ᠲᠤᠭᠠᠷ ᠵᠠᠢᠰᠠᠩ ᠤ᠋ᠨ ᠲᠤᠬᠠᠢДогор зайсангийн тухай
484
ᠬᠠᠮᠪᠤ ᠪᠯᠠᠮᠠ ᠳ᠋ᠠᠮᠪᠠ ᠠᠶᠤᠰᠢᠶᠸᠪ
ᠲᠤᠭᠠᠷ ᠵᠠᠢᠰᠠᠩ ᠤ᠋ᠨ ᠲᠠᠯᠠ ᠪᠠᠷ ᠡᠯᠳᠡᠪ ᠶᠠᠩᠵᠤ ᠶ᠋ᠢᠨ ᠲᠡᠦᠬᠡ ᠪᠠᠢᠳᠠᠭ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠶᠠᠮᠠᠷ ᠴᠤ᠌ ᠪᠠᠢᠭᠰᠠᠨ ᠮᠣᠩᠭᠣᠯ ᠬᠥᠮᠦᠨ ᠪᠠᠢᠭᠰᠠᠨ ᠨᠢ ᠬᠥᠳᠡᠯᠦᠰᠢ ᠦᠭᠡᠢ ᠪᠠᠷᠢᠮᠲᠠ ᠶᠤᠮ᠃ ᠣᠳᠣ ᠠᠮᠠ ᠳᠠᠮᠵᠢᠭᠰᠠᠨ ᠪᠣᠯᠤᠭᠠᠳ ᠲᠡᠦᠬᠡ ᠶ᠋ᠢᠨ ᠵᠠᠷᠢᠮ ᠰᠤᠳᠤᠷ ᠪᠢᠴᠢᠭ ᠦ᠋ᠨ ᠳᠠᠭᠠᠤ ᠬᠡᠳᠦᠨ ᠦᠭᠡ ᠪᠢᠴᠢᠭᠯᠡᠶᠡ᠃ ᠠᠮᠠ ᠳᠠᠮᠵᠢᠭᠰᠠᠨ ᠶᠠᠷᠢᠶᠠ᠃ 5 ᠳ᠋ᠤᠭᠠᠷ ᠳᠠᠯᠠᠢ ᠯᠠᠮᠠ ᠯᠤᠪᠰᠠᠩᠵᠠᠮᠼᠤ ᠪᠠᠷ ᠥᠪᠡᠷ ᠦ᠋ᠨ ᠨᠢᠭᠡᠨ ᠰᠢᠳᠠᠷ ᠱᠠᠪᠢ ᠳ᠋ᠤ᠌ ᠪᠠᠨ ᠬᠥᠯᠭᠡᠨ ᠰᠤᠳᠤᠷ ᠡᠭᠦᠷᠦᠭᠦᠯᠦᠨ ᠮᠣᠩᠭᠣᠯ ᠤ᠋ᠨ ᠵᠦᠭ ᠶᠠᠪᠤᠭᠤᠯᠵᠠᠢ᠃ ᠶᠠᠪᠤᠬᠤ ᠦᠶᠡ ᠳ᠋ᠦ᠍ ᠨᠢ ᠳᠠᠯᠠᠢ ᠯᠠᠮᠠ 《ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠣᠷᠣᠭᠠᠳ ᠬᠠᠮᠤᠭ ᠤ᠋ᠨ ᠡᠬᠢᠯᠡᠵᠦ ᠲᠠᠭᠠᠷᠠᠭᠰᠠᠨ ᠠᠢᠯ ᠳ᠋ᠤ᠌ ᠪᠠᠨ ᠣᠷᠣᠭᠠᠳ ᠨᠣᠮ ᠢ᠋ᠶ᠋ᠠᠨ ᠵᠠᠳᠠᠯᠤᠭᠠᠷᠠᠢ》 ᠭᠡᠵᠦ ᠵᠠᠬᠢᠵᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠯᠠᠮᠠ ᠨᠠᠷ ᠢ᠋ ᠤᠯᠠᠭᠠᠨ ᠤ᠋᠂ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠯᠠᠮᠠ ᠭᠡᠵᠦ ᠢᠯᠭᠠᠬᠤ ᠳ᠋ᠤ᠌ ᠪᠠᠨ ᠨᠣᠮ ᠤ᠋ᠨ ᠬᠢ ᠨᠢ ᠪᠠᠷᠢᠨᠲᠠᠭ ᠢ᠋ᠶ᠋ᠠᠷ ᠢᠯᠭᠠᠳᠠᠭ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠥᠨᠥ ᠯᠠᠮᠠ ᠮᠣᠩᠭᠣᠯ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠲᠠᠭᠠᠷᠠᠯᠳᠤᠭᠰᠠᠨ ᠬᠠᠮᠤᠭ ᠤ᠋ᠨ ᠡᠬᠢᠨ ᠦ᠌ ᠠᠢᠯ ᠳ᠋ᠤ᠌ ᠪᠠᠨ ᠣᠷᠣᠵᠤ ᠭᠡᠨᠡ᠃ ᠨᠣᠮ ᠨᠢ ᠤᠯᠠᠭᠠᠨ ᠪᠠᠷᠢᠨᠲᠠᠭ ᠲᠠᠢ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠭᠡᠷ ᠦ᠋ᠨ ᠡᠵᠡᠨ ᠤᠯᠠᠭᠠᠨ ᠤ᠋ ᠯᠠᠮᠠ ᠭᠡᠮᠡᠨ ᠪᠣᠳᠣᠵᠤ ᠪᠠᠢᠲᠠᠯᠠ ᠯᠠᠮᠠ ᠨᠣᠮ ᠢ᠋ᠶ᠋ᠠᠨ ᠵᠠᠳᠠᠯᠤᠭᠰᠠᠨ ᠳ᠋ᠤ᠌ ᠠᠬᠢᠨ ᠨᠢᠭᠡ ᠰᠢᠷᠠ ᠪᠠᠷᠢᠨᠲᠠᠭ ᠲᠠᠢ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠭᠡᠷ ᠦ᠋ᠨ ᠡᠵᠡᠨ ᠲᠥᠪᠡᠳ ᠲᠦ᠍ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠬᠤᠮᠢᠭᠳᠠᠵᠤ ᠪᠣᠢ ᠶ᠋ᠢ ᠤᠬᠠᠨ ᠣᠢᠯᠠᠭᠠᠵᠤ ᠥᠪᠡᠷ ᠦ᠋ᠨ ᠠᠴᠢᠶᠠ ᠪᠠᠷᠠᠭᠠ ᠶ᠋ᠢ ᠪᠠᠭᠯᠠᠨ ᠳᠣᠭᠰᠢᠨ ᠴᠠᠭᠠᠨ ᠡᠮᠨᠢᠭ ᠲᠡᠮᠡᠭᠡ ᠪᠡᠨ ᠤᠨᠤᠨ ᠲᠥᠪᠡᠳ ᠲᠦ᠍ ᠣᠴᠢᠭᠠᠳ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠳᠡᠯᠭᠡᠷᠡᠬᠦ ᠳ᠋ᠦ᠍ ᠰᠠᠭᠠᠳ ᠬᠢᠭᠴᠢ ᠬᠣᠣᠷᠲᠠᠨ ᠨᠤᠭᠤᠳ ᠢ᠋ ᠨᠣᠮᠣᠬᠠᠳᠬᠠᠬᠤ ᠳ᠋ᠤ᠌ ᠶᠡᠬᠡ ᠲᠤᠰᠠ ᠬᠦᠷᠭᠡᠭᠰᠡᠨ ᠬᠡᠮᠡᠳᠡᠭ᠃ ᠮᠥᠨ ᠲᠥᠪᠡᠳ ᠡᠴᠡ ᠢᠷᠡᠭᠰᠡᠨ ᠨᠢᠭᠡᠨ ᠨᠠᠢᠵᠠ ᠠ᠋ᠴᠠ ᠪᠠᠨ ᠰᠣᠨᠣᠰᠬᠤ ᠳ᠋ᠤ᠌ ᡀᠠᠰᠠ ᠬᠣᠲᠠ ᠳ᠋ᠤ᠌ ᠴᠠᠭᠠᠨ ᠲᠡᠮᠡᠭᠡ ᠤᠨᠤᠭᠰᠠᠨ ᠲᠤᠭᠠᠷ ᠵᠠᠢᠰᠠᠩ ᠤ᠋ᠨ ᠨᠢᠭᠡᠨ ᠬᠥᠷᠥᠭ ᠪᠠᠢᠳᠠᠭ ᠭᠡᠵᠦ ᠳᠤᠭᠤᠯᠤᠯᠠ᠃
