ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠷᠢᠨ ᠵᠢᠷᠭᠤᠭᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 26
54ᠪᠦᠲᠦᠬᠦ ᠡᠰᠡᠬᠦ ᠶᠢᠨ ᠰᠢᠨᠵᠢ ᠲᠡᠮᠲᠡᠭ
ᠰᠡᠳᠬᠢᠯ ᠳ᠋ᠦ᠍ᠨᠢ ᠬᠦᠰᠡᠭᠰᠡᠨ ᠬᠡᠷᠡᠭ ᠰᠡᠳᠬᠢᠯᠴᠢᠯᠡᠨ ᠪᠦᠲᠦᠬᠦ ᠨᠢ ᠯᠠᠪᠲᠠᠢ ᠰᠠᠨᠠᠭᠳᠠᠨ ᠭᠢᠰᠬᠢᠬᠦ ᠳᠣᠳᠣᠮ ᠬᠥᠯ ᠨᠢ ᠬᠥᠩᠭᠡᠷᠡᠬᠦ ᠠᠵᠢ᠃ ᠪᠣᠭᠳᠠ ᠶ᠋ᠢᠨ ᠡᠪᠦᠯ ᠦ᠋ᠨ ᠪᠠᠢᠷᠢ᠂ ᠳᠤᠮᠳᠠ ᠣᠷᠳᠣᠨᠠ ᠬᠦᠷᠦᠭᠡᠳ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠢᠨᠢ ᠣᠷᠣᠰ ᠮᠠᠶᠢᠭ ᠢ᠋ᠶ᠋ᠠᠷ ᠪᠠᠷᠢᠭᠳᠠᠭᠰᠠᠨ ᠬᠣᠶᠠᠷ ᠳᠠᠪᠬᠤᠷ ᠬᠥᠨᠳᠡᠯᠡᠨ ᠴᠠᠭᠠᠨ ᠪᠠᠢᠰᠢᠩ ᠤ᠋ᠨ ᠵᠡᠭᠦᠨ ᠲᠠᠢᠰᠢ ᠬᠠᠷᠠᠭᠰᠠᠨ ᠬᠠᠭᠠᠯᠭᠠ ᠶ᠋ᠢᠨ ᠡᠮᠦᠨᠡ ᠢᠷᠡᠬᠦ ᠳ᠋ᠦ᠍ ᠥᠪᠡᠷ ᠡᠴᠡ ᠨᠢ ᠤᠷᠢᠳ ᠪᠣᠭᠳᠠ ᠳ᠋ᠤ᠌ ᠪᠠᠷᠠᠯᠬᠠᠭᠰᠠᠨ ᠶᠡᠬᠡᠰ ᠦ᠋ᠳ ᠦ᠋ᠨ ᠵᠢᠶᠤᠤᠵᠠ ᠲᠡᠷᠭᠡ᠂ ᠰᠡᠦᠬᠡ ᠲᠡᠷᠭᠡ᠂ ᠰᠢᠷᠠ ᠪᠠ ᠬᠥᠬᠡ ᠲᠣᠷᠭᠠᠨ ᠵᠢᠯᠣᠭᠣ ᠲᠠᠢ ᠲᠠᠷᠭᠤᠨ ᠮᠣᠷᠢᠳ ᠳᠦᠭᠦᠷᠡᠩ ᠪᠠᠭᠰᠢᠷᠠᠭᠠᠲᠠᠢ ᠪᠠᠢᠯᠠ᠃
ᠡᠳᠡᠭᠡᠷ ᠬᠦᠯᠦᠭ ᠮᠣᠷᠢᠳ ᠤ᠋ᠨ ᠡᠵᠡᠳ ᠦ᠋ᠨ ᠳᠤᠮᠳᠠ ᠪᠠᠯᠳᠠᠨᠴᠡᠷᠢᠩ ᠰᠢᠭ ᠵᠢᠷ ᠦ᠋ᠨ ᠨᠢᠭᠡᠨ ᠰᠤᠯᠠ ᠬᠦᠩ ᠦ᠋ᠨ ᠲᠡᠳᠦᠢ ᠬᠥᠮᠦᠨ ᠦᠭᠡᠢ᠂ ᠬᠠᠷᠢᠨ ᠬᠠᠭᠠᠨ ᠸᠠᠩ᠂ ᠬᠤᠲᠤᠭᠲᠤ᠂ ᠵᠢᠨᠦᠩ ᠲᠠᠪᠤᠨᠠᠩ᠂ ᠬᠠᠮᠤᠭ ᠤ᠋ᠨ ᠳᠣᠣᠷᠠᠲᠤ ᠵᠡᠷᠭᠡ ᠶ᠋ᠢᠨ ᠬᠢᠨᠢ ᠪᠡᠢᠯᠡ ᠪᠠᠢᠰᠠ ᠶ᠋ᠢᠨ ᠬᠡᠷᠬᠡᠮ ᠢ᠋ ᠡᠴᠢᠭᠡ ᠡᠪᠦᠭᠡᠳ ᠡᠴᠡ ᠵᠠᠯᠭᠠᠮᠵᠢᠯᠠᠭᠰᠠᠨ ᠬᠣᠰᠢᠭᠤ ᠨᠣᠶᠠᠳ ᠪᠠᠢᠯᠠ᠃
ᠪᠠᠯᠳᠠᠨᠴᠡᠷᠢᠩ ᠲᠡᠳᠡᠭᠡᠷ ᠢ᠋ ᠳᠠᠩᠴᠤ ᠶᠡᠬᠡ ᠤᠳᠠᠬᠤ ᠦᠭᠡᠢ ᠪᠣᠯᠪᠠ ᠤᠤ ᠭᠡᠬᠦ ᠳ᠋ᠡᠭᠡᠨ ᠬᠦᠯᠦᠭ ᠮᠣᠷᠢᠳ ᠢ᠋ ᠰᠠᠬᠢᠭᠰᠠᠨ ᠬᠢᠶᠡ ᠳᠠᠭᠠᠯᠲᠠ ᠨᠤᠭᠤᠳ ᠤ᠋ᠨ ᠳᠤᠮᠳᠠ ᠣᠷᠣᠨ ᠵᠣᠭᠰᠣᠪᠠ᠃ ᠡᠳᠦᠷ ᠦ᠋ᠨ ᠪᠠᠢᠳᠠᠯ ᠣᠨᠴᠠᠭᠠᠢ ᠪᠠᠢᠭᠠ ᠪᠣᠯᠪᠠᠴᠤ ᠤᠳᠠᠭᠠᠨ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠭᠵᠢᠨ ᠲᠠᠭᠠᠷᠠᠯᠠ᠃ ᠢᠯᠠᠩᠭᠤᠶᠠ ᠴᠢᠬᠢ᠂ ᠤᠲᠤᠭᠠ ᠵᠢᠩᠰᠡ ᠲᠡᠢ ᠮᠠᠯᠠᠭᠠᠢ ᠶ᠋ᠢᠨ ᠴᠢᠬᠢ ᠶ᠋ᠢ ᠪᠤᠯᠠᠭᠠᠨ ᠴᠢᠬᠢ ᠲᠠᠭᠠᠷᠠᠭᠤᠯᠬᠤ ᠭᠡᠪᠡᠯ ᠶᠣᠰᠣ ᠵᠢᠷᠤᠮ ᠳ᠋ᠤ᠌ ᠦᠯᠦ ᠨᠡᠢᠴᠡᠬᠦ ᠤᠴᠢᠷ ᠬᠥᠯᠳᠡᠵᠦ ᠮᠠᠭᠠᠳ ᠦᠭᠡᠢ ᠪᠣᠯᠵᠠᠢ᠃ ᠭᠡᠲᠡᠯᠡ ᠪᠠᠰᠠ ᠣᠯᠠᠨ ᠤ᠋ ᠡᠮᠦᠨᠡ ᠣᠯᠠᠨ ᠤ᠋ ᠡᠮᠦᠨᠡ ᠴᠢᠬᠢ ᠪᠡᠨ ᠪᠠᠷᠢᠨ ᠨᠠᠭᠠᠰᠢ ᠴᠠᠭᠠᠰᠢ ᠬᠣᠯᠬᠢᠬᠤ ᠳ᠋ᠤ᠌ ᠶᠡᠷᠦ ᠵᠣᠬᠢᠮᠵᠢ ᠦᠭᠡᠢ ᠠᠵᠢ᠃ ᠡᠳᠦᠷ ᠳᠤᠮᠳᠠ ᠥᠩᠭᠡᠷᠡᠯᠡ᠃ ᠣᠷᠳᠣᠨ ᠠ᠋ᠴᠠ ᠭᠠᠷᠤᠭᠰᠠᠨ ᠨᠢ ᠬᠣᠶᠠᠷᠬᠠᠨ᠂ ᠤᠷᠢᠳ ᠡᠮᠦᠨᠡ ᠵᠢᠰᠦ ᠦᠵᠡᠭᠡ ᠦᠭᠡᠢ ᠬᠣᠶᠠᠷ ᠨᠣᠶᠠᠨ ᠤᠬᠠᠭᠠᠨ ᠦᠭᠡᠢ ᠰᠣᠭᠲᠣᠭᠤ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ ᠬᠢᠶᠡ ᠨᠠᠷ ᠨᠢ ᠤᠭᠲᠤᠨ ᠠᠪᠴᠤ ᠮᠣᠷᠢᠨ ᠳ᠋ᠤᠨᠢ ᠮᠣᠷᠳᠠᠭᠤᠯᠵᠤ ᠳᠥᠰᠢᠨ ᠣᠳᠤᠭᠰᠠᠨ ᠪᠥᠭᠡᠳ ᠨᠡᠮᠡᠨ ᠢᠷᠡᠭᠰᠡᠨ ᠨᠢ ᠲᠠᠪᠤ ᠵᠢᠷᠭᠤᠭᠠ ᠪᠣᠯᠵᠠᠢ᠃
