ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠬᠣᠶᠠᠳᠤᠭᠠᠷ ᠪᠦᠯᠦᠭ᠂ᠥᠯᠵᠡᠢᠵᠢᠷᠭᠠᠯ– ᠭᠢᠯᠠᠯᠵᠠᠭᠰᠠᠨ ᠨᠢᠭᠡ ᠨᠠᠰᠤ4(2) Шинэлам – 2-р бүлэг᠂Өлзийжаргал– гялалзсан нэг нас 4(2)
52(ᠬᠣᠶᠠᠷ) ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠤ ᠥᠴᠢᠭ ᠢ ᠠᠪᠤᠭᠰᠠᠨ
ᠦᠦᠰᠢᠨᠵᠤᠤ ᠶᠢᠨ ᠰᠦᠮᠡ(ᠭᠠᠨᠵᠤᠤᠷ ᠨᠣᠮ ᠤᠨ ᠬᠡᠶ᠋ᠢᠳ) ᠪᠣᠯ ᠦᠦᠰᠢᠨ ᠬᠣᠰᠢᠭᠤᠨ ᠤ ᠬᠣᠰᠢᠭᠤ ᠬᠡᠶ᠋ᠢᠳ ᠪᠣᠯᠬᠤ ᠶᠤᠮ᠃ ᠬᠡᠳᠦᠨ ᠵᠠᠭᠤᠨ ᠵᠢᠯ ᠤᠨ ᠲᠤᠷᠰᠢ᠂ ᠦᠦᠰᠢᠨ ᠦ ᠣᠯᠠᠨ ᠦᠶᠡ ᠶᠢᠨ ᠵᠠᠰᠠᠭ ᠨᠣᠶᠠᠨ ᠪᠡᠶᠡ ᠪᠡᠷ ᠢᠶᠡᠨ ᠦᠦᠰᠢᠨᠵᠤᠤ ᠶᠢᠨ ᠰᠦᠮᠡ ᠳᠦ ᠵᠢᠯ ᠳᠦ ᠬᠡᠳᠦ ᠤᠳᠠᠭᠠ ᠣᠴᠢᠳᠠᠭ᠃ ᠲᠡᠳᠡ ᠶᠡᠬᠡ ᠪᠡᠷ ᠥᠭᠯᠢᠭᠡ ᠪᠠᠷᠢᠴᠠ ᠡᠷᠭᠦᠵᠦ ᠥᠪᠡᠷ ᠤᠨ ᠪᠡᠶᠡ ᠪᠣᠯᠤᠨ ᠬᠣᠰᠢᠭᠤ ᠨᠡᠶ᠋ᠢᠲᠡ ᠶᠢᠨ ᠪᠤᠶᠠᠨ ᠵᠦᠭ ᠤᠨ ᠮᠥᠷ ᠲᠦ ᠳᠠᠭᠠᠳᠬᠠᠯ ᠬᠢᠵᠦ᠂ ᠵᠤᠯᠠ ᠬᠦᠵᠢ ᠡᠷᠭᠦᠨ ᠮᠥᠷᠭᠥᠨ ᠵᠠᠯᠪᠠᠷᠢᠳᠠᠭ ᠪᠠᠶ᠋ᠢᠵᠠᠢ᠃
ᠬᠥᠬᠡ ᠪᠠᠷᠰ ᠵᠢᠯ(1914) ᠤᠨ ᠬᠣᠶᠠᠷ ᠰᠠᠷᠠ ᠶᠢᠨ ᠦᠶᠡ ᠪᠡᠷ ᠨᠣᠶᠠᠨ ᠴᠠᠭᠳᠤᠷᠰᠡᠷᠡᠩ᠂ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠲᠠᠢ ᠪᠠᠨ ᠦᠦᠰᠢᠨᠵᠤᠤ ᠶᠢᠨ ᠰᠦᠮᠡ ᠳᠦ ᠮᠥᠷᠭᠥᠯ ᠬᠢᠵᠦ ᠠᠮᠠᠷᠠᠵᠤ ᠰᠠᠭᠤᠵᠠᠢ᠃ ᠡᠨᠡ ᠬᠦ᠌ ᠬᠤᠭᠤᠴᠠᠭᠠᠨ ᠳᠤ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠶᠠᠮᠤᠨ ᠤ ᠳᠡᠮᠴᠢ ᠡᠷᠳᠡᠨᠢᠰᠠᠩ ᠢ ᠬᠠᠮᠠᠭᠠᠯᠠᠨ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠰᠠᠨ ᠠᠴᠠ ᠬᠣᠶ᠋ᠢᠰᠢ ᠡᠨᠡ ᠤᠳᠠᠭᠠ ᠬᠡᠷᠡᠭ ᠣᠨᠣᠯᠠ ᠭᠡᠮᠡᠨ ᠦᠵᠡᠵᠦ᠂《ᠡᠷᠳᠡᠨᠢᠰᠠᠩ ᠤᠨ ᠥᠴᠢᠭ ᠪᠣᠯ ᠰᠢᠬᠠᠯᠲᠠ ᠶᠢᠨ ᠳᠣᠣᠷᠠ ᠥᠴᠢᠭᠯᠡᠭᠰᠡᠨ ᠬᠠᠭᠤᠷᠮᠠᠭ ᠶᠠᠯᠠ》 ᠭᠡᠵᠦ ᠪᠤᠰᠤᠳ ᠲᠤ ᠲᠠᠷᠬᠠᠭᠠᠨ᠂ ᠦᠨᠡᠨ ᠤᠴᠢᠷ ᠢ ᠮᠡᠳᠡᠬᠦ ᠦᠭᠡᠢ ᠮᠠᠯᠴᠢᠨ ᠲᠦᠮᠡᠨ ᠢ ᠮᠢᠨᠴᠦᠷᠡᠭᠦᠯᠵᠦ ᠳᠤᠭᠤᠶ᠋ᠢᠯᠠᠩ ᠤᠨ ᠬᠥᠮᠦᠰ ᠢ ᠡᠶ᠋ᠢᠮᠦ ᠲᠡᠶ᠋ᠢᠮᠦ ᠭᠡᠮᠡᠨ ᠮᠠᠭᠤᠯᠠᠪᠠ᠃ ᠡᠳᠡᠭᠡᠷ ᠢ ᠳᠤᠭᠤᠶ᠋ᠢᠯᠠᠩ ᠤᠨ ᠬᠢᠨ ᠣᠯᠵᠤ ᠰᠣᠨᠣᠰᠤᠭᠠᠳ ᠴᠠᠭᠳᠤᠷᠰᠡᠷᠡᠩ ᠨᠣᠶᠠᠨ ᠪᠣᠯᠤᠨ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠳᠦ ᠨᠡᠩ ᠬᠣᠷᠣᠰᠬᠤ ᠪᠣᠯᠵᠠᠢ᠃ ᠢᠩᠭᠢᠭᠡᠳ ᠰᠢᠨᠡᠯᠡᠮᠡ᠂ ᠲᠦᠪᠰᠢᠨ ᠵᠡᠷᠭᠡ ᠬᠣᠷᠢᠭᠠᠳ ᠬᠥᠮᠦᠨ ᠢ ᠳᠠᠭᠠᠭᠤᠯᠤᠨ ᠤᠷᠢᠳ ᠢᠶᠠᠷ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠢ ᠪᠠᠷᠢᠵᠤ ᠬᠣᠷᠣᠰᠤᠯ ᠢᠶᠠᠨ ᠲᠠᠶ᠋ᠢᠯᠬᠤ ᠪᠠᠷ ᠰᠥᠨᠢ ᠶᠢᠨ ᠬᠠᠷᠠᠩᠭᠤᠢ ᠶᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠦᠦᠰᠢᠨᠵᠤᠤ ᠶᠢᠨ ᠰᠦᠮᠡ ᠳᠦ ᠬᠦᠷᠴᠦ ᠨᠣᠶᠠᠨ ᠬᠠᠲᠤᠨ ᠬᠣᠶᠠᠭᠤᠯᠠ ᠶᠢᠨ ᠰᠠᠭᠤᠭᠠ ᠱᠠᠩ ᠣᠷᠳᠣᠨ ᠢ ᠪᠦᠰᠡᠯᠡᠵᠦ ᠠᠪᠴᠠᠢ᠃ ᠡᠭᠦᠳᠡᠨ ᠭᠠᠳᠠᠨᠠ ᠬᠡᠳᠦᠨ ᠣᠪᠣᠭᠠ ᠭᠠᠯ ᠲᠦᠯᠡᠵᠦ ᠤᠯᠠᠮᠵᠢᠯᠠᠯᠲᠤ ᠵᠠᠩ ᠦᠢᠯᠡ ᠪᠡᠷ ᠪᠤᠵᠠᠷ ᠢ᠋ ᠠᠷᠢᠭᠤᠳᠬᠠᠵᠤ ᠪᠠᠢᠭᠠ ᠰᠠᠨᠠᠭᠠ ᠶ᠋ᠢ ᠢᠯᠡᠷᠡᠭᠦᠯᠵᠦ᠂ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠤ᠋ᠨ ᠰᠤᠷ ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢ ᠭᠡᠷᠡᠯᠲᠦᠭᠦᠯᠵᠦ ᠪᠠᠢᠯᠠ᠃ ᠢᠩᠭᠢᠭᠡᠳ ᠳᠤᠭᠤᠢᠯᠠᠩ ᠤ᠋ᠨ ᠬᠢᠨ ᠮᠣᠩᠭᠣᠯ ᠭᠡᠷ ᠲᠦ᠍ ᠨᠣᠢᠷᠰᠤᠵᠤ ᠪᠠᠢᠭᠰᠠᠨ ᠨᠣᠶᠠᠨ ᠬᠠᠲᠤᠨ ᠬᠣᠶᠠᠭᠤᠯᠠ ᠶ᠋ᠢ ᠬᠦᠴᠦᠲᠡᠨ ᠳᠠᠭᠠᠭᠤᠯᠵᠤ ᠭᠠᠯ ᠤ᠋ᠨ ᠭᠡᠷᠡᠯ ᠳ᠋ᠦ᠍ ᠠᠪᠴᠢᠷᠠᠪᠠ᠃ ᠰᠢᠨᠠᠯᠠᠮᠠ ᠠ᠋ᠴᠠ᠄《ᠤᠷᠢᠳ ᠢ᠋ᠶ᠋ᠠᠷ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠪᠢᠳᠡ ᠳᠠᠭᠠᠭᠤᠯᠤᠨ ᠶᠠᠪᠤᠶᠠ᠂ ᠨᠣᠶᠠᠨ ᠡᠵᠡᠨ ᠦ᠌ ᠨᠡᠷᠡ ᠠᠯᠳᠠᠷ ᠢ᠋ ᠭᠤᠲᠤᠭᠠᠭᠰᠠᠨ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠢ᠋ ᠳᠡᠮᠴᠢ ᠡᠷᠳᠡᠨᠢᠰᠠᠩ ᠲᠠᠢ ᠠᠮᠠ ᠲᠤᠯᠭᠠᠭᠰᠠᠨ ᠤ᠋ ᠬᠣᠢᠨᠠ ᠰᠠᠶᠢ ᠪᠤᠴᠠᠭᠠᠶᠠ ᠁》 ᠭᠡᠬᠦ ᠳ᠋ᠦ᠍ ᠴᠠᠭᠳᠤᠷᠰᠡᠷᠡᠩ ᠡᠴᠡ᠄《ᠲᠠᠨᠤᠰ ᠮᠢᠨᠢ ᠶᠠᠭᠠᠬᠢᠵᠤ ᠪᠠᠢᠭᠠ ᠶᠤᠮ ᠪᠣᠢ? ᠨᠠᠪᠴᠢᠲᠤ ᠡᠷᠭᠦᠮᠵᠢᠯᠡᠯᠲᠦ ᠰᠡᠴᠡᠨ ᠬᠠᠲᠤᠨ ᠰᠢᠦ ᠁》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠰᠢᠨᠠᠯᠠᠮᠠ ᠡᠯᠭᠦᠵᠦ ᠠᠪᠤᠭᠠᠳ᠄《ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢ! ᠪᠢᠳᠡ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠳ᠋ᠦ᠍ ᠭᠠᠷ ᠬᠦᠷᠴᠦ ᠵᠣᠳᠣᠵᠤ ᠳᠡᠭᠦᠵᠢᠯᠡᠨ ᠲᠠᠮᠤᠯᠠᠬᠤ ᠦᠭᠡᠢ᠂ ᠬᠠᠷᠢᠨ ᠬᠤᠰᠢᠭᠤᠨ ᠤ᠋ ᠬᠠᠷᠢᠶᠠᠲᠤ ᠠᠢᠯ ᠡᠷᠦᠬᠡ ᠶ᠋ᠢ ᠳᠠᠭᠠᠭᠤᠯᠤᠨ ᠬᠠᠷᠠᠭᠠᠯᠵᠠᠨ ᠰᠤᠪᠢᠯᠠᠭᠤᠯᠤᠨᠠ᠃ ᠮᠠᠨᠤᠰ ᠲᠤ᠌ ᠢᠯᠡᠭᠦᠦ ᠮᠣᠷᠢ ᠦᠭᠡᠢ ᠲᠤᠯᠠ ᠰᠦᠮᠡ ᠶ᠋ᠢᠨ ᠯᠠᠮᠠ ᠪᠠᠭᠰᠢ ᠠ᠋ᠴᠠ ᠡᠮᠡᠭᠡᠯ ᠦᠭᠡᠢ ᠨᠢᠭᠡ ᠮᠣᠷᠢ ᠵᠢᠭᠡᠯᠡᠵᠦ ᠠᠪᠤᠯᠠ᠂ ᠭᠡᠶᠡ ᠬᠠᠲᠤᠨ ᠬᠥᠮᠦᠨ ᠢ᠋ ᠵᠠᠢᠳᠠᠩ ᠮᠣᠷᠢ ᠣᠨᠣᠭᠤᠯᠬᠤ ᠦᠭᠡᠢ ᠁》 ᠭᠡᠳ ᠬᠡᠵᠢᠶᠡᠨᠡᠢ ᠨᠢᠭᠡᠨ ᠵᠤᠵᠠᠭᠠᠨ ᠰᠢᠷᠲᠡᠭ ᠦ᠋ᠨ ᠳᠡᠭᠡᠷᠡ ᠮᠣᠳᠣᠨ ᠶᠠᠩᠭᠢᠷᠴᠠᠭ(ᠪᠠᠯᠠᠷ ᠣᠢ ᠳ᠋ᠤ᠌ ᠰᠠᠭᠤᠷᠢᠰᠢᠭᠰᠠᠨ ᠮᠣᠩᠭᠣᠯᠴᠤᠳ ᠮᠣᠷᠢ ᠪᠠᠷ ᠪᠤᠷᠭᠠᠰᠤ ᠠᠴᠢᠶᠠᠯᠠᠬᠤ ᠳ᠋ᠤ᠌ ᠡᠮᠡᠭᠡᠯ ᠦ᠋ᠨ ᠣᠷᠣᠨ ᠳ᠋ᠤ᠌ ᠵᠠᠷᠤᠳᠠᠭ 6 ᠬᠡᠰᠡᠭ ᠮᠣᠳᠣ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠵᠦᠢᠯ) ᠲᠣᠬᠣᠭᠰᠠᠨ ᠶᠠᠷᠵᠠᠩ ᠲᠦᠩᠰᠢᠶᠡ ᠮᠣᠷᠢᠨ(ᠲᠠᠷᠭᠤ ᠬᠦᠴᠦ ᠪᠡᠷ ᠳᠣᠷᠣᠢ ᠥᠴᠦᠬᠡᠨ ᠴᠦ᠍ ᠵᠢᠷᠣᠭᠠ ᠰᠠᠢᠪᠤᠷ ᠦᠭᠡᠢ ᠬᠠᠲᠠᠭᠤ ᠠᠯᠬᠤᠭᠠ ᠲᠠᠢ ᠮᠣᠷᠢ) ᠳᠡᠭᠡᠷᠡ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠰᠤᠭᠤᠳᠠᠵᠤ ᠤᠨᠤᠭᠤᠯᠤᠭᠠᠳ ᠢᠮᠠᠭᠠᠨ ᠰᠤᠷᠮᠤ ᠪᠠᠷ ᠲᠠᠮᠤᠭᠰᠠᠨ ᠤᠲᠠᠰᠤ ᠪᠠᠷ ᠳᠡᠯᠳᠡᠵᠦ ᠨᠡᠬᠡᠭᠰᠡᠨ ᠰᠢᠷᠦᠭᠦᠨ ᠰᠤᠮᠠᠯ ᠢ᠋ ᠲᠣᠯᠣᠭᠠᠢ ᠳ᠋ᠤᠨᠢ ᠤᠭᠯᠠᠵᠤ ᠰᠢᠷᠭᠤᠭᠤᠯᠤᠭᠠᠳ ᠮᠣᠷᠢ ᠶ᠋ᠢ ᠨᠢ ᠬᠥᠲᠥᠯᠦᠨ ᠦᠦᠰᠢᠨᠵᠣᠣ ᠶ᠋ᠢᠨ ᠰᠦᠮᠡ ᠡᠴᠡ ᠵᠡᠭᠦᠨᠰᠢ ᠶᠠᠪᠤᠵᠠᠢ᠃ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠤ᠋ ᠰᠡᠭᠦᠯᠡᠷ ᠡᠮᠦᠨᠡᠰᠢᠯᠡᠵᠦ ᠳᠠᠬᠢᠨ ᠪᠠᠷᠠᠭᠤᠨ ᠬᠣᠢᠰᠢ ᠴᠢᠳᠥᠷᠲᠦ ᠮᠣᠷᠢ ᠲᠠᠯᠪᠢᠴᠢᠬᠠᠭᠠᠳ ᠣᠯᠳᠠᠳᠠᠭ ᠦᠭᠡᠢ ᠪᠠᠯᠠᠷ ᠶᠡᠬᠡ ᠣᠢ ᠳᠤᠮᠳᠠᠭᠤᠷ ᠲᠣᠭᠣᠷᠢᠭᠤ ᠪᠠᠷ ᠵᠠᠮ ᠪᠤᠷᠤᠭᠤᠯᠠᠨ ᠪᠠᠷᠤᠭ ᠬᠣᠷᠢᠭᠠᠳ ᠺᠢᠯᠣᠮᠧᠲ᠋ᠷ ᠶᠠᠪᠤᠭᠠᠳ ᠪᠠᠨᠴᠢᠨ ᠰᠦᠮᠡ ᠳᠡᠭᠡᠷᠡ ᠬᠦᠷᠴᠡᠢ᠃
ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠬᠡᠳᠦᠢᠪᠡᠷ ᠳᠤᠭᠤᠢᠯᠠᠩ ᠢ᠋ ᠳᠠᠷᠤᠩᠭᠤᠢᠯᠠᠬᠤ ᠳ᠋ᠤ᠌ ᠬᠠᠲᠠᠭᠤ ᠴᠢᠩᠭᠠ ᠪᠣᠯᠪᠠᠴᠤ ᠨᠢᠭᠡᠨ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠪᠡᠶᠡ ᠳᠡᠭᠡᠷᠡ ᠲᠤᠯᠬᠤ ᠡᠨᠡ ᠬᠦ᠌ ᠨᠡᠷᠡ ᠦᠭᠡᠢ ᠬᠠᠴᠢᠨ ᠵᠢᠭᠲᠡᠢ ᠵᠡᠷᠯᠢᠭ ᠬᠠᠤᠯᠢ ᠳ᠋ᠤ᠌ ᠡᠪᠡᠳᠴᠦ ᠲᠡᠰᠬᠦ ᠦᠭᠡᠢ ᠳ᠋ᠡᠭᠡᠨ᠂ ᠪᠠᠨᠴᠢᠨ ᠰᠦᠮᠡ ᠬᠦᠷᠬᠦ ᠳ᠋ᠦ᠍ ᠨᠢᠭᠡᠨᠲᠡ ᠶᠠᠯᠠ ᠪᠠᠨ ᠪᠦᠬᠦᠨ ᠢ᠋ ᠴᠠᠭᠠᠪᠤᠷᠢᠯᠠᠭᠰᠠᠨ ᠪᠠᠢᠨᠠ᠃ ᠢᠩᠭᠢᠭᠡᠳ ᠳᠤᠭᠤᠢᠯᠠᠩ ᠤ᠋ᠨ ᠬᠢᠨ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠢ᠋ ᠡᠮᠬᠢᠳᠬᠡᠵᠦ ᠲᠤᠰ ᠬᠥᠮᠦᠨ ᠳ᠋ᠦ᠍ᠨᠢ ᠳᠠᠬᠢᠨ ᠳᠠᠪᠲᠠᠨ ᠰᠣᠨᠣᠰᠬᠠᠵᠤ ᠵᠥᠪᠰᠢᠶᠡᠷᠡᠭᠦᠯᠦᠭᠡᠳ ᠭᠠᠷ ᠤ᠋ᠨ ᠬᠤᠷᠤᠭᠤ ᠶ᠋ᠢ ᠨᠢ ᠳᠠᠷᠤᠭᠤᠯᠵᠠᠢ᠃ ᠢᠩᠭᠢᠭᠡᠳ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠠᠢᠯ ᠡᠷᠦᠬᠡ ᠳᠠᠭᠠᠭᠤᠯᠤᠨ ᠰᠠᠭᠤᠯᠭᠠᠵᠤ ᠲᠤᠰᠬᠠᠢ ᠬᠥᠮᠦᠨ ᠢ᠋ᠶ᠋ᠡᠷ ᠰᠤᠪᠢᠯᠠᠨ ᠬᠠᠮᠠᠭᠠᠯᠠᠭᠤᠯᠪᠠ᠃
