ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠷᠢᠨ ᠬᠣᠶᠠᠷ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 22
165ᠮᠥᠩᠭᠥᠨ ᠦ ᠡᠷᠢᠯ
ᠪᠠᠯᠳᠠᠨᠴᠡᠷᠢᠩ ᠡᠮᠡᠭᠲᠡᠢ ᠲᠡᠢ ᠬᠡᠵᠢᠶᠡ᠂ ᠬᠠᠮᠢᠭᠠ ᠠᠭᠤᠯᠵᠠᠬᠤ ᠪᠠᠨ ᠶᠠᠷᠢᠯᠴᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠭᠤᠷᠪᠠᠳᠠᠬᠢ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠢ ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠭᠣᠣᠯ ᠭᠤᠳᠤᠮᠵᠢᠨ ᠤ᠋ ᠠᠮᠠᠨ ᠳᠡᠭᠡᠷᠡ ᠪᠠᠰᠠ ᠯᠠ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠠᠭᠤᠯᠵᠠᠪᠠ᠃ ᠲᠡᠷᠡ ᠡᠳᠦᠷ ᠦ᠋ᠨ ᠲᠩᠷᠢ ᠮᠠᠰᠢ ᠰᠠᠢᠬᠠᠨ᠂ ᠡᠪᠦᠯ ᠦ᠋ᠨ ᠤᠯᠠᠷᠢᠯ ᠳ᠋ᠤ᠌ ᠬᠠᠶᠠᠬᠠᠨ ᠲᠣᠬᠢᠶᠠᠯᠳᠤᠳᠠᠭ ᠡᠳᠦᠷ ᠪᠠᠢᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ? ᠤᠴᠢᠷ ᠶᠠᠪᠤᠳᠠᠯ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠭᠰᠡᠨ ᠰᠠᠢᠨ ᠰᠠᠨᠠᠭᠠᠲᠤ ᠵᠢᠯᠣᠭᠣᠴᠢ ᠲᠦᠪᠰᠢᠨ ᠡᠷᠢᠶᠡᠨ ᠪᠦᠲᠡᠭᠡᠯᠭᠡ ᠶ᠋ᠢ ᠶᠠᠭᠠᠷᠠᠨ ᠭᠠᠷᠭᠠᠵᠤ ᠤᠷᠳᠤᠭᠤᠷ ᠨᠢ ᠲᠠᠲᠠᠵᠤ ᠥᠭᠭᠦᠭᠰᠡᠨ ᠢ᠋ ᠬᠡᠯᠡᠬᠦ ᠤᠤ? ᠲᠡᠭᠦᠨ ᠦ᠌ ᠠᠷᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠥᠨᠥᠬᠢ ᠬᠦᠰᠡᠯᠲᠦ ᠬᠡᠦᠬᠡᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠬᠠᠪᠢᠷᠭᠠᠨ ᠳ᠋ᠠᠭᠠᠨ ᠠᠪᠤᠨ ᠲᠡᠪᠡᠷᠢᠭᠰᠡᠨ ᠲᠡᠳᠦᠢ ᠦᠭᠡᠢ᠂ ᠤᠷᠠᠨ ᠭᠠᠷ ᠢ᠋ ᠨᠢ ᠡᠯᠢᠭᠡᠨ ᠳ᠋ᠡᠭᠡᠨ ᠠᠪᠠᠴᠢᠨ ᠠᠳᠬᠤᠵᠤ ᠵᠥᠭᠡᠯᠡᠨ ᠬᠠᠴᠠᠷ ᠢ᠋ ᠨᠢ ᠦᠨᠦᠰᠪᠡ᠃ ᠡᠢᠨ ᠬᠦ᠌ ᠢᠨᠠᠭᠯᠠᠬᠤ ᠬᠡᠴᠢᠨᠡᠨ ᠰᠠᠢᠬᠠᠨ ᠪᠠᠢᠭᠠ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠶᠠᠭᠤ ᠪᠠᠷ ᠴᠦ᠍ ᠵᠢᠱ᠌ᠢᠶᠡᠯᠡᠨ ᠭᠠᠷᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠥᠭᠡᠳ ᠶᠡᠷᠦ ᠬᠥᠮᠦᠨ ᠳ᠋ᠦ᠍ ᠬᠠᠢᠷᠠᠯᠠᠨ ᠳᠤᠷᠠᠯᠠᠯᠴᠠᠬᠤ ᠰᠢᠭ᠋ ᠰᠠᠢᠬᠠᠨ ᠶᠠᠭᠤᠮᠠ ᠪᠠᠢᠨᠠ ᠤᠤ? ᠭᠡᠵᠦ ᠪᠣᠳᠣᠨᠠ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠭᠣᠣᠯ ᠭᠤᠳᠤᠮᠵᠢᠨ ᠤ᠋ ᠡᠬᠢ ᠡᠴᠡ ᠠᠪᠤᠭᠠᠳ ᠨᠥᠭᠦᠭᠡ ᠦᠯᠦ ᠲᠠᠨᠢᠬᠤ ᠠᠢᠯ ᠤ᠋ᠨ ᠬᠠᠰᠢᠶᠠᠨ ᠤ᠋ ᠡᠮᠦᠨᠡ ᠬᠦᠷᠬᠦ ᠪᠡᠨ ᠬᠦᠷᠲᠡᠯᠡ ᠬᠡᠯᠡᠯᠴᠡᠭᠰᠡᠨ ᠶᠠᠷᠢᠯᠴᠠᠭᠰᠠᠨ ᠨᠢ ᠲᠤᠩ ᠪᠠᠭᠠ᠃
— ᠬᠠᠢᠷᠠᠲᠤ ᠮᠢᠨᠢ᠂ ᠲᠠᠭᠠᠷᠠᠵᠤ ᠪᠠᠢᠭᠠ ᠦᠭᠡᠢ ᠪᠢᠵᠡ?
— ᠦᠭᠡᠢ ᠳᠠᠭᠠᠷᠠᠭᠠ ᠦᠭᠡᠢ᠃
— ᠦᠭᠡᠢ᠂ ᠬᠣᠩᠭᠣᠷ ᠮᠢᠨᠢ ᠪᠢ ᠴᠢᠮᠠᠶ᠋ᠢ ᠡᠪ ᠦᠭᠡᠢ ᠲᠡᠪᠡᠷᠢᠭᠡᠳ ᠪᠠᠢᠭᠠ ᠪᠢᠰᠢ ᠪᠢᠵᠡ ᠠ᠋?
— ᠵᠦᠭᠡᠷ ᠠ᠋᠂ ᠲᠠ ᠪᠢᠲᠡᠭᠡᠢ ᠵᠣᠪᠠ᠃
— ᠪᠢ ᠡᠷᠲᠡ ᠡᠳᠦᠷ ᠴᠢᠮᠠ ᠲᠠᠢ ᠠᠭᠤᠯᠵᠠᠬᠤ ᠪᠣᠯᠵᠣᠭᠠ ᠪᠠᠨ ᠮᠠᠷᠲᠠᠭᠰᠠᠨ ᠳ᠋ᠠᠭᠠᠨ ᠴᠠᠭ ᠦᠷᠭᠦᠯᠵᠢ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠯᠠ᠃
— ᠡᠭᠦᠨ ᠡᠴᠡ ᠬᠣᠢᠰᠢ ᠪᠢ ᠪᠠᠭᠰᠢ ᠳ᠋ᠠᠭᠠᠨ ᠣᠴᠢᠬᠤ ᠪᠦᠷᠢ ᠳ᠋ᠦ᠍ ᠴᠢᠨᠢ ᠥᠨᠥᠳᠥᠷ ᠦ᠋ᠨ ᠬᠢ ᠰᠢᠭ ᠢ᠋ᠶ᠋ᠡᠨ ᠲᠡᠷᠡ ᠭᠤᠳᠤᠮᠵᠢᠨ ᠤ᠋ ᠠᠮᠠᠨ ᠳᠡᠭᠡᠷᠡ ᠬᠦᠯᠢᠶᠡᠨ ᠠᠪᠴᠤ ᠪᠠᠢᠶᠠ᠃
— ᠲᠡᠭᠡ᠂ ᠭᠡᠰᠡᠨ ᠢ᠋ᠶ᠋ᠡᠨ ᠡᠮᠡᠭᠲᠡᠢ᠂ ᠦᠭᠡᠢ ᠪᠠᠢᠭ! ᠲᠠ ᠥᠪᠡᠷ ᠢ᠋ᠶ᠋ᠡᠨ ᠶᠠᠳᠠᠷᠠᠨᠠ᠃
— ᠵᠦᠭᠡᠷ᠂ ᠪᠢ ᠶᠠᠳᠠᠷᠠᠬᠤ ᠦᠭᠡᠢ᠃ ᠡᠢᠨ ᠬᠦ᠌ ᠬᠡᠯᠡᠯᠴᠡᠬᠦ ᠵᠠᠭᠤᠷᠠ ᠪᠠᠯᠳᠠᠨᠴᠡᠷᠢᠩ ᠴᠠᠭ ᠦᠷᠭᠦᠯᠵᠢ ᠥᠪᠡᠷ ᠦ᠋ᠨ ᠮᠡᠳᠡᠬᠦ ᠶᠠᠩᠴᠢᠶᠠᠨ ᠪᠠᠭᠠ ᠲᠠᠢ ᠪᠠᠨ ᠰᠠᠨᠠᠨ ᠦᠶᠡ ᠦᠶᠡ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠳ᠋ᠤ᠌ ᠡᠮᠡᠭᠲᠡᠢ᠄
— ᠦᠭᠡᠢ᠂ ᠲᠠ ᠶᠠᠭᠤᠨ ᠳ᠋ᠤ᠌ ᠰᠠᠨᠠᠭᠠ ᠠᠯᠳᠠᠭᠠᠳ ᠪᠠᠢᠨᠠ ?
