ᠤᠢᠭᠤᠷᠵᠢᠨ ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠡᠭᠦᠰᠦᠯ ᠭᠠᠷᠤᠯУйгуржин монгол өсгийн үүсэл гарал
677ᠤᠢᠭᠤᠷᠵᠢᠨ ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠡᠭᠦᠰᠦᠯ ᠭᠠᠷᠤᠯ
ᠤᠢᠭᠤᠷᠵᠢᠨ ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠡᠭᠦᠰᠦᠯ ᠭᠠᠷᠤᠯ ᠤ᠋ᠨ ᠲᠤᠬᠠᠢ ᠲᠣᠪᠴᠢ ᠲᠠᠨᠢᠯᠴᠠᠭᠤᠯᠭᠠ ᠵᠢᠴᠢ ᠡᠯᠡ ᠢᠵᠠᠭᠤᠷ ᠡᠭᠦᠰᠦᠯ ᠦ᠋ᠨ ᠦᠰᠦᠭ ᠪᠢᠴᠢᠭ ᠦ᠋ᠨ ᠵᠢᠷᠤᠭ ᠬᠠᠪᠰᠤᠷᠤᠯᠲᠠ
ᠳᠡᠯᠡᠬᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠦᠰᠦᠭ ᠪᠢᠴᠢᠭ ᠦ᠋ᠨ ᠡᠭᠦᠰᠦᠯ ᠭᠠᠷᠤᠯ ᠢ᠋ ᠶᠠᠷᠢᠬᠤ ᠳ᠋ᠤ᠌ ᠶᠡᠷᠦ ᠨᠢ ᠡᠷᠲᠡᠨ ᠦ᠌ ᠶᠸᠵᠢᠫᠲ ᠦ᠋ᠨ ᠳᠦᠷᠰᠦᠲᠦ ᠦᠰᠦᠭ （ HIEROGLYPHS ） ᠪᠣᠯᠤᠨ ᠮᠸᠰᠤᠫᠤᠲᠠᠮᠢᠶᠠ ᠶ᠋ᠢᠨ ᠱᠣᠪᠬᠣ ᠦᠰᠦᠭ ᠡᠴᠡ ᠰᠠᠯᠵᠤ ᠪᠣᠯᠣᠰᠢ ᠦᠭᠡᠢ ᠪᠢᠯᠡ ᠃ ᠡᠨᠡ ᠬᠣᠶᠠᠷ ᠦᠰᠦᠭ ᠪᠢᠴᠢᠭ ᠨᠢ ᠣᠳᠣᠬᠠᠨ ᠤ᠋ ᠰᠤᠳᠤᠯᠤᠯ ᠤ᠋ᠨ ᠦᠷᠡ ᠳ᠋ᠦᠩ ᠳ᠋ᠦ᠍ ᠢᠯᠡᠷᠡᠭᠦᠯᠦᠭᠡᠳ ᠪᠠᠢᠭᠠ ᠬᠠᠮᠤᠭ ᠡᠷᠲᠡᠨ ᠦ᠌ ᠲᠣᠭᠲᠠᠯᠴᠠᠭᠠ ᠲᠠᠢ ᠦᠰᠦᠭ ᠪᠢᠴᠢᠭ ᠪᠣᠯᠬᠤ ᠶᠤᠮ ᠠ᠋ ᠃
※ ᠡᠷᠲᠡᠨ ᠦ᠌ ᠶᠸᠵᠢᠫᠲ ᠦ᠋ᠨ ᠳᠦᠷᠰᠦᠲᠦ ᠦᠰᠦᠭ ᠦ᠋ᠨ ᠡᠭᠦᠰᠦᠭᠰᠡᠨ ᠴᠠᠭ ( ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡ 3300－ 3100 ᠣᠨ ) ；
※ ᠮᠸᠰᠤᠫᠤᠲᠠᠮᠢᠶᠠ ᠶ᠋ᠢᠨ ᠱᠣᠪᠬᠣ ᠦᠰᠦᠭ ᠦ᠋ᠨ ᠡᠭᠦᠰᠦᠭᠰᠡᠨ ᠴᠠᠭ ( ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡ 3200 ᠣᠨ )；
※ ᠲᠤᠰ ᠵᠢᠷᠤᠭ ᠪᠣᠯ ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡᠬᠢ3 320—3150 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠵᠣᠬᠢᠶᠠᠭᠳᠠᠭᠰᠠᠨ ᠡᠷᠲᠡᠨ ᠦ᠌ ᠶᠧᠵᠢᠫᠲ ᠦ᠋ᠨ ᠳᠦᠷᠰᠦᠲᠦ ᠦᠰᠦᠭ ᠰᠡᠢᠯᠦᠭᠰᠡᠨ ᠵᠠᠭᠠᠨ ᠤ᠋ ᠶᠠᠰᠤᠨ ᠱᠣᠰᠢᠭᠠ ᠪᠣᠯᠤᠨᠠ᠃
ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡ ᠶ᠋ᠢᠨ 1900-1500 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠡᠷᠲᠡᠨ ᠦ᠌ ᠶᠧᠵᠢᠫᠲ ᠦ᠋ᠨ ᠳᠦᠷᠰᠦᠲᠦ ᠦᠰᠦᠭ ᠢ᠋ ᠲᠠᠨᠢᠳᠠᠭ ᠰᠸᠨᠠᠢ ᠬᠣᠢᠭ ᠤ᠋ᠨ ᠠᠭᠤᠷᠬᠠᠢᠴᠢᠳ （ ᠲᠡᠢᠨ ᠦ᠌ ᠣᠯᠵᠠᠯᠠᠭᠳᠠᠭᠰᠠᠳ ） ᠨᠢ ᠡᠷᠲᠡᠨ ᠦ᠌ ᠶᠧᠵᠢᠫᠲ ᠦ᠋ᠨ ᠳᠦᠷᠰᠦᠲᠦ ᠦᠰᠦᠭ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠸᠮᠢᠲ SEMITIC ᠬᠡᠯᠡ ᠲᠡᠢ ᠤᠶᠠᠯᠳᠤᠭᠤᠯᠤᠨ ᠢᠵᠠᠭᠤᠷ ᠡᠷᠲᠡᠨ ᠦ᠌ ᠰᠸᠨᠠᠢ （PROTO-SINAITIC） ᠭᠡᠬᠦ 27-30 ᠣᠷᠴᠢᠮ ᠲᠣᠭᠲᠠᠪᠤᠷᠢ ᠦᠭᠡᠢ ᠴᠠᠭᠠᠨ ᠲᠣᠯᠣᠭᠠᠢ ᠪᠤᠶᠤ ᠭᠠᠯᠢᠭ ᠦᠰᠦᠭ ᠢ᠋ ᠵᠣᠬᠢᠶᠠᠭᠰᠠᠨ ᠲᠠᠯᠠ ᠪᠠᠷ ᠣᠯᠠᠨ ᠡᠷᠳᠡᠮᠲᠡᠳ ᠰᠠᠨᠠᠯ ᠨᠢᠭᠡᠲᠡᠢ ᠪᠠᠢᠨᠠ ᠃
ᠡᠭᠦᠨ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠠᠯᠳᠠᠷᠲᠠᠢ ᠨᠢ ᠰᠸᠷᠠᠪᠢᠲ ᠡᠯᠢ - ᠬᠠᠳᠢᠮ ᠬᠡᠮᠡᠬᠦ ᠠᠭᠤᠷᠬᠠᠢ ᠳ᠋ᠤ᠌ ᠣᠷᠣᠰᠢᠬᠤ ᠬᠠᠲ᠋ᠬᠣᠷ ᠰᠠᠬᠢᠭᠤᠯᠰᠤᠨ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠰᠦᠮᠡ ᠶ᠋ᠢᠨ ᠳᠣᠲᠣᠷᠠᠬᠢ ᠴᠢᠯᠠᠭᠤᠨ ᠳ᠋ᠤ᠌ ᠰᠡᠢᠯᠦᠭᠰᠡᠨ ᠪᠢᠴᠢᠭᠡᠰᠦ ᠪᠣᠯᠤᠨᠠ ᠃