ᠰᠢᠨᠠᠯᠠᠮᠠ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠤ᠋ ᠥᠴᠢᠭ ᠢ᠋ ᠠᠪᠴᠤ ᠳᠤᠭᠤᠢᠯᠠᠩ ᠤ᠋ᠨ ᠨᠡᠷᠡ ᠪᠡᠷ ᠪᠠᠷᠠᠭᠤᠨ ᠬᠦᠩ ᠲᠤᠰᠠᠯᠠᠭᠴᠢ ᠴᠣᠭᠲᠤᠸᠴᠢᠷ ᠲᠤ᠌ ᠡᠷᠭᠦᠯᠲᠡ ᠪᠢᠴᠢᠵᠦ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠪᠣᠯᠤᠨ ᠳᠡᠮᠴᠢ ᠡᠷᠳᠡᠨᠢᠰᠠᠩ ᠢ᠋ ᠰᠢᠢᠳᠬᠡᠭᠦᠯᠬᠦ ᠪᠡᠷ ᠱᠠᠭᠠᠷᠳᠠᠪᠠ᠃ ᠴᠣᠭᠲᠤᠸᠴᠢᠷ ᠲᠡᠷᠡ ᠳᠠᠷᠤᠢ ᠳ᠋ᠤᠨᠢ ᠴᠢᠭᠤᠯᠭᠠᠨ ᠤ᠋ ᠲᠠᠰᠤᠯᠤᠨ ᠰᠢᠢᠳᠬᠡᠭᠴᠢ ᠶ᠋ᠢᠨ ᠶᠠᠮᠤᠨ ᠳ᠋ᠤ᠌ ᠳᠠᠮᠵᠢᠭᠤᠯᠤᠨ ᠮᠡᠳᠡᠭᠦᠯᠦᠭᠰᠡᠨ ᠶᠦᠮ᠃ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠴᠢᠭᠤᠯᠭᠠᠨ ᠤ᠋ ᠲᠠᠰᠤᠯᠤᠨ ᠰᠢᠢᠳᠬᠡᠭᠴᠢ ᠶ᠋ᠢᠨ ᠶᠠᠮᠤᠨ ᠠ᠋ᠴᠠ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠪᠠᠨᠴᠢᠨ ᠰᠦᠮᠡ ᠳᠡᠭᠡᠷᠡ ᠴᠢᠭᠤᠯᠭᠠᠨ ᠴᠢᠭᠤᠯᠵᠤ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠤ᠋《ᠨᠠᠪᠴᠢᠲᠤ ᠡᠷᠭᠦᠮᠵᠢᠯᠡᠯᠲᠦ ᠭᠤᠤᠮᠢᠩ ᠬᠠᠲᠤᠨ》 ᠭᠡᠬᠦ ᠬᠡᠷᠬᠡᠮ ᠦ᠋ᠨ ᠴᠣᠯᠠ ᠶ᠋ᠢ ᠨᠢ ᠳᠠᠭᠠᠷᠢᠵᠤ ᠰᠢᠢᠳᠬᠡᠪᠡ᠃ ᠡᠭᠦᠨ ᠦ᠌ ᠬᠠᠮᠲᠤ ᠣᠯᠠᠨ ᠲᠦᠮᠡᠨ ᠢ᠋ ᠳᠤᠭᠤᠢᠯᠠᠩ ᠢ᠋ᠶ᠋ᠠᠨ ᠲᠦᠷᠭᠡᠨ ᠲᠠᠷᠬᠠᠭᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠰᠢᠢᠳᠪᠦᠷᠢᠯᠡᠭᠰᠡᠨ ᠪᠠᠢᠨᠠ᠃
ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠠᠢᠵᠢ᠂ ᠬᠠᠷᠠᠴᠤᠰ ᠪᠣᠯᠤᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠮᠦᠰ ᠦ᠋ᠨ ᠵᠠᠭᠠᠯᠳᠤᠯᠭᠠ ᠪᠣᠯᠤᠨ ᠡᠰᠡᠷᠭᠦᠴᠡᠯ ᠦ᠋ᠨ ᠬᠦᠴᠦᠨ ᠦ᠌ ᠰᠢᠬᠠᠯᠲᠠ ᠠ᠋ᠴᠠ ᠪᠣᠯᠵᠤ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠢᠷᠭᠠᠢ ᠶ᠋ᠢᠨ ᠮᠠ ᠪᠦ ᠰᠢᠶᠠᠩ ᠵᠠᠩᠵᠤᠨ ᠤ᠋ ᠼᠠᠨᠮᠤ ᠢᠦᠢ ᠲᠢᠩ ᠮᠢᠩ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠢᠷᠡᠵᠦ ᠨᠡᠢᠭᠡᠮ ᠦ᠋ᠨ ᠪᠠᠢᠴᠠᠭᠠᠯᠲᠠ ᠬᠢᠪᠡ᠃ ᠰᠢᠨᠠᠯᠠᠮᠠ ᠶ᠋ᠢᠨ ᠳᠤᠷᠠᠳᠤᠯᠭᠠ ᠶ᠋ᠢ ᠦᠨᠳᠦᠰᠦᠯᠡᠵᠦ᠂ ᠴᠠᠭᠳᠤᠷᠰᠡᠷᠡᠩ ᠦ᠋ᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠲᠤᠰᠢᠶᠠᠯ ᠵᠡᠷᠭᠡ ᠶ᠋ᠢ ᠤᠭᠴᠠᠷᠠᠭᠤᠯᠬᠤ ᠶᠠᠪᠤᠳᠠᠯ ᠤᠷᠤᠭᠰᠢᠲᠠᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠳᠠᠷᠠᠭᠠ ᠵᠢᠯ ᠨᠢ ᠶᠤᠸᠠᠨ ᠱᠢ ᠺᠠᠢ ᠽᠦᠩᠲ᠋ᠦ᠋ᠩ ᠦ᠋ᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠴᠠᠭᠳᠤᠷᠰᠡᠷᠡᠩ ᠦ᠋ᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠲᠤᠰᠢᠶᠠᠯ ᠢ᠋ ᠤᠭᠴᠠᠷᠠᠭᠤᠯᠵᠠᠢ᠃ ᠢᠩᠭᠢᠭᠡᠳ ᠰᠢᠨᠠᠯᠠᠮᠠ ᠶ᠋ᠢᠨ ᠤᠳᠤᠷᠢᠳᠤᠭᠰᠠᠨ ᠳᠤᠭᠤᠢᠯᠠᠩ ᠨᠢ ᠪᠠᠰᠠ ᠨᠢᠭᠡᠨ ᠤᠳᠠᠭᠠ ᠢᠯᠠᠯᠲᠠ ᠣᠯᠪᠠ᠃
ᠲᠣᠳᠣᠷᠬᠠᠢᠯᠠᠯ
