ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠦᠯᠢᠭᠡᠷАлтан Мөнгөн Аргай Үлгэр
1231ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠴᠠᠭᠠᠨ ᠬᠦᠦ ᠲᠡᠢ᠂ ᠨᠠᠢ᠍ᠮᠠᠨ ᠵᠠᠭᠤᠨ ᠠᠳᠤᠭᠤ ᠲᠠᠢ᠂ ᠨᠠᠢ᠍ᠮᠠᠨ ᠬᠥᠯ ᠲᠡᠢ ᠨᠠᠢᠷ ᠠᠯᠠᠭ ᠮᠣᠷᠢ ᠲᠠᠢ᠂ ᠨᠠᠶᠠᠨ ᠨᠠᠰᠤᠲᠠᠢ ᠡᠮᠡᠭᠡᠨ ᠲᠡᠢ ᠨᠠᠮᠲᠠᠢ ᠮᠡᠷᠭᠡᠨ ᠡᠪᠦᠭᠡᠨ ᠭᠡᠵᠦ ᠪᠠᠢᠵᠤ ᠭᠡᠨᠡ ᠃ ᠬᠦᠦ ᠨᠢ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠷ ᠨᠠᠭᠠᠳᠳᠠᠭ ᠪᠠᠢᠵᠤ ᠭᠡᠨᠡ᠃
ᠡᠪᠦᠭᠡᠨ ᠨᠢᠭᠡ ᠥᠷᠯᠥᠭᠡ ᠨᠠᠢ᠍ᠮᠠᠨ ᠵᠠᠭᠤᠨ ᠠᠳᠤᠭᠤ ᠪᠠᠨ ᠨᠠᠭᠠᠰᠢᠯᠠᠭᠤᠯᠬᠤ ᠵᠠᠭᠤᠷᠠ ᠪᠠᠨ ᠠᠷᠤ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠠᠩ ᠬᠦᠷᠦᠭᠡ ᠬᠢᠵᠦ᠂ ᠥᠪᠥᠷ ᠦ᠋ᠨ ᠠᠭᠤᠯᠠᠨ ᠳ᠋ᠤ᠌ ᠦᠨᠡᠭᠡ ᠲᠠᠤᠯᠠᠢ ᠬᠥᠭᠡᠭᠡᠵᠦ ᠶᠠᠪᠤᠵᠠᠢ᠃ ᠭᠡᠲᠡᠯᠡ᠂ ᠭᠡᠷ ᠦ᠋ᠨ ᠴᠢᠨᠡᠭᠡ ᠭᠡᠳᠡᠰᠦ ᠲᠡᠢ᠂ ᠲᠣᠭᠣᠭᠠᠨ ᠴᠢᠨᠡᠭᠡ ᠲᠣᠯᠣᠭᠠᠢ ᠲᠠᠢ᠂ ᠶᠠᠷ ᠶᠠᠷ ᠳᠠᠭᠤ ᠲᠠᠢ᠂ ᠶᠠᠰᠤ ᠠᠷᠠᠰᠤ ᠪᠣᠯᠤᠭᠰᠠᠨ ᠪᠡᠶᠡ ᠲᠡᠢ ᠮᠠᠩᠭᠤᠰ ᠡᠮᠡᠭᠡᠨ ᠭᠠᠷᠴᠤ ᠢᠷᠡᠭᠡᠳ «ᠨᠠᠮᠲᠠᠢ ᠮᠡᠷᠭᠡᠨ ᠡᠪᠦᠭᠡᠨ ᠴᠢ᠂ ᠨᠠᠰᠤᠨ ᠥᠨᠳᠥᠷ ᠠᠮᠢ ᠪᠠᠨ ᠥᠭᠬᠦ ᠤᠤ? ᠨᠠᠢ᠍ᠮᠠᠨ ᠵᠠᠭᠤᠨ ᠠᠳᠤᠭᠤ ᠪᠠᠨ ᠥᠭᠬᠦ ᠤᠤ? ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠬᠦᠦ ᠪᠡᠨ ᠥᠭᠬᠦ ᠤᠤ? ᠨᠠᠳᠠ ᠰᠢᠭ᠋ ᠬᠥᠭᠰᠢᠨ ᠡᠮᠡᠭᠡᠨ ᠢ᠋ᠶ᠋ᠡᠨ ᠥᠭᠬᠦ ᠤᠤ? » ᠭᠡᠵᠦ ᠶᠠᠭᠤ ᠶᠠᠭᠤ ᠦᠭᠡᠢ ᠢᠳᠡᠬᠦ ᠪᠡᠷ ᠵᠠᠪᠳᠤᠵᠠᠢ᠃ ᠡᠪᠦᠭᠡᠨ ᠶᠡᠬᠡᠳᠡ ᠠᠶᠤᠵᠤ ᠬᠣᠭᠣᠯᠠᠢ ᠴᠡᠴᠡᠷᠡᠭᠦᠯᠦᠨ « ᠠ᠋ ᠂ ᠠ᠋᠂ ᠨᠠᠮᠲᠠᠢ ᠮᠡᠷᠭᠡᠨ ᠡᠪᠦᠭᠡᠨ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠵᠦ ᠬᠠᠢᠷᠠᠯᠠ᠂ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠬᠠᠮᠲᠤ ᠠᠮᠢᠳᠤᠷᠠᠭᠰᠠᠨ ᠡᠮᠡᠭᠡᠨ ᠢ᠋ ᠮᠢᠨᠢ ᠪᠢᠲᠡᠭᠡᠢ ᠢᠳᠡ! ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠬᠦᠦ ᠪᠡᠨ ᠦᠭᠶᠡ᠃ ᠭᠡᠬᠦ ᠳ᠋ᠦ᠍ ᠪᠡᠨ᠂ ᠡᠯᠢᠭᠡᠨ ᠳ᠋ᠦ᠍ ᠪᠡᠨ ᠨᠠᠭᠠᠵᠤ᠂ ᠡᠩᠭᠡᠷ ᠲᠦ᠍ ᠪᠡᠨ ᠲᠡᠪᠡᠷᠢᠵᠦ ᠥᠰᠬᠡᠭᠰᠡᠨ ᠡᠵᠢ ᠶ᠋ᠢᠨ ᠬᠢᠨᠢ ᠨᠢᠳᠦᠨ ᠳᠡᠭᠡᠷᠡ ᠥᠭᠴᠦ ᠳᠡᠢᠯᠬᠦ ᠦᠭᠡᠢ ᠳᠡ᠂ ᠮᠠᠨ ᠤ᠋ ᠬᠢ ᠨᠡᠭᠦᠪᠡᠯ ᠭᠤᠷᠪᠠᠨ ᠵᠢᠯ ᠦ᠋ᠨ ᠭᠠᠵᠠᠷ ᠨᠡᠭᠦᠳᠡᠭ᠂ ᠰᠠᠭᠤᠪᠠᠯ ᠭᠤᠷᠪᠠᠨ ᠵᠢᠯ ᠰᠠᠭᠤᠳᠠᠭ᠃ ᠬᠦᠦ ᠮᠢᠨᠢ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠨ ᠠᠮᠢᠨ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠦᠵᠡᠳᠡᠭ ᠶᠤᠮ᠃ ᠲᠡᠭᠦᠨ ᠢ᠋ ᠨᠢ ᠪᠢ ᠪᠠᠭᠤᠴᠠ ᠳᠡᠭᠡᠷᠡ ᠪᠡᠨ ᠣᠷᠬᠢᠭᠠᠳ ᠠᠯᠤᠰ ᠬᠣᠯᠠ ᠨᠡᠭᠦᠶᠡ᠂ ᠠᠷᠭᠠᠢ ᠪᠠᠨ ᠠᠪᠬᠤ ᠭᠡᠵᠦ ᠢᠷᠡᠬᠦ ᠪᠡᠷ ᠨᠢ ᠬᠦᠦ ᠶ᠋ᠢ ᠮᠢᠨᠢ ᠠᠪ ᠳᠠ»᠃ ᠮᠠᠩᠭᠤᠰ ᠡᠮᠡᠭᠡᠨ ᠵᠥᠪᠰᠢᠶᠡᠷᠡᠵᠦ ᠡᠪᠦᠭᠡᠨ ᠢ᠋ ᠶᠠᠪᠤᠭᠤᠯᠵᠤ ᠭᠡᠨᠡ᠃
ᠨᠠᠮᠲᠠᠢ ᠮᠡᠷᠭᠡᠨ ᠭᠡᠷ ᠲᠦ᠍ ᠪᠡᠨ ᠢᠷᠡᠭᠡᠳ « ᠡᠭ ᠂ ᠡᠪᠡᠰᠦ ᠨᠣᠭᠣᠭᠠ ᠭᠠᠩᠳᠠᠯᠠ᠂ ᠥᠭᠡᠷᠡ ᠭᠠᠵᠠᠷ ᠨᠤᠲᠤᠭ ᠰᠡᠯᠭᠦᠶᠡ ᠳᠧ » ᠭᠡᠵᠦ ᠬᠡᠯᠡᠭᠡᠳ ᠨᠡᠭᠦᠵᠡᠢ᠃ ᠰᠢᠨᠡ ᠨᠤᠲᠤᠭ ᠲᠤ᠌ ᠣᠴᠢᠭᠠᠳ ᠰᠢᠷᠢᠬᠢ ᠵᠦᠯᠭᠡᠨ ᠳᠡᠭᠡᠷᠡ ᠭᠡᠷ ᠢ᠋ᠶ᠋ᠡᠨ ᠪᠠᠷᠢᠵᠤ ᠪᠠᠢᠲᠠᠯᠠ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠴᠠᠭᠠᠨ ᠬᠦᠦ ᠨᠢ ᠲᠣᠭᠯᠠᠨ ᠨᠠᠭᠠᠳᠴᠤ ᠪᠠᠢᠭᠠᠳ ᠬᠡᠪ ᠭᠡᠨᠡᠳᠲᠡᠬᠡᠨ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠨ ᠰᠠᠨᠠᠵᠠᠢ᠃
«ᠠᠪᠤ ᠠ᠋ ! ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠮᠢᠨᠢ ᠬᠠᠮᠢᠭᠠ ᠪᠠᠢᠨᠠ?»
