᠣᠰᠢᠭᠤ ᠵᠦᠭ ᠮᠣᠷᠳᠠᠪᠠ᠃ ᠸᠠᠩᠴᠣᠭᠷᠠᠪᠳᠠᠨ ᠨᠠᠷ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠦᠦᠰᠢᠨᠵᠦᠦ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠴᠦ ᠰᠦᠮᠡ ᠶ᠋ᠢᠨ ᠭᠠᠳᠠᠭᠤᠷ ᠬᠠᠷᠠᠭᠤᠯ ᠮᠠᠨᠠᠭᠠ ᠵᠣᠭᠰᠣᠭᠠᠨ ᠯᠠᠮᠠ ᠨᠠᠷ ᠤ᠋ᠨ ᠣᠷᠣᠨ ᠭᠡᠷ ᠢ᠋ ᠨᠡᠩᠵᠢᠨ ᠪᠠᠢᠴᠠᠭᠠᠪᠠ᠃ ᠲᠡᠳᠡ ᠰᠢᠨᠠᠯᠠᠮᠠ ᠶ᠋ᠢᠨ ᠰᠤᠷᠠᠭ ᠢ᠋ ᠴᠦ᠍ ᠣᠯᠤᠭᠰᠠᠨ ᠦᠭᠡᠢ ᠦᠦᠰᠢᠨᠵᠦᠦ ᠳ᠋ᠦ᠍ ᠬᠣᠶᠠᠷ ᠬᠣᠨᠣᠭᠠᠳ ᠪᠤᠴᠠᠨ ᠢᠷᠡᠬᠦ ᠳ᠋ᠦ᠍ ᠰᠢᠨᠠᠯᠠᠮᠠ ᠬᠠᠷᠢᠨ ᠲᠤᠰ ᠡᠳᠦᠷ ᠲᠡᠭᠡᠨ ᠵᠠᠰᠠᠭ ᠬᠤᠰᠢᠭᠤᠨ ᠤ᠋ ᠯᠠᠮᠠ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠴᠦ ᠣᠴᠢᠭᠰᠠᠨ ᠪᠠᠢᠵᠠᠢ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠰᠤᠳᠨᠠᠮᠳᠣᠩᠷᠣᠪ᠂ ᠲᠦᠮᠡᠨᠵᠢᠷᠭᠠᠯ ᠨᠠᠷ ᠵᠠᠰᠠᠭ ᠬᠤᠰᠢᠭᠤᠨ ᠤ᠋ ᠪᠠᠪᠤᠤ ᠮᠡᠢᠷᠡᠨ ᠦ᠌ ᠳ᠋ᠦ᠍ ᠬᠦᠷᠴᠦ ᠰᠢᠨᠡᠯᠡᠮᠡ ᠲᠡᠢ ᠬᠡᠳᠦᠨ ᠡᠳᠦᠷ ᠶᠠᠷᠢᠯᠴᠠᠨ ᠵᠣᠭᠣᠭᠳᠠᠭᠰᠠᠨ ᠭᠡᠨᠡ᠃①
— — — —
① ᠲᠤᠰ ᠠᠭᠤᠯᠭᠠ ᠶ᠋ᠢ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠨᠢᠭᠡᠳᠦᠮᠡᠯ ᠹᠷᠣᠨᠲ ᠤ᠋ᠨ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠪᠠᠢᠭᠰᠠᠨ ᠴᠢ ᠪᠤᠤ ᠴᠤᠸᠠᠨ(ᠪᠠᠲᠤᠷᠠᠪᠳᠠᠨ) ᠪᠦᠷᠢᠨᠪᠠᠶᠠᠷ ᠵᠠᠯᠠᠨ ᠤ᠋ ᠵᠢᠷᠭᠤᠳᠤᠭᠠᠷ ᠬᠥᠪᠡᠭᠦᠨ ᠰᠡᠳᠡᠪᠠᠨᠽᠠᠷ ᠨᠠᠰᠤᠲᠠᠳ ᠤ᠋ᠨ ᠬᠡᠯᠡᠭᠰᠡᠨ ᠢ᠋ ᠡᠮᠬᠢᠳᠬᠡᠨ ᠨᠠᠢᠷᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠢᠯᠢᠭ᠌᠂ ᠪᠠᠯ
ᠦᠰᠦᠭ ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