1᠂ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠲᠤᠬᠠᠢ ᠵᠠᠷᠢᠮ ᠵᠣᠬᠢᠶᠠᠯ ᠳ᠋ᠤ᠌ ᠰᠢᠨᠡᠯᠡᠮᠡ᠂ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠦᠦᠰᠢᠨᠵᠤᠤ ᠶ᠋ᠢᠨ ᠰᠦᠮᠡ ᠡᠴᠡ ᠪᠠᠷᠢᠵᠤ ᠶᠠᠩᠭᠢᠷᠴᠠᠭ ᠲᠣᠬᠣᠭᠰᠠᠨ ᠮᠣᠷᠢ ᠤᠨᠤᠭᠤᠯᠵᠤ ᠲᠣᠯᠣᠭᠠᠢ ᠳ᠋ᠤᠨᠢ ᠰᠤᠮᠠᠯ ᠤᠭᠯᠠᠨ ᠲᠠᠭᠤᠵᠤ ᠶᠠᠪᠤᠭᠠᠳ33 ᠵᠤᠷᠪᠤᠰ ᠥᠴᠢᠭ ᠢ᠋ ᠨᠢ ᠠᠪᠴᠤ ᠳᠠᠷᠠᠭᠠ ᠨᠢ ᠪᠠᠯᠠᠷ ᠣᠢ ᠳ᠋ᠤ᠌ ᠠᠯᠠᠭᠰᠠᠨ ᠭᠡᠵᠦ ᠪᠢᠴᠢᠵᠦ ᠪᠣᠢ᠃ ᠡᠨᠡ ᠨᠢ ᠪᠣᠳᠠᠲᠤ ᠤᠴᠢᠷ ᠲᠠᠢ ᠠᠪᠴᠠᠯᠳᠤᠬᠤ ᠦᠭᠡᠢ᠃
2᠂ ᠶᠠᠩᠭᠢᠷᠴᠠᠭ ᠲᠣᠬᠣᠭᠰᠠᠨ ᠮᠣᠷᠢ ᠤᠨᠤᠭᠤᠯᠵᠤ ᠥᠴᠢᠭ ᠢ᠋ ᠠᠪᠤᠭᠰᠠᠨ ᠤᠴᠢᠷ ᠪᠣᠯ1914 ᠣᠨ ᠤ᠋(ᠬᠥᠬᠡ ᠪᠠᠷᠰ ᠵᠢᠯ)2 ᠰᠠᠷᠠ ᠶ᠋ᠢᠨ25 ᠤ᠋ ᠡᠳᠦᠷ ᠦ᠋ᠨ ᠰᠥᠨᠢ ᠶ᠋ᠢᠨ ᠦᠦᠰᠢᠨᠵᠦᠦ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡᠬᠢ ᠤᠴᠢᠷ ᠪᠣᠯᠤᠨᠠ᠃
3᠂ ᠰᠢᠨᠡᠯᠡᠮᠡ ᠂ ᠴᠣᠭᠳᠥ᠋ᠭᠦᠷᠡᠩ ᠵᠡᠷᠭᠡ ᠬᠥᠮᠦᠰ ᠢ᠋ ᠲᠣᠮᠢᠯᠠᠵᠤ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠢ᠋ ᠠᠯᠠᠭᠰᠠᠨ ᠤᠴᠢᠷ ᠪᠣᠯ1916 ᠣᠨ(ᠤᠯᠠᠭᠠᠨ ᠯᠤᠤ ᠵᠢᠯ) ᠦ᠋ᠨ4 ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠶ᠋ᠢᠨ ᠨᠢᠭᠡᠨ ᠰᠥᠨᠢ ᠦᠦᠰᠢᠨᠵᠦᠦ ᠶ᠋ᠢᠨ ᠪᠦᠷᠢᠨᠲᠦ ᠶ᠋ᠢᠨ ᠬᠡᠪᠡᠮᠢᠳᠤᠭ ᠤ᠋ᠨ ᠭᠡᠷ ᠲᠡᠬᠢ ᠤᠴᠢᠷ ᠪᠣᠯᠤᠨᠠ᠃
4᠂ ᠲᠤᠰ ᠬᠡᠰᠡᠭ ᠦ᠋ᠨ ᠠᠭᠤᠯᠭᠠ ᠶ᠋ᠢ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠴᠠᠭᠠᠨᠳᠦᠩ ᠨᠠᠰᠤᠲᠠᠨ ᠪᠠ ᠪᠦᠷᠢᠨᠵᠢᠷᠭᠠᠯ ᠨᠠᠰᠤᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠡᠮᠬᠢᠳᠬᠡᠨ ᠨᠠᠢᠷᠠᠭᠤᠯᠪᠠ᠃
ᠵᠡᠭᠦᠯᠲᠡ
1.《ᠴᠢᠩ ᠤᠯᠤᠰ ᠤ᠋ᠨ ᠮᠣᠩᠭᠣᠯ ᠢ᠋ ᠵᠠᠰᠠᠬᠤ ᠬᠠᠤᠯᠢ》 ᠶ᠋ᠢᠨ ᠳᠣᠲᠣᠷᠠ ᠰᠠᠳᠤᠷ ᠰᠠᠮᠠᠭᠤᠨ ᠤ᠋ ᠲᠤᠬᠠᠢ ᠥᠭᠦᠯᠡᠭᠰᠡᠨ ᠨᠢ᠄
(1) ᠲᠠᠢᠵᠢ ᠢᠵᠠᠭᠤᠷᠲᠠᠨ ᠬᠥᠮᠦᠨ᠂ ᠡᠭᠡᠯ ᠠᠷᠠᠳ ᠤ᠋ᠨ ᠡᠬᠡᠨᠡᠷ ᠲᠦ᠍ ᠬᠠᠯᠳᠠᠪᠠᠯ ᠶᠠᠯᠠ ᠬᠥᠩᠭᠡᠨ᠃
(2) ᠪᠣᠭᠣᠯ ᠠᠯᠪᠠᠲᠤ᠂ ᠲᠠᠢᠵᠢ ᠢᠵᠠᠭᠤᠷᠲᠠᠨ ᠤ᠋ ᠡᠬᠡᠨᠡᠷ ᠲᠦ᠍ ᠬᠠᠯᠳᠠᠪᠠᠯ ᠶᠠᠯᠠ ᠬᠦᠨᠳᠦ᠃
(3) ᠡᠩ ᠦ᠋ᠨ ᠠᠷᠠᠳ᠂ ᠡᠩ ᠦ᠋ᠨ ᠠᠷᠠᠳ ᠤ᠋ᠨ ᠡᠬᠡᠨᠡᠷ ᠲᠦ᠍ ᠬᠠᠯᠳᠠᠪᠠᠯ60 ᠲᠠᠰᠢᠭᠤᠷ ᠵᠠᠨᠴᠢᠨᠠ᠃
(4) ᠠᠯᠪᠠᠲᠤ ᠠᠷᠠᠳ᠂ ᠲᠠᠢᠵᠢ ᠬᠥᠮᠦᠨ ᠦ᠌ ᠡᠬᠡᠨᠡᠷ ᠲᠦ᠍ ᠬᠠᠯᠳᠠᠪᠠᠯ ᠨᠢᠭᠡ ᠳᠠᠬᠢᠨ ᠢ᠋ᠶ᠋ᠠᠷ ᠰᠢᠢᠳᠬᠡᠨᠡ᠃
(5) ᠬᠠᠷᠠᠴᠤ ᠬᠥᠮᠦᠨ᠂ ᠨᠣᠶᠠᠨ ᠢᠵᠠᠭᠤᠷᠲᠠᠨ ᠤ᠋ ᠬᠠᠲᠤᠨ ᠳ᠋ᠤ᠌ ᠬᠠᠯᠳᠠᠪᠠᠯ ᠬᠡᠳᠦ ᠬᠡᠳᠦᠨ ᠳᠠᠬᠢᠨ ᠢ᠋ᠶ᠋ᠠᠷ ᠶᠠᠯᠠᠯᠠᠨ ᠰᠢᠢᠳᠬᠡᠨᠡ᠃
ᠡᠭᠦᠨ ᠳ᠋ᠦ᠍ ᠪᠠᠰᠠ᠄
① ᠡᠷᠡ ᠬᠥᠮᠦᠨ ᠤᠷᠢᠳ ᠢ᠋ᠶ᠋ᠠᠷ ᠡᠮᠡ ᠬᠥᠮᠦᠨ ᠳ᠋ᠦ᠍ ᠭᠠᠷ ᠬᠦᠷᠦᠭᠰᠡᠨ ᠪᠣᠯ ᠨᠢᠭᠡᠨ ᠬᠤᠪᠢ᠃
② ᠡᠮᠡ ᠬᠥᠮᠦᠨ ᠤᠷᠢᠳ ᠢ᠋ᠶ᠋ᠠᠷ ᠡᠷᠡ ᠬᠥᠮᠦᠨ ᠳ᠋ᠦ᠍ ᠭᠠᠷ ᠬᠦᠷᠦᠭᠰᠡᠨ ᠪᠣᠯ ᠬᠣᠶᠠᠷ ᠬᠤᠪᠢ ᠪᠠᠷ ᠭᠡᠵᠦ ᠪᠢᠴᠢᠵᠦ ᠪᠣᠢ᠃
ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠦᠦᠰᠢᠨ ᠱᠠᠩ ᠣᠷᠳᠣᠨ ᠳ᠋ᠠᠭᠠᠨ ᠲᠤᠰᠬᠠᠢ ᠠᠮᠠᠷᠠᠵᠤ ᠰᠤᠯᠠ ᠬᠡᠪᠲᠡᠳᠡᠭ ᠨᠢᠭᠡᠨ ᠮᠣᠩᠭᠣᠯ ᠭᠡᠷ ᠪᠠᠢᠳᠠᠭ ᠭᠡᠨᠡ᠃ ᠲᠡᠷᠡ ᠦᠷᠭᠦᠯᠵᠢ ᠣᠷᠣᠢ ᠪᠣᠯᠪᠠᠯ ᠡᠨᠳᠡ ᠢᠷᠡᠵᠦ ᠠᠮᠠᠷᠠᠳᠠᠭ᠃ ᠲᠡᠷᠡ᠂ ᠳᠡᠮᠴᠢ ᠡᠷᠳᠡᠨᠢᠰᠠᠩ ᠲᠠᠢ ᠡᠨᠳᠡ ᠬᠥᠯ ᠭᠠᠷ ᠪᠣᠯᠤᠭᠰᠠᠨ ᠭᠡᠨᠡ᠃
ᠡᠨᠡ ᠨᠢ ᠬᠡᠳᠦᠢᠪᠡᠷ ᠨᠢᠭᠡᠨ ᠱᠠᠯᠢᠭ ᠰᠠᠮᠠᠭᠤᠨ ᠤ᠋ ᠤᠴᠢᠷ ᠪᠣᠯᠪᠠᠴᠤ《ᠨᠠᠪᠴᠢᠲᠤ ᠡᠷᠭᠦᠮᠵᠢᠯᠡᠯᠲᠦ ᠭᠤᠤᠮᠢᠩ ᠬᠠᠲᠤᠨ》 ᠤ᠋ ᠬᠤᠪᠢ ᠳ᠋ᠤ᠌᠂ ᠢᠯᠠᠩᠭᠤᠶᠠ ᠮᠠᠨᠵᠤ ᠶ᠋ᠢᠨ ᠬᠠᠤᠯᠢ ᠳ᠋ᠤ᠌ ᠬᠣᠯᠪᠣᠭᠳᠠᠭᠰᠠᠨ ᠲᠤᠯᠠ ᠨᠠᠷᠠᠨᠭᠡᠷᠡᠯ ᠦ᠋ᠨ ᠡᠨᠡ ᠬᠦ᠌ ᠡᠮᠵᠡᠭ ᠲᠠᠯᠠ ᠶ᠋ᠢ ᠪᠠᠷᠢᠵᠤ ᠰᠢᠨᠠᠯᠠᠮᠠ ᠳᠡᠭᠡᠭᠰᠢ ᠵᠠᠭᠠᠯᠳᠤᠭᠰᠠᠨ ᠪᠣᠯᠬᠣᠷ ᠵᠠᠷᠭᠤ ᠤᠨᠤᠵᠤ ᠨᠠᠷᠠᠨᠭᠡᠷᠡᠯ ᠬᠠᠲᠤᠨ ᠰᠢᠢᠳᠬᠡᠭᠳᠡᠵᠡᠢ᠃
2. ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠦ᠋ᠨ ᠥᠴᠢᠭ᠄
(1) ᠴᠠᠭᠳᠤᠷᠰᠡᠷᠡᠩ ᠸᠠᠩ ᠤ᠋ᠨ ᠪᠠᠭᠠ ᠬᠠᠲᠤᠨ ᠤ᠋ ᠡᠷᠬᠡ ᠲᠠᠩᠬᠢ ᠪᠠᠨ ᠠᠰᠢᠭᠯᠠᠵᠤ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠡᠷᠬᠡ ᠶ᠋ᠢ ᠳᠤᠷᠠ ᠪᠠᠷ ᠠᠳᠬᠤᠭᠰᠠᠨ᠃
(2) ᠬᠣᠰᠢᠭᠤ ᠳᠠᠶᠠᠭᠠᠷ ᠵᠥᠪᠯᠡᠯᠳᠦᠨ ᠲᠣᠭᠲᠠᠭᠠᠭᠰᠠᠨ ᠵᠦᠢᠯ ᠢ᠋ ᠡᠪᠳᠡᠵᠦ ᠬᠤᠰᠢᠭᠤᠨ ᠤ᠋ ᠴᠢᠬᠡ ᠵᠢᠬᠳᠠ ᠶ᠋ᠢ ᠳᠤᠷᠠ ᠪᠠᠷ ᠨᠡᠭᠡᠭᠡᠨ ᠦᠵᠡᠭᠰᠡᠨ᠃
(3) ᠰᠢᠳᠤᠷᠭᠤ ᠲᠦᠰᠢᠮᠡᠳ ᠢ᠋ ᠭᠠᠳᠠᠭᠤᠷᠴᠢᠯᠠᠨ ᠵᠢᠰᠤᠷ ᠵᠠᠯᠢᠬᠠᠢ ᠬᠥᠮᠦᠰ ᠢ᠋ ᠱᠠᠩ ᠶᠠᠮᠤᠨ ᠳ᠋ᠤ᠌ ᠳᠣᠲᠣᠨᠣᠴᠢᠯᠠᠨ ᠬᠡᠷᠡᠭᠯᠡᠭᠰᠡᠨ᠃
(4) ᠠᠰᠢᠭ ᠮᠥᠩᠭᠥᠨ ᠳ᠋ᠦ᠍ ᠰᠢᠨᠤᠵᠤ ᠵᠠᠯᠢᠬᠠᠢ ᠲᠦᠰᠢᠮᠡᠳ ᠢ᠋ ᠬᠡᠷᠡᠭᠯᠡᠵᠦ ᠰᠡᠢᠨᠳᠤᠷᠡ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠡᠵᠡᠨ ᠪᠠᠶᠠᠴᠤᠳ ᠲᠤ᠌ ᠭᠠᠵᠠᠷ ᠲᠠᠯᠪᠢᠵᠤ ᠥᠭᠭᠦᠭᠰᠡᠨ᠃
(5) ᠸᠠᠩ ᠤ᠋ᠨ ᠣᠷᠳᠣᠨ ᠤ᠋ ᠪᠣᠭᠣᠯ ᠵᠠᠷᠤᠴᠠ᠂ ᠰᠢᠪᠡᠭᠴᠢᠨ ᠳ᠋ᠦ᠍ ᠬᠠᠲᠠᠭᠤ ᠬᠠᠨᠳᠤᠵᠤ ᠡᠯᠳᠡᠪ ᠬᠠᠯᠠ ᠦᠵᠡᠭᠦᠯᠵᠦ ᠵᠡᠭᠦᠦ ᠰᠢᠪᠡᠵᠦ ᠤᠶᠠᠵᠤ ᠵᠣᠳᠣᠭᠰᠠᠨ᠃
(6) ᠠᠢᠯᠠᠳᠬᠠᠯ ᠪᠠᠶᠠᠨᠰᠠᠩ᠂ ᠪᠢᠴᠢᠭᠡᠴᠢ ᠴᠤᠭᠯᠠᠢᠨᠠᠮᠵᠢᠯ ᠨᠠᠷ ᠲᠠᠢ ᠨᠡᠢᠯᠡᠵᠦ ᠵᠡᠷᠭᠡ ᠣᠯᠤᠭᠠᠳᠤᠢ ᠲᠠᠢᠵᠢ ᠭᠦᠮᠪᠦᠵᠠᠪ᠂ ᠲᠥᠪᠡᠳ ᠯᠠᠮᠠ ᠷᠦᠪᠠᠪᠤᠤ ᠶ᠋ᠢ ᠬᠠᠯᠬᠠ ᠳ᠋ᠤ᠌ ᠶᠠᠪᠤᠭᠤᠯᠵᠤ᠂ ᠳᠤᠭᠤᠢᠯᠠᠩ ᠤ᠋ᠨ ᠣᠯᠠᠨ ᠢ᠋ ᠸᠠᠩ ᠨᠣᠶᠠᠨ ᠢ᠋ ᠫᠤᠤᠳᠠᠵᠤ ᠭᠡᠵᠢᠭᠡ ᠶ᠋ᠢ ᠨᠢ ᠣᠨᠣᠪᠠ ᠭᠡᠵᠦ ᠭᠦᠳᠬᠡᠨ ᠮᠡᠳᠡᠭᠦᠯᠦᠭᠰᠡᠨ᠃
(7) ᠴᠢᠩᠭᠢᠰ ᠬᠠᠭᠠᠨ ᠤ᠋ ᠣᠩᠭᠣᠨ ᠰᠦᠯᠳᠡ ᠶ᠋ᠢ ᠠᠷᠤ ᠮᠣᠩᠭᠣᠯ ᠳ᠋ᠤ᠌ ᠰᠢᠯᠵᠢᠭᠦᠯᠦᠨ ᠠᠪᠠᠴᠢᠬᠤ ᠪᠠᠷ ᠲᠥᠯᠥᠪᠯᠡᠭᠰᠡᠨ᠃
(8) ᠴᠠᠭᠳᠤᠷᠰᠡᠷᠡᠩ ᠸᠠᠩ ᠲᠠᠢ ᠪᠠᠨ ᠬᠠᠮᠲᠤ ᠤᠲᠠᠢ ᠠᠭᠤᠯᠠ ᠪᠣᠯᠤᠨ ᠪᠡᠭᠡᠵᠢᠩ ᠵᠡᠷᠭᠡ ᠦᠵᠡᠰᠬᠦᠯᠡᠩᠲᠦ ᠰᠠᠢᠬᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠲᠣᠭᠣᠷᠢᠨ ᠶᠠᠪᠤᠬᠤ ᠳ᠋ᠠᠭᠠᠨ ᠬᠠᠮᠢᠭᠠ ᠬᠦᠷᠪᠡᠯ ᠲᠡᠨᠳᠡᠬᠢ ᠶ᠋ᠢᠨ ᠮᠥᠩᠭᠥᠨ ᠲᠤᠯᠤᠮ ᠤ᠋ᠳ ᠠ᠋ᠴᠠ ᠥᠨᠳᠥᠷ ᠬᠦᠦ ᠲᠡᠢ ᠵᠢᠭᠡᠯᠡᠯᠭᠡ ᠮᠥᠩᠭᠥ ᠠᠪᠴᠤ ᠱᠠᠯᠢᠨ ᠪᠦᠷᠢᠯᠭᠡᠭᠡᠳ ᠪᠦᠬᠦ ᠬᠤᠰᠢᠭᠤᠨ ᠳ᠋ᠤ᠌ ᠥᠷᠢ ᠴᠢᠷᠦᠭᠳᠡᠯ ᠦ᠋ᠨ ᠳᠠᠷᠤᠭᠠᠰᠤ ᠶ᠋ᠢ ᠨᠡᠮᠡᠭᠳᠡᠭᠦᠯᠦᠭᠰᠡᠨ᠃
(9) ᠬᠦᠷᠭᠡᠨ ᠬᠦᠦ ᠡᠷᠳᠡᠨᠢᠰᠠᠩ ᠲᠠᠢ ᠰᠠᠳᠤᠷ ᠶᠠᠪᠤᠯᠴᠠᠵᠤ ᠲᠡᠭᠦᠨ ᠢ᠋ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠳᠣᠲᠣᠭᠠᠳᠤ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠭᠤᠯᠤᠭᠰᠠᠨ᠃
(10) ᠬᠠᠷᠠᠭᠴᠢᠨ ᠦᠬᠡᠷ ᠵᠢᠯ ᠦ᠋ᠨ ᠲᠠᠮᠠᠭᠠ ᠶ᠋ᠢᠨ ᠪᠦᠷᠢᠳᠬᠡᠯ ᠢ᠋ᠶ᠋ᠡᠷ ᠨᠣᠶᠠᠳ ᠲᠦᠰᠢᠮᠡᠳ ᠴᠥᠮ ᠪᠦᠷᠢᠳᠦᠨ ᠵᠥᠪᠯᠡᠯᠳᠦᠭᠡᠳ ᠢᠷᠭᠡᠨ ᠤᠯᠤᠰ ᠲᠤᠷ ᠳᠠᠭᠠᠶᠠ ᠭᠡᠰᠡᠨ ᠢ᠋ ᠰᠢᠭᠤᠳ ᠡᠰᠡᠷᠭᠦᠴᠡᠭᠰᠡᠨ᠃
(11) ᠰᠢᠢᠳᠬᠡᠬᠦ ᠪᠡᠷ ᠪᠠᠢᠭᠰᠠᠨ ᠳᠡᠮᠴᠢ ᠡᠷᠳᠡᠨᠢᠰᠠᠩ ᠢ᠋ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠭᠠᠵᠠᠷ ᠲᠤ᠌ ᠵᠢᠷᠣᠭᠠ ᠮᠣᠷᠢ᠂ ᠮᠥᠩᠭᠥ ᠵᠠᠷᠤᠵᠤ ᠪᠠᠢᠭᠠᠳ ᠳᠠᠯᠳᠠ ᠪᠠᠷ ᠭᠠᠷᠭᠠᠵᠤ ᠠᠪᠤᠭᠰᠠᠨ᠃
(12) ᠲᠥᠪᠡᠳ ᠱᠠᠪᠷᠤᠩ ᠷᠦᠪᠡᠪᠦᠦ ᠶ᠋ᠢ ᠭᠣᠬᠠᠳᠠᠨ ᠲᠠᠲᠠᠵᠤ ᠳᠤᠭᠤᠢᠯᠠᠩ ᠤ᠋ᠨ ᠲᠦᠷᠦᠭᠦᠴᠦᠳ ᠢ᠋ ᠬᠣᠣᠷᠯᠠᠬᠤ ᠪᠠᠷ ᠬᠠᠷᠢᠶᠠᠯ ᠬᠢᠯᠭᠡᠨ ᠬᠥᠮᠦᠰ ᠦ᠋ᠨ ᠵᠣᠷᠢᠭ ᠰᠦᠯᠳᠡ ᠶ᠋ᠢ ᠪᠠᠭᠤᠷᠠᠭᠤᠯᠤᠭᠰᠠᠨ᠃
(13) ᠬᠤᠰᠢᠭᠤᠨ ᠤ᠋ ᠭᠠᠵᠠᠷ ᠨᠤᠲᠤᠭ ᠢ᠋ ᠶᠡᠬᠡ ᠪᠡᠷ ᠬᠤᠳᠠᠯᠳᠤᠵᠤ ᠮᠠᠯᠴᠢᠳ ᠤ᠋ᠨ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷ ᠢ᠋ ᠪᠠᠭᠠᠰᠬᠠᠵᠤ ᠰᠠᠭᠤᠷᠢᠰᠢᠯ ᠨᠤᠲᠤᠭ ᠢ᠋ ᠠᠯᠳᠠᠭᠤᠯᠤᠭᠰᠠᠨ᠃
(14) ᠱᠠᠩ ᠶᠠᠮᠤᠨ ᠤ᠋ ᠳᠦᠷᠢᠮ ᠬᠡᠮᠵᠢᠶᠡ ᠶ᠋ᠢ ᠡᠪᠳᠡᠵᠦ ᠬᠤᠰᠢᠭᠤᠨ ᠤ᠋ ᠡᠷᠬᠡ ᠮᠠᠲᠠᠯ ᠢ᠋ ᠡᠵᠡᠮᠰᠢᠨ ᠠᠯᠪᠠᠨ ᠲᠤᠰᠢᠶᠠᠯᠲᠠᠳ ᠲᠤ᠌ ᠡᠷᠬᠡ ᠮᠠᠲᠠᠯ ᠦᠭᠡᠢ ᠪᠣᠯᠭᠠᠵᠤ ᠭᠠᠭᠴᠠᠭᠠᠷ ᠨᠣᠶᠠᠷᠬᠠᠭᠰᠠᠨ᠃
(15) ᠬᠤᠰᠢᠭᠤᠨ ᠤ᠋ ᠮᠥᠩᠭᠥ ᠵᠣᠭᠣᠰ ᠢ᠋ ᠳᠤᠷᠠ ᠪᠠᠷ ᠵᠠᠷᠤᠵᠤ ᠵᠢᠯ ᠡᠴᠡ ᠵᠢᠯ ᠵᠠᠷᠤᠳᠠᠯ ᠮᠥᠩᠭᠥ ᠶ᠋ᠢ ᠵᠦᠢ ᠪᠤᠰᠤ ᠪᠠᠷ ᠨᠡᠮᠡᠭᠳᠡᠭᠦᠯᠦᠭᠰᠡᠨ᠁
(ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠳᠠᠩᠰᠠ ᠡᠪᠬᠡᠮᠡᠯ ᠦ᠋ᠨ ᠰᠠᠩ ᠤ᠋ᠨ
《ᠰᠢᠨᠡᠯᠡᠮᠡ ᠶ᠋ᠢᠨ ᠬᠤᠪᠢᠰᠬᠠᠯᠲᠤ ᠬᠥᠳᠡᠯᠭᠡᠭᠡᠨ ᠦ᠌ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠡᠮᠬᠢᠳᠬᠡᠯ》 ᠦ᠋ᠨ
10 ᠳᠡᠪᠲᠡᠷ ᠡᠴᠡ ᠰᠡᠢᠷᠡᠭᠦᠯᠪᠡ᠃
ᠨᠠᠷᠠᠨᠭᠡᠷᠡᠯ ᠦ᠋ᠨ ᠲᠤᠬᠠᠢ ᠨᠡᠢᠲᠡ33 ᠵᠤᠷᠪᠤᠰ ᠪᠠᠢᠳᠠᠭ ᠭᠡᠵᠦ ᠬᠡᠯᠡᠯᠴᠡᠬᠦ ᠪᠣᠯᠪᠠᠴᠤ ᠮᠠᠲ᠋ᠧᠷᠢᠶᠠᠯ ᠠ᠋ᠴᠠ ᠰᠢᠭᠦᠵᠦ ᠣᠯᠤᠭᠰᠠᠨ ᠨᠢ ᠳᠡᠭᠡᠷᠡᠬᠢ15 ᠵᠤᠷᠪᠤᠰ ᠪᠣᠯᠤᠨᠠ᠃ ᠡᠨᠡ ᠨᠢ ᠴᠦ᠍ ᠨᠠᠷᠠᠨᠭᠡᠷᠡᠯ ᠢ᠋ ᠰᠢᠭᠦᠬᠦ ᠳ᠋ᠡᠭᠡᠨ ᠲᠡᠮᠳᠡᠭᠯᠡᠭᠰᠡᠨ ᠲᠡᠮᠳᠡᠭᠯᠡᠯ ᠰᠢᠭ ᠪᠠᠢᠨᠠ᠂ ᠪᠤᠰᠤᠳ ᠨᠢ ᠣᠯᠳᠠᠭᠰᠠᠨ ᠦᠭᠡᠢ)᠃
3. ᠰᠢᠨᠡᠯᠡᠮᠡ ᠴᠠᠭᠳᠤᠷᠰᠡᠷᠡᠩ ᠨᠣᠶᠠᠨ ᠪᠣᠯᠤᠨ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠦ᠋ᠨ ᠲᠤᠬᠠᠢ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠭᠠᠵᠠᠷ ᠲᠤ᠌ ᠵᠠᠭᠠᠯᠳᠤᠭᠰᠠᠨ ᠨᠢ᠄
ᠰᠢᠨᠠᠯᠠᠮᠠ ᠬᠣᠰᠢᠭᠤ ᠵᠠᠰᠠᠭ ᠨᠣᠶᠠᠨ ᠴᠠᠭᠳᠦᠷᠰᠦᠷᠦᠩ ᠪᠣᠯᠤᠨ ᠲᠡᠭᠦᠨ ᠦ᠌ ᠠᠷᠤ ᠲᠣᠬᠢᠭᠴᠢ ᠬᠠᠲᠤᠨ ᠨᠠᠷᠠᠨᠭᠡᠷᠡᠯ ᠦ᠋ᠨ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠶ᠋ᠢ ᠳᠡᠭᠡᠭᠰᠢ ᠵᠠᠭᠠᠯᠳᠤᠬᠤ ᠳ᠋ᠠᠭᠠᠨ ᠤᠷᠢᠳ ᠢ᠋ᠶ᠋ᠠᠷ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠪᠠᠷᠠᠭᠤᠨ ᠬᠦᠩ᠂ ᠲᠤᠰᠠᠯᠠᠭᠴᠢ ᠴᠣᠭᠲᠤᠸᠴᠢᠷ ᠲᠤ᠌ ᠵᠠᠭᠠᠯᠳᠤᠬᠤ ᠨᠡᠷᠡ ᠪᠡᠷ ᠲᠡᠭᠦᠨ ᠢ᠋ᠶ᠋ᠡᠷ ᠳᠠᠮᠵᠢᠭᠤᠯᠤᠨ ᠳᠡᠭᠡᠳᠦ ᠶᠠᠮᠤᠨ ᠳ᠋ᠤ᠌ ᠳᠤᠭᠤᠢᠯᠠᠩ ᠤ᠋ᠨ ᠣᠯᠠᠨ ᠤ᠋ ᠤᠴᠢᠷ ᠭᠣᠮᠣᠳᠠᠯ᠂ ᠵᠠᠭᠠᠯᠳᠤᠯᠠᠭᠠ ᠡᠷᠭᠦᠯᠲᠡ ᠪᠢᠴᠢᠭ ᠡᠷᠭᠦᠳᠡᠭ ᠪᠠᠢᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠰᠢᠨᠡᠯᠡᠮᠡ ᠰᠡᠴᠡᠨ ᠰᠡᠷᠭᠦᠯᠡᠩ ᠮᠥᠷᠲᠡᠭᠡᠨ ᠮᠣᠩᠭᠣᠯ ᠲᠥᠪᠡᠳ ᠬᠢᠲᠠᠳ ᠬᠡᠯᠡᠨ ᠳ᠋ᠦ᠍ ᠨᠡᠪᠲᠡᠷᠡᠭᠰᠡᠨ ᠲᠤᠯᠠ ᠰᠣᠶᠣᠯ ᠮᠡᠳᠡᠯᠭᠡ᠂ ᠤᠯᠤᠰ ᠲᠥᠷᠥ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢᠨ ᠬᠡᠮᠵᠢᠶᠡ ᠥᠨᠳᠥᠷ ᠪᠠᠢᠭᠰᠠᠨ ᠪᠠᠢᠯᠲᠠᠢ᠂ ᠲᠡᠷᠡ ᠵᠠᠭᠠᠯᠳᠤᠬᠤ ᠳ᠋ᠠᠭᠠᠨ ᠶᠡᠷᠦ ᠨᠢ ᠨᠠᠷᠢᠨ ᠬᠠᠷᠠ ᠶ᠋ᠢ ᠨᠢ(ᠲᠤᠢᠯ ᠤ᠋ᠨ ᠡᠮᠵᠡᠭ ᠲᠡᠢ ᠲᠠᠯᠠ) ᠪᠠᠷᠢᠵᠤ ᠵᠠᠩᠭᠢᠯᠠᠭᠠ ᠶ᠋ᠢᠨ ᠵᠦᠢᠯ ᠦ᠋ᠳ ᠢ᠋ ᠣᠨᠣᠪᠴᠢᠲᠠᠢ ᠠᠳᠬᠤᠵᠤ ᠴᠢᠳᠠᠳᠠᠭ ᠪᠠᠢᠵᠠᠢ᠃ ᠰᠢᠨᠠᠯᠠᠮᠠ᠂ ᠴᠠᠭᠳᠤᠷᠰᠡᠷᠡᠩ ᠨᠣᠶᠠᠨ ᠤ᠋ ᠵᠢᠰᠤᠷ ᠲᠦᠰᠢᠮᠡᠳ ᠢ᠋ ᠬᠦᠨᠳᠦᠳᠬᠡᠨ ᠵᠠᠷᠤᠵᠤ᠂ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠲᠠᠰᠤᠴᠢᠨ ᠬᠤᠳᠠᠯᠳᠤᠭᠤᠯᠵᠤ ᠠᠷᠠᠳ ᠢᠷᠭᠡᠳ ᠦ᠋ᠨ ᠭᠡᠷ ᠨᠤᠲᠤᠭ ᠢ᠋ ᠬᠠᠷᠠᠯᠠᠭᠤᠯᠵᠤ ᠦᠭᠡᠢᠷᠡᠭᠦᠯᠦᠭᠰᠡᠨ᠂ ᠢᠯᠠᠩᠭᠤᠶᠠ ᠣᠷᠳᠣᠰ ᠮᠣᠩᠭᠣᠯᠴᠤᠳ ᠤ᠋ᠨ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠡᠷᠬᠡᠰᠢᠭᠦᠯᠦᠨ ᠳᠠᠢᠵᠤ ᠳᠠᠬᠢᠬᠰᠠᠭᠠᠷ᠂ ᠬᠠᠮᠠᠭᠠᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠡᠵᠡᠨ ᠴᠢᠩᠭᠢᠰ ᠦ᠋ᠨ ᠣᠩᠭᠣᠨ ᠰᠢᠲᠦᠭᠡᠨ ᠣᠷᠳᠣᠨ ᠴᠣᠮᠣᠭ ᠢ᠋ ᠶᠠᠮᠠᠷ ᠴᠤ᠌ ᠤᠴᠢᠷ ᠰᠢᠯᠲᠠᠭᠠᠨ ᠦᠭᠡᠢ ᠪᠡᠷ ᠬᠠᠯᠬᠠ ᠳ᠋ᠤ᠌ ᠳᠤᠷᠠ ᠪᠠᠷ ᠰᠢᠯᠵᠢᠭᠦᠯᠬᠦ ᠪᠡᠷ ᠣᠷᠣᠯᠳᠣᠭᠰᠠᠨ ᠢ᠋ ᠭᠣᠣᠯ ᠶᠠᠯᠠ ᠪᠣᠯᠭᠠᠨ ᠵᠠᠭᠠᠯᠳᠤᠭᠰᠠᠨ ᠪᠠᠢᠵᠠᠢ᠃ ᠡᠨᠡ ᠦᠨᠡᠬᠡᠷ ᠬᠦᠨᠳᠦ ᠶᠠᠯᠠ ᠪᠣᠯᠪᠠ᠃
4. ᠵᠠᠩᠵᠤᠨ ᠠ᠋ᠴᠠ᠄
ᠬᠠᠮᠢᠶᠠᠷᠤᠭᠰᠠᠨ ᠬᠣᠯᠠᠳᠠᠬᠢᠨ ᠢ᠋ ᠠᠮᠤᠷᠵᠢᠭᠤᠯᠤᠭᠰᠠᠨ ᠬᠣᠲᠠ ᠶ᠋ᠢᠨ ᠵᠠᠩᠵᠤᠨ ᠪᠠᠰᠠᠬᠦ ᠬᠠᠭᠠᠯᠬᠤ ᠬᠡᠷᠡᠭ ᠢ᠋ ᠵᠠᠬᠢᠷᠤᠨ ᠰᠢᠢᠳᠬᠡᠬᠦ ᠬᠢᠵᠠᠭᠠᠷ ᠤ᠋ᠨ ᠬᠥᠪᠡᠭᠡᠯᠡ ᠳ᠋ᠣ᠌ᠣ᠌ᠢ᠍ᠯᠢ ᠲᠦᠰᠢᠮᠡᠯ ᠲᠢᠩᠬᠢᠮ ᠦ᠋ᠨ ᠲᠦᠰᠢᠮᠡᠯ ᠢ᠋ ᠰᠢᠢᠳᠬᠡᠨ ᠴᠢᠳᠠᠭᠴᠢ ᠵᠠᠩ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠬᠦᠷᠴᠦ ᠢᠷᠡᠭᠰᠡᠨ ᠪᠢᠴᠢᠭ ᠲᠣᠷ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠶᠠᠪᠤᠭᠤᠯᠬᠤ ᠶ᠋ᠢᠨ ᠤᠴᠢᠷ᠂ ᠮᠥᠨᠥᠬᠡᠨ ᠮᠣᠩᠭᠣᠯ ᠲᠥᠪᠡᠳ ᠦ᠋ᠨ ᠬᠡᠷᠡᠭ ᠢ᠋ ᠰᠢᠳᠬᠡᠬᠦ ᠶᠠᠮᠤᠨ ᠠ᠋ᠴᠠ ᠬᠦᠷᠭᠡᠷᠡ ᠢᠷᠡᠭᠰᠡᠨ ᠬᠢᠲᠠᠳ ᠦᠰᠦᠭ ᠦ᠋ᠨ ᠪᠢᠴᠢᠭ ᠲᠣᠷ᠂ ᠡᠨᠡ ᠵᠢᠯ ᠦ᠋ᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠠᠢ᠍ᠮᠠᠨ ᠳ᠋ᠤᠷ᠃
ᠶᠡᠬᠡ ᠽᠦᠩᠲ᠋ᠦ᠋ᠩ ᠦ᠋ᠨ ᠵᠠᠷᠯᠠᠨ ᠪᠠᠭᠤᠯᠭᠠᠭᠰᠠᠨ ᠠᠨᠤ ᠬᠠᠮᠢᠶᠠᠷᠤᠭᠰᠠᠨ ᠬᠣᠯᠠᠳᠠᠬᠢᠨ ᠢ᠋ ᠠᠮᠤᠷᠵᠢᠭᠤᠯᠤᠭᠰᠠᠨ ᠬᠣᠲᠠ ᠶ᠋ᠢᠨ ᠵᠠᠩᠵᠤᠨ ᠵᠠᠩ ᠱᠣᠣ ᠽᠧᠩ ᠡᠴᠡ ᠴᠠᠬᠢᠯᠭᠠᠨ ᠮᠡᠲᠦ ᠬᠤᠷᠳᠤᠨ ᠪᠢᠴᠢᠭ ᠲᠣᠷ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠡᠳ᠋ ᠴᠢᠭᠤᠯᠭᠠᠨ ᠤ᠋ ᠳᠠᠷᠤᠭᠠ ᠴᠠᠭᠳᠤᠷᠰᠡᠷᠡᠩ ᠪᠣᠯᠪᠠᠰᠤ ᠬᠤᠰᠢᠭᠤᠨ ᠤ᠋ ᠬᠡᠷᠡᠭ ᠰᠢᠢᠳᠬᠡᠬᠦᠢ ᠳ᠋ᠦ᠍ᠷ ᠢᠵᠠᠭᠤᠷ ᠠ᠋ᠴᠠ ᠪᠦᠲᠦᠭᠡᠭᠰᠡᠨ ᠵᠢᠳᠬᠦᠯ ᠦᠭᠡᠢ ᠪᠥᠯᠥᠭᠡ᠂ ᠣᠳᠣ ᠪᠠᠰᠠ ᠥᠪᠡᠷ ᠦ᠋ᠨ ᠬᠦ᠌ ᠬᠠᠷᠢᠶᠠᠲᠤ ᠬᠣᠰᠢᠭᠤ ᠠ᠋ᠴᠠ ᠠᠩᠭᠢᠵᠢᠯᠠᠵᠤ ᠪᠠᠢᠴᠠᠭᠠᠬᠤᠢ ᠳ᠋ᠤᠷ ᠰᠤᠷᠠᠭ ᠲᠣᠨᠣᠭ ᠦᠭᠡᠢ ᠶ᠋ᠢᠨ ᠲᠤᠯᠠ ᠣᠷᠣᠨ ᠠ᠋ᠴᠠ ᠤᠭᠴᠠᠷᠠᠭᠤᠯᠬᠤᠢ ᠶ᠋ᠢ ᠭᠣᠶᠣᠰᠤᠭᠠᠢ ᠬᠡᠮᠡᠵᠦᠬᠦᠢ᠂ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠡᠳ᠋ ᠴᠢᠭᠤᠯᠭᠠᠨ ᠳᠠᠷᠤᠭᠠ ᠴᠠᠭᠳᠤᠷᠰᠡᠷᠡᠩ ᠢ᠋ ᠵᠦᠢ ᠢᠨᠦ ᠳᠠᠷᠤᠢ ᠣᠷᠣᠨ ᠠ᠋ᠴᠠ ᠤᠭᠴᠠᠷᠠᠭᠤᠯᠲᠤᠭᠠᠢ ᠬᠡᠮᠡᠭᠰᠡᠨ ᠪᠠ ᠪᠠᠰᠠ ᠶᠡᠬᠡ ᠽᠦᠩᠲ᠋ᠦ᠋ᠩ ᠦ᠋ᠨ ᠵᠠᠷᠯᠠᠨ ᠪᠠᠭᠤᠯᠭᠠᠭᠰᠠᠨ ᠠᠨᠤ ᠲᠡᠭᠦᠰᠠᠠᠯᠲᠠᠨᠬᠤᠶᠠᠭᠲᠤ ᠶ᠋ᠢ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠡᠳ᠋ ᠳᠠᠷᠤᠭᠠ ᠳ᠋ᠤᠷ ᠣᠷᠣᠯᠳᠣᠭᠰᠠᠨ ᠪᠣᠯᠭᠠᠲᠤᠭᠠᠢ ᠬᠡᠮᠡᠭᠰᠡᠨ ᠪᠠ ᠪᠠᠰᠠ ᠶᠡᠬᠡ ᠽᠦᠩᠲ᠋ᠦ᠋ᠩ ᠦ᠋ᠨ ᠵᠠᠷᠯᠠᠨ ᠪᠠᠭᠤᠯᠭᠠᠭᠰᠠᠨ ᠠᠨᠤ ᠰᠦᠮᠪᠦᠷᠪᠠᠲᠤ ᠶ᠋ᠢ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠬᠡᠷᠡᠭ ᠢ᠋ ᠲᠠᠰᠤᠯᠤᠨ ᠰᠢᠢᠳᠬᠡᠬᠦᠢ ᠳ᠋ᠦ᠍ᠷ ᠣᠷᠣᠯᠳᠣᠭᠰᠠᠨ ᠪᠣᠯᠭᠠᠲᠤᠭᠠᠢ ᠬᠡᠮᠡᠭᠰᠡᠨ ᠭᠡᠮᠡᠨ ᠬᠦᠷᠴᠦ ᠢᠷᠡᠭᠰᠡᠨ ᠶᠠᠪᠤᠳᠠᠯ ᠢ᠋ ᠣᠯᠳᠠᠪᠠᠰᠤ᠃