— ᠵᠦᠭᠡᠷ᠂ ᠵᠦᠭᠡᠷ ᠯᠡ ᠰᠠᠨᠠᠭᠠ ᠠᠯᠳᠠᠯᠠ ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠭᠡᠪᠡᠴᠦ ᠪᠠᠰᠠ ᠯᠠ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠠᠵᠢ᠃
— ᠵᠠ ᠲᠡᠷᠡ᠂ ᠪᠠᠰᠠ ᠯᠠ ᠰᠠᠨᠠᠭᠠ ᠠᠯᠳᠠᠯᠠ᠃ ᠡᠨᠡ ᠴᠦ᠍ ᠯᠠᠪ ᠤᠴᠢᠷ ᠲᠠᠢ᠂ ᠬᠡᠯᠡ ᠨᠠᠳᠠ ᠳ᠋ᠤ᠌ ᠪᠠᠨ ᠵᠠᠪᠠᠯ ᠬᠡᠯᠡ!
— ᠶᠠᠭᠤ? ᠪᠢ ᠰᠠᠶᠢ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠭᠡᠵᠦ ᠤᠤ?
— ᠲᠡᠢᠮᠦ᠂ ᠪᠦᠷ ᠲᠦᠷᠦᠭᠦᠴᠢ ᠲᠦᠷᠦᠭᠦᠴᠢ ᠶ᠋ᠢᠨ ᠡᠴᠡ ᠤᠯᠠᠮ ᠬᠦᠴᠦᠲᠡᠢ ᠰᠠᠨᠠᠭᠠ ᠠᠯᠳᠠᠭᠰᠠᠨ᠃
ᠪᠠᠯᠳᠠᠨᠴᠡᠷᠢᠩ ᠦᠨᠡᠨ ᠰᠠᠨᠠᠭᠠ ᠪᠠᠨ ᠨᠢᠭᠡ ᠬᠡᠯᠡᠬᠦ ᠶᠦᠮ ᠪᠢᠯᠡ ᠤᠤ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠵᠤ᠄
— ᠵᠠ ᠪᠢᠲᠡᠭᠡᠢ ᠮᠠᠭᠤ ᠰᠠᠨᠠ᠃ ᠬᠡᠷᠪᠡ ᠪᠢ ᠳᠣᠲᠣᠷᠠ ᠪᠠᠨ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠪᠣᠳᠣᠵᠤ ᠰᠠᠨᠠᠭᠠ ᠠᠯᠳᠠᠵᠤ ᠪᠠᠢᠭᠠ ᠰᠠᠨ ᠪᠣᠯ ᠴᠢᠮᠠ ᠳ᠋ᠠᠭᠠᠨ ᠬᠡᠯᠡᠬᠦ ᠰᠢᠦ ᠳᠡ ᠭᠡᠳ ᠯᠠᠪᠯᠠᠨ ᠲᠡᠪᠡᠷᠢᠪᠡ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠬᠠᠢᠷᠠ ᠳᠤᠷᠠᠯᠠᠯ ᠤᠯᠠᠮ ᠢ᠋ᠶ᠋ᠠᠷ ᠭᠦᠨᠵᠡᠭᠡᠢᠷᠡᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠥᠨᠥᠬᠢ ᠮᠥᠩᠭᠥᠨ ᠦ᠌ ᠲᠤᠬᠠᠢ ᠪᠣᠳᠣᠬᠤ ᠨᠢ ᠤᠯᠠᠮ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠯᠠ᠃
ᠢᠩᠭᠢᠭᠡᠳ ᠬᠣᠢᠰᠢ ᠳ᠋ᠠᠭᠠᠨ ᠭᠡᠪᠡᠯ ᠪᠠᠯᠳᠠᠨᠴᠡᠷᠢᠩ ᠨᠢᠭᠡᠨᠲᠡ ᠬᠢᠵᠠᠭᠠᠷ ᠦᠭᠡᠢ ᠰᠡᠳᠬᠢᠯ ᠲᠡᠢ ᠪᠣᠯᠤᠭᠰᠠᠨ ᠡᠮᠡᠭᠲᠡᠢ ᠪᠡᠨ ᠦᠷᠭᠦᠯᠵᠢ ᠤᠭᠲᠤᠨ ᠠᠪᠳᠠᠭ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠪᠦᠷᠢ ᠳ᠋ᠡᠭᠡᠨ ᠬᠠᠢᠷᠠ ᠳᠤᠷᠠᠯᠠᠯ ᠤ᠋ᠨ ᠢ᠋ᠶ᠋ᠠᠨ ᠶᠠᠪᠤᠳᠠᠯ ᠢ᠋ ᠴᠢᠯᠥᠭᠡᠲᠡᠢ ᠬᠡᠯᠡᠯᠴᠡᠳᠡᠭ ᠪᠣᠯᠤᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠮᠥᠩᠭᠥᠨ ᠦ᠌ ᠲᠤᠬᠠᠢ ᠭᠡᠪᠡᠯ ᠵᠥᠪᠬᠡᠨ ᠳᠣᠲᠣᠷᠠ ᠪᠠᠨ ᠪᠣᠳᠣᠯ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠡᠳ᠋ᠯᠡᠨᠡ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠪᠠᠯᠳᠠᠨᠴᠡᠷᠢᠩ ᠳᠡᠮᠡᠢ ᠰᠠᠭᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌《ᠵᠢᠭᠠᠯ ᠵᠤᠭᠠ ᠮᠠᠢᠮᠠᠢ ᠬᠥᠳᠡᠯᠭᠡᠬᠦ ᠶᠦᠮ ᠪᠢᠯᠡ ᠤᠤ?》 ᠭᠡᠬᠦ ᠳ᠋ᠡᠭᠡᠨ ᠵᠠᠬᠠ ᠵᠡᠭᠡᠯᠢ ᠪᠡᠷ ᠶᠠᠪᠤᠨ ᠡᠯᠳᠡᠪ ᠶᠠᠭᠤᠮᠠ ᠶ᠋ᠢ ᠠᠵᠢᠭᠯᠠᠵᠤ ᠰᠣᠨᠢᠷᠬᠠᠨ ᠡᠬᠢᠯᠡᠭᠡᠳ ᠬᠡᠳᠦᠨ ᠲᠣᠮᠣ ᠫᠦᠰᠡ ᠪᠡᠷ ᠣᠷᠣᠵᠤ ᠦᠵᠡᠬᠦ ᠳ᠋ᠦ᠍ ᠲᠣᠷᠭᠠ ᠬᠣᠷᠭᠣᠢ ᠠ᠋ᠴᠠ ᠠᠪᠤᠭᠠᠳ ᠳᠠᠪᠤᠤ᠂ ᠳᠠᠯᠢᠩᠪᠤᠤ᠂ ᠴᠠᠢ ᠲᠠᠮᠠᠬᠢ ᠠᠪᠬᠤ ᠬᠥᠮᠦᠨ ᠳ᠋ᠦ᠍ ᠶᠠᠭᠤᠮᠠ ᠴᠢᠬᠢᠭᠡᠰᠦᠲᠡᠢ ᠪᠠᠢᠯᠠ᠃ ᠲᠡᠭᠦᠨ ᠡᠴᠡ ᠳᠣᠣᠭᠤᠷ ᠵᠢᠵᠢᠭ ᠫᠦᠰᠡ᠂ ᠯᠠᠩᠭᠦᠢ ᠨᠦ᠍ᠭᠦᠳ ᠢ᠋ᠶ᠋ᠡᠷ ᠣᠷᠣᠬᠤ ᠳ᠋ᠤ᠌ ᠡᠯᠳᠡᠪ ᠪᠠᠷᠠᠭᠠᠨ ᠤ᠋ ᠵᠠᠬᠠ ᠰᠡᠵᠢᠭᠦᠷ᠂ ᠢᠳᠡᠰᠢ ᠤᠤᠭᠤᠰᠢ ᠶ᠋ᠢᠨ ᠵᠦᠢᠯᠡᠰ ᠮᠥᠨ ᠯᠡ ᠠᠪᠬᠤ ᠬᠥᠮᠦᠨ ᠦᠭᠡᠢ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠡᠭᠦᠨ ᠡᠴᠡ ᠴᠠᠭᠠᠰᠢ ᠪᠠᠯᠳᠠᠨᠴᠡᠷᠢᠩ᠄ ᠬᠢᠲᠤᠭᠠ᠂ ᠰᠢᠪᠦᠭᠡ᠂ ᠡᠮᠡᠭᠡᠯ ᠬᠠᠵᠠᠭᠠᠷ ᠤ᠋ᠨ ᠲᠣᠨᠣᠭᠯᠠᠯ᠂ ᠰᠢᠯ᠂ ᠱᠠᠭᠠᠵᠠᠩ᠂ ᠰᠢᠭᠢᠳᠭᠡ᠂ ᠬᠡᠮᠬᠡᠷᠬᠡᠢ ᠬᠠᠭᠠᠷᠬᠠᠢ ᠲᠣᠭᠣᠭᠠ ᠰᠢᠨᠠᠭᠠ᠂ ᠳᠣᠮᠪᠣ ᠰᠠᠪᠠ᠁ ᠡᠯᠳᠡᠪ ᠪᠤᠰᠤ ᠶ᠋ᠢᠨ ᠮᠠᠭᠤᠰᠠᠢᠨ ᠶᠠᠭᠤᠮᠠᠰ ᠳᠡᠯᠭᠡᠭᠰᠡᠨ ᠭᠤᠳᠤᠮᠵᠢᠨ ᠤ᠋ ᠶᠠᠳᠠᠭᠤ ᠮᠠᠢᠮᠠᠢᠴᠢᠳ ᠬᠢᠭᠰᠡᠨ ᠢ᠋ᠶ᠋ᠡᠨ ᠵᠠᠷᠤᠬᠤ ᠪᠠᠷ ᠬᠥᠳᠡᠭᠡ ᠭᠠᠳᠠᠭᠠᠨ ᠤ᠋ ᠬᠥᠮᠦᠨ ᠦ᠌ ᠠᠷᠤ ᠥᠪᠥᠷ ᠡᠴᠡ ᠨᠢ ᠲᠡᠳᠡᠨ ᠴᠢᠩᠭᠠᠭᠠᠵᠤ ᠶᠠᠪᠤᠭᠤᠯᠬᠤ ᠦᠭᠡᠢ ᠪᠠᠢᠭᠠ ᠮᠠᠢᠮᠠᠢᠴᠢᠨ ᠡᠬᠡᠨᠡᠷ ᠦ᠋ᠳ᠂ ᠮᠢᠬᠠ ᠪᠠ ᠴᠠᠭᠠᠨ ᠢᠳᠡᠭᠡ ᠶ᠋ᠢᠨ ᠵᠦᠢᠯᠡᠰ ᠢ᠋ ᠲᠡᠮᠡᠭᠡ ᠪᠤᠶᠤ ᠲᠡᠷᠭᠡᠨ ᠳ᠋ᠦ᠍ ᠠᠴᠢᠭᠰᠠᠨ ᠢ᠋ᠶ᠋ᠠᠨ ᠪᠣᠷᠣᠯᠠᠭᠤᠯᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠬᠥᠳᠡᠭᠡ ᠶ᠋ᠢᠨ ᠬᠢᠨ᠂ ᠬᠣᠨᠢ ᠢᠮᠠᠭᠠ᠂ ᠦᠬᠡᠷ ᠠᠳᠤᠭᠤ᠂ ᠲᠡᠮᠡᠭᠡ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠢ᠋ ᠡᠳᠦᠢ ᠲᠡᠳᠦᠢ ᠪᠡᠷ ᠨᠢ ᠥᠯ ᠬᠣᠭᠣᠯᠠ ᠦᠭᠡᠢ ᠵᠣᠭᠰᠣᠭᠠᠭᠰᠠᠨ ᠶᠡᠬᠡ ᠬᠥᠯ ᠦ᠋ᠨ ᠫᠠᠨᠽᠢᠴᠢᠳ ᠴᠥᠮ ᠢ᠋ ᠦᠵᠡᠯᠡ᠃ ᠢᠩᠭᠢᠬᠦ ᠳ᠋ᠦ᠍ ᠠᠯᠢ ᠶ᠋ᠢ ᠨᠢ ᠪᠣᠯᠪᠠᠴᠤ ᠠᠪᠬᠤ ᠮᠠᠰᠢ ᠬᠣᠪᠣᠷ᠂ ᠬᠠᠷᠢᠨ ᠬᠠᠮᠢᠭᠠ ᠪᠣᠯ ᠬᠠᠮᠢᠭᠠ ᠥᠪᠡᠷ ᠦ᠋ᠨ ᠬᠢᠨᠢ ᠠᠳᠠᠯᠢ ᠮᠥᠩᠭᠥ ᠶᠠᠩᠴᠢᠶᠠᠨ ᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠶ᠋ᠢ ᠯᠠᠪᠲᠠᠢ ᠮᠡᠳᠡᠨ᠂ ᠭᠡᠷ ᠥᠭᠡᠳᠡ ᠪᠡᠨ ᠪᠤᠴᠠᠯᠠ᠃
ᠠᠷᠤ ᠠ᠋ᠴᠠ ᠨᠢ ᠨᠢᠭᠡ ᠬᠥᠮᠦᠨ ᠨᠡᠷᠡ ᠳᠤᠷᠠᠳᠤᠨ ᠳᠠᠭᠤᠳᠠᠬᠤ ᠰᠣᠨᠣᠰᠤᠭᠳᠠᠪᠠ᠃
ᠲᠡᠷᠡ ᠨᠢ ᠨᠢᠮᠠᠵᠠᠪ ᠪᠡᠢᠰᠡ ᠠᠵᠢ᠃ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠪᠦᠷᠢᠨ ᠬᠢᠲᠠᠳ ᠪᠥᠭᠡᠳ ᠠᠮᠢᠰᠬᠤᠭᠠᠳᠠᠨ ᠭᠦᠶᠦᠨ ᠢᠷᠡᠭᠡᠳ᠄
— ᠠᠢ᠂ ᠲᠦᠩ ᡁᠢ᠂ ᠨᠢ ᠬᠣᠣ ᠮᠠ!(ᠠᠢ᠂ ᠨᠥᠬᠥᠷ ᠰᠠᠢᠨ ᠤᠤ?) ᠭᠡᠬᠦ ᠶ᠋ᠢ ᠨᠢ ᠠᠵᠢᠬᠤ ᠳ᠋ᠤ᠌ ᠶᠡᠷᠦ ᠮᠣᠩᠭᠣᠯ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠬᠢᠲᠠᠳ ᠬᠥᠮᠦᠨ ᠪᠣᠯᠤᠨ ᠶᠠᠪᠤᠵᠤ ᠦᠭᠡ ᠬᠡᠯᠡ ᠶ᠋ᠢ ᠨᠢ ᠳᠠᠩᠨᠠᠭᠰᠠᠨ ᠪᠣᠯᠪᠠ ᠤᠤ ᠭᠡᠯᠲᠡᠢ ᠦᠵᠡᠭᠳᠡᠨᠡ᠃
— ᠵᠠ ᠡᠨᠡ ᠴᠢᠨᠢ ᠶᠠᠭᠤ ᠭᠡᠭᠴᠢ ᠪᠣᠯᠴᠢᠬᠠᠭᠠᠳ ᠶᠠᠪᠤᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ? ᠭᠡᠵᠦ ᠬᠡᠯᠡᠩᠭᠦᠲᠡ ᠬᠤᠪᠴᠠᠰᠤ ᠶ᠋ᠢ ᠨᠢ ᠣᠨᠴᠠᠯᠠᠨ ᠠᠵᠢᠬᠤ ᠳ᠋ᠤ᠌᠂
— ᠠ᠂ ᠡᠨᠡ ᠤᠤ ᠭᠡᠳ ᠣᠷᠰᠣᠭᠣᠢ ᠰᠢᠳᠦ ᠪᠡᠨ ᠢᠷᠵᠠᠢᠯᠭᠠᠨ ᠢᠨᠢᠶᠡᠮᠰᠦᠭᠯᠡᠵᠦ᠄ ᠶᠠᠭᠠᠬᠢᠬᠤᠪ᠂ ᠴᠠᠭ ᠤ᠋ᠨ ᠪᠠᠢᠳᠠᠯ᠂ ᠴᠠᠯᠢᠩ ᠠᠪᠤᠨᠠ ᠰᠢᠦ᠃
— ᠮᠥᠨ ᠳᠡ᠂ ᠣᠳᠣ ᠢᠩᠭᠢᠭᠡᠳ ᠲᠠᠨᠤᠰ ᠠ᠋ᠴᠠ ᠡᠬᠢᠯᠡᠨ ᠮᠣᠩᠭᠣᠯ ᠢ᠋ᠶ᠋ᠠᠨ ᠠᠯᠳᠠᠬᠤ ᠬᠡᠷᠡᠭ ᠤᠤ?
— ᠲᠡᠢᠮᠦ᠂ ᠭᠡᠪᠡᠴᠦ ᠳᠣᠲᠣᠷᠠ ᠪᠠᠨ ᠪᠢᠰᠢ᠂ ᠭᠠᠳᠠᠨᠠ ᠪᠠᠨ ᠭᠡᠳ ᠬᠠ ᠬᠠ ᠢᠨᠢᠶᠡᠪᠡ᠃ ᠲᠡᠭᠡᠭᠡᠳ ᠪᠠᠯᠳᠠᠨᠴᠡᠷᠢᠩ ᠤᠯᠠᠮ ᠢ᠋ᠶ᠋ᠠᠷ ᠵᠢᠪᠬᠦᠴᠡᠨ ᠠᠵᠢᠬᠤ ᠳ᠋ᠤ᠌ ᠢᠨᠢᠶᠡᠳᠦ ᠪᠡᠨ ᠭᠡᠨᠡᠳᠲᠡ ᠲᠡᠳᠡᠨ᠄
— ᠮᠠᠭᠤ ᠡᠪᠦᠭᠡᠨ ᠴᠢᠨᠢ ᠵᠦᠭᠡᠷ ᠰᠠᠭᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠰᠧᠯᠢᠩᠪᠦ ᠶ᠋ᠢᠨ ᠶᠠᠮᠤᠨ ᠳ᠋ᠤ᠌ ᠨᠢᠭᠡ ᠠᠵᠢᠯ ᠰᠢᠭ᠋ ᠶᠠᠭᠤᠮᠠ ᠬᠢᠬᠦ ᠪᠣᠯᠤᠯᠠ᠃
— ᠠᠬᠠᠢ᠂ ᠲᠠᠨ ᠢ᠋ ᠳᠣᠣᠷᠠᠲᠤ ᠠᠯᠪᠠᠲᠤ ᠨᠤᠭᠤᠳ ᠴᠢᠨᠢ ᠲᠡᠵᠢᠭᠡᠵᠦ ᠴᠢᠳᠠᠮᠠ ᠦᠭᠡᠢ ᠪᠠᠢᠨᠠ ᠤᠤ?
— ᠲᠡᠷᠡ ᠴᠦ᠍ ᠬᠠᠮᠢᠭᠠ ᠠ᠋ᠴᠠ᠂ ᠵᠦᠭᠡᠷ ᠣᠳᠣ ᠴᠠᠭ ᠲᠤ ᠶᠠᠳᠠᠵᠤ ᠪᠠᠢᠭᠠ ᠠᠯᠪᠠᠲᠤ ᠨᠤᠭᠤᠳ ᠤ᠋ᠨ ᠭᠠᠷ ᠢ᠋ ᠬᠠᠷᠠᠭᠰᠠᠨ ᠠ᠋ᠴᠠ ᠭᠠᠮᠢᠩ ᠤ᠋ᠨ ᠡᠪᠦᠷ ᠲᠦᠷᠡᠢ ᠳ᠋ᠡᠬᠢ ᠡᠴᠡ ᠰᠤᠭᠤᠯᠬᠤ ᠶ᠋ᠢ ᠪᠣᠳᠣᠭᠰᠠᠨ ᠳᠡᠭᠡᠷᠡ᠂ ᠲᠡᠢᠮᠦ ᠪᠢᠵᠡ ᠳᠡ?
