ᠮᠣᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠣᠭᠵᠤᠭᠤᠬᠠᠨ ᠬᠦᠦ -ᠳᠣᠮᠣᠭ ᠦᠯᠢᠭᠡᠷМогжоохон даагатай Жогжоохон хүү
2565ᠮᠣᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠣᠭᠵᠤᠭᠤᠬᠠᠨ ᠬᠦᠦ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠶᠤᠮ ᠭᠡᠨᠡ᠃ ᠮᠠᠨ ᠤ᠋ ᠡᠷᠢᠨ ᠡᠴᠡ ᠡᠮᠦᠨᠡ ᠮᠠᠰᠢ ᠡᠷᠲᠡ ᠶ᠋ᠢᠨ ᠴᠠᠭ ᠲᠤ᠌ ᠶᠤᠮ ᠭᠡᠨᠡ᠃
ᠠᠯᠢ ᠨᠢᠭᠡᠨ ᠭᠦᠷᠦᠨ ᠳ᠋ᠦ᠍ ᠥᠪᠡᠷᠰᠡᠳ ᠢ᠋ ᠪᠡᠨ ᠰᠡᠴᠡᠨ ᠮᠡᠷᠭᠡᠨ ᠳ᠋ᠦ᠍ ᠲᠣᠭᠠᠴᠠᠳᠠᠭ ᠬᠠᠭᠠᠨ ᠤ᠋ ᠬᠡᠰᠡᠭ ᠰᠢᠳᠠᠷ ᠬᠥᠮᠦᠰ ᠪᠠᠢᠳᠠᠭ ᠪᠠᠢᠵᠠᠢ᠃ ᠲᠡᠳᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠠᠷᠠᠳ ᠣᠯᠠᠨ᠂ ᠠᠯᠪᠠᠲᠤ ᠢᠷᠭᠡᠳ ᠢ᠋ ᠠᠮᠠ ᠬᠡᠯᠡ ᠪᠡᠷ ᠳᠣᠷᠣᠮᠵᠢᠯᠠᠵᠤ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠳᠡᠭ ᠦᠭᠡᠢ ᠪᠠᠢᠵᠠᠢ᠃
ᠬᠠᠷᠢᠨ ᠲᠡᠷᠡ ᠨᠤᠲᠤᠭ ᠲᠤ᠌ ᠮᠣᠭᠵᠥᠭᠤᠬᠠᠨ ᠳᠠᠭᠠ ᠲᠠᠢ ᠵᠣᠭᠵᠤᠭᠤᠬᠠᠨ ᠬᠦᠦ ᠭᠡᠵᠦ ᠥᠨᠥᠴᠢᠨ ᠪᠣᠯᠪᠠᠴᠤ ᠤᠬᠠᠭᠠᠯᠢᠭ ᠬᠦᠦ ᠪᠠᠢᠵᠠᠢ᠃ ᠵᠣᠭᠵᠤᠭᠤᠬᠠᠨ ᠬᠦᠦ ᠮᠣᠭᠵᠤᠭᠤᠬᠠᠨ ᠳᠠᠭᠠ ᠪᠠᠨ ᠤᠨᠤᠭᠠᠳ ᠨᠢᠭᠡ ᠡᠳᠦᠷ ᠲᠠᠷᠳᠠᠩᠬᠠᠨ ᠵᠠᠮ ᠢ᠋ᠶ᠋ᠠᠷ ᠲᠠᠰᠢᠭᠤᠷᠳᠠᠩᠬᠠᠨ ᠳᠠᠪᠬᠢᠩᠬᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠨᠢ ᠰᠢᠯᠤᠭᠤᠬᠠᠨ ᠨᠦᠬᠡ ᠤᠷᠤᠭᠤ ᠱᠣᠯᠲᠤᠩᠬᠠᠨ ᠵᠤᠷᠠᠮᠠ ᠭᠤᠯᠳᠤᠩᠬᠠᠨ ᠬᠢᠭᠡᠳ ᠣᠷᠣᠴᠢᠬᠠᠵᠠᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠮᠣᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠤᠭᠵᠤᠭᠤᠬᠠᠨ ᠬᠦᠦ ᠱᠣᠯᠳᠤᠩᠬᠠᠨ ᠵᠤᠷᠠᠮᠠᠨ ᠤ᠋ ᠰᠢᠯᠤᠭᠤᠬᠠᠨ ᠨᠦᠬᠡ ᠶ᠋ᠢ ᠤᠳᠤᠩᠬᠠᠨ ᠰᠠᠭᠤᠵᠤ ᠪᠠᠢᠵᠠᠢ ᠭᠡᠨᠡ᠃
