ᠭᠠᠯᠵᠠᠭᠤ ᠬᠥᠮᠦᠨ ᠦ᠌ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ -ᠯᠦ᠍ ᠰᠢᠶᠦ᠋ᠨГалзуу хүний өдрийн тэмдэглэл -Лү Шүнь
569
ᠭᠠᠯᠵᠠᠭᠤ ᠬᠥᠮᠦᠨ ᠦ᠌ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ
ᠯᠦ᠍ ᠰᠢᠶᠦ᠋ᠨ
ᠡᠢᠮᠦ ᠨᠢᠭᠡᠨ ᠠᠬᠠ ᠳᠡᠭᠦᠦ ᠬᠣᠶᠠᠷ ᠪᠣᠯᠪᠠᠰᠤ ᠮᠢᠨᠦ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠰᠠᠢᠬᠠᠨ ᠨᠥᠬᠥᠷ ᠠᠭᠰᠠᠨ ᠪᠥᠯᠥᠭᠡ᠃ ᠨᠡᠷᠡ ᠶ᠋ᠢ ᠢᠨᠦ ᠡᠳᠦᠭᠡ ᠦᠯᠦ ᠳᠤᠷᠠᠳᠤᠮᠤᠢ᠃ ᠰᠠᠯᠤᠭᠠᠳ ᠤᠳᠠᠭᠰᠠᠨ ᠤ᠋ ᠣᠴᠢᠷᠠ᠂ ᠠᠭᠠᠵᠢᠮ ᠢ᠋ᠶ᠋ᠠᠷ ᠵᠠᠬᠢᠳᠠᠯ ᠴᠢᠮᠡᠭᠡ ᠦᠯᠦ ᠨᠡᠪᠲᠡᠷᠡᠯᠴᠡᠬᠦ ᠪᠣᠯᠪᠠᠢ᠃ ᠨᠢᠭᠡ ᠢᠨᠦ ᠬᠦᠨᠳᠦ ᠡᠪᠡᠳᠴᠢᠨᠡ ᠨᠡᠷᠪᠡᠭᠳᠡᠪᠡᠢ ᠭᠡᠮᠡᠨ ᠮᠥᠨᠥᠬᠡᠨ ᠭᠡᠨᠡᠳᠲᠡ ᠰᠣᠨᠣᠰᠤᠭᠠᠳ ᠨᠤᠲᠤᠭ ᠲᠤ᠌ ᠬᠠᠷᠢᠬᠤ ᠲᠠᠰᠢᠷᠠᠮ ᠢ᠋ᠶ᠋ᠠᠷ ᠲᠤᠰᠬᠠᠢᠯᠠᠨ ᠡᠷᠢᠵᠦ ᠣᠴᠢᠬᠤᠯᠠ᠂ ᠭᠠᠭᠴᠠᠬᠠᠨ ᠠᠬᠠ ᠯᠤᠭᠠ ᠠᠨᠤ ᠣᠯᠵᠤ ᠤᠴᠠᠷᠠᠭᠰᠠᠨ ᠪᠥᠭᠡᠳ ᠡᠪᠡᠳᠪᠡᠢ ᠬᠡᠮᠡᠭᠰᠡᠨ ᠢᠨᠦ ᠲᠡᠭᠦᠨ ᠦ᠌ ᠳᠡᠭᠦᠦ ᠠᠭᠰᠠᠨ ᠠᠵᠤᠭᠤ᠃ ᠲᠠ ᠮᠢᠨᠦ᠂ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤᠷ ᠵᠦᠳᠡᠷᠡᠭᠰᠡᠨ ᠪᠣᠯᠪᠠ ᠤᠤ᠂ ᠲᠡᠢᠨ ᠬᠡᠮᠡᠪᠡᠰᠦ ᠲᠡᠷᠡ᠂ ᠬᠡᠳᠦᠢᠨ ᠢᠯᠠᠷᠢ ᠪᠣᠯᠤᠭᠠᠳ᠂ ᠭᠠᠳᠠᠭᠰᠢ ᠠᠯᠪᠠ ᠡᠷᠢᠬᠦ ᠪᠡᠷ ᠶᠠᠪᠤᠪᠠᠢ ᠭᠡᠮᠡᠨ ᠶᠡᠬᠡᠯᠡ ᠪᠠᠶᠠᠷᠯᠠᠨ᠂ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠬᠣᠶᠠᠷ ᠳᠡᠪᠲᠡᠷ ᠭᠠᠷᠭᠠᠭᠠᠳ᠂ ᠲᠡᠷᠡ ᠦᠶᠡ ᠶ᠋ᠢᠨ ᠡᠪᠡᠳᠴᠢᠨ ᠦ᠌ ᠪᠠᠢᠳᠠᠯ ᠢ᠋ ᠡᠭᠦᠨ ᠡᠴᠡ ᠮᠡᠳᠡᠵᠦ ᠪᠣᠯᠬᠤ ᠪᠣᠯᠠᠢ᠃ ᠬᠠᠭᠤᠴᠢᠨ ᠨᠥᠬᠥᠳ ᠲᠣᠷ ᠠᠨᠤ ᠦᠵᠡᠭᠦᠯᠦᠭᠰᠡᠨ ᠴᠦ᠍ ᠦᠯᠦ ᠪᠣᠯᠬᠤ ᠶᠠᠭᠤᠨ ᠬᠡᠮᠡᠪᠡᠢ᠃ ᠠᠪᠴᠤ ᠢᠷᠡᠭᠡᠳ ᠨᠢᠭᠡᠨ ᠤᠳᠠᠭᠠ ᠤᠩᠰᠢᠵᠤ 《ᠬᠠᠪᠴᠢᠯᠭᠠ ᠶ᠋ᠢᠨ ᠭᠠᠯᠵᠠᠭᠤ》 ᠮᠡᠲᠦᠰ ᠲᠦ᠍ᠷ ᠨᠡᠷᠪᠡᠭᠳᠡᠭᠰᠡᠨ ᠢ᠋ ᠢᠨᠦ ᠮᠡᠳᠡᠪᠡᠢ᠃ ᠦᠭᠡ ᠢᠨᠦ ᠡᠨᠳᠡᠭᠦᠦ ᠲᠡᠰᠢᠶᠡ ᠶᠡᠬᠡᠲᠡᠢ᠂ ᠡᠬᠢ ᠠᠳᠠᠭ ᠦᠭᠡᠢ ᠴᠠᠯᠴᠢᠶᠠ ᠭᠣᠣᠯᠲᠠᠢ ᠪᠥᠭᠡᠳ ᠪᠠᠰᠠ ᠬᠦ᠌ ᠡᠳᠦᠷ ᠰᠠᠷᠠ ᠶ᠋ᠢ ᠴᠦ᠍ ᠲᠡᠮᠳᠡᠭᠯᠡᠭᠰᠡᠨ ᠦᠭᠡᠢ ᠲᠤᠯᠠ ᠭᠠᠭᠴᠠ ᠬᠦ᠌ ᠪᠡᠬᠡᠨ ᠦ᠌ ᠥᠩᠭᠡ ᠪᠠ ᠪᠢᠴᠢᠯᠭᠡ ᠶ᠋ᠢᠨ ᠨᠢᠭᠡᠳᠦᠯ ᠦᠭᠡᠢ ᠡᠴᠡ ᠦᠵᠡᠪᠡᠰᠦ᠂ ᠨᠢᠭᠡᠨ ᠴᠠᠭ ᠲᠣᠷ ᠪᠢᠴᠢᠵᠦ ᠭᠠᠷᠭᠠᠭᠰᠠᠨ ᠠᠨᠤ ᠪᠤᠰᠤ ᠪᠣᠯᠠᠢ ᠬᠡᠮᠡᠭᠴᠢ ᠶ᠋ᠢ ᠮᠡᠳᠡᠪᠡᠢ᠃ ᠬᠠᠶᠠ ᠪᠠᠰᠠ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠪᠦᠬᠦᠢ ᠵᠦᠢᠯ ᠴᠤᠬᠤᠰ ᠮᠡᠳᠡᠭᠳᠡᠬᠦ ᠲᠤᠯᠠ ᠡᠳᠦᠭᠡ ᠨᠢᠭᠡᠨ ᠪᠦᠯᠦᠭ ᠢ᠋ ᠰᠣᠩᠭᠣᠨ ᠰᠡᠢᠷᠡᠭᠦᠯᠵᠦ ᠡᠮᠴᠢ ᠨᠠᠷ ᠤ᠋ᠨ ᠰᠢᠨᠵᠢᠯᠡᠭᠡᠨ ᠳ᠋ᠦ᠍ ᠵᠣᠷᠢᠭᠤᠯᠪᠠᠢ᠃ ᠲᠡᠮᠳᠡᠭᠯᠡᠯ ᠳ᠋ᠡᠬᠢ ᠦᠰᠦᠭ ᠦ᠋ᠨ ᠲᠡᠰᠢᠶᠡ ᠶ᠋ᠢ ᠨᠢᠭᠡᠴᠦ ᠡᠰᠡ ᠵᠠᠰᠠᠪᠠᠢ᠃ ᠭᠠᠭᠴᠠ ᠬᠦ᠌ ᠬᠥᠮᠦᠰ ᠦ᠋ᠨ ᠨᠡᠷᠡ ᠢᠨᠦ ᠣᠯᠠᠨᠠ ᠡᠰᠡ ᠠᠯᠳᠠᠷᠰᠢᠭᠰᠠᠨ ᠡᠭᠡᠯ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠰ ᠪᠥᠭᠡᠳ ᠲᠡᠮᠳᠡᠭᠯᠡᠯ ᠦ᠋ᠨ ᠪᠦᠬᠦ ᠪᠠᠢᠳᠠᠯ ᠳ᠋ᠤᠷ ᠲᠡᠳᠦᠢᠯᠡ ᠦᠯᠦ ᠬᠠᠷᠰᠢᠯᠠᠬᠤ ᠲᠤᠯᠠ ᠴᠥᠮ ᠢ᠋ ᠬᠠᠯᠠᠪᠠᠢ᠃ ᠪᠢᠴᠢᠭ ᠦ᠋ᠨ ᠨᠡᠷᠡ ᠶ᠋ᠢ ᠡᠪᠡᠳᠴᠢᠲᠡᠨ ᠢᠯᠠᠷᠢ ᠪᠣᠯᠤᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠲᠤᠯᠠ ᠳᠠᠬᠢᠵᠤ ᠡᠰᠡ ᠵᠠᠰᠠᠪᠠᠢ᠃ ᠳᠣᠯᠣᠭᠠᠨ ᠣᠨ ᠤ᠋ ᠳᠥᠷᠪᠡᠳᠦᠭᠡᠷ ᠰᠠᠷᠠ ᠶ᠋ᠢᠨ ᠬᠣᠶᠠᠷ ᠤ᠋ᠨ ᠡᠳᠦᠷ ᠪᠢᠴᠢᠪᠡᠢ᠃
ᠨᠢᠭᠡ
ᠰᠠᠷᠠ ᠲᠠᠢ ᠰᠠᠢᠬᠠᠨ ᠰᠠᠷᠠᠭᠤᠯ ᠦᠳᠡᠰᠢ ᠪᠠᠢᠯᠠ᠃
ᠪᠢ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠭᠤᠴᠢ ᠭᠠᠷᠤᠢ ᠵᠢᠯ ᠪᠣᠯᠤᠭᠰᠠᠨ ᠲᠤᠯᠠ ᠥᠨᠥᠳᠥᠷ ᠣᠯᠵᠤ ᠠᠭᠤᠯᠵᠠᠭᠠᠳ ᠳᠣᠲᠣᠷᠠ ᠮᠢᠨᠢ ᠲᠤᠩ ᠠᠶᠠᠲᠠᠢᠬᠠᠨ ᠰᠠᠨᠠᠭᠳᠠᠪᠠ᠃ ᠢᠩᠭᠢᠭᠡᠳ ᠡᠨᠡ ᠭᠤᠴᠢ ᠭᠠᠷᠤᠢ ᠵᠢᠯ ᠢ᠋ ᠪᠦᠷ ᠮᠤᠩᠭᠠᠨᠢᠵᠤ ᠣᠩᠭᠡᠷᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ ᠰᠠᠶᠢ ᠣᠯᠵᠤ ᠮᠡᠳᠡᠯᠡ᠃ ᠶᠡᠬᠡᠬᠡᠨ ᠪᠣᠯᠭᠣᠮᠵᠢᠯᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠦᠭᠡᠢ ᠪᠣᠯ᠂ ᠥᠨᠥ ᠵᠣᠣ ᠣᠪᠣᠭᠲᠠᠨ ᠤ᠋ ᠨᠣᠬᠠᠢ ᠶᠠᠭᠤᠨ ᠳ᠋ᠤ᠌ ᠨᠠᠮᠠ ᠶ᠋ᠢ ᠬᠡᠳᠦ ᠬᠠᠷᠠᠵᠤ ᠠᠪᠬᠤ ᠪᠢᠯᠡ?
ᠮᠢᠨᠦ ᠠᠶᠤᠬᠤ ᠨᠢ ᠵᠦᠢᠲᠡᠢ᠃
ᠬᠣᠶᠠᠷ
ᠡᠨᠡ ᠰᠥᠨᠢ ᠰᠠᠷᠠᠨ ᠤ᠋ ᠭᠡᠷᠡᠯ ᠣᠭᠲᠣ ᠦᠭᠡᠢ᠂ ᠬᠡᠷᠡᠭ ᠮᠠᠭᠤᠬᠠᠢ ᠪᠣᠯᠬᠤ ᠶ᠋ᠢ ᠪᠢ ᠮᠡᠳᠡᠪᠡ᠃ ᠥᠷᠯᠥᠭᠡ ᠭᠡᠷ ᠡᠴᠡ ᠪᠡᠨ ᠭᠠᠳᠠᠭᠰᠢ ᠭᠠᠷᠪᠠᠯ᠂ ᠵᠣᠣ ᠡᠷᠬᠢᠮ᠂ ᠨᠠᠳᠠᠠ᠋ᠴᠠ ᠠᠶᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋᠂ ᠨᠠᠮᠠ ᠶ᠋ᠢ ᠬᠣᠣᠷᠯᠠᠬᠤ ᠭᠡᠵᠦ ᠪᠠᠢᠭᠠ ᠴᠤ᠌ ᠶᠤᠮ ᠰᠢᠭ᠋ ᠨᠢᠳᠦ ᠨᠢ ᠵᠢᠭᠲᠡᠢᠬᠡᠨ ᠪᠠᠢᠯᠠ᠃ ᠲᠡᠭᠡᠭᠡᠳ ᠪᠠᠰᠠ ᠳᠣᠯᠣᠭᠠ ᠨᠠᠢ᠍ᠮᠠᠨ ᠬᠥᠮᠦᠨ᠂ ᠴᠢᠬᠢ ᠬᠣᠩᠰᠢᠶᠠᠷ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠵᠦ ᠮᠢᠨᠦ ᠲᠤᠬᠠᠢ ᠰᠢᠪᠡᠨᠡᠯᠳᠦᠬᠦ ᠳ᠋ᠡᠭᠡᠨ ᠪᠠᠰᠠ ᠨᠠᠳᠠᠠ᠋ᠴᠠ ᠨᠢᠭᠤᠵᠤ ᠪᠠᠢᠯᠠ᠃ ᠵᠠᠮ ᠳ᠋ᠤ᠌ ᠳᠠᠭᠠᠷᠢᠯᠳᠤᠭᠰᠠᠨ ᠬᠥᠮᠦᠰ ᠴᠥᠮ ᠡᠢᠮᠦ ᠪᠠᠢᠪᠠ᠃ ᠲᠡᠳᠡᠨ ᠦ᠌ ᠳᠣᠲᠣᠷᠠᠬᠢ ᠬᠠᠮᠤᠭ ᠤ᠋ᠨ ᠬᠡᠷᠴᠡᠭᠡᠢ ᠨᠢᠭᠡ ᠨᠢ ᠨᠠᠮᠠ ᠶ᠋ᠢ ᠬᠠᠷᠠᠭᠠᠳ ᠠᠮᠠ ᠪᠠᠨ ᠠᠩᠭᠠᠢᠨ ᠢᠨᠢᠶᠡᠭᠰᠡᠨ ᠳ᠋ᠦ᠍ ᠮᠢᠨᠦ ᠣᠷᠣ ᠠ᠋ᠴᠠ ᠤᠯᠠ ᠳ᠋ᠤ᠌ ᠬᠦᠷᠲᠡᠯᠡ ᠬᠦᠢᠲᠡᠨ ᠣᠷᠬᠢᠪᠠ᠃ ᠲᠡᠳᠡ ᠬᠠᠮᠤᠭ ᠢ᠋ᠶ᠋ᠠᠨ ᠪᠡᠯᠡᠳᠬᠡᠵᠦ ᠭᠦᠢᠴᠡᠭᠰᠡᠨ ᠢ᠋ ᠮᠡᠳᠡᠯᠡ᠃
ᠭᠡᠲᠡᠯᠡ ᠪᠢ ᠶᠡᠷᠦ ᠠᠶᠤᠬᠤ ᠦᠭᠡᠢ᠂ ᠶᠠᠪᠤᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠪᠤᠭᠰᠠᠭᠠᠷ ᠯᠠ ᠪᠠᠢᠪᠠ᠃ ᠡᠮᠦᠨᠡ ᠨᠢᠭᠡ ᠪᠦᠯᠦᠭ ᠬᠡᠦᠬᠡᠳ ᠪᠠᠰᠠ ᠯᠠ ᠨᠠᠮᠠ ᠶ᠋ᠢ ᠶᠠᠷᠢᠯᠴᠠᠨᠠ᠃ ᠨᠢᠳᠦᠨ ᠦ᠌ ᠬᠢᠨᠢ ᠬᠠᠷᠠᠴᠠ ᠮᠥᠨ ᠵᠣᠣ ᠡᠷᠬᠢᠮ ᠲᠡᠢ ᠠᠳᠠᠯᠢ᠂ ᠴᠢᠷᠠᠢ ᠨᠢ ᠴᠢᠯ ᠬᠥᠬᠡᠷᠡᠭᠰᠡᠨ ᠪᠠᠢᠯᠠ᠃ ᠪᠢ ᠬᠡᠦᠬᠡᠳ ᠲᠡᠢ ᠶᠠᠮᠠᠷ ᠦᠰ ᠲᠡᠢ ᠪᠢᠯᠡ? ᠲᠡᠳᠡ ᠪᠠᠰᠠ ᠢᠩᠭᠢᠳᠡᠭ ᠨᠢ ᠶᠠᠭᠤ ᠪᠣᠢ ᠭᠡᠵᠦ ᠪᠢ ᠰᠠᠨᠠᠪᠠ᠃ ᠲᠡᠭᠡᠭᠡᠳ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ:《ᠴᠢ ᠨᠠᠳᠠ ᠬᠡᠯᠡᠭᠡᠳ ᠠᠯᠢ!》 ᠭᠡᠵᠦ ᠬᠠᠰᠬᠢᠷᠪᠠ᠃ ᠭᠡᠲᠡᠯᠡ ᠲᠡᠳᠡ ᠳᠤᠲᠠᠭᠠᠵᠤ ᠠᠷᠢᠯᠪᠠ᠃
ᠪᠣᠳᠣᠬᠤ ᠳ᠋ᠤ᠌ ᠪᠢ ᠵᠣᠣ ᠡᠷᠬᠢᠮ ᠲᠡᠢ ᠶᠠᠮᠠᠷ ᠦᠰ ᠲᠡᠢ ᠪᠢᠯᠡ᠃ ᠵᠠᠮ ᠤ᠋ᠨ ᠬᠥᠮᠦᠰ ᠲᠡᠢ ᠪᠠᠰᠠ ᠶᠠᠮᠠᠷ ᠦᠰ ᠲᠡᠢ ᠪᠢᠯᠡ᠃ ᠬᠣᠷᠢᠨ ᠵᠢᠯ ᠦ᠋ᠨ ᠡᠮᠦᠨᠡ᠂ ᠭᠦ᠋ ᠵᠢᠦ ᠠᠪᠤᠭᠠᠢ ᠶ᠋ᠢᠨ ᠤᠳᠠᠭᠠᠨ ᠵᠢᠯ ᠦ᠋ᠨ ᠬᠢᠨᠢ ᠳᠠᠩᠰᠠ ᠶ᠋ᠢ ᠨᠢᠭᠡ ᠭᠢᠰᠬᠢᠭᠡᠳ᠂ ᠲᠡᠭᠦᠨ ᠢ᠋ ᠶᠡᠬᠡᠯᠡ ᠳᠤᠷᠠ ᠦᠭᠡᠢᠴᠡᠭᠦᠯᠦᠭᠰᠡᠨ ᠲᠡᠳᠦᠢ ᠶᠤᠮ᠃ ᠵᠣᠣ ᠡᠷᠬᠢᠮ ᠬᠡᠳᠦᠢᠪᠡᠷ ᠲᠡᠭᠦᠨ ᠢ᠋ ᠲᠠᠨᠢᠬᠤ ᠦᠭᠡᠢ ᠪᠣᠯᠪᠠᠴᠤ᠂ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠠᠭᠤᠷᠯᠠᠵᠤ᠂ ᠵᠠᠮ ᠤ᠋ᠨ ᠬᠥᠮᠦᠰ ᠲᠡᠢ ᠦᠭᠡ ᠨᠢᠰᠦᠭᠡᠳ ᠨᠠᠳᠠ ᠲᠠᠢ ᠦᠰ ᠬᠥᠭᠡᠭᠡᠵᠦ ᠪᠠᠢᠬᠤ ᠨᠢ ᠡᠨᠡ ᠪᠠᠢᠯᠭᠦᠢ᠃ ᠭᠡᠲᠡᠯᠡ ᠬᠡᠦᠬᠡᠳ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ? ᠲᠡᠷᠡ ᠦᠶᠡ ᠳ᠋ᠦ᠍ ᠳᠥᠷᠥᠭᠡ ᠴᠦ᠍ ᠦᠭᠡᠢ ᠪᠠᠢᠭᠰᠠᠨ ᠶᠤᠮ ᠴᠢᠨᠢ ᠶᠠᠭᠤᠨ ᠳ᠋ᠤ᠌ ᠥᠨᠥᠳᠥᠷ ᠪᠠᠰᠠ ᠨᠠᠳᠠ ᠠ᠋ᠴᠠ ᠠᠶᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋᠂ ᠨᠠᠮᠠ ᠶ᠋ᠢ ᠬᠣᠣᠷᠯᠠᠬᠤ ᠭᠡᠵᠦ ᠪᠠᠢᠭᠠ ᠴᠤ᠌ ᠶᠤᠮ ᠰᠢᠭ᠋ ᠮᠠᠭᠤᠬᠠᠢ ᠬᠠᠷᠠᠨᠠ ᠪᠣᠢ? ᠡᠨᠡ ᠴᠢᠨᠢ ᠨᠠᠳᠠ ᠠᠶᠤᠮᠠᠷ ᠪᠥᠭᠡᠳ ᠭᠠᠢᠬᠠᠰᠢ ᠠᠯᠳᠠᠮᠠ᠂ ᠵᠣᠪᠠᠯᠠᠩ ᠲᠠᠢ ᠬᠡᠷᠡᠭ ᠪᠠᠢᠨᠠ ᠰᠢᠦ!
ᠪᠢ ᠮᠡᠳᠡᠯᠡ᠃ ᠡᠬᠡ ᠡᠴᠢᠭᠡ ᠨᠢ ᠢᠩᠭᠢᠵᠦ ᠵᠢᠭᠠᠵᠤ ᠥᠭᠴᠡᠢ!
ᠭᠤᠷᠪᠠ
ᠰᠥᠨᠢ ᠶᠡᠷᠦ ᠨᠣᠢᠷ ᠬᠦᠷᠬᠦ ᠦᠭᠡᠢ᠃ ᠠᠯᠢᠪᠠ ᠬᠡᠷᠡᠭ ᠨᠢ ᠨᠢᠭᠲᠠᠯᠠᠵᠤ ᠪᠠᠢᠪᠠᠯ ᠰᠠᠶᠢ ᠤᠴᠢᠷ ᠢ᠋ ᠨᠢ ᠣᠯᠳᠠᠭ ᠪᠠᠢᠨᠠ᠃
ᠲᠡᠳᠡᠨ ᠦ᠌ ᠳᠣᠲᠣᠷᠠ ᠰᠢᠶᠠᠨ ᠤ᠋ ᠨᠣᠶᠠᠨ ᠢ᠋ᠶ᠋ᠠᠷ ᠳᠥᠩᠭᠡᠯᠡᠭᠦᠯᠦᠭᠰᠡᠨ ᠬᠥᠮᠦᠨ ᠴᠦ᠍ ᠪᠣᠢ᠂ ᠡᠷᠬᠡᠲᠡᠨ ᠳ᠋ᠦ᠍ ᠲᠦᠭᠦᠰᠢᠯᠡᠭᠳᠡᠭᠰᠡᠨ ᠬᠥᠮᠦᠨ ᠴᠦ᠍ ᠪᠣᠢ᠂ ᠶᠠᠮᠤᠨ ᠤ᠋ ᠲᠤᠰᠢᠶᠠᠯᠲᠠᠨ ᠳ᠋ᠤ᠌ ᠡᠬᠡᠨᠡᠷ ᠢ᠋ᠶ᠋ᠡᠨ ᠪᠤᠯᠢᠶᠠᠭᠳᠠᠭᠰᠠᠨ ᠬᠥᠮᠦᠨ ᠴᠦ᠍ ᠪᠣᠢ᠂ ᠠᠪᠤ ᠡᠵᠢ ᠨᠢ ᠠᠪᠤᠯᠭᠠ ᠶ᠋ᠢᠨ ᠡᠵᠡᠳ ᠲᠦ᠍ ᠬᠠᠪᠴᠢᠭᠳᠠᠨ ᠦᠬᠦᠭᠰᠡᠳ ᠴᠦ᠍ ᠪᠣᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠲᠡᠳᠡᠨ ᠦ᠌ ᠵᠢᠰᠦ ᠴᠢᠷᠠᠢ ᠶᠡᠷᠦ ᠥᠴᠥᠭᠡᠳᠦᠷ ᠦ᠋ᠨ ᠰᠢᠭ ᠲᠡᠢᠮᠦ ᠠᠶᠤᠮᠠᠷ᠂ ᠲᠡᠢᠮᠦ ᠬᠡᠷᠴᠡᠭᠡᠢ ᠪᠠᠢᠭᠰᠠᠨ ᠦᠭᠡᠢ ᠰᠠᠨ᠃
ᠬᠠᠮᠤᠭ ᠤ᠋ᠨ ᠵᠢᠭᠲᠡᠢ ᠨᠢ ᠥᠴᠥᠭᠡᠳᠦᠷ ᠭᠤᠳᠤᠮᠵᠢᠨ ᠳ᠋ᠤ᠌ ᠳᠠᠭᠠᠷᠢᠯᠳᠤᠭᠰᠠᠨ ᠲᠡᠷᠡ ᠡᠮᠡᠭᠲᠡᠢ ᠪᠠᠢᠯᠠ᠃ ᠲᠡᠷᠡ ᠬᠦᠦ ᠪᠡᠨ ᠵᠣᠳᠣᠵᠤ: 《ᠡᠴᠢᠭᠡ ᠮᠢᠨᠢ ᠠ᠋! ᠪᠢ ᠴᠢᠮᠠᠶ᠋ᠢ ᠭᠠᠢᠭᠤᠢ ᠬᠡᠳᠦ ᠬᠠᠵᠠᠶᠠ ᠭᠡᠮᠡᠨ ᠰᠠᠨᠠᠵᠤ ᠪᠠᠢᠨᠠ!》 ᠭᠡᠵᠦ ᠬᠡᠯᠡᠨᠡ᠃ ᠭᠡᠲᠡᠯᠡ ᠨᠢᠳᠦ ᠨᠢ ᠬᠠᠷᠢᠨ ᠨᠠᠮᠠ ᠶ᠋ᠢ ᠰᠢᠷᠲᠡᠭᠡᠳ ᠪᠠᠢᠪᠠ᠃ ᠪᠢ ᠨᠢᠭᠡᠮᠦᠰᠦᠨ ᠠᠶᠤᠭᠠᠳ ᠣᠷᠣᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠣᠯᠤᠭᠰᠠᠨ ᠦᠭᠡᠢ᠃ ᠥᠨᠥ ᠬᠦᠢᠲᠡᠨ ᠬᠥᠬᠡ ᠴᠢᠷᠠᠢᠳᠠᠨ ᠨᠤᠭᠤᠳ ᠴᠥᠮ ᠳᠦᠷᠬᠢᠷᠡᠲᠡᠯᠡ ᠢᠨᠢᠶᠡᠯᠳᠦᠪᠡ᠃ ᠴᠧᠨ ᠯᠤᠤ ᠦ᠋ ᠤᠬᠤᠰᠬᠢᠨ ᠭᠠᠷᠴᠤ ᠢᠷᠡᠭᠡᠳ ᠨᠠᠮᠠ ᠶ᠋ᠢ ᠭᠡᠷ ᠲᠦ᠍ ᠴᠢᠷᠴᠦ ᠣᠷᠣᠪᠠ᠃
ᠪᠢ ᠭᠡᠷ ᠲᠡᠭᠡᠨ ᠴᠢᠷᠦᠭᠳᠡᠨ ᠣᠷᠣᠬᠤᠯᠠ ᠭᠡᠷ ᠦ᠋ᠨ ᠬᠥᠮᠦᠰ ᠴᠥᠮ ᠨᠠᠮᠠ ᠶ᠋ᠢ ᠲᠠᠨᠢᠬᠤ ᠦᠭᠡᠢ ᠶᠤᠮ ᠰᠢᠭ᠋ ᠠᠭᠠᠰᠢᠯᠠᠨᠠ᠃ ᠲᠡᠳᠡᠨ ᠦ᠌ ᠬᠠᠷᠠᠴᠠ ᠨᠢ ᠮᠥᠨ ᠥᠭᠡᠷᠡ ᠪᠤᠰᠤᠳ ᠲᠠᠢ ᠪᠠᠨ ᠪᠦᠷ ᠠᠳᠠᠯᠢᠬᠠᠨ ᠪᠠᠢᠪᠠ᠃ ᠪᠢᠴᠢᠭ ᠦ᠋ᠨ ᠭᠡᠷ ᠲᠦ᠍ ᠣᠷᠣᠵᠤ ᠣᠴᠢᠲᠠᠯᠠ ᠲᠠᠬᠢᠶᠠ ᠨᠤᠭᠤᠰᠤ ᠬᠣᠷᠢᠭᠰᠠᠨ ᠶᠤᠮ ᠰᠢᠭ᠋ ᠡᠭᠦᠳᠡ ᠶ᠋ᠢ ᠠᠷᠤ ᠠ᠋ᠴᠠ ᠲᠦᠭᠵᠢᠵᠦ ᠣᠷᠬᠢᠪᠠ᠃ ᠡᠨᠡ ᠶᠠᠪᠤᠳᠠᠯ ᠨᠠᠮᠠ ᠶ᠋ᠢ ᠤᠯᠠᠮ ᠴᠤ᠌ ᠤᠴᠢᠷ ᠤᠬᠠᠭᠠᠨ ᠢ᠋ ᠨᠢ ᠣᠯᠬᠤ ᠦᠭᠡᠢ ᠪᠣᠯᠭᠠᠵᠤ ᠬᠠᠶᠠᠵᠠᠢ᠃
