ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠷᠢ ᠶᠢᠰᠦ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 29
63ᠵᠣᠷᠢᠭ ᠪᠠᠳᠠᠷᠠᠯᠲᠠ
ᠣᠶᠤᠨᠳᠠᠷᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ《ᠪᠣᠭᠳᠠ ᠶ᠋ᠢᠨ ᠵᠠᠷᠯᠢᠭ ᠢ᠋ ᠳᠠᠪᠠᠵᠤ ᠪᠣᠯᠳᠠᠭ ᠦᠭᠡᠢ ᠶᠦᠮ》 ᠭᠡᠵᠦ ᠪᠠᠢᠨ ᠪᠠᠢᠨ ᠳᠠᠪᠲᠠᠨ ᠬᠡᠯᠡᠭᠰᠡᠨ ᠢ᠋ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠵᠢᠭᠰᠢᠨ᠂ ᠨᠢᠭᠡ ᠴᠦ᠍ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠪᠠᠢᠭᠠᠳ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠰᠠᠨ ᠠᠵᠢ᠃ ᠥᠪᠡᠷ ᠦ᠋ᠨ ᠬᠢᠨᠢ ᠪᠣᠳᠣᠯ ᠢ᠋ᠶ᠋ᠠᠷ ᠪᠣᠯ᠄《ᠪᠢᠳᠡ ᠭᠠᠭᠴᠠ ᠥᠬᠢᠨ ᠢ᠋ᠶ᠋ᠡᠨ ᠪᠤᠰᠤᠳ ᠲᠤ ᠥᠭᠬᠦ ᠦᠭᠡᠢ》 ᠭᠡᠬᠦ ᠡᠴᠡ ᠠᠪᠤᠭᠠᠳ《ᠥᠪᠡᠷ ᠦ᠋ᠨ ᠬᠢᠨᠢ ᠰᠠᠨᠠᠯ ᠮᠡᠳᠡᠨᠡ》 ᠭᠡᠬᠦ ᠬᠦᠷᠲᠡᠯᠡ ᠣᠯᠠᠨ ᠲᠥᠷᠥᠯ ᠦ᠋ᠨ ᠰᠢᠯᠲᠠᠭᠠᠨ ᠪᠠᠢᠵᠤ ᠪᠣᠯᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠬᠡᠷᠪᠡ ᠲᠡᠷᠡ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠯᠳᠠᠭ ᠦᠭᠡᠢ ᠠᠪᠠᠰᠤ ᠨᠠᠮᠠᠶ᠋ᠢ ᠨᠢᠭᠡ ᠲᠡᠢᠰᠢ ᠨᠢ ᠰᠠᠮ ᠤᠷᠭᠤᠨ ᠵᠢᠭᠤᠲᠠᠭᠤᠯᠵᠤ ᠪᠣᠯᠬᠤ ᠰᠢᠦ ᠳᠡ ᠭᠡᠬᠦ ᠡᠴᠡ ᠡᠴᠢᠭᠡ ᠡᠬᠡ ᠬᠣᠶᠠᠷ ᠢ᠋ ᠥᠰᠢᠨ ᠵᠠᠨᠤᠬᠤ ᠰᠡᠳᠬᠢᠯ ᠲᠥᠷᠥᠨᠡ᠃《ᠣᠳᠣ ᠠ᠋ᠴᠠ ᠡᠬᠢᠯᠡᠨ ᠨᠠᠳᠠ ᠳ᠋ᠤ᠌ ᠠᠪᠤ ᠡᠵᠢ ᠪᠠᠢᠬᠤ ᠦᠭᠡᠢ᠂ ᠠᠪᠤᠷᠠᠨ ᠢᠪᠡᠭᠡᠬᠦ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠴᠦ᠍ ᠠᠯᠠᠭᠠ᠃ ᠴᠥᠮ ᠪᠣᠭᠳᠠ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠪᠠᠢᠳᠠᠭ ᠢ᠋ᠶ᠋ᠠᠷ ᠮᠢᠨᠦ ᠳᠠᠢᠰᠤᠨ ᠰᠢᠦ ᠳᠡ》 ᠭᠡᠬᠦ ᠡᠴᠡ ᠳᠠᠷᠤᠢ ᠪᠣᠭᠣᠵᠤ ᠦᠬᠦᠭᠦᠰᠢᠲᠡᠢ ᠠᠵᠢ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠢ᠋ ᠪᠣᠳᠣᠯᠠ᠃ ᠲᠡᠷᠡ ᠮᠠᠨᠢ ᠨᠠᠳᠠ ᠴᠢᠩ ᠰᠡᠳᠬᠢᠯ ᠡᠴᠡ ᠬᠠᠢᠷᠠᠲᠠᠢ ᠪᠣᠯᠬᠣᠷ ᠨᠠᠮᠠᠶ᠋ᠢ ᠥᠮᠥᠭᠯᠡᠨ ᠬᠠᠮᠠᠭᠠᠯᠠᠬᠤ ᠲᠡᠳᠦᠢ ᠦᠭᠡᠢ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠠᠪᠤᠨ ᠨᠢᠭᠡᠨ ᠲᠠᠢᠰᠢ ᠤᠷᠭᠤᠬᠤ ᠪᠣᠯᠪᠠ ᠤᠤ? ᠭᠡᠬᠦ ᠰᠡᠳᠬᠢᠯ ᠲᠥᠷᠥᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠣᠯᠤᠯᠠ᠃
ᠲᠡᠷᠡ ᠳᠣᠣᠷᠠ ᠪᠠᠨ ᠭᠡᠷ ᠡᠴᠡ ᠪᠡᠨ ᠱᠠᠭᠠᠢᠨ ᠵᠢᠯᠣᠭᠣᠴᠢ ᠲᠦᠪᠰᠢᠨ ᠢ᠋ ᠲᠠᠭᠤᠲᠠᠯᠠ᠂ ᠬᠣᠶᠠᠷ ᠳᠠᠬᠢᠨ ᠲᠠᠭᠤᠲᠠᠯᠠ᠃
ᠲᠦᠪᠰᠢᠨ ᠪᠠᠷᠠᠭᠤᠨ ᠭᠡᠷ ᠲᠦ᠍ ᠭᠠᠭᠴᠠ ᠥᠬᠢᠨ ᠦ᠌ ᠪᠡᠨ ᠬᠠᠷᠠᠩᠭᠤᠢ ᠭᠠᠰᠠᠯᠠᠩ ᠳ᠋ᠤ᠌ ᠤᠨᠠᠭᠰᠠᠨ ᠲᠤᠬᠠᠢ ᠳ᠋ᠤ᠌ ᠬᠡᠷᠬᠢᠬᠦ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠡᠴᠢᠭᠡ ᠡᠬᠡ ᠬᠣᠶᠠᠷ ᠤ᠋ᠨ ᠭᠤᠨᠢᠭᠲᠤ ᠶᠠᠷᠢᠶᠠᠨ ᠢ᠋ ᠰᠣᠨᠣᠰᠤᠨ ᠮᠥᠨ ᠯᠡ ᠣᠢ ᠭᠠᠰᠢᠭᠤᠨ ᠪᠣᠯᠤᠨ ᠰᠠᠭᠤᠭᠰᠠᠨ ᠤᠴᠢᠷ ᠭᠤᠷᠪᠠᠳᠠᠬᠢ ᠳᠠᠭᠤᠳᠠᠯᠲᠠ ᠳᠡᠭᠡᠷᠡ ᠠᠩᠬᠠ ᠤᠳᠠᠭᠠ ᠪᠠᠨ ᠰᠣᠨᠣᠰᠤᠨ ᠪᠣᠰᠤᠨ ᠬᠠᠷᠠᠢᠵᠤ᠄
— ᠬᠡᠦᠬᠡᠨ ᠮᠢᠨᠢ ᠶᠠᠭᠤ ᠬᠡ ᠪᠣᠢ? ᠭᠡᠵᠦ ᠭᠡᠷ ᠡᠴᠡ ᠭᠠᠷᠴᠤ ᠢᠷᠡᠪᠡ᠃
— ᠲᠠ ᠮᠣᠷᠢ ᠲᠡᠷᠭᠡ ᠬᠥᠯᠥᠯᠡ᠂ ᠪᠢ ᠶᠠᠪᠤᠶᠠ!
— ᠵᠠ ᠂ ᠵᠠ ᠣᠳᠣᠬᠠᠨ ᠭᠡᠵᠦ ᠲᠦᠪᠰᠢᠨ ᠮᠣᠷᠢᠨ ᠤ᠋ ᠫᠧᠩ ᠤᠷᠤᠭᠤ ᠫᠢᠵᠢᠭᠢᠨᠡᠨ ᠬᠠᠷᠠᠢᠯᠭᠠᠪᠠ᠃
ᠣᠶᠤᠳᠠᠷᠢ ᠪᠤᠴᠠᠨ ᠣᠷᠣᠵᠤ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠵᠠᠰᠠᠨ ᠪᠦᠰᠡ ᠪᠡᠨ ᠴᠢᠩᠭᠠᠯᠠᠬᠤ ᠳ᠋ᠠᠭᠠᠨ ᠲᠣᠯᠢᠨ ᠤ᠋ ᠡᠮᠦᠨᠡ ᠣᠴᠢᠨ ᠵᠣᠭᠰᠣᠯᠠ᠃ ᠨᠢᠳᠦ ᠨᠢ ᠤᠯᠠᠢᠭᠰᠠᠨ ᠪᠣᠯᠤᠨ ᠪᠥᠯᠴᠥᠢᠨ ᠬᠠᠪᠤᠳᠤᠭᠰᠠᠨ ᠦᠵᠡᠭᠳᠡᠪᠡ᠃ ᠬᠣᠢᠰᠢᠳᠠ ᠪᠠᠨ ᠶᠠᠭᠠᠬᠢᠭᠰᠠᠨ ᠴᠦ᠍ ᠢᠩᠭᠢᠵᠦ ᠤᠬᠢᠯᠠᠬᠤ ᠦᠭᠡᠢ ᠭᠡᠵᠦ ᠵᠢᠷᠦᠬᠡ ᠪᠡᠨ ᠴᠢᠩᠭᠠᠯᠠᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠪᠠᠯᠳᠠᠨᠴᠡᠷᠢᠩ ᠳᠡᠭᠡᠷᠡ ᠤᠷᠭᠤᠨ ᠣᠳᠤᠭᠰᠠᠨ ᠬᠣᠢᠨᠠ ᠨᠠᠮᠠᠶ᠋ᠢ ᠳᠠᠢᠰᠤᠩᠨᠠᠭᠴᠢ ᠪᠦᠬᠦᠨ ᠢ᠋ᠶ᠋ᠡᠷ ᠶᠠᠭᠠᠬᠢᠬᠤ ᠪᠣᠯ? ᠭᠡᠬᠦ ᠡᠴᠡ ᠢᠨᠢᠶᠡᠳᠦ ᠬᠦᠷᠬᠦ ᠠᠵᠢ᠃ ᠭᠡᠷ ᠡᠴᠡ ᠭᠠᠷᠤᠨ ᠮᠣᠷᠢ ᠲᠡᠷᠭᠡᠨ ᠳ᠋ᠡᠭᠡᠨ ᠰᠠᠭᠤᠬᠤ ᠳ᠋ᠤ᠌ ᠡᠬᠡ ᠨᠢ ᠭᠠᠷᠴᠤ ᠢᠷᠡᠨ᠄
— ᠬᠡᠦᠬᠡᠨ ᠮᠢᠨᠢ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠭᠡᠵᠦ ᠤᠶᠠᠬᠠᠨ ᠵᠥᠭᠡᠯᠡᠨ ᠬᠣᠭᠣᠯᠠᠢ ᠪᠠᠷ ᠠᠰᠠᠭᠤᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠣᠶᠤᠨᠳᠠᠷᠢ᠄
— ᠨᠢᠭᠡ ᠠᠢᠯ ᠳ᠋ᠤ᠌ ᠣᠴᠢᠨᠠ ᠭᠡᠵᠦ ᠬᠡᠭᠵᠡᠭᠦᠬᠡᠨ ᠢ᠋ᠶ᠋ᠡᠷ ᠬᠡᠯᠡᠪᠡ᠃
— ᠦᠭᠡᠢ ᠬᠡᠦᠬᠡᠨ ᠮᠢᠨᠢ ᠳᠡᠮᠡᠢ ᠪᠢᠰᠢ ᠤᠤ? ᠭᠡᠵᠦ ᠴᠡᠴᠡᠷᠬᠢᠯᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠬᠡᠯᠡᠬᠦ ᠳ᠋ᠦ᠍ᠨᠢ᠄
— ᠲᠠ ᠨᠠᠮᠠᠶ᠋ᠢ ᠪᠤᠰᠤᠳ ᠤ᠋ᠨ ᠪᠣᠭᠣᠯ ᠪᠣᠯᠭᠠᠬᠤ ᠠ᠋ᠴᠠ ᠢᠯᠡᠭᠦᠦ ᠶᠠᠭᠠᠬᠢᠬᠤ ᠬᠡ ᠪᠣᠢ? ᠭᠡᠵᠦ ᠬᠠᠰᠢᠶᠠ ᠳᠠᠪᠠᠨ ᠰᠣᠨᠣᠰᠤᠭᠳᠠᠲᠠᠯᠠ ᠴᠢᠩᠭᠠ ᠬᠡᠯᠡᠪᠡ᠃
ᠡᠬᠡ ᠰᠣᠴᠢᠨ᠂《ᠡᠢᠰᠢ》 ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠥᠭᠦᠯᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠬᠡᠯᠡᠭᠰᠡᠨ ᠦᠭᠡᠢ ᠪᠥᠭᠡᠳ ᠬᠠᠰᠢᠶᠠᠨ ᠤ᠋ ᠪᠠᠨ ᠶᠡᠬᠡ ᠬᠠᠭᠠᠯᠭᠠ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠨᠡᠭᠡᠭᠡᠯᠡ᠃ ᠲᠡᠭᠦᠨ ᠢ᠋ᠶ᠋ᠡᠷ ᠵᠢᠯᠣᠭᠣᠴᠢ ᠲᠦᠪᠰᠢᠨ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ᠄
— ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠣᠢ ᠬᠡᠦᠬᠡᠨ ᠠ᠋?
— ᠬᠦᠷᠢᠶᠡ ᠣᠷᠣᠶᠠ ᠲᠦᠪᠰᠢᠨ ᠭᠤᠸᠠᠢ᠃
ᠲᠦᠪᠰᠢᠨ ᠮᠣᠷᠢ ᠲᠡᠷᠭᠡ ᠪᠡᠨ ᠠᠭᠠᠵᠢᠭᠤᠬᠠᠨ ᠶᠠᠪᠤᠭᠤᠯᠤᠨ ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨᠠ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠰᠠᠭᠤᠳᠠᠯ ᠠ᠋ᠴᠠ ᠡᠷᠭᠢᠨ᠄
— ᠬᠡᠦᠬᠡᠨ ᠮᠢᠨᠢ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠠᠯᠬᠠᠬᠤ ᠴᠢᠨᠢ ᠤᠤ?
— ᠦᠭᠡᠢ ᠲᠦᠪᠰᠢᠨ ᠭᠤᠸᠠᠢ᠂ ᠪᠠᠯᠳᠠᠨᠴᠡᠷᠢᠩ ᠲᠠᠢ ᠠᠭᠤᠯᠵᠠᠶᠠ᠃
ᠲᠦᠪᠰᠢᠨ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠥᠭᠡᠳᠡ ᠡᠴᠡ ᠨᠢ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ᠄
—《ᠵᠥᠪ》 ᠭᠡᠳ ᠴᠠᠭᠠᠰᠢ ᠡᠷᠭᠢᠨ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠪᠡ᠃ ᠮᠣᠷᠢ ᠣᠷᠣᠭᠰᠢ ᠵᠢᠳᠬᠦᠨ ᠱᠣᠭᠰᠢᠯᠠ᠂ ᠲᠦᠪᠰᠢᠨ ᠨᠡᠮᠡᠨ᠂ ᠨᠡᠮᠡᠨ ᠲᠠᠰᠢᠭᠤᠷᠳᠠᠭᠰᠠᠨ ᠳ᠋ᠤ᠌ ᠮᠣᠷᠢ ᠤᠯᠠᠮ ᠢ᠋ᠶ᠋ᠠᠷ ᠬᠤᠷᠳᠤᠯᠠᠨ ᠳᠠᠪᠬᠢᠪᠠ᠃
ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠬᠦᠷᠢᠶᠡ ᠮᠠᠢᠮᠠᠢ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠬᠥᠯ ᠬᠥᠳᠡᠯᠭᠡᠭᠡᠨ ᠶᠡᠬᠡ᠂ ᠠᠬᠠ ᠳᠡᠭᠦᠦ ᠤᠷᠤᠭ ᠲᠥᠷᠥᠯ ᠦ᠋ᠳ ᠲᠡᠭᠡᠨ ᠵᠣᠯᠭᠠᠬᠤ ᠭᠡᠵᠦ ᠭᠣᠶᠣ ᠰᠠᠢᠬᠠᠨ ᠢ᠋ ᠡᠮᠦᠰᠦᠭᠰᠡᠨ᠂ ᠤᠨᠤᠭᠠ ᠲᠠᠢ ᠤᠨᠤᠭᠠ ᠦᠭᠡᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠥᠮᠦᠰ ᠦᠷᠭᠦᠯᠵᠢᠯᠡᠨ ᠴᠤᠪᠤᠨᠠ᠃ ᠲᠡᠷᠡ ᠳᠤᠮᠳᠠᠭᠤᠷ ᠲᠦᠪᠰᠢᠨ ᠣᠶᠤᠨᠳᠠᠷᠢ ᠶ᠋ᠢ ᠢᠨᠠᠭ ᠡᠷᠡ ᠲᠡᠢ ᠨᠢ ᠠᠭᠤᠯᠵᠠᠭᠤᠯᠬᠤ ᠶ᠋ᠢ ᠶᠠᠭᠠᠷᠠᠪᠴᠢᠯᠠᠨ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠨ ᠳᠠᠪᠬᠢᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠲᠡᠷᠭᠡᠨ ᠦ᠌ ᠳᠤᠭᠤᠢ ᠪᠠᠢᠨ ᠪᠠᠢᠨ ᠤᠪᠤᠨ ᠳᠣᠪᠣᠨ ᠳᠣᠲᠣᠷᠠ ᠣᠷᠣᠨ ᠪᠡᠶᠡ ᠥᠰᠥᠷᠬᠡᠨ ᠳᠣᠩᠰᠣᠯᠬᠤ ᠳ᠋ᠤ᠌ ᠣᠶᠤᠨᠳᠠᠷᠢ《ᠶᠡᠷᠦ ᠮᠠᠨ ᠤ᠋ ᠣᠳᠣ ᠶ᠋ᠢᠨ ᠠᠮᠢᠳᠤᠷᠠᠯ ᠡᠭᠡᠭᠡ ᠯᠡ ᠡᠨᠡ ᠳᠣᠩᠰᠣᠯᠭᠠ ᠰᠢᠭ᠋ ᠪᠣᠯᠵᠤ ᠳᠠ》 ᠭᠡᠵᠦ ᠨᠢᠭᠡ ᠦᠶᠡ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠃《ᠡᠭᠦᠨ ᠦ᠌ ᠡᠮᠦᠨᠡ ᠪᠢ ᠣᠢ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠪᠠᠭᠤᠵᠤ ᠥᠭᠭᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠷᠡᠮᠡᠬᠡᠢ ᠵᠣᠷᠢᠭ ᠢ᠋ᠶ᠋ᠠᠷ ᠲᠡᠮᠡᠴᠡᠬᠦ ᠶᠣᠰᠣᠲᠠᠢ》 ᠭᠡᠵᠦ ᠪᠡᠶᠡ ᠪᠡᠨ ᠢᠳᠬᠠᠪᠠ᠃ ᠡᠭᠦᠨ ᠡᠴᠡ ᠴᠠᠭᠠᠰᠢ ᠪᠣᠳᠣᠬᠤ ᠳ᠋ᠠᠭᠠᠨ ᠪᠠᠯᠳᠠᠨᠴᠡᠷᠢᠩ ᠲᠡᠢ ᠠᠭᠤᠯᠵᠠᠬᠤ᠂ ᠠᠭᠤᠯᠵᠠᠭᠰᠠᠨ ᠬᠣᠢᠨᠠ ᠪᠠᠨ ᠪᠦᠬᠦ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠨᠢᠭᠡᠮᠦᠰᠦᠨ ᠲᠣᠭᠠᠴᠢᠬᠤ᠂ ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠤᠷᠭᠤᠨ ᠠᠯᠠᠭᠠ ᠪᠣᠯᠬᠤ ᠶ᠋ᠢ ᠪᠣᠳᠣᠵᠤ ᠡᠭᠦᠨ ᠢ᠋ᠶ᠋ᠡᠨ ᠣᠶᠤᠨᠳᠠᠷᠢ ᠰᠡᠳᠬᠢᠯᠴᠢᠯᠡᠨ ᠪᠦᠲᠦᠭᠡᠬᠦ ᠳ᠋ᠦ᠍ ᠪᠠᠲᠤ ᠢᠳᠡᠭᠡᠨ ᠪᠠᠶᠠᠷᠯᠠᠬᠤ ᠠᠵᠢ᠃
ᠭᠡᠲᠡᠯᠡ ᠮᠣᠷᠢ ᠲᠡᠷᠭᠡ ᠨᠢ᠂ ᠪᠠᠯᠳᠠᠨᠴᠡᠷᠢᠩ᠄《ᠡᠨᠡ ᠮᠠᠨ ᠤ᠋ ᠬᠢ》ᠭᠡᠵᠦ ᠪᠠᠭᠤᠳᠠᠭ ᠪᠠᠢᠭᠰᠠᠨ ᠪᠤᠰᠤᠳ ᠤ᠋ᠨ ᠬᠠᠰᠢᠶᠠᠨ ᠤ᠋ ᠡᠮᠦᠨᠡ ᠢᠷᠡᠵᠦ ᠵᠣᠭᠰᠣᠪᠠ᠃ ᠣᠶᠤᠨᠳᠠᠷᠢ ᠶᠠᠭᠠᠷᠠᠯᠲᠠᠢ ᠨᠢ ᠠᠷᠭᠠ ᠦᠭᠡᠢ ᠪᠠᠭᠤᠨ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠶ᠋ᠢ ᠲᠠᠲᠠᠬᠤ ᠳ᠋ᠤ᠌ ᠳᠣᠲᠣᠷᠠ ᠨᠢ ᠬᠣᠶᠠᠷ ᠭᠡᠷ᠂ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠢᠨᠢ ᠨᠡᠯᠢᠶᠡᠳ ᠲᠣᠮᠣ᠂ ᠪᠦᠷᠢᠶᠡᠰᠦ ᠪᠡᠷ ᠬᠠᠷᠢᠭᠤ ᠦᠭᠡᠢ ᠳᠣᠷᠣᠢ᠂ ᠪᠠᠷᠠᠭᠤᠨ ᠭᠡᠷ ᠨᠢ ᠪᠠᠭᠠᠪᠲᠤᠷ ᠪᠣᠯᠤᠭᠠᠳ ᠪᠦᠷᠢᠶᠡᠰᠦ ᠰᠠᠢᠲᠠᠢ ᠪᠠᠢᠬᠤ ᠲᠤᠯᠠ᠂ ᠣᠶᠤᠨᠳᠠᠷᠢ ᠲᠡᠷᠡ ᠭᠡᠷ ᠢ᠋ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠬᠢ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠪᠠ᠃ ᠭᠡᠷ ᠦ᠋ᠨ ᠬᠠᠭᠠᠯᠭᠠ ᠶ᠋ᠢ ᠲᠠᠲᠠᠬᠤ ᠳ᠋ᠤ᠌᠂ ᠬᠣᠢᠮᠣᠷ ᠲᠤ ᠨᠢ ᠭᠤᠷᠪᠠ ᠣᠷᠴᠢᠮ ᠨᠠᠰᠤᠨ ᠤ᠋ ᠡᠷᠡᠭᠲᠡᠢ ᠬᠡᠦᠬᠡᠳ ᠨᠢᠰᠦ ᠨᠢᠯᠪᠤᠰᠤ ᠪᠠᠨ ᠴᠤᠪᠤᠷᠠᠭᠤᠯᠤᠨ ᠤᠬᠢᠯᠠᠵᠤ ᠰᠠᠭᠤᠭᠠ ᠦᠵᠡᠭᠳᠡᠨᠡ᠃ ᠪᠠᠷᠠᠭᠤᠨ ᠲᠠᠢ ᠨᠢ ᠣᠷᠣ᠂ ᠤᠷᠢᠲᠠᠢ ᠨᠢ ᠭᠤᠴᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠡᠬᠡᠨᠡᠷ ᠮᠠᠨᠴᠤᠢ ᠲᠠᠢ ᠬᠡᠦᠬᠡᠳ ᠲᠡᠪᠡᠷᠢᠨ ᠬᠥᠬᠥᠭᠦᠯᠵᠦ ᠰᠠᠭᠤᠨᠠ᠃ ᠯᠠᠪᠯᠠᠨ ᠠᠵᠢᠬᠤ ᠳ᠋ᠤ᠌ ᠡᠬᠡᠨᠡᠷ ᠦ᠋ᠨ ᠡᠮᠦᠰᠦᠭᠰᠡᠨ ᠵᠡᠭᠦᠭᠰᠡᠨ ᠨᠢ ᠮᠠᠭᠤ ᠪᠢᠰᠢ᠃ ᠭᠡᠪᠡᠴᠦ ᠰᠠᠨᠠᠭᠠ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠪᠣᠯᠤᠯᠲᠠᠢ᠃ ᠮᠢᠬᠠ ᠱᠥᠯᠥ ᠮᠠᠭᠤᠲᠠᠢ᠂ ᠵᠢᠰᠦ ᠴᠢᠷᠠᠢ ᠴᠣᠩᠬᠢᠭᠠᠷ᠂ ᠡᠬᠢᠯᠡᠭᠡᠳ ᠣᠶᠤᠨᠳᠠᠷᠢ ᠶ᠋ᠢ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠨᠢᠭᠡ ᠬᠡᠰᠡᠭ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠣᠢᠰᠢ ᠲᠠᠯᠪᠢᠪᠠ᠃ ᠲᠡᠷᠡ ᠨᠢ ᠳᠥᠩᠭᠡᠵᠦ ᠲᠠᠯᠪᠢᠮᠠᠭᠴᠠ ᠠᠭ ᠲᠠᠭ ᠦᠭᠡᠢ ᠪᠠᠷᠬᠢᠷᠠᠪᠠ᠃
ᠣᠶᠤᠨᠳᠠᠷᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠭᠡᠷ ᠣᠷᠣᠨ ᠢ᠋ ᠡᠢᠮᠦ ᠠᠢᠯ ᠪᠠᠢᠨᠠ ᠭᠡᠵᠦ ᠣᠭᠲᠣᠬᠠᠨ ᠴᠦ᠍ ᠰᠠᠨᠠᠭᠠ ᠦᠭᠡᠢ ᠳ᠋ᠡᠭᠡᠨ ᠲᠡᠩᠴᠡᠭᠦᠷᠢ ᠪᠡᠨ ᠠᠯᠳᠠᠭᠰᠠᠨ ᠮᠡᠲᠦ ᠪᠣᠯᠤᠨ ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠪᠥᠭᠡᠳ ᠲᠡᠷᠡ ᠠᠪᠠᠭᠠᠢ ᠴᠦ᠍ ᠮᠡᠨᠳᠦ ᠤᠰᠤ ᠮᠡᠳᠡᠭᠰᠡᠨ ᠦᠭᠡᠢ᠃
— ᠲᠠ ᠳᠡᠭᠡᠭᠰᠢ ᠪᠡᠨ ᠰᠠᠭᠤ ᠳᠠ᠃ ᠰᠠᠷᠠ ᠰᠢᠨᠡ ᠶ᠋ᠢᠨ ᠢᠳᠡᠭᠡᠨ ᠠᠮᠰᠠ! ᠭᠡᠳ ᠴᠠᠢ ᠬᠢᠵᠦ ᠥᠭᠬᠦ ᠶ᠋ᠢ ᠵᠠᠪᠳᠤᠪᠠ᠃
— ᠵᠦᠭᠡᠷ᠂ ᠪᠢ ᠵᠥᠪᠬᠡᠨ ᠨᠢᠭᠡ ᠬᠥᠮᠦᠨ ᠢ᠋ ᠰᠤᠷᠠᠭᠯᠠᠬᠤ ᠪᠠᠷ ᠣᠷᠣᠵᠤ ᠢᠷᠡᠪᠡ ᠭᠡᠬᠦ ᠳ᠋ᠦ᠍᠄
— ᠬᠡᠨ ᠭᠡᠭᠴᠢ ᠶ᠋ᠢ ᠪᠣᠢ?
— ᠪᠠᠯᠳᠠᠨᠴᠡᠷᠢᠩ᠂
— ᠪᠠᠯᠳᠠᠨᠴᠡᠷᠢᠩ ᠭᠡᠨᠡ? ᠪᠠᠢᠬᠤ ᠦᠭᠡᠢ ᠠ᠋᠂ ᠲᠡᠢᠮᠦ ᠬᠥᠮᠦᠨ ᠡᠨᠡ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠢᠬᠤ ᠦᠭᠡᠢ᠃
— ᠦᠭᠡᠢ ᠭᠡᠵᠢ ᠤᠤ? ᠤᠭ ᠨᠢ ᠡᠨᠳᠡ ᠭᠡᠵᠦ᠂ ᠲᠣᠳᠣᠷᠬᠠᠢ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠶᠦᠮ ᠰᠠᠨ᠃
ᠡᠬᠡᠨᠡᠷ ᠦ᠋ᠨ ᠴᠢᠷᠠᠢ ᠭᠡᠨᠡᠳᠲᠡ ᠬᠤᠪᠠᠬᠠᠢ ᠴᠠᠭᠠᠨ ᠪᠣᠯᠵᠤ᠄
— ᠴᠢ ᠲᠡᠭᠦᠨ ᠢ᠋ᠶ᠋ᠡᠷ ᠶᠠᠭᠠᠬᠢᠬᠤ ᠬᠡ ᠪᠣᠢ?
— ᠬᠥᠨᠳᠡᠯᠡᠨ ᠦ᠌ ᠬᠥᠮᠦᠨ ᠳ᠋ᠦ᠍ ᠬᠠᠮᠢᠶᠠ ᠦᠭᠡᠢ ᠵᠦᠢᠯ ᠭᠡᠵᠦ ᠡᠭᠳᠡᠭᠦᠴᠡᠨ ᠬᠠᠷᠢᠭᠤᠯᠪᠠ᠃ ᠲᠡᠭᠡᠭᠡᠳ ᠡᠬᠡᠨᠡᠷ ᠦ᠋ᠨ ᠠᠮᠢᠰᠬᠤᠯ ᠳᠡᠭᠡᠷᠡ ᠬᠥᠭᠡᠷᠦᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠬᠤᠷᠠᠯᠳᠤᠵᠤ ᠡᠬᠢᠯᠡᠬᠦ ᠳ᠋ᠦ᠍᠄
— ᠦᠭᠡᠢ ᠢᠩᠭᠢᠬᠦ ᠳ᠋ᠦ᠍ ᠲᠠ ᠶᠠᠭᠤ ᠨᠢ ᠪᠣᠢ?
— ᠴᠢᠮᠠᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠶᠠᠭᠤ ᠨᠢ ᠪᠠᠢᠮᠠᠷ ᠰᠢᠭ᠋ ᠪᠠᠢᠨᠠ ᠭᠡᠵᠦ ᠬᠠᠷᠢᠭᠤ ᠡᠭᠳᠡᠭᠦᠴᠡᠯᠡ᠃
ᠣᠶᠤᠨᠳᠠᠷᠢ ᠦᠭᠡ ᠳᠠᠭᠤ ᠦᠭᠡᠢ ᠭᠠᠷᠬᠤ ᠶ᠋ᠢᠨ ᠮᠥᠷᠥᠭᠡᠳᠦᠰᠦ ᠪᠣᠯᠤᠨ ᠡᠭᠦᠳᠡ ᠤᠷᠤᠭᠤ ᠶᠠᠪᠤᠬᠤ ᠳ᠋ᠤ᠌᠂ ᠡᠬᠡᠨᠡᠷ᠄《ᠴᠢ ᠪᠠᠢᠵᠠ ᠭᠡᠵᠦ ᠬᠠᠰᠬᠢᠷᠤᠨ᠂ ᠤᠷᠳᠤᠭᠤᠷ ᠨᠢ ᠣᠷᠣᠵᠤ ᠢᠷᠡᠵᠦ ᠡᠭᠦᠳᠡ ᠪᠡᠨ ᠲᠠᠭᠯᠠᠭᠠᠳ᠄
— ᠴᠢ ᠪᠠᠯᠳᠠᠨᠢᠮᠡ ᠲᠡᠢ ᠠᠭᠤᠯᠵᠠᠬᠤ ᠴᠣᠬᠣᠮ ᠶᠠᠮᠠᠷ ᠬᠡᠷᠡᠭ ᠲᠡᠢ ᠪᠣᠢ? ᠲᠡᠭᠦᠨ ᠢ᠋ᠶ᠋ᠡᠨ ᠬᠡᠯᠡ! ᠭᠡᠵᠦ ᠴᠡᠴᠡᠷᠬᠢᠯᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠥᠭᠦᠯᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠢᠯᠭᠠᠨ ᠨᠢᠭᠤᠷ ᠤ᠋ᠨ ᠬᠢᠨᠢ ᠡᠮᠦᠨᠡ ᠠᠪᠴᠢᠷᠠᠪᠠ᠃ ᠤᠷᠲᠤ ᠤᠷᠲᠤ ᠬᠢᠮᠤᠰᠤ ᠲᠠᠢ ᠨᠠᠷᠢᠬᠠᠨ ᠬᠤᠷᠤᠭᠤ ᠨᠤᠭᠤᠳ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠨᠢᠮᠭᠡᠨ ᠵᠣᠪᠬᠢ ᠲᠠᠢ ᠲᠣᠷᠮᠣᠭᠣᠷ ᠬᠠᠷᠠ ᠨᠢᠳᠦ ᠨᠢ ᠭᠣᠮᠣᠳᠠᠯ ᠡᠷᠢᠨ ᠨᠡᠪᠲᠡ ᠬᠠᠷᠠᠭᠳᠠᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ? ᠶᠡᠷᠦ ᠡᠨᠡ ᠦᠶᠡ ᠠᠶᠤᠮᠰᠢᠭᠲᠠᠢ᠃ ᠣᠷᠣᠨ ᠳᠡᠭᠡᠷᠡ ᠣᠷᠬᠢᠭᠳᠠᠭᠰᠠᠨ ᠥᠯᠥᠭᠡᠢ ᠲᠡᠢ ᠬᠡᠦᠬᠡᠳ ᠨᠢ ᠡᠭᠡᠷᠡᠨ ᠳᠠᠭᠵᠢᠭᠠᠳ ᠬᠣᠭᠣᠯᠠᠢ ᠨᠢ ᠵᠥᠪᠬᠡᠨ ᠬᠢᠬᠤᠨᠠᠳᠤᠨ ᠬᠡᠷᠴᠢᠭᠢᠨᠡᠵᠦ ᠪᠠᠢᠯᠠ᠃ ᠭᠡᠪᠡᠴᠦ ᠣᠶᠤᠨᠳᠠᠷᠢ ᠲᠡᠷᠡ ᠡᠬᠡᠨᠡᠷ ᠦ᠋ᠨ《ᠪᠠᠯᠳᠠᠨᠢᠮᠡ》 ᠭᠡᠰᠡᠨ ᠢ᠋ ᠨᠢ ᠰᠠᠨᠠᠨ ᠪᠠᠭᠠ ᠵᠡᠷᠭᠡ ᠰᠡᠭᠡᠭᠡ ᠠᠪᠴᠤ᠄
— ᠦᠭᠡᠢ ᠪᠢ ᠪᠠᠯᠳᠠᠨᠢᠮᠡ ᠶ᠋ᠢ ᠪᠢᠰᠢ᠂ ᠪᠠᠯᠳᠠᠨᠴᠡᠷᠢᠩ ᠢ᠋ ᠡᠷᠢᠵᠦ ᠶᠠᠪᠤᠭᠠ ᠶᠤᠮ᠃
— ᠮᠥᠨ᠂ ᠮᠥᠨ᠃ ᠲᠡᠷᠡ ᠴᠢᠮᠠ ᠳ᠋ᠤ᠌ ᠨᠡᠷᠡ ᠪᠡᠨ ᠪᠠᠯᠳᠠᠨᠴᠡᠷᠢᠩ ᠭᠡᠳᠡᠭ ᠪᠠᠢᠵᠠᠢ᠃
— ᠦᠭᠡᠢ᠂ ᠪᠢ ᠡᠨᠡ ᠨᠡᠷᠡ ᠶ᠋ᠢ ᠥᠪᠡᠷ ᠡᠴᠡ ᠨᠢ ᠪᠢᠰᠢ᠂ ᠥᠭᠡᠷᠡ ᠪᠤᠰᠤᠳ ᠠ᠋ᠴᠠ ᠣᠯᠵᠤ ᠮᠡᠳᠡᠭᠰᠡᠨ ᠶᠦᠮ᠃
ᠠ᠋ ᠵᠣᠯᠢᠭ᠂ ᠪᠤᠰᠤᠳ ᠲᠤ ᠪᠠᠰᠠ ᠨᠡᠷᠡ ᠪᠡᠨ ᠢᠩᠭᠢᠵᠦ ᠪᠤᠷᠤᠭᠤᠯᠠᠳᠠᠭ ᠪᠠᠢᠵᠠᠢ ᠭᠡᠳ ᠡᠬᠡᠨᠡᠷ ᠨᠢᠳᠦᠨ ᠳ᠋ᠡᠭᠡᠨ ᠬᠤᠷᠠᠯᠳᠤᠭᠰᠠᠨ ᠨᠢᠯᠪᠤᠰᠤ ᠶ᠋ᠢ ᠪᠠᠷᠢᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠨ ᠮᠡᠭᠰᠢᠨ ᠤᠬᠢᠯᠠᠵᠤ ᠡᠬᠢᠯᠡᠯᠡ᠃ ᠳᠠᠭᠤ ᠨᠢ ᠲᠤᠩ ᠲᠠᠮᠢᠷ ᠦᠭᠡᠢ ᠢᠩᠭᠢᠨᠡᠬᠦ ᠠᠪᠢᠶᠠᠨ ᠤ᠋ ᠴᠠᠭᠠᠨᠠ ᠥᠭᠡᠷᠡ ᠨᠢᠭᠡᠨ ᠬᠡᠷᠵᠢᠭᠢᠨᠡᠨ ᠴᠡᠴᠡᠷᠬᠢᠯᠡᠭᠰᠡᠨ ᠶᠠᠭᠤᠮᠠ ᠳᠠᠪᠬᠤᠷ ᠰᠣᠨᠣᠰᠳᠠᠬᠤ ᠨᠢ ᠲᠡᠭᠦᠨ ᠦ᠌ ᠢᠳᠡ ᠬᠦᠨᠳᠦᠷᠡᠯ ᠢ᠋ᠶ᠋ᠡᠨ ᠣᠯᠵᠤ ᠪᠠᠢᠭᠠ ᠠᠭᠤᠰᠬᠢᠨ ᠤ᠋ ᠮᠡᠩᠭᠡᠷ ᠡᠪᠡᠳᠴᠢᠨ ᠪᠠᠢᠯᠠ᠃
ᠪᠢ ᠲᠠᠨ ᠤ᠋ ᠦᠭᠡ ᠶ᠋ᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ᠂ ᠬᠥᠮᠦᠰ ᠲᠡᠭᠦᠨ ᠢ᠋ ᠵᠦᠭᠡᠷ ᠴᠦ᠍ ᠦᠭᠡᠢ ᠪᠠᠯᠳᠠᠨᠴᠡᠷᠢᠩ ᠬᠦᠩ ᠭᠡᠳᠡᠭ ᠶᠦᠮ ᠰᠠᠨ ᠭᠡᠬᠦ ᠳ᠋ᠦ᠍᠄
— ᠮᠥᠨ᠂ ᠮᠥᠨ᠂ ᠲᠡᠷᠡ ᠴᠢᠨᠢ ᠥᠪᠡᠷ ᠢ᠋ ᠪᠡᠨ ᠬᠦᠩ ᠭᠡᠵᠦ ᠵᠠᠷᠯᠠᠬᠤ ᠪᠠᠢᠲᠤᠭᠠᠢ᠂ ᠸᠠᠩ ᠪᠣᠯᠭᠠᠨ ᠡᠷᠭᠦᠮᠵᠢᠯᠡᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ ᠰᠠᠭᠰᠠᠭᠤ ᠠᠮᠢᠲᠠᠨ ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠪᠤᠪᠠᠲᠤᠨᠠᠨ᠂ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠭᠰᠠᠨ ᠬᠠᠯᠠᠭᠤᠨ ᠨᠢᠳᠤᠷᠭᠠ ᠪᠠᠨ ᠰᠢᠷᠲᠡᠨᠡ᠃
ᠣᠶᠤᠨᠳᠠᠷᠢ ᠡᠬᠡᠨᠡᠷ ᠦ᠋ᠨ ᠦᠭᠡ ᠶ᠋ᠢ ᠰᠢᠭᠤᠳ ᠢᠲᠡᠭᠡᠬᠦ ᠰᠡᠳᠬᠢᠯ ᠲᠥᠷᠥᠨ ᠳᠣᠲᠣᠷᠠ ᠨᠢ ᠬᠠᠷᠠᠩᠭᠤᠢᠯᠠᠪᠠ᠃ ᠮᠣᠳᠣ ᠮᠡᠲᠦ ᠬᠥᠰᠢᠨ᠂ ᠨᠢᠳᠦ ᠪᠡᠨ ᠴᠦ᠍ ᠴᠠᠪᠴᠢᠬᠤ ᠲᠡᠩᠬᠡᠯ ᠦᠭᠡᠢ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠡᠬᠡᠨᠡᠷ ᠬᠠᠵᠠᠭᠤ ᠠ᠋ᠴᠠ ᠨᠢ᠄
— ᠴᠢ ᠮᠡᠳᠡᠵᠦ ᠪᠠᠢᠨᠠ ᠤᠤ? ᠲᠡᠷᠡ ᠴᠢᠨᠢ ᠬᠥᠮᠦᠨ ᠪᠢᠰᠢ᠂ ᠬᠥᠮᠦᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠪᠤᠵᠠᠷᠯᠠᠨ ᠬᠣᠣᠷᠯᠠᠭᠴᠢ᠂ ᠬᠤᠳᠠᠯ ᠭᠡᠪᠡᠯ ᠴᠢ ᠬᠠᠷᠠ ᠨᠠᠮᠠᠶ᠋ᠢ᠂ ᠬᠣᠶᠠᠷ ᠬᠡᠦᠬᠡᠳ ᠨᠢ ᠲᠡᠷᠡ ᠪᠠᠢᠨᠠ᠂ ᠬᠥᠮᠦᠨ ᠢ᠋ ᠡᠢᠮᠦ ᠪᠣᠯᠭᠠᠵᠤ ᠣᠷᠬᠢᠭᠠᠳ ᠬᠠᠶᠠᠨ ᠠᠯᠠᠭᠠ ᠪᠣᠯᠳᠠᠭ ᠬᠥᠮᠦᠨ ᠡᠨᠡ ᠬᠣᠷᠸᠠ ᠳ᠋ᠤ᠌ ᠪᠠᠢᠬᠤ ᠤᠤ? ᠪᠢ ᠨᠢᠭᠡ ᠠᠢᠯ ᠤ᠋ᠨ ᠬᠡᠦᠬᠡᠨ ᠤᠷᠤᠭᠤ ᠶᠠᠪᠤᠳᠠᠭ ᠪᠣᠯᠤᠭᠰᠠᠨ ᠢ᠋ ᠨᠢ ᠲᠤᠭᠤᠯᠤᠭᠰᠠᠨ ᠶᠤᠮ᠃ ᠢᠩᠭᠢᠬᠦ ᠳ᠋ᠦ᠍ ᠲᠡᠷᠡ ᠡᠮᠡᠭᠲᠡᠢ ᠨᠢ ᠴᠢ ᠪᠠᠢᠵᠠᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠴᠢᠮᠠᠶ᠋ᠢ ᠮᠥᠨ ᠬᠠᠶᠠᠨᠠ᠂ ᠢᠩᠭᠢᠬᠦ ᠳ᠋ᠡᠭᠡᠨ ᠬᠡᠪᠡᠯᠢ ᠳ᠋ᠦ᠍ ᠴᠢᠨᠢ ᠬᠡᠦᠬᠡᠳ ᠲᠡᠢ ᠪᠣᠯᠭᠠᠵᠤ ᠬᠠᠶᠠᠨᠠ ᠰᠢᠦ᠂ ᠠ᠋ ᠴᠢ ᠬᠠᠶᠠ! ᠤᠷᠢᠲᠠᠭᠠᠳ ᠬᠠᠶᠠ! ᠨᠢᠭᠤᠷ ᠤᠷᠤᠭᠤ ᠨᠢ ᠰᠢᠷᠣᠢ ᠰᠠᠴᠤᠵᠤ ᠲᠣᠯᠣᠭᠠᠢ ᠳ᠋ᠤᠨᠢ ᠰᠢᠨᠠᠭᠠ ᠤᠰᠤ ᠰᠠᠴᠤᠭᠠᠳ ᠬᠥᠬᠡᠭᠡ! ᠢᠩᠭᠢᠪᠡᠯ ᠴᠢ ᠡᠴᠦᠰ ᠲᠡᠭᠡᠨ ᠭᠤᠨᠢᠬᠤ ᠦᠭᠡᠢ᠂ ᠦᠷᠡ ᠬᠡᠦᠬᠡᠳ ᠦᠭᠡᠢ ᠳᠠᠩ ᠪᠡᠶᠡ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠪᠠᠨ ᠡᠷᠡ ᠳ᠋ᠦ᠍ ᠣᠴᠢᠬᠤ ᠴᠢᠨᠢ ᠮᠠᠭᠠᠳ ᠰᠢᠦ᠃ ᠡᠭᠦᠨ ᠢ᠋ ᠪᠢ ᠴᠢᠮᠠ ᠳ᠋ᠤ᠌ ᠬᠠᠷᠠ ᠬᠣᠣᠷ ᠤ᠋ᠨ ᠰᠡᠳᠬᠢᠯ ᠡᠴᠡ ᠬᠡᠯᠡᠵᠦ ᠪᠠᠢᠭᠠ ᠪᠢᠰᠢ᠃ ᠡᠮᠡᠭᠲᠡᠢ ᠪᠢᠳᠡᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠨᠢᠭᠡᠨ ᠠᠳᠠᠯᠢ ᠳᠣᠷᠣᠢ ᠪᠠᠢᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠪᠢ ᠬᠥᠭᠡᠭᠡᠭᠡᠳ ᠡᠴᠦᠰ ᠲᠦ᠋ᠨᠢ ᠡᠴᠢᠭᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠷ ᠣᠷᠣᠨ ᠢ᠋ ᠪᠠᠷᠠᠳᠠᠨ ᠰᠠᠯᠬᠤ ᠮᠢᠨᠢ᠁ ᠭᠡᠬᠦ ᠮᠡᠲᠦ ᠶᠠᠭᠤᠮᠠᠰ ᠢ᠋ ᠬᠥᠪᠦᠷᠡᠯᠳᠦᠭᠦᠯᠦᠨ ᠶᠠᠷᠢᠭᠰᠠᠭᠠᠷ ᠯᠠ ᠪᠠᠢᠪᠠ᠃ ᠣᠶᠤᠨᠳᠠᠷᠢ ᠨᠢᠭᠡ ᠴᠦ᠍ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠵᠥᠪᠬᠡᠨ《 ᠨᠠᠮᠠᠶ᠋ᠢ ᠠᠪᠤᠷᠠᠬᠤ ᠶᠠᠭᠤᠮᠠ ᠶᠠᠭᠤ ᠴᠦ᠍ ᠠᠯᠠᠭᠠ》 ᠭᠡᠳᠡᠭ ᠪᠣᠳᠣᠯ ᠡᠷᠭᠢᠯᠳᠦᠵᠦ ᠪᠠᠢᠭᠰᠠᠨ ᠪᠥᠭᠡᠳ ᠬᠥᠯ ᠨᠢ ᠲᠡᠨᠳᠡ ᠡᠴᠡ ᠥᠪᠡᠷ ᠢ᠋ᠶ᠋ᠡᠨ ᠬᠥᠳᠡᠯᠦᠨ ᠭᠠᠷᠭᠠᠵᠠᠢ᠃
ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠵᠢᠰᠦ ᠴᠢᠷᠠᠢ ᠵᠢᠭᠲᠡᠢᠬᠡᠨ ᠤᠷᠤᠭᠤ ᠳᠣᠷᠣᠢ᠂ ᠣᠢ ᠭᠠᠰᠢᠭᠤᠨ ᠳ᠋ᠤ᠌ ᠳᠠᠷᠤᠭᠳᠠᠨ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ᠨᠢ ᠲᠦᠪᠰᠢᠨ᠄ ᠬᠡᠷᠡᠭ ᠵᠣᠷᠢᠭ ᠨᠢ ᠡᠰᠡ ᠪᠦᠲᠦᠭᠰᠡᠨ ᠢ᠋ ᠳᠠᠷᠤᠢ ᠮᠡᠳᠡᠪᠡ᠃ ᠲᠡᠷᠭᠡᠨ ᠳ᠋ᠡᠭᠡᠨ ᠡᠯᠡᠢ ᠪᠠᠯᠠᠢ ᠬᠥᠮᠦᠨ ᠦ᠌ ᠪᠠᠢᠳᠠᠯ ᠢ᠋ᠶ᠋ᠠᠷ ᠭᠤᠢᠪᠢᠯᠠᠨ ᠠᠪᠠᠷᠢᠵᠤ ᠰᠠᠭᠤᠬᠤ ᠳ᠋ᠤᠨᠢ ᠭᠠᠢᠬᠠᠨ ᠮᠡᠯᠡᠷᠡᠭᠰᠡᠨ ᠪᠥᠭᠡᠳ ᠪᠠᠯᠳᠠᠨᠴᠡᠷᠢᠩ ᠢ᠋ ᠭᠠᠷᠴᠤ ᠢᠷᠡᠨ ᠦᠳᠡᠬᠦ ᠪᠣᠯᠪᠠ ᠤᠤ ᠭᠡᠬᠦ ᠳ᠋ᠡᠭᠡᠨ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠶ᠋ᠢ ᠰᠢᠷᠲᠡᠨ ᠬᠦᠯᠢᠶᠡᠪᠡ᠃ ᠣᠶᠤᠨᠳᠠᠷᠢ ᠶ᠋ᠢᠨ ᠶᠠᠪᠤᠶᠠ ᠳᠠ ᠭᠡᠵᠦ ᠰᠠᠨᠠᠭᠠ ᠠᠯᠲᠠᠨ ᠬᠡᠯᠡᠬᠦ ᠳ᠋ᠦ᠍᠂ ᠮᠣᠷᠢᠨ ᠤ᠋ ᠪᠠᠨ ᠵᠢᠯᠣᠭᠣ ᠶ᠋ᠢ ᠬᠣᠢᠰᠢ ᠲᠡᠳᠡᠨ ᠳᠤᠭᠲᠤᠷᠴᠤ《ᠴᠤᠤ》 ᠭᠡᠵᠦ ᠬᠡᠯᠡᠯᠡ᠃ ᠮᠣᠷᠢ ᠳᠤᠷᠠᠮᠵᠢᠬᠠᠨ ᠢ᠋ᠶ᠋ᠠᠷ ᠬᠥᠳᠡᠯᠦᠨ ᠠᠭᠠᠵᠢᠭᠤᠬᠠᠨ ᠠᠯᠬᠤᠯᠠᠪᠠ᠃ ᠲᠦᠪᠰᠢᠨ ᠴᠦ᠍ ᠬᠤᠷᠳᠤᠯᠠᠬᠤ ᠶ᠋ᠢ ᠪᠣᠳᠣᠭᠰᠠᠨ ᠦᠭᠡᠢ᠂《ᠦᠭᠡᠢ ᠬᠡᠦᠬᠡᠨ ᠠ᠋ ᠶᠠᠭᠤ ᠪᠣᠯᠪᠠ ᠳᠠ》 ᠭᠡᠵᠦ ᠠᠰᠠᠭᠤᠨ ᠡᠷᠭᠢᠨ ᠬᠠᠷᠠᠬᠤ ᠶ᠋ᠢ ᠵᠠᠪᠳᠤᠭᠰᠠᠨ ᠢ᠋ᠶ᠋ᠠᠨ᠂ ᠣᠶᠤᠨᠳᠠᠷᠢ ᠶ᠋ᠢᠨ ᠣᠢ ᠭᠠᠰᠢᠭᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠴᠢᠷᠠᠢ ᠶ᠋ᠢ ᠳᠠᠬᠢᠨ ᠬᠠᠷᠠᠬᠤ ᠠ᠋ᠴᠠ ᠪᠠᠨ ᠬᠠᠯᠠᠰᠢᠷᠠᠨ ᠪᠣᠯᠢᠪᠠ᠃ ᠠᠷᠤ ᠳ᠋ᠤᠨᠢ ᠣᠶᠤᠨᠳᠠᠷᠢ ᠬᠡᠮᠵᠢᠶᠡ ᠦᠭᠡᠢ ᠢᠲᠡᠭᠡᠭᠰᠡᠨ ᠭᠠᠭᠴᠠ ᠭᠣᠷᠢᠳᠠᠯᠭᠠ ᠪᠠᠨ ᠪᠦᠷᠢᠮᠦᠰᠦᠨ ᠪᠠᠯᠠᠷᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠪᠦᠬᠦ ᠲᠡᠩᠬᠡᠯ ᠨᠢᠭᠡᠮᠦᠰᠦᠨ ᠠᠯᠳᠠᠷᠠᠵᠤ ᠨᠢᠳᠦ ᠪᠡᠨ ᠴᠦ᠍ ᠴᠠᠪᠴᠢᠬᠤ ᠰᠡᠭᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃
ᠮᠣᠷᠢ ᠲᠡᠷᠭᠡ ᠶᠡᠷᠦ ᠬᠤᠷᠳᠤᠯᠠᠬᠤ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠺᠣᠨᠰᠣᠯ ᠳᠡᠨᠵᠢ ᠬᠦᠷᠪᠡ᠃ ᠥᠭᠡᠳᠡ ᠠᠪᠠᠷᠢᠬᠤ ᠳ᠋ᠠᠭᠠᠨ ᠪᠦᠷ ᠠᠭᠠᠵᠢᠭᠤᠬᠠᠨ ᠦᠶᠡ ᠦᠶᠡ ᠵᠣᠭᠰᠣᠴᠢᠬᠠᠬᠤ ᠰᠢᠬᠠᠪᠠ᠃
ᠶᠠᠭ ᠡᠨᠡ ᠦᠶᠡ ᠪᠡᠷ ᠣᠶᠤᠨᠳᠠᠷᠢ ᠳ᠋ᠤ᠌᠂ ᠡᠷᠡ ᠳ᠋ᠡᠭᠡᠨ ᠬᠠᠶᠠᠭᠳᠠᠭᠰᠠᠨ ᠬᠥᠭᠡᠷᠦᠬᠦᠢ ᠡᠬᠡᠨᠡᠷ᠂ ᠲᠡᠭᠦᠨ ᠭᠤᠨᠢᠨ ᠭᠤᠲᠤᠷᠠᠬᠤ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠴᠢᠷᠠᠢ᠂ ᠬᠣᠶᠠᠷ ᠨᠢᠯᠬᠠ ᠬᠡᠦᠬᠡᠳ᠁ ᠶᠠᠭᠤᠲᠠᠢ ᠬᠦᠦᠲᠡᠢ ᠪᠡᠨ ᠰᠡᠳᠬᠢᠯ ᠳ᠋ᠦ᠍ ᠣᠷᠣᠵᠤ ᠢᠷᠡᠨ᠂ ᠨᠢᠳᠦᠨ ᠳ᠋ᠦ᠍ ᠲᠤᠰᠬᠤ ᠠᠵᠢ᠃ ᠲᠡᠭᠦᠨ ᠢ᠋ ᠣᠶᠤᠨᠳᠠᠷᠢ ᠦᠷᠦ ᠡᠪᠡᠳᠦᠯᠡ᠃ ᠲᠡᠭᠦᠨ ᠢ᠋ ᠲᠥᠯᠥᠭᠡᠯᠡᠨ ᠪᠠᠯᠳᠠᠨᠴᠡᠷᠢᠩ ᠢ᠋ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠵᠢᠭᠰᠢᠨ ᠵᠠᠨᠤᠯᠠ᠃ ᠭᠡᠲᠡᠯᠡ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ ᠭᠤᠨᠢᠭᠲᠤ ᠶᠠᠪᠤᠳᠠᠯ ᠶᠡᠷᠦ ᠨᠢᠭᠡᠨ ᠬᠥᠮᠦᠨ ᠦ᠌ ᠶᠠᠪᠤᠳᠠᠯ ᠪᠢᠰᠢ᠂ ᠬᠠᠷᠢᠨ ᠮᠣᠩᠭᠣᠯ ᠡᠮᠡᠭᠲᠡᠢ ᠪᠦᠷᠢ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠮᠥᠨ ᠪᠠᠢᠬᠤ ᠲᠤᠯᠠ᠂ ᠣᠶᠤᠨᠳᠠᠷᠢ᠂《ᠨᠠᠳᠠ ᠳ᠋ᠤ᠌ ᠠᠮᠢᠳᠤᠷᠠᠬᠤ ᠪᠠ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢ ᠬᠦᠰᠡᠭᠰᠡᠨ ᠠᠮᠢ ᠪᠡᠶᠡ ᠪᠡᠨ ᠬᠠᠢᠷᠠᠯᠠᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠣᠢ?》 ᠭᠡᠳᠡᠭ ᠠᠰᠠᠭᠤᠳᠠᠯ ᠢ᠋ ᠥᠪᠡᠷ ᠲᠡᠭᠡᠨ ᠲᠠᠯᠪᠢᠪᠠ᠃ ᠡᠨᠡ ᠵᠠᠭᠤᠷᠠ ᠮᠣᠷᠢ ᠲᠡᠷᠭᠡ ᠳᠡᠨᠵᠢ ᠳᠡᠭᠡᠷᠡ ᠭᠠᠷᠤᠭᠠᠳ ᠰᠦᠷᠡᠬᠡᠢ ᠪᠡᠬᠡ ᠪᠠᠷᠢᠭᠳᠠᠭᠰᠠᠨ ᠲᠤᠢᠫᠤᠤ ᠶ᠋ᠢᠨ ᠬᠡᠷᠡᠮᠡᠨ ᠬᠠᠰᠢᠶᠠᠨ ᠤ᠋ ᠤᠷᠳᠤᠭᠤᠷ ᠣᠷᠣᠨ ᠶᠠᠪᠤᠵᠤ ᠪᠠᠢᠯᠠ᠃ ᠡᠨᠡ ᠪᠣᠯ ᠠᠮᠧᠷᠢᠺᠠ ᠶ᠋ᠢᠨ ᠨᠢᠭᠡᠨ ᠲᠣᠮᠣ ᠫᠦᠰᠡ ᠶ᠋ᠢᠨ ᠪᠠᠷᠠᠭᠠ ᠠᠭᠤᠯᠬᠤ ᠭᠠᠵᠠᠷ᠃ ᠳᠣᠲᠣᠷᠠ ᠨᠢ ᠨᠢᠭᠡ ᠳᠡᠯᠭᠡᠭᠦᠷ ᠪᠠᠢᠳᠠᠭ ᠪᠥᠭᠡᠳ ᠣᠳᠣ ᠣᠶᠤᠨᠳᠠᠷᠢ ᠲᠡᠷᠡ ᠳᠡᠯᠭᠡᠭᠦᠷ ᠲᠦ᠍ ᠣᠷᠣᠭᠰᠠᠨ ᠬᠥᠮᠦᠨ ᠪᠦᠷᠢ《ᠬᠥᠮᠦᠨ ᠦ᠌ ᠬᠠᠷᠠ ᠨᠢᠳᠦᠨ ᠡᠴᠡ ᠪᠤᠰᠤᠳ ᠶᠠᠭᠤᠮᠠ ᠪᠦᠬᠦᠨ ᠪᠠᠢᠨᠠ》 ᠭᠡᠵᠦ ᠱᠠᠭᠰᠢᠨ ᠬᠡᠯᠡᠯᠴᠡᠳᠡᠭ ᠢ᠋ ᠰᠠᠨᠠᠪᠠ᠃
— ᠠᠯᠢ᠂ ᠲᠦᠪᠰᠢᠨ ᠭᠤᠸᠠᠢ᠂ ᠲᠠ ᠡᠨᠳᠡ ᠵᠣᠭᠰᠣᠨᠠ ᠤᠤ? ᠪᠢ ᠡᠨᠳᠡᠬᠢ ᠶ᠋ᠢᠨ ᠳᠡᠯᠭᠡᠭᠦᠷ ᠲᠦ᠍ ᠨᠢᠭᠡ ᠣᠷᠣᠵᠤ ᠦᠵᠡᠶᠡ ᠭᠡᠬᠦ ᠳ᠋ᠦ᠍᠂ ᠲᠦᠪᠰᠢᠨ᠂
— ᠠ ᠲᠡᠭᠡ ᠬᠡᠦᠬᠡᠨ ᠠ᠋᠃ ᠡᠨᠳᠡ ᠴᠢᠨᠢ ᠶᠣᠰᠣᠲᠠᠢ ᠬᠥᠮᠦᠨ ᠦ᠌ ᠬᠠᠷᠠ ᠨᠢᠳᠦᠨ ᠡᠴᠡ ᠪᠤᠰᠤᠳ ᠨᠢ ᠪᠠᠢᠳᠠᠭ ᠭᠠᠵᠠᠷ ᠭᠡᠵᠦ ᠰᠠᠨᠠᠭᠠ ᠰᠡᠳᠬᠢᠯ ᠰᠡᠷᠭᠦᠬᠦ ᠪᠣᠯᠪᠠ ᠤᠤ ᠭᠡᠬᠦ ᠳ᠋ᠡᠭᠡᠨ ᠣᠷᠢᠶᠠᠯᠭᠠᠨ ᠢ᠋ᠶ᠋ᠠᠷ ᠬᠡᠯᠡᠨ᠂ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠯᠠ᠃ ᠣᠶᠤᠨᠳᠠᠷᠢ ᠲᠡᠷᠭᠡᠨ ᠡᠴᠡ ᠪᠠᠭᠤᠨ ᠬᠠᠰᠢᠶᠠᠨ ᠤ᠋ ᠳᠡᠯᠭᠡᠰᠦᠲᠡᠢ ᠪᠠᠢᠭᠠ ᠶᠡᠬᠡ ᠬᠠᠭᠠᠯᠭᠠ ᠪᠠᠷ ᠣᠷᠣᠨ ᠵᠡᠭᠦᠨ ᠬᠣᠢᠰᠢ ᠡᠷᠭᠢᠨ ᠥᠨᠳᠥᠷ ᠴᠢᠯᠠᠭᠤᠨ ᠲᠣᠪᠴᠢᠶᠠᠨ ᠳᠡᠭᠡᠷᠡ ᠪᠠᠷᠢᠭᠳᠠᠭᠰᠠᠨ ᠲᠣᠮᠣ ᠳ᠋ᠦᠨᠵᠡᠨ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠪᠠ᠃
ᠡᠨᠡ ᠫᠦᠰᠡ ᠦᠨᠡᠬᠡᠷ ᠰᠣᠨᠢᠨ᠂ ᠦᠨᠦᠷ ᠲᠠᠨᠢᠷ ᠠ᠋ᠴᠠ ᠠᠪᠤᠭᠠᠳ ᠳᠡᠯᠭᠡᠭᠰᠡᠨ ᠲᠠᠯᠪᠢᠭᠰᠠᠨ ᠶᠠᠭᠤᠮᠠᠰ ᠴᠥᠮ ᠪᠤᠰᠤᠳ ᠫᠦᠰᠡ ᠨᠦ᠍ᠭᠦᠳ ᠡᠴᠡ ᠲᠠᠰᠤ ᠥᠭᠡᠷᠡ᠂ ᠧᠦ᠋ᠷᠣᠫᠠ ᠮᠠᠶᠢᠭ ᠤ᠋ᠨ ᠡᠷᠡᠭᠲᠡᠢ᠂ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠡᠨ ᠬᠤᠪᠴᠠᠰᠤ ᠨᠤᠭᠤᠳ᠂ ᠤᠨᠤᠳᠠᠭ ᠳᠤᠭᠤᠢ᠂ ᠣᠶᠣᠳᠠᠯ ᠤ᠋ᠨ ᠮᠠᠰᠢᠨ᠂ ᠰᠦᠨ ᠦ᠌ ᠮᠠᠰᠢᠨ᠂ ᠪᠤᠰᠤᠳ ᠡᠷᠭᠢ ᠱᠤᠷᠠᠭ ᠢ᠋ᠶ᠋ᠠᠷ ᠪᠦᠷᠢᠯᠳᠦᠭᠰᠡᠨ ᠪᠠᠭᠠᠵᠢ ᠬᠡᠷᠡᠭᠰᠡᠯ᠂ ᠲᠣᠭᠠ ᠪᠠᠷ ᠨᠢ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠴᠢᠳᠬᠥᠷ ᠦ᠋ᠨ ᠭᠠᠯ ᠤ᠋ᠨ ᠥᠩᠭᠡ ᠪᠡᠷ ᠲᠣᠳᠣᠬᠠᠨ ᠬᠠᠷᠠᠭᠳᠠᠳᠠᠭ ᠡᠩᠭᠡᠷ ᠦ᠋ᠨ ᠴᠠᠭ᠂ ᠤᠷᠲᠤ ᠪᠣᠭᠣᠨᠢ ᠬᠣᠶᠠᠷ ᠵᠠᠬᠠ ᠶ᠋ᠢᠨ ᠬᠢᠨᠢ ᠭᠣᠣᠯ ᠢ᠋ ᠪᠤᠷᠵᠠᠭᠠᠷ ᠦᠰᠦ ᠲᠡᠢ᠂ ᠲᠠᠰᠤ ᠬᠠᠷᠠ ᠴᠢᠷᠠᠢ ᠲᠠᠢ ᠬᠥᠮᠦᠨ ᠦ᠌ ᠬᠠᠮᠠᠷ ᠳᠡᠭᠡᠷᠡ ᠨᠢ ᠰᠢᠭᠢᠳᠬᠡᠨ ᠦᠢᠯᠡᠳᠦᠭᠰᠡᠨ ᠰᠢᠷᠡᠭᠡᠨ ᠦ᠌ ᠠᠶᠠᠭᠠᠨ ᠴᠠᠭ᠁ ᠶᠣᠰᠣᠲᠠᠢ ᠳᠣᠯᠣᠭᠠᠨ ᠰᠢᠳᠢ ᠶ᠋ᠢᠨ ᠶᠠᠭᠤᠮᠠᠰ ᠡᠨᠳᠡ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠭᠡᠪᠡᠴᠦ ᠡᠳᠡᠭᠡᠷ ᠢ᠋ ᠣᠶᠤᠨᠳᠠᠷᠢ ᠰᠣᠨᠢᠷᠬᠠᠭᠰᠠᠨ ᠦᠭᠡᠢ᠂ ᠵᠥᠪᠬᠡᠨ ᠨᠢᠳᠦ ᠳᠤᠰᠬᠠᠨ ᠥᠩᠭᠡᠷᠡᠭᠡᠳ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠩ ᠤ᠋ᠨ ᠫᠤᠤ᠂ ᠴᠢᠨᠣᠠ ᠦᠨᠡᠭᠡᠨ ᠦ᠌ ᠬᠠᠪᠬᠠ᠂ ᠭᠤᠷᠠ ᠶ᠋ᠢᠨ ᠡᠪᠡᠷ ᠪᠠᠷᠢᠭᠤᠯ ᠲᠠᠢ ᠤᠷᠲᠤ ᠪᠣᠭᠣᠨᠢ ᠬᠢᠲᠤᠭᠠ᠂ ᠡᠪᠬᠡᠮᠡᠯ ᠲᠣᠩᠭᠣᠷᠠᠭ ᠮᠡᠲᠦ ᠶ᠋ᠢ ᠬᠤᠳᠠᠯᠳᠤᠬᠤ ᠬᠡᠰᠡᠭ ᠦ᠋ᠨ ᠡᠮᠦᠨᠡ ᠣᠴᠢᠯᠠ᠃ ᠲᠡᠭᠡᠭᠡᠳ ᠪᠠᠨᠲᠠᠩ ᠤ᠋ᠨ ᠰᠢᠯᠦᠨ ᠬᠠᠪᠬᠠᠭ ᠲᠠᠢ ᠬᠠᠢᠷᠴᠠᠭ ᠤᠷᠤᠭᠤ ᠨᠢᠳᠦ ᠲᠤᠰᠬᠠᠨ ᠠᠵᠢᠬᠤ ᠳ᠋ᠤ᠌᠂ ᠳᠣᠲᠣᠷᠠ ᠨᠢ ᠶᠡᠬᠡ ᠪᠠᠭᠠ ᠬᠡᠮᠵᠢᠶᠡᠨ ᠦ᠌ ᠭᠠᠷ ᠫᠤᠤ᠂ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠫᠤᠤ ᠶ᠋ᠢᠨ ᠰᠤᠮᠤ᠂ ᠬᠣᠩᠬᠢᠶᠠ᠂ ᠳᠠᠷᠢ᠂ ᠲᠤᠭᠤᠯᠭᠠ᠂ ᠵᠢᠭᠠᠰᠤᠨ ᠤ᠋ ᠮᠠᠲᠠᠭᠠᠷ ᠳᠡᠭᠡᠭᠡ ᠨᠦ᠍ᠭᠦᠳ ᠪᠠᠰᠠ ᠪᠤᠰᠤᠳ ᠢ᠋ ᠶᠠᠩᠵᠤ ᠣᠷᠣᠭᠤᠯᠤᠨ ᠦᠷᠦᠭᠰᠡᠨ ᠦ᠌ ᠳᠤᠮᠳᠠ ᠨᠢᠭᠤᠷ ᠳᠡᠭᠡᠷᠡ ᠪᠡᠨ ᠪᠤᠲᠠ ᠮᠠᠯ ᠤ᠋ᠨ ᠰᠡᠭ ᠦ᠋ᠨ ᠳᠡᠭᠡᠷᠡ ᠰᠤᠨᠤᠨ ᠤᠨᠠᠭᠰᠠᠨ ᠣᠯᠠᠨ ᠴᠢᠨᠣᠠ ᠶ᠋ᠢᠨ ᠵᠢᠷᠤᠭ ᠲᠠᠢ ᠴᠠᠭᠠᠰᠤᠨ ᠬᠠᠢᠷᠴᠠᠭ ᠵᠢᠷᠤᠭ ᠶᠠᠭᠤᠮᠠ ᠭᠤᠷᠪᠠ ᠪᠠᠢᠯᠠ᠃ ᠭᠡᠲᠡᠯᠡ ᠣᠳᠣ ᠣᠶᠤᠨᠳᠠᠷᠢ ᠲᠡᠭᠦᠨ ᠢ᠋ ᠯᠡ ᠱᠣᠬᠣᠭᠣᠷᠬᠠᠨ ᠰᠢᠷᠲᠡᠬᠦ ᠠᠵᠢ᠃ ᠪᠠᠨᠲᠠᠩ ᠤ᠋ᠨ ᠨᠥᠭᠥᠭᠡᠳᠡᠬᠢ ᠳᠠᠭᠠᠷᠠᠩ ᠰᠢᠭ᠋ ᠪᠠᠷᠪᠠᠭᠠᠷ ᠨᠣᠣᠰᠣᠨ ᠡᠳ᠋ ᠢ᠋ᠶ᠋ᠡᠷ ᠬᠢᠭᠳᠡᠭᠰᠡᠨ ᠵᠠᠳᠠᠭᠠᠢ ᠡᠩᠭᠡᠷ ᠲᠡᠢ ᠰᠠᠭᠠᠷᠠᠯ ᠬᠦᠷᠮᠡ ᠮᠠᠶᠢᠭ ᠤ᠋ᠨ ᠵᠠᠬᠠ ᠡᠷᠭᠢᠮᠡᠯ ᠰᠤᠳᠠᠯ ᠲᠠᠢ ᠴᠡᠩᠬᠡᠷ ᠲᠥᠪᠡᠳ ᠴᠠᠮᠴᠠ ᠲᠠᠢ ᠪᠥᠭᠡᠳ ᠲᠡᠭᠦᠨ ᠳ᠋ᠡᠭᠡᠨ ᠮᠣᠭᠠᠢ ᠶ᠋ᠢᠨ ᠡᠷᠢᠶᠡᠨ ᠵᠠᠩᠭᠢᠶᠠ ᠶ᠋ᠢ ᠡᠷᠡᠦ ᠳᠣᠣᠷᠠ ᠪᠤᠯᠳᠤᠷᠤᠤ ᠵᠠᠩᠭᠢᠳᠤᠨ ᠵᠡᠭᠦᠭᠰᠡᠨ ᠳᠡᠭᠡᠳᠦ ᠤᠷᠤᠭᠤᠯ ᠳ᠋ᠠᠭᠠᠨ ᠰᠡᠷᠪᠡᠭᠡᠷ ᠰᠢᠷᠠ ᠰᠠᠬᠠᠯ ᠲᠠᠢ᠂ ᠲᠣᠯᠣᠭᠠᠢ ᠶ᠋ᠢᠨ ᠦᠰᠦ ᠵᠢᠷ ᠦ᠋ᠨ ᠰᠢᠷᠭᠠᠯ᠂ ᠠᠬᠢᠮᠠᠭ ᠨᠠᠰᠤ ᠲᠠᠢ ᠬᠤᠳᠠᠯᠳᠤᠭᠴᠢ ᠵᠣᠭᠰᠣᠵᠤ ᠪᠠᠢᠯᠠ᠃ ᠡᠨᠡ ᠬᠥᠮᠦᠨ ᠨᠢᠭᠡ ᠲᠠᠯᠠ ᠪᠠᠷ ᠣᠶᠤᠨᠳᠠᠷᠢ ᠶ᠋ᠢᠨ ᠭᠤᠸᠠ ᠰᠠᠢᠬᠠᠨ ᠢ᠋ ᠰᠣᠨᠢᠷᠬᠠᠵᠤ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠣᠢ ᠭᠠᠰᠢᠭᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠢ᠋ ᠡᠨᠡᠷᠢᠩᠭᠦᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠠᠵᠢᠵᠤ ᠰᠢᠷᠳᠡᠬᠦ ᠠᠵᠢ᠃
ᠣᠶᠤᠨᠳᠠᠷᠢ ᠴᠢᠨᠣᠠ ᠶ᠋ᠢᠨ ᠬᠠᠢᠷᠴᠠᠭ ᠢ᠋ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠵᠢᠭᠠᠨ
— ᠡᠨᠡ᠃ ᠪᠢ ᠠᠪᠤᠶᠠ ᠭᠡᠬᠦ ᠳ᠋ᠦ᠍᠂ ᠬᠤᠳᠠᠯᠳᠤᠭᠴᠢ《ᠡᠨᠡ ᠴᠢᠮᠠ ᠳ᠋ᠤ᠌ ᠬᠡᠷᠡᠭᠲᠡᠢ ᠶᠠᠭᠤᠮᠠ ᠪᠢᠰᠢ》 ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠬᠦᠰᠡᠬᠦ ᠪᠣᠯᠪᠠᠴᠤ ᠮᠣᠩᠭᠣᠯ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠪᠣᠭᠣᠭᠳᠠᠨ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠦᠭᠡᠢ ᠪᠢ ᠵᠦᠭᠡᠷ ᠦᠵᠡᠶᠡ᠃ ᠲᠠ ᠨᠠᠳᠠ ᠳ᠋ᠤ᠌ ᠦᠵᠡᠭᠦᠯ! ᠭᠡᠬᠦ ᠳ᠋ᠦ᠍ ᠬᠤᠳᠠᠯᠳᠤᠭᠴᠢ ᠬᠠᠢᠷᠴᠠᠭ ᠤ᠋ᠨ ᠰᠢᠯᠦᠨ ᠬᠠᠪᠬᠠᠭ ᠢ᠋ ᠳᠡᠭᠡᠭᠰᠢ ᠡᠷᠭᠦᠨ ᠥᠨᠥᠬᠢ ᠶᠠᠭᠤᠮᠠ ᠶ᠋ᠢ ᠭᠠᠷᠭᠠᠵᠤ ᠢᠷᠡᠭᠡᠳ ᠲᠠᠭ ᠢ᠋ ᠨᠢ ᠨᠡᠭᠡᠭᠡᠨ ᠣᠶᠤᠨᠳᠠᠷᠢ ᠶ᠋ᠢᠨ ᠡᠮᠦᠨᠡ ᠪᠠᠷᠢᠯᠠ᠃ ᠭᠡᠲᠡᠯᠡ᠂ ᠨᠡᠭᠡᠭᠡᠭᠳᠡᠭᠰᠡᠨ ᠲᠠᠭ ᠤ᠋ᠨ ᠨᠢᠭᠤᠷ ᠲᠤ ᠬᠣᠬᠢᠮᠠᠢ ᠶ᠋ᠢᠨ ᠲᠣᠯᠣᠭᠠᠢ᠂ ᠵᠥᠷᠢᠭᠦᠯᠦᠨ ᠲᠠᠯᠪᠢᠭᠰᠠᠨ ᠬᠤᠪᠠᠬᠠᠢ ᠶᠠᠰᠤᠨ ᠴᠥᠮᠥᠭᠡ ᠶ᠋ᠢ ᠰᠠᠨᠠᠮᠵᠢ ᠪᠣᠯᠭᠠᠨ ᠵᠢᠷᠤᠭᠰᠠᠨ ᠨᠢ ᠦᠵᠡᠭᠳᠡᠭᠰᠡᠨ ᠪᠥᠭᠡᠳ ᠬᠤᠳᠠᠯᠳᠤᠭᠴᠢ ᠶ᠋ᠢ ᠲᠡᠷᠡ ᠵᠦᠢᠯ ᠢ᠋ᠶ᠋ᠡᠨ ᠪᠤᠴᠠᠭᠠᠨ ᠬᠢᠬᠦ ᠶ᠋ᠢ ᠵᠠᠪᠳᠤᠬᠤ ᠳ᠋ᠤ᠌ ᠣᠶᠤᠨᠳᠠᠷᠢ ᠵᠠᠭᠠᠮᠠ ᠠ᠋ᠴᠠ ᠨᠢ ᠰᠢᠭᠦᠷᠡᠨ ᠠᠪᠴᠤ᠄
— ᠮᠠᠨ ᠤ᠋ ᠨᠣᠬᠠᠢ ᠶᠡᠬᠡ ᠮᠠᠭᠤ᠂ ᠭᠠᠯᠵᠠᠭᠤ ᠪᠠᠢᠨᠠ ᠭᠡᠵᠦ ᠠᠮᠢᠰᠬᠤᠭᠠᠳᠠᠨ ᠬᠡᠯᠡᠪᠡ᠃
ᠬᠤᠳᠠᠯᠳᠤᠭᠴᠢ ᠦᠭᠡ ᠳᠠᠭᠤ ᠦᠭᠡᠢ ᠶᠠᠭᠤᠮᠠᠨ ᠤ᠋ ᠪᠠᠨ ᠬᠣᠢᠨᠠ ᠠ᠋ᠴᠠ ᠭᠠᠷ ᠰᠤᠩᠭᠠᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠣᠶᠤᠨᠳᠠᠷᠢ ᠵᠡᠭᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠳᠤᠮᠳᠠ ᠬᠤᠷᠤᠭᠤᠨ ᠤ᠋ ᠪᠥᠭᠡᠵᠢ ᠶ᠋ᠢ ᠰᠤᠭᠤ ᠲᠡᠳᠡᠨ ᠠᠪᠴᠤ ᠭᠠᠷ ᠳᠡᠭᠡᠷᠡ ᠨᠢ ᠲᠠᠯᠪᠢᠪᠠ᠃
ᠲᠡᠷᠡ ᠪᠥᠭᠡᠵᠢ ᠨᠢ ᠬᠣᠯᠢᠯᠴᠠᠭᠠ ᠦᠭᠡᠢ ᠰᠢᠵᠢᠷ ᠠᠯᠲᠠ᠂ ᠬᠦᠨᠳᠦ ᠶ᠋ᠢᠨ ᠬᠡᠮᠵᠢᠶᠡ ᠲᠠᠪᠤᠨ ᠴᠢᠨ ᠭᠠᠷᠤᠢ᠃ ᠲᠡᠳᠦᠢ ᠬᠦᠨᠳᠦ ᠶᠠᠭᠤᠮᠠ ᠭᠡᠨᠡᠳᠲᠡ ᠭᠠᠷ ᠲᠤ ᠣᠷᠣᠭᠰᠠᠨ ᠢ᠋ ᠬᠤᠳᠠᠯᠳᠤᠭᠴᠢ《ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠪᠢ ᠵᠡᠭᠦᠳᠦᠯᠡᠵᠦ ᠪᠠᠢᠨᠠ ᠤᠤ?》 ᠭᠡᠵᠦ ᠰᠠᠨᠠᠨ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠲᠠᠭᠠᠵᠠ ᠶ᠋ᠢ ᠰᠢᠷᠲᠡᠨ ᠨᠢᠳᠦ ᠴᠠᠪᠴᠢᠪᠠ᠃ ᠲᠡᠭᠡᠭᠡᠳ ᠠᠯᠠᠭᠠ ᠲᠡᠨᠢᠢᠯᠭᠡᠨ ᠬᠠᠷᠠᠭᠰᠠᠨ ᠪᠥᠭᠡᠳ ᠰᠢᠵᠢᠷ ᠠᠯᠲᠠ ᠶ᠋ᠢ ᠨᠢᠳᠦᠨ ᠳ᠋ᠡᠭᠡᠨ ᠳᠤᠰᠤᠮᠠᠭᠴᠠ ᠰᠡᠳᠬᠢᠯ ᠪᠤᠯᠢᠶᠠᠭᠳᠠᠨ《ᠭᠣᠣᠯᠳᠠ!》 ᠭᠡᠵᠦ ᠥᠪᠡᠷ ᠲᠡᠭᠡᠨ ᠰᠢᠪᠡᠨᠡᠯᠡ᠃ ᠭᠡᠲᠡᠯᠡ ᠪᠠᠰᠠ ᠰᠡᠳᠬᠢᠯ ᠳ᠋ᠦ᠍ᠨᠢ《ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠪᠢ ᠨᠢᠭᠡ ᠡᠮᠡᠭᠲᠡᠢ ᠶ᠋ᠢᠨ ᠥᠪᠡᠷ ᠢ᠋ ᠨᠢ ᠶᠦᠮ ᠤᠤ᠂ ᠠᠯᠢ ᠡᠰᠡᠪᠡᠯ ᠥᠪᠡᠷ ᠪᠤᠰᠤᠳ ᠤ᠋ᠨ ᠠᠮᠢ ᠶ᠋ᠢ ᠪᠤᠰᠠᠨᠢᠭᠤᠯᠬᠤ ᠬᠡᠷᠡᠭ ᠲᠦ᠍ ᠭᠣᠣᠯ ᠬᠡᠷᠡᠭᠯᠡᠭᠦᠷ ᠢ᠋ ᠨᠢ ᠣᠯᠭᠣᠭᠰᠠᠨ ᠨᠢᠭᠦᠯ ᠳ᠋ᠦ᠍ ᠤᠨᠠᠬᠤ ᠪᠢᠰᠢ ᠤᠤ》 ᠭᠡᠵᠦ ᠪᠤᠳᠤᠭᠳᠠᠨ ᠰᠠᠨᠳᠤᠷᠤᠯᠠ᠃
ᠡᠨᠡ ᠵᠠᠭᠤᠷᠠ ᠣᠶᠤᠨᠳᠠᠷᠢ ᠳᠡᠯᠭᠡᠭᠦᠷ ᠡᠴᠡ ᠭᠠᠷᠴᠤ ᠠᠮᠵᠢᠭᠰᠠᠨ ᠪᠠᠢᠵᠠᠢ᠃ ᠬᠤᠳᠠᠯᠳᠤᠭᠴᠢ ᠴᠦ᠍ ᠤᠯᠠᠮ ᠢ᠋ᠶ᠋ᠠᠷ ᠰᠠᠨᠳᠤᠷᠤᠨ ᠪᠠᠨᠲᠠᠩ ᠤ᠋ᠨ ᠢ᠋ᠶ᠋ᠠᠨ ᠳᠡᠭᠡᠭᠦᠷ ᠶᠣᠰᠣᠲᠠᠢ ᠠᠮᠧᠷᠢᠺᠠ ᠬᠥᠮᠦᠨ ᠦ᠌ ᠭᠠᠪᠰᠢᠭᠠᠢᠯᠠᠯ ᠢ᠋ᠶ᠋ᠠᠷ ᠦᠰᠦᠷᠦᠨ ᠭᠠᠷᠴᠤ᠂ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠨᠡᠩᠵᠢᠭᠡᠳ ᠲᠡᠨᠳᠡ ᠡᠴᠡ ᠪᠡᠨ ᠭᠠᠳᠠᠭᠰᠢ ᠭᠠᠷᠤᠨ ᠬᠠᠰᠢᠶᠠᠨ ᠤ᠋ ᠪᠠᠨ ᠬᠠᠭᠠᠯᠭᠠ ᠳᠡᠭᠡᠷᠡ ᠬᠦᠷᠦᠯᠡ᠃ ᠭᠤᠳᠤᠮᠵᠢ ᠡᠯᠡᠢ ᠬᠤᠯᠡᠢ᠂ ᠭᠠᠭᠴᠠ ᠬᠦ᠌ ᠮᠣᠷᠢ ᠲᠡᠷᠭᠡ ᠴᠠᠭᠠᠰᠢ ᠬᠤᠷᠳᠤᠯᠠᠨ ᠶᠠᠪᠤᠬᠤ ᠶ᠋ᠢ ᠬᠤᠳᠠᠯᠳᠤᠭᠴᠢ ᠣᠯᠵᠤ ᠬᠠᠷᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠲᠡᠷᠭᠡᠨ ᠳ᠋ᠦ᠍ ᠥᠨᠥ ᠪᠠᠷᠢᠭᠠᠳ ᠠᠪᠬᠤ ᠶ᠋ᠢ ᠬᠦᠰᠡᠭᠰᠡᠨ ᠡᠮᠡᠭᠲᠡᠢ ᠶ᠋ᠢ ᠰᠠᠭᠤᠯᠭᠠᠭᠠᠳ ᠵᠢᠭᠤᠲᠠᠵᠤ ᠶᠠᠪᠤᠭᠠ ᠶ᠋ᠢ ᠲᠣᠳᠣᠷᠬᠠᠢ ᠮᠡᠳᠡᠪᠡ᠃ ᠭᠡᠪᠡᠴᠦ ᠭᠡᠨᠡᠳᠲᠡ ᠬᠣᠢᠨᠠ ᠠ᠋ᠴᠠ ᠨᠢ ᠬᠥᠭᠡᠭᠡᠬᠦ ᠬᠦᠰᠡᠯ ᠦᠭᠡᠢ ᠪᠣᠯᠤᠨ ᠣᠷᠣᠨ ᠳ᠋ᠤᠨᠢ ᠬᠠᠷᠢᠨ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠦᠷᠭᠡᠨ ᠲᠣᠨᠢᠯᠤᠭ! ᠭᠡᠰᠡᠨ ᠪᠣᠳᠣᠯ ᠲᠥᠷᠥᠪᠡ᠃ ᠶᠠᠭᠤᠨ ᠳ᠋ᠤ᠌ ᠭᠡᠪᠡᠯ᠄
ᠨᠢᠭᠡ ᠳ᠋ᠦ᠍᠂《 ᠪᠢ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠳᠡᠭᠡᠳᠦ ᠴᠠᠭᠠᠨ ᠠᠷᠠᠰᠤᠲᠠᠨ ᠪᠠᠢᠬᠤ ᠠᠲᠠᠯᠠ ᠪᠠᠨ ᠰᠠᠷᠮᠠᠭᠴᠢᠨ ᠤ᠋ ᠲᠥᠷᠥᠯ ᠡᠴᠡ ᠲᠡᠳᠦᠢ ᠯᠡ ᠬᠣᠯᠠᠳᠠᠭᠠ ᠦᠭᠡᠢ ᠰᠢᠷᠠ ᠠᠷᠠᠰᠤᠲᠠᠨ ᠬᠡᠦᠬᠡᠨ ᠦ᠌ ᠲᠥᠯᠥᠭᠡ ᠠᠮᠢ ᠲᠡᠮᠡᠴᠡᠨ ᠭᠦᠶᠦᠬᠦ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠣᠢ?》 ᠭᠡᠳᠡᠭ ᠨᠢᠭᠡ ᠠᠰᠠᠭᠤᠳᠠᠯ ᠣᠷᠣᠵᠤ ᠢᠷᠡᠭᠰᠡᠨ ᠦ᠌ ᠳᠡᠭᠡᠷᠡ ᠵᠡᠭᠦᠨ ᠭᠠᠷ ᠲᠤ ᠠᠳᠬᠤᠭᠠᠰᠤᠲᠠᠢ ᠪᠠᠢᠭᠠ ᠲᠠᠪᠤᠨ ᠴᠢᠨ ᠦ᠌ ᠰᠢᠵᠢᠷ ᠠᠯᠲᠠᠨ ᠪᠥᠭᠡᠵᠢ ᠬᠣᠢᠰᠢ ᠨᠢ ᠴᠢᠩᠭᠠᠭᠠᠪᠠ᠃
ᠬᠣᠶᠠᠷ ᠲᠤ᠂ ᠡᠴᠦᠰ ᠦ᠋ᠨ ᠪᠦᠯᠦᠭ ᠲᠦ᠍᠂ ᠠᠷᠢᠭᠤᠨ ᠪᠤᠷᠬᠠᠨ ᠤ᠋ ᠡᠮᠦᠨᠡ《ᠪᠢ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢ ᠭᠡᠮᠲᠦ ᠬᠡᠷᠡᠭ ᠡᠴᠡ ᠠᠪᠤᠷᠠᠬᠤ ᠭᠡᠵᠦ ᠬᠣᠢᠨᠠ ᠠ᠋ᠴᠠ ᠨᠢ ᠭᠦᠶᠦᠭᠡᠳ ᠣᠯᠤᠭᠠ ᠦᠭᠡᠢ ᠪᠢᠯᠡ》 ᠭᠡᠵᠦ ᠥᠴᠢᠬᠦ ᠳ᠋ᠦ᠍ ᠶᠠᠭᠠᠬᠢᠭᠰᠠᠨ ᠪᠣᠯᠬᠤ ᠦᠭᠡᠢ ᠪᠠᠢᠬᠤ ᠪᠢᠯᠡ ᠭᠡᠵᠦ ᠪᠣᠳᠣᠨ ᠪᠠᠶᠠᠷᠯᠠᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