— ᠬᠠᠷᠢᠨ ᠯᠠ ᠳᠠ᠂ ᠮᠠᠨ ᠤ᠋ ᠪᠣᠳᠣᠬᠤ ᠳ᠋ᠤ᠌ ᠭᠠᠮᠢᠩ ᠤ᠋ᠨ ᠡᠪᠦᠷ ᠲᠦᠷᠡᠢ ᠡᠴᠡ ᠰᠤᠭᠤᠯᠬᠤ ᠪᠢᠰᠢ᠂ ᠵᠦᠭᠡᠷ ᠬᠠᠮᠲᠤᠷᠠᠨ ᠢᠳᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠨᠠ
— ᠵᠠ ᠶᠠᠭᠠᠬᠢᠬᠤᠪ᠃ ᠴᠢ ᠢᠩᠭᠢᠵᠦ ᠦᠵᠡᠬᠦ ᠪᠠᠢᠵᠠᠢ᠃ ᠪᠢ ᠴᠦ᠍ ᠵᠥᠪᠰᠢᠶᠡᠷᠡᠶᠡ᠃ ᠭᠡᠲᠡᠯᠡ ᠪᠢᠳᠡ ᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠮᠢᠩ ᠤ᠋ᠳ ᠢ᠋ ᠬᠣᠬᠢᠷᠠᠭᠠᠬᠤ ᠦᠭᠡᠢ᠃ ᠦᠭᠡᠢ ᠰᠢᠦ ᠳᠡ᠃ ᠲᠡᠳᠡ ᠴᠢᠨᠢ ᠨᠠᠮᠠᠶ᠋ᠢ ᠣᠷᠣᠵᠤ ᠠᠵᠢᠯᠯᠠᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠥᠭᠡᠷᠡ ᠨᠢᠭᠡ ᠶ᠋ᠢ ᠠᠶᠠ ᠦᠭᠡᠢ ᠪᠣᠯ ᠪᠦᠬᠦ ᠰᠡᠳᠬᠢᠯ ᠮᠡᠳᠡᠷᠡᠯ ᠢ᠋ᠶ᠋ᠡᠨ ᠬᠤᠳᠠᠯᠳᠤᠬᠤ ᠶ᠋ᠢ ᠣᠯᠵᠤ ᠠᠵᠢᠯᠯᠠᠭᠤᠯᠬᠤ ᠰᠢᠦ ᠳᠡ᠃ ᠢᠩᠭᠢᠬᠦᠯᠡᠷ ᠵᠦᠭᠡᠷ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠰᠢᠷᠭᠤᠭᠤᠯᠵᠤ ᠠᠪᠤᠭᠰᠠᠨ ᠨᠢ ᠳᠡᠭᠡᠷᠡ ᠪᠠᠢᠬᠠ᠃
— ᠵᠠ ᠵᠠ ᠣᠳᠣ ᠮᠡᠳᠡᠯᠡ᠃ ᠢᠩᠭᠢᠬᠦ ᠳ᠋ᠦ᠍ ᠲᠠ ᠦᠯᠦ ᠪᠦᠲᠦᠬᠦ ᠬᠥᠮᠦᠨ ᠢ᠋ ᠲᠡᠳᠡᠨ ᠣᠷᠣᠭᠤᠯᠬᠤ ᠦᠭᠡᠢ ᠭᠡᠬᠦ ᠳ᠋ᠡᠭᠡᠨ ᠥᠪᠡᠷ ᠢ᠋ ᠪᠡᠨ ᠣᠷᠣᠭᠤᠯᠤᠭᠰᠠᠨ ᠬᠥᠮᠦᠨ ᠰᠢᠪ ᠳᠡ᠃
— ᠲᠡᠢᠮᠦ᠂ ᠢᠩᠭᠢᠭᠡᠳ ᠪᠢ ᠴᠢᠮᠠᠶ᠋ᠢ ᠮᠥᠨ ᠠᠵᠢᠯ ᠳ᠋ᠤ᠌ ᠣᠷᠣᠬᠤ ᠦᠭᠡᠢ ᠤᠤ ᠭᠡᠬᠦ ᠭᠡᠰᠡᠨ ᠶᠦᠮ᠃
— ᠵᠠ ᠪᠢ ᠶᠠᠭᠤ ᠬᠢᠬᠦ ᠬᠡᠷᠡᠭ ᠪᠣᠢ?
— ᠪᠢᠴᠢᠭ ᠦ᠋ᠨ ᠠᠵᠢᠯ᠂ ᠣᠷᠴᠢᠭᠤᠯᠭᠠ ᠬᠢ! ᠰᠢᠭᠦᠬᠦ ᠳ᠋ᠦ᠍ᠨᠢ ᠬᠥᠮᠦᠨ ᠬᠡᠷᠡᠭᠲᠡᠢ ᠭᠡᠨᠡ ᠪᠢᠯᠡ᠃
— ᠬᠠᠷᠢᠨ ᠯᠠ ᠳᠠ᠃ ᠴᠠᠯᠢᠩ ᠶᠠᠭᠤ ᠪᠠᠢᠬᠤ ᠪᠢᠯᠡ?
— ᠦ᠂ ᠰᠠᠢᠨ᠂ ᠪᠢ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠰᠠᠩ ᠤ᠋ᠨ ᠶᠠᠮᠤᠨ ᠳ᠋ᠤ᠌ ᠲᠦᠰᠢᠮᠡᠯ ᠪᠠᠢᠬᠤ ᠳ᠋ᠠᠭᠠᠨ ᠭᠤᠴᠢᠨ ᠶᠠᠩᠴᠢᠶᠠᠨ ᠠᠪᠳᠠᠭ ᠪᠠᠢᠭᠰᠠᠨ ᠪᠣᠯ ᠣᠳᠣ ᠲᠡᠨᠳᠡ ᠭᠤᠴᠢᠨ ᠲᠠᠪᠤ ᠶ᠋ᠢ ᠠᠪᠴᠤ ᠪᠠᠢᠨᠠ᠃ ᠪᠣᠳᠣᠪᠠᠯ ᠴᠢ ᠮᠥᠨ ᠲᠡᠳᠦᠢ ᠬᠢᠷᠢ ᠲᠠᠢ ᠯᠠ ᠠᠪᠤᠨᠠ ᠪᠠᠢᠬᠤ ᠠ᠋᠃
ᠰᠠᠷᠠ ᠪᠦᠷᠢ ᠭᠤᠴᠢᠨ ᠲᠠᠪᠤᠨ ᠶᠠᠩᠴᠢᠶᠠᠨ ᠠᠪᠤᠨᠠ ᠭᠡᠳᠡᠭ ᠪᠣᠯ ᠦᠭᠡ ᠳᠠᠭᠤ ᠦᠭᠡᠢ ᠭᠡᠷᠯᠡᠵᠦ ᠪᠣᠯᠤᠨᠠ ᠭᠡᠰᠡᠨ ᠦᠭᠡ ᠪᠠᠢᠨᠠ ᠳᠠ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠪᠣᠳᠣᠭᠳᠠᠨᠠ᠃ ᠭᠡᠪᠡᠴᠦ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠨᠢᠭᠡ ᠬᠡᠰᠡᠭ ᠮᠥᠷᠥ ᠵᠡᠷᠭᠡᠴᠡᠨ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠨᠢᠮᠠᠵᠠᠪ᠄
— ᠵᠠ ᠲᠡᠭᠡᠭᠡᠳ ᠴᠢ ᠶᠠᠭᠠᠬᠢᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃
— ᠬᠠᠷᠢᠨ ᠠ᠋᠃ ᠶᠠᠭᠤ ᠴᠦ᠍ ᠪᠣᠯᠲᠤᠭᠠᠢ ᠤᠷᠢᠳ ᠢ᠋ᠶ᠋ᠠᠷ ᠪᠣᠳᠣᠶᠠ᠃
— ᠪᠣᠳᠣᠭᠠᠳ ᠪᠠᠢᠬᠤ ᠶᠠᠭᠤ ᠪᠠᠢᠬᠤ ᠪᠢᠯᠡ ᠠ᠋᠃
— ᠪᠠᠯᠳᠠᠨᠴᠡᠷᠢᠩ ᠭᠠᠮᠢᠩ ᠳ᠋ᠤ᠌ ᠠᠵᠢᠯ ᠬᠢᠨᠡ ᠭᠡᠬᠦ ᠡᠴᠡ ᠭᠡᠨᠡᠳᠲᠡ ᠣᠢ ᠭᠤᠲᠤᠬᠤ ᠰᠡᠳᠬᠢᠯ ᠲᠥᠷᠥᠪᠡ᠃
— ᠲᠡᠢᠮᠦ ᠠ᠋᠂ ᠪᠣᠳᠣᠭᠠᠳ ᠪᠠᠢᠬᠤ ᠶᠠᠭᠤ ᠪᠠᠢᠬᠤᠪ᠃ ᠪᠢ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠡᠷᠲᠡᠬᠡᠨ ᠬᠡᠯᠡᠶᠡ᠃
ᠨᠢᠮᠠᠵᠠᠪ ᠤᠷᠮᠠ ᠬᠤᠭᠤᠷᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠢᠭᠡ ᠬᠡᠰᠡᠭ ᠳᠣᠷᠣᠭᠰᠢ ᠬᠠᠷᠠᠨ ᠶᠠᠪᠤᠪᠠ᠃ ᠲᠡᠭᠡᠭᠡᠳ᠄ ᠵᠠ ᠲᠡᠢᠮᠦ ᠪᠠᠢᠵᠠᠢ ᠭᠡᠳ ᠰᠠᠯᠤᠨ ᠶᠠᠪᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ᠄ ᠦᠭᠡᠢ ᠪᠠᠢᠵᠠ᠂ ᠪᠢ ᠴᠢᠮᠠ ᠳ᠋ᠤ᠌ ᠨᠢᠭᠡ ᠨᠢᠭᠤᠴᠠ ᠶᠠᠭᠤᠮᠠ ᠬᠡᠯᠡᠶᠡ ᠭᠡᠵᠦ ᠡᠷᠭᠢᠪᠡ᠃
