ᠥᠭᠡᠯᠦᠨ – ᠬᠠᠷᠠ ᠬᠣᠷᠣᠮ ᠤᠨ ᠳᠣᠮᠣᠭ - ᠴᠢᠩᠭᠢᠰ ᠬᠠᠭᠠᠨ ᠊ᠤ᠌ ᠨᠢᠭᠤᠴᠠ ᠲᠡᠦᠬᠡ 12 Өөлөн – Хар хормын домог - Чингис хаан оо нууц түүх 12
259ᠥᠭᠡᠯᠦᠨ –
ᠬᠠᠷᠠ ᠬᠣᠷᠣᠮ ᠤᠨ ᠳᠣᠮᠣᠭ
ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ ᠨᠢ ᠬᠠᠪᠤᠯ ᠬᠠᠭᠠᠨ᠂ ᠬᠣᠲᠠᠯᠠ ᠬᠠᠭᠠᠨ᠂ ᠨᠡᠭᠦᠨ ᠲᠠᠢᠵᠢ ᠶ᠋ᠢᠨ ᠦᠷᠡ ᠰᠡᠳᠦ ᠨᠡᠢᠯᠡᠨ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠵᠦ《ᠴᠢᠩᠭᠢᠰ ᠬᠠᠭᠠᠨ》 ᠬᠡᠮᠡᠬᠦ ᠰᠦᠷ ᠬᠦᠴᠦ ᠳᠠᠭᠤᠷᠢᠰᠤᠭᠰᠠᠨ ᠴᠣᠯᠠ ᠰᠣᠶᠣᠷᠬᠠᠨ ᠨᠠᠭᠠᠳᠤᠮ ᠴᠡᠩᠭᠡᠯ ᠬᠢᠬᠦᠢ ᠳ᠋ᠦ᠍ ᠨᠠᠢᠷ ᠤ᠋ᠨ ᠬᠣᠢᠮᠣᠷ ᠲᠤ ᠬᠥᠪᠡᠭᠦᠨ ᠦ᠌ ᠪᠡᠨ ᠵᠡᠭᠦᠨ ᠭᠠᠷ ᠲᠤ ᠰᠠᠭᠤᠵᠤ ᠠᠬᠤᠢ ᠳ᠋ᠠᠭᠠᠨ ᠥᠭᠡᠯᠦᠨ ᠨᠡᠩ ᠶᠡᠬᠡ ᠵᠢᠷᠭᠠᠨ ᠤᠶᠠᠷᠠᠵᠤ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠤᠨᠠᠭᠠᠪᠠ᠃ ᠲᠡᠭᠦᠨ ᠳ᠋ᠦ᠍ ᠠᠩᠬᠠ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠥᠷᠥᠭᠦᠯᠦᠭᠰᠡᠨ ᠦᠶᠡ ᠶ᠋ᠢᠨ ᠬᠢ ᠰᠢᠭ ᠪᠠᠬᠠᠷᠬᠠᠯᠲᠠᠢ ᠪᠠᠢᠯᠠ᠃ ᠡᠨᠡ ᠪᠣᠯ ᠦᠬᠦᠯ ᠦ᠋ᠨ ᠳᠤᠮᠳᠠ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠦ᠌ ᠶᠡᠬᠡ ᠪᠠᠶᠠᠷ ᠪᠠᠢᠪᠠ᠃ ᠪᠠᠰᠠ ᠥᠩᠭᠡᠷᠡᠭᠦᠯᠦᠭᠰᠡᠨ ᠵᠣᠪᠠᠯᠠᠩᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠡᠭᠦᠰᠬᠡᠯ᠂ ᠣᠨᠢᠰᠣᠭᠠ ᠰᠢᠭ᠋ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠰᠢᠨᠡ ᠠᠮᠢᠳᠤᠷᠠᠯ ᠤ᠋ᠨ ᠡᠬᠢᠯᠡᠯ ᠪᠠᠢᠪᠠ᠃ ᠶᠢᠰᠦᠭᠡᠢ ᠶ᠋ᠢᠨ ᠠᠮᠢᠳᠤ ᠰᠡᠷᠡᠭᠦᠨ ᠠᠬᠤᠢ ᠳ᠋ᠤ᠌ ᠡᠨᠡ ᠲᠡᠢᠨ ᠦ᠌ ᠨᠠᠢᠷ ᠨᠠᠭᠠᠳᠤᠮ ᠪᠢᠰᠢᠭᠦᠢ ᠦᠵᠡᠭᠰᠡᠨ ᠮᠥᠷᠲᠡᠭᠡᠨ ᠶᠠᠭᠤ ᠴᠦ᠍ ᠦᠵᠡᠭᠡ ᠦᠭᠡᠢ ᠵᠠᠯᠠᠭᠤ ᠥᠬᠢᠨ ᠰᠢᠭ ᠳᠣᠭᠳᠣᠯᠤᠨ ᠴᠡᠴᠡᠷᠡᠵᠡᠢ᠃ ᠲᠡᠮᠦᠵᠢᠨ ᠢ᠋ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠵᠦ
ᠣᠯᠠᠨ ᠲᠡᠢᠨ ᠳ᠋ᠦ᠍ ᠣᠷᠣᠢᠯᠠᠨ ᠶᠠᠪᠤᠵᠤ
ᠣᠨᠴᠠ ᠭᠤᠸᠠ ᠥᠬᠢᠳ ᠢ᠋ ᠣᠯᠵᠠᠯᠠᠵᠤ
ᠣᠷᠳᠣᠨ ᠰᠠᠢᠬᠠᠨ ᠭᠡᠷ ᠢ᠋ ᠠᠪᠴᠤ
ᠣᠯᠠᠨ ᠤ᠋ ᠬᠠᠭᠠᠨ ᠲᠡᠮᠦᠵᠢᠨ ᠳ᠋ᠦ᠍ ᠥᠭᠭᠦᠶᠡ
ᠬᠠᠷᠢ ᠶ᠋ᠢᠨ ᠢᠷᠭᠡᠳ ᠢ᠋
ᠬᠠᠯᠳᠠᠨ ᠳᠣᠪᠲᠣᠯᠵᠤ
ᠬᠠᠴᠠᠷ ᠭᠤᠸᠠ
ᠬᠠᠲᠤᠳ ᠢ᠋ ᠣᠯᠵᠠᠯᠠᠵᠤ
ᠬᠠᠲᠠᠷᠢ ᠰᠠᠢᠲᠤ
ᠠᠭᠲᠠ ᠶ᠋ᠢ ᠬᠥᠭᠡᠭᠡᠵᠦ
ᠠᠪᠴᠢᠷᠠᠵᠤ ᠥᠭᠭᠦᠶᠡ
ᠣᠷᠣᠭᠠ ᠭᠥᠷᠥᠭᠡᠰᠦ ᠶ᠋ᠢ
ᠠᠪᠠᠯᠠᠬᠤ ᠴᠠᠭ ᠲᠤ
ᠦᠳᠡᠵᠦ ᠣᠢᠷᠠᠲᠤᠭᠤᠯᠵᠤ
ᠥᠭᠭᠦᠶᠡ ᠪᠢᠳᠡ
ᠬᠡᠭᠡᠷᠡ ᠶ᠋ᠢᠨ ᠭᠥᠷᠥᠭᠡᠰᠦ ᠶ᠋ᠢ
ᠠᠩᠨᠠᠬᠤ ᠴᠠᠭ ᠲᠤ
ᠣᠯᠵᠠ ᠭᠠᠷᠭᠠᠵᠤ ᠥᠭᠭᠦᠶᠡ ᠪᠢᠳᠡ
ᠬᠠᠳᠬᠤᠯᠳᠤᠬᠤ ᠲᠡᠢᠨ
ᠪᠣᠯᠬᠤ ᠴᠠᠭ ᠲᠤ
ᠬᠠᠨ ᠲᠡᠮᠦᠵᠢᠨ ᠴᠢᠨᠦ
ᠬᠠᠲᠠᠭᠤ ᠵᠠᠷᠯᠢᠭ ᠢ᠋
ᠬᠠᠢᠬᠤᠷᠬᠤ ᠦᠭᠡᠢ ᠶᠠᠪᠤᠪᠠᠯ
ᠬᠠᠲᠤᠨ ᠡᠮᠡ ᠡᠴᠡ
ᠬᠠᠭᠠᠴᠠᠭᠤᠯᠤᠨ ᠰᠠᠯᠭᠠᠵᠤ
ᠬᠠᠮᠤᠭ ᠶᠠᠭᠤᠮᠠ ᠶ᠋ᠢ
ᠬᠠᠮᠤᠨ ᠠᠪᠴᠤ
ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠮᠢᠨᠢ
ᠬᠠᠶᠠᠵᠤ ᠣᠳᠤᠭᠲᠤᠨ
ᠡᠩᠬᠡ ᠴᠠᠭ ᠲᠤ
ᠡᠵᠡᠨ ᠲᠡᠮᠦᠵᠢᠨ ᠴᠢᠨᠦ
ᠡᠶᠡ ᠵᠠᠷᠯᠢᠭ ᠢ᠋
ᠡᠰᠡ ᠳᠠᠭᠠᠬᠤ ᠠᠪᠠᠰᠤ
ᠡᠵᠡᠯᠡᠭᠰᠡᠨ ᠠᠷᠠᠳ ᠢ᠋ ᠠᠪᠴᠤ
ᠡᠮᠡᠰ ᠬᠥᠪᠡᠭᠦᠳ ᠢ᠋ ᠪᠤᠯᠢᠶᠠᠵᠤ
ᠡᠨᠡ ᠪᠡᠶᠡ ᠶ᠋ᠢ ᠮᠢᠨᠢ
ᠡᠵᠡᠭᠦᠢ ᠭᠠᠵᠠᠷ
ᠬᠥᠭᠡᠭᠡᠵᠦ ᠣᠷᠭᠢ ᠭᠡᠵᠦ ᠠᠯᠲᠠᠨ᠂ ᠬᠤᠴᠢᠷ᠂ ᠰᠡᠴᠡ ᠪᠡᠬᠢ ᠭᠤᠷᠪᠠ ᠤᠭᠰᠠᠭᠠᠲᠤ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠣᠯᠠᠨ ᠢ᠋ ᠲᠥᠯᠥᠭᠡᠯᠡᠨ ᠪᠦᠰᠡ ᠪᠡᠨ ᠬᠦᠵᠦᠭᠦᠨ ᠳ᠋ᠦ᠍ ᠲᠣᠬᠣᠵᠤ᠂ ᠡᠪᠦᠳᠦᠭ ᠰᠥᠬᠥᠷᠡᠨ ᠰᠠᠭᠤᠭᠠᠳ ᠳᠡᠭᠡᠷᠡᠬᠢ ᠬᠠᠲᠠᠭᠤ ᠲᠠᠩᠭᠠᠷᠢᠭ ᠢ᠋ ᠥᠨᠳᠥᠷ ᠳᠠᠭᠤ ᠪᠠᠷ ᠥᠴᠢᠵᠡᠢ᠃ ᠲᠠᠢᠴᠢᠭᠤᠳ ᠤ᠋ᠨ ᠣᠯᠵᠠᠨ ᠳ᠋ᠤ᠌ ᠵᠢᠯ ᠲᠣᠭᠣᠷᠢᠨ ᠪᠠᠢᠭᠠᠳ ᠢᠷᠡᠬᠦ ᠳ᠋ᠦ᠍ᠨᠢ ᠬᠣᠶᠠᠷ ᠬᠥᠮᠦᠰᠬᠡᠨ ᠦ᠌ ᠬᠢᠨᠢ ᠬᠣᠭᠣᠷᠣᠨᠳᠣ ᠲᠣᠭᠲᠠᠭᠰᠠᠨ ᠭᠦᠨ ᠦᠷᠴᠢᠯᠡᠭᠡ ᠲᠡᠮᠦᠵᠢᠨ ᠦ᠌ ᠴᠢᠷᠠᠢ ᠶ᠋ᠢ ᠣᠭᠲᠣ ᠥᠭᠡᠷᠡ ᠬᠥᠮᠦᠨ ᠰᠢᠭ ᠬᠠᠷᠠᠭᠳᠠᠭᠤᠯᠬᠤ ᠪᠥᠭᠡᠳ ᠲᠡᠳᠡᠨ ᠦ᠌ ᠰᠦᠷᠵᠢᠨ ᠲᠠᠩᠭᠠᠷᠢᠭ ᠤ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠦᠭᠡᠢ ᠮᠡᠲᠦ ᠬᠡᠨᠡᠭ ᠦᠭᠡᠢ ᠴᠢᠷᠠᠢᠯᠠᠨ ᠵᠣᠭᠰᠣᠬᠤ ᠶ᠋ᠢ ᠦᠵᠡᠭᠡᠳ ᠥᠭᠡᠯᠦᠨ ᠶᠡᠬᠡ ᠭᠠᠢᠬᠠᠪᠠ᠃ ᠬᠠᠷᠢᠨ ᠲᠡᠮᠦᠵᠢᠨ ᠡᠴᠡ ᠰᠥᠭᠡᠮ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠬᠠᠰᠠᠷ ᠪᠠᠬᠠᠳᠤᠯᠲᠠᠢ ᠪᠠᠷ ᠢᠨᠢᠶᠡᠮᠰᠦᠭᠯᠡᠨ ᠡᠳᠡᠭᠡᠷ ᠬᠥᠮᠦᠰ ᠴᠣᠬᠣᠮ ᠲᠡᠭᠦᠨ ᠳ᠋ᠦ᠍ ᠲᠠᠩᠭᠠᠷᠢᠭ ᠡᠷᠭᠦᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠦᠭᠡ ᠪᠦᠭᠦᠳᠡ ᠶ᠋ᠢ ᠰᠢᠨᠤᠯᠲᠠᠢ ᠪᠠᠷ ᠵᠠᠯᠭᠢᠵᠤ ᠵᠣᠭᠰᠣᠪᠠ᠃ ᠬᠣᠶᠠᠷ ᠬᠥᠪᠡᠭᠦᠨ ᠦ᠌ ᠡᠯᠡ ᠢᠯᠭᠠᠭᠠ ᠲᠠᠢ ᠪᠠᠢᠳᠠᠯ ᠢ᠋ ᠦᠵᠡᠪᠡᠯ ᠲᠡᠮᠦᠵᠢᠨ ᠢ᠋ ᠪᠢᠰᠢ ᠬᠠᠰᠠᠷ ᠢ᠋ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠵᠦ ᠪᠠᠢᠭᠠ ᠮᠡᠲᠦ ᠣᠢᠯᠠᠭᠠᠭᠳᠠᠬᠤ ᠪᠠᠷ ᠠᠵᠢ᠃
ᠲᠡᠮᠦᠵᠢᠨ ᠦ᠌ ᠨᠠᠰᠤᠨ ᠠ᠋ᠴᠠ ᠪᠠᠨ ᠣᠪᠣᠷᠵᠢᠭᠤ ᠬᠠᠷᠠᠭᠳᠠᠬᠤ ᠴᠢᠷᠠᠢ ᠠ᠋ᠴᠠ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠳᠣᠲᠣᠷᠠᠬᠢ ᠪᠠᠶᠠᠷ ᠪᠠᠬᠠᠳᠤᠯ ᠤ᠋ᠨ ᠰᠢᠨᠵᠢ ᠥᠴᠦᠬᠡᠨ ᠴᠦ᠍ ᠦᠯᠦ ᠢᠯᠡᠷᠡᠨᠡ᠃ ᠲᠡᠷᠡ ᠪᠠᠭᠠ ᠶ᠋ᠢᠨ ᠳᠣᠲᠣᠭᠤᠷ ᠲᠠᠮᠢᠷ ᠲᠠᠢ ᠬᠥᠮᠦᠨ ᠳ᠋ᠦ᠍ ᠰᠠᠢᠨ ᠮᠠᠭᠤ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠨᠢᠭᠤᠴᠠ ᠶ᠋ᠢ ᠳᠡᠯᠭᠡᠬᠦ ᠳᠤᠷᠠ ᠦᠭᠡᠢ ᠬᠠᠴᠢᠨ ᠭᠥᠵᠢᠭᠦᠳ ᠬᠡᠦᠬᠡᠳ ᠪᠠᠢᠭᠰᠠᠨ ᠶᠤᠮ᠃ ᠬᠠᠷᠢᠨ ᠬᠠᠰᠠᠷ ᠶᠠᠭ ᠲᠡᠭᠦᠨ ᠦ᠌ ᠡᠰᠡᠷᠭᠦ ᠰᠡᠳᠬᠢᠯ ᠦ᠋ᠨ ᠬᠥᠳᠡᠯᠦᠯ ᠨᠢ ᠬᠤᠷᠴᠠ᠂ ᠬᠥᠳᠡᠯᠭᠡᠭᠡᠨ ᠨᠢ ᠴᠢᠷᠠᠢ ᠳ᠋ᠤᠨᠢ ᠠᠭᠱᠠᠨ ᠲᠡᠳᠦᠢ ᠵᠠᠭᠤᠷᠠ ᠢᠯᠡᠷᠡᠳᠡᠭ᠂ ᠢᠯᠡ ᠰᠢᠯᠤᠭᠤᠨ ᠦᠭᠡ ᠲᠡᠢ᠂ ᠪᠠᠶᠠᠷᠯᠠᠵᠤ ᠭᠣᠮᠣᠳᠠᠬᠤ᠂ ᠲᠠᠢᠳᠬᠤᠷᠠᠬᠤ ᠲᠠᠢᠪᠤᠰᠢᠷᠠᠬᠤ ᠨᠢ ᠬᠤᠷᠳᠤᠨ᠂ ᠬᠣᠣᠷ ᠦᠭᠡᠢ ᠴᠠᠭᠠᠬᠠᠨ ᠰᠡᠳᠬᠢᠯ ᠲᠡᠢ ᠪᠢᠯᠡ᠃ ᠬᠡᠳᠦᠢ ᠡᠢᠮᠦ ᠦᠵᠡᠭᠳᠡᠬᠦ ᠴᠢᠷᠠᠢ᠂ ᠦᠭᠡ ᠬᠡᠯᠡ ᠥᠭᠡᠷᠡ ᠴᠦ᠍ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠶᠠᠭ ᠠᠳᠠᠯᠢ ᠬᠦᠰᠡᠯ ᠲᠡᠮᠡᠦᠯᠦᠯ ᠲᠡᠢ ᠶ᠋ᠢ ᠨᠢ ᠮᠡᠳᠡᠭᠡᠳ ᠥᠭᠡᠯᠦᠨ ᠰᠣᠴᠢᠭᠰᠠᠨ ᠪᠢᠯᠡ᠃ ᠬᠠᠰᠠᠷ ᠤ᠋ᠨ ᠴᠢᠷᠠᠢ ᠳ᠋ᠤ᠌ ᠢᠯᠡᠷᠡᠭᠰᠡᠨ ᠬᠠᠨ ᠪᠣᠯᠬᠤ ᠣᠷᠭᠢᠯᠤᠭᠰᠠᠨ ᠬᠦᠰᠡᠯ ᠢ᠋ ᠥᠭᠡᠯᠦᠨ ᠬᠠᠷᠠᠵᠠᠢ᠃ ᠲᠡᠮᠦᠵᠢᠨ ᠳ᠋ᠦ᠍ ᠠᠲᠠᠭᠠᠷᠬᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠰᠠᠷ ᠲᠡᠪᠴᠢᠨ ᠨᠢᠭᠤᠵᠤ ᠪᠠᠢᠭᠰᠠᠨ ᠴᠦ᠍ ᠡᠬᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠢᠯᠡ ᠥᠷᠲᠥᠪᠡ᠃ ᠴᠣᠬᠣᠮ ᠡᠨᠡ ᠶᠠᠪᠤᠳᠠᠯ ᠥᠭᠡᠯᠦᠨ ᠢ᠋ ᠲᠦᠮᠡᠨ ᠪᠣᠳᠣᠯ ᠮᠢᠩᠭᠠᠨ ᠡᠷᠡᠭᠡᠯᠵᠡᠭᠡᠨ ᠳ᠋ᠦ᠍ ᠤᠨᠠᠭᠠᠪᠠ᠃ ᠥᠭᠡᠯᠦᠨ ᠦ᠌ ᠲᠦᠭᠰᠢᠭᠦᠷᠢ᠂ ᠰᠣᠪᠢᠩ ᠦᠨᠡᠨ ᠪᠣᠯᠬᠤ ᠶ᠋ᠢ ᠪᠠᠰᠠ ᠬᠥᠪᠡᠭᠦᠳ ᠦ᠋ᠨ ᠬᠢᠨᠢ ᠬᠣᠭᠣᠷᠣᠨᠳᠣ ᠭᠦᠨ ᠭᠦᠨᠵᠡᠭᠡᠢ ᠳᠠᠯᠳᠠ ᠵᠥᠷᠢᠴᠡᠯ ᠡᠭᠦᠰᠬᠦ ᠶ᠋ᠢ ᠮᠡᠳᠡᠷᠡᠵᠡᠢ᠃ ᠡᠭᠦᠨ ᠢ᠋ ᠤᠳᠠᠭᠠᠨ ᠬᠦᠯᠢᠶᠡᠬᠦ ᠬᠡᠷᠡᠭ ᠪᠠᠢᠭᠰᠠᠨ ᠦᠭᠡᠢ᠃ ᠲᠠᠩᠭᠠᠷᠢᠭ ᠡᠷᠭᠦᠭᠰᠡᠨ ᠦ᠌ ᠳᠠᠷᠠᠭᠠ ᠶᠡᠬᠡ ᠨᠠᠢᠷ ᠵᠠᠳᠠᠭᠠᠢᠷᠠᠬᠤ ᠶ᠋ᠢᠨ ᠴᠠᠭ ᠲᠤ ᠥᠷᠯᠥᠭᠡᠨ ᠡᠴᠡ ᠬᠣᠢᠰᠢ ᠣᠯᠠᠨ ᠤ᠋ ᠭᠠᠢᠬᠠᠰᠢᠷᠠᠯ ᠢ᠋ ᠲᠥᠷᠥᠭᠦᠯᠦᠨ ᠬᠦᠷᠡᠯ ᠴᠢᠷᠠᠢᠯᠠᠨ ᠲᠠᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠲᠡᠮᠦᠵᠢᠨ ᠪᠣᠰᠴᠤ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠪᠡ᠃ ᠡᠨᠡ ᠪᠣᠯ ᠬᠠᠨ ᠪᠣᠯᠤᠭᠠᠳ ᠠᠩᠬᠠ ᠤᠳᠠᠭᠠ ᠦᠭᠡ ᠬᠡᠯᠡᠬᠦ ᠭᠡᠵᠦ ᠪᠣᠢ ᠬᠡᠷᠡᠭ ᠲᠤᠯᠠ ᠣᠯᠠᠨ ᠪᠦᠭᠦᠳᠡᠭᠡᠷ ᠠᠩᠬᠠᠷᠤᠨ ᠲᠠᠭ ᠳᠠᠭᠤ ᠦᠭᠡᠢ ᠪᠤᠯᠵᠠᠭᠠᠪᠠ᠃ ᠲᠡᠮᠦᠵᠢᠨ ᠨᠢᠭᠡ ᠬᠡᠰᠡᠭ ᠳᠠᠭᠤ ᠦᠭᠡᠢ ᠵᠣᠭᠰᠣᠪᠠ᠃ ᠲᠡᠭᠦᠨ ᠦ᠌ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠬᠡᠨ ᠴᠦ᠍᠂ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠥᠭᠡᠯᠦᠨ ᠴᠦ᠍ ᠳᠠᠭᠠᠭᠰᠠᠨ ᠦᠭᠡᠢ᠃ ᠤᠭ ᠠ᠋ᠴᠠ ᠲᠡᠮᠦᠵᠢᠨ ᠡᠢᠮᠦ ᠲᠠᠢᠯᠤᠭᠳᠠᠰᠢ ᠦᠭᠡᠢ ᠣᠨᠢᠰᠣᠭᠠ ᠰᠢᠭ᠋ ᠬᠥᠮᠦᠨ ᠪᠢᠯᠡ᠃
— ᠥᠨᠥᠳᠥᠷ ᠲᠠ ᠨᠠᠷ ᠶᠢᠰᠦᠭᠡᠢ ᠶ᠋ᠢᠨ ᠤᠤᠭᠠᠨ ᠬᠥᠪᠡᠭᠦᠨ ᠲᠡᠮᠦᠵᠢᠨ ᠨᠠᠮᠠᠶ᠋ᠢ ᠰᠣᠩᠭᠣᠵᠤ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠭᠰᠡᠨ ᠨᠢ ᠳᠡᠭᠡᠳᠦ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠳᠠᠭᠠᠭᠰᠠᠨ ᠬᠡᠷᠡᠭ ᠪᠢᠵᠡ᠃ ᠪᠢᠳᠡᠨ ᠦ᠌ ᠳᠣᠲᠣᠷᠠ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠳᠠᠭᠠᠬᠤ ᠦᠭᠡᠢ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠪᠢ ᠴᠦ᠍ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠳᠠᠭᠠᠵᠤ ᠲᠠ ᠨᠠᠷ ᠤ᠋ᠨ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠢ᠋ ᠬᠦᠯᠢᠶᠡᠨ ᠠᠪᠤᠯᠠ᠃ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠬᠢᠵᠦ᠂ ᠬᠡᠯᠡᠯᠴᠡᠭᠰᠡᠨ ᠢ᠋ᠶ᠋ᠡᠨ ᠰᠠᠬᠢᠭᠲᠤᠨ᠃ ᠲᠡᠭᠡᠪᠡᠯ ᠪᠢᠳᠡ ᠥᠮᠪᠦᠢ ᠴᠥᠭᠡᠭᠦᠯᠡ᠂ ᠥᠴᠦᠬᠡᠨ ᠪᠠᠭᠤᠷᠠᠢ ᠴᠦ᠍ ᠶᠡᠬᠡ ᠶ᠋ᠢ ᠬᠢᠵᠦ ᠣᠯᠠᠨ ᠢ᠋ ᠳᠠᠭᠠᠭᠤᠯᠬᠤ ᠪᠣᠯᠤᠨᠠ᠃ ᠠᠩᠭᠠᠢᠭᠰᠠᠨ ᠠᠮᠠ᠂ ᠠᠨᠳᠠᠭᠠᠢᠯᠠᠭᠰᠠᠨ ᠦᠭᠡ ᠪᠡᠨ ᠪᠤᠴᠠᠭᠰᠠᠨ ᠬᠡᠨ ᠪᠣᠯᠪᠠᠴᠤ ᠲᠩᠷᠢ ᠶ᠋ᠢᠨ ᠭᠡᠰᠭᠡᠭᠡᠯ ᠠᠮᠰᠠᠵᠤ ᠲᠣᠯᠣᠭᠠᠢ ᠪᠡᠶᠡ ᠡᠴᠡ ᠬᠠᠭᠠᠴᠠᠬᠤ ᠪᠣᠯᠤᠨᠠ᠃ ᠨᠢᠭᠡᠨᠲᠡ ᠲᠠ ᠪᠦᠭᠦᠳᠡᠭᠡᠷ ᠳᠡᠭᠡᠳᠦ ᠲᠩᠷᠢ ᠶ᠋ᠢᠨ ᠲᠠᠭᠠᠯᠠᠯ ᠶᠣᠰᠣᠭᠠᠷ ᠨᠠᠮᠠᠶ᠋ᠢ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠭᠰᠡᠨ ᠲᠤᠯᠠ ᠮᠢᠨᠦ ᠦᠭᠡ ᠵᠠᠷᠯᠢᠭ ᠢ᠋ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠭᠡᠵᠦ ᠬᠦᠯᠢᠶᠡᠨ ᠠᠪᠴᠤ ᠳᠠᠭᠠᠭᠲᠤᠨ᠃
ᠲᠡᠮᠦᠵᠢᠨ ᠦ᠌ ᠡᠨᠡ ᠦᠭᠡ ᠶ᠋ᠢ ᠪᠦᠭᠦᠳᠡ ᠨᠠᠮ ᠭᠦᠮ ᠰᠣᠨᠣᠰᠴᠤ ᠰᠠᠭᠤᠯᠠ᠃ ᠡᠨᠡ ᠪᠣᠯ ᠲᠡᠮᠦᠵᠢᠨ ᠦ᠌ ᠰᠡᠭᠦᠯ ᠦ᠋ᠨ ᠬᠡᠳᠦ ᠬᠣᠨᠣᠭ ᠬᠡᠯᠡᠬᠦ ᠭᠡᠵᠦ ᠪᠣᠳᠣᠭᠠᠳ ᠣᠯᠤᠭᠠ ᠦᠭᠡᠢ ᠦᠭᠡᠰ ᠶᠦᠮ᠃ ᠦᠨᠡᠬᠡᠷ ᠲᠡᠮᠦᠵᠢᠨ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠭᠳᠡᠭᠡᠳ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠲᠤᠯᠭᠠᠮᠳᠠᠭᠰᠠᠭᠠᠷ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠲᠡᠭᠡ ᠭᠡᠳ ᠵᠥᠪᠯᠡᠯᠴᠡᠬᠦ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠡᠴᠦᠰ ᠦ᠋ᠨ ᠮᠥᠴᠡ ᠳ᠋ᠦ᠍ ᠠᠯᠲᠠᠨ᠂ ᠬᠣᠴᠢᠷ᠂ ᠰᠡᠴᠡ ᠪᠡᠬᠢ ᠭᠤᠷᠪᠠ ᠲᠠᠩᠭᠠᠷᠢᠭ ᠡᠷᠭᠦᠵᠦ ᠪᠠᠢᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠬᠥᠭᠡᠴᠦ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠭᠰᠠᠨ ᠪᠢᠯᠡ᠃ ᠬᠥᠭᠡᠴᠦ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠮᠠᠭᠴᠠ ᠲᠡᠭᠦᠨ ᠲᠡᠢ ᠬᠠᠮᠲᠤ ᠳᠡᠭᠡᠳᠦ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠭᠡᠰᠡᠨ ᠦᠭᠡ ᠰᠡᠳᠬᠢᠯ ᠳ᠋ᠦ᠍ᠨᠢ ᠲᠣᠳᠣᠷᠠᠨ ᠪᠠᠭᠤᠵᠠᠢ᠃ ᠮᠡᠩᠯᠢᠭ ᠦ᠋ᠨ ᠬᠥᠪᠡᠭᠦᠨ ᠢᠳᠢ ᠰᠢᠳᠢᠲᠦ ᠬᠥᠭᠡᠴᠦ ᠬᠣᠯᠠ ᠪᠠᠢᠭᠠ ᠴᠤ᠌ ᠣᠳᠣ ᠶᠠᠭ ᠳᠡᠷᠭᠡᠳᠡ ᠨᠢ ᠰᠠᠭᠤᠭᠠᠳ ᠬᠡᠯᠡᠬᠦ ᠦᠭᠡ ᠶ᠋ᠢ ᠨᠢ ᠵᠢᠭᠠᠵᠤ ᠪᠠᠢᠬᠤ ᠰᠢᠭ᠋ ᠲᠡᠮᠦᠵᠢᠨ ᠳ᠋ᠦ᠍ ᠰᠠᠨᠠᠭᠳᠠᠵᠠᠢ᠃ ᠲᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠲᠡᠮᠦᠵᠢᠨ ᠳᠡᠭᠡᠷᠡᠬᠢ ᠦᠭᠡᠰ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠲᠩᠷᠢ ᠳ᠋ᠦ᠍ ᠰᠤᠩᠭᠠᠪᠠ᠃ ᠲᠩᠷᠢ ᠳ᠋ᠦ᠍ ᠢᠩᠭᠢᠵᠦ ᠬᠠᠨᠳᠤᠬᠤ ᠶ᠋ᠢ ᠲᠡᠷᠡ ᠬᠥᠭᠡᠴᠦ ᠡᠴᠡ ᠰᠤᠷᠤᠭᠰᠠᠨ ᠪᠢᠯᠡ᠃ ᠬᠡᠴᠢᠨᠡᠨ ᠤᠳᠠᠭᠠ ᠬᠥᠭᠡᠴᠦ ᠶ᠋ᠢ ᠳᠠᠭᠤᠷᠢᠶᠠᠵᠤ ᠲᠩᠷᠢ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠶ᠋ᠢ ᠬᠦᠰᠡᠭᠰᠡᠨ ᠪᠣᠯᠪᠠᠴᠤ ᠴᠢᠳᠠᠭᠠ ᠦᠭᠡᠢ ᠶᠦᠮ᠃ ᠭᠡᠲᠡᠯᠡ ᠣᠳᠣ ᠬᠡᠨ ᠨᠢᠭᠡᠨ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠬᠦ ᠦᠭᠡ ᠶ᠋ᠢ ᠨᠢ ᠰᠢᠪᠡᠨᠡᠵᠦ ᠪᠠᠢᠯᠠ᠃ ᠡᠨᠡ ᠪᠣᠯ ᠲᠡᠮᠦᠵᠢᠨ ᠲᠩᠷᠢ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠪᠠ ᠤᠤ ᠭᠡᠯᠲᠡᠢ᠃ ᠰᠣᠨᠣᠰᠤᠭᠰᠠᠨ ᠳ᠋ᠠᠭᠠᠨ ᠢᠲᠡᠭᠡᠮᠡ ᠦᠭᠡᠢ ᠲᠡᠢᠮᠦ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠲᠩᠷᠢ ᠶ᠋ᠢᠨ ᠬᠦᠰᠡᠯ ᠢ᠋ ᠰᠣᠨᠣᠰᠴᠤ ᠪᠣᠯᠤᠨᠠ ᠭᠡᠵᠦ ᠬᠥᠭᠡᠴᠦ ᠬᠤᠳᠠᠯ ᠬᠡᠯᠡᠭᠡ ᠦᠭᠡᠢ ᠠᠵᠢ᠃ ᠦᠭᠡ ᠳᠠᠭᠤ ᠴᠥᠭᠡᠨ ᠲᠡᠢ ᠲᠦᠭ ᠲᠠᠭ ᠶᠠᠷᠢᠶᠠ ᠲᠠᠢ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠡᠢᠮᠦ ᠭᠠᠢᠬᠠᠯᠲᠠᠢ ᠤᠷᠠᠨ ᠭᠦᠨᠵᠡᠭᠡᠢ ᠦᠭᠡ ᠬᠡᠯᠡᠵᠦ ᠬᠤᠷᠠᠭᠰᠠᠨ ᠣᠯᠠᠨ ᠢ᠋ ᠬᠣᠷᠣᠮ ᠤ᠋ᠨ ᠲᠡᠳᠦᠢ ᠳ᠋ᠦ᠍ ᠪᠢᠰᠢᠷᠡᠭᠦᠯᠦᠨ ᠡᠵᠡᠮᠳᠡᠬᠦ ᠶ᠋ᠢ ᠥᠭᠡᠯᠦᠨ ᠭᠠᠢᠬᠠᠨ ᠬᠠᠷᠠᠵᠤ᠂ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠳᠠᠭᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠰᠤᠩᠭᠠᠪᠠ᠃ ᠬᠤᠷᠠᠭᠰᠠᠨ ᠣᠯᠠᠨ ᠪᠦᠭᠦᠳᠡᠭᠡᠷ ᠲᠩᠷᠢ ᠶ᠋ᠢᠨ ᠳᠠᠯᠳᠠ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠨ ᠨᠢᠭᠡᠨ ᠵᠡᠷᠭᠡ ᠪᠡᠷ ᠰᠥᠬᠥᠷᠡᠨ ᠰᠠᠭᠤᠵᠤ ᠲᠡᠮᠦᠵᠢᠨ ᠳ᠋ᠦ᠍ ᠮᠥᠷᠭᠥᠵᠡᠢ᠃ ᠠᠩᠬᠠ ᠨᠠᠭᠤᠷ ᠤ᠋ᠨ ᠡᠬᠢᠨ ᠳ᠋ᠦ᠍ ᠠᠮᠢ ᠪᠠᠨ ᠣᠢᠨ ᠦᠬᠦᠬᠦ ᠪᠡᠷ ᠢᠷᠡᠬᠦ ᠳ᠋ᠡᠭᠡᠨ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠡᠴᠡ ᠪᠡᠨ ᠮᠡᠳᠡᠷᠡᠭᠰᠡᠨ ᠲᠡᠷᠡ ᠳᠠᠯᠳᠠ ᠢᠳᠢ ᠰᠢᠳᠢ ᠶ᠋ᠢᠨ ᠬᠦᠴᠦ ᠶ᠋ᠢ ᠥᠭᠡᠯᠦᠨ ᠳᠠᠬᠢᠨ ᠮᠡᠳᠡᠷᠡᠵᠡᠢ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠨᠢ ᠲᠩᠷᠢ ᠶ᠋ᠢᠨ ᠵᠠᠷᠤᠭᠠᠯ ᠢ᠋ᠶ᠋ᠠᠷ ᠮᠡᠨᠳᠦᠯᠡᠭᠰᠡᠨ ᠪᠣᠯᠬᠤ ᠶ᠋ᠢ ᠥᠭᠡᠯᠦᠨ ᠳᠠᠬᠢᠨ ᠦᠵᠡᠵᠦ ᠢᠲᠡᠭᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠰᠠᠷᠠᠨ ᠤ᠋ ᠭᠡᠷᠡᠯ ᠲᠡᠢ ᠬᠠᠮᠲᠤ ᠲᠡᠮᠦᠵᠢᠨ ᠦ᠌ ᠪᠡᠶᠡ ᠳ᠋ᠦ᠍ ᠰᠢᠩᠭᠡᠵᠦ ᠪᠠᠢᠭᠰᠠᠨ ᠬᠦᠴᠦ ᠣᠳᠣ ᠲᠡᠮᠦᠵᠢᠨ ᠡᠴᠡ ᠲᠦᠭᠡᠨ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠠᠭᠠᠨ ᠭᠡᠷᠡᠯᠲᠦᠨ ᠰᠠᠴᠤᠷᠠᠵᠤ ᠪᠠᠢᠬᠤ ᠶ᠋ᠢ ᠥᠭᠡᠯᠦᠨ ᠬᠠᠷᠠᠪᠠ᠃ ᠪᠠᠰᠠ ᠡᠨᠳᠡ ᠰᠠᠭᠤᠭᠰᠠᠨ ᠪᠦᠬᠦ ᠬᠥᠮᠦᠰ ᠦᠵᠡᠵᠦ ᠪᠣᠢ ᠭᠡᠳᠡᠭ ᠲᠦ᠍ ᠴᠦ᠍ ᠢᠲᠡᠭᠡᠵᠡᠢ᠃ ᠲᠡᠮᠦᠵᠢᠨ ᠦ᠌ ᠪᠡᠶᠡ ᠡᠴᠡ ᠰᠠᠴᠤᠷᠠᠭᠰᠠᠨ ᠭᠡᠷᠡᠯ ᠲᠩᠷᠢ ᠳ᠋ᠦ᠍ ᠭᠠᠷᠴᠤ ᠰᠣᠯᠣᠩᠭᠠ ᠪᠣᠯᠤᠨ ᠲᠣᠭᠲᠠᠭᠰᠠᠨ ᠨᠢ ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠭᠡᠵᠦ ᠢᠳᠡᠭᠡᠨ᠂ ᠪᠢᠰᠢᠷᠡᠨ ᠳᠠᠭᠠᠬᠤ ᠰᠡᠳᠬᠢᠯ ᠢ᠋ ᠬᠦᠴᠦᠲᠡᠢ ᠪᠣᠯᠭᠠᠬᠤ ᠠᠵᠢ᠃ ᠢᠩᠭᠢᠵᠦ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠨᠢ ᠭᠠᠭᠴᠠ ᠬᠣᠷᠣᠮ ᠤ᠋ᠨ ᠳᠣᠲᠣᠷᠠ ᠲᠩᠷᠢ ᠶ᠋ᠢᠨ ᠢᠪᠡᠭᠡᠯ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠲᠦᠮᠡᠨ ᠦ᠌ ᠡᠵᠡᠨ ᠪᠣᠯᠤᠨ ᠲᠣᠳᠣᠷᠠᠬᠤ ᠶ᠋ᠢ ᠥᠭᠡᠯᠦᠨ ᠦᠵᠡᠪᠡ᠃ ᠲᠡᠮᠦᠵᠢᠨ ᠦ᠌ ᠪᠡᠶᠡ ᠡᠴᠡ ᠰᠠᠴᠤᠷᠠᠭᠰᠠᠨ ᠭᠡᠷᠡᠯ ᠢ᠋ ᠥᠭᠡᠯᠦᠨ ᠡᠴᠡ ᠥᠭᠡᠷᠡ ᠬᠥᠮᠦᠨ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠲᠩᠷᠢ ᠳ᠋ᠦ᠍ ᠲᠠᠲᠠᠭᠰᠠᠨ ᠰᠣᠯᠣᠩᠭᠠ ᠪᠦᠭᠦᠳᠡ ᠳ᠋ᠦ᠍ ᠦᠵᠡᠭᠳᠡᠵᠡᠢ᠃
ᠭᠡᠪᠡᠴᠦ ᠰᠡᠳᠬᠢᠯ ᠬᠥᠳᠡᠯᠭᠡᠭᠰᠡᠨ᠂ ᠡᠨᠡ ᠪᠠᠶᠠᠷ ᠬᠥᠷ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠭᠰᠡᠨ ᠦᠭᠡᠢ᠃ ᠤᠴᠢᠷ ᠨᠢ ᠬᠠᠰᠠᠷ ᠬᠥᠪᠡᠭᠦᠨ ᠨᠢ ᠥᠪᠡᠷ ᠦ᠋ᠨ ᠠᠲᠠᠭᠠᠷᠬᠠᠯ ᠬᠦᠰᠡᠯ ᠢ᠋ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠳᠦᠨ ᠡᠴᠡ ᠨᠢᠭᠤᠵᠤ ᠡᠰᠡ ᠴᠢᠳᠠᠭᠠᠳ ᠨᠠᠢᠷ ᠤ᠋ᠨ ᠲᠠᠯᠠᠪᠠᠢ ᠠ᠋ᠴᠠ ᠬᠣᠯᠠᠳᠤᠨ ᠶᠠᠪᠤᠬᠤ ᠳ᠋ᠤ᠌ ᠥᠭᠡᠯᠦᠨ ᠶᠡᠬᠡᠳᠡ ᠠᠶᠤᠵᠠᠢ᠃ ᠬᠠᠰᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠠᠢᠪᠤᠰᠢᠷᠠᠭᠤᠯᠤᠨ ᠰᠡᠷᠡᠮᠵᠢᠯᠡᠭᠦᠯᠬᠦ ᠦᠭᠡᠢ ᠪᠣᠯ ᠬᠥᠪᠡᠭᠦᠳ ᠦ᠋ᠨ ᠬᠢᠨᠢ ᠠᠲᠠᠭᠠᠷᠬᠠᠯ ᠬᠦᠰᠡᠯ ᠡᠴᠦᠰ ᠲᠡᠭᠡᠨ ᠶᠠᠭᠤᠨ ᠳ᠋ᠤ᠌ ᠬᠦᠷᠭᠡᠵᠦ ᠪᠣᠯᠬᠤ ᠶ᠋ᠢ ᠥᠭᠡᠯᠦᠨ ᠪᠦᠷᠢᠨ ᠲᠠᠭᠠᠮᠠᠭᠯᠠᠭᠠ ᠦᠭᠡᠢ ᠴᠦ᠍ ᠢᠷᠡᠬᠦ ᠠᠶᠤᠯ ᠢ᠋ ᠮᠡᠳᠡᠷᠡᠨ ᠲᠦᠭᠰᠢᠵᠡᠢ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠦ᠌ ᠶᠠᠭᠤ ᠭᠡᠵᠦ ᠰᠢᠢᠳᠦᠭᠰᠡᠨ ᠢ᠋ ᠳᠠᠩᠴᠤ ᠳᠠᠭᠠᠬᠤ ᠠᠷᠭᠠ ᠦᠭᠡᠢ ᠪᠢᠯᠡ᠃ ᠬᠠᠰᠠᠷ ᠢ᠋ ᠶᠠᠮᠠᠷ ᠴᠣᠬᠢᠯᠲᠠ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠢ᠋ ᠥᠭᠡᠯᠦᠨ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃ ᠦᠳᠡᠰᠢ ᠪᠣᠯᠵᠤ ᠨᠠᠢᠷ ᠥᠨᠳᠥᠷᠯᠡᠬᠦ ᠶ᠋ᠢᠨ ᠡᠮᠦᠨᠡ ᠡᠳᠦᠷᠵᠢᠨ ᠵᠥᠴᠢ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠲᠠᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠲᠡᠮᠦᠵᠢᠨ ᠳᠠᠬᠢᠨ ᠪᠣᠰᠴᠤ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠭᠰᠡᠨ ᠳ᠋ᠦ᠍ ᠬᠠᠯᠠᠮᠴᠠᠭᠰᠠᠨ ᠰᠣᠭᠲᠣᠭᠰᠠᠨ ᠣᠯᠠᠨ ᠲᠡᠷᠡ ᠳᠠᠷᠤᠢ ᠨᠠᠮ ᠭᠦᠮ ᠪᠣᠯᠵᠠᠢ᠃ ᠲᠡᠳᠡ ᠰᠢᠨᠡ ᠡᠵᠡᠨ ᠦ᠌ ᠪᠡᠨ ᠦᠭᠡ ᠶ᠋ᠢ ᠡᠢᠮᠦ ᠠᠮᠠᠷᠬᠠᠨ ᠰᠣᠨᠣᠰᠴᠤ ᠰᠤᠷᠤᠭᠰᠠᠨ ᠭᠡᠬᠦ ᠳ᠋ᠦ᠍ ᠬᠠᠷᠠᠭᠠᠳ ᠴᠦ᠍ ᠢᠲᠡᠭᠡᠬᠦ ᠠᠷᠭᠠ ᠦᠭᠡᠢ ᠠᠵᠢ᠃