ᠲᠡᠭᠡᠲᠡᠯᠡ ᠬᠠᠷᠠ ᠠᠵᠢᠷᠭᠠ ᠤᠨᠤᠭᠰᠠᠨ᠂ ᠬᠠᠷᠠ ᠳᠠᠬᠤ ᠨᠥᠮᠥᠷᠦᠭᠰᠡᠨ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠬᠦᠷᠴᠦ ᠢᠷᠡᠭᠡᠳ᠂
— ᠴᠢ ᠶᠡᠷᠦ ᠨᠢ ᠵᠠᠮ ᠳᠡᠭᠡᠷᠡ ᠶᠠᠭᠤ ᠬᠢᠵᠦ ᠰᠠᠭᠤᠭᠠ ᠨᠣᠪᠰᠢ ᠪᠣᠢ? ᠭᠡᠵᠡᠢ᠃ ᠵᠤᠭᠵᠤᠭᠤᠬᠠᠨ ᠬᠦᠦ᠂
— ᠪᠢ ᠰᠢᠯᠤᠭᠤᠬᠠᠨ ᠨᠦᠬᠡ ᠤᠷᠤᠭᠤ ᠱᠣᠯᠳᠣᠩᠬᠠᠨ ᠵᠤᠷᠠᠮᠠ ᠭᠤᠯᠳᠤᠩᠬᠠᠨ ᠬᠢᠭᠡᠳ ᠣᠷᠣᠴᠢᠬᠠᠬᠤ ᠪᠠᠷ ᠨᠢ ᠤᠳᠤᠩᠬᠠᠨ ᠰᠠᠭᠤᠵᠤ ᠪᠠᠢᠨᠠ᠂ ᠠᠬᠠ ᠠ᠋! ᠭᠡᠵᠦ ᠬᠡᠯᠡᠵᠡᠢ᠃ ᠭᠡᠲᠡᠯᠡ ᠨᠥᠭᠦᠭᠡ ᠬᠠᠷᠠ ᠠᠵᠢᠷᠭᠠ ᠤᠨᠤᠭᠰᠠᠨ᠂ ᠬᠠᠷᠠ ᠳᠠᠬᠤ ᠨᠥᠮᠥᠷᠦᠭᠰᠡᠨ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠲᠣᠬᠣᠭᠤᠷᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ᠂
— ᠵᠠᠮ ᠵᠠᠢᠯᠠ! ᠬᠦ ᠭᠡᠵᠦ ᠭᠡᠨᠡ᠃ ᠵᠣᠭᠵᠤᠭᠤᠬᠠᠨ ᠬᠦᠦ ᠲᠡᠭᠡᠬᠦ ᠪᠡᠷ ᠨᠢ ᠳᠤᠷᠠ ᠦᠭᠡᠢ ᠨᠢ ᠬᠦᠷᠦᠭᠡᠳ᠂
— ᠵᠠᠮ ᠴᠢᠮᠠ ᠶ᠋ᠢ ᠵᠠᠢᠯᠠ ᠭᠡᠵᠦ ᠪᠠᠢᠨᠠ ᠳ᠋ᠠ ᠭᠡᠳ ᠲᠠᠯᠠ ᠶ᠋ᠢᠨ ᠳᠡᠭᠡᠭᠦᠷ ᠰᠤᠨᠠᠢᠭᠰᠠᠨ ᠳᠠᠷᠳᠠᠩ ᠵᠠᠮ ᠢ᠋ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠷᠢᠶᠠᠯᠭᠠᠵᠤ ᠳᠦᠷᠢ ᠦᠵᠡᠭᠦᠯᠵᠡᠢ᠃ ᠲᠡᠭᠡᠲᠡᠯᠡ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠡᠨᠡ ᠶᠡᠷᠦ ᠨᠢ ᠰᠡᠴᠡᠨ ᠰᠡᠷᠭᠦᠯᠡᠩ ᠬᠦᠦ ᠪᠠᠢᠬᠤ ᠨᠢ᠂ ᠬᠡᠳᠦᠨ ᠦᠭᠡ ᠰᠣᠯᠢᠶᠠ ᠭᠡᠵᠦ ᠪᠣᠳᠣᠭᠠᠳ᠂