ᠤᠷᠢᠳ ᠬᠡᠳᠦᠨ ᠡᠳᠦᠷ᠂ ᠯᠠᠩ ᠽᠢ ᠼᠦᠨ ᠲᠣᠰᠬᠣᠨ ᠤ᠋ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠭᠠᠮᠰᠢᠭ ᠲᠤ᠌ ᠳᠠᠭᠠᠷᠢᠭᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠳᠡᠬᠦ ᠪᠡᠷ ᠢᠷᠡᠭᠡᠳ᠂ ᠮᠢᠨᠦ ᠶᠡᠬᠡ ᠠᠬᠠ ᠳ᠋ᠤ᠌ ᠲᠣᠰᠬᠣᠨ ᠤ᠋ ᠪᠠᠨ ᠨᠢᠭᠡᠨ ᠬᠠᠴᠢᠨ ᠮᠠᠭᠤ ᠬᠥᠮᠦᠨ ᠢ᠋ ᠠᠢᠯ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠣᠬᠢᠵᠤ ᠠᠯᠠᠭᠰᠠᠨ ᠪᠥᠭᠡᠳ ᠬᠡᠳᠦᠨ ᠬᠥᠮᠦᠨ ᠵᠢᠷᠦᠬᠡ ᠶ᠋ᠢ ᠨᠢ ᠰᠤᠭᠤᠯᠵᠤ ᠠᠪᠤᠭᠠᠳ᠂ ᠰᠥᠰᠥ ᠵᠣᠷᠢᠭ ᠢ᠋ᠶ᠋ᠠᠨ ᠪᠦᠳᠦᠭᠦᠷᠡᠭᠦᠯᠬᠦ ᠶᠤᠮ ᠭᠡᠵᠦ ᠲᠣᠰᠣ ᠪᠠᠷ ᠬᠠᠭᠠᠷᠢᠵᠤ ᠢᠳᠡᠪᠡ ᠭᠡᠵᠦ ᠶᠠᠷᠢᠯᠠ᠃ ᠪᠢ ᠳᠤᠮᠳᠠ ᠠ᠋ᠴᠠ ᠨᠢ ᠨᠢᠭᠡ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠥᠨᠥ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠶᠡᠬᠡ ᠠᠬᠠ ᠬᠣᠶᠠᠷ ᠨᠠᠮᠠ ᠶ᠋ᠢ ᠬᠡᠳᠦᠨᠲᠡ ᠭᠢᠯᠦᠢᠵᠦ ᠬᠠᠷᠠᠭᠰᠠᠨ ᠪᠢᠯᠡ᠃ ᠲᠡᠳᠡᠨ ᠦ᠌ ᠬᠠᠷᠠᠴᠠ᠂ ᠭᠠᠳᠠᠨᠠᠬᠢ ᠶ᠋ᠢᠨ ᠲᠡᠷᠡ ᠣᠯᠠᠨ ᠬᠥᠮᠦᠰ ᠲᠡᠢ ᠶᠠᠭ ᠠᠳᠠᠯᠢᠬᠠᠨ ᠪᠠᠢᠭᠰᠠᠨ ᠢ᠋ ᠥᠨᠥᠳᠥᠷ ᠰᠠᠶᠢ ᠣᠯᠵᠤ ᠮᠡᠳᠡᠯᠡ᠃
ᠡᠭᠦᠨ ᠢ᠋ ᠪᠣᠳᠣᠪᠠᠯ ᠮᠢᠨᠦ ᠣᠷᠣᠢ ᠠ᠋ᠴᠠ ᠤᠯᠠ ᠳ᠋ᠤ᠌ ᠬᠦᠷᠲᠡᠯᠡ ᠬᠦᠢᠲᠡᠨ ᠣᠷᠬᠢᠬᠤ ᠶᠤᠮ᠃
ᠲᠡᠳᠡ ᠬᠥᠮᠦᠨ ᠢᠳᠡᠳᠡᠭ ᠯᠡ ᠶᠤᠮ ᠪᠣᠯ ᠨᠠᠮᠠ ᠶ᠋ᠢ ᠢᠳᠡᠬᠦ ᠦᠭᠡᠢ ᠭᠡᠵᠦ ᠦᠭᠡᠢ ᠶᠤᠮ᠃ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ《ᠴᠢᠮᠠᠶ᠋ᠢ ᠭᠠᠢᠭᠤᠢ ᠬᠡᠳᠦ ᠬᠠᠵᠠᠨᠠ》ᠭᠡᠰᠡᠨ ᠦᠭᠡ᠂ ᠲᠡᠷᠡ ᠣᠯᠠᠨ ᠬᠥᠬᠡ ᠴᠢᠷᠠᠢᠳᠠᠨ ᠤ᠋ ᠢᠨᠢᠶᠡᠳᠦ ᠪᠣᠯᠤᠨ ᠤᠷᠢᠳ ᠡᠳᠦᠷ ᠦ᠋ᠨ ᠥᠨᠥ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠤ᠋ ᠬᠡᠯᠡᠭᠰᠡᠨ ᠦᠭᠡ ᠪᠦᠷ ᠨᠢᠭᠡ ᠶᠣᠰᠣᠨ ᠤ᠋ ᠨᠢᠭᠤᠴᠠ ᠳᠣᠬᠢᠶᠠ ᠮᠥᠨ ᠪᠣᠯᠬᠤ ᠨᠢ ᠢᠯᠡᠷᠬᠡᠢ᠃ ᠲᠡᠳᠡᠨ ᠦ᠌ ᠦᠭᠡ ᠨᠢ ᠬᠣᠣᠷ ᠢ᠋ᠶ᠋ᠠᠷ ᠳᠦᠭᠦᠷᠴᠦ᠂ ᠢᠨᠢᠶᠡᠳᠦ ᠨᠢ ᠢᠷ ᠮᠡᠰᠡ ᠪᠡᠷ ᠭᠢᠯᠠᠯᠵᠠᠨ ᠬᠤᠷᠴᠠ ᠰᠢᠲᠦ ᠨᠢ ᠢᠷᠵᠠᠭᠠᠨᠠᠭᠠᠳ᠂ ᠶᠣᠰᠣᠲᠠᠢ ᠬᠥᠮᠦᠨ ᠢᠳᠡᠳᠡᠭ ᠮᠢᠬᠠᠴᠢᠨ ᠮᠥᠨ ᠭᠡᠵᠦ ᠪᠢ ᠮᠡᠳᠡᠯᠡ᠃
ᠪᠢ ᠪᠡᠶᠡ ᠪᠡᠨ ᠮᠠᠭᠤ ᠬᠥᠮᠦᠨ ᠭᠡᠵᠦ ᠰᠠᠨᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠭᠦ᠋ ᠣᠪᠣᠭᠲᠠᠨ ᠤ᠋ ᠳᠠᠩᠰᠠ ᠶ᠋ᠢ ᠭᠢᠰᠬᠢᠭᠰᠡᠨ ᠡᠴᠡ ᠬᠣᠢᠰᠢ ᠬᠠᠷᠢᠨ ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠲᠡᠳᠡ ᠶᠠᠭ ᠮᠠᠭᠤ ᠰᠠᠨᠠᠭᠠ ᠠᠪᠴᠤ ᠪᠠᠢᠭᠠ ᠴᠤ᠌ ᠶᠤᠮ ᠰᠢᠭ᠋᠂ ᠪᠤᠤ ᠮᠡᠳᠡ᠃ ᠢᠯᠠᠩᠭᠤᠶᠠ ᠲᠡᠳᠡ ᠴᠢᠷᠠᠢ ᠬᠤᠪᠢᠯᠤᠮᠠᠭᠴᠠ ᠬᠥᠮᠦᠨ ᠢ᠋ ᠮᠠᠭᠤ ᠬᠥᠮᠦᠨ ᠪᠣᠯᠭᠠᠴᠢᠬᠠᠳᠠᠭ ᠶᠤᠮ᠃ ᠶᠡᠬᠡ ᠠᠬᠠ ᠤᠷᠢᠳᠤ ᠨᠠᠳᠠ ᠪᠠᠷ ᠨᠢᠭᠡ ᠵᠣᠬᠢᠶᠠᠯ ᠪᠢᠴᠢᠭᠦᠯᠦᠭᠰᠡᠨ ᠢ᠋ ᠪᠢ ᠡᠳᠦᠭᠡ ᠬᠦᠷᠲᠡᠯᠡ ᠮᠠᠷᠲᠠᠭᠠᠳᠤᠢ ᠪᠥᠭᠡᠳ ᠬᠢᠷᠢ ᠵᠡᠷᠭᠡ ᠶ᠋ᠢᠨ ᠰᠠᠢᠨ ᠬᠥᠮᠦᠨ ᠢ᠋ ᠴᠦ᠍ ᠬᠡᠳᠦᠨ ᠦᠭᠡ ᠮᠠᠭᠤᠴᠢᠯᠠᠮᠠᠭᠴᠠ ᠲᠡᠷᠡ ᠳᠠᠷᠤᠢ ᠵᠥᠪᠲᠦᠭᠡᠵᠦ ᠬᠡᠳᠦᠨ ᠪᠢᠨᠳᠦ ᠵᠢᠷᠤᠭᠠᠳ᠂ ᠮᠠᠭᠤ ᠬᠥᠮᠦᠨ ᠢ᠋ ᠠᠭᠤᠴᠢᠯᠠᠵᠤ ᠬᠡᠳᠦᠨ ᠦᠭᠡ ᠪᠢᠴᠢᠪᠡᠯ 《ᠣᠷᠴᠢᠯᠠᠩ ᠳᠡᠯᠡᠬᠡᠢ ᠶ᠋ᠢ ᠬᠥᠷᠪᠡᠭᠦᠯᠦᠭᠴᠢ ᠣᠯᠠᠨ ᠠ᠋ᠴᠠ ᠣᠨᠴᠣᠭᠣᠢ ᠮᠡᠷᠭᠡᠨ》 ᠭᠡᠳᠡᠭ᠃ ᠡᠢᠮᠦ ᠡᠴᠡ ᠲᠡᠳᠡ ᠴᠣᠬᠣᠮ ᠶᠠᠭᠤ ᠪᠣᠳᠣᠵᠤ ᠪᠠᠢᠭᠠ ᠶ᠋ᠢ ᠪᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ? ᠢᠯᠠᠩᠭᠤᠶᠠ ᠬᠥᠮᠦᠨ ᠢᠳᠡᠬᠦ ᠭᠡᠵᠦ ᠪᠠᠢᠭᠠ ᠦᠶᠡ ᠳ᠋ᠦ᠍᠃
ᠠᠯᠢᠪᠠ ᠬᠡᠷᠡᠭ ᠢ᠋ ᠨᠢᠭᠲᠠᠯᠠᠵᠤ ᠪᠣᠳᠣᠪᠠᠯ ᠰᠠᠶᠢ ᠤᠴᠢᠷ ᠢ᠋ ᠨᠢ ᠣᠯᠳᠠᠭ᠃ ᠡᠷᠲᠡᠨ ᠡᠴᠡ ᠠᠪᠤᠭᠠᠳ ᠬᠥᠮᠦᠨ ᠢᠳᠡᠭᠰᠡᠭᠡᠷ ᠢᠷᠡᠭᠰᠡᠨ ᠢ᠋ ᠪᠢ ᠪᠠᠰᠠ ᠮᠡᠳᠡᠬᠦ ᠪᠣᠯᠪᠠᠴᠤ ᠲᠡᠢᠮᠦ ᠲᠣᠳᠣᠷᠬᠠᠢ ᠪᠢᠰᠢ ᠪᠠᠢᠨᠠ᠃ ᠪᠢ ᠲᠡᠦᠬᠡ ᠶ᠋ᠢ ᠰᠡᠬᠦᠵᠦ ᠡᠷᠢᠬᠦᠯᠡ᠂ ᠡᠨᠡ ᠲᠡᠦᠬᠡ ᠨᠢ ᠣᠨ ᠵᠢᠯ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠦᠭᠡᠢ ᠪᠥᠭᠡᠳ ᠬᠠᠭᠤᠳᠠᠰᠤ ᠪᠦᠷᠢ ᠳ᠋ᠦ᠍ᠨᠢ ᠴᠥᠮ 《ᠥᠷᠥᠰᠢᠶᠡᠯ᠂ ᠵᠢᠷᠤᠮ᠂ ᠶᠣᠰᠣ᠂ ᠡᠷᠳᠡᠮ》 ᠭᠡᠰᠡᠨ ᠬᠡᠳᠦᠨ ᠦᠰᠦᠭ ᠢ᠋ ᠮᠤᠷᠤᠢ ᠰᠠᠷᠤᠢ ᠡᠷᠢᠶᠡᠴᠢᠭᠰᠡᠨ ᠪᠠᠢᠨᠠ᠃ ᠮᠢᠨᠦ ᠨᠣᠢᠷ ᠬᠤᠯᠵᠢᠭᠰᠠᠨ ᠤᠴᠢᠷ᠂ ᠲᠡᠭᠦᠨ ᠢ᠋ ᠬᠠᠭᠠᠰ ᠰᠥᠨᠢ ᠨᠢᠭᠲᠠᠯᠠᠵᠤ ᠦᠵᠡᠭᠡᠳ ᠰᠠᠶᠢ ᠦᠭᠡ ᠦᠰᠦᠭ ᠦ᠋ᠳ ᠦ᠋ᠨ ᠵᠠᠢ ᠵᠠᠪᠰᠠᠷ ᠢ᠋ᠶ᠋ᠠᠷ 《ᠬᠥᠮᠦᠨ ᠢᠳᠡᠨᠡ!》 ᠭᠡᠰᠡᠨ ᠬᠣᠶᠠᠷ ᠦᠭᠡ ᠳᠡᠪᠲᠡᠷ ᠳᠦᠭᠦᠷᠡᠩ ᠪᠢᠴᠢᠭᠡᠰᠦᠲᠡᠢ ᠪᠠᠢᠭᠰᠠᠨ ᠢ᠋ ᠣᠯᠵᠤ ᠦᠵᠡᠯᠡ! ᠪᠢᠴᠢᠭ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠥᠴᠢᠨᠡᠨ ᠣᠯᠠᠨ ᠦᠰᠦᠭ᠂ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠤ᠋ ᠬᠡᠯᠡᠭᠰᠡᠨ ᠲᠥᠴᠢᠨᠡᠨ ᠣᠯᠠᠨ ᠦᠭᠡ ᠨᠢ ᠬᠠᠷᠢᠨ ᠴᠥᠮ ᠢᠨᠢᠶᠡᠮᠰᠦᠭᠯᠡᠩᠭᠦᠢ ᠵᠢᠭᠲᠡᠢ ᠨᠢᠳᠦ ᠪᠡᠷ ᠨᠠᠮᠠ ᠶ᠋ᠢ ᠬᠠᠷᠠᠵᠤ ᠪᠠᠢᠯᠠ᠃
ᠪᠢ ᠴᠦ᠍ ᠮᠥᠨ ᠬᠥᠮᠦᠨ ᠪᠣᠯᠬᠣᠷ ᠲᠡᠳᠡ ᠨᠠᠮᠠ ᠶ᠋ᠢ ᠢᠳᠡᠬᠦ ᠭᠡᠵᠦ ᠪᠠᠢᠨᠠ!
ᠳᠥᠷᠪᠡ