— ᠪᠣᠷᠵᠢᠭᠢᠨ ᠠᠢᠮᠠᠭ ᠢ᠋ᠶ᠋ᠠᠨ ᠡᠷᠭᠢᠭᠦᠯᠦᠨ ᠨᠢᠭᠡᠳᠬᠡᠭᠰᠡᠨ ᠨᠢ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠪᠣᠯᠵᠠᠢ᠃ ᠪᠢ ᠠᠢᠮᠠᠭ ᠢ᠋ᠶ᠋ᠠᠨ ᠬᠣᠶᠠᠷ ᠬᠤᠪᠢᠶᠠᠨ ᠪᠠᠷᠠᠭᠤᠨ ᠵᠡᠭᠦᠨ ᠭᠠᠷ ᠤ᠋ᠨ ᠲᠦᠮᠡᠨ ᠪᠣᠯᠭᠠᠬᠤ ᠪᠠᠷ ᠰᠢᠢᠳᠪᠡ᠃ ᠮᠢᠨᠦ ᠲᠥᠯᠥᠭᠡ ᠬᠠᠮᠤᠭ ᠶᠡᠬᠡ ᠶ᠋ᠢ ᠬᠢᠵᠦ ᠵᠢᠳᠬᠦᠭᠰᠡᠨ ᠪᠠᠭᠠ ᠶ᠋ᠢᠨ ᠦᠨᠡᠨᠴᠢ ᠨᠥᠬᠥᠳ ᠪᠤᠭᠤᠷᠴᠢ᠂ ᠵᠡᠯᠮᠡ ᠬᠣᠶᠠᠷ ᠢ᠋ᠶ᠋ᠠᠷ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠲᠦᠮᠡᠨ ᠢ᠋ ᠵᠠᠬᠢᠷᠤᠭᠤᠯᠵᠤ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠᠬᠢ ᠪᠦᠬᠦ ᠬᠡᠷᠡᠭ ᠢ᠋ ᠮᠢᠨᠦ ᠬᠣᠶᠠᠷ ᠨᠥᠬᠥᠷ ᠨᠠᠳᠠ ᠲᠠᠢ ᠵᠥᠪᠰᠢᠨ ᠰᠢᠢᠳᠪᠦᠷᠢᠯᠡᠬᠦ ᠪᠣᠯᠤᠨᠠ᠃ ᠮᠢᠨᠦ ᠡᠨᠡ ᠦᠭᠡ ᠶ᠋ᠢ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠭᠡᠵᠦ ᠳᠠᠭᠠᠭᠲᠤᠨ ᠭᠡᠵᠡᠢ᠃ ᠡᠨᠡ ᠪᠣᠯ ᠭᠠᠭᠴᠠ ᠬᠠᠰᠠᠷ ᠢ᠋ ᠪᠢᠰᠢ ᠰᠣᠨᠣᠰᠤᠭᠰᠠᠨ ᠪᠦᠭᠦᠳᠡ ᠶ᠋ᠢ ᠭᠠᠢᠬᠠᠨ ᠠᠯᠮᠠᠢᠷᠠᠭᠤᠯᠤᠭᠰᠠᠨ ᠭᠡᠨᠡᠳᠲᠡ ᠶ᠋ᠢᠨ ᠶᠠᠪᠤᠳᠠᠯ ᠪᠣᠯᠪᠠ᠃ ᠪᠡᠭᠲᠡᠷ ᠢ᠋ ᠠᠯᠠᠬᠤ ᠳ᠋ᠤ᠌ ᠣᠷᠣᠯᠴᠠᠪᠠᠯ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠤᠳᠠᠭᠠᠬᠢ ᠡᠷᠬᠡ ᠶ᠋ᠢ ᠥᠭᠬᠦ ᠪᠡᠷ ᠠᠮᠠᠯᠠᠭᠰᠠᠨ ᠨᠢ ᠡᠷᠲᠡ ᠪᠠᠭᠠ ᠶ᠋ᠢᠨ ᠬᠡᠷᠡᠭ ᠪᠣᠯᠪᠠᠴᠤ ᠲᠠᠯᠪᠢᠭᠰᠠᠨ ᠲᠠᠩᠭᠠᠷᠢᠭ ᠡᠯᠡᠭᠳᠡᠵᠦ ᠬᠠᠭᠤᠴᠢᠷᠠᠬᠤ ᠶᠣᠰᠣ ᠮᠣᠩᠭᠣᠯᠴᠤᠳ ᠤ᠋ᠨ ᠬᠤᠪᠢ ᠳ᠋ᠤ᠌ ᠦᠭᠡᠢ ᠲᠤᠯᠠ ᠬᠠᠰᠠᠷ ᠶᠠᠭ ᠢᠩᠭᠢᠵᠦ ᠢᠳᠡᠭᠡᠨ ᠨᠢᠭᠡᠨᠲᠡ ᠲᠡᠮᠦᠵᠢᠨ ᠠᠢᠮᠠᠭ ᠤ᠋ᠨ ᠬᠠᠨ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠲᠡᠭᠦᠨ ᠳ᠋ᠦ᠍ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠᠬᠢ ᠤᠳᠠᠭᠠᠬᠢ ᠡᠷᠬᠡ ᠨᠣᠭᠳᠠᠨᠠ ᠭᠡᠵᠦ ᠳᠣᠭᠳᠣᠯᠤᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠨᠢ ᠲᠠᠯᠠᠭᠠᠷ ᠪᠣᠯᠪᠠ᠃ ᠭᠡᠲᠡᠯᠡ ᠲᠡᠮᠦᠵᠢᠨ ᠬᠠᠰᠠᠷ ᠢ᠋ ᠬᠥᠮᠦᠨ ᠭᠡᠵᠦ ᠲᠣᠭᠣᠭᠰᠠᠨ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠲᠡᠭᠦᠨ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠰᠡᠴᠡ ᠪᠡᠬᠢ᠂ ᠠᠯᠲᠠᠨ᠂ ᠬᠤᠴᠢᠷ ᠨᠠᠷ ᠪᠣᠯᠤᠭᠠᠳ ᠠᠬᠠᠮᠠᠳ ᠤ᠋ᠳ ᠶᠠᠭᠤ ᠭᠡᠬᠦ ᠶ᠋ᠢ ᠴᠦ᠍ ᠪᠣᠳᠣᠭᠰᠠᠨ ᠦᠭᠡᠢ᠃ ᠡᠨᠡ ᠰᠢᠢᠳᠪᠦᠷᠢ ᠲᠡᠮᠦᠵᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠰᠠᠨᠠᠮᠰᠠᠷ ᠦᠭᠡᠢ ᠪᠤᠶᠤ ᠭᠡᠨᠡᠳᠲᠡ ᠶ᠋ᠢᠨ ᠪᠢᠰᠢ ᠪᠠᠢᠪᠠ᠃ ᠢᠩᠭᠢᠵᠦ ᠰᠢᠢᠳᠬᠦ ᠶ᠋ᠢ ᠲᠡᠷᠡ ᠭᠠᠭᠴᠠ ᠡᠨᠡ ᠨᠠᠢᠷ ᠤ᠋ᠨ ᠳᠤᠮᠳᠠᠭᠤᠷ ᠪᠣᠳᠣᠵᠤ ᠣᠯᠤᠭᠰᠠᠨ ᠦᠭᠡᠢ᠃ ᠪᠠᠰᠠ ᠲᠩᠷᠢ ᠴᠦ᠍ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠦᠭᠡᠢ᠃ ᠠᠢᠮᠠᠭ ᠤ᠋ᠨ ᠣᠯᠠᠨ ᠠᠯᠪᠠᠲᠤ ᠣᠢᠷᠠ ᠳᠣᠲᠣᠨᠣ ᠨᠥᠬᠥᠳ ᠠᠬᠠᠮᠠᠳ ᠬᠥᠮᠦᠰ ᠡᠴᠡ ᠲᠡᠮᠦᠵᠢᠨ ᠳ᠋ᠦ᠍ ᠡᠷᠡᠭᠡᠯᠵᠡᠬᠦ ᠦᠭᠡᠢ ᠦᠨᠡᠨᠴᠢ ᠵᠢᠳᠬᠦᠬᠦ᠂ ᠬᠡᠯᠡᠭᠰᠡᠨ ᠢ᠋ ᠨᠢ ᠰᠢᠭᠦᠮᠵᠢᠯᠡᠬᠦ ᠦᠭᠡᠢ ᠪᠡᠷ ᠪᠡᠶᠡᠯᠡᠭᠦᠯᠬᠦ ᠬᠥᠮᠦᠰ ᠨᠢ ᠴᠣᠬᠣᠮ ᠪᠤᠭᠤᠷᠴᠢ ᠵᠠᠯᠮᠠ ᠬᠣᠶᠠᠷ ᠭᠡᠵᠦ ᠲᠡᠷᠡ ᠰᠣᠩᠭᠣᠵᠠᠢ᠃ ᠲᠡᠮᠦᠵᠢᠨ ᠥᠪᠡᠷ ᠲᠡᠭᠡᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠨᠥᠬᠥᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ ᠪᠡᠨ ᠬᠦᠷᠢᠶᠡᠯᠡᠭᠦᠯᠵᠦ ᠰᠠᠨᠠᠭᠰᠠᠨ ᠬᠡᠷᠡᠭ ᠢ᠋ᠶ᠋ᠡᠨ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠰᠢᠢᠳᠦᠭᠰᠡᠨ ᠪᠢᠯᠡ᠃ ᠡᠨᠡ ᠭᠡᠨᠡᠳᠲᠡ ᠶ᠋ᠢᠨ ᠰᠣᠴᠢᠮᠠᠷ ᠰᠢᠢᠳᠪᠦᠷᠢ ᠨᠢ ᠬᠣᠵᠢᠮ ᠬᠣᠢᠰᠢᠳᠠ ᠶ᠋ᠢᠨ ᠶᠡᠬᠡ ᠦᠢᠯᠡ ᠶ᠋ᠢᠨ ᠭᠠᠷᠴᠠᠭᠠ ᠦᠭᠡᠢ ᠵᠥᠪ ᠡᠬᠢᠯᠡᠯ ᠪᠣᠯᠬᠤ ᠶ᠋ᠢ ᠴᠦ᠍ ᠮᠡᠳᠡᠵᠦ ᠪᠠᠢᠪᠠ᠃ ᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠥᠭᠡᠯᠦᠨ ᠡᠬᠡ ᠪᠣᠯᠤᠭᠠᠳ ᠬᠠᠰᠠᠷ ᠤ᠋ᠨ ᠭᠣᠮᠣᠳᠠᠯ ᠠ᠋ᠴᠠ ᠠᠶᠤᠭᠰᠠᠨ ᠦᠭᠡᠢ᠃ ᠠᠮᠪᠠᠭᠠᠢ ᠬᠠᠭᠠᠨ᠂ ᠬᠣᠲᠠᠯᠠ ᠬᠠᠭᠠᠨ᠂ ᠨᠡᠭᠦᠨ ᠲᠠᠢᠵᠢ ᠶ᠋ᠢᠨ ᠦᠷᠡ ᠤᠳᠤᠮ ᠤ᠋ᠨ ᠵᠦᠭ ᠡᠴᠡ ᠭᠠᠷᠭᠠᠵᠤ ᠪᠣᠯᠬᠤ ᠡᠰᠡᠷᠭᠦᠴᠡᠯ ᠡᠴᠡ᠂ ᠪᠦᠷ ᠲᠡᠳᠡ ᠰᠠᠯᠵᠤ ᠶᠠᠪᠤᠬᠤ ᠠ᠋ᠴᠠ ᠴᠦ᠍ ᠠᠶᠤᠭᠰᠠᠨ ᠦᠭᠡᠢ ᠪᠢᠯᠡ᠃ ᠰᠢᠨᠡ ᠪᠥᠭᠡᠳ ᠵᠥᠪ ᠰᠢᠢᠳᠪᠦᠷᠢ ᠢᠮᠠᠭᠲᠠ ᠡᠰᠡᠷᠭᠦᠴᠡᠯ ᠲᠡᠢ ᠲᠤᠯᠤᠯᠳᠤᠳᠠᠭ ᠢ᠋ ᠲᠡᠮᠦᠵᠢᠨ ᠮᠡᠳᠡᠳᠡᠭ ᠪᠣᠯᠵᠠᠢ᠃ ᠥᠭᠡᠯᠦᠨ ᠡᠬᠡ ᠨᠢ ᠤᠴᠢᠷᠯᠠᠵᠤ ᠰᠠᠨᠠᠭᠤᠯᠤᠨ ᠳᠠᠭᠤ ᠦᠭᠡᠢ ᠰᠢᠷᠲᠡᠬᠦ ᠶ᠋ᠢ᠂ ᠬᠠᠰᠠᠷ ᠨᠠᠢᠷ ᠤ᠋ᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠣᠳᠬᠤ ᠶ᠋ᠢ ᠬᠠᠷᠠᠭᠰᠠᠭᠠᠷ ᠪᠣᠯᠪᠠᠴᠤ ᠠᠩᠭᠠᠵᠠᠷᠠᠭᠠ ᠦᠭᠡᠢ ᠮᠡᠲᠦ ᠰᠠᠭᠤᠵᠠᠢ᠃ ᠥᠭᠡᠯᠦᠨ ᠡᠬᠡ ᠨᠢ ᠬᠠᠮᠤᠭ ᠠ᠋ᠴᠠ ᠶᠡᠬᠡ ᠪᠡᠷ ᠰᠢᠨᠠᠯᠤᠨ ᠵᠣᠪᠠᠬᠤ ᠶ᠋ᠢ ᠴᠦ᠍ ᠮᠡᠳᠡᠵᠦ ᠪᠠᠢᠪᠠ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠳ᠋ᠦ᠍ ᠥᠭᠡᠷᠡ ᠵᠠᠮ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠮᠦᠵᠢᠨ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠨ ᠢ᠋ᠶ᠋ᠠᠷ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠨᠢ ᠶᠢᠰᠦᠭᠡᠢ ᠶ᠋ᠢᠨ ᠤᠳᠤᠮ ᠠᠯᠪᠠᠲᠤ ᠢᠷᠭᠡᠳ ᠦ᠋ᠨ ᠪᠠᠶᠠᠷ ᠪᠠᠬᠠᠳᠤᠯ ᠢ᠋ ᠪᠠᠳᠠᠷᠠᠭᠠᠭᠰᠠᠨ ᠬᠡᠷᠡᠭ ᠪᠣᠯᠪᠠᠴᠤ ᠥᠭᠡᠯᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠤ᠋ᠨ ᠡᠬᠢ ᠪᠣᠯᠵᠠᠢ᠃ ᠨᠢᠭᠡ ᠮᠢᠬᠠ ᠴᠢᠰᠤᠨ ᠠ᠋ᠴᠠ ᠤᠷᠭᠤᠨ ᠲᠥᠯᠵᠢᠵᠦ ᠤᠨᠠᠵᠤ ᠲᠥᠷᠥᠭᠰᠡᠨ ᠬᠣᠶᠠᠷ ᠬᠥᠪᠡᠭᠦᠨ ᠨᠢ ᠵᠠᠩ ᠠᠭᠠᠰᠢ ᠡᠷᠡᠰ ᠲᠠᠰᠤ ᠥᠭᠡᠷᠡ ᠲᠡᠷᠡ ᠪᠦᠦ ᠬᠡᠯᠡ ᠥᠷᠢᠰᠦᠯᠳᠦᠨ ᠲᠡᠮᠡᠴᠡᠯᠳᠦᠬᠦ ᠨᠢ ᠢᠯᠡᠷᠬᠡᠢ ᠪᠣᠯᠤᠭᠰᠠᠨ ᠨᠢ ᠢᠩᠭᠢᠵᠦ ᠵᠣᠪᠠᠬᠤ ᠳ᠋ᠤ᠌ ᠬᠦᠷᠭᠡᠪᠡ᠃ ᠲᠡᠮᠦᠵᠢᠨ ᠦ᠌ ᠬᠣᠷᠣᠨ ᠨᠢᠭᠤᠴᠠᠯᠢᠭ ᠵᠠᠩ ᠲᠥᠷᠬᠦ᠂ ᠬᠠᠰᠠᠷ ᠤ᠋ᠨ ᠢᠯᠡ ᠴᠠᠭᠠᠨ ᠲᠦᠷᠭᠡᠨ ᠠᠭᠠᠰᠢ ᠲᠠᠢ ᠶᠠᠭ ᠡᠳᠦᠷ ᠰᠥᠨᠢ ᠰᠢᠭ ᠶᠠᠭ ᠯᠠ ᠭᠠᠯ ᠤᠰᠤ ᠰᠢᠭ᠋ ᠬᠠᠷᠰᠢᠯᠠᠬᠤ ᠠᠵᠢ᠃ ᠲᠡᠮᠦᠵᠢᠨ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠨ ᠪᠣᠯᠤᠭᠰᠠᠨ ᠨᠢ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠪᠣᠯᠬᠤ ᠶ᠋ᠢ ᠥᠭᠡᠯᠦᠨ ᠨᠢᠭᠡᠨᠲᠡ ᠮᠡᠳᠡᠷᠡᠵᠦ ᠣᠢᠯᠠᠭᠠᠪᠠ᠃ ᠭᠡᠲᠡᠯᠡ ᠬᠠᠰᠠᠷ ᠡᠭᠦᠨ ᠢ᠋ ᠦᠯᠦ ᠣᠢᠯᠠᠭᠠᠬᠤ ᠪᠥᠭᠡᠳ ᠶᠠᠭᠤᠬᠠᠨ ᠳᠡᠭᠡᠷᠡ ᠴᠦ᠍ ᠪᠣᠯᠪᠠ ᠠᠬᠠ ᠲᠠᠢ ᠪᠠᠨ ᠥᠷᠢᠰᠦᠯᠳᠦᠨ ᠮᠥᠴᠡᠭᠡᠷᠬᠡᠬᠦ ᠪᠣᠯᠤᠭᠰᠠᠨ ᠨᠢ ᠴᠣᠬᠣᠮ ᠲᠩᠷᠢ ᠶ᠋ᠢᠨ ᠬᠡᠰᠭᠡᠭᠡᠯ ᠭᠡᠮᠡᠷ ᠪᠠᠢᠪᠠ᠃ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠᠬᠢ ᠬᠠᠮᠤᠭ ᠬᠡᠷᠡᠭ ᠢ᠋ ᠲᠡᠮᠦᠵᠢᠨ ᠥᠪᠡᠷ ᠦ᠋ᠨ ᠦᠨᠡᠨᠴᠢ ᠰᠢᠳᠠᠷ ᠤ᠋ᠳ ᠪᠣᠯᠬᠤ ᠪᠤᠭᠤᠷᠴᠢ᠂ ᠵᠠᠯᠮᠠ ᠬᠣᠶᠠᠷ ᠲᠤ ᠳᠠᠭᠠᠭᠠᠯᠭᠠᠭᠰᠠᠨ ᠨᠢ ᠬᠠᠰᠠᠷ ᠤ᠋ᠨ ᠭᠣᠮᠣᠳᠠᠯ ᠬᠣᠷᠣᠰᠤᠯ ᠢ᠋ ᠪᠠᠳᠠᠷᠠᠭᠠᠭᠰᠠᠨ ᠢ᠋ ᠥᠭᠡᠯᠦᠨ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠠᠢᠪᠠ᠃
ᠲᠡᠮᠦᠵᠢᠨ ᠦ᠌ ᠡᠨᠡ ᠰᠢᠢᠳᠪᠦᠷᠢ ᠦᠨᠡᠬᠡᠷ ᠨᠣᠴᠢᠲᠠᠢ ᠣᠰᠣᠯ ᠭᠠᠷᠭᠠᠵᠤ ᠮᠡᠳᠡᠬᠦ ᠲᠤᠯᠠ ᠠᠢᠮᠠᠭ ᠤ᠋ᠨ ᠪᠦᠬᠦ ᠶᠡᠬᠡᠰ ᠠᠬᠠᠮᠠᠳ ᠤ᠋ᠳ ᠢ᠋ ᠪᠦᠦ ᠬᠡᠯᠡ᠂ ᠵᠢᠷ ᠦ᠋ᠨ ᠠᠷᠠᠳ ᠤ᠋ᠨ ᠲᠡᠷᠡ ᠳᠤᠮᠳᠠ ᠪᠠᠨ ᠪᠤᠭᠤᠷᠴᠢ ᠵᠡᠯᠮᠡ ᠬᠣᠶᠠᠷ ᠢ᠋ ᠴᠦ᠍ ᠭᠠᠢᠬᠠᠰᠢᠷᠠᠭᠤᠯᠤᠭᠰᠠᠨ ᠪᠢᠯᠡ᠃ ᠬᠠᠷᠠᠴᠤ ᠪᠣᠭᠣᠯ ᠵᠠᠯᠮᠠ᠂ ᠬᠥᠨᠳᠡᠯᠡᠨ ᠦ᠌ ᠠᠷᠠᠳ ᠤ᠋ᠨ ᠬᠥᠪᠡᠭᠦᠨ ᠪᠤᠭᠤᠷᠴᠢ ᠶ᠋ᠢ ᠢᠩᠭᠢᠵᠦ ᠡᠷᠭᠦᠮᠵᠢᠯᠡᠭᠰᠡᠨ ᠨᠢ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠤᠷᠢᠳ ᠡᠮᠦᠨᠡ ᠦᠵᠡᠵᠦ ᠰᠣᠨᠣᠰᠤᠭᠠ ᠦᠭᠡᠢ ᠬᠡᠷᠡᠭ ᠪᠠᠢᠪᠠ᠃ ᠠᠯᠲᠠᠨ᠂ ᠬᠤᠴᠢᠷ᠂ ᠰᠡᠴᠡ ᠪᠡᠬᠢ ᠭᠡᠳ ᠤᠳᠤᠮ ᠰᠤᠳᠤᠷ ᠲᠠᠢ ᠤᠭᠰᠠᠭᠠ ᠭᠠᠷᠪᠠᠯᠢ ᠲᠠᠢ ᠠᠬᠠᠮᠠᠳ ᠨᠠᠰᠤᠲᠠᠢ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠬᠥᠮᠦᠰ ᠣᠯᠠᠨ ᠢ᠋ᠶ᠋ᠠᠷ ᠪᠠᠢᠲᠠᠯᠠ ᠲᠤᠤ ᠭᠡᠬᠦ ᠨᠣᠬᠠᠢ ᠦᠭᠡᠢ ᠴᠦᠦ ᠭᠡᠬᠦ ᠮᠣᠷᠢ ᠦᠭᠡᠢ ᠰᠢᠬᠠᠮ ᠲᠡᠳᠡᠨ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠨᠢ ᠳᠥᠩᠭᠡᠵᠢ ᠨᠢᠭᠡᠳᠦᠭᠡᠳ ᠪᠠᠢᠭᠰᠠᠨ ᠬᠢᠶᠠᠳ᠂ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠢᠨ ᠳ᠋ᠦ᠍ ᠡᠷᠭᠢᠭᠡᠳ ᠵᠠᠳᠠᠷᠠᠬᠤ ᠠᠶᠤᠯ ᠢ᠋ ᠢᠯᠡᠷᠬᠡᠢ ᠪᠣᠢ ᠪᠣᠯᠭᠠᠵᠠᠢ᠃ ᠣᠯᠠᠨ ᠬᠥᠮᠦᠨ ᠮᠠᠭᠤ ᠢᠷᠣᠯᠠᠨ ᠪᠣᠳᠣᠭᠰᠠᠨ ᠨᠢ ᠶᠣᠰᠣᠭᠠᠷ ᠪᠣᠯᠵᠤ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠ ᠶᠡᠬᠡ ᠡᠷᠬᠡ ᠡᠳ᠋ᠯᠡᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠰᠡᠴᠡ ᠪᠡᠬᠢ᠂ ᠠᠯᠲᠠᠨ᠂ ᠬᠣᠴᠢᠷ ᠨᠠᠷ ᠰᠠᠯᠵᠤ ᠶᠠᠪᠤᠵᠠᠢ᠃ ᠭᠡᠲᠡᠯᠡ ᠲᠡᠮᠦᠵᠢᠨ ᠦ᠌ ᠬᠠᠷᠢᠭᠤ ᠰᠠᠨᠠᠮᠰᠠᠷ ᠦᠭᠡᠢ ᠪᠥᠭᠡᠳ ᠠᠶᠤᠮᠰᠢᠭᠲᠠᠢ ᠪᠠᠢᠯᠠ᠃ ᠰᠡᠴᠡ ᠪᠡᠬᠢ᠂ ᠠᠯᠲᠠᠨ᠂ ᠬᠣᠴᠢᠷ ᠨᠠᠷ ᠢ᠋ ᠪᠠᠷᠢᠨ ᠠᠪᠴᠢᠷᠠᠵᠤ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠬᠦ ᠳ᠋ᠡᠭᠡᠨ ᠡᠷᠭᠦᠭᠰᠡᠨ ᠲᠠᠩᠭᠠᠷᠢᠭ ᠢ᠋ ᠨᠢ ᠰᠠᠨᠠᠭᠤᠯᠵᠤ ᠪᠠᠢᠭᠠᠳ ᠣᠯᠠᠨ ᠤ᠋ ᠡᠮᠦᠨᠡ ᠴᠠᠭᠠᠵᠠᠯᠠᠵᠠᠢ᠃ ᠬᠡᠨ ᠴᠦ᠍ ᠲᠡᠳᠡᠨ ᠢ᠋ ᠥᠮᠥᠭᠡᠷᠡᠨ ᠪᠣᠰᠤᠭᠰᠠᠨ ᠦᠭᠡᠢ᠃ ᠲᠡᠮᠦᠵᠢᠨ ᠢᠩᠭᠢᠵᠦ ᠥᠪᠡᠷ ᠦ᠋ᠨ ᠪᠠᠢᠷᠢ ᠰᠠᠭᠤᠷᠢ ᠨᠡᠷᠡ ᠲᠥᠷᠥ ᠶ᠋ᠢ ᠪᠡᠬᠢᠵᠢᠭᠦᠯᠦᠨ ᠠᠪᠴᠠᠢ᠃ ᠡᠨᠡ ᠴᠠᠭᠠᠵᠠ ᠠ᠋ᠴᠠ ᠬᠣᠢᠰᠢ ᠠᠬᠠᠮᠠᠳ ᠤ᠋ᠳ ᠤ᠋ᠨ ᠵᠦᠭ ᠡᠴᠡ ᠲᠡᠮᠦᠵᠢᠨ ᠢ᠋ ᠦᠯᠦ ᠲᠣᠭᠣᠮᠰᠠᠷᠯᠠᠬᠤ ᠪᠠᠢᠳᠠᠯ ᠲᠠᠰᠤᠷᠠᠵᠠᠢ᠃ ᠬᠢᠶᠠᠳ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠭᠤᠴᠢᠨ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠳᠤᠮᠳᠠ ᠬᠠᠮᠤᠭ ᠤ᠋ᠨ ᠶᠡᠬᠡ ᠨᠡᠷᠡᠲᠡᠢ ᠭᠤᠷᠪᠠᠨ ᠲᠣᠯᠣᠭᠠᠢᠯᠠᠭᠴᠢ ᠶ᠋ᠢ ᠴᠠᠭᠠᠵᠠᠯᠠᠭᠰᠠᠨ ᠢ᠋ᠶ᠋ᠠᠷ ᠲᠡᠮᠦᠵᠢᠨ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠡᠮᠵᠢᠶᠡ ᠦᠭᠡᠢ ᠡᠷᠬᠡᠲᠦ ᠡᠵᠡᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠪᠠᠲᠤᠯᠠᠪᠠ᠃ ᠵᠠᠯᠠᠭᠤ ᠲᠡᠮᠦᠵᠢᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠪᠤᠲᠠᠷᠠᠭᠰᠠᠨ ᠠᠢᠮᠠᠭ ᠢ᠋ᠶ᠋ᠠᠨ ᠨᠢᠭᠡᠳᠬᠡᠭᠡᠳ ᠡᠴᠦᠰ ᠲᠦ᠋ᠨᠢ ᠥᠪᠡᠷ ᠦ᠋ᠨ ᠪᠣᠯᠭᠠᠨᠠ ᠭᠡᠵᠦ ᠲᠣᠬᠢᠷᠠᠯᠴᠠᠭᠠᠳ ᠪᠠᠢᠭᠰᠠᠨ ᠲᠡᠳᠡᠨ ᠦ᠌ ᠳᠠᠯᠳᠠ ᠰᠠᠨᠠᠭᠠ ᠲᠠᠯᠠᠭᠠᠷ ᠪᠣᠯᠵᠤ ᠠᠮᠢ ᠪᠠᠨ ᠠᠯᠳᠠᠵᠠᠭᠠᠪᠠ᠃ ᠲᠡᠳᠡ ᠦᠨᠡᠬᠡᠷ ᠥᠪᠡᠷᠰᠡᠳ ᠦ᠋ᠨ ᠢᠷᠡᠭᠡᠳᠦᠢ ᠶ᠋ᠢᠨ ᠡᠷᠬᠡ ᠮᠠᠲᠠᠯ ᠤ᠋ᠨ ᠲᠥᠯᠥᠭᠡ ᠲᠡᠮᠦᠵᠢᠨ ᠢ᠋ᠶ᠋ᠡᠷ ᠬᠦᠨᠳᠦ ᠶ᠋ᠢ ᠡᠭᠦᠷᠦᠭᠦᠯᠵᠦ ᠬᠦᠴᠢᠷ ᠢ᠋ ᠲᠤᠭᠤᠯᠤᠭᠤᠯᠬᠤ ᠪᠠᠷ ᠦᠭᠡᠰᠡᠨ ᠲᠣᠬᠢᠷᠠᠭᠠᠳ ᠶᠢᠰᠦᠭᠡᠢ ᠶ᠋ᠢᠨ ᠬᠥᠪᠡᠭᠦᠨ ᠢ᠋ ᠢᠩᠭᠢᠵᠦ ᠤᠷᠢᠶᠠᠯᠠᠭᠠᠬᠠᠨ ᠢ᠋ᠶ᠋ᠠᠷ ᠡᠷᠭᠦᠮᠵᠢᠯᠡᠭᠰᠡᠨ ᠪᠢᠯᠡ᠃ ᠬᠠᠷᠢᠨ ᠬᠠᠰᠠᠷ ᠢ᠋ ᠶᠠᠳᠠᠵᠤ ᠪᠣᠭᠣᠯ ᠵᠠᠯᠮᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠬᠦ ᠶ᠋ᠢ ᠬᠦᠰᠡᠭᠰᠡᠨ ᠬᠦᠯᠢᠶᠡᠭᠰᠡᠨ ᠬᠥᠮᠦᠨ ᠴᠥᠭᠡᠨ ᠦᠭᠡᠢ ᠪᠠᠢᠯᠠ᠃ ᠭᠡᠲᠡᠯᠡ ᠲᠡᠮᠦᠵᠢᠨ ᠢᠩᠭᠢᠬᠦ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠳᠠᠯᠳᠠ ᠨᠠᠷᠢᠨ ᠰᠠᠨᠠᠭᠠ ᠶ᠋ᠢ ᠥᠭᠡᠯᠦᠨ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠯᠠ᠃ ᠲᠡᠮᠦᠵᠢᠨ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠᠬᠢ ᠡᠷᠬᠡ ᠶ᠋ᠢ ᠬᠡᠨ ᠲᠡᠢ ᠴᠦ᠍ ᠬᠤᠪᠢᠶᠠᠬᠤ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ ᠠᠵᠢ᠃ ᠲᠡᠮᠦᠵᠢᠨ ᠦ᠌ ᠨᠢᠭᠤᠴᠠᠭᠠᠢ ᠳᠠᠭᠤ ᠦᠭᠡᠢ ᠲᠥᠷᠬᠦ ᠶ᠋ᠢᠨ ᠴᠠᠭᠠᠨᠠ ᠶᠠᠮᠠᠷ ᠭᠦᠨᠵᠡᠭᠡᠢ ᠪᠣᠳᠣᠯ ᠰᠠᠨᠠᠭᠠ ᠨᠢᠭᠤᠭᠳᠠᠵᠤ ᠪᠠᠢᠭᠠ ᠶ᠋ᠢ ᠥᠭᠡᠯᠦᠨ ᠪᠦᠷᠢᠨ ᠳᠠᠭᠠᠵᠤ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠶᠠᠭ ᠢᠩᠭᠢᠵᠦ ᠣᠢᠯᠠᠭᠠᠵᠠᠢ᠃ ᠲᠡᠮᠦᠵᠢᠨ ᠤᠷᠢᠳ ᠡᠮᠦᠨᠡ ᠬᠡᠨ ᠦ᠌ ᠴᠦ᠍ ᠶᠠᠪᠤᠵᠤ ᠪᠠᠢᠭᠠ ᠦᠭᠡᠢ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠦᠭᠦᠳᠡ ᠶ᠋ᠢ ᠴᠣ ᠰᠢᠨᠡ ᠪᠡᠷ ᠬᠢᠬᠦ ᠶ᠋ᠢ ᠬᠦᠰᠡᠵᠦ ᠪᠠᠢᠭᠠ ᠨᠢ ᠢᠯᠡᠳᠲᠡ ᠪᠠᠢᠪᠠ᠃ ᠥᠪᠡᠷ ᠲᠡᠭᠡᠨ ᠬᠠᠮᠤᠭ ᠤ᠋ᠨ ᠦᠨᠡᠨᠴᠢ᠂ ᠠᠮᠢ ᠪᠠᠨ ᠴᠦ᠍ ᠡᠷᠭᠦᠬᠦ ᠳ᠋ᠦ᠍ ᠪᠡᠯᠡᠨ ᠪᠣᠭᠣᠷᠴᠢ ᠵᠡᠯᠮᠡ ᠬᠣᠶᠠᠷ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠨᠢ ᠡᠭᠦᠨ ᠢ᠋ ᠪᠠᠲᠤᠯᠠᠨᠠ᠃
ᠲᠡᠮᠦᠵᠢᠨ ᠢ᠋ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠭᠰᠡᠨ ᠨᠠᠢᠷ ᠥᠨᠳᠥᠷᠯᠡᠵᠦ ᠪᠦᠭᠦᠳᠡ ᠴᠢᠪ ᠴᠢᠮᠡᠭᠡ ᠦᠭᠡᠢ ᠲᠠᠷᠠᠵᠤ ᠣᠳᠤᠭᠰᠠᠨ ᠪᠢᠯᠡ᠃ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠ ᠨᠡᠷᠡ ᠨᠥᠯᠥᠭᠡ ᠣᠯᠤᠨᠠ ᠭᠡᠵᠦ ᠢᠲᠡᠭᠡᠵᠦ ᠬᠦᠯᠢᠶᠡᠵᠦ ᠬᠥᠮᠦᠨ ᠪᠦᠬᠦᠨ ᠤᠷᠮᠠ ᠦᠭᠡᠢ ᠪᠤᠴᠠᠬᠤ ᠶ᠋ᠢ ᠥᠭᠡᠯᠦᠨ ᠬᠠᠷᠠᠵᠤ ᠬᠣᠴᠣᠷᠴᠠᠢ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠮᠢᠨᠢ ᠡᠨᠡ ᠭᠡᠨᠡᠳᠲᠡ ᠶ᠋ᠢᠨ ᠰᠢᠢᠳᠪᠦᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠶᠠᠭᠠᠬᠢᠬᠤ ᠪᠣᠯ ᠭᠡᠵᠦ ᠰᠢᠨᠠᠯᠤᠨ ᠪᠣᠳᠣᠵᠤ ᠪᠠᠢᠯᠠ᠃ ᠤᠴᠠᠷᠠᠭᠰᠠᠨ ᠵᠣᠪᠠᠯᠠᠩ ᠪᠦᠭᠦᠳᠡ ᠶ᠋ᠢ ᠡᠪ ᠨᠢᠭᠡᠳᠦᠯ ᠦ᠋ᠨ ᠢ᠋ᠶ᠋ᠡᠨ ᠬᠦᠴᠦ ᠪᠡᠷ ᠬᠠᠮᠲᠤᠷᠠᠨ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠭᠡᠷ ᠪᠦᠯᠢ ᠶ᠋ᠢ ᠨᠢ ᠲᠡᠮᠦᠵᠢᠨ ᠦ᠌ ᠡᠨᠡ ᠰᠢᠢᠳᠪᠦᠷᠢ ᠡᠪᠳᠡᠨ ᠪᠤᠰᠠᠨᠢᠭᠤᠯᠵᠤ ᠬᠠᠶᠠᠭᠰᠠᠨ ᠰᠢᠭ᠋ ᠥᠭᠡᠯᠦᠨ ᠭᠠᠰᠢᠭᠤᠳᠠᠯ ᠲᠦᠭᠰᠢᠭᠦᠷᠢ ᠳᠦᠭᠦᠷᠡᠩ ᠪᠣᠯᠵᠠᠢ᠃ ᠨᠠᠢᠷ ᠤ᠋ᠨ ᠳᠠᠷᠠᠭᠠ ᠬᠠᠰᠠᠷ ᠥᠪᠡᠷ ᠦ᠋ᠨ ᠠᠯᠪᠠᠲᠤ ᠬᠦᠷᠢᠶᠡ ᠪᠡᠨ ᠨᠡᠭᠦᠯᠭᠡᠨ ᠲᠤᠰ ᠲᠠᠭᠠᠨ ᠰᠠᠭᠤᠬᠤ ᠪᠠᠷ ᠣᠳᠤᠭᠰᠠᠨ ᠨᠢ ᠥᠭᠡᠯᠦᠨ ᠢ᠋ ᠠᠮᠢᠳᠤ ᠪᠠᠷ ᠨᠢ ᠲᠡᠮᠦᠯᠡᠨ ᠦᠬᠦᠭᠦᠯᠦᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠵᠠᠢ᠃ ᠬᠠᠰᠠᠷ ᠤ᠋ᠨ ᠨᠡᠭᠦᠭᠰᠡᠨ ᠨᠢ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠ ᠣᠨᠴᠠᠯᠠᠬᠤ ᠡᠷᠬᠡ ᠣᠯᠤᠭᠠ ᠦᠭᠡᠢ ᠳ᠋ᠦ᠍ ᠡᠭᠳᠡᠭᠦᠴᠡᠵᠦ ᠬᠣᠷᠣᠰᠤᠭᠰᠠᠨ ᠰᠡᠳᠬᠢᠯ ᠦ᠋ᠨ ᠢᠯᠡᠷᠡᠯ ᠪᠠᠢᠪᠠ᠃ ᠭᠡᠪᠡᠴᠦ ᠬᠠᠰᠠᠷ ᠢᠩᠭᠢᠵᠦ ᠢᠯᠡ ᠲᠣᠳᠣ ᠬᠡᠯᠡᠭᠡ ᠦᠭᠡᠢ ᠴᠦ᠍ ᠲᠡᠮᠦᠵᠢᠨ ᠪᠣᠯᠤᠨ ᠪᠦᠭᠦᠳᠡᠭᠡᠷ ᠲᠡᠭᠡᠵᠦ ᠣᠢᠯᠠᠭᠠᠵᠠᠢ᠃ ᠥᠭᠡᠯᠦᠨ ᠶᠠᠭᠠᠬᠢᠬᠤ ᠤᠴᠢᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠪᠠ᠃ ᠬᠣᠶᠠᠷ ᠬᠥᠪᠡᠭᠦᠨ ᠨᠢ ᠰᠠᠯᠵᠤ ᠨᠡᠭᠦᠭᠰᠡᠨ ᠨᠢ ᠵᠢᠷ ᠦ᠋ᠨ ᠨᠢᠭᠡ ᠪᠡᠯᠴᠢᠭᠡᠷ ᠭᠠᠵᠠᠷ ᠤ᠋ᠨ ᠬᠤᠪᠢᠶᠠᠷᠢ ᠲᠡᠳᠦᠢ ᠬᠡᠷᠡᠭ ᠪᠢᠰᠢ ᠪᠠᠢᠪᠠ᠃ ᠣᠳᠣ ᠬᠣᠶᠠᠷ ᠬᠥᠪᠡᠭᠦᠨ ᠨᠢ ᠠᠭᠤᠯᠵᠠᠪᠠᠯ ᠦᠭᠡ ᠪᠢᠰᠢ ᠢᠯᠳᠦ ᠵᠥᠷᠢᠭᠦᠯᠬᠦ ᠳ᠋ᠦ᠍ ᠪᠡᠯᠡᠨ ᠪᠣᠯᠵᠠᠢ᠃ ᠬᠠᠰᠠᠷ ᠤ᠋ᠨ ᠢᠩᠭᠢᠵᠦ ᠰᠠᠯᠤᠨ ᠨᠡᠭᠦᠵᠦ ᠲᠤᠰᠠᠭᠠᠷ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠢ᠋ ᠲᠡᠮᠦᠵᠢᠨ ᠣᠭᠲᠣ ᠡᠰᠡᠷᠭᠦᠴᠡᠨ ᠰᠢᠭᠦᠮᠵᠢᠯᠡᠭᠰᠡᠨ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ ᠳᠠᠮᠵᠢᠨ ᠰᠠᠢᠰᠢᠶᠠᠭᠰᠠᠨ ᠴᠦ᠍ ᠳᠣᠲᠣᠷᠠ ᠪᠠᠨ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠣᠢ ᠶ᠋ᠢ ᠳᠠᠭᠠᠬᠤ ᠶ᠋ᠢᠨ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃ ᠥᠭᠡᠯᠦᠨ ᠬᠠᠰᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠡᠮᠦᠵᠢᠨ ᠦ᠌ ᠳᠠᠯᠳᠠ ᠠᠶᠤᠯ ᠲᠠᠢ ᠰᠠᠨᠠᠭᠠᠨ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠤᠤ ᠡᠰᠡᠪᠡᠯ ᠲᠡᠮᠦᠵᠢᠨ ᠢ᠋ ᠬᠠᠰᠠᠷ ᠤ᠋ᠨ ᠡᠰᠡᠷᠭᠦᠴᠡᠯ ᠳᠠᠭᠠᠷᠢᠯᠲᠠ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠤᠤ ᠭᠡᠳᠡᠭ ᠢ᠋ᠶ᠋ᠡᠨ ᠰᠢᠢᠳᠴᠦ ᠡᠰᠡ ᠴᠢᠳᠠᠵᠠᠢ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠤ᠋ᠨ ᠬᠡᠨ ᠨᠢ ᠲᠦᠷᠦᠭᠦᠯᠡᠨ ᠳᠠᠭᠠᠷᠢᠬᠤ ᠶ᠋ᠢ ᠮᠡᠳᠡᠬᠦ ᠠᠷᠭᠠ ᠳᠠᠩᠴᠤ ᠠᠯᠠᠭᠠ ᠪᠠᠢᠪᠠ᠃ ᠬᠠᠰᠠᠷ ᠲᠡᠪᠴᠢᠶᠡᠷᠢ ᠦᠭᠡᠢ ᠲᠦᠷᠭᠡᠨ ᠣᠮᠣᠭᠯᠠᠩ ᠵᠠᠩ ᠲᠠᠢ ᠲᠤᠯᠠ ᠭᠡᠨᠡᠳᠡᠨ ᠲᠡᠮᠦᠵᠢᠨ ᠦ᠌ ᠬᠣᠷᠣᠨ ᠰᠠᠨᠠᠭᠠᠨ ᠤ᠋ ᠵᠣᠯᠢᠶᠠᠰᠤ ᠪᠣᠯᠬᠤ ᠨᠢ ᠬᠢᠯᠪᠠᠷ ᠰᠠᠨᠠᠭᠳᠠᠵᠠᠢ᠃ ᠵᠣᠪᠠᠵᠤ ᠵᠦᠳᠡᠷᠡᠵᠦ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠬᠦᠨᠳᠦ ᠬᠦᠴᠢᠷ ᠠᠮᠢᠳᠤᠷᠠᠯ ᠨᠢ ᠲᠡᠭᠦᠰᠴᠦ᠂ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠠᠴᠢ ᠲᠤᠰᠠ ᠶ᠋ᠢ ᠦᠵᠡᠨ ᠵᠢᠷᠭᠠᠭᠰᠠᠨ ᠡᠬᠢᠨ ᠦ᠌ ᠪᠡᠨ ᠵᠢᠯ ᠳ᠋ᠦ᠍ ᠡᠢᠮᠦ ᠠᠶᠤᠮᠰᠢᠭᠲᠤ ᠲᠠᠮᠤᠯᠠᠯ ᠳ᠋ᠤ᠌ ᠤᠨᠠᠨᠠ ᠭᠡᠵᠦ ᠥᠭᠡᠯᠦᠨ ᠰᠠᠨᠠᠭᠰᠠᠨ ᠦᠭᠡᠢ᠃ ᠡᠢᠨ ᠠᠷᠭᠠ ᠪᠠᠨ ᠪᠠᠷᠠᠭᠳᠠᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠰᠠᠮ ᠶᠠᠪᠤᠵᠤ ᠶᠢᠰᠦᠭᠡᠢ ᠶ᠋ᠢᠨ ᠣᠩᠭᠣᠨ ᠳ᠋ᠤ᠌ ᠣᠴᠢᠵᠤ ᠮᠥᠷᠭᠥᠵᠡᠢ᠃
— ᠶᠢᠰᠦᠭᠡᠢ ᠴᠢ ᠰᠣᠨᠣᠰᠤᠭᠠᠴᠢ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠮᠢᠨᠢ ᠰᠠᠯᠵᠤ ᠣᠳᠤᠯᠠ᠃ ᠪᠢ ᠲᠡᠳᠡᠨ ᠢ᠋ ᠠᠳᠠᠯᠢᠬᠠᠨ ᠬᠠᠢᠷᠠᠯᠠᠵᠤ ᠥᠰᠬᠡᠭᠰᠡᠨ ᠶᠦᠮ᠃ ᠣᠳᠣ ᠬᠥᠪᠡᠭᠦᠳ ᠮᠢᠨᠢ ᠠᠯᠠᠯᠳᠤᠨ ᠬᠦᠨᠦᠭᠡᠯᠳᠦᠬᠦ ᠳ᠋ᠦ᠍ ᠪᠡᠯᠡᠨ ᠪᠣᠯᠵᠠᠢ᠃ ᠲᠡᠮᠦᠵᠢᠨ ᠬᠠᠰᠠᠷ ᠳᠡᠭᠦᠦ ᠪᠡᠨ ᠭᠡᠨᠡᠳᠡᠭᠦᠯᠦᠨ ᠠᠯᠠᠬᠤ ᠪᠣᠢ ᠭᠡᠬᠦ ᠡᠴᠡ ᠡᠯᠢᠭᠡ ᠵᠢᠷᠦᠬᠡ ᠮᠢᠨᠢ ᠤᠷᠠᠭᠳᠠᠵᠤ ᠡᠨᠡ ᠪᠡᠶᠡ ᠮᠢᠨᠢ ᠦᠢᠷᠡᠬᠦ ᠰᠢᠭ ᠪᠣᠯᠤᠨᠠ᠃ ᠴᠢ ᠬᠡᠨ ᠢ᠋᠂ ᠶᠠᠮᠠᠷ ᠠᠮᠢᠲᠠᠳ ᠢ᠋ ᠨᠠᠳᠠᠳᠤ ᠦᠯᠡᠳᠡᠭᠡᠭᠡᠳ ᠭᠠᠭᠴᠠᠭᠠᠷ ᠢ᠋ ᠮᠢᠨᠢ ᠬᠠᠶᠠᠵᠤ ᠣᠳᠬᠤ ᠴᠢᠨᠢ ᠡᠨᠡ ᠪᠣᠢ ᠭᠡᠵᠦ ᠠᠷᠭᠠ ᠪᠠᠨ ᠪᠠᠷᠠᠨ ᠤᠬᠢᠯᠠᠵᠠᠢ᠃ ᠶᠢᠰᠦᠭᠡᠢ ᠶ᠋ᠢᠨ ᠰᠦᠨᠡᠰᠦ ᠲᠡᠭᠦᠨ ᠳ᠋ᠦ᠍ ᠣᠭᠲᠣ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ ᠵᠥᠪᠬᠡᠨ ᠭᠤᠨᠢᠭᠲᠤ ᠬᠠᠷᠠᠴᠠ ᠪᠠᠷ ᠰᠢᠷᠳᠡᠭᠰᠡᠭᠡᠷ ᠪᠠᠢᠵᠠᠢ᠃ ᠶᠢᠰᠦᠭᠡᠢ ᠶ᠋ᠢᠨ ᠰᠦᠨᠡᠰᠦ ᠶ᠋ᠢ ᠡᠢᠮᠦ ᠭᠤᠨᠢᠭᠲᠠᠢ ᠪᠠᠢᠬᠤ ᠶ᠋ᠢ ᠥᠭᠡᠯᠦᠨ ᠶᠡᠷᠦ ᠦᠵᠡᠭᠰᠡᠨ ᠦᠭᠡᠢ ᠪᠢᠯᠡ᠃
— ᠬᠠᠰᠠᠷ ᠬᠥᠪᠡᠭᠦᠨ ᠮᠢᠨᠢ ᠭᠬᠢᠷ ᠦᠭᠡᠢ ᠴᠠᠭᠠᠨ ᠪᠣᠳᠣᠯ ᠲᠠᠢ᠂ ᠬᠠᠯᠠᠭᠤᠨ ᠤᠶᠠᠨ ᠰᠡᠳᠬᠢᠯ ᠲᠡᠢ ᠶᠦᠮ᠃ ᠲᠡᠷᠡ ᠲᠡᠮᠦᠵᠢᠨ ᠠᠬᠠ ᠳ᠋ᠠᠭᠠᠨ ᠭᠣᠮᠣᠳᠠᠵᠠᠢ᠃ ᠭᠡᠲᠡᠯᠡ ᠲᠡᠮᠦᠵᠢᠨ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠ ᠤᠳᠠᠭᠠᠬᠢ ᠡᠷᠬᠡ ᠶ᠋ᠢ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠬᠠᠰᠠᠷ ᠳᠡᠭᠦᠦ ᠳ᠋ᠡᠭᠡᠨ ᠥᠭᠭᠦᠭᠰᠡᠨ ᠦᠭᠡᠢ᠃ ᠤᠭ ᠨᠢ ᠲᠡᠮᠦᠵᠢᠨ ᠳᠡᠭᠦᠦ ᠪᠡᠨ ᠡᠷᠭᠦᠮᠵᠢᠯᠡᠨᠡ ᠭᠡᠵᠦ ᠲᠠᠩᠭᠠᠷᠢᠭᠯᠠᠭᠰᠠᠨ ᠪᠣᠯᠪᠠᠴᠤ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠨᠢᠴᠤᠵᠠᠢ᠃ ᠲᠡᠷᠡ ᠬᠥᠪᠡᠭᠦᠨ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠢᠩᠭᠢᠨᠡ ᠪᠣᠢ? ᠶᠢᠰᠦᠭᠡᠢ᠃ ᠪᠢ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ ᠴᠢᠨᠢ ᠣᠢᠯᠠᠭᠠᠬᠤ ᠦᠭᠡᠢ ᠳ᠋ᠦ᠍ ᠬᠦᠷᠦᠯᠡ᠃ ᠲᠡᠭᠦᠨ ᠦ᠌ ᠶᠠᠭᠤ ᠬᠢᠬᠦ ᠭᠡᠵᠦ ᠪᠣᠢ ᠶ᠋ᠢ ᠨᠠᠳᠠᠳᠤ ᠬᠡᠯᠡᠵᠦ ᠥᠭᠴᠦ ᠲᠤᠰᠠᠯᠠᠭᠠᠴᠢ᠃ ᠲᠡᠷᠡ ᠠᠷᠠᠢ ᠬᠠᠰᠠᠷ ᠳᠡᠭᠦᠦ ᠪᠡᠨ ᠬᠥᠨᠥᠭᠡᠬᠦ ᠪᠡᠷ ᠰᠢᠢᠳᠦᠭᠰᠡᠨ ᠪᠢᠰᠢ ᠪᠠᠢᠭᠠ᠃ ᠲᠡᠮᠦᠵᠢᠨ ᠦ᠌ ᠬᠠᠷᠠᠴᠠ ᠰᠡᠳᠬᠢᠯ ᠳ᠋ᠦ᠍ ᠶᠠᠭᠤ ᠨᠢᠭᠤᠭᠳᠠᠨᠠ ᠪᠣᠢ? ᠲᠡᠷᠡ ᠳᠠᠭᠤ ᠦᠭᠡᠢ ᠭᠥᠯᠢᠭᠡᠷ ᠬᠥᠪᠡᠭᠦᠨ ᠴᠣᠬᠣᠮ ᠶᠠᠭᠤ ᠶ᠋ᠢ ᠬᠦᠰᠡᠨᠡ ᠪᠣᠢ? ᠪᠢ ᠲᠡᠭᠡᠭᠡᠵᠦ ᠲᠥᠷᠥᠭᠦᠯᠵᠦ ᠲᠡᠪᠡᠷᠢᠵᠦ ᠬᠥᠲᠥᠯᠵᠦ ᠥᠰᠬᠡᠭᠰᠡᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠠᠨᠢᠬᠤ ᠦᠭᠡᠢ ᠪᠣᠯᠵᠠᠢ᠃ ᠨᠠᠳᠠᠳᠤ ᠬᠥᠪᠡᠭᠦᠳ ᠮᠢᠨᠢ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠡᠷᠡᠭᠲᠡᠢ ᠶᠦᠮ᠃ ᠬᠠᠴᠢᠭᠤᠨ ᠬᠥᠪᠡᠭᠦᠨ ᠴᠢᠨᠢ ᠬᠦᠨᠳᠦ ᠡᠪᠡᠳᠴᠢᠲᠡᠢ᠃ ᠲᠡᠮᠦᠭᠡ ᠬᠥᠪᠡᠭᠦᠨ ᠴᠢᠨᠢ ᠨᠢᠯᠠᠭᠳᠠᠭᠠᠳ ᠪᠢ ᠭᠠᠭᠴᠠᠭᠠᠷᠳᠠᠵᠤ ᠰᠢᠨᠠᠯᠵᠤ ᠪᠠᠢᠨᠠ᠃
ᠥᠭᠡᠯᠦᠨ ᠦ᠌ ᠡᠨᠡ ᠦᠭᠡ ᠶ᠋ᠢ ᠶᠢᠰᠦᠭᠡᠢ ᠶ᠋ᠢᠨ ᠰᠦᠨᠡᠰᠦ ᠰᠣᠨᠣᠰᠤᠭᠠᠳ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ ᠨᠢ ᠲᠡᠷᠡ ᠴᠦ᠍ ᠪᠠᠰᠠ ᠥᠭᠡᠯᠦᠨ ᠦ᠌ ᠠᠳᠠᠯᠢ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠤ᠋ ᠬᠢ ᠪᠠᠢᠪᠠ᠃ ᠢᠩᠭᠢᠭᠡᠳ ᠥᠭᠡᠯᠦᠨ ᠳ᠋ᠦ᠍ ᠲᠤᠰᠠᠯᠠᠵᠤ ᠵᠥᠪᠯᠡᠬᠦ ᠬᠥᠮᠦᠨ ᠦᠭᠡᠢ ᠪᠣᠯᠵᠠᠢ᠃ ᠲᠡᠷᠡ ᠪᠦᠬᠦ ᠬᠡᠷᠡᠭ ᠢ᠋ ᠥᠪᠡᠷ ᠦ᠋ᠨ ᠣᠢᠯᠠᠭᠠᠵᠤ ᠮᠡᠳᠡᠷᠡᠭᠰᠡᠨ ᠢ᠋ᠶ᠋ᠡᠷ ᠰᠢᠢᠳᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃ ᠶᠢᠰᠦᠭᠡᠢ ᠶ᠋ᠢᠨ ᠣᠩᠭᠣᠨ ᠳ᠋ᠤ᠌ ᠮᠥᠷᠭᠥᠵᠦ ᠢᠷᠡᠭᠡᠳ ᠥᠭᠡᠯᠦᠨ ᠨᠡᠭᠦᠵᠦ ᠬᠠᠰᠠᠷ ᠬᠥᠪᠡᠭᠦᠨ ᠦ᠌ ᠪᠡᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠴᠢᠵᠤ ᠰᠠᠭᠤᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠢ᠋ᠶ᠋ᠡᠨ ᠲᠡᠮᠦᠵᠢᠨ ᠳ᠋ᠦ᠍ ᠬᠡᠯᠡᠵᠡᠢ᠃ ᠲᠡᠮᠦᠵᠢᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠤᠳᠠᠭᠠᠨ ᠳᠠᠭᠤ ᠦᠭᠡᠢ ᠰᠠᠭᠤᠪᠠ᠃ ᠥᠭᠡᠯᠦᠨ ᠴᠦ᠍ ᠳᠠᠭᠤ ᠦᠭᠡᠢ ᠲᠡᠪᠴᠢᠶᠡᠷᠢ ᠲᠡᠢ ᠬᠦᠯᠢᠶᠡᠵᠡᠢ᠃ ᠡᠬᠡ ᠨᠢ ᠶᠠᠭᠠᠬᠢᠭᠠᠳ ᠭᠡᠨᠡᠳᠲᠡ ᠢᠩᠭᠢᠵᠦ ᠨᠡᠭᠦᠬᠦ ᠪᠡᠷ ᠪᠣᠯᠤᠭᠰᠠᠨ ᠢ᠋ ᠲᠡᠮᠦᠵᠢᠨ ᠭᠠᠳᠠᠷᠯᠠᠵᠤ ᠪᠠᠢᠪᠠ᠃ ᠡᠨᠡ ᠪᠣᠯ ᠬᠠᠰᠠᠷ ᠢ᠋ ᠥᠮᠥᠭᠡᠷᠡᠭᠰᠡᠨ ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠭᠡᠵᠦ ᠣᠢᠯᠠᠭᠠᠪᠠ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠠᠶᠠᠲᠠᠢ ᠵᠥᠪ ᠬᠠᠷᠢᠭᠤ ᠣᠯᠵᠤ ᠬᠡᠯᠡᠬᠦ ᠲᠡᠮᠦᠵᠢᠨ ᠳ᠋ᠦ᠍ ᠶᠡᠬᠡ ᠬᠡᠴᠡᠭᠦᠦ ᠪᠠᠢᠯᠠ᠃ ᠭᠡᠪᠡᠴᠦ ᠳᠠᠭᠤ ᠦᠭᠡᠢ ᠰᠠᠭᠤᠭᠠᠳ ᠪᠠᠢᠵᠤ ᠪᠣᠯᠤᠭᠰᠠᠨ ᠦᠭᠡᠢ᠃
— ᠡᠵᠢ ᠠ᠋᠃
ᠲᠡᠮᠦᠵᠢᠨ ᠠᠯᠢ ᠪᠣᠯᠬᠣᠷ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠳᠤᠤᠭᠠᠷᠬᠤ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠪᠠ᠃
— ᠡᠵᠢ ᠠ᠋᠃ ᠲᠠᠨ ᠤ᠋ ᠢᠩᠭᠢᠵᠦ ᠬᠡᠯᠡᠭᠰᠡᠨ ᠦ᠌ ᠤᠴᠢᠷ ᠢ᠋ ᠪᠢ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠨᠠ᠃ ᠭᠡᠪᠡᠴᠦ ᠲᠠ ᠲᠥᠪ ᠬᠦᠷᠢᠶᠡᠨ ᠡᠴᠡ ᠨᠡᠭᠦᠵᠦ ᠬᠠᠰᠠᠷ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠴᠢᠵᠤ ᠰᠠᠭᠤᠵᠤ ᠶᠠᠭᠠᠬᠢᠨ ᠪᠣᠯᠬᠤ ᠪᠢᠯᠡ? ᠲᠠ ᠡᠪᠲᠡᠢ ᠪᠣᠯ ᠬᠦᠴᠦᠲᠡᠢ ᠭᠡᠵᠦ ᠰᠤᠷᠭᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠰᠢ ᠤᠤ? ᠭᠡᠲᠡᠯᠡ ᠬᠡᠯᠡᠭᠰᠡᠨ ᠦᠭᠡ ᠰᠤᠷᠭᠠᠯ ᠢ᠋ᠶ᠋ᠠᠨ ᠨᠢᠴᠤᠵᠤ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠨᠡ ᠪᠣᠢ? ᠲᠠᠨ ᠢ᠋ ᠬᠠᠰᠠᠷ ᠤ᠋ᠨ ᠳᠡᠷᠭᠡᠳᠡ ᠣᠴᠢᠵᠤ ᠰᠠᠭᠤᠪᠠᠯ ᠬᠠᠷᠠᠭᠰᠠᠨ ᠦᠵᠡᠭᠰᠡᠨ ᠪᠦᠬᠦᠨ ᠶᠠᠭᠤ ᠭᠡᠬᠦ ᠪᠣᠢ? ᠲᠠ ᠪᠢᠳᠡ ᠬᠣᠶᠠᠷ ᠢ᠋ ᠡᠪᠳᠡᠷᠡᠯᠴᠡᠪᠡ ᠭᠡᠬᠦ ᠪᠤᠰᠤ ᠤᠤ? ᠡᠬᠡ ᠳ᠋ᠡᠭᠡᠨ ᠬᠠᠶᠠᠭᠳᠠᠭᠰᠠᠨ ᠨᠠᠮᠠᠶ᠋ᠢ ᠬᠡᠨ ᠲᠣᠭᠣᠬᠤ ᠪᠢᠯᠡ᠃ ᠪᠢ ᠬᠠᠨ ᠰᠠᠭᠤᠵᠤ ᠶᠢᠰᠦᠭᠡᠢ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠷᠢᠶᠡᠰ ᠢ᠋ ᠪᠡᠶᠡᠯᠡᠭᠦᠯᠬᠦ ᠡᠴᠡ ᠥᠭᠡᠷᠡ ᠬᠦᠰᠡᠯ ᠦᠭᠡᠢ᠃ ᠬᠠᠰᠠᠷ ᠤ᠋ᠨ ᠭᠣᠮᠣᠳᠠᠬᠤ ᠨᠢ ᠴᠠᠭ ᠵᠠᠭᠤᠷᠠ ᠶ᠋ᠢᠨ ᠬᠢ ᠪᠢᠵᠡ᠃ ᠡᠵᠢ ᠲᠠ ᠠᠶᠠᠲᠠᠢ ᠬᠡᠯᠡᠵᠦ ᠠᠭᠠᠰᠢᠯᠠᠵᠤ ᠰᠤᠷᠭᠠᠪᠠᠯ ᠬᠠᠰᠠᠷ ᠲᠠ ᠪᠢᠳᠡ ᠬᠣᠶᠠᠷ ᠤ᠋ᠨ ᠦᠭᠡᠨ ᠡᠴᠡ ᠭᠠᠷᠬᠤ ᠦᠭᠡᠢ᠃ ᠥᠭᠡᠯᠦᠨ ᠡᠵᠢ ᠲᠠ ᠯᠠ ᠮᠢᠨᠦ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠦᠢᠯᠡ ᠶ᠋ᠢ ᠳᠡᠮᠵᠢᠬᠦ ᠦᠭᠡᠢ ᠪᠣᠯ ᠥᠭᠡᠷᠡ ᠬᠡᠨ ᠨᠠᠮᠠᠶ᠋ᠢ ᠳᠠᠭᠠᠬᠤ ᠪᠢᠯᠡ᠃ ᠲᠠᠨ ᠢ᠋ ᠶᠠᠪᠤᠴᠢᠬᠠᠪᠠᠯ ᠮᠢᠨᠦ ᠤᠯᠠ ᠶ᠋ᠢ ᠱᠠᠭᠠᠢᠵᠤ ᠦᠬᠦᠯ ᠢ ᠬᠦᠰᠡᠭᠰᠡᠨ ᠪᠦᠭᠦᠳᠡ ᠶ᠋ᠢᠨ ᠪᠠᠶᠠᠷ ᠪᠣᠯᠬᠤ ᠪᠢᠰᠢ ᠤᠤ? ᠲᠠ ᠬᠠᠰᠠᠷ ᠳᠡᠭᠦᠦ ᠳ᠋ᠦ᠍ ᠰᠠᠨᠠᠭᠠ ᠪᠦᠦ ᠵᠣᠪᠠ᠃ ᠬᠠᠰᠠᠷ ᠤ᠋ᠨ ᠲᠤᠰ ᠲᠠᠭᠠᠨ ᠰᠠᠭᠤᠵᠤ ᠬᠦᠷᠢᠶᠡ ᠪᠡᠨ ᠵᠠᠰᠠᠬᠤ ᠴᠢᠨᠢ ᠶᠡᠷᠦ ᠬᠥᠮᠦᠨ ᠦ᠌ ᠶᠣᠰᠣ ᠪᠢᠵᠡ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠦᠷᠡ ᠰᠠᠲᠤ ᠥᠰᠴᠦ ᠬᠦᠴᠦᠷᠬᠡᠭᠵᠢᠵᠦ ᠪᠣᠢ ᠶ᠋ᠢᠨ ᠪᠠᠲᠤᠯᠠᠭᠠ ᠪᠣᠯᠤᠨᠠ᠃ ᠲᠠ ᠪᠣᠯ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠶᠡᠬᠡ ᠬᠠᠲᠤᠨ᠃ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠲᠤᠨ ᠡᠵᠢ ᠶᠦᠮ᠃ ᠲᠠ ᠪᠠᠢᠬᠤ ᠶᠣᠰᠣᠲᠠᠢ ᠭᠠᠵᠠᠷ ᠢ᠋ᠶ᠋ᠠᠨ ᠰᠠᠭᠤᠵᠤ ᠬᠡᠯᠡᠬᠦ ᠶᠣᠰᠣᠲᠠᠢ ᠦᠭᠡ ᠪᠡᠨ ᠬᠡᠯᠡᠵᠦ ᠪᠠᠢᠭᠲᠤᠨ ᠭᠡᠰᠡᠨ ᠨᠢ ᠥᠭᠡᠯᠦᠨ ᠢ ᠬᠡᠯᠡᠬᠦ ᠦᠭᠡ ᠦᠭᠡᠢ ᠪᠣᠯᠭᠠᠵᠠᠢ᠃ ᠲᠡᠮᠦᠵᠢᠨ ᠶᠠᠭᠠᠬᠢᠭᠠᠳ ᠡᠢᠮᠦ ᠤᠬᠠᠭᠠᠨ ᠰᠡᠢᠷᠡᠭ ᠤᠷᠠᠨ ᠰᠡᠴᠡᠨ ᠪᠣᠯᠤᠭᠰᠠᠭᠠᠷ ᠪᠠᠢᠭᠰᠠᠨ ᠢ ᠥᠭᠡᠯᠦᠨ ᠤᠬᠠᠭᠠᠷᠠᠭᠰᠠᠨ ᠦᠭᠡᠢ ᠶᠠᠪᠤᠵᠠᠢ᠃ ᠦᠨᠡᠬᠡᠷ ᠰᠡᠭᠦᠯ ᠦ᠋ᠨ ᠵᠢᠯ ᠳ᠋ᠦ᠍ ᠲᠡᠮᠦᠵᠢᠨ ᠣᠭᠲᠣ ᠲᠠᠨᠢᠭᠳᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠡᠷ ᠥᠭᠡᠷᠡᠴᠢᠯᠡᠭᠳᠡᠨ ᠬᠤᠪᠢᠷᠠᠵᠠᠢ᠃
一 ᠡᠵᠢ ᠠ᠋᠃ ᠲᠠ ᠪᠡᠯᠡᠳ᠃ ᠬᠣᠶᠠᠭᠤᠯᠠ ᠥᠨᠥᠳᠥᠷ ᠬᠠᠰᠠᠷ ᠳᠡᠭᠦᠦ ᠶ᠋ᠢᠨ ᠳ᠋ᠦ᠍ ᠠᠢᠯᠴᠢᠯᠠᠨ ᠣᠴᠢᠶᠠ᠃ ᠨᠠᠳᠠᠳᠤ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ ᠵᠥᠪᠯᠡᠬᠦ ᠬᠡᠷᠡᠭ ᠪᠠᠢᠨᠠ ᠭᠡᠰᠡᠨ ᠪᠢᠯᠡ᠃ ᠲᠡᠮᠦᠵᠢᠨ ᠶᠠᠮᠠᠷ ᠨᠢᠭᠡ ᠶ᠋ᠢ ᠪᠣᠳᠣᠵᠤ ᠰᠢᠢᠳᠦᠭᠰᠡᠨ ᠨᠢ ᠢᠯᠡᠳᠲᠡ ᠪᠠᠢᠪᠠ᠃ ᠥᠭᠡᠯᠦᠨ ᠴᠦ᠍ ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢ ᠳᠠᠭᠠᠵᠠᠢ᠃
ᠲᠡᠳᠡᠨ ᠢ ᠢᠩᠭᠢᠵᠦ ᠭᠡᠨᠡᠳᠲᠡ ᠢᠷᠡᠨᠡ ᠭᠡᠵᠦ ᠰᠠᠨᠠᠭᠠ ᠦᠭᠡᠢ ᠲᠤᠯᠠ ᠬᠠᠰᠠᠷ ᠪᠣᠷᠣᠭᠴᠢᠨ ᠬᠣᠶᠠᠷ ᠰᠠᠨᠳᠤᠷᠤᠨ ᠬᠥᠯ ᠪᠣᠯᠵᠠᠢ᠃ ᠬᠠᠰᠠᠷ ᠤ᠋ᠨ ᠬᠦᠷᠢᠶᠡ ᠥᠷᠭᠡᠵᠢᠵᠦ ᠲᠡᠯᠡᠭᠡᠳ ᠣᠳᠣ ᠲᠡᠮᠦᠵᠢᠨ ᠦ᠌ ᠬᠢ ᠡᠴᠡ ᠶᠡᠷᠦ ᠳᠤᠲᠠᠬᠤ ᠶᠠᠭᠤᠮᠠ ᠦᠭᠡᠢ ᠬᠥᠨᠳᠡᠢ ᠳᠦᠭᠦᠷᠴᠡᠢ᠃ ᠬᠠᠰᠠᠷ ᠤ᠋ᠨ ᠲᠤᠰᠠᠭᠠᠷ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠡᠬᠡ ᠠᠬᠠ ᠬᠣᠶᠠᠷ ᠨᠢ ᠠᠩᠬᠠ ᠤᠳᠠᠭᠠ ᠴᠣᠭ ᠢᠷᠡᠭᠰᠡᠨ ᠨᠢ ᠡᠨᠡ ᠲᠤᠯᠠ ᠬᠠᠰᠠᠷ ᠨᠠᠢᠷ ᠬᠢᠪᠡ᠃ ᠲᠡᠮᠦᠵᠢᠨ ᠴᠦ᠍ ᠶᠠᠭᠠᠷᠠᠵᠤ ᠰᠠᠨᠳᠤᠷᠤᠭᠰᠠᠨ ᠦᠭᠡᠢ ᠠᠢᠪᠤᠭᠤ ᠲᠠᠢᠪᠤᠭᠤ ᠰᠠᠭᠤᠪᠠ᠃ ᠨᠠᠢᠷ ᠤ᠋ᠨ ᠳᠠᠷᠠᠭᠠ ᠶᠡᠬᠡ ᠲᠦᠳᠡᠭ ᠦ᠋ᠨ ᠳᠡᠷᠭᠡᠳᠡ ᠭᠤᠷᠪᠠᠭᠤᠯᠠ ᠬᠣᠴᠣᠷᠴᠤ ᠤᠳᠠᠭᠠᠨ ᠬᠠᠭᠤᠴᠢ ᠬᠥᠭᠡᠷᠴᠡᠢ᠃ ᠢᠩᠭᠢᠵᠦ ᠰᠠᠭᠤᠬᠤ ᠶ᠋ᠢ ᠲᠡᠮᠦᠵᠢᠨ ᠬᠦᠰᠡᠵᠡᠢ᠃ ᠬᠡᠵᠢᠶᠡ ᠴᠦ᠍ ᠢᠩᠭᠢᠵᠦ ᠣᠯᠠᠨ ᠦᠭᠡ ᠬᠡᠯᠡᠳᠡᠭ ᠦᠭᠡᠢ ᠲᠡᠮᠦᠵᠢᠨ ᠢ ᠪᠠᠭᠠ ᠨᠠᠰᠤ᠂ ᠥᠩᠭᠡᠷᠡᠭᠰᠡᠨ ᠠᠮᠢᠳᠤᠷᠠᠯ᠂ ᠶᠢᠰᠦᠭᠡᠢ ᠡᠴᠢᠭᠡ ᠶ᠋ᠢ ᠪᠡᠨ ᠳᠤᠷᠠᠰᠤᠨ ᠪᠦᠷ ᠬᠣᠭᠣᠯᠠᠢ ᠵᠠᠩᠭᠢᠷᠠᠭᠤᠯᠬᠤ ᠶ᠋ᠢ ᠦᠵᠡᠭᠡᠳ ᠥᠭᠡᠯᠦᠨ ᠬᠠᠰᠠᠷ ᠬᠣᠶᠠᠷ ᠤᠶᠠᠷᠠᠨ ᠨᠢᠯᠪᠤᠰᠤ ᠤᠨᠠᠭᠠᠵᠠᠢ᠃ ᠦᠨᠡᠬᠡᠷ ᠬᠥᠪᠡᠭᠦᠳ ᠦ᠋ᠨ ᠬᠢᠨᠢ ᠳᠣᠲᠣᠷᠠ ᠠ᠋ᠴᠠ ᠲᠡᠮᠦᠵᠢᠨ ᠰᠢᠭ ᠵᠣᠪᠠᠭᠰᠠᠨ ᠨᠢ ᠦᠭᠡᠢ ᠲᠤᠯᠠ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠶᠡᠬᠡᠳᠡ ᠦᠷᠦ ᠡᠪᠡᠳᠦᠨ ᠬᠠᠢᠷᠠᠯᠠᠵᠠᠢ᠃ ᠭᠠᠰᠢᠭᠤᠨ ᠢᠳᠡᠭᠡᠨ ᠡᠴᠡ ᠨᠢᠭᠡ ᠶᠡᠬᠡ ᠬᠣᠢᠰᠢ ᠰᠠᠭᠤᠭᠠᠳ ᠪᠠᠢᠳᠠᠭ ᠦᠭᠡᠢ ᠬᠠᠰᠠᠷ ᠡᠨᠡ ᠦᠳᠡᠰᠢ ᠣᠭᠲᠣ ᠤᠤᠭᠤᠭᠰᠠᠨ ᠦᠭᠡᠢ ᠨᠢ ᠥᠭᠡᠯᠦᠨ ᠢ ᠲᠦᠭᠰᠢᠬᠡᠵᠦ ᠬᠥᠪᠡᠭᠦᠳ ᠨᠢ ᠶᠠᠭᠠᠬᠢᠬᠤ ᠭᠡᠳ ᠪᠠᠢᠭᠠ ᠶ᠋ᠢ ᠪᠦᠷ ᠮᠡᠳᠡᠬᠦ ᠪᠡᠨ ᠪᠣᠯᠢᠵᠠᠢ᠃ ᠲᠦᠳᠡᠭ ᠦ᠋ᠨ ᠣᠴᠢ ᠲᠩᠷᠢ ᠳ᠋ᠦ᠍ ᠰᠠᠴᠤᠷᠠᠵᠤ ᠨᠠᠢᠷᠲᠠᠢ ᠰᠠᠢᠬᠠᠨ ᠳᠤᠯᠠᠭᠠᠨ ᠰᠥᠨᠢ ᠡᠬᠢᠯᠡᠵᠡᠢ᠃ ᠲᠡᠮᠦᠵᠢᠨ ᠵᠦᠭᠡᠷ ᠨᠢᠭᠡ ᠲᠦᠳᠡᠭ ᠦ᠋ᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠬᠠᠭᠤᠴᠢ ᠬᠥᠭᠡᠷᠬᠦ ᠭᠡᠵᠦ ᠢᠷᠡᠭᠡ ᠦᠭᠡᠢ ᠨᠢ ᠯᠠᠪᠲᠠᠢ᠃ ᠦᠨᠡᠬᠡᠷ ᠴᠦ᠍ ᠲᠡᠢᠮᠦ ᠪᠠᠢᠪᠠ᠃
一 ᠬᠠᠰᠠᠷ ᠠ᠋᠃ ᠪᠢ ᠴᠢᠮᠠ ᠲᠠᠢ ᠨᠢᠭᠡᠨ ᠬᠡᠷᠡᠭ ᠢ ᠵᠥᠪᠯᠡᠬᠦ ᠭᠡᠵᠦ ᠢᠷᠡᠯᠡ ᠭᠡᠵᠦ ᠲᠡᠮᠦᠵᠢᠨ ᠭᠡᠨᠡᠳᠲᠡ ᠬᠡᠯᠡᠪᠡ᠃ ᠬᠡᠨ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃
一 ᠨᠠᠳᠠᠳᠤ ᠪᠠᠷᠯᠠᠭᠦᠳ᠂ ᠣᠩᠭᠣᠳ᠂ ᠪᠠᠰᠤᠳ ᠭᠡᠳ ᠬᠡᠳᠦᠨ ᠣᠪᠣᠭ ᠠ᠋ᠴᠠ ᠳᠠᠭᠠᠵᠤ ᠢᠷᠡᠭᠰᠡᠳ ᠨᠡᠢᠯᠡᠭᠡᠳ ᠬᠣᠶᠠᠷ ᠲᠦᠮᠡ ᠬᠣᠯᠠ ᠢᠯᠡᠭᠦᠦ ᠬᠥᠮᠦᠨ ᠪᠣᠯᠵᠠᠢ᠃ ᠲᠡᠳᠡᠨ ᠦ᠌ ᠴᠡᠷᠢᠭ ᠡᠷᠡᠰ ᠦ᠋ᠨ ᠲᠣᠭᠠ ᠳᠠᠷᠤᠢ ᠬᠠᠭᠠᠰ ᠲᠦᠮᠡ ᠬᠦᠷᠦᠨᠡ᠃ ᠪᠢ ᠡᠨᠡ ᠢᠷᠭᠡᠳ ᠢ ᠴᠢᠮᠠ ᠳ᠋ᠤ᠌ ᠥᠭᠭᠦᠶᠡ᠃ ᠴᠢ ᠲᠡᠳᠡᠨ ᠡᠴᠡ ᠴᠡᠷᠢᠭ ᠲᠠᠲᠠᠵᠤ ᠵᠠᠰᠠᠵᠤ ᠰᠤᠷᠭᠠ᠃ ᠣᠳᠣ ᠶᠢᠰᠦᠭᠡᠢ ᠶ᠋ᠢᠨ ᠬᠥᠪᠡᠭᠦᠳ ᠪᠢᠳᠡ ᠥᠪᠡᠷ ᠢ ᠪᠡᠨ ᠬᠠᠮᠠᠭᠠᠯᠠᠬᠤ ᠪᠢᠰᠢ ᠦᠰᠲᠡᠨ ᠢ᠋ᠶ᠋ᠡᠨ ᠳᠣᠪᠲᠣᠯᠤᠨ ᠳᠠᠷᠤᠬᠤ ᠶᠡᠬᠡ ᠴᠡᠷᠢᠭ ᠵᠠᠰᠠᠬᠤ ᠴᠠᠭ ᠢᠷᠡᠵᠡᠢ᠃ ᠪᠠᠢᠯᠳᠤᠬᠤ ᠲᠤᠯᠤᠯᠳᠤᠬᠤ ᠳ᠋ᠠᠭᠠᠨ ᠴᠢᠮᠠ ᠠ᠋ᠴᠠ ᠢᠯᠡᠭᠦᠦ ᠬᠡᠨ ᠪᠢᠯᠡ᠃ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠶᠡᠬᠡ ᠴᠡᠷᠢᠭ ᠢ ᠬᠠᠰᠠᠷ ᠳᠡᠭᠦᠦ ᠴᠢ ᠵᠠᠰᠠᠵᠤ ᠤᠳᠤᠷᠢᠳᠤᠭᠲᠤᠨ᠃ ᠡᠢᠮᠦ ᠡᠷᠬᠡ ᠶ᠋ᠢ ᠪᠢ ᠴᠢᠮᠠ ᠳ᠋ᠤ᠌ ᠣᠯᠭᠣᠶᠠ᠃ ᠡᠵᠢ ᠴᠦ᠍ ᠢᠩᠭᠢᠵᠦ ᠪᠣᠳᠣᠵᠤ ᠪᠣᠢ ᠪᠠᠨ ᠨᠠᠳᠠᠳᠤ ᠬᠡᠯᠡᠪᠡ᠃
ᠲᠡᠮᠦᠵᠢᠨ ᠦ᠌ ᠡᠨᠡ ᠰᠠᠨᠠᠮᠰᠠᠷ ᠦᠭᠡᠢ ᠦᠭᠡ ᠬᠠᠰᠠᠷ ᠢ᠋ ᠰᠠᠭᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠦᠰᠦᠷᠦᠨ ᠪᠣᠰᠲᠠᠯᠠ ᠪᠠᠶᠠᠷᠯᠠᠭᠤᠯᠵᠤ ᠥᠭᠡᠯᠦᠨ ᠢ᠋ ᠰᠣᠴᠢᠭᠠᠪᠠ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠳᠠᠭᠤ ᠦᠭᠡᠢ ᠲᠣᠯᠣᠭᠠᠢ ᠳᠣᠬᠢᠵᠠᠢ᠃ ᠡᠭᠦᠨ ᠡᠴᠡ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠶᠠᠭᠠᠬᠢᠬᠤ ᠪᠢᠯᠡ᠃ ᠲᠡᠮᠦᠵᠢᠨ ᠦ᠌ ᠦᠭᠡᠨ ᠳ᠋ᠦ᠍ ᠪᠠᠶᠠᠷᠯᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠠᠢᠪᠠ᠃ ᠬᠥᠭᠡᠷᠴᠦ ᠳᠣᠭᠳᠣᠯᠤᠭᠰᠠᠨ ᠬᠠᠰᠠᠷ ᠬᠡᠯᠡᠬᠦ ᠦᠭᠡ ᠪᠡᠨ ᠣᠯᠬᠤ ᠦᠭᠡᠢ ᠪᠣᠯᠵᠠᠢ᠃
— ᠬᠠᠰᠠᠷ ᠴᠢ ᠶᠠᠪᠤᠭᠠᠨ ᠳ᠋ᠠᠭᠠᠨ ᠮᠢᠨᠦ ᠤᠯᠤᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠪᠣᠯᠤᠨᠠ᠃ ᠪᠢ ᠳᠡᠭᠦᠦ ᠴᠢᠮᠠ ᠠ᠋ᠴᠠ ᠥᠭᠡᠷᠡ ᠬᠡᠨ ᠳ᠋ᠦ᠍ ᠢᠲᠡᠭᠡᠵᠦ ᠡᠨᠡ ᠬᠡᠷᠡᠭ ᠢ᠋ ᠳᠠᠭᠠᠭᠠᠯᠭᠠᠬᠤ ᠪᠢᠯᠡ᠃ ᠶᠢᠰᠦᠭᠡᠢ ᠶ᠋ᠢᠨ ᠬᠥᠪᠡᠭᠦᠳ ᠡᠪᠲᠡᠢ ᠶᠠᠪᠤᠪᠠᠯ ᠬᠡᠨ ᠳ᠋ᠦ᠍ ᠴᠦ᠍ ᠳᠡᠢᠯᠦᠭᠳᠡᠬᠦ ᠦᠭᠡᠢ ᠭᠡᠵᠦ ᠡᠵᠢ ᠲᠠ ᠰᠤᠷᠭᠠᠳᠠᠭ ᠪᠢᠰᠢ ᠤᠤ ᠭᠡᠵᠦ ᠲᠡᠮᠦᠵᠢᠨ ᠢᠨᠢᠶᠡᠵᠡᠢ᠃ ᠥᠭᠡᠯᠦᠨ ᠴᠢᠮᠡᠭᠡ ᠦᠭᠡᠢ ᠤᠬᠢᠯᠠᠵᠤ ᠰᠠᠭᠤᠪᠠ᠃ ᠬᠠᠰᠠᠷ ᠭᠠᠢᠬᠠᠵᠤ
— ᠡᠵᠢ ᠠ᠋᠂ ᠲᠡᠮᠦᠵᠢᠨ ᠠᠬᠠ ᠡᠢᠮᠦ ᠪᠠᠶᠠᠷᠲᠠᠢ ᠦᠭᠡ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠠ ᠶᠠᠭᠤᠨ ᠳ᠋ᠤ᠌ ᠤᠬᠢᠯᠠᠪᠠ ᠭᠡᠵᠦ ᠬᠥᠬᠥᠷᠡᠨᠡ᠃
— ᠡᠵᠢ ᠨᠢ ᠲᠠ ᠬᠣᠶᠠᠷ ᠢ᠋ ᠢᠩᠭᠢᠵᠦ ᠨᠠᠢᠷᠲᠠᠢ ᠰᠠᠭᠤᠬᠤ ᠶ᠋ᠢ ᠬᠠᠷᠠᠭᠠᠳ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠤᠬᠢᠯᠠᠪᠠ ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠡᠢ᠃
— ᠡᠵᠢ ᠠ᠋᠂ ᠲᠠ ᠥᠩᠭᠡᠷᠡᠭᠰᠡᠨ ᠶᠠᠪᠤᠳᠠᠯ ᠢ᠋ ᠮᠠᠷᠲᠠ᠃ ᠪᠢ ᠲᠡᠮᠦᠵᠢᠨ ᠠᠬᠠ ᠳ᠋ᠤ᠌ ᠶᠡᠷᠦ ᠭᠣᠮᠣᠳᠠᠵᠤ ᠰᠠᠨᠠᠭᠰᠠᠨ ᠵᠦᠢᠯ ᠦᠭᠡᠢ ᠭᠡᠵᠦ ᠬᠠᠰᠠᠷ ᠦᠨᠡᠨ ᠰᠡᠳᠬᠢᠯ ᠡᠴᠡ ᠬᠡᠯᠡᠭᠰᠡᠨ ᠪᠢᠯᠡ᠃《ᠬᠠᠰᠠᠷ ᠬᠥᠪᠡᠭᠦᠨ ᠮᠢᠨᠢ ᠳᠠᠩᠴᠤ ᠢᠲᠡᠭᠡᠮᠡᠲᠡᠭᠡᠢ ᠭᠡᠨᠡᠨ ᠬᠥᠮᠦᠨ ᠳᠡ》 ᠭᠡᠵᠦ ᠪᠣᠳᠣᠭᠰᠠᠨ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠬᠠᠰᠠᠷ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡ ᠨᠢ ᠴᠣᠬᠣᠮ ᠲᠡᠮᠦᠵᠢᠨ ᠦ᠌ ᠰᠣᠨᠣᠰᠬᠤ ᠭᠡᠵᠦ ᠬᠦᠰᠡᠭᠰᠡᠨ ᠦᠭᠡ ᠶᠦᠮ᠃
ᠲᠡᠮᠦᠵᠢᠨ ᠦ᠌ ᠭᠡᠨᠡᠳᠲᠡ ᠢᠩᠭᠢᠵᠦ ᠰᠢᠢᠳᠦᠭᠰᠡᠨ ᠨᠢ ᠥᠭᠡᠯᠦᠨ ᠢ᠋ ᠭᠠᠢᠬᠠᠰᠢᠷᠠᠭᠤᠯᠵᠠᠢ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠦ᠌ ᠤᠬᠠᠭᠠᠨ ᠳ᠋ᠤ᠌ ᠢᠲᠡᠭᠡᠵᠦ ᠪᠠᠢᠪᠠ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠭᠴᠠ ᠥᠷᠢᠰᠦᠯᠳᠦᠭᠴᠢ ᠳ᠋ᠦ᠍ ᠭᠡᠨᠡᠳᠲᠡ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠬᠤ ᠡᠷᠬᠡ ᠶ᠋ᠢ ᠥᠭᠴᠦ ᠳᠡᠮᠵᠢᠭᠰᠡᠨ ᠨᠢ ᠣᠢᠯᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠬᠡᠷᠡᠭ ᠪᠠᠢᠭᠰᠠᠨ ᠴᠦ᠍ ᠪᠠᠰᠠ ᠲᠡᠮᠦᠵᠢᠨ ᠳ᠋ᠦ᠍ ᠡᠭᠦᠨ ᠡᠴᠡ ᠥᠭᠡᠷᠡ ᠵᠠᠮ ᠪᠠᠢᠭᠰᠠᠨ ᠦᠭᠡᠢ ᠪᠢᠯᠡ᠃ ᠬᠠᠰᠠᠷ ᠤ᠋ᠨ ᠭᠣᠮᠣᠳᠠᠭᠰᠠᠨ ᠰᠡᠳᠬᠢᠯ ᠡᠴᠡ ᠶᠠᠮᠠᠷ ᠴᠦ᠍ ᠦᠢᠯᠡ ᠭᠠᠷᠴᠤ ᠪᠣᠯᠬᠤ ᠶ᠋ᠢ ᠲᠡᠮᠦᠵᠢᠨ ᠮᠡᠳᠡᠵᠦ ᠪᠠᠢᠯᠠ᠃ ᠡᠭᠦᠨ ᠦ᠌ ᠬᠠᠵᠠᠭᠤ ᠪᠠᠷ ᠥᠭᠡᠯᠦᠨ ᠡᠬᠡ ᠨᠢ ᠬᠠᠰᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠢᠯᠡᠷᠬᠡᠢ ᠥᠮᠥᠭᠡᠷᠡᠨ ᠳᠡᠮᠵᠢᠵᠦ ᠪᠠᠢᠭᠠ ᠨᠢ ᠢᠩᠭᠢᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠭᠡᠵᠡᠢ᠃ ᠪᠠᠰᠠ ᠰᠢᠨᠡ ᠬᠠᠨ ᠲᠡᠮᠦᠵᠢᠨ ᠳ᠋ᠦ᠍ ᠭᠣᠮᠣᠳᠠᠭᠰᠠᠨ ᠠᠬᠠᠰ ᠶᠡᠬᠡᠰ ᠲᠡᠭᠦᠨ ᠢ᠋ ᠵᠠᠢᠯᠠᠭᠤᠯᠬᠤ ᠶ᠋ᠢ ᠬᠦᠰᠡᠬᠦ ᠳ᠋ᠡᠭᠡᠨ ᠬᠠᠰᠠᠷ ᠢ᠋ ᠠᠰᠢᠭᠯᠠᠬᠤ ᠨᠢ ᠢᠯᠡᠳᠲᠡ ᠲᠤᠯᠠ ᠢᠩᠭᠢᠵᠦ ᠰᠢᠢᠳᠬᠦ ᠳ᠋ᠦ᠍ ᠬᠦᠷᠭᠡᠪᠡ᠃ ᠬᠠᠰᠠᠷ ᠤ᠋ᠨ ᠦᠷᠭᠦᠭᠡᠨ ᠳ᠋ᠦ᠍ ᠬᠡᠨ ᠣᠴᠢᠵᠤ ᠶᠠᠭᠤ ᠭᠡᠵᠦ ᠶᠠᠷᠢᠭᠰᠠᠨ ᠢ᠋ ᠴᠦ᠍ ᠲᠡᠮᠦᠵᠢᠨ ᠮᠡᠳᠡᠵᠦ ᠪᠠᠢᠪᠠ᠃ ᠬᠠᠰᠠᠷ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠥᠪᠡᠷ ᠦ᠋ᠨ ᠢᠲᠡᠭᠡᠯᠲᠡᠢ ᠲᠠᠩᠨᠠᠭᠤᠯ ᠢ᠋ᠶ᠋ᠠᠨ ᠰᠠᠭᠤᠯᠭᠠᠬᠤ ᠪᠠᠨ ᠲᠡᠮᠦᠵᠢᠨ ᠮᠠᠷᠲᠠᠭᠠ ᠦᠭᠡᠢ ᠪᠢᠯᠡ᠃ ᠥᠷᠢᠰᠦᠯᠳᠦᠭᠴᠢᠳ ᠪᠣᠯᠤᠨ ᠬᠣᠷᠣᠨ ᠰᠠᠨᠠᠭᠠᠲᠠᠨ ᠨᠤᠭᠤᠳ ᠬᠠᠰᠠᠷ ᠲᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠡᠭᠦᠰᠦᠭᠰᠡᠨ ᠵᠥᠷᠢᠴᠡᠯ ᠢ᠋ ᠠᠰᠢᠭᠯᠠᠨ ᠳᠥᠩᠭᠡᠵᠦ ᠨᠢᠭᠡᠳᠦᠭᠡᠳ ᠪᠠᠢᠭᠠ ᠪᠣᠷᠵᠢᠭᠢᠨ ᠠᠢᠮᠠᠭ ᠢ᠋ ᠪᠤᠲᠠᠷᠠᠭᠠᠵᠤ ᠲᠡᠭᠦᠨ ᠡᠴᠡ ᠬᠠᠨ ᠰᠠᠭᠤᠳᠠᠯ ᠢ᠋ ᠨᠢ ᠪᠤᠯᠢᠶᠠᠨ ᠠᠪᠬᠤ ᠶ᠋ᠢ ᠰᠠᠨᠠᠭᠠᠷᠬᠠᠵᠤ ᠪᠠᠢᠭᠠ ᠨᠢ ᠢᠯᠡᠳᠲᠡ ᠪᠠᠢᠪᠠ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠲᠡᠳᠡᠨ ᠦ᠌ ᠡᠨᠡ ᠰᠠᠨᠠᠭᠠ ᠶ᠋ᠢ ᠲᠠᠰᠤᠯᠤᠨ ᠵᠣᠭᠰᠣᠭᠠᠬᠤ ᠭᠠᠭᠴᠠ ᠠᠷᠭᠠ ᠨᠢ ᠪᠠᠭᠤᠯᠲᠠ ᠬᠢᠵᠦ ᠬᠠᠰᠠᠷ ᠢ᠋ ᠥᠪᠡᠷ ᠲᠡᠭᠡᠨ ᠲᠠᠲᠠᠬᠤ ᠶᠠᠪᠤᠳᠠᠯ ᠪᠠᠢᠭᠰᠠᠨ ᠪᠢᠯᠡ᠃ ᠬᠠᠰᠠᠷ ᠢ᠋ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠢ᠋ᠶ᠋ᠠᠷ ᠲᠣᠮᠢᠯᠠᠬᠤ ᠠ᠋ᠴᠠ ᠥᠭᠡᠷᠡ ᠰᠠᠢᠨ ᠠᠷᠭᠠ ᠶ᠋ᠢ ᠲᠡᠮᠦᠵᠢᠨ ᠣᠯᠤᠭᠰᠠᠨ ᠦᠭᠡᠢ᠃ ᠡᠨᠡ ᠪᠦᠭᠦᠳᠡ ᠶ᠋ᠢ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠤᠷ ᠳᠡᠭᠡᠷᠡ ᠬᠡᠯᠡᠭᠰᠡᠨ ᠨᠢ ᠴᠦ᠍ ᠤᠴᠢᠷᠲᠠᠢ ᠶᠤᠮ᠃ ᠬᠠᠰᠠᠷ ᠲᠤ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠦᠭᠡ ᠶᠠᠮᠠᠷ ᠨᠥᠯᠥᠭᠡᠲᠡᠢ ᠶ᠋ᠢ ᠪᠣᠳᠣᠯᠴᠠᠭᠰᠠᠨ ᠬᠡᠷᠡᠭ ᠪᠠᠢᠪᠠ᠃ ᠥᠭᠡᠯᠦᠨ ᠲᠦᠷ ᠪᠣᠯᠪᠠᠴᠤ ᠰᠡᠳᠬᠢᠯ ᠠᠮᠠᠷᠠᠵᠤ ᠬᠠᠰᠠᠷ ᠲᠡᠮᠦᠵᠢᠨ ᠦ᠌ ᠳᠠᠭᠠᠭᠠᠯᠭᠠᠭᠰᠠᠨ ᠠᠵᠢᠯ ᠳ᠋ᠤ᠌ ᠢᠲᠡᠭᠡᠯ ᠲᠡᠭᠦᠰ ᠤᠷᠮᠠ ᠵᠣᠷᠢᠭ ᠳᠦᠭᠦᠷᠡᠩ ᠣᠷᠣᠵᠠᠢ᠃ ᠬᠠᠰᠠᠷ ᠲᠠᠢ ᠪᠠᠭᠤᠯᠲᠠ ᠬᠢᠬᠦ ᠵᠠᠮ ᠢ᠋ᠶ᠋ᠠᠷ ᠲᠡᠮᠡᠴᠡᠵᠦ ᠥᠪᠡᠷ ᠦ᠋ᠨ ᠬᠡᠷᠡᠭ ᠲᠦ᠍ ᠠᠰᠢᠭᠯᠠᠬᠤ ᠶᠣᠰᠣᠲᠠᠢ ᠶ᠋ᠢ ᠲᠡᠮᠦᠵᠢᠨ᠂ ᠬᠠᠨ ᠰᠠᠭᠤᠭᠰᠠᠨ ᠡᠬᠢᠨ ᠦ᠌ ᠵᠢᠯ ᠦ᠋ᠳ ᠲᠡᠭᠡᠨ ᠰᠠᠢᠲᠤᠷ ᠣᠢᠯᠠᠭᠠᠵᠤ ᠠᠪᠴᠠᠢ᠃ ᠬᠠᠰᠠᠷ ᠢ᠋ ᠠᠯᠳᠠᠪᠠᠯ ᠠᠢᠮᠠᠭ ᠤ᠋ᠨ ᠢ᠋ᠶ᠋ᠠᠨ ᠬᠠᠭᠠᠰ ᠢ᠋ ᠠᠯᠳᠠᠭᠰᠠᠨ ᠲᠠᠢ ᠠᠳᠠᠯᠢ ᠬᠡᠷᠡᠭ ᠪᠣᠯᠵᠤ ᠳᠠᠪᠠᠵᠤ ᠳᠡᠢᠯᠦᠰᠢ ᠦᠭᠡᠢ ᠳᠠᠢᠰᠤᠨ ᠲᠠᠢ ᠪᠣᠯᠬᠤ ᠶ᠋ᠢ ᠲᠡᠷᠡ ᠰᠠᠢᠨ ᠮᠡᠳᠡᠵᠦ ᠪᠠᠢᠪᠠ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠴᠠᠭ ᠠᠯᠳᠠᠯ ᠦᠭᠡᠢ ᠢᠩᠭᠢᠵᠦ ᠵᠣᠷᠢᠮᠠᠭ ᠰᠢᠢᠳ ᠭᠠᠷᠭᠠᠵᠠᠢ᠃ ᠬᠠᠰᠠᠷ ᠡᠷᠭᠢᠭᠡᠳ ᠳᠤᠭᠤᠯᠭᠠᠪᠤᠷᠢᠲᠠᠢ ᠦᠨᠡᠨᠴᠢ ᠰᠡᠳᠬᠢᠯ ᠲᠡᠢ ᠳᠡᠭᠦᠦ ᠪᠣᠯᠤᠨ ᠬᠤᠪᠢᠷᠠᠵᠤ ᠴᠡᠷᠢᠭ ᠵᠠᠰᠠᠬᠤ ᠠᠵᠢᠯ ᠳ᠋ᠠᠭᠠᠨ ᠰᠢᠭᠤᠳᠴᠠᠢ᠃ ᠴᠡᠷᠢᠭ ᠵᠠᠰᠠᠬᠤ ᠪᠠᠢᠯᠳᠤᠵᠤ ᠲᠤᠯᠬᠤ ᠨᠢ ᠬᠠᠰᠠᠷ ᠤ᠋ᠨ ᠲᠥᠷᠦᠮᠡᠯ ᠤᠬᠠᠭᠠᠨ ᠠᠪᠢᠶᠠᠰ ᠪᠥᠭᠡᠳ ᠲᠡᠭᠦᠨ ᠦ᠌ ᠴᠢᠳᠠᠪᠤᠷᠢ ᠶ᠋ᠢ ᠪᠦᠭᠦᠳᠡᠭᠡᠷ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠵᠦ ᠤᠳᠠᠯ ᠦᠭᠡᠢ ᠬᠠᠰᠠᠷ ᠰᠢᠯᠢᠳᠡᠭ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠢ᠋ ᠵᠠᠰᠠᠵᠠᠢ᠃ ᠲᠡᠮᠦᠵᠢᠨ ᠥᠪᠡᠷ ᠦ᠋ᠨ ᠰᠢᠢᠳᠪᠦᠷᠢ ᠶ᠋ᠢᠨ ᠵᠥᠪ ᠭᠡᠳᠡᠭ ᠲᠦ᠍ ᠢᠲᠡᠭᠡᠭᠡᠳ ᠴᠡᠷᠢᠭ ᠦ᠋ᠨ ᠪᠦᠬᠦ ᠬᠡᠷᠡᠭ ᠢ᠋ ᠭᠣᠣᠯᠴᠢᠯᠠᠨ ᠬᠠᠰᠠᠷ ᠲᠠᠢ ᠵᠥᠪᠯᠡᠬᠦ ᠪᠣᠯᠵᠠᠢ᠃ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠳᠣᠲᠣᠷᠠ ᠶᠢᠰᠦᠭᠡᠢ ᠶ᠋ᠢᠨ ᠬᠥᠪᠡᠭᠦᠳ ᠦ᠋ᠨ ᠳᠤᠮᠳᠠ ᠡᠭᠦᠰᠦᠭᠰᠡᠨ ᠠᠶᠤᠯᠲᠤ ᠵᠥᠷᠢᠴᠡᠯ ᠨᠠᠮᠳᠠᠭᠰᠠᠨ ᠨᠢ ᠣᠯᠠᠨ ᠣᠪᠣᠭ ᠠᠢᠮᠠᠭ ᠢ᠋ ᠠᠶᠤᠯᠭᠠᠵᠤ ᠡᠬᠢᠯᠡᠪᠡ᠃《ᠶᠢᠰᠦᠭᠡᠢ ᠶ᠋ᠢᠨ ᠬᠥᠪᠡᠭᠦᠳ ᠲᠠ ᠨᠠᠷ ᠡᠪᠲᠡᠢ ᠪᠠᠢᠪᠠᠯ ᠬᠡᠨ ᠳ᠋ᠦ᠍ ᠴᠦ᠍ ᠦᠯᠦ ᠳᠡᠢᠯᠦᠭᠳᠡᠨᠡ》ᠭᠡᠵᠦ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠬᠡᠯᠡᠳᠡᠭ ᠦᠨᠡᠨ ᠪᠣᠯᠬᠤ ᠳ᠋ᠤ᠌ ᠣᠳᠣ ᠪᠦᠭᠦᠳᠡ ᠢᠲᠡᠭᠡᠪᠡ᠃ ᠥᠭᠡᠯᠦᠨ ᠵᠢᠷᠭᠠᠯᠲᠠᠢ ᠪᠣᠯᠵᠠᠢ᠃ ᠲᠡᠷᠡ ᠪᠡᠷ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠭᠠᠢᠬᠠᠯᠲᠠᠢ ᠮᠡᠷᠭᠡᠨ ᠤᠬᠠᠭᠠᠨ ᠳ᠋ᠤ᠌ ᠶᠡᠬᠡᠳᠡ ᠪᠢᠰᠢᠷᠡᠵᠦ ᠲᠡᠭᠦᠨ ᠢ᠋ ᠲᠣᠭᠣᠵᠤ ᠬᠦᠨᠳᠦᠯᠡᠬᠦ ᠨᠢ ᠤᠯᠠᠮ ᠨᠡᠮᠡᠭᠳᠡᠵᠡᠢ᠃ ᠲᠡᠮᠦᠵᠢᠨ ᠣᠳᠣ ᠨᠢᠭᠡᠨᠲᠡ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠢᠰᠢ ᠪᠣᠯᠤᠭᠰᠠᠨ ᠢ᠋ ᠣᠢᠯᠠᠭᠠᠪᠠ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠨᠢ ᠲᠡᠭᠦᠨ ᠦ᠌ ᠨᠢᠳᠦᠨ ᠳᠡᠭᠡᠷᠡ ᠡᠷᠬᠡ ᠮᠠᠲᠠᠯ ᠳᠦᠭᠦᠷᠡᠩ ᠰᠢᠨᠡ ᠡᠵᠡᠨ ᠪᠣᠯᠤᠨ ᠬᠤᠪᠢᠷᠠᠵᠤ ᠪᠠᠢᠬᠤ ᠶ᠋ᠢ ᠥᠭᠡᠯᠦᠨ ᠪᠠᠬᠠᠷᠬᠠᠨ ᠬᠠᠷᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠰᠡᠳᠬᠢᠯ ᠳ᠋ᠦ᠍ ᠤᠷᠢᠳ ᠤ᠋ᠨ ᠠᠳᠠᠯᠢ ᠬᠦᠨᠳᠦᠳᠬᠡᠯᠲᠡᠢ ᠬᠠᠨᠳᠤᠳᠠᠭ ᠨᠢ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠲᠡᠷᠡ ᠶᠡᠬᠡ ᠪᠠᠶᠠᠷᠯᠠᠳᠠᠭ ᠪᠠᠢᠪᠠ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠮᠡᠨᠳᠦᠯᠡᠭᠰᠡᠨ ᠳ᠋ᠦ᠍ ᠣᠳᠣ ᠥᠭᠡᠯᠦᠨ ᠪᠦᠷ ᠪᠠᠲᠤ ᠢᠲᠡᠭᠡᠬᠦ ᠪᠣᠯᠵᠠᠢ᠃ ᠠᠩᠬᠠ ᠲᠥᠷᠥᠬᠦ ᠳ᠋ᠦ᠍ᠨᠢ ᠢᠩᠭᠢᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠬᠠᠲᠠᠭᠤ ᠢᠳᠡᠭᠡ ᠦᠭᠡᠢ ᠪᠢᠯᠡ᠃
