ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠷᠢ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 20
270ᠭᠤᠷᠪᠠᠳᠠᠬᠢ ᠠᠭᠤᠯᠵᠠᠯᠲᠠ
— ᠠᠢ᠂ ᠲᠠ ᠬᠠᠮᠢᠭᠠ ᠬᠦᠷᠦᠨᠡ? ᠮᠠᠢᠮᠠᠢ ᠣᠷᠣᠬᠤ ᠤᠤ? ᠰᠠᠭᠤ ᠪᠠ᠂ ᠶᠠᠪᠠᠭᠠᠨ ᠶᠠᠭᠠᠬᠢᠵᠤ ᠶᠠᠪᠤᠨᠠ? ᠭᠡᠵᠦ ᠥᠭᠡᠳᠡ ᠲᠡᠢ ᠥᠩᠭᠡ ᠲᠡᠢ ᠡᠮᠦᠰᠦᠭᠰᠡᠨ ᠪᠦᠬᠦᠨ ᠢ᠋ ᠬᠣᠷᠭᠣᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠷᠭᠣᠬᠤ ᠳ᠋ᠤ᠌᠄
— ᠲᠡᠢᠮᠦ ᠠ᠋᠂ ᠮᠠᠢᠮᠠᠢ ᠣᠷᠣᠨᠠ᠂ ᠲᠡᠷᠡ ᠬᠦᠷᠲᠡᠯᠡ ᠶᠠᠮᠠᠷ ᠬᠥᠯᠥᠰᠥ ᠲᠡᠢ ᠪᠣᠢ?
— ᠠᠢ ᠶᠠᠭᠤ ᠪᠠᠢᠬᠠ᠃ ᠬᠣᠷᠢᠨ ᠲᠠᠪᠤᠨ ᠮᠥᠩᠭᠥ᠃ ᠬᠤᠷᠢᠨ ᠲᠠᠪᠤᠨ ᠮᠥᠩᠭᠥ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠬᠡᠵᠢᠶᠡᠨ ᠦ᠌ ᠪᠠᠭᠠ ᠵᠦᠢᠯ ᠪᠢᠰᠢ᠂《ᠶᠠᠩᠴᠢᠶᠠᠨ ᠳᠥᠷᠪᠡ ᠬᠤᠪᠢᠶᠠᠭᠰᠠᠨ ᠤ᠋ ᠨᠢᠭᠡ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠬᠤ ᠶ᠋ᠢᠨ ᠳᠡᠭᠡᠷᠡ ᠣᠳᠣ ᠮᠥᠩᠭᠥᠨ ᠦ᠌ ᠬᠡᠷᠡᠭᠴᠡᠭᠡ ᠮᠠᠰᠢ ᠶᠡᠬᠡ ᠪᠠᠢᠭᠠ ᠪᠠᠨ ᠰᠠᠨᠠᠪᠠ᠃
— ᠦᠭᠡᠢ᠂ ᠰᠠᠭᠤᠬᠤ ᠦᠭᠡᠢ᠃
— ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠬᠣᠷᠢᠨ ᠮᠥᠩᠭᠥ ᠪᠡᠷ ᠰᠠᠭᠤ ᠪᠠ!
— ᠦᠭᠡᠢ᠂ ᠦᠨᠡ ᠲᠡᠢ ᠪᠠᠢᠨᠠ᠃
— ᠠᠢ᠂ ᠶᠠᠭᠠᠬᠢᠭᠰᠠᠨ ᠨᠠᠷᠢᠨ ᠭᠡᠳ ᠵᠢᠯᠣᠭᠣᠴᠢ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ᠂
— ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠲᠠᠨᠢᠭᠰᠠᠨ ᠬᠥᠮᠦᠨ᠂ ᠠᠷᠪᠠᠨ ᠲᠠᠪᠤ ᠪᠠᠷ ᠰᠠᠭᠤ! ᠭᠡᠵᠦ ᠡᠷᠭᠢᠨ ᠬᠠᠰᠬᠢᠷᠪᠠ᠃
— ᠦᠭᠡᠢ ᠠ᠋᠂ ᠦᠭᠡᠢ ᠠᠷᠪᠠ ᠪᠠᠷ ᠴᠦ᠍ ᠰᠠᠭᠤᠬᠤ ᠦᠭᠡᠢ ᠭᠡᠵᠦ ᠬᠠᠷᠢᠭᠤ ᠬᠠᠰᠬᠢᠷᠤᠯᠠ᠃ ᠨᠠᠭᠠᠰᠢ ᠶᠠᠪᠤᠬᠤ ᠳᠣᠳᠣᠮ ᠬᠦᠢᠲᠡᠨ ᠵᠢᠪᠠᠷ ᠴᠢᠩᠭᠠᠷᠠᠵᠤ ᠬᠦᠴᠦᠲᠡᠢ ᠰᠠᠯᠬᠢ ᠰᠡᠪᠡᠯᠵᠡᠨᠡ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠭᠠᠭᠴᠠ ᠤᠯᠠᠭᠠᠨ ᠮᠥᠩᠭᠥᠨ ᠦ᠌ ᠭᠠᠷᠤᠵᠠ ᠭᠠᠷᠭᠠᠬᠤ ᠦᠭᠡᠢ ᠳ᠋ᠡᠭᠡᠨ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠳᠤᠯᠠᠭᠠᠴᠠᠭᠤᠯᠤᠨ ᠶᠠᠪᠤᠨᠠ᠃ ᠮᠠᠢᠮᠠᠢ ᠬᠣᠲᠠᠨᠠ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠣᠭᠲᠣ ᠶ᠋ᠢᠨ ᠮᠡᠳᠡᠬᠦ ᠦᠭᠡᠢ ᠭᠤᠳᠤᠮᠵᠢ ᠨᠤᠭᠤᠳ ᠲᠠᠭᠠᠷᠠᠯᠳᠤᠨᠠ᠃ ᠡᠨᠳᠡᠬᠢ ᠶ᠋ᠢᠨ ᠣᠷᠣᠨ ᠪᠠᠢᠰᠢᠩ᠂ ᠬᠠᠰᠢᠶᠠ ᠬᠣᠷᠢᠶᠠ ᠴᠥᠮ ᠬᠢᠲᠠᠳ ᠮᠠᠶᠢᠭ ᠰᠦᠷᠡᠬᠡᠢ ᠳᠣᠷᠪᠢᠯᠢᠭ᠂ ᠲᠣᠮᠣ ᠲᠣᠮᠣ ᠤᠯᠢᠶᠠᠰᠤ ᠨᠤᠭᠤᠳ ᠪᠠ ᠤᠰᠤᠨ ᠤ᠋ ᠱᠤᠤᠳᠤᠤ ᠨᠤᠭᠤᠳ ᠬᠦᠷᠲᠡᠯᠡ ᠪᠠᠢᠨ ᠪᠠᠢᠨ ᠲᠠᠭᠠᠷᠠᠯᠳᠤᠨᠠ᠃ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠭᠠ ᠬᠥᠮᠦᠰ ᠦ᠋ᠨ ᠪᠠᠢᠳᠠᠯ ᠪᠠᠰᠠ ᠥᠭᠡᠷᠡ᠃ ᠬᠢᠲᠠᠳ ᠮᠣᠩᠭᠣᠯ ᠮᠠᠨᠵᠤ ᠭᠤᠷᠪᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠪᠦᠷᠢᠯᠳᠦᠭᠰᠡᠨ ᠶᠦᠮ ᠰᠢᠭ ᠦᠵᠡᠭᠳᠡᠨᠡ᠃ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠡᠨᠡ ᠮᠠᠢᠮᠠᠢ ᠬᠣᠲᠠ᠂ ᠬᠦᠷᠢᠶᠡ ᠶ᠋ᠢ ᠪᠣᠳᠣᠪᠠᠯ ᠴᠡᠪᠡᠷ ᠦᠵᠡᠮᠵᠢ ᠲᠡᠢ ᠠᠵᠢ᠃ ᠢᠯᠠᠩᠭᠤᠶᠠ ᠡᠮᠡᠭᠲᠡᠢᠴᠦᠳ ᠨᠢ ᠰᠦᠷᠡᠬᠡᠢ ᠴᠢᠷᠠᠢᠯᠠᠭ ᠪᠣᠯᠤᠭᠠᠳ ᠡᠮᠦᠰᠴᠦ ᠵᠡᠭᠦᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠢᠬᠠᠯᠲᠠᠢ ᠳᠡᠭᠵᠢᠨ ᠪᠠᠢᠯᠠ᠃ ᠪᠠᠯᠳᠠᠨᠴᠡᠷᠢᠩ ᠪᠠᠷᠠᠭᠤᠨ ᠠ᠋ᠴᠠ ᠵᠡᠭᠦᠨ ᠲᠡᠢᠰᠢ ᠨᠡᠪᠲᠡ ᠭᠠᠷᠤᠭᠰᠠᠨ ᠭᠣᠣᠯ ᠭᠤᠳᠤᠮᠵᠢ ᠪᠠᠷ ᠨᠢ ᠶᠠᠪᠤᠬᠤ ᠳ᠋ᠠᠭᠠᠨ᠂ ᠭᠣᠴᠣ ᠰᠠᠢᠬᠠᠨ ᠦᠵᠡᠰᠬᠦᠯᠡᠩᠲᠦ ᠡᠮᠡᠭᠲᠡᠢᠴᠦᠳ ᠲᠡᠢ ᠣᠯᠠᠨᠲᠠ ᠳᠠᠭᠠᠷᠢᠯᠳᠤᠪᠠ᠃ ᠭᠡᠪᠡᠴᠦ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠦᠰᠡᠭᠰᠡᠨ ᠢ᠋ ᠯᠡ ᠣᠷᠴᠢᠯᠠᠩ ᠳ᠋ᠤ᠌ ᠬᠣᠣᠰ ᠦᠭᠡᠢ ᠳ᠋ᠦ᠍ ᠪᠣᠳᠣᠨ ᠲᠡᠭᠦᠨ ᠢ᠋ᠶ᠋ᠡᠨ ᠡᠷᠢᠨᠡ᠃ ᠭᠡᠲᠡᠯᠡ ᠪᠠᠯᠳᠠᠨᠴᠡᠷᠢᠩ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ ᠬᠠᠮᠢᠭᠠ ᠪᠠᠢᠳᠠᠭ ᠢ᠋ ᠪᠠᠢᠲᠤᠭᠠᠢ᠂ ᠬᠡᠨ ᠦ᠌ ᠬᠡᠨ ᠭᠡᠭᠴᠢ ᠪᠣᠯᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠡᠭᠦᠨ ᠢ᠋ᠶ᠋ᠡᠨ ᠰᠠᠨᠠᠬᠤ ᠳ᠋ᠤ᠌ ᠣᠭᠲᠣ ᠳᠡᠮᠡᠢ ᠡᠨᠳᠡ ᠢᠷᠡᠭᠰᠡᠨ ᠪᠠᠢᠬᠤ ᠪᠥᠭᠡᠳ ᠭᠡᠪᠡᠴᠦ ᠭᠣᠷᠢᠳᠠᠨᠠ᠃ ᠶᠡᠷᠦ ᠭᠣᠷᠢᠳᠠᠬᠤ ᠪᠣᠯ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠭᠣᠣᠯ ᠵᠢᠷᠦᠬᠡ ᠳ᠋ᠦ᠍ ᠭᠦᠨᠡ ᠰᠢᠩᠭᠡᠭᠰᠡᠨ ᠨᠢᠭᠡ ᠶᠠᠭᠤᠮᠠ ᠪᠣᠯᠤᠭᠰᠠᠨ ᠠᠵᠢ᠃ ᠣᠯᠠᠨ ᠤ᠋ ᠬᠥᠯ ᠪᠣᠯᠤᠭᠰᠠᠨ ᠨᠢᠭᠡᠨ ᠲᠣᠮᠣ ᠫᠦᠰᠡᠨ ᠳ᠋ᠦ᠍ ᠣᠷᠣᠬᠤ ᠳ᠋ᠤ᠌ ᠥᠭᠡᠳᠡ ᠨᠢ ᠬᠥᠩᠭᠡᠨ ᠭᠠᠪᠰᠢᠭᠠᠢ ᠬᠥᠳᠡᠯᠭᠡᠭᠡᠨ ᠲᠡᠢ ᠬᠤᠳᠠᠯᠳᠤᠭᠴᠢᠳ《ᠠᠢ ᠨᠣᠶᠠᠨ!》 ᠭᠡᠵᠦ ᠤᠭᠲᠤᠭᠠᠳ ᠳᠠᠷᠠᠭᠠ ᠨᠢ᠄ ᠲᠠ ᠶᠠᠭᠤ ᠠᠪᠤᠨᠠ? ᠲᠣᠷᠭᠠ ᠤᠤ? ᠠᠯᠢ ᠥᠭᠡᠷᠡ ᠵᠦᠢᠯ ᠬᠡᠷᠡᠭᠲᠡᠢ ᠤᠤ? ᠡᠰᠡᠪᠡᠯ ᠲᠠ ᠳᠠᠩᠵᠢᠶᠠᠳ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠮᠣᠷᠢᠯᠠᠨ ᠢᠷᠡᠪᠡ ᠤᠤ? ᠭᠡᠵᠦ ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠬᠣᠷᠭᠣᠨ ᠰᠠᠨᠳᠤᠷᠭᠠᠪᠠ᠃ ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠥᠭᠡᠷᠡ ᠫᠦᠰᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠵᠤ ᠨᠡᠯᠢᠶᠡᠳ ᠵᠣᠭᠰᠣᠪᠠ᠃ ᠭᠡᠲᠡᠯᠡ ᠮᠡᠳᠡᠭᠡᠴᠢ ᠬᠡᠷᠡᠭ᠂ ᠥᠨᠥᠬᠢ ᠡᠮᠡᠭᠲᠡᠢ ᠨᠢ ᠠᠯᠠᠭᠠ᠃ ᠳᠡᠮᠡᠢ ᠭᠠᠢᠬᠠᠬᠤ ᠳ᠋ᠠᠭᠠᠨ ᠲᠡᠨᠳᠡ ᠡᠴᠡ ᠭᠤᠸᠠᠩᠵᠠᠨ ᠤ᠋ ᠬᠠᠭᠠᠯᠭᠠ ᠨᠤᠭᠤᠳ ᠢ᠋ ᠲᠡᠳᠡᠨ ᠱᠠᠭᠠᠢᠵᠤ᠂ ᠤᠯᠤᠰ ᠣᠯᠠᠨ ᠤ᠋ ᠪᠥᠭᠡᠮᠨᠡᠷᠡᠭᠰᠡᠨ ᠦ᠌ ᠳᠡᠷᠭᠡᠳᠡᠭᠦᠷ ᠠᠩᠬᠠᠷᠤᠯ ᠲᠠᠯᠪᠢᠨ ᠥᠩᠭᠡᠷᠡᠭᠦᠴᠢᠯᠡᠨ ᠢ᠋ᠶ᠋ᠡᠷ ᠵᠥᠩᠳᠡᠭᠡᠨ ᠶᠠᠪᠤᠪᠠ᠃ ᠲᠡᠭᠡᠭᠡᠳ ᠪᠦᠷ ᠭᠣᠷᠢᠳᠠᠯᠭᠠ ᠲᠠᠰᠤᠷᠠᠬᠤ ᠳ᠋ᠠᠭᠠᠨ ᠨᠣᠭᠣᠭᠠ ᠬᠤᠳᠠᠯᠳᠤᠳᠠᠭ ᠵᠢᠵᠢᠭᠬᠡᠨ ᠰᠢᠪᠡᠷ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠪᠠ᠃ ᠬᠤᠳᠠᠯᠳᠤᠭᠴᠢ ᠨᠢ ᠬᠡᠳᠦ ᠲᠤᠷᠠᠩᠬᠠᠢ᠂ ᠥᠨᠳᠥᠷ ᠪᠡᠶᠡ ᠲᠡᠢ᠂ ᠬᠤᠷᠤᠭᠤᠨ ᠤ᠋ ᠪᠠᠨ ᠬᠢᠮᠤᠰᠤ ᠶ᠋ᠢ ᠳᠡᠩᠳᠡᠭᠦᠦ ᠤᠷᠲᠤ ᠤᠷᠭᠤᠭᠤᠯᠤᠭᠰᠠᠨ ᠡᠪᠦᠭᠡᠨ ᠬᠢᠲᠠᠳ ᠪᠠᠢᠯᠠ᠃ ᠡᠨᠡ ᠬᠥᠮᠦᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠬᠤᠪᠴᠠᠰᠤ ᠶ᠋ᠢ ᠬᠠᠷᠠᠬᠤ ᠲᠠᠢ ᠪᠠᠨ ᠵᠡᠷᠭᠡ ᠥᠪᠡᠷ ᠲᠡᠢ ᠪᠡᠨ ᠮᠠᠢᠮᠠᠢ ᠬᠢᠬᠦ ᠦᠭᠡᠢ ᠶ᠋ᠢ ᠯᠠᠪᠲᠠᠢ ᠮᠡᠳᠡᠨ ᠵᠥᠪᠬᠡᠨ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠠᠵᠢᠨᠠ᠃ ᠡᠨᠳᠡ ᠡᠯᠳᠡᠪ ᠲᠥᠷᠥᠯ ᠦ᠋ᠨ ᠳᠠᠪᠤᠰᠤᠯᠠᠭᠰᠠᠨ ᠨᠣᠭᠣᠭᠠ᠂ ᠲᠡᠭᠦᠨ ᠦ᠌ ᠢᠯᠵᠠᠷᠠᠮᠠᠯ ᠦᠨᠦᠷ᠂ ᠰᠠᠷᠢᠮᠰᠠᠭ ᠤ᠋ᠨ ᠭᠠᠰᠢᠭᠤᠨ᠂ ᠴᠢᠨᠵᠢᠶᠤᠤ ᠲᠤᠯᠢᠶᠤᠤ ᠶ᠋ᠢᠨ ᠨᠢᠰᠤᠭᠤᠨ᠂ ᠽᠦ᠍ ᠵᠢᠶᠠᠩ ᠤ᠋ᠨ ᠢᠰᠬᠦᠯᠡᠩ ᠲᠡᠷᠡ ᠪᠦᠷᠢ ᠪᠡᠷ ᠨᠡᠢᠯᠡᠨ ᠬᠠᠩᠬᠤᠯᠬᠤ ᠨᠢ ᠤᠳᠠᠭᠠᠨ ᠪᠠᠢᠵᠤ ᠪᠣᠯᠤᠮᠠ ᠦᠭᠡᠢ ᠠᠵᠢ᠃ ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠵᠥᠪᠬᠡᠨ ᠪᠤᠴᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠰᠠᠢᠬᠠᠨ ᠳᠤᠯᠠᠭᠠᠴᠠᠵᠤ ᠠᠪᠬᠤ ᠶ᠋ᠢ ᠪᠣᠳᠣᠨ ᠲᠡᠨᠳᠡ ᠬᠣᠷᠭᠣᠳᠠᠨᠠ᠃ ᠡᠭᠦᠳᠡ ᠨᠢ ᠪᠠᠢᠨ ᠪᠠᠢᠨ ᠣᠩᠭᠣᠯᠵᠠᠵᠤ ᠬᠥᠭᠰᠢᠨ ᠵᠠᠯᠠᠭᠤ ᠡᠮᠡᠭᠲᠡᠢ ᠪᠠᠭᠠᠴᠤᠳ ᠮᠡᠲᠦ ᠶ᠋ᠢᠨ ᠬᠥᠮᠦᠰ ᠲᠠᠰᠤᠷᠠᠯᠲᠠ ᠦᠭᠡᠢ ᠣᠷᠣᠵᠤ ᠢᠷᠡᠨ᠂ ᠬᠡᠷᠡᠭᠴᠡᠭᠡᠲᠦ ᠵᠦᠢᠯ ᠢ᠋ᠶ᠋ᠡᠨ ᠠᠪᠤᠨ ᠭᠠᠷᠤᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠡᠪᠦᠭᠡᠨ ᠬᠤᠳᠠᠯᠳᠤᠭᠴᠢ᠂ ᠪᠠᠯᠳᠠᠨᠴᠡᠷᠢᠩ ᠤᠳᠠᠭᠠᠨ ᠵᠣᠭᠰᠣᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠭᠠᠢᠬᠠᠨ ᠰᠦᠷᠳᠡᠵᠦ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠪᠠᠢᠨ ᠪᠠᠢᠨ ᠠᠵᠢᠭᠯᠠᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠨ ᠳᠣᠷᠣᠭᠰᠢ ᠰᠢᠷᠲᠡᠨᠡ᠃ ᠡᠴᠦᠰ ᠦ᠋ᠨ ᠤᠳᠠᠭᠠ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠨ ᠨᠢᠭᠡ ᠡᠮᠡᠭᠲᠡᠢ᠄ ᠠᠢ᠂ ᠳᠠ ᠶᠧ ᠠ᠋᠂ ᠰᠣᠩᠭᠢᠨᠠ ᠠᠪᠤᠶᠠ! ᠭᠡᠰᠡᠨ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠰᠣᠴᠢᠨ ᠬᠠᠷᠠᠪᠠ᠃ ᠡᠨᠡ ᠡᠮᠡᠭᠲᠡᠢ ᠥᠨᠥᠬᠢ ᠬᠦᠰᠡᠵᠦ ᠮᠥᠷᠥᠭᠡᠳᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠨᠢ ᠪᠠᠢᠯᠠ᠃ ᠤᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠠᠳᠠᠯᠢ ᠭᠣᠶᠣ ᠭᠠᠩᠭᠠᠨ ᠬᠤᠪᠴᠠᠰᠤ ᠲᠠᠢ ᠪᠢᠰᠢ ᠵᠢᠷ ᠦ᠋ᠨ ᠬᠥᠮᠦᠰ ᠦ᠋ᠨ ᠡᠳ᠋ᠯᠡᠳᠡᠭ ᠪᠦᠳᠦᠭᠦᠨ ᠳᠠᠯᠢᠩᠪᠤ ᠳᠡᠪᠡᠯ ᠲᠡᠢ ᠶᠠᠪᠤᠭᠠ ᠨᠢ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠬᠠᠷᠢᠨ ᠴᠦ᠍ ᠰᠠᠢᠬᠠᠨ ᠰᠠᠨᠠᠭᠳᠠᠨ ᠰᠡᠳᠬᠢᠯ ᠲᠠᠲᠠᠨᠠ᠃