— ᠵᠠ ᠶᠠᠭᠤ ᠪᠣᠢ? ᠭᠡᠬᠦ ᠳ᠋ᠦ᠍᠄
— ᠮᠠᠷᠭᠠᠰᠢ ᠭᠠᠮᠢᠩ ᠤ᠋ᠨ ᠬᠢᠨ ᠬᠣᠷᠢᠶᠠ ᠬᠦᠷᠢᠶᠡ ᠪᠡᠷ ᠭᠠᠷᠴᠤ ᠪᠠᠷᠢᠨᠠ ᠭᠡᠵᠦ ᠣᠷᠰᠣᠭᠣᠢ ᠰᠢᠳᠦᠲᠦ ᠬᠣᠰᠢᠭᠤ ᠪᠠᠨ ᠣᠢᠷᠠᠲᠤᠭᠤᠯᠤᠨ ᠰᠢᠪᠡᠨᠡᠪᠡ᠃
ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠦ᠋ᠨ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠬᠦᠢᠲᠡᠨ ᠤᠰᠤ ᠪᠡᠶᠡ ᠪᠡᠷ ᠨᠢ ᠭᠦᠶᠦᠬᠦ ᠰᠢᠭ ᠪᠣᠯᠤᠨ ᠬᠠᠮᠤᠭ ᠪᠡᠶᠡ ᠨᠢ ᠵᠢᠷᠢᠰᠬᠢᠪᠡ᠃
— ᠠ᠂ ᠲᠡᠢᠮᠦ ᠤᠤ? ᠲᠡᠭᠡᠭᠡᠳ ᠴᠣᠬᠣᠮ ᠶᠠᠭᠤ ᠪᠠᠷᠢᠬᠤ ᠶᠤᠮ ᠪᠣᠯ? ᠭᠡᠵᠦ ᠬᠠᠷᠢᠭᠤ ᠰᠢᠪᠡᠨᠡᠬᠦ ᠳ᠋ᠦ᠍᠄
— ᠰᠧᠯᠢᠩᠪᠦ ᠶ᠋ᠢᠨ ᠶᠠᠮᠤᠨ ᠤ᠋ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠪᠣᠯ᠄ ᠬᠥᠰᠬᠡ᠂ ᠣᠨᠣᠯᠭᠠ᠂ ᠬᠣᠭᠣᠯᠠ ᠬᠦᠨᠡᠰᠦ᠂ ᠬᠤᠪᠴᠠᠰᠤ ᠬᠤᠨᠠᠷ᠂ ᠭᠡᠪᠡᠴᠦ ᠲᠡᠷᠡ ᠴᠠᠭ ᠲᠡᠷᠡ ᠴᠠᠭ ᠳᠡᠭᠡᠷᠡ ᠪᠡᠨ ᠶᠠᠭᠤ ᠶᠠᠭᠤ ᠴᠦ᠍ ᠪᠣᠯᠬᠤ ᠶ᠋ᠢ ᠬᠡᠨ ᠮᠠᠨᠢ ᠮᠡᠳᠡᠬᠦ ᠪᠣᠢ? ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠭᠤᠮᠠ ᠶ᠋ᠢ ᠥᠨᠥᠳᠥᠷ ᠦ᠋ᠨ ᠳᠣᠲᠣᠷᠠ ᠳᠠᠨᠵᠢᠯᠠ᠂ ᠥᠭᠡᠷᠡ ᠪᠤᠰᠤᠳ ᠲᠤ ᠪᠦᠦ ᠮᠡᠳᠡᠭᠳᠡ!
ᠡᠨᠡ ᠦᠭᠡ ᠶ᠋ᠢ ᠨᠢᠮᠠᠵᠠᠪ ᠳᠣᠲᠣᠨᠣ ᠨᠥᠬᠥᠷ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠡᠬᠢᠯᠡᠭᠰᠡᠨ ᠪᠣᠯᠪᠠᠴᠤ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠣᠨᠴᠠ ᠠᠩᠬᠠᠷᠤᠯ ᠲᠠᠯᠪᠢᠬᠤ ᠳ᠋ᠤ᠌ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠴᠢᠷᠠᠢ ᠬᠤᠪᠢᠷᠠᠭᠠᠭᠰᠠᠨ ᠪᠥᠭᠡᠳ ᠦᠭᠡ ᠳᠠᠭᠤᠰᠤᠮᠠᠭᠴᠠ ᠡᠷᠭᠢᠨ ᠶᠠᠪᠤᠬᠤ ᠶ᠋ᠢ ᠵᠠᠪᠳᠤᠪᠠ᠃ ᠪᠠᠯᠳᠠᠨᠴᠡᠷᠢᠩ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠨᠢ ᠰᠢᠭᠦᠷᠡᠨ ᠠᠪᠴᠤ ᠬᠣᠢᠰᠢ ᠲᠡᠳᠡᠨ᠄
— ᠦᠭᠡᠢ᠂ ᠲᠠ ᠬᠦᠯᠢᠶᠡ! ᠡᠨᠡ ᠴᠣᠬᠣᠮ ᠶᠠᠭᠤ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠨᠢ ᠡᠨᠡ ᠪᠣᠢ?
ᠨᠢᠮᠠᠵᠠᠪ ᠴᠠᠭᠠᠰᠢ ᠶᠠᠷᠢᠬᠤ ᠴᠦ᠍ ᠪᠠᠢᠲᠤᠭᠠᠢ ᠲᠦᠷᠦᠭᠦᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠷᠢᠵᠤ ᠣᠷᠬᠢᠭᠰᠠᠨ ᠢ᠋ᠶ᠋ᠠᠨ ᠭᠡᠮᠰᠢᠬᠦ ᠮᠡᠲᠦ ᠨᠢᠭᠤᠷ ᠨᠢ ᠭᠦᠯᠦᠢᠨ᠂ ᠨᠢᠳᠦ ᠪᠡᠨ ᠴᠦ᠍ ᠴᠠᠪᠴᠢᠬᠤ ᠦᠭᠡᠢ ᠠᠮᠢᠰᠬᠤᠭᠠᠳᠠᠨᠠ᠃
— ᠡᠨᠡ ᠴᠢᠨᠢ ᠣᠳᠣ ᠠᠶᠤᠯ ᠲᠠᠢ ᠨᠢᠭᠤᠴᠠ ᠪᠠᠢᠭᠠ ᠶᠤᠮ ᠤᠤ ᠭᠡᠬᠦ ᠳ᠋ᠦ᠍᠂
— ᠲᠡᠭᠡᠬᠦ ᠦᠭᠡᠢ ᠶᠠᠭᠠᠬᠢᠬᠤᠪ᠃ ᠨᠢᠭᠡᠨᠲᠡ ᠢᠲᠡᠭᠡᠭᠰᠡᠨ ᠦ᠌ ᠬᠢ ᠭᠡᠳ ᠨᠢᠮᠠᠵᠠᠪ ᠰᠢᠪᠡᠨᠡᠯᠲᠡ ᠪᠡᠨ ᠠᠶᠠᠷᠬᠠᠨ ᠪᠣᠯᠭᠠᠨ᠄ ᠤᠯᠠᠭᠠᠨ ᠣᠷᠣᠰ ᠤᠷᠤᠭᠤ ᠴᠡᠷᠢᠭ ᠶᠠᠪᠤᠭᠤᠯᠬᠤ ᠭᠡᠨᠡ ᠪᠢᠯᠡ᠃
— ᠪᠠᠢᠯᠳᠤᠬᠤ ᠭᠡᠵᠦ ᠤᠤ?
— ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃
ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠤᠯᠠᠭᠠᠨ ᠣᠷᠣᠰ ᠢ᠋ ᠥᠮᠥᠭᠯᠡᠬᠦ ᠰᠡᠳᠬᠢᠯ ᠲᠥᠷᠥᠪᠡ᠃ ᠲᠦᠷᠦᠭᠦᠨ ᠦ᠌ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠤᠯᠠᠭᠠᠨ ᠣᠷᠣᠰ ᠢ᠋ ᠲᠦᠰᠢᠭᠯᠡᠨᠡ ᠭᠡᠰᠡᠨ ᠢ᠋ ᠰᠠᠨᠠᠬᠤ ᠳ᠋ᠤ᠌ ᠲᠤᠩ ᠶᠠᠭᠠᠷᠠᠯᠲᠠᠢ ᠮᠡᠳᠡᠭᠦᠰᠢᠲᠡᠢ ᠠᠵᠢ᠃
— ᠵᠠ ᠳᠤᠭᠤᠯᠤᠯᠠ᠃ ᠡᠨᠡ ᠶᠠᠪᠤᠳᠠᠯ ᠢ᠋ ᠲᠠ ᠰᠦᠬᠡᠪᠠᠭᠠᠲᠤᠷ ᠲᠤ ᠮᠡᠳᠡᠭᠳᠡᠭᠰᠡᠨ ᠤᠤ?