ᠲᠡᠮᠦᠵᠢᠨ ᠢ᠋ ᠲᠥᠷᠥᠬᠦ ᠳ᠋ᠦ᠍ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠡᠵᠡᠭᠦᠢ ᠲᠠᠲ᠋ᠠᠷ ᠲᠠᠢ ᠲᠤᠯᠤᠯᠳᠤᠬᠤ ᠪᠠᠷ ᠣᠳᠤᠭᠰᠠᠨ ᠪᠠᠢᠵᠠᠢ᠃ ᠲᠡᠮᠦᠵᠢᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠳᠡᠰᠦᠨ ᠳ᠋ᠦ᠍ ᠣᠯᠳᠠᠭᠰᠠᠨ ᠴᠠᠭ ᠠ᠋ᠴᠠ ᠪᠠᠨ ᠯᠠ ᠭᠠᠢᠬᠠᠰᠢᠷᠠᠯ ᠢ᠋ ᠨᠢ ᠪᠠᠷᠠᠭᠰᠠᠨ ᠬᠡᠦᠬᠡᠳ ᠪᠠᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠶᠢᠰᠦᠭᠡᠢ ᠶ᠋ᠢᠨ ᠪᠠᠭᠠ ᠬᠠᠲᠤᠨ ᠰᠣᠴᠢᠭᠠᠯ ᠪᠠᠰᠠ ᠪᠡᠶᠡ ᠳᠠᠪᠬᠤᠷ ᠪᠠᠢᠭᠰᠠᠨ ᠨᠢ ᠡᠮᠡᠰ ᠦ᠋ᠨ ᠬᠣᠭᠣᠷᠣᠨᠳᠣ ᠳᠠᠯᠳᠠ ᠪᠢᠴᠢᠬᠠᠨ ᠥᠷᠢᠰᠦᠯᠳᠦᠭᠡᠨ ᠢ᠋ ᠡᠭᠦᠰᠬᠡᠵᠡᠢ᠃ ᠶᠢᠰᠦᠭᠡᠢ ᠵᠡᠷᠭᠡ ᠰᠢᠬᠠᠮ ᠪᠡᠶᠡ ᠳᠠᠪᠬᠤᠷ ᠪᠣᠯᠤᠭᠰᠠᠨ ᠬᠠᠲᠤᠳ ᠤ᠋ᠨ ᠢ᠋ᠶ᠋ᠠᠨ ᠳᠤᠮᠳᠠᠭᠤᠷ ᠬᠡᠪᠲᠡᠭᠡᠳ ᠴᠣᠳᠣᠭᠣᠷ ᠭᠡᠳᠡᠰᠦ ᠶ᠋ᠢ ᠨᠢ ᠢᠯᠪᠢᠨ ᠪᠠᠶᠠᠷ ᠬᠥᠷ ᠳᠦᠭᠦᠷᠡᠩ ᠪᠠᠢᠬᠤ ᠦᠶᠡ ᠳ᠋ᠡᠭᠡᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠳᠠᠭᠤᠳᠠᠨ ᠡᠷᠬᠡᠯᠡᠭᠦᠯᠳᠡᠭ ᠪᠠᠢᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠰᠣᠴᠢᠭᠠᠯ ᠤ᠋ᠨ ᠭᠡᠳᠡᠰᠦᠨ ᠳ᠋ᠡᠬᠢ ᠬᠡᠦᠬᠡᠳ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠠᠳ ᠬᠥᠳᠡᠯᠵᠦ ᠪᠠᠢᠬᠤ ᠳ᠋ᠤ᠌ ᠬᠠᠷᠢᠨ ᠥᠭᠡᠯᠦᠨ ᠦ᠌ ᠬᠡᠦᠬᠡᠳ ᠦᠬᠦᠭᠰᠡᠨ ᠮᠡᠲᠦ ᠲᠠᠭ ᠴᠢᠭ ᠪᠠᠢᠳᠠᠭ ᠨᠢ ᠳᠠᠩᠴᠤ ᠠᠲᠠᠭᠠᠷᠬᠠᠯᠲᠠᠢ ᠰᠠᠨᠠᠭᠳᠠᠳᠠᠭ ᠪᠠᠢᠪᠠ᠃
— ᠰᠣᠴᠢᠭᠠᠯ᠃ ᠴᠢᠨᠦ ᠬᠡᠦᠬᠡᠳ ᠯᠠᠪ ᠲᠦᠷᠦᠭᠦᠯᠡᠵᠦ ᠭᠠᠷᠬᠤ ᠪᠠᠢᠬᠤ᠃ ᠡᠴᠢᠭᠡ ᠶ᠋ᠢ ᠪᠡᠨ ᠲᠠᠨᠢᠵᠤ ᠬᠥᠳᠡᠯᠵᠦ ᠪᠠᠢᠬᠤ ᠶ᠋ᠢ ᠨᠢ ᠦᠵᠡᠪᠡᠯ ᠰᠦᠷᠡᠬᠡᠢ ᠪᠠᠭᠠᠲᠤᠷ ᠡᠷᠡ ᠲᠥᠷᠥᠬᠦ ᠪᠢᠵᠡ ᠭᠡᠵᠦ ᠶᠢᠰᠦᠭᠡᠢ ᠥᠭᠦᠯᠡᠵᠦ ᠪᠠᠭᠠ ᠬᠠᠲᠤᠨ ᠢ᠋ᠶ᠋ᠠᠨ ᠡᠩᠬᠦᠷᠡᠢᠯᠡᠵᠤ ᠬᠠᠯᠠᠮᠵᠢᠯᠠᠬᠤ ᠨᠢ ᠤᠯᠠᠮ ᠨᠡᠮᠡᠭᠳᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠥᠭᠡᠯᠦᠨ ᠦ᠌ ᠠᠲᠠᠭᠠᠷᠬᠠᠯ ᠬᠣᠷᠣᠰᠤᠯ ᠪᠠᠳᠠᠷᠠᠵᠤ ᠨᠡᠭᠡᠷᠡᠨ ᠬᠡᠪᠲᠡᠰᠢᠨ ᠳ᠋ᠡᠬᠢ ᠬᠡᠦᠬᠡᠳ ᠨᠢ ᠠᠮᠢ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠭᠠᠳ ᠰᠥᠨᠢ ᠪᠦᠷᠢ ᠤᠬᠢᠯᠠᠵᠤ ᠬᠣᠨᠣᠳᠠᠭ ᠪᠠᠢᠪᠠ᠃ ᠥᠭᠡᠯᠦᠨ ᠦ᠌ ᠪᠠᠢᠳᠠᠯ ᠢ᠋ ᠭᠠᠳᠠᠷᠯᠠᠭᠰᠠᠨ ᠠᠰᠠᠷᠠᠭᠴᠢ ᠡᠮᠡ ᠬᠤᠸᠠᠭᠴᠢᠨ ᠨᠢ
— ᠥᠭᠡᠯᠦᠨ ᠰᠠᠨᠠᠭᠠ ᠪᠦᠦ ᠵᠣᠪᠠ᠃ ᠴᠢᠨᠦ ᠬᠡᠦᠬᠡᠳ ᠵᠦᠭᠡᠷ᠃ ᠬᠠᠷᠢᠨ ᠴᠤ᠌ ᠢᠩᠭᠢᠵᠦ ᠳᠠᠭᠤ ᠦᠭᠡᠢ ᠲᠡᠪᠴᠢᠶᠡᠷᠢ ᠲᠡᠢ ᠪᠠᠢᠭᠠ ᠨᠢ ᠪᠠᠭᠠᠲᠤᠷ ᠡᠷᠡ ᠲᠥᠷᠥᠬᠦ ᠶ᠋ᠢᠨ ᠰᠢᠨᠵᠢ ᠭᠡᠵᠦ ᠲᠠᠢᠪᠤᠰᠢᠷᠠᠭᠤᠯᠳᠠᠭ ᠪᠠᠢᠵᠠᠢ᠃ ᠥᠭᠡᠯᠦᠨ ᠶᠡᠬᠡ ᠬᠠᠲᠤᠨ ᠤ᠋ ᠬᠤᠪᠢ ᠳ᠋ᠤ᠌ ᠲᠦᠷᠦᠭᠦᠯᠡᠵᠦ ᠲᠥᠷᠥᠬᠦ ᠶ᠋ᠢ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠶᠢᠰᠦᠭᠡᠢ ᠶ᠋ᠢᠨ ᠤᠤᠭᠠᠨ ᠵᠠᠯᠭᠠᠮᠵᠢᠯᠠᠭᠴᠢ ᠪᠣᠯᠬᠤ ᠶ᠋ᠢ ᠲᠤᠢᠯ ᠠ᠋ᠴᠠ ᠬᠦᠰᠡᠵᠦ ᠪᠠᠢᠪᠠ᠃ ᠭᠡᠲᠡᠯᠡ ᠬᠦᠰᠡᠬᠦ ᠳ᠋ᠦ᠍ ᠬᠢᠰᠠᠨᠠ ᠭᠡᠭᠴᠢ ᠪᠡᠷ ᠬᠡᠦᠬᠡᠳ ᠨᠢ ᠬᠥᠳᠡᠯᠬᠦ ᠴᠦ᠍ ᠦᠭᠡᠢ ᠪᠠᠢᠬᠤ ᠨᠢ ᠭᠠᠰᠠᠯᠠᠩᠲᠠᠢ᠃ ᠶᠢᠰᠦᠭᠡᠢ ᠶ᠋ᠢ ᠲᠠᠲ᠋ᠠᠷ ᠲᠠᠢ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠣᠴᠢᠭᠠᠯ ᠪᠠᠢᠨ ᠪᠠᠢᠨ ᠡᠪᠡᠳᠬᠦ ᠪᠣᠯᠤᠭᠰᠠᠨ ᠨᠢ ᠥᠭᠡᠯᠦᠨ ᠦ᠌ ᠬᠦᠰᠡᠯ ᠪᠡᠶᠡᠯᠡᠬᠦ ᠬᠤᠪᠢ ᠦᠭᠡᠢ ᠶ᠋ᠢ ᠪᠠᠲᠤᠯᠠᠵᠤ᠂ ᠬᠦᠷᠢᠶᠡ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠭᠠᠭᠴᠠ ᠰᠣᠴᠢᠭᠠᠯ ᠢ᠋ ᠲᠣᠢᠯᠠᠵᠤ ᠬᠣᠸᠠᠭᠴᠢᠨ ᠠᠰᠠᠷᠠᠭᠴᠢ ᠨᠢ ᠬᠦᠷᠲᠡᠯᠡ ᠰᠣᠴᠢᠭᠠᠯ ᠢ᠋ ᠰᠠᠬᠢᠨ ᠬᠣᠨᠣᠬᠤ ᠪᠣᠯᠵᠠᠢ᠃ ᠥᠭᠡᠯᠦᠨ ᠬᠡᠭᠡᠷᠡ ᠭᠠᠳᠠᠨᠠ ᠭᠠᠭᠴᠠᠭᠠᠷ ᠬᠠᠶᠠᠭᠳᠠᠭᠰᠠᠨ ᠮᠡᠲᠦ ᠭᠤᠨᠢᠭ ᠲᠤ ᠠᠪᠲᠠᠪᠠ᠃ ᠲᠡᠷᠡ ᠣᠳᠣ ᠪᠠᠭᠠ ᠬᠠᠲᠤᠨ ᠰᠣᠴᠢᠭᠠᠯ ᠠ᠋ᠴᠠ ᠰᠡᠭᠦᠯᠳᠡᠵᠦ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠥᠷᠥᠭᠦᠯᠬᠦ ᠨᠢ ᠲᠣᠳᠣᠷᠬᠠᠢ ᠪᠣᠯᠵᠠᠢ᠃ ᠲᠡᠷᠡ ᠰᠥᠨᠢ ᠬᠣᠸᠠᠭᠴᠢᠨ ᠤᠷᠢᠳ ᠤ᠋ᠨ ᠠᠳᠠᠯᠢ ᠰᠣᠴᠢᠭᠠᠯ ᠢ᠋ ᠰᠠᠬᠢᠬᠤ ᠪᠠᠷ ᠶᠠᠪᠤᠭᠰᠠᠨ ᠲᠤᠯᠠ ᠥᠭᠡᠯᠦᠨ ᠭᠡᠷ ᠲᠡᠭᠡᠨ ᠭᠠᠭᠴᠠᠭᠠᠷ ᠬᠡᠪᠲᠡᠵᠦ ᠪᠠᠢᠪᠠ᠃ ᠭᠡᠲᠡᠯᠡ ᠭᠡᠨᠡᠳᠲᠡ ᠭᠠᠳᠠᠭᠠ ᠰᠠᠷᠠ ᠭᠠᠷᠬᠤ ᠰᠢᠭ᠋ ᠲᠣᠭᠣᠨᠣ ᠪᠠᠷ ᠭᠡᠷᠡᠯ ᠲᠤᠰᠬᠤ ᠰᠢᠭ᠋ ᠪᠣᠯᠵᠠᠢ᠃ ᠥᠭᠡᠯᠦᠨ ᠵᠡᠭᠦᠳᠦᠯᠡᠵᠦ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠵᠠᠢ᠃ ᠥᠨᠥᠬᠢ ᠬᠡᠴᠢᠨᠡᠨ ᠰᠠᠷᠠ ᠦᠬᠦᠭᠰᠡᠨ ᠮᠡᠲᠦ ᠪᠠᠢᠭᠰᠠᠨ ᠬᠡᠦᠬᠡᠳ ᠨᠢ ᠬᠥᠳᠡᠯᠵᠦ ᠪᠦᠷ ᠭᠠᠷᠬᠤ ᠭᠡᠵᠦ ᠪᠠᠴᠢᠮᠳᠠᠨ ᠳᠣᠲᠣᠷᠠ ᠠ᠋ᠴᠠ ᠲᠦᠭ ᠲᠦᠭ ᠪᠠᠯᠪᠠᠵᠤ ᠪᠠᠢᠵᠠᠢ᠃ ᠪᠠᠶᠠᠷᠯᠠᠵᠤ ᠬᠥᠭᠡᠷᠬᠦ ᠶ᠋ᠢᠨ ᠵᠠᠪ ᠦᠭᠡᠢ ᠭᠡᠨᠡᠳᠲᠡ ᠪᠡᠶᠡ ᠨᠢ ᠡᠪ ᠦᠭᠡᠢᠷᠡᠵᠦ ᠬᠠᠰᠬᠢᠷᠴᠤ ᠬᠥᠮᠦᠨ ᠳᠠᠭᠤᠳᠠᠬᠤ ᠰᠡᠭᠡᠭᠡ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠬᠣᠷᠣᠮ ᠤ᠋ᠨ ᠳᠣᠲᠣᠷᠠ ᠲᠡᠭᠦᠨ ᠦ᠌ ᠬᠡᠵᠢᠶᠡ ᠴᠦ᠍ ᠦᠵᠡᠵᠦ ᠮᠡᠳᠡᠭᠡ ᠦᠭᠡᠢ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠥᠭᠡᠯᠦᠨ ᠢ᠋ ᠥᠨᠥ ᠬᠡᠦᠬᠡᠳ ᠨᠢ ᠬᠥᠳᠡᠯᠵᠦ ᠤᠳᠤᠷᠢᠳᠴᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠥᠭᠡᠯᠦᠨ ᠨᠢᠭᠡᠨᠲᠡ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠮᠡᠳᠡᠬᠦ ᠪᠡᠨ ᠪᠣᠯᠢᠭᠠᠳ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠠᠶᠠ ᠶ᠋ᠢ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠷ ᠳᠠᠭᠠᠵᠠᠢ᠃ ᠭᠡᠨᠡᠳᠲᠡ ᠬᠣᠶᠠᠷ ᠬᠥᠯ ᠦ᠋ᠨ ᠬᠣᠭᠣᠷᠣᠨᠳᠣ ᠠᠷᠪᠠᠭᠠᠷ ᠤᠯᠠᠭᠠᠨ ᠠᠮᠢᠲᠠᠨ ᠤᠨᠠᠭᠠᠳ ᠤᠴᠢᠷ ᠦᠭᠡᠢ ᠴᠢᠩᠭᠠ ᠪᠠᠷ ᠪᠠᠷᠬᠢᠷᠠᠨ ᠤᠬᠢᠯᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠯᠡ ᠰᠠᠶᠢ ᠰᠡᠬᠡᠭᠡᠷᠡᠵᠦ ᠤᠬᠠᠭᠠᠨ ᠣᠷᠣᠵᠠᠢ᠃ ᠬᠡᠦᠬᠡᠳ ᠨᠢ ᠭᠠᠷᠬᠤ ᠳ᠋ᠤ᠌ ᠥᠴᠦᠬᠡᠨ ᠴᠦ᠍ ᠡᠪᠡᠳᠦᠭᠰᠡᠨ ᠦᠭᠡᠢ ᠨᠢ ᠬᠠᠴᠢᠷᠬᠠᠯᠲᠠᠢ᠃ ᠥᠭᠡᠯᠦᠨ ᠴᠦ᠍ ᠬᠡᠦᠬᠡᠳ ᠢ᠋ᠶ᠋ᠡᠨ ᠳᠠᠭᠠᠨ ᠤᠬᠢᠯᠠᠵᠠᠢ᠃ ᠢᠩᠭᠢᠵᠦ ᠲᠡᠮᠦᠵᠢᠨ ᠲᠥᠷᠥᠬᠦ ᠡᠴᠡ ᠪᠠᠨ ᠯᠠ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠢᠬᠠᠰᠢᠷᠠᠯ ᠢ᠋ ᠪᠠᠷᠠᠵᠤ ᠡᠬᠢᠯᠡᠭᠰᠡᠨ ᠪᠢᠯᠡ᠃ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠭᠠᠷᠠᠭᠰᠠᠨ ᠰᠡᠳᠬᠢᠯ ᠢ᠋ ᠣᠢᠯᠠᠭᠠᠭᠠᠳ ᠲᠡᠮᠦᠵᠢᠨ᠂ ᠰᠣᠴᠢᠭᠠᠯ ᠤ᠋ᠨ ᠪᠡᠭᠲᠡᠷ ᠡᠴᠡ ᠳᠠᠷᠤᠢ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠲᠥᠷᠥᠭᠰᠡᠨ ᠳ᠋ᠦ᠍ ᠥᠭᠡᠯᠦᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠥᠷᠥᠪᠡ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠦᠷᠴᠡᠢ᠃ ᠦᠬᠦᠭᠰᠡᠨ ᠮᠡᠲᠦ ᠲᠠᠭ ᠴᠢᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠶᠠᠭ ᠬᠦᠰᠡᠭᠰᠡᠨ ᠦᠶᠡ ᠳ᠋ᠦ᠍ᠨᠢ ᠲᠥᠷᠥᠭᠰᠡᠨ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠨᠢ ᠥᠨᠥ ᠴᠦ᠍ ᠣᠨᠢᠰᠣᠭᠠ ᠮᠡᠲᠦ ᠵᠠᠩ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠥᠰᠴᠡᠢ᠃ ᠡᠬᠡ ᠬᠦᠦ ᠬᠣᠶᠠᠷ ᠤ᠋ᠨ ᠤᠬᠢᠯᠠᠬᠤ ᠶᠡᠬᠡ ᠴᠢᠮᠡᠭᠡ ᠪᠡᠷ ᠰᠠᠨᠳᠤᠷᠤᠨ ᠭᠦᠶᠦᠵᠦ ᠢᠷᠡᠭᠰᠡᠨ ᠬᠣᠸᠠᠭᠴᠢᠨ ᠦᠨᠡᠬᠡᠷ ᠦᠵᠡᠭᠰᠡᠨ ᠡᠴᠡ ᠪᠡᠨ ᠪᠣᠯᠤᠭᠠᠳ ᠤᠬᠠᠭᠠᠨ ᠠᠯᠳᠠᠬᠤ ᠳᠥᠭᠥᠵᠡᠢ᠃ ᠤᠰᠤ ᠴᠢᠰᠤᠨ ᠳ᠋ᠤ᠌ ᠬᠣᠯᠢᠯᠳᠤᠭᠰᠠᠨ ᠡᠬᠡ ᠬᠦᠦ ᠬᠣᠶᠠᠷ ᠬᠦᠢ ᠪᠡᠨ ᠴᠦ᠍ ᠲᠠᠰᠤᠯᠤᠯ ᠦᠭᠡᠢ ᠲᠡᠪᠡᠷᠢᠯᠳᠦᠵᠦ ᠰᠠᠭᠤᠵᠤ ᠪᠠᠢᠪᠠ᠃
— ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠭᠡ ᠦᠭᠡᠢ ᠤᠤ ᠭᠡᠵᠦ ᠬᠣᠸᠠᠭᠴᠢᠨ ᠤᠬᠢᠯᠠᠨ ᠰᠢᠪᠡᠨᠡᠭᠡᠳ ᠬᠦᠢ ᠶ᠋ᠢ ᠨᠢ ᠲᠠᠰᠤ ᠬᠠᠵᠠᠭᠠᠳ ᠭᠡᠵᠢᠭᠡᠨ ᠡᠴᠡ ᠪᠡᠨ ᠰᠤᠭᠤᠯᠤᠨ ᠪᠣᠭᠣᠵᠤ ᠥᠭᠭᠦᠭᠰᠡᠨ ᠪᠢᠯᠡ᠃ ᠲᠦᠷᠦᠮᠡᠭᠴᠡ ᠪᠡᠨ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ ᠡᠨᠡ ᠲᠡᠷᠡ ᠶ᠋ᠢ ᠣᠨᠣᠭᠠᠵᠤ ᠬᠠᠷᠠᠳᠠᠭ ᠲᠡᠢᠮᠦ ᠬᠡᠦᠬᠡᠳ ᠢ᠋ ᠤᠷᠢᠳ ᠡᠮᠦᠨᠡ ᠦᠵᠡᠭᠡ ᠦᠭᠡᠢ ᠬᠣᠸᠠᠭᠴᠢᠨ ᠪᠢᠴᠢᠬᠠᠨ ᠬᠥᠪᠡᠭᠦᠨ ᠢ᠋ ᠶᠡᠬᠡᠳᠡ ᠪᠢᠰᠢᠷᠡᠵᠡᠢ᠃ ᠬᠥᠪᠡᠭᠦᠨ ᠢ᠋ ᠤᠬᠢᠶᠠᠵᠤ ᠥᠯᠥᠭᠡᠢᠳᠡᠭᠡᠳ ᠬᠣᠸᠠᠭᠴᠢᠨ ᠭᠠᠷᠴᠤ ᠪᠦᠭᠦᠳᠡ ᠶ᠋ᠢ ᠰᠡᠷᠡᠭᠡᠨ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠵᠠᠯᠭᠠᠮᠵᠢᠯᠠᠭᠴᠢ ᠲᠠᠢ ᠪᠣᠯᠤᠭᠰᠠᠨ ᠢ᠋ ᠵᠠᠷᠯᠠᠵᠤ ᠬᠦᠷᠢᠶᠡ ᠳᠠᠶᠠᠭᠠᠷ ᠪᠥᠭᠡᠮ ᠪᠠᠶᠠᠷ ᠬᠥᠷ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠯᠠ ᠥᠭᠡᠯᠦᠨ ᠰᠠᠶᠢ ᠨᠢᠭᠡ ᠰᠡᠳᠬᠢᠯ ᠨᠢ ᠲᠠᠢᠳᠬᠤᠷᠠᠵᠤ ᠲᠡᠭᠰᠢᠷᠡᠭᠡᠳ ᠬᠥᠪᠡᠭᠦᠨ ᠲᠥᠷᠥᠭᠦᠯᠦᠭᠰᠡᠨ ᠳ᠋ᠡᠭᠡᠨ ᠢᠲᠡᠭᠡᠵᠦ ᠲᠩᠷᠢ ᠳ᠋ᠦ᠍ ᠲᠠᠯᠠᠷᠬᠠᠨ ᠮᠥᠷᠭᠥᠵᠡᠢ᠃ ᠲᠩᠷᠢ ᠥᠭᠡᠯᠦᠨ ᠦ᠌ ᠬᠦᠰᠡᠯ ᠢ᠋ ᠳᠠᠭᠠᠵᠤ ᠲᠡᠷᠡ ᠰᠣᠴᠢᠭᠠᠯ ᠠ᠋ᠴᠠ ᠲᠦᠷᠦᠭᠦᠯᠡᠨ ᠬᠥᠪᠡᠭᠦᠨ ᠲᠥᠷᠥᠭᠦᠯᠵᠡᠢ᠃ ᠬᠠᠷᠢᠨ ᠰᠢᠨᠡ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠦ᠌ ᠬᠢᠨᠢ ᠥᠯᠥᠭᠡᠢ ᠶ᠋ᠢᠨ ᠡᠩᠭᠡᠷ ᠵᠠᠭᠠᠮᠠ ᠪᠠᠷ ᠭᠡᠷᠡᠯ ᠰᠠᠴᠤᠷᠠᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠶᠡᠬᠡᠳᠡ ᠭᠠᠢᠬᠠᠨ ᠢᠷᠡᠨ ᠵᠠᠳᠠᠯᠵᠤ ᠦᠵᠡᠪᠡ᠃ ᠬᠥᠪᠡᠭᠦᠨ ᠦ᠌ ᠬᠢᠨᠢ ᠲᠠᠰᠤ ᠠᠳᠬᠤᠭᠠᠰᠤᠲᠠᠢ ᠵᠡᠭᠦᠨ ᠭᠠᠷ ᠠ᠋ᠴᠠ ᠲᠡᠷᠡ ᠭᠡᠷᠡᠯ ᠰᠠᠴᠤᠷᠠᠵᠤ ᠪᠠᠢᠵᠠᠢ᠃ ᠨᠠᠷᠢᠬᠠᠨ ᠡᠮᠵᠡᠭ ᠬᠤᠷᠤᠭᠤ ᠨᠤᠭᠤᠳ ᠢ᠋ ᠨᠢ ᠰᠠᠯᠭᠠᠵᠤ ᠲᠡᠨᠢᠢᠯᠭᠡᠨ ᠦᠵᠡᠪᠡᠯ ᠠᠯᠠᠭᠠᠨ ᠳ᠋ᠤᠨᠢ ᠭᠠᠯᠲᠤ ᠤᠯᠠᠭᠠᠨ ᠴᠢᠯᠠᠭᠤ ᠬᠡᠷᠡᠯᠳᠦᠵᠦ ᠪᠠᠢᠯᠠ᠃ ᠲᠡᠷᠡ ᠴᠢᠯᠠᠭᠤ ᠬᠥᠮᠦᠨ ᠬᠠᠷᠠᠮᠠᠭᠴᠠ ᠭᠡᠷᠡᠯ ᠨᠢ ᠤᠨᠲᠠᠷᠠᠭᠠᠳ ᠲᠡᠷᠡ ᠳᠣᠣᠷᠠ ᠪᠠᠨ ᠪᠢᠴᠢᠬᠠᠨ ᠨᠥᠵᠢ ᠪᠣᠯᠤᠨ ᠬᠤᠪᠢᠷᠠᠭᠰᠠᠨ ᠳ᠋ᠤ᠌ ᠥᠭᠡᠯᠦᠨ ᠶᠡᠬᠡᠳᠡ ᠠᠶᠤᠵᠤ ᠳᠡᠮᠡᠢ ᠶᠠᠭᠤᠮᠠ ᠬᠢᠪᠡ ᠭᠡᠵᠦ ᠬᠠᠷᠠᠮᠰᠠᠭᠰᠠᠨ ᠴᠦ᠍ ᠬᠣᠵᠢᠮᠳᠠᠵᠠᠢ᠃ ᠡᠨᠡ ᠪᠣᠯ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠪᠣᠯᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ ᠪᠠᠢᠪᠠ᠃ ᠬᠤᠸᠠᠭᠴᠢᠨ ᠣᠷᠣᠵᠤ ᠢᠷᠡᠭᠡᠳ ᠬᠥᠪᠡᠭᠦᠨ ᠦ᠌ ᠠᠳᠬᠤᠵᠤ ᠲᠥᠷᠥᠭᠰᠡᠨ ᠨᠥᠵᠢ ᠶ᠋ᠢ ᠬᠠᠷᠠᠭᠠᠳ ᠪᠡᠶᠡᠰᠦᠨ ᠳᠣᠭᠳᠣᠯᠵᠤ
— ᠬᠥᠪᠡᠭᠦᠨ ᠬᠡᠦᠬᠡᠳ ᠨᠥᠵᠢ ᠠᠳᠬᠤᠵᠤ ᠲᠥᠷᠥᠬᠦ ᠨᠢ ᠡᠷᠡ ᠵᠣᠷᠢᠭᠲᠠᠢ ᠶ᠋ᠢᠨ ᠰᠢᠨᠵᠢ ᠶᠦᠮ ᠭᠡᠵᠦ ᠲᠠᠢᠪᠤᠰᠢᠷᠠᠭᠤᠯᠤᠭᠰᠠᠨ ᠪᠢᠯᠡ᠃ ᠲᠡᠮᠦᠵᠢᠨ ᠢᠩᠭᠢᠵᠦ ᠲᠥᠷᠥᠵᠡᠢ᠃
ᠬᠠᠷᠢᠨ ᠬᠠᠰᠠᠷ ᠪᠣᠯ ᠲᠠᠰᠤ ᠥᠭᠡᠷᠡ ᠪᠦᠷ ᠭᠡᠳᠡᠰᠦᠨ ᠳ᠋ᠦ᠍ ᠪᠠᠢᠬᠤ ᠶ᠋ᠢᠨ ᠬᠠᠴᠢᠨ ᠶᠡᠬᠡ ᠬᠥᠳᠡᠯᠭᠡᠭᠡᠨ ᠲᠡᠢ᠂ ᠨᠣᠢᠷ ᠤ᠋ᠨ ᠳᠤᠮᠳᠠ ᠢᠰᠬᠦᠯᠵᠦ ᠲᠡᠢᠴᠢᠭᠢᠨᠡᠭᠡᠳ ᠰᠡᠷᠡᠭᠡᠵᠦ ᠣᠷᠬᠢᠳᠠᠭ ᠪᠢᠷᠠ ᠲᠠᠢ ᠬᠡᠦᠬᠡᠳ ᠪᠠᠢᠵᠠᠢ᠃ ᠬᠠᠰᠠᠷ ᠢ᠋ ᠲᠥᠷᠥᠭᠦᠯᠬᠦ ᠭᠡᠵᠦ ᠥᠭᠡᠯᠦᠨ ᠪᠡᠷᠬᠡ ᠶᠡᠬᠡ ᠪᠡᠷ ᠡᠪᠡᠳᠴᠦ ᠰᠢᠨᠠᠯᠤᠭᠰᠠᠨ ᠪᠢᠯᠡ᠃ ᠣᠯᠠᠨ ᠬᠣᠨᠣᠭ ᠨᠣᠢᠷ ᠬᠣᠭᠣᠯᠠ ᠠᠯᠳᠠᠭᠤᠯᠤᠨ ᠡᠪᠡᠳᠴᠦ ᠵᠣᠪᠠᠭᠠᠭᠰᠠᠨ ᠳ᠋ᠠᠭᠠᠨ ᠲᠡᠷᠡ ᠶᠦᠮ ᠤᠤ ᠬᠠᠰᠠᠷ ᠡᠬᠡ ᠳ᠋ᠡᠭᠡᠨ ᠤᠴᠢᠷ ᠦᠭᠡᠢ ᠳᠣᠲᠣᠨᠣ ᠬᠠᠢᠷᠠᠲᠠᠢ ᠪᠣᠯᠵᠤ ᠥᠰᠴᠡᠢ᠃ ᠬᠠᠰᠠᠷ ᠰᠢᠭ᠋ ᠵᠣᠪᠠᠵᠤ ᠲᠥᠷᠥᠭᠦᠯᠦᠭᠰᠡᠨ ᠨᠢ ᠥᠭᠡᠯᠦᠨ ᠳ᠋ᠦ᠍ ᠦᠭᠡᠢ ᠪᠠᠢᠪᠠ᠃ ᠬᠠᠰᠠᠷ ᠢ᠋ ᠪᠡᠨ ᠬᠠᠷᠠᠬᠤ ᠪᠦᠷᠢ《ᠡᠨᠡ ᠬᠥᠪᠡᠭᠦᠨ ᠮᠢᠨᠦ ᠵᠣᠪᠠᠯᠠᠩ ᠤ᠋ᠨ ᠦᠷᠡ ᠪᠠᠢᠬᠤ》 ᠭᠡᠵᠦ ᠦᠷᠦ ᠡᠪᠡᠳᠦᠨ ᠪᠣᠳᠣᠳᠠᠭ ᠪᠢᠯᠡ᠃ ᠬᠠᠮᠤᠭ ᠤ᠋ᠨ ᠶᠡᠬᠡ ᠪᠡᠷ ᠵᠣᠪᠠᠵᠤ ᠲᠥᠷᠥᠭᠦᠯᠦᠭᠰᠡᠨ ᠦᠷᠡ ᠳ᠋ᠡᠭᠡᠨ ᠥᠭᠡᠯᠦᠨ ᠬᠠᠮᠤᠭ ᠠ᠋ᠴᠠ ᠢᠯᠡᠭᠦᠦ ᠪᠡᠷ ᠬᠠᠢᠷᠠᠲᠠᠢ ᠪᠣᠯᠵᠠᠢ᠃ ᠬᠠᠰᠠᠷ ᠤ᠋ᠨ ᠪᠠᠭᠠ ᠳ᠋ᠤ᠌
— ᠮᠢᠨᠦ ᠬᠥᠪᠡᠭᠦᠨ ᠡᠵᠢ ᠶ᠋ᠢ ᠪᠡᠨ ᠶᠡᠬᠡ ᠵᠣᠪᠠᠭᠠᠵᠤ ᠲᠥᠷᠥᠭᠰᠡᠨ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ ᠲᠡᠷᠡ ᠪᠡᠷ ᠣᠮᠣᠭᠲᠠᠢ ᠴᠣᠭᠯᠢᠭ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠰᠢᠷᠲᠡᠵᠦ ᠡᠬᠡ ᠶ᠋ᠢ ᠪᠡᠨ ᠵᠣᠪᠠᠭᠠᠭᠰᠠᠨ ᠳ᠋ᠠᠭᠠᠨ ᠬᠠᠴᠢᠨ ᠶᠡᠬᠡ ᠪᠡᠷ ᠬᠠᠷᠠᠮᠰᠠᠵᠤ ᠪᠠᠢᠭᠠ ᠨᠢ ᠢᠯᠡᠳᠲᠡ ᠮᠡᠳᠡᠷᠡᠭᠳᠡᠳᠡᠭ ᠪᠠᠢᠵᠠᠢ᠃ ᠬᠠᠷᠢᠨ ᠲᠡᠮᠦᠵᠢᠨ ᠭᠡᠳᠡᠰᠦᠨ ᠳ᠋ᠦ᠍ ᠪᠠᠢᠬᠤ ᠶ᠋ᠢᠨ ᠯᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠰᠡᠯ ᠢ᠋ ᠴᠢᠪ ᠴᠢᠮᠡᠭᠡ ᠦᠭᠡᠢ ᠣᠢᠯᠠᠭᠠᠵᠤ ᠮᠡᠳᠡᠳᠡᠭ ᠪᠠᠢᠵᠠᠢ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠠᠳᠬᠤᠵᠤ ᠲᠥᠷᠥᠭᠰᠡᠨ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠣᠰᠣᠯᠳᠠᠵᠤ ᠨᠥᠵᠢ ᠪᠣᠯᠭᠠᠨ ᠬᠤᠪᠢᠷᠠᠭᠠᠭᠰᠠᠨ ᠳ᠋ᠠᠭᠠᠨ ᠥᠭᠡᠯᠦᠨ ᠶᠡᠬᠡᠳᠡ ᠬᠠᠷᠠᠮᠰᠠᠭᠰᠠᠨ ᠲᠤᠯᠠ ᠪᠣᠳᠣᠭᠰᠠᠭᠠᠷ ᠬᠡᠷᠬᠢᠨ ᠬᠠᠳᠠᠭᠠᠯᠠᠬᠤ ᠠᠷᠭᠠ ᠰᠡᠳᠦᠵᠦ ᠣᠯᠵᠠᠢ᠃ ᠬᠠᠷᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠩᠷᠢ ᠶ᠋ᠢᠨ ᠭᠠᠯᠲᠤ ᠲᠡᠮᠳᠡᠭ ᠠᠳᠬᠤᠵᠤ ᠲᠥᠷᠥᠭᠰᠡᠨ ᠢ᠋ ᠶᠢᠰᠦᠭᠡᠢ ᠶ᠋ᠢ ᠲᠡᠢᠨ ᠡᠴᠡ ᠪᠤᠴᠠᠨ ᠢᠷᠡᠬᠦ ᠳ᠋ᠦ᠍ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠣᠭᠲᠣ ᠦᠨᠡᠮᠰᠢᠭᠰᠡᠨ ᠦᠭᠡᠢ᠃
— ᠴᠢᠨᠦ ᠤᠬᠠᠭᠠᠨ ᠪᠠᠯᠠᠷᠳᠠᠭᠠᠳ ᠪᠤᠷᠤᠭᠤ ᠵᠥᠷᠢᠭᠦᠦ ᠬᠠᠷᠠᠭᠠ ᠪᠢᠵᠡ ᠭᠡᠵᠦ ᠬᠥᠭᠡᠷᠴᠦ ᠥᠩᠭᠡᠷᠡᠭᠡᠭᠰᠡᠨ ᠨᠢ ᠭᠣᠮᠣᠳᠠᠯᠲᠠᠢ ᠴᠦ᠍ ᠥᠭᠡᠯᠦᠨ ᠳ᠋ᠦ᠍ ᠦᠵᠡᠭᠦᠯᠦᠨ ᠪᠠᠲᠤᠯᠠᠬᠤ ᠪᠠᠷᠢᠮᠲᠠ ᠨᠢᠭᠡᠨᠲᠡ ᠦᠭᠡᠢ ᠲᠤᠯᠠ ᠳᠠᠭᠤ ᠦᠭᠡᠢ ᠪᠣᠯᠵᠠᠢ᠃ ᠭᠡᠪᠡᠴᠦ ᠥᠭᠡᠯᠦᠨ ᠣᠳᠣ ᠬᠦᠷᠲᠡᠯᠡ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠥᠷᠥᠭᠰᠡᠨ ᠳ᠋ᠦ᠍ ᠢᠲᠡᠭᠡᠭᠰᠡᠭᠡᠷ ᠪᠢᠯᠡ᠃ ᠲᠡᠭᠦᠨ ᠦ᠌ ᠬᠢᠨᠢ ᠪᠠᠲᠤᠯᠠᠭᠠ ᠪᠣᠯᠵᠤ ᠥᠨᠥ ᠴᠦ᠍ ᠲᠡᠮᠦᠵᠢᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠦ᠋ᠨ ᠰᠢᠨᠠᠯᠭᠠᠨ ᠢ᠋ ᠣᠢᠯᠠᠭᠠᠵᠤ ᠮᠡᠳᠡᠭᠡᠳ ᠬᠠᠰᠠᠷ ᠳᠡᠭᠦᠦ ᠳ᠋ᠡᠭᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠬᠢᠷᠤᠭᠤᠯᠵᠠᠢ᠃ ᠡᠭᠦᠨ ᠰᠢᠭ ᠤᠬᠠᠭᠠᠨ ᠲᠠᠢ ᠮᠡᠷᠭᠡᠨ ᠰᠢᠢᠳᠪᠦᠷᠢ ᠶ᠋ᠢ ᠥᠭᠡᠯᠦᠨ ᠤᠷᠢᠳ ᠨᠢ ᠮᠡᠳᠡᠬᠦ ᠦᠭᠡᠢ ᠮᠡᠲᠦ ᠪᠠᠢᠯᠠ᠃ ᠥᠭᠡᠯᠦᠨ ᠬᠢᠵᠠᠭᠠᠷ ᠦᠭᠡᠢ ᠠᠵᠠ ᠵᠢᠷᠭᠠᠯ ᠲᠠᠢ ᠪᠣᠯᠵᠠᠢ᠃ ᠣᠯᠠᠰᠢᠷᠠᠵᠤ ᠥᠷᠭᠡᠵᠢᠭᠡᠳ ᠵᠠᠬᠠ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠦᠷᠢᠶᠡᠨ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠭᠡᠷ ᠲᠦ᠍ ᠲᠠᠭᠠᠲᠠᠢ ᠰᠠᠢᠬᠠᠨ ᠠᠮᠢᠳᠤᠷᠠᠵᠤ ᠪᠠᠢᠪᠠ᠃
ᠲᠩᠷᠢ ᠲᠡᠳᠬᠦᠵᠦ ᠲᠡᠮᠦᠵᠢᠨ ᠢ᠋ ᠬᠦᠴᠦ ᠪᠡᠨ ᠨᠢᠭᠡᠳᠬᠡᠨ ᠪᠡᠬᠢᠵᠢᠭᠦᠯ ᠭᠡᠬᠦ ᠰᠢᠭ ᠬᠠᠯᠳᠠᠨ ᠢᠷᠡᠬᠦ ᠠᠶᠤᠯ ᠦᠭᠡᠢ ᠬᠡᠳᠦᠨ ᠵᠢᠯ ᠥᠩᠭᠡᠷᠡᠪᠡ᠃ ᠬᠠᠰᠠᠷ ᠲᠡᠮᠦᠵᠢᠨ ᠬᠣᠶᠠᠷ ᠤ᠋ᠨ ᠬᠡᠷᠡᠭᠦᠯ ᠲᠡᠮᠡᠴᠡᠯ ᠪᠦᠷ ᠮᠠᠷᠲᠠᠭᠳᠠᠭᠠᠳ ᠪᠠᠢᠲᠠᠯᠠ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠨᠢᠭᠡᠨ ᠬᠡᠷᠡᠭ ᠮᠠᠨᠳᠤᠪᠠ᠃ ᠨᠢᠭᠡ ᠥᠷᠯᠥᠭᠡ ᠠᠭᠲᠠ ᠶ᠋ᠢᠨ ᠲᠣᠭᠠᠯᠠᠯᠭᠠ ᠪᠠᠷ ᠶᠠᠪᠤᠭᠰᠠᠨ ᠲᠡᠮᠦᠭᠡ ᠳᠠᠪᠬᠢᠨ ᠢᠷᠡᠵᠡᠢ᠃
— ᠡᠵᠢ ᠠ᠋᠂ ᠲᠡᠮᠦᠵᠢᠨ ᠠᠬᠠ ᠠ᠋᠂ ᠬᠡᠷᠦᠯᠦᠨ ᠥᠭᠰᠥᠭᠡᠳ ᠮᠡᠩᠯᠢᠭ ᠠᠬᠠ ᠣᠯᠠᠨ ᠠᠯᠪᠠᠲᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠢᠷᠡᠵᠦ ᠶᠠᠪᠤᠨᠠ᠃ ᠪᠢ ᠠᠭᠤᠯᠵᠠᠯᠠ᠃ ᠲᠡᠳᠡᠨ ᠦ᠌ ᠬᠢ ᠶᠡᠬᠡ ᠪᠠᠶᠠᠵᠢᠵᠤ ᠪᠦᠷ ᠨᠡᠭᠦᠳᠡᠯ ᠦ᠋ᠨ ᠬᠢᠨᠢ ᠲᠡᠭᠦᠰᠬᠡᠯ ᠬᠠᠷᠠᠭᠳᠠᠬᠤ ᠦᠭᠡᠢ ᠬᠦᠪᠦᠷᠢᠵᠦ ᠪᠠᠢᠨᠠ ᠭᠡᠵᠦ ᠲᠡᠮᠦᠭᠡ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠥᠭᠡᠯᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠮᠤᠬᠤᠷ ᠲᠤ ᠨᠢᠭᠡ ᠤᠲᠠᠰᠤ ᠳᠣᠷᠭᠢᠨ ᠳᠤᠤᠭᠠᠷᠬᠤ ᠰᠢᠭ᠋ ᠪᠣᠯᠤᠭᠠᠳ ᠭᠠᠷ ᠨᠢ ᠵᠢᠷᠦᠬᠡ ᠲᠡᠢ ᠪᠡᠨ ᠠᠳᠠᠯᠢ ᠴᠡᠴᠡᠷᠡᠵᠦ ᠠᠶᠠᠭᠠ ᠲᠠᠢ ᠴᠠᠢ ᠪᠠᠨ ᠴᠠᠯᠭᠢᠭᠤᠯᠵᠠᠢ᠃ ᠲᠡᠷᠡ ᠥᠷᠯᠥᠭᠡ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠷ ᠲᠦ᠍ ᠴᠡᠢᠯᠡᠵᠦ ᠰᠠᠭᠤᠪᠠ᠃ ᠥᠭᠡᠯᠦᠨ ᠲᠦᠷᠦᠭᠦᠯᠡᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠷᠡ ᠣᠳᠣ ᠲᠡᠮᠦᠵᠢᠨ ᠦ᠌ ᠠᠮᠠ ᠶ᠋ᠢ ᠬᠠᠷᠠᠵᠤ ᠰᠤᠷᠴᠠᠢ᠃ ᠲᠡᠮᠦᠵᠢᠨ ᠲᠡᠷᠡ ᠳᠣᠣᠷᠠ ᠪᠠᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠶᠡᠷᠦ ᠲᠡᠮᠦᠵᠢᠨ ᠲᠦᠷᠦᠭᠦᠯᠡᠨ ᠳᠤᠤᠭᠠᠷᠬᠤ ᠵᠠᠩ ᠦᠭᠡᠢ ᠲᠤᠯᠠ ᠥᠭᠡᠯᠦᠨ ᠬᠦᠯᠢᠶᠡᠵᠡᠢ᠃ ᠬᠠᠷᠢᠨ ᠬᠠᠰᠠᠷ ᠳᠠᠭᠤ ᠦᠭᠡᠢ ᠰᠠᠭᠤᠬᠤ ᠡᠬᠡ ᠠᠬᠠ ᠬᠣᠶᠠᠷ ᠢ᠋ᠶ᠋ᠠᠨ ᠬᠡᠰᠡᠭ ᠬᠠᠷᠠᠭᠠᠳ ᠲᠡᠰᠦᠭᠰᠡᠨ ᠦᠭᠡᠢ᠃
— ᠲᠡᠷᠡ ᠪᠣᠭᠣᠯ ᠮᠡᠩᠯᠢᠭ ᠬᠠᠶᠠᠵᠤ ᠶᠠᠪᠤᠴᠢᠬᠠᠭᠠᠳ ᠣᠳᠣ ᠶᠠᠮᠠᠷ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠭᠢᠨ ᠢᠷᠡᠪᠡ᠃ ᠪᠢ ᠴᠡᠷᠢᠭᠯᠡᠨ ᠣᠴᠢᠵᠤ ᠶᠠᠯᠠ ᠠᠰᠠᠭᠤᠶᠠ᠃ ᠳᠠᠭᠠᠵᠤ ᠢᠷᠡᠭᠰᠡᠳ ᠢ᠋ ᠨᠢ ᠬᠣᠷᠢᠶᠠᠨ ᠠᠪᠤᠶᠠ᠃ ᠡᠵᠡᠨ ᠢ᠋ᠶ᠋ᠡᠨ ᠬᠠᠶᠠᠭᠰᠠᠨ ᠪᠣᠭᠣᠯ ᠢ᠋ ᠭᠡᠰᠬᠡᠬᠦ ᠨᠢ ᠵᠥᠪ ᠪᠢᠵᠡ᠃ ᠪᠤᠰᠤᠳ ᠲᠤᠨᠢ ᠦᠯᠢᠭᠡᠷ ᠪᠣᠯᠤᠭ ᠭᠡᠵᠦ ᠴᠢᠩᠭᠠ ᠬᠡᠯᠡᠵᠡᠢ᠃ ᠲᠡᠮᠦᠵᠢᠨ ᠲᠡᠷᠡ ᠳᠣᠣᠷᠠ ᠪᠠᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠴᠦ᠍ ᠬᠠᠷᠠᠴᠠ ᠨᠢ ᠭᠡᠷᠡᠯᠲᠦᠨ ᠬᠠᠰᠠᠷ ᠤ᠋ᠨ ᠦᠭᠡᠨ ᠳ᠋ᠦ᠍ ᠠᠭᠤᠷ ᠬᠢᠯᠢᠩ ᠨᠢ ᠳᠦᠷᠡᠯᠵᠡᠭᠰᠡᠨ ᠢ᠋ᠶ᠋ᠡᠨ ᠠᠯᠭᠤᠷ ᠤᠨᠲᠠᠷᠠᠬᠤ ᠶ᠋ᠢ ᠥᠭᠡᠯᠦᠨ ᠲᠦᠭᠰᠢᠨ ᠬᠠᠷᠠᠵᠠᠢ᠃ ᠲᠡᠮᠦᠵᠢᠨ ᠦ᠌ ᠬᠠᠮᠢᠭᠠ ᠠ᠋ᠴᠠ ᠨᠢ ᠡᠨᠡ ᠶᠡᠬᠡ ᠲᠡᠪᠴᠢᠶᠡᠷᠢ ᠭᠠᠷᠳᠠᠭ ᠢ᠋ ᠥᠭᠡᠯᠦᠨ ᠪᠣᠳᠣᠭᠠᠳ ᠪᠣᠳᠣᠭᠠᠳ ᠣᠯᠳᠠᠭ ᠦᠭᠡᠢ ᠪᠢᠯᠡ᠃
— ᠬᠠᠰᠠᠷ ᠠ᠋᠂ ᠴᠢ ᠨᠢᠭᠡᠨ ᠵᠦᠢᠯ ᠢ᠋ ᠮᠠᠷᠲᠠᠵᠠᠢ᠃ ᠶᠢᠰᠦᠭᠡᠢ ᠡᠴᠢᠭᠡ ᠶ᠋ᠢᠨ ᠦᠬᠦᠯ ᠡᠴᠡ ᠬᠣᠢᠰᠢ ᠪᠢᠳᠡᠨ ᠢ᠋ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠣᠷᠬᠢᠵᠤ ᠣᠳᠤᠭᠰᠠᠨ ᠬᠥᠮᠦᠨ ᠪᠣᠯ ᠮᠡᠩᠯᠢᠭ ᠶᠦᠮ᠃ ᠲᠡᠭᠦᠨ ᠢ᠋ ᠤᠷᠪᠠᠭᠰᠠᠨ ᠭᠡᠵᠦ ᠦᠵᠡᠬᠦ ᠦᠨᠳᠦᠰᠦ ᠦᠭᠡᠢ ᠪᠢᠵᠡ᠃ ᠮᠡᠩᠯᠢᠭ ᠢ᠋ ᠬᠦᠨᠳᠦᠲᠦ ᠵᠣᠴᠢᠨ ᠤ᠋ ᠶᠣᠰᠣᠭᠠᠷ ᠤᠭᠲᠤᠵᠤ ᠠᠪᠤᠨᠠ ᠭᠡᠵᠦ ᠬᠡᠯᠡᠭᠡᠳ ᠲᠡᠮᠦᠵᠢᠨ ᠡᠬᠡ ᠶ᠋ᠢ ᠪᠡᠨ ᠬᠠᠷᠠᠵᠠᠢ᠃ ᠲᠡᠮᠦᠵᠢᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠰᠡᠯ ᠢ᠋ ᠡᠨᠡ ᠤᠳᠠᠭᠠ ᠳ᠋ᠤ᠌ ᠴᠦ᠍ ᠠᠯᠳᠠᠯ ᠦᠭᠡᠢ ᠳᠠᠭᠠᠪᠠ᠃ ᠥᠭᠡᠯᠦᠨ ᠳᠣᠭᠳᠣᠯᠵᠤ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠳᠣᠭᠣᠭᠰᠢ ᠲᠣᠩᠭᠣᠢᠪᠠ᠃ ᠲᠡᠷᠡ ᠮᠡᠩᠯᠢᠭ ᠢ᠋ ᠢᠷᠡᠨᠡ ᠭᠡᠵᠦ ᠬᠡᠴᠢᠨᠡᠨ ᠶᠡᠬᠡ ᠬᠦᠯᠢᠶᠡᠵᠦ ᠬᠦᠰᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠶᠢ ᠯᠠ ᠮᠡᠳᠡᠵᠡᠢ᠃ ᠡᠭᠦᠨ ᠢ᠋ ᠴᠦ᠍ ᠲᠡᠮᠦᠵᠢᠨ ᠮᠡᠳᠡᠵᠦ ᠪᠣᠢ ᠶ᠋ᠢ ᠣᠢᠯᠠᠭᠠᠪᠠ᠃
— ᠪᠢ ᠲᠡᠷᠡ ᠪᠣᠭᠣᠯ ᠢ᠋ ᠬᠦᠨᠳᠦᠲᠦ ᠵᠣᠴᠢᠨ ᠮᠡᠲᠦ ᠤᠭᠲᠤᠵᠤ ᠡᠰᠡ ᠲᠡᠪᠴᠢᠨᠡ ᠭᠡᠵᠦ ᠵᠥᠷᠢᠭᠦᠳᠯᠡᠭᠰᠡᠨ ᠳ᠋ᠦ᠍ ᠲᠡᠮᠦᠵᠢᠨ ᠴᠢᠮᠡᠭᠡ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠵᠡᠢ᠃
