ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠷᠢᠨ ᠳᠣᠯᠣᠭᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 27
56ᠣᠯᠵᠠᠲᠤ ᠡᠳᠦᠷ ᠦᠳ
ᠰᠣᠬᠣᠷ ᠳᠠᠭᠤᠴᠢ ᠦᠵᠡᠭᠴᠢᠳ ᠦ᠋ᠨ ᠡᠮᠦᠨᠡ ᠨᠢᠭᠡ ᠲᠠᠯᠠ ᠳ᠋ᠠᠭᠠᠨ ᠪᠢᠴᠢᠬᠠᠨ ᠰᠢᠷᠡᠭᠡ᠂ ᠲᠡᠭᠦᠨ ᠳᠡᠭᠡᠷᠡ ᠨᠢ ᠬᠠᠯᠠᠭᠤᠨ ᠴᠠᠢ ᠢᠮᠠᠭᠲᠠ ᠪᠡᠯᠡᠨ ᠪᠠᠢᠨᠠ᠃ ᠨᠥᠭᠦᠭᠡ ᠲᠠᠯᠠ ᠨᠢ ᠭᠤᠷᠪᠠᠨ ᠳᠠᠪᠬᠤᠷ ᠪᠦᠰᠡᠯᠡᠭᠦᠷᠲᠦ ᠴᠣᠣᠵᠢ ᠲᠠᠢ ᠠᠪᠳᠠᠷᠠ᠂ ᠴᠣᠬᠣᠮ ᠶᠠᠭᠤ ᠳᠠᠭᠤᠯᠠᠬᠤ ᠶ᠋ᠢ ᠨᠢ ᠰᠦᠮᠡ ᠶ᠋ᠢᠨ ᠵᠦᠭ ᠡᠴᠡ ᠰᠣᠨᠣᠰᠤᠭᠴᠢᠳ ᠲᠤ ᠤᠷᠢᠳᠴᠢᠯᠠᠨ ᠵᠠᠷᠯᠠᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠱᠤᠳᠤᠷᠭᠤ ᠶᠤᠭᠠᠨ ᠳ᠋ᠠᠩ ᠶᠢᠩ ᠪᠠᠭᠤᠯᠭᠠᠨ ᠭᠥᠭᠯᠡᠵᠦ ᠡᠬᠢᠯᠡᠬᠦ ᠳ᠋ᠦ᠍ᠨᠢ ᠳᠠᠩᠵᠢᠶᠠᠳ ᠨᠤᠭᠤᠳ ᠦᠭᠡ ᠦᠰᠦᠭ ᠢ᠋ᠶ᠋ᠡᠷ ᠠᠯᠳᠠᠬᠤ ᠡᠰᠡᠬᠦ ᠶ᠋ᠢ ᠨᠢ ᠬᠢᠨᠠᠨ ᠰᠢᠯᠭᠠᠬᠤ ᠭᠡᠵᠦ ᠬᠡᠪᠯᠡᠮᠡᠯ ᠳᠡᠪᠲᠡᠷ ᠢ᠋ ᠤᠷᠢᠲᠠᠢ ᠪᠠᠨ ᠲᠠᠯᠪᠢᠨ ᠳᠡᠯᠭᠡᠵᠦ ᠬᠢᠴᠢᠶᠡᠩᠭᠦᠢᠯᠡᠨ ᠰᠢᠷᠲᠡᠨᠡ᠃ ᠰᠣᠬᠣᠷ ᠤ᠋ᠨ ᠳᠠᠭᠤᠯᠠᠬᠤ ᠭᠠᠢᠬᠠᠯᠲᠠᠢ᠂ ᠰᠣᠨᠣᠰᠤᠭᠴᠢᠳ ᠤ᠋ᠨ ᠠᠩᠬᠠᠷᠤᠯ ᠢ᠋ ᠴᠠᠭ ᠢᠮᠠᠭᠲᠠ ᠥᠪᠡᠷ ᠲᠡᠭᠡᠨ ᠲᠡᠳᠡᠨ᠂ ᠤᠷᠢᠲᠠᠢ ᠪᠠᠨ ᠳᠡᠯᠭᠡᠭᠰᠡᠨ ᠨᠣᠮ ᠢ᠋ ᠦᠷᠭᠦᠯᠵᠢᠯᠡᠨ ᠱᠠᠭᠠᠢᠵᠤ ᠪᠠᠢᠯᠠ ᠴᠦ᠍ ᠭᠡᠰᠡᠨ ᠲᠡᠳᠡ ᠠᠢᠬᠤᠪᠲᠤᠷ ᠨᠣᠮ ᠡᠷᠳᠡᠮ ᠪᠣᠯᠪᠠᠰᠤᠷᠠᠭᠰᠠᠨ ᠤᠯᠤᠰ ᠪᠢᠰᠢ᠂ ᠤᠰᠤᠨ ᠪᠣᠯᠣᠷ ᠰᠢᠯ ᠢ᠋ ᠨᠢᠳᠦᠨ ᠳ᠋ᠡᠭᠡᠨ ᠬᠢᠨ ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠠᠯᠳᠠᠷᠲᠤ ᠨᠣᠮ ᠢ᠋ ᠪᠠᠷᠢᠨ ᠰᠠᠭᠤᠬᠤ ᠶᠣᠰᠣᠲᠠᠢ ᠬᠣᠭᠣᠰᠣᠨ ᠳᠦᠷᠢᠮ ᠪᠥᠭᠡᠳ ᠣᠢ ᠲᠣᠢ ᠳ᠋ᠠᠭᠠᠨ ᠠᠶᠠᠲᠠᠢᠬᠠᠨ ᠣᠢᠯᠠᠭᠠᠭᠳᠠᠬᠤ ᠬᠡᠰᠡᠭ ᠳᠡᠭᠡᠷᠡ ᠶᠦᠮ ᠤᠤ᠂ ᠡᠰᠡᠪᠡᠯ ᠬᠥᠭ ᠠᠶᠠ ᠬᠣᠶᠠᠷ ᠤ᠋ᠨ ᠨᠠᠷᠢᠰᠬᠤ ᠳᠡᠭᠡᠷᠡ《ᠬᠣᠣ ᠸᠠ!》 ᠭᠡᠵᠦ ᠬᠠᠰᠬᠢᠷᠤᠨ ᠪᠠᠶᠠᠷ ᠬᠦᠷᠭᠡᠨᠡ᠃ ᠵᠠᠷᠢᠮ ᠳ᠋ᠠᠭᠠᠨ ᠪᠢᠴᠢᠭ ᠦᠰᠦᠭ ᠲᠦ᠍ ᠣᠨᠴᠠ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠨᠢᠭᠡᠨ ᠦ᠌ ᠪᠡᠨ ᠵᠦᠭᠡᠷ ᠬᠥᠭᠵᠢᠶᠡᠨ ᠱᠤᠤᠭᠢᠶᠠᠨ ᠳᠡᠭᠳᠡᠭᠡᠬᠦ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠭᠡᠨᠡᠳᠲᠡ ᠬᠠᠰᠬᠢᠷᠬᠤ ᠳ᠋ᠤ᠌ ᠳᠡᠮᠡᠢ ᠳᠠᠭᠠᠯᠳᠤᠨ ᠳᠠᠭᠤ ᠱᠣᠣ ᠪᠣᠯᠬᠤ ᠴᠦ᠍ ᠶᠠᠪᠤᠳᠠᠯ ᠲᠣᠬᠢᠶᠠᠯᠳᠤᠨᠠ᠃ ᠭᠡᠲᠡᠯᠡ ᠡᠨᠡ《ᠬᠣᠣ ᠸᠠ》 ᠭᠡᠳᠡᠭ ᠬᠠᠰᠬᠢᠷᠤᠯᠲᠠ ᠶᠡᠷᠦ ᠪᠠᠭᠠ ᠬᠡᠷᠡᠭ ᠪᠢᠰᠢ᠂ ᠲᠡᠷᠡ ᠪᠦᠷᠢ ᠳᠡᠭᠡᠷᠡ ᠰᠣᠬᠣᠷ ᠤ᠋ᠨ ᠲᠣᠭᠣᠭᠠᠴᠢ ᠯᠤᠤ ᠬᠠᠨ ᠪᠢᠴᠢᠬᠠᠨ ᠫᠣᠣᠯᠤᠤ ᠪᠠᠷᠢᠨ ᠭᠠᠷᠴᠤ ᠢᠷᠡᠵᠦ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠡᠮᠦᠨᠡ ᠲᠤᠰᠬᠤ ᠪᠥᠭᠡᠳ᠂ ᠲᠡᠭᠦᠨ ᠤᠷᠤᠭᠤ ᠨᠢ ᠳᠠᠩᠵᠢᠶᠠᠳ ᠨᠤᠭᠤᠳ ᠮᠥᠨ ᠯᠡ ᠨᠡᠷᠡ ᠨᠢᠭᠤᠷ ᠢ᠋ᠶ᠋ᠠᠨ ᠪᠣᠳᠣᠨ ᠶᠠᠩᠴᠢᠶᠠᠨ ᠠ᠋ᠴᠠ ᠳᠣᠷᠣᠭᠰᠢ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠰᠢᠲᠠᠨ ᠬᠠᠶᠠᠨ ᠪᠠᠭᠤᠯᠭᠠᠨᠠ᠃ ᠲᠣᠭᠣᠭᠠᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ ᠰᠣᠬᠣᠷ ᠡᠪᠦᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠨ ᠲᠦᠯᠬᠢᠭᠦᠷ ᠭᠠᠷᠭᠠᠵᠤ ᠭᠤᠷᠪᠠᠨ ᠳᠠᠪᠬᠤᠷ ᠲᠡᠮᠦᠷ ᠪᠦᠰᠡᠯᠡᠭᠦᠷᠲᠦ ᠠᠪᠳᠠᠷᠠ ᠪᠠᠨ ᠨᠡᠭᠡᠭᠡᠨ᠂ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠨᠤᠭᠤᠳ ᠰᠢᠷ ᠨᠢᠷ ᠪᠠᠭᠤᠨ ᠠᠰᠬᠠᠷᠠᠮᠠᠭᠴᠠ ᠬᠠᠪᠬᠠᠯᠠᠨ ᠴᠣᠣᠵᠢᠯᠠᠵᠤ ᠠᠪᠤᠭᠠᠳ ᠳᠠᠭᠤᠯᠠᠬᠤ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃
ᠣᠳᠣ ᠠ᠋ᠴᠠ ᠲᠠᠪᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠣᠶᠣᠨᠳᠠᠷᠢ ᠠᠷᠪᠠᠨ ᠳᠥᠷᠪᠡᠲᠡᠢ ᠳ᠋ᠡᠭᠡᠨ ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠡᠷᠯᠢᠭ ᠬᠠᠭᠠᠨ ᠤ᠋ ᠰᠦᠮᠡ ᠶ᠋ᠢᠨ ᠡᠮᠦᠨᠡ ᠰᠣᠬᠣᠷ ᠤ᠋ᠨ ᠳᠠᠭᠤᠯᠠᠬᠤ ᠶ᠋ᠢ ᠠᠩᠬᠠ ᠦᠵᠡᠭᠡᠳ ᠲᠡᠭᠦᠨ ᠰᠢᠭ ᠳᠠᠭᠤᠯᠠᠨ ᠬᠥᠭᠵᠢᠮᠳᠡᠳᠡᠭ ᠪᠣᠯᠬᠤ ᠶ᠋ᠢ ᠬᠦᠰᠡᠭᠰᠡᠨ ᠪᠢᠯᠡ᠃ ᠬᠡᠦᠬᠡᠳ ᠪᠦᠷ ᠶᠠᠭᠤᠮᠠ ᠶ᠋ᠢ ᠬᠥᠩᠭᠡᠨ ᠬᠢᠯᠪᠠᠷ ᠢ᠋ᠶ᠋ᠠᠷ ᠪᠣᠳᠣᠳᠠᠭ ᠶᠣᠰᠣᠭᠠᠷ ᠱᠤᠳᠤᠷᠭᠤ ᠬᠥᠭᠵᠢᠮ ᠬᠤᠳᠠᠯᠳᠤᠨ ᠠᠪᠴᠤ ᠣᠷᠣᠯᠳᠣᠭᠠᠳ ᠰᠠᠨᠠᠭᠠ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠡᠳ᠋ᠯᠡᠬᠦ ᠳ᠋ᠦ᠍ᠨᠢ ᠡᠴᠢᠭᠡ ᠨᠢ ᠰᠣᠬᠣᠷ ᠳᠠᠭᠤᠴᠢᠨ ᠳ᠋ᠤ᠌ ᠱᠠᠪᠢ ᠣᠷᠣᠭᠤᠯᠤᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠣᠶᠣᠨᠳᠠᠷᠢ ᠳ᠋ᠤ᠌ ᠰᠤᠷᠭᠠᠭᠰᠠᠨ ᠨᠢ ᠶᠡᠷᠦ ᠪᠠᠭᠠ ᠪᠢᠰᠢ᠂ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠳᠠᠯᠢ ᠬᠡᠳᠦᠨ ᠠᠷᠪᠠᠨ ᠲᠣᠮᠣ ᠳᠡᠪᠲᠡᠷ ᠢ᠋ ᠠᠶᠠᠯᠤᠨ ᠳᠠᠭᠤᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠᠴᠤ᠂ ᠬᠡᠳᠦᠨ ᠠᠷᠪᠠᠨ ᠳᠠᠭᠤᠤ ᠰᠢᠯᠦᠭ᠂ ᠦᠯᠢᠭᠡᠷ ᠨᠠᠢᠷᠠᠭᠯᠠᠯ ᠢ᠋ ᠳᠠᠭᠤᠯᠠᠵᠤ ᠴᠢᠳᠠᠨᠠ᠃ ᠦᠰᠦᠭ ᠨᠣᠮ ᠢ᠋ ᠨᠢ ᠵᠠᠮᠢᠶᠠᠨ ᠬᠦᠩ ᠢ᠋ᠶ᠋ᠡᠷ ᠵᠢᠭᠠᠯᠭᠠᠨ ᠨᠠᠷᠢᠨ ᠨᠢᠮᠪᠠᠢ ᠰᠤᠳᠤᠯᠤᠭᠰᠠᠨ ᠤᠴᠢᠷ ᠬᠢᠲᠠᠳ ᠬᠡᠯᠡᠨ ᠳ᠋ᠦ᠍ ᠴᠦ᠍ ᠰᠠᠢᠨ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠰᠣᠬᠣᠷ ᠳᠠᠭᠤᠴᠢ ᠬᠡᠳᠦᠢᠪᠡᠷ ᠡᠳᠦᠷ ᠰᠥᠨᠢ ᠬᠣᠶᠠᠷ ᠢ᠋ ᠢᠯᠭᠠᠬᠤ ᠦᠭᠡᠢ ᠬᠥᠮᠦᠨ ᠪᠣᠯᠪᠠᠴᠤ ᠣᠶᠣᠨᠳᠠᠷᠢ ᠶ᠋ᠢᠨ ᠬᠣᠭᠣᠯᠠᠢ ᠶ᠋ᠢᠨ ᠰᠠᠢᠬᠠᠨ᠂ ᠭᠠᠷ ᠬᠤᠷᠤᠭᠤ ᠨᠢ ᠬᠥᠩᠭᠡᠨ ᠭᠠᠪᠰᠢᠭᠠᠢ᠂ ᠲᠣᠭᠲᠠᠭᠠᠨ ᠴᠡᠭᠡᠵᠢᠯᠡᠬᠦ ᠶ᠋ᠢᠨ ᠬᠢᠨᠢ ᠬᠣᠣᠰ ᠦᠭᠡᠢ᠂ ᠡᠳᠡ ᠪᠦᠬᠦᠨ ᠡᠴᠡ ᠨᠢ ᠵᠢᠷ ᠦ᠋ᠨ ᠥᠬᠢᠨ ᠪᠢᠰᠢ ᠭᠡᠵᠦ ᠦᠨᠡᠯᠡᠨ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠬᠠᠢᠷᠠᠯᠠᠨᠠ᠃
ᠴᠠᠭᠠᠨ ᠰᠠᠷᠠ ᠪᠣᠯᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠰᠣᠬᠣᠷ ᠳᠠᠭᠤᠴᠢ ᠬᠠᠪᠤᠷ ᠤ᠋ᠨ ᠳᠠᠭᠤᠯᠠᠯᠲᠠ ᠪᠠᠷ ᠢ᠋ᠶ᠋ᠠᠨ ᠡᠮᠦᠰᠳᠡᠭ ᠬᠠᠷᠠ ᠲᠣᠷᠭᠠᠨ ᠲᠣᠭᠣᠷᠴᠣᠭ᠂ ᠣᠭᠳᠦᠷᠬᠠᠨ ᠬᠠᠷᠠ ᠬᠦᠷᠮᠡ᠂ ᠵᠤᠵᠠᠭᠠᠨ ᠬᠥᠪᠥᠩ ᠲᠡᠢ ᠪᠠᠭᠠᠷᠭᠠᠷ ᠥᠮᠥᠳᠥ᠂ ᠢᠰᠡᠭᠡᠢ ᠱᠠᠬᠠᠢ ᠡᠮᠦᠰᠴᠡᠢ᠃ ᠠᠯᠢ ᠥᠷᠯᠥᠭᠡ ᠡᠴᠡ ᠠᠪᠤᠨ ᠣᠶᠣᠨᠳᠠᠷᠢ ᠶ᠋ᠢ ᠬᠦᠯᠢᠶᠡᠨ ᠰᠠᠭᠤᠨᠠ᠃ ᠥᠭᠡᠷᠡ ᠬᠥᠮᠦᠨ ᠳ᠋ᠦ᠍ ᠲᠡᠳᠡᠨ ᠦ᠌ ᠳ᠋ᠦ᠍ ᠴᠠᠭᠠᠨ ᠰᠠᠷᠠ ᠪᠣᠯᠪᠠ ᠭᠡᠵᠦ ᠣᠴᠢᠳᠠᠭ ᠦᠭᠡᠢ ᠪᠠᠢᠯᠠ᠃
ᠪᠠᠭᠠ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍᠂ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠨ ᠬᠥᠮᠦᠰ ᠢᠷᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠰᠣᠬᠣᠷ《ᠬᠦ ᠬᠦ ᠰᠢ᠂》 ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠡᠭᠦᠳᠡ ᠤᠷᠤᠭᠤ ᠪᠠᠨ ᠴᠢᠬᠢ ᠲᠠᠯᠪᠢᠨ ᠰᠣᠬᠣᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠴᠠᠪᠴᠢᠯ ᠦᠭᠡᠢ ᠰᠢᠷᠲᠡᠪᠡ᠃ ᠡᠨᠡ ᠦᠨᠡᠬᠡᠷ ᠣᠶᠣᠨᠳᠠᠷᠢ ᠪᠠᠢᠯᠠ᠃ ᠪᠣᠱᠣᠭᠠ ᠶ᠋ᠢ ᠨᠢ ᠳᠥᠩᠭᠡᠵᠦ ᠳᠠᠪᠠᠩᠭᠤᠲᠠ ᠪᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠯᠢᠭᠡᠨ ᠳ᠋ᠡᠭᠡᠨ ᠲᠡᠪᠡᠷᠢᠨ ᠮᠥᠷᠭᠥᠬᠦ ᠳ᠋ᠦ᠍ ᠰᠣᠬᠣᠷ ᠡᠭᠡᠭᠡ ᠯᠡ ᠨᠢᠳᠦ ᠲᠡᠢ ᠬᠥᠮᠦᠨ ᠰᠢᠭ ᠬᠠᠷᠢᠭᠤ ᠲᠣᠯᠣᠭᠠᠢ ᠲᠣᠬᠢᠨᠠ᠃ ᠣᠷᠣᠭᠰᠢ ᠬᠣᠶᠠᠷ ᠠᠯᠬᠤᠭᠠᠳ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠥᠬᠥᠷᠡᠨ᠄
— ᠭᠦᠸᠡᠨᠢᠶᠠᠨ ᠬᠣᠣ! ᠭᠡᠵᠦ ᠮᠥᠷᠭᠥᠬᠦ ᠳ᠋ᠦ᠍᠂
— ᠠᠢ ᠬᠣᠣ! ᠭᠦᠸᠡᠨᠢᠶᠠᠨ ᠬᠣᠣ! ᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠤᠷᠢᠳᠤᠬᠢ ᠰᠢᠷᠡᠭᠡᠨ ᠦ᠌ ᠨᠥᠭᠦᠭᠡ ᠲᠠᠯᠠ ᠤᠷᠤᠭᠤ ᠵᠢᠭᠠᠨ ᠰᠠᠭᠤᠯᠭᠠᠪᠠ᠃ ᠲᠣᠭᠣᠭᠠᠴᠢ᠂ ᠠᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ᠂ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠨᠠᠷᠢᠨ ᠬᠣᠭᠣᠯᠠ ᠬᠢᠨ ᠵᠣᠴᠢᠯᠠᠨᠠ᠃
ᠰᠣᠬᠣᠷ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠡᠭᠰᠡᠨ ᠳ᠋ᠦ᠍ ᠲᠡᠰᠬᠡᠯ ᠦᠭᠡᠢ ᠪᠠᠶᠠᠷᠯᠠᠨ ᠴᠠᠭ ᠢᠮᠠᠭᠲᠠ ᠢᠨᠢᠶᠡᠮᠰᠦᠭᠯᠡᠬᠦ ᠪᠣᠯᠪᠠᠴᠤ ᠣᠨᠴᠠ ᠶ᠋ᠢᠨ ᠶᠠᠷᠢᠶᠠᠨ ᠦᠭᠡᠢ᠂ ᠬᠣᠭᠣᠯᠠ ᠤᠮᠳᠠ ᠪᠠᠷ ᠢ᠋ᠶ᠋ᠠᠨ ᠯᠠ ᠵᠣᠴᠢᠯᠠᠬᠤ ᠶ᠋ᠢ ᠡᠷᠬᠢᠮᠯᠡᠨᠡ᠃ ᠲᠡᠭᠡᠭᠡᠳ ᠡᠴᠦᠰ ᠲᠦ᠋ᠨᠢ ᠭᠤᠷᠪᠠᠨ ᠳᠠᠪᠬᠤᠷ ᠲᠡᠮᠦᠷ ᠪᠦᠰᠡᠯᠡᠭᠦᠷᠲᠦ ᠠᠪᠳᠠᠷᠠ ᠪᠠᠨ ᠨᠡᠭᠡᠭᠡᠨ ᠠᠷᠪᠠᠨ ᠶᠠᠩᠴᠢᠶᠠᠨ ᠪᠡᠯᠡᠭᠯᠡᠯᠡ᠃
ᠣᠶᠣᠨᠳᠠᠷᠢ ᠲᠦᠷᠦᠭᠦᠨ ᠠᠪᠤ᠂ ᠡᠵᠢ᠂ ᠲᠣᠭᠣᠭᠠᠴᠢ ᠨᠠᠷ ᠠ᠋ᠴᠠ ᠪᠠᠨ ᠣᠯᠤᠭᠰᠠᠨ ᠮᠥᠩᠭᠥ ᠪᠡᠨ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠥᠭᠴᠢᠭᠰᠡᠨ ᠪᠢᠯᠡ᠃ ᠣᠳᠣ ᠬᠣᠶᠠᠷ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠠᠯᠬᠠᠨ ᠳᠠᠬᠢᠨ ᠮᠥᠩᠭᠥ ᠲᠡᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠬᠤ ᠪᠥᠭᠡᠳ ᠪᠠᠯᠳᠠᠨᠴᠡᠷᠢᠩ ᠲᠡᠢ ᠰᠠᠭᠤᠬᠤ ᠳ᠋ᠠᠭᠠᠨ ᠬᠤᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠥᠩᠭᠥ ᠲᠡᠢ ᠪᠠᠢᠬᠤ᠂ ᠲᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠠᠢᠬᠠᠨ ᠳᠡᠪᠡᠯ᠂ ᠮᠠᠯᠠᠭᠠᠢ᠂ ᠭᠤᠲᠤᠯ ᠠᠪᠴᠤ ᠥᠭᠭᠦᠨᠡ ᠭᠡᠵᠦ ᠪᠣᠳᠣᠬᠤ ᠲᠤᠯᠠ ᠬᠠᠩᠬᠤ ᠶ᠋ᠢᠨ ᠴᠦ᠍ ᠡᠴᠦᠰ ᠠᠯᠠᠭᠠ᠃ ᠴᠠᠭᠠᠰᠢ ᠣᠯᠬᠤ ᠶ᠋ᠢ ᠬᠦᠰᠡᠬᠦ ᠳ᠋ᠡᠭᠡᠨ ᠣᠶᠣᠨᠳᠠᠷᠢ ᠮᠣᠷᠢ ᠲᠡᠷᠭᠡ ᠪᠡᠨ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠭᠦᠳᠡᠨ ᠳᠡᠭᠡᠷᠡ ᠡᠴᠡ ᠪᠤᠴᠠᠭᠠᠭᠠᠳ ᠭᠠᠭᠴᠠᠭᠠᠷ ᠬᠡᠰᠦᠵᠦ ᠭᠠᠷᠤᠯᠠ᠃ ᠮᠠᠷᠭᠠᠰᠢ ᠨᠢ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠥᠷᠯᠥᠭᠡ ᠡᠴᠡ ᠠᠪᠤᠭᠠᠳ ᠦᠳᠡᠰᠢ ᠪᠣᠯᠲᠠᠯᠠ ᠬᠡᠰᠦᠪᠡ᠃ ᠲᠡᠭᠦᠨ ᠳ᠋ᠡᠭᠡᠨ ᠤᠷᠤᠭ ᠲᠥᠷᠥᠯ ᠦ᠋ᠳ ᠲᠦᠩᠰᠢ ᠫᠦᠰᠡ ᠶ᠋ᠢᠨ ᠬᠢᠨ᠂ ᠡᠩ ᠦ᠋ᠨ ᠲᠠᠨᠢᠬᠤ ᠠᠢᠯ ᠤ᠋ᠳ ᠢ᠋ᠶ᠋ᠠᠷ ᠴᠦ᠍ ᠣᠷᠣᠵᠠᠢ᠃ ᠬᠥᠮᠦᠰ ᠣᠶᠣᠨᠳᠠᠷᠢ ᠶ᠋ᠢ ᠤᠷᠢᠳ ᠤᠷᠢᠳ ᠤ᠋ᠨ ᠴᠠᠭᠠᠨ ᠰᠠᠷᠠ ᠪᠠᠷ ᠢᠷᠡᠳᠡᠭ ᠦᠭᠡᠢ ᠪᠠᠢᠭᠰᠠᠨ ᠢ᠋ ᠨᠢ ᠰᠠᠨᠠᠨ ᠳᠤᠷᠠᠰᠬᠤ᠂ ᠡᠳᠦᠢ ᠪᠠᠶᠠᠨ ᠠᠢᠯ ᠤ᠋ᠨ ᠡᠷᠬᠡ ᠲᠠᠩᠬᠢ ᠪᠣᠯᠤᠭᠠᠳ ᠡᠷᠳᠡᠮ ᠨᠣᠮ ᠲᠠᠢ ᠥᠬᠢᠨ ᠭᠡᠵᠦ ᠶᠡᠬᠡᠳᠡ ᠬᠦᠨᠳᠦᠳᠬᠡᠬᠦ ᠠᠵᠢ᠃ ᠳᠣᠣᠷᠠᠲᠤ ᠲᠠᠯᠠ ᠶ᠋ᠢᠨ ᠶᠠᠳᠠᠭᠤ ᠠᠢᠯ ᠲᠠᠪᠢᠨ ᠮᠥᠩᠭᠥ᠂ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠢ ᠨᠢᠭᠡ ᠶᠠᠩᠴᠢᠶᠠᠨ᠂ ᠬᠣᠶᠠᠷ ᠶᠠᠩᠴᠢᠶᠠᠨ᠂ ᠭᠣᠣᠯ ᠲᠥᠯᠥᠪ ᠨᠢ ᠭᠤᠷᠪᠠ᠂ ᠪᠦᠷ ᠳᠡᠭᠡᠳᠦ ᠲᠠᠯᠠ ᠶ᠋ᠢᠨ ᠠᠢᠯ ᠲᠠᠪᠤ ᠶ᠋ᠢ ᠪᠡᠯᠡᠭᠯᠡᠵᠦ ᠪᠠᠢᠯᠠ᠃
ᠰᠥᠨᠢ ᠣᠶᠣᠨᠳᠠᠷᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠭᠠᠯᠭᠠ ᠶ᠋ᠢ ᠲᠦᠭᠵᠢᠵᠦ ᠠᠪᠤᠭᠠᠳ ᠬᠣᠷᠮᠣᠢ ᠳᠡᠪᠢᠰᠦᠨ ᠰᠥᠬᠥᠷᠡᠨ ᠪᠦᠬᠦ ᠣᠯᠤᠭᠰᠠᠨ ᠢ᠋ᠶ᠋ᠠᠨ ᠲᠣᠭᠠᠯᠠᠵᠤ ᠦᠵᠡᠯᠡ᠂ ᠪᠦᠭᠦᠳᠡ ᠵᠠᠭᠤᠨ ᠵᠢᠷᠠᠨ ᠶᠠᠩᠴᠢᠶᠠᠨ ᠲᠠᠪᠢᠨ ᠮᠥᠩᠭᠥ ᠪᠣᠯᠤᠭᠰᠠᠨ ᠳ᠋ᠤ᠌ ᠬᠥᠮᠥᠰᠬᠡ ᠨᠢ ᠳᠡᠭᠡᠭᠰᠢ ᠪᠣᠯᠤᠨ ᠪᠠᠶᠠᠷᠯᠠᠨ ᠰᠢᠷᠲᠡᠨᠡ᠃ ᠭᠡᠪᠡᠴᠦ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠠᠰᠠ ᠯᠠ ᠮᠥᠩᠭᠥ᠂《ᠣᠳᠣ ᠡᠨᠡ ᠮᠥᠩᠭᠥ ᠪᠡᠨ ᠬᠡᠷᠬᠢᠨ ᠬᠣᠶᠠᠷ ᠵᠠᠭᠤ ᠪᠣᠯᠭᠠᠬᠤ ᠪᠢᠯᠡ?》 ᠭᠡᠬᠦ ᠳ᠋ᠦ᠍ ᠣᠷᠣᠭᠠ ᠦᠭᠡᠢ ᠪᠣᠯᠳ ᠣᠷᠣᠭᠤᠰᠢᠲᠠᠢ ᠠᠢᠯ ᠤ᠋ᠳ ᠢ᠋ ᠪᠦᠷᠢᠳᠬᠡᠨ ᠪᠣᠳᠣᠬᠤ ᠬᠡᠷᠡᠭᠲᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠦᠨᠡᠬᠡᠷ ᠨᠣᠢᠷ ᠨᠢ ᠪᠦᠷ ᠬᠤᠯᠵᠢᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