— ᠦᠭᠡᠢ ᠴᠢ! ᠭᠡᠵᠦ ᠠᠶᠠᠷᠬᠠᠨ ᠢ᠋ᠶ᠋ᠠᠷ ᠳᠠᠭᠤ ᠠᠯᠳᠠᠭᠠᠳ᠄ ᠵᠠ ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠳᠥᠭᠥᠨ ᠣᠴᠢᠬᠤ ᠳ᠋ᠤ᠌ ᠡᠮᠡᠭᠲᠡᠢ᠄
— ᠰᠠᠢᠨ᠂ ᠲᠠ ᠰᠠᠢᠨ ᠪᠠᠢᠨᠠ ᠤᠤ? ᠦᠭᠡᠢ ᠡᠨᠳᠡ ᠲᠠ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠪᠤᠭᠠ ᠶᠤᠮ ᠪᠣᠢ? ᠭᠡᠵᠦ ᠰᠢᠯᠦᠭᠯᠡᠨ ᠳᠠᠭᠤᠯᠠᠳᠠᠭ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠬᠣᠭᠣᠯᠠᠢ ᠪᠠᠷ ᠢ᠋ᠶ᠋ᠠᠨ ᠥᠭᠦᠯᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠵᠦᠭᠡᠷ᠂ ᠪᠢ ᠲᠠᠨ ᠤ᠋ ᠬᠣᠲᠠ ᠶ᠋ᠢ ᠯᠡ ᠭᠠᠢᠬᠠᠵᠤ ᠰᠣᠨᠢᠷᠬᠠᠵᠤ ᠶᠠᠪᠤᠨᠠ ᠭᠡᠳ ᠪᠠᠯᠳᠠᠨᠴᠡᠷᠢᠩ《ᠬᠣᠲᠠ ᠶ᠋ᠢ ᠪᠢᠰᠢ ᠴᠢᠨᠦᠬᠢ ᠪᠡᠨ ᠬᠣᠢᠨᠠ ᠠ᠋ᠴᠠ ᠯᠠ᠁》 ᠭᠡᠵᠦ ᠮᠡᠳᠡᠭᠳᠡᠬᠦ ᠶ᠋ᠢ ᠬᠢᠴᠢᠶᠡᠨ ᠨᠢᠭᠤᠷ ᠢ᠋ ᠨᠢ ᠰᠢᠷᠲᠡᠪᠡ᠃
— ᠲᠡᠭᠡᠪᠡᠯ ᠲᠠ ᠮᠢᠨᠦ ᠪᠠᠭᠰᠢ ᠳ᠋ᠤ᠌ ᠪᠠᠷᠠᠯᠬᠠᠳᠠᠭ ᠡᠳᠦᠷ ᠢᠷᠡᠳᠡᠭ ᠪᠠᠢᠵᠠᠢ᠃
— ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠢᠯᠡ?
— ᠶᠠᠭᠠᠬᠢᠬᠤ ᠪᠣᠢ᠂ ᠪᠤᠴᠠᠬᠤ ᠳ᠋ᠠᠭᠠᠨ ᠪᠡᠶᠡ ᠠᠮᠤᠷ ᠪᠤᠴᠠᠬᠤ ᠦᠭᠡᠢ ᠤᠤ? ᠭᠡᠰᠡᠨ ᠢ᠋ᠶ᠋ᠡᠨ ᠡᠮᠡᠭᠲᠡᠢ᠂ ᠨᠢᠭᠤᠷ ᠨᠢ ᠤᠯᠠᠢᠨ ᠳᠣᠷᠣᠭᠰᠢ ᠰᠢᠷᠳᠡᠪᠡ᠃ ᠡᠨᠡ ᠨᠢ ᠰᠠᠨᠠᠮᠰᠠᠷ ᠦᠭᠡᠢ ᠥᠭᠦᠯᠡᠵᠦ ᠣᠷᠬᠢᠭᠰᠠᠨ ᠢ᠋ᠶ᠋ᠠᠨ《ᠡᠪ ᠦᠭᠡᠢ ᠶᠠᠭᠤᠮᠠ ᠪᠣᠯᠵᠤ ᠣᠷᠬᠢᠬᠤ ᠪᠣᠢ》 ᠭᠡᠵᠦ ᠭᠡᠨᠡᠳᠲᠡ ᠰᠠᠨᠠᠭᠰᠠᠨ ᠤ᠋ ᠬᠢ ᠪᠠᠢᠵᠠᠢ᠃
— ᠨᠡᠭᠡᠷᠡᠨ ᠲᠡᠭᠡᠪᠡᠯ ᠲᠠᠭᠠᠷᠠᠬᠤ ᠪᠠᠢᠵᠠᠢ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠠᠯᠬᠠᠬᠤ ᠡᠳᠦᠷ ᠡᠳᠦᠷ ᠢ᠋ ᠨᠢ ᠮᠡᠳᠡᠭᠡ ᠦᠭᠡᠢ ᠪᠠᠢᠳᠠᠯ ᠭᠠᠷᠭᠠᠨ ᠬᠡᠯᠡᠪᠡ᠃ ᠡᠭᠦᠨ ᠡᠴᠡ ᠴᠠᠭᠠᠰᠢ ᠬᠡᠯᠡᠬᠦ ᠦᠭᠡ ᠡᠰᠡ ᠣᠯᠳᠠᠨᠠ᠃ ᠡᠮᠡᠭᠲᠡᠢ ᠴᠦ᠍ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠠᠪᠬᠤ ᠵᠦᠢᠯ ᠢ᠋ᠶ᠋ᠡᠨ ᠠᠪᠤᠨ᠂ ᠮᠥᠩᠭᠥ ᠪᠡᠨ ᠲᠥᠯᠥᠭᠡᠳ ᠭᠠᠷᠬᠤ ᠭᠡᠰᠡᠨ ᠢ᠋ᠶ᠋ᠡᠨ᠄
— ᠲᠠ ᠡᠨᠳᠡ ᠡᠴᠡ ᠪᠤᠴᠠᠬᠤ ᠤᠤ?