— ᠨᠢᠮᠠᠵᠠᠪ ᠰᠣᠴᠢᠨ ᠥᠭᠡᠳᠡ ᠡᠴᠡ ᠨᠢ ᠠᠮᠠ ᠠᠩᠭᠠᠢᠯᠭᠠᠨ ᠭᠠᠢᠬᠠᠨ ᠰᠢᠷᠳᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠴᠦ᠍《ᠦᠭᠡᠢ᠂ ᠡᠨᠡ ᠴᠢᠨᠢ ᠢᠩᠭᠢᠬᠦ ᠳ᠋ᠦ᠍ ᠪᠢ ᠶᠠᠭᠤ ᠬᠡᠯᠡᠵᠦ ᠣᠷᠬᠢᠪᠠ》 ᠭᠡᠰᠡᠨ ᠰᠢᠭ ᠨᠢᠮᠠᠵᠠᠪ ᠤ᠋ᠨ ᠨᠢᠭᠤᠷ ᠢ᠋ ᠰᠢᠷᠲᠡᠪᠡ᠃ ᠬᠠᠭᠠᠰ ᠮᠢᠨᠦ᠋ᠲ ᠬᠢᠷᠢ ᠲᠠᠭ ᠴᠢᠮᠡᠭᠡ ᠦᠭᠡᠢ᠂ ᠰᠦᠬᠡᠪᠠᠭᠠᠲᠤᠷ ᠨᠢᠮᠠᠵᠠᠪ ᠬᠣᠶᠠᠷ ᠠᠨᠳᠠ ᠨᠥᠬᠥᠳ ᠴᠦ᠍ ᠪᠢᠰᠢ᠂ ᠭᠡᠮ ᠬᠣᠣᠷ ᠦᠭᠡᠢ ᠲᠠᠨᠢᠯ ᠤ᠋ᠳ ᠴᠦ᠍ ᠪᠢᠰᠢ᠂ ᠬᠠᠷᠢᠨ ᠬᠣᠶᠠᠷ ᠪᠡᠶᠡ ᠪᠡᠨ ᠬᠠᠷᠠᠳᠠᠨ ᠬᠢᠴᠢᠶᠡᠭᠰᠡᠨ ᠬᠥᠮᠦᠨ ᠪᠢᠰᠢ ᠤᠤ? ᠭᠡᠵᠦ ᠰᠠᠨᠠᠪᠠ᠃ ᠭᠡᠲᠡᠯᠡ ᠨᠢᠮᠠᠵᠠᠪ ᠰᠤᠯᠠᠬᠠᠨ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠳᠣᠬᠢᠭᠠᠳ᠄
— ᠬᠡᠷᠪᠡ ᠴᠢ ᠮᠢᠨᠦ ᠡᠨᠡ ᠶᠠᠷᠢᠭᠰᠠᠨ ᠢ᠋ ᠪᠤᠰᠤᠳ ᠲᠤ ᠶᠠᠷᠢᠭᠰᠠᠨ ᠪᠠᠢᠪᠠᠯ ᠤᠤ? ᠭᠡᠳ ᠪᠠᠯᠳᠠᠨᠴᠡᠷᠢᠩ ᠢ᠋ ᠣᠷᠰᠣᠭᠣᠢ ᠰᠢᠲᠦ ᠪᠡᠷ ᠢ᠋ᠶ᠋ᠡᠨ ᠬᠠᠳᠤᠷᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠨᠢᠭᠤᠷ ᠲᠤᠨᠢ ᠲᠤᠯᠪᠠ᠃
— ᠵᠦᠭᠡᠷ᠂ ᠬᠡᠷᠪᠡ ᠪᠢ ᠡᠨᠡ ᠨᠢᠭᠤᠴᠠ ᠶ᠋ᠢ ᠵᠠᠳᠠᠷᠠᠭᠤᠯᠤᠭᠰᠠᠨ ᠪᠠᠢᠪᠠᠯ ᠭᠠᠢᠭᠤᠢ ᠲᠠ ᠮᠢᠨᠦ ᠲᠣᠯᠣᠭᠠᠢ ᠶ᠋ᠢ ᠬᠡᠵᠢᠶᠡ ᠴᠦ᠍ ᠠᠪᠴᠤ ᠠᠮᠵᠢᠨᠠ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠥᠭᠦᠯᠡᠪᠡ᠃
— ᠦᠬᠦᠭᠰᠡᠨ ᠭᠡᠵᠦ ᠨᠢᠮᠠᠵᠠᠪ ᠤᠤᠯᠭᠠ ᠠᠯᠳᠠᠪᠠ᠃ ᠡᠨᠡ ᠨᠢ ᠪᠤᠰᠤᠳ ᠢ᠋ ᠪᠢᠰᠢ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠠᠳᠠᠭᠠᠢ ᠠᠮᠠ ᠲᠠᠢ ᠳ᠋ᠠᠭᠠᠨ ᠪᠣᠯᠵᠤ ᠭᠠᠮᠢᠩ ᠤ᠋ᠨ ᠨᠢᠭᠤᠴᠠ ᠶ᠋ᠢ ᠬᠡᠯᠡᠵᠦ ᠣᠷᠬᠢᠭᠰᠠᠨ ᠳ᠋ᠠᠭᠠᠨ ᠭᠡᠮᠰᠢᠵᠦ ᠥᠪᠡᠷ ᠢ᠋ ᠪᠡᠨ ᠬᠠᠷᠢᠶᠠᠪᠠ ᠪᠣᠯᠤᠯᠲᠠᠢ᠃
— ᠴᠢᠨᠦ ᠲᠣᠯᠣᠭᠠᠢ ᠶ᠋ᠢ ᠠᠪᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠥᠨᠲᠥᠭᠡᠷ ᠢ᠋ ᠠᠪᠤᠭᠤᠯᠴᠢᠬᠠᠨᠠ ᠰᠢᠦ ᠳᠡ ᠭᠡᠳ ᠡᠷᠭᠢᠨ ᠶᠠᠪᠤᠪᠠ᠃ ᠠᠷᠤ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠶᠣᠰᠣᠲᠠᠢ ᠲᠣᠯᠣᠭᠠᠢ ᠲᠠᠢ ᠪᠠᠨ ᠬᠣᠯᠪᠣᠭᠳᠠᠬᠤ ᠨᠢᠭᠤᠴᠠ ᠪᠠᠨ ᠠᠯᠳᠠᠭᠰᠠᠨ ᠬᠥᠮᠦᠨ ᠯᠡ ᠡᠢᠮᠦ ᠪᠠᠢᠳᠠᠭ ᠪᠣᠯᠪᠠ ᠤᠤ ᠭᠡᠮᠡᠷ ᠵᠡᠭᠦᠨ ᠪᠠᠷᠠᠭᠤᠨ ᠢ᠋ ᠰᠡᠯᠭᠦᠯᠡᠨ ᠲᠡᠭ ᠲᠤᠭ ᠠᠯᠬᠤᠯᠠᠬᠤ ᠨᠢ ᠬᠠᠷᠠᠭᠳᠠᠨᠠ᠃ ᠤᠷᠢᠳ ᠨᠢ ᠪᠠᠯᠳᠠᠨᠴᠡᠷᠢᠩ᠂ ᠭᠠᠮᠢᠩ ᠢ᠋ ᠪᠤᠬᠢᠨᠢᠳᠤᠵᠤ ᠶᠠᠪᠤᠬᠤ ᠳ᠋ᠤᠨᠢ ᠨᠢᠮᠠᠵᠠᠪ ᠢ᠋ ᠶᠠᠭᠤᠨ ᠠᠢᠬᠤᠪᠲᠤᠷ ᠡᠷᠡ ᠪᠣᠢ ᠭᠡᠵᠦ ᠭᠠᠢᠬᠠᠳᠠᠭ ᠪᠠᠢᠭᠰᠠᠨ ᠪᠣᠯ ᠣᠳᠣ᠂ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠲᠠᠤᠯᠠᠢ ᠰᠢᠭ᠋ ᠵᠢᠷᠦᠬᠡ ᠦᠭᠡᠢ ᠮᠠᠭᠤ ᠡᠷᠡ ᠪᠣᠢ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠭᠡᠲᠡᠯᠡ ᠲᠣᠯᠣᠭᠠᠢ ᠳ᠋ᠤᠨᠢ᠄ ᠡᠨᠡ ᠭᠠᠮᠢᠩ ᠤ᠋ᠳ ᠤᠯᠠᠭᠠᠨ ᠣᠷᠣᠰ ᠤᠷᠤᠭᠤ ᠳᠣᠪᠲᠣᠯᠬᠤ ᠶ᠋ᠢᠨ ᠤᠴᠢᠷ ᠶᠠᠭᠤ ᠪᠣᠢ? ᠭᠡᠳᠡᠭ ᠨᠢᠭᠡ ᠠᠰᠠᠭᠤᠳᠠᠯ ᠣᠷᠣᠵᠤ ᠢᠷᠡᠯᠡ᠃ ᠡᠭᠦᠨ ᠦ᠌ ᠤᠷᠢᠳ ᠤᠯᠠᠭᠠᠨ ᠣᠷᠣᠰ ᠢ᠋ ᠠᠩᠭ᠌ᠯᠢ᠂ ᠠᠮᠧᠷᠢᠺᠠ᠂ ᠶᠠᠫᠣᠨ᠂ ᠭᠧᠷᠮᠠᠨ᠂ ᠢᠲ᠋ᠠᠯᠢ᠂ ᠠᠦ᠋ᠰᠲ᠋ᠷᠠᠯᠢᠶᠠ᠂ ᠴᠧᠨ᠌ᠨ᠌ᠣ᠋ ᠪᠠ ᠪᠠᠰᠠ ᠪᠤᠰᠤᠳ ᠤᠯᠤᠰ ᠤ᠋ᠳ ᠡᠰᠡᠷᠭᠦᠴᠡᠨ ᠳᠣᠪᠲᠣᠯᠵᠤ ᠪᠠᠢᠨᠠ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠤ᠋ ᠳᠡᠭᠡᠷᠡ ᠣᠳᠣ ᠭᠠᠮᠢᠩ ᠨᠡᠮᠡᠭᠳᠡᠵᠦ ᠪᠠᠢᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠥᠮᠥᠭᠯᠡᠬᠦ ᠶᠡᠬᠡ ᠰᠡᠳᠬᠢᠯ ᠲᠥᠷᠥᠪᠡ᠃《ᠶᠡᠷᠦ ᠤᠯᠠᠭᠠᠨ ᠣᠷᠣᠰ ᠭᠡᠳᠡᠭ ᠪᠣᠯ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠶ᠋ᠢᠨ ᠶᠣᠰᠣ ᠰᠤᠷᠲᠠᠬᠤᠨ ᠢ᠋ ᠪᠦᠷᠢᠨ ᠡᠰᠡᠷᠭᠦᠴᠡᠭᠰᠡᠨ ᠠᠷᠢᠭᠤᠨ ᠵᠣᠷᠢᠯᠭᠠᠲᠤ ᠤᠯᠤᠰ ᠶᠤᠮ》 ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠬᠡᠯᠡᠭᠰᠡᠨ ᠨᠢ ᠦᠨᠡᠨ ᠲᠡᠢ ᠶ᠋ᠢᠨ ᠤᠯᠠᠮ ᠠ᠋ᠴᠠ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠤᠯᠤᠰ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠩᠭᠢᠵᠦ ᠡᠰᠡᠷᠭᠦᠴᠡᠵᠦ ᠪᠠᠢᠵᠤ ᠮᠠᠭᠠᠳ ᠭᠡᠬᠦ ᠡᠴᠡ ᠠᠭᠤᠷ ᠭᠦᠷᠦᠨ ᠪᠤᠬᠢᠨᠢᠳᠤᠨᠠ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ《ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠶᠠᠪᠤᠳᠠᠯ ᠨᠠᠳᠠ ᠳ᠋ᠤ᠌ ᠶᠠᠭᠤᠨ ᠤ᠋ ᠬᠠᠮᠢᠶᠠ ᠪᠣᠢ? ᠪᠢ ᠶᠠᠮᠠᠷ ᠲᠡᠭᠦᠨ ᠢ᠋ ᠮᠡᠳᠡᠬᠦ ᠪᠡᠷ ᠪᠢᠰᠢ᠂ ᠵᠠᠯᠬᠠᠭᠠᠨ ᠴᠡᠭᠡᠷᠯᠡᠭᠦᠯᠬᠦ ᠲᠩᠷᠢ ᠪᠢᠰᠢ᠂ ᠬᠠᠷᠢᠨ ᠬᠠᠨᠢᠯᠠᠬᠤ ᠠᠮᠠᠷᠠᠭ ᠪᠠᠢᠪᠠᠴᠤ ᠲᠡᠭᠦᠨ ᠢ᠋ᠶ᠋ᠡᠨ ᠠᠪᠬᠤ ᠬᠥᠷᠥᠩᠭᠡ ᠮᠥᠩᠭᠥ ᠦᠭᠡᠢ ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠥᠴᠦᠬᠡᠨ ᠠᠮᠢᠲᠠᠨ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠭᠰᠠᠨ ᠤᠴᠢᠷ ᠤᠯᠤᠰ ᠲᠥᠷᠥ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠡᠢᠨ ᠬᠦ᠌ ᠬᠠᠵᠠᠭᠤ ᠲᠠᠢᠰᠢ ᠲᠠᠯᠪᠢᠭᠠᠳ᠂ ᠭᠠᠭᠴᠠ ᠬᠦ᠌ ᠬᠠᠢᠷᠠᠲᠤ ᠠᠮᠠᠷᠠᠭ ᠨᠢ ᠪᠣᠳᠣᠭᠳᠠᠵᠤ ᠡᠬᠢᠯᠡᠪᠡ᠃ ᠲᠡᠭᠡᠭᠡᠳ ᠨᠢᠮᠠᠵᠠᠪ ᠤ᠋ᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠭᠠᠮᠢᠩ ᠤ᠋ᠨ ᠭᠠᠵᠠᠷ ᠠᠯᠪᠠ ᠬᠠᠭᠠᠬᠤ ᠶᠤᠮ ᠪᠢᠯᠡ ᠤᠤ ᠭᠡᠳᠡᠭ ᠳᠡᠭᠡᠷᠡ ᠰᠡᠳᠬᠢᠯ ᠨᠢ ᠰᠢᠯᠵᠢᠪᠡ᠃ ᠢᠩᠭᠢᠭᠡᠳ ᠰᠠᠷᠠ ᠪᠦᠷᠢ ᠭᠤᠴᠢᠨ ᠲᠠᠪᠤᠨ ᠶᠠᠩᠴᠢᠶᠠᠨ ᠠᠪᠬᠤ ᠶᠠᠪᠤᠳᠠᠯ ᠪᠣᠯ ᠦᠭᠡ ᠳᠠᠭᠤ ᠦᠭᠡᠢ ᠭᠡᠷᠯᠡᠵᠦ ᠪᠣᠯᠤᠨᠠ ᠭᠡᠰᠡᠨ ᠦᠭᠡ ᠪᠠᠢᠨᠠ᠃ ᠭᠡᠲᠡᠯᠡ ᠬᠠᠵᠠᠭᠤ ᠠ᠋ᠴᠠ ᠨᠢᠭᠡ ᠶᠠᠭᠤᠮᠠ《ᠠ᠋ ᠴᠢ ᠶᠠᠭᠤᠲᠠᠢ ᠵᠢᠭᠲᠡᠢ ᠶᠠᠭᠤᠮᠠ ᠪᠣᠳᠣᠨᠠ ᠪᠣᠢ? ᠡᠬᠡᠨᠡᠷ ᠠᠪᠬᠤ ᠶ᠋ᠢᠨ ᠲᠥᠯᠥᠭᠡ ᠤᠯᠤᠰ ᠣᠷᠣᠨ ᠤ᠋ ᠪᠠᠨ ᠳᠠᠢᠰᠤᠨ ᠳ᠋ᠤ᠌ ᠪᠦᠷ ᠪᠡᠶᠡ ᠪᠡᠨ ᠬᠤᠳᠠᠯᠳᠤᠬᠤ ᠭᠡᠵᠦ ᠪᠠᠢᠨᠠ ᠤᠤ?》 ᠭᠡᠵᠦ ᠰᠢᠪᠡᠨᠡᠨ ᠠᠰᠠᠭᠤᠬᠤ ᠰᠢᠭ᠋ ᠪᠣᠯᠤᠨ ᠤᠷᠮᠠ ᠵᠣᠷᠢᠭ ᠢ᠋ ᠨᠢ ᠭᠤᠲᠤᠭᠠᠬᠤ ᠠᠵᠢ᠃
ᠭᠡᠷ ᠲᠡᠭᠡᠨ ᠢᠷᠡᠬᠦ ᠳ᠋ᠦ᠍ ᠱᠠᠪᠢ ᠨᠢ ᠦᠭᠡᠢ ᠪᠠᠢᠯᠠ᠃ ᠬᠠᠯᠠᠭᠤᠨ ᠤ᠋ ᠢᠯᠴᠢ ᠥᠭᠭᠦᠨ ᠭᠡᠷ ᠣᠷᠣᠨ ᠢ᠋ ᠨᠢ ᠳᠤᠯᠠᠭᠠᠴᠠᠭᠤᠯᠳᠠᠭ ᠵᠤᠤᠬᠠ ᠶᠠᠩᠳᠤᠩ ᠭᠥᠯᠢᠢᠨ ᠬᠦᠷᠦᠵᠦ᠂ ᠬᠦᠢᠲᠡᠨ ᠵᠢᠪᠠᠷ ᠭᠠᠷ ᠬᠠᠭᠠᠷᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠠᠷᠤ ᠳ᠋ᠤᠨᠢ ᠨᠢᠭᠡ ᠶᠠᠭᠤᠮᠠ ᠲᠠᠰᠬᠢᠬᠦ ᠶ᠋ᠢ ᠡᠷᠭᠢᠨ ᠦᠵᠡᠬᠦ ᠳ᠋ᠦ᠍ ᠬᠠᠶᠠᠭᠠᠨ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠬᠤᠪᠢᠩ ᠲᠠᠢ ᠤᠰᠤ ᠬᠥᠯᠲᠡᠨ ᠳᠤᠮᠳᠠ ᠪᠠᠨ ᠣᠪᠣᠢᠨ ᠬᠠᠭᠠᠷᠠᠵᠤ ᠪᠠᠢᠯᠠ᠃ ᠡᠭᠦᠨ ᠡᠴᠡ ᠦᠵᠡᠬᠦ ᠳ᠋ᠦ᠍ ᠱᠠᠪᠢ ᠨᠢ ᠥᠷᠯᠥᠭᠡ ᠥᠪᠡᠷ ᠡᠴᠡ ᠨᠢ ᠤᠷᠢᠳ ᠭᠠᠷᠤᠭᠠᠳ ᠣᠳᠣ ᠪᠣᠯᠲᠠᠯᠠ ᠢᠷᠡᠭᠡ ᠦᠭᠡᠢ ᠪᠠᠢᠭᠠ ᠨᠢ ᠢᠯᠡᠬᠡᠨ ᠠᠵᠢ᠃
ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠱᠠᠪᠢ ᠳ᠋ᠠᠭᠠᠨ ᠠᠭᠤᠷᠯᠠᠭᠰᠠᠨ ᠦᠭᠡᠢ ᠪᠥᠭᠡᠳ《ᠬᠡᠷᠪᠡ ᠪᠢ ᠡᠬᠡᠨᠡᠷ ᠲᠡᠢ ᠰᠠᠨ ᠪᠣᠯ ᠭᠡᠷ ᠣᠷᠣᠨ ᠮᠢᠨᠢ ᠬᠠᠮᠢᠭᠠ ᠠ᠋ᠴᠠ ᠡᠢᠮᠦ ᠪᠠᠢᠬᠤ ᠪᠢᠯᠡ?》 ᠭᠡᠵᠦ ᠯᠡ ᠰᠠᠨᠠᠪᠠ᠃ ᠭᠡᠷ ᠡᠴᠡ ᠪᠡᠨ ᠭᠠᠷᠤᠨ ᠲᠦᠯᠡᠭᠡ ᠣᠷᠣᠭᠤᠯᠵᠤ ᠭᠠᠯ ᠲᠦᠯᠡᠬᠦ ᠭᠡᠵᠦ ᠰᠠᠭᠤᠬᠤ ᠳ᠋ᠤᠨᠢ ᠡᠭᠦᠳᠡ ᠰᠡᠪᠬᠢᠨ ᠨᠡᠭᠡᠭᠡᠭᠳᠡᠵᠦ ᠱᠠᠪᠢ ᠨᠢ ᠣᠷᠣᠵᠤ ᠢᠷᠡᠯᠡ᠃ ᠦᠵᠡᠲᠡᠯᠡ ᠰᠠᠨᠳᠤᠷᠤᠭᠰᠠᠨ ᠮᠡᠲᠦ ᠠᠮᠢᠰᠬᠤᠯ ᠨᠢ ᠳᠡᠭᠡᠷᠡ ᠪᠠᠢᠬᠤ ᠲᠤᠯᠠ ᠪᠠᠯᠳᠠᠨᠴᠡᠷᠢᠩ ᠭᠡᠷ ᠡᠴᠡ ᠭᠠᠷᠤᠨ ᠤᠳᠠᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠨᠢ ᠵᠣᠪᠠᠵᠤ ᠳᠠ ᠭᠡᠵᠦ ᠪᠣᠳᠣᠪᠠ᠃ ᠭᠡᠲᠡᠯᠡ ᠶᠡᠷᠦ ᠲᠡᠢᠮᠦ ᠪᠢᠰᠢ᠄
— ᠪᠠᠭᠰᠢ ᠠ᠋! ᠶᠠᠭᠠᠬᠢᠬᠤ ᠪᠢᠯᠡ ᠠ᠋? ᠭᠡᠵᠦ ᠦᠭᠡ ᠪᠡᠨ ᠲᠠᠰᠤᠯᠤᠨ ᠪᠥᠬᠥᠢᠨ᠄ ᠭᠠᠮᠢᠩ ᠤ᠋ᠳ ᠪᠠᠷᠢᠶᠠ ᠪᠠᠷᠢᠬᠤ ᠭᠡᠨᠡ ᠭᠡᠵᠦ ᠨᠢᠭᠤᠴᠠᠯᠠᠨ ᠰᠢᠪᠡᠨᠡᠪᠡ᠃
ᠢᠩᠭᠢᠬᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠪᠠᠷᠢᠶᠠ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠶᠡᠷᠦ ᠬᠥᠮᠦᠨ ᠮᠡᠳᠡᠭᠡ ᠦᠭᠡᠢ ᠪᠠᠢᠭᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠤᠴᠢᠷ ᠡᠨᠡ ᠪᠠᠰᠠ ᠬᠠᠮᠢᠭᠠ ᠠ᠋ᠴᠠ ᠣᠯᠵᠤ ᠮᠡᠳᠡᠪᠡ ᠭᠡᠵᠦ ᠪᠣᠳᠣᠨ᠄
— ᠬᠡᠵᠢᠶᠡ ᠭᠡᠵᠦ ᠯᠠᠪᠯᠠᠨ ᠠᠰᠠᠭᠤᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠨᠠᠮᠰᠠᠷᠠᠢ᠂
— ᠮᠠᠷᠭᠠᠰᠢ᠃
— ᠦᠭᠡᠢ ᠴᠢ ᠬᠡᠨ ᠡᠴᠡ ᠳᠤᠭᠤᠯᠪᠠ?
