ᠬᠦᠯᠦᠭ ᠰᠢᠨᠵᠢᠭᠡᠴᠢ ᠨᠢᠰᠤᠩᠬᠠᠢ ᠵᠢᠭᠠᠯ-ᠰᠣᠷᠭᠣᠭХөлөг шинжээч нусанхай жаалсрг-Соргог
3677ᠬᠦᠯᠦᠭ ᠰᠢᠨᠵᠢᠭᠡᠴᠢ ᠨᠢᠰᠤᠩᠬᠠᠢ ᠵᠢᠭᠠᠯ
ᠤᠩᠰᠢᠬᠴᠢ᠄ ᠰᠣᠷᠭᠣᠭ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌᠂ ᠠᠯᠲᠠᠢ ᠬᠠᠩᠭᠠᠢ ᠳ᠋ᠤ᠌ ᠨᠤᠲᠤᠭ ᠲᠠᠢ ᠠᠷᠪᠠᠨ ᠲᠦᠮᠡᠨ ᠠᠳᠤᠭᠤ ᠲᠠᠢ᠂ ᠠᠯᠳᠠᠷ ᠴᠣᠯᠠ ᠮᠠᠨᠳᠤᠭᠰᠠᠨ ᠠᠯᠠᠭᠲᠠᠢ ᠪᠠᠶᠠᠨ ᠭᠡᠵᠦ ᠪᠠᠢᠵᠠᠢ᠃ ᠠᠯᠠᠭᠲᠠᠢ ᠪᠠᠶᠠᠨ ᠤ᠋ ᠠᠳᠤᠭᠤ ᠮᠠᠯ ᠨᠢ ᠣᠯᠠᠨ ᠪᠣᠯᠬᠣᠷ ᠠᠯᠪᠠᠲᠤ ᠵᠠᠷᠤᠴᠠ ᠨᠢ ᠴᠦ᠍ ᠠᠷᠪᠢᠨ ᠪᠠᠢᠵᠠᠢ᠃ ᠭᠡᠪᠡᠴᠦ ᠠᠯᠠᠭᠲᠠᠢ ᠪᠠᠶᠠᠨ ᠬᠠᠷᠢᠨ《 ᠠᠷᠪᠠᠨ ᠲᠦᠮᠡᠨ ᠠᠳᠤᠭᠤᠨ ᠳ᠋ᠤ᠌ ᠮᠢᠨᠢ ᠠᠵᠢᠨᠠᠢ ᠬᠦᠯᠦᠭ ᠨᠢᠭᠡ ᠴᠦ᠍ ᠦᠭᠡᠢ᠂ ᠠᠯᠪᠠᠲᠤ ᠵᠠᠷᠤᠴᠠ ᠠᠷᠪᠢᠨ ᠪᠣᠯᠪᠠᠴᠤ ᠬᠦᠯᠦᠭ ᠰᠢᠨᠵᠢᠭᠡᠴᠢ ᠨᠢᠭᠡ ᠴᠦ᠍ ᠦᠭᠡᠢ》 ᠭᠡᠵᠦ ᠦᠷᠭᠦᠯᠵᠢ ᠭᠣᠩᠰᠣᠷᠠᠳᠠᠭ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠠᠯᠠᠭᠲᠠᠢ ᠪᠠᠶᠠᠨ ᠠᠳᠤᠭᠤᠨ ᠤ᠋ ᠪᠠᠨ ᠡᠮᠦᠨᠡ ᠡᠴᠡ ᠵᠢᠷᠣᠭᠠ ᠰᠠᠭᠠᠷᠠᠯ ᠢ᠋ᠶ᠋ᠠᠨ ᠤᠨᠤᠨ ᠵᠢᠷᠪᠢᠯᠵᠡᠭᠦᠯᠦᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠲᠡᠭᠦᠨ ᠦ᠌ ᠠᠳᠤᠭᠤ ᠶ᠋ᠢ ᠬᠠᠷᠢᠭᠤᠯᠳᠠᠭ ᠠᠷᠪᠠᠨ ᠲᠠᠪᠤᠲᠠᠢ ᠨᠢᠰᠤᠩᠬᠠᠢ ᠵᠢᠭᠠᠯ ᠬᠠᠷᠢᠨ ᠨᠢᠭᠡ ᠦᠬᠦᠭᠰᠡᠨ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠲᠡᠪᠡᠷᠢᠨ ᠨᠢᠭᠡ ᠶᠠᠭᠤᠮᠠ ᠳᠦᠳᠦᠨᠡᠵᠦ ᠪᠠᠢᠭᠰᠠᠨ ᠭᠡᠨᠡ᠃ ᠠᠯᠠᠭᠲᠠᠢ ᠪᠠᠶᠠᠨ ᠶᠡᠬᠡᠳᠡ ᠭᠠᠢᠬᠠᠨ ᠴᠢᠩᠨᠠᠬᠤᠯᠠᠷ᠂《 ᠬᠡᠨ ᠴᠢᠮᠠ ᠶ᠋ᠢ ᠠᠵᠢᠨᠠᠢ ᠬᠦᠯᠦᠭ ᠦ᠋ᠨ ᠲᠣᠯᠣᠭᠠᠢ ᠭᠡᠬᠦ ᠪᠣᠢ? ᠬᠡᠨ ᠨᠠᠮᠠ ᠶ᠋ᠢ ᠬᠦᠯᠦᠭ ᠰᠢᠨᠵᠢᠭᠡᠴᠢ ᠶ᠋ᠢᠨ ᠬᠦᠦ ᠭᠡᠵᠦ ᠰᠠᠨᠠᠬᠤ ᠪᠣᠢ?》 ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ᠂ ᠠᠯᠠᠭᠲᠠᠢ ᠪᠠᠶᠠᠨ ᠳᠣᠲᠣᠷᠠ ᠪᠠᠨ《 ᠮᠠᠭᠤ ᠨᠢᠰᠤᠩᠬᠠᠢ ᠵᠢᠭᠠᠯ ᠴᠢᠨᠢ ᠦᠬᠦᠭᠰᠡᠨ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠬᠦᠷᠲᠡᠯᠡ ᠲᠠᠨᠢᠯᠠ ᠭᠡᠵᠦ ᠦᠯᠢᠶᠡᠳᠡᠭ ᠬᠦᠦ ᠪᠠᠢᠨᠠ》 ᠭᠡᠵᠦ ᠪᠣᠳᠣᠭᠠᠳ ᠲᠡᠷᠡ ᠨᠢᠰᠤᠩᠬᠠᠢ ᠵᠢᠭᠠᠯ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠨ᠄《 ᠴᠢ ᠮᠣᠷᠢ ᠰᠢᠨᠵᠢᠳᠡᠭ ᠤᠤ? ᠮᠢᠨᠦ ᠠᠷᠪᠠᠨ ᠲᠦᠮᠡᠨ ᠠᠳᠤᠭᠤᠨ ᠳ᠋ᠤ᠌ ᠠᠵᠢᠨᠠᠢ ᠬᠦᠯᠦᠭ ᠬᠡᠳᠦ ᠪᠠᠢᠨᠠ?》 ᠭᠡᠵᠦ ᠠᠰᠠᠭᠤᠵᠠᠢ᠃
ᠨᠢᠰᠤᠩᠬᠠᠢ ᠵᠢᠭᠠᠯ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠤᠷᠤᠯᠳᠤᠨ ᠨᠠᠭᠠᠳᠴᠤ ᠪᠠᠢᠭᠰᠠᠭᠠᠷ ᠠᠮᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ᠄《 ᠮᠢᠨᠦ ᠠᠪᠤ ᠪᠣᠯ ᠨᠡᠷᠡᠲᠡᠢ ᠬᠦᠯᠦᠭ ᠰᠢᠨᠵᠢᠭᠡᠴᠢ ᠪᠠᠢᠭᠰᠠᠨ᠃ ᠪᠢ ᠪᠣᠯ ᠵᠥᠪᠬᠡᠨ ᠪᠠᠷᠤᠭᠴᠠᠭᠠᠯᠠᠳᠠᠭ᠃ ᠲᠠᠨ ᠤ᠋ ᠠᠳᠤᠭᠤᠨ ᠳ᠋ᠤ᠌ ᠠᠵᠢᠨᠠᠢ ᠬᠦᠯᠦᠭ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠪᠢ ᠬᠠᠷᠢᠨ ᠠᠩᠬᠠᠷᠤᠭᠰᠠᠨ ᠦᠭᠡᠢ ᠰᠢᠦ》 ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠡᠢ᠃
ᠲᠡᠭᠡᠬᠦᠯᠡᠷ ᠠᠯᠠᠭᠲᠠᠢ ᠪᠠᠶᠠᠨ᠄《 ᠪᠢ ᠮᠠᠷᠭᠠᠰᠢ ᠠᠳᠤᠭᠤ ᠪᠠᠨ ᠪᠦᠬᠦᠨ ᠢ᠋ ᠴᠤᠭᠯᠠᠭᠤᠯᠵᠤ ᠤᠰᠤᠯᠠᠶᠠ᠃ ᠴᠢ ᠬᠤᠳᠳᠤᠭ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠭᠠᠳ ᠨᠢᠭᠲᠠᠯᠠᠵᠤ ᠦᠵᠡ᠃ ᠬᠡᠷᠪᠡ ᠬᠤᠳᠠᠯ ᠬᠡᠯᠡᠵᠦ ᠬᠤᠤᠳᠤᠤ ᠶᠠᠷᠢᠪᠠᠯ ᠠᠷᠠᠰᠤ ᠶ᠋ᠢ ᠴᠢᠨᠢ ᠱᠠᠭᠠᠯᠵᠤ ᠰᠢᠷᠪᠥᠰᠥ ᠶ᠋ᠢ ᠴᠢᠨᠢ ᠰᠤᠭᠤᠯᠤᠨᠠ ᠰᠢᠦ》 ᠭᠡᠵᠦ ᠬᠠᠲᠠᠭᠤ ᠵᠠᠬᠢᠶᠠ ᠦᠭᠭᠦᠭᠰᠡᠨ ᠳ᠋ᠦ᠍ ᠨᠢᠰᠤᠩᠬᠠᠢ ᠵᠢᠭᠠᠯ ᠠᠷᠭᠠ ᠦᠭᠡᠢ ᠵᠥᠪᠰᠢᠶᠡᠷᠡᠵᠡᠢ᠃ ᠮᠠᠷᠭᠠᠰᠢ ᠨᠢ ᠪᠣᠯᠬᠤᠯᠠᠷ ᠠᠯᠠᠭᠲᠠᠢ ᠪᠠᠶᠠᠨ ᠠᠳᠤᠭᠤ ᠪᠠᠨ ᠴᠤᠭᠯᠠᠭᠤᠯᠵᠤ ᠤᠰᠤᠯᠠᠵᠠᠢ᠃ ᠨᠢᠰᠤᠩᠬᠠᠢ ᠵᠢᠭᠠᠯ ᠬᠤᠳᠳᠤᠭ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠵᠣᠭᠰᠣᠨ ᠤᠰᠤ ᠤᠤᠭᠤᠭᠰᠠᠨ ᠮᠣᠷᠢᠳ ᠢ᠋ ᠰᠢᠨᠵᠢᠵᠦ ᠪᠠᠢᠭᠰᠠᠨ ᠳ᠋ᠤ᠌ ᠠᠯᠠᠭᠲᠠᠢ ᠪᠠᠶᠠᠨ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠭᠠᠳ᠄《 ᠡᠨᠡ ᠮᠣᠷᠢ ᠮᠥᠨ ᠤᠤ? ᠲᠡᠷᠡ ᠮᠣᠷᠢ ᠶᠠᠮᠠᠷ ᠪᠠᠢᠨᠠ?》 