ᠪᠠᠶᠠᠨ ᠢᠪᠡᠭᠡᠯᠲᠦ ᠪᠠᠯᠴᠢᠷᠤᠳ ᠰᠦᠮᠡ -ᠳᠥᠷᠪᠡᠳ ᠡᠷᠳᠡᠨᠢᠪᠠᠶᠠᠷ Баян ивээлт балчрут сүм-Дөрвөд Эрдэнэбаяр
505
ᠪᠠᠶᠠᠨ ᠢᠪᠡᠭᠡᠯᠲᠦ ᠪᠠᠯᠴᠢᠷᠤᠳ ᠰᠦᠮᠡ
ᠳᠥᠷᠪᠡᠳ ᠡᠷᠳᠡᠨᠢᠪᠠᠶᠠᠷ
ᠥᠯᠵᠡᠢ ᠮᠥᠷᠡᠨ ᠷᠠᠰᠢᠶᠠᠨ ᠬᠠᠳᠠᠭ ᠢ᠋ᠶ᠋ᠠᠨ ᠰᠦᠮᠡ ᠳ᠋ᠦ᠍ ᠡᠷᠭᠦᠬᠦᠢ
ᠥᠨᠳᠥᠷ ᠭᠠᠵᠠᠷ ᠡᠷᠬᠢᠮ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠭᠡᠭᠡᠨ ᠳ᠋ᠦ᠍ ᠡᠷᠭᠦᠬᠦᠢ
ᠪᠠᠶᠠᠨ ᠡᠷᠬᠢᠮ ᠬᠤᠷᠠᠨ ᠴᠤᠭᠯᠠᠷᠠᠭᠰᠠᠨ ᠪᠠᠯᠴᠢᠷᠤᠳ ᠰᠦᠮᠡ
ᠪᠠᠳᠠᠭ ᠲᠠᠷᠨᠢ ᠮᠥᠩᠬᠡ ᠭᠡᠷᠡᠯᠲᠦᠭᠰᠡᠨ ᠪᠠᠯᠴᠢᠷᠤᠳ ᠰᠦᠮᠡ
ᠮᠠᠭᠤ ᠰᠡᠳᠬᠢᠯ ᠢ᠋ ᠳᠠᠷᠤᠨ ᠰᠠᠢᠨ ᠢ᠋ ᠡᠷᠳᠡᠨᠢ ᠪᠣᠯᠭᠠᠭᠴᠢ ᠰᠦᠮᠡ
ᠮᠠᠭᠤ ᠬᠡᠯᠡ ᠶ᠋ᠢ ᠳᠠᠷᠤᠨ ᠰᠠᠢᠨ ᠢ᠋ ᠡᠷᠳᠡᠨᠢ ᠪᠣᠯᠭᠠᠭᠴᠢ ᠰᠦᠮᠡ
ᠮᠠᠭᠤ ᠪᠡᠶᠡ ᠶ᠋ᠢ ᠳᠠᠷᠤᠨ ᠰᠠᠢᠨ ᠢ᠋ ᠡᠷᠳᠡᠨᠢ ᠪᠣᠯᠭᠠᠭᠴᠢ ᠰᠦᠮᠡ
ᠮᠠᠭᠤ ᠪᠦᠬᠦᠨ ᠢ᠋ ᠳᠠᠷᠤᠨ ᠰᠠᠢᠨ ᠢ᠋ ᠡᠷᠳᠡᠨᠢ ᠪᠣᠯᠭᠠᠭᠴᠢ ᠰᠦᠮᠡ
ᠰᠠᠢᠨ ᠴᠠᠭ ᠤ᠋ᠨ ᠤᠭᠲᠤᠯ ᠤᠩᠰᠢᠯᠭᠠ ᠨᠣᠮ ᠠ᠋ᠴᠠ ᠰᠣᠨᠣᠰᠳᠠᠭᠠᠳ
ᠰᠠᠢᠨ ᠴᠠᠭ ᠤ᠋ᠨ ᠰᠤᠷᠠᠭ ᠯᠠᠮᠠ ᠶ᠋ᠢᠨ ᠦᠢᠯᠡ ᠡᠴᠡ ᠮᠡᠳᠡᠭᠳᠡᠭᠡᠳ
ᠰᠠᠢᠨ ᠴᠠᠭ ᠤ᠋ᠨ ᠠᠨᠢᠷ ᠪᠤᠷᠬᠠᠨ ᠲᠠᠬᠢᠯ ᠠ᠋ᠴᠠ ᠬᠠᠷᠠᠭᠳᠠᠭᠠᠳ
ᠰᠠᠢᠨ ᠴᠠᠭ ᠤ᠋ᠨ ᠥᠯᠵᠡᠢ ᠪᠡᠯᠭᠡ ᠰᠠᠢᠲᠤᠷ ᠪᠠᠲᠤ ᠣᠷᠣᠰᠢᠭᠠᠳ
ᠡᠷᠲᠡᠨ ᠦ᠌ ᠨᠣᠮ ᠤ᠋ᠨ ᠳᠠᠭᠤᠨ ᠬᠥᠬᠡ ᠲᠣᠭᠣᠰᠬᠠᠨ ᠠ᠋ᠴᠠ ᠠᠨᠢᠷᠲᠤᠭᠠᠳ