« ᠮᠡᠳᠡᠬᠦ ᠦᠭᠡᠢ᠂ ᠡᠵᠢ ᠡᠴᠡ ᠪᠡᠨ ᠠᠰᠠᠭᠤ »
«ᠡᠵᠢ ᠠ᠋᠂ ᠡᠵᠢ ᠠ᠋! ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠮᠢᠨᠢ ᠬᠠᠮᠢᠭᠠ ᠪᠠᠢᠨᠠ?»
«ᠠᠢ! ᠮᠡᠳᠡᠬᠦ ᠦᠭᠡᠢ᠂ ᠮᠢᠨᠦ ᠬᠦᠦ ᠂ ᠠᠪᠤ ᠠ᠋ᠴᠠ ᠪᠠᠨ ᠯᠠ ᠠᠰᠠᠭᠤ »
«ᠠᠪᠤ ᠠ᠋᠂ ᠠᠪᠤ ᠠ᠋! ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠪᠣᠯ?»
«ᠠ᠂ ᠶᠣᠰᠣᠲᠠᠢ ᠪᠤᠤ ᠮᠡᠳᠡ ᠠ᠋᠂ ᠪᠠᠭᠤᠴᠠ ᠳᠡᠭᠡᠷᠡ ᠪᠡᠨ ᠬᠠᠶᠠᠭᠳᠠᠭᠠ ᠪᠢᠵᠡ ᠳᠧ᠂ ᠦᠭᠡᠢ ᠪᠣᠯ»
«ᠲᠡᠭᠡᠪᠡᠯ ᠪᠢ ᠪᠤᠴᠠᠵᠤ ᠣᠴᠢᠭᠠᠳ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠨ ᠠᠪᠤᠭᠠᠳ ᠢᠷᠡᠶᠡ »
«ᠲᠡᠭᠡ᠂ ᠲᠡᠭᠡ ᠠ᠋ ᠂ ᠮᠢᠨᠦ ᠬᠦᠦ!»
« ᠬᠠᠷᠢᠨ ᠪᠢ ᠶᠠᠮᠠᠷ ᠮᠣᠷᠢ ᠤᠨᠤᠵᠤ ᠶᠠᠪᠤᠬᠤ ᠪᠣᠢ?»
« ᠡᠭ! ᠠᠳᠤᠭᠤᠨ ᠤ᠋ ᠪᠠᠨ ᠰᠡᠭᠦᠯ ᠳ᠋ᠦ᠍ ᠶᠠᠪᠤᠳᠠᠭ ᠬᠠᠮᠠᠭᠤ ᠲᠠᠢ ᠬᠠᠷᠠ ᠳᠠᠭᠠ ᠪᠠᠨ ᠤᠨᠤᠭᠠᠳ ᠶᠠᠪᠤ »
«ᠡᠵᠢ ᠠ᠋! ᠪᠢ ᠶᠠᠮᠠᠷ ᠮᠣᠷᠢ ᠤᠨᠤᠵᠤ ᠶᠠᠪᠤᠬᠤ ᠪᠣᠢ?»
«ᠨᠠᠢ᠍ᠮᠠᠨ ᠵᠠᠭᠤᠨ ᠠᠳᠤᠭᠤᠨ ᠤ᠋ ᠪᠠᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠳᠠᠭ ᠨᠠᠢ᠍ᠮᠠᠨ ᠬᠥᠯ ᠲᠡᠢ ᠨᠠᠢᠷ ᠠᠯᠠᠭ ᠮᠣᠷᠢ ᠪᠠᠨ ᠤᠨᠤᠭᠠᠳ ᠶᠠᠪᠤ ᠳᠠ »
«ᠠᠪᠤ ᠠ᠋! ᠪᠢ ᠶᠠᠮᠠᠷ ᠬᠣᠨᠢ ᠪᠠᠷ ᠢ᠋ᠶ᠋ᠠᠨ ᠬᠦᠨᠡᠰᠦ ᠬᠢᠬᠦ ᠪᠣᠢ?»
«ᠬᠣᠨᠢᠨ ᠤ᠋ ᠪᠠᠨ ᠰᠡᠭᠦᠯ ᠳ᠋ᠦ᠍ ᠶᠠᠪᠤᠳᠠᠭ ᠬᠤᠷᠴᠢᠭᠤᠷ ᠬᠠᠷᠠ ᠲᠥᠯᠥᠭᠡ ᠪᠡᠷ ᠢ᠋ᠶ᠋ᠡᠨ ᠬᠦᠨᠡᠰᠦ ᠬᠢ»
«ᠡᠵᠢ ᠠ᠋! ᠪᠢ ᠶᠠᠮᠠᠷ ᠬᠣᠨᠢ ᠪᠠᠷ ᠢ᠋ᠶ᠋ᠠᠨ ᠬᠦᠨᠡᠰᠦ ᠬᠢᠬᠦ ᠪᠣᠢ?»
«ᠲᠦᠮᠡᠨ ᠬᠣᠨᠢᠨ ᠤ᠋ ᠪᠠᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠳᠠᠭ ᠲᠦᠨᠲᠦᠭᠦᠷ ᠪᠣᠷᠣ ᠢᠷᠭᠡ ᠪᠡᠷ ᠢ᠋ᠶ᠋ᠡᠨ ᠬᠦᠨᠡᠰᠦ ᠬᠢ »
ᠢᠩᠭᠢᠭᠡᠳ ᠬᠦᠦ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠨᠠᠢ᠍ᠮᠠᠨ ᠵᠠᠭᠤᠨ ᠠᠳᠤᠭᠤᠨ ᠤ᠋ ᠪᠠᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠳᠠᠭ ᠨᠠᠢ᠍ᠮᠠᠨ ᠬᠥᠯ ᠲᠡᠢ ᠨᠠᠢᠷ ᠠᠯᠠᠭ ᠮᠣᠷᠢ ᠪᠠᠨ ᠤᠨᠤᠵᠤ ᠲᠦᠮᠡᠨ ᠬᠣᠨᠢᠨ ᠤ᠋ ᠪᠠᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠳᠠᠭ ᠲᠦᠨᠲᠦᠭᠦᠷ ᠪᠣᠷᠣ ᠢᠷᠭᠡ ᠪᠡᠷ ᠢ᠋ᠶ᠋ᠡᠨ ᠬᠦᠨᠡᠰᠦ ᠬᠢᠭᠡᠳ ᠶᠠᠪᠤᠵᠤ ᠭᠡᠨᠡ᠃
ᠲᠡᠭᠡᠭᠡᠳ ᠬᠠᠭᠤᠴᠢᠨ ᠪᠠᠭᠤᠷᠢᠨ ᠳᠡᠭᠡᠷᠡ ᠪᠡᠨ ᠢᠷᠡᠲᠡᠯᠡ ᠮᠠᠩᠭᠤᠰ ᠡᠮᠡᠭᠡᠨ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠷ ᠨᠢ ᠲᠣᠭᠯᠠᠵᠤ ᠰᠠᠭᠤᠵᠠᠢ᠃
«ᠡᠮᠧ ᠠ᠋! ᠡᠵᠢ ᠡᠴᠡ ᠮᠢᠨᠢ ᠢᠯᠭᠠᠭᠠ ᠶᠠᠭᠤ ᠪᠠᠢᠬᠤ ᠪᠣᠢ! ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠶ᠋ᠢ ᠮᠢᠨᠢ ᠠᠪᠤᠭᠠᠳ ᠥᠭᠭᠦᠭᠡᠴᠢ!»
«ᠠᠢ᠂ᠮᠢᠨᠦ ᠬᠦᠦ᠂ ᠡᠮᠧ ᠨᠢ ᠪᠣᠰᠪᠠᠯ ᠰᠠᠭᠤᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠰᠠᠭᠤᠪᠠᠯ ᠪᠣᠰᠴᠤ ᠴᠢᠳᠠᠳᠠᠭ ᠦᠭᠡᠢ ᠃ ᠬᠦᠦ ᠮᠢᠨᠢ ᠪᠠᠭᠤᠵᠤ ᠢᠷᠡᠭᠡᠳ ᠠᠪᠤᠭᠠᠳ ᠣᠴᠢ!» ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠠᠢ᠍ᠮᠠᠨ ᠬᠥᠯ ᠲᠡᠢ ᠨᠠᠢᠷ ᠠᠯᠠᠭᠠ ᠮᠣᠷᠢ ᠨᠢ ᠡᠮᠡᠭᠡᠨ ᠢ᠋ ᠡᠭᠡᠯ ᠬᠥᠮᠦᠨ ᠪᠢᠰᠢ ᠭᠡᠳᠡᠭ ᠢ᠋ ᠮᠡᠳᠡᠭᠡᠳ ᠬᠦᠦ ᠳ᠋ᠦ᠍ «ᠪᠢ ᠬᠣᠲᠣᠢᠬᠤ ᠶ᠋ᠢᠨ ᠳᠡᠭᠡᠳᠦ ᠪᠡᠷ ᠬᠣᠲᠣᠢᠶᠠ᠃ ᠴᠢ ᠱᠦᠭᠦᠷᠡᠬᠦ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠱᠦᠭᠦᠷ!» ᠭᠡᠵᠦ ᠰᠢᠪᠡᠨᠡᠨ ᠮᠠᠩᠭᠤᠰ ᠡᠮᠡᠭᠡᠨ ᠢ᠋ ᠨᠢᠳᠦ ᠪᠡᠨ ᠴᠠᠪᠴᠢᠬᠤ ᠵᠠᠭᠤᠷᠠ ᠨᠠᠢᠷ ᠠᠯᠠᠭ ᠮᠣᠷᠢ ᠤᠬᠤᠰᠬᠢᠨ ᠳᠠᠪᠬᠢᠵᠤ ᠬᠣᠲᠣᠢᠬᠤ ᠶ᠋ᠢᠨ ᠳᠡᠭᠡᠳᠦ ᠪᠡᠷ ᠬᠣᠲᠣᠢᠬᠤ ᠳ᠋ᠤ᠌᠂ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠴᠠᠭᠠᠨ ᠬᠦᠦ ᠱᠦᠭᠦᠷᠡᠬᠦ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠱᠦᠭᠦᠷᠡᠵᠦ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠨ ᠠᠪᠤᠭᠠᠳ ᠵᠢᠭᠤᠲᠠᠯᠠ᠃
ᠮᠠᠩᠭᠤᠰ ᠡᠮᠡᠭᠡᠨ ᠴᠦ᠍ ᠪᠣᠰᠤᠨ ᠬᠠᠷᠠᠢᠵᠤ ᠬᠣᠢᠨᠠ ᠡᠴᠡ ᠨᠢ ᠢᠯᠳᠦᠨ ᠬᠥᠭᠡᠭᠡᠯᠡ᠃ ᠬᠥᠭᠡᠭᠡᠭᠰᠡᠭᠡᠷ ᠭᠦᠢᠴᠡᠵᠦ ᠣᠴᠢᠭᠠᠳ ᠨᠠᠢᠷ ᠠᠯᠠᠭ ᠮᠣᠷᠢᠨ ᠤ᠋ ᠨᠠᠢ᠍ᠮᠠᠨ ᠬᠥᠯ ᠦ᠋ᠨ ᠨᠢᠭᠡ ᠶ᠋ᠢ ᠨᠢ ᠬᠠᠳᠤᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠰᠤ ᠰᠢᠷᠪᠠᠯᠠ ᠃ ᠭᠡᠲᠡᠯᠡ ᠨᠠᠢᠷ ᠠᠯᠠᠭ ᠮᠣᠷᠢ ᠳᠣᠯᠣᠭᠠᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠤᠭᠤᠯᠳᠠᠭᠰᠠᠨ ᠳᠠᠪᠬᠢᠵᠤ ᠭᠠᠷᠤᠯᠠ᠃ ᠨᠢᠭᠡᠨ ᠳᠠᠪᠠᠭᠠ ᠳᠠᠪᠠᠭᠠᠳ ᠮᠠᠩᠭᠤᠰ ᠪᠠᠰᠠ ᠯᠠ ᠭᠦᠢᠴᠡᠨ ᠣᠴᠢᠵᠤ ᠮᠣᠷᠢᠨ ᠤ᠋ ᠨᠢᠭᠡ ᠬᠥᠯ ᠢ᠋ ᠨᠢ ᠳᠠᠬᠢᠨ ᠲᠠᠰᠤ ᠴᠠᠪᠴᠢᠪᠠ᠃ ᠡᠢᠨ ᠬᠦ᠌ ᠨᠠᠢ᠍ᠮᠠᠨ ᠳᠠᠪᠠᠭᠠ ᠳᠠᠪᠠᠬᠤ ᠳ᠋ᠤ᠌ ᠨᠠᠢᠷ ᠠᠯᠠᠭ ᠮᠣᠷᠢᠨ ᠤ᠋ ᠨᠠᠢ᠍ᠮᠠᠨ ᠬᠥᠯ ᠢ᠋ ᠨᠢ ᠲᠠᠰᠤ ᠰᠢᠷᠪᠠᠵᠤ ᠳᠠᠭᠤᠰᠴᠠᠢ᠃ ᠨᠠᠢᠷ ᠠᠯᠠᠭ ᠮᠣᠷᠢ ᠨᠢ ᠨᠠᠢ᠍ᠮᠠᠨ ᠬᠥᠯ ᠢ᠋ᠶ᠋ᠡᠨ ᠲᠠᠰᠤᠯᠳᠠᠭᠤᠯᠤᠭᠰᠠᠨ ᠴᠤ᠌ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠴᠠᠭᠠᠨ ᠬᠦᠦ ᠶ᠋ᠢ ᠠᠪᠤᠷᠠᠬᠤ ᠶ᠋ᠢᠨ ᠲᠤᠯᠠᠳᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠡᠮᠪᠡᠭᠡᠨᠡᠨ ᠵᠢᠭᠤᠲᠠᠵᠤ ᠪᠠᠢᠯᠠ᠃ ᠳᠠᠬᠢᠨ ᠨᠢᠭᠡ ᠳᠠᠪᠠᠭᠠ ᠳᠠᠪᠠᠬᠤ ᠳ᠋ᠤ᠌ ᠮᠠᠩᠭᠤᠰ ᠡᠮᠡᠭᠡᠨ ᠭᠦᠢᠴᠡᠨ ᠢᠷᠡᠵᠦ ᠮᠣᠷᠢᠨ ᠤ᠋ ᠪᠥᠭᠰᠡᠨ ᠪᠡᠶᠡ ᠶ᠋ᠢ ᠲᠠᠰᠤ ᠰᠢᠷᠪᠠᠵᠤ ᠭᠡᠨᠡ᠃ ᠬᠥᠭᠡᠷᠦᠬᠦᠢ ᠮᠣᠷᠢ ᠴᠡᠭᠡᠵᠢ ᠪᠡᠷ ᠢ᠋ᠶ᠋ᠡᠨ ᠴᠥᠮᠴᠥᠭᠡᠨᠡᠨ ᠶᠠᠪᠤᠬᠤ ᠵᠠᠭᠤᠷᠠ ᠳ᠋ᠤ᠌ ᠪᠠᠨ ᠴᠠᠭᠠᠨ ᠬᠦᠦ ᠳ᠋ᠦ᠍ « ᠮᠠᠩᠭᠤᠰ ᠡᠮᠡᠭᠡᠨ ᠤᠳᠠᠯ ᠦᠭᠡᠢ ᠭᠦᠢᠴᠡᠵᠦ ᠬᠦᠵᠦᠭᠦᠦ ᠮᠢᠨᠢ ᠲᠠᠰᠤ ᠰᠢᠷᠪᠠᠨᠠ᠂ ᠴᠢ ᠮᠢᠨᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠰᠠᠭᠤᠭᠠᠳ ᠶᠠᠪᠤ !» ᠢᠩᠭᠢᠭᠡᠳ ᠴᠠᠭᠠᠨ ᠬᠦᠦ ᠮᠣᠷᠢᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠰᠠᠭᠤᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠮᠠᠩᠭᠤᠰ ᠡᠮᠡᠭᠡᠨ ᠭᠦᠢᠴᠡᠨ ᠢᠷᠡᠵᠦ ᠮᠣᠷᠢᠨ ᠤ᠋ ᠬᠢᠨᠢ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠴᠠᠪᠴᠢᠪᠠ᠃ ᠢᠩᠭᠢᠭᠡᠳ ᠨᠠᠢᠷ ᠠᠯᠠᠭ ᠮᠣᠷᠢ ᠨᠢ ᠦᠬᠦᠴᠢᠬᠡᠵᠡᠢ᠃ ᠴᠠᠭᠠᠨ ᠬᠦᠦ ᠨᠠᠢᠷ ᠠᠯᠠᠭ ᠮᠣᠷᠢ ᠪᠠᠨ ᠦᠬᠦᠭᠰᠡᠨ ᠳ᠋ᠦ᠍ ᠭᠠᠰᠢᠭᠤᠳᠠᠨ ᠤᠬᠢᠯᠠᠵᠤ ᠮᠠᠩᠭᠤᠰ ᠡᠮᠡᠭᠡᠨ ᠡᠴᠡ ᠵᠢᠭᠤᠲᠠᠨ ᠭᠦᠶᠦᠭᠰᠡᠭᠡᠷ ᠠᠯᠲᠠᠨ ᠤᠯᠢᠶᠠᠰᠤᠨ ᠳᠡᠭᠡᠷᠡ ᠠᠪᠠᠷᠢᠨ ᠭᠠᠷᠴᠠᠢ᠃ ᠮᠠᠩᠭᠤᠰ ᠤᠯᠢᠶᠠᠰᠤ ᠶ᠋ᠢ ᠴᠠᠪᠴᠢᠬᠤ ᠭᠡᠲᠡᠯᠡ ᠨᠢᠭᠡᠨ ᠤᠯᠠᠭᠠᠨ ᠦᠨᠡᠭᠡ ᠭᠦᠶᠦᠨ ᠢᠷᠡᠵᠦ᠄
«ᠡᠵᠢ ᠮᠢᠨᠢ᠂ ᠪᠢ ᠡᠨᠡ ᠤᠯᠢᠶᠠᠰᠤ ᠶ᠋ᠢ ᠤᠨᠠᠭᠠᠶᠠ᠃ ᠲᠠ ᠵᠢᠭᠠᠬᠠᠨ ᠤᠨᠲᠠᠵᠤ ᠠᠮᠠᠷᠠ!»
«ᠠ᠋ ᠂ ᠠᠰᠢᠭᠦᠢ᠂ ᠠᠰᠢᠭᠦᠢ! ᠶᠠᠭᠠᠬᠢᠭᠰᠠᠨ ᠴᠤ᠌ ᠠᠴᠢ ᠲᠤᠰᠠ ᠲᠠᠢ ᠦᠨᠡᠭᠡ ᠶᠤᠮ ᠳᠧ !» ᠡᠮᠡᠭᠡᠨ ᠢᠩᠭᠢᠵᠦ ᠬᠡᠯᠡᠭᠡᠳ ᠪᠠᠷᠠᠭᠤᠨ ᠬᠠᠮᠠᠷ ᠠ᠋ᠴᠠ ᠪᠠᠨ ᠤᠲᠤᠭᠠ ᠰᠠᠪᠰᠠᠭᠤᠯᠤᠨ᠂ ᠵᠡᠭᠦᠨ ᠬᠠᠮᠠᠷ ᠠ᠋ᠴᠠ ᠪᠠᠨ ᠭᠠᠯ ᠪᠠᠳᠠᠷᠠᠭᠤᠯᠤᠨ ᠬᠥᠷ ᠬᠥᠷ ᠬᠤᠷᠬᠢᠷᠠᠨ ᠤᠨᠲᠠᠵᠠᠢ᠃ ᠦᠨᠡᠭᠡ ᠬᠦᠦ ᠶ᠋ᠢ ᠮᠣᠳᠣᠨ ᠡᠴᠡ ᠪᠤᠰᠢᠭᠤᠬᠠᠨ ᠪᠠᠭᠤᠯᠭᠠᠵᠤ ᠶᠠᠪᠤᠭᠤᠯᠤᠭᠠᠳ ᠮᠠᠩᠭᠤᠰ ᠤ᠋ᠨ ᠨᠢᠳᠦ ᠶ᠋ᠢ ᠴᠠᠪᠠᠤᠳᠠᠵᠤ ᠣᠷᠬᠢᠯᠠ᠃ ᠮᠠᠩᠭᠤᠰ ᠰᠡᠷᠡᠭᠡᠳ ᠮᠥᠷ ᠢ᠋ᠶ᠋ᠡᠷ ᠨᠢ ᠰᠢᠩᠰᠢᠨ ᠦᠨᠦᠷᠳᠡᠵᠦ ᠬᠦᠦ ᠶ᠋ᠢ ᠭᠦᠢᠴᠡᠨ ᠣᠴᠢᠵᠠᠢ᠃ ᠴᠠᠭᠠᠨ ᠬᠦᠦ ᠪᠠᠷᠢᠭᠳᠠᠬᠤ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠤᠷᠭᠤᠭᠰᠠᠨ ᠨᠢᠭᠡᠨ ᠠᠯᠲᠠᠨ ᠤᠯᠢᠶᠠᠰᠤᠨ ᠳ᠋ᠤ᠌ ᠳᠠᠬᠢᠨ ᠠᠪᠠᠷᠢᠨ ᠭᠠᠷᠤᠯᠠ᠃ ᠮᠠᠩᠭᠤᠰ ᠮᠣᠳᠣ ᠶ᠋ᠢ ᠴᠠᠪᠴᠢᠬᠤ ᠭᠡᠲᠡᠯᠡ ᠥᠨᠥᠬᠢ ᠤᠯᠠᠭᠠᠨ ᠦᠨᠡᠭᠡ ᠥᠪᠡᠷ ᠢ᠋ ᠪᠡᠨ ᠴᠠᠭᠠᠨ ᠢ᠋ᠶ᠋ᠠᠷ ᠪᠤᠳᠤᠴᠢᠬᠠᠭᠠᠳ ᠳᠠᠬᠢᠨ ᠢᠷᠡᠵᠦ᠄
«ᠡᠵᠢ ᠡᠵᠢ᠂ ᠡᠨᠡ ᠤᠯᠢᠶᠠᠰᠤ ᠶ᠋ᠢ ᠪᠢ ᠤᠨᠠᠭᠠᠵᠤ ᠥᠭᠭᠦᠶᠡ ᠃ »
«ᠪᠢ ᠴᠢᠮᠠ ᠳ᠋ᠤ᠌ ᠶᠠᠭᠠᠬᠢᠵᠤ ᠢᠲᠡᠭᠡᠬᠦ ᠪᠢᠯᠡ? ᠲᠦᠷᠦᠭᠦᠬᠡᠨ ᠨᠢᠭᠡ ᠦᠨᠡᠭᠡ ᠲᠡᠭᠡᠵᠦ ᠬᠠᠭᠤᠷᠤᠭᠠᠳ ᠬᠡᠯᠡᠭᠡᠳ ᠨᠢᠳᠦ ᠶ᠋ᠢ ᠮᠢᠨᠢ ᠴᠠᠪᠠᠤᠳᠤᠭᠰᠠᠨ᠃ »
« ᠦᠭᠡᠢ! ᠡᠵᠢ ᠠ᠋᠂ ᠲᠡᠷᠡ ᠴᠢᠨᠢ ᠲᠠᠯᠠ ᠶ᠋ᠢᠨ ᠦᠨᠡᠭᠡ ᠂ ᠠ᠂ ᠪᠢ ᠪᠣᠯ ᠲᠠᠢᠭᠠ ᠶ᠋ᠢᠨ ᠦᠨᠡᠭᠡ ᠃ » ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠡᠮᠡᠭᠡᠨ ᠮᠥᠨ ᠢᠳᠡᠭᠡᠨ ᠤᠨᠲᠠᠭᠠᠳ ᠥᠭᠴᠡᠢ᠃ ᠦᠨᠡᠭᠡ ᠬᠦᠦ ᠶ᠋ᠢ ᠬᠤᠷᠳᠤᠬᠠᠨ ᠰᠢᠭ᠋ ᠮᠣᠳᠣᠨ ᠡᠴᠡ ᠨᠢ ᠪᠠᠭᠤᠯᠭᠠᠭᠠᠳ ᠮᠠᠩᠭᠤᠰ ᠤ᠋ᠨ ᠨᠢᠳᠦ ᠶ᠋ᠢ ᠳᠠᠬᠢᠨ ᠴᠠᠪᠠᠤᠳᠠᠯᠠ᠃ ᠮᠠᠩᠭᠤᠰ ᠡᠮᠡᠭᠡᠨ ᠰᠡᠷᠢᠵᠦ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠴᠠᠭᠠᠨ ᠬᠦᠦ ᠶ᠋ᠢᠨ ᠰᠢᠨᠡ ᠮᠥᠷ ᠢ᠋ᠶ᠋ᠡᠷ ᠨᠢ ᠰᠢᠩᠰᠢᠵᠦ ᠬᠠᠭᠤᠴᠢᠨ ᠮᠥᠷ ᠢ᠋ᠶ᠋ᠡᠷ ᠨᠢ ᠬᠤᠩᠰᠢᠨ ᠨᠡᠬᠡᠪᠡ᠃ ᠬᠦᠦ ᠶ᠋ᠢ ᠮᠠᠩᠭᠤᠰ ᠡᠴᠡ ᠵᠢᠭᠤᠲᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠨᠠᠢᠷ ᠠᠯᠠᠭ ᠮᠣᠷᠢ ᠨᠢ ᠪᠤᠬᠠᠨ ᠪᠢᠷᠠᠭᠤ ᠪᠣᠯᠤᠨ ᠬᠤᠪᠢᠯᠤᠭᠠᠳ ᠳᠠᠪᠬᠢᠨ ᠢᠷᠡᠵᠦ᠄
