ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠ ᠶᠢᠰᠦ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 19
148ᠠᠢᠯ ᠭᠡᠷ ᠪᠣᠯᠬᠤ ᠶᠡᠭᠡ ᠡᠷᠡᠮᠡᠯᠵᠡᠯ
ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠪᠦᠷᠢᠮᠦᠰᠦᠨ ᠥᠭᠡᠷᠡᠴᠢᠯᠡᠬᠦ ᠶ᠋ᠢ ᠰᠢᠲᠦᠭᠡᠳ ᠥᠪ ᠬᠥᠷᠥᠩᠭᠡ᠂ ᠡᠳ᠋ ᠬᠣᠭᠰᠢᠯ ᠶᠠᠭᠤ ᠶᠠᠭᠤᠲᠠᠢ ᠪᠣᠯᠬᠤ ᠪᠠᠨ ᠪᠦᠷᠢᠳᠬᠡᠨ ᠦᠵᠡᠬᠦ ᠳ᠋ᠦ᠍᠂ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠶᠠᠭᠤᠮᠠ ᠠᠬᠤᠭᠤᠯᠬᠤ ᠪᠢᠴᠢᠬᠠᠨ ᠪᠠᠢᠰᠢᠩ ᠪᠦᠬᠦᠢ ᠬᠣᠶᠠᠷ ᠲᠠᠯᠠ ᠬᠠᠰᠢᠶᠠ᠂ ᠰᠠᠭᠤᠵᠤ ᠪᠠᠢᠭᠠ ᠳᠥᠷᠪᠡᠨ ᠬᠠᠨᠠ ᠲᠠᠢ ᠭᠡᠷ᠂ ᠰᠣᠯᠢᠵᠤ ᠡᠮᠦᠰᠬᠦ ᠬᠤᠪᠴᠠᠰᠤ ᠨᠤᠭᠤᠳ᠂ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠭᠤᠷᠪᠠᠨ ᠵᠠᠭᠤ ᠣᠷᠴᠢᠮ ᠪᠠᠢᠨᠠ᠃ ᠡᠨᠡ ᠪᠣᠯ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠠᠦ᠋ᠲ᠋ᠣᠨᠣᠮᠢᠲᠤ ᠵᠠᠰᠠᠭ ᠢ᠋ ᠠᠩᠬᠠ ᠲᠣᠷᠨᠢᠨ ᠲᠣᠭᠲᠠᠨᠢᠭᠰᠠᠨ ᠠ᠋ᠴᠠ ᠠᠪᠤᠭᠠᠳ ᠭᠠᠮᠢᠩ ᠤ᠋ᠨ ᠭᠠᠷ ᠲᠤ ᠣᠷᠣᠨ ᠤᠨᠠᠬᠤ ᠡᠴᠦᠰ ᠦ᠋ᠨ ᠡᠳᠦᠷ ᠢ᠋ ᠬᠦᠷᠲᠡᠯᠡ ᠠᠯᠪᠠᠨ ᠠᠵᠢᠯ ᠬᠢᠬᠦ ᠳ᠋ᠡᠭᠡᠨ ᠭᠠᠭᠴᠠ ᠤᠯᠠᠭᠠᠨ ᠮᠥᠩᠭᠥ ᠶ᠋ᠢ ᠳᠡᠮᠡᠢ ᠦᠷᠡᠭᠳᠡᠭᠦᠯᠬᠦ ᠦᠭᠡᠢ ᠬᠤᠷᠢᠶᠠᠭᠰᠠᠨ ᠨᠢ ᠪᠠᠢᠯᠠ᠃
ᠬᠥᠳᠡᠭᠡᠬᠢ ᠠᠷᠤ ᠭᠡᠷ ᠨᠢ ᠨᠡᠯᠢᠶᠡᠳ ᠮᠠᠯ ᠲᠠᠢ ᠪᠠᠶᠠᠨ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠨᠢᠭᠡᠨᠲᠡ ᠲᠡᠨᠳᠡ ᠡᠴᠡ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠲᠠᠰᠤᠷᠠᠵᠤ ᠮᠠᠯ ᠤ᠋ᠨ ᠵᠠᠬᠠ ᠠ᠋ᠴᠠ ᠬᠣᠯᠠᠳᠠᠵᠠᠢ᠃ ᠬᠣᠶᠠᠷ ᠲᠤ ᠭᠡᠪᠡᠯ᠄ ᠲᠠᠪᠤ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠢᠭᠡ ᠡᠬᠡ ᠬᠣᠶᠠᠷ ᠢ᠋ᠶ᠋ᠠᠨ ᠣᠢᠷᠠ ᠣᠢᠷᠠᠬᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠠ᠋ᠴᠠ ᠨᠢ ᠬᠣᠢᠰᠢ ᠬᠦᠨᠳᠦ ᠭᠤᠲᠤᠷᠠᠯ ᠳ᠋ᠤ᠌ ᠳᠠᠷᠤᠭᠳᠠᠨ᠂ ᠣᠴᠢᠬᠤ ᠪᠠᠨ ᠪᠣᠯᠢᠭᠰᠠᠨ ᠪᠥᠭᠡᠳ ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠠᠬᠠ᠂ ᠳᠡᠭᠦᠦ ᠡᠴᠡ ᠠᠪᠬᠤ ᠪᠠᠢᠲᠤᠭᠠᠢ ᠭᠣᠷᠢᠳᠠᠬᠤ ᠴᠦ᠍ ᠡᠷᠬᠡ ᠦᠭᠡᠢ ᠭᠡᠵᠦ ᠪᠣᠳᠣᠨᠠ᠃ ᠬᠠᠷᠢᠨ ᠠᠬᠠ ᠪᠤᠳᠠᠵᠠᠪ ᠭᠡᠭᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠢᠯ ᠦ᠋ᠨ ᠵᠢᠯ ᠳ᠋ᠦ᠍ ᠭᠤᠷᠪᠠᠨ ᠬᠣᠨᠢᠨ ᠤ᠋ ᠮᠢᠬᠠ᠂ ᠵᠢᠭᠠᠯ ᠵᠤᠭᠠ ᠴᠠᠭᠠᠨ ᠢᠳᠡᠭᠡ᠂ ᠲᠠᠪᠤᠨ ᠲᠡᠮᠡᠭᠡ ᠲᠦᠯᠡᠭᠡ ᠣᠷᠣᠭᠤᠯᠵᠤ ᠥᠭᠳᠡᠭ ᠲᠤᠨᠢ ᠪᠠᠶᠠᠷᠯᠠᠨᠠ᠃ ᠡᠭᠦᠨ ᠢ᠋ᠶ᠋ᠡᠷ ᠨᠢ ᠪᠠᠯᠳᠠᠨᠴᠡᠷᠢᠩ ᠣᠳᠣ ᠶ᠋ᠢᠨ ᠬᠠᠮᠲᠤ ᠰᠠᠭᠤᠭᠠ ᠱᠠᠪᠢ ᠨᠠᠮᠰᠠᠷᠠᠢ ᠶ᠋ᠢᠨ ᠢᠷᠡᠬᠦ ᠶ᠋ᠢᠨ ᠡᠮᠦᠨᠡ ᠨᠢᠭᠡ ᠬᠢᠲᠠᠳ ᠲᠣᠭᠣᠭᠠᠴᠢ ᠲᠠᠢ ᠪᠠᠢᠬᠤ ᠳ᠋ᠠᠭᠠᠨ ᠴᠦ᠍ ᠪᠣᠯᠪᠠ᠂ ᠰᠡᠷᠢᠭᠦᠨ ᠤᠯᠠᠷᠢᠯ ᠤ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢ ᠡᠯᠪᠡᠭ ᠠᠪᠴᠤ ᠴᠢᠳᠠᠳᠠᠭ ᠪᠠᠢᠵᠠᠢ᠃
ᠥᠩᠭᠡᠷᠡᠭᠰᠡᠨ ᠠᠮᠢᠳᠤᠷᠠᠯ ᠡᠢᠮᠦ ᠪᠥᠭᠡᠳ ᠥᠪ ᠬᠥᠷᠥᠩᠭᠡ ᠨᠢᠮᠭᠡᠨ᠂ ᠡᠬᠡᠨᠡᠷ ᠠᠪᠤᠨᠠ ᠭᠡᠬᠦ ᠳ᠋ᠦ᠍ ᠰᠦᠢ ᠪᠡᠯᠡᠭ ᠲᠦ᠋ᠨᠢ ᠶᠠᠭᠤ ᠥᠭᠬᠦ᠂ ᠨᠠᠢᠷ ᠬᠤᠷᠢᠮ ᠢ᠋ ᠬᠡᠷᠬᠢᠨ ᠶᠠᠭᠤ ᠪᠠᠷ ᠥᠩᠭᠡᠷᠡᠭᠦᠯᠬᠦ᠂ ᠶᠠᠳᠠᠵᠤ ᠣᠷᠣᠨ ᠭᠡᠷ ᠵᠠᠢ ᠦᠭᠡᠢ᠂ ᠡᠭᠦᠨ ᠡᠴᠡ ᠴᠠᠭᠠᠰᠢ ᠬᠠᠨᠢᠯᠠᠨ ᠰᠠᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠤᠷᠢᠳᠤ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠦᠷᠦᠯᠴᠡᠳᠡᠭ ᠪᠠᠢᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠷᠦᠯᠴᠡᠬᠦ ᠦᠭᠡᠢ ᠪᠣᠯᠬᠤ ᠵᠡᠷᠭᠡ ᠶ᠋ᠢ ᠰᠠᠨᠠᠬᠤ ᠳ᠋ᠤ᠌ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠵᠣᠷᠢᠭ ᠮᠣᠬᠣᠭᠤᠰᠢᠲᠠᠢ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠲᠡᠷᠡ ᠡᠮᠡᠭᠲᠡᠢ ᠡᠴᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠤᠴᠠᠭᠠᠨ ᠠᠪᠴᠤ ᠡᠰᠡ ᠴᠢᠳᠠᠨᠠ᠃《ᠦᠭᠡᠢ ᠪᠦᠲᠦᠬᠦ ᠪᠣᠯᠪᠠ ᠤᠤ》 ᠭᠡᠵᠦ ᠬᠣᠭᠣᠰᠣᠨ ᠭᠣᠷᠢᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠷᠡ《ᠶᠠᠭᠠᠬᠢᠵᠤ ᠢᠩᠭᠢᠵᠦ ᠪᠠᠢᠭᠠᠳ ᠨᠢᠭᠡ ᠪᠣᠯᠭᠠᠶᠠ》 ᠭᠡᠵᠦ ᠪᠣᠳᠣᠨᠠ᠃ ᠭᠡᠲᠡᠯᠡ ᠭᠠᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠭᠡᠭᠴᠢ ᠪᠡᠷ ᠭᠠᠷᠤᠵᠠ ᠪᠠᠰᠠ ᠳᠣᠣᠷᠠ ᠠ᠋ᠴᠠ ᠪᠠᠨ ᠭᠠᠷᠴᠤ ᠢᠷᠡᠨᠡ᠃ ᠨᠢᠭᠡ ᠡᠳᠦᠷ ᠱᠠᠪᠢ᠄
— ᠪᠠᠭᠰᠢ ᠠ᠋᠂ ᠥᠨᠥᠬᠢ ᠠᠷᠪᠠᠭᠠᠢ ᠭᠡᠵᠦ ᠦᠭᠡ ᠪᠡᠨ ᠡᠬᠢᠯᠡᠬᠦ ᠳ᠋ᠦ᠍ᠨᠢ᠂
— ᠶᠠᠭᠤᠨ ᠠᠷᠪᠠᠭᠠᠢ ᠪᠢᠯᠡ? ᠠᠷᠪᠠᠭᠠᠢ ᠭᠡᠵᠦ ᠬᠡᠨ ᠢ᠋ ᠬᠡᠯᠡᠨᠡ ᠪᠣᠢ?
— ᠶᠠᠭᠠᠬᠢᠪᠠ ᠳᠠ ᠥᠨᠥᠬᠢ ᠡᠪᠡᠳᠴᠢᠲᠡᠨ᠃ ᠲᠡᠷᠡ ᠮᠠᠨᠢ ᠣᠳᠣ ᠪᠦᠷ ᠡᠪ ᠡᠷᠡᠭᠦᠯ ᠪᠣᠯᠤᠭᠰᠠᠨ ᠰᠢᠦ ᠳᠡ᠃
— ᠰᠤᠪᠤᠷᠭᠠ ᠶ᠋ᠢᠨ ᠢᠷᠣᠭᠠᠷ ᠲᠤ ᠬᠠᠶᠠᠭᠳᠠᠨ ᠦᠬᠦᠯᠦᠭᠦᠲᠡ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠬᠥᠮᠦᠨ ᠢ᠋ ᠠᠷᠪᠠᠭᠠᠢ ᠭᠡᠳᠡᠭ ᠪᠠᠢᠵᠠᠢ᠃ ᠲᠡᠭᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠣᠷᠣ ᠲᠠᠰᠤ ᠮᠠᠷᠲᠠᠭᠰᠠᠨ ᠢ᠋ᠶ᠋ᠠᠨ ᠰᠠᠶᠢ ᠰᠠᠨᠠᠪᠠ᠃
— ᠠᠰᠢᠭᠦᠢ ᠳᠡ᠃ ᠣᠳᠣ ᠨᠢᠭᠡᠨᠲᠡ ᠡᠷᠡᠭᠦᠯ ᠪᠣᠯᠤᠭᠰᠠᠨ ᠪᠣᠯ ᠣᠷᠣᠨ ᠨᠤᠲᠤᠭ ᠢ᠋ᠶ᠋ᠠᠨ ᠪᠠᠷᠠᠳᠠᠪᠠᠯ ᠪᠠᠷᠠᠪᠠ ᠳᠠ ᠭᠡᠬᠦ ᠳ᠋ᠦ᠍ ᠱᠠᠪᠢ᠄
— ᠡᠨᠡ ᠲᠤᠬᠠᠢ ᠶᠠᠷᠢᠭᠰᠠᠨ᠂ ᠭᠡᠲᠡᠯᠡ ᠲᠡᠭᠦᠨ ᠳ᠋ᠦ᠍ ᠴᠢᠨᠢ ᠮᠥᠩᠭᠥ ᠶᠠᠩᠴᠢᠶᠠᠨ ᠬᠡᠷᠡᠭᠲᠡᠢ ᠰᠢᠦ ᠳᠡ᠃
— ᠲᠡᠭᠡᠪᠡᠯ ᠶᠠᠭᠠᠬᠢᠬᠤ ᠪᠣᠢ᠂ ᠥᠪᠡᠷ ᠢ᠋ᠶ᠋ᠡᠨ ᠠᠵᠢᠯ ᠬᠢᠵᠦ ᠮᠥᠩᠭᠥ ᠣᠯᠤᠨᠠ ᠪᠢᠵᠡ ᠳᠡ᠃
— ᠠᠵᠢᠯ ᠬᠢᠵᠦ ᠮᠥᠩᠭᠥ ᠣᠯᠬᠤ ᠨᠥᠬᠥᠴᠡᠯ ᠦᠭᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠲᠠᠨ ᠳ᠋ᠤ᠌ ᠨᠢᠭᠡ ᠪᠠᠷᠠᠯᠬᠠᠨ ᠵᠠᠮ ᠮᠥᠷ ᠢ᠋ᠶ᠋ᠡᠨ ᠵᠢᠭᠠᠯᠭᠠᠬᠤ ᠬᠦᠰᠡᠯ ᠲᠡᠢ ᠭᠡᠬᠦ ᠶᠦᠮ᠂ ᠬᠡᠵᠢᠶᠡ ᠢᠷᠡᠭᠦᠯᠬᠦ ᠪᠣᠢ?
ᠪᠠᠯᠳᠠᠨᠴᠡᠷᠢᠩ ᠲᠡᠷᠡ ᠬᠥᠮᠦᠨ ᠢ᠋ ᠮᠥᠩᠭᠥ ᠶᠠᠩᠴᠢᠶᠠᠨ ᠤ᠋ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠭᠡᠵᠦ ᠪᠠᠢᠭᠠ ᠭᠡᠵᠦ ᠪᠣᠳᠣᠨ ᠬᠥᠮᠥᠰᠬᠡ ᠵᠠᠩᠭᠢᠳᠪᠠ᠃ ᠤᠷᠢᠳ ᠡᠮᠦᠨᠡ ᠵᠠᠷᠤᠴᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠬᠣᠷᠢ ᠭᠠᠷᠤᠢ ᠶᠠᠩᠴᠢᠶᠠᠨ ᠪᠣᠯᠤᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ《ᠣᠳᠣ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠲᠤᠰᠠᠯᠠᠬᠤ ᠠ᠋ᠴᠠ ᠯᠠ ᠪᠢᠰᠢ ᠳᠡ》 ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ᠄
— ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠬᠡᠷᠡᠭ ᠦᠭᠡᠢ᠃ ᠵᠦᠭᠡᠷ ᠡᠨᠡ ᠮᠥᠩᠭᠥ ᠪᠡᠷ ᠬᠣᠶᠠᠷ ᠬᠣᠨᠢ ᠬᠤᠳᠠᠯᠳᠤᠨ ᠠᠪᠴᠤ ᠮᠢᠬᠠ ᠪᠣᠯᠭᠠᠨ ᠮᠠᠢᠮᠠᠢᠯᠠᠵᠤ ᠬᠥᠯ ᠵᠠᠯᠭᠠᠬᠤ ᠶ᠋ᠢ ᠪᠣᠳᠣ! ᠭᠡᠵᠦ ᠬᠡᠯᠡ ᠭᠡᠳ ᠨᠠᠢ᠍ᠮᠠᠨ ᠶᠠᠩᠴᠢᠶᠠᠨ ᠭᠠᠷᠭᠠᠵᠤ ᠥᠭᠪᠡ᠃ ᠭᠡᠲᠡᠯᠡ ᠪᠠᠰᠠ ᠲᠡᠷᠡ ᠡᠷᠡ ᠶ᠋ᠢᠨ ᠲᠠᠮᠲᠤᠭ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠮᠠᠭᠤ ᠬᠤᠪᠴᠠᠰᠤ ᠲᠠᠢ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠶᠡᠷᠦ ᠬᠥᠮᠦᠨ ᠬᠤᠪᠴᠠᠰᠤ ᠦᠭᠡᠢ ᠪᠠᠢᠭᠰᠠᠭᠠᠷ ᠪᠤᠰᠤᠳ ᠲᠤ ᠡᠰᠡ ᠲᠣᠭᠣᠭᠳᠠᠨ ᠠᠵᠢᠯ ᠬᠡᠷᠡᠭ ᠶᠠᠪᠤᠴᠠ ᠦᠭᠡᠢ ᠪᠣᠯᠬᠤ ᠶᠠᠪᠤᠳᠠᠯ ᠪᠠᠢᠳᠠᠭ ᠲᠤᠯᠠ ᠳᠠᠬᠢᠨ ᠬᠡᠳᠦᠨ ᠶᠠᠩᠴᠢᠶᠠᠨ ᠥᠭᠬᠦ ᠪᠣᠯᠪᠠ ᠪᠢᠯᠡ? ᠭᠡᠵᠦ ᠨᠢᠭᠡ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠵᠤ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠠᠭᠠ ᠵᠡᠷᠭᠡ ᠡᠳ᠋ᠯᠡᠭᠳᠡᠭᠰᠡᠨ ᠴᠢᠰᠴᠡᠦ ᠳᠡᠪᠡᠯ᠂ ᠨᠡᠯᠢᠶᠡᠳ ᠬᠠᠭᠤᠴᠢᠷᠠᠭᠰᠠᠨ ᠪᠣᠯᠪᠠᠴᠤ ᠭᠠᠮᠲᠠᠢ ᠡᠳ᠋ᠯᠡᠭᠰᠡᠨ ᠭᠤᠲᠤᠯ᠂ ᠳᠣᠲᠣᠭᠤᠷ᠂ ᠭᠠᠳᠠᠭᠤᠷ ᠥᠮᠥᠳᠥ᠂ ᠴᠠᠮᠴᠠ᠁ ᠵᠥᠪᠬᠡᠨ ᠮᠠᠯᠠᠭᠠᠢ ᠠ᠋ᠴᠠ ᠪᠤᠰᠤᠳ ᠢ᠋ ᠪᠦᠷᠢᠯᠳᠦᠭᠦᠯᠦᠨ ᠥᠭᠬᠦ ᠪᠡᠷ ᠪᠣᠯᠤᠯᠠ᠃ ᠡᠳᠡᠭᠡᠷ ᠢ᠋ ᠱᠠᠪᠢ ᠨᠢ ᠡᠨᠡ ᠲᠡᠷᠡ ᠶ᠋ᠢ ᠣᠩᠭᠢᠴᠢᠨ ᠴᠤᠭᠯᠠᠭᠤᠯᠵᠤ ᠠᠪᠤᠭᠠᠳ ᠪᠣᠭᠣᠵᠤ ᠡᠬᠢᠯᠡᠬᠦ ᠶ᠋ᠢ ᠨᠢ ᠦᠵᠡᠬᠦ ᠳ᠋ᠦ᠍ ᠲᠤᠰ ᠪᠦᠷᠢ ᠪᠡᠨ ᠬᠡᠷᠡᠭᠴᠡᠭᠡ ᠲᠡᠢ ᠵᠦᠢᠯᠡᠰ ᠪᠠᠢᠬᠤ ᠲᠡᠳᠦᠢ ᠦᠭᠡᠢ ᠮᠥᠩᠭᠥ ᠳᠦᠭᠦᠷᠡᠭ ᠦ᠋ᠨ ᠦᠨᠡ ᠬᠦᠷᠬᠦ ᠵᠦᠢᠯᠡᠰ ᠪᠠᠢᠬᠤ ᠲᠤᠯᠠ ᠪᠠᠯᠳᠠᠨᠴᠡᠷᠢᠩ ᠳᠣᠲᠣᠷᠠ ᠪᠠᠨ ᠬᠠᠷᠠᠭᠤᠰᠤᠨᠠ᠃《ᠳᠠᠬᠢᠨ ᠪᠠᠰᠠ ᠭᠠᠢ ᠪᠣᠯᠤᠨᠠ ᠪᠣᠢ》 ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ᠄