ᠡᠳᠦᠭᠡ ᠶ᠋ᠢᠨ ᠨᠣᠮ ᠤ᠋ᠨ ᠳᠠᠭᠤᠨ ᠲᠠᠢ ᠳᠤᠭᠠᠩ ᠳᠦᠭᠦᠷᠡᠩ ᠨᠡᠢᠯᠡᠭᠡᠳ
ᠦᠨᠡᠨ ᠰᠠᠢᠨ ᠨᠣᠮ ᠮᠥᠩᠬᠡ ᠪᠠᠢᠳᠠᠭ ᠢ᠋ ᠪᠠᠲᠤᠯᠠᠭᠠᠳ
ᠥᠯᠵᠡᠢ ᠪᠠᠲᠤ ᠣᠷᠣᠰᠢᠬᠤ ᠢᠷᠦᠭᠡᠯ ᠲᠠᠩᠭᠠᠷᠢᠭ ᠲᠠᠯᠪᠢᠭᠠᠳ
ᠪᠠᠷᠢᠭᠰᠠᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠪᠡᠶᠡ ᠶ᠋ᠢᠨ ᠬᠠᠷᠠᠩᠭᠤᠢ ᠶ᠋ᠢ ᠠᠷᠢᠯᠭᠠᠨ
ᠪᠠᠷᠢᠭᠰᠠᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠬᠡᠯᠡ ᠶ᠋ᠢᠨ ᠬᠠᠷᠠᠩᠭᠤᠢ ᠶ᠋ᠢ ᠠᠷᠢᠯᠭᠠᠨ
ᠪᠠᠷᠢᠭᠰᠠᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠰᠡᠳᠬᠢᠯ ᠦ᠋ᠨ ᠬᠠᠷᠠᠩᠭᠤᠢ ᠶ᠋ᠢ ᠠᠷᠢᠯᠭᠠᠨ
ᠪᠠᠷᠢᠭᠰᠠᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠪᠢᠳᠡᠨ ᠦ᠌ ᠬᠠᠷᠠᠩᠭᠤᠢ ᠶ᠋ᠢ ᠠᠷᠢᠯᠭᠠᠨ
ᠴᠠᠭᠠᠨ ᠯᠠᠪᠠᠢ ᠶ᠋ᠢᠨ ᠡᠭᠡᠰᠢᠭ ᠴᠠᠭ ᠤ᠋ᠨ ᠪᠤᠷᠬᠠᠳ ᠢ᠋ ᠳᠠᠭᠤᠳᠠᠭᠠᠳ
ᠴᠠᠭᠠᠨ ᠯᠠᠪᠠᠢ ᠶ᠋ᠢᠨ ᠡᠭᠡᠰᠢᠭ ᠴᠠᠭ ᠤ᠋ᠨ ᠬᠣᠣᠷ ᠢ᠋ ᠲᠠᠢᠯᠤᠭᠠᠳ
ᠴᠠᠭᠠᠨ ᠯᠠᠪᠠᠢ ᠶ᠋ᠢᠨ ᠡᠭᠡᠰᠢᠭ ᠴᠠᠭ ᠤ᠋ᠨ ᠬᠦᠷᠳᠦ ᠶ᠋ᠢ ᠬᠥᠭᠯᠡᠭᠡᠳ
ᠴᠠᠭᠠᠨ ᠯᠠᠪᠠᠢ ᠶ᠋ᠢᠨ ᠡᠭᠡᠰᠢᠭ ᠴᠠᠭ ᠤ᠋ᠨ ᠰᠠᠢᠨ ᠢ᠋ ᠳᠠᠭᠤᠳᠠᠭᠠᠳ
ᠴᠢᠩ ᠰᠦᠵᠢᠭ ᠪᠠᠢᠪᠠᠯ ᠪᠤᠷᠬᠠᠨ ᠥᠪᠡᠷᠲᠡᠭᠡᠨ ᠠᠮᠢᠯᠠᠬᠤᠢ
ᠴᠢᠩ ᠰᠦᠵᠢᠭ ᠪᠠᠢᠪᠠᠯ ᠨᠣᠮ ᠥᠪᠡᠷᠲᠡᠭᠡᠨ ᠠᠮᠢᠯᠠᠬᠤᠢ