ᠪᠠᠯᠳᠠᠨᠴᠡᠷᠢᠩ ᠥᠨᠥᠳᠥᠷ ᠲᠡᠭᠡᠨ ᠪᠣᠭᠳᠠ ᠳ᠋ᠤ᠌ ᠪᠠᠷᠠᠯᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠡᠨ ᠮᠡᠳᠡᠯᠡ᠃ ᠳᠠᠷᠠᠭᠠ ᠨᠢ ᠪᠠᠰᠠ ᠯᠠ ᠡᠨᠡ ᠮᠡᠲᠦ ᠪᠡᠷ ᠳᠡᠮᠡᠢ ᠶᠠᠪᠤᠳᠠᠯ ᠪᠣᠯᠬᠤ ᠪᠣᠯᠪᠠ ᠤᠤ ᠭᠡᠬᠦ ᠳ᠋ᠡᠭᠡᠨ ᠰᠢᠳᠠᠷ ᠬᠥᠮᠦᠰ ᠦ᠋ᠨ ᠬᠢᠨᠢ ᠨᠢᠭᠡ ᠲᠡᠢ ᠠᠭᠤᠯᠵᠠᠨ ᠡᠳᠦᠷ ᠲᠣᠭᠲᠠᠭᠠᠵᠤ ᠠᠪᠤᠶᠠ ᠭᠡᠵᠦ ᠪᠣᠳᠣᠪᠠ᠃ ᠡᠨᠡ ᠶᠠᠪᠤᠳᠠᠯ ᠠᠷᠭᠠ ᠪᠤᠶᠤ ᠠᠮᠢ ᠭᠣᠣᠯ ᠤ᠋ᠨ ᠴᠢᠬᠤᠯᠠ ᠬᠡᠷᠡᠭ ᠪᠣᠯᠬᠤ ᠲᠤᠯᠠ ᠣᠷᠳᠣᠨ ᠤ᠋ ᠬᠠᠭᠠᠯᠭᠠ ᠶ᠋ᠢ ᠠᠶᠤᠮᠰᠢᠭ ᠦᠭᠡᠢ ᠲᠠᠲᠠᠵᠠᠢ᠃ ᠥᠭᠡᠳᠡ ᠡᠴᠡ ᠨᠢ ᠲᠥᠪᠡᠳ ᠣᠷᠣᠨ ᠠ᠋ᠴᠠ ᠢᠷᠡᠳᠡᠭ ᠰᠠᠢᠬᠠᠨ ᠦᠨᠦᠷᠲᠦ ᠬᠦᠷᠡᠩ ᠬᠦᠵᠢ᠂ ᠭᠦᠭᠡᠯ ᠦ᠋ᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠬᠠᠯᠠᠭᠤᠨ ᠠᠭᠠᠷ ᠤᠭᠲᠤᠨ ᠰᠠᠨᠠᠨ ᠰᠡᠳᠬᠢᠬᠦᠢ ᠶ᠋ᠢ ᠰᠢᠲᠦᠨ ᠪᠢᠰᠢᠷᠡᠬᠦ ᠲᠠᠢᠰᠢ ᠲᠠᠲᠠᠨᠠ᠃ ᠳᠤᠭᠤᠢ ᠪᠤᠯᠠᠭᠠᠨ ᠮᠠᠯᠠᠭᠠᠢ ᠶ᠋ᠢ ᠮᠠᠩᠨᠠᠢ ᠳᠠᠷᠤᠨ ᠡᠮᠦᠰᠦᠭᠰᠡᠨ ᠵᠠᠯᠠᠭᠤᠬᠠᠨ ᠯᠠᠮᠠ ᠬᠠᠭᠠᠯᠭᠠᠴᠢ ᠳᠠᠪᠬᠤᠷ ᠬᠠᠭᠠᠯᠭᠠᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠭᠡᠨᠡᠳᠲᠡ ᠭᠠᠷᠴᠤ ᠢᠷᠡᠨ ᠠᠮᠤᠷ ᠡᠷᠢᠨ ᠭᠦᠨᠡ ᠮᠡᠬᠦᠢᠪᠡ᠃ ᠡᠨᠡ ᠨᠢ ᠡᠶᠡᠯᠳᠡᠭ ᠰᠠᠢᠨ ᠳ᠋ᠠᠭᠠᠨ ᠪᠢᠰᠢ᠂ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠤᠲᠤᠭᠠ ᠵᠢᠩᠰᠡᠲᠦ ᠮᠠᠯᠠᠭᠠᠢ᠂ ᠬᠠᠷᠠ ᠬᠦᠷᠮᠡ ᠶ᠋ᠢ ᠬᠠᠷᠠᠭᠠᠳ ᠨᠣᠶᠠᠨ ᠬᠥᠮᠦᠨ ᠭᠡᠵᠦ ᠦᠵᠡᠭᠰᠡᠨ ᠦ᠌ ᠬᠢ ᠪᠠᠢᠯᠠ᠃ ᠲᠡᠭᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠮᠡᠳᠡᠨ ᠢᠨᠢᠶᠡᠳᠦ ᠬᠦᠷᠬᠦ ᠰᠢᠭ ᠪᠣᠯᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠨᠢᠭᠡᠨᠲᠡ ᠡᠨᠳᠡᠭᠦᠷᠡᠭᠰᠡᠨ ᠢ᠋ ᠨᠢ ᠳᠠᠯᠢᠮᠳᠠᠭᠤᠯᠤᠨ ᠠᠰᠢᠭᠯᠠᠬᠤ ᠰᠠᠨᠠᠭᠠ ᠲᠥᠷᠥᠪᠡ᠃ ᠦᠯᠦ ᠲᠣᠭᠣᠮᠰᠠᠷᠯᠠᠬᠤ ᠪᠠᠢᠳᠠᠯ ᠭᠠᠷᠭᠠᠨ ᠬᠠᠷᠢᠭᠤ ᠮᠡᠨᠳᠦᠯᠡᠬᠦ ᠲᠡᠳᠦᠢᠬᠡᠨ ᠪᠣᠯᠵᠤ᠄
— ᠰᠣᠢᠪᠣᠨ ᠯᠠᠮᠠ ᠬᠠᠮᠢᠭᠠ ᠪᠠᠢᠨᠠ? ᠨᠠᠳᠠ ᠳ᠋ᠤ᠌ ᠠᠭᠤᠯᠵᠠᠬᠤ ᠶᠠᠭᠠᠷᠠᠯᠲᠠᠢ ᠬᠡᠷᠡᠭ ᠪᠠᠢᠨᠠ ᠭᠡᠳ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠬᠣᠭᠣᠯᠠᠢ ᠵᠠᠰᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠵᠡᠭᠦᠨ ᠲᠡᠢᠰᠢ ᠰᠡᠯᠭᠦᠯᠡᠨ ᠢᠯᠢᠪᠡ᠃
— ᠵᠠ᠂ ᠵᠠᠪ ᠲᠠᠢ ᠪᠠᠢᠬᠠ᠂ ᠲᠤᠩ ᠰᠠᠶᠢᠬᠠᠨ ᠳᠡᠭᠡᠷᠡ ᠡᠴᠡ ᠪᠠᠭᠤᠨ ᠥᠷᠥᠭᠡᠨ ᠳ᠋ᠡᠭᠡᠨ ᠵᠠᠯᠠᠷᠠᠨᠠ ᠪᠢᠯᠡ᠃
— ᠤᠤᠬᠠᠢ᠂ ᠢᠩᠭᠢᠬᠦ ᠳ᠋ᠦ᠍ ᠴᠢ ᠰᠣᠢᠪᠣᠳ ᠤ᠋ᠨ ᠴᠣᠬᠣᠮ ᠬᠡᠨ ᠢ᠋ ᠨᠢ ᠬᠡᠯᠡᠭᠡᠳ ᠪᠠᠢᠨᠠ?
— ᠵᠠ᠂ ᠪᠢ ᠳᠠᠰᠢᠳᠣᠣ ᠰᠣᠢᠪᠣᠨᠲᠠᠨ ᠢ᠋ ᠠᠢᠯᠠᠳᠬᠠᠵᠤ ᠪᠠᠢᠨᠠ᠃
— ᠲᠡᠭᠡᠪᠡᠯ ᠪᠦᠷ ᠰᠠᠢᠨ᠃ ᠥᠷᠥᠭᠡ ᠨᠢ ᠬᠠᠮᠢᠭᠠ ᠨᠢ ᠪᠢᠯᠡ᠃
— ᠪᠢ ᠲᠠᠨ ᠳ᠋ᠤ᠌ ᠪᠠᠷᠠ ᠪᠣᠯᠤᠶᠠ᠃
— ᠲᠡᠭᠡᠵᠦ ᠦᠵᠡ!
