ᠰᠠᠨᠠᠵᠤ ᠶᠠᠳᠠᠭᠰᠠᠨ ᠰᠢᠯᠦᠭ – ᠪᠠᠪᠤᠤ ᠶ᠋ᠢᠨ ᡀᠬᠠᠪᠠᠰᠥ᠋ᠷᠦᠩ Санаж ядсан шүлэг – Бавуугийн Лхагвасүрэн
688ᠰᠠᠨᠠᠵᠤ ᠶᠠᠳᠠᠭᠰᠠᠨ ᠰᠢᠯᠦᠭ
ᠡᠭᠳᠡᠭᠦᠴᠡᠭᠰᠡᠨ ᠡᠭᠦᠯᠡ ᠣᠷᠴᠢᠵᠤ᠂ ᠴᠠᠰᠤ ᠪᠠᠷ ᠴᠡᠯᠮᠡᠵᠦ ᠵᠤᠳᠯᠠᠬᠤ ᠳ᠋ᠤ᠌
ᠡᠨᠳᠡ ᠮᠢᠨᠦ ᠡᠯᠢᠭᠡ ᠵᠢᠩᠳᠡᠳᠡᠭ᠁
ᠲᠠᠯᠠ ᠮᠢᠨᠢ᠁
ᠲᠠᠯᠠ ᠮᠢᠨᠢ᠁
ᠲᠦᠷᠢᠮᠡᠬᠡᠢ ᠴᠤᠤᠷᠢᠶᠠ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠵᠠᠯᠢᠷᠠᠵᠤ
ᠲᠩᠷᠢ ᠶ᠋ᠢᠨ ᠵᠠᠭᠠᠳᠠᠰᠤ ᠪᠦᠲᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠭᠲᠠᠳᠠᠭ ᠠᠭᠤᠳᠠᠮ ᠮᠢᠨᠢ
ᠠᠰᠢᠭᠦᠢ ᠮᠢᠨᠢ ᠳᠡ!
ᠬᠠᠶᠠ ᠲᠤᠤᠯᠠ ᠶ᠋ᠢᠨ ᠪᠤᠷᠭᠠᠰᠤ ᠴᠠᠰ ᠴᠠᠰᠬᠢᠨ ᠭᠥᠯᠥᠭᠡᠯᠡᠵᠦ
ᠬᠠᠭᠠᠨ ᠤ᠋ ᠲᠢᠲᠢᠮ ᠰᠢᠭ ᠢᠷᠭᠤᠢ ᠴᠠᠰᠤᠨ ᠤ᠋ ᠥᠮᠥᠷᠬᠡᠢ ᠳ᠋ᠦ᠍ ᠴᠤᠬᠤᠢᠯᠠ᠃
ᠳᠠᠭᠠᠭᠠᠴᠠ᠂ ᠲᠠᠯᠠ ᠶ᠋ᠢᠨ ᠪᠣᠷᠣ᠂ ᠲᠠᠪᠢᠨ ᠵᠢᠰᠠ ᠶ᠋ᠢᠨ ᠮᠢᠨᠢ
ᠳᠠᠷᠤᠭᠳᠠᠭᠰᠠᠨ ᠡᠪᠡᠰᠦ ᠴᠤᠬᠤᠢᠵᠤ᠂
ᠮᠠᠯ ᠤ᠋ᠨ ᠬᠠᠮᠠᠷ ᠬᠠᠳᠬᠤᠭᠠ ᠪᠣᠯ ᠤᠤ?᠁
ᠡᠷᠭᠢ ᠶ᠋ᠢᠨ ᠴᠢᠨᠢ ᠮᠠᠷᠢᠶᠠ ᠬᠥᠯᠥᠷᠡᠵᠦ᠂ ᠴᠠᠷᠠᠭᠠ ᠪᠠᠨ ᠬᠤᠮᠢᠬᠤ ᠳ᠋ᠤ᠌
ᠡᠨᠳᠡ ᠮᠢᠨᠦ ᠰᠤᠳᠠᠰᠤ ᠵᠢᠪᠳᠡᠭ᠁
ᠤᠰᠤ ᠮᠢᠨᠢ᠁
ᠤᠰᠤ ᠮᠢᠨᠢ᠁
ᠤᠬᠢᠯᠠᠵᠤ᠂ ᠤᠬᠢᠯᠠᠵᠤ ᠲᠩᠷᠢ ᠳ᠋ᠦ᠍ ᠠᠷᠭᠠᠳᠠᠭᠤᠯᠵᠤ ᠲᠠᠯᠢᠮᠠᠭᠰᠠᠨ
ᠯᠤᠤᠰ ᠤ᠋ᠨ ᠭᠦᠩᠵᠦ ᠶ᠋ᠢᠨ ᠨᠢᠳᠦ ᠮᠢᠨᠢ᠁
ᠠᠰᠢᠭᠦᠢ ᠮᠢᠨᠢ ᠳᠡ!