ᠴᠢᠩ ᠰᠦᠵᠢᠭ ᠪᠠᠢᠪᠠᠯ ᠯᠠᠮᠠ ᠥᠪᠡᠷᠲᠡᠭᠡᠨ ᠠᠮᠢᠯᠠᠬᠤᠢ
ᠴᠢᠩ ᠰᠦᠵᠢᠭ ᠪᠠᠢᠪᠠᠯ ᠰᠡᠳᠬᠢᠯ ᠥᠪᠡᠷᠲᠡᠭᠡᠨ ᠠᠮᠢᠯᠠᠬᠤᠢ
ᠰᠦᠮᠡ ᠶ᠋ᠢᠨ ᠭᠡᠷᠡᠯ ᠨᠢᠭᠡᠨ ᠰᠡᠳᠬᠢᠯ ᠢ᠋ ᠬᠡᠷᠡᠯᠳᠦᠭᠦᠯᠬᠦᠢ
ᠰᠦᠮᠡ ᠶ᠋ᠢᠨ ᠭᠡᠷᠡᠯ ᠬᠣᠶᠠᠷ ᠦᠨᠡᠨ ᠢ᠋ ᠭᠡᠷᠡᠯᠲᠦᠭᠦᠯᠬᠦᠢ
ᠰᠦᠮᠡ ᠶ᠋ᠢᠨ ᠭᠡᠷᠡᠯ ᠭᠤᠷᠪᠠᠨ ᠡᠷᠳᠡᠨᠢ ᠶ᠋ᠢ ᠬᠡᠷᠡᠯᠳᠦᠭᠦᠯᠬᠦᠢ
ᠰᠦᠮᠡ ᠶ᠋ᠢᠨ ᠭᠡᠷᠡᠯ ᠳᠥᠷᠪᠡᠨ ᠳᠠᠯᠠᠢ ᠶ᠋ᠢ ᠬᠡᠷᠡᠯᠳᠦᠭᠦᠯᠬᠦᠢ
ᠬᠥᠬᠥᠭᠡ ᠰᠢᠪᠠᠭᠤ ᠴᠠᠭ ᠢ᠋ ᠤᠭᠲᠤᠨ ᠤᠶᠠᠩᠭᠠᠯᠠᠭᠠᠳ
ᠬᠥᠬᠡᠷᠡᠬᠦ ᠠᠯᠤᠰ ᠲᠤ᠌ ᠠᠮᠤᠷ ᠠᠮᠤᠭᠤᠯᠠᠩ ᠪᠠᠯᠴᠢᠷᠤᠳ ᠰᠦᠮᠡ
ᠬᠦᠵᠢ ᠶ᠋ᠢᠨ ᠤᠲᠤᠭᠠ ᠴᠠᠭ ᠢ᠋ ᠠᠷᠢᠭᠤᠯᠠᠨ ᠤᠩᠭᠤᠰᠤᠭᠠᠳ
ᠬᠥᠬᠡ ᠮᠣᠩᠭᠣᠯ ᠠᠮᠤᠷ ᠠᠮᠤᠭᠤᠯᠠᠩ ᠪᠠᠯᠴᠢᠷᠤᠳ ᠰᠦᠮᠡ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠨᠣᠮ ᠬᠦᠷᠭᠡᠬᠦ ᠴᠠᠮ ᠪᠥᠵᠢᠭ ᠨᠢ ᠠᠯᠳᠠᠷᠲᠠᠢ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠨᠣᠮ ᠬᠦᠷᠭᠡᠬᠦ ᠲᠠᠬᠢᠯ ᠵᠤᠯᠠ ᠨᠢ ᠪᠢᠰᠢᠷᠡᠯᠲᠡᠢ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠨᠣᠮ ᠬᠦᠷᠭᠡᠬᠦ ᠡᠷᠭᠦᠯ ᠮᠥᠷᠭᠥᠯ ᠨᠢ ᠪᠠᠬᠠᠳᠤᠯᠲᠠᠢ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠨᠣᠮ ᠬᠦᠷᠭᠡᠬᠦ ᠪᠤᠷᠬᠠᠨ ᠰᠦᠮᠡ ᠨᠢ ᠵᠢᠪᠬᠤᠭᠠᠲᠠᠢ
ᠪᠠᠶᠠᠨ ᠲᠠᠩᠰᠤᠭ ᠵᠢᠷᠭᠠᠶᠠ ᠭᠡᠪᠡᠯ ᠪᠣᠳᠢ ᠰᠡᠳᠬᠢᠯ ᠢ᠋ ᠣᠯᠤᠭᠠᠷᠠᠢ