— ᠴᠢ ᠰᠢᠯᠤᠭᠤᠬᠠᠨ ᠨᠦᠬᠡ ᠤᠷᠤᠭᠤ ᠭᠤᠯᠳᠤᠩᠬᠠᠨ ᠬᠢᠭᠡᠳ ᠣᠷᠣᠭᠰᠠᠨ ᠱᠤᠯᠳᠤᠩᠬᠠᠨ ᠵᠤᠷᠠᠮᠠᠨ ᠤ᠋ ᠨᠦᠬᠡ ᠶ᠋ᠢ ᠤᠳᠤᠩᠬᠠᠨ ᠰᠠᠭᠤᠬᠤ ᠴᠢᠨᠢ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠣᠢ? ᠵᠤᠷᠠᠮᠠᠨ ᠤ᠋ ᠵᠠᠬᠢᠭᠰᠠᠨ ᠵᠠᠬᠢᠶᠠᠰᠤ ᠶ᠋ᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ ᠲᠡᠭᠦᠨ ᠳ᠋ᠦ᠍ ᠥᠭᠬᠦ ᠪᠡᠷ ᠤᠳᠤᠩᠬᠠᠨ ᠪᠠᠢᠭᠠ ᠶᠤᠮ ᠠ᠋! ᠭᠡᠵᠡᠢ᠃ ᠲᠡᠭᠡᠬᠦ ᠪᠡᠷ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ᠂
— ᠵᠤᠷᠠᠮᠠ ᠴᠢᠮᠠ ᠳ᠋ᠤ᠌ ᠶᠠᠭᠤ ᠭᠡᠵᠦ ᠵᠠᠬᠢᠭᠰᠠᠨ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠵᠠᠢ᠃
— ᠰᠢᠯᠤᠭᠤᠬᠠᠨ ᠨᠦᠬᠡ ᠤᠷᠤᠭᠤ ᠱᠤᠯᠳᠤᠩᠬᠠᠨ ᠵᠤᠷᠠᠮᠠ ᠭᠤᠯᠳᠤᠩᠬᠠᠨ ᠬᠢᠭᠡᠳ ᠣᠷᠣᠬᠤ ᠳ᠋ᠤ᠌ ᠪᠠᠨ ᠡᠭᠦᠪᠡᠷ ᠬᠠᠷᠠ ᠠᠵᠢᠷᠭᠠ ᠤᠨᠤᠭᠰᠠᠨ᠂ ᠬᠠᠷᠠ ᠳᠠᠬᠤ ᠨᠥᠮᠥᠷᠦᠭᠰᠡᠨ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠢᠷᠡᠪᠡᠯ᠂ ᠥᠪᠡᠷ ᠢ᠋ᠶ᠋ᠡᠨ ᠪᠤᠤ ᠪᠦᠳᠦᠷᠢᠴᠢᠬᠡ᠂ ᠥᠷᠭᠥᠭᠡ ᠶ᠋ᠢ ᠪᠤᠤ ᠡᠪᠳᠡᠴᠢᠬᠡ᠂ ᠥᠨᠥᠴᠢᠨ ᠬᠦᠦ ᠶ᠋ᠢ ᠪᠤᠤ ᠪᠠᠰᠤᠭᠠᠷᠠᠢ! ᠭᠡᠵᠦ ᠵᠠᠬᠢᠭᠠᠷᠠᠢ ᠭᠡᠰᠡᠨ ᠶᠤᠮ ᠠ᠋ ᠭᠡᠵᠡᠢ᠃ ᠠᠳᠤᠭᠤᠴᠢᠨ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ᠂
— ᠶᠠᠭᠠᠬᠢᠭᠰᠠᠨ ᠰᠦᠷᠡᠬᠡᠢ ᠰᠡᠴᠡᠨ ᠦᠭᠡ ᠲᠡᠢ ᠭᠠᠢᠬᠠᠯ ᠪᠣᠢ? ᠲᠡᠭᠷᠢ ᠴᠢᠮᠠ ᠶ᠋ᠢ ᠨᠢᠷᠭᠡᠭ! ᠭᠡᠵᠦ ᠭᠡᠨᠡ᠃ ᠲᠡᠭᠡᠬᠦ ᠪᠡᠷ ᠨᠢ ᠵᠣᠭᠵᠤᠭᠤᠬᠠᠨ ᠬᠦᠦ᠂