ᠬᠠᠨ ᠠᠭᠤᠯᠠ ᠶ᠋ᠢᠨ ᠬᠢᠩᠭᠠ ᠲᠠᠰᠢᠯᠠᠨ
ᠬᠠᠪᠤᠷ ᠤ᠋ᠨ ᠰᠢᠪᠠᠭᠤᠳ ᠨᠠᠮᠢᠷᠠᠭᠠᠳ ᠢᠷᠡᠯᠡ᠁
ᠬᠠᠢᠷᠠ ᠶ᠋ᠢᠨ ᠨᠠᠭᠤᠷ ᠤ᠋ᠨ ᠮᠢᠨᠢ ᠡᠮᠲᠦ ᠤᠰᠤᠨ ᠳ᠋ᠤ᠌ ᠦᠳᠡᠯᠡᠵᠦ
ᠾᠢᠮᠠᠯᠠᠶᠠ ᠶ᠋ᠢ ᠳᠠᠪᠠᠬᠤ ᠳ᠋ᠠᠭᠠᠨ
ᠬᠤᠯᠠᠭᠤᠭᠰᠠᠨ ᠳᠠᠯᠠᠪᠴᠢ ᠪᠠᠨ ᠱᠠᠪᠰᠢᠭᠠ ᠪᠣᠯ ᠤᠤ?᠁
ᠡᠩᠭᠡᠷ ᠦ᠋ᠨ ᠴᠢᠨᠢ ᠬᠠᠢᠯᠠᠰᠤ ᠨᠠᠷᠠᠨ ᠳ᠋ᠤ᠌ ᠬᠠᠭᠰᠠᠬᠤ ᠳ᠋ᠤ᠌
ᠡᠨᠳᠡ ᠮᠢᠨᠦ ᠤᠷᠤᠭᠤᠯ ᠣᠮᠣᠭᠣᠯᠲᠤᠳᠠᠭ
ᠠᠭᠤᠯᠠ ᠮᠢᠨᠢ᠁
ᠠᠭᠤᠯᠠ ᠮᠢᠨᠢ᠁
ᠤᠨᠲᠠᠵᠤ ᠬᠣᠴᠣᠷᠤᠭᠠᠳ ᠲᠡᠨᠳᠡ ᠪᠡᠨ ᠴᠢᠯᠠᠭᠤᠵᠢᠭᠰᠠᠨ
ᠲᠩᠷᠢ ᠶ᠋ᠢᠨ ᠭᠥᠷᠦᠭᠡᠰᠦᠨ ᠦ᠌ ᠢᠨᠵᠠᠭᠠ ᠮᠢᠨᠢ᠁
ᠠᠰᠢᠭᠦᠢ ᠮᠢᠨᠢ ᠳᠡ!
ᠵᠣᠭᠳᠣᠷ ᠴᠠᠭᠠᠨ ᠡᠭᠦᠯᠡᠨ ᠭᠠᠷᠤᠯᠠ
ᠵᠣᠷᠭᠣᠯ ᠤ᠋ᠨ ᠮᠢᠨᠢ ᠣᠷᠣᠢ ᠶ᠋ᠢ ᠱᠦᠷᠭᠦᠭᠡ ᠪᠠᠢᠯᠭᠦᠢ
ᠴᠠᠩᠭᠠᠭᠰᠠᠨ ᠴᠡᠴᠡᠭ ᠦ᠋ᠨ ᠬᠢᠨᠢ ᠡᠭᠰᠢᠭᠰᠡᠨ ᠳᠡᠯᠪᠢ ᠶ᠋ᠢ
ᠴᠠᠪᠯᠠᠵᠤ ᠱᠠᠭᠢᠭᠰᠠᠨ ᠪᠣᠷᠣᠭᠠ ᠲᠣᠰᠤᠭᠠ ᠪᠣᠯ ᠤᠤ?
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