ᠵᠠᠯᠠᠭᠤ ᠬᠠᠭᠠᠯᠭᠠᠴᠢ ᠠᠯᠠᠭᠠ ᠵᠥᠷᠢᠭᠦᠯᠦᠨ ᠤᠷᠲᠤ ᠪᠠᠨ ᠪᠠᠷᠢᠨ ᠡᠪᠦᠷ ᠳᠡᠭᠡᠷᠡ ᠪᠡᠨ ᠶᠡᠬᠡᠰ ᠳᠡᠭᠡᠳᠦᠰ ᠢ᠋ ᠬᠦᠨᠳᠦᠳᠬᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠨᠳᠦᠳᠬᠡᠨ ᠮᠡᠬᠦᠯᠵᠡᠭᠰᠡᠨ ᠢ᠋ᠶ᠋ᠡᠨ ᠲᠦᠷᠦᠭᠦᠯᠡᠨ ᠶᠠᠪᠤᠯᠠ᠃ ᠪᠢᠲᠡᠭᠦᠦ ᠬᠡᠪᠢᠰ ᠳᠡᠪᠢᠰᠦᠭᠰᠡᠨ ᠠᠭᠤᠳᠠᠮ ᠰᠠᠷᠠᠭᠤᠯ ᠶᠡᠬᠡ ᠬᠣᠩᠭᠢᠯ ᠤ᠋ᠨ ᠳᠤᠮᠳᠠᠭᠤᠷ ᠶᠠᠪᠤᠬᠤ ᠳ᠋ᠤᠨᠢ ᠳᠡᠭᠡᠳᠦ ᠳᠠᠪᠬᠤᠷ ᠠ᠋ᠴᠠ ᠱᠤᠳᠤᠷᠭᠤ᠂ ᠶᠣᠣᠴᠢᠨ᠂ ᠬᠤᠭᠤᠷ ᠭᠤᠷᠪᠠ ᠪᠠᠷ ᠰᠢᠨᠡ ᠴᠠᠭ ᠤ᠋ᠨ ᠬᠥᠩᠭᠡᠨ ᠠᠶᠠᠯᠭᠤᠲᠤ ᠰᠣᠨᠢᠨ ᠳᠠᠭᠤᠤ ᠶ᠋ᠢ ᠳᠠᠷᠤᠵᠤ ᠪᠠᠢᠭᠠ ᠨᠢ ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭ ᠲᠡᠢ ᠨᠢ ᠠᠷᠭᠠ ᠦᠭᠡᠢ ᠰᠣᠨᠣᠰᠤᠭᠳᠠᠨᠠ᠃ ᠭᠡᠲᠡᠯᠡ ᠭᠡᠨᠡᠳᠲᠡ ᠬᠥᠯᠴᠥᠭᠦᠷᠡᠭᠰᠡᠨ ᠠᠪᠠᠭᠠᠢ ᠨᠠᠷ ᠤ᠋ᠨ ᠣᠷᠢᠯᠠᠭᠰᠠᠨ᠂ ᠴᠢᠷᠠᠯᠠᠭᠰᠠᠨ᠂ ᠰᠥᠭᠡᠩᠭᠡᠳᠡᠭᠰᠡᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠪᠣᠯᠬᠢ ᠬᠣᠭᠣᠯᠠᠢ ᠪᠠᠷ ᠳᠠᠭᠤᠯᠠᠬᠤ ᠳ᠋ᠤ᠌ ᠬᠥᠭᠵᠢᠮ ᠦ᠋ᠨ ᠰᠠᠢᠬᠠᠨ ᠠᠪᠢᠶᠠ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠳᠤᠭᠤᠯᠳᠠᠬᠤ ᠪᠠᠨ ᠪᠣᠯᠢᠨ ᠵᠠᠮᠬᠠᠷᠠᠪᠠ᠃ ᠡᠳᠡᠭᠡᠷ ᠠᠪᠠᠭᠠᠢ ᠨᠠᠷ ᠪᠣᠯ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠂ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠳ ᠬᠠᠲᠤᠳ ᠠᠬᠠᠢᠲᠠᠨ ᠨᠠᠷ᠂ ᠪᠣᠳᠣᠪᠠᠯ ᠳᠡᠭᠡᠷᠡᠬᠢ ᠡᠴᠡ《ᠳᠠᠭᠤᠯᠠᠵᠠᠭᠠ》 ᠭᠡᠵᠦ ᠵᠠᠷᠯᠢᠭ ᠪᠠᠭᠤᠭᠰᠠᠨ ᠳ᠋ᠤ᠌᠂ ᠲᠠᠭᠠᠯᠠᠯ ᠪᠣᠯᠭᠠᠬᠤ ᠭᠡᠵᠦ ᠪᠦᠬᠦ ᠪᠠᠢᠳᠠᠭ ᠬᠣᠭᠣᠯᠠᠢ ᠪᠠᠨ ᠰᠢᠪᠬᠠᠨ ᠲᠠᠯᠪᠢᠵᠤ ᠪᠠᠢᠭᠠ ᠨᠢ ᠯᠡ ᠡᠨᠡ ᠪᠢᠵᠡ᠃ ᠵᠢᠷ ᠦ᠋ᠨ ᠬᠥᠮᠦᠰ ᠪᠣᠳᠣᠬᠤ ᠳ᠋ᠠᠭᠠᠨ᠄ ᠪᠣᠭᠳᠠ ᠶ᠋ᠢᠨ ᠪᠤᠷᠬᠠᠨ ᠬᠠᠭᠠᠳ ᠨᠣᠶᠠᠳ ᠢ᠋ ᠳᠡᠭᠡᠳᠦ ᠲᠩᠷᠢ ᠶ᠋ᠢᠨ ᠬᠥᠪᠡᠭᠦᠳ᠂ ᠡᠮᠡᠰ ᠬᠠᠲᠤᠳ ᠢ᠋ ᠨᠢ ᠣᠨᠴᠠᠭᠠᠢ ᠬᠤᠪᠢ ᠵᠠᠶᠠᠭᠠᠲᠠᠨ ᠭᠡᠵᠦ ᠦᠵᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠢᠷᠯᠠᠨ ᠴᠡᠩᠭᠡᠬᠦ ᠶ᠋ᠢ ᠨᠢ ᠶᠣᠰᠣᠲᠠᠢ ᠠᠷᠢᠭᠤᠨ ᠲᠤᠩᠭᠠᠯᠠᠭ ᠪᠠᠢᠬᠤ ᠭᠡᠵᠦ ᠪᠣᠳᠣᠨᠠ᠃ ᠭᠡᠲᠡᠯᠡ ᠣᠳᠣ ᠶ᠋ᠢᠨ ᠡᠨᠡ ᠳᠠᠭᠤᠯᠠᠵᠤ ᠪᠠᠢᠭᠠ ᠪᠠᠷ ᠪᠣᠯ ᠶᠣᠰᠣᠲᠠᠢ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠪᠤᠵᠢᠭᠢᠨᠠᠭᠠᠨ᠂ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠣᠷᠣᠭᠰᠠᠨ ᠱᠤᠤᠭᠢᠶᠠᠨ ᠠᠵᠢ᠃
ᠬᠠᠭᠠᠯᠭᠠᠴᠢ ᠪᠠᠯᠳᠠᠨᠴᠡᠷᠢᠩ ᠢ᠋ ᠤᠷᠤᠭᠰᠢ ᠬᠠᠷᠠᠭᠰᠠᠨ ᠬᠠᠭᠠᠯᠭᠠ ᠲᠠᠢ ᠥᠷᠥᠭᠡᠨ ᠦ᠌ ᠡᠮᠦᠨᠡ ᠬᠦᠷᠭᠡᠨ ᠬᠠᠭᠠᠯᠭᠠ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠨᠡᠭᠡᠭᠡᠨ᠄ ᠮᠣᠷᠢᠯᠠᠵᠤ ᠬᠠᠢᠷᠠᠯᠠ! ᠭᠡᠵᠦ ᠴᠡᠭᠡᠵᠢ ᠪᠡᠨ ᠳᠠᠷᠤᠨ ᠪᠥᠬᠥᠢᠪᠡ᠃ ᠳᠣᠲᠣᠭᠰᠢ ᠣᠷᠣᠬᠤ ᠳ᠋ᠤ᠌ ᠳᠡᠭᠡᠷᠡ ᠲᠠᠰᠤᠯᠭᠠ ᠨᠡᠯᠢᠶᠡᠳ ᠲᠣᠮᠣ᠂ ᠬᠠᠨᠠ ᠲᠤᠭᠤᠷᠭᠠ ᠨᠤᠭᠤᠳ ᠤ᠋ᠨ ᠶᠡᠬᠡᠩᠬᠢ ᠶ᠋ᠢ ᠲᠣᠮᠣ ᠲᠣᠮᠣ ᠬᠥᠯᠭᠡ ᠰᠤᠳᠤᠷ ᠤ᠋ᠳ ᠢ᠋ᠶ᠋ᠠᠷ ᠳᠦᠭᠦᠷᠭᠡᠭᠰᠡᠨ ᠱᠦᠭᠦᠢ ᠨᠦ᠍ᠭᠦᠳ ᠦᠶᠡ ᠳᠠᠷᠠᠭᠠᠯᠠᠨ ᠡᠵᠡᠯᠡᠭᠰᠡᠨ ᠢ᠋ ᠨᠢ ᠦᠵᠡᠬᠦ ᠳ᠋ᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ ᠲᠣᠳᠣ ᠰᠠᠨᠠᠭᠳᠠᠭᠤᠯᠤᠨᠠ᠃ ᠭᠡᠲᠡᠯᠡ ᠵᠡᠭᠦᠨᠲᠡᠢ ᠨᠢ ᠨᠢᠭᠡ ᠬᠡᠰᠡᠭ ᠭᠠᠵᠠᠷ ᠢ᠋ ᠳᠠᠩ ᠪᠤᠷᠬᠠᠨ ᠲᠠᠬᠢᠯ ᠡᠵᠡᠯᠡᠭᠰᠡᠨ ᠦ᠌ ᠡᠮᠦᠨᠡ ᠪᠡᠶᠡ ᠪᠡᠷ ᠪᠦᠳᠦᠭᠦᠨ᠂ ᠭᠡᠳᠡᠰᠦ ᠶᠡᠬᠡᠲᠡᠢ᠂ ᠬᠠᠯᠵᠠᠨ ᠲᠣᠯᠣᠭᠠᠢ ᠲᠠᠢ ᠡᠪᠦᠭᠡᠰᠢᠶᠡᠷ ᠯᠠᠮᠠ ᠬᠡᠳᠦᠨ ᠳᠠᠪᠬᠤᠷ ᠣᠯᠪᠣᠭ ᠳᠡᠭᠡᠷᠡ ᠬᠡᠳᠦ ᠢᠳᠡᠭᠰᠡᠨ ᠬᠣᠭᠣᠯᠠ ᠪᠠᠨ ᠰᠢᠩᠭᠡᠭᠡᠵᠦ ᠶᠠᠳᠠᠬᠤ ᠮᠡᠲᠦ ᠲᠣᠮᠪᠣᠢᠨ ᠰᠠᠭᠤᠨᠠ᠃ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠢ᠋ ᠬᠠᠷᠠᠬᠤ ᠲᠠᠢ ᠪᠠᠨ ᠵᠡᠷᠭᠡ ᠳᠠᠰᠢᠳᠣᠣ ᠰᠣᠢᠪᠣᠨ ᠭᠡᠭᠴᠢ ᠪᠣᠯᠬᠤ ᠶ᠋ᠢ ᠳᠣᠲᠣᠷᠠ ᠪᠠᠨ ᠰᠠᠨᠠᠨ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠣᠯᠠᠨ ᠳᠡᠭᠡᠳᠦ ᠮᠠᠨᠳᠠᠯ ᠢ᠋ ᠬᠢᠴᠢᠶᠡᠩᠭᠦᠢᠯᠡᠨ ᠠᠢᠯᠠᠳᠬᠠᠵᠤ ᠵᠣᠯᠭᠠᠯᠠ᠃ ᠰᠣᠢᠪᠣᠨ ᠯᠠᠮᠠ ᠴᠦ᠍ ᠬᠦᠨᠳᠦᠳᠬᠡᠨ ᠰᠠᠢᠨ ᠰᠠᠢᠬᠠᠨ ᠢ᠋ᠶ᠋ᠠᠷ ᠤᠭᠲᠤᠨ ᠠᠪᠬᠤ ᠶ᠋ᠢ ᠬᠢᠴᠢᠶᠡᠬᠦ ᠠᠵᠢ᠃
— ᠲᠠ ᠳᠡᠭᠡᠭᠰᠢ ᠪᠡᠨ ᠮᠣᠷᠢᠯᠠ! ᠭᠡᠵᠦ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠥᠭᠦᠯᠡᠨ᠂ ᠯᠠᠪ ᠬᠣᠶᠠᠷ ᠬᠥᠮᠦᠨ ᠳᠠᠮᠨᠠᠨ ᠠᠪᠴᠢᠷᠠᠭᠰᠠᠨ ᠪᠠᠢᠬᠤ ᠭᠡᠮᠡᠷ ᠲᠣᠮᠣ ᠮᠥᠩᠭᠥᠨ ᠴᠠᠷᠠ ᠲᠠᠢ ᠶᠡᠬᠡ ᠢᠳᠡᠭᠡᠨ ᠦ᠌ ᠠᠷᠤ ᠳ᠋ᠠᠬᠢ ᠠᠯᠲᠠᠨ ᠰᠠ ᠤᠲᠠᠰᠤ ᠳᠠᠷᠤᠭᠤᠯᠤᠨ ᠯᠤᠤ ᠶ᠋ᠢᠨ ᠬᠡ ᠭᠠᠷᠭᠠᠭᠰᠠᠨ ᠬᠥᠬᠡ ᠲᠣᠷᠭᠠᠨ ᠲᠦᠰᠢᠯᠭᠡᠲᠦ ᠣᠯᠪᠣᠭ ᠤᠷᠤᠭᠤ ᠭᠠᠷ ᠰᠤᠩᠭᠠᠨ ᠵᠢᠭᠠᠪᠠ᠃ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠨᠢ ᠰᠠᠭᠤᠪᠠ᠃ ᠤᠷᠢᠳ ᠡᠮᠦᠨᠡ ᠡᠢᠮᠦ ᠶᠠᠭᠤᠮᠠᠨ ᠳᠡᠭᠡᠷᠡ ᠰᠠᠭᠤᠵᠤ ᠦᠵᠡᠭᠡ ᠦᠭᠡᠢ ᠲᠤᠯᠠ ᠰᠡᠳᠬᠢᠯ ᠲᠠᠪᠠ ᠦᠭᠡᠢ ᠪᠣᠯᠤᠨ ᠨᠢᠭᠤᠷ ᠤᠯᠠᠢᠪᠠ᠃ ᠭᠡᠲᠡᠯᠡ ᠰᠣᠢᠪᠣᠨ ᠯᠠᠮᠠ᠄ ᠲᠠ ᠢᠳᠡᠭᠡ ᠵᠣᠭᠣᠭᠯᠠ! ᠭᠡᠵᠦ ᠨᠠᠢᠷ ᠲᠠᠯᠪᠢᠨ ᠲᠣᠯᠣᠭᠠᠢ ᠮᠡᠬᠦᠢᠯᠭᠡᠭᠰᠡᠨ ᠲᠡᠳᠦᠢ ᠦᠭᠡᠢ᠂ ᠠᠯᠲᠠᠨ ᠳᠣᠲᠣᠷ ᠲᠠᠢ ᠮᠥᠩᠭᠥᠨ ᠬᠤᠨᠳᠠᠭᠠᠨ ᠳ᠋ᠤ᠌ ᠠᠷᠢᠬᠢ ᠳᠦᠭᠦᠷᠭᠡᠨ᠄ ᠨᠠᠩᠴᠢᠳ ᠪᠣᠯᠭᠣᠭᠠ! ᠭᠡᠵᠦ ᠪᠠᠷᠢᠯᠠ᠃ ᠡᠢᠨ ᠬᠦ᠌ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠬᠡᠳᠦ ᠬᠦᠨᠳᠦᠳᠬᠡᠭᠰᠡᠨ ᠡᠴᠡ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠭᠠᠷ ᠬᠤᠷᠤᠭᠤ ᠶᠠᠮᠠᠷ ᠨᠢᠭᠡᠨ ᠦᠯᠦ ᠦᠵᠡᠭᠳᠡᠬᠦ ᠶᠠᠭᠤᠮᠠᠨ ᠳ᠋ᠤ᠌ ᠪᠠᠷᠢᠭᠳᠠᠨ ᠬᠦᠯᠢᠭᠳᠡᠭᠰᠡᠨ ᠰᠢᠭ ᠪᠣᠯᠤᠨ ᠴᠢᠯᠥᠭᠡ ᠲᠡᠢ ᠬᠥᠳᠡᠯᠵᠦ ᠴᠢᠳᠠᠬᠤ ᠪᠠᠨ ᠪᠣᠯᠢᠵᠤ ᠢᠷᠡᠯᠡ᠃
ᠦᠨᠡᠨ ᠳ᠋ᠡᠭᠡᠨ ᠲᠡᠷᠡ ᠰᠣᠢᠪᠣᠨ ᠤᠷᠢᠳ ᠡᠮᠦᠨᠡ ᠪᠠᠯᠳᠠᠨᠴᠡᠷᠢᠩ ᠲᠡᠢ ᠠᠭᠤᠯᠵᠠᠬᠤ ᠪᠠᠢᠲᠤᠭᠠᠢ ᠪᠠᠷᠠ ᠶ᠋ᠢ ᠨᠢ ᠴᠦ᠍ ᠬᠠᠷᠠᠭᠰᠠᠨ ᠤᠳᠠᠭᠠ ᠦᠭᠡᠢ᠂ ᠭᠡᠪᠡᠴᠦ ᠥᠪᠡᠷ ᠲᠡᠢ ᠨᠢ ᠠᠭᠤᠯᠵᠠᠬᠤ ᠪᠠᠷ ᠶᠡᠬᠡ ᠣᠷᠳᠣᠨᠠ ᠠᠶᠤᠮᠰᠢᠭ ᠦᠭᠡᠢ ᠵᠢᠳᠬᠦᠨ ᠣᠷᠣᠵᠤ ᠢᠷᠡᠭᠰᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠲᠠᠨᠢᠯ ᠲᠠᠯᠠ ᠶ᠋ᠢᠨ ᠨᠣᠶᠠᠨ ᠤ᠋ ᠬᠦᠦ ᠪᠣᠯᠪᠠ ᠤᠤ ᠭᠡᠵᠦ ᠲᠠᠭᠠᠪᠤᠷᠢᠯᠠᠬᠤ ᠶ᠋ᠢᠨ ᠳᠡᠭᠡᠷᠡ ᠣᠷᠣ ᠲᠠᠰᠤ ᠲᠠᠨᠢᠬᠤ ᠦᠭᠡᠢ ᠪᠠᠢᠭᠠ ᠳ᠋ᠠᠭᠠᠨ ᠰᠡᠳᠬᠢᠯ ᠵᠣᠪᠠᠬᠤ ᠠᠵᠢ᠃
— ᠢᠩᠭᠢᠩᠭᠦᠲᠡ ᠲᠠᠨ ᠤ᠋ ᠠᠯᠳᠠᠷ ᠬᠡᠨ ᠪᠢᠯᠡ ᠳᠠ ᠠ᠋? ᠴᠡᠭᠡᠵᠢᠨ ᠳ᠋ᠦ᠍ ᠮᠢᠨᠢ ᠲᠤᠩ ᠣᠢᠷᠠᠬᠠᠨ ᠪᠠᠢᠭᠠ ᠬᠢᠷᠢ ᠨᠢ ᠨᠢᠭᠡ ᠯᠡ ᠰᠢᠭᠤᠳ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠠᠯᠠᠮᠵᠢᠭᠤᠬᠠᠨ ᠪᠠᠢᠭᠠ ᠳᠤᠭᠤᠢ ᠴᠠᠭᠠᠨ ᠴᠢᠷᠠᠢ ᠪᠠᠨ ᠠᠷᠴᠢᠨ ᠬᠡᠯᠡᠪᠡ᠃ ᠲᠡᠭᠡᠭᠡᠳ ᠪᠠᠯᠳᠠᠨᠴᠡᠷᠢᠩ ᠨᠡᠷᠡ ᠠᠯᠳᠠᠷ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢ ᠬᠡᠯᠡᠵᠦ ᠥᠭᠬᠦ ᠳ᠋ᠦ᠍᠄