ᠭᠡᠵᠦ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠮᠣᠷᠢᠳ ᠢ᠋ ᠵᠢᠭᠠᠭᠠᠳ ᠠᠰᠠᠭᠤᠵᠤ ᠯᠠ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠨᠢᠰᠤᠩᠬᠠᠢ ᠵᠢᠭᠠᠯ ᠪᠦᠷ ᠯᠡ ᠲᠣᠯᠣᠭᠠᠢ ᠰᠠᠵᠢᠨ ᠥᠩᠭᠡᠷᠡᠭᠡᠵᠡᠢ᠃ ᠬᠡᠳᠦᠨ ᠤᠳᠠᠭᠠ ᠵᠣᠭᠰᠣᠭᠠᠳ ᠪᠦᠷ ᠦᠭᠡᠢ ᠪᠣᠯᠬᠤᠯᠠᠷ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠳᠡᠷᠭᠡᠳᠡ ᠨᠢ ᠵᠣᠭᠰᠣᠬᠤ ᠪᠠᠨ ᠴᠤ᠌ ᠪᠣᠯᠢᠵᠤ ᠠᠷᠪᠠᠭᠠᠳ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠪᠦᠬᠦ ᠠᠳᠤᠭᠤ ᠪᠠᠷᠤᠭ ᠤᠤᠭᠤᠭᠠᠳ ᠪᠠᠷᠠᠬᠤ ᠦᠶᠡ ᠪᠡᠷ ᠨᠢᠭᠡ ᠱᠤᠪᠲᠤᠩ ᠰᠡᠭᠦᠯ ᠲᠡᠢ᠂ ᠬᠤᠯᠤᠭᠠᠷ ᠴᠢᠬᠢ ᠲᠡᠢ᠂ ᠨᠢᠷᠤᠭᠤᠨ ᠳ᠋ᠤ᠌ ᠪᠠᠨ ᠲᠠᠭᠠᠷᠢ ᠲᠠᠢ ᠪᠠᠭᠠᠰᠤᠩᠬᠠᠢ ᠳᠠᠭᠠ ᠢᠷᠡᠵᠦ ᠤᠰᠤ ᠤᠤᠭᠤᠭᠰᠠᠨ ᠢ᠋ ᠨᠢᠰᠤᠩᠬᠠᠢ ᠵᠢᠭᠠᠯ ᠦᠵᠡᠩᠭᠦᠲᠡ ᠪᠡᠨ᠄《 ᠡᠨᠡ ᠪᠣᠯ ᠶᠠᠭ ᠰᠠᠢᠬᠠᠨ ᠡᠳᠦᠷ ᠲᠦ᠍ ᠮᠢᠩᠭᠠᠨ ᠭᠠᠵᠠᠷ ᠳᠠᠪᠬᠢᠬᠤ ᠵᠣᠷᠢᠭ ᠲᠠᠢ ᠮᠥᠷᠲᠡᠭᠡᠨ ᠴᠢᠳᠠᠯ ᠲᠠᠢ ᠠᠵᠢᠨᠠᠢ ᠬᠦᠯᠦᠭ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠬᠥᠮᠦᠰ ᠪᠦᠷ ᠢᠨᠢᠶᠡᠯᠴᠡᠭᠡᠳ ᠢᠲᠡᠭᠡᠭᠰᠡᠨ ᠦᠭᠡᠢ ᠭᠡᠨᠡ᠃ ᠠᠯᠠᠭᠲᠠᠢ ᠪᠠᠶᠠᠨ ᠴᠦ᠍᠄《 ᠮᠢᠨᠦ ᠲᠡᠳᠦᠢᠴᠢᠨᠡᠭᠡᠨ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠪᠦᠳᠦᠭᠦᠨ ᠪᠦᠳᠦᠭᠦᠨ ᠮᠣᠷᠢᠳ ᠢ᠋ ᠲᠣᠯᠣᠭᠠᠢ ᠰᠠᠵᠢᠨ ᠥᠩᠭᠡᠷᠡᠭᠡᠵᠦ ᠲᠠᠯᠪᠢᠴᠢᠬᠠᠭᠠᠳ ᠬᠠᠷᠢᠨ ᠡᠨᠡ ᠮᠠᠭᠤ ᠡᠴᠡᠵᠦ ᠲᠤᠷᠠᠭᠠᠳ ᠦᠬᠦᠬᠦ ᠳ᠋ᠦ᠍ ᠪᠡᠨ ᠣᠢᠷᠠᠲᠤᠭᠰᠠᠨ ᠪᠠᠭᠠᠰᠤᠩᠬᠠᠢ ᠳᠠᠭᠠ ᠶ᠋ᠢ ᠮᠠᠨᠢ ᠠᠵᠢᠨᠠᠢ ᠬᠦᠯᠦᠭ ᠭᠡᠨᠡ ᠤᠤ?》 ᠭᠡᠳ ᠠᠭᠤᠷᠯᠠᠭᠰᠠᠨ ᠳ᠋ᠤ᠌ ᠨᠢᠰᠤᠩᠬᠠᠢ ᠵᠢᠭᠠᠯ᠄《 ᠨᠣᠶᠠᠨ ᠠᠪᠤ ᠠ᠋᠂ ᠲᠤᠩᠭᠠᠵᠤ ᠬᠠᠢᠷᠠᠯᠠ! ᠠᠵᠢᠨᠠᠢ ᠬᠦᠯᠦᠭ ᠭᠡᠭᠴᠢ ᠲᠠᠷᠭᠤᠨ ᠡᠴᠡᠩᠬᠡᠢ ᠳᠡᠭᠡᠷᠡ ᠪᠠᠢᠳᠠᠭ ᠪᠢᠰᠢ ᠰᠢᠦ᠃ ᠬᠠᠷᠢᠨ ᠲᠡᠭᠦᠨ ᠦ᠌ ᠤᠳᠤᠮ ᠤᠭᠰᠠᠭᠠ ᠳᠡᠭᠡᠷᠡ ᠪᠡᠨ ᠪᠠᠢᠳᠠᠭ ᠶᠤᠮ᠃ ᠶᠠᠮᠠᠷ ᠴᠤ᠌ ᠮᠣᠷᠢ ᠶ᠋ᠢ ᠰᠠᠢᠲᠤᠷ ᠠᠷᠠᠴᠢᠯᠠᠨ ᠲᠡᠵᠢᠭᠡᠪᠡᠯ ᠪᠦᠷ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠪᠣᠯᠵᠤ ᠴᠢᠳᠠᠨᠠ》 ᠭᠡᠬᠦᠯᠡᠷ《 ᠲᠡᠭᠡᠪᠡᠯ ᠴᠢ ᠡᠨᠡ ᠮᠠᠭᠤ ᠠᠷᠠᠰᠤ ᠶ᠋ᠢ ᠲᠡᠵᠢᠭᠡᠭᠡᠳ ᠠᠵᠢᠨᠠᠢ ᠬᠦᠯᠦᠭ ᠪᠣᠯᠭᠠᠴᠢᠬᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠮᠠ ᠲᠠᠢ ᠬᠡᠯᠡᠯᠴᠡᠭᠰᠡᠨ ᠴᠦ᠍ ᠣᠷᠣᠢᠲᠠᠬᠤ ᠦᠭᠡᠢ》 ᠭᠡᠵᠦ ᠲᠡᠷᠡ ᠳᠠᠭᠠ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠲᠤᠰᠢᠶᠠᠭᠰᠠᠨ ᠭᠡᠨᠡ᠃
ᠨᠢᠰᠤᠩᠬᠠᠢ ᠵᠢᠭᠠᠯ ᠤᠰᠤᠨ ᠤ᠋ ᠲᠤᠩᠭᠠᠯᠠᠭ ᠡᠪᠡᠰᠦᠨ ᠦ᠌ ᠰᠣᠷᠭᠣᠭ ᠢ᠋ ᠡᠷᠢᠵᠦ᠂ ᠪᠠᠭᠠᠰᠤᠩᠬᠠᠢ ᠳᠠᠭᠠ ᠪᠠᠨ ᠨᠠᠷᠢᠨ ᠬᠢᠨᠠᠮᠠᠭᠠᠢ ᠠᠷᠠᠴᠢᠯᠠᠨ ᠲᠡᠵᠢᠭᠡᠭᠰᠡᠭᠡᠷ ᠪᠠᠢᠭᠠᠳ ᠴᠣᠭ ᠵᠢᠪᠬᠤᠯᠠᠩᠲᠠᠢ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠮᠣᠷᠢ ᠪᠣᠯᠭᠠᠴᠢᠬᠠᠵᠠᠢ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠨᠢᠰᠤᠩᠬᠠᠢ ᠵᠢᠭᠠᠯ ᠥᠨᠥᠬᠢ ᠮᠣᠷᠢ ᠪᠠᠨ ᠵᠠᠰᠠᠵᠤ ᠴᠢᠮᠡᠴᠢᠬᠡᠭᠡᠳ ᠠᠯᠠᠭᠲᠠᠢ ᠪᠠᠶᠠᠨ ᠳ᠋ᠤ᠌ ᠠᠪᠠᠴᠢᠨ᠄《 ᠮᠠᠷᠭᠠᠰᠢ ᠪᠢ ᠲᠠᠨ ᠳ᠋ᠤ᠌ ᠤᠨᠤᠵᠤ ᠦᠵᠡᠭᠦᠯᠦᠶᠡ᠃ ᠬᠣᠶᠠᠷ ᠤᠭᠤᠲᠠ ᠦᠨᠡᠰᠦ᠂ ᠬᠣᠶᠠᠷ ᠤᠭᠤᠲᠠ ᠴᠢᠪᠠᠭᠠ ᠪᠡᠯᠡᠳᠬᠡᠭᠡᠳ ᠪᠠᠢᠭᠠᠷᠠᠢ》 ᠭᠡᠰᠡᠨ ᠳ᠋ᠦ᠍ ᠠᠯᠠᠭᠲᠠᠢ ᠪᠠᠶᠠᠨ ᠳᠣᠲᠣᠷᠠ ᠪᠠᠨ《 ᠮᠠᠭᠠᠳ ᠴᠤ᠌ ᠪᠣᠯᠪᠠ ᠤᠤ?》 ᠭᠡᠳ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠪᠡᠯᠡᠳᠬᠡᠵᠦ ᠲᠠᠯᠪᠢᠵᠠᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠨᠢᠰᠤᠩᠬᠠᠢ ᠵᠢᠭᠠᠯ ᠠᠵᠢᠨᠠᠢ ᠬᠦᠯᠦᠭ ᠲᠦ᠍ ᠪᠡᠨ ᠡᠮᠡᠭᠡᠯ ᠳᠤᠬᠤᠨ ᠬᠣᠶᠠᠷ ᠤᠭᠤᠲᠠ ᠦᠨᠡᠰᠦ᠂ ᠬᠣᠶᠠᠷ ᠤᠭᠤᠲᠠ ᠴᠢᠪᠠᠭᠠ ᠪᠠᠨ ᠠᠴᠢᠭᠠᠳ ᠠᠯᠠᠪᠬᠢᠨ ᠮᠣᠷᠳᠠᠮᠠᠭᠴᠠ ᠬᠦᠯᠦᠭ ᠨᠢ ᠡᠵᠡᠨ ᠦ᠌ ᠪᠡᠨ ᠰᠠᠨᠠᠭᠠ ᠶ᠋ᠢ ᠮᠡᠳᠡᠭᠰᠡᠨ ᠰᠢᠭ ᠰᠠᠯᠬᠢ ᠠ᠋ᠴᠠ ᠳᠡᠯᠢᠮ ᠲᠦᠷᠭᠡᠨ᠂ ᠰᠠᠨᠠᠭᠠᠨ ᠠ᠋ᠴᠠ ᠠᠯᠲᠠ ᠬᠤᠷᠳᠤᠨ ᠳᠠᠪᠬᠢᠵᠤ᠂ ᠬᠣᠶᠠᠷ ᠤᠭᠤᠲᠠ ᠦᠨᠡᠰᠦ ᠨᠢ ᠪᠤᠲᠠᠷᠠᠵᠤ ᠲᠡᠭᠷᠢ ᠲᠤᠯᠤᠮᠠ ᠲᠣᠭᠣᠰᠣ ᠳᠡᠭᠳᠡᠭᠡᠨ ᠪᠠᠷᠠ ᠦᠭᠡᠢ ᠪᠣᠯᠵᠠᠢ᠃
ᠠᠯᠠᠭᠲᠠᠢ ᠪᠠᠶᠠᠨ ᠠᠷᠤ ᠠ᠋ᠴᠠ ᠨᠢ ᠮᠡᠯᠡᠷᠡᠵᠦ ᠪᠠᠢᠭᠰᠠᠭᠠᠷ ᠭᠡᠨᠡᠳᠲᠡ᠄《 ᠬᠤᠷᠳᠤᠨ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠠᠪᠴᠢᠷᠠ! ᠮᠢᠨᠦ ᠠᠵᠢᠨᠠᠢ ᠬᠦᠯᠦᠭ ᠢ᠋ ᠤᠨᠤᠭᠠᠳ ᠳᠤᠲᠠᠭᠠᠴᠢᠬᠠᠯᠠ!》 ᠭᠡᠵᠦ ᠪᠠᠷᠬᠢᠷᠠᠭᠰᠠᠨ ᠪᠣᠯᠪᠠᠴᠤ ᠨᠢᠭᠡᠨᠲᠡ ᠣᠷᠣᠢᠲᠠᠵᠠᠢ᠃ ᠠᠯᠠᠭᠲᠠᠢ ᠪᠠᠶᠠᠨ ᠪᠣᠳᠣᠨ ᠪᠣᠳᠣᠨ ᠪᠤᠷᠤᠭᠤᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠡᠳ ᠡᠪᠦᠳᠦᠭ ᠢ᠋ᠶ᠋ᠡᠨ ᠠᠯᠠᠭᠠᠳᠠᠨ᠄《 ᠠᠷᠪᠠᠨ ᠲᠦᠮᠡᠨ ᠠᠳᠤᠭᠤᠨ ᠳ᠋ᠤ᠌ ᠮᠢᠨᠢ ᠭᠠᠭᠴᠠ ᠨᠢᠭᠡ ᠠᠵᠢᠨᠠᠢ ᠬᠦᠯᠦᠭ ᠪᠠᠢᠭᠰᠠᠨ ᠢ᠋ ᠠᠯᠳᠠᠭᠠᠳ ᠶᠠᠪᠤᠭᠤᠯᠴᠢᠬᠠᠯᠠ᠃ ᠠᠯᠪᠠᠲᠤ ᠵᠠᠷᠤᠴᠠ ᠶ᠋ᠢᠨ ᠳᠣᠲᠣᠷᠠ ᠭᠠᠭᠴᠠ ᠨᠢᠭᠡ ᠬᠦᠯᠦᠭ ᠰᠢᠨᠵᠢᠭᠡᠴᠢ ᠪᠠᠢᠭᠰᠠᠨ ᠢ᠋ ᠴᠦ᠍ ᠬᠡᠷᠡᠭᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠠᠯᠳᠠᠵᠤ ᠣᠷᠬᠢᠵᠠᠢ!》 ᠭᠡᠳ ᠬᠠᠷᠠᠩᠭᠤᠰᠤᠨ ᠤᠨᠠᠭᠰᠠᠨ ᠭᠡᠨᠡ᠃
ᠨᠢᠰᠤᠩᠬᠠᠢ ᠵᠢᠭᠠᠯ ᠠᠵᠢᠨᠠᠢ ᠬᠦᠯᠦᠭ ᠢ᠋ᠶ᠋ᠡᠨ ᠤᠨᠤᠵᠤ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠵᠤ ᠲᠥᠷᠥ ᠳ᠋ᠦ᠍ ᠪᠡᠨ ᠨᠡᠷᠡᠲᠡᠢ ᠲᠦᠮᠡᠨ ᠳ᠋ᠦ᠍ ᠪᠡᠨ ᠭᠠᠪᠢᠶᠠᠲᠠᠢ ᠵᠠᠩᠵᠤᠨ ᠪᠣᠯᠤᠭᠠᠳ ᠠᠵᠢᠨᠠᠢ ᠬᠦᠯᠦᠭ ᠦ᠋ᠨ ᠵᠢᠩᠬᠢᠨᠢ ᠡᠵᠡᠨ ᠨᠢ ᠪᠣᠯᠤᠭᠰᠠᠨ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠦᠰᠦᠭ ᠬᠠᠳᠠᠭᠴᠢ᠄ ᠠᠯᠲᠠᠨᠴᠢᠮᠡᠭ