«ᠬᠦᠦ ᠮᠢᠨᠢ ᠂ ᠨᠠᠮᠠᠶ᠋ᠢ ᠤᠨᠤᠭᠠᠳ ᠶᠠᠪᠤ ᠃ » ᠴᠠᠭᠠᠨ ᠬᠦᠦ ᠪᠢᠷᠠᠭᠤ ᠶ᠋ᠢ ᠤᠨᠤᠵᠤ ᠴᠠᠰᠢ ᠵᠢᠭᠤᠲᠠᠭᠰᠠᠨ ᠪᠣᠯᠪᠠᠴᠤ ᠮᠠᠩᠭᠤᠰ ᠲᠤᠩ ᠣᠢᠷᠠᠬᠠᠨ ᠢᠷᠡᠵᠡᠢ᠃ ᠡᠮᠡᠭᠡᠨ ᠬᠠᠳᠤᠭᠤᠷ ᠢ᠋ᠶ᠋ᠠᠷ ᠬᠥᠯ ᠢ᠋ ᠨᠢ ᠴᠠᠪᠴᠢᠬᠤ ᠭᠡᠳ ᠳᠣᠷᠣᠭᠰᠢ ᠲᠣᠩᠭᠣᠢᠲᠠᠯᠠ ᠪᠤᠬᠠᠨ ᠪᠢᠷᠠᠭᠤ ᠪᠠᠭᠠᠵᠤ ᠮᠠᠩᠭᠤᠰ ᠤ᠋ᠨ ᠬᠠᠮᠠᠷ ᠳᠡᠭᠡᠷᠡ ᠨᠠᠭᠠᠯᠳᠤᠴᠢᠬᠠᠵᠠᠢ᠃ ᠮᠠᠩᠭᠤᠰ ᠠᠭᠤᠷᠯᠠᠭᠠᠳ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠣᠴᠢᠭᠠᠳ ᠤᠰᠤ ᠶ᠋ᠢ ᠨᠢ ᠪᠤᠯᠠᠩᠭᠢᠷᠲᠤᠲᠠᠯᠠ ᠤᠬᠢᠶᠠᠵᠠᠢ᠃ ᠪᠤᠬᠠᠨ ᠪᠢᠷᠠᠭᠤ ᠰᠡᠭᠦᠯ ᠢ᠋ᠶ᠋ᠡᠨ ᠮᠣᠳᠣᠢᠯᠭᠠᠨ ᠳᠠᠪᠬᠢᠬᠤ ᠳ᠋ᠤ᠌᠂ ᠬᠦᠦ ᠬᠣᠶᠠᠷ ᠴᠢᠬᠢᠨ ᠡᠴᠡ ᠨᠢ ᠪᠠᠷᠢᠨ ᠬᠥᠪᠡᠭᠡ ᠲᠤᠯᠤᠭᠠᠳ ᠳᠠᠪᠠᠨ ᠨᠡᠯᠢᠶᠡᠳ ᠬᠣᠯᠠ ᠵᠢᠭᠤᠲᠠᠵᠤ ᠠᠮᠵᠢᠪᠠ᠃ ᠴᠠᠭᠠᠨ ᠬᠦᠦ ᠨᠡᠭᠦᠳᠡᠯ ᠦ᠋ᠨ ᠵᠠᠮ ᠳ᠋ᠤ᠌ ᠭᠡᠭᠡᠭᠳᠡᠭᠰᠡᠨ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠢᠯᠡᠭᠦᠨ ᠦ᠌ ᠬᠠᠭᠠᠷᠬᠠᠢ᠂ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠮ ᠤ᠋ᠨ ᠬᠤᠭᠤᠷᠬᠠᠢ ᠰᠡᠲᠡᠷᠬᠡᠢ ᠲᠡᠪᠡᠨᠡ ᠶ᠋ᠢ ᠠᠪᠤᠨ ᠴᠠᠰᠢ ᠶᠠᠪᠤᠯᠠ᠃ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠮᠠᠩᠭᠤᠰ ᠡᠮᠡᠭᠡᠨ ᠳᠠᠬᠢᠨ ᠭᠦᠢᠴᠡᠵᠦ ᠢᠷᠡᠯᠡ᠃ ᠬᠦᠦ ᠮᠠᠩᠭᠤᠰ ᠢ᠋ ᠳᠥᠭᠥᠵᠦ ᠢᠷᠡᠮᠡᠭᠴᠡ «ᠪᠠᠲᠠᠭᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠪᠠᠭᠲᠠᠬᠤ ᠦᠭᠡᠢ ᠪᠢᠲᠡᠭᠦᠦ ᠬᠠᠷᠠ ᠰᠢᠷᠢᠩᠭᠢ ᠪᠣᠯ!» ᠭᠡᠵᠦ ᠬᠡᠯᠡᠭᠡᠳ ᠬᠤᠭᠤᠷᠬᠠᠢ ᠰᠠᠮ ᠢ᠋ᠶ᠋ᠠᠨ ᠰᠢᠪᠰᠢᠭᠡᠳ ᠰᠢᠳᠡᠬᠦ ᠳ᠋ᠦ᠍ ᠪᠢᠲᠡᠭᠦᠦ ᠬᠠᠷᠠ ᠰᠢᠷᠢᠩᠭᠢ ᠪᠣᠯᠪᠠ᠃
« ᠴᠠᠭᠠᠨ ᠠ᠋ ᠴᠢ᠂ ᠡᠨᠡ ᠪᠢᠲᠡᠭᠦᠦ ᠰᠢᠷᠢᠩᠭᠢ ᠶ᠋ᠢᠨ ᠴᠠᠭᠠᠨᠠ ᠨᠢ ᠶᠠᠭᠠᠬᠢᠵᠤ ᠭᠠᠷᠪᠠ? »
« ᠡᠮᠧ ᠮᠢᠨᠢ᠂ ᠨᠢᠭᠤᠷ ᠨᠢᠳᠦ ᠪᠡᠨ ᠰᠣᠬᠣᠯᠤᠨ ᠪᠠᠢᠵᠤ ᠪᠢ ᠭᠠᠷᠤᠯᠠ » ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠮᠠᠩᠭᠤᠰ ᠡᠮᠡᠭᠡᠨ ᠴᠦ᠍ ᠨᠢᠭᠤᠷ ᠨᠢᠳᠦ ᠪᠡᠨ ᠰᠣᠬᠣᠯᠤᠨ ᠠᠷᠠᠢ ᠭᠡᠵᠦ ᠭᠠᠷᠤᠭᠠᠳ ᠭᠦᠢᠴᠡᠨ ᠢᠷᠡᠯᠡ᠃ ᠬᠦᠦ ᠮᠠᠩᠭᠤᠰ ᠢ᠋ ᠭᠦᠢᠴᠡᠭᠡᠳ ᠢᠷᠡᠬᠦᠯᠡᠷ ᠪᠢᠯᠡᠭᠦᠨ ᠦ᠌ ᠬᠠᠭᠠᠷᠬᠠᠢ ᠶ᠋ᠢ « ᠡᠯᠢᠶᠡ ᠰᠢᠪᠠᠭᠤᠨ ᠳᠠᠪᠠᠬᠤ ᠦᠭᠡᠢ᠂ ᠡᠯᠢᠭᠡᠨ ᠤᠯᠠᠭᠠᠨ ᠬᠠᠳᠠ ᠪᠣᠯ» ᠭᠡᠳ ᠰᠢᠳᠡᠲᠡᠯᠡ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠨᠢ ᠪᠣᠯᠪᠠ᠃ ᠮᠠᠩᠭᠤᠰ ᠡᠮᠡᠭᠡᠨ᠄
«ᠠ᠋ ᠬᠦᠦ ᠮᠢᠨᠢ ᠴᠢ! ᠡᠨᠡ ᠡᠯᠢᠭᠡᠨ ᠤᠯᠠᠭᠠᠨ ᠬᠠᠳᠠ ᠶ᠋ᠢ ᠶᠠᠭᠠᠬᠢᠵᠤ ᠳᠠᠪᠠᠪᠠ?»