— ᠴᠡᠴᠡᠨ ᠦᠭᠡ ᠴᠡᠭᠡᠵᠢᠨ ᠳ᠋ᠦ᠍ ᠪᠡᠨ᠂ ᠴᠡᠴᠡᠭ ᠨᠠᠪᠴᠢ ᠠᠭᠤᠯᠠᠨ ᠳ᠋ᠤ᠌ ᠪᠠᠨ᠂ ᠬᠣᠱᠣᠩ ᠦᠭᠡ ᠬᠣᠭᠣᠯᠠᠢ ᠳ᠋ᠤ᠌ ᠪᠠᠨ᠂ ᠬᠣᠩᠬᠣ ᠳᠠᠮᠠᠷᠤ ᠯᠠᠮᠠ ᠳ᠋ᠤ᠌ ᠪᠠᠨ ᠪᠠᠢᠳᠠᠭ ᠰᠢᠦ ᠳ᠋ᠠ᠃ ᠳᠠᠬᠤ ᠲᠠᠢ ᠪᠠᠷ ᠨᠢ ᠲᠠᠨ ᠊ᠢ ᠨᠢᠷᠭᠡᠭ᠂ ᠳᠠᠯᠠᠩ ᠲᠠᠢ ᠪᠠᠷ ᠨᠢ ᠠᠵᠢᠷᠭᠠ ᠶ᠋ᠢ ᠴᠢᠨᠢ ᠨᠢᠷᠭᠡᠭ! ᠳᠠᠭᠠᠬᠢ ᠲᠠᠢ ᠪᠠᠷ ᠨᠢ ᠳᠠᠭᠠ ᠶ᠋ᠢ ᠮᠢᠨᠢ ᠥᠷᠥᠰᠢᠶᠡᠭ! ᠭᠡᠵᠡᠢ᠃
ᠡᠭᠦᠨ ᠳ᠋ᠦ᠍ ᠬᠠᠷᠠ ᠠᠵᠢᠷᠭᠠ ᠤᠨᠤᠭᠰᠠᠨ ᠬᠠᠷᠠ ᠳᠠᠬᠤ ᠨᠥᠮᠥᠷᠦᠭᠰᠡᠨ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠠᠭᠤᠷᠯᠠᠭᠠᠳ ᠬᠠᠭᠠᠨ ᠳ᠋ᠤ᠌ ᠪᠠᠨ ᠮᠡᠳᠡᠭᠦᠯᠵᠦ ᠵᠠᠯᠬᠠᠭᠠᠬᠤ ᠪᠠᠷ ᠬᠦᠦ ᠶ᠋ᠢ ᠠᠪᠤᠭᠠᠳ ᠶᠠᠪᠤᠵᠠᠢ ᠭᠡᠨᠡ᠃ ᠬᠠᠭᠠᠨ ᠤ᠋ ᠳ᠋ᠤ᠌ ᠬᠦᠷᠴᠦ ᠣᠴᠢᠲᠠᠯᠠ ᠬᠠᠭᠠᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠡᠨ ᠪᠠᠢᠬᠤ ᠦᠭᠡᠢ ᠪᠠᠢᠵᠠᠢ ᠭᠡᠨᠡ᠃ ᠲᠡᠢᠮᠦ ᠡᠴᠡ ᠪᠡᠨ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠬᠠᠲᠤᠨ ᠳ᠋ᠤ᠌ ᠨᠢ ᠥᠴᠢᠭ ᠮᠡᠳᠡᠭᠦᠯᠵᠡᠢ᠃ ᠬᠠᠭᠠᠨ ᠤ᠋ ᠬᠠᠲᠤᠨ ᠬᠦᠦ ᠶ᠋ᠢ ᠳᠠᠭᠤᠳᠠᠵᠤ ᠣᠷᠣᠭᠤᠯᠤᠭᠠᠳ ᠪᠠᠢᠴᠠᠭᠠᠬᠤ ᠭᠡᠲᠡᠯᠡ ᠮᠣᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠣᠭᠵᠤᠭᠤᠬᠠᠨ ᠬᠦᠦ᠂
— ᠢᠮᠠᠭᠠᠨ ᠲᠣᠯᠣᠭᠠᠢ ᠶᠠᠮᠪᠠᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠂ ᠶᠠᠨᠲᠠᠭᠠᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ᠂ ᠲᠡᠮᠡᠭᠡᠨ ᠲᠣᠯᠣᠭᠠᠢ ᠳᠠᠪᠰᠢᠨ ᠳ᠋ᠤ᠌ ᠪᠠᠭᠲᠠᠳᠠᠭ ᠦᠭᠡᠢ᠂ ᠲᠡᠨᠲᠡᠭᠡᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ᠂ ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢ ᠬᠣᠢᠮᠣᠷ ᠲᠤ᠌ ᠳᠡᠭᠡᠵᠢᠯᠡᠳᠡᠭ᠂ ᠬᠣᠲᠠᠯᠠ ᠳ᠋ᠤ᠌ ᠨᠡᠷᠡᠲᠡᠢ ᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠷᠭᠤ ᠰᠢᠭᠦᠯᠭᠡᠨᠡ! ᠭᠡᠵᠡᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠬᠠᠲᠤᠨ ᠤᠴᠢᠷ ᠦᠭᠡᠢ ᠠᠭᠤᠷᠯᠠᠵᠤ ᠬᠦᠦ ᠶ᠋ᠢ ᠭᠠᠷᠭᠠᠭᠠᠳ ᠮᠣᠷᠢᠨ ᠤ᠋ ᠪᠠᠨ ᠤᠶᠠᠭᠠᠨ ᠳᠡᠭᠡᠷᠡ ᠤᠶᠠᠴᠢᠬᠠᠪᠠ ᠭᠡᠨᠡ᠃ ᠬᠦᠦ ᠤᠢᠳᠬᠤ ᠳ᠋ᠤ᠌ ᠪᠠᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠵᠢᠷᠤᠭᠠᠳ ᠰᠠᠭᠤᠵᠤ ᠪᠠᠢᠵᠠᠢ᠃ ᠲᠡᠭᠡᠲᠡᠯᠡ ᠬᠠᠭᠠᠨ ᠤ᠋ ᠣᠲᠠᠴᠢ ᠯᠠᠮᠠ ᠭᠠᠷᠴᠤ ᠢᠷᠡᠭᠡᠳ᠂
— ᠴᠢ ᠶᠠᠭᠤ ᠭᠡᠵᠦ ᠭᠠᠵᠠᠷ ᠤᠬᠤᠭᠠᠳ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠬᠦ ᠳ᠋ᠦ᠍ ᠵᠣᠭᠵᠤᠭᠤᠬᠠᠨ ᠬᠦᠦ
— ᠡᠮᠴᠢ ᠬᠥᠮᠦᠨ ᠦ᠌ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠷ᠂ ᠳᠣᠮᠴᠢ ᠬᠥᠮᠦᠨ ᠦ᠌ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠷ ᠭᠠᠵᠠᠷ ᠤᠬᠤᠭᠠ ᠦᠭᠡᠢ ᠠ᠋᠃ ᠥᠨᠥᠴᠢᠨ ᠬᠦᠦ ᠡᠳᠦᠷ ᠢ᠋ ᠪᠠᠷᠠᠵᠤ ᠴᠥᠬᠥᠨ᠂ ᠥᠭᠡᠳᠡᠰᠦᠨ ᠪᠡᠶᠡ ᠪᠡᠨ ᠰᠠᠭᠠᠲᠠᠭᠤᠯᠵᠤ ᠶᠠᠳᠠᠬᠤ ᠳ᠋ᠤ᠌ ᠪᠠᠨ ᠯᠠ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠠᠭᠤ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠷ ᠭᠠᠵᠠᠷ ᠵᠢᠷᠤᠭᠰᠠᠨ ᠶᠤᠮ ᠭᠡᠵᠦ ᠭᠡᠨᠡ᠃ ᠬᠠᠭᠠᠨ ᠤ᠋ ᠣᠲᠠᠴᠢ ᠯᠠᠮᠠ ᠶᠠᠭᠤ ᠴᠤ᠌ ᠳᠤᠤᠭᠠᠷᠴᠤ ᠴᠢᠳᠠᠯ ᠦᠭᠡᠢ ᠪᠤᠴᠠᠭᠠᠳ ᠣᠷᠣᠴᠢᠬᠠᠵᠠᠢ᠃ ᠢᠩᠭᠢᠲᠡᠯᠡ ᠬᠠᠭᠠᠨ ᠢᠷᠡᠪᠡ ᠭᠡᠨᠡ᠃ ᠲᠡᠭᠡᠭᠡᠳ ᠬᠠᠭᠠᠨ ᠮᠣᠭᠵᠤᠭᠤᠬᠠᠨ ᠳᠠᠭᠠ ᠲᠠᠢ ᠵᠣᠭᠵᠤᠭᠤᠬᠠᠨ ᠬᠦᠦ ᠡᠴᠡ᠂
— ᠶᠠᠭᠠᠬᠢᠭᠠᠳ ᠴᠢᠮᠠ ᠶ᠋ᠢ ᠡᠨᠳᠡ ᠤᠶᠠᠴᠢᠬᠠᠭᠰᠠᠨ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠵᠠᠢ ᠭᠡᠨᠡ᠃ ᠬᠦᠦ ᠴᠦ᠍ ᠬᠠᠮᠤᠭ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠶᠠᠷᠢᠭᠰᠠᠨ ᠭᠡᠨᠡ᠃ ᠲᠡᠭᠡᠲᠡᠯᠡ ᠬᠠᠲᠤᠨ ᠬᠠᠵᠠᠭᠤ ᠠ᠋ᠴᠠ ᠨᠢ᠂
— ᠨᠠᠭᠠᠳᠤ ᠮᠠᠭᠤ ᠨᠣᠪᠰᠢ ᠴᠢᠨᠢ ᠨᠠᠮᠠ ᠶ᠋ᠢ ᠬᠠᠴᠢᠨ ᠶᠡᠬᠡ ᠪᠡᠷ ᠳᠣᠷᠣᠮᠵᠢᠯᠠᠭᠰᠠᠨ ᠭᠡᠵᠦ ᠭᠣᠮᠣᠳᠠᠯ ᠢ᠋ᠶ᠋ᠠᠨ ᠬᠡᠯᠡᠵᠡᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠬᠦᠦ᠂
— ᠨᠣᠪᠰᠢ ᠶ᠋ᠢᠨ ᠮᠠᠭᠤ ᠬᠦᠦ ᠪᠢ ᠶᠠᠭᠤ ᠳᠣᠷᠣᠮᠵᠢᠯᠠᠵᠤ ᠴᠢᠳᠠᠬᠤ ᠪᠣᠢ ᠳ᠋ᠠ᠃ ᠬᠠᠷᠢᠨ ᠭᠤᠸᠠ ᠰᠠᠢᠬᠠᠨ ᠬᠠᠲᠤᠨ ᠭᠤᠸᠠᠢ ᠯᠠ ᠮᠣᠷᠢ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠤᠶᠠᠭᠠᠨ ᠳᠡᠭᠡᠷᠡ ᠡᠷᠡ ᠨᠠᠮᠠ ᠶ᠋ᠢ ᠠᠳᠤᠭᠤᠰᠤ ᠮᠡᠲᠦ ᠤᠶᠠᠭᠠᠳ ᠠᠢᠬᠤᠪᠲᠤᠷ ᠳᠣᠷᠣᠮᠵᠢᠯᠠᠵᠤ ᠪᠠᠢᠨᠠ ᠰᠢᠦ ᠳ᠋ᠠ᠂ ᠪᠢ ᠤᠭ ᠨᠢ ᠬᠠᠲᠤᠨ ᠠᠪᠠᠬᠠᠢ ᠶ᠋ᠢ ᠬᠠᠭᠠᠨ ᠤ᠋ ᠡᠷᠬᠡ ᠶᠠᠮᠪᠠ ᠶ᠋ᠢ ᠪᠤᠯᠢᠶᠠᠯᠳᠤᠭᠠᠳ ᠬᠡᠷᠡᠭ ᠰᠢᠭᠦᠨᠡ ᠭᠡᠬᠦ ᠪᠡᠷ ᠨᠢ ᠥᠨᠳᠥᠷ ᠲᠢᠳᠢᠮᠲᠤ ᠬᠠᠭᠠᠨ ᠢ᠋ ᠪᠡᠨ ᠬᠠᠮᠠᠭᠠᠯᠠᠵᠤ᠂