— ᠰᠦᠬᠡᠪᠠᠭᠠᠲᠤᠷ ᠠ᠋ᠴᠠ᠃
— ᠰᠦᠬᠡᠪᠠᠭᠠᠲᠤᠷ ᠴᠢᠮᠠ ᠳ᠋ᠤ᠌ ᠬᠡᠯᠡᠯᠡ ᠭᠡᠵᠦ ᠤᠤ? ᠭᠡᠵᠦ ᠭᠠᠢᠬᠠᠨ ᠰᠢᠷᠳᠡᠬᠦ ᠳ᠋ᠦ᠍᠂ ᠨᠠᠮᠰᠠᠷᠠᠢ᠄
— ᠦᠭᠡᠢ᠂ ᠰᠦᠬᠡᠪᠠᠭᠠᠲᠤᠷ ᠨᠠᠳᠠ ᠳ᠋ᠤ᠌ ᠬᠡᠯᠡᠭᠰᠡᠨ ᠶᠠᠭᠤᠮᠠ ᠪᠢᠰᠢ᠂ ᠪᠢ ᠵᠦᠭᠡᠷ ᠥᠭᠡᠷᠡ ᠪᠤᠰᠤᠳ ᠳᠤ ᠶᠠᠷᠢᠵᠤ ᠪᠠᠢᠬᠤ ᠳ᠋ᠤᠨᠢ ᠬᠠᠵᠠᠭᠤ ᠠ᠋ᠴᠠ ᠨᠢ ᠳᠤᠭᠤᠯᠤᠯᠠ ᠭᠡᠬᠦ ᠨᠢ ᠶᠠᠭ ᠯᠠ ᠨᠢᠮᠠᠵᠠᠪ ᠤ᠋ᠨ ᠨᠢᠭᠤᠴᠠ ᠪᠠᠨ ᠠᠯᠳᠠᠵᠤ ᠣᠷᠬᠢᠭᠠᠳ ᠰᠠᠨᠳᠤᠷᠴᠤ ᠪᠠᠢᠭᠰᠠᠨ ᠢ᠋ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠭᠤᠯᠬᠤ ᠠᠵᠢ᠃
ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠰᠦᠬᠡᠪᠠᠭᠠᠲᠤᠷ ᠠ᠋ᠴᠠ ᠰᠢᠭᠤᠳ ᠥᠪᠡᠷ ᠲᠤᠨᠢ ᠬᠡᠯᠡᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠪᠥᠭᠡᠳ ᠶᠠᠭᠠᠬᠢᠭᠠᠳ ᠡᠨᠡ ᠬᠣᠶᠠᠷ ᠡᠢᠮᠦ ᠰᠦᠷᠡᠬᠡᠢ ᠨᠠᠢᠵᠠ ᠨᠤᠭᠤᠳ ᠪᠣᠯᠴᠢᠬᠠᠪᠠ ᠭᠡᠳᠡᠭ ᠢ᠋ ᠪᠣᠳᠣᠨ ᠨᠢᠭᠡ ᠬᠡᠰᠡᠭ ᠳᠤᠭᠤᠢ ᠰᠠᠭᠤᠯᠠ᠃
— ᠵᠠ ᠲᠡᠭᠡᠭᠡᠳ ᠴᠣᠬᠣᠮ ᠶᠠᠭᠤ ᠪᠠᠷᠢᠬᠤ ᠶᠤᠮ ᠪᠣᠯ ᠭᠡᠬᠦ ᠳ᠋ᠦ᠍᠂ ᠨᠠᠮᠰᠠᠷᠠᠢ᠂ ᠨᠢᠮᠠᠵᠠᠪ ᠤ᠋ᠨ ᠬᠡᠯᠡᠭᠰᠡᠨ ᠢ᠋ ᠰᠢᠷᠬᠡᠭ ᠳᠠᠷᠠᠭᠠᠯᠠᠨ ᠲᠣᠭᠠᠴᠢᠪᠠ᠃
ᠡᠭᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠤᠭ ᠪᠠᠷᠢᠶᠠᠨ ᠤ᠋ ᠶᠠᠪᠤᠳᠠᠯ ᠢ᠋ ᠨᠢᠮᠠᠵᠠᠪ ᠲᠠᠷᠬᠠᠭᠠᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠲᠡᠭᠦᠨ ᠢ᠋ ᠮᠥᠨ ᠤᠯᠤᠰ ᠣᠷᠣᠨ ᠤ᠋ ᠪᠠᠨ ᠲᠥᠯᠥᠭᠡ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠥᠭᠭᠦᠰᠡᠭᠡᠷ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠨᠢᠭᠡ ᠲᠠᠯᠠ ᠪᠠᠷ ᠪᠠᠰᠠ ᠰᠡᠳᠬᠢᠯ ᠬᠥᠳᠡᠯᠦᠨ ᠪᠠᠶᠠᠷᠯᠠᠪᠠ᠃ ᠬᠠᠷᠢᠨ ᠱᠠᠪᠢ ᠨᠠᠮᠰᠠᠷᠠᠢ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌ ᠭᠡᠪᠡᠯ ᠪᠠᠶᠠᠷᠯᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠡᠨᠡ ᠮᠠᠨᠢ《ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠲᠡᠷᠡ ᠤᠯᠤᠰ ᠲᠥᠷᠥ ᠶ᠋ᠢᠨ ᠲᠣᠮᠣ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠭᠴᠢᠳ ᠤ᠋ᠨ ᠨᠢᠭᠡ ᠪᠣᠯᠤᠭᠰᠠᠨ ᠶᠤᠮ ᠪᠢᠰᠢ ᠪᠠᠢᠭᠠ ᠳᠠ》 ᠭᠡᠵᠦ ᠰᠡᠵᠢᠭᠯᠡᠬᠦ ᠶ᠋ᠢᠨ ᠳᠡᠭᠡᠷᠡ ᠪᠠᠯᠴᠢᠷ ᠲᠣᠮᠣᠭᠠ ᠦᠭᠡᠢ ᠳ᠋ᠡᠭᠡᠨ ᠭᠡᠨᠡᠳᠡᠵᠦ ᠴᠠᠯᠭᠠᠷᠳᠠᠨ ᠳᠠᠢᠰᠤᠨ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠮᠡᠳᠡᠭᠳᠡᠨ ᠪᠠᠷᠢᠭᠳᠠᠬᠤ᠂ ᠪᠠᠷᠢᠭᠳᠠᠭᠰᠠᠨ ᠬᠣᠢᠨᠠ ᠪᠠᠨ ᠬᠠᠮᠤᠭ ᠨᠢᠭᠤᠴᠠ ᠪᠠᠨ ᠢᠯᠡᠴᠢᠯᠡᠬᠦ ᠮᠡᠲᠦ ᠶ᠋ᠢᠨ ᠠᠶᠤᠮᠰᠢᠭ ᠲᠤ ᠠᠪᠲᠠᠭᠳᠠᠬᠤ ᠪᠣᠢ ᠭᠡᠬᠦ ᠡᠴᠡ ᠰᠡᠳᠬᠢᠯ ᠵᠣᠪᠠᠬᠤ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