«ᠦᠭᠡᠢ ᠶᠠᠭᠠᠬᠢᠬᠤᠪ᠂ ᠪᠢ ᠭᠠᠷ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠴᠢᠨ ᠪᠠᠢᠵᠤ ᠳᠠᠪᠠᠭᠰᠠᠨ ᠶᠤᠮ» ᠡᠮᠡᠭᠡᠨ ᠡᠯᠢᠭᠡᠨ ᠤᠯᠠᠭᠠᠨ ᠬᠠᠳᠠ ᠶ᠋ᠢ ᠵᠠᠪ ᠳᠠᠭᠠᠷᠢᠵᠤ ᠭᠠᠷ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠴᠢᠨ ᠪᠠᠢᠵᠤ ᠳᠠᠪᠠᠭᠠᠳ ᠪᠠᠰᠠ ᠯᠠ ᠭᠦᠢᠴᠡᠨ ᠢᠷᠡᠪᠡ᠃ ᠬᠦᠦ ᠮᠠᠩᠭᠤᠰ ᠢ᠋ ᠳᠥᠭᠥᠨ ᠢᠷᠡᠮᠡᠭᠴᠡ ᠰᠡᠲᠡᠷᠬᠡᠢ ᠲᠡᠪᠡᠨᠡ ᠪᠡᠨ ᠰᠢᠪᠰᠢᠨ ᠰᠢᠪᠰᠢᠨ « ᠵᠠᠭᠠᠭᠰᠤᠯᠠᠵᠤ ᠪᠠᠷᠠᠬᠤ ᠦᠭᠡᠢ ᠵᠠᠬᠠ ᠦᠭᠡᠢ ᠳᠠᠯᠠᠢ ᠪᠣᠯ»
«ᠠ᠋ ᠬᠦᠦ ᠮᠢᠨᠢ᠂ ᠡᠨᠡ ᠶᠡᠬᠡ ᠳᠠᠯᠠᠢ ᠶ᠋ᠢ ᠴᠢ ᠶᠠᠭᠠᠬᠢᠵᠤ ᠭᠠᠲᠤᠯᠪᠠ ?»
«ᠡᠮᠧ ᠠ᠋ ᠂ ᠪᠢ ᠦᠬᠡᠷ ᠦ᠋ᠨ ᠴᠢᠨᠡᠭᠡ ᠬᠣᠶᠠᠷ ᠴᠢᠯᠠᠭᠤ ᠶ᠋ᠢ ᠮᠥᠷᠦᠨ ᠳ᠋ᠦ᠍ ᠪᠡᠨ ᠵᠡᠭᠦᠭᠡᠳ ᠬᠣᠯᠪᠢᠰ ᠬᠣᠯᠪᠢᠰ ᠭᠡᠳ ᠭᠠᠲᠤᠯᠤᠭᠰᠠᠨ᠃» ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠮᠠᠩᠭᠤᠰ ᠦᠬᠡᠷ ᠦ᠋ᠨ ᠴᠢᠨᠡᠭᠡ ᠬᠣᠶᠠᠷ ᠴᠢᠯᠠᠭᠤ ᠶ᠋ᠢ ᠮᠥᠷᠦᠨ ᠳ᠋ᠦ᠍ ᠪᠡᠨ ᠵᠡᠭᠦᠭᠡᠳ ᠬᠣᠯᠪᠢᠰ ᠬᠣᠯᠪᠢᠰ ᠭᠡᠳ ᠭᠠᠷᠬᠤ ᠭᠡᠲᠡᠯᠡ ᠳᠠᠯᠠᠢ ᠶ᠋ᠢᠨ ᠵᠠᠬᠠ ᠤᠷᠤᠭᠤ ᠣᠷᠣᠵᠤ ᠵᠢᠪᠴᠦ ᠦᠬᠦᠵᠡᠢ᠃
ᠢᠩᠭᠢᠭᠡᠳ ᠬᠦᠦ ᠴᠠᠰᠢ ᠶᠠᠪᠤᠵᠤ ᠪᠠᠢᠲᠠᠯᠠ ᠪᠤᠬᠠᠨ ᠪᠢᠷᠠᠭᠤ ᠨᠢ᠄
« ᠨᠠᠮᠠᠶ᠋ᠢ ᠠᠯᠠᠭᠠᠳ ᠳᠥᠷᠪᠡᠨ ᠬᠥᠯ ᠢ᠋ ᠮᠢᠨᠢ ᠳᠥᠷᠪᠡᠨ ᠲᠡᠰᠢ ᠬᠠᠷᠠᠭᠤᠯᠵᠤ ᠵᠢᠷᠦᠬᠡ ᠶ᠋ᠢ ᠮᠢᠨᠢ ᠡᠪᠦᠷᠲᠦᠯᠡᠵᠦ ᠤᠨᠲᠠᠭᠠᠷᠠᠢ»
« ᠪᠢ ᠶᠠᠭᠠᠬᠢᠯᠠ ᠭᠡᠵᠦ ᠠᠴᠢᠲᠠᠢ ᠪᠤᠶᠠᠨᠲᠠᠢ ᠴᠢᠮᠠᠶ᠋ᠢ ᠠᠯᠠᠬᠤ ᠪᠢᠯᠡ ᠳᠧ ?»