ᠥᠷᠯᠥᠭᠡᠭᠦᠷ ᠪᠢ ᠲᠦᠷ ᠨᠠᠮ ᠰᠠᠭᠤᠯᠠ᠃ ᠴᠧᠨ ᠯᠤᠤ ᠦ᠋ ᠨᠢᠭᠡ ᠠᠶᠠᠭᠠ ᠨᠣᠭᠣᠭᠠ᠂ ᠨᠢᠭᠡ ᠠᠶᠠᠭᠠ ᠵᠢᠩᠨᠡᠭᠰᠡᠨ ᠵᠢᠭᠠᠰᠤ ᠲᠠᠢ ᠬᠣᠭᠣᠯᠠ ᠠᠪᠴᠢᠷᠠᠵᠤ ᠥᠭᠪᠡ᠃ ᠲᠡᠷᠡ ᠵᠢᠭᠠᠰᠤᠨ ᠤ᠋ ᠬᠠᠪ ᠬᠠᠲᠠᠭᠤ ᠴᠠᠪ ᠴᠠᠭᠠᠨ ᠨᠢᠳᠦ ᠪᠠ ᠠᠩᠭᠠᠢᠭᠰᠠᠨ ᠠᠮᠠ ᠨᠢ ᠬᠥᠮᠦᠨ ᠢᠳᠡᠬᠦ ᠶ᠋ᠢ ᠵᠠᠪᠳᠤᠭᠰᠠᠨ ᠲᠡᠷᠡ ᠣᠯᠠᠨ ᠬᠥᠮᠦᠨ ᠲᠡᠢ ᠪᠦᠷ ᠠᠳᠠᠯᠢᠬᠠᠨ ᠪᠠᠢᠪᠠ᠃ ᠬᠡᠳᠦᠬᠡᠨ ᠰᠠᠪᠬᠠᠯᠠᠲᠠᠯᠠ ᠵᠢᠭᠠᠰᠤ ᠴᠤ᠌ ᠶᠤᠮ ᠤᠤ᠂ ᠬᠥᠮᠦᠨ ᠴᠦ᠍ ᠶᠤᠮ ᠤᠤ ᠪᠤᠤ ᠮᠡᠳᠡ᠂ ᠨᠢᠭᠡᠯᠡ ᠮᠠᠭᠤᠬᠠᠢ ᠨᠢᠯᠤᠭᠤᠨ ᠣᠷᠬᠢᠭᠰᠠᠨ ᠳ᠋ᠤ᠌ ᠶᠠᠭᠤᠲᠠᠢ ᠬᠡᠦᠳᠡᠢ ᠨᠢ ᠪᠥᠭᠡᠯᠵᠢᠵᠦ ᠭᠠᠷᠭᠠᠪᠠ᠃ 《ᠯᠤᠤ ᠦ᠋᠂ ᠪᠢ ᠠᠢᠬᠤᠪᠲᠤᠷ ᠤᠢᠳᠤᠭᠠᠳ ᠪᠠᠢᠨᠠ᠂ ᠬᠠᠰᠢᠶᠠᠨ ᠳ᠋ᠤ᠌ ᠭᠠᠷᠴᠤ ᠠᠯᠬᠤᠬᠤ ᠰᠠᠨ ᠭᠡᠵᠦ ᠠᠬᠠ ᠳ᠋ᠤ᠌ ᠬᠡᠯᠡᠭᠡᠳ ᠠᠯᠢ》 ᠭᠡᠵᠦ ᠪᠢ ᠬᠡᠯᠡᠯᠡ᠃ ᠴᠧᠨ ᠯᠤᠤ ᠦ᠋ ᠳᠤᠭᠤᠢ ᠭᠠᠷᠴᠤ ᠣᠳᠪᠠ᠃ ᠪᠠᠬᠠᠨ ᠤᠳᠠᠰᠬᠢᠭᠡᠳ ᠬᠠᠷᠢᠨ ᠢᠷᠡᠵᠦ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠪᠡ᠃ ᠲᠡᠳᠡ ᠨᠠᠮᠠ ᠶ᠋ᠢ ᠴᠣᠬᠣᠮ ᠶᠠᠭᠠᠬᠢᠳᠠᠭ ᠢ᠋ ᠨᠢ ᠦᠵᠡᠶᠡ ᠭᠡᠵᠦ ᠬᠥᠳᠡᠯᠦᠯ ᠦᠭᠡᠢ ᠠᠵᠢᠭᠯᠠᠵᠤ ᠰᠠᠭᠤᠨᠠ᠃ ᠯᠠᠪ ᠠᠮᠤᠷ ᠲᠠᠯᠪᠢᠬᠤ ᠦᠭᠡᠢ ᠭᠡᠭᠴᠢ ᠶ᠋ᠢ ᠪᠢ ᠮᠡᠳᠡᠵᠦ ᠪᠠᠢᠯᠠ᠃ ᠦᠨᠡᠬᠡᠷ ᠴᠦ᠍ ᠲᠡᠢᠮᠦ ᠪᠠᠢᠵᠠᠢ! ᠮᠠᠨ ᠤ᠋ ᠠᠬᠠ ᠨᠢᠭᠡᠨ ᠡᠪᠦᠭᠡᠨ ᠢ᠋ ᠳᠠᠭᠠᠭᠤᠯᠵᠤ ᠶᠠᠭᠠᠷᠠᠯ ᠦᠭᠡᠢ ᠣᠷᠣᠵᠤ ᠢᠷᠡᠯᠡ᠃ ᠡᠪᠦᠭᠡᠨ ᠠᠢᠬᠤᠪᠲᠤᠷ ᠬᠦᠢᠲᠡᠨ ᠬᠠᠷᠠᠴᠠ ᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠠᠳᠠ ᠰᠡᠷᠡᠭᠡᠳᠡᠭᠦᠯᠵᠡᠢ ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠪᠥᠬᠥᠢᠵᠦ ᠪᠦᠷ ᠭᠠᠵᠠᠷ ᠤᠷᠤᠭᠤ ᠬᠠᠨᠳᠤᠭᠤᠯᠤᠭᠠᠳ ᠨᠢᠳᠦᠨ ᠰᠢᠯ ᠦ᠋ᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠪᠠᠷ ᠨᠠᠮᠠ ᠶ᠋ᠢ ᠰᠡᠮᠬᠡᠨ ᠰᠢᠷᠳᠡᠨᠡ᠃ ᠠᠬᠠ:《ᠴᠢ ᠥᠨᠥᠳᠥᠷ ᠵᠦᠭᠡᠷ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ》ᠭᠡᠬᠦ ᠳ᠋ᠦ᠍ ᠪᠢ《ᠲᠡᠢᠮᠦ 》ᠭᠡᠪᠡ᠃ ᠠᠬᠠ: 《ᠥᠨᠥᠳᠥᠷ ᠾᠧ ᠡᠮᠴᠢ ᠶ᠋ᠢ ᠵᠠᠯᠠᠵᠤ ᠪᠡᠶᠡ ᠶ᠋ᠢ ᠴᠢᠨᠢ ᠦᠵᠡᠭᠦᠯᠬᠦ ᠭᠡᠰᠡᠨ ᠶᠤᠮ》 ᠭᠡᠬᠦ ᠳ᠋ᠦ᠍ᠨᠢ ᠪᠢ: 《ᠵᠠ!》 ᠭᠡᠪᠡ᠃ ᠦᠨᠡᠨ ᠳ᠋ᠡᠭᠡᠨ ᠡᠨᠡ ᠡᠪᠦᠭᠡᠨ ᠪᠣᠯ ᠵᠢᠰᠦ ᠪᠡᠨ ᠪᠤᠷᠤᠭᠤᠯᠠᠭᠰᠠᠨ ᠶᠠᠷᠭᠠᠴᠢᠨ ᠮᠥᠨ ᠭᠡᠭᠴᠢ ᠶ᠋ᠢ ᠪᠢ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠶᠤᠮ ᠪᠢᠰᠢ! ᠰᠤᠳᠠᠯ ᠪᠠᠷᠢᠬᠤ ᠨᠡᠷᠡ ᠪᠡᠷ ᠲᠠᠷᠭᠤᠨ ᠡᠴᠡᠩᠭᠡᠷ ᠢ᠋ ᠮᠢᠨᠢ ᠦᠵᠡᠭᠡᠳ ᠡᠨᠡ ᠭᠠᠪᠢᠶᠠ ᠪᠠᠷ ᠢ᠋ᠶ᠋ᠠᠨ ᠨᠢᠭᠡ ᠵᠦᠰᠦᠮ ᠮᠢᠬᠠ ᠣᠯᠵᠤ ᠢᠳᠡᠬᠦ ᠯᠡ ᠭᠡᠰᠡᠨ ᠬᠡᠷᠡᠭ ᠠ᠋᠃ ᠪᠢ ᠴᠦ᠍ ᠠᠶᠤᠬᠤ ᠦᠭᠡᠢ᠂ ᠬᠡᠳᠦᠢᠪᠡᠷ ᠬᠥᠮᠦᠨ ᠢᠳᠡᠳᠡᠭ ᠦᠭᠡᠢ ᠪᠣᠯᠪᠠᠴᠤ ᠲᠡᠳᠡᠨ ᠡᠴᠡ ᠢᠯᠡᠭᠦᠦ ᠵᠢᠷᠦᠬᠡ ᠪᠦᠳᠦᠭᠦᠨ ᠬᠥᠮᠦᠨ ᠪᠢᠯᠡ ᠪᠢ᠃ ᠬᠣᠶᠠᠷ ᠨᠢᠳᠤᠷᠭᠠ ᠪᠠᠨ ᠰᠤᠩᠭᠠᠵᠤ ᠥᠭᠭᠦᠭᠡᠳ ᠶᠠᠭᠠᠬᠢᠵᠤ ᠭᠠᠷ ᠬᠥᠳᠡᠯᠬᠦ ᠶ᠋ᠢ ᠨᠢ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠡᠪᠦᠭᠡᠨ ᠨᠢᠳᠦ ᠪᠡᠨ ᠠᠨᠢᠭᠠᠳ ᠤᠳᠠᠲᠠᠯᠠ ᠲᠡᠮᠲᠡᠷᠢᠵᠦ᠂ ᠤᠳᠠᠲᠠᠯᠠ ᠪᠣᠳᠣᠯᠭᠠ ᠪᠣᠯᠤᠨ ᠰᠠᠭᠤᠭᠠᠳ ᠰᠠᠶᠢ ᠰᠢᠮᠨᠤ ᠶ᠋ᠢᠨ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ: 《ᠳᠡᠮᠡᠢ ᠶᠠᠭᠤᠮᠠ ᠪᠤᠤ ᠪᠣᠳᠣ ᠠ᠋᠃ ᠬᠡᠳᠦᠨ ᠡᠳᠦᠷ ᠨᠠᠮ ᠰᠤᠪᠢᠯᠠᠪᠠᠯ ᠰᠠᠢᠨ ᠪᠣᠯᠤᠨᠠ》ᠭᠡᠨᠡ᠃
ᠳᠡᠮᠡᠢ ᠶᠠᠭᠤᠮᠠ ᠪᠤᠤ ᠪᠣᠳᠣ᠂ ᠨᠠᠮ ᠰᠤᠪᠢᠯᠠ! ᠰᠤᠪᠢᠯᠠᠭᠰᠠᠭᠠᠷ ᠲᠠᠷᠭᠤᠯᠠᠪᠠᠯ᠂ ᠲᠡᠳᠡ ᠢᠯᠡᠭᠦᠦ ᠮᠢᠬᠠ ᠣᠯᠵᠤ ᠢᠳᠡᠬᠦ ᠨᠢ ᠶᠠᠷᠢᠶᠠᠨ ᠦᠭᠡᠢ᠃ ᠨᠠᠳᠠ ᠶᠠᠮᠠᠷ ᠰᠠᠢᠨ ᠲᠠᠢ ᠶᠤᠮ ᠪᠣᠢ᠂ ᠶᠠᠭᠠᠬᠢᠭᠠᠳ 《ᠰᠠᠢᠨ ᠪᠣᠯᠬᠤ》 ᠶᠤᠮ ᠪᠣᠢ? ᠡᠳᠡ ᠶᠡᠷᠦ ᠨᠢ ᠬᠥᠮᠦᠨ ᠢ᠋ ᠢᠳᠡᠬᠦ ᠶ᠋ᠢ ᠬᠦᠰᠡᠬᠦ ᠠᠲᠠᠯᠠ ᠪᠠᠰᠠ ᠬᠤᠯᠠᠩ ᠬᠠᠯᠠᠩ ᠬᠢᠵᠦ ᠳᠠᠷᠤᠵᠤ ᠳᠠᠯᠳᠠᠯᠠᠬᠤ ᠶ᠋ᠢ ᠤᠷᠤᠯᠳᠤᠵᠤ ᠰᠢᠭᠤᠳ ᠭᠠᠷ ᠬᠥᠳᠡᠯᠵᠦ ᠴᠢᠳᠠᠳᠠᠭ ᠦᠭᠡᠢ ᠨᠢ ᠦᠨᠡᠬᠡᠷ ᠱᠠᠯ ᠢᠨᠢᠶᠡᠯᠲᠡᠢ ᠬᠡᠷᠡᠭ ᠠ᠋᠃ ᠪᠢ ᠲᠡᠰᠴᠦ ᠶᠠᠳᠠᠨ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠬᠦᠯᠡ ᠰᠡᠳᠬᠢᠯ ᠮᠢᠨᠢ ᠶᠡᠬᠡ ᠠᠭᠤᠵᠢᠷᠠᠪᠠ᠃ ᠡᠨᠡ ᠢᠨᠢᠶᠡᠳᠦ ᠮᠢᠨᠢ ᠰᠢᠳᠤᠷᠭᠤ ᠵᠣᠷᠢᠭ ᠠᠷᠢᠭᠤᠨ ᠶᠣᠰᠣ ᠪᠠᠷ ᠳᠦᠭᠦᠷᠡᠩ ᠪᠠᠢᠬᠤ ᠶ᠋ᠢ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠵᠦ ᠪᠠᠢᠨᠠ᠃ ᠲᠡᠷᠡ ᠡᠪᠦᠭᠡᠨ ᠠᠬᠠ ᠬᠣᠶᠠᠷ ᠴᠢᠷᠠᠢ ᠠᠯᠳᠠᠵᠤ᠂ ᠮᠢᠨᠦ ᠰᠢᠳᠤᠷᠭᠤ ᠵᠣᠷᠢᠭ ᠠᠷᠢᠭᠤᠨ ᠶᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠪᠠ᠃
ᠭᠡᠲᠡᠯᠡ ᠪᠢ ᠵᠣᠷᠢᠭ ᠲᠠᠢ ᠪᠠᠢᠪᠠᠯ ᠲᠡᠳᠡ ᠡᠨᠡ ᠵᠣᠷᠢᠭ ᠠ᠋ᠴᠠ ᠮᠢᠨᠢ ᠬᠤᠪᠢᠶᠠᠯᠴᠠᠬᠤ ᠭᠡᠵᠦ ᠨᠠᠮᠠ ᠶ᠋ᠢ ᠤᠯᠠᠮ ᠴᠤ᠌ ᠪᠠᠷᠢᠵᠤ ᠢᠳᠡᠬᠦ ᠭᠡᠨᠡ᠃ ᠡᠪᠦᠭᠡᠨ ᠡᠭᠦᠳᠡ ᠠᠯᠬᠤᠵᠤ ᠭᠠᠷᠤᠭᠠᠳ ᠳᠡᠮᠡᠢ ᠬᠣᠯᠠ ᠶᠠᠪᠤᠯ ᠦᠭᠡᠢ᠂ ᠠᠬᠠ ᠳ᠋ᠤ᠌ ᠰᠡᠮᠬᠡᠨ ᠢ᠋ᠶ᠋ᠡᠷ 《ᠪᠤᠰᠢᠭᠤᠬᠠᠨ ᠢᠳᠡᠶᠡ!》 ᠭᠡᠰᠡᠨ ᠳ᠋ᠦ᠍᠂ ᠠᠬᠠ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠪᠠ᠃ ᠦᠵᠡᠰᠡ᠂ ᠡᠭᠦᠨ ᠳ᠋ᠦ᠍ᠨᠢ ᠴᠢ ᠪᠠᠰᠠ ᠪᠠᠢᠬᠤ ᠶᠤᠮ ᠤᠤ! ᠡᠨᠡ ᠨᠢᠭᠡ ᠶᠡᠬᠡ ᠨᠡᠭᠡᠭᠡᠯᠲᠡ ᠬᠡᠳᠦᠢᠪᠡᠷ ᠰᠠᠨᠠᠮᠰᠠᠷ ᠦᠭᠡᠢ ᠮᠡᠲᠦ ᠪᠣᠯᠪᠠᠴᠤ᠂ ᠮᠥᠨ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠬᠡᠷᠡᠭ ᠠ᠋᠃ ᠬᠠᠮᠵᠢᠨ ᠨᠡᠢᠯᠡᠵᠦ ᠨᠠᠮᠠ ᠶ᠋ᠢ ᠢᠳᠡᠬᠦ ᠭᠡᠰᠡᠨ ᠬᠥᠮᠦᠨ ᠮᠢᠨᠢ ᠬᠠᠷᠢᠨ ᠮᠢᠨᠦ ᠠᠬᠠ ᠪᠠᠢᠵᠠᠢ᠃
ᠬᠥᠮᠦᠨ ᠢᠳᠡᠳᠡᠭ ᠨᠢ ᠮᠢᠨᠦ ᠠᠬᠠ!
ᠪᠢ ᠪᠣᠯ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠦ᠌ ᠳᠡᠭᠦᠦ!
ᠪᠢ ᠥᠪᠡᠷ ᠢ᠋ᠶ᠋ᠡᠨ ᠬᠥᠮᠦᠨ ᠳ᠋ᠦ᠍ ᠢᠳᠡᠭᠳᠡᠭᠰᠡᠨ ᠴᠦ᠍ ᠮᠥᠨ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠦ᠌ ᠳᠡᠭᠦᠦ ᠰᠢᠦ!