— ᠡᠭᠦᠨ ᠡᠴᠡ ᠴᠠᠭᠠᠰᠢ ᠳᠠᠬᠢᠨ ᠭᠣᠷᠢᠳᠠᠬᠤ ᠬᠡᠷᠡᠭ ᠦᠭᠡᠢ ᠭᠡᠵᠦ ᠰᠠᠢᠨ ᠬᠡᠯᠡᠭᠡᠷᠡᠢ ᠭᠡᠵᠦ ᠬᠦᠢᠲᠡᠨ ᠴᠢᠷᠠᠢ ᠪᠠᠷ ᠵᠠᠬᠢᠯᠠ᠃
ᠡᠢᠨ ᠬᠦ᠌ ᠨᠢᠭᠡ ᠬᠡᠷᠡᠭ ᠡᠴᠡ ᠪᠡᠶᠡ ᠪᠡᠨ ᠵᠠᠢᠯᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠬᠣᠶᠠᠳᠠᠬᠢ ᠬᠡᠷᠡᠭ ᠮᠥᠨ ᠯᠡ ᠳᠣᠣᠷᠠ ᠠ᠋ᠴᠠ ᠪᠠᠨ ᠭᠠᠷᠴᠤ ᠢᠷᠡᠯᠡ᠃ ᠱᠠᠪᠢ ᠨᠠᠮᠰᠠᠷᠠᠢ ᠥᠭᠡᠷᠡ ᠨᠢᠭᠡ ᠡᠳᠦᠷ ᠭᠠᠳᠠᠭᠤᠷ ᠶᠠᠪᠤᠭᠠᠳ ᠢᠷᠡᠬᠦ ᠳ᠋ᠡᠭᠡᠨ᠄
— ᠰᠦᠬᠡᠪᠠᠭᠠᠲᠤᠷ ᠲᠠᠨ ᠢ᠋ ᠭᠡᠷ ᠲᠡᠭᠡᠨ ᠢᠷᠡᠨᠡ ᠤᠤ? ᠭᠡᠵᠦ ᠪᠠᠢᠨᠠ ᠭᠡᠪᠡ᠃
— ᠴᠢ ᠬᠠᠮᠢᠭᠠ ᠲᠠᠭᠠᠷᠠᠯᠳᠤᠪᠠ ᠭᠡᠬᠦ ᠳ᠋ᠦ᠍᠂
— ᠪᠢ ᠭᠡᠷ ᠢ᠋ᠶ᠋ᠡᠷ ᠨᠢ ᠣᠷᠣᠭᠰᠠᠨ ᠶᠤᠮ᠃
— ᠠ! ᠭᠡᠳ ᠪᠠᠯᠳᠠᠨᠴᠡᠷᠢᠩ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠬᠢ ᠪᠡᠷ ᠪᠠᠢᠨ ᠪᠠᠢᠨ ᠣᠷᠣᠳᠠᠭ ᠪᠣᠯᠤᠭᠰᠠᠨ ᠢ᠋ ᠨᠢ ᠳᠣᠲᠣᠷᠠ ᠪᠠᠨ ᠳᠠᠭᠠᠪᠤᠷᠢᠯᠠᠭᠠᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠡᠶᠡ ᠶ᠋ᠢ ᠮᠥᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠵᠣᠷᠢᠭᠰᠠᠨ ᠦᠢᠯᠡ ᠬᠡᠷᠡᠭ ᠡᠴᠡ ᠳᠠᠷᠤᠢ ᠵᠠᠢᠯᠠᠭᠤᠯᠬᠤ ᠶ᠋ᠢ ᠪᠣᠳᠣᠪᠠ᠃
— ᠪᠡᠶᠡ ᠮᠠᠭᠤ᠃ ᠤᠵᠢᠭ ᠡᠪᠡᠳᠴᠢᠨ ᠬᠦᠷᠦᠭᠰᠡᠨ᠂ ᠣᠢᠷᠠ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠣᠴᠢᠬᠤ ᠨᠥᠬᠥᠴᠡᠯ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠷᠡᠢ ᠭᠡᠪᠡ᠃ ᠭᠡᠪᠡᠴᠦ ᠤᠭ ᠬᠡᠷᠡᠭ ᠢᠩᠭᠢᠭᠡᠳ ᠵᠣᠭᠰᠣᠭᠰᠠᠨ ᠦᠭᠡᠢ᠂ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠱᠠᠪᠢ᠄
— ᠰᠦᠬᠡᠪᠠᠭᠠᠲᠤᠷ ᠲᠠᠨ ᠢ᠋ ᠶᠠᠮᠠᠷ ᠪᠣᠯᠪᠠᠴᠤ ᠥᠨᠥ ᠣᠷᠣᠢ ᠵᠠᠮᠢᠶᠠᠨ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠨᠢᠭᠡ ᠣᠴᠢᠵᠤ ᠦᠵᠡᠨᠡ ᠤᠤ? ᠭᠡᠯᠡ ᠭᠡᠪᠡ᠃
— ᠶᠠᠮᠠᠷ ᠪᠣᠯᠪᠠᠴᠤ ᠭᠡᠰᠡᠨ ᠭᠡᠵᠦ ᠤᠤ? ᠭᠡᠵᠦ ᠰᠣᠴᠢᠨ ᠠᠰᠠᠭᠤᠬᠤ ᠳ᠋ᠤ᠌᠂
— ᠲᠡᠢᠮᠦ ᠳᠡ᠂ ᠨᠠᠮᠠᠶ᠋ᠢ ᠵᠠᠪᠠᠯ ᠬᠡᠯᠡᠭᠡᠷᠡᠢ ᠭᠡᠰᠡᠨ᠂
— ᠶᠠᠭᠠᠬᠢᠬᠤ ᠬᠡ ᠶᠦᠮ ᠪᠣᠯ ᠮᠡᠳᠡᠪᠡ ᠤᠤ?
— ᠮᠡᠳᠡᠭᠰᠡᠨ ᠭᠡᠳ ᠱᠠᠪᠢ ᠣᠷᠣᠭᠰᠢ ᠪᠥᠬᠥᠢᠨ᠄ ᠨᠠᠮ ᠤ᠋ᠨ ᠵᠢᠷᠤᠮᠲᠤ ᠨᠥᠬᠥᠳ ᠴᠤᠭᠯᠠᠷᠠᠨ ᠬᠡᠷᠡᠭ ᠬᠡᠯᠡᠯᠴᠡᠬᠦ ᠶᠦᠮ ᠭᠡᠨᠡ ᠪᠢᠯᠡ ᠭᠡᠵᠦ ᠬᠣᠶᠠᠭᠤᠯᠠᠬᠠᠨ ᠢ᠋ᠶ᠋ᠠᠨ ᠪᠠᠢᠭᠠ ᠠᠲᠠᠯᠠ ᠪᠠᠨ ᠰᠢᠪᠡᠨᠡᠨ ᠬᠡᠯᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠲᠤᠩ ᠶᠡᠬᠡ ᠭᠠᠢᠬᠠᠯᠠ᠃《ᠶᠠᠭᠤᠨ ᠤ᠋ ᠨᠠᠮ ᠤ᠋ᠨ ᠨᠥᠬᠥᠳ ᠪᠣᠢ? ᠤᠯᠠᠭᠠᠨ ᠣᠷᠣᠰ ᠢ᠋ ᠲᠦᠰᠢᠭᠯᠡᠬᠦ ᠨᠢᠭᠡ ᠨᠠᠮ ᠪᠣᠢ ᠪᠣᠯᠤᠭᠰᠠᠨ ᠬᠡᠷᠡᠭ ᠤᠤ?》 ᠭᠡᠵᠦ ᠪᠣᠳᠣᠭᠰᠠᠨ ᠠ᠋ᠴᠠ ᠭᠠᠳᠠᠨᠠ᠂《ᠨᠠᠳᠠ ᠤᠯᠤᠰ ᠲᠥᠷᠥ ᠪᠡᠷ ᠬᠥᠭᠡᠭᠡᠴᠡᠯᠳᠦᠬᠦ ᠶ᠋ᠢᠨ ᠬᠡᠷᠡᠭ ᠠᠯᠠᠭᠠ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠶᠠᠪᠤᠭᠰᠠᠨ᠂ ᠵᠢᠳᠬᠦᠭᠰᠡᠨ ᠪᠦᠬᠦᠨ ᠲᠠᠯᠠᠭᠠᠷ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠰᠡᠳᠬᠢᠯ ᠬᠠᠨᠤᠨ ᠵᠦᠭᠡᠷ ᠠᠵᠤ ᠲᠥᠷᠥᠨ ᠠᠮᠢᠳᠤᠷᠠᠬᠤ ᠶ᠋ᠢ ᠪᠣᠳᠣᠶᠠ》 ᠭᠡᠵᠦ ᠪᠣᠳᠣᠯᠠ᠃ ᠨᠠᠮᠰᠠᠷᠠᠢ ᠬᠠᠵᠠᠭᠤ ᠳ᠋ᠤᠨᠢ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠨᠢ ᠬᠦᠯᠢᠶᠡᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠮᠠ ᠶ᠋ᠢ ᠨᠢ ᠰᠢᠷᠳᠡᠨᠡ᠃ ᠴᠠᠢ ᠴᠢᠨᠠᠬᠤ ᠪᠠᠷ ᠵᠤᠤᠬᠠᠨ ᠳ᠋ᠤ᠌ ᠬᠢᠭᠰᠡᠨ ᠬᠠᠭᠤᠷᠠᠢ ᠬᠠᠷᠠ ᠮᠣᠳᠣ ᠳᠡᠰ ᠨᠢᠰ ᠣᠴᠢ ᠦᠰᠦᠷᠦᠨ ᠳᠤᠤᠭᠠᠷᠴᠤ᠂ ᠶᠡᠩᠳᠦᠩ ᠵᠤᠤᠬᠠ ᠬᠦᠩᠭᠢᠨᠡᠨ ᠪᠠᠢᠬᠤ ᠦᠶᠡ ᠳ᠋ᠦ᠍ ᠨᠠᠮᠰᠠᠷᠠᠢ ᠲᠣᠭᠣᠭᠠ ᠪᠠᠨ ᠲᠠᠯᠪᠢᠬᠤ ᠶ᠋ᠢ ᠮᠠᠷᠲᠠᠨ ᠰᠠᠭᠤᠭᠰᠠᠭᠠᠷ᠃
— ᠡᠷᠲᠡ ᠡᠳᠦᠷ ᠴᠢ ᠮᠢᠨᠦ ᠣᠵᠢᠭ ᠡᠪᠡᠳᠴᠢᠨ ᠣᠯᠤᠭᠠᠳ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠷᠡᠢ ᠭᠡᠰᠡᠨ ᠢ᠋ ᠬᠡᠯᠡᠭᠰᠡᠨ ᠤᠤ?
— ᠬᠡᠯᠡᠭᠰᠡᠨ᠃
— ᠲᠡᠭᠡᠪᠡᠯ ᠤᠭ ᠡᠪᠡᠳᠴᠢᠨ ᠣᠳᠣ ᠤᠯᠠᠮ ᠬᠦᠨᠳᠦᠷᠡᠭᠡᠳ ᠪᠠᠢᠨᠠ᠃ ᠨᠥᠬᠥᠳ ᠦ᠋ᠨ ᠦᠢᠯᠡ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠢ ᠭᠡᠵᠦ ᠬᠡᠯᠡᠭᠡᠷᠡᠢ ᠭᠡᠪᠡ᠃
ᠨᠠᠮᠰᠠᠷᠠᠢ ᠭᠤᠨᠢᠭ ᠲᠠᠢ ᠪᠠᠷ《ᠵᠠ》 ᠭᠡᠳ ᠪᠣᠰᠤᠨ ᠡᠭᠦᠳᠡ ᠤᠷᠤᠭᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠂
— ᠲᠠᠨ ᠤ᠋ ᠡᠨᠡ ᠦᠭᠡ ᠶ᠋ᠢ ᠴᠢᠨᠢ ᠪᠢ ᠰᠢᠭᠤᠳ ᠬᠡᠯᠡᠬᠦ ᠬᠡᠷᠡᠭ ᠤᠤ?
— ᠲᠡᠭᠡ! ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠤᠴᠠᠭᠠᠷᠯᠠᠨ ᠵᠠᠩᠳᠤᠷᠬᠤ ᠠᠶᠠᠲᠠᠢ ᠬᠠᠷᠢᠭᠤᠯᠪᠠ᠃
ᠨᠠᠮᠰᠠᠷᠠᠢ ᠳᠠᠷᠤᠢ ᠡᠷᠭᠢᠨ ᠭᠡᠷ ᠡᠴᠡ ᠭᠠᠷᠬᠤ ᠳ᠋ᠠᠭᠠᠨ ᠠᠭᠤᠷᠯᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠠᠭᠠᠯᠭᠠ ᠪᠠᠨ ᠫᠠᠰ ᠪᠠᠭᠤᠯᠭᠠᠨ ᠰᠠᠪᠠᠪᠠ᠃ ᠠᠷᠤ ᠳ᠋ᠤᠨᠢ ᠭᠡᠷ ᠠᠨᠢᠷ ᠴᠢᠮᠡᠭᠡ ᠪᠣᠯᠤᠨ ᠦᠯᠡᠲᠡᠯᠡ᠃ ᠵᠤᠤᠬᠠᠨ ᠳ᠋ᠤ᠌ ᠲᠤᠩ ᠰᠠᠶᠢᠬᠠᠨ ᠣᠴᠢ ᠥᠰᠥᠷᠬᠡᠨ ᠳᠦᠷᠡᠯᠵᠡᠵᠦ ᠪᠠᠢᠭᠰᠠᠨ ᠭᠠᠯ ᠬᠦᠷᠲᠡᠯᠡ ᠤᠨᠲᠠᠷᠠᠬᠤ ᠲᠠᠢᠰᠢ ᠬᠠᠨᠳᠤᠭᠰᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠭᠠᠭᠴᠠᠭᠠᠷ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ᠄ 《ᠡᠨᠡ ᠮᠠᠨᠢ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠦᠢᠯᠡ ᠬᠡᠷᠡᠭ ᠢ᠋ ᠨᠠᠮᠠᠶ᠋ᠢ ᠡᠷᠬᠢᠮᠯᠡᠬᠦ ᠡᠴᠡ ᠢᠯᠡᠭᠦᠦ ᠲᠡᠢ ᠦᠵᠡᠬᠦ ᠪᠣᠯᠤᠭᠰᠠᠨ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ?》 ᠭᠡᠵᠦ ᠪᠣᠳᠣᠪᠠ᠃
ᠴᠠᠭᠠᠰᠢ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠰᠦᠬᠡᠪᠠᠭᠠᠲᠤᠷ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠡ ᠦᠭᠡᠢ ᠬᠡᠦᠬᠡᠳ ᠢ᠋ᠶ᠋ᠡᠷ ᠶᠠᠭᠤ ᠬᠢᠬᠦ ᠪᠢᠯᠡ ᠭᠡᠮᠡᠷ ᠪᠠᠢᠪᠠᠴᠤ᠂ ᠡᠨᠡ ᠲᠡᠷᠡ ᠲᠡᠢ ᠬᠡᠯᠡ ᠠᠪᠤᠯᠴᠠᠵᠤ᠂ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠲᠠᠩᠨᠠᠭᠤᠯᠳᠠᠬᠤ ᠳ᠋ᠤ᠌ ᠬᠡᠦᠬᠡᠳ ᠣᠨᠴᠠ ᠬᠡᠷᠡᠭᠲᠡᠢ ᠪᠠᠢᠵᠤ ᠪᠣᠯᠤᠮᠠᠷ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠶᠡᠷᠦ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠭᠦᠯ ᠦ᠋ᠨ ᠦᠶᠡ ᠶ᠋ᠢᠨ ᠪᠠᠢᠳᠠᠯ ᠢ᠋ ᠬᠢᠨᠠᠨ ᠦᠵᠡᠬᠦ ᠳ᠋ᠦ᠍ ᠡᠪᠡᠳᠴᠢᠲᠡᠢ ᠬᠥᠮᠦᠨ ᠢ᠋ ᠡᠷᠭᠢᠬᠦ ᠨᠡᠷᠡᠢᠳᠦᠯ ᠢ᠋ᠶ᠋ᠡᠷ ᠡᠳᠦᠷ ᠪᠦᠷᠢ ᠶᠠᠪᠤᠭᠰᠠᠨ ᠢ᠋ ᠨᠢ ᠰᠦᠬᠡᠪᠠᠭᠠᠲᠤᠷ ᠠ᠋ᠴᠠ ᠬᠣᠶᠠᠷ ᠳᠠᠬᠢᠨ ᠬᠡᠯᠡ ᠠᠪᠴᠢᠷᠠᠭᠰᠠᠨ ᠲᠠᠢ ᠨᠢ ᠬᠠᠷᠰᠢᠭᠤᠯᠤᠨ ᠦᠵᠡᠬᠦ ᠳ᠋ᠦ᠍ ᠡᠪᠡᠳᠴᠢᠲᠡᠨ ᠤᠷᠤᠭᠤ ᠪᠢᠰᠢ᠂ ᠰᠦᠬᠡᠪᠠᠭᠠᠲᠤᠷ ᠤᠷᠤᠭᠤ ᠭᠦᠶᠦᠳᠡᠭ ᠪᠠᠢᠵᠠᠢ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠡᠢᠮᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠱᠠᠪᠢ ᠪᠠᠨ ᠣᠢᠷᠠ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠣᠷᠣᠨ ᠨᠤᠲᠤᠭ ᠤᠷᠤᠭᠤ ᠨᠢ ᠶᠠᠪᠤᠭᠤᠯᠤᠶᠠ ᠭᠡᠵᠦ ᠪᠣᠳᠣᠯᠠ᠃ ᠭᠡᠲᠡᠯᠡ ᠥᠪᠡᠷ ᠦ᠋ᠨ ᠬᠢᠨᠢ ᠰᠡᠳᠬᠢᠯ ᠢ᠋ ᠨᠢ ᠪᠤᠯᠢᠶᠠᠭᠰᠠᠨ ᠡᠮᠡᠭᠲᠡᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠠᠢ᠃ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠬᠤ᠂ ᠶᠠᠳᠠᠵᠤ ᠨᠢᠭᠡ ᠪᠠᠷᠠ ᠶ᠋ᠢ ᠨᠢ ᠬᠠᠷᠠᠬᠤ ᠰᠠᠨ ᠭᠡᠬᠦ ᠳ᠋ᠡᠭᠡᠨ ᠭᠡᠷ ᠡᠴᠡ ᠭᠠᠷᠪᠠ᠃ ᠲᠡᠭᠦᠨ ᠦ᠌ ᠭᠤᠷᠪᠠᠨ ᠬᠣᠨᠣᠭ ᠳᠣᠳᠣᠮ ᠤ᠋ᠨ ᠢ᠋ᠶ᠋ᠠᠨ ᠣᠷᠣᠢ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠠᠯᠬᠠᠳᠠᠭ ᠢ᠋ ᠮᠡᠳᠡᠭᠰᠡᠨ ᠲᠡᠳᠦᠢ ᠦᠭᠡᠢ᠂ ᠵᠡᠭᠦᠨ ᠲᠡᠢ ᠡᠴᠡ ᠢᠷᠡᠳᠡᠭ ᠢ᠋ ᠨᠢ ᠴᠦ᠍ ᠲᠣᠳᠣᠷᠬᠠᠢ ᠮᠡᠳᠡᠭᠰᠡᠨ ᠪᠠᠢᠵᠠᠢ᠃
ᠡᠨᠡ ᠤᠳᠠᠭᠠ ᠪᠠᠯᠳᠠᠨᠴᠡᠷᠢᠩ ᠥᠨᠥ ᠡᠮᠡᠭᠲᠡᠢ ᠶ᠋ᠢ ᠵᠡᠭᠦᠨ ᠰᠢᠯᠪᠢ ᠶ᠋ᠢᠨ ᠭᠦᠦᠷ ᠢ᠋ᠶ᠋ᠡᠷ ᠮᠣᠷᠢᠨ ᠲᠡᠷᠭᠡ ᠲᠡᠢ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠨᠢ ᠬᠠᠷᠠᠭᠠᠳ ᠨᠡᠯᠢᠶᠡᠳ ᠬᠣᠯᠠ ᠠ᠋ᠴᠠ ᠢᠷᠡᠳᠡᠭ ᠢ᠋ ᠨᠢ ᠮᠡᠳᠡᠪᠡ᠃ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠳ᠋ᠦ᠍ᠨᠢ ᠲᠠᠨᠢᠬᠤ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠲᠣᠯᠣᠭᠠᠢ ᠳᠣᠬᠢᠨ ᠮᠡᠨᠳᠦᠯᠡᠭᠰᠡᠨ ᠪᠣᠯᠪᠠᠴᠤ ᠶᠠᠭᠠᠬᠢᠵᠤ ᠴᠦ᠍ ᠴᠢᠳᠠᠭᠰᠠᠨ ᠦᠭᠡᠢ ᠪᠢᠯᠡ᠃ ᠦᠳᠡᠰᠢ ᠬᠠᠷᠠᠩᠭᠤᠢ ᠪᠣᠯᠬᠤ ᠳ᠋ᠤ᠌ ᠵᠠᠮᠢᠶᠠᠨ ᠤ᠋ ᠬᠠᠰᠢᠶᠠᠨ ᠤ᠋ ᠬᠠᠪᠢ ᠳ᠋ᠤ᠌ ᠣᠴᠢᠨ ᠡᠷᠭᠢᠯᠳᠦᠵᠦ᠂ ᠡᠮᠡᠭᠲᠡᠢ ᠶ᠋ᠢᠨ ᠱᠤᠳᠤᠷᠭᠤ ᠪᠠᠨ ᠴᠣᠬᠢᠨ᠂ ᠰᠢᠯᠦᠭᠯᠡᠨ ᠳᠠᠭᠤᠯᠠᠵᠤ ᠪᠠᠢᠬᠤ ᠶ᠋ᠢ ᠮᠥᠨ ᠯᠡ ᠣᠯᠵᠤ ᠰᠣᠨᠣᠰᠤᠯᠠ᠃ ᠡᠴᠦᠰ ᠲᠦ᠋ᠨᠢ ᠡᠮᠡᠭᠲᠡᠢ ᠶ᠋ᠢᠨ ᠭᠡᠷ ᠡᠴᠡ ᠭᠠᠷᠬᠤ ᠴᠢᠮᠡᠭᠡ ᠪᠡᠷ ᠬᠠᠰᠢᠶᠠᠨ ᠤ᠋ ᠪᠤᠯᠤᠩ ᠤ᠋ᠨ ᠰᠡᠭᠦᠳᠡᠷ ᠲᠦ᠍ ᠬᠣᠷᠭᠣᠳᠠᠨ ᠪᠠᠷᠠ ᠰᠡᠭᠦᠳᠡᠷ ᠢ᠋ ᠨᠢ ᠵᠥᠪᠬᠡᠨ ᠬᠣᠯᠠ ᠠ᠋ᠴᠠ ᠬᠠᠷᠠᠨ ᠬᠣᠴᠣᠷᠴᠠᠢ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠳᠠᠷᠠᠭᠠᠴᠢ ᠶ᠋ᠢᠨ ᠭᠤᠷᠪᠠᠳᠠᠬᠢ ᠬᠣᠨᠣᠭ ᠳᠡᠭᠡᠷᠡ ᠭᠡᠷ ᠡᠴᠡ ᠨᠡᠯᠢᠶᠡᠳ ᠡᠷᠲᠡ ᠭᠠᠷᠤᠨ ᠰᠡᠯᠪᠢ ᠶ᠋ᠢᠨ ᠭᠦᠦᠷ ᠢ᠋ ᠥᠩᠭᠡᠷᠡᠨ ᠺᠣᠨᠰᠦ᠋ᠯ ᠦ᠋ᠨ ᠳᠡᠨᠵᠢ ᠳᠡᠭᠡᠷᠡ ᠭᠠᠷᠤᠨ ᠡᠷᠭᠢᠯᠳᠦᠭᠰᠡᠨ ᠪᠥᠭᠡᠳ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢ ᠮᠠᠢᠮᠠᠢ ᠬᠣᠲᠠ ᠠ᠋ᠴᠠ ᠢᠷᠡᠳᠡᠭ ᠢ᠋ ᠨᠢ ᠣᠯᠵᠤ ᠬᠠᠷᠠᠪᠠ᠃ ᠣᠢᠷᠠᠲᠤᠨ ᠢᠷᠡᠬᠦ ᠳ᠋ᠦ᠍ᠨᠢ᠂ ᠡᠩ ᠦ᠋ᠨ ᠶᠠᠪᠤᠭᠠ ᠬᠥᠮᠦᠨ ᠪᠣᠯᠬᠤ ᠭᠡᠵᠦ ᠪᠠᠷᠠᠭᠤᠨ ᠲᠡᠢᠰᠢ ᠴᠢᠭᠯᠡᠨ ᠠᠭᠠᠵᠢᠭᠤᠯᠠᠨ ᠠᠯᠬᠤᠪᠠ᠃ ᠮᠣᠷᠢᠨ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠶᠠᠭᠤ ᠶᠠᠭᠤ ᠦᠭᠡᠢ ᠳᠡᠷᠭᠡᠳᠡ ᠣᠢᠷᠠᠲᠤᠨ ᠢᠷᠡᠬᠦ ᠳ᠋ᠦ᠍ ᠬᠠᠵᠠᠭᠤ ᠲᠡᠢᠰᠢ ᠡᠷᠭᠢᠨ᠄ ᠲᠠ ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠵᠢᠯᠣᠭᠣᠴᠢ ᠳ᠋ᠤᠨᠢ ᠮᠡᠨᠳᠦᠯᠡᠭᠡᠳ᠄ ᠲᠠ ᠨᠠᠮᠠᠶ᠋ᠢ ᠵᠢᠭᠠᠬᠠᠨ ᠭᠠᠵᠠᠷ ᠳᠥᠬᠥᠭᠦᠯᠵᠦ ᠥᠭᠭᠦᠨᠡ ᠤᠤ ᠭᠡᠵᠦ ᠭᠤᠶᠤᠯᠠ᠃ ᠵᠢᠯᠣᠭᠣᠴᠢ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠬᠣᠢᠰᠢ ᠲᠠᠲᠠᠪᠠ᠃《ᠢᠩᠭᠢᠨᠡ ᠴᠦ᠍ ᠪᠢᠵᠡ》 ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠳᠣᠲᠣᠷᠠ ᠪᠠᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠠᠵᠢ᠃ ᠪᠠᠶᠠᠷᠯᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠲᠡᠷᠭᠡᠨ ᠦ᠌ ᠬᠢᠨᠢ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠨ ᠡᠮᠡᠭᠲᠡᠢ ᠶ᠋ᠢ ᠬᠠᠷᠠᠭᠠᠳ᠄
— ᠦᠭᠡᠢ ᠲᠠ ᠶᠠᠪᠤᠭᠠ ᠶᠤᠮ ᠰᠠᠨ ᠤᠤ? ᠪᠢ ᠡᠢᠰᠢ ᠪᠡᠨ ᠵᠢᠭᠠᠬᠠᠨ ᠭᠠᠵᠠᠷ ᠳᠥᠭᠥᠬᠦ ᠭᠡᠰᠡᠨ ᠶᠦᠮ ᠰᠠᠨ ᠭᠡᠵᠦ ᠲᠡᠭᠡᠨᠡᠭᠡᠯᠵᠡᠬᠦ ᠪᠠᠢᠳᠠᠯ ᠦᠵᠡᠭᠦᠯᠪᠡ᠃ ᠢᠩᠭᠢᠬᠦ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠲᠤᠩ ᠰᠠᠢᠬᠠᠨ ᠪᠣᠳᠣᠭᠰᠠᠨ ᠪᠥᠭᠡᠳ ᠡᠮᠡᠭᠲᠡᠢ ᠡᠴᠡ ᠨᠠᠷᠠ ᠮᠠᠨᠳᠤᠬᠤ ᠮᠡᠲᠦ ᠰᠠᠢᠬᠠᠨ ᠢ᠋ᠶ᠋ᠠᠷ ᠢᠨᠢᠶᠡᠮᠰᠦᠭᠯᠡᠨ᠄
— ᠵᠦᠭᠡᠷ ᠲᠠ ᠰᠠᠭᠤ! ᠭᠡᠳ ᠬᠠᠵᠠᠭᠤ ᠳ᠋ᠠᠭᠠᠨ ᠲᠠᠯᠪᠢᠭᠰᠠᠨ ᠱᠤᠳᠤᠷᠭᠤ ᠪᠠᠨ ᠠᠪᠤᠨ ᠡᠪᠦᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠪᠠ᠃ ᠢᠩᠭᠢᠬᠦ ᠶ᠋ᠢ ᠨᠢ ᠴᠦ᠍ ᠪᠠᠯᠳᠠᠨᠴᠡᠷᠢᠩ ᠳᠣᠲᠣᠷᠠ ᠪᠠᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠬᠡᠷᠡᠭ᠃
— ᠬᠡᠷᠪᠡ ᠪᠣᠯᠪᠠᠯ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠭᠠ ᠴᠦ᠍ ᠬᠦᠷᠭᠡᠭᠦᠯᠵᠦ ᠪᠣᠯᠬᠤ ᠰᠢᠪ ᠳᠡ ᠭᠡᠬᠦ ᠳ᠋ᠦ᠍ᠨᠢ ᠪᠠᠯᠳᠠᠨᠴᠡᠷᠢᠩ ᠢᠩᠭᠢᠵᠦ ᠬᠡᠯᠡᠨᠡ ᠪᠠᠢᠬᠤ ᠭᠡᠵᠦ ᠣᠭᠲᠣ ᠪᠣᠳᠣᠭᠠ ᠦᠭᠡᠢ ᠳ᠋ᠡᠭᠡᠨ ᠰᠠᠮᠭᠠᠷᠳᠠᠨ᠄