« ᠮᠢᠨᠦ ᠲᠣᠯᠣᠭᠠᠢ ᠵᠠᠭᠠᠲᠤᠨᠠᠭᠠᠳ ᠪᠠᠢᠨᠠ᠂ ᠶᠠᠭᠤ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠥᠭᠭᠦᠭᠡᠴᠢ »
«ᠠᠯᠢ ᠪᠣᠢ᠂ ᠦᠭᠡᠢ ᠡᠨᠡ ᠴᠢᠨᠢ ᠨᠢᠭᠡ ᠤᠯᠠᠭᠠᠨ ᠰᠢᠷᠬᠡ ᠪᠠᠢᠨᠠ» ᠭᠡᠵᠦ ᠬᠡᠯᠡᠭᠡᠳ ᠨᠢᠰᠠᠯᠤᠭᠠᠳ ᠠᠯᠠᠴᠢᠬᠠᠪᠠ᠃ ᠭᠡᠲᠡᠯᠡ ᠪᠢᠷᠠᠭᠤ ᠨᠢ ᠦᠬᠦᠴᠢᠬᠡᠵᠡᠢ᠃ ᠴᠠᠭᠠᠨ ᠬᠦᠦ ᠭᠠᠰᠢᠭᠤᠳᠠᠨ ᠤᠬᠢᠯᠠᠭᠰᠠᠭᠠᠷ ᠪᠢᠷᠠᠭᠤᠨ ᠤ᠋ ᠪᠠᠨ ᠳᠥᠷᠪᠡᠨ ᠬᠥᠯ ᠢ᠋ ᠨᠢ ᠳᠥᠷᠪᠡᠨ ᠲᠡᠰᠢ ᠬᠠᠷᠠᠭᠤᠯᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠤᠷᠢᠳᠤ ᠵᠦᠭ ᠲᠠᠯᠪᠢᠭᠠᠳ ᠵᠢᠷᠦᠬᠡ ᠶ᠋ᠢ ᠨᠢ ᠡᠪᠦᠷᠲᠦᠯᠡᠨ ᠤᠨᠲᠠᠵᠠᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠰᠡᠷᠡᠲᠡᠯᠡ ᠥᠷᠭᠥᠭᠡ ᠰᠠᠢᠬᠠᠨ ᠭᠡᠷ᠂ ᠦᠵᠡᠰᠬᠦᠯᠡᠩ ᠭᠤᠸᠠ ᠭᠡᠷᠭᠡᠢ ᠲᠡᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠭᠠᠳᠠᠭᠰᠢ ᠭᠠᠷᠤᠨ ᠬᠠᠷᠠᠲᠠᠯᠠ ᠠᠷᠤ ᠪᠠᠷ ᠢ᠋ᠶ᠋ᠠᠨ ᠠᠶᠠ ᠲᠦᠮᠡᠨ ᠠᠳᠤᠭᠤ ᠥᠪᠥᠷ ᠢ᠋ᠶ᠋ᠡᠷ ᠨᠢ ᠦᠢ ᠲᠦᠮᠡᠨ ᠦᠬᠡᠷ ᠬᠣᠨᠢ ᠪᠡᠯᠴᠢᠵᠦ ᠪᠠᠢᠯᠠ᠃ ᠴᠠᠭᠠᠨ ᠬᠦᠦ ᠄
« ᠪᠢ ᠡᠵᠢ ᠠᠪᠤ ᠪᠠᠨ ᠡᠷᠭᠢᠭᠡᠳ ᠢᠷᠡᠶᠡ » ᠭᠡᠵᠦ ᠡᠬᠡᠨᠡᠷ ᠲᠡᠭᠡᠨ ᠬᠡᠯᠡᠭᠡᠳ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠨ ᠡᠪᠦᠷᠲᠦᠯᠡᠨ ᠭᠡᠷ ᠲᠡᠭᠡᠨ ᠢᠷᠡᠯᠡ᠃ ᠭᠡᠲᠡᠯᠡ ᠠᠪᠤ ᠨᠢ ᠠᠳᠤᠭᠤᠨ ᠳ᠋ᠤ᠌ ᠪᠠᠨ ᠶᠠᠪᠤᠴᠢᠬᠠᠭᠰᠠᠨ᠂ ᠡᠬᠡ ᠨᠢ ᠡᠩᠭᠡᠷ ᠢ᠋ᠶ᠋ᠡᠨ ᠨᠡᠪᠲᠡᠷᠡᠲᠡᠯᠡ ᠤᠬᠢᠯᠠᠵᠤ ᠰᠠᠭᠤᠨᠠ᠃ ᠡᠵᠢ ᠨᠢ ᠬᠦᠦ ᠪᠡᠨ ᠬᠠᠷᠠᠭᠠᠳ ᠤᠤᠯᠭᠠ ᠠᠯᠲᠠᠨ ᠲᠡᠪᠡᠷᠢᠵᠦ ᠄ « ᠡᠪᠡᠢ ! ᠮᠢᠨᠦ ᠬᠦᠦ ᠂ ᠢᠩᠭᠢᠭᠡᠳ ᠬᠦᠷᠦᠭᠡᠳ ᠢᠷᠡᠳᠡᠭ ᠶᠤᠮ ᠪᠠᠢᠵᠠᠢ » ᠭᠡᠵᠦ ᠤᠬᠢᠯᠠᠨ ᠪᠠᠢᠵᠤ ᠬᠡᠯᠡᠭᠡᠳ ᠠᠪᠤ ᠨᠢ ᠶᠠᠮᠠᠷ ᠤᠴᠢᠷ ᠡᠴᠡ ᠬᠦᠦ ᠪᠡᠨ ᠶᠠᠪᠤᠭᠤᠯᠤᠭᠰᠠᠨ ᠢ᠋ ᠨᠢ ᠬᠡᠯᠡᠪᠡ᠃ ᠬᠦᠦ ᠦᠨᠡᠮᠰᠢᠭᠰᠡᠨ ᠦᠭᠡᠢ᠃
« ᠬᠦᠦ ᠮᠢᠨᠢ᠂ ᠴᠢ ᠠᠪᠳᠠᠷᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠣᠷᠣᠭᠠᠳ ᠨᠢᠭᠤᠭᠳᠠᠵᠤ ᠪᠠᠢ᠂ ᠠᠪᠤ ᠴᠢᠨᠢ ᠢᠷᠡᠭᠡᠳ ᠬᠣᠨᠢ ᠭᠠᠷᠭᠠᠨᠠ᠂ ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠨᠢ ᠰᠣᠨᠣᠰ » ᠭᠡᠵᠦ ᠬᠡᠯᠡᠯᠡ᠃ ᠬᠦᠦ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠡᠬᠦ ᠴᠢᠮᠡᠭᠡ ᠪᠡᠷ ᠠᠪᠳᠠᠷᠠ ᠶ᠋ᠢᠨ ᠠᠷᠤ ᠪᠠᠷ ᠨᠢᠭᠤᠭᠳᠠᠯᠠ᠃ ᠡᠵᠢ ᠨᠢ ᠭᠡᠳᠡᠰᠦ ᠴᠢᠨᠠᠭᠠᠳ ᠄
«ᠬᠦᠦ ᠮᠢᠨᠢ ᠢᠷᠡᠭᠡᠰᠡᠢ᠂ ᠦᠩᠬᠦᠯᠴᠡᠭ ᠢ᠋ ᠨᠢ ᠥᠭᠬᠦ ᠰᠠᠨ!»
«ᠶᠠᠭᠤᠨ ᠬᠦᠦ!» ᠭᠡᠵᠦ ᠬᠡᠯᠡᠭᠡᠳ ᠡᠵᠢ ᠶ᠋ᠢ ᠨᠢ ᠨᠣᠢᠲᠠᠨ ᠪᠤᠷᠭᠠᠰᠤ ᠪᠥᠬᠥᠢᠲᠡᠯᠡ᠂ ᠬᠠᠭᠤᠷᠠᠢ ᠪᠤᠷᠭᠠᠰᠤ ᠬᠤᠭᠤᠷᠠᠲᠠᠯᠠ ᠵᠠᠨᠴᠢᠪᠠ᠃
«ᠦᠬᠦᠭᠡ ᠦᠭᠡᠢ ᠬᠦᠦ ᠳ᠋ᠦ᠍ ᠪᠡᠨ ᠦᠩᠬᠦᠯᠴᠡᠭ ᠵᠢᠷᠦᠬᠡ ᠥᠭᠳᠡᠭ ᠵᠠᠩᠰᠢᠯ ᠲᠠᠢ !» ᠭᠡᠵᠦ ᠬᠡᠯᠡᠭᠡᠳ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠪᠠᠷ ᠢ᠋ᠶ᠋ᠠᠨ «ᠠᠷᠭᠠᠢ ᠠᠷᠭᠠᠢ ᠲᠦᠭᠦᠳᠡᠭ ᠂ ᠠᠪᠤ ᠶ᠋ᠢᠨ ᠲᠣᠯᠣᠭᠠᠢ ᠬᠠᠭᠠ» ᠭᠡᠵᠦ ᠬᠡᠯᠡᠭᠡᠳ ᠴᠣᠬᠢᠲᠠᠯᠠ ᠠᠪᠤ ᠨᠢ ᠭᠠᠵᠠᠷ ᠤᠨᠠᠭᠠᠳ ᠤᠬᠠᠭᠠ ᠠᠯᠳᠠᠵᠠᠢ᠃