ᠲᠠᠪᠤ
ᠡᠨᠡ ᠬᠡᠳᠦᠨ ᠡᠳᠦᠷ ᠨᠢᠭᠡ ᠠᠯᠬᠤᠮ ᠤᠬᠤᠷᠢᠭᠠᠳ ᠪᠣᠳᠣᠵᠤ ᠦᠵᠡᠯᠡ᠃ ᠬᠡᠷᠪᠡ ᠲᠡᠷᠡ ᠡᠪᠦᠭᠡᠨ ᠵᠢᠰᠦ ᠪᠡᠨ ᠪᠤᠷᠤᠭᠤᠯᠠᠭᠰᠠᠨ ᠶᠠᠷᠭᠠᠴᠢᠨ ᠪᠢᠰᠢ᠂ ᠦᠨᠡᠨ ᠡᠮᠴᠢ ᠪᠣᠯᠤᠭᠰᠠᠨ ᠴᠤ᠌ ᠮᠥᠨ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠳᠡᠨ ᠦ᠌ ᠳᠡᠭᠡᠳᠦ ᠪᠠᠭᠰᠢ ᠯᠢ ᠱᠢ ᠵᠧᠨ ᠦ᠌ ᠵᠣᠬᠢᠶᠠᠭᠰᠠᠨ 《ᠬᠢᠲᠠᠳ ᠡᠮ ᠦ᠋ᠨ ᠶᠠᠭᠤ》 ᠳ᠋ᠤ᠌ ᠬᠥᠮᠦᠨ ᠦ᠌ ᠮᠢᠬᠠ ᠶ᠋ᠢ ᠴᠢᠨᠠᠵᠤ ᠢᠳᠡᠵᠦ ᠪᠣᠯᠤᠨᠠ ᠭᠡᠵᠦ ᠲᠣᠳᠣᠷᠬᠠᠢ ᠪᠢᠴᠢᠭᠡᠳ ᠪᠠᠢᠬᠤ ᠶᠤᠮ ᠴᠢᠨᠢ᠂ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠬᠥᠮᠦᠨ ᠢᠳᠡᠬᠦ ᠦᠭᠡᠢ ᠪᠠᠢᠵᠤ ᠴᠢᠳᠠᠨᠠ ᠤᠤ? ᠮᠢᠨᠦ ᠠᠬᠠ ᠶ᠋ᠢᠨ ᠲᠤᠬᠠᠢ ᠴᠤ᠌ ᠭᠡᠰᠡᠨ᠂ ᠲᠡᠭᠦᠨ ᠢ᠋ ᠬᠢᠯᠢᠰᠳᠡᠭᠦᠯᠦᠭᠰᠡᠨ ᠵᠦᠢᠯ ᠣᠭᠲᠣ ᠠᠯᠠᠭᠠ᠃ ᠲᠡᠷᠡ ᠨᠠᠳᠠ ᠪᠢᠴᠢᠭ ᠵᠢᠭᠠᠬᠤ ᠳ᠋ᠠᠭᠠᠨ 《ᠬᠡᠦᠬᠡᠳ ᠶᠥᠭᠡᠨ ᠰᠣᠯᠢᠨ ᠢᠳᠡᠵᠦ ᠪᠣᠯᠤᠮᠤᠢ》 ᠭᠡᠵᠦ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠶᠤᠮ᠃ ᠪᠠᠰᠠ ᠨᠢᠭᠡ ᠤᠳᠠᠭᠠ ᠪᠢᠳᠡ ᠨᠢᠭᠡᠨ ᠮᠠᠭᠤ ᠬᠥᠮᠦᠨ ᠦ᠌ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠪᠠᠢᠲᠠᠯᠠ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠨᠢ ᠠᠯᠠᠬᠤ ᠶᠣᠰᠣᠲᠠᠢ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠪᠠᠰᠠ《ᠮᠢᠬᠠ ᠶ᠋ᠢ ᠠᠨᠤ ᠢᠳᠡᠵᠦ᠂ ᠠᠷᠠᠰᠤ ᠶ᠋ᠢ ᠠᠨᠤ ᠳᠡᠪᠢᠰᠬᠦ 》ᠶᠣᠰᠣᠲᠠᠢ ᠭᠡᠰᠡᠨ ᠪᠢᠯᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠢ ᠨᠠᠰᠤ ᠪᠠᠭᠠ ᠪᠠᠢᠭᠰᠠᠨ ᠲᠤᠯᠠ ᠵᠢᠷᠦᠬᠡ ᠮᠢᠨᠢ ᠤᠳᠠᠲᠠᠯᠠ ᠲᠦᠭᠰᠢᠵᠦ ᠪᠢᠯᠡ᠃ ᠤᠷᠢᠳ ᠡᠳᠦᠷ ᠯᠠᠩ ᠽᠢ ᠼᠦᠨ ᠲᠣᠰᠬᠣᠨ ᠤ᠋ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠢᠷᠡᠵᠦ᠂ ᠵᠢᠷᠦᠬᠡ ᠢᠳᠡᠭᠰᠡᠨ ᠶᠠᠪᠤᠳᠠᠯ ᠢ᠋ ᠶᠠᠷᠢᠬᠤ ᠳ᠋ᠤ᠌᠂ ᠲᠡᠷᠡ ᠪᠠᠰᠠ ᠠᠵᠢᠭ ᠴᠤ᠌ ᠦᠭᠡᠢ᠂ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠵᠤ ᠯᠠ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠤᠷᠢᠳᠠᠬᠢ ᠲᠠᠢ ᠪᠠᠨ ᠠᠳᠠᠯᠢ ᠬᠣᠣᠷᠲᠠᠢ ᠪᠠᠢᠭᠠ ᠨᠢ ᠢᠯᠡᠷᠬᠡᠢ ᠮᠡᠳᠡᠭᠳᠡᠨᠡ᠃ 《ᠬᠡᠦᠬᠡᠳ ᠶᠥᠭᠡᠨ ᠰᠣᠯᠢᠨ ᠢᠳᠡᠵᠦ ᠪᠣᠯᠵᠤ》 ᠪᠠᠢᠬᠤ ᠲᠤᠯᠠ ᠶᠠᠭᠤ ᠶ᠋ᠢ ᠴᠦ᠍ ᠪᠦᠷ ᠰᠣᠯᠢᠵᠤ ᠪᠣᠯᠤᠨᠠ᠃ ᠬᠡᠨ ᠢ᠋ ᠴᠦ᠍ ᠪᠦᠷ ᠢᠳᠡᠵᠦ ᠪᠣᠯᠤᠨᠠ᠃ ᠤᠷᠢᠳᠤ ᠪᠢ ᠲᠡᠭᠦᠨ ᠦ᠌ ᠶᠣᠰᠣ ᠶᠠᠷᠢᠬᠤ ᠶ᠋ᠢ ᠯᠡ ᠰᠣᠨᠣᠰᠤᠭᠠᠳ᠂ ᠳᠦᠯᠡᠢ ᠪᠠᠯᠠᠢ ᠥᠩᠭᠡᠷᠡᠭᠡᠵᠦ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠶᠣᠰᠣ ᠶᠠᠷᠢᠬᠤ ᠦᠶᠡ ᠳ᠋ᠦ᠍ ᠤᠷᠤᠭᠤᠯ ᠳᠡᠭᠡᠷᠡ ᠨᠢ ᠬᠥᠮᠦᠨ ᠦ᠌ ᠲᠣᠰᠣ ᠨᠠᠭᠠᠯᠳᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠨ᠂ ᠮᠥᠨ ᠴᠡᠭᠡᠵᠢ ᠨᠢ ᠬᠥᠮᠦᠨ ᠢᠳᠡᠬᠦ ᠰᠠᠨᠠᠭᠠ ᠪᠠᠷ ᠳᠦᠭᠦᠷᠡᠩ ᠪᠠᠢᠯᠠ ᠭᠡᠭᠴᠢ ᠶ᠋ᠢ ᠣᠳᠣ ᠰᠠᠶᠢ ᠣᠯᠵᠤ ᠮᠡᠳᠡᠯᠡ᠃
ᠵᠢᠷᠭᠤᠭᠠ
ᠡᠳᠦᠷ ᠴᠦ᠍ ᠶᠦᠮ ᠤᠤ᠂ ᠰᠥᠨᠢ ᠴᠦ᠍ ᠶᠤᠮ ᠤᠤ ᠪᠤᠤ ᠮᠡᠳᠡ᠂ ᠫᠠᠳ ᠬᠠᠷᠠᠩᠭᠤᠢ᠃ ᠵᠣᠣ ᠣᠪᠣᠭᠲᠠᠨ ᠤ᠋ ᠨᠣᠬᠠᠢ ᠪᠠᠰᠠ ᠬᠤᠴᠠᠵᠤ ᠡᠬᠢᠯᠡᠯᠡ᠃
ᠠᠷᠰᠯᠠᠨ ᠰᠢᠭ᠋ ᠬᠡᠷᠴᠡᠭᠡᠢ᠂ ᠲᠠᠤᠯᠠᠢ ᠰᠢᠭ᠋ ᠠᠶᠤᠮᠠᠲᠠᠭᠠᠢ᠂ ᠦᠨᠡᠭᠡ ᠰᠢᠭ ᠬᠤᠢᠬᠤᠷ ᠁
ᠳᠣᠯᠣᠭᠠ
ᠲᠡᠳᠡᠨ ᠦ᠌ ᠠᠷᠭᠠ ᠶ᠋ᠢ ᠪᠢ ᠮᠡᠳᠡᠪᠡ᠃ ᠰᠢᠭᠤᠳ ᠠᠯᠠᠬᠤ ᠦᠭᠡᠢ᠂ ᠴᠢᠩᠭᠢᠵᠦ ᠪᠠᠰᠠ ᠴᠢᠳᠠᠬᠤ ᠦᠭᠡᠢ᠂ ᠬᠡᠷᠡᠭ ᠪᠣᠯᠬᠤ ᠠ᠋ᠴᠠ ᠠᠶᠤᠳᠠᠭ ᠪᠠᠢᠪᠠ᠃ ᠲᠡᠢᠮᠦ ᠡᠴᠡ ᠲᠡᠳᠡ ᠳᠠᠯᠳᠠᠭᠤᠷ ᠬᠤᠤᠪᠢᠯᠳᠤᠵᠤ᠂ ᠤᠷᠠᠬᠠ ᠲᠣᠣᠷ ᠵᠣᠬᠢᠶᠠᠭᠠᠳ᠂ ᠨᠠᠮᠠ ᠶ᠋ᠢ ᠠᠯᠪᠠ ᠪᠠᠷ ᠬᠣᠷᠣᠭᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠤᠷᠢᠳ ᠬᠡᠳᠦᠨ ᠡᠳᠦᠷ ᠭᠤᠳᠤᠮᠵᠢᠨ ᠳ᠋ᠤ᠌ ᠳᠠᠭᠠᠷᠢᠯᠳᠤᠭᠰᠠᠨ ᠡᠷᠡᠭᠲᠡᠢ ᠡᠮᠡᠭᠲᠡᠢᠴᠦᠳ ᠦ᠋ᠨ ᠶᠠᠩᠵᠤ ᠪᠠ ᠠᠬᠠ ᠶ᠋ᠢᠨ ᠡᠨᠡ ᠬᠡᠳᠦᠨ ᠡᠳᠦᠷ ᠦ᠋ᠨ ᠬᠥᠳᠡᠯᠵᠦ ᠪᠠᠷᠢᠬᠤ ᠠ᠋ᠴᠠ ᠦᠵᠡᠪᠡᠯ᠂ ᠨᠠᠷᠢᠨ ᠤᠴᠢᠷ ᠢ᠋ ᠨᠢ ᠨᠠᠢ᠍ᠮᠠ ᠶᠢᠰᠦᠨ ᠬᠤᠪᠢ ᠪᠠᠷᠲᠠᠭᠠ ᠪᠠᠷ ᠮᠡᠳᠡᠬᠦ ᠶᠤᠮ᠃ ᠪᠦᠰᠡ ᠪᠡᠨ ᠲᠠᠢᠯᠵᠤ ᠪᠠᠢᠰᠢᠩ ᠤ᠋ᠨ ᠨᠢᠷᠤᠭᠤᠨ ᠠ᠋ᠴᠠ ᠡᠯᠭᠦᠭᠡᠳ ᠶᠠᠷᠭᠢᠲᠠᠯᠠ ᠪᠣᠭᠣᠮᠢᠯᠠᠵᠤ ᠦᠬᠦᠬᠦ ᠡᠴᠡ ᠢᠯᠡᠭᠦᠦ ᠰᠠᠢᠨ ᠶᠠᠪᠤᠳᠠᠯ ᠠᠯᠠᠭᠠ᠃ ᠢᠩᠭᠢᠪᠡᠯ ᠲᠡᠳᠡ ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠ ᠦᠭᠡᠢ ᠮᠥᠷᠲᠡᠭᠡᠨ ᠪᠠᠰᠠ ᠰᠠᠨᠠᠭᠠ ᠪᠠᠨ ᠭᠦᠢᠴᠡᠭᠡᠬᠦ ᠲᠤᠯᠠ ᠲᠡᠭᠷᠢ ᠦᠭᠡᠢ ᠶᠡᠬᠡ ᠪᠠᠶᠠᠷᠯᠠᠵᠤ ᠬᠠᠬᠠᠵᠤ ᠬᠥᠰᠢᠲᠡᠯᠡ ᠪᠡᠨ ᠢᠨᠢᠶᠡᠯᠳᠦᠬᠦ ᠨᠢ ᠶᠠᠷᠢᠶᠠᠨ ᠦᠭᠡᠢ᠃ ᠦᠭᠡᠢ ᠪᠣᠯ᠂ ᠠᠶᠤᠯᠭᠠᠵᠤ ᠵᠣᠪᠠᠭᠠᠭᠰᠠᠭᠠᠷ ᠦᠬᠦᠭᠦᠯᠦᠨᠡ᠃ ᠢᠩᠭᠢᠪᠡᠯ ᠪᠠᠬᠠᠨ ᠡᠴᠡᠬᠦ ᠪᠣᠯᠪᠠᠴᠤ ᠮᠥᠨ ᠲᠣᠯᠣᠭᠠᠢ ᠪᠠᠨ ᠬᠡᠳᠦ ᠳᠣᠬᠢᠵᠤ ᠥᠭᠬᠦ ᠶᠤᠮ᠃
ᠲᠡᠳᠡ ᠪᠣᠯ ᠦᠬᠦᠭᠰᠡᠨ ᠮᠢᠬᠠ ᠶ᠋ᠢ ᠯᠡ ᠢᠳᠡᠵᠦ ᠴᠢᠳᠠᠨᠠ! ᠶᠠᠮᠠᠷ ᠴᠤ᠌ ᠪᠢᠴᠢᠭ ᠳᠡᠭᠡᠷᠡ ᠪᠢᠯᠡ 《ᠬᠠᠢᠶᠧᠨᠠ》 ᠭᠡᠳᠡᠭ ᠨᠢᠭᠡ ᠠᠮᠢᠲᠠᠨ᠂ ᠨᠢᠳᠦ ᠪᠡᠶᠡ ᠪᠠᠢᠳᠠᠯ ᠨᠢ ᠦᠵᠡᠰᠢ ᠦᠭᠡᠢ ᠮᠠᠭᠤᠬᠠᠢ᠂ ᠬᠡᠵᠢᠶᠡᠳᠡ ᠦᠬᠦᠭᠰᠡᠨ ᠮᠢᠬᠠ ᠢᠳᠡᠳᠡᠭ ᠪᠥᠭᠡᠳ ᠪᠦᠳᠦᠭᠦᠨ ᠪᠦᠳᠦᠭᠦᠨ ᠶᠠᠰᠤ ᠶ᠋ᠢ ᠴᠦ᠍ ᠪᠠᠯᠪᠠ ᠬᠡᠮᠬᠡ ᠵᠠᠵᠢᠯᠤᠭᠠᠳ ᠵᠠᠯᠭᠢᠳᠠᠭ ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠵᠤ ᠪᠢᠯᠡ᠃ ᠪᠣᠳᠣᠵᠤ ᠦᠵᠡᠪᠡᠯ ᠮᠥᠨ ᠠᠶᠤᠮᠠᠷ ᠰᠠᠨᠠᠭᠳᠠᠬᠤ ᠶᠤᠮ᠃ 《ᠬᠠᠢᠶᠧᠨᠠ》 ᠪᠣᠯ ᠴᠢᠨᠣᠠ ᠶ᠋ᠢᠨ ᠰᠠᠳᠤᠨ᠂ ᠴᠢᠨᠣᠠ ᠪᠣᠯ ᠨᠣᠬᠠᠢ ᠶ᠋ᠢᠨ ᠲᠥᠷᠥᠯ ᠶᠤᠮ᠃ ᠤᠷᠵᠢᠳᠤᠷ ᠵᠣᠣ ᠣᠪᠣᠭᠲᠠᠨ ᠤ᠋ ᠨᠣᠬᠠᠢ ᠪᠣᠯᠬᠡᠳᠦ ᠬᠠᠷᠠᠵᠤ ᠠᠪᠤᠯᠠ᠃ ᠪᠣᠳᠣᠪᠠᠯ ᠲᠡᠷᠡ ᠪᠠᠰᠠ ᠦᠭᠡ ᠨᠢᠭᠡᠲᠡᠢ ᠬᠡᠳᠦᠢᠨ ᠣᠴᠢᠭᠠᠳ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠭᠰᠠᠨ ᠪᠠᠢᠯᠭᠦᠢ᠃ ᠡᠪᠦᠭᠡᠨ ᠦ᠌ ᠨᠢᠳᠦ ᠭᠠᠵᠠᠷ ᠱᠠᠭᠠᠢᠵᠤ ᠪᠠᠢᠭᠰᠠᠨ ᠴᠤ᠌ ᠨᠠᠳᠠ ᠠ᠋ᠴᠠ ᠶᠠᠭᠠᠬᠢᠵᠤ ᠨᠢᠭᠤᠵᠤ ᠴᠢᠳᠠᠬᠤ ᠪᠣᠢ᠃
ᠠᠬᠠ ᠯᠠ ᠮᠠᠰᠢ ᠬᠥᠭᠡᠷᠦᠬᠦᠢ ᠪᠠᠢᠨᠠ᠃ ᠲᠡᠷᠡ ᠪᠠᠰᠠ ᠬᠥᠮᠦᠨ ᠪᠠᠢᠲᠠᠯᠠ ᠶᠠᠭᠠᠬᠢᠭᠠᠳ ᠣᠭᠲᠣ ᠠᠶᠤᠵᠤ ᠵᠣᠪᠠᠬᠤ ᠦᠭᠡᠢ ᠪᠡᠷ ᠬᠥᠮᠦᠨ ᠲᠡᠢ ᠨᠡᠢᠯᠡᠵᠦ ᠪᠣᠯ ᠢᠳᠡᠬᠦ ᠨᠢ ᠤᠤ? ᠰᠤᠷᠴᠤ ᠵᠠᠩᠰᠢᠯ ᠪᠣᠯᠴᠢᠬᠠᠭᠠᠳ᠂ ᠪᠤᠷᠤᠭᠤ ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠪᠠᠢᠭᠠ ᠶᠤᠮ ᠤᠤ? ᠡᠰᠡᠬᠦᠯᠡ ᠬᠥᠮᠦᠨ ᠦ᠌ ᠴᠢᠨᠠᠷ ᠢ᠋ᠶ᠋ᠠᠨ ᠠᠯᠳᠠᠭᠠᠳ᠂ ᠮᠡᠳᠡᠪᠡᠴᠦ ᠵᠣᠷᠢᠭᠤᠳᠠ ᠦᠢᠯᠡᠳᠴᠦ ᠪᠠᠢᠬᠤ ᠨᠢ ᠲᠡᠷᠡ ᠤᠤ?