— ᠲᠡᠭᠡᠨᠡ᠂ ᠣᠳᠣᠬᠠᠨ ᠪᠤᠴᠠᠨᠠ ᠭᠡᠳ ᠬᠣᠢᠨᠠ ᠨᠢ ᠳ᠋ᠡᠭᠡᠨ ᠭᠠᠷᠪᠠ᠃ ᠴᠠᠭᠠᠰᠢ ᠪᠠᠰᠠ ᠶᠠᠷᠢᠬᠤ ᠶᠠᠭᠤᠮᠠ ᠣᠯᠬᠤ ᠦᠭᠡᠢ ᠪᠣᠯᠬᠤ ᠳ᠋ᠤ᠌᠄
— ᠪᠢ ᠥᠨᠥᠳᠥᠷ ᠭᠡᠰᠡᠷ ᠰᠦᠮᠡ ᠳ᠋ᠦ᠍ ᠣᠷᠣᠬᠤ ᠭᠡᠳ ᠠᠮᠵᠢᠭᠰᠠᠨ ᠦᠭᠡᠢ ᠭᠡᠯᠡ᠃
— ᠠ ᠲᠡᠢᠮᠦ ᠤᠤ᠂ ᠲᠠ ᠲᠡᠨᠳᠡ ᠣᠷᠣᠵᠤ ᠶᠠᠭᠠᠬᠢᠬᠤ ᠬᠡ ᠪᠣᠢ?
— ᠲᠥᠯᠭᠡ ᠠᠢᠯᠠᠳᠤᠭᠤᠯᠬᠤ ᠭᠡᠰᠡᠨ ᠶᠦᠮ᠃
— ᠶᠠᠭᠤᠨ ᠲᠤᠬᠠᠢ ᠪᠣᠢ?
— ᠢᠷᠡᠭᠡᠳᠦᠢ ᠶ᠋ᠢᠨ ᠦᠢᠯᠡ ᠬᠡᠷᠡᠭ ᠠᠯᠢ ᠬᠢᠷᠢ ᠪᠣᠳᠣᠮᠵᠢ ᠲᠠᠢ ᠪᠠᠢᠬᠤ ᠪᠣᠯ ᠯᠠ ᠭᠡᠵᠦ᠃
— ᠮᠠᠷᠭᠠᠰᠢ ᠢᠷᠡᠬᠦ ᠶᠦᠮ ᠪᠠᠢᠨᠠ᠃ ᠲᠡᠭᠡᠭᠡᠳ ᠪᠤᠴᠠᠬᠤ ᠳ᠋ᠠᠭᠠᠨ ᠲᠡᠷᠭᠡᠨ ᠳ᠋ᠦ᠍ ᠴᠢᠨᠢ ᠳᠠᠢᠭᠳᠠᠶᠠ ᠪᠣᠯᠤᠨᠠ ᠪᠢᠵᠡ ᠳᠡ? ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤᠪ᠂ ᠬᠠᠷᠢᠨ ᠲᠠ ᠡᠳᠦᠢ ᠳ᠋ᠦ᠍ ᠡᠨᠡ ᠬᠠᠪᠢ ᠳ᠋ᠤ᠌ ᠬᠦᠯᠢᠶᠡᠭᠡᠷᠡᠢ ᠯᠡ ᠳᠡ?
— ᠲᠡᠭᠡᠶᠡ᠃ ᠡᠢᠨ ᠬᠦ᠌ ᠶᠠᠷᠢᠯᠴᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠲᠤᠩ ᠠᠶᠠᠲᠠᠢᠬᠠᠨ ᠪᠠᠢᠯᠠ᠃《ᠣᠳᠣ ᠭᠡᠷ ᠣᠷᠣᠨ ᠢ᠋ ᠨᠢ ᠬᠠᠮᠢᠭᠠ ᠪᠠᠢᠳᠠᠭ ᠢ᠋ ᠨᠢ ᠮᠡᠳᠡᠶᠡ》 ᠭᠡᠰᠡᠨ ᠨᠢᠭᠡ ᠡᠷᠡᠮᠡᠯᠵᠡᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠡᠷᠭᠢᠯᠳᠦᠨᠡ᠃ ᠭᠡᠲᠡᠯᠡ ᠡᠮᠡᠭᠲᠡᠢ ᠨᠠᠷᠢᠨ ᠴᠠᠭᠠᠨ ᠰᠢᠪᠠᠷ ᠢ᠋ᠶ᠋ᠠᠷ ᠨᠢᠭᠲᠠ ᠰᠢᠪᠠᠭᠰᠠᠨ ᠥᠨᠳᠥᠷ ᠬᠠᠰᠢᠶᠠᠨᠠ ᠣᠢᠷᠠᠲᠤᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠬᠥᠯ ᠨᠢ ᠤᠳᠠᠭᠠᠰᠢᠷᠠᠵᠤ᠄
— ᠮᠠᠨ ᠤ᠋ ᠬᠢ ᠡᠨᠳᠡ ᠭᠡᠪᠡ᠃
— ᠠᠯᠢ ᠬᠠᠭᠠᠯᠭᠠ ᠪᠣᠢ? ᠭᠡᠬᠦ ᠳ᠋ᠦ᠍᠄
— ᠲᠡᠷᠡ! ᠭᠡᠵᠦ ᠵᠢᠭᠠᠪᠠ᠃ ᠲᠡᠷᠡ ᠨᠢ ᠭᠡᠪᠡᠯ᠄ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠬᠥᠬᠡ ᠰᠢᠪᠡᠷ ᠸᠠᠭᠠᠷᠤᠨ ᠣᠷᠣᠢ ᠲᠠᠢ ᠰᠦᠷᠡᠬᠡᠢ ᠳᠣᠷᠪᠢᠯᠢᠭ ᠠᠰᠠᠷᠲᠤ ᠬᠠᠭᠠᠯᠭᠠ ᠪᠠᠢᠯᠠ᠃ ᠡᠮᠡᠭᠲᠡᠢ ᠬᠠᠭᠠᠯᠭᠠᠨ ᠳ᠋ᠠᠭᠠᠨ ᠣᠢᠷᠠᠲᠤᠬᠤ ᠳᠣᠳᠣᠮ ᠢ᠋ᠶ᠋ᠠᠨ《ᠲᠠ ᠡᠨᠳᠡ ᠡᠴᠡ ᠪᠤᠴᠠᠭᠠᠷᠠᠢ》 ᠭᠡᠬᠦ ᠮᠡᠲᠦ ᠬᠥᠯ ᠨᠢ ᠤᠯᠠᠮ ᠢ᠋ᠶ᠋ᠠᠷ ᠤᠳᠠᠭᠠᠰᠢᠷᠠᠪᠠ᠃