ᠪᠠᠭᠠᠲᠤᠷ ᠵᠠᠩᠵᠤᠨ ᠪᠣᠯᠤᠶᠠ ᠭᠡᠪᠡᠯ ᠪᠣᠳᠢ ᠰᠡᠳᠬᠢᠯ ᠢ᠋ ᠣᠯᠤᠭᠠᠷᠠᠢ
ᠪᠠᠯᠠᠮᠠᠳ ᠪᠦᠬᠦᠨ ᠢ᠋ ᠳᠠᠷᠤᠶᠠ ᠭᠡᠪᠡᠯ ᠪᠣᠳᠢ ᠰᠡᠳᠬᠢᠯ ᠢ᠋ ᠣᠯᠤᠭᠠᠷᠠᠢ
ᠪᠤᠷᠬᠠᠨ ᠤ᠋ ᠬᠤᠲᠤᠭ ᠢ᠋ ᠣᠯᠤᠶᠠ ᠭᠡᠪᠡᠯ ᠪᠣᠳᠢ ᠰᠡᠳᠬᠢᠯ ᠢ᠋ ᠣᠯᠤᠭᠠᠷᠠᠢ
ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠤᠷᠠᠨ ᠢ᠋ ᠳᠠᠷᠤᠪᠠᠯ ᠴᠢᠳᠬᠥᠷ ᠢ᠋ ᠳᠠᠷᠤᠭᠰᠠᠨ ᠬᠡᠷᠡᠭ
ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠮᠤᠩᠬᠠᠭ ᠢ᠋ ᠳᠠᠷᠤᠪᠠᠯ ᠴᠢᠳᠬᠥᠷ ᠢ᠋ ᠳᠠᠷᠤᠭᠰᠠᠨ ᠶᠠᠪᠤᠳᠠᠯ
ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠲᠠᠴᠢᠶᠠᠩᠭᠤᠢ ᠶ᠋ᠢ ᠳᠠᠷᠤᠪᠠᠯ ᠴᠢᠳᠬᠥᠷ ᠢ᠋ ᠳᠠᠷᠤᠭᠰᠠᠨ ᠤᠴᠢᠷ
ᠥᠪᠡᠷ ᠦ᠋ᠨ ᠰᠡᠳᠬᠢᠯ ᠦ᠋ᠨ ᠳᠠᠢᠰᠤᠨ ᠢ᠋ ᠳᠠᠷᠤᠪᠠᠯ ᠴᠢᠳᠬᠥᠷ ᠢ᠋ ᠳᠠᠷᠤᠭᠰᠠᠨ ᠢᠯᠠᠯᠲᠠ
ᠪᠠᠷᠴᠢᠳ ᠢ᠋ ᠳᠠᠷᠤᠭᠴᠢ ᠪᠠᠯᠴᠢᠷᠤᠳ ᠰᠦᠮᠡ ᠡᠴᠡ ᠰᠢᠷᠠ ᠭᠡᠷᠡᠯ ᠮᠠᠨᠳᠤᠬᠤᠢ
ᠪᠠᠶᠠᠨ ᠢ᠋ ᠢᠪᠡᠭᠡᠭᠴᠢ ᠪᠠᠯᠴᠢᠷᠤᠳ ᠰᠦᠮᠡ ᠡᠴᠡ ᠰᠢᠷᠠ ᠭᠡᠷᠡᠯ ᠬᠡᠷᠡᠯᠳᠦᠬᠦᠢ
ᠪᠤᠶᠠᠨ ᠢ᠋ ᠲᠦᠭᠡᠭᠡᠭᠴᠢ ᠪᠠᠯᠴᠢᠷᠤᠳ ᠰᠦᠮᠡ ᠡᠴᠡ ᠰᠢᠷᠠ ᠭᠡᠷᠡᠯ ᠰᠠᠴᠤᠷᠠᠬᠤᠢ
ᠪᠤᠷᠬᠠᠨ ᠤ᠋ ᠣᠷᠣᠨ ᠪᠠᠯᠴᠢᠷᠤᠳ ᠰᠦᠮᠡ ᠡᠴᠡ ᠰᠢᠷᠠ ᠭᠡᠷᠡᠯ ᠢᠪᠡᠭᠡᠬᠦᠢ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