— ᠨᠡᠭᠡᠷᠡᠨ ᠲᠡᠢᠮᠦ ᠯᠡ ᠳᠡ ᠠ᠋᠂ ᠨᠠᠰᠤ ᠥᠲᠡᠯᠬᠦ ᠳ᠋ᠦ᠍ ᠴᠢᠨᠢ ᠮᠠᠷᠲᠠᠵᠤ ᠮᠤᠩᠭᠠᠨᠢᠬᠤ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠪᠣᠯᠬᠤ ᠪᠠᠰᠠ ᠮᠠᠭᠤᠬᠠᠢ ᠶᠤᠮ ᠳᠠ ᠭᠡᠵᠦ ᠰᠣᠢᠪᠣᠨ ᠬᠠᠭᠤᠷᠮᠠᠭ ᠪᠣᠯᠪᠠᠴᠤ ᠬᠠᠰᠢᠩ ᠬᠠᠭᠠᠨ ᠬᠡᠮᠡᠬᠦ ᠱᠠᠭᠠᠵᠠᠩ ᠡᠪᠦᠭᠡᠨ ᠦ᠌ ᠠᠮᠤᠷᠯᠢᠩᠭᠤᠢ ᠰᠠᠢᠬᠠᠨ ᠳᠦᠷᠢ ᠪᠡᠷ ᠢᠨᠢᠶᠡᠮᠰᠦᠭᠯᠡᠨ ᠳᠠᠬᠢᠨ ᠬᠥᠯᠥᠰᠥ ᠪᠡᠨ ᠠᠷᠴᠢᠪᠠ᠃
— ᠨᠠᠳᠠ ᠳᠡᠭᠡᠷᠡᠬᠢ ᠳ᠋ᠦ᠍ ᠮᠠᠨᠳᠠᠯ ᠡᠷᠭᠦᠨ᠂ ᠪᠠᠷᠠᠯᠬᠠᠵᠤ ᠠᠢᠯᠠᠳᠬᠠᠬᠤ ᠴᠢᠬᠤᠯᠠ ᠬᠡᠷᠡᠭ ᠪᠠᠢᠬᠤ ᠶᠤᠮ᠂ ᠡᠨᠡ ᠲᠤᠬᠠᠢ ᠲᠠᠨ ᠳ᠋ᠤ᠌ ᠰᠣᠨᠣᠰᠬᠠᠨ ᠴᠣᠬᠣᠮ ᠬᠡᠳᠦᠢ ᠳ᠋ᠦ᠍ ᠪᠣᠯᠤᠯᠴᠠᠭᠠ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠶ᠋ᠢ ᠬᠦᠰᠡᠭᠰᠡᠨ ᠪᠢᠯᠡ ᠭᠡᠬᠦ ᠳ᠋ᠦ᠍᠄
— ᠠ᠋ ᠲᠡᠢᠮᠦ ᠤᠤ ᠭᠡᠵᠦ ᠨᠢᠭᠤᠷ ᠥᠭᠡᠳᠡ ᠰᠢᠷᠳᠡᠨ᠄ ᠵᠠ ᠬᠦ ᠡᠨᠡ ᠴᠦ᠍ ᠠᠮᠤᠷ ᠦᠭᠡᠢ ᠳᠡ᠃ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠪᠦᠷ ᠴᠦ᠍ ᠨᠥᠬᠥᠴᠡᠯ ᠦᠭᠡᠢ᠃
— ᠵᠠ ᠲᠡᠢᠮᠦ ᠪᠣᠯᠲᠤᠭᠠᠢ᠂ ᠮᠠᠷᠭᠠᠰᠢ ᠪᠠᠷᠠᠯᠬᠠᠵᠤ ᠪᠣᠯᠬᠤ ᠪᠣᠯᠪᠠ ᠤᠤ?
— ᠦᠭᠡᠢ ᠮᠠᠷᠭᠠᠰᠢ ᠴᠢᠨᠢ ᠰᠢᠨᠡ ᠶ᠋ᠢᠨ ᠭᠤᠷᠪᠠᠨ᠂ ᠭᠠᠨᠳᠠᠩ ᠬᠦᠷᠢᠶᠡᠨ ᠦ᠌ ᠪᠦᠬᠦ ᠬᠠᠮᠪᠤ᠂ ᠴᠣᠷᠵᠢ ᠨᠠᠷ ᠤ᠋ᠨ ᠪᠠᠷᠠᠯᠬᠠᠬᠤ ᠡᠳᠦᠷ᠃
— ᠲᠡᠭᠡᠪᠡᠯ ᠰᠢᠨᠡ ᠶ᠋ᠢᠨ ᠳᠥᠷᠪᠡᠨ ᠳ᠋ᠦ᠍ ᠶᠠᠭᠠᠬᠢᠬᠤ ᠪᠣᠯ?
— ᠵᠠ ᠠ᠋᠂ ᠪᠠᠢᠵᠠ᠂ ᠰᠢᠨᠡ ᠶ᠋ᠢᠨ ᠳᠥᠷᠪᠡᠨ ᠳ᠋ᠦ᠍ ᠴᠢᠨᠢ ᠶᠠᠭᠤ ᠪᠠᠢᠳᠠᠭ ᠰᠠᠨ ᠪᠢᠯᠡ? ᠭᠡᠵᠦ ᠰᠣᠢᠪᠣᠨ ᠨᠢᠳᠦ ᠴᠠᠪᠴᠢᠯᠠᠨ ᠳᠡᠭᠡᠭᠰᠢ ᠬᠠᠷᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠄
— ᠠ ᠲᠡᠢᠮᠦ᠂ ᠭᠠᠮᠢᠩ ᠤ᠋ᠨ ᠨᠣᠶᠠᠨ ᠳᠠᠷᠤᠭᠠ ᠨᠠᠷ ᠪᠠᠷᠠᠯᠬᠠᠬᠤ ᠭᠡᠰᠡᠨ ᠭᠡᠳ ᠰᠢᠨᠡ ᠶ᠋ᠢᠨ ᠲᠠᠪᠤᠨ ᠳ᠋ᠤ᠌ ᠣᠨᠴᠠ ᠶ᠋ᠢᠨ ᠶᠠᠭᠤᠮᠠ ᠦᠭᠡᠢ ᠭᠡᠰᠡᠨ ᠢ᠋ᠶ᠋ᠡᠨ ᠠᠷᠠᠳ ᠣᠯᠠᠨ ᠳ᠋ᠤ᠌ ᠮᠥᠷᠭᠥᠯ ᠬᠠᠢᠷᠠᠯᠠᠬᠤ ᠭᠡᠵᠦ ᠪᠠᠢᠭᠠ ᠶ᠋ᠢ ᠳᠤᠷᠠᠳᠤᠯᠠ᠃
— ᠲᠡᠭᠡᠪᠡᠯ ᠰᠢᠨᠡ ᠶ᠋ᠢᠨ ᠲᠠᠪᠤᠨ ᠳ᠋ᠤ᠌ ᠪᠠᠷᠠᠯᠬᠠᠭᠤᠯᠤᠨ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠵᠤ ᠬᠠᠢᠷᠠᠯᠠ ᠭᠡᠬᠦ ᠳ᠋ᠦ᠍᠄
— ᠦᠭᠡᠢ ᠶᠡᠷᠦ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ ᠳᠠ ᠠ᠋᠂ ᠤᠭ ᠨᠢ ᠵᠥᠪᠬᠡᠨ ᠮᠥᠷᠭᠥᠯ ᠦ᠋ᠨ ᠡᠳᠦᠷ ᠯᠡ ᠪᠠᠢᠪᠠᠯ ᠵᠦᠭᠡᠷ ᠶᠦᠮ ᠰᠠᠨ᠃ ᠠᠶᠠ ᠦᠭᠡᠢ ᠪᠣᠯ ᠳᠡᠭᠡᠷᠡᠬᠢ ᠶ᠋ᠢᠨ ᠪᠡᠶᠡ ᠲᠥᠪ ᠦᠭᠡᠢ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃ ᠭᠡᠪᠡᠴᠦ ᠲᠠᠨ ᠤ᠋ ᠬᠡᠷᠡᠭ ᠴᠣᠬᠣᠮ ᠶᠠᠭᠤ ᠪᠣᠢ? ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠤᠬᠠᠢ ᠤᠤ? ᠠᠯᠢ ᠠᠮᠢ ᠬᠣᠪᠢᠨ ᠤ᠋ ᠶᠠᠪᠤᠳᠠᠯ ᠤᠤ? ᠶᠠᠭᠤ ᠴᠦ᠍ ᠠᠲᠤᠭᠠᠢ ᠪᠢ ᠳ᠋ᠦᠩ ᠲᠣᠢᠮᠣ ᠶ᠋ᠢ ᠨᠢ ᠳᠣᠭᠣᠯᠤᠶᠠ᠃
ᠪᠠᠯᠳᠠᠨᠴᠡᠷᠢᠩ ᠰᠣᠢᠪᠣᠨ ᠯᠠᠮᠠ ᠶ᠋ᠢᠨ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠰᠢᠢᠳᠪᠦᠷᠢ ᠦᠭᠡᠢ ᠶᠠᠷᠢᠶᠠᠨ ᠳᠡᠭᠡᠷᠡ ᠭᠣᠷᠢᠳᠠᠬᠤ᠂ ᠭᠣᠷᠢᠳᠠᠯᠭᠠ ᠠᠯᠳᠠᠬᠤ ᠬᠣᠶᠠᠷ ᠢ᠋ ᠡᠭᠡᠯᠵᠢᠯᠡᠭᠦᠯᠦᠭᠰᠡᠭᠡᠷ ᠪᠠᠢᠭᠰᠠᠨ ᠪᠥᠭᠡᠳ ᠡᠴᠦᠰ ᠦ᠋ᠨ ᠬᠢᠨᠢ ᠦᠭᠡᠨ ᠳᠡᠭᠡᠷᠡ《ᠡᠨᠡ ᠬᠥᠮᠦᠨ ᠡᠬᠡᠨᠡᠷ ᠠᠪᠬᠤ ᠶ᠋ᠢ ᠬᠦᠰᠡᠭᠰᠡᠨ ᠠᠮᠢᠨ ᠬᠣᠪᠢᠨ ᠬᠡᠷᠡᠭ ᠢ᠋ ᠶᠠᠭᠠᠬᠢᠨ ᠴᠢᠬᠤᠯᠠ ᠳ᠋ᠤ᠌ ᠪᠣᠳᠣᠬᠤ ᠪᠢᠯᠡ》 ᠭᠡᠵᠦ ᠤᠷᠮᠠ ᠵᠣᠷᠢᠭ ᠨᠢᠭᠡᠮᠦᠰᠦᠨ ᠮᠣᠬᠣᠪᠠ᠃ ᠲᠡᠭᠡᠭᠡᠳ ᠠᠷᠭᠠ ᠪᠤᠶᠤ ᠤᠭ ᠬᠡᠷᠡᠭ ᠢ᠋ ᠰᠣᠨᠣᠰᠤᠶᠠ ᠭᠡᠰᠡᠨ ᠪᠣᠯᠬᠣᠷ᠄
— ᠯᠠᠮᠠᠳᠠᠨ ᠮᠢᠨᠢ᠂ ᠠᠮᠢ ᠬᠤᠪᠢ ᠶ᠋ᠢᠨ ᠬᠡᠷᠡᠭ ᠭᠡᠵᠦ ᠴᠠᠭᠠᠰᠢ ᠵᠠᠯᠭᠠᠨ ᠬᠡᠯᠡᠬᠦ ᠦᠭᠡ ᠣᠯᠳᠠᠬᠤ ᠦᠭᠡᠢ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ᠄ ᠠᠶᠤᠮᠰᠢᠭ ᠦᠭᠡᠢ ᠠᠢᠯᠠᠳᠬᠠᠬᠤ ᠳ᠋ᠤ᠌《ᠣᠷᠣᠨ ᠨᠤᠲᠤᠭ ᠮᠢᠨᠢ ᠬᠣᠯᠠ᠂ ᠠᠷᠪᠠᠨ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠴᠢᠲᠤ ᠪᠣᠭᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠭᠡᠨ ᠲᠥᠷᠥ ᠳ᠋ᠦ᠍ ᠵᠢᠳᠬᠦᠬᠦ ᠭᠡᠵᠦ ᠡᠨᠡ ᠬᠦᠷᠢᠶᠡᠨᠡ ᠢᠷᠡᠭᠰᠡᠨ ᠶᠦᠮ᠃ ᠶᠡᠬᠡ ᠪᠠᠭᠠ ᠠᠯᠪᠠᠨ ᠲᠤᠰᠢᠶᠠᠯ ᠢ᠋ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠬᠦᠯᠢᠶᠡᠵᠦ᠂ ᠡᠨᠳᠡᠭᠳᠡᠯ ᠦᠭᠡᠢ ᠪᠠᠷᠠ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠳᠦᠢᠪᠡᠷ ᠬᠠᠷᠠᠴᠤ ᠠᠷᠠᠳ ᠤ᠋ᠨ ᠬᠥᠪᠡᠭᠦᠨ ᠪᠣᠯᠪᠠᠴᠤ ᠬᠦᠩ ᠵᠡᠷᠭᠡ ᠱᠠᠩᠨᠠᠯ ᠢ᠋ ᠬᠦᠷᠲᠡᠵᠦ ᠶᠠᠪᠤᠯᠠ᠃ ᠵᠠ ᠡᠨᠡ ᠶᠠᠭᠠᠬᠢᠬᠤᠪ᠃ ᠣᠳᠣ ᠨᠢᠭᠡᠨᠲᠡ ᠴᠠᠭ ᠲᠥᠷᠥ ᠥᠭᠡᠷᠡᠴᠢᠯᠡᠭᠳᠡᠨ ᠥᠭᠡᠷᠡ ᠪᠠᠢᠳᠠᠯ ᠳ᠋ᠤ᠌ ᠰᠢᠯᠵᠢᠭᠰᠡᠨ ᠪᠣᠯᠬᠣᠷ ᠣᠨᠴᠠ ᠳᠤᠷᠠᠳᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ ᠰᠢᠬᠠᠮ ᠪᠢᠵᠡ ᠠ᠋᠃ ᠭᠡᠪᠡᠴᠦ ᠡᠨᠡ ᠪᠡᠶᠡ ᠥᠷᠭᠡᠨ ᠬᠥᠨᠳᠡᠢ ᠳ᠋ᠦ᠍ ᠭᠠᠭᠴᠠᠭᠠᠷ ᠤᠷᠭᠤᠭᠰᠠᠨ ᠴᠣᠷ ᠤ᠋ᠨ ᠭᠠᠭᠴᠠ ᠬᠠᠢᠯᠠᠰᠤ ᠰᠢᠭ᠋ ᠶᠠᠪᠤᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠠᠴᠢᠲᠤ ᠪᠣᠭᠳᠠ ᠠ᠋ᠴᠠ ᠪᠠᠨ ᠬᠡᠰᠢᠭ ᠬᠦᠷᠲᠡᠬᠦ ᠶ᠋ᠢ ᠯᠡ ᠬᠦᠰᠡᠬᠦ ᠪᠣᠯᠤᠨᠠ ᠰᠢᠦ ᠳᠡ᠂ ᠯᠠᠮᠠᠲᠠᠨ ᠮᠢᠨᠢ》 ᠭᠡᠬᠦ ᠳ᠋ᠦ᠍᠄
ᠰᠣᠢᠪᠣᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠦᠭᠡ ᠪᠦᠷᠢ ᠳᠡᠭᠡᠷᠡ᠄ ᠤᠤᠬᠠᠢ? ᠮᠥᠨ᠂ ᠵᠠ ᠭᠡᠵᠦ ᠠᠩᠬᠠᠷᠤᠯ ᠲᠠᠢ ᠨᠢ ᠠᠷᠭᠠ ᠦᠭᠡᠢ ᠬᠦᠯᠢᠶᠡᠨ ᠠᠪᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠦᠭᠡᠢ ᠴᠢ ᠴᠣᠬᠣᠮ ᠶᠠᠮᠠᠷ ᠬᠡᠰᠢᠭ ᠬᠦᠷᠲᠡᠬᠦ ᠶ᠋ᠢ ᠬᠡᠯᠡᠭᠡᠳ ᠪᠠᠢᠨᠠ ᠪᠣᠢ? ᠭᠡᠵᠦ ᠰᠠᠪᠠᠭᠠ ᠦᠭᠡᠢᠬᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠠ ᠳᠠ᠂ ᠯᠠᠮᠠᠳᠠᠨ ᠮᠢᠨᠢ ᠶᠠᠭᠤ ᠴᠦ᠍ ᠭᠡᠬᠦ ᠪᠣᠢ ᠳᠠ? ᠢᠴᠢᠨ ᠡᠮᠢᠶᠡᠬᠦ ᠶ᠋ᠢ ᠬᠣᠢᠰᠢ ᠲᠠᠯᠪᠢᠨ᠂ ᠪᠣᠯᠬᠢ ᠪᠦᠳᠦᠭᠦᠯᠢᠭ ᠢ᠋ᠶ᠋ᠡᠷ ᠬᠡᠯᠡᠬᠦ ᠳ᠋ᠦ᠍ ᠨᠢᠭᠡ ᠪᠡᠶᠡ ᠶ᠋ᠢ ᠮᠢᠨᠢ ᠬᠣᠶᠠᠷ᠂ ᠨᠢᠮᠭᠡᠨ ᠪᠡᠶᠡ ᠶ᠋ᠢ ᠮᠢᠨᠢ ᠵᠤᠵᠠᠭᠠᠨ ᠪᠣᠯᠭᠠᠵᠤ ᠬᠠᠢᠷᠠᠯᠠᠬᠤ ᠶ᠋ᠢ ᠯᠡ ᠠᠢᠯᠠᠳᠬᠠᠨ ᠮᠥᠷᠭᠥᠬᠦ ᠭᠡᠰᠡᠨ ᠬᠡᠷᠡᠭ ᠶᠦᠮ᠃
— ᠵᠠ᠂ ᠵᠠ ᠮᠡᠳᠡᠯᠡ᠂ ᠬᠠᠨᠢ ᠲᠠᠢ ᠪᠣᠯᠭᠠᠵᠤ ᠬᠠᠢᠷᠠᠯᠠᠬᠤ ᠶ᠋ᠢ ᠯᠡ ᠠᠢᠯᠠᠳᠬᠠᠬᠤ ᠭᠡᠰᠡᠨ ᠬᠡᠷᠡᠭ᠃
— ᠲᠡᠢᠮᠦ ᠯᠠᠮᠠᠳᠠᠨ ᠠ᠋᠃ ᠭᠡᠪᠡᠴᠦ ᠬᠡᠨ ᠨᠢᠭᠡ ᠶ᠋ᠢ ᠪᠢᠰᠢ᠂ ᠬᠣᠶᠠᠷ ᠰᠡᠳᠬᠢᠯ ᠬᠠᠷᠢᠯᠴᠠᠨ ᠲᠣᠬᠢᠷᠠᠭᠰᠠᠨ ᠨᠢᠭᠡ ᠡᠮᠡᠭᠲᠡᠢ ᠪᠠᠢᠭᠠ ᠶᠤᠮ᠃ ᠲᠡᠭᠦᠨ ᠲᠡᠢ ᠰᠢᠭᠤᠳ ᠰᠠᠭᠤᠬᠤ ᠭᠡᠬᠦ ᠳ᠋ᠦ᠍ ᠶᠠᠭᠤ ᠭᠡᠬᠦ ᠶᠦᠮ ᠪᠣᠢ ᠳᠠ ᠭᠡᠳ ᠬᠥᠷᠥᠩᠭᠡ ᠵᠣᠭᠣᠷᠢ ᠦᠭᠡᠢ ᠪᠡᠨ ᠬᠡᠯᠡᠬᠦ ᠡᠴᠡ ᠵᠣᠪᠠᠨᠢᠨ ᠲᠦᠭᠳᠡᠷᠡᠪᠡ᠃ ᠭᠡᠲᠡᠯᠡ ᠰᠣᠢᠪᠣᠨ᠄
— ᠵᠠ᠂ ᠵᠠ ᠮᠡᠳᠡᠯᠡ᠂ ᠭᠡᠷ ᠣᠷᠣᠨ ᠤ᠋ ᠬᠢᠨ ᠨᠢ ᠪᠣᠯᠬᠤ ᠦᠭᠡᠢ ᠪᠠᠢᠭᠠ ᠶᠤᠮ ᠤᠤ?
