ᠲᠣᠪᠤᠤ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠣᠮᠣᠭTovuu zakhiragchiin domogТовуу захирагчийн домог
177ᠲᠣᠪᠤᠤ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠣᠮᠣᠭ
ᠮᠠᠨᠵᠤ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠪᠠᠲᠤᠯᠠᠭᠰᠠᠨ ᠬᠠᠤᠯᠢ ᠶ᠋ᠢᠨ ᠲᠥᠰᠦᠯ ᠳ᠋ᠦ᠍᠄
ᠬᠥᠮᠦᠨ ᠢ᠋ ᠠᠯᠠᠪᠠᠯ᠂ ᠵᠠᠪᠠᠯ ᠠᠮᠢ ᠶ᠋ᠢ ᠠᠮᠢ ᠪᠠᠷ ᠰᠣᠯᠢᠨᠠ ᠭᠡᠬᠦ ᠶᠠᠪᠤᠳᠠᠯ ᠦᠭᠡᠢ᠃ ᠠᠯᠠᠭᠳᠠᠭᠰᠠᠨ ᠬᠥᠮᠦᠨ ᠦ᠌ ᠠᠷᠤ ᠭᠡᠷ ᠠᠪᠠᠭᠠᠢ ᠬᠡᠦᠬᠡᠳ ᠢ᠋ ᠠᠰᠠᠷᠠᠨ ᠲᠡᠵᠢᠭᠡᠬᠦ᠂ ᠡᠳ᠋ ᠮᠥᠩᠭᠥ ᠪᠡᠷ ᠠᠮᠢ ᠶ᠋ᠢ ᠦᠨᠡᠯᠡᠨ ᠲᠥᠯᠥᠬᠦ ᠵᠡᠷᠭᠡ ᠪᠡᠷ ᠨᠥᠬᠥᠨ ᠲᠥᠯᠥᠵᠦ ᠪᠣᠯᠤᠨᠠ ᠭᠡᠵᠡᠢ᠃
ᠡᠨᠡ ᠨᠢ ᠭᠠᠳᠠᠭᠠᠳᠤ ᠶ᠋ᠢᠨ ᠲᠦᠷᠢᠮᠡᠬᠡᠢᠯᠡᠭᠴᠢᠳ ᠦ᠋ᠨ ᠬᠦᠦᠯᠡᠭᠴᠢᠳ᠂ ᠬᠤᠳᠠᠯᠳᠤᠭᠠᠴᠢᠳ᠂ ᠳᠣᠲᠣᠭᠠᠳᠤ ᠶ᠋ᠢᠨ ᠪᠠᠶᠠᠳ ᠨᠣᠶᠠᠳ᠂ ᠢᠵᠠᠭᠤᠷᠲᠠᠨ᠂ ᠳᠡᠭᠡᠳᠦᠰ ᠨᠢ ᠶᠠᠯᠠᠲᠤ ᠬᠡᠷᠡᠭ ᠢ᠋ ᠬᠠᠭᠠᠴᠠᠶ᠋ᠢᠯᠠᠬᠤ ᠬᠡᠷᠡᠭᠯᠡᠭᠦᠷ ᠪᠣᠯᠵᠤ᠂ ᠤᠯᠠᠮ ᠢ᠋ᠶ᠋ᠠᠷ ᠡᠳ᠋ ᠬᠥᠷᠥᠩᠭᠡ᠂ ᠬᠠᠬᠤᠤᠯᠢ ᠪᠠᠷ ᠲᠥᠷᠥ ᠶ᠋ᠢ ᠪᠠᠷᠢᠵᠤ᠂ ᠠᠶᠤᠯᠲᠤ ᠠᠯᠠᠯᠭᠠ᠂ ᠬᠢᠳᠤᠯᠭᠠ ᠪᠣᠢ ᠪᠣᠯᠬᠤ ᠡᠷᠬᠡ ᠶ᠋ᠢᠨ ᠪᠠᠲᠤᠯᠠᠭᠠ ᠶ᠋ᠢ ᠪᠣᠢ ᠪᠣᠯᠭᠠᠵᠤ ᠪᠠᠢᠯᠠ᠃