«ᠲᠥᠷᠥᠭᠰᠡᠨ ᠭᠠᠭᠴᠠ ᠬᠦᠦ ᠪᠡᠨ ᠮᠠᠩᠭᠤᠰ ᠲᠤ᠌ ᠵᠢᠭᠠᠵᠤ ᠥᠭᠳᠡᠭ᠂ ᠬᠠᠨᠢᠯᠠᠭᠰᠠᠨ ᠬᠠᠨᠢ ᠪᠠᠨ ᠣᠷᠣᠢ ᠪᠣᠯᠭᠠᠨ ᠵᠠᠨᠴᠢᠳᠠᠭ ᠥᠭᠡᠳᠡ ᠦᠭᠡᠢ ᠠᠪᠤ ᠪᠠᠷ ᠶᠠᠭᠠᠬᠢᠬᠤ ᠪᠣᠢ!» ᠭᠡᠵᠦ ᠬᠡᠯᠡᠭᠡᠳ ᠡᠵᠢ ᠶ᠋ᠢ ᠪᠡᠨ ᠳᠠᠭᠠᠭᠤᠯᠤᠨ ᠶᠠᠪᠤᠵᠠᠢ᠃
ᠢᠩᠭᠢᠭᠡᠳ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌ ᠮᠠᠯ ᠰᠦᠷᠦᠭ ᠨᠢ ᠪᠡᠯᠴᠢᠭᠰᠡᠨ ᠥᠷᠭᠥᠭᠡ ᠴᠠᠭᠠᠨ ᠭᠡᠷ ᠲᠡᠭᠡᠨ ᠡᠵᠢ ᠡᠬᠡᠨᠡᠷ ᠬᠣᠶᠠᠷ ᠲᠠᠢ ᠪᠠᠨ ᠠᠮᠤᠷ ᠠᠮᠤᠭᠤᠯᠠᠩ ᠠᠮᠢᠳᠤᠷᠠᠬᠤ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ᠃
ᠲᠠᠢᠯᠪᠤᠷᠢ᠄
ᠡᠨᠡ ᠦᠯᠢᠭᠡᠷ ᠢ᠋ ᠭ᠂ ᠳ᠂ ᠰᠠᠨᠵᠧᠸ ᠦ᠋ᠨ «ᠳᠠᠷᠬᠠᠲ᠋ᠰᠺ ᠤ᠋ᠨ ᠭᠣᠪᠣᠷ ᠢ ᠹᠣᠯᠺᠯᠣᠷ» ᠯᠠ᠃ 1931 ᠭᠡᠳᠡᠭ ᠨᠣᠮ ᠳ᠋ᠤ᠌ ᠪᠠᠢᠭᠠ (69—71 ) «ᠴᠡᠭᠡᠪᠡᠨ ᠬᠦᠦ» ᠭᠡᠳᠡᠭ ᠦᠯᠢᠭᠡᠷ᠃ ᡀᠠᠮᠣᠰᠦ᠋ᠷᠦᠩ᠃ 1943 (18—20 ) ᠭᠡᠳᠡᠭ ᠡᠮᠬᠢᠳᠬᠡᠯ ᠳ᠋ᠦ᠍ ᠪᠠᠢᠭᠠ «ᠨᠠᠮ ᠲᠠᠢ ᠮᠡᠷᠭᠡᠨ ᠬᠠᠭᠠᠨ» ᠭᠡᠳᠡᠭ ᠦᠯᠢᠭᠡᠷ᠂ ᠵ᠂ ᠨᠠᠳᠮᠢᠳ ᠤ᠋ᠨ ᠡᠮᠬᠢᠳᠬᠡᠭᠰᠡᠨ «МАҮ» ᠤᠪ᠃ 1957 ᠭᠡᠳᠡᠭ ᠡᠮᠬᠢᠳᠬᠡᠯ ᠳ᠋ᠦ᠍ (138—141 ) ᠪᠠᠢᠭᠠ «ᠨᠠᠢ᠍ᠮᠠᠨ ᠬᠥᠯᠲᠦ ᠨᠠᠢᠷ ᠠᠯᠠᠭ» ᠭᠡᠳᠡᠭ ᠦᠯᠢᠭᠡᠷ᠂ ᠮᠥᠨ ᠳ᠂ ᠳᠠᠰᠢᠳᠣᠷᠵᠢ᠃ ᠭᠦᠷᠦᠷᠢᠨᠴᠢᠨ ᠨᠠᠷ ᠤ᠋ᠨ ᠡᠮᠬᠢᠳᠬᠡᠭᠰᠡᠨ «ᠠᠷᠠᠳ ᠤ᠋ᠨ ᠠᠮᠠᠨ ᠵᠣᠬᠢᠶᠠᠯ ᠠ᠋ᠴᠠ» ᠤᠪ.᠂ 1958 ᠭᠡᠳᠡᠭ ᠡᠮᠬᠢᠳᠬᠡᠯ ᠳ᠋ᠦ᠍ (38—39 ) ᠪᠠᠢᠭᠠ «ᠨᠠᠢ᠍ᠮᠠᠨ ᠬᠥᠯ ᠲᠡᠢ ᠨᠠᠢᠭᠤᠯ ᠽᠠᠨᠳᠠᠨ» ᠭᠡᠳᠡᠭ ᠦᠯᠢᠭᠡᠷ ᠵᠡᠷᠭᠡ ᠶ᠋ᠢ ᠬᠠᠷᠢᠴᠠᠭᠤᠯᠤᠨ ᠲᠣᠬᠢᠶᠠᠯᠳᠤᠭᠤᠯᠵᠤ ᠨᠠᠢᠷᠠᠭᠤᠯᠤᠨ ᠪᠠᠭᠤᠯᠭᠠᠵᠤ ᠠᠪᠤᠪᠠ᠃
ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ ᠲᠦ᠍ ᠭᠡᠷ ᠦ᠋ᠨ ᠴᠢᠨᠡᠭᠡᠨ ᠭᠡᠳᠡᠰᠦ ᠲᠡᠢ᠂ ᠲᠣᠭᠣᠭᠠᠨ ᠴᠢᠨᠡᠭᠡ ᠲᠣᠯᠣᠭᠠᠢ ᠲᠠᠢ ᠠᠲᠤᠭᠠᠯᠵᠢᠨ ᠮᠠᠩᠭᠤᠰ ᠲᠠᠢ ᠲᠡᠮᠡᠴᠡᠵᠦ ᠂ ᠰᠠᠭᠠᠳ ᠪᠡᠷᠬᠡᠰᠢᠶᠡᠯ ᠢ᠋ ᠳᠠᠪᠠᠨ ᠲᠤᠭᠤᠯᠬᠤ ᠨᠢᠭᠡᠨ ᠬᠦᠦ ᠶ᠋ᠢᠨ ᠡᠷᠡ ᠵᠣᠷᠢᠭ᠂ ᠠᠷᠭᠠ ᠤᠬᠠᠭᠠᠨ᠂ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ ᠶ᠋ᠢ ᠤᠷᠠᠨ ᠢᠷᠠᠭᠤ ᠳᠦᠷᠰᠦᠯᠡᠨ ᠦᠵᠡᠭᠦᠯᠦᠭᠰᠡᠨ ᠪᠢᠯᠡ᠃ ᠨᠠᠢ᠍ᠮᠠᠨ ᠵᠠᠭᠤᠨ ᠠᠳᠤᠭᠤᠨ ᠤ᠋ ᠪᠠᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠳᠠᠭ᠂ ᠨᠠᠢᠷ ᠠᠯᠠᠭ ᠮᠣᠷᠢ ᠲᠠᠢ᠂ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠵᠢᠭᠠᠬᠠᠨ ᠬᠦᠦ ᠠᠲᠤᠭᠠᠯᠵᠢᠨ ᠮᠠᠩᠭᠤᠰ ᠢ᠋ ᠢᠯᠠᠨ ᠲᠠᠢᠯᠵᠤ᠂ ᠠᠯᠲᠠᠨ ᠮᠥᠩᠭᠥᠨ ᠠᠷᠭᠠᠢ ᠶ᠋ᠢ ᠪᠡᠨ ᠡᠷᠭᠢᠭᠦᠯᠦᠨ ᠠᠪᠴᠤ ᠪᠠᠢᠭᠠ ᠪᠠᠭᠠᠲᠤᠷᠯᠢᠭ ᠲᠡᠦᠬᠡ ᠶᠤᠮ᠃ ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠦᠯᠢᠭᠡᠷ ᠨᠢ ᠬᠡᠦᠬᠡᠳ ᠲᠦ᠍ ᠪᠠᠭᠠ ᠡᠴᠡ ᠨᠢ ᠵᠣᠷᠢᠭ᠂ ᠲᠡᠪᠴᠢᠶᠡᠷᠢ ᠲᠡᠢ᠂ ᠵᠣᠷᠢᠭᠰᠠᠨ ᠳ᠋ᠠᠭᠠᠨ ᠬᠥᠷᠥᠬᠦ ᠶ᠋ᠢᠨ ᠲᠥᠯᠥᠭᠡ ᠰᠢᠨᠲᠠᠷᠠᠯ ᠦᠭᠡᠢ ᠲᠡᠮᠡᠦᠯᠵᠦ᠂ ᠠᠯᠢᠪᠠ ᠰᠠᠭᠠᠳ ᠪᠡᠷᠬᠡᠰᠢᠶᠡᠯ ᠢ᠋ ᠳᠠᠪᠠᠨ ᠲᠤᠭᠤᠯᠬᠤ ᠶ᠋ᠢᠨ ᠴᠢᠬᠤᠯᠠ ᠶ᠋ᠢ ᠮᠡᠳᠡᠷᠡᠭᠦᠯᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠬᠡᠦᠬᠡᠳ ᠦ᠋ᠨ ᠬᠡᠯᠡ ᠶᠠᠷᠢᠶᠠᠨ ᠤ᠋ ᠬᠥᠭᠵᠢᠯ᠂ ᠰᠡᠳᠬᠢᠬᠦᠢ ᠶ᠋ᠢᠨ ᠲᠥᠯᠦᠪᠰᠢᠯ ᠳ᠋ᠦ᠍ ᠰᠠᠢᠨ ᠢ᠋ᠶ᠋ᠠᠷ ᠨᠥᠯᠥᠭᠡᠯᠡᠳᠡᠭ ᠪᠢᠯᠡ᠃