ᠲᠡᠦᠬᠡ ᠶ᠋ᠢᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠳᠣᠲᠣᠷᠠ ᠮᠢᠨᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯ ᠲᠥᠪᠡᠳ ᠲᠦ᠍ ᠤᠯᠤᠰ ᠲᠥᠷᠥ ᠶ᠋ᠢᠨ ᠡᠷᠬᠡ ᠮᠠᠲᠠᠯ ᠠ᠋ᠴᠠ ᠪᠣᠯᠵᠤ ᠥᠪᠡᠷ ᠥᠪᠡᠷᠰᠡᠳ ᠦ᠋ᠨ ᠰᠢᠳᠦᠨ ᠪᠢᠰᠢᠷᠡᠳᠡᠭ ᠱᠠᠰᠢᠨ ᠢ᠋ ᠮᠠᠨᠳᠤᠭᠤᠯᠵᠤ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠳᠠᠮᠵᠢᠭᠤᠯᠵᠤ ᠥᠪᠡᠷ ᠦ᠋ᠨ ᠡᠷᠬᠡ ᠳᠠᠷᠬᠠ ᠶ᠋ᠢ ᠲᠣᠭᠲᠠᠭᠠᠬᠤ ᠣᠷᠣᠯᠳᠣᠯᠭᠠ ᠪᠠᠷ ᠡᠭᠦᠳᠦᠭᠰᠡᠨ ᠢᠷ ᠬᠢᠮᠤᠷᠠᠯ ᠠ᠋ᠴᠠ ᠪᠣᠯᠵᠤ ᠲᠥᠪᠡᠳ ᠦ᠋ᠨ ᠬᠠᠮᠤᠭ ᠤ᠋ᠨ ᠣᠳᠬᠠᠨ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠤᠷᠤᠰᠬᠠᠯ ᠪᠣᠯᠬᠤ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠰᠦᠮᠡ ᠬᠡᠢᠳ ᠢ᠋ ᠨᠤᠷᠠᠭᠠᠨ ᠬᠤᠲᠤᠭᠲᠤ ᠬᠤᠪᠢᠯᠭᠠᠳ ᠢ᠋ ᠬᠢᠬᠠᠨ ᠬᠠᠪᠴᠢᠬᠤ ᠦᠶᠡ ᠳ᠋ᠦ᠍ ᠲᠡᠷᠡ ᠬᠢᠮᠤᠷᠠᠯ ᠰᠠᠮᠠᠭᠤᠨ ᠢ᠋ ᠠᠷᠢᠯᠭᠠᠬᠤ ᠪᠠᠷ ᠲᠥᠪᠡᠳ ᠲᠦ᠍ ᠢᠷᠡᠭᠰᠡᠨ ᠭᠦᠦᠰᠢ ᠬᠠᠭᠠᠨ ᠤ᠋ ᠨᠢᠭᠡᠨ ᠲᠦᠮᠡᠲᠦ ᠶ᠋ᠢᠨ ᠨᠣᠶᠠᠨ ᠪᠠᠢᠵᠠᠢ᠃ ᠲᠡᠢᠮᠦ ᠳ᠋ᠦ᠍ ᠪᠡᠨ ᠴᠦ᠍ ᠬᠠᠮᠢᠭᠠ ᠣᠴᠢᠭᠰᠠᠨ ᠭᠠᠵᠠᠷ ᠤ᠋ᠨ ᠬᠡᠢᠳ ᠣᠷᠣᠨ ᠳ᠋ᠤ᠌ ᠪᠣᠭᠳᠠ ᠽᠤᠩᠺᠠᠪᠠ ᠶ᠋ᠢᠨ ᠳᠦᠷᠢ ᠬᠥᠷᠥᠭ ᠢ᠋ ᠵᠠᠯᠠᠭᠠ ᠦᠭᠡᠢ ᠪᠣᠯ ᠶᠡᠬᠡ ᠬᠢᠯᠢᠩᠨᠡᠳᠡᠭ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠳ᠋ᠦ᠍ ᠨᠢ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠤᠯᠠᠭᠠᠨ ᠤ᠋ ᠱᠠᠰᠢᠨ ᠤ᠋ ᠵᠠᠷᠢᠮ ᠯᠠᠮᠠ ᠨᠠᠷ ᠨᠢᠭᠤᠴᠠ ᠪᠠᠷ ᠬᠤᠤᠪᠢᠯᠳᠤᠨ ᠥᠭᠡᠳᠡ ᠡᠴᠡ ᠨᠢ ᠭᠠᠯᠵᠠᠭᠤ ᠪᠠᠷᠰ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠥᠨᠥ ᠭᠠᠯᠵᠠᠭᠤ ᠪᠠᠷᠰ ᠢ᠋ ᠨᠣᠮᠣᠬᠠᠷᠠᠭᠤᠯᠤᠨ ᠬᠥᠲᠥᠯᠦᠭᠡᠳ ᠠᠪᠴᠤ ᠢᠷᠡᠭᠰᠡᠨ ᠭᠡᠵᠦ ᠤᠩᠰᠢᠭᠰᠠᠨ᠃ ᠮᠥᠨ ᠣᠳᠣ ᠶ᠋ᠢ ᠬᠦᠷᠲᠡᠯᠡ ᠲᠡᠭᠦᠨ ᠦ᠌ ᠰᠡᠯᠡᠮᠡ ᠪᠠᠢᠳᠠᠭ ᠪᠥᠭᠡᠳ ᠲᠡᠷᠡ ᠰᠡᠯᠡᠮᠡ ᠶ᠋ᠢ ᠪᠠᠷᠢᠵᠤ ᠦᠵᠡᠭᠰᠡᠨ ᠪᠥᠬᠡᠴᠦᠳ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ ᠳᠡᠢᠯᠦᠭᠡ ᠦᠭᠡᠢ ᠭᠡᠵᠦ ᠲᠤᠭᠤᠯᠤᠭᠰᠠᠨ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠲᠤᠭᠠᠷ ᠵᠠᠢᠰᠠᠩ ᠨᠢ ᠲᠥᠪᠡᠳ ᠲᠦ᠍ ᠰᠣᠭᠪᠣ ᠳ᠋ᠠᠭᠲ᠋ᠢᠳ ᠪᠤᠶᠤ ᠪᠠᠷᠰ ᠬᠥᠲᠥᠯᠦᠭᠰᠡᠨ ᠮᠣᠩᠭᠣᠯ ᠭᠡᠵᠦ ᠣᠳᠣ ᠶ᠋ᠢ ᠬᠦᠷᠲᠡᠯᠡ ᠶᠡᠬᠡᠳᠡ ᠳᠡᠭᠡᠳᠦᠯᠡᠨ ᠬᠦᠨᠳᠦᠯᠡᠨ ᠰᠢᠲᠦᠭᠰᠡᠭᠡᠷ ᠪᠠᠢᠳᠠᠭ᠃ ᠲᠡᠭᠦᠨ ᠦ᠌ ᠳᠦᠷᠢ ᠵᠢᠷᠤᠭ ᠠᠢᠯ ᠳ᠋ᠤ᠌ ᠪᠠᠢᠪᠠᠰᠤ ᠠᠯᠢᠪᠠ ᠮᠠᠭᠤ ᠮᠠᠭᠤᠬᠠᠢ ᠶᠠᠭᠤᠮᠠᠰ ᠬᠣᠯᠠᠳᠠᠨ ᠵᠠᠢᠯᠠᠳᠠᠭ ᠭᠡᠵᠦ ᠶᠠᠷᠢᠳᠠᠭ᠃
ᠢᠷᠡᠯᠲᠡ᠄ ᠢᠪᠠᠯᠭᠠ ᠶ᠋ᠢᠨ ᠳ᠋ᠠᠼᠠᠩ 《 ᠬᠠᠮᠪᠤ ᠶ᠋ᠢᠨ ᠬᠦᠷᠢᠶᠡ》
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠨᠠᠪᠴᠢ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