ᠲᠣᠪᠤᠤ ᠵᠠᠬᠢᠷᠤᠭᠴᠢ ᠲᠡᠷᠢᠭᠦᠲᠡᠢ ᠮᠣᠩᠭᠣᠯ ᠢ᠋ᠶ᠋ᠠᠨ ᠭᠡᠰᠡᠨ ᠰᠡᠳᠬᠢᠯᠲᠡᠨ ᠨᠦ᠍ᠭᠦᠳ ᠂ ᠡᠭᠦᠨ ᠦ᠌ ᠡᠰᠡᠷᠭᠦᠦ᠂ ᠰᠦᠷᠡᠬᠡᠢ ᠡᠰᠡᠷᠭᠦᠴᠡᠭᠰᠡᠨ ᠪᠣᠯᠪᠠᠴᠤ ᠡᠰᠡ ᠲᠠᠢᠯᠤᠨ᠂ ᠤᠭ ᠬᠠᠤᠯᠢ ᠪᠠᠲᠤᠯᠠᠭᠳᠠᠵᠤ᠂ ᠬᠠᠮᠤᠭ ᠤ᠋ᠨ ᠦᠨᠡᠲᠡᠢ ᠬᠥᠮᠦᠨ ᠢ᠋ ᠮᠢᠩᠭᠠᠨ ᠯᠠᠩ ᠢ᠋ᠶ᠋ᠠᠷ ᠲᠣᠭᠲᠠᠭᠠᠨ ᠦᠨᠡᠯᠡᠵᠦ᠂ ᠠᠷᠤ ᠭᠡᠷ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ ᠠᠰᠠᠷᠠᠨ ᠲᠡᠳᠬᠦᠬᠦ ᠪᠤᠶᠤ ᠥᠪᠡᠷᠲᠡᠭᠡᠨ ᠥᠮᠴᠢᠯᠡᠨ ᠠᠪᠴᠤ ᠡᠷᠭᠦᠵᠦ ᠪᠣᠯᠤᠨᠠ ᠭᠡᠵᠦ ᠵᠢᠭᠠᠵᠠᠢ᠃ ᠲᠣᠪᠤᠤ ᠵᠠᠬᠢᠷᠤᠭᠴᠢ ᠡᠭᠦᠨ ᠢ᠋ ᠵᠠᠰᠠᠬᠤ ᠶ᠋ᠢᠨ ᠲᠤᠯᠠᠳᠠ ᠠᠷᠭᠠ ᠰᠢᠳᠡᠨ ᠂ ᠨᠠᠢ᠍ᠮᠠᠨ ᠬᠥᠮᠦᠨ ᠢ᠋ᠶ᠋ᠡᠷ ᠳᠥᠷᠪᠡᠨ ᠢᠰᠡᠭᠡᠢ ᠬᠣᠪᠲᠣ ᠲᠠᠢ ᠶᠠᠭᠤᠮᠠ ᠳᠠᠮᠵᠢᠯᠠᠭᠤᠯᠤᠨ ᠴᠢᠭᠤᠯᠭᠠᠨ ᠳ᠋ᠤ᠌ ᠣᠷᠣᠭᠤᠯᠵᠤ ᠭᠡᠨᠡ ᠳ᠋ᠡ᠃ ᠪᠠᠶᠠᠳ ᠨᠣᠶᠠᠳ ᠠᠩᠭᠠᠰ ᠭᠡᠵᠦ᠂《ᠠᠢ! ᠪᠢᠳᠡᠨ ᠳ᠋ᠦ᠍ ᠪᠢᠯᠢᠭ ᠱᠠᠩ ᠡᠷᠭᠦᠬᠦ ᠨᠢ ᠭᠡᠵᠦ ᠪᠠᠶᠠᠷᠯᠠᠴᠢᠬᠠᠵᠤ᠂ ᠭᠣᠷᠢᠳᠠᠨ ᠭᠣᠷᠢᠳᠠᠨ ᠬᠠᠷᠠᠵᠤ᠂ ᠭᠠᠷᠳᠠᠨ ᠲᠤᠰᠬᠤ ᠳ᠋ᠤ᠌ ᠪᠡᠯᠡᠳᠬᠡᠨ᠂ ᠰᠢᠯᠵᠢᠨ ᠰᠠᠭᠤᠴᠢᠬᠠᠪᠠ ᠭᠡᠨᠡ᠃ ᠲᠣᠪᠤᠤ ᠵᠠᠬᠢᠷᠤᠭᠴᠢ ᠬᠡᠩ ᠪᠣᠰᠴᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠣᠯᠵᠠᠢ ᠠᠮᠪᠠᠨ ᠢ᠋ ᠵᠠᠭᠠᠮᠠᠳᠠᠨ ᠠᠪᠴᠤ ᠳᠠᠷᠤᠵᠤ ᠤᠨᠠᠭᠠᠭᠠᠳ᠂ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ ᠠᠪᠴᠤ ᠬᠤᠷᠴᠠ ᠢᠷ ᠢ᠋ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠲᠠᠯᠪᠢᠵᠤ᠂ ᠣᠭᠲᠣᠯᠬᠤ ᠳᠦᠷᠢ ᠦᠵᠡᠭᠦᠯᠪᠡ ᠭᠡᠨᠡ ᠂ ᠠᠮᠪᠠᠨ ᠠᠷᠠᠢ ᠭᠡᠵᠦ ᠠᠮᠠ ᠠᠩᠭᠠᠢᠵᠤ《ᠠᠢ !ᠴᠢ ᠶᠠᠭᠠᠬᠢᠵᠤ ᠪᠠᠢᠨᠠ 》ᠭᠡᠬᠦ ᠳ᠋ᠦ᠍ 《ᠪᠢ ᠴᠢᠮᠠ ᠶ᠋ᠢ᠂ ᠪᠢ ᠲᠠ ᠨᠠᠷ ᠠᠯᠠᠨᠠ᠃ ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠬᠥᠷᠥᠩᠭᠡ᠂ ᠨᠢᠭᠡ ᠪᠠᠢᠲᠤᠭᠠᠢ ᠨᠡᠢᠲᠡ ᠲᠠ ᠨᠠᠷ ᠢ᠋ ᠨᠢᠭᠡ ᠬᠣᠶᠠᠷ ᠢ᠋ᠶ᠋ᠠᠷ ᠨᠢ ᠠᠯᠠᠭᠠᠳ᠂ ᠲᠥᠯᠥᠭᠡᠳ ᠪᠠᠢᠬᠤ ᠳ᠋ᠤ᠌ ᠬᠦᠷᠬᠦ ᠪᠡᠷ ᠪᠠᠢᠨᠠ᠂ ᠲᠡᠷᠡ ᠬᠣᠪᠲᠣ ᠲᠠᠢ ᠮᠥᠩᠭᠥ ᠶ᠋ᠢ ᠬᠠᠷᠠᠪᠠ ᠤᠤ? ᠤᠯᠠᠭᠠᠨ ᠭᠣᠣᠯ ᠢ᠋ ᠴᠢᠨᠢ ᠲᠠᠰᠤᠯᠴᠢᠬᠠᠭᠠᠳ᠂ ᠵᠠᠯᠠᠭᠤ ᠬᠠᠲᠤᠨ ᠢ᠋ ᠴᠢᠨᠢ ᠠᠪᠤᠭᠠᠳ ᠶᠠᠪᠤᠯᠠ 》ᠭᠡᠬᠦ ᠳ᠋ᠦ᠍ ᠠᠮᠪᠠᠨ《 ᠠᠢ!ᠴᠢ ᠪᠣᠯᠤᠨᠠ᠂ ᠨᠠᠮᠠ ᠶ᠋ᠢ ᠥᠷᠥᠰᠢᠶᠡ᠂ ᠬᠠᠤᠯᠢ ᠪᠠᠷ ᠴᠣᠭᠴᠠᠯᠠᠪᠠ!ᠴᠣᠭᠴᠠᠯᠠᠪᠠ! ᠬᠥᠮᠦᠨ ᠢ᠋ ᠠᠯᠠᠪᠠᠯ᠂ ᠠᠮᠢ ᠶ᠋ᠢ ᠠᠮᠢ ᠪᠠᠷ ᠲᠥᠯᠥᠨᠡ 》ᠭᠡᠵᠦ ᠬᠠᠰᠬᠢᠷᠴᠠᠢ᠃ ᠡᠢᠨᠬᠦ ᠲᠣᠪᠤᠤ ᠵᠠᠬᠢᠷᠤᠭᠴᠢ ᠬᠠᠷᠭᠢᠰ ᠬᠠᠤᠯᠢ ᠶ᠋ᠢ ᠥᠭᠡᠷᠡᠴᠢᠯᠡᠨ ᠬᠠᠷᠠᠴᠤ ᠣᠯᠠᠨ ᠢ᠋ᠶ᠋ᠠᠨ ᠠᠪᠤᠷᠠᠭᠰᠠᠨ ᠭᠡᠳᠡᠭ᠃
ᠦᠰᠦᠭ ᠬᠠᠳᠠᠭᠴᠢ᠄ ᠵᠢᠷᠠᠨᠲᠠᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠤᠭᠠᠨᠵᠢᠳ
ᠬᠢᠨᠠᠭᠴᠢ᠄ ᠳᠠᠯᠠᠨᠲᠠᠢ᠂ ᠵᠢᠷᠠᠨᠲᠠᠢ