— ᠬᠠᠰᠠᠷ ᠬᠥᠪᠡᠭᠦᠨ ᠮᠢᠨᠢ᠃ ᠮᠡᠩᠯᠢᠭ ᠪᠣᠯ ᠶᠢᠰᠦᠭᠡᠢ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠤᠨᠠᠭᠠᠨ ᠪᠣᠭᠣᠯ᠃ ᠡᠴᠦᠰ ᠦ᠋ᠨ ᠭᠡᠷᠢᠶᠡᠰ ᠢ᠋ ᠨᠢ ᠰᠣᠨᠣᠰᠴᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠦᠰᠢᠵᠦ ᠶᠠᠰᠤ ᠶ᠋ᠢ ᠨᠢ ᠪᠠᠷᠢᠭᠰᠠᠨ ᠭᠠᠭᠴᠠ ᠬᠥᠮᠦᠨ ᠰᠢᠦ᠃ ᠪᠤᠤ ᠲᠡᠭᠡᠵᠦ ᠬᠡᠯᠡ᠃ ᠣᠳᠣ ᠲᠡᠭᠦᠨ ᠢ᠋ ᠪᠣᠭᠣᠯ ᠭᠡᠵᠦ ᠪᠤᠤ ᠳᠠᠭᠤᠳᠠᠭᠲᠤᠨ᠃ ᠪᠣᠭᠣᠯ ᠮᠡᠲᠦ ᠪᠤᠤ ᠦᠵᠡᠭᠲᠦᠨ᠃ ᠮᠡᠩᠯᠢᠭ ᠢ᠋ ᠪᠣᠭᠣᠯ ᠠ᠋ᠴᠠ ᠴᠢᠯᠥᠭᠡᠯᠡᠵᠦ ᠳᠤᠷᠠ ᠪᠠᠷ ᠶᠠᠪᠤᠭᠤᠯ᠃ ᠶᠢᠰᠦᠭᠡᠢ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠰᠦᠨᠡᠰᠦ ᠴᠢᠩᠭᠢᠬᠦ ᠶ᠋ᠢ ᠬᠦᠰᠡᠵᠦ ᠪᠣᠢ ᠭᠡᠵᠦ ᠥᠭᠡᠯᠦᠨ ᠦ᠌ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠰᠠᠷ ᠦᠭᠡ ᠬᠡᠯᠡᠯ ᠦᠭᠡᠢ ᠠᠭᠤᠷᠯᠠᠨ ᠭᠠᠷᠴᠤ ᠣᠳᠴᠠᠢ᠃
— ᠲᠡᠮᠦᠵᠢᠨ ᠬᠥᠪᠡᠭᠦᠨ ᠮᠢᠨᠢ᠃ ᠬᠠᠰᠠᠷ ᠳᠡᠭᠦᠦ ᠪᠡᠨ ᠪᠤᠤ ᠪᠤᠷᠤᠭᠤᠳᠬᠠ᠃ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠥᠨᠥᠴᠢᠨ ᠬᠠᠶᠠᠭᠳᠠᠭᠰᠠᠨ ᠭᠣᠮᠣᠳᠠᠯ ᠨᠢ ᠠᠷᠢᠯᠬᠤ ᠦᠭᠡᠢ ᠪᠠᠢᠭᠠ ᠪᠢᠵᠡ᠃ ᠳᠡᠭᠦᠦ ᠴᠢᠨᠢ ᠲᠦᠷᠭᠡᠨ ᠵᠠᠩ ᠲᠠᠢ ᠴᠦ᠍ ᠬᠣᠷᠣᠨ ᠮᠠᠭᠤ ᠰᠠᠨᠠᠭᠠ ᠦᠭᠡᠢ᠂ ᠴᠠᠭᠠᠨ ᠴᠠᠢᠯᠭᠠᠨ ᠬᠥᠮᠦᠨ ᠰᠢᠦ᠃ ᠬᠠᠰᠠᠷ ᠶᠡᠷᠦ ᠬᠤᠳᠠᠯ ᠵᠠᠰᠠᠳᠠᠭ ᠵᠠᠩ ᠭᠠᠷᠭᠠᠳᠠᠭ ᠦᠭᠡᠢ ᠬᠡᠦᠬᠡᠳ᠃ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠯᠠ ᠬᠡᠯᠡᠪᠡ᠃ ᠮᠡᠩᠯᠢᠭ ᠪᠢᠳᠡᠨ ᠢ᠋ ᠬᠠᠶᠠᠵᠤ ᠶᠠᠪᠤᠭᠰᠠᠨ ᠶᠤᠮ ᠪᠢᠰᠢ᠃ ᠪᠢ ᠲᠡᠭᠦᠨ ᠢ᠋ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠮᠡᠩᠯᠢᠭ ᠨᠠᠳᠠᠳᠤ ᠭᠣᠮᠣᠳᠠᠯ ᠦᠭᠡᠢ ᠪᠢᠳᠡᠨ ᠢ᠋ ᠭᠡᠵᠦ ᠡᠷᠭᠢᠨ ᠢᠷᠡᠭᠰᠡᠨ ᠳ᠋ᠦ᠍ ᠡᠵᠢ ᠨᠢ ᠪᠠᠶᠠᠷᠲᠠᠢ ᠪᠣᠯᠤᠯᠠ ᠭᠡᠵᠦ ᠥᠭᠡᠯᠦᠨ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠡᠢ᠃
— ᠡᠵᠢ ᠠ᠋᠃ ᠮᠡᠩᠯᠢᠭ ᠢ᠋ ᠪᠢ ᠳᠡᠭᠦᠦ ᠨᠠᠷ ᠤ᠋ᠨ ᠬᠠᠮᠲᠤ ᠬᠦᠷᠢᠶᠡᠨ ᠡᠴᠡ ᠭᠠᠷᠴᠤ ᠵᠠᠮ ᠳ᠋ᠤᠨᠢ ᠤᠭᠲᠤᠨ ᠠᠪᠤᠶᠠ᠃ ᠬᠠᠷᠢᠨ ᠲᠠ ᠦᠷᠭᠦᠭᠡᠨ ᠳ᠋ᠡᠭᠡᠨ ᠬᠦᠯᠢᠶᠡᠭᠲᠦᠨ᠃ ᠲᠡᠳᠡ ᠲᠠᠨ ᠳ᠋ᠤ᠌ ᠢᠷᠡᠵᠦ ᠮᠥᠷᠭᠥᠭ ᠭᠡᠵᠦ ᠲᠡᠮᠦᠵᠢᠨ ᠬᠡᠯᠡᠵᠡᠢ᠃ ᠬᠠᠰᠠᠷ᠂ ᠡᠬᠡ ᠠᠬᠠ ᠬᠣᠶᠠᠷ ᠤ᠋ᠨ ᠢ᠋ᠶ᠋ᠠᠨ ᠦᠭᠡ ᠶ᠋ᠢ ᠳᠠᠭᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠪᠠ᠃
ᠬᠦᠷᠢᠶᠡᠨ ᠦ᠌ ᠵᠠᠬᠠ ᠠ᠋ᠴᠠ ᠬᠣᠯᠠ ᠤᠴᠢᠷᠲᠠᠢ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠣᠪᠣᠭᠠᠨ ᠳᠡᠭᠡᠷᠡ ᠲᠡᠮᠦᠵᠢᠨ ᠬᠠᠰᠠᠷ᠂ ᠰᠢᠳᠠᠷ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠤᠭᠲᠤᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠨᠢ ᠮᠡᠩᠯᠢᠭ ᠢ᠋ ᠰᠣᠴᠢᠭᠠᠵᠤ ᠪᠠᠰᠠ ᠭᠡᠮᠰᠢᠭᠦᠯᠦᠭᠰᠡᠨ ᠨᠢ ᠲᠤᠢᠯ ᠦᠭᠡᠢ ᠪᠣᠯᠵᠠᠢ᠃ ᠮᠡᠩᠯᠢᠭ ᠬᠠᠭᠤᠴᠢᠨ ᠡᠵᠡᠨ ᠦ᠌ ᠪᠡᠨ ᠦᠷᠡ ᠰᠠᠲᠤ᠂ ᠥᠭᠡᠯᠦᠨ ᠬᠠᠲᠤᠨ ᠤ᠋ ᠨᠢᠭᠤᠷ ᠢ᠋ ᠶᠠᠭᠠᠬᠢᠵᠤ ᠬᠠᠷᠠᠨᠠ ᠭᠡᠬᠦ ᠡᠴᠡ ᠭᠣᠣᠯ ᠬᠠᠷᠠᠯᠠᠨ ᠡᠮᠢᠶᠡᠵᠦ ᠶᠠᠪᠤᠵᠠᠢ᠃ ᠭᠡᠪᠡᠴᠦ ᠲᠡᠭᠦᠨ ᠳ᠋ᠦ᠍ ᠪᠠᠰᠠ ᠡᠭᠦᠨ ᠡᠴᠡ ᠥᠭᠡᠷᠡ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠮᠦᠵᠢᠨ ᠦ᠌ ᠳᠡᠷᠭᠡᠳᠡ ᠣᠴᠢᠬᠤ ᠶ᠋ᠢ ᠬᠥᠭᠡᠴᠦ ᠬᠥᠪᠡᠭᠦᠨ ᠦ᠌ ᠬᠢᠨᠢ ᠱᠠᠭᠠᠷᠳᠠᠵᠤ᠂ ᠪᠠᠢᠬᠤ ᠰᠠᠭᠤᠬᠤ ᠠᠷᠭᠠ ᠦᠭᠡᠢ ᠪᠣᠯᠭᠠᠵᠠᠢ᠃ ᠡᠨᠳᠡ ᠪᠡᠨ ᠤᠳᠠᠪᠠᠯ ᠡᠵᠡᠨ ᠢ᠋ᠶ᠋ᠡᠨ ᠬᠠᠶᠠᠵᠤ ᠣᠳᠤᠭᠰᠠᠨ ᠲᠡᠭᠦᠨ ᠳ᠋ᠦ᠍ ᠦᠬᠦᠯ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠣᠯᠳᠠᠬᠤ ᠦᠭᠡᠢ ᠪᠣᠯᠬᠤ ᠶ᠋ᠢ ᠬᠥᠭᠡᠴᠦ ᠰᠠᠨᠠᠭᠤᠯᠤᠭᠰᠠᠨ ᠨᠢ ᠨᠡᠭᠦᠬᠦ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠪᠢᠯᠡ᠃ ᠬᠠᠷᠢᠨ ᠲᠡᠮᠦᠵᠢᠨ ᠢ᠋ ᠢᠩᠭᠢᠵᠦ ᠬᠥᠯ ᠪᠣᠯᠤᠨ ᠵᠠᠮ ᠳ᠋ᠤ᠌ ᠤᠭᠲᠤᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠦᠭᠡᠢ᠃ ᠡᠴᠦᠰ ᠲᠡᠭᠦᠰᠬᠡᠯ ᠦᠭᠡᠢ ᠦᠷᠭᠦᠯᠵᠢᠯᠡᠭᠰᠡᠨ ᠶᠡᠬᠡ ᠨᠡᠭᠦᠳᠡᠯ ᠦ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠪᠥᠬᠡ ᠶ᠋ᠢᠨ ᠬᠠᠷᠠ ᠰᠦᠯᠳᠡ ᠲᠡᠢ ᠬᠥᠩᠭᠡᠨ ᠰᠡᠦᠬᠡ ᠢᠷᠡᠭᠰᠡᠨ ᠨᠢ ᠬᠥᠭᠡᠴᠦ ᠶ᠋ᠢᠨ ᠬᠢ ᠠᠵᠢ᠃ ᠮᠡᠩᠯᠢᠭ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠢᠷᠡᠵᠦ ᠲᠡᠮᠦᠵᠢᠨ ᠳ᠋ᠦ᠍ ᠲᠦᠷᠦᠭᠦᠯᠡᠨ ᠮᠥᠷᠭᠥᠵᠡᠢ᠃ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠰᠤᠭᠤᠳᠠᠨ ᠪᠣᠰᠬᠠᠭᠠᠳ
— ᠮᠡᠩᠯᠢᠭ ᠡᠴᠢᠭᠡ ᠮᠢᠨᠢ ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠪᠦᠭᠦᠳᠡ ᠭᠠᠢᠬᠠᠵᠠᠢ᠃ ᠲᠡᠮᠦᠵᠢᠨ ᠦ᠌ ᠡᠨᠡ ᠬᠡᠲᠦᠷᠬᠡᠢ ᠶᠡᠬᠡ ᠬᠦᠨᠳᠦᠳᠬᠡᠯ ᠪᠣᠭᠣᠯ ᠮᠡᠩᠯᠢᠭ ᠲᠤ ᠵᠣᠬᠢᠬᠤ ᠦᠭᠡᠢ ᠭᠡᠵᠦ ᠬᠠᠰᠠᠷ ᠪᠤᠬᠢᠨᠢᠳᠤᠨ ᠭᠢᠯᠠᠯᠵᠠᠵᠤ ᠵᠣᠭᠰᠣᠪᠠ᠃ ᠡᠢᠨ ᠬᠦ᠌《ᠡᠴᠢᠭᠡ》 ᠭᠡᠵᠦ ᠬᠦᠨᠳᠦᠯᠡᠨ ᠳᠠᠭᠤᠳᠠᠭᠰᠠᠨ ᠳ᠋ᠤ᠌ ᠮᠡᠩᠯᠢᠭ ᠴᠦ᠍ ᠴᠣᠴᠢᠷᠳᠠᠨ ᠠᠯᠮᠠᠢᠷᠠᠵᠠᠢ᠃
— ᠮᠡᠩᠯᠢᠭ ᠡᠴᠢᠭᠡ ᠮᠢᠨᠢ᠃ ᠲᠠ ᠪᠣᠯ ᠥᠨᠥᠴᠢᠨ ᠬᠣᠴᠣᠷᠤᠭᠰᠠᠨ ᠪᠢᠳᠡᠨ ᠢ᠋ ᠠᠪᠤᠷᠠᠨ ᠬᠠᠮᠠᠭᠠᠯᠠᠵᠤ ᠢᠷᠡᠭᠰᠡᠨ ᠠᠴᠢᠲᠠᠨ ᠶᠤᠮ᠃ ᠡᠨᠡ ᠡᠳᠦᠷ ᠡᠴᠡ ᠬᠣᠢᠰᠢ ᠲᠠ ᠮᠢᠨᠦ ᠠᠢᠮᠠᠭ ᠲᠤ ᠬᠠᠮᠤᠭ ᠤ᠋ᠨ ᠬᠦᠨᠳᠦᠲᠡᠢ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠵᠤ ᠨᠠᠳᠠᠳᠤ ᠰᠢᠳᠠᠷᠯᠠᠵᠤ ᠪᠠᠢᠬᠤ ᠪᠣᠯᠤᠨᠠ ᠭᠡᠵᠦ ᠡᠪᠦᠳᠦᠭ ᠰᠥᠬᠥᠷᠡᠨ ᠮᠥᠷᠭᠥᠪᠡ᠃ ᠬᠠᠰᠠᠷ ᠵᠣᠯ ᠲᠠᠢ ᠯᠠ ᠬᠠᠰᠬᠢᠷᠤᠭᠰᠠᠨ ᠦᠭᠡᠢ ᠠᠵᠢ᠃
— ᠳᠡᠭᠦᠦ ᠨᠠᠷ᠃ ᠮᠢᠨᠦ ᠨᠥᠬᠥᠳ ᠲᠠ ᠨᠠᠷ ᠮᠡᠩᠯᠢᠭ ᠡᠴᠢᠭᠡ ᠳ᠋ᠦ᠍ ᠮᠥᠷᠭᠥᠭᠲᠦᠨ ᠭᠡᠰᠡᠨ ᠲᠡᠮᠦᠵᠢᠨ ᠦ᠌ ᠦᠭᠡᠨ ᠡᠴᠡ ᠵᠥᠷᠢᠬᠦ ᠵᠢᠷᠦᠬᠡᠲᠡᠨ ᠭᠠᠷᠤᠭᠰᠠᠨ ᠦᠭᠡᠢ ᠴᠤᠪᠤᠷᠠᠨ ᠮᠥᠷᠭᠥᠵᠡᠢ᠃ ᠬᠠᠰᠠᠷ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠮᠥᠷᠭᠥᠪᠡ᠃ ᠮᠡᠩᠯᠢᠭ ᠢ᠋ ᠳᠠᠭᠠᠵᠤ ᠢᠷᠡᠭᠰᠡᠳ ᠨᠢ ᠬᠥᠭᠡᠴᠦ ᠶ᠋ᠢᠨ ᠢᠳᠢ ᠰᠢᠳᠢ ᠶ᠋ᠢ ᠰᠢᠲᠦᠵᠦ ᠲᠡᠭᠦᠨ ᠦ᠌ ᠠᠪᠤᠷᠠᠯ ᠢᠪᠡᠭᠡᠯ ᠳ᠋ᠦ᠍ ᠪᠠᠬᠲᠠᠬᠰᠠᠳ ᠠᠵᠢ᠃ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠮᠡᠩᠯᠢᠭ ᠲᠤ ᠢᠩᠭᠢᠵᠦ ᠶᠡᠬᠡ ᠬᠦᠨᠳᠦᠯᠡᠯ ᠦᠵᠡᠭᠦᠯᠦᠭᠰᠡᠨ ᠢ᠋ ᠭᠠᠳᠠᠷᠯᠠᠭᠰᠠᠨ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠮᠦᠵᠢᠨ ᠪᠣᠯᠤᠭᠠᠳ ᠬᠥᠭᠡᠴᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃ ᠲᠡᠮᠦᠵᠢᠨ ᠮᠡᠩᠯᠢᠭ ᠲᠦ᠍ ᠪᠦᠬᠦ ᠬᠦᠨᠳᠦᠯᠡᠯ ᠢ᠋ ᠦᠵᠡᠭᠦᠯᠵᠦ ᠬᠥᠭᠡᠴᠦ ᠶ᠋ᠢ ᠠᠩᠵᠠᠭᠠᠷᠠᠬᠤ ᠦᠭᠡᠢ ᠮᠡᠲᠦ ᠪᠠᠢᠵᠠᠢ᠃ ᠮᠡᠩᠯᠢᠭ ᠢ᠋ ᠢᠷᠡᠭᠰᠡᠨ ᠳ᠋ᠦ᠍ ᠲᠡᠮᠦᠵᠢᠨ ᠶᠡᠬᠡ ᠨᠠᠢᠷ ᠬᠢᠪᠡ᠃ ᠨᠠᠢᠷ ᠤ᠋ᠨ ᠡᠬᠢᠨ ᠳ᠋ᠦ᠍ ᠮᠡᠩᠯᠢᠭ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠥᠭᠡᠯᠦᠨ ᠳ᠋ᠦ᠍ ᠮᠥᠷᠭᠥᠵᠡᠢ᠃ ᠨᠠᠢᠷ ᠤ᠋ᠨ ᠲᠤᠷᠰᠢ ᠥᠭᠡᠯᠦᠨ ᠮᠡᠩᠯᠢᠭ ᠬᠣᠶᠠᠷ ᠦᠭᠡ ᠰᠣᠯᠢᠭᠰᠠᠨ ᠦᠭᠡᠢ᠃ ᠲᠡᠮᠦᠵᠢᠨ ᠮᠡᠩᠯᠢᠭ ᠢ᠋ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠰᠠᠭᠤᠯᠭᠠᠵᠠᠢ᠃ ᠬᠠᠶᠠᠵᠤ ᠣᠲᠣᠭᠠᠳ ᠰᠠᠶᠢ ᠡᠷᠭᠢᠨ ᠢᠷᠡᠭᠰᠡᠨ ᠪᠣᠭᠣᠯ ᠮᠡᠩᠯᠢᠭ ᠢ᠋ ᠢᠩᠭᠢᠵᠦ ᠶᠡᠬᠡ ᠪᠡᠷ ᠬᠦᠨᠳᠦᠳᠬᠡᠭᠰᠡᠨ ᠢ᠋ ᠣᠯᠠᠨ ᠬᠥᠮᠦᠨ ᠭᠠᠢᠬᠠᠵᠠᠢ᠃
ᠡᠨᠡ ᠪᠣᠯ ᠲᠡᠮᠦᠵᠢᠨ ᠦ᠌ ᠬᠣᠯᠠ ᠶ᠋ᠢᠨ ᠳᠠᠯᠳᠠ ᠰᠠᠨᠠᠭᠠᠨ ᠤ᠋ ᠢᠯᠡᠷᠡᠯ ᠭᠡᠳᠡᠭ ᠢ᠋ ᠥᠭᠡᠯᠦᠨ ᠮᠡᠳᠡᠵᠦ ᠪᠣᠯᠭᠣᠮᠵᠢᠯᠠᠵᠤ ᠪᠠᠢᠪᠠ᠃ ᠤᠴᠢᠷ ᠨᠢ ᠮᠡᠩᠯᠢᠭ ᠢ᠋ ᠢᠩᠭᠢᠵᠦ ᠶᠡᠬᠡ ᠪᠡᠷ ᠬᠦᠨᠳᠦᠳᠬᠡᠵᠦ ᠪᠦᠷ 《ᠡᠴᠢᠭᠡ》 ᠭᠡᠮᠡᠨ ᠳᠠᠭᠤᠳᠠᠵᠤ ᠪᠣᠢ ᠨᠢ ᠥᠭᠡᠯᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠴᠢᠨᠠᠳᠤ ᠨᠢᠭᠤᠴᠠ ᠶ᠋ᠢ ᠲᠡᠮᠦᠵᠢᠨ ᠮᠡᠳᠡᠵᠦ ᠪᠠᠢᠭᠠ ᠪᠠᠷ ᠵᠣᠭᠰᠣᠬᠤ ᠦᠭᠡᠢ ᠪᠦᠷ ᠲᠡᠭᠦᠨ ᠢ᠋ ᠵᠢᠮᠡᠯᠡᠵᠦ ᠪᠠᠭᠠᠯᠠᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠪᠠᠯᠠᠮᠠᠭᠳᠠᠭᠰᠠᠨ ᠳ᠋ᠠᠭᠠᠨ ᠮᠡᠩᠯᠢᠭ ᠲᠡᠢ ᠳᠤᠤᠭᠠᠷᠬᠤ ᠦᠭᠡᠢ ᠪᠡᠶᠡ ᠪᠡᠨ ᠪᠠᠷᠢᠬᠤ ᠳ᠋ᠤ᠌ ᠬᠦᠷᠴᠡᠢ᠃ ᠲᠡᠮᠦᠵᠢᠨ ᠳᠣᠲᠣᠷᠠ ᠪᠠᠨ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠣᠢ ᠶ᠋ᠢ ᠳᠠᠭᠠᠬᠤ ᠠᠷᠭᠠ ᠦᠭᠡᠢ ᠲᠤᠯᠠ ᠠᠶᠤᠵᠤ ᠪᠠᠢᠪᠠ᠃ ᠮᠡᠩᠯᠢᠭ ᠢ᠋ ᠡᠪᠦᠷ ᠲᠡᠭᠡᠨ ᠣᠷᠣᠭᠤᠯᠵᠤ ᠱᠠᠯᠢᠭᠯᠠᠭᠰᠠᠨ ᠢ᠋ ᠲᠡᠮᠦᠵᠢᠨ ᠣᠭᠲᠣ ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠨᠢ ᠶᠡᠬᠡ ᠯᠡ ᠭᠡᠨᠡᠨ ᠬᠡᠷᠡᠭ ᠪᠠᠢᠭᠰᠠᠨ ᠢ᠋ ᠮᠡᠳᠡᠵᠦ ᠶᠡᠬᠡ ᠢᠴᠢᠵᠡᠢ᠃ ᠢᠩᠭᠢᠵᠦ ᠪᠣᠳᠣᠬᠤ ᠪᠠᠷ ᠲᠡᠮᠦᠵᠢᠨ ᠦ᠌ ᠡᠮᠦᠨᠡ ᠪᠤᠷᠤᠭᠤᠳᠠᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠭᠠᠳ ᠳᠣᠲᠣᠷᠠ ᠨᠢ ᠮᠠᠭᠤᠬᠠᠢᠷᠠᠪᠠᠴᠤ ᠪᠠᠰᠠ ᠭᠡᠨᠡ ᠭᠡᠨᠡ ᠲᠤᠯᠭᠠᠷᠠᠬᠤ ᠮᠡᠩᠯᠢᠭ ᠦ᠋ᠨ ᠬᠠᠷᠠᠴᠠ ᠲᠡᠭᠦᠨ ᠢ᠋ ᠲᠥᠭᠡᠨᠡᠬᠦ ᠮᠡᠲᠦ ᠪᠣᠯᠵᠤ ᠪᠦᠦᠷ ᠲᠦᠦᠷ ᠬᠦᠰᠡᠯ ᠨᠢ ᠣᠷᠭᠢᠯᠵᠤ ᠡᠬᠢᠯᠡᠵᠡᠢ᠃ ᠡᠨᠡ ᠪᠣᠯ ᠥᠭᠡᠯᠦᠨ ᠦ᠌ ᠬᠡᠵᠢᠶᠡ ᠴᠦ᠍ ᠦᠵᠡᠵᠦ ᠮᠡᠳᠡᠷᠡᠭᠡ ᠦᠭᠡᠢ ᠶᠠᠪᠤᠳᠠᠯ ᠪᠣᠯᠪᠠ᠃ ᠳᠡᠷᠭᠡᠳᠡ ᠰᠠᠭᠤᠭᠰᠠᠨ ᠮᠡᠩᠯᠢᠭ ᠡᠴᠡ ᠳᠤᠷᠠ ᠲᠠᠴᠢᠶᠠᠯ ᠣᠷᠭᠢᠯᠠᠭᠤᠯᠵᠤ ᠬᠠᠴᠢᠨ ᠰᠣᠳᠣᠨ ᠦᠨᠦᠷ ᠬᠠᠩᠬᠤᠯᠵᠤ ᠪᠠᠢᠬᠤ ᠶ᠋ᠢ ᠥᠭᠡᠯᠦᠨ ᠠᠩᠬᠠ ᠤᠳᠠᠭᠠ ᠮᠡᠳᠡᠷᠡᠵᠡᠢ᠃ ᠲᠡᠷᠡ ᠦᠨᠦᠷ ᠲᠦ᠍ ᠥᠭᠡᠯᠦᠨ ᠰᠣᠭᠲᠣᠭᠰᠠᠨ ᠮᠡᠲᠦ ᠪᠣᠯᠤᠭᠠᠳ ᠭᠠᠭᠴᠠᠬᠠᠨ ᠮᠡᠩᠯᠢᠭ ᠲᠡᠢ ᠴᠡᠩᠭᠡᠵᠦ ᠪᠠᠢᠭᠰᠠᠨ ᠥᠨᠥᠬᠢ ᠰᠥᠨᠢ ᠶ᠋ᠢᠨ ᠳᠤᠷᠠᠰᠤᠮᠵᠢ ᠬᠠᠴᠢᠨ ᠲᠣᠳᠣᠷᠬᠠᠢ ᠰᠡᠷᠭᠦᠵᠦ ᠠᠯᠢ ᠡᠷᠲᠡ ᠮᠡᠳᠡᠷᠡᠯ ᠦᠭᠡᠢ ᠮᠡᠲᠦ ᠪᠣᠯᠤᠭᠰᠠᠨ ᠬᠥᠬᠥ ᠨᠢ ᠴᠢᠨᠦᠷᠡᠨ ᠴᠢᠮ ᠴᠢᠮ ᠡᠪᠡᠳᠴᠦ ᠪᠠᠢᠵᠠᠢ᠃ ᠥᠨᠥᠴᠢᠨ ᠬᠣᠴᠣᠷᠤᠭᠰᠠᠨ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠲᠡᠷᠡ ᠳᠤᠮᠳᠠ ᠪᠠᠨ ᠲᠡᠮᠦᠵᠢᠨ ᠦ᠌ ᠲᠥᠯᠥᠭᠡ ᠵᠠᠷᠤᠴᠠ ᠪᠣᠭᠣᠯ ᠮᠡᠩᠯᠢᠭ ᠲᠤ ᠪᠡᠶᠡ ᠪᠡᠨ ᠡᠳ᠋ᠯᠡᠭᠦᠯᠦᠭᠰᠡᠨ ᠭᠡᠵᠦ ᠥᠪᠡᠷ ᠢ᠋ ᠪᠡᠨ ᠴᠠᠭᠠᠳᠬᠠᠨ ᠥᠮᠥᠭᠡᠷᠡᠵᠦ ᠶᠠᠪᠤᠭᠰᠠᠨ ᠪᠥᠭᠡᠳ ᠬᠠᠷᠢᠨ ᠣᠳᠣ ᠡᠮᠡ ᠪᠡᠶᠡ ᠨᠢ ᠬᠠᠭᠰᠠᠷᠠᠵᠤ ᠮᠡᠩᠯᠢᠭ ᠢ᠋ ᠬᠦᠰᠡᠮᠵᠢᠯᠡᠨ ᠲᠠᠴᠢᠶᠠᠳᠠᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠣᠢᠯᠠᠭᠠᠵᠠᠢ᠃ ᠰᠡᠳᠬᠢᠯ ᠦ᠋ᠨ ᠳᠣᠲᠣᠷᠠ ᠡᠢᠮᠦ ᠶᠡᠬᠡ ᠳᠤᠷᠠ ᠬᠦᠰᠡᠯ ᠬᠠᠳᠠᠭᠠᠯᠠᠭᠳᠠᠨ ᠶᠠᠪᠤᠵᠠᠢ᠃ ᠥᠭᠡᠯᠦᠨ ᠥᠪᠡᠷ ᠦ᠋ᠨ ᠳᠤᠷᠠ ᠬᠦᠰᠡᠯ ᠢ᠋ ᠲᠡᠪᠴᠢᠨ ᠪᠠᠷᠢᠵᠤ ᠡᠰᠡ ᠳᠡᠢᠯᠦᠭᠡᠳ ᠲᠣᠯᠣᠭᠠᠢ ᠡᠪᠡᠳᠦᠭᠰᠡᠨ ᠨᠡᠷᠡ ᠪᠡᠷ ᠭᠡᠷ ᠲᠡᠭᠡᠨ ᠰᠢᠷᠭᠤᠨ ᠭᠠᠭᠴᠠᠭᠠᠷ ᠠᠰᠬᠠᠷᠠᠲᠠᠯᠠ ᠤᠬᠢᠯᠠᠵᠤ ᠠᠷᠠᠢᠬᠠᠨ ᠲᠠᠢᠪᠤᠰᠢᠷᠠᠵᠠᠢ᠃ ᠲᠡᠷᠡ ᠥᠪᠡᠷ ᠦ᠋ᠨ ᠰᠡᠳᠬᠢᠯ ᠢ᠋ ᠣᠢᠯᠠᠭᠠᠬᠤ ᠪᠠᠨ ᠪᠣᠯᠢᠪᠠ᠃
ᠮᠡᠩᠯᠢᠭ ᠢ᠋ ᠳᠠᠭᠠᠵᠤ ᠢᠷᠡᠭᠰᠡᠨ ᠢᠷᠭᠡᠳ ᠢ᠋ ᠲᠡᠭᠦᠨ ᠳ᠋ᠦ᠍ ᠥᠭᠴᠦ ᠲᠡᠳᠡᠨ ᠳ᠋ᠦ᠍ ᠨᠤᠲᠤᠭ ᠵᠢᠭᠠᠨ ᠰᠠᠭᠤᠯᠭᠠᠬᠤ ᠪᠠᠷ ᠲᠡᠮᠦᠵᠢᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠨᠢ ᠪᠣᠷᠵᠢᠭᠢᠨ ᠠᠢᠮᠠᠭ ᠲᠤ ᠮᠡᠩᠯᠢᠭ ᠦ᠋ᠨ ᠤᠳᠤᠮ ᠬᠠᠮᠤᠭ ᠤ᠋ᠨ ᠶᠡᠬᠡ ᠬᠦᠨᠳᠦᠯᠡᠯ ᠬᠦᠯᠢᠶᠡᠨ ᠳᠠᠷᠬᠠᠯᠠᠭᠳᠠᠭᠰᠠᠨ ᠬᠡᠷᠡᠭ ᠪᠠᠢᠪᠠ᠃ ᠮᠡᠩᠯᠢᠭ ᠠᠯᠪᠠᠲᠤ ᠪᠠᠨ ᠳᠠᠭᠠᠭᠤᠯᠤᠨ ᠵᠢᠭᠠᠭᠰᠠᠨ ᠨᠤᠲᠤᠭ ᠤᠷᠤᠭᠤ ᠨᠡᠭᠦᠵᠦ ᠣᠳᠴᠠᠢ᠃ ᠮᠡᠩᠯᠢᠭ ᠥᠭᠡᠯᠦᠨ ᠦ᠌ ᠭᠡᠷ ᠲᠦ᠍ ᠲᠤᠰᠬᠠᠢᠯᠠᠨ ᠣᠷᠣᠵᠤ ᠪᠠᠷᠠᠯᠠᠬᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠬᠥᠭᠡᠴᠦ ᠬᠥᠪᠡᠭᠦᠨ ᠦ᠌ ᠪᠡᠨ ᠬᠠᠮᠲᠤ ᠲᠡᠮᠦᠵᠢᠨ ᠲᠡᠢ ᠤᠳᠠᠭᠠᠨ ᠰᠠᠭᠤᠵᠤ ᠶᠠᠷᠢᠯᠴᠠᠭᠠᠳ ᠨᠡᠭᠦᠳᠡᠯ ᠦ᠋ᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠮᠣᠷᠳᠠᠵᠠᠢ᠃ ᠥᠭᠡᠯᠦᠨ ᠲᠡᠭᠦᠨ ᠢ᠋ ᠣᠷᠣᠭᠠᠳ ᠢᠷᠡᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠲᠤᠯᠠ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠨᠠ ᠳᠠᠯᠳᠠ ᠣᠷᠣᠲᠠᠯᠠ ᠬᠠᠷᠠᠵᠤ ᠵᠣᠭᠰᠣᠪᠠ᠃ ᠭᠡᠲᠡᠯᠡ ᠵᠠᠷᠤᠴᠠ ᠮᠡᠩᠯᠢᠭ ᠡᠷᠭᠢᠵᠦ ᠴᠦ᠍ ᠬᠠᠷᠠᠭᠰᠠᠨ ᠦᠭᠡᠢ ᠶᠠᠪᠤᠭᠰᠠᠨ ᠳ᠋ᠤ᠌ ᠭᠣᠮᠣᠳᠠᠯ ᠨᠢ ᠬᠣᠷᠣᠰᠤᠯ ᠢ᠋ᠶ᠋ᠠᠷ ᠰᠣᠯᠢᠭᠳᠠᠬᠤ ᠰᠢᠭ᠋ ᠪᠣᠯᠵᠠᠢ᠃ ᠡᠨᠡ ᠵᠤᠨ ᠥᠭᠡᠯᠦᠨ ᠳᠥᠴᠢᠨ ᠭᠤᠷᠪᠠᠨ ᠨᠠᠰᠤ ᠬᠦᠷᠦᠭᠰᠡᠨ ᠴᠦ᠍ ᠡᠷᠡ ᠶ᠋ᠢᠨ ᠨᠢᠳᠦ ᠰᠡᠳᠬᠢᠯ ᠢ᠋ ᠲᠠᠲᠠᠬᠤ ᠦᠵᠡᠮᠵᠢ ᠨᠢ ᠪᠠᠭᠤᠷᠠᠭᠠ ᠦᠭᠡᠢ ᠪᠠᠢᠯᠠ᠃ ᠥᠭᠡᠯᠦᠨ ᠬᠡᠵᠢᠶᠡ ᠴᠦ᠍ ᠥᠨᠥᠳᠥᠷ ᠦ᠋ᠨ ᠬᠢ ᠰᠢᠭ ᠡᠷᠡ ᠶ᠋ᠢ ᠬᠦᠰᠡᠨ ᠲᠠᠴᠢᠶᠠᠳᠠᠵᠤ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠮᠢᠭᠠ ᠨᠢ ᠨᠢᠭᠤᠭᠳᠠᠵᠤ ᠶᠠᠪᠤᠭᠰᠠᠨ ᠶᠡᠬᠡ ᠲᠠᠴᠢᠶᠠᠯ ᠶᠤᠮ ᠪᠤᠤ ᠮᠡᠳᠡ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠰᠥᠨᠢ ᠪᠦᠷᠢ ᠭᠠᠭᠴᠠᠬᠠᠨ ᠮᠡᠩᠯᠢᠭ ᠢ᠋ ᠬᠦᠰᠡᠮᠵᠢᠯᠡᠨ ᠲᠠᠷᠴᠢᠯᠠᠵᠤ ᠳᠤᠷᠠ ᠲᠠᠴᠢᠶᠠᠯ ᠳ᠋ᠠᠭᠠᠨ ᠰᠢᠲᠠᠨ ᠨᠣᠢᠷ ᠦᠭᠡᠢ ᠬᠣᠨᠣᠬᠤ ᠪᠣᠯᠵᠠᠢ᠃ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠨᠡᠷᠡ ᠨᠢᠭᠤᠷ᠂ ᠶᠢᠰᠦᠭᠡᠢ ᠶ᠋ᠢᠨ ᠠᠯᠳᠠᠷ ᠬᠦᠨᠳᠦ ᠶ᠋ᠢ ᠪᠣᠳᠣᠨ ᠡᠷᠡ ᠬᠥᠮᠦᠨ ᠲᠡᠢ ᠣᠢᠷᠠᠲᠤᠵᠤ ᠬᠠᠪᠢᠳᠠᠬᠤ ᠶ᠋ᠢ ᠴᠡᠭᠡᠷᠯᠡᠨ ᠣᠯᠠᠨ ᠵᠢᠯ ᠳᠤᠷᠠ ᠬᠦᠰᠡᠯ ᠢ᠋ᠶ᠋ᠡᠨ ᠬᠦᠴᠦ ᠪᠡᠷ ᠬᠣᠷᠢᠭᠯᠠᠨ ᠲᠡᠪᠴᠢᠵᠦ ᠢᠷᠡᠭᠰᠡᠨ ᠨᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠡᠢᠮᠦ ᠡᠪᠡᠳᠴᠢᠨ ᠡᠭᠦᠰᠬᠡᠭᠰᠡᠨ ᠢ᠋ ᠥᠭᠡᠯᠦᠨ ᠭᠠᠳᠠᠷᠯᠠᠭᠰᠠᠨ ᠦᠭᠡᠢ᠃ ᠲᠡᠭᠦᠨ ᠦ᠌ ᠤᠷᠲᠤ ᠠᠮᠢᠳᠤᠷᠠᠯ ᠳ᠋ᠤ᠌ ᠪᠡᠶᠡ ᠪᠡᠨ ᠥᠭᠭᠦᠭᠰᠡᠨ ᠭᠤᠷᠪᠠᠬᠠᠨ ᠡᠷᠡ ᠪᠠᠢᠯᠠ᠃ ᠡᠷᠡ ᠨᠥᠬᠥᠷ ᠶᠢᠰᠦᠭᠡᠢ᠃ ᠬᠠᠭᠤᠴᠢᠨ ᠨᠥᠬᠥᠷ ᠴᠢᠯᠡᠳᠦ᠃ ᠲᠡᠭᠡᠭᠡᠳ ᠡᠨᠡ ᠵᠠᠷᠤᠴᠠ ᠮᠡᠩᠯᠢᠭ ᠠᠵᠢ᠃ ᠲᠡᠷᠡ ᠣᠳᠣ ᠠᠵᠠ ᠦᠭᠡᠢ ᠪᠡᠷ ᠦᠬᠦᠭᠰᠡᠨ ᠰᠤᠴᠢᠭᠠᠯ ᠳ᠋ᠤ᠌ ᠠᠲᠠᠭᠠᠷᠬᠠᠵᠤ ᠪᠠᠢᠪᠠ᠃ ᠰᠤᠴᠢᠭᠠᠯ᠂ ᠶᠢᠰᠦᠭᠡᠢ ᠶ᠋ᠢᠨ ᠦᠬᠦᠭᠰᠡᠨ ᠡᠴᠡ ᠬᠣᠢᠰᠢ ᠶᠢᠰᠦᠭᠡᠢ ᠶ᠋ᠢᠨ ᠨᠡᠷᠡ ᠬᠦᠨᠳᠦ ᠶ᠋ᠢ ᠪᠣᠳᠣᠯ ᠦᠭᠡᠢ ᠪᠡᠷ ᠭᠠᠭᠴᠠ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠵᠢᠷᠭᠠᠯ ᠢ᠋ ᠬᠥᠭᠡᠭᠡᠵᠦ ᠲᠠᠭᠠᠷᠠᠭᠰᠠᠨ ᠡᠷᠡᠴᠦᠦᠯ ᠲᠡᠢ ᠳᠤᠷᠠ ᠴᠢᠯᠥᠭᠡᠲᠡᠢ ᠱᠠᠯᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ ᠥᠭᠡᠯᠦᠨ ᠶᠡᠬᠡᠳᠡ ᠦᠵᠡᠨ ᠶᠠᠳᠠᠵᠤ ᠵᠠᠩᠨᠠᠵᠤ ᠬᠣᠷᠢᠭᠯᠠᠭᠰᠠᠨ ᠨᠢ ᠣᠯᠠᠨ ᠴᠦ᠍《ᠴᠢᠮᠠᠶ᠋ᠢ ᠡᠷᠡ ᠲᠣᠭᠣᠬᠤ ᠦᠭᠡᠢ ᠪᠣᠯ ᠳᠠᠭᠤ ᠦᠭᠡᠢ ᠪᠠᠢᠭᠲᠤᠨ》 ᠭᠡᠵᠦ ᠵᠠᠩᠨᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠦᠭᠡ ᠬᠡᠯᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠪᠢᠯᠡ᠃ ᠰᠣᠴᠢᠭᠠᠯ ᠪᠥᠷᠲᠡ ᠶ᠋ᠢᠨ ᠬᠠᠮᠲᠤ ᠮᠡᠷᠭᠢᠳ ᠲᠦ᠍ ᠪᠤᠯᠢᠶᠠᠭᠳᠠᠵᠤ ᠣᠴᠢᠭᠠᠳ ᠮᠡᠷᠭᠢᠳ ᠦ᠋ᠨ ᠣᠯᠠᠨ ᠡᠷᠡᠴᠦᠦᠯ ᠳ᠋ᠦ᠍ ᠡᠳ᠋ᠯᠡᠭᠳᠡᠵᠦ ᠪᠠᠢᠭᠰᠠᠨ ᠳ᠋ᠠᠭᠠᠨ ᠢᠴᠢᠨ ᠮᠣᠳᠣᠨ ᠳ᠋ᠤ᠌ ᠪᠣᠭᠣᠮᠢᠯᠠᠨ ᠦᠬᠦᠭᠰᠡᠨ ᠢ᠋ ᠳᠤᠭᠤᠯᠤᠭᠠᠳ ᠮᠠᠭᠤ ᠵᠠᠪᠬᠠᠢ ᠦᠢᠯᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠣᠷ ᠢ᠋ ᠠᠮᠰᠠᠪᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠣᠳᠣ ᠰᠠᠨᠠᠬᠤ ᠳ᠋ᠤ᠌ ᠬᠠᠷᠢᠨ ᠥᠭᠡᠯᠦᠨ ᠯᠡ ᠵᠢᠷᠭᠠᠯ ᠴᠡᠩᠭᠡᠯ ᠦᠵᠡᠭᠰᠡᠨ ᠦᠭᠡᠢ ᠨᠠᠰᠤ ᠶ᠋ᠢ ᠦᠷᠡᠭᠰᠡᠨ ᠨᠢ ᠬᠣᠬᠢᠷᠠᠵᠤ ᠴᠡᠭᠡᠷᠯᠡᠯ ᠠᠮᠰᠠᠭᠰᠠᠨ ᠮᠡᠲᠦ ᠠᠵᠢ᠃ ᠡᠢᠨ ᠰᠡᠳᠬᠢᠯ ᠪᠡᠶᠡ ᠨᠢ ᠬᠢᠮᠤᠷᠠᠭᠰᠠᠨ ᠢ᠋ᠶ᠋ᠠᠨ ᠭᠠᠭᠴᠠᠬᠠᠨ ᠮᠡᠩᠯᠢᠭ ᠦ᠋ᠨ ᠡᠷᠡ ᠪᠡᠶᠡ ᠶ᠋ᠢᠨ ᠴᠢᠯᠬᠠ ᠰᠠᠢᠲᠠᠢ ᠶ᠋ᠢ᠂ ᠡᠷᠲᠡ ᠳᠡᠭᠡᠷᠡ ᠲᠡᠷᠡ ᠰᠥᠨᠢ ᠤᠴᠠᠷᠠᠬᠤ ᠳ᠋ᠠᠭᠠᠨ ᠬᠡᠷᠬᠢᠨ ᠡᠳ᠋ᠯᠡᠨ ᠵᠢᠷᠭᠠᠭᠠᠭᠰᠠᠨ ᠢ᠋ ᠳᠤᠷᠠᠰᠤᠨ ᠰᠠᠨᠠᠭᠰᠠᠨ ᠠ᠋ᠴᠠ ᠪᠣᠯᠪᠠ ᠭᠡᠵᠦ ᠪᠣᠳᠣᠭᠠᠳ ᠢᠩᠭᠢᠰᠬᠢᠭᠡᠳ ᠥᠩᠭᠡᠷᠡᠵᠦ ᠮᠠᠷᠲᠠᠭᠳᠠᠨᠠ ᠪᠢᠵᠡ ᠭᠡᠵᠦ ᠥᠪᠡᠷ ᠢ᠋ ᠪᠡᠨ ᠲᠠᠢᠪᠤᠰᠢᠷᠠᠭᠤᠯᠬᠤ ᠶ᠋ᠢ ᠬᠢᠴᠢᠶᠡᠵᠡᠢ᠃ ᠭᠡᠲᠡᠯᠡ ᠡᠪᠡᠳᠴᠢᠨ ᠨᠢ ᠲᠡᠭᠦᠨ ᠦ᠌ ᠰᠠᠨᠠᠭᠰᠠᠨ ᠰᠢᠭ᠋ ᠠᠮᠠᠷ ᠬᠢᠯᠪᠠᠷ ᠡᠳᠡᠭᠡᠷᠡᠵᠦ ᠢᠯᠠᠷᠢᠰᠢᠭᠰᠠᠨ ᠦᠭᠡᠢ ᠤᠯᠠᠮ ᠬᠦᠨᠳᠦᠷᠡᠵᠦ ᠪᠦᠷ ᠡᠷᠡ ᠶ᠋ᠢ ᠬᠦᠰᠡᠮᠵᠢᠯᠡᠨ ᠰᠣᠯᠢᠶᠠᠷᠠᠬᠤ ᠳᠥᠭᠥᠵᠡᠢ᠃ ᠥᠭᠡᠯᠦᠨ ᠰᠥᠨᠢ ᠤᠨᠲᠠᠬᠤ ᠦᠭᠡᠢ ᠰᠢᠬᠠᠮ ᠪᠣᠯᠤᠭᠰᠠᠭᠠᠷ ᠤᠳᠠᠪᠠ᠃ ᠨᠢᠳᠦ ᠨᠢ ᠭᠠᠷᠠᠬᠠᠯᠠᠵᠤ ᠡᠴᠡᠵᠦ ᠲᠤᠷᠠᠵᠤ ᠡᠬᠢᠯᠡᠭᠰᠡᠨ ᠨᠢ ᠬᠡᠦᠬᠡᠳ ᠦ᠋ᠳ ᠢ᠋ ᠨᠢ ᠰᠠᠨᠳᠤᠷᠭᠠᠪᠠ᠃ ᠬᠡᠳᠦᠢ ᠪᠡᠷ ᠥᠪᠡᠷ ᠦ᠋ᠨ ᠡᠨᠡ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠡᠮᠴᠢᠯᠡᠨ ᠡᠳᠡᠭᠡᠬᠦ ᠶ᠋ᠢ ᠥᠭᠡᠯᠦᠨ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠴᠦ᠍ ᠣᠯᠠᠨ ᠤ᠋ ᠬᠡᠯᠡ ᠠᠮᠠ ᠬᠣᠪ ᠵᠢᠪ ᠡᠴᠡ ᠠᠶᠤᠵᠤ ᠴᠠᠭᠠᠷᠢᠭᠯᠠᠭᠰᠠᠭᠠᠷ ᠪᠠᠢᠪᠠ᠃ ᠭᠡᠪᠡᠴᠦ ᠡᠨᠡ ᠮᠠᠶᠢᠭ ᠢ᠋ᠶ᠋ᠠᠷ ᠡᠳᠦᠷ ᠬᠣᠨᠣᠭ ᠢ᠋ ᠥᠩᠭᠡᠷᠡᠭᠡᠵᠦ ᠲᠡᠪᠴᠢᠬᠦ ᠳ᠋ᠦ᠍ ᠤᠳᠠᠬᠤ ᠪᠦᠷᠢ ᠬᠦᠨᠳᠦ ᠪᠣᠯᠤᠭᠰᠠᠭᠠᠷ ᠠᠵᠢ᠃