ᠡᠨᠡᠬᠦ ᠴᠢᠯᠠᠭᠤᠨ ᠰᠡᠢᠯᠦᠮᠡᠯ ᠳ᠋ᠡᠬᠢ ᠦᠰᠦᠭ ᠦ᠋ᠨ ᠲᠠᠯᠠ ᠪᠠᠷ ᠬᠢ ᠲᠠᠢᠯᠪᠤᠷᠢᠯᠠᠯᠲᠠ ᠳ᠋ᠤ᠌ ᠣᠯᠠᠨᠠ ᠬᠠᠮᠤᠭ ᠤ᠋ᠨ ᠦᠨᠡᠯᠡᠭᠳᠡᠭᠰᠡᠨ ᠨᠢ \"TO BAALAT (LADY), THE MISTRESS\" ᠪᠣᠯᠤᠨᠠ ᠃ ᠤᠳᠬᠠ ᠨᠢ 《ᠡᠮᠡᠭᠲᠡᠢ ᠰᠠᠬᠢᠭᠤᠯᠰᠤᠨ ᠳ᠋ᠤ᠌ ᠬᠦᠨᠳᠦᠳᠬᠡᠨ ᠵᠣᠷᠢᠭᠤᠯᠪᠠ》᠃
ᠢᠵᠠᠭᠤᠷ ᠡᠷᠲᠡᠨ ᠦ᠌ ᠰᠸᠨᠠᠢ （PROTO-SINAITIC） ᠦᠰᠦᠭ ᠨᠢ ᠤᠯᠠᠷᠢᠨ ᠬᠥᠭᠵᠢᠭᠰᠡᠭᠡᠷ ᠰᠸᠮᠢᠲ SEMITIC ᠢᠵᠠᠭᠤᠷ ᠬᠡᠯᠡᠨ ᠳ᠋ᠦ᠍ ᠬᠢ ᠢᠵᠠᠭᠤᠷ ᠬᠠᠨᠠᠭᠠᠨ（PROTO-CANAANITE） ᠬᠡᠯᠡᠨ ᠦ᠌ ᠴᠠᠭᠠᠨ ᠲᠣᠯᠣᠭᠠᠢ ᠪᠣᠯᠤᠨ ᠬᠤᠪᠢᠷᠠᠵᠠᠢ ᠃ ᠡᠨᠡ ᠨᠢ ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡᠬᠢ 1600 - 1050 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠪᠠᠢᠵᠤ 22-28 ᠣᠷᠴᠢᠮ ᠶᠠᠪᠤᠭᠠᠨ ᠳ᠋ᠤ᠌ ᠪᠠᠨ ᠲᠣᠭᠲᠠᠪᠤᠷᠢᠵᠢᠭᠰᠠᠨ ᠴᠠᠭᠠᠨ ᠲᠣᠯᠣᠭᠠᠢ ᠪᠣᠯᠤᠨᠠ ᠃ ᠡᠨᠡᠬᠦ ᠢᠵᠠᠭᠤᠷ ᠬᠠᠨᠠᠭᠠᠨ （PROTO-CANAANITE） ᠬᠡᠯᠡᠨ ᠦ᠌ ᠴᠠᠭᠠᠨ ᠲᠣᠯᠣᠭᠠᠢ ᠨᠢ 1050 ᠣᠨ ᠠ᠋ᠴᠠ ᠡᠷᠲᠡᠨ ᠦ᠌ ᠹᠣᠸᠨᠢᠼᠢᠶᠠᠨ ᠴᠠᠭᠠᠨ ᠲᠣᠯᠣᠭᠠᠢ （PHOENICIAN ALPHABET） ᠪᠣᠯᠵᠤ ᠬᠤᠪᠢᠷᠠᠵᠠᠢ ᠃ ᠹᠣᠸᠨᠢᠼᠢᠶᠠᠨ ᠴᠠᠭᠠᠨ ᠲᠣᠯᠣᠭᠠᠢ ᠨᠢ （PHOENICIAN ALPHABET） ᠬᠣᠵᠢᠮ ᠨᠢ ᠡᠷᠲᠡᠨ ᠦ᠌ ᠭᠷᠢᠭ ᠂ ᠯᠠᠲ᠋ᠢᠨ ᠂ ᠠᠷᠠᠮᠢ ᠂ ᠢᠪᠷᠠᠢ ᠂ ᠠᠷᠠᠪ ