ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠊᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠳᠦᠷᠪᠡ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 4
173ᠰᠠᠨᠠᠭᠠ ᠦᠭᠡᠢ ᠶᠠᠭᠤᠮᠠ ᠪᠠᠨ ᠰᠠᠨᠠᠪᠠ
— ᠲᠠ ᠨᠠᠷ ᠭᠠᠮᠢᠩ ᠤ᠋ᠳ ᠪᠠᠢᠵᠤ ᠶᠠᠭᠤᠨ ᠳ᠋ᠤ᠌ ᠦᠬᠦᠭᠰᠡᠨ ᠦᠭᠡᠢ ᠪᠣᠢ? ᠭᠡᠪᠡ᠃ ᠡᠨᠡ ᠳᠠᠷᠤᠢ ᠨᠥᠭᠥᠭᠡᠳᠦᠭᠦᠯᠡ ᠨᠢ᠄
— ᠲᠡᠭᠡᠪᠡᠯ ᠪᠢᠳᠡ ᠭᠠᠮᠢᠩ ᠪᠣᠯᠬᠤ ᠦᠭᠡᠢ! ᠭᠡᠵᠦ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠱᠤᠤᠭᠢᠯᠳᠤᠪᠠ᠃ ᠢᠩᠭᠢᠭᠡᠳ ᠡᠴᠦᠰ ᠲᠦ᠋ᠨᠢ ᠭᠠᠮᠢᠩ ᠪᠣᠯᠬᠤ ᠬᠡᠦᠬᠡᠳ ᠣᠯᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠪᠠᠶᠠᠷᠯᠠᠬᠤ ᠮᠡᠲᠦ ᠪᠣᠯᠤᠨ᠄
— ᠵᠥᠪ! ᠲᠠ ᠨᠠᠷ ᠤ᠋ᠨ ᠦᠶᠡ ᠳ᠋ᠦ᠍ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠭᠠᠮᠢᠩ ᠤ᠋ᠳ ᠪᠠᠢᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠪᠡ᠃ ᠬᠡᠦᠬᠡᠳ ᠴᠥᠮ ᠪᠠᠯᠳᠠᠨᠴᠡᠷᠢᠭ ᠢ᠋ ᠭᠠᠢᠬᠠᠨ ᠬᠠᠷᠠᠪᠠ᠃ ᠭᠣᠶᠣ ᠰᠠᠢᠬᠠᠨ ᠬᠤᠪᠴᠠᠰᠤ ᠲᠠᠢ ᠬᠥᠮᠦᠨ ᠢ᠋ ᠭᠡᠨᠡᠳᠲᠡ ᠬᠠᠷᠠᠭᠰᠠᠨ ᠳ᠋ᠠᠭᠠᠨ ᠲᠡᠳᠡᠨ ᠠᠶᠤᠨ ᠰᠦᠷᠳᠡᠬᠦ ᠠᠵᠢ᠃ ᠭᠡᠪᠡᠴᠦ ᠨᠢᠭᠡ ᠨᠢ᠄
— ᠭᠠᠮᠢᠩ ᠬᠠᠮᠢᠭᠠ ᠣᠴᠢᠬᠤ ᠪᠣᠢ? ᠭᠡᠵᠦ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ ᠠᠰᠠᠭᠤᠪᠠ᠃
— ᠤᠰᠠᠳᠬᠠᠭᠳᠠᠨᠠ! ᠡᠳᠡ ᠨᠠᠷ ᠢ᠋ ᠴᠢᠨᠢ ᠪᠢᠳᠡ ᠲᠠ ᠨᠠᠷ ᠠ᠋ᠴᠠ ᠲᠦᠷᠦᠭᠦᠯᠡᠭᠡᠳ ᠦᠭᠡᠢ ᠬᠢᠴᠢᠬᠡᠬᠦ ᠪᠠᠢᠯᠭᠦᠢ ᠳᠡ ᠭᠡᠬᠦ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠭ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠳᠤᠮᠳᠠᠭᠤᠷ ᠣᠷᠣᠨ ᠴᠠᠭᠠᠰᠢ ᠶᠠᠪᠤᠯᠠ᠃ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠬᠡᠦᠬᠡᠳ ᠦ᠋ᠳ ᠬᠣᠢᠨᠠ ᠠ᠋ᠴᠠ ᠨᠢ ᠭᠠᠢᠬᠠᠨ ᠰᠢᠷᠳᠡᠭᠰᠡᠭᠡᠷ ᠪᠣᠢ ᠦᠵᠡᠭᠳᠡᠨᠡ᠃
ᠣᠳᠣ ᠪᠠᠯᠳᠠᠨᠴᠡᠷᠢᠭ ᠡᠨᠡ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠲᠣᠭᠯᠠᠯᠲᠠ ᠶ᠋ᠢ ᠪᠡᠯᠭᠡᠰᠢᠶᠡᠬᠦ ᠡᠴᠡ ᠭᠠᠳᠠᠨᠠ ᠠᠷᠤ ᠭᠡᠷ ᠦ᠋ᠨ ᠬᠢᠨᠢ ᠬᠥᠮᠦᠰ ᠭᠠᠮᠢᠩ ᠤ᠋ᠳ ᠢ᠋ ᠡᠷᠬᠡ ᠦᠭᠡᠢ ᠳᠠᠢᠳᠤᠨ ᠲᠤᠯᠤᠯᠳᠤᠬᠤ ᠪᠠᠷ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠤᠨᠠ ᠭᠡᠵᠦ ᠶᠠᠷᠢᠳᠠᠭ ᠠ᠋ᠴᠠ ᠡᠳᠡ ᠨᠠᠷ ᠢᠩᠭᠢᠵᠦ ᠲᠣᠭᠯᠠᠬᠤ ᠪᠣᠯᠤᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠪᠠ᠃ ᠢᠩᠭᠢᠬᠦ ᠳ᠋ᠦ᠍ ᠥᠪᠡᠷ ᠢ᠋ᠶ᠋ᠡᠨ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠡᠮᠦᠨᠡ ᠰᠠᠨᠠᠮᠰᠠᠷ ᠦᠭᠡᠢ ᠬᠡᠯᠡᠭᠰᠡᠨ ᠦᠭᠡ ᠪᠡᠨ ᠡᠷᠭᠢᠴᠡᠭᠦᠯᠦᠨ ᠦᠵᠡᠬᠦ ᠳ᠋ᠦ᠍ ᠴᠦ᠍ ᠶᠡᠷᠦ ᠮᠠᠭᠤ ᠪᠢᠰᠢ᠂ ᠶᠠᠭᠤᠨ ᠳ᠋ᠤ᠌ ᠭᠡᠪᠡᠯ ᠬᠡᠦᠬᠡᠳ ᠦ᠋ᠳ ᠭᠡᠷ ᠬᠠᠷᠢᠭᠠᠳ《ᠨᠢᠭᠡ ᠬᠥᠮᠦᠨ ᠭᠠᠮᠢᠩ ᠤ᠋ᠳ ᠢ᠋ ᠪᠢᠳᠡ ᠲᠠ ᠨᠠᠷ ᠠ᠋ᠴᠠ ᠲᠦᠷᠦᠭᠦᠯᠡᠨ ᠤᠰᠠᠳᠬᠠᠨᠠ》 ᠭᠡᠵᠦ ᠬᠡᠯᠡᠪᠡ ᠭᠡᠵᠦ ᠶᠠᠷᠢᠬᠤ ᠨᠢ ᠮᠠᠭᠠᠳ ᠪᠠᠢᠬᠤ ᠪᠥᠭᠡᠳ ᠡᠨᠡ ᠦᠭᠡ ᠴᠢᠨᠠᠳᠤᠬᠢ ᠬᠥᠮᠦᠰ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠶᠠᠮᠠᠷ ᠢ᠋ᠶ᠋ᠠᠷ ᠰᠣᠨᠣᠰᠤᠭᠳᠠᠬᠤ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠮᠥᠨ ᠴᠦ᠍ ᠠᠶᠠᠲᠠᠢᠬᠠᠨ ᠠᠵᠢ᠃
ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠭᠠᠷᠤᠨ ᠳᠤᠮᠳᠠ ᠭᠣᠣᠯ ᠭᠡᠭᠴᠢ ᠭᠠᠵᠠᠷ ᠬᠦᠷᠪᠡ᠃ ᠭᠣᠣᠯ ᠤ᠋ᠨ ᠳᠡᠭᠡᠭᠦᠷ ᠲᠠᠯᠪᠢᠭᠰᠠᠨ ᠬᠦᠷᠡᠩ ᠤᠯᠠᠭᠠᠨ ᠪᠣᠳᠣᠭ ᠲᠠᠢ ᠭᠦᠦᠷ ᠳᠡᠭᠡᠷᠡ ᠭᠠᠷᠬᠤ ᠳ᠋ᠤ᠌ ᠠᠭᠤᠷ ᠠᠮᠢᠰᠬᠤᠯ ᠮᠠᠰᠢ ᠰᠠᠢᠬᠠᠨ᠂ ᠭᠦᠦᠷ ᠦ᠋ᠨ ᠳᠣᠣᠷᠠᠬᠢ ᠮᠥᠰᠥ ᠲᠤᠩᠭᠠᠯᠠᠭ᠂ ᠲᠩᠷᠢ ᠶ᠋ᠢᠨ ᠲᠤᠩᠭᠠᠯᠠᠭ ᠴᠡᠩᠬᠡᠷ ᠥᠩᠭᠡ ᠶ᠋ᠢ ᠥᠪᠡᠷ ᠲᠡᠭᠡᠨ ᠲᠡᠳᠡᠨ ᠭᠥᠯᠢᠢᠬᠦ ᠪᠡᠷ ᠢ᠋ᠶ᠋ᠡᠨ ᠭᠥᠯᠢᠢᠭᠰᠡᠨ ᠢ᠋ ᠬᠡᠯᠡᠬᠦ ᠤᠤ?《ᠥᠪᠡᠷ ᠦ᠋ᠨ ᠪᠡᠶᠡ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠡᠴᠡ ᠲᠠᠰᠤᠷᠠᠨ ᠭᠡᠷ ᠦ᠋ᠨ ᠮᠤᠬᠤᠷ ᠲᠤ ᠰᠢᠭᠢᠳᠦᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠮᠠᠨᠢ ᠱᠠᠯ ᠳᠡᠮᠡᠢ ᠪᠠᠢᠵᠤ ᠳᠠ》 ᠭᠡᠰᠡᠨ ᠢ᠋ ᠪᠣᠳᠣᠭᠳᠠᠭᠤᠯᠤᠨᠠ᠃
ᠪᠠᠷᠠᠭᠤᠨ ᠠ᠋ᠴᠠ ᠪᠠᠬᠠᠨ ᠶᠠᠪᠠᠭᠠᠨ ᠤᠯᠤᠰ ᠬᠦᠪᠦᠷᠡᠯᠳᠦᠨ ᠠᠢᠰᠤᠢ ᠶᠠᠪᠤᠯᠠ᠃ ᠪᠠᠯᠳᠠᠨᠴᠡᠷᠢᠭ ᠲᠡᠳᠡᠨ ᠢ᠋ ᠭᠠᠮᠢᠩ ᠤ᠋ᠳ ᠭᠡᠵᠦ ᠪᠣᠳᠣᠨ ᠳᠣᠲᠣᠷᠠ ᠨᠢ ᠵᠢᠷᠢᠰᠬᠢᠪᠡ᠃ ᠭᠦᠦᠷ ᠦ᠋ᠨ ᠬᠠᠰᠢᠯᠭᠠ ᠳᠡᠭᠡᠷᠡ ᠵᠥᠷᠢᠭᠦᠯᠦᠨ ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠳᠥᠰᠢᠨ ᠵᠣᠭᠰᠣᠵᠤ ᠣᠢᠷᠠᠲᠤᠨ ᠢᠷᠡᠬᠦ ᠶ᠋ᠢ ᠨᠢ ᠬᠦᠯᠢᠶᠡᠪᠡ᠃ ᠭᠡᠲᠡᠯᠡ ᠲᠡᠷᠡ ᠭᠠᠮᠢᠩ ᠪᠢᠰᠢ᠂ ᠭᠠᠮᠢᠩ ᠤ᠋ᠳ ᠲᠤ᠌ ᠲᠠᠭᠤᠭᠳᠠᠨ ᠶᠠᠪᠤᠭᠠ ᠴᠠᠬᠠᠷ ᠤ᠋ᠳ ᠪᠥᠭᠡᠳ ᠭᠠᠷ ᠲᠠᠭᠠᠨ ᠭᠠᠪᠠ ᠲᠠᠢ᠂ ᠬᠥᠯ ᠳ᠋ᠡᠭᠡᠨ ᠲᠤᠰᠢᠶᠠ ᠲᠠᠢ᠂ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠨᠣᠣᠷᠠᠩᠬᠠᠢ᠂ ᠲᠡᠮᠦᠷ ᠲᠤᠰᠢᠶᠠᠨ ᠳ᠋ᠠᠭᠠᠨ ᠪᠠᠷᠢᠭᠳᠠᠨ ᠣᠢᠷᠠᠬᠠᠨ ᠣᠢᠷᠠᠬᠠᠨ ᠭᠢᠰᠬᠢᠯᠡᠬᠦ ᠪᠥᠭᠡᠳ ᠡᠬᠢᠨ ᠦ᠌ ᠪᠡᠨ ᠬᠥᠮᠦᠨ ᠡᠴᠡ ᠠᠪᠤᠭᠠᠳ ᠡᠴᠦᠰ ᠦ᠋ᠨ ᠬᠢᠨᠢ ᠪᠣᠯᠪᠠᠴᠤ ᠵᠥᠪᠬᠡᠨ ᠨᠢᠭᠡᠨ ᠭᠠᠵᠠᠷ ᠭᠢᠰᠬᠢᠬᠦ ᠶ᠋ᠢ ᠬᠢᠴᠢᠶᠡᠬᠦ ᠮᠡᠲᠦ᠂ ᠬᠦᠢᠲᠡᠨ ᠵᠢᠪᠠᠷ ᠲᠤ ᠨᠡᠪᠲᠡ ᠴᠣᠬᠢᠭᠳᠠᠭᠰᠠᠨ ᠭᠠᠩᠳᠠᠮᠠᠯ ᠴᠢᠷᠠᠢ ᠪᠠᠷ ᠢ᠋ᠶ᠋ᠠᠨ ᠳᠣᠷᠣᠭᠰᠢ ᠰᠢᠷᠲᠡᠨ ᠠᠯᠬᠤᠯᠠᠨᠠ᠃
《ᠡᠳᠡᠭᠡᠷ ᠬᠥᠮᠦᠰ ᠶᠠᠭᠤᠨ ᠤ᠋ ᠤᠯᠤᠰ ᠪᠢᠯᠡ?》 ᠭᠡᠬᠦ ᠡᠴᠡ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠱᠠᠪᠢ ᠨᠢ《ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠡᠷᠬᠡ ᠴᠢᠯᠥᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠲᠡᠮᠡᠴᠡᠭᠴᠢᠳ ᠭᠠᠮᠢᠩ ᠤ᠋ᠳ ᠲᠤ᠌ ᠢᠯᠠᠭᠳᠠᠨ ᠣᠷᠣᠰ ᠤᠷᠤᠭᠤ ᠵᠢᠭᠤᠲᠠᠭᠠᠳ ᠲᠡᠨᠳᠡ ᠡᠴᠡ ᠪᠡᠨ ᠠᠷᠤ ᠮᠣᠩᠭᠣᠯ ᠳ᠋ᠤ᠌ ᠢᠷᠡᠬᠦ ᠪᠡᠷ ᠬᠢᠶᠠᠭᠲᠤ ᠳ᠋ᠤ᠌ ᠢᠷᠡᠭᠰᠡᠨ ᠢ᠋ ᠭᠠᠮᠢᠩ ᠤ᠋ᠳ ᠪᠠᠷᠢᠭᠰᠠᠨ ᠭᠡᠨᠡ》 ᠭᠡᠵᠦ ᠬᠠᠮᠢᠭᠠ ᠨᠢᠭᠡ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠨ᠂ ᠨᠢᠳᠦ ᠶ᠋ᠢ ᠨᠢ ᠨᠢᠯᠪᠤᠰᠤ ᠪᠦᠷᠬᠦᠪᠡ᠃ ᠴᠠᠭᠠᠰᠢ ᠠᠵᠢᠭᠯᠠᠬᠤ ᠭᠡᠬᠦ ᠳ᠋ᠦ᠍ ᠨᠢᠭᠡ ᠳ᠋ᠦ᠍ ᠨᠢᠳᠦ ᠬᠠᠯᠲᠤᠷᠢᠨᠠ᠂ ᠬᠣᠶᠠᠷ ᠲᠤ ᠭᠠᠮᠢᠩ ᠤ᠋ᠳ ᠲᠤ᠌ ᠨᠢᠯᠪᠤᠰᠤ ᠪᠠᠨ ᠦᠵᠡᠭᠦᠯᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠬᠦ ᠬᠡᠷᠡᠭᠲᠡᠢ ᠪᠠᠢᠯᠠ᠃ ᠳᠣᠷᠣᠭᠰᠢ ᠪᠥᠬᠥᠢᠬᠦ ᠳ᠋ᠦ᠍ ᠲᠠᠭᠤᠭᠳᠠᠭᠰᠠᠠᠳ ᠤ᠋ᠨ ᠲᠦᠷᠦᠭᠦᠴᠢ ᠶ᠋ᠢᠨ ᠬᠥᠮᠦᠨ ᠦ᠌ ᠬᠥᠯ ᠦ᠋ᠨ ᠲᠤᠰᠢᠶᠠ ᠲᠡᠮᠦᠷ ᠭᠢᠨᠵᠢ ᠱᠠᠵᠢᠭᠢᠨᠠᠨ ᠴᠢᠬᠢᠨ ᠳ᠋ᠦ᠍ ᠴᠢᠭᠢᠷᠡᠲᠦᠵᠦ᠂ ᠪᠡᠶᠡᠰ ᠨᠢ ᠲᠤᠩᠭᠠᠯᠠᠭ ᠲᠩᠷᠢ ᠶ᠋ᠢᠨ ᠥᠩᠭᠡ ᠶ᠋ᠢ ᠢᠷᠣᠭᠠᠷ ᠲᠠᠭᠠᠨ ᠲᠤᠰᠬᠠᠭᠰᠠᠨ ᠭᠥᠯᠢᠭᠡᠷ ᠮᠥᠰᠥᠨ ᠳᠡᠭᠡᠷᠡ ᠵᠡᠭᠦᠳᠦᠨ ᠦ᠌ ᠶᠠᠭᠤᠮᠠᠰ ᠰᠢᠭ᠋ ᠲᠤᠰᠤᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ?《ᠠᠢ ᠠᠬᠠ ᠳᠡᠭᠦᠦ ᠨᠠᠷ ᠠ᠋! ᠲᠠ ᠨᠠᠷ ᠭᠡᠮᠲᠦ ᠨᠥᠬᠥᠳ ᠪᠢᠰᠢ᠂ ᠨᠢᠭᠦᠯᠲᠡᠨ ᠴᠦ᠍ ᠪᠢᠰᠢ᠂ ᠣᠯᠠᠨ ᠲᠦᠮᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠲᠡᠮᠡᠴᠡᠭᠴᠢ ᠪᠠᠭᠠᠲᠤᠷ ᠤ᠋ᠳ᠂ ᠲᠠ ᠨᠠᠷ ᠤ᠋ᠨ ᠡᠢᠨ ᠬᠦ᠌ ᠲᠤᠰᠢᠶᠠ᠂ ᠬᠦᠯᠢᠶᠡ ᠲᠡᠢ ᠶᠠᠪᠤᠬᠤ ᠴᠢᠨᠢ ᠭᠤᠲᠤᠮᠰᠢᠭ ᠪᠠᠢᠪᠠᠴᠤ ᠴᠣᠭ ᠵᠣᠯᠪᠣᠭᠠ᠂ ᠪᠠᠶᠠᠷ ᠪᠠᠬᠠᠳᠤᠯ ᠬᠣᠶᠠᠷ ᠰᠡᠭᠦᠳᠡᠷ ᠰᠢᠭ ᠨᠢ ᠳᠠᠭᠠᠵᠤ ᠶᠠᠪᠤᠨᠠ》 ᠭᠡᠵᠦ ᠬᠠᠮᠤᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠬᠢᠷᠠᠨ ᠭᠦᠶᠦᠨ ᠬᠦᠷᠴᠦ ᠬᠥᠮᠦᠨ ᠪᠦᠷᠢ ᠶ᠋ᠢ ᠲᠡᠪᠡᠷᠢᠮᠡᠷ ᠰᠠᠨᠠᠭᠳᠠᠨᠠ᠃
ᠲᠠᠭᠤᠭᠳᠠᠭᠰᠠᠳ ᠥᠩᠭᠡᠷᠡᠵᠦ ᠭᠥᠯᠢᠭᠡᠷ ᠮᠥᠰᠥ ᠳᠠᠬᠢᠨ ᠬᠥᠬᠡ ᠲᠩᠷᠢ ᠶ᠋ᠢ ᠲᠣᠯᠢᠳᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠪᠣᠯᠪᠠ᠃ ᠭᠡᠯᠡ ᠴᠦ᠍ ᠠᠷᠤ ᠳ᠋ᠤᠨᠢ ᠬᠥᠯ ᠦ᠋ᠨ ᠭᠢᠨᠵᠢ ᠱᠠᠵᠢᠭᠢᠨᠠᠨ ᠵᠢᠩᠭᠢᠨᠡᠭᠰᠡᠭᠡᠷ ᠪᠥᠭᠡᠳ ᠲᠡᠭᠦᠨ ᠢ᠋ ᠨᠢ ᠰᠣᠨᠣᠰᠬᠤ ᠳ᠋ᠤ᠌ ᠠᠭᠤᠷ ᠬᠢᠯᠢᠩ᠂ ᠬᠠᠷᠢᠶᠠᠯ ᠵᠦᠬᠡᠯ᠂ ᠣᠢ ᠭᠠᠰᠢᠭᠤᠨ ᠪᠠ ᠵᠣᠪᠠᠯᠠᠩ ᠵᠦᠳᠡᠭᠦᠷᠡᠯ ᠢ᠋ ᠨᠢ ᠡᠭᠡᠯᠵᠢᠯᠡᠭᠦᠯᠦᠨ ᠢᠯᠡᠴᠢᠯᠡᠬᠦ ᠰᠢᠭ᠂ ᠳᠠᠬᠢᠨ ᠴᠢᠩᠨᠠᠬᠤ ᠳ᠋ᠤ᠌᠂ ᠭᠠᠮᠢᠩ ᠤ᠋ᠳ ᠤ᠋ᠨ ᠬᠠᠷᠭᠢᠰᠯᠠᠯ ᠪᠠ ᠬᠠᠲᠠᠭᠤ ᠰᠢᠷᠦᠭᠦᠨ ᠢ᠋ ᠢᠯᠡᠴᠢᠯᠡᠬᠦ ᠰᠢᠭ᠂ ᠪᠦᠷ ᠬᠣᠯᠠᠳᠠᠨ ᠭᠢᠨᠵᠢ ᠶ᠋ᠢᠨ ᠠᠪᠢᠶᠠ ᠣᠷᠣ ᠲᠠᠰᠤ ᠳᠤᠭᠤᠯᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠪᠣᠯᠪᠠᠴᠤ ᠥᠨᠥᠬᠢ ᠨᠢ ᠰᠡᠳᠬᠢᠯ ᠳ᠋ᠦ᠍ ᠦᠯᠡᠳᠡᠨ ᠵᠢᠩᠭᠢᠨᠡᠨᠡ᠃ ᠰᠠᠨᠠᠮᠰᠠᠷ ᠦᠭᠡᠢ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠢᠬᠦ ᠳ᠋ᠦ᠍ ᠬᠤᠷᠤᠭᠤᠨ ᠤ᠋ ᠬᠢᠨᠢ ᠦᠵᠦᠭᠦᠷ ᠲᠦ᠍ ᠬᠦᠢᠲᠡᠨ ᠨᠣᠢᠲᠠᠨ ᠶᠠᠭᠤᠮᠠ ᠪᠠᠷᠢᠭᠳᠠᠪᠠ᠃ ᠡᠨᠡ ᠨᠢ ᠲᠤᠩ ᠰᠠᠶᠢᠬᠠᠨ ᠠᠰᠬᠠᠷᠠᠭᠤᠯᠤᠭᠰᠠᠨ ᠨᠢᠯᠪᠤᠰᠤ ᠬᠠᠴᠠᠷ ᠢ᠋ᠶ᠋ᠠᠨ ᠳᠠᠭᠠᠨ ᠤᠷᠤᠰᠤᠭᠰᠠᠨ ᠤ᠋ ᠬᠢ ᠪᠠᠢᠵᠠᠢ᠃ ᠪᠠᠯᠳᠠᠨᠴᠡᠷᠢᠭ ᠲᠡᠢᠨ ᠬᠦ᠌ ᠤᠬᠢᠯᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠲᠠᠢ ᠪᠠᠨ ᠵᠡᠷᠭᠡ᠂ ᠪᠢ ᠰᠠᠬᠠᠯ ᠰᠠᠮᠪᠠᠢ ᠪᠠᠨ ᠬᠦᠷᠲᠡᠯᠡ ᠤᠷᠭᠤᠭᠤᠯᠤᠭᠰᠠᠨ ᠨᠢᠭᠡ ᠶᠣᠰᠣᠨ ᠤ᠋ ᠲᠥᠷᠥ ᠶ᠋ᠢᠨ ᠬᠠᠷᠠ ᠬᠥᠮᠦᠨ ᠪᠠᠢᠵᠤ᠂ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠤᠬᠢᠯᠠᠬᠤ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠵᠢᠷᠦᠬᠡ ᠪᠡᠨ ᠴᠢᠩᠭᠠᠯᠠᠨ ᠴᠠᠭᠠᠰᠢ ᠶᠠᠪᠤᠯᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠣᠭᠳᠠ ᠶ᠋ᠢᠨ ᠨᠣᠭᠣᠭᠠᠨ ᠣᠷᠳᠣᠨ ᠬᠦᠷᠦᠭᠰᠡᠨ ᠪᠠᠢᠵᠠᠢ᠃ ᠬᠦᠷᠡᠩ ᠤᠯᠠᠭᠠᠨ ᠪᠣᠳᠣᠭ ᠲᠠᠢ ᠰᠦᠷᠡᠬᠡᠢ ᠲᠣᠬᠢᠯᠢᠭ ᠪᠠᠩᠵᠠᠨ ᠬᠠᠰᠢᠶᠠᠨ ᠤ᠋ ᠬᠢᠨᠢ ᠬᠣᠢᠲᠤ ᠥᠨᠴᠥᠭ ᠳᠡᠭᠡᠷᠡ ᠨᠢ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠲᠡᠨᠳᠡ ᠶᠠᠪᠤᠭᠠ ᠪᠠᠨ ᠮᠡᠳᠡᠪᠡ᠃ ᠤᠷᠢᠳ ᠡᠮᠦᠨᠡ ᠡᠭᠦᠨ ᠢ᠋ᠶ᠋ᠡᠷ ᠶᠠᠪᠤᠬᠤ ᠪᠦᠷᠢ ᠳ᠋ᠦ᠍《ᠡᠨᠡ ᠪᠣᠯ ᠠᠯᠢᠪᠠ ᠠᠮᠢᠲᠠᠨ ᠢ᠋ ᠨᠢᠭᠦᠯᠡᠰᠦᠩᠭᠦᠢ ᠮᠡᠯᠮᠡᠢ ᠪᠡᠷ ᠲᠣᠯᠢᠳᠠᠨ ᠭᠡᠢᠭᠦᠯᠦᠭᠴᠢ ᠠᠴᠢᠲᠤ ᠪᠣᠭᠳᠠ ᠶ᠋ᠢᠨ ᠮᠢᠨᠢ ᠠᠷᠢᠭᠤᠨ ᠣᠷᠳᠣᠨ ᠰᠢᠦ ᠳᠡ》 ᠭᠡᠵᠦ ᠰᠦᠰᠦᠭᠯᠡᠳᠡᠭ ᠪᠠᠢᠭᠰᠠᠨ ᠠᠵᠢ᠃ ᠬᠠᠷᠢᠨ ᠣᠳᠣ ᠭᠡᠪᠡᠯ᠄ ᠴᠡᠷᠢᠨᠴᠢᠮᠢᠳ ᠳᠡ ᠯᠠᠮᠠ᠂ ᠬᠠᠨᠳᠠᠳᠣᠷᠵᠢ ᠴᠢᠨ ᠸᠠᠩ᠂ ᠰᠠᠢᠨ ᠨᠣᠶᠠᠨ ᠬᠠᠨ ᠮᠡᠲᠦ ᠶ᠋ᠢᠨ ᠲᠥᠷᠥ ᠶ᠋ᠢᠨ ᠵᠢᠳᠬᠦᠯᠲᠡᠨ ᠬᠥᠮᠦᠰ ᠦ᠋ᠨ ᠭᠡᠨᠡᠳᠲᠡ ᠶ᠋ᠢᠨ ᠦᠬᠦᠯ ᠢ᠋ᠶ᠋ᠡᠷ ᠦᠬᠦᠭᠰᠡᠨ ᠢ᠋ ᠰᠠᠨᠠᠨᠠ᠃ ᠡᠳᠡᠭᠡᠷ ᠬᠥᠮᠦᠰ ᠦ᠋ᠨ ᠦᠬᠦᠭᠰᠡᠨ ᠦ᠌ ᠰᠢᠯᠲᠠᠭᠠᠨ ᠮᠠᠰᠢ ᠨᠢᠭᠤᠴᠠ᠂ ᠵᠠᠳᠠᠷᠠᠭᠤᠯᠤᠭᠰᠠᠨ ᠬᠥᠮᠦᠨ ᠰᠢᠭᠤᠳ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠬᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠣᠯᠠᠨ ᠵᠢᠵᠢᠭ ᠳᠤᠰᠤᠯ ᠨᠡᠢᠯᠡᠨ᠂ ᠨᠡᠢᠯᠡᠭᠰᠡᠭᠡᠷ ᠨᠢᠭᠡ ᠪᠠᠯᠭᠤ ᠪᠣᠯᠬᠤ ᠠᠳᠠᠯᠢ ᠬᠥᠮᠦᠰ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠦᠭᠡ ᠴᠤᠬᠤᠢᠯᠭᠠᠨ ᠳᠠᠮᠵᠢᠭᠤᠯᠤᠭᠰᠠᠭᠠᠷ ᠲᠡᠳᠡᠭᠡᠷ ᠬᠥᠮᠦᠰ ᠢ᠋ ᠪᠣᠭᠳᠠ ᠥᠪᠡᠷ ᠢ᠋ᠶ᠋ᠡᠨ ᠪᠤᠰᠤᠳ ᠤ᠋ᠨ ᠬᠣᠪ ᠵᠢᠪ ᠲᠦ᠍ ᠠᠪᠲᠠᠭᠳᠠᠨ ᠬᠣᠣᠷ ᠢ᠋ᠶ᠋ᠠᠷ ᠬᠣᠣᠷᠯᠠᠨ ᠠᠯᠠᠭᠰᠠᠨ ᠨᠢ ᠲᠣᠳᠣᠷᠬᠠᠢ ᠪᠣᠯᠤᠭᠰᠠᠨ ᠪᠠᠢᠵᠠᠢ᠃ ᠡᠨᠡ ᠤᠴᠢᠷ ᠠ᠋ᠴᠠ ᠪᠠᠯᠳᠠᠨᠴᠡᠷᠢᠭ ᠬᠣᠪ ᠵᠢᠪ ᠢ᠋ ᠬᠦᠯᠢᠶᠡᠨ ᠠᠪᠬᠤ ᠪᠠ ᠬᠣᠪ ᠵᠢᠪᠴᠢ ᠨᠦ᠍ᠭᠦᠳ ᠢ᠋ᠶ᠋ᠡᠷ ᠪᠡᠶᠡ ᠪᠡᠨ ᠲᠣᠭᠣᠷᠢᠭᠤᠯᠬᠤ ᠪᠣᠯ ᠲᠥᠷᠥ ᠶ᠋ᠢᠨ ᠬᠥᠮᠦᠨ ᠦ᠌ ᠰᠢᠨᠵᠢ ᠪᠢᠰᠢ᠂ ᠲᠡᠨᠡᠭ ᠮᠤᠩᠬᠠᠭ ᠤ᠋ᠨ ᠶᠠᠪᠤᠳᠠᠯ ᠭᠡᠵᠦ ᠦᠵᠡᠬᠦ ᠶ᠋ᠢᠨ ᠳᠡᠭᠡᠷᠡ ᠡᠨᠡ ᠲᠡᠨᠡᠭ ᠮᠤᠩᠬᠠᠭ ᠢ᠋ ᠶᠠᠭᠠᠬᠢᠶᠠ ᠭᠡᠵᠦ ᠪᠣᠳᠣᠪᠠ᠃ ᠲᠡᠭᠡᠭᠡᠳ ᠣᠷᠳᠣᠨ ᠤ᠋ ᠶᠡᠬᠡ ᠬᠠᠰᠢᠶᠠᠨ ᠤ᠋ ᠬᠣᠢᠲᠤ ᠪᠤᠯᠤᠩ ᠠ᠋ᠴᠠ ᠤᠷᠲᠤ ᠪᠤᠯᠤᠩ ᠢ᠋ ᠬᠦᠷᠬᠦ ᠵᠠᠭᠤᠷᠠ ᠮᠥᠨ ᠯᠡ ᠡᠨᠡ ᠲᠡᠨᠡᠭ ᠬᠠᠷᠠᠩᠭᠤᠢ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠣᠳᠣ ᠪᠠᠰᠠ ᠪᠤᠰᠤᠳ ᠢ᠋ ᠬᠣᠣᠷᠯᠠᠬᠤ ᠬᠣᠣᠷ ᠬᠡᠴᠢᠨᠡᠭᠡᠨ ᠬᠠᠳᠠᠭᠠᠯᠠᠭᠠᠰᠤᠲᠠᠢ ᠪᠠᠢᠭᠠ ᠪᠣᠯ? ᠭᠡᠵᠦ ᠪᠣᠳᠣᠬᠤ ᠲᠠᠢ ᠵᠡᠷᠭᠡ ᠭᠣᠣᠯ ᠳ᠋ᠤᠨᠢ ᠬᠦᠢᠲᠡᠨ ᠣᠷᠣᠪᠠ᠃