ᠲᠡᠮᠦᠵᠢᠨ ᠬᠠᠰᠠᠷ ᠨᠠᠷ ᠲᠠᠢᠴᠢᠭᠤᠳ ᠤ᠋ᠨ ᠵᠠᠬᠠ ᠶ᠋ᠢᠨ ᠢᠷᠭᠡᠳ ᠢ᠋ ᠰᠠᠮ ᠳᠣᠪᠲᠣᠯᠤᠨ ᠬᠤᠷᠢᠶᠠᠵᠤ ᠡᠪᠦᠯᠵᠢᠬᠦ ᠪᠡᠯᠴᠢᠭᠡᠷ ᠨᠤᠲᠤᠭ ᠢ᠋ᠶ᠋ᠠᠨ ᠴᠢᠯᠥᠭᠡᠯᠡᠨ ᠠᠪᠬᠤ ᠪᠠᠷ ᠴᠡᠷᠢᠭᠯᠡᠨ ᠮᠣᠷᠳᠠᠭᠰᠠᠨ ᠲᠡᠷᠡ ᠡᠳᠦᠷ ᠥᠭᠡᠯᠦᠨ ᠶᠠᠭ ᠤᠬᠠᠭᠠᠨ ᠰᠣᠯᠢᠶᠠᠷᠠᠭᠰᠠᠨ ᠮᠡᠲᠦ ᠪᠣᠯᠵᠤ ᠵᠥᠪᠬᠡᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠡᠳᠡᠷᠡᠮᠵᠢᠨ ᠳ᠋ᠦ᠍ ᠬᠥᠲᠥᠯᠦᠭᠳᠡᠨ ᠶᠠᠪᠤᠵᠠᠢ᠃ ᠮᠡᠩᠯᠢᠭ ᠦ᠋ᠨ ᠬᠦᠷᠢᠶᠡ ᠨᠠᠮᠤᠷᠵᠢᠵᠤ ᠪᠠᠢᠭᠰᠠᠨ ᠴᠡᠩᠬᠡᠷ ᠮᠠᠨᠳᠠᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠬᠦᠷᠴᠦ ᠢᠷᠡᠭᠰᠡᠨ ᠬᠣᠢᠨᠠ ᠪᠠᠨ ᠯᠠ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠠᠲᠠᠵᠠᠢ᠃ ᠡᠮᠦᠨᠡ ᠨᠢ ᠣᠯᠠᠨ ᠭᠡᠷ ᠲᠡᠢ ᠪᠠᠶᠠᠨ ᠬᠦᠷᠢᠶᠡ ᠦᠵᠡᠭᠳᠡᠨᠡ᠃ ᠤᠬᠠᠭᠠᠷᠠᠭᠰᠠᠨ ᠴᠦ᠍ ᠲᠡᠭᠦᠨ ᠳ᠋ᠦ᠍ ᠤᠬᠤᠷᠢᠵᠤ ᠪᠤᠴᠠᠬᠤ ᠬᠦᠰᠡᠯ ᠲᠥᠷᠥᠭᠰᠡᠨ ᠦᠭᠡᠢ᠃ ᠲᠡᠷᠡ ᠶᠠᠪᠤᠭᠰᠠᠭᠠᠷ ᠮᠡᠩᠯᠢᠭ ᠦ᠋ᠨ ᠭᠡᠷ ᠦ᠋ᠨ ᠭᠠᠳᠠᠨᠠᠬᠢ ᠤᠶᠠᠭᠠᠨ ᠳᠡᠭᠡᠷᠡ ᠣᠴᠢᠵᠤ ᠪᠠᠭᠤᠵᠠᠢ᠃ ᠢᠩᠭᠢᠨᠡ ᠭᠡᠵᠦ ᠣᠯᠠᠨ ᠬᠣᠨᠣᠭ ᠲᠥᠯᠥᠪᠯᠡᠨ ᠪᠣᠳᠣᠭᠰᠠᠨ ᠲᠤᠯᠠ ᠡᠷᠡᠭᠡᠯᠵᠡᠨ ᠲᠡᠭᠡᠨᠡᠭᠡᠯᠵᠡᠬᠦ ᠵᠦᠢᠯ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠭᠡᠨᠡᠳᠲᠡ ᠴᠢᠪ ᠴᠢᠮᠡᠭᠡ ᠦᠭᠡᠢ ᠣᠷᠣᠵᠤ ᠢᠷᠡᠭᠰᠡᠨ ᠥᠭᠡᠯᠦᠨ ᠢ᠋ ᠦᠵᠡᠭᠡᠳ ᠮᠡᠩᠯᠢᠭ ᠴᠣᠴᠢᠨ ᠪᠣᠰᠴᠤ ᠬᠠᠷᠠᠢᠵᠠᠢ᠃ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠪᠠᠭᠠ ᠡᠬᠡᠨᠡᠷ ᠨᠢ ᠥᠭᠡᠯᠦᠨ ᠢ᠋ ᠦᠵᠡᠮᠡᠭᠴᠡ ᠰᠦᠷᠳᠡᠨ ᠭᠣᠳ ᠦᠰᠦᠷᠦᠨ ᠭᠠᠷᠪᠠ᠃ ᠮᠡᠩᠯᠢᠭ ᠦ᠋ᠨ ᠬᠥᠪᠡᠭᠦᠳ ᠲᠡᠭᠦᠨ ᠦ᠌ ᠠᠯᠪᠠᠲᠤ ᠡᠷᠡᠴᠦᠳ ᠪᠦᠭᠦᠳᠡ ᠲᠡᠮᠦᠵᠢᠨ ᠦ᠌ ᠴᠡᠷᠢᠭ ᠲᠦ᠍ ᠶᠠᠪᠤᠭᠰᠠᠨ ᠲᠤᠯᠠ ᠬᠦᠷᠢᠶᠡ ᠳᠠᠶᠠᠭᠠᠷ ᠡᠯᠦᠢ ᠬᠤᠯᠤᠢ ᠡᠮᠡᠰ ᠭᠣᠣᠯᠳᠠᠭᠤ ᠦᠯᠡᠳᠡᠭᠡᠳ ᠪᠠᠢᠵᠠᠢ᠃ ᠬᠠᠷᠢᠨ ᠮᠡᠩᠯᠢᠭ ᠠᠬᠠᠮᠠᠳ ᠤ᠋ᠨ ᠶᠣᠰᠣᠭᠠᠷ ᠬᠦᠷᠢᠶᠡ ᠪᠡᠨ ᠵᠠᠬᠢᠷᠤᠨ ᠬᠣᠴᠣᠷᠴᠠᠢ᠃ ᠥᠭᠡᠯᠦᠨ ᠶᠠᠭ ᠡᠢᠮᠦ ᠦᠶᠡ ᠶ᠋ᠢ ᠲᠠᠭᠠᠷᠠᠭᠤᠯᠬᠤ ᠭᠡᠵᠦ ᠲᠡᠪᠴᠢᠨ ᠬᠦᠯᠢᠶᠡᠭᠰᠡᠨ ᠪᠢᠯᠡ᠃ ᠲᠡᠷᠡ ᠶᠠᠭᠤ ᠴᠦ᠍ ᠶᠠᠷᠢᠵᠤ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠠᠮᠢᠳᠤᠷᠠᠯ ᠢ᠋ ᠣᠶᠤᠨ ᠤᠬᠠᠭᠠᠨ ᠪᠢᠰᠢ ᠬᠦᠰᠡᠯ ᠮᠡᠳᠡᠷᠡᠮᠵᠢ ᠬᠥᠲᠥᠯᠳᠡᠭ ᠲᠡᠢᠮᠦ ᠴᠠᠭ ᠢᠷᠡᠵᠡᠢ᠃ ᠲᠡᠳᠡᠨ ᠢ᠋ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠶᠡᠬᠡ ᠬᠤᠶᠠᠯᠢ ᠲᠠᠴᠢᠶᠠᠯ ᠬᠥᠲᠥᠯᠵᠦ ᠪᠠᠢᠪᠠ᠃ ᠮᠡᠩᠯᠢᠭ ᠴᠦ᠍ ᠤᠴᠢᠷ ᠢ᠋ ᠣᠯᠵᠤ ᠤᠬᠠᠭᠠᠨ ᠵᠠᠷᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠭᠠᠭᠴᠠᠬᠠᠨ ᠡᠷᠡ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠪᠦᠭᠦᠳᠡ ᠶ᠋ᠢ ᠥᠪᠡᠷ ᠦ᠋ᠨ ᠬᠦᠰᠡᠯ ᠢ᠋ᠶ᠋ᠡᠷ ᠡᠬᠢᠯᠡᠨ ᠬᠢᠬᠦ ᠶ᠋ᠢ ᠥᠭᠡᠯᠦᠨ ᠦ᠌ ᠬᠠᠷᠠᠴᠠ ᠱᠠᠭᠠᠷᠳᠠᠵᠤ ᠪᠠᠢᠬᠤ ᠶ᠋ᠢ ᠯᠡ ᠮᠡᠳᠡᠵᠡᠢ᠃ ᠮᠡᠩᠯᠢᠭ ᠤᠬᠠᠭᠠᠨ ᠠᠯᠳᠠᠪᠠ᠃ ᠲᠡᠷᠡ ᠶᠠᠭ ᠯᠠ ᠵᠡᠷᠯᠢᠭ ᠠᠳᠤᠭᠤᠰᠤ ᠮᠡᠲᠦ ᠠᠭᠠᠰᠢᠯᠠᠵᠤ ᠥᠭᠡᠯᠦᠨ ᠦ᠌ ᠬᠠᠮᠤᠭ ᠬᠤᠪᠴᠠᠰᠤ ᠶ᠋ᠢ ᠤᠷᠠᠵᠤ ᠲᠠᠰᠤᠴᠢᠨ ᠲᠠᠢᠯᠵᠤ ᠬᠠᠶᠠᠪᠠ᠃ ᠣᠳᠣ ᠥᠭᠡᠯᠦᠨ ᠲᠡᠳᠡ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠨᠢᠴᠦᠭᠦᠨ ᠪᠡᠶᠡ ᠪᠡᠷ ᠬᠣᠴᠣᠷᠴᠠᠢ᠃ ᠮᠡᠩᠯᠢᠭ ᠥᠭᠡᠯᠦᠨ ᠢ᠋ ᠶᠠᠭ ᠯᠠ ᠠᠵᠢᠷᠭᠠ ᠰᠢᠭ᠋ ᠬᠦᠴᠦ ᠪᠡᠷ ᠨᠤᠬᠤᠴᠢᠨ ᠡᠵᠡᠮᠳᠡᠪᠡ᠃ ᠬᠡᠴᠢᠨᠡᠨ ᠣᠯᠠᠨ ᠵᠢᠯ ᠭᠠᠭᠴᠠᠬᠠᠨ ᠡᠨᠡ ᠯᠡ ᠮᠥᠴᠡ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠮᠡᠲᠦ ᠥᠭᠡᠯᠦᠨ ᠮᠡᠩᠯᠢᠭ ᠦ᠋ᠨ ᠭᠠᠷ᠂ ᠬᠥᠳᠡᠯᠭᠡᠭᠡᠨ᠂ ᠬᠦᠰᠡᠯ ᠢ᠋ ᠲᠠᠭᠠᠯᠠᠮᠵᠢᠲᠠᠢ ᠪᠠᠷ ᠳᠠᠭᠠᠵᠤ ᠪᠠᠢᠪᠠ᠃ ᠡᠨᠡ ᠪᠣᠯ ᠲᠩᠷᠢ ᠢᠴᠢᠮᠡᠷ ᠭᠠᠯᠵᠠᠭᠤ ᠳᠤᠷᠠ ᠲᠠᠴᠢᠶᠠᠯ ᠪᠠᠢᠪᠠ᠃ ᠲᠡᠳᠡ ᠭᠤᠷᠪᠠᠨ ᠡᠳᠦᠷ ᠰᠥᠨᠢ ᠪᠡᠶᠡ ᠰᠠᠯᠭᠠᠯ ᠦᠭᠡᠢ ᠴᠡᠩᠭᠡᠨ ᠵᠢᠷᠭᠠᠭᠠᠳ ᠰᠠᠶᠢ ᠯᠠ ᠨᠢᠭᠡ ᠬᠠᠨᠵᠤ ᠴᠠᠳᠤᠭᠠᠳ ᠪᠦᠲᠦᠨ ᠡᠳᠦᠷ ᠰᠥᠨᠢ ᠨᠠᠮ ᠤᠨᠲᠠᠵᠠᠢ᠃ ᠬᠠᠷᠢᠨ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠥᠭᠡᠯᠦᠨ ᠡᠪ ᠡᠷᠡᠭᠦᠯ ᠰᠡᠪ ᠰᠠᠷᠠᠭᠤᠯ ᠪᠣᠯᠤᠨ ᠡᠳᠡᠭᠡᠭᠡᠳ ᠰᠡᠷᠡᠵᠡᠢ᠃ ᠲᠡᠷᠡ ᠪᠡᠷ ᠪᠦᠴᠡ ᠲᠣᠪᠴᠢ ᠨᠢ ᠲᠠᠰᠤᠷᠠᠵᠤ ᠤᠷᠠᠭᠳᠠᠭᠰᠠᠨ ᠳᠡᠪᠡᠯ ᠬᠤᠪᠴᠠᠰᠤ ᠪᠠᠨ ᠡᠭᠡᠯᠳᠦᠷᠭᠡᠯᠡᠭᠡᠳ ᠭᠠᠷᠪᠠ᠃ ᠮᠡᠩᠯᠢᠭ ᠰᠦᠬᠡ ᠪᠡᠷ ᠴᠣᠬᠢᠭᠤᠯᠤᠭᠰᠠᠨ ᠮᠡᠲᠦ ᠨᠠᠮ ᠬᠡᠪᠲᠡᠭᠰᠡᠭᠡᠷ ᠬᠣᠴᠣᠷᠴᠠᠢ᠃ ᠥᠭᠡᠯᠦᠨ ᠦ᠌ ᠭᠠᠯᠵᠠᠭᠤᠷᠠᠭᠰᠠᠨ ᠲᠠᠴᠢᠶᠠᠯ ᠢ᠋ ᠬᠠᠩᠭᠠᠬᠤ ᠭᠡᠵᠦ ᠮᠡᠩᠯᠢᠭ ᠬᠠᠮᠤᠭ ᠲᠠᠮᠢᠷ ᠲᠡᠩᠬᠡᠭᠡ ᠪᠡᠨ ᠰᠢᠪᠬᠠᠵᠠᠢ᠃ ᠮᠡᠩᠯᠢᠭ ᠡᠴᠡ ᠥᠭᠡᠷᠡ ᠴᠢᠯᠬᠠ ᠮᠠᠭᠤᠲᠠᠢ ᠡᠷᠡ ᠪᠠᠢᠭᠰᠠᠨ ᠪᠣᠯ ᠯᠠᠪ ᠲᠡᠰᠬᠦ ᠦᠭᠡᠢ ᠢᠴᠢᠭᠦᠷᠢᠲᠡᠢ ᠪᠡᠷ ᠬᠥᠭᠡᠭᠡᠭᠳᠡᠨ ᠵᠢᠭᠤᠲᠠᠭᠠᠬᠤ ᠪᠠᠢᠭᠰᠠᠨ ᠪᠢᠵᠡ᠃ ᠥᠭᠡᠯᠦᠨ ᠢ᠋ ᠭᠠᠷᠬᠤ ᠳ᠋ᠤ᠌ ᠭᠠᠳᠠᠭᠠ ᠳᠥᠩᠭᠡᠵᠢ ᠦᠦᠷ ᠬᠠᠶᠠᠭᠠᠷᠠᠭᠠᠳ ᠬᠠᠷᠢᠨ ᠤᠶᠠᠭᠠᠨ ᠳᠡᠭᠡᠷᠡ ᠡᠮᠡᠭᠡᠯ ᠲᠡᠢ ᠮᠣᠷᠢ ᠨᠢ ᠦᠵᠡᠭᠳᠡᠵᠡᠢ᠃ ᠥᠭᠡᠯᠦᠨ ᠶᠠᠭᠤ ᠴᠦ᠍ ᠪᠣᠳᠣᠭᠰᠠᠨ ᠦᠭᠡᠢ ᠮᠣᠷᠳᠠᠨ ᠶᠠᠪᠤᠪᠠ᠃ ᠲᠡᠭᠦᠨ ᠦ᠌ ᠲᠠᠷᠢᠬᠢ ᠲᠣᠯᠣᠭᠠᠢ ᠪᠡᠶᠡ ᠬᠠ ᠨᠢ ᠬᠣᠭᠣᠰᠣᠷᠠᠵᠤ ᠡᠵᠡᠭᠦᠢᠷᠡᠵᠡᠢ᠃ ᠪᠠᠭᠠ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠮᠡᠩᠯᠢᠭ ᠦ᠋ᠨ ᠬᠣᠶᠠᠷ ᠡᠬᠡᠨᠡᠷ ᠲᠡᠭᠦᠨ ᠢ᠋ ᠭᠤᠨᠢᠭ ᠳᠦᠭᠦᠷᠡᠩ ᠨᠢᠳᠦ ᠪᠡᠷ ᠰᠢᠷᠳᠡᠨ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠠᠩᠵᠠᠭᠠᠷᠠᠵᠤ ᠬᠠᠷᠠᠭᠰᠠᠨ ᠦᠭᠡᠢ᠃ ᠮᠡᠩᠯᠢᠭ ᠲᠡᠢ ᠳᠠᠬᠢᠨ ᠠᠭᠤᠯᠵᠠᠬᠤ ᠦᠭᠡᠢ ᠭᠡᠵᠦ ᠥᠭᠡᠯᠦᠨ ᠬᠠᠲᠠᠭᠤ ᠰᠢᠢᠳᠴᠡᠢ᠃ ᠲᠡᠷᠡ ᠳᠡᠩᠳᠡᠭᠦᠦ ᠶᠡᠬᠡ ᠵᠣᠷᠢᠭ ᠭᠠᠷᠭᠠᠵᠤ ᠶᠠᠭ ᠯᠠ ᠭᠠᠯᠵᠠᠭᠤ ᠬᠥᠮᠦᠨ ᠮᠡᠲᠦ ᠠᠭᠠᠰᠢᠯᠠᠵᠠᠢ᠃ ᠭᠡᠪᠡᠴᠦ ᠥᠭᠡᠯᠦᠨ ᠬᠢᠭᠰᠡᠨ ᠬᠡᠷᠡᠭ ᠲᠡᠭᠡᠨ ᠶᠡᠷᠦ ᠬᠠᠷᠠᠮᠰᠠᠵᠤ ᠰᠢᠨᠠᠯᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠥᠪᠡᠷ ᠢ᠋ ᠨᠢ ᠰᠢᠨᠠᠯᠭᠠᠭᠰᠠᠨ ᠡᠪᠡᠳᠴᠢᠨ ᠨᠢ ᠣᠷᠣ ᠦᠭᠡᠢ ᠠᠷᠢᠯᠤᠭᠠᠳ ᠤᠷᠢᠳ ᠤ᠋ᠨ ᠤᠬᠠᠭᠠᠯᠢᠭ ᠢᠲᠡᠭᠡᠯᠲᠡᠢ ᠲᠥᠷᠬᠦ ᠨᠢ ᠡᠷᠭᠢᠨ ᠢᠷᠡᠵᠡᠢ᠃ ᠥᠭᠡᠯᠦᠨ ᠲᠠᠯᠪᠢᠭᠰᠠᠨ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠪᠠᠲᠤ ᠰᠠᠬᠢᠨ ᠮᠡᠩᠯᠢᠭ ᠢ᠋ ᠡᠪᠦᠷ ᠲᠡᠭᠡᠨ ᠳᠠᠬᠢᠨ ᠣᠢᠷᠠᠲᠤᠭᠤᠯᠤᠭᠰᠠᠨ ᠦᠭᠡᠢ᠃ ᠥᠭᠡᠯᠦᠨ ᠦ᠌ ᠡᠨᠡ ᠦᠯᠦ ᠣᠢᠯᠠᠭᠠᠭᠳᠠᠬᠤ ᠬᠠᠴᠢᠨ ᠵᠠᠩ ᠳ᠋ᠤ᠌ ᠮᠡᠩᠯᠢᠭ ᠶᠡᠬᠡᠳᠡ ᠴᠣᠴᠢᠷᠳᠠᠵᠤ ᠲᠡᠭᠦᠨ ᠢ᠋ ᠮᠠᠰᠢ ᠶᠡᠬᠡ ᠪᠡᠷ ᠬᠦᠰᠡᠮᠵᠢᠯᠡᠨ ᠰᠢᠨᠠᠯᠬᠤ ᠪᠣᠯᠤᠭᠰᠠᠨ ᠢ᠋ ᠥᠭᠡᠯᠦᠨ ᠭᠠᠳᠠᠷᠯᠠᠪᠠᠴᠤ ᠴᠢᠷᠠᠢ ᠥᠭᠭᠦᠭᠡ ᠦᠭᠡᠢ ᠪᠢᠯᠡ᠃ ᠥᠭᠡᠯᠦᠨ ᠦ᠌ ᠮᠡᠩᠯᠢᠭ ᠦ᠋ᠨ ᠭᠡᠷ ᠲᠦ᠍ ᠣᠴᠢᠵᠤ ᠭᠤᠷᠪᠠ ᠬᠣᠨᠣᠭᠰᠠᠨ ᠢ᠋ ᠪᠥᠷᠲᠡ ᠮᠡᠳᠡᠭᠰᠡᠨ ᠴᠦ᠍ ᠲᠡᠮᠦᠵᠢᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠦᠭᠡᠢ ᠥᠩᠭᠡᠷᠡᠪᠡ᠃ ᠡᠭᠦᠨ ᠳ᠋ᠦ᠍ᠨᠢ ᠥᠭᠡᠯᠦᠨ ᠪᠡᠷᠢ ᠳ᠋ᠡᠭᠡᠨ ᠶᠡᠬᠡᠳᠡ ᠲᠠᠯᠠᠷᠬᠠᠵᠠᠢ᠃ ᠢᠩᠭᠢᠵᠦ ᠥᠭᠡᠯᠦᠨ ᠦ᠌ ᠡᠪᠡᠳᠴᠢᠨ ᠢᠯᠠᠷᠢᠰᠢᠵᠤ ᠮᠡᠩᠯᠢᠭ ᠲᠡᠷᠡ ᠬᠣᠶᠠᠷ ᠤ᠋ᠨ ᠬᠠᠴᠢᠨ ᠬᠠᠷᠢᠴᠠᠭᠠ ᠡᠭᠡᠨᠡᠭᠲᠡ ᠲᠠᠰᠤᠷᠠᠵᠠᠢ᠃
ᠪᠣᠷᠵᠢᠭᠢᠨ ᠠᠢᠮᠠᠭ ᠨᠢᠭᠡᠳᠦᠨ ᠤᠯᠠᠮ ᠢ᠋ᠶ᠋ᠠᠷ ᠬᠦᠴᠦᠷᠬᠡᠭᠵᠢᠭᠡᠳ ᠲᠡᠮᠦᠵᠢᠨ ᠦ᠌ ᠠᠯᠳᠠᠷ ᠨᠡᠷᠡ ᠲᠦᠭᠡᠵᠦ ᠠᠮᠢᠳᠤᠷᠠᠯ ᠠᠬᠤᠢ ᠨᠢ ᠳᠡᠭᠡᠭᠰᠢᠯᠡᠨ ᠵᠢᠷᠭᠠᠯ ᠳᠦᠭᠦᠷᠡᠩ ᠮᠡᠲᠦ ᠪᠣᠯᠤᠭᠰᠠᠨ ᠴᠦ᠍ ᠥᠭᠡᠯᠦᠨ ᠦ᠌ ᠰᠡᠳᠬᠢᠯ ᠠᠮᠤᠷ ᠲᠠᠢᠪᠤᠩ ᠪᠠᠢᠬᠤ ᠡᠳᠦᠷ ᠬᠣᠪᠣᠷ ᠪᠣᠯᠵᠠᠢ᠃ ᠲᠡᠭᠦᠨ ᠦ᠌ ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠠᠮᠢᠳᠤᠷᠠᠯ᠂ ᠬᠥᠮᠦᠰ ᠲᠠᠨᠢᠵᠤ ᠮᠡᠳᠡᠬᠦ ᠶ᠋ᠢᠨ ᠡᠷᠬᠡ ᠦᠭᠡᠢ ᠲᠦᠷᠭᠡᠨ ᠢ᠋ᠶ᠋ᠡᠷ ᠬᠤᠪᠢᠷᠠᠨ ᠥᠭᠡᠷᠡᠴᠢᠯᠡᠭᠳᠡᠵᠡᠢ᠃ ᠡᠷᠬᠡ ᠮᠠᠲᠠᠯ ᠰᠦᠷ ᠬᠦᠴᠦ ᠨᠢ ᠨᠡᠮᠡᠭᠳᠡᠬᠦ ᠲᠣᠰᠤᠮ ᠲᠡᠮᠦᠵᠢᠨ ᠦ᠌ ᠵᠠᠩ ᠠᠪᠤᠷᠢ ᠳᠠᠭᠠᠬᠤ ᠶ᠋ᠢᠨ ᠡᠷᠬᠡ ᠦᠭᠡᠢ ᠥᠭᠡᠷᠡ ᠪᠣᠯᠵᠤ ᠪᠠᠢᠯᠠ᠃ ᠳᠠᠭᠤ ᠦᠭᠡᠢ ᠵᠥᠷᠢᠭᠦᠳ ᠬᠥᠪᠡᠭᠦᠨ ᠨᠢ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠡᠵᠡᠨ ᠪᠣᠯᠤᠨ ᠬᠤᠪᠢᠷᠠᠵᠤ ᠪᠠᠢᠪᠠ᠃ ᠲᠡᠮᠦᠵᠢᠨ ᠦ᠌ ᠬᠢᠵᠦ ᠪᠣᠢ ᠵᠦᠢᠯ ᠲᠡᠷᠡ ᠪᠦᠷᠢ ᠥᠭᠡᠯᠦᠨ ᠳ᠋ᠦ᠍ ᠲᠠᠭᠠᠰᠢᠶᠠᠭᠳᠠᠬᠤ ᠦᠭᠡᠢ ᠴᠦ᠍ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠰᠠᠨᠠᠯ ᠢ᠋ ᠰᠣᠨᠣᠰᠬᠤ ᠨᠢ ᠬᠣᠪᠣᠷ ᠪᠣᠯᠵᠠᠢ᠃ ᠥᠭᠡᠯᠦᠨ ᠦ᠌ ᠬᠠᠭᠤᠴᠢᠨ ᠡᠷᠬᠡ ᠮᠠᠲᠠᠯ ᠠ᠋ᠴᠠ ᠥᠴᠦᠬᠡᠨ ᠴᠦ᠍ ᠦᠯᠡᠳᠡᠭᠰᠡᠨ ᠦᠭᠡᠢ ᠪᠦᠭᠦᠳᠡ ᠶ᠋ᠢ ᠲᠡᠮᠦᠵᠢᠨ ᠪᠥᠷᠲᠡ ᠬᠣᠶᠠᠷ ᠠᠯᠭᠤᠷ ᠪᠤᠯᠢᠶᠠᠨ ᠠᠪᠴᠠᠢ᠃ ᠥᠭᠡᠯᠦᠨ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠮᠥᠷᠲᠡᠭᠡᠨ ᠭᠠᠭᠴᠠᠭᠠᠷᠳᠠᠵᠤ ᠡᠵᠡᠳ ᠨᠢ ᠬᠠᠶᠠᠵᠤ ᠨᠡᠭᠦᠭᠰᠡᠨ ᠬᠦᠷᠢᠶᠡ᠂ ᠬᠣᠭᠣᠰᠣᠨ ᠬᠠᠩᠬᠠᠢ ᠭᠡᠷ ᠮᠡᠲᠦ ᠪᠣᠯᠤᠭᠠᠳ ᠭᠠᠩᠰᠠᠷᠠᠬᠤ ᠪᠣᠯᠵᠠᠢ᠃ ᠮᠡᠩᠯᠢᠭ ᠦ᠋ᠨ ᠬᠥᠪᠡᠭᠦᠨ ᠬᠥᠭᠡᠴᠦ ᠶ᠋ᠢ ᠲᠡᠮᠦᠵᠢᠨ ᠶᠡᠬᠡᠳᠡ ᠲᠣᠭᠣᠨ ᠣᠢᠷᠠ ᠨᠥᠬᠥᠷᠯᠡᠬᠦ ᠪᠣᠯᠤᠭᠰᠠᠨ ᠨᠢ ᠬᠠᠰᠠᠷ ᠤ᠋ᠨ ᠠᠭᠤᠷ ᠡᠭᠳᠡᠭᠦᠴᠡᠯ ᠢ᠋ ᠶᠠᠭᠤ ᠶᠠᠭᠤᠨ ᠠ᠋ᠴᠠ ᠢᠯᠡᠭᠦᠦ ᠬᠦᠷᠭᠡᠵᠦ ᠲᠡᠭᠦᠨ ᠦ᠌ ᠲᠡᠪᠴᠢᠶᠡᠷᠢ ᠪᠠᠷᠠᠭᠳᠠᠵᠤ ᠪᠠᠢᠭᠠ ᠶ᠋ᠢ ᠥᠭᠡᠯᠦᠨ ᠮᠡᠳᠡᠷᠡᠵᠦ ᠲᠦᠭᠰᠢᠭᠦᠷᠢ ᠮᠠᠭᠤ ᠰᠤᠪᠢᠩ ᠲᠠᠲᠠᠬᠤ ᠪᠣᠯᠪᠠ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠵᠠᠯᠢ ᠲᠠᠢ ᠲᠤᠯᠠ ᠬᠠᠰᠠᠷ ᠤ᠋ᠨ ᠰᠡᠳᠬᠢᠯ ᠢ᠋ ᠡᠯᠳᠡᠪ ᠵᠥᠭᠡᠯᠡᠨ ᠠᠷᠭᠠ ᠪᠠᠷ ᠰᠠᠲᠠᠭᠠᠷᠠᠭᠤᠯᠤᠨ ᠬᠠᠭᠤᠷᠴᠤ ᠰᠤᠷᠤᠭᠰᠠᠨ ᠪᠠᠢᠪᠠ᠃ ᠬᠠᠰᠠᠷ ᠤᠯᠠᠮ ᠪᠦᠷ ᠠᠬᠠ ᠠ᠋ᠴᠠ ᠪᠠᠨ ᠬᠥᠨᠳᠡᠢᠷᠡᠵᠦ ᠲᠤᠰ ᠲᠠᠭᠠᠨ ᠰᠠᠭᠤᠭᠰᠠᠭᠠᠷ ᠨᠢᠭᠡ ᠯᠡ ᠡᠳᠦᠷ ᠲᠡᠭᠦᠨ ᠡᠴᠡ ᠡᠭᠡᠨᠡᠭᠲᠡ ᠰᠠᠯᠵᠤ ᠣᠳᠬᠤ ᠮᠡᠲᠦ ᠥᠭᠡᠯᠦᠨ ᠳ᠋ᠦ᠍ ᠰᠠᠨᠠᠭᠳᠠᠬᠤ ᠪᠣᠯᠵᠠᠢ᠃ ᠪᠠᠰᠠ ᠲᠡᠮᠦᠵᠢᠨ ᠲᠥᠷᠥᠭᠰᠡᠨ ᠳᠡᠭᠦᠦ ᠨᠠᠷ ᠲᠠᠭᠠᠨ ᠶᠡᠬᠡ ᠡᠷᠬᠡ ᠥᠭᠬᠦ ᠦᠭᠡᠢ᠂ ᠳᠣᠪᠣᠢᠯᠭᠠᠨ ᠡᠷᠭᠦᠮᠵᠢᠯᠡᠬᠦ ᠦᠭᠡᠢ ᠵᠢᠷ ᠦ᠋ᠨ ᠰᠢᠳᠠᠷ ᠠᠯᠪᠠᠲᠤ ᠶ᠋ᠢᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠦᠵᠡᠳᠡᠭ ᠪᠣᠯᠤᠭᠰᠠᠨ ᠨᠢ ᠲᠦᠭᠰᠢᠭᠦᠷᠢ ᠲᠥᠷᠥᠭᠦᠯᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠯᠠ᠃ ᠶᠠᠭ ᠡᠢᠮᠦ ᠦᠶᠡ ᠳ᠋ᠦ᠍ ᠨᠢᠭᠡᠨ ᠬᠡᠷᠡᠭ ᠮᠠᠨᠳᠤᠵᠠᠢ᠃ ᠲᠡᠮᠦᠯᠦᠨ ᠥᠬᠢᠨ ᠨᠢ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤ ᠬᠦᠷᠴᠦ ᠡᠷᠡ ᠳ᠋ᠦ᠍ ᠣᠴᠢᠬᠤ ᠪᠣᠯᠤᠭᠠᠳ ᠪᠠᠢᠲᠠᠯᠠ ᠪᠤᠢᠷ ᠨᠠᠭᠤᠷ ᠤ᠋ᠨ ᠬᠠᠪᠢ ᠪᠠᠷ ᠨᠤᠲᠤᠭᠯᠠᠭᠴᠢ ᠢᠬᠢᠷᠡᠰ ᠠᠢᠮᠠᠭ ᠤ᠋ᠨ ᠪᠣᠳᠣ ᠭᠡᠭᠴᠢ ᠡᠷᠡ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠢᠷᠡᠵᠦ ᠣᠯᠠᠨ ᠠᠭᠲᠠ ᠪᠠᠷ ᠢᠨᠵᠢ ᠪᠣᠯᠭᠠᠨ ᠲᠡᠮᠦᠯᠦᠨ ᠥᠬᠢᠨ ᠢ᠋ ᠨᠢ ᠪᠡᠷᠢ ᠪᠠᠭᠤᠯᠭᠠᠬᠤ ᠪᠠᠷ ᠭᠤᠶᠤᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠪᠣᠳᠣ ᠭᠡᠭᠴᠢ ᠥᠭᠡᠯᠦᠨ ᠡᠴᠡ ᠪᠢᠰᠢ ᠲᠡᠮᠦᠵᠢᠨ ᠡᠴᠡ ᠳᠡᠭᠦᠦ ᠥᠬᠢᠨ ᠢ᠋ ᠨᠢ ᠭᠤᠶᠤᠭᠰᠠᠨ ᠨᠢ ᠬᠡᠷᠡᠭᠦᠯ ᠤᠷᠤᠭᠤᠯ ᠤ᠋ᠨ ᠡᠬᠢ ᠪᠣᠯᠪᠠ᠃ ᠪᠣᠳᠣ ᠪᠣᠯ ᠢᠬᠢᠷᠡᠰ ᠠᠢᠮᠠᠭ ᠤ᠋ᠨ ᠨᠥᠯᠥᠭᠡ ᠪᠦᠬᠦᠢ ᠲᠣᠯᠣᠭᠠᠢᠯᠠᠭᠴᠢᠳ ᠤ᠋ᠨ ᠨᠢᠭᠡ ᠲᠤᠯᠠ ᠲᠡᠮᠦᠵᠢᠨ ᠲᠡᠳᠡᠨ ᠢ᠋ ᠨᠠᠢᠷᠲᠠᠢ ᠤᠭᠲᠤᠨ ᠳᠠᠢᠯᠠᠵᠤ᠂ ᠬᠦᠰᠡᠯ ᠢ᠋ ᠨᠢ ᠰᠣᠨᠣᠰᠴᠠᠢ᠃ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠢᠬᠢᠷᠡᠰ ᠠᠢᠮᠠᠭ ᠲᠠᠢ ᠬᠣᠲᠠ ᠤᠷᠤᠭ ᠪᠣᠯᠬᠤ ᠨᠢ ᠵᠡᠭᠦᠨ ᠲᠠᠯᠠ ᠳ᠋ᠠᠭᠠᠨ ᠳᠠᠢᠰᠤᠩᠨᠠᠬᠤ ᠠᠶᠤᠯ ᠦᠭᠡᠢ ᠠᠮᠤᠷ ᠪᠠᠢᠬᠤ ᠶ᠋ᠢᠨ ᠨᠢᠭᠡ ᠦᠨᠳᠦᠰᠦ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠭᠠᠳ ᠲᠡᠮᠦᠵᠢᠨ ᠳᠣᠲᠣᠷᠠ ᠪᠠᠨ ᠶᠡᠬᠡᠳᠡ ᠳᠤᠷᠠᠲᠠᠢ ᠪᠠᠢᠵᠠᠢ᠃ ᠢᠬᠢᠷᠡᠰ ᠠᠢᠮᠠᠭ ᠰᠠᠨᠠᠭᠠ ᠨᠢᠭᠡᠳᠦᠨ ᠬᠣᠯᠪᠣᠭᠠᠲᠠᠨ ᠪᠣᠯᠬᠤ ᠠᠪᠠᠰᠤ ᠳᠡᠭᠦᠦ ᠥᠬᠢᠨ ᠢ᠋ᠶ᠋ᠡᠨ ᠥᠭᠬᠦ ᠶ᠋ᠢ ᠲᠡᠮᠦᠵᠢᠨ ᠬᠦᠰᠡᠵᠡᠢ᠃ ᠢᠬᠢᠷᠡᠰ ᠠᠢᠮᠠᠭ ᠤ᠋ᠨ ᠬᠢᠨ ᠨᠡᠷᠡ ᠨᠢ ᠲᠦᠭᠡᠵᠦ ᠪᠣᠢ ᠵᠠᠯᠠᠭᠤ ᠲᠡᠮᠦᠵᠢᠨ ᠲᠡᠢ ᠨᠠᠢᠷᠲᠠᠢ ᠪᠠᠢᠬᠤ ᠶ᠋ᠢ ᠬᠦᠰᠡᠬᠦ ᠲᠤᠯᠠ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠵᠡᠢ᠃ ᠭᠡᠲᠡᠯᠡ ᠲᠡᠮᠦᠯᠦᠨ ᠪᠣᠳᠣ ᠳ᠋ᠤ᠌ ᠣᠴᠢᠬᠤ ᠠ᠋ᠴᠠ ᠡᠷᠡᠰ ᠲᠠᠲᠠᠭᠠᠯᠵᠠᠪᠠ᠃ ᠥᠭᠡᠯᠦᠨ ᠬᠠᠢᠷᠠᠲᠠᠢ ᠭᠠᠭᠴᠠ ᠥᠬᠢᠨ ᠢ᠋ᠶ᠋ᠡᠨ ᠠᠵᠠ ᠵᠢᠷᠭᠠᠯᠲᠠᠢ ᠥᠪᠡᠷ ᠦ᠋ᠨ ᠬᠦᠰᠡᠭᠰᠡᠨ ᠢ᠋ᠶ᠋ᠡᠷ ᠠᠮᠢᠳᠤᠷᠠᠬᠤ ᠶ᠋ᠢ ᠬᠦᠰᠡᠬᠦ ᠲᠤᠯᠠ ᠬᠥᠭᠡᠷᠦᠬᠦᠢ ᠲᠡᠭᠦᠨ ᠢ᠋ᠶ᠋ᠡᠨ ᠤᠬᠢᠯᠠᠵᠤ ᠤᠨᠵᠢᠬᠤ ᠶ᠋ᠢ ᠬᠠᠷᠠᠬᠤ ᠦᠨᠡᠬᠡᠷ ᠬᠡᠴᠡᠭᠦᠦ ᠪᠠᠢᠯᠠ᠃
— ᠡᠵᠢ ᠮᠢᠨᠢ᠃ ᠲᠠ ᠨᠠᠮᠠᠶ᠋ᠢ ᠲᠠᠨᠢᠬᠤ ᠦᠭᠡᠢ ᠬᠣᠯᠠ ᠶ᠋ᠢᠨ ᠠᠢᠮᠠᠭ ᠲᠤ ᠪᠤᠤ ᠥᠭᠭᠦᠭᠡᠴᠢ᠃ ᠪᠢ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠲᠡᠢ᠃ ᠲᠡᠭᠦᠨ ᠢ᠋ ᠮᠢᠨᠢ ᠲᠡᠳᠦ ᠭᠡᠳᠡᠭ᠃ ᠬᠠᠰᠠᠷ ᠠᠬᠠ ᠶ᠋ᠢᠨ ᠪᠣᠷᠣᠭᠴᠢᠨ ᠬᠠᠲᠤᠨ ᠤ᠋ ᠲᠥᠷᠥᠭᠰᠡᠨ ᠳᠡᠭᠦᠦ ᠶᠦᠮ᠃ ᠲᠡᠮᠦᠵᠢᠨ ᠠᠬᠠ ᠶ᠋ᠢᠨ ᠠᠮᠢ ᠬᠠᠮᠠᠭᠠᠯᠠᠭᠴᠢ ᠰᠢᠳᠠᠷ ᠴᠡᠷᠢᠭ᠃ ᠲᠠ ᠲᠡᠮᠦᠵᠢᠨ ᠠᠬᠠ ᠠ᠋ᠴᠠ ᠭᠤᠶᠤᠭᠠᠴᠢ ᠭᠡᠵᠦ ᠲᠡᠮᠦᠯᠦᠨ ᠰᠥᠨᠢᠵᠢᠨ ᠤᠬᠢᠯᠠᠵᠠᠢ᠃ ᠤᠬᠢᠯᠠᠵᠤ ᠤᠬᠢᠯᠠᠵᠤ ᠴᠥᠬᠥᠷᠡᠭᠡᠳ ᠤᠨᠲᠠᠭᠰᠠᠨ ᠬᠥᠭᠡᠷᠦᠬᠦᠢ ᠥᠬᠢᠨ ᠢ᠋ᠶ᠋ᠡᠨ ᠣᠷᠬᠢᠭᠠᠳ ᠥᠭᠡᠯᠦᠨ ᠭᠠᠷᠪᠠᠯ ᠬᠠᠷᠠᠩᠭᠤᠢ ᠳ᠋ᠤ᠌ ᠲᠡᠮᠦᠵᠢᠨ ᠦ᠌ ᠶᠠᠮᠪᠠᠨ ᠦᠷᠭᠦᠭᠡᠨ ᠦ᠌ ᠲᠣᠭᠣᠨᠣ ᠪᠠᠷ ᠭᠡᠷᠡᠯ ᠭᠠᠷᠴᠤ ᠪᠠᠢᠭᠰᠠᠨ ᠳ᠋ᠤ᠌ ᠲᠡᠷᠡ ᠠᠭᠤᠯᠵᠠᠬᠤ ᠪᠠᠷ ᠣᠴᠢᠵᠠᠢ᠃ ᠭᠡᠲᠡᠯᠡ ᠬᠡᠪᠲᠡᠭᠦᠯ ᠴᠡᠷᠢᠭ ᠦ᠋ᠳ ᠣᠢᠷᠠᠲᠤᠭᠤᠯᠤᠭᠰᠠᠨ ᠦᠭᠡᠢ᠃ ᠭᠡᠷ ᠲᠦ᠍ ᠲᠡᠮᠦᠵᠢᠨ ᠳᠠᠪ ᠲᠩᠷᠢ ᠶ᠋ᠢᠨ ᠬᠠᠮᠲᠤ ᠪᠠᠢᠭᠠ ᠭᠡᠵᠡᠢ᠃ ᠥᠭᠡᠯᠦᠨ ᠬᠦᠯᠢᠶᠡᠬᠦ ᠪᠡᠷ ᠰᠢᠢᠳᠴᠦ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠭᠠ ᠨᠠᠮᠤᠷ ᠤ᠋ᠨ ᠰᠥᠨᠢ ᠶ᠋ᠢᠨ ᠰᠡᠷᠢᠭᠦᠨ ᠳ᠋ᠦ᠍ ᠳᠠᠭᠵᠢᠨ ᠰᠠᠭᠤᠭᠰᠠᠭᠠᠷ ᠪᠠᠢᠪᠠ᠃ ᠭᠡᠷ ᠲᠦ᠍ ᠣᠷᠣᠵᠤ ᠲᠡᠮᠦᠯᠦᠨ ᠥᠬᠢᠨ ᠦ᠌ ᠪᠡᠨ ᠰᠢᠨᠠᠯᠤᠩᠲᠤ ᠴᠢᠷᠠᠢ ᠶ᠋ᠢ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠢᠩᠭᠢᠵᠦ ᠰᠥᠨᠢ ᠳᠦᠯᠢ ᠪᠣᠯᠲᠠᠯᠠ ᠳᠠᠪ ᠲᠩᠷᠢ ᠶ᠋ᠢᠨ ᠬᠠᠮᠲᠤ ᠶᠠᠭᠤ ᠶᠠᠷᠢᠳᠠᠭ ᠪᠣᠯ ᠭᠡᠵᠦ ᠭᠠᠢᠬᠠᠨ ᠪᠣᠳᠣᠵᠠᠢ᠃ ᠯᠠᠪᠲᠠᠢ ᠴᠢᠬᠤᠯᠠ ᠬᠡᠷᠡᠭ ᠬᠡᠯᠡᠯᠴᠡᠵᠦ ᠪᠠᠢᠭᠠ ᠪᠢᠵᠡ ᠭᠡᠵᠦ ᠳᠠᠭᠠᠵᠠᠢ᠃
ᠲᠡᠳᠡ ᠦᠨᠡᠬᠡᠷ ᠴᠢᠬᠤᠯᠠ ᠬᠡᠷᠡᠭ ᠬᠡᠯᠡᠯᠴᠡᠵᠦ ᠪᠠᠢᠵᠠᠢ᠃ ᠬᠢᠬᠦ ᠦᠢᠯᠡ᠂ ᠬᠡᠯᠡᠬᠦ ᠦᠭᠡ ᠪᠡᠨ ᠳᠠᠪ ᠲᠩᠷᠢ ᠲᠡᠢ ᠵᠥᠪᠯᠡᠵᠦ᠂ ᠲᠡᠭᠦᠨ ᠢ᠋ᠶ᠋ᠡᠷ ᠮᠡᠷᠭᠡ ᠲᠥᠯᠭᠡ ᠲᠠᠯᠪᠢᠭᠤᠯᠬᠤ ᠨᠢ ᠲᠡᠮᠦᠵᠢᠨ ᠦ᠌ ᠵᠠᠩ ᠪᠣᠯᠤᠭᠠᠳ ᠪᠠᠢᠵᠠᠢ᠃ ᠡᠨᠡ ᠤᠳᠠᠭᠠ ᠳ᠋ᠤ᠌ ᠵᠦᠷᠭᠢᠨ ᠣᠪᠣᠭ ᠤ᠋ᠨ ᠬᠢᠨ ᠢ᠋ ᠬᠡᠷᠬᠢᠬᠦ ᠶ᠋ᠢ ᠲᠡᠳᠡ ᠶᠠᠷᠢᠯᠴᠠᠵᠤ ᠰᠠᠭᠤᠵᠠᠢ᠃ ᠵᠦᠷᠭᠢᠨ ᠨᠦ᠍ᠭᠦᠳ ᠲᠠᠲ᠋ᠠᠷ ᠲᠠᠢ ᠪᠠᠢᠯᠳᠤᠬᠤ ᠳ᠋ᠤ᠌ ᠴᠡᠷᠢᠭ ᠢ᠋ᠶ᠋ᠡᠨ ᠭᠠᠷᠭᠠᠭᠠ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ ᠡᠵᠡᠭᠦᠢ ᠬᠣᠢᠭᠤᠷ ᠬᠦᠷᠢᠶᠡ ᠤᠷᠤᠭᠤ ᠨᠢ ᠳᠣᠪᠲᠣᠯᠵᠤ ᠬᠥᠮᠦᠨ ᠠᠯᠠᠵᠤ ᠳᠡᠭᠡᠷᠡᠮ ᠬᠢᠭᠰᠡᠨ ᠪᠠᠢᠪᠠ᠃ ᠣᠳᠣ ᠵᠦᠷᠭᠢᠨ ᠢ᠋ ᠵᠠᠯᠬᠠᠭᠠᠬᠤ ᠨᠢ ᠬᠣᠢᠰᠢᠯᠠᠭᠤᠯᠤᠰᠢ ᠦᠭᠡᠢ ᠪᠣᠯᠵᠠᠢ᠃ ᠲᠡᠳᠡ ᠶᠠᠭ ᠬᠣᠭᠣᠯᠠᠢ ᠳ᠋ᠤ᠌ ᠶᠠᠰᠤ ᠮᠡᠲᠦ ᠲᠡᠭᠡᠭᠯᠡᠵᠡᠢ᠃ ᠭᠡᠪᠡᠴᠦ ᠵᠦᠷᠭᠢᠨ ᠨᠦ᠍ᠭᠦᠳ ᠤᠭᠰᠠᠭᠠ ᠭᠠᠷᠪᠠᠯᠢ ᠨᠢᠭᠡᠲᠡᠢ ᠡᠴᠡ ᠭᠠᠳᠠᠨᠠ ᠵᠣᠷᠢᠭ ᠵᠢᠷᠦᠬᠡ ᠣᠮᠣᠭ ᠣᠪᠣᠷ ᠶᠡᠬᠡᠲᠡᠢ ᠨᠢ ᠡᠷᠬᠡ ᠦᠭᠡᠢ ᠪᠣᠯᠭᠣᠮᠵᠢᠯᠠᠬᠤ ᠳ᠋ᠤ᠌ ᠬᠦᠷᠭᠡᠵᠡᠢ᠃ ᠲᠡᠮᠦᠵᠢᠨ ᠲᠡᠳᠡᠨ ᠢ᠋ ᠨᠣᠮᠣᠬᠠᠳᠬᠠᠬᠤ ᠬᠢᠯᠪᠠᠷ ᠮᠡᠷᠭᠡᠨ ᠠᠷᠭᠠ ᠬᠠᠢᠵᠤ ᠪᠠᠢᠪᠠ᠃ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠢᠩᠭᠢᠵᠦ ᠳᠠᠪ ᠲᠩᠷᠢ ᠶ᠋ᠢ ᠵᠠᠯᠠᠵᠤ ᠨᠣᠢᠷ ᠢ᠋ᠶ᠋ᠠᠨ ᠬᠤᠭᠤᠰᠯᠠᠨ ᠰᠠᠭᠤᠵᠠᠢ᠃ ᠳᠠᠪ ᠲᠩᠷᠢ ᠲᠡᠢ ᠶᠠᠷᠢᠬᠤ ᠪᠦᠷᠢ ᠤᠬᠠᠭᠠᠨ ᠰᠠᠨᠠᠭᠠ ᠨᠢ ᠴᠡᠯᠮᠡᠭ ᠭᠡᠢᠬᠦ ᠰᠢᠭ ᠪᠣᠯᠳᠠᠭ ᠪᠢᠯᠡ᠃ ᠳᠠᠪ ᠲᠩᠷᠢ ᠨᠢᠭᠡ ᠨᠢᠳᠦ ᠪᠡᠷ ᠲᠡᠮᠦᠵᠢᠨ ᠢ᠋ ᠨᠥᠭᠦᠭᠡ ᠨᠢᠳᠦ ᠪᠡᠷ ᠲᠣᠭᠣᠨᠣ ᠥᠭᠡᠳᠡ ᠰᠢᠷᠲᠡᠨ ᠰᠠᠭᠤᠭᠠᠳ ᠢᠩᠭᠢᠵᠦ ᠬᠡᠯᠡᠪᠡ᠃
— ᠲᠡᠮᠦᠵᠢᠨ᠃ ᠠᠯᠢᠪᠠ ᠤᠯᠤᠰ ᠠᠢᠮᠠᠭ ᠢ᠋ ᠡᠵᠡᠯᠡᠬᠦ᠂ ᠤᠬᠠᠭᠠᠨ ᠵᠣᠷᠢᠭ ᠶᠡᠬᠡᠲᠡᠢ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠬᠤ ᠳ᠋ᠤ᠌ ᠡᠷᠬᠡᠪᠰᠢ ᠨᠢᠭᠡ ᠨᠠᠷᠢᠨ ᠤᠴᠢᠷ ᠢ᠋ ᠤᠬᠠᠭᠠᠷᠠᠪᠠᠯ ᠵᠣᠬᠢᠨᠠ ᠭᠡᠵᠦ ᠲᠩᠷᠢ ᠬᠡᠯᠡᠵᠡᠢ᠃ ᠠᠯᠢᠪᠠ ᠠᠢᠮᠠᠭ ᠤᠯᠤᠰ ᠲᠤ ᠲᠡᠳᠡᠨ ᠦ᠌ ᠰᠦᠷ ᠰᠦᠯᠳᠡ᠂ ᠰᠦᠨᠡᠰᠦ ᠬᠡᠢ ᠮᠣᠷᠢ ᠪᠣᠯᠤᠭᠰᠠᠨ ᠬᠡᠨ ᠨᠢᠭᠡᠨ ᠬᠥᠮᠦᠨ ᠶᠦᠮ ᠤᠤ ᠳᠡᠭᠡᠳᠦᠯᠡᠨ ᠪᠢᠰᠢᠷᠡᠬᠦ ᠰᠢᠲᠦᠭᠡᠨ ᠪᠣᠢ᠃ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠡᠨᠡ ᠰᠦᠷ ᠰᠦᠯᠳᠡ ᠰᠦᠨᠡᠰᠦ᠂ ᠬᠡᠢ ᠮᠣᠷᠢ ᠶ᠋ᠢ ᠨᠢ ᠦᠬᠦᠭᠦᠯᠬᠦ ᠶᠦᠮ ᠤᠤ ᠪᠤᠯᠢᠶᠠᠨ ᠠᠪᠬᠤ ᠶ᠋ᠢ ᠬᠢᠴᠢᠶᠡᠬᠦ ᠬᠡᠷᠡᠭᠲᠡᠢ᠃ ᠴᠢᠩᠭᠢᠮᠡᠨ ᠦᠯᠡᠳᠡᠭᠰᠡᠨ ᠦᠢᠯᠡ ᠪᠣᠯᠤᠭᠠᠳ ᠢᠷᠭᠡᠳ ᠨᠢ ᠠᠶᠠᠨᠳᠠᠭᠠᠨ ᠴᠢᠮᠠᠶ᠋ᠢ ᠳᠠᠭᠠᠬᠤ ᠪᠣᠯᠤᠨᠠ᠃ ᠡᠨᠡ ᠪᠣᠯ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠬᠤ ᠲᠩᠷᠢ ᠶ᠋ᠢᠨ ᠠᠷᠭᠠ ᠪᠣᠯᠤᠨᠠ ᠭᠡᠬᠦ ᠳ᠋ᠦ᠍ᠨᠢ ᠳᠠᠪ ᠲᠩᠷᠢ ᠶ᠋ᠢᠨ ᠡᠨᠡ ᠦᠭᠡ ᠲᠤᠢᠯ ᠤ᠋ᠨ ᠵᠥᠪ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠵᠥᠪᠰᠢᠶᠡᠷᠡᠨ ᠲᠣᠯᠣᠭᠠᠢ ᠳᠣᠬᠢᠵᠤ ᠰᠠᠭᠤᠵᠠᠢ᠃
— ᠡᠢᠮᠦ ᠰᠦᠯᠳᠡ ᠬᠡᠢ ᠮᠣᠷᠢ ᠪᠠᠭᠠᠲᠤᠷ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠪᠣᠢ᠃ ᠲᠡᠮᠦᠵᠢᠨ ᠴᠢᠨᠦ ᠰᠦᠷ ᠰᠦᠯᠳᠡ ᠮᠢᠨᠦ ᠴᠢᠮᠠ ᠳ᠋ᠤ᠌ ᠥᠭᠭᠦᠭᠰᠡᠨ ᠲᠩᠷᠢ ᠶ᠋ᠢᠨ ᠰᠠᠬᠢᠭᠤᠰᠤᠨ ᠳ᠋ᠤ᠌ ᠣᠷᠣᠰᠢᠨᠠ᠃ ᠬᠠᠷᠢᠨ ᠳᠠᠪ ᠲᠩᠷᠢ ᠮᠢᠨᠦᠬᠢ ᠡᠨᠡ ᠮᠠᠯᠠᠭᠠᠢ ᠶ᠋ᠢᠨ ᠣᠷᠣᠢ ᠳ᠋ᠠᠬᠢ ᠰᠠᠬᠢᠭᠤᠰᠤᠨ ᠳ᠋ᠤ᠌ ᠪᠣᠢ ᠭᠡᠵᠦ ᠬᠥᠭᠡᠴᠦ ᠥᠭᠦᠯᠡᠭᠡᠳ ᠲᠡᠭᠦᠨ ᠢ᠋ ᠠᠩᠬᠠᠷᠤᠭᠤᠯᠤᠨ ᠬᠣᠶᠠᠷ ᠨᠢᠳᠦ ᠪᠡᠷ ᠡᠭᠴᠡ ᠰᠢᠷᠳᠡᠵᠡᠢ᠃
— ᠣᠳᠣ ᠲᠡᠮᠦᠵᠢᠨ ᠴᠢ ᠰᠠᠢᠨ ᠰᠣᠨᠣᠰ᠃ ᠵᠦᠷᠭᠢᠨ ᠣᠪᠣᠭ ᠤ᠋ᠨ ᠰᠦᠷ ᠰᠦᠯᠳᠡ ᠨᠢ ᠲᠡᠳᠡᠨ ᠦ᠌ ᠬᠦᠴᠦᠲᠦ ᠪᠠᠭᠠᠲᠤᠷ ᠪᠦᠷᠢ ᠪᠥᠬᠡ ᠶ᠋ᠢᠨ ᠪᠡᠶᠡ ᠳ᠋ᠦ᠍ ᠣᠷᠣᠰᠢᠵᠠᠢ᠃ ᠴᠢ ᠲᠡᠭᠦᠨ ᠢ᠋ ᠬᠠᠭᠤᠷᠴᠤ ᠤᠷᠢᠨ ᠠᠪᠴᠢᠷᠠᠵᠤ ᠪᠠᠷᠢᠯᠳᠤᠭᠤᠯᠤᠨ ᠭᠡᠨᠡ ᠦᠭᠡᠢ ᠪᠠᠢᠬᠤ ᠳ᠋ᠤᠨᠢ ᠠᠯᠠᠭᠲᠤᠨ᠃ ᠲᠡᠭᠡᠭᠰᠡᠨ ᠴᠠᠭ ᠲᠤ ᠦᠯᠡᠳᠡᠭᠰᠡᠨ ᠵᠦᠷᠭᠢᠨ ᠦ᠌ ᠬᠢᠨ ᠦ᠌ ᠣᠮᠣᠭ ᠬᠦᠴᠦ ᠨᠢ ᠳᠠᠷᠤᠭᠳᠠᠭᠠᠳ ᠠᠶᠠᠨᠳᠠᠭᠠᠨ ᠴᠢᠮᠠ ᠳ᠋ᠤ᠌ ᠳᠠᠭᠠᠵᠤ ᠢᠷᠡᠨᠡ᠃ ᠬᠠᠷᠢᠨ ᠬᠡᠷᠬᠢᠨ ᠬᠢᠬᠦ ᠶ᠋ᠢ ᠴᠢ ᠰᠠᠢᠲᠤᠷ ᠪᠣᠳᠣᠭᠳᠠᠨ᠃ ᠲᠩᠷᠢ ᠶ᠋ᠢᠨ ᠢᠪᠡᠭᠡᠯ ᠢ᠋ ᠪᠦᠦ ᠠᠯᠳᠠᠭᠲᠤᠨ ᠭᠡᠳ ᠬᠥᠭᠡᠴᠦ ᠰᠠᠭᠤᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠬᠤᠷᠬᠢᠷᠠᠵᠤ ᠡᠬᠢᠯᠡᠵᠡᠢ᠃ ᠳᠠᠪ ᠲᠩᠷᠢ ᠶ᠋ᠢᠨ ᠡᠨᠡ ᠮᠡᠲᠦ ᠭᠠᠢᠬᠠᠯᠲᠠᠢ ᠠᠭᠠᠰᠢ᠂ ᠢᠳᠢ ᠰᠢᠳᠢ ᠤᠷᠢᠳᠴᠢᠯᠠᠨ ᠳᠠᠭᠠᠵᠤ ᠮᠡᠳᠡᠬᠦ ᠴᠢᠳᠠᠪᠤᠷᠢ ᠳ᠋ᠤ᠌ ᠲᠡᠮᠦᠵᠢᠨ ᠨᠢᠭᠡᠨᠲᠡ ᠠᠪᠲᠠᠭᠠᠳ ᠪᠠᠢᠯᠠ᠃ ᠳᠠᠪ ᠲᠩᠷᠢ ᠤᠨᠲᠠᠭᠰᠠᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠰᠠᠭᠠᠳ ᠬᠢᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠲᠡᠮᠦᠵᠢᠨ ᠪᠡᠶᠡ ᠪᠡᠨ ᠲᠡᠨᠢᠢᠯᠭᠡᠬᠦ ᠪᠡᠷ ᠭᠠᠳᠠᠭᠠ ᠭᠠᠷᠴᠠᠢ᠃ ᠬᠣᠯᠠ ᠦᠭᠡᠢ ᠰᠥᠨᠢ ᠶ᠋ᠢᠨ ᠬᠠᠷᠠᠭᠤᠯ ᠤ᠋ᠳ ᠦᠵᠡᠭᠳᠡᠭᠡᠳ ᠦᠷ ᠴᠠᠢᠵᠤ ᠭᠡᠭᠡ ᠣᠷᠣᠵᠠᠢ᠃ ᠬᠠᠷᠢᠨ ᠲᠡᠭᠦᠨ ᠦ᠌ ᠭᠠᠷᠤᠭᠰᠠᠨ ᠳᠠᠷᠤᠢ ᠳ᠋ᠤ᠌ ᠥᠭᠡᠯᠦᠨ ᠡᠬᠡ ᠨᠢ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠶᠡᠬᠡ ᠭᠠᠢᠬᠠᠵᠤ ᠠᠶᠤᠵᠠᠢ᠃
— ᠡᠵᠢ ᠠ᠋᠃ ᠲᠠ ᠶᠠᠭᠠᠬᠢᠪᠠ ᠭᠡᠵᠦ ᠲᠡᠮᠦᠵᠢᠨ ᠰᠠᠨᠳᠤᠷᠤᠨ ᠠᠰᠠᠭᠤᠪᠠ᠃ ᠥᠭᠡᠯᠦᠨ ᠡᠬᠡ ᠶ᠋ᠢ ᠪᠡᠨ ᠢᠩᠭᠢᠵᠦ ᠦᠷ ᠴᠦᠷ ᠢ᠋ᠶ᠋ᠡᠷ ᠶᠠᠪᠤᠬᠤ ᠶ᠋ᠢ ᠣᠢᠷᠠ ᠶ᠋ᠢᠨ ᠬᠡᠳᠦᠨ ᠵᠢᠯ ᠳ᠋ᠦ᠍ ᠦᠵᠡᠭᠡ ᠦᠭᠡᠢ ᠲᠤᠯᠠ ᠢᠩᠭᠢᠵᠦ ᠭᠠᠢᠬᠠᠵᠠᠢ᠃
— ᠬᠦᠦ ᠮᠢᠨᠢ᠃ ᠳᠣᠲᠣᠭᠰᠢ ᠣᠷᠣᠶᠠ᠃
— ᠡᠵᠢ ᠠ᠋᠃ ᠡᠨᠳᠡ ᠳᠠᠪ ᠲᠩᠷᠢ ᠪᠥᠬᠡ ᠤᠨᠲᠠᠵᠤ ᠪᠣᠢ᠃ ᠲᠡᠭᠦᠨ ᠢ᠋ ᠰᠡᠷᠡᠭᠡᠵᠦ ᠶᠠᠭᠠᠬᠢᠬᠤ ᠪᠣᠢ ᠭᠡᠰᠡᠨ ᠨᠢ ᠥᠭᠡᠯᠦᠨ ᠢ᠋ ᠶᠡᠬᠡ ᠭᠠᠢᠬᠠᠭᠤᠯᠵᠠᠢ᠃ ᠬᠥᠭᠡᠴᠦ ᠲᠡᠮᠦᠵᠢᠨ ᠲᠡᠢ ᠢᠩᠭᠢᠵᠦ ᠰᠢᠳᠠᠷᠯᠠᠵᠤ ᠪᠠᠢᠭᠠ ᠨᠢ ᠶᠡᠷᠦ ᠰᠠᠢᠨ ᠤ᠋ ᠢᠷᠣᠠ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠦᠭᠡᠢ ᠠᠵᠢ᠃ ᠭᠡᠪᠡᠴᠦ ᠣᠳᠣ ᠥᠭᠡᠯᠦᠨ ᠳ᠋ᠦ᠍ ᠡᠨᠡ ᠲᠤᠬᠠᠢ ᠰᠢᠭᠦᠮᠵᠢᠯᠡᠨ ᠪᠣᠳᠣᠬᠤ ᠵᠠᠪ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠭᠡᠭᠡᠳ
— ᠬᠥᠪᠡᠭᠦᠨ ᠮᠢᠨᠢ᠃ ᠲᠡᠭᠡᠪᠡᠯ ᠮᠠᠨ ᠤ᠋ ᠳ᠋ᠤ᠌ ᠣᠴᠢ ᠭᠡᠵᠡᠢ᠃ ᠲᠡᠮᠦᠵᠢᠨ ᠡᠬᠡ ᠶ᠋ᠢ ᠪᠡᠨ ᠳᠠᠭᠤ ᠦᠭᠡᠢ ᠳᠠᠭᠠᠪᠠ᠃ ᠭᠡᠪᠡᠴᠦ ᠭᠡᠷ ᠲᠡᠭᠡᠨ ᠣᠷᠣᠵᠤ ᠪᠣᠯᠬᠤ ᠦᠭᠡᠢ ᠪᠡᠨ ᠥᠭᠡᠯᠦᠨ ᠵᠠᠮ ᠤ᠋ᠨ ᠳᠤᠮᠳᠠ ᠤᠬᠠᠭᠠᠷᠠᠪᠠ᠃ ᠲᠡᠭᠡᠭᠡᠳ ᠵᠣᠭ ᠲᠣᠰᠴᠤ