— ᠲᠡᠢᠮᠦ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠶᠠᠭᠠᠷᠠᠨ ᠬᠠᠷᠢᠭᠤᠯᠪᠠ᠃
ᠰᠣᠢᠪᠣᠨ《 ᠬᠡ ᠬᠡ》 ᠭᠡᠵᠦ ᠢᠨᠢᠶᠡᠨ᠄
— ᠪᠠᠭᠠ ᠬᠡᠷᠡᠭ᠃ ᠪᠣᠭᠳᠠ ᠲᠠ ᠬᠣᠶᠠᠷ ᠲᠤ ᠦᠭᠡ ᠦᠭᠡᠢ ᠥᠷᠥᠰᠢᠶᠡᠯ ᠬᠠᠢᠷᠠᠯᠠᠨᠠ ᠭᠡᠵᠦ ᠮᠡᠳᠡ! ᠪᠢ ᠴᠦ᠍ ᠡᠢᠮᠦ ᠬᠡᠷᠡᠭ ᠲᠦ᠍ ᠲᠤᠰᠠ ᠨᠡᠮᠡᠭᠦᠷᠢ ᠪᠣᠯᠬᠤ ᠳᠤᠷᠠ ᠲᠠᠢ᠃ ᠡᠷᠡ ᠡᠮᠡ ᠬᠣᠶᠠᠷ ᠢ᠋ ᠨᠡᠢᠯᠡᠭᠦᠯᠬᠦ ᠪᠣᠯ ᠡᠨᠡ ᠨᠠᠰᠤᠨ ᠤ᠋ ᠬᠢᠨᠢ ᠬᠤᠪᠢ ᠵᠠᠶᠠᠭᠠ᠂ ᠵᠠᠮ ᠮᠥᠷ ᠬᠣᠶᠠᠷ ᠢ᠋ ᠨᠢ ᠣᠯᠭᠣᠨ ᠲᠡᠳᠬᠦᠬᠦ ᠭᠡᠰᠡᠨ ᠦᠭᠡ᠃ ᠢᠩᠭᠢᠬᠦ ᠶᠠᠭᠤᠨ ᠮᠠᠭᠤᠬᠠᠢ ᠬᠡᠷᠡᠭ ᠪᠠᠢᠬᠤ ᠪᠢᠯᠡ᠃ ᠭᠡᠪᠡᠴᠦ ᠲᠡᠷᠡ ᠪᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠰᠢ ᠪᠣᠢ᠃ ᠪᠢ ᠲᠤᠩ ᠰᠠᠶᠢᠬᠠᠨ ᠮᠡᠳᠡᠯᠡ᠃ ᠵᠡᠭᠦᠨ ᠠᠢᠮᠠᠭ ᠤ᠋ᠨ ᠨᠢᠭᠡᠨ ᠨᠣᠶᠠᠨ ᠬᠦᠦ ᠪᠡᠨ ᠬᠠᠨᠢ ᠲᠠᠢ ᠪᠣᠯᠭᠠᠬᠤ ᠭᠡᠵᠦ ᠨᠢᠭᠡ ᠠᠢᠯ ᠤ᠋ᠨ ᠥᠬᠢᠨ ᠦ᠌ ᠨᠡᠷᠡ ᠨᠠᠰᠤ ᠶ᠋ᠢ ᠲᠣᠳᠣᠷᠬᠠᠢᠯᠠᠨ ᠠᠢᠯᠠᠳᠬᠠᠵᠤ᠂ ᠵᠠᠷᠯᠢᠭ ᠪᠠᠭᠤᠯᠭᠠᠭᠤᠯᠵᠤ ᠠᠪᠤᠯᠠ᠃ ᠬᠦᠦ ᠶ᠋ᠢ ᠨᠢ ᠦᠵᠡᠪᠡᠯ ᠵᠢᠰᠦ ᠴᠢᠷᠠᠢ ᠤᠬᠠᠭᠠᠨ ᠰᠠᠨᠠᠭᠠ ᠠᠯᠢ ᠴᠦ᠍ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠪᠢᠵᠠᠭᠠᠯᠲᠠᠢ ᠪᠢᠰᠢ᠂ ᠪᠣᠳᠣᠪᠠᠯ ᠴᠢᠨᠠᠳᠤ ᠥᠬᠢᠨ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ ᠰᠦᠷᠡᠬᠡᠢ ᠰᠠᠢᠬᠠᠨ ᠠᠮᠢᠲᠠᠨ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠢᠩᠭᠢᠬᠦ ᠪᠡᠷ ᠲᠡᠷᠡ ᠬᠣᠶᠠᠷ ᠢ᠋ ᠨᠡᠢᠯᠡᠭᠦᠯᠬᠦ ᠨᠢ ᠲᠡᠢᠮᠦ ᠴᠦ᠍ ᠰᠠᠢᠬᠠᠨ ᠬᠡᠷᠡᠭ ᠪᠢᠰᠢ ᠪᠣᠯᠤᠨᠠ ᠳᠠ᠃
— ᠵᠠ ᠲᠡᠢᠮᠦ᠃ ᠲᠠ ᠲᠤᠩ ᠰᠠᠢᠬᠠᠨ ᠢ᠋ ᠠᠢᠯᠠᠳᠬᠠᠵᠤ ᠪᠠᠢᠨᠠ᠃
— ᠵᠠ ᠲᠡᠭᠡᠭᠡᠳ ᠨᠢᠭᠡᠨᠲᠡ ᠳᠡᠭᠡᠷᠡᠬᠢ ᠡᠴᠡ ᠪᠣᠯᠭᠣᠭᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠠ᠋ᠴᠠ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠪᠢ ᠲᠡᠷᠡ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠢ᠋ ᠨᠢ ᠬᠢᠬᠦ ᠭᠡᠵᠦ ᠰᠠᠶᠢ ᠪᠠᠭᠤᠵᠤ ᠢᠷᠡᠭᠡᠳ ᠰᠡᠳᠬᠢᠯ ᠲᠠᠪᠠᠭᠦᠢᠴᠡᠨ ᠭᠠᠷ ᠮᠠᠨᠢ ᠴᠦ᠍ ᠪᠢᠷ ᠶᠠᠩᠲᠠᠢ ᠤᠷᠤᠭᠤ ᠶᠠᠪᠤᠵᠤ ᠥᠭᠬᠦ ᠦᠭᠡᠢ ᠰᠢᠭ ᠰᠠᠭᠤᠵᠤ ᠪᠠᠢᠲᠠᠯᠠ ᠲᠠ ᠣᠷᠣᠵᠤ ᠢᠷᠡᠪᠡ ᠰᠢᠦ᠃ ᠢᠩᠭᠢᠬᠦ ᠳ᠋ᠦ᠍ ᠲᠠᠨ ᠤ᠋ ᠰᠡᠳᠬᠢᠯ ᠨᠡᠢᠯᠡᠭᠰᠡᠨ ᠡᠮᠡᠭᠲᠡᠢ ᠲᠡᠢ ᠪᠡᠨ ᠬᠠᠨᠢᠯᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠭᠠ ᠴᠢᠨᠢ ᠮᠠᠰᠢ ᠰᠠᠢᠬᠠᠨ ᠪᠠᠢᠨᠠ᠃ ᠪᠣᠭᠳᠠ ᠯᠠᠮᠠᠳᠠᠨ ᠵᠥᠪᠰᠢᠶᠡᠷᠡᠨᠡ᠂ ᠪᠢ ᠴᠦ᠍ ᠲᠤᠰᠠ ᠨᠡᠮᠡᠭᠦᠷᠢ ᠪᠣᠯᠬᠤ ᠪᠠᠨ ᠪᠣᠳᠣᠶᠠ ᠭᠡᠵᠦ ᠲᠡᠷᠭᠡᠯ ᠰᠠᠷᠠᠨ ᠤ᠋ ᠠᠳᠠᠯᠢ ᠳᠤᠭᠤᠢ ᠪᠣᠯᠤᠭᠠᠳ ᠬᠠᠴᠠᠷ ᠶᠠᠭᠠᠪᠲᠤᠷ ᠲᠤᠩᠭᠠᠯᠠᠭ ᠴᠢᠷᠠᠢ ᠪᠠᠨ ᠮᠡᠯᠡᠯᠵᠡᠭᠦᠯᠦᠨ ᠢᠨᠢᠶᠡᠪᠡ᠃ ᠴᠢᠨᠠᠭᠰᠢᠳᠠ ᠪᠠᠨ ᠪᠠᠰᠠ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠰᠠᠭᠠᠳ ᠪᠡᠷᠬᠡᠰᠢᠶᠡᠯ ᠤᠴᠠᠷᠠᠭᠤᠯᠤᠭᠰᠠᠨ ᠵᠦᠢᠯ ᠦᠭᠡᠢ ᠮᠠᠨᠳᠠᠯ ᠡᠷᠭᠦᠬᠦ ᠵᠠᠭᠤᠨ ᠲᠠᠪᠢᠨ ᠶᠠᠩᠴᠢᠶᠠᠨ ᠢ᠋ ᠪᠣᠭᠣᠳᠠᠯ ᠲᠠᠢ ᠴᠢᠭ ᠢ᠋ᠶ᠋ᠡᠷ ᠨᠢ ᠪᠠᠷᠢᠬᠤ ᠳ᠋ᠤ᠌᠂ ᠲᠣᠭᠠᠯᠠᠯ ᠦᠭᠡᠢ ᠬᠦᠯᠢᠶᠡᠨ ᠠᠪᠴᠤ᠂ ᠬᠠᠵᠠᠭᠤ ᠳ᠋ᠠᠭᠠᠨ ᠲᠠᠯᠪᠢᠵᠤ᠂ ᠳᠠᠩᠰᠠ ᠪᠦᠷᠢᠳᠬᠡᠯ ᠳ᠋ᠡᠭᠡᠨ ᠣᠷᠣᠭᠤᠯᠤᠨ ᠰᠢᠨᠡ ᠶ᠋ᠢᠨ ᠲᠠᠪᠤᠨ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠲᠤᠰᠬᠠᠢ ᠳ᠋ᠤᠨᠢ ᠪᠣᠭᠳᠠ ᠳ᠋ᠤ᠌ ᠪᠠᠷᠠᠯᠬᠠᠭᠤᠯᠬᠤ᠂ ᠲᠡᠷᠡ ᠴᠠᠭ ᠲᠤ ᠪᠣᠭᠳᠠ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠨ ᠲᠤᠰᠠ ᠨᠡᠮᠡᠭᠦᠷᠢ ᠵᠡᠷᠭᠡ ᠪᠡᠨ ᠰᠡᠳᠬᠢᠯ ᠬᠠᠷᠠᠮ ᠦᠭᠡᠢ ᠢᠯᠡᠷᠬᠡᠢᠯᠡᠨᠡ ᠭᠡᠵᠦ ᠠᠮᠠᠯᠠᠪᠠ᠃
ᠡᠢᠨ ᠬᠦ᠌ ᠪᠠᠯᠳᠠᠨᠴᠡᠷᠢᠩ ᠦᠨᠡᠬᠡᠷ ᠠᠷᠢᠭᠤᠨ ᠴᠠᠭᠠᠨ ᠥᠭᠭᠢᠶᠡᠮᠦᠷ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠲᠡᠢ ᠤᠴᠠᠷᠠᠭᠰᠠᠨ ᠳ᠋ᠠᠭᠠᠨ ᠬᠡᠴᠢᠨᠡᠭᠡᠨ ᠶᠡᠬᠡ ᠪᠠᠶᠠᠷᠯᠠᠭᠰᠠᠨ ᠢ᠋ ᠡᠨᠳᠡ ᠲᠣᠳᠣᠷᠠᠭᠤᠯᠬᠤ ᠳ᠋ᠤ᠌ ᠪᠡᠷᠬᠡ᠃
— ᠲᠠᠨ ᠳ᠋ᠤ᠌ ᠡᠩᠬᠡ ᠠᠮᠤᠭᠤᠯᠠᠩ᠂ ᠤᠷᠲᠤ ᠤᠳᠠᠭᠠᠨ ᠨᠠᠰᠤᠯᠠᠬᠤ ᠶ᠋ᠢ ᠢᠷᠥᠭᠡᠶᠡ ᠭᠡᠵᠦ ᠰᠠᠯᠬᠤ ᠶᠣᠰᠣ ᠭᠦᠢᠴᠡᠳᠬᠡᠬᠦ ᠳ᠋ᠡᠭᠡᠨ《ᠶᠣᠰᠣᠲᠠᠢ ᠠᠴᠢᠲᠤ ᠬᠥᠮᠦᠨ ᠮᠥᠨ》 ᠭᠡᠵᠦ ᠴᠢᠩ ᠰᠡᠳᠬᠢᠯ ᠡᠴᠡ ᠪᠢᠰᠢᠷᠡᠨ ᠭᠤᠷᠪᠠᠨᠲᠠ ᠮᠡᠬᠦᠢᠯᠡ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠨᠡᠪᠲᠡᠷᠡᠨ ᠣᠷᠣᠵᠤ ᠢᠷᠡᠭᠰᠡᠨ ᠭᠣᠶᠣᠮᠰᠣᠭ ᠬᠣᠩᠭᠢᠯ ᠤ᠋ᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠥᠨᠥᠬᠢ ᠬᠠᠲᠤᠳ ᠠᠬᠠᠢᠲᠠᠨ ᠨᠤᠭᠤᠳ ᠤ᠋ᠨ ᠵᠠᠮᠪᠠᠷᠠᠭᠠ ᠦᠭᠡᠢ ᠳᠠᠭᠤᠯᠠᠯᠳᠤᠵᠤ ᠪᠠᠢᠭᠰᠠᠨ ᠨᠢ ᠠᠯᠢ ᠬᠡᠳᠦᠢᠨ ᠦ᠌ ᠵᠣᠭᠰᠣᠭᠰᠠᠨ ᠪᠣᠯᠤᠯᠲᠠᠢ᠃ ᠲᠡᠭᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠴᠣᠷ ᠤ᠋ᠨ ᠭᠠᠭᠴᠠ ᠡᠮᠡᠭᠲᠡᠢ᠂ ᠮᠣᠷᠢᠨ ᠬᠢᠭᠢᠯᠢ ᠶ᠋ᠢᠨ ᠬᠦᠩᠭᠢᠨᠡᠬᠦ ᠠᠪᠢᠶᠠ ᠶ᠋ᠢ ᠳᠠᠭᠠᠭᠤᠯᠤᠨ ᠳᠠᠭᠤᠯᠠᠵᠤ ᠪᠠᠢᠭᠠ ᠰᠣᠨᠣᠰᠤᠭᠳᠠᠨᠠ᠃ ᠬᠣᠭᠣᠯᠠᠢ ᠨᠢ ᠰᠦᠷᠡᠬᠡᠢ ᠴᠢᠩᠭᠠ ᠠᠲᠠᠯᠠ ᠪᠠᠨ ᠤᠶᠠᠬᠠᠨ ᠨᠢ ᠬᠠᠴᠢᠨ ᠤᠷᠲᠤ᠂ ᠠᠶᠠ ᠠᠭᠤᠯᠠ ᠥᠭᠡᠳᠡ ᠠᠰᠠᠬᠤ ᠮᠡᠲᠦ ᠳᠡᠭᠡᠭᠰᠢ ᠡᠷᠭᠦᠭᠳᠡᠬᠦ ᠨᠢ ᠥᠷᠯᠥᠭᠡᠨ ᠦ᠌ ᠨᠠᠷᠠᠨ ᠮᠠᠨᠳᠤᠨ ᠭᠠᠷᠬᠤ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ᠃ ᠬᠥᠯ ᠦ᠋ᠨ ᠭᠢᠰᠬᠢᠯᠲᠡ ᠶ᠋ᠢ ᠤᠳᠠᠭᠠᠰᠢᠷᠠᠭᠤᠯᠤᠨ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠬᠤ ᠳ᠋ᠤ᠌᠄
《 ᠵᠠ ᠤᠶᠠᠬᠠᠨ ᠽᠠᠮᠪᠦ᠋ᠳᠢᠪ ᠦ᠋ᠨ ᠨᠠᠷᠠᠨ ᠨᠢ ᠡᠨᠡᠬᠡᠨ ᠳᠡᠯᠡᠬᠡᠢ ᠳᠠᠶᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠥᠬᠥᠯ ᠦᠭᠡᠢ ᠮᠠᠨᠳᠤᠭᠰᠠᠭᠠᠷ ᠪᠠᠢᠬᠤ ᠶ᠋ᠢ ᠮᠡᠳᠡᠭᠰᠡᠭᠡᠷ ᠪᠠᠢᠭᠠ ᠪᠣᠢ ᠊ᠢᠠ ᠳᠠ ᠲᠠ ᠮᠢᠨᠦ ᠵᠧ》 ᠭᠡᠳᠡᠭ ᠦᠭᠡ ᠲᠣᠪ ᠲᠣᠳᠣᠬᠠᠨ ᠰᠣᠨᠣᠰᠤᠭᠳᠠᠵᠤ《ᠨᠡᠭᠡᠷᠡᠨ ᠡᠨᠡ ᠳᠡᠯᠡᠬᠡᠢ ᠭᠡᠳᠡᠭ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ?》 ᠭᠡᠳᠡᠭ ᠪᠣᠳᠣᠯ ᠪᠣᠳᠣᠭᠳᠠᠭᠤᠯᠤᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠬᠤᠷᠠᠯᠳᠤᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠷᠮᠠ