ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ – ᠴᠢᠷᠮᠠᠢᠯᠲᠦ - ᠨᠢᠭᠡᠳᠦᠭᠡᠷ ᠪᠦᠯᠦᠭ<2-4> Монгол үндэстний шалгарсан ардчилсан хувьсгалч Шинэлам – Чармаилт - Нэгдүгээр бүлэг–2-4
433ᠬᠣᠶᠠᠷ᠂ ᠴᠢᠩ ᠤᠯᠤᠰ ᠠ᠋ᠴᠠ ᠬᠣᠢᠰᠢᠬᠢ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠯᠲᠠ
(ᠳᠥᠷᠪᠡ) ᠂ ᠮᠠᠨᠵᠤ ᠴᠢᠩ ᠦ᠋ᠨ ᠦᠶᠡ ᠳ᠋ᠡᠬᠢ ᠲᠠᠢᠵᠢ ᠢᠵᠠᠭᠤᠷᠲᠠᠨ ᠤ᠋ ᠴᠠᠯᠢᠩ ᠹᠦᠩᠯᠦ ᠪᠣᠯᠤᠨ ᠠᠷᠠᠳ ᠤ᠋ᠨ ᠠᠯᠪᠠᠨ ᠲᠠᠲᠠᠪᠤᠷᠢ ᠶ᠋ᠢᠨ ᠪᠠᠢᠳᠠᠯ①
ᠴᠢᠩ ᠤᠯᠤᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠣᠷᠳᠣᠰ ᠤ᠋ᠨ ᠲᠠᠢᠵᠢ ᠢᠵᠠᠭᠤᠷᠲᠠᠨ ᠢ᠋ ᠢᠯᠪᠢᠨ ᠲᠠᠲᠠᠬᠤ ᠶ᠋ᠢᠨ ᠲᠥᠯᠥᠭᠡ ᠦᠯᠡᠮᠵᠢ ᠹᠦᠩᠯᠦ ᠣᠯᠭᠣᠳᠠᠭ᠃ ᠵᠢᠨᠦᠩ ᠬᠡᠷᠬᠡᠮ ᠲᠡᠢ ᠳ᠋ᠦ᠍ᠨᠢ ᠵᠢᠯ ᠪᠦᠷᠢ1200 ᠯᠠᠩ ᠮᠥᠩᠭᠥᠨ ᠦ᠌ ᠹᠦᠩᠯᠦ᠂ ᠲᠣᠷᠭᠠ15~20 ᠬᠡᠰᠡᠭ᠂ ᠬᠦᠨᠡᠰᠦ ᠪᠤᠳᠠᠭᠠ285 ᠳ᠋ᠠᠨ᠃ ᠪᠡᠢᠯᠡ ᠬᠡᠷᠬᠡᠮ ᠲᠡᠢ ᠳ᠋ᠦ᠍ᠨᠢ800 ᠯᠠᠩ᠂ ᠲᠣᠷᠭᠠ13 ᠬᠡᠰᠡᠭ᠂ ᠬᠦᠨᠡᠰᠦ ᠪᠤᠳᠠᠭᠠ190 ᠳ᠋ᠠᠨ᠃ ᠪᠡᠢᠰᠡ ᠬᠡᠷᠬᠡᠮ ᠲᠡᠢ ᠳ᠋ᠦ᠍ᠨᠢ500 ᠯᠠᠩ᠂ ᠲᠣᠷᠭᠠ10 ᠬᠡᠰᠡᠭ᠂ ᠬᠦᠨᠡᠰᠦ ᠪᠤᠳᠠᠭᠠ185 ᠳ᠋ᠠᠨ᠃ ᠤᠯᠤᠰ ᠤ᠋ᠨ ᠲᠦᠰᠢᠶᠡ ᠬᠦᠩ300 ᠯᠠᠩ᠂ ᠲᠣᠷᠭᠠ9 ᠬᠡᠰᠡᠭ᠂ ᠬᠦᠨᠡᠰᠦ ᠪᠤᠳᠠᠭᠠ71 ᠳ᠋ᠠᠨ᠃ ᠤᠯᠤᠰ ᠲᠤ᠌ ᠳᠥᠭᠥᠮ ᠲᠤᠰᠠᠯᠠᠬᠤ ᠬᠦᠩ200 ᠯᠠᠩ᠂ ᠲᠣᠷᠭᠠ7 ᠬᠡᠰᠡᠭ᠂ ᠬᠦᠨᠡᠰᠦ ᠪᠤᠳᠠᠭᠠ47 ᠳ᠋ᠠᠨ᠃ ᠵᠠᠰᠠᠭ ᠲᠠᠢᠵᠢ100 ᠯᠠᠩ᠂ ᠲᠣᠷᠭᠠ4 ᠬᠡᠰᠡᠭ᠂ ᠨᠢᠭᠡᠳᠦᠭᠡᠷ ᠵᠡᠷᠭᠡ ᠶ᠋ᠢᠨ ᠲᠠᠢᠵᠢ70 ᠯᠠᠩ᠂ ᠬᠦᠨᠡᠰᠦ ᠪᠤᠳᠠᠭᠠ23 ᠳ᠋ᠠᠨ ᠤ᠋ ᠣᠯᠭᠣᠮᠵᠢ ᠶ᠋ᠢ ᠭᠠᠷᠭᠠᠪᠠᠯ ᠵᠠᠰᠠᠭ ᠵᠠᠬᠢᠷᠭᠠᠨ ᠤ᠋ ᠲᠠᠯᠠ ᠪᠠᠷ ᠵᠠᠷᠤᠳᠠᠯ ᠮᠥᠩᠭᠥ ᠭᠡᠵᠦ ᠶᠠᠭᠤ ᠴᠤ᠌ ᠥᠭᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠠᠵᠤ ᠠᠬᠤᠢ ᠶ᠋ᠢᠨ ᠰᠤᠳᠤᠯᠭᠠᠲᠠᠨ ᠤ᠋ ᠵᠢᠱ᠌ᠢᠭᠰᠡᠨ ᠢ᠋ᠶ᠋ᠡᠷ ᠲᠩᠷᠢ ᠲᠡᠳᠬᠦᠭᠴᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠨᠢᠭᠡ ᠯᠠᠩ ᠮᠥᠩᠭᠥ ᠨᠢ ᠣᠳᠣ ᠶ᠋ᠢᠨ ᠠᠷᠠᠳ ᠤ᠋ᠨ ᠵᠣᠭᠣᠰ ᠤ᠋ᠨ60 ᠲᠥᠭᠥᠷᠢᠭ ᠲᠡᠢ ᠲᠡᠩᠴᠡᠨᠡ ᠭᠡᠰᠡᠨ ᠲᠤᠯᠠ ᠣᠳᠣ ᠶ᠋ᠢᠨ ᠵᠣᠭᠣᠰ ᠢ᠋ᠶ᠋ᠠᠷ ᠨᠤᠭᠤᠯᠵᠤ ᠪᠣᠳᠣᠪᠠᠯ ᠵᠢᠨᠦᠩ72000 ᠲᠥᠭᠥᠷᠢᠭ᠂ ᠪᠡᠢᠯᠡ48000 ᠲᠥᠭᠥᠷᠢᠭ᠂ ᠪᠡᠢᠰᠡ30000 ᠲᠥᠭᠥᠷᠢᠭ᠂ ᠲᠦᠰᠢᠶᠡ ᠬᠦᠩ18000 ᠲᠥᠭᠥᠷᠢᠭ᠂ ᠤᠯᠤᠰ ᠲᠤ᠌ ᠲᠤᠰᠠᠯᠠᠬᠤ ᠬᠦᠩ12000 ᠲᠥᠭᠥᠷᠢᠭ᠂ ᠵᠠᠰᠠᠭ ᠲᠠᠢᠵᠢ6000 ᠲᠥᠭᠥᠷᠢᠭ᠂ ᠨᠢᠭᠡᠳᠦᠭᠡᠷ ᠵᠡᠷᠭᠡ ᠶ᠋ᠢᠨ ᠲᠠᠢᠵᠢ4800 ᠲᠥᠭᠥᠷᠢᠭ ᠦ᠋ᠨ ᠣᠯᠭᠣᠮᠵᠢ ᠲᠠᠢ ᠪᠥᠭᠡᠳ ᠳᠡᠭᠡᠷᠡ ᠨᠢ ᠪᠠᠰᠠ ᠡᠮᠦᠰᠬᠦ ᠡᠴᠡ ᠲᠣᠷᠭᠠ᠂ ᠢᠳᠡᠬᠦ ᠡᠴᠡ ᠬᠦᠨᠡᠰᠦ ᠪᠤᠳᠠᠭᠠ ᠲᠠᠢ᠃ ᠴᠢᠩ ᠤᠯᠤᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠲᠤ᠌ ᠵᠢᠯ ᠪᠦᠷᠢ ᠬᠣᠰᠢᠭᠤ ᠪᠣᠯᠭᠠᠨ ᠬᠠᠮᠤᠭ ᠪᠠᠭᠠ ᠳ᠋ᠠᠭᠠᠨ15 ᠲᠦᠮᠡᠨ ᠲᠥᠭᠥᠷᠢᠭ ᠡᠴᠡ ᠳᠡᠭᠡᠭᠰᠢ ᠮᠥᠩᠭᠥ ᠪᠠ ᠦᠯᠡᠮᠵᠢ ᠲᠣᠭᠠᠨ ᠤ᠋ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠡ ᠲᠤᠰᠢᠶᠠᠬᠤ ᠬᠡᠷᠡᠭᠲᠡᠢ ᠪᠠᠢᠵᠠᠢ᠃ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤ ᠬᠦᠷᠦᠭᠰᠡᠳ ᠢ᠋ ᠡᠷᠡ ᠶ᠋ᠢᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠪᠡ ᠭᠡᠮᠡᠨ ᠬᠤᠶᠠᠭ ᠤ᠋ᠨ ᠵᠢᠩᠳᠡ ᠳ᠋ᠦ᠍ ᠣᠷᠣᠭᠤᠯᠬᠤ ᠳ᠋ᠤ᠌ ᠲᠠᠢᠵᠢ ᠭᠠᠷᠤᠯᠲᠠᠢ ᠠ᠋ᠴᠠ ᠨᠢ ᠬᠥᠮᠦᠨ ᠪᠦᠷᠢ ᠨᠢᠭᠡ ᠯᠠᠩ ᠲᠠᠪᠤᠨ ᠴᠢᠨ ᠮᠥᠩᠭᠥ᠂ ᠬᠠᠷᠠᠴᠤᠰ ᠠ᠋ᠴᠠ ᠨᠢᠭᠡ ᠴᠢᠨ ᠲᠠᠪᠤᠨ ᠹᠦᠨ ᠮᠥᠩᠭᠥ᠂ ᠪᠠᠰᠠ ᠳᠡᠭᠡᠵᠢ᠂ ᠲᠠᠪᠤᠨ ᠰᠠᠭᠠᠯᠢ ᠪᠠ ᠰᠢᠭᠦᠰᠦᠨ ᠬᠣᠨᠢ᠂ ᠰᠢᠷᠠ ᠲᠣᠰᠣ᠂ ᠭᠤᠯᠢᠷ ᠠᠮᠤ ᠴᠠᠢ᠂ ᠳᠠᠭᠠᠭᠠᠪᠤᠷᠢ ᠶ᠋ᠢᠨ ᠮᠥᠩᠭᠥ ᠵᠡᠷᠭᠡ ᠵᠦᠢᠯ ᠢ᠋ ᠲᠠᠲᠠᠪᠤᠷᠢᠯᠠᠨ ᠬᠣᠷᠢᠶᠠᠨ ᠠᠪᠴᠤ ᠳᠡᠭᠡᠭᠰᠢ ᠲᠤᠰᠢᠶᠠᠨᠠ᠃ ᠪᠠᠰᠠ ᠬᠣᠰᠢᠭᠤ ᠶᠠᠮᠤᠨ᠂ ᠰᠠᠩ ᠤ᠋ᠨ ᠵᠠᠷᠤᠳᠠᠯ᠂ ᠨᠣᠶᠠᠨ ᠤ᠋ ᠵᠣᠭᠣᠭ ᠤ᠋ᠨ ᠬᠣᠨᠢ᠂ ᠰᠦᠮᠡ ᠬᠡᠢᠳ ᠦ᠋ᠨ ᠵᠤᠯᠠ ᠶ᠋ᠢᠨ ᠲᠣᠰᠣ᠂ ᠡᠯᠡ ᠲᠠᠬᠢᠯᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠰᠢᠭᠦᠰᠦ᠂ ᠰᠢᠷᠠ ᠲᠣᠰᠣ᠂ ᠠᠢᠷᠠᠭ ᠠᠷᠴᠠ᠂ ᠤᠯᠠᠭᠠ ᠬᠥᠰᠬᠡ ᠵᠡᠷᠭᠡ ᠶ᠋ᠢ ᠴᠦ᠍ ᠲᠠᠲᠠᠪᠤᠷᠢᠯᠠᠨ ᠠᠪᠬᠤ ᠠ᠋ᠴᠠ ᠭᠠᠳᠠᠨᠠ ᠴᠢᠭᠤᠯᠭᠠᠨ ᠶᠠᠮᠤᠨ ᠤ᠋ ᠠᠯᠪᠠᠨ ᠲᠤᠰᠢᠶᠠᠯᠲᠠᠳ ᠡᠯᠡ ᠬᠤᠰᠢᠭᠤᠨ ᠳ᠋ᠤ᠌ ᠬᠦᠷᠴᠦ ᠴᠢᠭᠤᠯᠭᠠᠨ ᠬᠤᠷᠠᠯ ᠡᠷᠬᠢᠯᠡᠬᠦ ᠪᠤᠶᠤ ᠬᠡᠷᠡᠭ ᠶᠠᠪᠤᠳᠠᠯ ᠰᠢᠢᠳᠬᠡᠵᠦ ᠰᠢᠢᠳᠪᠦᠷᠢᠯᠡᠬᠦ ᠦᠶᠡ ᠳ᠋ᠦ᠍ ᠬᠤᠰᠢᠭᠤᠨ ᠤ᠋ ᠨᠣᠶᠠᠳ ᠲᠦᠰᠢᠮᠡᠳ ᠥᠷᠲᠡᠭᠡ ᠪᠠᠭᠤᠳᠠᠯ ᠪᠦᠷᠢ ᠳ᠋ᠦ᠍ ᠬᠤᠷᠢᠮ ᠳᠠᠢᠯᠠᠯᠭᠠ ᠪᠡᠯᠡᠳᠬᠡᠨ ᠤᠭᠲᠤᠵᠤ ᠦᠳᠡᠨ᠂ ᠬᠡᠭᠡᠯᠢ ᠬᠠᠬᠤᠤᠯᠢ ᠲᠦᠯᠬᠢᠬᠦ ᠪᠡᠷ ᠦᠯᠦ ᠪᠠᠷᠠᠮ ᠪᠣᠱᠣᠭᠣ ᠬᠢᠶᠡ ᠲᠣᠮᠢᠯᠠᠨ ᠣᠢᠷᠠ ᠣᠷᠴᠢᠮ ᠤ᠋ᠨ ᠠᠢᠯ ᠡᠷᠦᠬᠡ ᠡᠴᠡ ᠬᠠᠷᠪᠤᠭᠤᠯ(ᠳᠦᠷᠢᠮᠲᠦ ᠲᠠᠲᠠᠪᠤᠷᠢ ᠠ᠋ᠴᠠ ᠠᠰᠲᠠᠭᠠᠨ ᠬᠣᠷᠢᠶᠠᠨ ᠠᠪᠬᠤ ᠮᠥᠩᠭᠥ) ᠮᠥᠩᠭᠥ᠂ ᠲᠠᠪᠤᠨ ᠰᠠᠭᠠᠯᠢ ᠶ᠋ᠢᠨ ᠵᠦᠢᠯ ᠢ᠋ ᠠᠯᠪᠠᠲᠠᠨ ᠠᠪᠳᠠᠭ ᠪᠠᠢᠵᠠᠢ᠃ ᠥᠭᠡᠷᠡ ᠬᠤᠰᠢᠭᠤᠨ ᠠ᠋ᠴᠠ ᠨᠡᠭᠦᠳᠡᠯᠯᠡᠨ ᠢᠷᠡᠭᠰᠡᠳ ᠡᠴᠡ ᠪᠠᠰᠠ ᠭᠣᠯᠣᠮᠲᠠ ᠶ᠋ᠢᠨ ᠭᠠᠢᠯᠢ᠂ ᠪᠡᠯᠴᠢᠭᠡᠷ ᠤᠰᠤᠨ ᠤ᠋ ᠲᠠᠲᠠᠪᠤᠷᠢ ᠭᠡᠵᠦ ᠠᠰᠲᠠᠭᠠᠨ ᠠᠪᠳᠠᠭ᠃
ᠴᠢᠩ ᠤᠯᠤᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ᠂ ᠣᠷᠳᠣᠰ ᠤ᠋ᠨ ᠤᠤᠯ ᠤ᠋ᠨ ᠨᠣᠶᠠᠷᠬᠠᠭᠴᠢᠳ ᠤ᠋ᠨ ᠹᠧᠣᠳᠠᠯ ᠤ᠋ᠨ ᠮᠥᠯᠵᠢᠯᠲᠦ ᠪᠠᠢᠭᠤᠯᠤᠯ ᠢ᠋ ᠦᠨᠳᠦᠰᠦᠨ ᠳ᠋ᠡᠭᠡᠨ ᠬᠡᠪ ᠢ᠋ᠶ᠋ᠡᠷ ᠨᠢ ᠦᠯᠡᠳᠡᠭᠡᠭᠰᠡᠨ ᠦ᠌ ᠬᠠᠮᠲᠤ ᠤᠯᠤᠰ ᠲᠥᠷᠥ ᠠᠵᠤ ᠠᠬᠤᠢ ᠶ᠋ᠢᠨ ᠲᠠᠯᠠ ᠪᠠᠷ ᠵᠦᠢᠯ ᠵᠦᠢᠯ ᠦ᠋ᠨ ᠣᠨᠴᠠ ᠡᠷᠬᠡ ᠣᠯᠭᠣᠨ ᠨᠡᠷᠡ ᠶ᠋ᠢᠨ ᠲᠡᠳᠦᠢ ᠬᠤᠪᠢᠷᠠᠭᠤᠯᠤᠭᠰᠠᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠡᠷᠦᠬᠡ ᠠᠮᠠ ᠶ᠋ᠢ ᠬᠤᠪᠢᠶᠠᠷᠢᠯᠠᠨ ᠵᠠᠬᠢᠷᠬᠤ ᠳᠦᠷᠢᠮ ᠢ᠋《ᠴᠢᠭᠤᠯᠭᠠᠨ ᠬᠤᠰᠢᠭᠤᠨ ᠤ᠋ ᠳᠦᠷᠢᠮ》 ᠭᠡᠵᠦ ᠶᠠᠪᠤᠭᠤᠯᠤᠨ ᠤᠭ ᠤ᠋ᠨ ᠠᠳᠠᠯᠢ ᠠᠯᠤᠰ ᠬᠣᠯᠠ ᠨᠡᠭᠦᠳᠡᠯᠯᠡᠨ ᠶᠠᠪᠤᠬᠤ ᠶ᠋ᠢ ᠬᠢᠵᠠᠭᠠᠷᠯᠠᠭᠰᠠᠨ ᠤᠴᠢᠷ ᠰᠠᠭᠤᠷᠢᠰᠢᠨ ᠨᠤᠲᠤᠭᠯᠠᠬᠤ ᠨᠥᠬᠥᠴᠡᠯ ᠲᠡᠢ ᠪᠣᠯᠭᠠᠵᠤ ᠢᠵᠠᠭᠤᠷᠲᠠᠨ ᠨᠣᠶᠠᠳ ᠤ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠱᠠᠭᠠᠷᠳᠠᠯᠭᠠ ᠶ᠋ᠢ ᠥᠨᠳᠥᠷ ᠪᠣᠯᠭᠠᠪᠠ᠃ ᠲᠡᠳᠡᠨ ᠦ᠌ ᠤᠤᠯ ᠤ᠋ᠨ ᠲᠠᠪᠤ ᠵᠢᠷᠭᠤᠭᠠᠨ ᠮᠣᠩᠭᠣᠯ ᠭᠡᠷ ᠲᠡᠢ᠂ ᠲᠠᠪᠤ ᠭᠤᠷᠪᠠᠨ ᠠᠯᠪᠠᠲᠤ ᠪᠣᠭᠣᠯ ᠲᠠᠢ ᠪᠠᠢᠭᠰᠠᠨ ᠢ᠋ ᠳᠣᠲᠣᠷᠠ ᠣᠷᠣᠨ ᠤ᠋ ᠨᠣᠶᠠᠳ ᠪᠠᠶᠠᠳ ᠰᠢᠭ᠋ ᠠᠭᠤᠳᠠᠮ ᠥᠷᠭᠡᠨ ᠬᠦᠷᠢᠶᠡ ᠬᠠᠰᠢᠶᠠ ᠲᠠᠢ ᠥᠨᠳᠥᠷ ᠰᠦᠷᠯᠢᠭ ᠸᠠᠭᠠᠷ ᠲᠣᠭᠣᠰᠬᠠᠨ ᠤᠷᠲᠤ ᠬᠠᠷᠰᠢ᠂ ᠶᠠᠮᠤᠨ ᠰᠠᠩ ᠲᠠᠢ ᠪᠣᠯᠭᠠᠵᠤ᠂ ᠲᠠᠪᠢ ᠵᠢᠷᠠᠨ ᠪᠣᠭᠣᠯ ᠵᠠᠷᠤᠴᠠ ᠲᠠᠢ᠂ ᠭᠠᠯᠴᠢ ᠬᠥᠲᠥᠴᠢ᠂ ᠳᠡᠮᠴᠢ ᠨᠢᠷᠪᠠ ᠸᠠᠳᠠᠨᠳᠠ(ᠲᠡᠷᠡ ᠦᠶᠡ ᠳ᠋ᠦ᠍ ᠸᠠᠳᠠᠨᠳᠠ ᠭᠡᠵᠦ ᠪᠢᠴᠢᠭᠡᠳ ᠪᠠᠢᠳᠠᠨᠳᠠ ᠭᠡᠵᠦ ᠤᠩᠰᠢᠳᠠᠭ) ᠭᠡᠳ ᠣᠯᠠᠨ ᠬᠥᠮᠦᠨ ᠵᠠᠷᠤᠵᠤ ᠢᠳᠡᠵᠦ ᠡᠮᠦᠰᠬᠦ ᠵᠠᠷᠤᠵᠤ ᠰᠦᠢᠳᠬᠡᠬᠦ ᠬᠡᠳᠦ ᠢᠯᠵᠠᠷᠠᠮᠠᠯ ᠪᠦᠷᠢᠯᠭᠡᠮᠡᠲᠡᠭᠡᠢ ᠠᠮᠢᠳᠤᠷᠠᠯ ᠨᠢ ᠠᠷᠠᠳ ᠲᠦᠮᠡᠨ ᠦ᠌ ᠡᠭᠦᠷᠭᠡ ᠳᠠᠷᠤᠭᠠᠰᠤ ᠶ᠋ᠢ ᠲᠤᠢᠯ ᠢ᠋ᠶ᠋ᠠᠷ ᠬᠦᠨᠳᠦᠷᠡᠭᠦᠯᠵᠡᠢ᠃ ᠲᠣᠭᠲᠠᠭᠰᠠᠨ ᠭᠠᠢᠯᠢ ᠲᠠᠲᠠᠪᠤᠷᠢ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠴᠡᠷᠢᠭ ᠲᠡᠵᠢᠭᠡᠬᠦ ᠵᠠᠷᠤᠳᠠᠯ᠂ ᠪᠠᠷᠢᠴᠠᠭᠠᠨ ᠤ᠋ ᠵᠠᠷᠤᠳᠠᠯ᠂ ᠤᠰᠤ ᠪᠡᠯᠴᠢᠭᠡᠷ ᠦ᠋ᠨ ᠰᠦᠢᠳᠬᠡᠯ᠂ ᠬᠠᠰᠢᠶᠠ ᠰᠠᠷᠠᠪᠴᠢᠨ ᠤ᠋ ᠰᠦᠢᠳᠬᠡᠯ ᠵᠡᠷᠭᠡ ᠪᠡᠷ ᠭᠤᠪᠴᠢᠭᠤᠷᠯᠠᠳᠠᠭ᠃ ᠨᠡᠭᠦᠳᠡᠯ ᠮᠠᠯ ᠠᠵᠤ ᠠᠬᠤᠢ ᠪᠣᠯ ᠬᠡᠪᠡᠷᠡᠭᠬᠡᠨ ᠠᠵᠤ ᠠᠬᠤᠢ ᠮᠥᠨ᠃ ᠮᠠᠯᠴᠢᠳ ᠶᠡᠷᠦ ᠨᠢ ᠨᠢᠭᠡ ᠬᠣᠨᠢ ᠪᠠᠷ ᠨᠢᠭᠡ ᠬᠡᠰᠡᠭ ᠬᠡᠪ ᠦ᠋ᠨ ᠴᠠᠢ ᠰᠣᠯᠢᠵᠤ᠂ ᠨᠢᠭᠡ ᠬᠡᠰᠡᠭ ᠪᠤᠭ ᠮᠠᠯ ᠤ᠋ᠨ ᠠᠷᠠᠰᠤ ᠪᠠᠷ ᠨᠢᠭᠡ ᠲᠣᠬᠣᠢ ᠪᠦᠳᠦᠭᠦᠯᠢᠭ ᠳ᠋ᠠᠪᠤᠤ ᠪᠥᠰ ᠰᠣᠯᠢᠵᠤ ᠪᠠᠢᠭᠰᠠᠨ ᠨᠢ ᠲᠡᠷᠡ ᠦᠶᠡ ᠶ᠋ᠢᠨ《ᠭᠣᠣᠯᠴᠢ ᠠᠷᠠᠯᠵᠢᠶᠠ》 ᠪᠠᠢᠪᠠ᠃《ᠳᠥᠷᠪᠡᠨ ᠯᠠᠩ ᠮᠥᠩᠭᠥ ᠪᠡᠷ ᠨᠢᠭᠡ ᠰᠠᠢᠨ ᠱᠠᠷ ᠰᠣᠯᠢᠨᠠ》 ᠭᠡᠳᠡᠭ ᠪᠣᠯ ᠲᠡᠷᠡ ᠦᠶᠡ ᠶ᠋ᠢᠨ ᠵᠠᠯᠢᠬᠠᠢ ᠠᠷᠠᠯᠵᠢᠶᠠᠴᠢᠨ ᠤ᠋ ᠠᠮᠠᠨ ᠲᠠᠷᠨᠢ ᠮᠥᠨ᠃ ᠵᠢᠯ ᠦ᠋ᠨ ᠥᠩᠭᠡ ᠰᠠᠢᠨ ᠪᠣᠯ ᠮᠠᠯᠴᠢᠳ ᠪᠠᠰᠠ ᠳᠥᠩᠭᠡᠭᠡᠳ ᠢᠳᠡᠵᠦ ᠡᠮᠦᠰᠬᠦ ᠪᠡᠨ ᠠᠷᠭᠠᠴᠠᠭᠠᠨᠠ᠃ ᠭᠡᠲᠡᠯᠡ ᠭᠠᠩ ᠭᠠᠮᠰᠢᠭ ᠴᠠᠰᠤ ᠵᠤᠳ ᠲᠣᠬᠢᠶᠠᠯᠳᠤᠪᠠᠯ᠂ ᠬᠠᠷᠠᠴᠤ ᠠᠷᠠᠳ ᠬᠠᠮᠢᠭᠠ ᠠ᠋ᠴᠠ ᠲᠡᠳᠦᠢ ᠠᠷᠪᠢᠨ ᠵᠣᠭᠣᠰ ᠮᠥᠩᠭᠥ ᠣᠯᠵᠤ ᠴᠢᠳᠠᠬᠤ ᠪᠣᠢ⁈
ᠡᠯᠡ ᠬᠤᠰᠢᠭᠤᠨ ᠤ᠋ ᠨᠣᠶᠠᠳ ᠢᠵᠠᠭᠤᠷᠲᠠᠨ᠂ ᠠᠪᠠᠬᠠᠢ ᠬᠠᠲᠤᠨ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠯᠠᠭᠳᠠᠵᠤ ᠠᠯᠪᠠᠨ ᠤᠴᠢᠷ ᠢ᠋ᠶ᠋ᠠᠷ ᠭᠠᠳᠠᠭᠰᠢ ᠭᠠᠷᠬᠤ᠂ ᠵᠡᠷᠭᠡ ᠬᠡᠷᠬᠡᠮ ᠬᠤᠳᠠᠯᠳᠤᠨ ᠠᠪᠬᠤ ᠳ᠋ᠤ᠌ ᠴᠥᠮ ᠶᠡᠬᠡ ᠬᠡᠮᠵᠢᠶᠡᠨ ᠦ᠌ ᠵᠣᠭᠣᠰ ᠮᠥᠩᠭᠥ ᠵᠠᠷᠤᠴᠠᠭᠤᠯᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ᠂1870 ᠣᠨ ᠳ᠋ᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠪᠠᠯᠵᠤᠤᠷ ᠴᠢᠩ ᠦ᠋ᠨ ᠲᠥᠷᠥ ᠳ᠋ᠦ᠍ ᠶᠡᠬᠡ ᠬᠡᠮᠵᠢᠶᠡᠨ ᠦ᠌ ᠴᠠᠭᠠᠨ ᠮᠥᠩᠭᠥ ᠬᠦᠷᠭᠡᠭᠰᠡᠨ ᠡᠴᠡ ᠤᠯᠤᠰ ᠤ᠋ᠨ ᠲᠦᠰᠢᠶᠡ ᠬᠦᠩ ᠦ᠋ᠨ ᠬᠡᠷᠬᠡᠮ ᠳᠡᠭᠡᠷᠡ ᠭᠤᠷᠪᠠᠨ ᠵᠡᠷᠭᠡ ᠨᠡᠮᠡᠭᠰᠡᠨ ᠬᠠᠢᠷᠠ ᠶ᠋ᠢᠨ ᠱᠠᠩ ᠬᠦᠷᠲᠡᠵᠡᠢ᠃
ᠴᠢᠩ ᠤᠯᠤᠰ ᠤ᠋ᠨ ᠰᠡᠭᠦᠯᠴᠢ ᠪᠡᠷ《ᠠᠷᠠᠳ ᠢ᠋ ᠨᠡᠭᠦᠯᠭᠡᠨ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠬᠤ》 ᠭᠡᠰᠡᠨ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠨᠢ ᠴᠠᠭᠠᠨ ᠬᠡᠷᠡᠮ ᠡᠴᠡ ᠬᠣᠢᠰᠢᠬᠢ ᠥᠷᠭᠡᠨ ᠠᠭᠤᠳᠠᠮ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷ ᠢ᠋ ᠳᠤᠷᠠ ᠮᠡᠳᠡᠨ ᠲᠠᠷᠢᠶᠠᠯᠠᠬᠤ ᠳ᠋ᠤ᠌ ᠲᠦᠯᠬᠢᠴᠡ ᠬᠦᠴᠦᠨ ᠪᠣᠯᠵᠤ᠂ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠭᠰᠠᠨ ᠣᠷᠣᠨ ᠤ᠋ ᠥᠷᠭᠡᠨ ᠣᠯᠠᠨ ᠮᠠᠯᠴᠢᠳ ᠢ᠋ ᠠᠯᠪᠠᠲᠠᠨ ᠨᠡᠭᠦᠯᠭᠡᠵᠦ《ᠰᠠᠭᠤᠬᠤ ᠨᠤᠲᠤᠭ ᠦᠭᠡᠢ᠂ ᠬᠠᠷᠠᠬᠤ ᠮᠠᠯ ᠦᠭᠡᠢ᠂ ᠬᠣᠨᠣᠬᠤ ᠭᠡᠷ ᠴᠦ᠍ ᠦᠭᠡᠢ》 ᠲᠡᠨᠦᠭᠦᠯ ᠠᠷᠠᠳ ᠪᠣᠯᠭᠠᠨ᠂ ᠭᠠᠯ ᠤᠰᠤᠨ ᠤ᠋ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠳ᠋ᠤ᠌ ᠲᠦᠯᠬᠢᠨ ᠣᠷᠣᠭᠤᠯᠤᠭᠰᠠᠨ ᠪᠠᠢᠲᠠᠯᠠ᠂ ᠡᠯᠡ ᠬᠤᠰᠢᠭᠤᠨ ᠤ᠋ ᠨᠣᠶᠠᠳ ᠢᠵᠠᠭᠤᠷᠲᠠᠨ ᠥᠪᠡᠷ ᠦ᠋ᠨ ᠬᠠᠨᠤᠰᠢ ᠦᠭᠡᠢ ᠱᠠᠯᠢᠨ ᠪᠦᠷᠢᠯᠭᠡᠮᠡᠲᠡᠭᠡᠢ ᠢᠯᠵᠠᠷᠠᠮᠠᠯ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠬᠠᠩᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠮᠠᠯᠴᠢᠨ ᠲᠦᠮᠡᠨ ᠦ᠌ ᠦᠬᠦᠵᠦ ᠰᠡᠬᠡᠬᠦ ᠶ᠋ᠢ ᠬᠠᠮᠢᠶᠠᠷᠤᠯ ᠦᠭᠡᠢ ᠪᠡᠷ ᠬᠠᠷᠢ ᠶ᠋ᠢᠨ ᠲᠦᠷᠢᠮᠡᠬᠡᠢᠯᠡᠭᠴᠢᠳ ᠪᠠ ᠬᠢᠲᠠᠳ ᠤ᠋ᠨ ᠭᠠᠵᠠᠷ ᠤ᠋ᠨ ᠡᠵᠡᠨ᠂ ᠪᠠᠶᠠᠨ ᠲᠠᠷᠢᠶᠠᠴᠢᠨ᠂ ᠠᠪᠯᠢᠭᠠᠴᠢ ᠲᠦᠰᠢᠮᠡᠯ᠂ ᠬᠣᠪᠳᠣᠭ ᠨᠣᠶᠠᠳ ᠲᠠᠢ ᠰᠦᠯᠪᠡᠭᠡᠯᠳᠦᠨ ᠠᠷᠠᠳ ᠲᠦᠮᠡᠨ ᠢ᠋ ᠨᠡᠩ ᠬᠡᠴᠡᠭᠦᠦ ᠪᠡᠷ ᠬᠢᠬᠠᠨ ᠮᠥᠯᠵᠢᠬᠦ ᠪᠣᠯᠵᠠᠢ᠃ ᠡᠢᠮᠦ ᠪᠠᠢᠳᠠᠯ ᠳᠣᠣᠷᠠ ᠣᠷᠳᠣᠰ ᠤ᠋ᠨ ᠮᠠᠯᠴᠢᠨ ᠲᠦᠮᠡᠨ ᠳᠤᠭᠤᠢ ᠳᠤᠭᠤᠢᠯᠠᠨ ᠬᠠᠰᠬᠢᠷᠤᠯᠴᠠᠨ ᠪᠣᠰᠴᠤ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠢ᠋ ᠥᠷᠨᠢᠭᠦᠯᠦᠭᠰᠡᠨ ᠪᠠᠢᠵᠠᠢ᠃
— — — —
① (ᠦᠦᠰᠢᠨ ᠦ᠌ ᠰᠣᠶᠣᠯ ᠲᠡᠦᠬᠡ ᠶ᠋ᠢᠨ ᠮᠠᠲ᠋ᠧᠷᠢᠠᠯ) ᠤ᠋ᠨ82 ᠳ᠋ᠤᠭᠠᠷ ᠨᠢᠭᠤᠷ ᠲᠤ᠌᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠠᠷᠠᠨᠲᠤᠶᠠᠭᠠ᠂ ᠪᠠᠯ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