— ᠬᠥᠪᠡᠭᠦᠨ ᠮᠢᠨᠢ᠃ ᠲᠡᠮᠦᠯᠦᠨ ᠳᠡᠭᠦᠦ ᠴᠢᠨᠢ ᠥᠭᠡᠷᠡ ᠬᠥᠮᠦᠨ ᠳ᠋ᠦ᠍ ᠰᠡᠳᠬᠢᠯ ᠲᠡᠢ ᠭᠡᠨᠡ᠃ ᠪᠢ ᠭᠠᠭᠴᠠ ᠥᠬᠢᠨ ᠢ᠋ᠶ᠋ᠡᠨ ᠠᠵᠠ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠭᠠᠰᠠᠢ ᠭᠡᠵᠦ ᠬᠦᠰᠡᠨᠡ᠃ ᠲᠡᠮᠦᠯᠦᠨ ᠢ᠋ ᠢᠬᠢᠷᠡᠰ ᠠᠢᠮᠠᠭ ᠤ᠋ᠨ ᠪᠣᠳᠣ ᠳ᠋ᠤ᠌ ᠪᠦᠦ ᠥᠭ᠃ ᠥᠬᠢᠨ ᠮᠢᠨᠢ ᠬᠦᠰᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠯᠤᠭ ᠭᠡᠵᠦ ᠥᠭᠡᠯᠦᠨ ᠰᠢᠭᠤᠳ ᠬᠡᠯᠡᠵᠡᠢ᠃ ᠲᠡᠮᠦᠵᠢᠨ ᠥᠨᠥᠬᠢ ᠰᠤᠷᠤᠭᠰᠠᠨ ᠵᠠᠩ ᠢ᠋ᠶ᠋ᠠᠷ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠰᠢᠷᠳᠡᠨ ᠳᠠᠭᠤ ᠦᠭᠡᠢ ᠵᠣᠭᠰᠣᠪᠠ᠃
— ᠡᠵᠢ ᠠ᠋᠃ ᠲᠠ ᠪᠢᠳᠡ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠲᠥᠯᠥᠭᠡ ᠠᠮᠢ ᠪᠠᠨ ᠦᠷᠡᠨ ᠵᠢᠳᠬᠦᠭᠰᠡᠭᠡᠷ ᠢᠷᠡᠭᠰᠡᠨ ᠪᠢᠰᠢ ᠤᠤ? ᠢᠬᠢᠷᠡᠰ ᠠᠢᠮᠠᠭ ᠪᠣᠯ ᠪᠠᠶᠠᠨ ᠬᠦᠴᠦᠷᠬᠡᠭ ᠠᠢᠮᠠᠭ᠃ ᠢᠬᠢᠷᠡᠰ ᠠᠢᠮᠠᠭ ᠲᠠᠢ ᠬᠦᠴᠦ ᠪᠡᠨ ᠨᠢᠭᠡᠳᠬᠡᠬᠦ ᠨᠢ ᠲᠩᠷᠢ ᠶ᠋ᠢᠨ ᠢᠪᠡᠭᠡᠯ ᠢ᠋ᠶ᠋ᠡᠷ ᠪᠣᠯᠤᠭᠰᠠᠨ ᠬᠡᠷᠡᠭ ᠶᠦᠮ᠃ ᠨᠢᠭᠡ ᠪᠦᠰᠡᠭᠦᠢ ᠬᠥᠮᠦᠨ ᠡᠢᠮᠦ ᠦᠨᠡ ᠬᠦᠷᠦᠨᠡ ᠭᠡᠳᠡᠭ ᠭᠠᠪᠢᠶᠠᠲᠠᠢ ᠶᠠᠪᠤᠳᠠᠯ ᠪᠣᠯᠤᠨᠠ᠃ ᠮᠢᠨᠦ ᠳᠡᠭᠦᠦ ᠥᠬᠢᠨ ᠢᠬᠢᠷᠡᠰ ᠠᠢᠮᠠᠭ ᠤ᠋ᠨ ᠨᠢᠭᠡ ᠲᠣᠯᠣᠭᠠᠢᠯᠠᠭᠴᠢ ᠶ᠋ᠢᠨ ᠡᠬᠡᠨᠡᠷ ᠪᠣᠯᠤᠨᠠ ᠭᠡᠳᠡᠭ ᠪᠠᠬᠠᠳᠤᠯᠲᠠᠢ ᠬᠡᠷᠡᠭ ᠶᠦ᠍ᠮ᠃ ᠣᠳᠣ ᠪᠢᠳᠡ ᠪᠦᠭᠦᠳᠡᠭᠡᠷ ᠬᠠᠷᠠ ᠪᠡᠶᠡ ᠶ᠋ᠢᠨ ᠵᠢᠷᠭᠠᠯ ᠢ᠋ ᠪᠢᠰᠢ ᠤᠯᠤᠰ ᠠᠢᠮᠠᠭ ᠤ᠋ᠨ ᠢ᠋ᠶ᠋ᠠᠨ ᠢᠷᠡᠭᠡᠳᠦᠢ ᠶ᠋ᠢ ᠪᠣᠳᠣᠬᠤ ᠶᠣᠰᠣᠲᠠᠢ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠪᠢ ᠲᠡᠮᠦᠯᠦᠨ ᠢ᠋ ᠢᠬᠢᠷᠡᠰ ᠠᠢᠮᠠᠭ ᠤ᠋ᠨ ᠪᠣᠳᠣ ᠳ᠋ᠤ᠌ ᠥᠭᠭᠦᠨᠡ᠃ ᠪᠢ ᠠᠮᠠᠯᠠᠭᠰᠠᠨ ᠠ᠋ᠴᠠ ᠪᠠᠨ ᠬᠡᠷᠬᠢᠨ ᠪᠤᠴᠠᠬᠤ ᠪᠢᠯᠡ᠃ ᠲᠠ ᠨᠠᠮᠠᠶ᠋ᠢ ᠶᠠᠭᠤᠨ ᠬᠢᠯᠪᠠᠷ ᠪᠣᠳᠣᠪᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠡᠵᠢ ᠲᠠ ᠡᠨᠡ ᠮᠡᠲᠦ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠵᠤ ᠥᠪᠡᠷ ᠢ᠋ ᠪᠡᠨ ᠪᠤᠤ ᠴᠢᠯᠡᠭᠡ ᠭᠡᠳ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠭᠡᠷ ᠦ᠋ᠨ ᠭᠠᠳᠠᠨᠠ ᠣᠷᠬᠢᠭᠠᠳ ᠶᠠᠪᠤᠭᠠᠳ ᠥᠭᠴᠡᠢ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠨ ᠢᠷᠡᠵᠦ
— ᠲᠡᠮᠦᠯᠦᠨ ᠦ᠌ ᠲᠡᠷᠡ ᠬᠥᠮᠦᠨ ᠬᠡᠨ ᠭᠡᠨᠡ? ᠭᠡᠵᠦ ᠲᠤᠯᠭᠠᠨ ᠠᠰᠠᠭᠤᠪᠠ᠃ ᠲᠡᠮᠦᠵᠢᠨ ᠦ᠌ ᠳᠠᠭᠤᠨ ᠤ᠋ ᠥᠩᠭᠡ ᠵᠠᠨᠤᠯᠲᠠᠢ ᠪᠣᠯᠵᠠᠢ᠃ ᠥᠭᠡᠯᠦᠨ ᠳᠡᠮᠡᠢ ᠶᠠᠭᠤᠮᠠ ᠬᠢᠭᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠣᠢᠯᠠᠭᠠᠨ ᠲᠦᠭᠰᠢᠪᠡ᠃ ᠲᠡᠮᠦᠵᠢᠨ ᠴᠣᠬᠣᠮ ᠶᠠᠭᠠᠬᠢᠬᠤ ᠭᠡᠵᠦ ᠢᠩᠭᠢᠵᠦ ᠠᠰᠠᠭᠤᠵᠤ ᠪᠠᠢᠭᠠ ᠶ᠋ᠢ ᠴᠦ᠍ ᠲᠦᠪᠡᠭ ᠦᠭᠡᠢ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠲᠡᠮᠦᠵᠢᠨ ᠦ᠌ ᠠᠰᠠᠭᠤᠭᠰᠠᠨ ᠢ᠋ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ ᠠᠭᠤᠷᠯᠠᠨ ᠭᠡᠷ ᠲᠡᠭᠡᠨ ᠣᠷᠣᠵᠠᠢ᠃
ᠥᠭᠡᠯᠦᠨ ᠪᠣᠯᠤᠭᠰᠠᠨ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠲᠡᠮᠦᠯᠦᠨ ᠥᠬᠢᠨ ᠳ᠋ᠡᠭᠡᠨ ᠬᠡᠯᠡᠵᠦ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠬᠢᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠶ᠋ᠢ ᠤᠴᠢᠷᠯᠠᠵᠠᠢ᠃ ᠭᠡᠪᠡᠴᠦ ᠲᠡᠮᠦᠯᠦᠨ ᠡᠷᠬᠡ ᠥᠬᠢᠨ ᠦ᠌ ᠣᠮᠣᠭᠯᠠᠩ ᠵᠠᠩ ᠢ᠋ᠶ᠋ᠠᠷ ᠪᠠᠭᠤᠵᠤ ᠥᠭᠬᠦ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠦᠳᠡᠰᠢ ᠲᠡᠮᠦᠯᠦᠨ ᠪᠥᠷᠲᠡ ᠳ᠋ᠦ᠍ ᠪᠦᠬᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠠᠪᠤᠷᠠᠯ ᠲᠤᠰᠠᠯᠠᠮᠵᠢ ᠭᠤᠶᠤᠵᠠᠢ᠃ ᠣᠳᠣ ᠲᠡᠮᠦᠯᠦᠨ ᠢ᠋ ᠠᠪᠤᠷᠠᠬᠤ ᠭᠠᠭᠴᠠ ᠬᠥᠮᠦᠨ ᠪᠣᠯ ᠪᠥᠷᠲᠡ ᠪᠠᠢᠪᠠ᠃ ᠥᠭᠡᠯᠦᠨ ᠬᠡᠳᠦᠢ ᠪᠡᠷ ᠪᠥᠷᠲᠡ ᠳ᠋ᠦ᠍ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠶ᠋ᠢ ᠬᠠᠲᠠᠭᠤ ᠬᠣᠷᠢᠭᠯᠠᠭᠰᠠᠨ ᠪᠣᠯᠪᠠᠴᠤ ᠲᠡᠮᠦᠯᠦᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠦᠭᠡᠢ᠃ ᠲᠡᠷᠡ ᠰᠥᠨᠢ ᠥᠭᠡᠯᠦᠨ ᠤᠨᠲᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠪᠥᠷᠲᠡ ᠳ᠋ᠦ᠍ ᠢᠲᠡᠭᠡᠭᠰᠡᠨ ᠲᠡᠮᠦᠯᠦᠨ ᠠᠵᠠ ᠵᠢᠷᠭᠠᠯ ᠳᠦᠭᠦᠷᠡᠩ ᠲᠠᠢᠪᠤᠩ ᠨᠣᠢᠷᠰᠤᠵᠤ ᠪᠠᠢᠯᠠ᠃ ᠰᠥᠨᠢ ᠳᠦᠯᠢ ᠪᠡᠷ ᠬᠠᠰᠠᠷ ᠥᠪᠡᠷ ᠦ᠋ᠨ ᠬᠦᠷᠢᠶᠡᠨ ᠡᠴᠡ ᠳᠠᠪᠬᠢᠨ ᠢᠷᠡᠵᠦ ᠲᠡᠮᠦᠵᠢᠨ ᠦ᠌ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠬᠤ ᠶ᠋ᠢ ᠥᠭᠡᠯᠦᠨ ᠰᠣᠨᠣᠰᠴᠤ ᠬᠡᠪᠲᠡᠯᠡ᠃ ᠲᠡᠭᠦᠨ ᠦ᠌ ᠰᠡᠵᠢᠭᠯᠡᠨ ᠪᠣᠳᠣᠭᠰᠠᠨ ᠲᠡᠷᠡ ᠠᠶᠤᠮᠰᠢᠭᠲᠤ ᠬᠡᠷᠡᠭ ᠨᠢᠭᠡᠨᠲᠡ ᠪᠡᠶᠡᠯᠡᠵᠦ ᠡᠬᠢᠯᠡᠬᠦ ᠶ᠋ᠢ ᠲᠡᠷᠡ ᠮᠡᠳᠡᠷᠡᠵᠡᠢ᠃ ᠭᠡᠪᠡᠴᠦ ᠲᠠᠢᠪᠤᠰᠢᠷᠠᠨ ᠢᠲᠡᠭᠡᠭᠡᠳ ᠨᠠᠮ ᠤᠨᠲᠠᠵᠤ ᠪᠣᠢ ᠬᠥᠭᠡᠷᠦᠬᠦᠢ ᠥᠬᠢᠨ ᠢ᠋ᠶ᠋ᠡᠨ ᠰᠡᠷᠡᠭᠡᠬᠦ ᠡᠴᠡ ᠠᠶᠤᠵᠠᠢ᠃《ᠶᠠᠳᠠᠵᠤ ᠭᠠᠭᠴᠠ ᠰᠥᠨᠢ ᠴᠦ᠍ ᠪᠣᠯᠪᠠ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠪᠦᠷ ᠲᠦ᠍ ᠰᠠᠢᠬᠠᠨ ᠤᠨᠲᠠᠵᠤ ᠠᠮᠲᠠᠲᠠᠢ ᠵᠡᠭᠦᠳᠦ ᠵᠡᠭᠦᠳᠦᠯᠡᠭ ᠳᠡ 》 ᠭᠡᠵᠦ ᠥᠭᠡᠯᠦᠨ ᠪᠣᠳᠣᠪᠠ᠃ ᠲᠡᠮᠦᠯᠦᠨ ᠥᠬᠢᠨ ᠨᠢ ᠵᠡᠭᠦᠳᠦᠨ ᠳ᠋ᠡᠭᠡᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠥᠭᠡᠯᠦᠨ ᠦ᠌ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠠᠰᠬᠠᠷᠠᠵᠠᠢ᠃ ᠣᠳᠣ ᠲᠡᠭᠦᠨ ᠳ᠋ᠦ᠍ ᠪᠣᠯᠵᠤ ᠪᠣᠢ ᠬᠡᠷᠡᠭ ᠢ᠋ ᠬᠣᠷᠢᠭᠯᠠᠨ ᠵᠣᠭᠰᠣᠭᠠᠬᠤ ᠠᠷᠭᠠ ᠳᠠᠩᠴᠤ ᠪᠠᠢᠭᠰᠠᠨ ᠦᠭᠡᠢ᠃ ᠪᠦᠬᠦ ᠬᠡᠷᠡᠭ ᠥᠭᠡᠯᠦᠨ ᠦ᠌ ᠰᠡᠵᠢᠭᠯᠡᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠷ ᠪᠣᠯᠵᠠᠢ᠃ ᠢᠬᠢᠷᠡᠰ ᠠᠢᠮᠠᠭ ᠲᠠᠢ ᠡᠪᠰᠡᠬᠦ ᠨᠢ ᠭᠠᠷᠴᠠᠭᠠ ᠦᠭᠡᠢ ᠴᠢᠬᠤᠯᠠ ᠪᠣᠯᠬᠤ ᠶ᠋ᠢ ᠬᠠᠰᠠᠷ ᠬᠡᠯᠡᠭᠦᠯᠦᠯᠲᠡ ᠦᠭᠡᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠲᠡᠮᠦᠯᠦᠨ ᠦ᠌ ᠬᠠᠢᠷᠠᠲᠠᠢ ᠬᠥᠮᠦᠨ ᠰᠢᠳᠠᠷ ᠴᠡᠷᠢᠭ ᠲᠡᠳᠦ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠦᠷ ᠴᠠᠢᠬᠤ ᠳ᠋ᠤ᠌ ᠨᠢᠭᠡᠨᠲᠡ ᠰᠢᠢᠳᠦᠭᠳᠡᠭᠰᠡᠨ ᠪᠢᠯᠡ᠃ ᠬᠠᠷᠢᠨ ᠲᠡᠮᠦᠵᠢᠨ ᠳ᠋ᠦ᠍ ᠲᠡᠳᠦ ᠶ᠋ᠢ ᠠᠯᠠᠬᠤ ᠰᠠᠨᠠᠭᠠ ᠤᠭ ᠠ᠋ᠴᠠ ᠲᠥᠷᠥᠬᠦ ᠦᠭᠡᠢ ᠪᠠᠢᠭᠰᠠᠭᠠᠷ ᠲᠤᠯᠠ ᠲᠡᠭᠷᠢ ᠢᠪᠡᠭᠡᠵᠦ ᠡᠨᠡ ᠬᠡᠷᠡᠭ ᠢ᠋ ᠵᠥᠴᠢ ᠬᠥᠪᠡᠭᠦᠨ ᠨᠢ ᠭᠦᠢᠴᠡᠯᠳᠦᠭᠦᠯᠦᠨ ᠲᠡᠳᠦ ᠶ᠋ᠢ ᠠᠪᠤᠷᠠᠵᠤ ᠠᠪᠤᠭᠰᠠᠨ ᠶᠤᠮ᠃ ᠡᠨᠡ ᠬᠡᠷᠡᠭ ᠡᠴᠡ ᠬᠣᠢᠰᠢ ᠲᠡᠮᠦᠵᠢᠨ ᠵᠥᠴᠢ ᠬᠥᠪᠡᠭᠦᠨ ᠳ᠋ᠡᠭᠡᠨ ᠶᠡᠬᠡ ᠯᠡ ᠰᠠᠢᠨ ᠢ᠋ᠶ᠋ᠠᠷ ᠬᠠᠨᠳᠤᠬᠤ ᠶ᠋ᠢ ᠬᠢᠴᠢᠶᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠥᠷᠲᠡ ᠶᠡᠬᠡ ᠪᠠᠶᠠᠷᠲᠠᠢ ᠪᠣᠯᠵᠠᠢ᠃ ᠪᠦᠬᠦ ᠬᠡᠷᠡᠭ ᠵᠥᠴᠢ ᠶ᠋ᠢᠨ ᠠᠴᠢ ᠪᠠᠷ ᠲᠡᠮᠦᠵᠢᠨ ᠦ᠌ ᠬᠦᠰᠡᠭᠰᠡᠨ ᠢ᠋ᠶ᠋ᠡᠷ ᠪᠣᠯᠵᠤ ᠲᠡᠮᠦᠯᠦᠨ ᠪᠣᠳᠣ ᠶ᠋ᠢ ᠳᠠᠭᠠᠨ ᠢᠬᠢᠷᠡᠰ ᠠᠢᠮᠠᠭ ᠲᠤ ᠤᠬᠢᠯᠠᠭᠰᠠᠭᠠᠷ ᠣᠳᠬᠤ ᠳ᠋ᠤ᠌ ᠲᠡᠮᠦᠵᠢᠨ᠂ ᠲᠡᠳᠦ ᠶ᠋ᠢ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠵᠥᠴᠢ ᠬᠥᠪᠡᠭᠦᠨ ᠳ᠋ᠡᠭᠡᠨ ᠪᠣᠭᠣᠯ ᠪᠣᠯᠭᠠᠨ ᠥᠭᠴᠡᠢ᠃
ᠬᠠᠷᠢᠨ ᠥᠭᠡᠯᠦᠨ ᠲᠡᠮᠦᠯᠦᠨ ᠥᠬᠢᠨ ᠢ᠋ᠶ᠋ᠡᠨ ᠬᠠᠷᠢ ᠳ᠋ᠤ᠌ ᠣᠳᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠤᠢᠯ ᠤ᠋ᠨ ᠶᠡᠬᠡ ᠪᠡᠷ ᠭᠠᠭᠴᠠᠭᠠᠷᠳᠠᠵᠤ ᠥᠪᠡᠷ ᠢ ᠪᠡᠨ ᠲᠡᠮᠦᠵᠢᠨ ᠦ᠌ ᠬᠦᠷᠢᠶᠡᠨ ᠳ᠋ᠦ᠍ ᠬᠡᠨ ᠳ᠋ᠦ᠍ ᠴᠦ᠍ ᠲᠣᠭᠣᠭᠳᠠᠬᠤ ᠦᠭᠡᠢ ᠬᠥᠮᠦᠨ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠬᠤ ᠪᠣᠯᠵᠠᠢ᠃ ᠦᠨᠡᠬᠡᠷ ᠬᠥᠪᠡᠭᠦᠳ ᠨᠢ ᠡᠵᠡᠨ ᠰᠠᠭᠤᠵᠤ ᠬᠦᠴᠦᠷᠬᠡᠭᠵᠢᠬᠦ ᠶ᠋ᠢᠨ ᠬᠢᠷᠢ ᠪᠡᠷ ᠥᠭᠡᠯᠦᠨ ᠠᠪᠴᠤ ᠪᠣᠯᠬᠤ ᠦᠭᠡᠢ ᠬᠠᠶᠠᠵᠤ ᠪᠣᠯᠳᠠᠭ ᠦᠭᠡᠢ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠰᠢᠭ᠋ ᠪᠣᠯᠵᠠᠢ᠃ ᠪᠠᠰᠠ ᠲᠡᠮᠦᠵᠢᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠦᠭᠡ ᠰᠠᠨᠠᠯ ᠶᠠᠮᠠᠷ ᠴᠤ᠌ ᠦᠨᠡ ᠴᠠᠨᠠ ᠦᠭᠡᠢ ᠮᠡᠲᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠡᠷ ᠲᠤᠢᠯ ᠤ᠋ᠨ ᠶᠡᠬᠡ ᠪᠡᠷ ᠭᠤᠳᠤᠷᠠᠨ ᠭᠣᠮᠣᠳᠠᠵᠠᠢ᠃ ᠭᠡᠪᠡᠴᠦ ᠡᠨᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠶᠡᠷᠦ ᠢᠯᠡᠷᠡᠭᠦᠯᠦᠨ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ᠃ ᠤᠬᠠᠭᠠᠨ ᠲᠠᠢ᠂ ᠠᠢᠬᠤᠪᠲᠤᠷ ᠠᠯᠤᠰ ᠰᠠᠨᠠᠭᠠ ᠲᠠᠢ ᠪᠥᠷᠲᠡ ᠡᠪ ᠦᠭᠡᠢ ᠬᠡᠷᠡᠭ ᠡᠴᠡ᠂ ᠡᠯᠳᠡᠪ ᠬᠡᠷᠡᠭᠦᠯ ᠡᠴᠡ ᠰᠡᠷᠭᠡᠢᠯᠡᠨ ᠥᠭᠡᠯᠦᠨ ᠢ ᠬᠦᠨᠳᠦᠳᠬᠡᠨ ᠠᠰᠠᠷᠠᠬᠤ ᠪᠠᠨ ᠬᠡᠵᠢᠶᠡ ᠴᠦ᠍ ᠮᠠᠷᠲᠠᠭᠰᠠᠨ ᠦᠭᠡᠢ ᠪᠢᠯᠡ᠃ ᠲᠡᠮᠦᠯᠦᠨ ᠪᠣᠯᠤᠭᠠᠳ ᠲᠡᠳᠦ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠪᠥᠷᠲᠡ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠰᠢᠢᠳᠦᠭᠳᠡᠭᠰᠡᠨ ᠢ ᠥᠭᠡᠯᠦᠨ ᠰᠡᠵᠢᠭᠯᠡᠨ ᠲᠠᠭᠠᠮᠠᠭᠯᠠᠵᠤ ᠪᠠᠢᠪᠠ᠃ ᠬᠠᠷᠢᠨ ᠥᠭᠡᠯᠦᠨ ᠦ᠌ ᠬᠠᠢᠷᠠᠯᠠᠨ ᠲᠡᠪᠡᠷᠢᠵᠦ ᠥᠰᠬᠡᠭᠰᠡᠨ ᠠᠴᠢ ᠬᠥᠪᠡᠭᠦᠨ ᠵᠥᠴᠢ ᠤᠭ ᠤ᠋ᠨ ᠰᠡᠷᠭᠦᠯᠡᠩ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠭᠡᠷᠦᠬᠦᠢ ᠲᠡᠷᠡ ᠵᠢᠭᠠᠰᠤᠨ ᠨᠢᠳᠦᠲᠦ ᠲᠡᠳᠦ ᠶ᠋ᠢ ᠠᠪᠤᠷᠠᠵᠤ ᠭᠠᠷᠴᠠᠢ᠃ ᠪᠥᠷᠲᠡ ᠶ᠋ᠢᠨ ᠮᠡᠷᠭᠢᠳ ᠴᠢᠰᠤ ᠲᠠᠢ ᠡᠨᠡ ᠬᠥᠪᠡᠭᠦᠨ ᠳ᠋ᠦ᠍ ᠥᠭᠡᠯᠦᠨ ᠦᠨᠡᠨ ᠰᠡᠳᠬᠢᠯ ᠡᠴᠡ ᠬᠠᠢᠷᠠᠲᠠᠢ ᠪᠥᠭᠡᠳ ᠡᠨᠡ ᠶᠠᠪᠤᠳᠠᠯ ᠠ᠋ᠴᠠ ᠬᠣᠢᠰᠢ ᠪᠦᠷ ᠴᠦ᠍ ᠶᠡᠬᠡ ᠪᠡᠷ ᠲᠣᠭᠣᠬᠤ ᠪᠣᠯᠵᠠᠢ᠃ ᠬᠠᠷᠢᠨ ᠪᠣᠯᠤᠭᠰᠠᠨ ᠬᠡᠷᠡᠭ ᠲᠦ᠍ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠪᠤᠷᠤᠭᠤᠳᠬᠠᠭᠰᠠᠨ ᠦᠭᠡᠢ᠃ ᠢᠬᠢᠷᠡᠰ ᠠᠢᠮᠠᠭ ᠲᠠᠢ ᠬᠣᠯᠪᠣᠭᠠᠲᠠᠨ ᠪᠣᠯᠵᠤ ᠤᠷᠤᠭ ᠪᠠᠷᠢᠯᠳᠤᠬᠤ ᠨᠢ ᠬᠡᠴᠢᠨᠡᠨ ᠴᠢᠬᠤᠯᠠ ᠪᠣᠯᠬᠤ ᠶ᠋ᠢ ᠣᠢᠯᠠᠭᠠᠵᠤ ᠪᠠᠢᠪᠠ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠨᠢ ᠬᠥᠮᠦᠨ ᠬᠥᠮᠦᠨ ᠡᠴᠡ ᠣᠨᠴᠠᠭᠠᠢ ᠢᠯᠡᠭᠦᠦ ᠬᠦᠰᠡᠯ ᠲᠡᠢ ᠪᠣᠯᠬᠤ ᠶ᠋ᠢ ᠨᠢᠭᠡᠨᠲᠡ ᠮᠡᠳᠡᠬᠦ ᠪᠣᠯᠤᠭᠰᠠᠨ ᠨᠢ ᠥᠭᠡᠯᠦᠨ ᠢ ᠠᠯᠭᠤᠷ ᠥᠭᠡᠷᠡᠴᠢᠯᠡᠨ ᠬᠤᠪᠢᠷᠠᠭᠠᠵᠠᠢ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠶᠠᠭᠤ ᠬᠦᠰᠡᠵᠦ ᠶᠠᠭᠤᠨ ᠳ᠋ᠤ᠌ ᠵᠣᠷᠢᠵᠤ ᠪᠠᠢᠭᠠ ᠶ᠋ᠢ ᠥᠭᠡᠯᠦᠨ ᠡᠳᠦᠷ ᠬᠣᠨᠣᠭ ᠰᠠᠷᠠ ᠵᠢᠯ ᠥᠩᠭᠡᠷᠡᠬᠦ ᠪᠦᠷᠢ ᠤᠯᠠᠮ ᠭᠦᠨᠵᠡᠭᠡᠢ ᠲᠣᠳᠣ ᠪᠠᠷ ᠣᠢᠯᠠᠭᠠᠬᠤ ᠪᠣᠯᠵᠠᠢ᠃ ᠲᠡᠷᠡ ᠦᠨᠡᠬᠡᠷ ᠬᠥᠮᠦᠨ ᠪᠢᠰᠢ ᠬᠥᠪᠡᠭᠦᠨ ᠲᠥᠷᠥᠭᠦᠯᠵᠡᠢ᠃ ᠥᠭᠡᠯᠦᠨ ᠦ᠌ ᠪᠦᠬᠦ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠵᠣᠪᠠᠯᠠᠩ ᠪᠡᠷᠬᠡᠰᠢᠶᠡᠯ ᠭᠠᠭᠴᠠᠬᠠᠨ ᠲᠡᠮᠦᠵᠢᠨ ᠦ᠌ ᠬᠦᠰᠡᠯ ᠢ ᠪᠡᠶᠡᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠪᠠᠢᠭᠰᠠᠨ ᠳ᠋ᠤ᠌ ᠣᠳᠣ ᠡᠷᠡᠭᠡᠯᠵᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠢᠩᠭᠢᠵᠦ ᠪᠣᠳᠣᠭᠠᠳ ᠥᠭᠡᠯᠦᠨ ᠥᠩᠭᠡᠷᠡᠭᠰᠡᠨ ᠠᠮᠢᠳᠤᠷᠠᠯ ᠦᠵᠡᠭᠡ ᠦᠭᠡᠢ ᠵᠢᠷᠭᠠᠯ ᠳ᠋ᠤ᠌ ᠪᠠᠨ ᠬᠠᠷᠠᠮᠰᠠᠬᠤ ᠦᠭᠡᠢ ᠪᠠᠢᠬᠤ ᠪᠠᠷ ᠰᠢᠢᠳᠴᠡᠢ᠃ ᠲᠡᠷᠡ ᠣᠳᠣ ᠥᠪᠡᠷ ᠦ᠋ᠨ ᠦᠯᠡᠳᠡᠭᠰᠡᠨ ᠨᠠᠰᠤ ᠶ᠋ᠢ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠶᠡᠬᠡ ᠬᠠᠭᠠᠨ ᠰᠠᠭᠤᠬᠤ ᠳ᠋ᠤ᠌ ᠵᠣᠷᠢᠭᠤᠯᠬᠤ ᠪᠠᠷ ᠰᠢᠢᠳᠪᠡ᠃ ᠶᠠᠭ ᠡᠢᠮᠦ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠠᠰᠠᠷ ᠲᠤ᠌ ᠬᠠᠨᠳᠤᠬᠤ ᠪᠣᠯᠪᠠ᠃ ᠬᠠᠰᠠᠷ ᠢ ᠥᠮᠥᠭᠡᠷᠡᠪᠡ ᠭᠡᠮᠡᠨ ᠲᠡᠮᠦᠵᠢᠨ ᠡᠬᠡ ᠳ᠋ᠦ᠍ ᠪᠡᠨ ᠭᠣᠮᠣᠳᠠᠳᠠᠭ ᠪᠢᠵᠡ ᠭᠡᠵᠦ ᠥᠭᠡᠯᠦᠨ ᠪᠣᠳᠣᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠥᠭᠡᠯᠦᠨ ᠬᠠᠰᠠᠷ ᠢ ᠪᠢᠰᠢ ᠲᠡᠮᠦᠵᠢᠨ ᠢ ᠯᠡ ᠬᠠᠮᠠᠭᠠᠯᠠᠨ ᠥᠮᠥᠭᠯᠡᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠪᠡ᠃ ᠬᠠᠷᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠦ᠌ ᠪᠡᠨ ᠠᠯᠠᠯᠳᠤᠬᠤ ᠶ᠋ᠢ ᠲᠡᠷᠡ ᠬᠡᠵᠢᠶᠡ ᠴᠦ᠍ ᠬᠦᠰᠡᠭᠰᠡᠨ ᠦᠭᠡᠢ᠃ ᠢᠩᠭᠢᠬᠦ ᠶ᠋ᠢ ᠶᠡᠷᠦ ᠶᠠᠮᠠᠷ ᠡᠬᠡ ᠬᠦᠰᠡᠬᠦ ᠪᠢᠯᠡ᠃ ᠲᠡᠷᠡ ᠨᠢᠭᠡᠨ ᠠᠶᠤᠮᠰᠢᠭᠲᠤ ᠰᠥᠨᠢ ᠲᠡᠭᠷᠢ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠵᠥᠴᠢ ᠬᠥᠪᠡᠭᠦᠨ ᠨᠢ ᠬᠠᠰᠬᠢᠷᠤᠨ ᠭᠦᠶᠦᠵᠦ ᠢᠷᠡᠵᠦ ᠬᠡᠯᠡᠭᠡ ᠦᠭᠡᠢ ᠪᠣᠯ ᠥᠭᠡᠯᠦᠨ ᠦ᠌ ᠬᠦᠰᠡᠭᠡ ᠦᠭᠡᠢ ᠲᠡᠷᠡ ᠬᠡᠷᠡᠭ ᠭᠠᠷᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ ᠪᠠᠢᠪᠠ᠃ ᠳᠠᠪ ᠲᠡᠭᠷᠢ ᠪᠥᠬᠡ ᠶ᠋ᠢᠨ ᠮᠠᠭᠤ ᠢᠷᠣᠠ ᠶ᠋ᠢᠨ ᠢᠳᠢ ᠰᠢᠳᠢ ᠳ᠋ᠦ᠍ ᠠᠪᠲᠠᠭᠳᠠᠭᠰᠠᠨ ᠲᠡᠮᠦᠵᠢᠨ ᠬᠠᠰᠠᠷ ᠳᠡᠭᠦᠦ ᠪᠡᠨ ᠶᠠᠭ ᠠᠯᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠭᠡᠪᠡᠴᠦ ᠥᠭᠡᠯᠦᠨ ᠦ᠌ ᠦᠷᠡ ᠪᠡᠨ ᠭᠡᠰᠡᠨ ᠡᠬᠡ ᠶ᠋ᠢᠨ ᠬᠠᠢᠷᠠ ᠰᠡᠳᠬᠢᠯ ᠨᠢ ᠳᠠᠪ ᠲᠡᠭᠷᠢ ᠪᠥᠬᠡ ᠶ᠋ᠢᠨ ᠮᠠᠭᠤ ᠢᠷᠣᠠ ᠶ᠋ᠢᠨ ᠰᠠᠬᠢᠭᠤᠰᠤᠨ ᠠ᠋ᠴᠠ ᠬᠦᠴᠦᠲᠡᠢ ᠪᠣᠯᠬᠤ ᠶ᠋ᠢ ᠲᠡᠷᠡ ᠦᠵᠡᠵᠡᠢ᠃ ᠡᠬᠡ ᠶ᠋ᠢ ᠪᠡᠨ ᠦᠵᠡᠮᠡᠭᠴᠡ ᠲᠡᠮᠦᠵᠢᠨ ᠮᠠᠭᠤ ᠰᠡᠳᠬᠢᠯ ᠦ᠋ᠨ ᠦᠷᠡ ᠪᠡᠨ ᠳᠠᠷᠤᠵᠤ ᠴᠢᠳᠠᠭᠠᠳ ᠬᠠᠰᠠᠷ ᠢ ᠣᠷᠬᠢᠨ ᠶᠠᠪᠤᠭᠰᠠᠨ ᠪᠢᠯᠡ᠃ ᠥᠭᠡᠯᠦᠨ ᠢᠩᠭᠢᠵᠦ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠦᠬᠦᠯ ᠡᠴᠡ ᠠᠪᠤᠷᠠᠵᠠᠢ᠃ ᠭᠡᠪᠡᠴᠦ ᠬᠠᠰᠠᠷ ᠤ᠋ᠨ ᠦᠬᠦᠯ ᠢ ᠵᠠᠢᠯᠠᠭᠤᠯᠵᠤ ᠳᠠᠷᠠᠭᠠ ᠨᠢ ᠲᠡᠮᠦᠵᠢᠨ ᠳᠠᠪ ᠲᠡᠭᠷᠢ ᠪᠥᠬᠡ ᠶ᠋ᠢ ᠦᠬᠦᠭᠦᠯᠦᠭᠰᠡᠨ ᠴᠦ᠍ ᠡᠨᠡ ᠮᠠᠭᠤ ᠢᠷᠣᠠ ᠶ᠋ᠢᠨ ᠰᠠᠬᠢᠭᠤᠰᠤᠨ ᠤ᠋ ᠬᠣᠣᠷᠯᠠᠯ ᠳᠠᠭᠤᠰᠬᠤ ᠦᠭᠡᠢ ᠶ᠋ᠢ ᠥᠭᠡᠯᠦᠨ ᠮᠡᠳᠡᠵᠦ ᠪᠠᠢᠪᠠ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠲᠡᠷᠡ ᠲᠡᠮᠦᠭᠡ᠂ ᠬᠠᠰᠠᠷ᠂ ᠲᠡᠮᠦᠵᠢᠨ ᠭᠤᠷᠪᠠ ᠶ᠋ᠢ ᠭᠡᠷ ᠲᠡᠭᠡᠨ ᠳᠠᠭᠤᠳᠠᠨ ᠢᠷᠡᠭᠦᠯᠵᠡᠢ᠃ ᠬᠠᠴᠢᠭᠤᠨ ᠬᠥᠪᠡᠭᠦᠨ ᠨᠢ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠥᠭᠡᠳᠡ ᠪᠣᠯᠤᠭᠠᠳ ᠬᠡᠳᠦᠨ ᠵᠢᠯ ᠥᠩᠭᠡᠷᠡᠵᠡᠢ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠤ᠋ᠨ ᠵᠥᠷᠢᠴᠡᠯ ᠨᠢᠭᠡᠨᠲᠡ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠤᠬᠠᠭᠠᠨ ᠳ᠋ᠤ᠌ ᠵᠠᠬᠢᠷᠤᠭᠳᠠᠨ ᠲᠡᠢᠯᠳᠡᠬᠦ ᠦᠭᠡᠢ ᠪᠣᠯᠤᠭᠰᠠᠭᠠᠷ ᠪᠠᠢᠭᠠ ᠶ᠋ᠢ ᠥᠭᠡᠯᠦᠨ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠪᠠ᠃ ᠤᠯᠤᠰ ᠪᠠᠢᠭᠤᠯᠵᠤ ᠬᠠᠭᠠᠨ ᠰᠠᠭᠤᠭᠰᠠᠨ ᠲᠡᠮᠦᠵᠢᠨ᠂ ᠳᠡᠭᠦᠦ ᠨᠠᠷ ᠲᠠᠢ ᠪᠠᠨ ᠤᠯᠤᠰ ᠢ᠋ᠶ᠋ᠠᠨ ᠬᠤᠪᠢᠶᠠᠯᠴᠠᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠠᠰᠠ ᠬᠠᠰᠠᠷ ᠥᠪᠡᠷ ᠦ᠋ᠨ ᠵᠢᠳᠬᠦᠵᠦ ᠣᠯᠤᠭᠰᠠᠨ ᠤ᠋ ᠬᠢᠷᠢ ᠪᠡᠷ ᠬᠤᠪᠢ ᠬᠦᠷᠲᠡᠬᠦ ᠶ᠋ᠢ ᠬᠦᠰᠡᠬᠦ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠶᠦᠮ᠃ ᠬᠥᠪᠡᠭᠦᠳ ᠦ᠋ᠨ ᠡᠨᠡ ᠬᠦᠰᠡᠯ ᠬᠢᠰᠠᠯ ᠤ᠋ᠨ ᠵᠥᠷᠢᠴᠡᠯ ᠲᠡᠮᠡᠴᠡᠯ ᠨᠢ ᠨᠢᠭᠤᠵᠤ ᠬᠠᠭᠠᠬᠤ᠂ ᠠᠷᠢᠯᠭᠠᠨ ᠴᠠᠢᠷᠠᠭᠤᠯᠬᠤ ᠬᠦᠴᠦᠲᠡᠢ ᠬᠥᠮᠦᠨ ᠨᠢᠭᠡᠨᠲᠡ ᠦᠭᠡᠢ ᠪᠠᠢᠯᠠ᠃ ᠥᠭᠡᠯᠦᠨ ᠠᠷᠭᠠ ᠪᠠᠨ ᠪᠠᠷᠠᠵᠠᠢ᠃ ᠲᠡᠷᠡ ᠡᠳᠦᠷ ᠶᠢᠰᠦᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠥᠭᠡᠯᠦᠨ ᠦ᠌ ᠭᠡᠷ ᠲᠦ᠍ ᠬᠠᠯᠠᠭᠤᠨ ᠪᠦᠯᠢ ᠪᠡᠷ ᠴᠤᠭᠯᠠᠵᠤ ᠡᠩ ᠦ᠋ᠨ ᠰᠠᠢᠬᠠᠨ ᠨᠠᠢᠷᠯᠠᠵᠤ ᠭᠠᠭᠴᠠ ᠪᠢᠰᠢ ᠬᠤᠨᠳᠠᠭᠠ ᠲᠣᠭᠲᠠᠭᠠᠵᠠᠢ᠃ ᠥᠭᠡᠯᠦᠨ ᠳ᠋ᠦ᠍ ᠬᠥᠪᠡᠭᠦᠳ ᠲᠡᠭᠡᠨ ᠶᠠᠷᠢᠶᠠ ᠭᠡᠵᠦ ᠰᠠᠨᠠᠭᠰᠠᠨ ᠨᠢᠭᠡ ᠳᠣᠮᠣᠭ ᠪᠠᠢᠪᠠ᠃ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠤᠬᠠᠭᠠᠷᠠᠭᠤᠯᠵᠤ ᠬᠡᠬᠡᠷᠡᠭᠦᠯᠬᠦ ᠶ᠋ᠢ ᠲᠡᠷᠡ ᠬᠦᠰᠡᠵᠡᠢ᠃ ᠤᠬᠠᠭᠠᠷᠠᠵᠤ ᠭᠡᠭᠡᠷᠡᠬᠦ ᠨᠢ ᠴᠢᠰᠤ ᠤᠷᠤᠰᠬᠠᠨ ᠠᠯᠠᠯᠳᠤᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠵᠦ ᠪᠣᠯᠬᠤ ᠭᠠᠭᠴᠠ ᠠᠷᠭᠠ ᠭᠡᠵᠦ ᠥᠭᠡᠯᠦᠨ ᠢᠲᠡᠭᠡᠨᠡ᠃ ᠲᠡᠷᠡ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠥᠪᠡᠷ ᠡᠴᠡ ᠪᠡᠨ ᠢᠯᠡᠭᠦᠦ ᠤᠬᠠᠭᠠᠨ ᠲᠠᠢ ᠭᠡᠵᠦ ᠪᠣᠳᠣᠨᠠ᠃ ᠲᠡᠷᠡ ᠳᠣᠮᠣᠭ ᠲᠤ ᠡᠢᠨ ᠥᠭᠦᠯᠡᠳᠡᠭ ᠠᠵᠢ᠃
《ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠠᠩᠬᠠ ᠶᠡᠷᠦ ᠡᠴᠡ ᠬᠠᠷᠠ ᠬᠣᠷᠣᠮ ᠨᠡᠷᠡ ᠲᠡᠢ ᠭᠠᠭᠴᠠ ᠠᠭᠤᠯᠠ ᠯᠠ ᠪᠠᠢᠵᠠᠢ᠃ ᠬᠠᠷᠠ ᠬᠣᠷᠣᠮ ᠠᠭᠤᠯᠠ ᠶ᠋ᠢᠨ ᠰᠤᠭᠤᠨ ᠠ᠋ᠴᠠ ᠨᠢᠭᠡᠨ ᠶᠡᠬᠡ ᠤᠰᠤᠲᠤ ᠮᠥᠷᠡᠨ ᠤᠨᠳᠤᠷᠤᠨ ᠭᠠᠷᠳᠠᠭ ᠢ᠋ ᠮᠥᠩᠬᠡ ᠭᠣᠣᠯ ᠬᠡᠮᠡᠨᠡ᠃ ᠬᠠᠷᠠ ᠬᠣᠷᠣᠮ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠪᠠᠯ ᠮᠥᠩᠬᠡ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠨᠵᠢ ᠪᠡᠷ ᠪᠢᠯᠢᠭ ᠡᠷᠳᠡᠮ ᠲᠡᠭᠦᠰ ᠪᠤᠶᠠᠨᠲᠠᠢ ᠬᠡᠮᠡᠬᠦ ᠡᠪᠦᠭᠡᠨ ᠠᠮᠢᠳᠤᠷᠠᠨ ᠢᠷᠡᠵᠡᠢ᠃ ᠪᠤᠶᠠᠨᠲᠠᠢ ᠡᠪᠦᠭᠡᠨ ᠬᠣᠷᠬᠤᠨ᠂ ᠬᠣᠨᠣᠨ᠂ ᠬᠡᠷᠦᠯᠦᠨ᠂ ᠲᠤᠭᠤᠯᠤᠨ᠂ ᠰᠡᠯᠡᠩᠭᠦᠨ ᠭᠡᠮᠡᠨ ᠲᠠᠪᠤᠨ ᠬᠥᠪᠡᠭᠦᠨ ᠲᠡᠢ ᠠᠵᠢ᠃ ᠲᠡᠳᠡᠨ ᠦ᠌ ᠦᠷᠡ ᠰᠠᠲᠤ ᠥᠰᠴᠦ ᠦᠷᠡᠵᠢᠭᠰᠡᠭᠡᠷ ᠭᠠᠭᠴᠠ ᠮᠥᠩᠬᠡ ᠭᠣᠣᠯ ᠤ᠋ᠨ ᠢ᠋ᠶ᠋ᠠᠨ ᠬᠥᠨᠳᠡᠢ ᠳ᠋ᠦ᠍ ᠪᠠᠭᠲᠠᠵᠤ ᠴᠥᠬᠥᠵᠡᠢ᠃ ᠲᠡᠳᠡᠨ ᠢ᠋ ᠮᠥᠩᠬᠡ ᠭᠣᠣᠯ ᠤ᠋ᠨ ᠬᠢᠨ ᠭᠡᠬᠦ ᠪᠥᠭᠡᠳ ᠶᠠᠪᠤᠭᠠᠨ ᠳ᠋ᠠᠭᠠᠨ ᠵᠦᠭᠡᠷ ᠯᠡ ᠮᠣᠩᠭᠣᠯ ᠤ᠋ᠨ ᠬᠢᠨ ᠮᠣᠩᠭᠣᠯᠴᠤᠳ ᠭᠡᠬᠦ ᠪᠣᠯᠵᠠᠢ᠃ ᠦᠷᠡ ᠠᠴᠢ ᠨᠠᠷ ᠲᠤᠨᠢ ᠨᠤᠲᠤᠭ ᠪᠡᠯᠴᠢᠭᠡᠷ ᠬᠡᠷᠡᠭᠲᠡᠢ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠪᠤᠶᠠᠨᠲᠠᠢ ᠡᠪᠦᠭᠡᠨ ᠲᠩᠷᠢ ᠶ᠋ᠢᠨ ᠬᠦᠴᠦ ᠶ᠋ᠢ ᠠᠭᠤᠯᠤᠭᠰᠠᠨ ᠬᠠᠷᠠ ᠬᠣᠷᠣᠮ ᠠᠭᠤᠯᠠ ᠪᠠᠨ ᠲᠠᠪᠤᠨ ᠶᠡᠬᠡ ᠠᠭᠤᠯᠠᠰ ᠲᠤ ᠬᠤᠪᠢᠶᠠᠵᠤ ᠪᠠᠰᠠ ᠮᠥᠩᠬᠡ ᠭᠣᠣᠯ ᠢ᠋ᠶ᠋ᠠᠨ ᠲᠠᠪᠤᠨ ᠶᠡᠬᠡ ᠭᠣᠣᠯ ᠪᠣᠯᠭᠠᠭᠠᠳ ᠲᠠᠪᠤᠨ ᠬᠥᠪᠡᠭᠦᠨ ᠳ᠋ᠡᠭᠡᠨ ᠥᠮᠴᠢᠯᠡᠭᠦᠯᠦᠨ ᠥᠭᠴᠡᠢ᠃ ᠬᠣᠨᠣᠨ ᠬᠥᠪᠡᠭᠦᠨ ᠦ᠌ ᠨᠤᠲᠤᠭᠯᠠᠬᠤ ᠤᠰᠤ ᠤᠨᠤᠨ ᠭᠣᠣᠯ ᠪᠣᠯᠪᠠ᠃ ᠬᠣᠷᠬᠤᠨ ᠬᠥᠪᠡᠭᠦᠨ ᠦ᠌ ᠨᠤᠲᠤᠭ ᠢ᠋ ᠣᠷᠬᠣᠨ ᠭᠣᠣᠯ ᠭᠡᠨᠡ᠃ ᠬᠡᠷᠦᠯᠦᠨ ᠬᠥᠪᠡᠭᠦᠨ ᠦ᠌ ᠨᠤᠲᠤᠭ ᠬᠡᠷᠦᠯᠦᠨ ᠮᠥᠷᠡᠨ ᠪᠣᠯᠵᠠᠢ᠃ ᠲᠤᠭᠤᠯᠤᠨ ᠬᠥᠪᠡᠭᠦᠨ ᠦ᠌ ᠭᠣᠣᠯ ᠢ᠋ ᠲᠤᠤᠯᠠ ᠬᠡᠮᠡᠵᠡᠢ᠃ ᠰᠡᠯᠡᠩᠭᠦᠨ ᠬᠥᠪᠡᠭᠦᠨ ᠥᠪᠡᠷ ᠦ᠋ᠨ ᠤᠰᠤ ᠶ᠋ᠢ ᠰᠡᠯᠡᠩᠭᠡ ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠢᠩᠭᠢᠵᠦ ᠮᠣᠩᠭᠣᠯᠴᠤᠳ ᠡᠨᠡ ᠶᠡᠬᠡ ᠲᠠᠪᠤᠨ ᠭᠣᠣᠯ ᠤ᠋ᠨ ᠰᠠᠪᠠ ᠳ᠋ᠤ᠌ ᠳᠠᠷᠬᠠᠨ ᠨᠤᠲᠤᠭᠯᠠᠵᠤ ᠢᠷᠡᠵᠡᠢ᠃ ᠬᠠᠷᠢᠨ ᠬᠤᠪᠢᠶᠠᠵᠤ ᠥᠭᠭᠦᠭᠰᠡᠨ ᠬᠠᠷᠠ ᠬᠣᠷᠣᠮ ᠠᠭᠤᠯᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠵᠢᠭᠠᠬᠠᠨ ᠠᠭᠤᠯᠠ ᠶ᠋ᠢ ᠬᠥᠪᠡᠭᠦᠳ ᠨᠢ ᠡᠴᠢᠭᠡ ᠪᠡᠨ ᠳᠤᠷᠠᠰᠤᠨ ᠶᠡᠬᠡ ᠮᠣᠩᠭᠣᠯ ᠠᠭᠤᠯᠠ ᠭᠡᠵᠦ ᠨᠡᠷᠡᠯᠡᠬᠦ ᠪᠡᠷ ᠲᠣᠭᠲᠠᠵᠠᠢ》 ᠭᠡᠵᠡᠢ᠃