ᠪᠢ ᠬᠥᠮᠦᠨ ᠢᠳᠡᠭᠴᠢᠳ ᠢ᠋ ᠵᠦᠬᠡᠨ ᠬᠠᠷᠢᠶᠠᠬᠤ ᠳ᠋ᠠᠭᠠᠨ ᠲᠡᠭᠦᠨ ᠡᠴᠡ ᠡᠬᠢᠯᠡᠨᠡ᠃ ᠬᠥᠮᠦᠨ ᠢᠳᠡᠭᠴᠢᠳ ᠢ᠋ ᠢᠳᠬᠠᠬᠤ ᠳ᠋ᠠᠭᠠᠨ ᠴᠤ᠌ ᠲᠡᠭᠦᠨ ᠡᠴᠡ ᠡᠬᠢᠯᠡᠨᠡ᠃
ᠨᠠᠢ᠍ᠮᠠ
ᠴᠣᠬᠣᠮ ᠳ᠋ᠠᠭᠠᠨ ᠡᠳᠡᠭᠡᠷ ᠶᠣᠰᠣ ᠶ᠋ᠢ ᠣᠳᠣ ᠲᠡᠳᠡ ᠬᠡᠳᠦᠢᠨ ᠣᠢᠯᠠᠭᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠁
ᠭᠡᠨᠡᠳᠲᠡ ᠨᠢᠭᠡ ᠬᠥᠮᠦᠨ ᠣᠷᠣᠵᠤ ᠢᠷᠡᠪᠡ᠃ ᠬᠣᠷᠢᠭᠠᠳ ᠨᠠᠰᠤᠨ ᠤ᠋ ᠮᠠᠶᠢᠭᠲᠠᠢ᠂ ᠵᠢᠰᠦ ᠴᠢᠷᠠᠢ ᠶ᠋ᠢ ᠨᠢ ᠲᠣᠳᠣᠷᠬᠠᠢ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ᠂ ᠴᠢᠷᠠᠢ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠵᠦ ᠮᠢᠨᠦ ᠵᠦᠭ ᠲᠣᠬᠢᠨᠠ᠃ ᠢᠨᠢᠶᠡᠳᠦ ᠨᠢ ᠮᠥᠨ ᠦᠨᠡᠨ ᠢᠨᠢᠶᠡᠳᠦ ᠪᠢᠰᠢ ᠶᠠᠩᠵᠤ ᠲᠠᠢ᠃ ᠪᠢ ᠲᠡᠭᠦᠨ ᠡᠴᠡ: 《ᠬᠥᠮᠦᠨ ᠢ᠋ ᠢᠳᠡᠬᠦ ᠨᠢ ᠲᠠᠭᠠᠷᠠᠨᠠ ᠤᠤ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠮᠥᠨ ᠢᠨᠢᠶᠡᠮᠰᠦᠭᠯᠡᠵᠦ: 《ᠭᠠᠴᠢᠭ ᠵᠢᠯ ᠪᠢᠰᠢ ᠪᠠᠢᠲᠠᠯᠠ ᠶᠠᠭᠤᠨ ᠳ᠋ᠤ᠌ ᠬᠥᠮᠦᠨ ᠢᠳᠡᠬᠦ ᠪᠣᠢ》 ᠭᠡᠪᠡ᠃ ᠡᠨᠡ ᠴᠦ᠍ ᠮᠥᠨ ᠬᠥᠮᠦᠨ ᠢᠳᠡᠬᠦ ᠳᠤᠷᠠᠲᠠᠢ! ᠨᠢᠭᠡ ᠵᠠᠮ ᠤ᠋ᠨ ᠴᠢᠳᠬᠥᠷ ᠪᠠᠢᠨᠠ ᠭᠡᠵᠦ ᠪᠢ ᠳᠣᠣᠷᠠ ᠪᠠᠨ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠪᠢ ᠵᠠᠭᠤᠨ ᠬᠤᠪᠢ ᠶ᠋ᠢᠨ ᠵᠣᠷᠢᠭ ᠭᠠᠷᠭᠠᠵᠤ ᠵᠣᠷᠢᠭᠤᠳᠠ ᠲᠡᠭᠦᠨ ᠡᠴᠡ:
《ᠲᠠᠭᠠᠷᠠᠨᠠ ᠤᠤ》 ᠭᠡᠵᠦ ᠠᠰᠠᠭᠤᠪᠠ᠃
《ᠡᠳᠡᠭᠡᠷ ᠶᠠᠪᠤᠳᠠᠯ ᠢ᠋ ᠠᠰᠠᠭᠤᠭᠠᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ᠃ ᠴᠢ ᠦᠨᠡᠬᠡᠷ ᠁ ᠶᠡᠬᠡ ᠱᠣᠭ ᠲᠠᠢ ᠬᠥᠮᠦᠨ ᠪᠠᠢᠨᠠ᠃ ᠁ ᠥᠨᠥᠳᠥᠷ ᠲᠡᠭᠷᠢ ᠰᠠᠢᠬᠠᠨ ᠪᠠᠢᠨᠠ ᠰᠢᠦ᠃ 》 ᠲᠡᠭᠷᠢ ᠴᠦ᠍ ᠰᠠᠢᠬᠠᠨ ᠪᠠᠢᠨᠠ᠂ ᠰᠠᠷᠠ ᠪᠠᠰᠠ ᠲᠤᠩᠭᠠᠯᠠᠭ ᠪᠠᠢᠨᠠ᠃
ᠭᠡᠪᠡᠴᠦ ᠪᠢ ᠴᠢᠮᠠ ᠠ᠋ᠴᠠ ᠠᠰᠠᠭᠤᠶᠠ:
《ᠲᠠᠭᠠᠷᠠᠨᠠ ᠤᠤ?》 ᠲᠡᠷᠡ᠂ ᠦᠯᠦ ᠲᠠᠭᠠᠰᠢᠶᠠᠬᠤᠢᠴᠠ 《ᠲᠠᠭᠠᠷᠠᠬᠤ ᠦᠭᠡᠢ ᠁》 ᠭᠡᠵᠦ ᠬᠠᠯᠲᠤ ᠮᠥᠯᠲᠥ ᠳᠤᠤᠭᠠᠷᠪᠠ᠃
《ᠲᠠᠭᠠᠷᠠᠬᠤ ᠦᠭᠡᠢ ᠪᠣᠯ ᠲᠡᠳᠡ ᠶᠠᠭᠤᠨ ᠳ᠋ᠤ᠌ ᠢᠳᠡᠭᠡᠳ ᠪᠠᠢᠳᠠᠭ ᠶᠤᠮ ᠪᠣᠢ?》
《ᠪᠠᠢᠳᠠᠭ ᠦᠭᠡᠢ ᠬᠡᠷᠡᠭ ᠁》
《ᠪᠠᠢᠳᠠᠭ ᠦᠭᠡᠢ ᠬᠡᠷᠡᠭ ᠠ᠋? ᠣᠳᠣ ᠯᠠᠩ ᠽᠢ ᠼᠦᠨ ᠲᠣᠰᠬᠣᠨ ᠳ᠋ᠤ᠌ ᠢᠳᠡᠵᠦ ᠪᠠᠢᠨᠠ᠃ ᠪᠢᠴᠢᠭ ᠲᠦ᠍ ᠪᠠᠰᠠ ᠪᠢᠴᠢᠭᠡᠰᠦᠲᠡᠢ᠂ ᠤᠪ ᠤᠯᠠᠭᠠᠨ ᠰᠢᠪ ᠰᠢᠨᠡᠬᠡᠨ!》
ᠲᠡᠷᠡ ᠬᠥᠮᠦᠨ ᠳᠣᠣᠷᠠ ᠪᠠᠨ ᠴᠢᠷᠠᠢ ᠪᠠᠨ ᠲᠡᠮᠦᠷ ᠮᠡᠲᠦ ᠬᠥᠬᠡᠷᠡᠭᠦᠯᠵᠦ᠂ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ: 《ᠪᠠᠢᠵᠤ ᠴᠤ᠌ ᠮᠡᠳᠡᠨᠡ᠂ ᠤᠤᠯ ᠠ᠋ᠴᠠ ᠡᠢᠮᠦ ᠯᠡ ᠪᠠᠢᠭᠰᠠᠨ ᠁》 ᠭᠡᠪᠡ᠃
《ᠤᠤᠯ ᠠ᠋ᠴᠠ ᠡᠢᠮᠦ ᠯᠡ ᠪᠠᠢᠭᠰᠠᠨ ᠨᠢ ᠲᠠᠭᠠᠷᠠᠨᠠ ᠤᠤ?》
《ᠪᠢ ᠴᠢᠮᠠ ᠲᠠᠢ ᠡᠳᠡᠭᠡᠷ ᠶᠣᠰᠣ ᠶ᠋ᠢ ᠬᠡᠯᠡᠯᠴᠡᠬᠦ ᠦᠭᠡᠢ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠴᠢ ᠡᠭᠦᠨ ᠢ᠋ ᠬᠡᠯᠡᠬᠦ ᠶᠣᠰᠣ ᠦᠭᠡᠢ᠂ ᠴᠢ ᠬᠡᠯᠡᠪᠡᠯ ᠴᠢᠨᠦ ᠪᠤᠷᠤᠭᠤ ᠪᠣᠯᠤᠨᠠ!
ᠪᠢ ᠭᠣᠰ ᠦᠰᠦᠷᠦᠨ ᠪᠣᠰᠴᠤ ᠨᠢᠳᠦ ᠪᠡᠨ ᠨᠡᠭᠡᠭᠡᠬᠦᠯᠡ ᠲᠡᠷᠡ ᠬᠥᠮᠦᠨ ᠠᠯᠠᠭᠠ ᠪᠣᠯᠪᠠ᠃ ᠬᠠᠮᠤᠭ ᠪᠡᠶᠡ ᠡᠴᠡ ᠮᠢᠨᠢ ᠬᠠᠷᠠ ᠬᠥᠯᠥᠰᠥ ᠠᠰᠬᠠᠷᠠᠨᠠ᠃ ᠲᠡᠭᠦᠨ ᠦ᠌ ᠨᠠᠰᠤ ᠮᠢᠨᠦ ᠠᠬᠠ ᠠ᠋ᠴᠠ ᠬᠣᠯᠠ ᠪᠠᠭᠠ ᠪᠠᠢᠭᠰᠠᠨ ᠴᠤ᠌ ᠮᠥᠨ ᠨᠢᠭᠡ ᠨᠠᠮ ᠠᠵᠢ᠃ ᠡᠭᠦᠨ ᠢ᠋ ᠯᠠᠪ ᠡᠬᠡ ᠡᠴᠢᠭᠡ ᠨᠢ ᠤᠷᠢᠳᠠᠰᠠ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠪᠠᠢᠯᠭᠦᠢ᠂ ᠲᠡᠭᠡᠭᠡᠳ ᠲᠡᠷᠡ ᠬᠦᠦ ᠳ᠋ᠡᠭᠡᠨ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠪᠢᠵᠡ᠃ ᠢᠩᠭᠢᠬᠦᠯᠡᠷ ᠬᠡᠦᠬᠡᠳ ᠬᠦᠷᠲᠡᠯᠡ ᠴᠥᠮ ᠪᠣᠯ ᠬᠣᠣᠷᠲᠠᠢ ᠬᠠᠷᠠᠵᠤ ᠪᠠᠢᠬᠤ ᠨᠢ ᠲᠡᠷᠡ ᠪᠢᠵᠡ᠃
ᠶᠢᠰᠦ
ᠥᠪᠡᠷ ᠢ᠋ᠶ᠋ᠡᠨ ᠬᠥᠮᠦᠨ ᠢ᠋ ᠢᠳᠡᠬᠦ ᠭᠡᠨᠡ᠃ ᠪᠠᠰᠠ ᠬᠥᠮᠦᠨ ᠳ᠋ᠦ᠍ ᠢᠳᠡᠭᠳᠡᠬᠦ ᠡᠴᠡ ᠪᠡᠨ ᠠᠶᠤᠭᠠᠳ ᠪᠦᠷ ᠯᠡ ᠲᠤᠢᠯ ᠤ᠋ᠨ ᠶᠡᠬᠡ ᠬᠠᠷᠠᠳᠠᠭᠰᠠᠨ ᠨᠢᠳᠦ ᠪᠡᠷ ᠨᠢᠭᠡ ᠨᠢᠭᠡ ᠪᠡᠨ ᠰᠢᠷᠳᠡᠨᠡ᠃ ᠁
ᠡᠨᠡ ᠪᠣᠳᠣᠯᠭᠠ ᠪᠠᠨ ᠬᠠᠶᠠᠭᠠᠳ ᠰᠠᠨᠠᠭᠠ ᠠᠮᠤᠷ ᠠᠵᠢᠯᠯᠠᠵᠤ ᠤᠨᠲᠠᠵᠤ ᠢᠳᠡᠵᠦ ᠶᠠᠪᠤᠪᠠᠯ ᠬᠡᠴᠢᠨᠡᠨ ᠠᠶᠠᠲᠠᠢ ᠪᠢᠯᠡ᠃ ᠢᠩᠭᠢᠬᠦ ᠨᠢ ᠬᠠᠲᠠᠪᠴᠢ ᠠᠯᠬᠤᠨ ᠭᠠᠷᠬᠤ ᠶ᠋ᠢᠨ ᠲᠡᠳᠦᠢ ᠨᠢᠭᠡ ᠯᠡ ᠪᠣᠭᠣᠮᠲᠠ ᠶᠤᠮ᠃ ᠭᠡᠲᠡᠯᠡ ᠲᠡᠳᠡ ᠠᠪᠤ ᠬᠦᠦ᠂ ᠠᠬᠠ ᠳᠡᠭᠦᠦ᠂ ᠡᠷᠡ ᠡᠮᠡ᠂ ᠠᠨᠳᠠ ᠨᠥᠬᠥᠷ᠂ ᠪᠠᠭᠰᠢ ᠱᠠᠪᠢ᠂ ᠦᠰᠲᠡᠨ ᠳᠠᠢᠰᠤᠨ ᠪᠠ ᠦᠯᠦ ᠲᠠᠨᠢᠯᠴᠠᠬᠤ ᠬᠥᠮᠦᠰ ᠬᠦᠷᠲᠡᠯᠡ ᠴᠥᠮ ᠨᠡᠢᠯᠡᠵᠦ ᠨᠢᠭᠡᠳᠦᠭᠡᠳ ᠪᠡᠶᠡ ᠪᠡᠶᠡ ᠪᠡᠨ ᠬᠣᠷᠢᠵᠤ ᠢᠳᠬᠠᠨ ᠨᠢᠭᠡ ᠨᠢ ᠨᠢᠭᠡ ᠪᠡᠨ ᠲᠠᠲᠠᠯᠴᠠᠨ᠂ ᠡᠨᠡ ᠭᠠᠭᠴᠠᠬᠠᠨ ᠠᠯᠬᠤᠮ ᠢ᠋ ᠦᠬᠦᠪᠡᠴᠦ ᠠᠯᠬᠤᠵᠤ ᠥᠭᠬᠦ ᠦᠭᠡᠢ ᠪᠠᠢᠨᠠ᠃
ᠠᠷᠪᠠ
ᠬᠠᠷᠠ ᠥᠷᠯᠥᠭᠡᠭᠦᠷ ᠪᠢ ᠠᠬᠠ ᠪᠠᠨ ᠡᠷᠢᠵᠦ ᠣᠴᠢᠪᠠ᠃ ᠲᠡᠷᠡ ᠭᠣᠣᠯ ᠭᠡᠷ ᠦ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠪᠡᠨ ᠲᠡᠭᠷᠢ ᠶ᠋ᠢ ᠰᠢᠷᠲᠡᠨ ᠵᠣᠭᠰᠣᠨᠠ᠃ ᠪᠢ ᠲᠡᠭᠦᠨ ᠦ᠌ ᠠᠷᠤ ᠳ᠋ᠤ᠌ ᠣᠴᠢᠭᠠᠳ ᠡᠭᠦᠳᠡ ᠶ᠋ᠢ ᠬᠠᠰᠢᠨ ᠵᠣᠭᠰᠣᠵᠤ᠂ ᠶᠡᠬᠡ ᠡᠶᠡᠯᠳᠡᠭ ᠳᠥᠯᠭᠡᠨ ᠢ᠋ᠶ᠋ᠡᠷ:
《ᠠᠬᠠ ᠠ᠋᠂ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠬᠦ ᠦᠭᠡ ᠪᠠᠢᠨᠠ 》ᠭᠡᠪᠡ᠃
《ᠶᠠᠷᠢ ᠯᠠ ᠳᠠ 》 ᠭᠡᠵᠦ ᠲᠡᠷᠡ ᠲᠦᠷᠭᠡᠨ ᠡᠷᠭᠢᠵᠦ ᠬᠠᠷᠠᠭᠠᠳ ᠲᠣᠯᠣᠭᠠᠢ ᠳᠣᠬᠢᠪᠠ᠃
《ᠪᠢ ᠬᠡᠳᠦᠬᠡᠨ ᠦᠭᠡ ᠬᠡᠯᠡᠬᠦ ᠭᠡᠰᠡᠨ ᠶᠤᠮ᠂ ᠭᠡᠲᠡᠯᠡ ᠠᠮᠠᠨ ᠠ᠋ᠴᠠ ᠭᠠᠷᠴᠤ ᠥᠭᠬᠦ ᠦᠭᠡᠢ ᠪᠠᠢᠨᠠ᠃ ᠠᠬᠠ ᠠ᠋᠂ ᠤᠷᠢᠳᠤ ᠶ᠋ᠢᠨ ᠵᠡᠷᠯᠢᠭ ᠬᠥᠮᠦᠨ ᠪᠠᠷᠤᠭ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠭᠠ ᠰᠠᠭᠠ ᠬᠥᠮᠦᠨ ᠢᠳᠡᠳᠡᠭ ᠪᠠᠢᠭᠰᠠᠨ ᠪᠢᠵᠡ᠃ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠪᠣᠳᠣᠯᠭᠠ ᠰᠠᠨᠠᠭᠠ ᠨᠢ ᠣᠨᠳᠣᠣ ᠪᠣᠯᠤᠭᠰᠠᠨ ᠤᠴᠢᠷ ᠠ᠋ᠴᠠ ᠵᠠᠷᠢᠮ ᠨᠢ ᠬᠥᠮᠦᠨ ᠢᠳᠡᠬᠦ ᠪᠡᠨ ᠪᠠᠢᠵᠤ᠂ ᠰᠠᠢᠨ ᠢ᠋ ᠰᠠᠨᠠᠭᠰᠠᠭᠠᠷ ᠬᠥᠮᠦᠨ ᠪᠣᠯᠵᠤ᠂ ᠵᠢᠩᠬᠢᠨᠢ ᠬᠥᠮᠦᠨ ᠪᠣᠯᠵᠠᠢ᠃ ᠵᠠᠷᠢᠮ ᠨᠢ ᠮᠥᠨ ᠬᠣᠷᠣᠬᠠᠢ ᠰᠢᠪᠡᠵᠢ ᠰᠢᠭ᠋ ᠢᠳᠡᠭᠰᠡᠭᠡᠷ ᠪᠠᠢᠨᠠ᠃ ᠵᠠᠷᠢᠮ ᠨᠢ ᠵᠢᠭᠠᠰᠤ᠂ ᠰᠢᠪᠠᠭᠤ᠂ ᠰᠠᠷᠮᠠᠭᠴᠢᠨ ᠪᠣᠯᠤᠭᠰᠠᠭᠠᠷ ᠤᠯᠠᠮ ᠢ᠋ᠶ᠋ᠠᠷ ᠬᠥᠮᠦᠨ ᠪᠣᠯᠵᠤ ᠬᠤᠪᠢᠷᠠᠪᠠ᠃ ᠵᠠᠷᠢᠮ ᠨᠢ ᠰᠠᠢᠨ ᠢ᠋ ᠬᠦᠰᠡᠬᠦ ᠦᠭᠡᠢ᠂ ᠣᠳᠣ ᠪᠣᠯᠲᠠᠯᠠ ᠬᠣᠷᠣᠬᠠᠢ ᠰᠢᠪᠡᠵᠢ ᠬᠡᠪ ᠢ᠋ᠶ᠋ᠡᠷ ᠪᠠᠢᠨᠠ᠃ ᠬᠥᠮᠦᠨ ᠢᠳᠡᠳᠡᠭ ᠨᠢ ᠬᠥᠮᠦᠨ ᠢᠳᠡᠳᠡᠭ ᠦᠭᠡᠢ ᠪᠡᠨ ᠪᠣᠳᠣᠪᠠᠯ ᠶᠠᠭᠤᠲᠠᠢ ᠢᠴᠢᠭᠦᠷᠢᠲᠡᠢ ᠠᠵᠢ᠃ ᠯᠠᠪ ᠬᠣᠷᠣᠬᠠᠢ ᠰᠢᠪᠡᠵᠢ᠂ ᠰᠠᠷᠮᠠᠭᠴᠢᠨ ᠠ᠋ᠴᠠ ᠢᠴᠡᠩᠭᠦᠷᠡᠬᠦ ᠡᠴᠡ ᠬᠣᠯᠠ ᠴᠠᠰᠢ ᠪᠠᠢᠬᠤ ᠠ᠋᠃
ᠢ ᠶᠠ ᠬᠦᠦ ᠪᠡᠨ ᠵᠢᠩᠨᠡᠵᠦ᠂ ᠵᠢᠶᠧ ᠵᠧᠦ ᠬᠣᠶᠠᠷ ᠬᠠᠭᠠᠨ ᠳ᠋ᠤ᠌ ᠢᠳᠡᠭᠦᠯᠦᠭᠰᠡᠨ ᠶᠠᠪᠤᠳᠠᠯ ᠪᠣᠯ ᠪᠦᠷ ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠬᠡᠷᠡᠭ ᠰᠢᠦ ᠲᠠ᠃ ᠫᠠᠨ ᠭᠦ᠋ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢ ᠲᠣᠭᠲᠠᠭᠠᠭᠰᠠᠨ ᠠ᠋ᠴᠠ ᠨᠡᠰᠢ᠂ ᠢ ᠶᠠ ᠶ᠋ᠢᠨ ᠬᠦᠦ ᠬᠦᠷᠴᠦ ᠢᠷᠡᠲᠡᠯᠡ᠂ ᠢ ᠶᠠ ᠶ᠋ᠢᠨ ᠬᠦᠦ ᠡᠴᠡ ᠰᠢᠦᠢ ᠰᠢ ᠯᠢᠨ ᠬᠦᠷᠴᠦ ᠢᠷᠡᠲᠡᠯᠡ᠂ ᠰᠢᠦᠢ ᠰᠢ ᠯᠢᠨ ᠡᠴᠡ ᠪᠠᠰᠠ ᠯᠠᠩ ᠽᠢ ᠼᠦᠨ ᠲᠣᠰᠬᠣᠨ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠬᠦᠷᠴᠦ ᠢᠷᠡᠲᠡᠯᠡ ᠢᠳᠡᠭᠳᠡᠭᠰᠡᠭᠡᠷ ᠢᠷᠡᠭᠰᠡᠨ ᠢ᠋ ᠬᠡᠨ ᠮᠡᠳᠡᠬᠦ ᠪᠣᠢ᠃ ᠨᠢᠳᠤᠨᠤᠨ ᠬᠣᠲᠠ ᠳ᠋ᠤ᠌ ᠨᠢᠭᠡ ᠶᠠᠯᠠᠲᠠᠨ ᠢ᠋ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠭᠰᠠᠨ ᠳ᠋ᠤ᠌᠂ ᠪᠠᠰᠠ ᠨᠢᠭᠡ ᠠᠭᠤᠰᠬᠢᠨ ᠤ᠋ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠲᠡᠭᠦᠨ ᠦ᠌ ᠴᠢᠰᠤᠨ ᠳ᠋ᠤ᠌ ᠮᠠᠨᠲᠠᠤ ᠲᠥᠷᠥᠵᠦ ᠢᠳᠡᠭᠰᠡᠨ ᠶᠤᠮ᠃
《ᠲᠡᠳᠡ ᠨᠠᠮᠠ ᠶ᠋ᠢ ᠢᠳᠡᠬᠦ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠭᠠᠭᠴᠠᠬᠠᠨ ᠴᠢ ᠴᠣᠬᠣᠮ ᠶᠠᠮᠠᠷ ᠠᠷᠭᠠ ᠪᠠᠢᠬᠤ ᠪᠣᠢ᠂ ᠭᠡᠲᠡᠯᠡ ᠲᠡᠷᠡ ᠪᠦᠯᠦᠭ ᠲᠦ᠍ ᠣᠴᠢᠵᠤ ᠣᠷᠣᠳᠠᠭ ᠴᠢᠨᠢ ᠶᠠᠭᠤᠨ ᠪᠢᠯᠡ? ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠰ ᠶᠠᠭᠤ ᠡᠰᠡ ᠦᠢᠯᠡᠳᠬᠦ ᠪᠢᠯᠡ᠃ ᠲᠡᠳᠡ ᠨᠠᠮᠠ ᠶ᠋ᠢ ᠢᠳᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠴᠢᠮᠠᠶ᠋ᠢ ᠪᠠᠰᠠ ᠢᠳᠡᠨᠡ᠂ ᠪᠦᠯᠦᠭ ᠳᠣᠲᠣᠷᠠ ᠪᠠᠨ ᠨᠢᠭᠡ ᠨᠢᠭᠡ ᠪᠡᠨ ᠬᠦᠷᠲᠡᠯᠡ ᠪᠠᠷᠢᠵᠤ ᠢᠳᠡᠬᠦ ᠶᠤᠮ᠃ ᠭᠡᠲᠡᠯᠡ ᠬᠡᠷᠪᠡ ᠨᠢᠭᠡᠯᠬᠡᠨ ᠠᠯᠬᠤᠮ ᠡᠷᠭᠢᠵᠦ᠂ ᠳᠣᠣᠷᠠ ᠪᠠᠨ ᠬᠠᠯᠠᠵᠤ ᠵᠠᠰᠠᠷᠠᠬᠤ ᠶᠤᠮ ᠪᠣᠯ ᠬᠥᠮᠦᠨ ᠪᠦᠬᠦᠨ ᠠᠮᠤᠷ ᠲᠠᠢᠪᠤᠩ ᠠᠮᠢᠳᠤᠷᠠᠬᠤ ᠪᠣᠯᠤᠨᠠ᠃ ᠬᠡᠳᠦᠢᠪᠡᠷ ᠤᠤᠯ ᠠ᠋ᠴᠠ ᠡᠢᠮᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠥᠨᠥᠳᠥᠷ ᠪᠢᠳᠡ ᠣᠨᠴᠠ ᠰᠠᠢᠨ ᠪᠠᠢᠵᠤ ᠪᠣᠯᠬᠤ ᠶ᠋ᠢ ᠴᠢᠳᠠᠬᠤ ᠦᠭᠡᠢ ᠯᠡ ᠭᠡᠬᠦ ᠶᠤᠮ! ᠠᠬᠠ ᠴᠢᠮᠠᠶ᠋ᠢ ᠯᠠᠪ ᠢᠩᠭᠢᠵᠦ ᠬᠡᠯᠡᠨᠡ ᠭᠡᠵᠦ ᠪᠢ ᠢᠲᠡᠭᠡᠵᠦ ᠪᠠᠢᠨᠠ᠃ ᠤᠷᠢᠳ ᠡᠳᠦᠷ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠢᠷᠡᠵᠦ ᠲᠦᠷᠢᠶᠡᠰᠦ ᠶ᠋ᠢ ᠬᠥᠩᠭᠡᠯᠡ ᠭᠡᠰᠡᠨ ᠳ᠋ᠦ᠍ ᠴᠢ ᠴᠢᠳᠠᠬᠤ ᠦᠭᠡᠢ ᠭᠡᠰᠡᠨ ᠪᠢᠰᠢ ᠤᠤ?》
ᠲᠡᠷᠡ ᠡᠬᠢᠯᠡᠭᠡᠳ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠯᠡ ᠪᠠᠢᠭᠰᠠᠨ᠂ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠨᠢᠳᠦᠨ ᠦ᠌ ᠬᠢᠨᠢ ᠬᠠᠷᠠᠴᠠ ᠠᠢᠬᠤᠪᠲᠤᠷ ᠮᠠᠭᠤᠬᠠᠢ ᠪᠣᠯᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠳᠣᠲᠣᠭᠠᠳᠤ ᠨᠢᠭᠤᠴᠠ ᠶ᠋ᠢ ᠨᠢ ᠢᠯᠡᠷᠡᠭᠦᠯᠦᠭᠰᠡᠨ ᠡᠴᠡ ᠥᠩᠭᠡ ᠵᠢᠰᠦ ᠨᠢ ᠪᠦᠷ ᠵᠢᠪᠡᠷᠡᠵᠦ ᠬᠠᠷᠠᠯᠠᠪᠠ᠃ ᠬᠠᠭᠠᠯᠭᠠᠨ ᠤ᠋ ᠭᠠᠳᠠᠨᠠ ᠣᠯᠠᠨ ᠬᠥᠮᠦᠨ ᠢᠷᠡᠵᠦ ᠵᠣᠭᠰᠣᠭᠰᠠᠨ ᠤ᠋ ᠳᠣᠲᠣᠷᠠ᠂ ᠵᠣᠣ ᠡᠷᠬᠢᠮ ᠨᠣᠬᠠᠢ ᠲᠠᠢ ᠪᠠᠨ ᠬᠠᠮᠲᠤ ᠪᠠᠢᠯᠴᠠᠨᠠ᠃ ᠲᠡᠭᠡᠭᠡᠳ ᠱᠠᠭᠠᠢᠵᠤ ᠴᠢᠩᠨᠠᠭᠰᠠᠭᠠᠷ ᠰᠢᠬᠠᠯᠴᠠᠨ ᠣᠷᠣᠵᠤ ᠢᠷᠡᠪᠡ᠃ ᠵᠠᠷᠢᠮ ᠨᠢ ᠮᠥᠨ ᠬᠦᠢᠲᠡᠨ ᠬᠥᠬᠡ ᠴᠢᠷᠠᠢᠯᠠᠵᠤ ᠠᠮᠠ ᠳᠠᠷᠪᠠᠢᠨ ᠢᠨᠢᠶᠡᠨᠡ᠃ ᠡᠳᠡ ᠪᠣᠯ ᠴᠥᠮ ᠬᠥᠮᠦᠨ ᠢᠳᠡᠳᠡᠭ ᠨᠢᠭᠡ ᠨᠠᠮ ᠤ᠋ᠨ ᠠᠮᠢᠲᠠᠨ ᠭᠡᠵᠦ ᠪᠢ ᠮᠡᠳᠡᠪᠡ᠃ ᠭᠡᠲᠡᠯᠡ ᠲᠡᠳᠡᠨ ᠦ᠌ ᠪᠣᠳᠣᠯᠭᠠ ᠰᠠᠨᠠᠭᠠ ᠨᠢ ᠠᠩᠭᠢᠳᠠ ᠥᠭᠡᠷᠡ ᠪᠠᠢᠬᠤ ᠶ᠋ᠢ ᠪᠢ ᠪᠠᠰᠠ ᠮᠡᠳᠡᠯᠡ᠃ ᠨᠢᠭᠡ ᠪᠦᠯᠦᠭ ᠨᠢ ᠶᠡᠷᠦ ᠡᠴᠡ ᠡᠢᠮᠦ ᠯᠡ ᠪᠠᠢᠭᠰᠠᠨ᠂ ᠢᠳᠡᠬᠦ ᠯᠡ ᠶᠣᠰᠣᠲᠠᠢ ᠭᠡᠵᠦ ᠰᠠᠨᠠᠨᠠ᠃ ᠨᠥᠭᠦᠭᠡ ᠪᠦᠯᠦᠭ ᠨᠢ ᠢᠳᠡᠬᠦ ᠶᠣᠰᠣ ᠦᠭᠡᠢ ᠭᠡᠭᠴᠢ ᠶ᠋ᠢ ᠮᠡᠳᠡᠬᠦ ᠪᠣᠯᠪᠠᠴᠤ ᠮᠥᠨ ᠢᠳᠡᠬᠦ ᠶ᠋ᠢ ᠬᠦᠰᠡᠬᠦ ᠪᠥᠭᠡᠳ ᠪᠠᠰᠠ ᠪᠤᠰᠤᠳ ᠲᠤ᠌ ᠮᠡᠳᠡᠭᠳᠡᠬᠦ ᠡᠴᠡ ᠪᠡᠨ ᠠᠶᠤᠨᠠ᠃ ᠲᠡᠢᠨ ᠬᠦ᠌ ᠮᠢᠨᠦ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠨᠡᠩ ᠶᠡᠬᠡ ᠠᠭᠤᠷᠯᠠᠬᠤ ᠪᠣᠯᠪᠠᠴᠤ ᠠᠮᠠ ᠪᠠᠨ ᠠᠩᠭᠠᠢᠵᠤ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠨᠡ᠃
ᠢᠩᠭᠢᠲᠡᠯᠡ ᠠᠬᠠ ᠪᠠᠰᠠ ᠭᠡᠨᠡᠳᠲᠡ ᠬᠡᠷᠴᠡᠭᠡᠢ ᠴᠢᠷᠠᠢᠯᠠᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ:《ᠭᠠᠷᠴᠠᠭᠠ! ᠭᠠᠯᠵᠠᠭᠤ ᠠᠮᠢᠲᠠᠨ ᠤ᠋ ᠶᠠᠭᠤ ᠶ᠋ᠢ ᠨᠢ ᠦᠵᠡᠨᠡ ᠪᠣᠢ!》ᠭᠡᠵᠦ ᠵᠠᠩᠳᠤᠷᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠢ ᠲᠡᠳᠡᠨ ᠦ᠌ ᠪᠠᠰᠠ ᠨᠢᠭᠡ ᠵᠠᠯᠢᠬᠠᠢ ᠮᠡᠬᠡ ᠶ᠋ᠢ ᠣᠯᠵᠤ ᠮᠡᠳᠡᠯᠡ᠃ ᠲᠡᠳᠡ ᠬᠠᠯᠠᠵᠤ ᠵᠠᠰᠠᠷᠠᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠬᠠᠷᠢᠨ ᠨᠠᠳᠠ ᠭᠠᠯᠵᠠᠭᠤ ᠨᠡᠷᠡ ᠵᠡᠭᠦᠯᠭᠡᠬᠦ ᠪᠡᠷ ᠬᠡᠳᠦᠢᠨ ᠪᠡᠯᠡᠳᠦᠭᠰᠡᠨ ᠪᠠᠢᠵᠠᠢ᠃ ᠢᠩᠭᠢᠪᠡᠯ ᠬᠣᠵᠢᠮ ᠪᠠᠷᠢᠵᠤ ᠢᠳᠡᠭᠰᠡᠨ ᠴᠦ᠍ ᠬᠡᠷᠡᠭ ᠭᠠᠷᠬᠤ ᠦᠭᠡᠢ ᠪᠠᠰᠠ ᠲᠠᠯᠠ ᠣᠯᠵᠤ ᠮᠡᠳᠡᠬᠦ ᠶᠤᠮ᠃ ᠠᠢᠯ ᠣᠯᠠᠨ ᠢ᠋ᠶ᠋ᠠᠷ ᠨᠢᠭᠡᠨ ᠮᠠᠭᠤ ᠬᠥᠮᠦᠨ ᠪᠠᠷᠢᠵᠤ ᠢᠳᠡᠯᠡ ᠭᠡᠵᠦ ᠲᠦᠷᠢᠶᠡᠰᠦᠨ ᠲᠠᠷᠢᠶᠠᠴᠢᠨ ᠬᠡᠯᠡᠭᠰᠡᠨ ᠨᠢ ᠶᠠᠭ ᠯᠠ ᠡᠨᠡ ᠠᠷᠭᠠ ᠶᠤᠮ ᠰᠢᠦ᠃ ᠡᠨᠡ ᠪᠣᠯ ᠲᠡᠳᠡᠨ ᠦ᠌ ᠰᠤᠷᠮᠠᠭᠠᠢ ᠠᠷᠭᠠ ᠶᠤᠮ! ᠴᠧᠨ ᠯᠤᠤ ᠦ᠋ ᠪᠠᠰᠠ ᠠᠭᠤᠷᠲᠠᠢ ᠰᠢᠭᠤᠳ ᠣᠷᠣᠵᠤ ᠢᠷᠡᠪᠡ᠃ ᠮᠢᠨᠦ ᠠᠮᠠ ᠶ᠋ᠢ ᠲᠠᠭᠯᠠᠵᠤ ᠴᠢᠳᠠᠬᠤ ᠪᠣᠢ᠂ ᠪᠢ ᠵᠣᠷᠢᠭᠤᠳᠠ ᠲᠡᠳᠡᠨ ᠦ᠌ ᠵᠦᠭ:
《ᠲᠠ ᠨᠠᠷ ᠵᠠᠰᠠᠷᠠᠵᠤ ᠦᠵᠡ᠂ ᠦᠨᠡᠨ ᠰᠡᠳᠬᠢᠯ ᠡᠴᠡᠭᠡᠨ ᠵᠠᠰᠠᠷᠠᠬᠤ ᠬᠡᠷᠡᠭᠲᠡᠢ! ᠬᠣᠵᠢᠮ ᠳᠡᠯᠡᠬᠡᠢ ᠳᠡᠭᠡᠷᠡ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠪᠠᠢᠯᠭᠠᠬᠤ ᠦᠭᠡᠢ ᠭᠡᠭᠴᠢ ᠶ᠋ᠢ ᠮᠡᠳᠡᠬᠦ ᠬᠡᠷᠡᠭᠲᠡᠢ᠃