— ᠢᠮᠠᠭᠠᠨ ᠲᠣᠯᠣᠭᠠᠢ ᠶᠠᠮᠪᠠᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠂ ᠶᠠᠨᠳᠠᠭᠠᠷ ᠬᠠᠲᠤᠨ ᠵᠠᠷᠭᠤ ᠰᠢᠭᠦᠳᠡᠭ ᠦᠭᠡᠢ᠂ ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢ ᠬᠣᠢᠮᠣᠷ ᠲᠤ᠌ ᠳᠡᠭᠡᠵᠢᠯᠡᠳᠡᠭ᠂ ᠬᠣᠲᠠᠯᠠ ᠳ᠋ᠤ᠌ ᠨᠡᠷᠡᠲᠡᠢ ᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠷᠭᠤ ᠰᠢᠭᠦᠯᠭᠡᠨᠡ! ᠭᠡᠵᠦ ᠯᠡ ᠬᠡᠯᠡᠭᠰᠡᠨ ᠶᠤᠮ ᠳ᠋ᠠ᠃ ᠲᠡᠭᠡᠭᠡᠳ ᠪᠢ ᠤᠶᠠᠭᠠᠲᠠᠢ ᠴᠤ᠌ ᠪᠣᠯᠪᠠ᠃ ᠤᠬᠠᠭᠠᠨ ᠲᠠᠢ ᠨᠣᠶᠠᠨ ᠢ᠋ᠶ᠋ᠠᠨ ᠬᠦᠯᠢᠶᠡᠭᠡᠳ ᠤᠢᠳᠬᠤ ᠳ᠋ᠤ᠌ ᠪᠠᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠢ᠋ ᠵᠢᠷᠤᠭᠠᠳ ᠭᠠᠢ ᠪᠣᠯᠵᠤ ᠲᠠᠨ ᠤ᠋ ᠯᠠᠮᠠ ᠳ᠋ᠤ᠌ ᠵᠠᠩᠨᠠᠭᠤᠯᠤᠭᠠᠳ ᠰᠠᠭᠤᠵᠤ ᠪᠠᠢᠨᠠ ᠰᠢᠣ ᠳ᠋ᠠ᠂ ᠬᠠᠭᠠᠨ ᠡᠵᠡᠨ ᠮᠢᠨᠢ! ᠭᠡᠵᠦ ᠭᠡᠨᠡ᠃ ᠬᠠᠭᠠᠨ ᠪᠣᠳᠣᠵᠤ ᠪᠣᠳᠣᠭᠠᠳ᠂
— ᠪᠦᠬᠦ ᠬᠡᠷᠡᠭ ᠬᠦᠦ ᠶ᠋ᠢᠨ ᠬᠢ ᠵᠥᠪ ᠪᠠᠢᠨᠠ ᠭᠡᠵᠦ ᠰᠢᠢᠳᠬᠡᠵᠡᠢ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ ᠵᠣᠭᠵᠤᠭᠤᠬᠠᠨ ᠬᠦᠦ ᠮᠣᠭᠵᠤᠭᠤᠬᠠᠨ ᠳᠠᠭᠠ ᠪᠠᠨ ᠤᠨᠤᠭᠠᠳ ᠪᠠᠶᠠᠷ ᠲᠠᠢ ᠨᠢ ᠠᠷᠭᠠ ᠦᠭᠡᠢ ᠱᠣᠭᠰᠢᠭᠤᠯᠤᠩᠬᠠᠨ ᠬᠠᠷᠢᠵᠠᠢ ᠭᠡᠨᠡ᠃
ᠡᠨᠡ ᠦᠶᠡ ᠡᠴᠡ ᠬᠣᠢᠰᠢ ᠲᠡᠷᠡ ᠬᠠᠭᠠᠨ ᠤ᠋ ᠰᠢᠳᠠᠷ ᠬᠥᠮᠦᠰ᠂ ᠬᠡᠷᠬᠡᠮ ᠳᠤᠰᠢᠶᠠᠯᠲᠠᠳ ᠬᠡᠯᠡ ᠠᠮᠠ ᠲᠠᠢ ᠭᠡᠭᠳᠡᠳᠡᠭ ᠪᠦᠬᠦᠨ ᠨᠢ ᠬᠠᠷᠠᠴᠤ ᠠᠷᠠᠳ᠂ ᠠᠯᠪᠠᠲᠤ ᠢᠷᠭᠡᠳ ᠢ᠋ ᠬᠠᠮᠢᠶᠠ ᠪᠤᠰᠤ ᠪᠠᠷ ᠳᠣᠷᠣᠮᠵᠢᠯᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠶᠤᠮ ᠭᠡᠨᠡ᠃
ᠦᠰᠦᠭ ᠬᠠᠳᠠᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