ᠡᠨᠡ ᠳᠣᠮᠣᠭ ᠢ᠋ ᠶᠠᠷᠢᠭᠠᠳ ᠥᠭᠡᠯᠦᠨ ᠠᠷᠤ ᠠ᠋ᠴᠠ ᠨᠢ ᠶᠠᠮᠠᠷ ᠨᠢᠭᠡᠨ ᠲᠠᠢᠯᠪᠤᠷᠢ ᠰᠠᠨᠠᠭᠤᠯᠭᠠ ᠬᠡᠯᠡᠭᠰᠡᠨ ᠦᠭᠡᠢ᠃ ᠥᠭᠡᠯᠦᠨ ᠦ᠌ ᠳᠠᠯᠳᠠ ᠰᠠᠨᠠᠭᠠ ᠳᠡᠩᠳᠡᠭᠦᠦ ᠲᠣᠳᠣ ᠪᠠᠢᠪᠠ᠃ ᠡᠨᠡ ᠶᠡᠬᠡ ᠲᠠᠪᠤᠨ ᠭᠣᠣᠯ ᠤ᠋ᠨ ᠤᠯᠤᠰ ᠠᠢᠮᠠᠭ ᠨᠢᠭᠡ ᠢᠵᠠᠭᠤᠷ ᠲᠠᠢ ᠪᠣᠯᠬᠤ ᠶ᠋ᠢ ᠬᠡᠯᠡᠭᠰᠡᠨ ᠡᠴᠡ ᠭᠠᠳᠠᠨᠠ ᠲᠡᠮᠦᠵᠢᠨ ᠬᠠᠰᠠᠷ ᠨᠠᠷ ᠤ᠋ᠨ ᠪᠠᠭᠲᠠᠬᠤ ᠰᠢᠩᠭᠡᠬᠦ ᠭᠠᠵᠠᠷ ᠨᠢ ᠬᠡᠴᠢᠨᠡᠨ ᠶᠡᠬᠡ ᠶ᠋ᠢ ᠤᠬᠠᠭᠠᠷᠠᠭᠤᠯᠤᠨ ᠬᠡᠯᠡᠵᠡᠢ᠃ ᠪᠠᠰᠠ ᠶᠠᠭᠤ ᠶ᠋ᠢ ᠪᠤᠯᠢᠶᠠᠯᠳᠤᠵᠤ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠦᠰᠲᠡᠨ ᠪᠣᠯᠤᠭᠠᠳ ᠪᠠᠢᠭᠠ ᠶ᠋ᠢ ᠴᠦ᠍ ᠣᠢᠯᠠᠭᠠᠭᠤᠯᠪᠠ᠃ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠶᠢᠰᠦᠭᠡᠢ ᠶ᠋ᠢᠨ ᠴᠥᠭᠡᠨ ᠬᠥᠪᠡᠭᠦᠳ ᠪᠦᠦ ᠬᠡᠯᠡ ᠬᠠᠮᠤᠭ ᠮᠣᠩᠭᠣᠯᠴᠤᠳ ᠪᠠᠭᠲᠠᠵᠤ ᠢᠷᠡᠭᠰᠡᠨ ᠢ᠋ ᠬᠡᠯᠡᠵᠡᠢ᠃ ᠬᠥᠪᠡᠭᠦᠳ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠷᠢᠭᠰᠠᠨ ᠳᠣᠮᠣᠭ ᠢ᠋ ᠰᠣᠨᠣᠰᠤᠭᠠᠳ ᠤᠳᠠᠲᠠᠯᠠ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠰᠠᠭᠤᠵᠠᠢ᠃ ᠠᠩᠬᠠ ᠪᠡᠭᠲᠡᠷ ᠲᠡᠢ ᠮᠠᠭᠤᠳᠠᠯᠴᠠᠵᠤ ᠠᠬᠤᠢ ᠳ᠋ᠤ᠌ ᠠᠯᠤᠩᠭᠤᠸᠠ ᠡᠬᠡ ᠶ᠋ᠢᠨ ᠳᠣᠮᠣᠭ ᠢ᠋ ᠬᠥᠪᠡᠭᠦᠳ ᠲᠡᠭᠡᠨ ᠶᠠᠷᠢᠵᠤ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠪᠠ᠃ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠡᠪᠲᠡᠢ ᠪᠠᠢᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠶᠠᠷᠢᠭᠰᠠᠨ ᠲᠡᠷᠡ ᠳᠣᠮᠣᠭ ᠢ᠋ ᠬᠥᠪᠡᠭᠦᠳ ᠨᠢ ᠶᠠᠭᠠᠬᠢᠵᠤ ᠣᠢᠯᠠᠭᠠᠵᠤ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠲᠡᠮᠦᠵᠢᠨ ᠪᠡᠭᠲᠡᠷ ᠢ᠋ ᠠᠯᠠᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠣᠳᠣ ᠡᠨᠡ ᠳᠣᠮᠣᠭ ᠲᠤ ᠲᠡᠳᠡᠨ ᠢ᠋ ᠶᠠᠮᠠᠷ ᠦᠢᠯᠡ ᠳ᠋ᠦ᠍ ᠬᠥᠲᠥᠯᠬᠦ ᠶ᠋ᠢ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠬᠥᠪᠡᠭᠦᠳ ᠨᠢ ᠶᠠᠭ ᠪᠤᠶᠠᠨᠲᠠᠢ ᠡᠪᠦᠭᠡᠨ ᠦ᠌ ᠬᠥᠪᠡᠭᠦᠳ ᠦ᠋ᠨ ᠠᠳᠠᠯᠢ ᠡᠨᠡ ᠭᠠᠵᠠᠷ ᠢ᠋ ᠬᠤᠪᠢᠶᠠᠨ ᠡᠵᠡᠯᠡᠵᠦ ᠰᠠᠭᠤᠭᠠᠰᠠᠢ ᠭᠡᠵᠦ ᠥᠭᠡᠯᠦᠨ ᠬᠦᠰᠡᠵᠦ ᠪᠠᠢᠪᠠ᠃ ᠲᠡᠳᠡᠨ ᠳ᠋ᠦ᠍ ᠬᠣᠭᠣᠷᠣᠨᠳᠣ ᠪᠠᠨ ᠠᠯᠠᠯᠳᠤᠬᠤ ᠶ᠋ᠢᠨ ᠬᠡᠷᠡᠭ ᠣᠭᠲᠣ ᠦᠭᠡᠢ ᠶᠦᠮ᠃ ᠬᠥᠪᠡᠭᠦᠳ ᠨᠢ ᠲᠡᠷᠡ ᠦᠳᠡᠰᠢ ᠡᠪ ᠦᠭᠡᠢ ᠰᠥᠭᠡᠯᠵᠢᠭᠦᠦ ᠦᠭᠡ ᠬᠡᠯᠡᠭᠡ ᠦᠭᠡᠢ ᠪᠥᠭᠡᠳ ᠥᠭᠡᠯᠦᠨ ᠴᠦ᠍ ᠰᠡᠳᠬᠢᠯ ᠲᠡᠨᠢᠭᠡᠷ ᠪᠣᠯᠵᠠᠢ᠃ ᠬᠡᠷᠪᠡ ᠥᠭᠡᠯᠦᠨ ᠡᠨᠡ ᠭᠠᠵᠠᠷ ᠢ᠋ ᠡᠵᠡᠩᠨᠡᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠣᠯ ᠶᠠᠭ ᠯᠠ ᠪᠤᠶᠠᠨᠲᠠᠢ ᠡᠪᠦᠭᠡᠨ ᠦ᠌ ᠠᠳᠠᠯᠢ ᠬᠢᠬᠦ ᠪᠠᠢᠪᠠ᠃ ᠲᠡᠭᠡᠭᠡᠳ ᠮᠣᠩᠭᠣᠯ ᠭᠠᠵᠠᠷ ᠤ᠋ᠨ ᠬᠠᠮᠤᠭ ᠤ᠋ᠨ ᠶᠡᠬᠡ ᠤᠰᠤ᠂ ᠠᠭᠤᠯᠠᠰ ᠬᠥᠪᠡᠭᠦᠳ ᠪᠣᠯᠤᠭᠠᠳ ᠶᠢᠰᠦᠭᠡᠢ ᠶ᠋ᠢᠨ ᠨᠡᠷᠡ ᠪᠡᠷ ᠡᠭᠦᠷᠢᠳᠡ ᠨᠡᠷᠡᠯᠡᠭᠳᠡᠭᠡᠰᠡᠢ ᠭᠡᠵᠦ ᠬᠦᠰᠡᠵᠦ ᠪᠠᠢᠪᠠ᠃ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠭᠤ ᠬᠦᠰᠡᠵᠦ ᠡᠨᠡ ᠳᠣᠮᠣᠭ ᠢ᠋ ᠬᠦᠦᠷᠨᠢᠭᠰᠡᠨ ᠢ᠋ ᠬᠥᠪᠡᠭᠦᠳ ᠨᠢ ᠣᠢᠯᠠᠭᠠᠵᠠᠢ᠃ ᠲᠡᠳᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠤᠬᠠᠭᠠᠨ ᠢ᠋ ᠪᠠᠬᠠᠳᠤᠨ ᠰᠠᠢᠰᠢᠶᠠᠵᠤ ᠪᠠᠢᠭᠠ ᠨᠢ ᠬᠠᠷᠠᠴᠠᠨ ᠠ᠋ᠴᠠ ᠨᠢ ᠢᠯᠡᠳᠲᠡ ᠪᠠᠢᠯᠠ᠃ ᠲᠡᠷᠡ ᠳᠤᠮᠳᠠ ᠪᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠷᠢᠭᠰᠠᠨ ᠲᠡᠷᠡ ᠳᠣᠮᠣᠭ ᠢ᠋ ᠲᠡᠮᠦᠵᠢᠨ ᠶᠡᠬᠡᠳᠡ ᠲᠣᠭᠣᠵᠤ ᠣᠯᠠᠨ ᠬᠣᠨᠣᠭ ᠪᠣᠳᠣᠵᠠᠢ᠃ ᠪᠤᠶᠠᠨᠲᠠᠢ ᠭᠡᠭᠴᠢ ᠲᠡᠷᠡ ᠡᠪᠦᠭᠡᠨ ᠲᠠᠯᠠ ᠨᠤᠲᠤᠭ ᠤ᠋ᠨ ᠭᠣᠣᠯ ᠤᠰᠤ ᠶ᠋ᠢ ᠬᠥᠪᠡᠭᠦᠳ ᠲᠡᠭᠡᠨ ᠬᠤᠪᠢᠶᠠᠨ ᠥᠭᠭᠦᠭᠰᠡᠨ ᠨᠢ ᠳᠠᠭᠤᠷᠢᠶᠠᠯᠲᠠᠢ ᠰᠠᠨᠠᠭᠳᠠᠭᠰᠠᠨ ᠴᠦ᠍ ᠡᠨᠡ ᠳᠣᠮᠣᠭ ᠲᠤ ᠭᠠᠷᠤᠭᠰᠠᠨ ᠲᠡᠷᠡ ᠶᠡᠬᠡ ᠮᠣᠩᠭᠣᠯ ᠠᠭᠤᠯᠠ ᠶ᠋ᠢᠨ ᠨᠡᠷᠡ ᠶᠡᠬᠡᠳᠡ ᠲᠠᠭᠠᠯᠠᠭᠳᠠᠵᠤ ᠲᠡᠭᠦᠨ ᠦ᠌ ᠪᠠᠢᠭᠤᠯᠬᠤ ᠤᠯᠤᠰ ᠤ᠋ᠨ ᠨᠡᠷᠡ ᠪᠣᠯᠬᠤ ᠶ᠋ᠢ ᠮᠡᠳᠡᠷᠡᠵᠡᠢ᠃ ᠢᠩᠭᠢᠵᠦ ᠥᠭᠡᠯᠦᠨ ᠡᠬᠡ ᠨᠢ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠪᠠᠢᠭᠤᠯᠬᠤ ᠶᠡᠬᠡ ᠤᠯᠤᠰ ᠤ᠋ᠨ ᠨᠡᠷᠡ ᠶ᠋ᠢ ᠬᠡᠯᠡᠭᠰᠡᠨ ᠨᠢ ᠲᠩᠷᠢ ᠶ᠋ᠢᠨ ᠬᠦᠰᠡᠯ ᠪᠠᠢᠵᠠᠢ᠃ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠡᠪᠯᠡᠷᠡᠭᠦᠯᠬᠦ ᠭᠡᠵᠦ ᠶᠠᠷᠢᠭᠰᠠᠨ ᠳᠣᠮᠣᠭ ᠲᠡᠮᠦᠵᠢᠨ ᠢ᠋ ᠪᠦᠷ ᠠᠯᠤᠰ ᠬᠣᠯᠠ ᠶ᠋ᠢᠨ ᠶᠡᠬᠡ ᠵᠣᠷᠢᠯᠭᠠ ᠳ᠋ᠤ᠌ ᠳᠠᠭᠤᠳᠠᠵᠤ ᠪᠠᠰᠠ ᠡᠷᠭᠢᠯᠲᠡ ᠦᠭᠡᠢ ᠵᠥᠪ ᠵᠠᠮ ᠢ᠋ᠶ᠋ᠠᠷ ᠤᠷᠤᠭᠰᠢᠯᠠᠵᠤ ᠪᠠᠢᠭᠠ ᠶ᠋ᠢ ᠨᠢ ᠪᠠᠲᠤᠯᠠᠬᠤ ᠰᠢᠭ᠋ ᠰᠠᠨᠠᠭᠳᠠᠭᠰᠠᠨ ᠪᠢᠯᠡ᠃ ᠦᠨᠡᠬᠡᠷ ᠬᠠᠷᠠ ᠬᠣᠷᠣᠮ ᠠᠭᠤᠯᠠ ᠶ᠋ᠢᠨ ᠲᠤᠬᠠᠢ ᠳᠣᠮᠣᠭ ᠲᠤ ᠭᠠᠷᠳᠠᠭ ᠰᠢᠭ᠋ ᠬᠠᠷᠠ ᠬᠣᠷᠣᠮ ᠡᠬᠢᠲᠡᠢ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠪᠠᠢᠭᠤᠯᠬᠤ ᠶ᠋ᠢ ᠡᠨᠡ ᠳᠣᠮᠣᠭ ᠲᠤ ᠵᠥᠩᠨᠡᠨ ᠵᠢᠭᠠᠵᠤ ᠥᠭᠦᠯᠡᠵᠡᠢ᠃ ᠥᠭᠡᠯᠦᠨ ᠡᠬᠡ ᠨᠢ ᠴᠣᠬᠣᠮ ᠢᠩᠭᠢᠵᠦ ᠤᠬᠠᠭᠠᠷᠠᠭᠠᠰᠠᠢ ᠭᠡᠵᠦ ᠬᠦᠰᠡᠭᠰᠡᠨ ᠳ᠋ᠡᠭᠡᠨ ᠡᠨᠡ ᠬᠦ᠌ ᠳᠣᠮᠣᠭ ᠢ᠋ ᠶᠠᠷᠢᠭᠰᠠᠨ ᠭᠡᠳᠡᠭ ᠲᠦ᠍ ᠲᠡᠷᠡ ᠢᠲᠡᠭᠡᠪᠡ᠃ ᠲᠡᠮᠦᠵᠢᠨ ᠢᠩᠭᠢᠵᠦ ᠪᠣᠳᠣᠭᠠᠳ ᠡᠷᠭᠢᠯᠲᠡ ᠦᠭᠡᠢ ᠵᠣᠷᠢᠭᠵᠢᠨ ᠰᠢᠯᠤᠭᠤᠳᠠᠵᠤ ᠬᠠᠰᠠᠷ ᠢ᠋ ᠳᠠᠭᠤᠳᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠵᠤ ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠳᠠᠢᠯᠠᠬᠤ ᠳ᠋ᠤ᠌ ᠪᠡᠯᠡᠳᠬᠦ ᠶ᠋ᠢ ᠲᠤᠰᠢᠶᠠᠵᠠᠢ᠃ ᠬᠠᠰᠠᠷ ᠤ᠋ᠨ ᠰᠡᠳᠬᠢᠯ ᠴᠦ᠍ ᠴᠡᠪᠡᠷᠰᠢᠨ᠂ ᠣᠯᠵᠠᠯᠠᠭᠳᠠᠭᠰᠠᠨ ᠲᠠᠲ᠋ᠠᠷ ᠢᠷᠭᠡᠳ ᠢ᠋ ᠴᠠᠭᠠᠵᠠᠯᠠᠬᠤ ᠠ᠋ᠴᠠ ᠪᠣᠯᠵᠤ ᠡᠭᠦᠰᠦᠭᠰᠡᠨ ᠭᠣᠮᠣᠳᠠᠯ ᠢ᠋ᠶ᠋ᠠᠨ ᠳᠠᠷᠤᠢ ᠮᠠᠷᠲᠠᠵᠤ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠵᠤ ᠡᠬᠢᠯᠡᠵᠡᠢ᠃
ᠥᠭᠡᠯᠦᠨ ᠦ᠌ ᠶᠠᠷᠢᠭᠰᠠᠨ ᠳᠣᠮᠣᠭ ᠢᠩᠭᠢᠵᠦ ᠣᠭᠲᠣ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠦᠷᠡ ᠳ᠋ᠦᠩ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠢ᠋ ᠲᠡᠷᠡ ᠲᠠᠭᠠᠮᠠᠭᠯᠠᠭᠰᠠᠨ ᠦᠭᠡᠢ᠃ ᠶᠠᠮᠠᠷ ᠴᠦ᠍ ᠪᠣᠯᠪᠠ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠡᠭᠦᠰᠦᠭᠰᠡᠨ ᠠᠶᠤᠮᠰᠢᠭᠲᠤ ᠬᠡᠷᠡᠭᠦᠯ ᠠᠶᠠᠲᠠᠢ ᠨᠠᠮᠳᠠᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠵᠠᠢ᠃ ᠥᠭᠡᠯᠦᠨ ᠦ᠌ ᠠᠵᠠ ᠵᠢᠷᠭᠠᠯ ᠤ᠋ᠨ ᠦᠨᠳᠦᠰᠦ ᠬᠥᠪᠡᠭᠦᠳ ᠦ᠋ᠨ ᠬᠢᠨᠢ ᠡᠪ ᠨᠢᠭᠡᠳᠦᠯ ᠪᠠᠢᠪᠠ᠃ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠢ᠋ ᠪᠠᠢᠭᠤᠯᠵᠤ ᠬᠡᠯᠡ ᠨᠢᠭᠡᠲᠡᠢ ᠨᠡᠭᠦᠳᠡᠯᠴᠢᠨ ᠠᠢᠮᠠᠭ ᠤ᠋ᠳ ᠲᠡᠮᠦᠵᠢᠨ ᠦ᠌ ᠳᠣᠣᠷᠠ ᠨᠢᠭᠡᠳᠦᠭᠰᠡᠨ ᠨᠢ ᠥᠭᠡᠯᠦᠨ ᠪᠣᠯᠤᠭᠠᠳ ᠶᠢᠰᠦᠭᠡᠢ ᠶ᠋ᠢᠨ ᠡᠴᠦᠰ ᠦ᠋ᠨ ᠬᠦᠰᠡᠯ ᠪᠠᠢᠯᠠ᠃ ᠭᠡᠲᠡᠯᠡ ᠲᠡᠮᠦᠵᠢᠨ ᠪᠣᠯᠤᠭᠠᠳ ᠬᠠᠰᠠᠷ ᠲᠤ ᠡᠭᠦᠨ ᠡᠴᠡ ᠬᠣᠯᠠ ᠶ᠋ᠢᠨ ᠶᠡᠬᠡ ᠬᠦᠰᠡᠯ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠥᠭᠡᠯᠦᠨ ᠪᠠᠬᠠᠷᠳᠤᠨ ᠰᠣᠴᠢᠵᠠᠢ᠃ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠲᠠᠩᠭᠤᠳ ᠤᠯᠤᠰ ᠢ᠋ ᠳᠠᠢᠯᠠᠭᠠᠳ ᠵᠣᠭᠰᠣᠭᠰᠠᠨ ᠦᠭᠡᠢ ᠪᠦᠷ ᠬᠦᠴᠦᠷᠬᠡᠭ ᠠᠯᠲᠠᠨ ᠤᠯᠤᠰ ᠲᠤ ᠳᠣᠪᠲᠣᠯᠵᠤ ᠴᠠᠭᠠᠨ ᠬᠡᠷᠡᠮ ᠢ᠋ ᠳᠠᠪᠠᠬᠤ ᠪᠠᠷ ᠪᠡᠯᠡᠳᠬᠡᠵᠦ ᠡᠬᠢᠯᠡᠭᠰᠡᠨ ᠨᠢ ᠥᠭᠡᠯᠦᠨ ᠢ᠋ ᠠᠰᠤᠷᠤ ᠶᠡᠬᠡ ᠪᠡᠷ ᠴᠣᠴᠢᠷᠳᠠᠭᠤᠯᠵᠤ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠢᠷᠡᠭᠡᠳᠦᠢ ᠳ᠋ᠦ᠍ ᠰᠠᠨᠠᠭᠠ ᠵᠣᠪᠠᠨᠢᠬᠤ ᠳ᠋ᠤ᠌ ᠬᠦᠷᠭᠡᠪᠡ᠃ ᠠᠯᠲᠠᠨ ᠤᠯᠤᠰ ᠲᠤ ᠳᠣᠪᠲᠣᠯᠬᠤ ᠨᠢ ᠮᠡᠷᠭᠢᠳ᠂ ᠨᠠᠢ᠍ᠮᠠᠨ ᠠᠢᠮᠠᠭ ᠲᠠᠢ ᠪᠠᠢᠯᠳᠤᠬᠤ ᠠ᠋ᠴᠠ ᠣᠭᠲᠣ ᠥᠭᠡᠷᠡ᠂ ᠠᠮᠢ ᠪᠠᠨ ᠦᠷᠡᠵᠦ ᠤᠯᠤᠰ ᠢ᠋ᠶ᠋ᠠᠨ ᠠᠯᠳᠠᠵᠤ ᠮᠡᠳᠡᠬᠦ ᠠᠶᠤᠯᠲᠠᠢ ᠬᠡᠷᠡᠭ ᠭᠡᠵᠦ ᠪᠣᠳᠣᠭᠳᠠᠵᠠᠢ᠃ ᠠᠯᠲᠠᠨ ᠤᠯᠤᠰ ᠪᠣᠯ ᠲᠡᠳᠡᠨ ᠦ᠌ ᠳᠡᠷᠭᠡᠳᠡ ᠠᠷᠰᠯᠠᠨ ᠪᠠᠷᠰ ᠮᠡᠲᠦ ᠬᠦᠴᠦᠷᠬᠡᠭ᠂ ᠦᠢ ᠲᠦᠮᠡᠨ ᠴᠡᠷᠢᠭ ᠲᠡᠢ᠂ ᠥᠨᠳᠥᠷ ᠶᠡᠬᠡ ᠬᠡᠷᠡᠮ ᠲᠡᠢ᠂ ᠳᠡᠢᠯᠦᠨᠡ ᠭᠡᠵᠦ ᠰᠠᠨᠠᠬᠤ ᠳ᠋ᠤ᠌ ᠳᠠᠩᠴᠤ ᠢᠲᠡᠭᠡᠮᠡ ᠦᠭᠡᠢ ᠰᠠᠨᠠᠭᠳᠠᠵᠠᠢ᠃ ᠦᠬᠦᠯ ᠨᠢ ᠢᠷᠡᠭᠰᠡᠨ ᠬᠤᠯᠤᠭᠠᠨᠠ ᠮᠤᠤᠷ ᠤ᠋ᠨ ᠰᠠᠬᠠᠯ ᠢ᠋ ᠣᠷᠣᠯᠳᠣᠳᠠᠭ ᠤ᠋ᠨ ᠦᠯᠢᠭᠡᠷ ᠪᠣᠯᠤᠨᠠ ᠭᠡᠵᠦ ᠡᠮᠢᠶᠡᠵᠦ ᠪᠠᠢᠪᠠ᠃ ᠮᠣᠩᠭᠣᠯ ᠠᠢᠮᠠᠭ ᠤ᠋ᠳ ᠢ᠋ᠶ᠋ᠠᠨ ᠨᠢᠭᠡᠳᠬᠡᠨ ᠥᠪᠡᠷ ᠦ᠋ᠨ ᠶᠡᠬᠡ ᠤᠯᠤᠰ ᠢ᠋ ᠪᠠᠢᠭᠤᠯᠪᠠ᠃ ᠣᠳᠣ ᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠠᠭᠠᠬᠢᠨᠠ᠃ ᠳᠠᠢᠰᠤᠨ ᠡᠲᠡᠭᠡᠳ ᠢ᠋ᠶ᠋ᠡᠨ ᠬᠢᠯᠢᠩᠨᠡᠭᠦᠯᠦᠯ ᠥᠬᠡᠢ ᠠᠮᠤᠷ ᠲᠠᠢᠪᠤᠩ ᠠᠮᠢᠳᠤᠷᠠᠬᠤ ᠶ᠋ᠢ ᠥᠭᠡᠯᠦᠨ ᠬᠦᠰᠡᠵᠦ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠢᠳᠬᠠᠵᠤ ᠨᠢᠭᠡ ᠦᠵᠡᠪᠡ᠃ ᠬᠥᠭᠰᠢᠨ ᠨᠠᠰᠤᠲᠠᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠯᠠᠢᠯᠭᠠᠨ᠂ ᠦᠬᠦᠬᠦ ᠪᠡᠷ ᠢ᠋ᠶ᠋ᠡᠨ ᠠᠶᠤᠯᠭᠠᠵᠤ ᠨᠢᠭᠡ ᠦᠵᠡᠭᠡᠳ ᠲᠤᠰᠠ ᠶ᠋ᠢ ᠡᠰᠡ ᠣᠯᠵᠠᠢ᠃ ᠲᠡᠮᠦᠵᠢᠨ ᠪᠣᠯᠤᠭᠠᠳ ᠲᠡᠭᠦᠨ ᠦ᠌ ᠨᠥᠬᠥᠳ ᠢ᠋ ᠡᠷᠬᠢᠭᠡᠨ ᠲᠣᠭᠲᠠᠭᠠᠬᠤ ᠬᠦᠴᠦ ᠨᠢᠭᠡᠨᠲᠡ ᠦᠭᠡᠢ ᠪᠣᠯᠵᠠᠢ᠃ ᠡᠴᠦᠰ ᠲᠦ᠋ᠨᠢ ᠲᠡᠮᠦᠵᠢᠨ ᠢ᠋ ᠶᠡᠬᠡ ᠲᠡᠢᠨ ᠬᠢᠬᠦ ᠡᠴᠡ ᠢᠳᠬᠠᠨ ᠤᠬᠤᠷᠢᠭᠠᠬᠤ ᠪᠢᠰᠢ ᠬᠠᠷᠢᠨ ᠢᠯᠠᠯᠲᠠ ᠪᠠᠢᠭᠤᠯᠬᠤ ᠳ᠋ᠤᠨᠢ ᠳᠠᠮᠵᠢᠨ ᠵᠣᠷᠢᠭᠵᠢᠭᠤᠯᠬᠤ ᠬᠡᠷᠡᠭᠲᠡᠢ ᠶ᠋ᠢ ᠣᠢᠯᠠᠭᠠᠵᠠᠢ᠃ ᠭᠡᠪᠡᠴᠦ ᠥᠨᠳᠥᠷ ᠨᠠᠰᠤᠲᠠᠢ ᠪᠣᠯᠤᠭᠰᠠᠨ ᠥᠭᠡᠯᠦᠨ ᠶᠠᠭᠤᠬᠠᠨ ᠬᠢᠵᠦ ᠴᠢᠳᠠᠬᠤ ᠪᠢᠯᠡ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠯᠡ ᠥᠨᠥᠬᠢ ᠡᠩᠭᠡᠷ ᠦ᠋ᠨ ᠮᠤᠬᠤᠷ ᠲᠤ ᠣᠶᠣᠭᠰᠠᠨ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠠᠢ᠃ ᠵᠦᠷᠴᠢᠳ ᠦ᠋ᠨ ᠠᠯᠲᠠᠨ ᠤᠯᠤᠰ ᠢ᠋ ᠳᠠᠢᠯᠠᠨ ᠰᠥᠨᠥᠭᠡᠨᠡ ᠭᠡᠳᠡᠭ ᠳᠠᠩᠴᠤ ᠠᠯᠤᠰ ᠬᠣᠯᠠ ᠭᠥᠷᠥᠰᠢ ᠦᠭᠡᠢ ᠵᠣᠷᠢᠯᠭᠠ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠴᠦ᠍ ᠨᠢᠭᠡᠨᠲᠡ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠠᠳᠬᠤᠨ ᠲᠥᠷᠥᠭᠰᠡᠨ ᠪᠠᠭᠠᠲᠤᠷ ᠡᠷᠡ ᠲᠤᠯᠠ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠨᠢ ᠵᠣᠷᠢᠭᠯᠠᠭᠰᠠᠨ ᠯᠠ ᠪᠣᠯᠭᠠᠨ ᠴᠢᠳᠠᠨᠠ ᠭᠡᠵᠦ ᠢᠲᠡᠭᠡᠵᠡᠢ᠃ ᠭᠠᠭᠴᠠ ᠡᠷᠡᠭᠡᠯᠵᠡᠭᠡ ᠲᠥᠷᠥᠭᠦᠯᠦᠭᠰᠡᠨ ᠵᠦᠢᠯ ᠨᠢ ᠨᠠᠰᠤ ᠨᠢ ᠬᠦᠷᠬᠦ ᠦᠭᠡᠢ ᠪᠠᠢᠬᠤ ᠪᠣᠢ ᠭᠡᠰᠡᠨ ᠪᠣᠳᠣᠯ ᠪᠠᠢᠪᠠ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠥᠰᠲᠦ ᠠᠯᠲᠠᠨ ᠤᠯᠤᠰ ᠢ᠋ ᠮᠥᠬᠥᠭᠡᠵᠦ ᠠᠯᠳᠠᠷ ᠢ᠋ᠶ᠋ᠠᠨ ᠮᠥᠩᠬᠡᠯᠡᠭᠡᠰᠡᠢ ᠭᠡᠮᠡᠨ ᠥᠭᠡᠯᠦᠨ ᠲᠤᠢᠯ ᠤ᠋ᠨ ᠶᠡᠬᠡ ᠪᠡᠷ ᠬᠦᠰᠡᠳᠡᠭ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠬᠥᠪᠡᠭᠦᠨ ᠦ᠌ ᠪᠡᠨ ᠡᠨᠡ ᠶᠡᠬᠡ ᠦᠢᠯᠡ ᠳ᠋ᠦ᠍ ᠥᠪᠡᠷ ᠦ᠋ᠨ ᠦᠯᠡᠳᠡᠭᠰᠡᠨ ᠪᠣᠭᠣᠨᠢ ᠨᠠᠰᠤ ᠪᠠᠨ ᠵᠣᠷᠢᠭᠤᠯᠬᠤ ᠪᠠᠷ ᠰᠢᠢᠳᠪᠡ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠨᠢ ᠲᠩᠷᠢ ᠶ᠋ᠢᠨ ᠬᠦᠰᠡᠯ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠥᠷᠥᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠳᠡᠭ ᠦᠭᠡᠢ ᠶᠦᠮ ᠪᠢᠰᠢ ᠪᠢᠵᠡ ᠭᠡᠰᠡᠨ ᠪᠣᠳᠣᠯ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠲᠥᠷᠥᠬᠦ ᠪᠣᠯᠵᠠᠢ᠃ ᠥᠭᠡᠯᠦᠨ ᠲᠡᠮᠦᠵᠢᠨ ᠦ᠌ ᠠᠳᠬᠤᠵᠤ ᠲᠥᠷᠥᠭᠰᠡᠨ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠦ᠋ᠨ ᠲᠤᠬᠠᠢ ᠶᠢᠰᠦᠭᠡᠢ ᠡᠴᠡ ᠥᠭᠡᠷᠡ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠭᠡ ᠦᠭᠡᠢ ᠡᠳᠦᠢ ᠬᠦᠷᠦᠭᠰᠡᠨ ᠪᠢᠯᠡ᠃ ᠬᠠᠷᠢᠨ ᠣᠳᠣ ᠡᠨᠡ ᠲᠤᠬᠠᠢ ᠲᠡᠮᠦᠵᠢᠨ ᠳ᠋ᠦ᠍ ᠬᠡᠯᠡᠬᠦ ᠡᠰᠡᠬᠦ ᠪᠡᠨ ᠰᠢᠢᠳᠴᠦ ᠴᠢᠳᠠᠬᠤ ᠦᠭᠡᠢ ᠲᠡᠭᠡᠨᠡᠭᠡᠯᠵᠡᠵᠦ ᠪᠠᠢᠪᠠ᠃ ᠲᠡᠮᠦᠵᠢᠨ ᠢ᠋ ᠲᠥᠷᠥᠭᠰᠡᠨ ᠦ᠌ ᠳᠠᠷᠠᠭᠠ ᠥᠨᠥ ᠨᠥᠵᠢ ᠪᠣᠯᠤᠨ ᠬᠤᠪᠢᠷᠠᠭᠰᠠᠨ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠥᠪᠡᠷ ᠦ᠋ᠨ ᠪᠣᠳᠣᠵᠤ ᠣᠯᠤᠭᠰᠠᠨ ᠠᠷᠭᠠ ᠪᠠᠷ ᠬᠠᠳᠠᠭᠠᠯᠠᠨ ᠬᠢᠮᠠᠭᠠᠳᠠᠵᠤ ᠢᠷᠡᠵᠡᠢ᠃ ᠬᠠᠷᠢᠨ ᠣᠳᠣ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠬᠡᠷᠬᠢᠬᠦ ᠲᠤᠬᠠᠢ ᠰᠢᠢᠳᠴᠦ ᠡᠰᠡ ᠴᠢᠳᠠᠵᠠᠢ᠃ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠬᠢᠨᠢ ᠶᠡᠬᠡ ᠦᠢᠯᠡᠰ ᠲᠦ᠍ ᠶᠠᠮᠠᠷ ᠴᠦ᠍ ᠪᠣᠯᠪᠠ ᠬᠡᠷᠡᠭ ᠪᠣᠯᠤᠨᠠ ᠭᠡᠵᠦ ᠢᠲᠡᠭᠡᠵᠦ ᠪᠠᠢᠪᠠ᠃ ᠪᠠᠰᠠ ᠪᠤᠷᠤᠭᠤ ᠵᠥᠷᠢᠭᠦᠦ ᠬᠡᠷᠡᠭ ᠬᠢᠵᠦ ᠲᠩᠷᠢ ᠶ᠋ᠢ ᠬᠢᠯᠢᠩᠨᠡᠭᠦᠯᠬᠦ ᠡᠴᠡ ᠡᠮᠢᠶᠡᠬᠦ ᠲᠤᠯᠠ ᠶᠠᠭᠠᠬᠢᠬᠤ ᠴᠦ᠍ ᠤᠴᠢᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠵᠠᠢ᠃ ᠤᠭ ᠨᠢ ᠢᠳᠢ ᠰᠢᠳᠢ ᠶᠡᠬᠡᠲᠡᠢ ᠲᠡᠭᠡᠭᠡᠳ ᠲᠡᠮᠦᠵᠢᠨ ᠦ᠌ ᠶᠡᠬᠡᠳᠡ ᠬᠦᠨᠳᠦᠳᠬᠡᠨ ᠰᠢᠲᠦᠳᠡᠭ ᠳᠠᠪ ᠲᠩᠷᠢ ᠪᠥᠬᠡ ᠡᠴᠡ ᠠᠰᠠᠭᠤᠮᠠᠷ ᠰᠠᠨᠠᠭᠳᠠᠳᠠᠭ ᠪᠠᠢᠭᠰᠠᠨ ᠴᠦ᠍ ᠴᠠᠭᠠᠷᠢᠭᠯᠠᠭᠰᠠᠭᠠᠷ ᠪᠠᠢᠲᠠᠯᠠ ᠲᠡᠮᠦᠵᠢᠨ ᠳᠠᠪ ᠲᠩᠷᠢ ᠪᠥᠬᠡ ᠶ᠋ᠢ ᠦᠬᠦᠭᠦᠯᠦᠭᠰᠡᠨ ᠪᠢᠯᠡ᠃ ᠳᠠᠪ ᠲᠩᠷᠢ ᠪᠥᠬᠡ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠡᠷᠬᠡ ᠪᠤᠯᠢᠶᠠᠯᠳᠤᠭᠠᠳ ᠠᠯᠠᠭᠳᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠥᠭᠡᠯᠦᠨ ᠡᠨᠡ ᠲᠡᠷᠡ ᠪᠥᠬᠡ ᠵᠠᠢᠷᠠᠩ ᠳ᠋ᠤ᠌ ᠢᠲᠡᠭᠡᠯ ᠠᠯᠳᠠᠷᠠᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠬᠥᠪᠡᠭᠦᠨ ᠦ᠌ ᠪᠡᠨ ᠠᠳᠬᠤᠵᠤ ᠲᠥᠷᠥᠭᠰᠡᠨ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠨᠢᠭᠤᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠮᠦᠵᠢᠨ ᠳ᠋ᠡᠭᠡᠨ ᠲᠤᠰᠠ ᠪᠣᠯᠪᠠ ᠤᠤ᠂ ᠤᠰᠤ ᠪᠣᠯᠪᠠ ᠤᠤ ᠭᠡᠳᠡᠭ ᠢ᠋ᠶ᠋ᠡᠨ ᠮᠠᠲᠠᠮᠠᠷ ᠰᠠᠨᠠᠭᠳᠠᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ᠃ ᠶᠠᠭᠠᠬᠢᠭᠠᠳ ᠴᠦ᠍ ᠶᠤᠮ ᠪᠣᠢ ᠡᠨᠡ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠴᠠᠭᠠᠰᠢᠳᠠ ᠲᠡᠮᠦᠵᠢᠨ ᠳ᠋ᠦ᠍ ᠬᠡᠷᠡᠭ ᠲᠤᠰᠠ ᠪᠣᠯᠬᠤ ᠮᠡᠲᠦ ᠰᠠᠨᠠᠭᠳᠠᠳᠠᠭ ᠪᠠᠢᠯᠠ᠃ ᠶᠠᠭᠤᠲᠠᠢ ᠴᠦ᠍ ᠡᠨᠡ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠲᠡᠮᠦᠵᠢᠨ ᠡᠴᠡ ᠥᠭᠡᠷᠡ ᠬᠥᠮᠦᠨ ᠡᠵᠡᠮᠰᠢᠵᠦ ᠡᠳ᠋ᠯᠡᠵᠦ ᠪᠣᠯᠬᠤ ᠦᠭᠡᠢ ᠶ᠋ᠢ ᠣᠢᠯᠠᠭᠠᠵᠤ ᠪᠠᠢᠪᠠ᠃ ᠲᠡᠭᠡᠭᠡᠳ ᠪᠣᠳᠣᠭᠠᠳ ᠪᠣᠳᠣᠭᠠᠳ ᠪᠤᠲᠠ ᠶ᠋ᠢᠨ ᠰᠢᠭᠢᠷᠡ ᠳᠥᠷᠪᠡ ᠭᠡᠳᠡᠭ ᠪᠣᠯᠵᠤ ᠠᠳᠬᠤᠵᠤ ᠲᠥᠷᠥᠭᠰᠡᠨ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ᠶ᠋ᠡᠨ ᠬᠡᠷᠬᠢᠬᠦ ᠪᠡᠨ ᠲᠡᠮᠦᠵᠢᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠭ ᠭᠡᠵᠦ ᠰᠢᠢᠳᠴᠡᠢ᠃ ᠢᠩᠭᠢᠵᠦ ᠰᠢᠢᠳᠦᠭᠰᠡᠨ ᠨᠢ ᠲᠡᠮᠦᠵᠢᠨ ᠪᠦᠬᠦ ᠴᠡᠷᠢᠭ ᠢ᠋ᠶ᠋ᠡᠨ ᠨᠢᠭᠡᠳᠬᠡᠨ ᠵᠠᠰᠠᠭᠠᠳ ᠠᠯᠲᠠᠨ ᠤᠯᠤᠰ ᠲᠤ ᠳᠣᠪᠲᠣᠯᠬᠤ ᠪᠠᠷ ᠬᠥᠳᠡᠯᠬᠦ ᠶ᠋ᠢᠨ ᠤᠷᠢᠳ ᠪᠣᠯᠵᠠᠢ᠃ ᠲᠩᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠬᠠᠳᠠᠭᠠᠯᠠᠵᠤ ᠢᠷᠡᠭᠰᠡᠨ ᠨᠢ ᠵᠥᠪ ᠭᠡᠳᠡᠭ ᠲᠡᠭᠡᠨ ᠥᠭᠡᠯᠦᠨ ᠡᠷᠡᠭᠡᠯᠵᠡᠬᠦ ᠦᠭᠡᠢ ᠪᠠᠢᠪᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠴᠦ᠍ ᠲᠡᠭᠦᠨ ᠢ᠋ ᠲᠡᠮᠦᠵᠢᠨ ᠡᠴᠡ ᠥᠭᠡᠷᠡ ᠬᠥᠮᠦᠨ ᠦᠵᠡᠬᠦ ᠶᠣᠰᠣ ᠦᠭᠡᠢ ᠭᠡᠵᠦ ᠪᠣᠳᠣᠵᠠᠢ᠃ ᠥᠭᠡᠯᠦᠨ ᠲᠡᠷᠡ ᠲᠡᠮᠳᠡᠭ ᠢ᠋ ᠳᠠᠬᠢᠨ ᠬᠠᠳᠠᠭᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠤᠴᠢᠷ ᠨᠢ ᠠᠯᠲᠠᠨ ᠤᠯᠤᠰ ᠲᠤ ᠣᠳᠬᠤ ᠭᠡᠵᠦ ᠪᠣᠢ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠲᠡᠢ ᠪᠡᠨ ᠲᠡᠷᠡ ᠪᠡᠷ ᠳᠠᠬᠢᠨ ᠠᠭᠤᠯᠵᠠᠬᠤ ᠦᠭᠡᠢ ᠭᠡᠵᠦ ᠰᠢᠢᠳᠦᠭᠡᠳ ᠪᠠᠢᠪᠠ᠃ ᠥᠭᠡᠯᠦᠨ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠳ᠋ᠡᠭᠡᠨ ᠢᠯᠡᠭᠦᠦ ᠠᠴᠢᠶᠠ ᠪᠣᠯᠬᠤ ᠶ᠋ᠢ ᠬᠦᠰᠡᠭᠰᠡᠨ ᠦᠭᠡᠢ᠃ ᠬᠣᠯᠠ ᠶ᠋ᠢᠨ ᠶᠡᠬᠡ ᠠᠶᠠᠨ ᠳ᠋ᠤ᠌ ᠭᠠᠷᠴᠤ ᠪᠣᠢ ᠬᠥᠪᠡᠭᠦᠨ ᠦ᠌ ᠪᠡᠨ ᠠᠴᠢᠶᠠ ᠶ᠋ᠢ ᠬᠥᠩᠭᠡᠯᠡᠬᠦ ᠡᠴᠡ ᠢᠯᠡᠭᠦᠦ ᠲᠤᠰᠠ ᠶ᠋ᠢ ᠥᠭᠡᠯᠦᠨ ᠦᠵᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠮᠡᠳᠡᠵᠦ ᠪᠠᠢᠪᠠ᠃ ᠣᠳᠣ ᠠᠯᠲᠠᠨ ᠤᠯᠤᠰ ᠲᠠᠢ ᠬᠢᠬᠦ ᠶᠡᠬᠡ ᠳᠣᠯᠣᠭᠠᠨ ᠳ᠋ᠤ᠌ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠦᠬᠦᠬᠦ ᠶ᠋ᠢ ᠦᠵᠡᠬᠦ ᠬᠦᠰᠡᠯ ᠲᠡᠭᠦᠨ ᠳ᠋ᠦ᠍ ᠳᠠᠩᠴᠤ ᠪᠠᠢᠭᠰᠠᠨ ᠦᠭᠡᠢ᠃ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠳᠣᠯᠣᠭᠠᠨ ᠳ᠋ᠤ᠌ ᠦᠬᠦᠬᠦ ᠶ᠋ᠢ ᠪᠠᠰᠠ ᠳᠡᠢᠯᠦᠭᠳᠡᠵᠦ ᠢᠯᠠᠭᠳᠠᠬᠤ ᠶ᠋ᠢ ᠦᠵᠡᠬᠦ ᠡᠴᠡ ᠦᠬᠦᠭᠰᠡᠨ ᠨᠢ ᠰᠢᠯᠤᠭᠤᠨ ᠪᠢᠯᠡ᠃ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠲᠩᠷᠢ ᠳ᠋ᠦ᠍ ᠳᠠᠭᠠᠳᠬᠠᠨ ᠦᠯᠡᠳᠡᠭᠡᠬᠦ ᠭᠠᠭᠴᠠ ᠵᠠᠮ ᠲᠡᠭᠦᠨ ᠢ᠋ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠥᠭᠡᠯᠦᠨ ᠲᠩᠷᠢ ᠳ᠋ᠦ᠍ ᠭᠠᠷᠴᠤ ᠶᠢᠰᠦᠭᠡᠢ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠬᠤ ᠪᠠᠷ ᠰᠢᠢᠳᠴᠡᠢ᠃ ᠲᠡᠷᠡ ᠥᠪᠡᠷ ᠢ᠋ ᠪᠡᠨ ᠳᠡᠩᠳᠡᠭᠦᠦ ᠶᠡᠬᠡ ᠵᠣᠪᠠᠭᠠᠪᠠ᠃ ᠪᠠᠰᠠ ᠳᠡᠩᠳᠡᠭᠦᠦ ᠶᠡᠬᠡ ᠵᠢᠷᠭᠠᠪᠠ ᠭᠡᠵᠦ ᠲᠣᠭᠠᠴᠠᠵᠠᠢ᠃ ᠭᠡᠪᠡᠴᠦ ᠥᠭᠡᠯᠦᠨ ᠦ᠌ ᠦᠬᠦᠯ ᠢᠷᠡᠬᠦ ᠪᠣᠯᠤᠭᠠ ᠦᠭᠡᠢ ᠠᠵᠢ᠃ ᠥᠭᠡᠯᠦᠨ ᠳ᠋ᠦ᠍ ᠳᠠᠬᠢᠭᠠᠳ ᠴᠢᠯᠢᠢᠭᠰᠡᠨ ᠬᠣᠶᠠᠷ ᠵᠢᠯ ᠦ᠋ᠨ ᠠᠮᠢᠳᠤᠷᠠᠯ ᠦᠯᠡᠳᠡᠭᠡᠳ ᠪᠠᠢᠭᠠ ᠶ᠋ᠢ ᠲᠡᠷᠡ ᠳᠠᠩᠴᠤ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠴᠠᠭ ᠨᠢ ᠪᠣᠯᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠦᠬᠦᠯ ᠢ᠋ ᠬᠡᠨ ᠴᠦ᠍ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠪᠢᠵᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠬᠡᠷᠡᠢᠳ ᠮᠥᠩᠬᠡᠨᠠᠰᠤᠨ᠂ ᠬᠡᠯᠡᠰᠣᠶᠤᠯ᠂ (ᠪᠤᠤ ᠸᠸᠨ ᠬᠤᠸᠠ)᠂
ᠱᠠᠭᠰᠠᠯ᠂ ᠠᠯᠲᠠᠨᠴᠡᠴᠡᠭ᠂ ᠨᠠᠷᠠᠨᠲᠤᠶᠠᠭᠠ᠂ ᠰᠡᠴᠡᠨᠴᠢᠮᠡᠭ᠂
ᠵᠢᠩᠯᠢᠬᠤᠸᠠᠷ᠂ ᠡᠩᠬᠡᠪᠠᠲᠤ᠂ ᠠᠷᠢᠭᠤᠨ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠰᠡᠬᠡᠭᠡᠷᠡᠯ᠂ ᠮᠣᠩᠭᠣᠯ ᠰᠦᠨᠡᠰᠦ᠂ ᠠᠷᠢᠭᠤᠨ ᠂ ᠰᠡᠴᠡᠨᠴᠢᠮᠡᠭ᠂
ᠲ·ᠬᠦᠮᠦᠵᠢᠯᠲᠦ᠂ ᠱᠠᠭᠰᠠᠯ᠂ ᠪᠠᠶᠠᠨᠴᠡᠴᠡᠭ᠂ ᠬᠡᠯᠡᠰᠣᠶᠤᠯ᠂ ᠭᠠᠷᠮᠠ