ᠣᠷᠳᠣᠨ ᠤ᠋ ᠡᠮᠦᠨᠡᠬᠢ ᠠᠷᠤ ᠥᠪᠥᠷ ᠳᠡᠭᠡᠷᠡ ᠪᠡᠨ ᠡᠷᠡ ᠥᠬᠢᠨ ᠬᠣᠶᠠᠷ ᠬᠣᠶᠠᠷ ᠯᠤᠤ ᠶ᠋ᠢ ᠣᠷᠢᠶᠠᠯᠳᠤᠭᠤᠯᠤᠨ ᠤᠷᠠᠯᠠᠭᠰᠠᠨ ᠰᠡᠢᠯᠪᠦᠷᠢᠲᠡᠢ ᠥᠨᠳᠥᠷ ᠶᠠᠩᠫᠠᠢ ᠶ᠋ᠢᠨ ᠡᠮᠦᠨᠡᠬᠡᠨ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠭᠤᠷᠪᠠᠨ ᠡᠩᠨᠡᠭᠡ ᠦᠶᠡᠯᠡᠨ ᠰᠥᠬᠥᠷᠡᠨ ᠰᠠᠭᠤᠭᠰᠠᠨ ᠤ᠋ ᠳᠡᠷᠭᠡᠳᠡ ᠪᠠᠯᠳᠠᠨᠴᠡᠷᠢᠭ ᠣᠢᠷᠠᠲᠤᠨ ᠣᠴᠢᠪᠠ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠤᠲᠤᠭᠠ ᠵᠢᠩᠰᠡ ᠪᠡᠨ ᠵᠡᠭᠦᠭᠰᠡᠨ ᠶᠡᠬᠡᠬᠡᠨ ᠲᠠᠢᠵᠢ ᠨᠠᠷ᠂ ᠠᠯᠲᠠ ᠮᠥᠩᠭᠥᠨ ᠭᠣᠶᠣᠯ ᠴᠢᠮᠡᠭᠯᠡᠯ ᠢ᠋ᠶ᠋ᠡᠨ ᠳᠠᠭᠠᠭᠠᠵᠤ ᠶᠠᠳᠠᠭᠰᠠᠨ ᠳᠡᠷᠡᠭᠡᠷ ᠦᠰᠦ ᠲᠡᠢ ᠬᠠᠲᠤᠳ᠂ ᠵᠢᠷ ᠦ᠋ᠨ ᠪᠠᠶᠠᠴᠤᠳ᠂ ᠠᠳᠠᠭ ᠤ᠋ᠨ ᠶᠠᠳᠠᠭᠤ ᠬᠥᠳᠥᠰᠦᠨ ᠳᠡᠪᠡᠯ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠭᠡᠢ ᠡᠪᠦᠭᠡᠳ ᠡᠮᠡᠭᠡᠳ᠂ ᠶᠡᠷᠦ ᠠᠩᠭᠢ ᠳᠠᠪᠬᠤᠷᠭᠠ ᠪᠦᠷᠢ ᠶ᠋ᠢᠨ ᠬᠥᠮᠦᠰ ᠪᠣᠢ ᠦᠵᠡᠭᠳᠡᠨᠡ᠃ ᠢᠩᠭᠢᠬᠦ ᠳ᠋ᠦ᠍ ᠲᠡᠳᠡ ᠴᠥᠮ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠪᠠᠢᠭᠠ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠡᠢᠨ ᠬᠦ᠌ ᠮᠥᠷᠭᠥᠬᠦ ᠳ᠋ᠦ᠍ ᠲᠦᠷᠦᠭᠦᠴᠢ ᠶ᠋ᠢᠨ ᠬᠥᠮᠦᠨ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠢ᠋ᠶ᠋ᠠᠷ᠂ ᠡᠴᠦᠰ ᠦ᠋ᠨ ᠬᠥᠮᠦᠨ ᠪᠠᠭᠠ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠢᠷᠡᠬᠦ ᠪᠣᠯᠪᠠᠴᠤ ᠣᠷᠣᠢ ᠶ᠋ᠢᠨ ᠨᠠᠷᠠᠨ ᠵᠢᠷᠭᠠᠬᠤ ᠶ᠋ᠢᠨ ᠡᠮᠦᠨᠡ ᠪᠣᠭᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠠ ᠶ᠋ᠢ ᠠᠷᠠᠢᠭᠡᠵᠦ ᠬᠠᠷᠠᠵᠤ ᠠᠳᠢᠰ ᠬᠦᠷᠲᠡᠬᠦ ᠶᠠᠪᠤᠳᠠᠯ ᠣᠯᠠᠨᠲᠠ ᠪᠠᠢᠳᠠᠭ ᠢ᠋ ᠪᠠᠯᠳᠠᠨᠴᠡᠷᠢᠭ ᠰᠠᠢᠨ ᠮᠡᠳᠡᠨᠡ᠃ ᠬᠠᠷᠢᠨ ᠣᠳᠣ ᠪᠣᠭᠳᠠ᠂ ᠭᠠᠮᠢᠩ ᠳ᠋ᠤ᠌ ᠲᠥᠷᠥ ᠪᠡᠨ ᠠᠯᠲᠠᠨ᠂ ᠬᠠᠭᠠᠨ ᠰᠢᠷᠡᠭᠡᠨ ᠡᠴᠡ ᠪᠡᠨ ᠭᠣᠳ ᠲᠠᠲᠠᠭᠤᠯᠤᠭᠠᠳ᠂ ᠵᠥᠪᠬᠡᠨ ᠰᠦᠰᠦᠭᠲᠡᠨ ᠣᠯᠠᠨ ᠳ᠋ᠤ᠌ ᠮᠥᠷᠭᠥᠯ ᠬᠠᠢᠷᠠᠯᠠᠬᠤ ᠠ᠋ᠴᠠ ᠥᠭᠡᠷᠡ ᠠᠵᠢᠯ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠬᠥᠮᠦᠨ ᠢ᠋ ᠤᠳᠠᠭᠠᠨ ᠬᠦᠯᠢᠶᠡᠯᠭᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠪᠠᠢᠵᠠᠢ᠃ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤᠨ ᠤᠶᠠᠩᠭᠠᠯᠠᠨ ᠬᠠᠩᠭᠢᠨᠠᠵᠤ᠂ ᠮᠥᠷᠭᠥᠯ ᠦ᠋ᠨ ᠬᠥᠮᠦᠰ《ᠬᠠᠢᠷᠠᠬᠠᠨ ᠪᠣᠭᠳᠠ! ᠪᠣᠭᠳᠠ ᠵᠠᠯᠠᠷᠠᠨ ᠠᠢᠰᠤᠢ》 ᠭᠡᠵᠦ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠨᠠᠮᠠᠨᠴᠢᠯᠠᠪᠠ᠃
ᠣᠷᠳᠣᠨ ᠤ᠋ ᠶᠡᠬᠡ ᠬᠠᠰᠢᠶᠠᠨ ᠤ᠋ ᠨᠣᠭᠣᠭᠠᠨ ᠱᠠᠭᠠᠵᠠᠩ ᠣᠷᠣᠢᠲᠤ ᠠᠰᠠᠷ ᠤ᠋ᠨ ᠬᠠᠭᠠᠯᠭᠠ ᠥᠪᠡᠷ ᠢ᠋ᠶ᠋ᠡᠨ ᠨᠡᠭᠡᠭᠡᠭᠳᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠠᠭᠠᠵᠢᠭᠤᠬᠠᠨ ᠢ᠋ᠶ᠋ᠠᠷ ᠨᠡᠭᠡᠭᠡᠭᠳᠡᠨ ᠬᠣᠶᠠᠷ ᠲᠠᠢᠰᠢ ᠪᠠᠨ ᠲᠡᠯᠡᠭᠳᠡᠪᠡ᠃ ᠪᠠᠷᠰ ᠤ᠋ᠨ ᠰᠡᠭᠦᠯ ᠭᠡᠵᠦ ᠨᠡᠷᠡᠯᠡᠭᠳᠡᠳᠡᠭ ᠤᠷᠲᠤ ᠬᠡᠪᠢᠰᠦᠨ ᠲᠤᠩᠲᠤᠢ ᠶ᠋ᠢ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠪᠥᠭᠲᠥᠷᠢᠭᠦᠯᠦᠨ ᠲᠠᠯᠪᠢᠭᠰᠠᠨ ᠪᠦᠳᠦᠭᠦᠨ ᠯᠠᠮᠠ ᠨᠠᠮᠤᠭᠤᠬᠠᠨ ᠠᠯᠬᠤᠯᠠᠨ ᠭᠠᠷᠴᠤ ᠢᠷᠡᠯᠡ᠃ ᠳᠠᠷᠠᠭᠠ ᠨᠢ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠪᠠᠰᠠ ᠨᠢᠭᠡ ᠯᠠᠮᠠ ᠬᠣᠶᠠᠷ ᠦᠵᠦᠭᠦᠷ ᠲᠡᠭᠡᠨ ᠯᠤᠤ ᠶ᠋ᠢᠨ ᠲᠣᠯᠣᠭᠠᠢ ᠰᠡᠢᠯᠦᠮᠡᠯ ᠳᠠᠮᠨᠠᠭᠤᠷᠭᠠᠨ ᠳ᠋ᠤ᠌ ᠰᠠᠢᠬᠠᠨ ᠦᠨᠦᠷ ᠲᠡᠢ ᠶᠠᠭᠤᠮᠠ ᠶ᠋ᠢ ᠣᠷᠭᠢᠯᠤᠨ ᠰᠠᠪᠰᠠᠭᠤᠯᠤᠭᠰᠠᠨ ᠪᠣᠢᠫᠣᠷ ᠤ᠋ᠳ ᠡᠯᠭᠦᠭᠰᠡᠨ ᠢ᠋ ᠮᠥᠷᠥᠪᠴᠢᠯᠡᠨ ᠶᠠᠪᠤᠨᠠ᠃ ᠡᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠪᠣᠭᠳᠠ ᠥᠪᠡᠷ ᠢ᠋ᠶ᠋ᠡᠨ ᠪᠢᠲᠡᠭᠦᠦ ᠵᠢᠶᠤᠤᠵᠠᠨ ᠳ᠋ᠤ᠌ ᠬᠣᠶᠠᠷ ᠯᠠᠮᠠ ᠪᠠᠷ ᠳᠠᠮᠨᠠᠭᠤᠯᠵᠠᠢ᠃ ᠬᠠᠵᠠᠭᠤ ᠳ᠋ᠤᠨᠢ ᠮᠥᠷᠭᠥᠬᠦ ᠬᠥᠮᠦᠰ ᠦ᠋ᠨ ᠡᠷᠭᠦᠯ ᠬᠤᠷᠢᠶᠠᠬᠤ ᠨᠢᠭᠡ ᠯᠠᠮᠠ᠂ ᠮᠥᠷᠭᠥᠯ ᠬᠠᠢᠷᠠᠯᠠᠬᠤ ᠰᠤᠨᠳᠠᠭ ᠪᠠᠷᠢᠭᠰᠠᠨ ᠥᠭᠡᠷᠡ ᠨᠢᠭᠡ ᠯᠠᠮᠠ ᠲᠠᠢ ᠮᠥᠷᠥ ᠵᠡᠷᠭᠡᠴᠡᠨ ᠶᠠᠪᠤᠨᠠ᠃ ᠡᠳᠡᠭᠡᠷ ᠦ᠋ᠨ ᠠᠷᠤ ᠳ᠋ᠤ᠌ ᠮᠥᠨ ᠯᠡ ᠪᠣᠢᠫᠣᠷ᠂ ᠪᠠᠷᠰ ᠤ᠋ᠨ ᠰᠡᠭᠦᠯ ᠬᠣᠶᠠᠷ ᠢ᠋ ᠮᠥᠷᠥᠪᠴᠢᠯᠡᠭᠰᠡᠨ ᠯᠠᠮᠠ ᠨᠠᠷ ᠶᠠᠪᠤᠬᠤ ᠠᠵᠢ᠃
ᠪᠦᠬᠦ ᠯᠠᠮᠠ ᠨᠠᠷ ᠤ᠋ᠨ ᠵᠢᠰᠦ ᠴᠢᠷᠠᠢ ᠲᠤᠩᠭᠠᠯᠠᠭ᠂ ᠪᠡᠶᠡ ᠪᠢᠯᠳᠠᠷ ᠰᠠᠢᠲᠠᠢ ᠪᠥᠭᠡᠳ ᠲᠠᠷᠭᠤᠨ ᠴᠠᠳᠬᠤᠯᠠᠩ᠂ ᠰᠠᠬᠤᠯᠠᠭ ᠦᠰᠦᠲᠡᠢ᠂ ᠳᠤᠭᠤᠢ ᠪᠤᠯᠠᠭᠠᠨ ᠮᠠᠯᠠᠭᠠᠢ ᠲᠠᠢ᠂ ᠰᠢᠷᠠ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠪᠡᠨ ᠥᠷᠭᠡᠨ ᠶᠠᠭᠠᠨ ᠳᠤᠷᠳᠤᠩ ᠣᠷᠬᠢᠮᠵᠢ ᠶ᠋ᠢ ᠣᠷᠢᠶᠠᠨ ᠦᠵᠦᠭᠦᠷ ᠢ᠋ ᠨᠢ ᠳᠣᠷᠣᠭᠰᠢ ᠨᠠᠮᠢᠷᠠᠭᠤᠯᠤᠨ ᠤᠨᠵᠢᠭᠤᠯᠵᠤ᠂ ᠲᠥᠪ ᠬᠢᠴᠢᠶᠡᠩᠭᠦᠢ ᠶ᠋ᠢᠨ ᠳᠦᠷᠢ ᠶ᠋ᠢ ᠪᠠᠲᠤᠳᠠ ᠪᠠᠷᠢᠨ ᠭᠢᠰᠬᠢᠯᠡᠨᠡ᠃ ᠪᠣᠭᠳᠠ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠡᠩ ᠲᠠᠷᠮᠠᠨ ᠳᠡᠪᠡᠯ ᠲᠡᠢ᠂ ᠣᠷᠣᠢ ᠨᠢ ᠨᠡᠯᠢᠶᠡᠳ ᠥᠨᠳᠥᠷ ᠪᠣᠯᠬᠤ ᠠ᠋ᠴᠠ ᠭᠠᠳᠠᠨᠠ ᠬᠣᠶᠠᠷ ᠲᠠᠯᠠ ᠨᠢ ᠴᠢᠬᠢᠪᠴᠢ ᠪᠦᠰᠡᠯᠡᠬᠦ ᠦᠭᠡᠢ ᠤᠷᠲᠤ ᠬᠦᠷᠮᠡ ᠴᠤᠯᠭᠤᠢ ᠰᠢᠷᠠ ᠲᠣᠷᠭᠠᠨ ᠣᠪᠣᠭᠠ ᠲᠠᠢ ᠮᠠᠯᠠᠭᠠᠢ ᠲᠠᠢ ᠪᠥᠭᠡᠳ ᠨᠢᠳᠦ ᠠᠨᠢᠭᠰᠠᠨ ᠴᠦ᠍ ᠪᠢᠰᠢ᠂ ᠨᠡᠭᠡᠭᠡᠭᠰᠡᠨ ᠴᠦ᠍ ᠪᠢᠰᠢ᠂ ᠶᠣᠰᠣᠲᠠᠢ ᠯᠠ ᠠᠮᠤᠷᠯᠢᠩᠭᠤᠢ ᠳᠦᠷᠢ ᠪᠡᠷ ᠴᠢᠭ ᠣᠷᠣᠭᠰᠢ ᠰᠢᠷᠲᠡᠨ ᠵᠠᠯᠠᠷᠠᠵᠤ ᠶᠠᠪᠤᠭᠠ ᠨᠢ ᠵᠢᠶᠤᠤᠵᠠᠨ ᠤ᠋ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠴᠣᠩᠬᠣ ᠪᠠᠷ ᠬᠠᠭᠠᠰ ᠬᠠᠷᠠᠭᠳᠠᠬᠤ ᠨᠢ ᠶᠡᠷᠦ ᠡᠭᠡᠯ ᠪᠤᠰᠤ᠂ ᠭᠦᠩᠭᠠᠷᠠᠪᠠ ᠳ᠋ᠤ᠌ ᠵᠠᠯᠠᠭᠰᠠᠨ ᠰᠠᠭᠤᠮᠠᠯ ᠪᠤᠷᠬᠠᠨ ᠤ᠋ ᠳᠦᠷᠢ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ᠃ ᠲᠡᠭᠡᠭᠡᠳ ᠤᠷᠤᠭᠰᠢᠯᠠᠬᠤ ᠳᠣᠳᠣᠮ ᠪᠣᠢᠫᠣᠷ ᠤ᠋ᠨ ᠤᠲᠤᠭᠠ ᠪᠠᠭᠠᠭᠢᠨ ᠰᠠᠪᠰᠠᠵᠤ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤ ᠤᠯᠠᠮ ᠢ᠋ᠶ᠋ᠠᠷ ᠤᠶᠠᠩᠭᠠᠯᠠᠬᠤ ᠶ᠋ᠢ ᠬᠡᠯᠡᠬᠦ ᠤᠤ? ᠁ ᠭᠡᠪᠡᠴᠦ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠭᠰᠡᠳ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠶᠠᠭᠠᠷᠠᠨ ᠦᠵᠡᠭᠳᠡᠪᠡᠰᠦ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠨᠢ ᠳᠡᠮᠡᠢ ᠦᠢᠮᠡᠭᠦᠯᠬᠦ ᠶ᠋ᠢᠨ ᠨᠡᠮᠡᠭᠦᠷᠢ ᠭᠡᠰᠡᠨ ᠰᠢᠭ ᠵᠥᠪᠬᠡᠨ ᠥᠨᠳᠥᠷ ᠶᠠᠩᠫᠠᠢ ᠤᠷᠤᠭᠤ ᠴᠢᠭᠯᠡᠨ ᠪᠡᠶᠡ ᠪᠡᠨ ᠬᠠᠯᠬᠠᠯᠠᠨ ᠶᠠᠪᠤᠬᠤ ᠪᠥᠭᠡᠳ ᠲᠡᠭᠦᠨ ᠳ᠋ᠦ᠍ ᠲᠤᠯᠤᠨ ᠣᠴᠢᠭᠰᠠᠨ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠢ᠋ᠶ᠋ᠠᠷ ᠨᠢ ᠲᠣᠭᠣᠷᠢᠨ ᠮᠥᠷᠭᠥᠯᠴᠢᠳ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠢᠯᠡᠷᠡᠨᠡ᠃ ᠡᠨᠡ ᠳᠠᠷᠤᠢ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤᠨ ᠭᠡᠨᠡᠳᠲᠡ ᠲᠠᠰᠤᠷᠠᠨ ᠠᠨᠢᠷ ᠴᠢᠮᠡᠭᠡ ᠣᠭᠲᠣᠬᠠᠨ ᠴᠦ᠍ ᠦᠭᠡᠢ ᠪᠣᠯᠬᠤ ᠪᠣᠯᠪᠠᠴᠤ ᠪᠣᠢᠫᠣᠷ ᠤ᠋ᠨ ᠰᠠᠢᠬᠠᠨ ᠦᠨᠦᠷᠲᠦ ᠤᠲᠤᠭᠠ ᠠᠶᠠᠨ ᠳ᠋ᠠᠭᠠᠨ ᠳᠠᠷᠬᠠᠨ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠬᠠᠮᠠᠷ ᠲᠤ ᠬᠠᠩᠬᠤᠯᠬᠤ ᠪᠥᠭᠡᠳ ᠡᠨᠡ ᠨᠢ ᠪᠣᠭᠳᠠ ᠶ᠋ᠢ ᠲᠩᠷᠢ ᠡᠴᠡ ᠪᠠᠭᠤᠨ ᠢᠷᠡᠬᠦ ᠰᠢᠭ ᠪᠣᠯᠭᠠᠨᠠ᠃ ᠶᠡᠷᠦ ᠡᠨᠡ ᠦᠶᠡ ᠳ᠋ᠦ᠍ ᠰᠦᠰᠦᠭᠲᠡᠨ ᠬᠥᠮᠦᠰ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠣᠷᠣ ᠲᠠᠰᠤ ᠮᠠᠷᠲᠠᠨ ᠭᠠᠭᠴᠠ ᠬᠦ᠌ ᠬᠣᠢᠲᠤ ᠨᠠᠰᠤᠨ ᠳ᠋ᠠᠭᠠᠨ ᠱᠠᠮᠪᠢᠯ ᠬᠡᠮᠡᠬᠦ ᠪᠤᠷᠬᠠᠨ ᠤ᠋ ᠣᠷᠣᠨ ᠢ᠋ ᠯᠡ ᠰᠠᠨᠠᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠨᠠᠮᠠᠨᠴᠢᠯᠠᠨᠠ᠃ ᠪᠣᠭᠳᠠ᠂ ᠦᠶᠡᠯᠡᠨ ᠰᠠᠭᠤᠭᠰᠠᠨ ᠮᠥᠷᠭᠥᠯᠴᠢᠳ ᠦ᠋ᠨ ᠳᠤᠮᠳᠠᠭᠤᠷ ᠶᠠᠪᠤᠬᠤ ᠳ᠋ᠠᠭᠠᠨ ᠥᠨᠥᠬᠢ ᠠᠮᠤᠷᠯᠢᠩᠭᠤᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠦᠷᠢ ᠶ᠋ᠢ ᠲᠤᠩ ᠲᠡᠰᠪᠦᠷᠢᠲᠡᠢ ᠬᠠᠳᠠᠭᠠᠯᠠᠨᠠ᠃ ᠬᠠᠵᠠᠭᠤ ᠶ᠋ᠢᠨ ᠬᠣᠶᠠᠷ ᠯᠠᠮᠠ ᠶ᠋ᠢᠨ ᠨᠢᠭᠡ᠂ ᠡᠷᠭᠦᠯ ᠢ᠋ ᠬᠤᠷᠢᠶᠠᠵᠤ᠂ ᠨᠥᠭᠦᠭᠡ ᠨᠢ ᠠᠳᠢᠰ ᠲᠠᠯᠪᠢᠨᠠ᠃ ᠶᠡᠷᠦ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠳᠡᠭ ᠬᠡᠵᠢᠶᠡ ᠪᠣᠯᠪᠠᠴᠤ ᠡᠢᠮᠦ ᠪᠠᠢᠳᠠᠭ ᠢ᠋ ᠪᠠᠯᠳᠠᠨᠴᠡᠷᠢᠭ ᠰᠠᠢᠨ ᠮᠡᠳᠡᠬᠦ ᠪᠢᠯᠡ᠃ ᠭᠡᠪᠡᠴᠦ ᠣᠳᠣ ᠰᠠᠨᠠᠭᠠ ᠤᠷᠪᠠᠨ ᠰᠦᠰᠦᠭᠯᠡᠨ ᠪᠢᠰᠢᠷᠡᠬᠦ ᠪᠠᠨ ᠪᠣᠯᠢᠵᠤ ᠪᠠᠢᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠣᠭᠲᠣ ᠥᠭᠡᠷᠡ ᠨᠢᠳᠦ ᠪᠡᠷ ᠠᠵᠢᠨ ᠰᠢᠷᠲᠡᠬᠦ ᠠᠵᠢ᠃ ᠪᠣᠭᠳᠠ ᠶ᠋ᠢ ᠡᠷᠭᠢᠨ ᠵᠠᠯᠠᠷᠠᠬᠤ ᠳ᠋ᠤ᠌ ᠨᠢᠭᠡ ᠡᠪᠦᠭᠡᠰᠢᠶᠡᠷ ᠬᠥᠮᠦᠨ ᠪᠤᠰᠤᠳ ᠠ᠋ᠴᠠ ᠲᠡᠷᠢᠭᠦᠯᠡᠨ ᠲᠣᠯᠣᠭᠠᠢ ᠥᠨᠳᠡᠢᠯᠭᠡᠵᠦ᠄
— ᠠᠢ ᠲᠦᠮᠡᠨ ᠰᠣᠨᠣᠷᠲᠤ᠂ ᠮᠢᠩᠭᠠᠨ ᠮᠡᠯᠮᠡᠢᠲᠦ ᠪᠣᠭᠳᠠ ᠯᠠᠮᠠᠲᠠᠨ ᠮᠢᠨᠢ ᠠ᠋! ᠳᠣᠣᠷᠠᠲᠤ ᠱᠠᠪᠢ ᠨᠠᠷ ᠪᠢᠳᠡᠨ ᠦ᠌ ᠪᠡᠨ ᠭᠠᠯ ᠤᠰᠤᠨ ᠤ᠋ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠢ᠋ ᠳᠤᠯᠢᠳᠠᠨ ᠬᠠᠢᠷᠠᠯᠠᠵᠤ᠂ ᠠᠩᠭᠢᠵᠢᠷᠠᠭᠤᠯᠤᠨ ᠠᠪᠤᠷᠠ! ᠭᠡᠵᠦ ᠤᠬᠢᠯᠠᠨ ᠪᠠᠷᠬᠢᠷᠠᠬᠤ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠲᠥᠷᠥᠭᠦᠯᠭᠡ ᠪᠡᠨ ᠰᠠᠪᠠᠨ ᠤᠨᠠᠪᠠ᠃
ᠪᠠᠯᠳᠠᠨᠴᠡᠷᠢᠭ᠄《ᠦᠢ ᠣᠯᠠᠨ ᠢ᠋ ᠪᠠᠢᠲᠤᠭᠠᠢ᠂ ᠥᠪᠡᠷ ᠢ᠋ ᠪᠡᠨ ᠠᠪᠤᠷᠠᠬᠤ ᠴᠢᠳᠠᠯ ᠦᠭᠡᠢ ᠠᠮᠢᠲᠠᠨ ᠠ᠋ᠴᠠ ᠢᠩᠭᠢᠵᠦ ᠠᠪᠤᠷᠠᠯ ᠡᠷᠢᠬᠦ ᠴᠦ᠍ ᠭᠡᠵᠦ ᠳᠡ ᠴᠠᠪᠠᠰᠤ》 ᠭᠡᠵᠦ ᠪᠣᠳᠣᠨ ᠰᠠᠨᠠᠭᠠ ᠠᠯᠳᠠᠪᠠ᠃ ᠪᠣᠭᠳᠠ ᠶ᠋ᠢᠨ ᠥᠨᠳᠥᠷ ᠶᠠᠩᠫᠠᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠡᠮᠦᠨᠡ ᠡᠴᠡ ᠨᠢ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤᠨ ᠲᠦᠷᠦᠭᠦᠴᠢ ᠶ᠋ᠢᠨ ᠬᠢ ᠡᠴᠡ ᠢᠯᠡᠭᠦᠦ ᠤᠶᠠᠩᠭᠠᠯᠠᠨ ᠤᠭᠲᠤᠨᠠ᠃ ᠡᠨᠡ ᠨᠢ ᠠᠷᠤ ᠳ᠋ᠤᠨᠢ ᠦᠯᠡᠳᠡᠵᠦ ᠪᠠᠢᠭᠠ ᠰᠦᠰᠦᠭᠲᠡᠨ ᠨᠦ᠍ᠭᠦᠳ ᠲᠦ᠍ ᠮᠥᠨ ᠲᠩᠷᠢ ᠡᠴᠡ ᠪᠠᠭᠤᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠳᠠᠬᠢᠨ ᠲᠩᠷᠢ ᠳ᠋ᠡᠭᠡᠨ ᠵᠠᠯᠠᠷᠠᠵᠤ ᠪᠠᠢᠭᠠ ᠰᠢᠭ᠋ ᠢ᠋ᠶ᠋ᠡᠷ ᠰᠠᠨᠠᠭᠳᠠᠭᠤᠯᠤᠨᠠ᠃ ᠲᠡᠨᠳᠡ ᠡᠴᠡ ᠭᠡᠳᠡᠷᠭᠦ ᠡᠷᠭᠢᠨ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ᠨᠢ ᠲᠤᠩ ᠭᠤᠨᠢᠭ᠂ ᠨᠢᠭᠡ ᠲᠠᠯᠠ ᠠ᠋ᠴᠠ ᠪᠣᠭᠳᠠ ᠶ᠋ᠢᠨ ᠠᠯᠢᠪᠠ ᠪᠤᠷᠤᠩᠬᠤᠢ ᠮᠠᠭᠤ ᠶᠠᠪᠤᠳᠠᠯ ᠤ᠋ᠳ᠂ ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ ᠠᠷᠠᠳ ᠲᠦᠮᠡᠨ ᠦ᠌ ᠪᠡᠨ ᠰᠦᠰᠦᠭ ᠪᠢᠰᠢᠷᠡᠯ ᠳ᠋ᠦ᠍ ᠬᠡᠳᠦ ᠠᠪᠲᠠᠭᠳᠠᠭᠰᠠᠨ ᠪᠠᠢᠳᠠᠯ ᠡᠢᠮᠦ ᠬᠣᠶᠠᠷ ᠵᠦᠢᠯ ᠲᠣᠯᠣᠭᠠᠢ ᠳ᠋ᠤᠨᠢ ᠲᠠᠰᠤᠷᠠᠯᠲᠠ ᠦᠭᠡᠢ ᠡᠷᠭᠢᠯᠳᠦᠬᠦ ᠠᠵᠢ᠃ ᠬᠠᠰᠢᠶᠠᠨ ᠤ᠋ ᠪᠠᠨ ᠭᠠᠳᠠᠨᠠ ᠢᠷᠡᠭᠡᠳ ᠳᠣᠲᠣᠭᠰᠢ ᠣᠷᠣᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠳᠡᠮᠡᠢ ᠬᠡᠪᠲᠡᠬᠦ ᠡᠴᠡ ᠪᠡᠨ ᠬᠠᠯᠠᠰᠢᠷᠠᠭᠰᠠᠨ ᠪᠥᠭᠡᠳ ᠪᠠᠷᠠᠭᠤᠨ ᠲᠡᠢᠰᠢ ᠶᠠᠪᠤᠯᠠ᠃ ᠶᠣᠰᠣᠲᠠᠢ ᠳᠡᠮᠡᠢ ᠪᠠᠯᠠᠢ ᠡᠷᠭᠢᠭᠦᠦ ᠠᠮᠢᠲᠠᠨ ᠰᠢᠭ᠋ ᠶᠠᠪᠤᠭᠰᠠᠭᠠᠷ ᠪᠠᠢᠲᠠᠯᠠ ᠨᠠᠷᠠ ᠵᠢᠷᠭᠠᠪᠠ᠃ ᠭᠡᠯᠡ ᠴᠦ᠍ ᠭᠡᠰᠡᠨ ᠬᠠᠷᠢᠬᠤ ᠬᠦᠰᠡᠯ ᠠᠯᠠᠭᠠ᠃ ᠬᠠᠷᠢᠨ ᠲᠠᠨᠢᠯ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠢᠯ ᠭᠡᠷ ᠦ᠋ᠨ ᠨᠢᠭᠡᠨ ᠳ᠋ᠦ᠍ ᠣᠷᠣᠪᠠᠰᠤ ᠡᠷᠬᠡ ᠦᠭᠡᠢ ᠰᠡᠳᠬᠢᠯ ᠰᠡᠷᠭᠦᠨ ᠬᠥᠭᠵᠢᠬᠦ ᠪᠣᠯ ᠤᠤ ᠭᠡᠵᠦ ᠪᠣᠳᠣᠭᠳᠠᠪᠠ᠃