ᠮᠣᠩᠭᠣᠯ ᠬᠣᠨᠢ-ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠣᠪᠴᠢ ᠲᠠᠨᠢᠯᠴᠠᠭᠤᠯᠭᠠ-ᠳᠣᠯᠣᠳ • ᠨᠠᠮᠵᠢᠯMongol khoniМонгол хонь-Таван хушуу малын товч танилчуулга
671ᠮᠣᠩᠭᠣᠯ ᠬᠣᠨᠢ-ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠣᠪᠴᠢ ᠲᠠᠨᠢᠯᠴᠠᠭᠤᠯᠭᠠ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠲᠣᠪᠴᠢ ᠲᠠᠨᠢᠯᠴᠠᠭᠤᠯᠭᠠ
ᠳᠣᠯᠣᠳ • ᠨᠠᠮᠵᠢᠯ
ᠮᠣᠩᠭᠣᠯ ᠬᠣᠨᠢ᠂ ᠬᠣᠨᠢᠨ ᠤ᠋ ᠡᠭᠦᠯᠳᠡᠷ ᠦ᠋ᠨ ᠠᠩᠭᠢᠯᠠᠯ ᠳ᠋ᠤ᠌᠂ ᠪᠣᠭᠣᠨᠢ ᠥᠭᠡᠬᠦᠨ ᠰᠡᠭᠦᠯᠲᠦ᠂ ᠪᠦᠳᠦᠭᠦᠨ ᠨᠣᠣᠰᠣᠲᠤ᠂ ᠡᠷᠲᠡᠨ ᠦ᠌ ᠡᠭᠦᠯᠳᠡᠷ ᠦ᠋ᠨ ᠬᠡᠪᠴᠢᠶᠡᠨ ᠳ᠋ᠦ᠍ ᠬᠠᠷᠢᠶᠠᠯᠠᠭᠳᠠᠨᠠ᠃
ᠮᠣᠩᠭᠣᠯ ᠬᠣᠨᠢ ᠪᠣᠯ᠂ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠪᠣᠯᠤᠨ ᠲᠡᠭᠦᠨ ᠦ᠌ ᠣᠷᠴᠢᠨ ᠳ᠋ᠠᠬᠢ ᠭᠠᠵᠠᠷ ᠣᠷᠣᠨ ᠳ᠋ᠤ᠌᠂ ᠤᠷᠲᠤ ᠤᠳᠠᠭᠠᠨ ᠲᠡᠦᠬᠡᠨ ᠬᠤᠭᠤᠴᠠᠭᠠᠨᠠ ᠮᠣᠩᠭᠣᠯᠴᠤᠳ ᠤ᠋ᠨ ᠴᠥᠬᠥᠷᠡᠯᠲᠡ ᠦᠭᠡᠢ ᠨᠢᠮᠪᠠᠢ ᠰᠢᠯᠢᠨ ᠪᠣᠢᠵᠢᠭᠤᠯᠤᠯᠲᠠ ᠪᠠᠷ ᠳᠠᠮᠵᠢᠨ ᠪᠣᠢ ᠪᠣᠯᠤᠭᠰᠠᠨ᠂ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠪᠠᠢᠭᠠᠯᠢ ᠣᠷᠴᠢᠨ ᠠᠬᠤᠢ ᠳ᠋ᠤ᠌ ᠵᠣᠬᠢᠴᠠᠭᠰᠠᠨ ᠮᠥᠷᠲᠡᠭᠡᠨ ᠬᠥᠮᠦᠰ ᠦ᠋ᠨ ᠠᠬᠤᠢ ᠠᠮᠢᠳᠤᠷᠠᠯ ᠤ᠋ᠨ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭᠠ ᠶ᠋ᠢ ᠬᠠᠩᠭᠠᠵᠤ ᠴᠢᠳᠠᠬᠤᠢᠴᠠ ᠮᠢᠬᠠ᠂ ᠨᠣᠣᠰᠣ᠂ ᠰᠦ᠂ ᠠᠷᠠᠰᠤ ᠵᠡᠷᠭᠡ ᠣᠯᠠᠨ ᠵᠦᠢᠯ ᠦ᠋ᠨ ᠭᠠᠷᠤᠯᠲᠠ ᠶ᠋ᠢ ᠨᠢᠭᠡᠨ ᠴᠣᠭᠴᠠ ᠪᠡᠶᠡ ᠳ᠋ᠡᠭᠡᠨ ᠤᠶᠠᠯᠳᠤᠭᠤᠯᠤᠭᠰᠠᠨ᠂ ᠪᠡᠶᠡ ᠴᠣᠭᠴᠠ ᠴᠢᠭᠢᠷᠠᠭ᠂ ᠤᠳᠤᠮᠰᠢᠯ ᠨᠢ ᠲᠣᠭᠲᠠᠭᠤᠨ᠂ ᠠᠭᠤᠷ ᠠᠮᠢᠰᠬᠤᠯ ᠡᠷᠡᠰ ᠲᠠᠰᠤ ᠬᠤᠪᠢᠷᠠᠯᠲᠠ ᠶᠡᠬᠡᠲᠡᠢ ᠪᠠᠢᠭᠠᠯᠢ ᠶ᠋ᠢᠨ ᠣᠷᠴᠢᠨ ᠠᠬᠤᠢ ᠳ᠋ᠤ᠌ ᠵᠣᠬᠢᠴᠠᠵᠤ ᠴᠢᠳᠠᠳᠠᠭ᠂ ᠲᠡᠰᠪᠦᠷᠢ ᠳᠠᠭᠠᠭᠠᠴᠠ ᠰᠠᠢᠲᠠᠢ ᠳᠡᠯᠡᠬᠡᠢ ᠳ᠋ᠦ᠍ ᠬᠣᠪᠣᠷᠬᠠᠨ ᠬᠣᠨᠢ ᠶᠤᠮ᠂ ᠵᠢᠯ ᠲᠤᠷᠰᠢ ᠪᠡᠯᠴᠢᠭᠡᠷ ᠦ᠋ᠨ ᠮᠠᠯᠵᠢᠯᠭᠠ ᠪᠠᠷ ᠡᠪᠦᠯ ᠬᠠᠪᠤᠷ ᠤ᠋ᠨ ᠵᠤᠳ ᠭᠠᠮᠰᠢᠭ ᠢ᠋ ᠠᠵᠢᠭ ᠦᠭᠡᠢ ᠬᠡᠪ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠲᠤᠭᠤᠯᠤᠨ ᠦᠰᠦᠨ ᠦᠷᠡᠵᠢᠳᠡᠭ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠦ᠋ᠨ ᠤᠷᠭᠤᠴᠠ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠬᠠᠷᠢᠭᠤᠯᠭᠠ ᠪᠠᠷ ᠲᠠᠷᠭᠤ ᠠᠪᠤᠯᠲᠠ ᠨᠢ ᠮᠠᠰᠢ ᠲᠦᠷᠭᠡᠨ᠂ ᠮᠠᠯᠵᠢᠬᠤ ᠳ᠋ᠤ᠌ ᠳᠥᠭᠥᠮ᠂ ᠮᠠᠯᠵᠢᠯᠭᠠ ᠶ᠋ᠢᠨ ᠪᠡᠯᠡ ᠣᠷᠣᠭᠤᠯᠤᠯᠲᠠ ᠪᠠᠭᠠ᠂ ᠬᠠᠷᠢᠴᠠᠩᠭᠤᠢ ᠪᠠᠷ ᠠᠰᠢᠭ ᠣᠯᠵᠠᠪᠤᠷᠢ ᠶᠡᠬᠡᠲᠡᠢ᠂ ᠪᠣᠭᠣᠨᠢ ᠥᠭᠡᠬᠦᠨ ᠰᠡᠭᠦᠯᠲᠦ᠂ ᠪᠦᠳᠦᠭᠦᠨ ᠨᠣᠣᠰᠣᠲᠤ (ᠬᠣᠯᠢᠮᠠᠭ ᠨᠣᠣᠰᠣᠲᠤ)᠂ ᠡᠷᠲᠡᠨ ᠦ᠌ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢ ᠶᠤᠮ᠃
ᠮᠣᠩᠭᠣᠯ ᠬᠣᠨᠢᠨ ᠤ᠋ ᠲᠠᠷᠬᠠᠴᠠ ᠶ᠋ᠢᠨ ᠬᠡᠪᠴᠢᠶᠡ ᠮᠠᠰᠢ ᠥᠷᠭᠡᠨ ᠳᠡᠯᠭᠡᠷ᠂ ᠲᠣᠭᠠ ᠲᠣᠯᠣᠭᠠᠢ ᠲᠤᠩ ᠠᠷᠪᠢᠨ ᠪᠠᠢᠳᠠᠭ᠃ ᠨᠢᠭᠡ ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠶᠡᠷᠡᠭᠡᠳ ᠣᠨ ᠤ᠋ ᠡᠬᠢᠨ ᠦ᠌ ᠦᠶᠡ ᠪᠡᠷ ᠮᠠᠨ ᠤ᠋ ᠤᠯᠤᠰ ᠲᠤ᠌ ᠮᠠᠯᠵᠢᠵᠤ ᠪᠠᠢᠭᠰᠠᠨ 2000 ᠭᠠᠷᠤᠢ ᠲᠦᠮᠡᠨ ᠮᠣᠩᠭᠣᠯ ᠬᠣᠨᠢᠨ ᠠ᠋ᠴᠠ ᠨᠢᠭᠡ ᠮᠢᠩᠭᠠ ᠭᠠᠷᠤᠢ ᠲᠦᠮᠡ ᠶ᠋ᠢ ᠨᠢ ᠥᠪᠥᠷ ᠮᠣᠩᠭᠣᠯ ᠳ᠋ᠤ᠌ ᠮᠠᠯᠵᠢᠵᠤ ᠪᠠᠢᠭᠰᠠᠨ ᠶᠤᠮ᠃ ᠣᠳᠣᠬᠠᠨ ᠳ᠋ᠤ᠌᠂ ᠮᠣᠩᠭᠣᠯ ᠬᠣᠨᠢ ᠶ᠋ᠢ ᠨᠡᠯᠢᠶᠡᠳ ᠲᠥᠪᠯᠡᠷᠡᠩᠭᠦᠢ ᠪᠡᠷ ᠣᠯᠠᠨ ᠲᠣᠭᠠ ᠪᠠᠷ ᠮᠠᠯᠵᠢᠵᠤ ᠪᠠᠢᠭᠠ ᠭᠠᠵᠠᠷ ᠣᠷᠣᠨ ᠪᠣᠯ ᠮᠣᠩᠭᠣᠯ ᠤᠯᠤᠰ ᠪᠣᠯᠤᠨ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠪᠣᠯᠤᠨᠠ᠂ ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠣᠷᠣᠰ ᠤᠯᠤᠰ ᠲᠤ᠌ ᠪᠠᠰᠠ ᠣᠯᠠᠨ ᠲᠣᠭᠠ ᠪᠠᠷ ᠮᠠᠯᠵᠢᠵᠤ ᠪᠠᠢᠨᠠ᠂ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠰᠢᠨᠵᠢᠶᠠᠩ᠂ ᠬᠥᠬᠡᠨᠠᠭᠤᠷ᠂ ᠭᠠᠨᠰᠦ᠂ ᠨᠢᠩᠰᠢᠶᠠ᠂ ᠱᠠᠨᠰᠢ᠂ ᠱᠠᠨ ᠰᠢ᠂ ᠾᠧᠪᠧᠢ᠂ ᠾᠧᠨᠠᠨ᠂ ᠠᠨᠾᠥ᠋ᠢ᠂ ᠱᠠᠨᠳᠦ᠋ᠩ᠂ ᠯᠢᠶᠣᠤᠨᠢᠩ᠂ ᠬᠢᠷᠢᠨ᠂ ᠬᠠᠷᠠᠮᠦ᠋ᠷᠡᠨ ᠵᠡᠷᠭᠡ ᠮᠣᠵᠢ ᠣᠷᠣᠨ ᠳ᠋ᠤ᠌ ᠠᠳᠠᠯᠢ ᠪᠤᠰᠤ ᠬᠡᠮᠵᠢᠶᠡ ᠪᠡᠷ ᠮᠠᠯᠵᠢᠵᠤ ᠪᠠᠢᠨᠠ᠃ ᠰᠣᠯᠣᠩᠭᠣᠰ ᠪᠣᠯᠤᠨ ᠶᠠᠫᠣᠨ ᠤᠯᠤᠰ ᠲᠤ᠌ ᠮᠣᠩᠭᠣᠯ ᠬᠣᠨᠢ ᠪᠠᠢᠭᠰᠠᠨ ᠲᠤᠬᠠᠢ ᠮᠡᠳᠡᠭᠡᠯᠡᠯ ᠪᠠᠰᠠ ᠪᠠᠢᠳᠠᠭ᠃
ᠮᠣᠩᠭᠣᠯ ᠬᠣᠨᠢᠨ ᠤ᠋ ᠪᠡᠶᠡ ᠪᠢᠯᠳᠠᠷ᠂ ᠰᠢᠨᠵᠢ ᠪᠠᠢᠳᠠᠯ ᠄ ᠬᠤᠴᠠ ᠣᠯᠠᠩᠬᠢ ᠨᠢ ᠤᠭᠠᠯᠵᠠᠨ ᠡᠪᠡᠷ ᠲᠡᠢ᠂ ᠡᠮᠡ ᠬᠣᠨᠢᠨ ᠤ᠋ ᠶᠡᠬᠡᠩᠬᠢ ᠨᠢ ᠡᠪᠡᠷ ᠦᠭᠡᠢ᠂ ᠬᠠᠮᠠᠷ ᠨᠢ ᠪᠠᠭᠠ ᠵᠡᠷᠭᠡ ᠮᠣᠩᠬᠣᠷ᠂ ᠲᠣᠯᠣᠭᠠᠢ ᠶ᠋ᠢᠨ ᠶᠡᠬᠡ ᠪᠠᠭᠠ ᠨᠢ ᠲᠡᠩᠴᠡᠭᠦᠨ ᠲᠣᠬᠢᠯᠢᠭ᠂ ᠴᠢᠬᠢ ᠨᠢ ᠳᠤᠮᠳᠠ ᠵᠡᠷᠭᠡ᠂ ᠬᠦᠵᠦᠭᠦᠨ ᠦ᠌ ᠤᠷᠲᠤ ᠨᠢ ᠲᠣᠬᠢᠷᠠᠮᠵᠢᠲᠠᠢ ᠪᠥᠭᠡᠳ ᠮᠢᠬᠠᠯᠢᠭ᠂ ᠥᠷᠭᠡᠨ ᠲᠡᠨᠢᠭᠦᠨ ᠴᠡᠭᠡᠵᠢ ᠲᠡᠢ᠂ ᠨᠢᠷᠤᠭᠤ ᠲᠡᠭᠰᠢ᠂ ᠶᠡᠬᠡ ᠪᠡᠶᠡ ᠤᠷᠲᠤᠯᠢᠭ᠂ ᠳᠥᠷᠪᠡᠨ ᠬᠥᠯ ᠦ᠋ᠨ ᠭᠢᠰᠬᠢᠯᠲᠡ ᠲᠥᠪ ᠪᠥᠭᠡᠳ ᠢᠳᠡᠯᠢᠭ᠂ ᠲᠤᠭᠤᠷᠠᠢ ᠨᠢ ᠪᠡᠬᠢᠯᠢᠭ ᠬᠠᠲᠠᠭᠤ᠂ ᠥᠭᠡᠬᠦᠨ ᠰᠡᠭᠦᠯ ᠨᠢ ᠲᠣᠮᠣ ᠪᠣᠯᠪᠠᠴᠤ ᠪᠣᠷᠪᠢ ᠠ᠋ᠴᠠ ᠪᠠᠨ ᠬᠡᠲᠦᠷᠡᠳᠡᠭ ᠦᠭᠡᠢ᠃ ᠮᠠᠯᠵᠢᠵᠤ ᠪᠠᠢᠭᠠ ᠭᠠᠵᠠᠷ ᠤ᠋ᠨ ᠪᠠᠢᠭᠠᠯᠢ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠨᠥᠬᠥᠴᠡᠯ ᠰᠢᠯᠲᠠᠭᠠᠨ ᠤ᠋ ᠠᠳᠠᠯᠢ ᠪᠤᠰᠤ ᠠ᠋ᠴᠠ ᠪᠣᠯᠵᠤ ᠡᠯᠡ ᠭᠠᠵᠠᠷ ᠳᠠᠬᠢ ᠮᠣᠩᠭᠣᠯ ᠬᠣᠨᠢᠨ ᠤ᠋ ᠪᠡᠶᠡ ᠶ᠋ᠢᠨ ᠶᠡᠬᠡ ᠪᠠᠭᠠ ᠪᠣᠯᠤᠨ ᠮᠢᠬᠠᠨ ᠭᠠᠷᠴᠠ᠂ ᠨᠣᠣᠰᠣᠨ ᠴᠢᠨᠠᠷ ᠵᠡᠷᠭᠡ ᠵᠠᠷᠢᠮ ᠰᠢᠨᠵᠢ ᠣᠨᠴᠠᠯᠢᠭ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠨᠡᠯᠢᠶᠡᠳ ᠵᠥᠷᠢᠶᠡ ᠲᠡᠢ ᠪᠣᠯᠵᠠᠢ᠃ ᠡᠨᠡ ᠲᠤᠬᠠᠢ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠵᠠᠷᠢᠮ ᠣᠷᠣᠨ ᠨᠤᠲᠤᠭ ᠲᠠᠬᠢ ᠮᠣᠩᠭᠣᠯ ᠬᠣᠨᠢ ᠪᠠᠷ ᠵᠢᠱ᠌ᠢᠶᠡᠯᠡᠬᠦ ᠳ᠋ᠦ᠍᠂ ᠦᠵᠦᠮᠦᠴᠢᠨ ᠬᠣᠨᠢ᠂ ᠰᠥᠨᠢᠳ ᠬᠣᠨᠢ᠂ ᠪᠠᠷᠭᠤ ᠬᠣᠨᠢ᠂ ᠣᠷᠢᠶᠠᠩᠬᠠᠨ ᠬᠣᠨᠢ᠂ ᠰᠢᠨᠵᠢᠶᠠᠩ ᠤ᠋ᠨ ᠪᠠᠶᠠᠨᠪᠤᠯᠠᠭ ᠤ᠋ᠨ ᠬᠠᠷᠠ ᠲᠣᠯᠣᠭᠠᠢᠲᠤ ᠬᠣᠨᠢ ᠭᠡᠬᠦ ᠮᠡᠲᠦ ᠣᠯᠠᠨ ᠠᠷᠪᠢᠨ ᠭᠠᠵᠠᠷ ᠣᠷᠣᠨ ᠤ᠋ ᠣᠨᠴᠠᠯᠢᠭᠲᠤ ᠰᠢᠯᠢᠳᠡᠭ ᠡᠭᠦᠯᠳᠡᠷ ᠨᠦ᠍ᠭᠦᠳ ᠪᠣᠢ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠭᠠᠵᠠᠷ ᠤ᠋ᠨ ᠮᠣᠵᠢ ᠣᠷᠣᠨ ᠳ᠋ᠤ᠌ ᠦᠷᠡᠵᠢᠭᠦᠯᠦᠨ ᠥᠰᠬᠡᠵᠦ ᠪᠠᠢᠬᠤ ᠨᠡᠷᠡᠲᠦ ᠰᠢᠯᠢᠳᠡᠭ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢ ᠨᠤᠭᠤᠳ ᠠ᠋ᠴᠠ ᠵᠢᠱ᠌ᠢᠶᠡᠯᠡᠪᠡᠯ ᠄ ᠨᠢᠩᠰᠢᠶᠠ ᠶ᠋ᠢᠨ ᠬᠣᠲᠣᠩ ᠦᠨᠳᠦᠰᠦᠲᠡᠨ ᠦ᠌ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠳ᠋ᠤ᠌ ᠮᠠᠯᠵᠢᠵᠤ ᠪᠠᠢᠬᠤ ᠦᠶᠡᠯᠡᠭᠰᠡᠨ ᠰᠠᠢᠬᠠᠨ ᠠᠲᠤᠷᠢᠶᠠ ᠨᠤᠭᠤᠯᠣᠭᠠᠰᠤᠲᠣ ᠰᠥᠭᠡᠮ ᠤᠷᠲᠤ ᠰᠠᠳᠠᠷᠠᠭᠰᠠᠨ ᠴᠠᠭᠠᠨ ᠦᠰᠦ ᠲᠡᠢ ᠰᠡᠩᠰᠡᠨ ᠬᠤᠷᠠᠭᠠᠨ ᠠᠷᠠᠰᠤ ᠭᠠᠷᠳᠠᠭ ᠳᠠᠩ ᠶᠠᠩ ᠬᠣᠨᠢ᠂ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠭᠠᠵᠠᠷ ᠴᠢᠷᠦᠮ ᠲᠣᠮᠣ ᠤᠷᠲᠤ ᠥᠭᠡᠬᠦᠨ ᠰᠡᠭᠦᠯᠲᠦ ᠲᠦᠩ ᠶᠠᠩ ᠬᠣᠨᠢ᠂ ᠾᠧᠪᠧᠢ ᠶ᠋ᠢᠨ ᠡᠮᠦᠨᠡ ᠬᠡᠰᠡᠭ᠂ ᠾᠧᠨᠠᠨ ᠤ᠋ ᠬᠣᠢᠲᠤ ᠬᠡᠰᠡᠭ ᠵᠢᠴᠢ ᠱᠠᠨᠳᠦ᠋ᠩ ᠦ᠋ᠨ ᠪᠠᠷᠠᠭᠤᠨ ᠬᠡᠰᠡᠭ ᠦ᠋ᠨ ᠭᠠᠵᠠᠷ ᠤ᠋ᠳ ᠢ᠋ᠶ᠋ᠠᠷ ᠥᠰᠬᠡᠨ ᠮᠠᠯᠵᠢᠵᠤ ᠪᠠᠢᠬᠤ ᠪᠠᠭᠠ ᠥᠭᠡᠬᠦᠨ ᠰᠡᠭᠦᠯᠲᠦ ᠬᠠᠨ ᠶᠠᠩ ᠬᠣᠨᠢ ᠪᠣᠯᠤᠨ ᠵᠧᠵᠢᠶᠠᠩ ᠮᠣᠵᠢ ᠶ᠋ᠢᠨ ᠲᠡᠢ ᠬᠡᠦ ᠨᠠᠭᠤᠷ ᠣᠷᠴᠢᠮ ᠢ᠋ᠶ᠋ᠠᠷ ᠲᠡᠵᠢᠭᠡᠨ ᠮᠠᠯᠵᠢᠵᠤ ᠪᠠᠢᠭᠠ᠂ ᠦᠰᠦᠨ ᠦ᠌ ᠦᠵᠦᠭᠦᠷ ᠨᠢ ᠠᠷᠠᠰᠤ ᠪᠠᠨ ᠨᠠᠯᠠᠭᠰᠠᠨ ᠶᠠᠩᠵᠤ ᠶ᠋ᠢᠨ ᠰᠠᠢᠬᠠᠨ ᠬᠡ ᠤᠭᠠᠯᠵᠠᠨ ᠪᠤᠶᠤ ᠤᠰᠤᠨ ᠠᠷ ᠶᠠᠩᠵᠤᠲᠠᠢ ᠦᠰᠦᠨ ᠬᠤᠸᠠᠷ ᠲᠠᠢ ᠴᠢᠨᠳᠠᠭᠠᠨ ᠴᠠᠭᠠᠨ ᠨᠢᠯᠬᠠ ᠬᠤᠷᠠᠭᠠᠨ ᠠᠷᠠᠰᠤ ᠭᠠᠷᠳᠠᠭ ᠬᠡᠦ ᠶᠠᠩ ᠬᠣᠨᠢ ᠵᠡᠷᠭᠡ ᠪᠣᠯ ᠪᠦᠷ ᠮᠣᠩᠭᠣᠯ ᠬᠣᠨᠢ ᠶᠢ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠨᠤᠲᠤᠭ ᠲᠤ᠌ ᠤᠷᠲᠤ ᠬᠤᠭᠤᠴᠠᠭᠠᠨᠠ ᠮᠠᠯᠵᠢᠨ ᠤᠯᠠᠷᠢᠨ ᠬᠤᠪᠢᠰᠴᠤ ᠡᠭᠦᠰᠦᠭᠰᠡᠨ ᠡᠭᠦᠯᠳᠡᠷ ᠨᠦ᠍ᠭᠦᠳ ᠪᠣᠯᠤᠨᠠ᠃ ᠡᠭᠦᠨᠴᠡ ᠭᠠᠳᠠᠨᠠ᠂ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠥᠪᠡᠷᠲᠡᠭᠡᠨ ᠪᠣᠢᠵᠢᠭᠤᠯᠤᠨ ᠭᠠᠷᠭᠠᠭᠰᠠᠨ ᠰᠢᠨᠡ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢ ᠨᠤᠭᠤᠳ ᠄ ᠰᠢᠨᠵᠢᠶᠠᠩ ᠤ᠋ᠨ ᠨᠠᠷᠢᠨ ᠨᠣᠣᠰᠣᠲᠤ ᠬᠣᠨᠢ᠂ ᠵᠡᠭᠦᠨ ᠬᠣᠢᠲᠤ ᠣᠷᠣᠨ ᠤ᠋ ᠨᠠᠷᠢᠨ ᠨᠣᠣᠰᠣᠲᠤ ᠬᠣᠨᠢ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠨᠠᠷᠢᠨ ᠨᠣᠣᠰᠣᠲᠤ ᠬᠣᠨᠢ᠂ ᠠᠤᠬᠠᠨ ᠤ᠋ ᠨᠠᠷᠢᠨ ᠨᠣᠣᠰᠣᠲᠤ ᠬᠣᠨᠢ᠂ ᠣᠷᠳᠣᠰ ᠤ᠋ᠨ ᠨᠠᠷᠢᠨ ᠨᠣᠣᠰᠣᠲᠤ ᠬᠣᠨᠢ᠂ ᠭᠠᠨᠰᠦ ᠶ᠋ᠢᠨ ᠨᠠᠷᠢᠨ ᠨᠣᠣᠰᠣᠲᠤ ᠬᠣᠨᠢ ᠵᠡᠷᠭᠡ ᠨᠠᠷᠢᠨ ᠨᠣᠣᠰᠣᠲᠤ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢ ᠪᠣᠯᠤᠨ ᠭᠠᠨᠰᠦ ᠶ᠋ᠢᠨ ᠨᠠᠷᠢᠪᠲᠤᠷ ᠨᠣᠣᠰᠣᠲᠤ ᠬᠣᠨᠢ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠨᠠᠷᠢᠪᠲᠤᠷ ᠨᠣᠣᠰᠣᠲᠤ ᠵᠡᠷᠭᠡ ᠶᠡᠬᠡ ᠠᠷᠪᠢᠨ ᠨᠠᠷᠢᠪᠲᠤᠷ ᠨᠣᠣᠰᠣᠲᠤ ᠬᠣᠨᠢᠨ ᠡᠭᠦᠯᠳᠡᠷ ᠢ᠋ ᠪᠣᠢᠵᠢᠭᠤᠯᠬᠤ ᠳ᠋ᠤ᠌ ᠮᠣᠩᠭᠣᠯ ᠬᠣᠨᠢ ᠶ᠋ᠢ ᠡᠬᠡ ᠤᠳᠤᠮ ᠢ᠋ᠶ᠋ᠠᠷ ᠬᠡᠷᠡᠭᠯᠡᠭᠰᠡᠨ ᠶᠦᠮ᠃
ᠮᠣᠩᠭᠣᠯ ᠬᠣᠨᠢᠨ ᠤ᠋ ᠵᠢᠰᠦ᠄ ᠮᠣᠩᠭᠣᠯ ᠬᠣᠨᠢᠨ ᠤ᠋ ᠶᠡᠬᠡ ᠪᠡᠶᠡ ᠶ᠋ᠢᠨ ᠵᠢᠰᠦ ᠨᠢ ᠴᠠᠭᠠᠨ ᠪᠣᠯᠪᠠᠴᠤ᠂ ᠣᠯᠠᠩᠬᠢ ᠨᠢ ᠬᠠᠷᠠ ᠲᠦᠷᠦᠭᠦᠦ ᠪᠤᠶᠤ ᠬᠦᠷᠡᠩ ᠲᠦᠷᠦᠭᠦᠦ᠂ ᠬᠠᠷᠠ ᠨᠢᠳᠦᠨ᠂ ᠪᠣᠷᠣ ᠨᠢᠳᠦᠨ ᠵᠡᠷᠭᠡ ᠲᠣᠯᠣᠭᠠᠢ ᠶ᠋ᠢᠨ ᠬᠡᠰᠡᠭ ᠦ᠋ᠨ ᠦᠰᠦᠨ ᠦ᠌ ᠥᠩᠭᠡ ᠨᠢ ᠠᠳᠠᠯᠢ ᠦᠭᠡᠢ ᠥᠭᠡᠷᠡ ᠵᠢᠰᠦᠮ ᠲᠡᠢ ᠪᠥᠭᠡᠳ ᠵᠠᠷᠢᠮ ᠨᠢ ᠪᠠᠰᠠ ᠰᠢᠭᠢᠷᠡ ᠠᠯᠠᠭ ᠪᠠᠢᠳᠠᠭ᠂ ᠶᠡᠬᠡᠩᠬᠢ ᠭᠠᠵᠠᠷ ᠤ᠋ᠨ ᠳᠠᠩ ᠴᠠᠭᠠᠨ ᠵᠢᠰᠦᠮ ᠦ᠋ᠨ ᠬᠣᠨᠢᠳ ᠨᠢ ᠶᠡᠬᠡ ᠲᠥᠯᠥᠪ 20% ᠣᠷᠴᠢᠮ ᠠ᠋ᠴᠠ ᠬᠡᠲᠦᠷᠡᠬᠦ ᠦᠭᠡᠢ ᠰᠢᠭ ᠪᠠᠢᠳᠠᠭ᠂ ᠪᠠᠰᠠ ᠴᠥᠭᠡᠪᠦᠷᠢ ᠲᠣᠭᠠᠨ ᠤ᠋ ᠬᠣᠨᠢᠳ ᠨᠢ ᠥᠭᠡᠷᠡ ᠪᠤᠰᠤᠳ ᠵᠢᠰᠦᠮ ᠲᠡᠢ ᠪᠣᠢ᠃
ᠮᠣᠩᠭᠣᠯ ᠬᠣᠨᠢᠨ ᠤ᠋ ᠪᠡᠶᠡ ᠶ᠋ᠢᠨ ᠬᠡᠮᠵᠢᠯᠲᠡ ᠶ᠋ᠢᠨ ᠳᠤᠮᠳᠠᠴᠢᠯᠠᠭᠰᠠᠨ ᠬᠡᠮᠵᠢᠭᠳᠡᠯ
ᠪᠦᠳᠦᠭᠦᠨ ᠬᠤᠴᠠ᠄ ᠴᠡᠭᠡᠵᠢᠨ ᠬᠡᠰᠡᠭ ᠦ᠋ᠨ ᠥᠨᠳᠥᠷ 70.1 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠶᠡ ᠶ᠋ᠢᠨ ᠲᠠᠰᠢᠭᠤ ᠤᠷᠲᠤ 74.8 ᠰᠡᠨᠲ᠋ᠢᠮᠧᠲ᠋ᠷ᠂ ᠴᠡᠭᠡᠵᠢᠨ ᠪᠦᠰᠡᠯᠡᠭᠦᠷ 101.2 ᠰᠡᠨᠲ᠋ᠢᠮᠧᠲ᠋ᠷ᠂ ᠠᠮᠢᠳᠤ ᠶ᠋ᠢᠨ ᠵᠢᠩ 75.4 ᠺᠢᠯᠣᠭ᠌ᠷᠠᠮ ︔
ᠪᠦᠳᠦᠭᠦᠨ ᠡᠮᠡ ᠬᠣᠨᠢ ᠄ ᠴᠡᠭᠡᠵᠢᠨ ᠬᠡᠰᠡᠭ ᠦ᠋ᠨ ᠥᠨᠳᠥᠷ 65.6 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠶᠡ ᠶ᠋ᠢᠨ ᠲᠠᠰᠢᠭᠤ ᠤᠷᠲᠤ 69.9᠂ ᠴᠡᠭᠡᠵᠢᠨ ᠪᠦᠰᠡᠯᠡᠭᠦᠷ 89.4 ᠰᠡᠨᠲ᠋ᠢᠮᠧᠲ᠋ᠷ᠂ ᠠᠮᠢᠳᠤ ᠶ᠋ᠢᠨ ᠵᠢᠩ 63.1 ᠺᠢᠯᠣᠭ᠌ᠷᠠᠮ ︔
ᠲᠥᠯᠥᠭᠡᠨ ᠬᠤᠴᠠ (ᠰᠢᠳᠦᠯᠡᠩ ᠬᠤᠴᠠ) ᠄ ᠴᠡᠭᠡᠵᠢᠨ ᠬᠡᠰᠡᠭ ᠦ᠋ᠨ ᠥᠨᠳᠥᠷ 65.2 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠶᠡ ᠶ᠋ᠢᠨ ᠲᠠᠰᠢᠭᠤ ᠤᠷᠲᠤ 68.3 ᠰᠡᠨᠲ᠋ᠢᠮᠧᠲ᠋ᠷ᠂ ᠴᠡᠭᠡᠵᠢᠨ ᠪᠦᠰᠡᠯᠡᠭᠦᠷ 91.1 ᠰᠡᠨᠲ᠋ᠢᠮᠧᠲ᠋ᠷ᠂ ᠠᠮᠢᠳᠤ ᠶ᠋ᠢᠨ ᠵᠢᠩ 54.7 ᠺᠢᠯᠣᠭ᠌ᠷᠠᠮ ︔
ᠥᠬᠢᠨ ᠲᠥᠯᠥᠭᠡ (ᠰᠢᠳᠦᠯᠡᠩ ᠡᠮᠡ ᠬᠣᠨᠢ) ᠄ ᠴᠡᠭᠡᠵᠢᠨ ᠬᠡᠰᠡᠭ ᠦ᠋ᠨ ᠥᠨᠳᠥᠷ 61.5 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠶᠡ ᠶ᠋ᠢᠨ ᠲᠠᠰᠢᠭᠤ ᠤᠷᠲᠤ 64.8 ᠰᠡᠨᠲ᠋ᠢᠮᠧᠲ᠋ᠷ᠂ ᠴᠡᠭᠡᠵᠢᠨ ᠪᠦᠰᠡᠯᠡᠭᠦᠷ 85.2 ᠰᠡᠨᠲ᠋ᠢᠮᠧᠲ᠋ᠷ᠂ ᠠᠮᠢᠳᠤ ᠶ᠋ᠢᠨ ᠵᠢᠩ 46.7 ᠺᠢᠯᠣᠭ᠌ᠷᠠᠮ ︔
ᠰᠠᠶᠢ ᠭᠠᠷᠤᠭᠰᠠᠨ ᠨᠢᠯᠬᠠ ᠡᠷᠡ ᠬᠤᠷᠠᠭᠠᠨ ᠤ᠋ ᠠᠮᠢᠳᠤ ᠶ᠋ᠢᠨ ᠵᠢᠩ᠄ 3.66 ᠺᠢᠯᠣᠭ᠌ᠷᠠᠮ ︔ ᠨᠢᠯᠬᠠ ᠥᠬᠢᠨ ᠬᠤᠷᠠᠭᠠᠨ ᠤ᠋ ᠠᠮᠢᠳᠤ ᠶ᠋ᠢᠨ ᠵᠢᠩ᠄ 3.31 ᠺᠢᠯᠣᠭ᠌ᠷᠠᠮ᠃
ᠮᠣᠩᠭᠣᠯ ᠬᠣᠨᠢᠨ ᠤ᠋ ᠨᠣᠣᠰᠣᠨ ᠭᠠᠷᠴᠠ ᠶ᠋ᠢᠨ ᠬᠡᠮᠵᠢᠶᠡ ᠪᠣᠯᠤᠨ ᠨᠣᠣᠰᠣᠨ ᠤ᠋ ᠪᠦᠷᠢᠯᠳᠦᠬᠦᠨ ᠢ᠋ ᠢᠯᠡᠳᠬᠡᠭᠰᠡᠨ ᠬᠡᠮᠵᠢᠭᠳᠡᠯ
ᠨᠣᠣᠰᠣᠨ ᠭᠠᠷᠴᠠ ᠶ᠋ᠢᠨ ᠬᠡᠮᠵᠢᠶᠡ ᠄ ᠪᠦᠳᠦᠭᠦᠨ ᠬᠤᠴᠠ᠄ 1.5 — 2.2 ᠺᠢᠯᠣᠭ᠌ᠷᠠᠮ ︔ ᠪᠦᠳᠦᠭᠦᠨ ᠡᠮᠡ ᠬᠣᠨᠢ ᠄ 1 — 1.8 ᠺᠢᠯᠣᠭ᠌ᠷᠠᠮ᠃
ᠨᠣᠣᠰᠣᠨ ᠤ᠋ ᠪᠦᠷᠢᠯᠳᠦᠬᠦᠨ (ᠳᠤᠮᠳᠠᠴᠢ ᠬᠡᠮᠵᠢᠭᠳᠡᠯ)᠄ ᠪᠡᠶᠡ ᠨᠣᠣᠰᠣᠨ ᠤ᠋ ᠪᠦᠷᠢᠯᠳᠦᠬᠦᠨ ᠢ᠋ ᠲᠥᠷᠥᠯ ᠵᠦᠢᠯ ᠠᠩᠭᠢᠯᠠᠪᠠᠯ᠂ ᠪᠦᠳᠦᠭᠦᠨ ᠨᠣᠣᠰᠣ (ᠭᠣᠣᠯ ᠲᠠᠢ ᠨᠣᠣᠰᠣ᠂ ᠰᠤᠷ ᠭᠡᠵᠦ ᠪᠠᠰᠠ ᠬᠡᠯᠡᠳᠡᠭ) 3.79%᠂ ᠰᠣᠢᠷ ᠦᠰᠦ (ᠢᠮᠠᠭᠠᠨ ᠦᠰᠦ) 15.23%᠂ ᠪᠡᠰᠡᠷᠡᠭ ᠨᠣᠣᠰᠣ (ᠨᠣᠣᠰᠣᠨ ᠤ᠋ ᠭᠣᠣᠯ ᠨᠢ ᠲᠠᠰᠤᠯᠳᠠᠭᠰᠠᠨ ᠪᠤᠶᠤ ᠳᠤᠰᠤᠯ ᠮᠠᠶᠢᠭ ᠲᠠᠢ᠂ ᠨᠠᠷᠢᠨ ᠤ᠋ ᠬᠡᠮᠵᠢᠶᠡ ᠨᠢ ᠪᠦᠳᠦᠭᠦᠨ ᠨᠣᠣᠰᠣ ᠪᠣᠯᠤᠨ ᠨᠣᠯᠤᠤᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠬᠡᠯᠪᠡᠷᠢᠲᠦ ᠨᠣᠣᠰᠣ) 4.76%᠂ ᠨᠣᠯᠤᠤᠷ (ᠭᠣᠣᠯ ᠦᠭᠡᠢ ᠨᠣᠣᠰᠣ᠂ ᠶᠡᠷᠦ ᠶ᠋ᠢᠨ ᠬᠡᠯᠡᠯᠭᠡ ᠪᠡᠷ ᠪᠣᠯ ᠨᠠᠷᠢᠨ ᠨᠣᠣᠰᠣ ᠭᠡᠵᠦ ᠬᠡᠯᠡᠳᠡᠭ)76.22%᠃ ᠮᠣᠩᠭᠣᠯ ᠬᠣᠨᠢᠨ ᠤ᠋ ᠨᠣᠣᠰᠣᠨ ᠪᠦᠷᠢᠯᠳᠦᠬᠦᠨ ᠦ᠌ ᠪᠠᠢᠳᠠᠯ ᠨᠢ ᠶᠡᠬᠡ ᠲᠥᠯᠥᠪ ᠲᠡᠭᠡᠨ ᠳᠡᠭᠡᠷᠡ ᠢᠯᠡᠳᠬᠡᠭᠰᠡᠨ ᠵᠠᠷᠢᠮ ᠬᠡᠮᠵᠢᠯᠲᠡ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠮᠡᠲᠦ ᠪᠣᠯᠪᠠᠴᠤ᠂ ᠡᠯᠡ ᠭᠠᠵᠠᠷ ᠳᠠᠬᠢ ᠬᠣᠨᠢᠨ ᠨᠣᠣᠰᠣᠨ ᠪᠦᠷᠢᠯᠳᠦᠬᠦᠨ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠮᠠᠰᠢ ᠶᠡᠬᠡ ᠵᠥᠷᠢᠶᠡ ᠲᠡᠢ᠃ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠳᠤᠮᠳᠠ ᠪᠠᠷᠠᠭᠤᠨ ᠬᠡᠰᠡᠭ ᠦ᠋ᠨ ᠭᠠᠵᠠᠷ ᠣᠷᠣᠨ ᠳ᠋ᠠᠬᠢ ᠮᠣᠩᠭᠣᠯ ᠬᠣᠨᠢᠨ ᠤ᠋ ᠨᠣᠣᠰᠣᠨ ᠳ᠋ᠤ᠌ ᠰᠣᠢᠷ ᠦᠰᠦ (ᠢᠮᠠᠭᠠᠨ ᠦᠰᠦ) ᠪᠠᠢᠳᠠᠭ ᠦᠭᠡᠢ ᠪᠣᠯᠬᠣᠷ ᠬᠡᠪᠢᠰ ᠨᠡᠬᠡᠮᠡᠯ ᠦ᠋ᠨ ᠳᠡᠭᠡᠳᠦ ᠳᠡᠰ ᠦ᠋ᠨ ᠣᠬᠢ ᠰᠠᠢᠨ ᠲᠦᠭᠦᠬᠡᠢ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠬᠡᠷᠡᠭᠯᠡᠭᠳᠡᠳᠡᠭ᠃
ᠨᠣᠣᠰᠣᠨ ᠤ᠋ ᠨᠠᠷᠢᠨ ᠤ᠋ ᠬᠡᠮᠵᠢᠶᠡ (ᠳᠤᠮᠳᠠᠴᠢ ᠬᠡᠮᠵᠢᠭᠳᠡᠯ)᠄ ᠪᠦᠳᠦᠭᠦᠨ ᠨᠣᠣᠰᠣ (ᠭᠣᠣᠯ ᠲᠠᠢ ᠨᠣᠣᠰᠣ) 54.04 ᠮᠢᠺᠷᠣᠨ᠂ ᠰᠣᠢᠷ ᠦᠰᠦ (ᠢᠮᠠᠭᠠᠨ ᠦᠰᠦ)109.46 ᠮᠢᠺᠷᠣᠨ᠂ ᠪᠡᠰᠡᠷᠡᠭ ᠨᠣᠣᠰᠣ (ᠪᠦᠳᠦᠭᠦᠨ ᠨᠣᠣᠰᠣ ᠪᠣᠯᠤᠨ ᠨᠣᠯᠤᠤᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠬᠡᠯᠪᠡᠷᠢᠲᠦ ᠨᠣᠣᠰᠣ)37.93 ᠮᠢᠺᠷᠣᠨ᠂ ᠨᠣᠯᠤᠤᠷ (ᠭᠣᠣᠯ ᠦᠭᠡᠢ ᠨᠣᠣᠰᠣ) 20.22 ᠮᠢᠺᠷᠣᠨ᠃
ᠨᠣᠣᠰᠣᠨ ᠤ᠋ ᠨᠢᠭ ᠦ᠋ᠨ ᠬᠡᠮᠵᠢᠶᠡ᠄ ᠲᠠᠯᠤᠨ ᠤ᠋ ᠠᠷᠤ᠂ ᠴᠡᠭᠡᠵᠢᠨ ᠳᠤᠮᠳᠠ ᠬᠡᠰᠡᠭ ᠦ᠋ᠨ ᠨᠣᠣᠰᠣᠨ ᠤ᠋ ᠨᠢᠭ ᠨᠢ᠂ ᠨᠢᠭᠡ ᠲᠡᠭᠰᠢ ᠳᠥᠷᠪᠡᠯᠵᠢᠨ ᠰᠡᠨᠲ᠋ᠢᠮᠧᠲ᠋ᠷ ᠲᠠᠯᠠᠪᠠᠢ ᠳ᠋ᠤ᠌᠂ 1500 — 3400 ᠰᠢᠷᠬᠡᠭ ᠨᠣᠣᠰᠣ ᠪᠣᠢ᠃
ᠨᠣᠣᠰᠣᠨ ᠤ᠋ ᠲᠡᠨᠢᠢᠯᠭᠡᠭᠰᠡᠨ ᠤᠷᠲᠤ ᠶ᠋ᠢᠨ ᠬᠡᠮᠵᠢᠶᠡ (ᠳᠤᠮᠳᠠᠴᠢ ᠬᠡᠮᠵᠢᠭᠳᠡᠯ)᠄ ᠪᠦᠳᠦᠭᠦᠨ ᠨᠣᠣᠰᠣ(ᠭᠣᠣᠯ ᠲᠠᠢ ᠨᠣᠣᠰᠣ)9.8 ᠰᠡᠨᠲ᠋ᠢᠮᠧᠲ᠋ᠷ᠂ ᠰᠣᠢᠷ ᠦᠰᠦ(ᠢᠮᠠᠭᠠᠨ ᠦᠰᠦ)8.4 ᠰᠡᠨᠲ᠋ᠢᠮᠧᠲ᠋ᠷ᠂ ᠪᠡᠰᠡᠷᠡᠭ ᠨᠣᠣᠰᠣ (ᠪᠦᠳᠦᠭᠦᠨ ᠨᠣᠣᠰᠣ ᠪᠣᠯᠤᠨ ᠨᠣᠯᠤᠤᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠬᠡᠯᠪᠡᠷᠢᠲᠦ ᠨᠣᠣᠰᠣ)10.4 ᠰᠡᠨᠲ᠋ᠢᠮᠧᠲ᠋ᠷ᠂ ᠨᠣᠯᠤᠤᠷ (ᠭᠣᠣᠯ ᠦᠭᠡᠢ ᠨᠣᠣᠰᠣ)8.5 ᠰᠡᠨᠲ᠋ᠢᠮᠧᠲ᠋ᠷ᠃
ᠮᠢᠬᠠᠨ ᠭᠠᠷᠤᠯᠲᠠ ᠄ ᠨᠢᠲᠤᠯᠭᠠ ᠶ᠋ᠢᠨ ᠭᠠᠷᠴᠠ ᠨᠢ 50% ᠣᠷᠴᠢᠮ᠂ ᠣᠨᠴᠠᠭᠠᠢ ᠵᠠᠷᠢᠮ ᠨᠢ 60% ᠬᠦᠷᠬᠦ ᠴᠦ᠍ ᠪᠣᠢ᠃
ᠢᠬᠡᠷᠡᠯᠡᠬᠦ ᠨᠣᠷᠮᠠ ᠨᠢ ᠶᠡᠷᠦ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌᠂ 5% ᠠ᠋ᠴᠠ ᠬᠡᠲᠦᠷᠡᠬᠦ ᠦᠭᠡᠢ ᠪᠠᠢᠳᠠᠭ ᠪᠣᠯᠪᠠᠴᠤ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠦ᠋ᠨ ᠨᠥᠬᠥᠴᠡᠯ ᠣᠨᠴᠠ ᠰᠠᠢᠨ ᠪᠤᠶᠤ ᠲᠠᠷᠭᠤ ᠬᠦᠴᠦ ᠶᠡᠬᠡ ᠰᠠᠢᠨ ᠪᠠᠢᠳᠠᠯ ᠳᠣᠣᠷᠠ᠂ ᠢᠬᠡᠷᠡᠯᠡᠬᠦ ᠨᠣᠷᠮᠠ ᠨᠢ ᠶᠡᠬᠡᠪᠡᠷ ᠳᠡᠭᠡᠭᠰᠢᠯᠡᠳᠡᠭ᠃
ᠮᠣᠩᠭᠣᠯ ᠬᠣᠨᠢᠨ ᠤ᠋ ᠢᠯᠡᠭᠦᠦ ᠨᠢᠭᠡ ᠦᠶᠡ ᠰᠡᠭᠡᠷ (ᠰᠡᠭᠡᠷ ᠶᠠᠰᠤ ᠨᠢ ᠢᠯᠡᠭᠦᠦ ᠨᠢᠭᠡ ᠦᠶᠡ᠂ ᠬᠠᠪᠢᠷᠭᠠ ᠨᠢ ᠢᠯᠡᠭᠦᠦ ᠨᠢᠭᠡᠨ ᠬᠣᠣᠰ) ᠪᠤᠶᠤ ᠢᠯᠡᠭᠦᠦ ᠨᠢᠭᠡ ᠦᠶᠡ ᠨᠢᠷᠤᠭᠤ ᠶᠠᠰᠤ ᠲᠠᠢ ᠪᠠᠢᠬᠤ ᠤᠳᠤᠮᠰᠢᠯ ᠤ᠋ᠨ ᠰᠢᠨᠵᠢ ᠣᠨᠴᠠᠯᠢᠭ ᠨᠢ ᠮᠣᠩᠭᠣᠯ ᠤᠳᠤᠮ ᠤ᠋ᠨ ᠬᠣᠨᠢ ᠠ᠋ᠴᠠ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠬᠣᠨᠢᠨ ᠤ᠋ ᠡᠭᠦᠯᠳᠡᠷ ᠲᠦ᠍ ᠦᠯᠦ ᠪᠠᠢᠬᠤ ᠣᠨᠴᠠᠭᠠᠢ ᠨᠢᠭᠡᠨ ᠥᠪᠡᠷᠮᠢᠴᠡ ᠰᠢᠨᠵᠢ ᠣᠨᠴᠠᠯᠢᠭ ᠶᠤᠮ᠂ ᠲᠡᠭᠦᠨ ᠦ᠌ ᠡᠨᠡ ᠬᠦ᠌ ᠥᠪᠡᠷᠮᠢᠴᠡ ᠰᠢᠨᠵᠢ ᠣᠨᠴᠠᠯᠢᠭ ᠤ᠋ᠨ ᠤᠳᠤᠮᠰᠢᠯ ᠨᠢ ᠮᠠᠰᠢ ᠴᠢᠩᠭᠠ ᠪᠠᠢᠳᠠᠭ᠃ 1982 ᠣᠨ ᠳ᠋ᠤ᠌᠂ ᠵᠠᠩ ᠱᠢ ᠴᠤᠸᠠᠨ᠂ ᠮᠥᠩᠬᠡ᠂ ᠮᠠᠨᠠᠨᠠ᠂ ᠨᠠᠮᠵᠢᠯ ᠨᠠᠷ ᠤ᠋ᠨ ᠵᠡᠭᠦᠨ ᠦᠵᠦᠮᠦᠴᠢᠨ ᠪᠠ ᠪᠠᠷᠠᠭᠤᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠬᠢᠭᠰᠡᠨ ᠦᠵᠦᠮᠦᠴᠢᠨ ᠬᠣᠨᠢᠨ ᠤ᠋ ᠰᠤᠳᠤᠯᠤᠯᠲᠠ ᠳ᠋ᠤ᠌᠂ ᠰᠡᠭᠡᠷ ᠶᠠᠰᠤ ᠨᠢ 14 ᠦᠶᠡ᠂ 14 ᠬᠣᠣᠰ ᠬᠠᠪᠢᠷᠭᠠ ᠲᠠᠢ ᠬᠣᠨᠢ 20% ᠣᠷᠴᠢᠮ ᠢ᠋ ᠨᠢ ᠡᠵᠡᠯᠡᠵᠦ᠂ 7 ᠦᠶᠡ ᠨᠢᠷᠤᠭᠤᠨ ᠶᠠᠰᠤ ᠲᠠᠢ ᠬᠣᠨᠢ 40% ᠣᠷᠴᠢᠮ ᠢ᠋ ᠨᠢ ᠡᠵᠡᠯᠡᠵᠦ ᠪᠠᠢᠪᠠ (ᠶᠡᠷᠦ ᠶ᠋ᠢᠨ ᠬᠣᠨᠢ ᠪᠣᠯ᠂ ᠰᠡᠭᠡᠷ ᠶᠠᠰᠤ ᠨᠢ 13 ᠦᠶᠡ᠂ 13 ᠬᠣᠣᠰ ᠬᠠᠪᠢᠷᠭᠠ ᠲᠠᠢ᠂ ᠨᠢᠷᠤᠭᠤ ᠶᠠᠰᠤ 6 ᠦᠶᠡ ᠲᠡᠢ ᠪᠠᠢᠳᠠᠭ)᠃ 1991 ᠣᠨ ᠳ᠋ᠤ᠌᠂ ᠮᠥᠩᠬᠡ᠂ ᠨᠠᠮᠵᠢᠯ ᠨᠠᠷ ᠠᠪᠠᠭᠠ ᠬᠤᠰᠢᠭᠤᠨ ᠤ᠋ ᠣᠷᠢᠶᠠᠩᠬᠠᠨ ᠬᠣᠨᠢᠨ ᠳ᠋ᠤ᠌ ᠬᠢᠭᠰᠡᠨ ᠰᠤᠳᠤᠯᠤᠯᠲᠠ ᠳ᠋ᠤ᠌᠂ ᠰᠡᠭᠡᠷ ᠶᠠᠰᠤ ᠨᠢ 14 ᠦᠶᠡ᠂ 14 ᠬᠣᠣᠰ ᠬᠠᠪᠢᠷᠭᠠ ᠲᠠᠢ ᠬᠣᠨᠢ 18.8% ᠶ᠋ᠢ ᠡᠵᠡᠯᠡᠵᠦ ᠪᠠᠢᠪᠠ᠃ ᠡᠨᠡ ᠲᠤᠬᠠᠢ ᠪᠤᠰᠤᠳ ᠭᠠᠵᠠᠷ ᠬᠢᠭᠰᠡᠨ ᠪᠠᠭᠠ ᠬᠡᠪᠴᠢᠶᠡᠨ ᠦ᠌ ᠬᠡᠮᠵᠢᠯᠲᠡ ᠶ᠋ᠢᠨ ᠪᠠᠢᠳᠠᠯ ᠠ᠋ᠴᠠ ᠢᠯᠡᠳᠬᠡᠪᠡᠯ᠂ 1998 ᠣᠨ ᠳ᠋ᠤ᠌᠂ ᠵᠡᠭᠦᠨ ᠰᠥᠨᠢᠳ ᠦ᠋ᠨ ᠨᠢᠭᠡᠨ ᠰᠦᠷᠦᠭ ᠬᠣᠨᠢᠨ ᠳ᠋ᠤ᠌ ᠬᠡᠮᠵᠢᠯᠲᠡ ᠬᠢᠬᠦ ᠳ᠋ᠦ᠍᠂ ᠢᠯᠡᠭᠦᠦ ᠨᠢᠭᠡ ᠦᠶᠡ ᠰᠡᠭᠡᠷ ᠶᠠᠰᠤ᠂ ᠢᠯᠡᠭᠦᠦ ᠨᠢᠭᠡᠨ ᠬᠣᠣᠰ ᠬᠠᠪᠢᠷᠭᠠ ᠲᠠᠢ ᠨᠢ 15% ᠣᠷᠴᠢᠮ ᠪᠠᠢᠪᠠ᠂ 1986 ᠣᠨ ᠤ᠋ ᠬᠠᠪᠤᠷ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠲᠤᠷᠰᠢᠯᠲᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠠᠬᠢ 471 ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠨᠠᠷᠢᠨ ᠨᠣᠣᠰᠣᠲᠤ ᠡᠮᠡ ᠬᠣᠨᠢ ᠶ᠋ᠢ ᠬᠡᠮᠵᠢᠨ ᠪᠠᠢᠴᠠᠭᠠᠬᠤ ᠳ᠋ᠤ᠌᠂ ᠢᠯᠡᠭᠦᠦ ᠨᠢᠭᠡ ᠦᠶᠡ ᠰᠡᠭᠡᠷ ᠶᠠᠰᠤ᠂ ᠢᠯᠡᠭᠦᠦ ᠨᠢᠭᠡᠨ ᠬᠣᠣᠰ ᠬᠠᠪᠢᠷᠭᠠ ᠲᠠᠢ ᠬᠣᠨᠢ 14 ᠪᠠᠢᠪᠠ (ᠲᠤᠰ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢᠨ ᠤ᠋ ᠡᠬᠡ ᠤᠳᠤᠮ ᠨᠢ ᠪᠦᠷ ᠮᠣᠩᠭᠣᠯ ᠬᠣᠨᠢ ᠪᠣᠯᠬᠣᠷ᠂ ᠢᠯᠡᠭᠦᠦ ᠨᠢᠭᠡ ᠦᠶᠡ ᠰᠡᠭᠡᠷ ᠶᠠᠰᠤ᠂ ᠢᠯᠡᠭᠦᠦ ᠨᠢᠭᠡᠨ ᠬᠣᠣᠰ ᠬᠠᠪᠢᠷᠭᠠᠨ ᠤ᠋ ᠰᠢᠨᠵᠢ ᠣᠨᠴᠠᠯᠢᠭ ᠨᠢ ᠬᠣᠢᠴᠢ ᠦᠶᠡ ᠳ᠋ᠡᠭᠡᠨ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠤᠳᠤᠮᠰᠢᠭᠰᠠᠨ ᠪᠣᠯᠤᠯᠲᠠᠢ)᠃ ᠠᠳᠠᠯᠢ ᠮᠠᠯᠵᠢᠯᠭᠠ ᠶ᠋ᠢᠨ ᠨᠥᠬᠥᠴᠡᠯ ᠳᠣᠣᠷᠠ᠂ ᠡᠢᠮᠦᠷᠬᠦ ᠢᠯᠡᠭᠦᠦ ᠨᠢᠭᠡ ᠦᠶᠡ ᠰᠡᠭᠡᠷ ᠶᠠᠰᠤ᠂ ᠢᠯᠡᠭᠦᠦ ᠨᠢᠭᠡᠨ ᠬᠣᠣᠰ ᠬᠠᠪᠢᠷᠭᠠ ᠲᠠᠢ ᠬᠣᠨᠢᠨ ᠤ᠋ ᠮᠢᠬᠠᠨ ᠭᠠᠷᠴᠠ ᠨᠢ᠂ ᠶᠡᠷᠦ ᠶ᠋ᠢᠨ ᠰᠡᠭᠡᠷ ᠶᠠᠰᠤ ᠨᠢ 13 ᠦᠶᠡ᠂ 13 ᠬᠣᠣᠰ ᠬᠠᠪᠢᠷᠭᠠ ᠲᠠᠢ ᠬᠣᠨᠢ ᠠ᠋ᠴᠠ 4 — 6 ᠵᠢᠩ ᠣᠷᠴᠢᠮ ᠮᠢᠬᠠ ᠢᠯᠡᠭᠦᠦ ᠭᠠᠷᠬᠤ ᠪᠣᠯᠣᠮᠵᠢᠲᠠᠢ ᠪᠠᠢᠭᠠ ᠶ᠋ᠢ ᠵᠠᠩ ᠱᠢ ᠴᠤᠸᠠᠨ᠂ ᠮᠥᠩᠬᠡ᠂ ᠮᠠᠨᠠᠨᠠ᠂ ᠨᠠᠮᠵᠢᠯ ᠨᠠᠷ ᠤ᠋ᠨ ᠬᠢᠭᠰᠡᠨ ᠦᠵᠦᠮᠦᠴᠢᠨ ᠬᠣᠨᠢᠨ ᠤ᠋ ᠰᠤᠳᠤᠯᠤᠯᠲᠠ ᠬᠡᠮᠵᠢᠯᠲᠡ ᠭᠡᠷᠡᠴᠢᠯᠡᠪᠡ᠃
ᠮᠣᠩᠭᠣᠯ ᠬᠣᠨᠢ ᠪᠣᠯ᠂ ᠬᠤᠪᠢᠷᠠᠯᠲᠠ ᠶᠡᠬᠡᠲᠡᠢ᠂ ᠨᠥᠬᠥᠴᠡᠯ ᠮᠠᠭᠤ ᠰᠢᠭ᠋ ᠪᠠᠢᠭᠠᠯᠢ ᠶ᠋ᠢᠨ ᠣᠷᠴᠢᠨ ᠠᠬᠤᠢ ᠳ᠋ᠤ᠌ ᠲᠡᠰᠪᠦᠷᠢ ᠳᠠᠭᠠᠭᠠᠴᠠ ᠲᠠᠢ ᠪᠠᠷ ᠵᠣᠬᠢᠴᠠᠨ᠂ ᠬᠡᠪ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠦᠰᠦᠨ ᠦᠷᠡᠵᠢᠵᠦ ᠴᠢᠳᠠᠳᠠᠭ᠂ ᠮᠠᠯᠵᠢᠯᠭᠠ ᠶ᠋ᠢᠨ ᠵᠠᠷᠤᠳᠠᠯ ᠪᠠᠭᠠ᠂ ᠣᠯᠵᠠ ᠠᠰᠢᠭ ᠶᠡᠬᠡᠲᠡᠢ᠂ ᠬᠥᠮᠦᠰ ᠦ᠋ᠨ ᠠᠮᠢᠳᠤᠷᠠᠯ᠂ ᠦᠢᠯᠡᠳᠪᠦᠷᠢᠯᠡᠯ᠂ ᠠᠵᠤ ᠠᠬᠤᠢ ᠶ᠋ᠢᠨ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭᠠ ᠳ᠋ᠤ᠌ ᠲᠣᠬᠢᠷᠠᠭᠰᠠᠨ ᠴᠢᠨᠠᠷ ᠰᠠᠢᠲᠠᠢ ᠮᠢᠬᠠ᠂ ᠨᠣᠣᠰᠣ᠂ ᠰᠦ᠂ ᠠᠷᠠᠰᠤ ᠵᠡᠷᠭᠡ ᠣᠯᠠᠨ ᠵᠦᠢᠯ ᠦ᠋ᠨ ᠴᠢᠨᠠᠷᠯᠢᠭ ᠰᠠᠢᠨ ᠭᠠᠷᠤᠯᠲᠠ ᠬᠠᠩᠭᠠᠬᠤ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠥᠭᠡᠷᠡ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢᠳ ᠲᠤ᠌ ᠦᠯᠦ ᠪᠠᠢᠬᠤ ᠮᠠᠰᠢ ᠣᠯᠠᠨ ᠵᠦᠢᠯ ᠦ᠋ᠨ ᠳᠠᠪᠠᠭᠤᠯᠢᠭ ᠲᠠᠯᠠ ᠲᠠᠢ᠂ ᠲᠤᠩ ᠬᠣᠪᠣᠷᠬᠠᠨ ᠨᠢᠭᠡᠨ ᠰᠢᠯᠢᠳᠡᠭ ᠰᠠᠢᠨ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢ ᠪᠣᠯᠬᠣᠷ᠂ ᠬᠣᠢᠰᠢᠳᠠ ᠲᠡᠭᠦᠨ ᠦ᠌ ᠡᠨᠡ ᠬᠦ᠌ ᠳᠠᠪᠠᠭᠤᠯᠢᠭ ᠲᠠᠯᠠ ᠶ᠋ᠢ ᠬᠠᠮᠠᠭᠠᠯᠠᠨ ᠬᠥᠭᠵᠢᠭᠦᠯᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡᠪᠡᠷ ᠵᠠᠷᠢᠮ ᠳᠠᠯᠳᠠ ᠵᠦᠢᠯᠡᠰ ᠢ᠋ ᠤᠯᠠᠮ ᠭᠦᠨᠵᠡᠭᠡᠢ ᠨᠠᠷᠢᠨ ᠰᠤᠳᠤᠯᠤᠨ ᠰᠢᠨᠵᠢᠯᠡᠵᠦ᠂ ᠪᠣᠢ ᠪᠦᠬᠦᠢ ᠳᠠᠪᠠᠭᠤᠯᠢᠭ ᠰᠢᠨᠵᠢ ᠣᠨᠴᠠᠯᠢᠭ ᠢ᠋ ᠨᠢ ᠤᠯᠠᠮ ᠪᠠᠳᠠᠷᠠᠭᠤᠯᠤᠨ ᠰᠠᠢᠬᠠᠨ ᠠᠰᠢᠭᠯᠠᠪᠠᠯ ᠵᠣᠬᠢᠨᠠ᠃ ᠶᠠᠮᠠᠷ ᠨᠢᠭᠡᠨ ᠨᠢᠳᠦᠨ ᠡᠮᠦᠨᠡᠬᠢ ᠠᠰᠢᠭ ᠣᠯᠵᠠᠪᠤᠷᠢ ᠶ᠋ᠢ ᠪᠣᠳᠣᠵᠤ᠂ ᠠᠯᠢ ᠨᠢᠭᠡᠨ ᠭᠠᠷᠤᠯᠲᠠ ᠶ᠋ᠢ ᠨᠢ ᠨᠡᠮᠡᠭᠳᠡᠭᠦᠯᠬᠦ ᠪᠤᠶᠤ ᠬᠠᠯᠠᠨ ᠰᠠᠢᠵᠢᠷᠠᠭᠤᠯᠬᠤ ᠭᠡᠵᠦ ᠠᠯᠤᠰ ᠤ᠋ᠨ ᠲᠥᠰᠥᠪ ᠲᠥᠯᠥᠪᠯᠡᠭᠡ ᠦᠭᠡᠢ᠂ ᠮᠡᠷᠭᠡᠵᠢᠯ ᠦ᠋ᠨ ᠵᠢᠯᠣᠭᠣᠳᠤᠯᠭᠠ ᠦᠭᠡᠢ ᠪᠡᠷ ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠡᠷᠯᠢᠰᠡᠵᠢᠭᠦᠯᠬᠦ ᠠᠵᠢᠯᠯᠠᠭᠠ ᠬᠢᠬᠦ ᠶ᠋ᠢ ᠣᠨᠴᠠ ᠬᠢᠴᠢᠶᠡᠵᠦ᠂ ᠮᠣᠩᠭᠣᠯ ᠬᠣᠨᠢᠨ ᠤ᠋ ᠰᠢᠯᠢᠳᠡᠭ ᠰᠠᠢᠨ ᠤᠳᠤᠮᠰᠢᠯ ᠤ᠋ᠨ ᠰᠢᠨᠵᠢ ᠴᠢᠨᠠᠷ ᠢ᠋ ᠨᠢ ᠦᠨᠡᠨ ᠪᠠᠲᠤᠲᠠᠢ ᠴᠡᠪᠡᠷ ᠢ᠋ᠶ᠋ᠡᠷ ᠨᠢ ᠬᠠᠮᠠᠭᠠᠯᠠᠨ ᠬᠥᠭᠵᠢᠭᠦᠯᠬᠦ ᠨᠢ ᠲᠤᠢᠯ ᠤ᠋ᠨ ᠴᠢᠬᠤᠯᠠ ᠶᠤᠮ᠃
ᠮᠣᠩᠭᠣᠯ ᠬᠣᠨᠢ Монгол Хонь
ᠬᠢᠲᠠᠳ ᠨᠡᠷᠡ᠄ 蒙古羊
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳᠣᠯᠣᠳ • ᠨᠠᠮᠵᠢᠯ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