ᠡᠷᠬᠢᠮ ᠵᠠᠩᠵᠤᠨ ᠳ᠋ᠤᠷ ᠶᠠᠪᠤᠭᠤᠯᠵᠤ᠂ ᠪᠠᠢᠴᠠᠭᠠᠨ ᠦᠵᠡᠵᠦ ᠤᠯᠠᠮᠵᠢᠯᠠᠨ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠶᠠᠪᠤᠭᠤᠯᠰᠤᠭᠠᠢ ᠬᠡᠮᠡᠮᠦᠢ ᠭᠡᠮᠡᠨ ᠬᠦᠷᠭᠡᠷᠡ ᠢᠷᠡᠵᠦᠬᠦᠢ᠂ ᠡᠢᠮᠦ ᠶ᠋ᠢᠨ ᠲᠤᠯᠠᠳᠠ ᠡᠭᠦᠨ ᠢ᠋ ᠮᠣᠩᠭᠣᠯ ᠦᠭᠡ ᠪᠡᠷ ᠬᠡᠯᠡᠯᠴᠡᠨ ᠣᠷᠴᠢᠭᠤᠯᠵᠤ ᠣᠷᠳᠣᠰ ᠤ᠋ᠨ ᠵᠡᠭᠦᠨ ᠭᠠᠷ ᠤ᠋ᠨ ᠳᠤᠮᠳᠠᠳᠤ ᠬᠣᠰᠢᠭᠤ ᠶ᠋ᠢ ᠵᠠᠬᠢᠷᠬᠤ ᠵᠠᠰᠠᠭ ᠴᠢᠨ ᠸᠠᠩ᠂ ᠬᠣᠢᠲᠤ ᠬᠣᠰᠢᠭᠤ ᠶ᠋ᠢ ᠵᠠᠬᠢᠷᠬᠤ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠵᠡᠷᠭᠡ ᠵᠠᠰᠠᠭ ᠪᠡᠢᠯᠡ ᠨᠣᠶᠠᠳ ᠲᠠᠨᠠ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠶᠠᠪᠤᠭᠤᠯᠵᠤ ᠵᠢᠷᠤᠮᠯᠠᠨ ᠳᠠᠭᠠᠰᠤᠭᠠᠢ ᠬᠡᠮᠡᠬᠦ ᠡᠴᠡ ᠭᠠᠳᠠᠨᠠ ᠣᠯᠳᠠᠪᠠᠰᠤ ᠮᠣᠩᠭᠣᠯ ᠦᠭᠡ ᠪᠡᠷ ᠬᠡᠯᠡᠯᠴᠡᠵᠦ ᠣᠷᠴᠢᠭᠤᠯᠵᠤ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠠᠷᠤᠭᠠ ᠲᠠᠨᠠ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠶᠠᠪᠤᠭᠤᠯᠵᠤ ᠤᠯᠠᠮᠵᠢᠯᠠᠨ ᠲᠤᠰᠢᠶᠠᠯᠭᠠᠵᠤ ᠵᠢᠷᠤᠮᠯᠠᠨ ᠳᠠᠭᠠᠰᠤᠭᠠᠢ ᠬᠡᠮᠡᠮᠦᠢ᠃ ᠡᠭᠦᠨ ᠦ᠌ ᠲᠤᠯᠠ ᠮᠡᠳᠡᠲᠦᠭᠦᠢ ᠭᠡᠮᠡᠨ ᠢᠯᠡᠭᠡᠪᠡ᠃
ᠳᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠤ᠋ᠨ ᠬᠣᠶᠠᠳᠤᠭᠠᠷ ᠣᠨ᠂ ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨᠠ᠂
ᠺᠡᠦ ᠬᠡᠮᠡᠬᠦ ᠬᠠᠷᠠᠭᠴᠢᠨ ᠦᠬᠡᠷ ᠵᠢᠯ ᠦ᠋ᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨᠠ
5. ᠢᠷᠭᠠᠢ ᠶ᠋ᠢᠨ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠡᠯᠴᠢᠨ ᠦ᠌ ᠶᠠᠮᠤᠨ ᠤ᠋ ᠪᠢᠴᠢᠭ᠄
ᠥᠨᠥᠬᠡᠨ ᠮᠣᠩᠭᠣᠯ ᠲᠥᠪᠡᠳ ᠦ᠋ᠨ ᠵᠤᠷᠭᠠᠨ ᠠ᠋ᠴᠠ ᠬᠠᠷᠢᠭᠤ ᠡᠷᠭᠦᠨ ᠮᠡᠳᠡᠭᠦᠯᠵᠦ ᠵᠠᠷᠯᠠᠯ ᠢ᠋ ᠳᠠᠭᠠᠵᠤ ᠬᠢᠨᠠᠨ ᠬᠡᠯᠡᠯᠴᠡᠭᠰᠡᠨ ᠢᠨᠦ᠂ ᠬᠣᠯᠠᠳᠠᠬᠢᠨ ᠢ᠋ ᠠᠮᠤᠷᠵᠢᠭᠤᠯᠤᠭᠰᠠᠨ ᠬᠣᠲᠠ ᠶ᠋ᠢᠨ ᠳ᠋ᠦᠲ᠋ᠦ᠋ᠩ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠠᠷᠤᠭᠠ ᠯᠤᠭᠠ ᠬᠠᠮᠲᠤ ᠨᠡᠢᠯᠡᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠪᠡᠢᠯᠡ ᠶ᠋ᠢ ᠲᠣᠳᠣᠷᠬᠠᠢᠯᠠᠨ ᠪᠠᠢᠴᠠᠭᠠᠪᠠᠰᠤ ᠣᠭᠲᠣ ᠨᠢᠭᠤᠨ ᠳᠠᠯᠳᠠᠯᠠᠭᠰᠠᠨ ᠥᠭᠡᠷᠡ ᠰᠡᠳᠬᠢᠯᠭᠡ ᠦᠭᠡᠢ ᠬᠡᠮᠡᠭᠰᠡᠨ ᠲᠤᠰ ᠲᠤᠰ ᠤ᠋ᠨ ᠤᠴᠢᠷ ᠪᠠᠢᠳᠠᠯ ᠪᠠ ᠵᠢᠴᠢ ᠰᠢᠢᠳᠬᠡᠬᠦ ᠠᠷᠭᠠ ᠶ᠋ᠢ ᠲᠥᠰᠥᠪᠯᠡᠭᠰᠡᠨ ᠨᠢᠭᠡᠨ ᠬᠡᠷᠡᠭ ᠢ᠋ ᠡᠨᠡ ᠣᠨ ᠤ᠋ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠵᠢᠷᠭᠤᠭᠠᠨᠠ ᠬᠦᠯᠢᠶᠡᠨ ᠠᠪᠤᠭᠠᠳ ᠶᠡᠬᠡ ᠽᠦᠩᠲ᠋ᠦ᠋ᠩ ᠦ᠋ᠨ ᠪᠣᠳᠣᠯᠭᠠ ᠳ᠋ᠤ᠌ ᠵᠠᠷᠯᠠᠯ ᠳ᠋ᠤᠷ ᠮᠣᠩᠭᠣᠯ ᠲᠥᠪᠡᠳ ᠦ᠋ᠨ ᠵᠤᠷᠭᠠᠨ ᠠ᠋ᠴᠠ ᠡᠷᠭᠦᠨ ᠮᠡᠳᠡᠭᠦᠯᠦᠭᠰᠡᠨ ᠢᠨᠦ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠵᠠᠰᠠᠭ ᠪᠡᠢᠯᠡ ᠴᠠᠭᠳᠤᠷᠰᠡᠷᠡᠩ ᠳ᠋ᠦ᠍ᠷ ᠲᠣᠳᠣᠷᠬᠠᠢᠯᠠᠨ ᠪᠠᠢᠴᠠᠭᠠᠪᠠᠰᠤ ᠦᠢᠯᠡᠳᠦᠨ ᠵᠠᠰᠠᠬᠤ ᠳ᠋ᠤᠷ ᠠᠯᠳᠠᠭᠳᠠᠭᠠᠳ ᠣᠯᠠᠩᠬᠢ ᠮᠣᠩᠭᠣᠯᠴᠤᠳ ᠤ᠋ᠨ ᠰᠠᠨᠠᠭᠠᠨ ᠦᠢᠮᠡᠯᠴᠡᠨ ᠬᠤᠪᠢᠰᠴᠤ ᠰᠠᠶᠢ ᠳᠤᠭᠤᠢᠯᠠᠩ ᠪᠣᠯᠵᠤ ᠰᠠᠮᠠᠭᠤᠷᠠᠯ ᠢ᠋ ᠡᠳᠦᠭᠰᠡᠨ ᠣᠴᠢᠷᠠ ᠴᠠᠭᠳᠤᠷᠰᠡᠷᠡᠩ ᠦ᠋ᠨ ᠵᠠᠰᠠᠭ ᠪᠠ ᠲᠡᠭᠦᠨ ᠦ᠌ ᠪᠡᠢᠯᠡ ᠵᠡᠷᠭᠡ ᠬᠡᠷᠬᠡᠮ ᠢ᠋ ᠤᠭᠴᠠᠷᠠᠭᠤᠯᠤᠨ ᠡᠪᠳᠡᠵᠦ ᠪᠠᠢᠯᠭᠠᠭᠠᠳ ᠵᠠᠯᠬᠠᠭᠠᠵᠤ ᠴᠡᠭᠡᠷᠯᠡᠯ ᠦᠵᠡᠭᠦᠯᠦᠭᠲᠦᠨ᠂ ᠡᠭᠦᠨ ᠦ᠌ ᠲᠤᠯᠠ ᠵᠠᠷᠯᠠᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠠᠷᠠᠨᠲᠤᠶᠠᠭᠠ᠂ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ᠂ ᠣᠶᠤᠨᠪᠢᠯᠢᠭ᠌
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠣᠶᠤᠨᠪᠠᠲᠤ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠲ· ᠬᠦᠮᠦᠵᠢᠯᠲᠦ᠂ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