ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠬᠣᠶᠠᠳᠤᠭᠠᠷ ᠪᠦᠯᠦᠭ᠂ᠥᠯᠵᠡᠢᠵᠢᠷᠭᠠᠯ– ᠭᠢᠯᠠᠯᠵᠠᠭᠰᠠᠨ ᠨᠢᠭᠡ ᠨᠠᠰᠤ4(4) Шинэлам – 2-р бүлэг᠂Өлзийжаргал– гялалзсан нэг нас 4(4)
42(ᠳᠥᠷᠪᠡ) ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠢ᠋ ᠨᠢᠭᠤᠴᠠ ᠪᠠᠷ ᠰᠢᠢᠳᠬᠡᠭᠰᠡᠨ ᠨᠢ
ᠴᠠᠭᠠᠭᠴᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠳᠠᠷᠠᠭᠠ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠲᠠᠰᠤᠴᠢᠨ ᠬᠤᠳᠠᠯᠳᠤᠭᠰᠠᠨ᠂ ᠹᠧᠣᠳᠠᠯ ᠤ᠋ᠨ ᠭᠠᠭᠴᠠᠭᠠᠷ ᠡᠵᠡᠷᠬᠡᠬᠦ ᠡᠷᠬᠡ ᠶ᠋ᠢ ᠡᠰᠡᠷᠭᠦᠴᠡᠭᠰᠡᠨ《ᠠᠷᠪᠠᠨ ᠨᠢᠭᠡᠨ ᠳᠤᠭᠤᠢᠯᠠᠩ》 ᠤ᠋ᠨ ᠬᠥᠳᠡᠯᠭᠡᠭᠡᠨ᠂ ᠰᠢᠨᠡᠯᠡᠮᠡ ᠶ᠋ᠢᠨ ᠤᠳᠤᠷᠢᠳᠤᠭᠰᠠᠨ《ᠳᠠᠯᠠᠨ ᠠᠨᠳᠠ》 ᠶ᠋ᠢᠨ ᠳᠤᠭᠤᠢᠯᠠᠩ ᠵᠡᠷᠭᠡ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠵᠠᠰᠠᠭ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠤ᠋ ᠪᠠᠢᠷᠢ ᠰᠠᠭᠤᠷᠢ ᠪᠠᠷ ᠢ᠋ᠶ᠋ᠠᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠶᠠᠪᠤᠳᠠᠯ ᠳ᠋ᠤ᠌ ᠭᠠᠷ ᠲᠥᠷᠥᠵᠦ᠂ ᠠᠷᠠᠳ ᠲᠦᠮᠡᠨ ᠦ᠌ ᠠᠷᠠᠳᠴᠢᠯᠠᠯᠲᠤ ᠬᠥᠳᠡᠯᠭᠡᠭᠡᠨ ᠢ᠋ ᠳᠠᠷᠤᠩᠭᠤᠢᠯᠠᠬᠤ ᠤᠷᠰᠢᠭ ᠤ᠋ᠨ ᠡᠵᠡᠨ ᠪᠣᠯᠵᠤ ᠳᠤᠭᠤᠢᠯᠠᠩ ᠢ᠋ ᠳᠠᠢᠰᠤᠩᠨᠠᠵᠤ ᠪᠠᠢᠵᠠᠢ᠃
ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠭᠠᠵᠠᠷ(ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋)1915 ᠣᠨ ᠳ᠋ᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠨᠦᠬᠡᠨᠰᠥ᠋ᠮᠡ ᠳᠡᠭᠡᠷᠡ ᠴᠢᠭᠤᠯᠭᠠᠨ ᠴᠢᠭᠤᠯᠭᠠᠵᠤ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠤ᠋《ᠨᠠᠪᠴᠢᠲᠤ ᠡᠷᠭᠦᠮᠵᠢᠯᠡᠯᠲᠦ ᠰᠡᠴᠡᠨ ᠬᠠᠲᠤᠨ》 ᠭᠡᠰᠡᠨ ᠴᠣᠯᠠ ᠶ᠋ᠢ ᠨᠢ ᠬᠠᠰᠤᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠦᠷᠭᠦᠯᠵᠢᠯᠡᠨ ᠮᠤᠵᠢᠭᠤᠳᠠᠯᠠᠨ ᠳᠤᠭᠤᠢᠯᠠᠩ ᠤ᠋ᠨ ᠬᠢᠨ ᠲᠡᠢ ᠳᠠᠢᠰᠤᠩᠨᠠᠭᠰᠠᠨ ᠳ᠋ᠤ᠌᠂ ᠰᠢᠨᠠᠯᠠᠮᠠ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠠᠷᠢᠯᠭᠠᠵᠤ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠣᠯᠠᠩᠬᠢ ᠬᠥᠮᠦᠰ ᠦ᠋ᠨ ᠬᠣᠷᠣᠰᠤᠯ ᠢ᠋ ᠲᠠᠢᠯᠬᠤ ᠪᠠᠷ ᠵᠣᠷᠢᠵᠠᠢ᠃ ᠭᠡᠪᠡᠴᠦ ᠡᠨᠡ ᠤᠴᠢᠷ ᠢ᠋ ᠲᠠᠰᠤ ᠨᠢᠭᠤᠴᠠ ᠪᠠᠷ ᠬᠢᠬᠦ ᠬᠡᠷᠡᠭᠲᠡᠢ ᠪᠠᠢᠵᠠᠢ᠃
1916 ᠣᠨ ᠳ᠋ᠤ᠌ ᠤᠯᠠᠭᠠᠨᠴᠠᠪ ᠤ᠋ᠨ ᠯᠦ᠍ ᠵᠠᠨ ᠺᠦᠢ(卢占魁) ᠶ᠋ᠢᠨ ᠲᠦᠮᠡᠨ ᠳ᠋ᠤᠯᠢ(ᠦᠦᠰᠢᠨᠴᠦᠳ ᠲᠦᠮᠡᠨ ᠳ᠋ᠤᠯᠢ ᠭᠡᠵᠦ ᠬᠡᠯᠡᠳᠡᠭ᠂ ᠦᠨᠡᠨ ᠳ᠋ᠡᠭᠡᠨ ᠲᠦᠮᠡ ᠪᠠᠢᠭᠰᠠᠨ ᠡᠰᠡᠬᠦ ᠶ᠋ᠢ ᠪᠦᠦ ᠮᠡᠳᠡ)ᠦᠦᠰᠢᠨ ᠬᠣᠰᠢᠭᠤ ᠪᠠᠷ ᠥᠩᠭᠡᠷᠡᠨ ᠭᠠᠷᠬᠤ ᠳ᠋ᠠᠭᠠᠨ ᠬᠡᠳᠦᠨ ᠰᠠᠷᠠ ᠴᠤᠪᠤᠷᠠᠵᠤ ᠶᠡᠬᠡ ᠪᠡᠷ ᠳᠡᠭᠡᠷᠡᠮᠳᠡᠭᠰᠡᠨ ᠪᠠᠢᠵᠠᠢ᠃ ᠰᠢᠨᠡᠯᠡᠮᠡ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠰᠢᠢᠳᠬᠡᠬᠦ ᠳ᠋ᠦ᠍ ᠡᠨᠡ ᠬᠦ᠌ ᠳ᠋ᠤᠯᠢ ᠶ᠋ᠢᠨ ᠮᠥᠷ ᠢ᠋ ᠳᠠᠭᠠᠭᠤᠯᠵᠤ ᠰᠢᠢᠳᠪᠦᠷᠢᠯᠡᠬᠦ ᠪᠡᠷ ᠤᠷᠠᠨ ᠠᠷᠭᠠ ᠪᠣᠳᠣᠵᠤ᠂ ᠪᠠᠷᠠᠭᠤᠨ ᠬᠦᠩ ᠴᠣᠭᠲᠣᠸᠴᠢᠷ ᠪᠣᠯᠤᠨ ᠴᠠᠭᠳᠤᠷᠰᠡᠷᠡᠩ ᠦ᠋ᠨ ᠵᠥᠷᠢᠴᠡᠯ ᠢ᠋ ᠠᠰᠢᠭᠯᠠᠨ᠂ ᠴᠣᠭᠲᠣᠸᠴᠢᠷ ᠤ᠋ᠨ ᠨᠢᠭᠤᠴᠠ ᠳᠣᠬᠢᠯᠲᠠ ᠶ᠋ᠢ ᠣᠯᠵᠤ ᠪᠠᠷᠠᠭᠤᠨ ᠬᠦᠩ ᠴᠣᠭᠲᠣᠸᠴᠢᠷ ᠪᠣᠯᠤᠨ ᠬᠣᠰᠢᠭᠤ ᠵᠠᠰᠠᠭ ᠨᠣᠶᠠᠨ ᠴᠠᠭᠳᠤᠷᠰᠡᠷᠡᠩ ᠬᠣᠶᠠᠭᠤᠯᠠ ᠶ᠋ᠢᠨ ᠵᠥᠷᠢᠴᠡᠯ ᠮᠥᠷᠭᠥᠯᠳᠦᠭᠡᠨ ᠢ᠋ ᠴᠢᠳᠠᠮᠠᠭᠠᠢ ᠠᠰᠢᠭᠯᠠᠵᠤ ᠪᠠᠢᠭᠠᠳ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠰᠢᠢᠳᠬᠡᠬᠦ ᠠᠵᠢᠯ ᠢ᠋ᠶ᠋ᠠᠨ ᠭᠠᠷᠳᠠᠵᠠᠢ᠃
ᠰᠢᠨᠡᠯᠡᠮᠡ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠳ᠋ᠤᠯᠢ ᠨᠦᠬᠡᠨᠰᠦᠮᠡ(ᠥᠨᠥ ᠶ᠋ᠢᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠦᠦᠰᠢᠨᠵᠤᠤ ᠰᠤᠮᠤᠨ ᠤ᠋ ᠪᠦᠷᠢᠳᠦ ᠭᠠᠴᠠᠭᠠᠨ ᠤ᠋ ᠭᠠᠵᠠᠷ ᠲᠤ᠌ ᠪᠠᠢᠵᠠᠢ) ᠣᠷᠴᠢᠮ ᠢ᠋ᠶ᠋ᠠᠷ ᠥᠩᠭᠡᠷᠡᠬᠦ ᠴᠠᠭ ᠲᠣᠬᠢᠶᠠᠯ ᠢ᠋ ᠵᠠᠪᠳᠤᠵᠤ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ(ᠥᠨᠥ ᠶ᠋ᠢᠨ ᠡᠵᠡᠨ ᠬᠣᠷᠣᠭᠠ) ᠠ᠋ᠴᠠ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠭᠠᠯᠠᠭᠤᠲᠤ ᠶ᠋ᠢᠨ ᠪᠤᠵᠠᠢ ᠨᠠᠭᠤᠷ ᠲᠤ᠌ ᠡᠬᠡ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠢᠷᠡᠵᠦ ᠨᠤᠲᠤᠭᠰᠢᠨ ᠰᠠᠭᠤᠭᠰᠠᠨᠨ ᠬᠤᠢ ᠬᠦᠢ(灰鬼) ᠴᠣᠭᠳᠥ᠋ᠭᠦᠷᠡᠩ ᠢ᠋ ᠠᠰᠢᠭᠯᠠᠬᠤ ᠪᠠᠷ ᠪᠣᠯᠪᠠ᠃ ᠲᠡᠷᠡ ᠪᠣᠯ ᠶᠠᠭᠤᠨ ᠠ᠋ᠴᠠ ᠴᠤ᠌ ᠠᠶᠤᠳᠠᠭ ᠦᠭᠡᠢ ᠮᠥᠷᠲᠡᠭᠡᠨ ᠣᠷᠬᠢᠭᠠ ᠵᠠᠩ ᠲᠠᠢ᠂ ᠬᠦᠴᠦ ᠲᠤᠷᠪᠢ ᠲᠠᠢ ᠪᠤᠵᠠᠭᠠᠢ ᠡᠷᠡ ᠪᠠᠢᠵᠤ᠂ ᠰᠢᠨᠡᠯᠡᠮᠡ ᠲᠡᠭᠦᠨ ᠳ᠋ᠦ᠍᠄《ᠴᠢ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠲᠣᠨᠢᠯᠭᠠᠴᠢᠬᠠᠪᠠᠯ ᠴᠢᠮᠠᠲᠤ ᠨᠢᠭᠡ ᠵᠠᠭᠤᠨ ᠴᠠᠭᠠᠨ ᠲᠥᠭᠥᠷᠢᠭ ᠥᠭᠭᠦᠶᠡ! ᠴᠢᠮᠠᠢᠢ ᠳ᠋ᠤ᠌ ᠬᠠᠪᠰᠤᠷᠬᠤ ᠪᠠᠷ ᠮᠠᠨᠳᠠ᠂ ᠲᠦᠪᠰᠢᠨ ᠵᠡᠷᠭᠡ ᠠᠷᠪᠠᠭᠠᠳ ᠰᠠᠢᠨ ᠴᠡᠷᠢᠭ ᠥᠭᠴᠦ ᠶᠠᠪᠤᠭᠤᠯᠤᠶᠠ》 ᠭᠡᠵᠡᠢ᠃《ᠨᠢᠳᠦ ᠤᠯᠠᠭᠠᠨ ᠮᠥᠩᠭᠥ ᠴᠠᠭᠠᠨ》 ᠭᠡᠳᠡᠭ ᠢ᠋ᠶ᠋ᠡᠷ ᠲᠡᠷᠡ ᠰᠣᠨᠣᠰᠤᠮᠠᠭᠴᠠ ᠪᠠᠶᠠᠷᠯᠠᠭᠠᠳ ᠠᠷᠪᠠᠭᠠᠳ ᠴᠡᠷᠢᠭ ᠲᠡᠢ ᠰᠥᠨᠢ ᠪᠡᠷ ᠶᠠᠪᠤᠭᠠᠳ ᠴᠠᠭᠠᠨᠰᠥ᠋ᠮᠡ ᠳ᠋ᠦ᠍ ᠬᠦᠷᠴᠦ ᠪᠠᠢᠳᠠᠯ ᠢ᠋ ᠰᠡᠮᠡᠷᠬᠡᠨ ᠣᠢᠯᠠᠭᠠᠵᠤ ᠳᠠᠷᠠᠭᠠ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠠᠷ ᠭᠠᠷ ᠬᠥᠳᠡᠯᠬᠦ ᠪᠡᠷ ᠪᠡᠯᠡᠳᠬᠡᠯᠡ᠃ ᠴᠠᠭᠳᠤᠷᠰᠡᠷᠡᠩ᠂ ᠨᠠᠷᠠᠨᠭᠡᠷᠡᠯ ᠨᠠᠷ ᠴᠠᠭᠠᠨᠰᠥ᠋ᠮᠡ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠨᠠ ᠠᠷᠪᠠᠭᠠᠳ ᠺᠢᠯᠣᠮᠧᠲ᠋ᠷ ᠵᠠᠢᠲᠠᠢ ᠪᠠᠢᠭᠠ ᠪᠦᠷᠢᠳᠦ ᠶ᠋ᠢᠨ ᠡᠩᠭᠡᠷ ᠲᠡᠬᠢ ᠦᠦᠰᠢᠨ ᠨᠣᠶᠠᠨ ᠱᠠᠩ ᠤ᠋ᠨ ᠵᠠᠷᠤᠴᠠ ᠡᠷᠦᠬᠡ ᠭᠢᠪᠢᠮᠢᠳᠤᠭ ᠤ᠋ᠨ ᠭᠡᠷ ᠲᠦ᠍ ᠠᠮᠠᠷᠠᠵᠤ ᠰᠠᠭᠤᠵᠤ ᠪᠠᠢᠵᠠᠢ᠃
ᠳᠠᠷᠠᠭᠠ ᠰᠥᠨᠢ ᠨᠢ ᠮᠠᠨᠳᠠ᠂ ᠲᠦᠪᠰᠢᠨ᠂ ᠳᠦᠭᠦᠷᠡᠩ ᠵᠡᠷᠭᠡ ᠬᠥᠮᠦᠰ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠳ᠋ᠤᠯᠢ ᠶ᠋ᠢᠨ ᠶᠠᠪᠤᠭᠰᠠᠨ ᠮᠥᠷ ᠢ᠋ ᠳᠠᠭᠠᠵᠤ ᠭᠢᠪᠢᠮᠢᠳᠤᠭ ᠤ᠋ᠨ ᠭᠡᠷ ᠦ᠋ᠨ ᠣᠢᠷᠠᠬᠠᠨ ᠬᠦᠷᠴᠦ ᠳ᠋ᠤᠯᠢ ᠶ᠋ᠢᠨ ᠦᠷᠭᠦᠯᠵᠢᠯᠡᠨ ᠴᠤᠪᠤᠵᠤ ᠶᠠᠪᠤᠵᠤ ᠪᠠᠢᠭᠠ ᠡᠰᠡᠬᠦ ᠪᠠ ᠬᠢᠪᠢᠮᠢᠳᠤᠭ ᠤ᠋ᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠳᠣᠲᠣᠷᠠᠬᠢ ᠪᠠᠢᠳᠠᠯ ᠢ᠋ ᠰᠡᠮᠬᠡᠨ ᠳᠠᠩᠨᠠᠪᠠ᠃ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠳ᠋ᠤᠯᠢ ᠦᠷᠭᠦᠯᠵᠢᠯᠡᠨ ᠶᠠᠪᠤᠵᠤ ᠪᠠᠢᠵᠠᠢ᠃
ᠲᠤᠰ ᠰᠥᠨᠢ ᠶ᠋ᠢᠨ ᠭᠣᠣᠯ ᠵᠢᠯᠣᠭᠣᠳᠤᠭᠴᠢ ᠪᠣᠯ ᠰᠢᠨᠠᠯᠠᠮᠠ ᠶ᠋ᠢᠨ ᠨᠢᠭᠤᠴᠠ ᠪᠠᠷ ᠲᠣᠮᠢᠯᠠᠭᠰᠠᠨ ᠮᠠᠨᠳᠠ ᠪᠣᠯᠤᠨᠠ᠃ ᠲᠤᠰ ᠠᠢᠯ ᠤ᠋ᠨ ᠬᠢᠨ ᠨᠡᠯᠢᠶᠡᠳ ᠡᠷᠲᠡ ᠰᠢᠭ ᠤᠨᠲᠠᠵᠤ ᠠᠮᠠᠷᠠᠭᠠᠳ ᠴᠠᠭᠳᠤᠷᠰᠡᠷᠡᠩ ᠨᠠᠷᠠᠨᠭᠡᠷᠡᠯ ᠬᠣᠢᠲᠤ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠬᠠᠨᠵᠤᠨ ᠳ᠋ᠤ᠌ ᠨᠣᠢᠷᠰᠤᠵᠤ᠂ ᠵᠠᠷᠤᠴᠠ ᠪᠣᠯᠤᠨ ᠪᠤᠰᠤᠳ ᠬᠥᠮᠦᠰ ᠥᠭᠡᠷᠡ ᠭᠡᠷ ᠦ᠋ᠳ ᠲᠦ᠍ ᠤᠨᠲᠠᠭᠰᠠᠨ ᠪᠠᠢᠵᠠᠢ᠃ ᠰᠥᠨᠢ ᠶ᠋ᠢᠨ ᠭᠦᠨ ᠪᠣᠯᠬᠤ ᠳ᠋ᠤ᠌ ᠲᠡᠳᠡᠭᠡᠷ ᠴᠡᠷᠢᠭ ᠦ᠋ᠳ ᠭᠠᠷ ᠬᠥᠳᠡᠯᠬᠦ ᠪᠡᠷ ᠠᠵᠢᠯ ᠬᠤᠪᠢᠶᠠᠷᠢᠯᠠᠯᠠ᠃
1. ᠭᠤᠷᠪᠠᠨ ᠴᠡᠷᠢᠭ ᠫᠤᠤ ᠳ᠋ᠠᠭᠠᠨ ᠰᠤᠮᠤ ᠳᠠᠷᠤᠵᠤ ᠭᠤᠷᠪᠠᠨ ᠭᠡᠷ ᠦ᠋ᠨ ᠡᠭᠦᠳᠡ ᠴᠣᠩᠬᠣ ᠶ᠋ᠢ ᠰᠠᠬᠢᠵᠤ ᠭᠠᠳᠠᠭᠰᠢ ᠬᠥᠮᠦᠨ ᠭᠠᠷᠭᠠᠬᠤ ᠦᠭᠡᠢ᠂ ᠭᠠᠷᠪᠠᠯ ᠫᠤᠤᠳᠠᠵᠤ ᠠᠯᠠᠨᠠ᠃
2. ᠨᠢᠭᠡ ᠨᠢ ᠭᠡᠷ ᠦ᠋ᠨ ᠣᠢᠷᠠᠯᠴᠠᠭᠠ ᠮᠣᠷᠢᠳ ᠢ᠋ᠶ᠋ᠠᠨ ᠪᠠᠷᠢᠵᠤ ᠭᠡᠨᠡᠳᠲᠡ ᠮᠣᠷᠳᠠᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠯᠭᠠᠨᠠ᠃
3. ᠴᠣᠭᠳᠦ᠋ᠭᠦᠷᠡᠩ ᠨᠢᠭᠡ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠬᠣᠢᠲᠤ ᠶᠡᠬᠡ ᠭᠡᠷ ᠲᠦ᠍ ᠣᠷᠣᠵᠤ ᠨᠠᠷᠠᠨᠭᠡᠷᠡᠯ ᠢ᠋ ᠴᠢᠷᠴᠦ ᠠᠪᠴᠢᠷᠠᠨᠠ᠃
4. ᠪᠤᠰᠤᠳ ᠳᠥᠷᠪᠡᠨ ᠴᠡᠷᠢᠭ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠠᠰᠠᠷ ᠲᠤ᠌ ᠲᠤᠰ ᠪᠦᠷᠢ ᠨᠢᠭᠡ ᠪᠠᠭᠴᠠ ᠰᠢᠷᠠ ᠬᠦᠵᠢ ᠪᠣᠭᠣᠵᠤ ᠦᠵᠦᠭᠦᠷ ᠢ᠋ ᠨᠢ ᠨᠣᠴᠣᠭᠠᠨ ᠭᠡᠷ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠥᠨᠳᠡᠯᠡᠨ ᠵᠥᠷᠢᠭᠦᠦ ᠡᠷᠭᠢᠴᠡᠵᠦ ᠬᠠᠰᠬᠢᠷᠤᠯᠳᠤᠨ ᠭᠡᠨᠡᠳᠲᠡ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠠᠷᠭᠠᠴᠠᠭᠠᠨᠠ᠃
5. ᠴᠡᠷᠢᠭ ᠦ᠋ᠳ ᠬᠠᠷᠢᠯᠴᠠᠨ ᠬᠢᠲᠠᠳ ᠢ᠋ᠶ᠋ᠠᠷ ᠬᠡᠯᠡᠯᠴᠡᠵᠦ ᠬᠠᠷᠢᠶᠠᠯᠴᠠᠬᠤ ᠠ᠋ᠴᠠ ᠪᠢᠰᠢ ᠨᠢᠭᠡ ᠴᠦ᠍ ᠮᠣᠩᠭᠣᠯ ᠦᠭᠡ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ᠂ ᠬᠥᠯ ᠳ᠋ᠡᠭᠡᠨ ᠪᠡᠯᠡᠳᠬᠡᠭᠰᠡᠨ ᠫᠠᠷᠢᠩ ᠱᠠᠬᠠᠢ ᠪᠠᠨ ᠡᠮᠦᠰᠦᠨᠡ ᠭᠡᠵᠦ ᠶᠠᠷᠢᠯᠴᠠᠨ ᠲᠣᠭᠲᠠᠵᠠᠢ᠃
《ᠮᠠᠨ ᠤ᠋ ᠨᠣᠶᠠᠨ ᠯᠦ᠍ ᠵᠠᠨ ᠺᠦᠢ᠂ ᠲᠠᠨᠤᠰ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠪᠴᠢᠯᠠᠵᠤ ᠠᠪᠴᠢᠷᠠ ᠭᠡᠵᠦ ᠪᠠᠢᠨᠠ᠂ ᠲᠠᠨᠤᠰ ᠪᠤᠤ ᠬᠥᠳᠡᠯ! ᠬᠥᠳᠡᠯᠪᠡᠯ ᠪᠦᠭᠦᠳᠡ ᠶ᠋ᠢ ᠫᠤᠤᠳᠠᠵᠤ ᠠᠯᠠᠨᠠ!》 ᠭᠡᠮᠡᠨ ᠬᠢᠲᠠᠳ ᠢ᠋ᠶ᠋ᠠᠷ ᠪᠠᠷᠬᠢᠷᠠᠯᠳᠤᠵᠤ᠂ ᠴᠤᠭᠳᠦ᠋ᠭᠦᠷᠡᠩ ᠨᠠᠷ ᠬᠣᠢᠲᠤ ᠭᠡᠷ ᠲᠦ᠍ ᠦᠰᠦᠷᠦᠨ ᠣᠷᠣᠪᠠ᠃ ᠲᠡᠳᠡ ᠴᠣᠩᠬᠣᠨ ᠤ᠋ ᠬᠠᠵᠠᠭᠤ ᠪᠠᠷ ᠤᠨᠲᠠᠵᠤ ᠪᠠᠢᠭᠰᠠᠨ ᠨᠠᠷᠠᠨᠭᠡᠷᠡᠯ ᠢ᠋ ᠲᠡᠳᠡᠨ ᠴᠢᠷᠦᠭᠰᠡᠭᠡᠷ ᠭᠡᠷ ᠦ᠋ᠨ ᠭᠠᠳᠠᠨᠠᠬᠢ ᠪᠤᠷᠭᠠᠰᠤᠨ ᠬᠦᠷᠢᠶᠡᠨ ᠦ᠌ ᠭᠣᠣᠯ ᠡᠭᠦᠳᠡᠨ ᠪᠣᠱᠣᠭᠠ ᠪᠠᠷ ᠭᠠᠷᠬᠤ ᠳ᠋ᠤ᠌᠂ ᠨᠠᠷᠠᠨᠭᠡᠷᠡᠯ ᠠᠮᠢ ᠠᠪᠤᠷᠠ ᠭᠡᠮᠡᠨ ᠪᠠᠷᠬᠢᠷᠠᠵᠤ ᠤᠬᠢᠯᠠᠭᠰᠠᠭᠠᠷ ᠡᠭᠦᠳᠡᠨ ᠬᠠᠲᠠᠪᠴᠢ ᠠ᠋ᠴᠠ ᠪᠠᠷᠢᠭᠠᠳ ᠲᠠᠯᠪᠢᠬᠤ ᠦᠭᠡᠢ ᠪᠠᠢᠯᠠ᠃ ᠴᠣᠭᠳᠦᠢ᠍ᠭᠦᠷᠡᠩ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠭᠠᠷ ᠫᠤᠤ ᠪᠠᠷ ᠲᠡᠭᠦᠨ ᠢ᠋ ᠳᠣᠣᠷᠠ ᠨᠢ ᠫᠤᠤᠳᠠᠨ ᠠᠯᠠᠵᠤ᠂ ᠴᠡᠷᠢᠭ ᠲᠡᠢ ᠪᠡᠨ ᠮᠣᠷᠢᠳ ᠢ᠋ᠶ᠋ᠠᠨ ᠤᠨᠤᠭᠠᠳ ᠭᠢᠪᠢᠮᠢᠳᠤᠭ ᠤ᠋ᠨ ᠭᠡᠷ ᠦ᠋ᠨ ᠠᠷᠤ ᠪᠠᠷ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠳ᠋ᠤᠯᠢ ᠶᠠᠪᠤᠭᠠ ᠵᠠᠮ ᠮᠥᠷ ᠢ᠋ ᠳᠠᠭᠠᠵᠤ ᠪᠠᠷᠠᠭᠤᠨᠰᠢ ᠶᠠᠪᠤᠯᠠ᠃ ᠲᠡᠳᠡ ᠤᠤᠯ ᠨᠢ ᠨᠠᠷᠠᠨᠭᠡᠷᠡᠯ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠵᠤ ᠶᠠᠪᠤᠭᠠᠳ ᠪᠠᠯᠠᠷ ᠲᠤ᠌ ᠫᠤᠤᠳᠠᠵᠤ ᠠᠯᠠᠭᠠᠳ ᠲᠡᠨᠳᠡ ᠨᠢ ᠪᠤᠯᠠᠬᠤ ᠪᠠᠷ ᠲᠥᠯᠥᠪᠯᠡᠵᠦ ᠪᠠᠢᠭᠰᠠᠨ ᠭᠡᠨᠡ᠃ ᠭᠢᠪᠢᠮᠢᠳᠤᠭ ᠤ᠋ᠨ ᠬᠢᠨ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠳ᠋ᠤᠯᠢ ᠢᠷᠡᠭᠡᠳ ᠠᠯᠠᠴᠢᠬᠠᠯᠠ ᠭᠡᠮᠡᠨ ᠲᠠᠭᠠᠮᠠᠭᠯᠠᠵᠤ ᠪᠠᠢᠯᠠ᠃
ᠴᠣᠭᠳᠦᠢ᠍ᠭᠦᠷᠡᠩ ᠨᠠᠷ ᠳ᠋ᠤᠯᠢ ᠶ᠋ᠢᠨ ᠶᠠᠪᠤᠭᠠ ᠴᠡᠷᠢᠭ ᠦ᠋ᠨ ᠮᠥᠷ ᠢ᠋ ᠳᠠᠭᠠᠨ ᠨᠡᠯᠢᠶᠡᠳ ᠬᠣᠯᠠ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠤᠴᠢᠷ ᠶᠠᠪᠤᠳᠠᠯ ᠤᠷᠤᠭᠰᠢᠲᠠᠢ ᠪᠦᠲᠦᠯᠡ ᠭᠡᠮᠡᠨ ᠣᠮᠣᠭᠰᠢᠨ ᠪᠠᠶᠠᠷᠯᠠᠵᠠᠭᠠᠵᠤ ᠣᠷᠳᠣᠰ ᠠᠷᠠᠳ ᠤ᠋ᠨ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠪᠠᠨ ᠬᠠᠩᠭᠢᠨᠠᠭᠤᠯᠤᠨ ᠶᠠᠪᠤᠵᠠᠭᠠᠨᠠ᠃ ᠡᠨᠡ ᠬᠦ᠌ ᠰᠥᠨᠢ ᠶ᠋ᠢᠨ ᠭᠦᠨ ᠦ᠌ ᠮᠣᠩᠭᠣᠯ ᠳᠠᠭᠤᠤ ᠶ᠋ᠢᠨ ᠬᠠᠩᠭᠢᠷᠭᠠ ᠴᠤᠤᠷᠢᠶᠠ ᠨᠢ ᠬᠢᠪᠢᠮᠢᠳᠤᠭ ᠤ᠋ᠨ ᠭᠠᠳᠠᠨᠠ ᠶᠠᠪᠤᠭᠠ ᠠᠯᠢ ᠨᠢᠭᠡᠨ ᠳ᠋ᠦ᠍ᠨᠢ ᠪᠦᠦᠷ ᠲᠦᠦᠷ ᠳᠤᠭᠤᠯᠳᠠᠭᠳᠠᠵᠤ ᠨᠠᠷᠠᠨᠭᠡᠷᠡᠯ ᠢ᠋ ᠠᠯᠠᠭᠰᠠᠨ ᠬᠥᠮᠦᠰ ᠬᠢᠲᠠᠳ ᠳ᠋ᠤᠯᠢ ᠪᠢᠰᠢ ᠪᠠᠷᠤᠭ ᠮᠣᠩᠭᠣᠯᠴᠤᠳ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠰᠡᠨ ᠰᠡᠵᠢᠭ ᠲᠥᠷᠥᠭᠦᠯᠵᠡᠢ᠃
ᠭᠡᠪᠡᠴᠦ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠠᠷᠠᠨᠭᠡᠷᠡᠯ ᠢ᠋ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠲᠦᠮᠡᠨ ᠳ᠋ᠤᠯᠢ ᠬᠣᠣᠷᠯᠠᠵᠠᠢ ᠭᠡᠰᠡᠨ ᠴᠤᠤᠷᠬᠠᠯ ᠦᠭᠡ ᠲᠠᠷᠬᠠᠭᠰᠠᠨ ᠪᠠᠢᠨᠠ᠃ ᠲᠦᠷᠦᠭᠦᠬᠡᠨ ᠵᠡᠷᠭᠡ ᠪᠡᠨ ᠠᠪᠤᠭᠤᠯᠤᠭᠰᠠᠨ ᠴᠠᠭᠳᠤᠷᠰᠡᠷᠡᠩ᠂ ᠠᠬᠠᠮᠠᠳ ᠬᠥᠪᠡᠭᠦᠨ ᠲᠡᠭᠦᠰᠠᠠᠮᠤᠭᠤᠯᠠᠩ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠬᠣᠰᠢᠭᠤ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠪᠤᠯᠢᠶᠠᠵᠤ ᠠᠪᠤᠭᠠᠳ ᠨᠠᠷᠠᠨᠭᠡᠷᠡᠯ ᠲᠡᠢ ᠬᠣᠶᠠᠭᠤᠯᠠ ᠬᠢᠪᠢᠮᠢᠳᠤᠭ ᠤ᠋ᠨ ᠳ᠋ᠤ᠌ ᠠᠮᠠᠷᠠᠵᠤ ᠰᠠᠭᠤᠵᠤ ᠪᠠᠢᠭᠠᠳ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠳ᠋ᠤᠯᠢ ᠶ᠋ᠢᠨ ᠮᠥᠷ ᠢ᠋ ᠳᠠᠭᠠᠨ ᠲᠠᠮᠠᠭᠠ ᠪᠠᠨ ᠠᠪᠴᠤ ᠳᠤᠲᠠᠭᠠᠨ ᠬᠠᠯᠬᠠ ᠮᠣᠩᠭᠣᠯ ᠳ᠋ᠤ᠌ ᠣᠴᠢᠵᠤ ᠵᠢᠪᠽᠤᠨᠳᠠᠮᠪᠠ ᠬᠤᠲᠤᠭᠲᠤ ᠲᠠᠢ ᠨᠡᠢᠯᠡᠬᠦ ᠪᠡᠷ ᠪᠣᠳᠣᠭᠰᠠᠨ ᠪᠣᠳᠣᠯ ᠨᠢ ᠪᠦᠷᠢᠮᠦᠰᠦᠨ ᠰᠠᠭᠠᠷᠠᠵᠤ ᠤᠬᠢᠯᠠᠨ ᠵᠣᠪᠠᠵᠤ ᠪᠠᠢᠭᠠ ᠦᠶᠡᠰ ᠲᠦ᠍᠂ ᠰᠢᠨᠡᠯᠡᠮᠡ ᠤᠷᠠᠨ ᠠᠷᠭᠠ ᠵᠠᠷᠤᠵᠤ ᠨᠣᠶᠠᠨ ᠱᠠᠩ ᠳᠡᠭᠡᠷᠡ ᠣᠴᠢᠵᠤ ᠬᠣᠰᠢᠭᠤ ᠮᠡᠢᠷᠡᠨ ᠰᠠᠢᠨᠴᠣᠭᠲᠣ ᠳ᠋ᠤ᠌᠄《ᠰᠠᠶᠢᠬᠢ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠳ᠋ᠤᠯᠢ ᠢᠷᠡᠵᠦ ᠠᠯᠠᠴᠢᠬᠠᠵᠠᠢ ᠭᠡᠨᠡ᠂ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠲᠠᠮᠠᠭᠠ ᠶ᠋ᠢ ᠳ᠋ᠤᠯᠢ ᠪᠤᠯᠢᠶᠠᠵᠤ ᠠᠪᠤᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠪᠢᠰᠢ ᠪᠠ? ᠢᠩᠭᠢᠪᠡᠯ ᠦᠦᠰᠢᠨ ᠬᠣᠰᠢᠭᠤ ᠵᠠᠰᠠᠭ ᠲᠠᠮᠠᠭᠠ ᠴᠤ᠌ ᠦᠭᠡᠢ ᠬᠣᠰᠢᠭᠤ ᠪᠣᠯᠴᠢᠬᠠᠬᠤ ᠪᠢᠰᠢ ᠤᠤ?》 ᠭᠡᠪᠡ᠃ ᠰᠠᠢᠨᠴᠣᠭᠲᠣ ᠮᠡᠢᠷᠡᠨ ᠰᠠᠨᠳᠤᠷᠴᠤ ᠪᠤᠰᠤᠳ ᠲᠤᠰᠢᠶᠠᠯᠲᠠᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠴᠠᠭᠳᠤᠷᠰᠡᠷᠡᠩ ᠢ᠋ ᠠᠢᠯᠠᠳᠬᠠᠨ ᠲᠣᠬᠣᠨᠢᠭᠤᠯᠬᠤ ᠨᠡᠷᠡ ᠪᠡᠷ ᠬᠢᠪᠢᠮᠢᠳᠤᠭ ᠤ᠋ᠨ ᠳ᠋ᠤ᠌ ᠣᠴᠢᠵᠤ ᠬᠣᠶᠠᠷ ᠬᠣᠨᠣᠭᠠᠳ ᠬᠣᠰᠢᠭᠤ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠠᠪᠴᠢᠷᠠᠵᠤ ᠪᠢᠴᠢᠬᠠᠨ ᠸᠠᠩ ᠲᠡᠭᠦᠰᠠᠠᠮᠤᠭᠤᠯᠠᠩ ᠳ᠋ᠤ᠌ ᠲᠤᠰᠢᠶᠠᠨ ᠱᠠᠩ ᠣᠷᠳᠣᠨ ᠳ᠋ᠤ᠌ ᠬᠠᠳᠠᠭᠠᠯᠠᠭᠰᠠᠨ ᠭᠡᠨᠡ᠃
ᠵᠠᠷᠢᠮ ᠵᠣᠬᠢᠶᠠᠯ ᠳ᠋ᠤ᠌ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠢ᠋ ᠠᠯᠠᠭᠰᠠᠨ ᠶᠠᠪᠤᠳᠠᠯ ᠪᠠ ᠴᠠᠭᠳᠤᠷᠰᠡᠷᠡᠩ ᠡᠴᠡ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢ ᠪᠤᠯᠢᠶᠠᠭᠰᠠᠨ ᠶᠠᠪᠤᠳᠠᠯ ᠢ᠋ ᠨᠢᠭᠡ ᠤᠳᠠᠭᠠ ᠳᠡᠭᠡᠷᠡ ᠦᠢᠯᠡᠳᠦᠭᠰᠡᠨ ᠭᠡᠵᠦ ᠪᠢᠴᠢᠵᠦ ᠪᠠᠢᠳᠠᠭ᠃ ᠦᠨᠡᠨ ᠳ᠋ᠡᠭᠡᠨ ᠲᠡᠷᠡ ᠰᠥᠨᠢ ᠢᠩᠭᠢᠵᠦ ᠬᠢᠬᠦ ᠪᠣᠯᠤᠯᠴᠠᠭᠠ ᠦᠭᠡᠢ ᠶᠦᠮ᠃ ᠤᠴᠢᠷ ᠨᠢ ᠬᠥᠮᠦᠨ ᠲᠣᠮᠢᠯᠠᠵᠤ ᠨᠠᠷᠠᠨᠭᠡᠷᠡᠯ ᠢ᠋ ᠠᠯᠠᠬᠤ ᠶᠠᠪᠤᠳᠠᠯ ᠪᠣᠯ ᠲᠤᠢᠯ ᠤ᠋ᠨ ᠨᠢᠭᠤᠴᠠ ᠮᠥᠷᠲᠡᠭᠡᠨ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠳ᠋ᠤᠯᠢ ᠪᠠᠷ ᠣᠪᠯᠠᠵᠤ ᠪᠤᠰᠢᠭᠤ ᠲᠦᠷᠭᠡᠨ ᠦᠢᠯᠡᠳᠬᠦ ᠴᠢᠬᠤᠯᠠᠲᠠᠢ ᠲᠤᠯᠠ ᠲᠠᠮᠠᠭᠠ ᠡᠷᠢᠵᠦ ᠪᠤᠯᠢᠶᠠᠬᠤ ᠵᠠᠪ ᠴᠢᠯᠥᠭᠡ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ᠃ ᠡᠢᠮᠦ ᠡᠴᠡ ᠲᠠᠮᠠᠭᠠ ᠶ᠋ᠢ ᠰᠢᠨᠠᠯᠠᠮᠠ ᠠᠷᠭᠠ ᠬᠡᠷᠡᠭᠯᠡᠵᠦ ᠴᠠᠭᠳᠤᠷᠰᠡᠷᠡᠩ ᠦ᠋ᠨ ᠬᠥᠮᠦᠰ ᠢ᠋ ᠲᠠᠯᠪᠢᠵᠤ ᠠᠪᠤᠭᠤᠯᠤᠭᠰᠠᠨ ᠨᠢ ᠪᠣᠳᠠᠲᠤ ᠪᠠᠢᠳᠠᠯ ᠲᠠᠢ ᠨᠡᠯᠢᠶᠡᠳ ᠨᠡᠢᠴᠡᠵᠦ ᠪᠠᠢᠭᠠ ᠶᠤᠮ᠃①
— — — —
① ᠲᠤᠰ ᠠᠭᠤᠯᠭᠠ ᠶ᠋ᠢ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠰᠠᠷᠠᠭᠤᠯᠨᠤᠲᠤᠭ ᠤ᠋ᠨ ᠥᠯᠵᠠᠢᠵᠠᠩᠭᠠ ᠨᠠᠰᠤᠲᠠᠨ ᠪᠣᠯᠤᠨ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠵᠠᠮᠪᠠᠷᠬᠠᠪᠠ(ᠯᠢ ᠵᠢᠩ ᠱᠠᠨ)᠂ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠶᠡᠬᠡ ᠬᠦᠷᠢᠶᠡ ᠶ᠋ᠢᠨ ᠪᠠᠲᠤᠷᠠᠪᠳᠠᠨ(ᠴᠢ ᠪᠤᠤ ᠴᠤᠸᠠᠨ)᠂ ᠴᠠᠭᠠᠨᠳᠦᠩ ᠨᠠᠰᠤᠲᠠᠨ ᠨᠠᠷ ᠤ᠋ᠨ ᠬᠡᠯᠡᠭᠰᠡᠨ ᠢ᠋ ᠡᠮᠬᠢᠳᠬᠡᠨ ᠨᠠᠢᠷᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠡᠩᠬᠡᠯᠴᠡᠴᠡᠭ᠂ ᠰᠠᠷᠠᠨᠲᠤᠶᠠᠭᠠ᠂ ᠣᠶᠤᠨᠪᠢᠯᠢᠭ᠌᠂ ᠴᠤᠯᠮᠤᠨᠭᠡᠷᠡᠯ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠠᠯᠲᠠᠨᠱᠠ᠂ ᠲ· ᠬᠦᠮᠦᠵᠢᠯᠲᠦ᠂ ᠴᠤᠯᠮᠤᠨᠭᠡᠷᠡᠯ᠂ ᠴᠡᠩᠬᠡᠯᠴᠡᠴᠡᠭ᠂ ᠪᠠᠯ