— ᠴᠢ ᠭᠡᠷ ᠲᠡᠭᠡᠨ ᠣᠯᠠᠭᠤᠯᠠ ᠰᠠᠭᠤᠳᠠᠭ ᠤᠤ? ᠭᠡᠬᠦ ᠳ᠋ᠦ᠍᠂
— ᠦᠭᠡᠢ ᠠ᠋᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ᠃ ᠠᠪᠤ ᠡᠵᠢ ᠬᠣᠶᠠᠷ ᠮᠠᠨᠢ ᠲᠤᠰᠬᠠᠢ ᠭᠡᠷ ᠲᠦ᠍ ᠰᠠᠭᠤᠳᠠᠭ ᠭᠡᠪᠡ᠃
— ᠦᠭᠡᠢ᠂ ᠪᠢ ᠨᠢᠭᠡᠨᠲᠡ ᠡᠨᠳᠡ ᠢᠷᠡᠭᠰᠡᠨ ᠡᠴᠡ ᠣᠷᠣᠭᠠᠳ ᠶᠠᠪᠤᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠡᠮᠡᠭᠲᠡᠢ ᠰᠣᠴᠢᠨ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃
— ᠶᠠᠭᠠᠬᠢᠭᠠᠳ? ᠭᠡᠬᠦ ᠳ᠋ᠦ᠍ ᠪᠦᠷ ᠰᠠᠨᠳᠤᠷᠤᠨ᠂ ᠲᠤᠩᠭᠠᠯᠠᠭ ᠴᠠᠭᠠᠨ ᠴᠢᠷᠠᠢ ᠳ᠋ᠤᠨᠢ ᠴᠢᠰᠤ ᠭᠦᠶᠦᠨ ᠶᠠᠭᠠᠷᠠᠵᠤ᠄ ᠠᠶᠤᠵᠤ ᠪᠠᠢᠨᠠ᠃ ᠠᠪᠤ ᠡᠵᠢ ᠬᠣᠶᠠᠷ ᠬᠠᠷᠠᠴᠢᠬᠠᠨᠠ ᠭᠡᠵᠦ ᠴᠡᠴᠡᠷᠬᠢᠯᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠰᠢᠪᠡᠨᠡᠨ ᠥᠭᠦᠯᠡᠪᠡ᠃ ᠬᠠᠭᠠᠯᠭᠠ ᠪᠠᠨ ᠠᠶᠠᠷᠬᠠᠨ ᠢ᠋ᠶ᠋ᠠᠷ ᠲᠦᠯᠬᠢᠨ ᠨᠡᠭᠡᠭᠡᠬᠦ ᠳ᠋ᠦ᠍ᠨᠢ ᠰᠢᠪᠡᠷ ᠸᠠᠭᠠᠷᠤᠨ ᠲᠤᠢᠫᠤᠤ ᠶ᠋ᠢᠨ ᠤᠷᠲᠤ ᠪᠠᠢᠰᠢᠩ ᠬᠠᠰᠢᠶᠠᠨ ᠤ᠋ ᠬᠣᠢᠲᠤ ᠲᠠᠯᠠ ᠶ᠋ᠢ ᠪᠦᠬᠦᠯᠢ ᠳ᠋ᠦ᠍ᠨᠢ ᠡᠵᠡᠯᠡᠭᠰᠡᠨ ᠦ᠌ ᠰᠢᠭᠢᠳᠬᠡᠨ ᠵᠠᠮ ᠳᠡᠪᠢᠰᠦᠭᠰᠡᠨ ᠪᠠᠢᠬᠤ ᠪᠥᠭᠡᠳ ᠵᠡᠭᠦᠨ ᠲᠡᠢ ᠨᠢ ᠪᠠᠢᠭᠠ ᠮᠣᠷᠢᠨ ᠤ᠋ ᠫᠧᠩ ᠪᠣᠯᠪᠠᠴᠤ ᠠᠢᠯ ᠤ᠋ᠨ ᠣᠷᠣᠨ ᠰᠠᠭᠤᠴᠠ ᠰᠢᠭ᠋ ᠰᠢᠯᠦᠨ ᠴᠣᠩᠬᠣ ᠲᠠᠢ ᠪᠠᠢᠭᠠ ᠶ᠋ᠢ ᠨᠢ ᠦᠵᠡᠬᠦ ᠳ᠋ᠦ᠍ ᠬᠢᠷᠢ ᠪᠠᠷᠤᠭ ᠤ᠋ᠨ ᠨᠣᠶᠠᠳ ᠤ᠋ᠨ ᠬᠢ ᠴᠦ᠍ ᠡᠢᠮᠦ ᠰᠢᠦ ᠳᠡ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠡᠮᠡᠭᠲᠡᠢ ᠬᠠᠭᠠᠯᠭᠠ ᠪᠠᠨ ᠵᠥᠪᠬᠡᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠡᠶᠡ ᠶ᠋ᠢ ᠪᠠᠭᠲᠠᠬᠤ ᠬᠢᠷᠢ ᠪᠡᠷ ᠨᠡᠭᠡᠭᠡᠨ ᠬᠥᠯ ᠢ᠋ᠶ᠋ᠡᠨ ᠪᠣᠱᠣᠭᠠ ᠳᠠᠪᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ᠂ ᠵᠠ ᠲᠠ ᠰᠡᠭᠦᠯᠡᠷ! ᠭᠡᠳ ᠴᠠᠭᠠᠰᠢ ᠣᠷᠣᠨ᠂ ᠬᠠᠭᠠᠯᠭᠠ ᠪᠠᠨ ᠮᠥᠨ ᠶᠠᠮᠠᠷ ᠴᠦ᠍ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠯ ᠦᠭᠡᠢ ᠬᠠᠭᠠᠯᠠ᠃ ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠡᠮᠡᠭᠲᠡᠢ ᠶ᠋ᠢᠨ ᠥᠪᠡᠷ ᠲᠤᠨᠢ ᠰᠡᠳᠬᠢᠯ ᠪᠠᠢᠭᠠ ᠶ᠋ᠢ ᠲᠣᠳᠣᠷᠬᠠᠢ ᠮᠡᠳᠡᠨ ᠪᠠᠶᠠᠷᠯᠠᠪᠠ᠃ ᠭᠡᠪᠡᠴᠦ ᠡᠷᠭᠢᠬᠦ ᠵᠠᠮ ᠳ᠋ᠠᠭᠠᠨ ᠢᠷᠡᠭᠡᠳᠦᠢ ᠳ᠋ᠦ᠍ ᠴᠣᠬᠣᠮ ᠶᠠᠭᠤ ᠪᠣᠯᠬᠤ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠮᠥᠨ ᠶᠡᠷᠦ ᠠᠮᠤᠷ ᠪᠢᠰᠢ《ᠦᠵᠡᠲᠡᠯᠡ ᠡᠢᠮᠦ ᠪᠠᠶᠠᠨ ᠠᠢᠯ ᠪᠠᠢᠬᠤ ᠠᠲᠠᠯᠠ ᠪᠠᠨ ᠴᠢ ᠭᠠᠭᠴᠠ ᠬᠡᠦᠬᠡᠨ ᠲᠡᠢ ᠨᠢ ᠰᠠᠭᠤᠬᠤ ᠶ᠋ᠢ ᠰᠠᠨᠠᠭᠠᠰᠢᠷᠠᠬᠤ ᠴᠢᠨᠢ ᠶᠠᠭᠤ ᠪᠣᠢ? ᠰᠦᠢ ᠪᠡᠯᠡᠭ ᠲᠦ᠋ᠨᠢ ᠴᠢ ᠶᠠᠭᠤ ᠪᠠᠨ ᠥᠭᠬᠦ ᠬᠡ ᠪᠣᠢ? ᠨᠠᠢᠷ ᠬᠤᠷᠢᠮ ᠢ᠋ ᠴᠢ ᠬᠡᠷᠬᠢᠨ ᠥᠩᠭᠡᠷᠡᠭᠦᠯᠬᠦ ᠬᠡ ᠪᠣᠢ? ᠬᠥᠮᠦᠨ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ᠂ ᠲᠡᠮᠡᠭᠡ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠭᠡᠭᠴᠢ ᠪᠡᠷ ᠥᠪᠡᠷ ᠲᠡᠢ ᠨᠢ ᠲᠣᠬᠢᠷᠠᠬᠤ ᠳᠣᠣᠭᠤᠷ ᠶᠠᠭᠤᠮᠠ ᠲᠠᠢ ᠠᠢᠯ ᠤ᠋ᠨ ᠬᠡᠦᠬᠡᠨ ᠲᠡᠢ ᠰᠠᠭᠤᠪᠠᠯ ᠳᠡᠭᠡᠷᠡ ᠪᠢᠰᠢ ᠤᠤ?》 ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠭᠡᠲᠡᠯᠡ ᠪᠠᠰᠠ ᠣᠳᠣ ᠢᠩᠭᠢᠭᠡᠳ《ᠲᠡᠷᠡ ᠰᠠᠢᠬᠠᠨ ᠠᠮᠢᠲᠠᠨ ᠠ᠋ᠴᠠ ᠪᠡᠶᠡ ᠪᠡᠨ ᠬᠣᠯᠠᠳᠬᠠᠨ ᠪᠠᠷᠠ ᠶ᠋ᠢ ᠨᠢ ᠴᠦ᠍ ᠬᠠᠷᠠᠬᠤ ᠦᠭᠡᠢ ᠪᠣᠯᠤᠨᠠ ᠰᠢᠦ ᠳᠡ》 ᠭᠡᠬᠦ ᠡᠴᠡ ᠠᠮᠢ ᠪᠡᠶᠡ ᠪᠡᠨ ᠬᠠᠭᠠᠴᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠵᠢᠷᠦᠬᠡ ᠴᠣᠬᠢᠯᠠᠨ ᠠᠮᠢᠰᠬᠤᠭᠠ ᠳᠡᠭᠡᠷᠡ ᠬᠥᠭᠡᠷᠬᠦ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