《ᠲᠠ ᠨᠠᠷ ᠵᠠᠰᠠᠷᠠᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠨᠢᠭᠡ ᠨᠢ ᠨᠢᠭᠡ ᠪᠡᠨ ᠢᠳᠡᠵᠦ ᠳᠠᠭᠤᠰᠤᠨᠠ᠂ ᠴᠢᠨᠣᠠ ᠠᠩᠴᠢᠨ ᠳ᠋ᠤ᠌ ᠠᠯᠠᠭᠳᠠᠵᠤ ᠳᠠᠭᠤᠰᠬᠤ ᠲᠠᠢ ᠠᠳᠠᠯᠢ! ᠬᠣᠷᠣᠬᠠᠢ ᠲᠠᠢ ᠠᠳᠠᠯᠢ᠂ ᠵᠢᠩᠬᠢᠨᠢ ᠬᠥᠮᠦᠨ ᠳ᠋ᠦ᠍ ᠤᠰᠠᠳᠬᠠᠭᠳᠠᠨᠠ!》 ᠭᠡᠪᠡ᠃
ᠲᠡᠳᠡ ᠴᠥᠮ ᠴᠧᠨ ᠯᠤᠤ ᠦ᠋ ᠳ᠋ᠦ᠍ ᠬᠥᠭᠡᠭᠡᠭᠳᠡᠵᠦ ᠶᠠᠪᠤᠪᠠ᠃ ᠠᠬᠠ ᠴᠤ᠌ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃ ᠴᠧᠨ ᠯᠤᠤ ᠦ᠋ ᠨᠠᠮᠠ ᠶ᠋ᠢ ᠭᠡᠷ ᠲᠦ᠍ ᠱᠠᠯᠠᠵᠤ ᠣᠷᠣᠭᠤᠯᠪᠠ᠃ ᠭᠡᠷ ᠳᠣᠲᠣᠷᠠ ᠫᠠᠳ ᠬᠠᠷᠠᠩᠭᠤᠢ᠂ ᠪᠠᠢᠰᠢᠩ ᠤ᠋ᠨ ᠨᠢᠷᠤᠭᠤ ᠪᠠ ᠣᠨᠢ ᠴᠥᠮ ᠲᠣᠯᠣᠭᠠᠢ ᠳᠡᠭᠡᠷᠡ ᠴᠡᠴᠡᠷᠡᠨᠡ᠃ ᠲᠦᠷ ᠴᠡᠴᠡᠷᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠦᠳᠦᠭᠦᠷᠡᠭᠰᠡᠭᠡᠷ ᠮᠢᠨᠦ ᠳᠡᠭᠡᠷᠡ ᠢᠷᠡᠵᠦ ᠣᠪᠣᠭᠠᠷᠠᠪᠠ᠃ ᠪᠡᠶᠡ ᠬᠥᠳᠡᠯᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠠᠰᠤᠷᠤ ᠬᠦᠨᠳᠦ ᠪᠠᠢᠪᠠ᠃ ᠨᠠᠮᠠ ᠶ᠋ᠢ ᠳᠠᠷᠤᠵᠤ ᠠᠯᠠᠬᠤ ᠭᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠡᠨᠡ ᠬᠦᠨᠳᠦ ᠨᠢ ᠬᠤᠳᠠᠯ ᠭᠡᠵᠦ ᠪᠢ ᠮᠡᠳᠡᠭᠡᠳ ᠲᠡᠯᠴᠢᠯᠡᠭᠰᠡᠭᠡᠷ ᠭᠠᠷᠴᠤ ᠢᠷᠡᠪᠡ᠃ ᠪᠡᠶᠡ ᠳᠦᠭᠦᠷᠡᠩ ᠬᠥᠯᠥᠰᠥ ᠭᠠᠷᠴᠠᠢ᠃ ᠭᠡᠪᠡᠴᠦ ᠪᠢ ᠵᠣᠷᠢᠭᠤᠳᠠ:《ᠲᠠ ᠨᠠᠷ ᠲᠦᠷᠭᠡᠬᠡᠨ ᠵᠠᠰᠠᠷᠠᠵᠤ ᠦᠵᠡ᠂ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠵᠠᠰᠠᠷᠠᠬᠤ ᠬᠡᠷᠡᠭᠲᠡᠢ! ᠬᠣᠵᠢᠮ ᠳᠡᠯᠡᠬᠡᠢ ᠳᠡᠭᠡᠷᠡ ᠬᠥᠮᠦᠨ ᠢᠳᠡᠳᠡᠭ ᠬᠥᠮᠦᠨ ᠪᠠᠢᠯᠭᠠᠬᠤ ᠦᠭᠡᠢ ᠭᠡᠭᠴᠢ ᠶ᠋ᠢ ᠮᠡᠳᠡᠬᠦ ᠬᠡᠷᠡᠭᠲᠡᠢ ᠁》 ᠭᠡᠪᠡ᠃
ᠠᠷᠪᠠᠨ ᠨᠢᠭᠡ
ᠨᠠᠷᠠ ᠴᠦ᠍ ᠭᠠᠷᠬᠤ ᠦᠭᠡᠢ᠂ ᠡᠭᠦᠳᠡ ᠴᠦ᠍ ᠨᠡᠭᠡᠭᠡᠭᠳᠡᠬᠦ ᠦᠭᠡᠢ᠂ ᠡᠳᠦᠷ ᠲᠣᠷ ᠬᠣᠶᠠᠷ ᠴᠠᠭ ᠤ᠋ᠨ ᠬᠣᠭᠣᠯᠠ᠃
ᠪᠢ ᠰᠠᠪᠬᠠ ᠪᠠᠷᠢᠮᠠᠭᠴᠠ ᠠᠬᠠ ᠪᠠᠨ ᠰᠠᠨᠠᠪᠠ᠃ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠮᠢᠨᠢ ᠦᠬᠦᠭᠰᠡᠨ ᠰᠢᠯᠲᠠᠭᠠᠨ ᠮᠥᠨ ᠴᠦ᠍ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠠ ᠭᠡᠭᠴᠢ ᠶ᠋ᠢ ᠪᠢ ᠮᠡᠳᠡᠨᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠥᠬᠢᠨ ᠳᠡᠭᠦᠦ ᠮᠢᠨᠢ ᠲᠠᠪᠤᠬᠠᠨ ᠨᠠᠰᠤᠲᠠᠢ ᠪᠠᠢᠵᠤ ᠪᠢᠯᠡ᠂ ᠬᠣᠩᠭᠣᠷ ᠬᠥᠭᠡᠷᠦᠬᠦᠨ ᠪᠠᠢᠳᠠᠯ ᠨᠢ ᠣᠳᠣ ᠴᠤ᠌ ᠨᠢᠳᠦᠨ ᠳ᠋ᠦ᠍ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠠᠭᠳᠠᠭᠰᠠᠭᠠᠷ᠃ ᠡᠵᠢ ᠮᠢᠨᠢ ᠤᠬᠢᠯᠠᠭᠠᠳ ᠪᠣᠯᠬᠤ ᠦᠭᠡᠢ ᠪᠠᠢᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠠᠬᠠ ᠬᠠᠷᠢᠨ ᠡᠵᠢ ᠶ᠋ᠢᠨ ᠤᠬᠢᠯᠠᠬᠤ ᠶ᠋ᠢ ᠬᠣᠷᠢᠨᠠ᠃ ᠥᠪᠡᠷ ᠢ᠋ᠶ᠋ᠡᠨ ᠪᠠᠷᠢᠭᠠᠳ ᠢᠳᠡᠴᠢᠬᠡᠭᠰᠡᠨ ᠲᠤᠯᠠ ᠤᠬᠢᠯᠠᠬᠤᠯᠠᠷ ᠳᠣᠲᠣᠷᠠ ᠨᠢ ᠡᠪ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ᠂ ᠬᠡᠷᠪᠡ ᠪᠠᠰᠠ ᠡᠪ ᠦᠭᠡᠢᠳᠡᠳᠡᠭ ᠪᠠᠢᠭᠰᠠᠨ ᠪᠣᠯ ᠁
ᠥᠬᠢᠨ ᠳᠡᠭᠦᠦ ᠮᠢᠨᠢ ᠠᠬᠠ ᠳ᠋ᠤ᠌ ᠢᠳᠡᠭᠳᠡᠵᠡᠢ᠃ ᠡᠵᠢ ᠮᠡᠳᠡᠭᠰᠡᠨ ᠡᠰᠡᠬᠦ ᠶ᠋ᠢ ᠪᠢ ᠬᠠᠷᠢᠨ ᠮᠡᠳᠡᠬᠦ ᠦᠭᠡᠢ᠃ ᠪᠣᠳᠣᠪᠠᠯ ᠡᠵᠢ ᠪᠠᠰᠠ ᠮᠡᠳᠡᠬᠦ ᠪᠠᠢᠯᠭᠦᠢ᠂ ᠭᠡᠪᠡᠴᠦ ᠤᠬᠢᠯᠠᠵᠤ ᠭᠠᠰᠠᠯᠬᠤ ᠳ᠋ᠠᠭᠠᠨ ᠶᠠᠭᠤᠮᠠ ᠶᠠᠷᠢᠬᠤ ᠦᠭᠡᠢ ᠪᠠᠢᠭᠰᠠᠨ ᠠ᠋ᠴᠠ ᠦᠵᠡᠪᠡᠯ ᠪᠠᠰᠠ ᠵᠦᠢᠲᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠃ ᠨᠠᠮᠠ ᠶ᠋ᠢ ᠳᠥᠷᠪᠡ ᠲᠠᠪᠤᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠪᠢᠯᠡ᠂ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡ ᠰᠡᠷᠢᠭᠦᠴᠡᠨ ᠰᠠᠭᠤᠲᠠᠯᠠ ᠮᠠᠨ ᠤ᠋ ᠠᠬᠠ᠂ ᠡᠴᠢᠭᠡ ᠡᠬᠡ ᠨᠢ ᠡᠪᠡᠳᠪᠡᠯ ᠬᠡᠦᠬᠡᠳ ᠨᠢ ᠮᠢᠬᠠᠨ ᠠ᠋ᠴᠠ ᠪᠠᠨ ᠨᠢᠭᠡ ᠵᠦᠰᠦᠮ ᠣᠭᠲᠣᠯᠵᠤ ᠠᠪᠤᠭᠠᠳ ᠴᠢᠨᠠᠵᠤ ᠢᠳᠡᠭᠦᠯᠬᠦ ᠶᠣᠰᠣᠲᠠᠢ᠂ ᠢᠩᠭᠢᠪᠡᠯ ᠰᠠᠶᠢ ᠰᠠᠢᠨ ᠬᠥᠮᠦᠨ ᠶᠤᠮ ᠭᠡᠵᠡᠢ᠃ ᠡᠵᠢ ᠪᠠᠰᠠ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠦᠭᠡᠢ ᠶᠤᠮ᠃ ᠨᠢᠭᠡ ᠵᠦᠰᠦᠮ ᠢᠳᠡᠵᠦ ᠪᠣᠯᠪᠠᠯ ᠪᠦᠬᠦᠯᠢ ᠪᠡᠷ ᠨᠢ ᠢᠳᠡᠵᠦ ᠪᠣᠯᠬᠤ ᠨᠢ ᠪᠠᠰᠠ ᠶᠠᠷᠢᠶᠠᠨ ᠦᠭᠡᠢ᠃ ᠭᠡᠪᠡᠴᠦ ᠲᠡᠷᠡ ᠡᠳᠦᠷ ᠦ᠋ᠨ ᠤᠬᠢᠯᠠᠬᠤ ᠶᠠᠩᠵᠤ ᠶ᠋ᠢ ᠨᠢ ᠪᠣᠳᠣᠪᠠᠯ ᠦᠨᠡᠬᠡᠷ ᠴᠦ᠍ ᠡᠯᠢᠭᠡ ᠡᠮᠲᠡᠷᠡᠮᠡᠷ᠂ ᠡᠨᠡ ᠦᠨᠡᠬᠡᠷ ᠲᠤᠢᠯ ᠤ᠋ᠨ ᠵᠢᠭᠲᠡᠢ ᠬᠡᠷᠡᠭ ᠠ᠋!
ᠠᠷᠪᠠᠨ ᠬᠣᠶᠠᠷ
ᠴᠠᠰᠢ ᠪᠣᠳᠣᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠵᠠᠢ᠃
ᠳᠥᠷᠪᠡᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠦᠶᠡ ᠤᠯᠠᠷᠢᠨ ᠢᠷᠡᠭᠰᠡᠨ ᠭᠠᠵᠠᠷ᠂ ᠪᠢ ᠴᠦ᠍ ᠮᠥᠨ ᠣᠯᠠᠨ ᠵᠢᠯ ᠳᠤᠮᠳᠠ ᠨᠢ ᠬᠤᠳᠬᠤᠯᠳᠤᠭᠰᠠᠭᠠᠷ ᠢᠷᠡᠯᠡ ᠭᠡᠭᠴᠢ ᠪᠡᠨ ᠥᠨᠥᠳᠥᠷ ᠣᠯᠵᠤ ᠮᠡᠳᠡᠯᠡ᠃ ᠶᠠᠭ ᠠᠬᠠ ᠶ᠋ᠢ ᠭᠡᠷ ᠦ᠋ᠨ ᠬᠡᠷᠡᠭ ᠡᠷᠬᠢᠯᠡᠵᠦ ᠪᠠᠢᠭᠰᠠᠨ ᠲᠡᠷᠡ ᠦᠶᠡ ᠳ᠋ᠦ᠍ ᠳᠡᠭᠦᠦ ᠮᠢᠨᠢ ᠦᠬᠦᠭᠰᠡᠨ ᠲᠤᠯᠠ ᠪᠤᠳᠠᠭᠠ ᠨᠣᠭᠣᠭᠠᠨ ᠳ᠋ᠤ᠌ ᠬᠣᠯᠢᠭᠳᠠᠵᠤ ᠪᠢᠳᠡᠨ ᠳ᠋ᠦ᠍ ᠮᠡᠳᠡᠭᠳᠡᠯ ᠦᠭᠡᠢ ᠪᠡᠷ ᠢᠳᠡᠭᠳᠡᠭᠰᠡᠨ ᠦᠭᠡᠢ ᠭᠡᠵᠦ ᠶᠠᠭᠠᠬᠢᠵᠤ ᠬᠡᠯᠡᠵᠦ ᠮᠡᠳᠡᠬᠦ ᠪᠣᠢ᠃ ᠪᠢ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠮᠢᠬᠠ ᠶ᠋ᠢ ᠰᠠᠨᠠᠮᠰᠠᠷ ᠦᠭᠡᠢ ᠪᠡᠷ ᠬᠡᠳᠦᠨ ᠬᠡᠰᠡᠭ ᠢᠳᠡᠭᠰᠡᠨ ᠦᠭᠡᠢ ᠭᠡᠵᠦ ᠶᠠᠭᠠᠬᠢᠵᠤ ᠬᠡᠯᠡᠵᠦ ᠮᠡᠳᠡᠬᠦ ᠪᠣᠢ᠃ ᠣᠳᠣ ᠬᠠᠷᠢᠨ ᠮᠢᠨᠦ ᠳᠡᠭᠡᠷᠡ ᠬᠦᠷᠦᠭᠡᠳ ᠢᠷᠡᠯᠡ ᠁ ᠳᠥᠷᠪᠡᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠬᠥᠮᠦᠨ ᠢᠳᠡᠭᠰᠡᠨ ᠲᠡᠦᠬᠡ ᠲᠡᠢ ᠪᠢ᠂ ᠵᠢᠩᠬᠢᠨᠢ ᠬᠥᠮᠦᠨ ᠮᠥᠨ ᠭᠡᠬᠦ ᠳ᠋ᠦ᠍ ᠪᠡᠷᠬᠡ ᠭᠡᠭᠴᠢ ᠪᠡᠨ ᠲᠡᠷᠡ ᠦᠶᠡ ᠳ᠋ᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠴᠤ᠌ ᠣᠳᠣ ᠮᠡᠳᠡᠯᠡ!
ᠠᠷᠪᠠᠨ ᠭᠤᠷᠪᠠ
ᠬᠥᠮᠦᠨ ᠢ᠋ ᠢᠳᠡᠭᠡᠳᠦᠢ ᠬᠡᠦᠬᠡᠳ ᠪᠠᠰᠠ ᠪᠠᠢᠬᠤ ᠶᠤᠮ ᠤᠤ? ᠬᠡᠦᠬᠡᠳ ᠢ᠋ ᠠᠪᠤᠷᠠᠬᠤ ᠰᠠᠨ ᠁
1918 ᠣᠨ ᠤ᠋ ᠳᠥᠷᠪᠡᠳᠦᠭᠡᠷ ᠰᠠᠷᠠ
ᠦᠰᠦᠭ ᠬᠥᠷᠪᠡᠭᠦᠯᠦᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ 2025.7.19