— ᠵᠦᠭᠡᠷ ᠠ᠋᠂ ᠪᠢ ᠢᠩᠭᠢᠭᠡᠳ ᠪᠠᠭᠤᠨᠠ ᠭᠡᠵᠦ ᠬᠡᠯᠡᠯᠡ᠃ ᠶᠡᠷᠦ ᠡᠮᠡᠭᠲᠡᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠨᠢᠭᠡ ᠯᠡ ᠪᠢᠰᠢ᠃ ᠵᠢᠷᠦᠬᠡ ᠴᠣᠬᠢᠯᠠᠨ᠂ ᠨᠢᠭᠤᠷ ᠤᠯᠠᠢᠨᠠ᠃ ᠲᠦᠷ ᠵᠣᠭᠰᠣᠭᠰᠠᠨ ᠲᠡᠷᠭᠡ ᠣᠷᠣᠭᠰᠢ ᠬᠥᠳᠡᠯᠦᠨ ᠪᠥᠮᠪᠦᠭᠡᠨ ᠪᠦᠷᠢᠶᠡᠰᠦᠲᠦ ᠳᠥᠷᠪᠡᠨ ᠳᠤᠭᠤᠢ ᠨᠢ ᠴᠢᠮᠡᠭᠡ ᠦᠭᠡᠢᠬᠡᠨ ᠡᠷᠭᠢᠯᠳᠦᠵᠦ᠂ ᠤᠶᠠᠨ ᠬᠠᠳᠠᠨ ᠨᠤᠮᠤ ᠨᠤᠭᠤᠳ ᠨᠢ ᠢᠯᠢᠨ ᠲᠠᠭᠠᠯᠠᠬᠤ ᠮᠡᠲᠦ ᠨᠠᠮᠢᠯᠵᠠᠨᠠ᠃ ᠤᠭ ᠲᠡᠷᠭᠡᠨ ᠦ᠌ ᠪᠦᠷᠬᠦᠭᠦᠯ ᠰᠠᠭᠤᠳᠠᠯ ᠤ᠋ᠨ ᠠᠷᠤ ᠪᠠ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠠᠵᠠᠭᠤ ᠶ᠋ᠢ ᠲᠠᠪᠠᠲᠠᠢ ᠬᠠᠯᠬᠠᠯᠠᠭᠰᠠᠨ ᠤ᠋ ᠳᠡᠭᠡᠷᠡ᠂ ᠤᠷᠲᠤ ᠲᠠᠯᠠ ᠶ᠋ᠢᠨ ᠣᠩᠭᠣᠷᠬᠠᠢ ᠶ᠋ᠢ ᠵᠤᠵᠠᠭᠠᠨ ᠴᠠᠭᠠᠨ ᠨᠡᠬᠡᠢ ᠳᠡᠪᠡᠯ ᠲᠡᠢ ᠵᠢᠯᠣᠭᠣᠴᠢ ᠪᠦᠬᠦ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠠᠭᠯᠠᠵᠤ᠂ ᠮᠢᠨᠦ ᠠᠷᠤ ᠳ᠋ᠤ᠌ ᠲᠠ ᠨᠠᠷ ᠶᠠᠭᠤ ᠳᠤᠷᠠ ᠲᠠᠢ ᠪᠠᠨ ᠬᠡᠯᠡᠯᠴᠡ! ᠦᠨᠦᠰᠦᠯᠴᠡᠭᠰᠡᠨ ᠴᠦ᠍ ᠪᠣᠯᠤᠨᠠ ᠭᠡᠰᠡᠨ ᠰᠢᠭ ᠴᠢᠭ ᠠᠵᠢᠭ ᠦᠭᠡᠢ ᠶᠠᠪᠤᠨᠠ᠃ ᠭᠡᠯᠡ ᠴᠦ᠍ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠡᠮᠡᠭᠲᠡᠢ ᠲᠡᠢ ᠶᠠᠷᠢᠯᠴᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠤᠭ ᠨᠢ ᠪᠦᠬᠦ ᠶᠠᠭᠤᠮᠠ ᠤᠷᠢᠳᠴᠢᠯᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠷ ᠪᠦᠲᠦᠮᠵᠢᠲᠡᠢ ᠨᠢ ᠠᠷᠭᠠ ᠦᠭᠡᠢ ᠶᠠᠪᠤᠭᠳᠠᠵᠤ ᠪᠠᠢᠭᠰᠠᠨ ᠨᠢ ᠬᠠᠷᠢᠨ ᠡᠮᠡᠭᠲᠡᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠡᠷᠡ ᠲᠠᠯᠠ ᠠ᠋ᠴᠠ ᠠᠢᠬᠤᠪᠲᠤᠷ ᠬᠠᠯᠠᠭᠤᠨ ᠴᠣᠷᠭᠢᠨ᠂ ᠤᠷᠢᠳ ᠤ᠋ᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠲᠡᠮᠡᠦᠯᠵᠦ ᠪᠠᠢᠭᠰᠠᠨ ᠬᠠᠢᠷᠠ ᠵᠠᠮᠬᠠᠷᠠᠨ ᠠᠷᠢᠯᠵᠤ᠂ ᠣᠷᠣᠨ ᠳ᠋ᠤᠨᠢ ᠢᠴᠢᠬᠦ᠂ ᠵᠣᠪᠠᠬᠤ᠂ ᠪᠢᠰᠢᠭᠦᠷᠬᠡᠬᠦ ᠭᠤᠷᠪᠠ ᠴᠡᠭᠡᠵᠢᠨ ᠳ᠋ᠦ᠍ ᠬᠤᠷᠠᠯᠳᠤᠨ ᠬᠣᠭᠣᠯᠠᠢ ᠳ᠋ᠤ᠌ ᠲᠤᠯᠤᠨ ᠪᠥᠭᠡᠮᠨᠡᠷᠡᠨᠡ᠃ ᠡᠮᠡᠭᠲᠡᠢ ᠶ᠋ᠢ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠰᠠᠮ ᠠᠵᠢᠬᠤ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠢᠴᠢᠵᠦ ᠵᠣᠪᠠᠭᠰᠠᠨ ᠶᠠᠭᠤᠮᠠ ᠶᠡᠷᠦ ᠦᠭᠡᠢ᠃ ᠬᠠᠨᠴᠤᠢ ᠳ᠋ᠠᠭᠠᠨ ᠵᠥᠷᠢᠭᠦᠯᠦᠭᠰᠡᠨ ᠭᠠᠷ ᠨᠢ ᠱᠤᠳᠤᠷᠭᠤ ᠴᠣᠬᠢᠬᠤ ᠳᠠᠰᠬᠠᠯ ᠬᠢᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ ᠬᠥᠳᠡᠯᠵᠦ᠂ ᠠᠮᠠᠨ ᠳ᠋ᠠᠭᠠᠨ ᠰᠢᠯᠦᠭ ᠦ᠋ᠨ ᠠᠶᠠ ᠡᠭᠡᠰᠢᠭᠯᠡᠨᠡ᠃ ᠡᠭᠦᠨ ᠳ᠋ᠦ᠍ᠨᠢ ᠪᠠᠯᠳᠠᠨᠴᠡᠷᠢᠩ ᠬᠣᠷᠣ ᠬᠥᠳᠡᠯᠦᠨ ᠵᠣᠷᠢᠭ ᠣᠷᠣᠵᠤ᠄
— ᠡᠨᠡ ᠴᠢᠨᠢ ᠶᠠᠭᠤᠨ ᠰᠠᠢᠬᠠᠨ ᠠᠶᠠ ᠪᠣᠢ? ᠵᠢᠭᠠᠬᠠᠨ ᠴᠢᠩᠭᠠ ᠪᠠᠷ ᠡᠭᠡᠰᠢᠭᠯᠡᠨᠡ ᠤᠤ? ᠪᠢ ᠰᠣᠨᠢᠷᠬᠠᠶᠠ᠃
— ᠦᠭᠡᠢ ᠡᠨᠡ ᠪᠣᠯ ᠬᠢᠲᠠᠳ ᠰᠢᠯᠦᠭ ᠦ᠋ᠨ ᠠᠶᠠ᠃ ᠪᠣᠳᠣᠪᠠᠯ ᠲᠠᠨ ᠳ᠋ᠤ᠌ ᠲᠡᠳᠦᠢ ᠯᠡ ᠰᠣᠨᠢᠷᠬᠠᠭᠳᠠᠬᠤ ᠦᠭᠡᠢ ᠪᠢᠵᠡ᠃ ᠪᠢ ᠵᠦᠭᠡᠷ ᠨᠢᠭᠡ ᠮᠣᠩᠭᠣᠯ ᠰᠢᠯᠦᠭ ᠠᠶᠠᠯᠠᠶᠠ᠃
— ᠵᠦᠭᠡᠷ᠂ ᠪᠢ ᠣᠢᠯᠠᠭᠠᠨᠠ᠃ ᠡᠷᠲᠡ ᠡᠳᠦᠷ ᠪᠠᠭᠰᠢ ᠳ᠋ᠠᠭᠠᠨ ᠰᠢᠭᠦᠯᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠴᠢᠨᠢ ᠣᠢᠯᠠᠭᠠᠵᠤ ᠲᠤᠩ ᠶᠡᠬᠡ ᠰᠣᠨᠢᠷᠬᠠᠭᠰᠠᠨ᠃
— ᠠ᠂ ᠲᠡᠢᠮᠦ ᠤᠤ ᠭᠡᠳ ᠡᠮᠡᠭᠲᠡᠢ ᠬᠡᠦᠬᠡᠳ ᠰᠢᠭ ᠪᠠᠶᠠᠷᠯᠠᠨ᠂ ᠬᠣᠭᠣᠯᠠᠢ ᠵᠠᠰᠠᠨ ᠡᠭᠡᠰᠢᠭᠯᠡᠵᠦ ᠡᠬᠢᠯᠡᠪᠡ᠃ ᠡᠨᠡ ᠨᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠢ᠋ ᠠᠷᠭᠠᠳᠠᠬᠤ ᠮᠡᠲᠦ ᠲᠠᠢᠪᠤᠰᠢᠷᠠᠭᠤᠯᠤᠯᠠ᠃《ᠬᠥᠮᠦᠨ᠂ ᠬᠥᠮᠦᠨ ᠦ᠌ ᠤᠷᠠᠨ ᠠᠪᠢᠶᠠᠰ ᠢ᠋ ᠰᠣᠨᠢᠷᠬᠠᠬᠤ ᠳ᠋ᠠᠭᠠᠨ ᠨᠢᠳᠦ ᠲᠠᠯᠪᠢᠨ ᠰᠢᠷᠳᠡᠬᠦ ᠪᠣᠯ ᠶᠡᠷᠦ ᠶ᠋ᠢᠨ ᠬᠡᠷᠡᠭ ᠰᠢᠦ ᠳᠡ》 ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠳᠬᠠᠨ ᠡᠭᠴᠡᠯᠡᠨ ᠬᠠᠷᠠᠬᠤ ᠳ᠋ᠤ᠌᠂ ᠴᠢᠷᠠᠢ ᠨᠢ ᠲᠤᠩ ᠰᠠᠢᠬᠠᠨ᠃《ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠤᠷᠠᠨ ᠴᠢᠳᠠᠪᠤᠷᠢ ᠶ᠋ᠢ ᠶᠠᠭᠤᠮᠠ ᠮᠡᠳᠡᠳᠡᠭ ᠨᠢᠭᠡᠨ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠡᠮᠦᠨᠡ ᠵᠦᠭᠡᠷ ᠭᠤᠶᠤᠭᠰᠠᠨ ᠤ᠋ ᠬᠢᠨᠢ ᠤᠷᠮᠠ ᠳ᠋ᠤ᠌ ᠰᠣᠨᠢᠷᠬᠠᠭᠤᠯᠵᠤ ᠪᠠᠢᠨᠠ》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ ᠴᠢᠷᠠᠢ ᠬᠡᠪ ᠦ᠋ᠨ ᠢ᠋ᠶ᠋ᠡᠨ ᠰᠠᠢᠬᠠᠨ ᠠ᠋ᠴᠠ ᠬᠡᠳᠦᠨ ᠬᠤᠪᠢ ᠰᠠᠢᠬᠠᠨ ᠪᠣᠯᠤᠭᠠᠳ ᠪᠠᠢᠭᠰᠠᠨ ᠠᠵᠢ᠃ ᠠᠶᠠᠯᠠᠬᠤ ᠳᠠᠭᠤᠯᠠᠬᠤ ᠨᠢ ᠪᠠᠰᠠ ᠰᠠᠢᠬᠠᠨ᠃ ᠬᠥᠭᠵᠢᠮ ᠦᠭᠡᠢ ᠪᠣᠯᠪᠠᠴᠤ ᠲᠡᠷᠭᠡᠨ ᠦ᠌ ᠵᠥᠭᠡᠯᠡᠨ ᠳᠣᠩᠰᠣᠯᠭᠠ᠂ ᠤᠷᠳᠤᠬᠢ ᠮᠣᠷᠢᠨ ᠤ᠋ ᠬᠥᠯ ᠰᠣᠩᠭᠣᠭᠰᠠᠨ ᠭᠢᠰᠬᠢᠯᠲᠡ ᠶ᠋ᠢᠨ ᠴᠢᠮᠡᠭᠡ ᠲᠡᠢ ᠶᠠᠪ ᠴᠠᠪ ᠵᠣᠬᠢᠯᠳᠤᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ᠂ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠤᠷᠢᠳᠤ ᠶ᠋ᠢᠨ ᠬᠢᠨᠢ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠳᠤᠷᠠᠯᠠᠭᠰᠠᠨ ᠰᠡᠳᠬᠢᠯ ᠨᠢ ᠡᠷᠭᠢᠨ ᠢᠷᠡᠵᠦ᠂ ᠢᠴᠢᠨ ᠪᠢᠰᠢᠭᠦᠷᠬᠡᠬᠦ ᠶ᠋ᠢ ᠪᠦᠷᠢᠮᠦᠰᠦᠨ ᠮᠠᠷᠲᠠᠭᠳᠠᠭᠤᠯᠪᠠ᠃ ᠡᠮᠡᠭᠲᠡᠢ ᠭᠡᠨᠡᠳᠲᠡ ᠳᠠᠭᠤᠯᠠᠬᠤ ᠪᠠᠨ ᠵᠣᠭᠰᠣᠨ ᠪᠠᠯᠳᠠᠨᠴᠡᠷᠢᠩ ᠢ᠋ ᠡᠭᠴᠡᠯᠡᠨ ᠬᠠᠷᠠᠵᠤ᠄
— ᠢᠩᠭᠢᠬᠦ ᠳ᠋ᠦ᠍ ᠲᠠᠨ ᠤ᠋ ᠬᠢ ᠬᠠᠮᠢᠭᠠ ᠪᠢᠯᠡ?
— ᠮᠠᠨ ᠤ᠋ ᠬᠢ ᠤᠤ? ᠭᠡᠳ ᠪᠠᠯᠳᠠᠨᠴᠡᠷᠢᠩ ᠣᠷᠣᠭᠰᠢ ᠪᠥᠬᠥᠢᠨ ᠲᠡᠷᠭᠡᠨ ᠡᠴᠡ ᠲᠣᠯᠣᠭᠠᠢ ᠭᠠᠷᠭᠠᠨ ᠬᠠᠷᠠᠪᠠ᠃ ᠬᠠᠰᠢᠶᠠ ᠨᠢ ᠬᠡᠳᠦᠨ ᠭᠤᠳᠤᠮᠵᠢ ᠶ᠋ᠢᠨ ᠡᠮᠦᠨᠡ ᠪᠠᠷᠤᠭ ᠥᠩᠭᠡᠷᠡᠬᠦ ᠭᠡᠵᠦ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠡᠮᠡᠭᠲᠡᠢ ᠲᠡᠢ ᠪᠠᠯᠳᠠᠨᠴᠡᠷᠢᠩ ᠬᠡᠳᠦᠨ ᠠᠯᠬᠤᠮ ᠪᠣᠯᠪᠠᠴᠤ ᠬᠠᠮᠲᠤ ᠶᠠᠪᠤᠬᠤ ᠶ᠋ᠢ ᠬᠦᠰᠡᠬᠦ ᠠᠵᠢ᠃
— ᠮᠠᠨ ᠤ᠋ ᠬᠢ ᠪᠣᠯᠤᠭᠠ ᠦᠭᠡᠢ ᠪᠠᠢᠨᠠ᠃ ᠪᠠᠭᠰᠢ ᠶ᠋ᠢᠨ ᠬᠢ ᠡᠴᠡ ᠴᠢᠨᠢ ᠴᠠᠭᠠᠨᠠ ᠪᠠᠢᠳᠠᠭ ᠶᠤᠮ᠃
— ᠠ ᠲᠡᠢᠮᠦ ᠤᠤ? ᠭᠡᠳ ᠡᠮᠡᠭᠲᠡᠢ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠨᠢᠭᠡ ᠦᠶᠡ ᠳᠠᠭᠤ ᠴᠢᠮᠡᠭᠡ ᠲᠠᠰᠤᠷᠠᠨ ᠡᠯᠡᠢ ᠬᠤᠯᠡᠢ ᠣᠷᠬᠢᠪᠠ᠃ ᠵᠠᠮᠢᠶᠠᠨ ᠤ᠋ ᠬᠢ ᠣᠢᠷᠠᠲᠤᠬᠤ ᠳ᠋ᠤ᠌ ᠡᠮᠡᠭᠲᠡᠢ ᠵᠢᠯᠣᠭᠣᠴᠢ ᠪᠠᠨ ᠲᠦᠪᠰᠢᠨ ᠭᠤᠸᠠᠢ ᠭᠡᠵᠦ ᠳᠠᠭᠤᠳᠠᠨ᠂
— ᠲᠠ ᠪᠠᠭᠰᠢ ᠶ᠋ᠢᠨ ᠭᠤᠳᠤᠮᠵᠢ ᠪᠠᠷ ᠣᠷᠣᠯ ᠦᠭᠡᠢ ᠠᠷᠤ ᠶ᠋ᠢᠨ ᠬᠢ ᠪᠡᠷ ᠨᠢ ᠶᠠᠪᠤᠭᠠᠷᠠᠢ ᠭᠡᠯᠡ᠃ ᠵᠢᠯᠣᠭᠣᠴᠢ ᠡᠷᠭᠢᠵᠦ ᠬᠠᠷᠠᠯ ᠦᠭᠡᠢ ᠪᠡᠷ《ᠵᠠ》 ᠭᠡᠬᠦ ᠨᠢ ᠰᠣᠨᠣᠰᠤᠭᠳᠠᠪᠠ᠃
— ᠦᠭᠡᠢ ᠴᠢᠭ ᠢ᠋ᠶ᠋ᠡᠷ ᠨᠢ ᠶᠠᠪᠤᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠵᠠᠮ ᠭᠠᠵᠢᠭᠤᠳᠠᠬᠤ ᠶᠠᠪᠤᠳᠠᠯ ᠠᠯᠠᠭᠠ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠵᠥᠪᠬᠡᠨ ᠶᠠᠷᠢᠶᠠ ᠥᠳᠥᠭᠡᠬᠦ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠬᠡᠯᠡᠪᠡ᠃ ᠡᠮᠡᠭᠲᠡᠢ᠄
— ᠶᠠᠷᠰᠢᠭ ᠭᠡᠵᠦ ᠰᠣᠴᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠳᠣᠷᠣᠭᠰᠢ ᠬᠠᠷᠠᠯᠠ᠃
— ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠣᠢ? ᠭᠡᠬᠦ ᠳ᠋ᠦ᠍
— ᠪᠢ ᠲᠠᠨ ᠲᠠᠢ ᠪᠠᠭᠰᠢ ᠶ᠋ᠢᠨ ᠭᠤᠳᠤᠮᠵᠢ ᠪᠠᠷ ᠣᠷᠣᠬᠤ ᠠ᠋ᠴᠠ ᠠᠶᠤᠵᠤ ᠪᠠᠢᠨᠠ᠃
— ᠶᠠᠭᠤᠨ ᠲᠡᠷᠡ ᠪᠣᠢ?
— ᠪᠠᠭᠰᠢ ᠲᠠᠨ ᠲᠠᠢ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠪᠠᠯ ᠶᠠᠭᠠᠬᠢᠨᠠ ᠭᠡᠳ ᠡᠮᠡᠭᠲᠡᠢ ᠢᠴᠢᠨ ᠨᠢᠭᠤᠷ ᠢ᠋ᠶ᠋ᠠᠨ ᠳᠠᠷᠤᠪᠠ᠃
ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠵᠠᠮᠢᠶᠠᠨ ᠤ᠋ ᠬᠢ ᠠᠯᠢ ᠬᠡᠳᠦᠢᠨ ᠦ᠌ ᠥᠩᠭᠡᠷᠡᠵᠦ᠂ ᠬᠦᠷᠢᠶᠡᠨ ᠦ᠌ ᠪᠠᠷᠠᠭᠤᠨ ᠵᠠᠬᠠ ᠭᠠᠷᠬᠤ ᠭᠡᠵᠦ ᠶᠠᠪᠤᠪᠠ᠃
— ᠵᠠ ᠮᠠᠨ ᠤ᠋ ᠬᠢ ᠡᠨᠳᠡ᠃ ᠪᠢ ᠪᠠᠭᠤᠶᠠ ᠭᠡᠬᠦ ᠳ᠋ᠦ᠍ ᠡᠮᠡᠭᠲᠡᠢ᠄
— ᠠ ᠲᠡᠢᠮᠦ ᠤᠤ ᠴᠣᠬᠣᠮ ᠠᠯᠢ ᠬᠠᠭᠠᠯᠭᠠ ᠨᠢ ᠪᠣᠢ?
— ᠲᠡᠷᠡ ᠬᠠᠭᠠᠯᠭᠠ ᠭᠡᠵᠦ ᠲᠣᠯᠣᠭᠠᠢ ᠬᠥᠳᠡᠯᠭᠡᠨ ᠵᠢᠭᠠᠭᠰᠠᠨ ᠪᠣᠯᠪᠠ᠃
— ᠲᠡᠭᠡᠪᠡᠯ ᠲᠠ ᠨᠢᠭᠡᠨᠲᠡ ᠡᠨᠳᠡ ᠢᠷᠡᠭᠰᠡᠨ ᠡᠴᠡ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠪᠡᠨ ᠪᠠᠭᠤ ᠯᠠ ᠳᠠ᠃
— ᠦᠭᠡᠢ ᠲᠡᠭᠡᠭᠡᠳ ᠴᠦ᠍ ᠶᠠᠭᠠᠬᠢᠬᠤᠪ᠃
ᠤᠷᠤᠭᠰᠢ ᠬᠠᠷᠠᠭᠰᠠᠨ ᠬᠠᠭᠠᠯᠭᠠ ᠨᠤᠭᠤᠳ ᠤ᠋ᠨ ᠭᠤᠷᠪᠠᠳᠠᠬᠢ ᠶ᠋ᠢ ᠥᠩᠭᠡᠷᠡᠭᠡᠳ ᠳᠥᠷᠪᠡᠳᠡᠬᠢ ᠳᠡᠭᠡᠷᠡ ᠨᠢ ᠪᠠᠯᠳᠠᠨᠴᠡᠷᠢᠩ᠄《ᠮᠠᠨ ᠤ᠋ ᠬᠢ ᠡᠨᠡ》 ᠭᠡᠵᠦ ᠲᠡᠷᠭᠡᠨ ᠡᠴᠡ ᠪᠠᠭᠤᠵᠤ᠄
— ᠨᠣᠮ ᠢ᠋ᠶ᠋ᠠᠨ ᠰᠠᠢᠨ ᠰᠢᠭᠦᠯᠭᠡᠷᠡᠢ! ᠭᠡᠳ ᠭᠠᠳᠠᠭᠠ ᠪᠠᠨ ᠢᠷᠡᠭᠰᠡᠨ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠶᠡᠬᠡ ᠪᠠᠭᠠ ᠬᠣᠶᠠᠷ ᠬᠠᠭᠠᠯᠭᠠ ᠶ᠋ᠢᠨ ᠪᠠᠭᠠ ᠶ᠋ᠢᠨ ᠣᠨᠢᠰᠣᠨ ᠰᠤᠷ ᠢ᠋ ᠲᠡᠳᠡᠨ ᠣᠷᠣᠬᠤ ᠭᠡᠲᠡᠯᠡ ᠥᠭᠡᠳᠡ ᠡᠴᠡ ᠨᠢ ᠤᠶᠠᠭᠠ ᠠ᠋ᠴᠠ ᠪᠠᠨ ᠠᠯᠳᠠᠷᠠᠭᠰᠠᠨ ᠬᠦᠵᠦᠭᠦᠨ ᠳ᠋ᠡᠭᠡᠨ ᠬᠣᠩᠬᠣ ᠲᠠᠢ ᠨᠣᠬᠠᠢ ᠳᠠᠪᠬᠢᠨ ᠢᠷᠡᠯᠡ᠃ ᠬᠠᠭᠠᠯᠭᠠ ᠶ᠋ᠢ ᠥᠪᠡᠷ ᠤᠷᠤᠭᠤ ᠪᠠᠨ ᠲᠡᠳᠡᠨ ᠡᠷᠭᠢᠵᠦ᠄
— ᠵᠠ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠭᠠᠷᠠᠢ! ᠭᠡᠵᠦ ᠨᠡᠮᠡᠨ ᠬᠡᠯᠡᠪᠡ᠃
ᠡᠨᠡ ᠵᠠᠭᠤᠷᠠ ᠲᠡᠷᠭᠡ ᠭᠡᠳᠡᠷᠭᠦ ᠡᠷᠭᠢᠬᠦ ᠭᠡᠵᠦ ᠨᠠᠷᠢᠬᠠᠨ ᠭᠤᠳᠤᠮᠵᠢᠨᠡ ᠬᠥᠰᠢᠯᠳᠦᠨ ᠲᠡᠪᠡᠳᠡᠵᠦ ᠪᠠᠢᠭᠰᠠᠨ ᠤᠴᠢᠷ᠂ ᠡᠮᠡᠭᠲᠡᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠨᠣᠬᠠᠢ ᠠ᠋ᠴᠠ ᠬᠡᠷᠬᠢᠨ ᠠᠶᠤᠨ ᠰᠠᠨᠳᠤᠷᠬᠤ ᠶ᠋ᠢ ᠬᠠᠷᠠᠬᠠᠨ ᠣᠯᠵᠤ ᠬᠠᠷᠠᠭᠠ ᠦᠭᠡᠢ ᠪᠠᠢᠯᠠ᠃ ᠲᠡᠭᠦᠨ ᠢ᠋ᠶ᠋ᠡᠷ ᠦᠯᠦ ᠪᠠᠷᠠᠮ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠯᠡᠭᠰᠡᠨ ᠦᠭᠡ ᠰᠡᠳᠬᠢᠯ ᠳ᠋ᠦ᠍ᠨᠢ ᠨᠢᠭᠡ ᠶ᠋ᠢ ᠣᠷᠣᠭᠤᠯᠤᠭᠰᠠᠨ ᠠᠵᠢ᠃
— ᠵᠠ᠂ ᠵᠠ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ! ᠭᠡᠵᠦ ᠡᠮᠡᠭᠲᠡᠢ ᠢᠴᠢᠬᠦ ᠪᠠᠶᠠᠷᠯᠠᠬᠤ ᠬᠣᠶᠠᠷ ᠳᠠᠪᠬᠤᠴᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠪᠡ᠃ ᠲᠡᠭᠡᠭᠡᠳ ᠤᠭ ᠭᠤᠳᠤᠮᠵᠢ ᠶ᠋ᠢ ᠰᠢᠪᠲᠤᠷᠠᠨ ᠪᠤᠯᠤᠩ ᠲᠣᠭᠣᠷᠢᠬᠤ ᠵᠠᠭᠤᠷᠠ ᠪᠠᠨ ᠲᠡᠷᠭᠡᠨ ᠡᠴᠡ ᠪᠡᠨ ᠲᠣᠯᠣᠭᠠᠢ ᠭᠠᠷᠭᠠᠨ ᠬᠣᠶᠠᠷ ᠳᠠᠬᠢᠨ ᠡᠷᠭᠢᠨ ᠬᠠᠷᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠪᠦᠷᠢ ᠳ᠋ᠡᠭᠡᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠵᠣᠭᠰᠣᠭᠰᠠᠭᠠᠷ ᠪᠠᠢᠭᠠ ᠶ᠋ᠢ ᠬᠠᠷᠠᠨ ᠰᠠᠨᠳᠤᠷᠤᠨ ᠡᠷᠭᠢᠪᠡ᠃
ᠪᠠᠯᠳᠠᠨᠴᠡᠷᠢᠩ ᠡᠮᠡᠭᠲᠡᠢ ᠶ᠋ᠢᠨ ᠪᠠᠷᠠ ᠣᠷᠣ ᠰᠤᠷᠠᠭ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠯᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠦᠭᠡ᠂ ᠬᠥᠳᠡᠯᠦᠭᠰᠡᠨ ᠬᠥᠳᠡᠯᠭᠡᠭᠡᠨ᠂ ᠨᠢᠭᠤᠷ ᠴᠢᠷᠠᠢ ᠨᠢ᠂ ᠨᠠᠮᠪᠠ ᠲᠥᠷᠬᠦ ᠨᠢ ᠨᠢᠳᠦᠨ ᠳ᠋ᠦ᠍ ᠲᠣᠰᠣᠨ ᠪᠣᠳᠣᠭᠳᠠᠨᠠ᠃ ᠢᠯᠠᠩᠭᠤᠶᠠ《ᠪᠢ ᠡᠷᠲᠡ ᠡᠳᠦᠷ ᠪᠠᠭᠰᠢ ᠳ᠋ᠠᠭᠠᠨ ᠰᠢᠭᠦᠯᠭᠡᠵᠦ ᠪᠠᠢᠬᠤ ᠶ᠋ᠢ ᠴᠢᠨᠢ ᠪᠦᠷᠢᠨ ᠣᠢᠯᠠᠭᠠᠨ ᠰᠣᠨᠢᠷᠬᠠᠭᠰᠠᠨ》 ᠭᠡᠬᠦ ᠳ᠋ᠦ᠍ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠬᠡᠦᠬᠡᠳ ᠰᠢᠭ ᠪᠠᠶᠠᠷᠯᠠᠨ᠂ ᠠᠷᠢᠭᠤᠨ ᠴᠠᠭᠠᠨ ᠰᠡᠳᠬᠢᠯ ᠲᠡᠢ ᠪᠡᠨ ᠦᠵᠡᠭᠦᠯᠦᠭᠰᠡᠨ ᠨᠢᠭᠡ ᠶᠠᠪᠤᠳᠠᠯ᠂《ᠪᠢ ᠲᠠᠨ ᠲᠠᠢ ᠪᠠᠭᠰᠢ ᠶ᠋ᠢᠨ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠬᠤ ᠠ᠋ᠴᠠ ᠠᠶᠤᠨᠠ᠂ ᠪᠠᠭᠰᠢ ᠬᠠᠷᠠᠵᠤ ᠣᠷᠬᠢᠪᠠᠯ ᠶᠠᠭᠠᠬᠢᠨᠠ》 ᠭᠡᠳ ᠨᠢᠭᠤᠷ ᠳᠠᠷᠤᠨ ᠴᠡᠪᠡᠷ ᠢᠴᠢᠮᠡᠲᠡᠭᠡᠢ ᠪᠡᠨ ᠦᠵᠡᠭᠦᠯᠦᠭᠰᠡᠨ ᠬᠣᠶᠠᠳᠠᠬᠢ ᠶᠠᠪᠤᠳᠠᠯ᠂ ᠬᠠᠮᠤᠭ ᠤ᠋ᠨ ᠡᠴᠦᠰ ᠲᠦ᠍ ᠭᠤᠳᠤᠮᠵᠢ ᠰᠢᠪᠲᠤᠷᠠᠨ ᠪᠤᠯᠤᠩ ᠲᠣᠭᠣᠷᠢᠬᠤ ᠵᠠᠭᠤᠷᠠ ᠪᠠᠨ ᠬᠣᠶᠠᠷ ᠳᠠᠬᠢᠨ ᠡᠷᠭᠢᠨ ᠬᠠᠷᠠᠭᠰᠠᠨ ᠡᠳᠡᠭᠡᠷ ᠶᠠᠪᠤᠳᠠᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠡᠭᠦᠷᠢᠳᠡ ᠰᠠᠯᠤᠮᠠ ᠦᠭᠡᠢ ᠦᠯᠡᠲᠡᠯᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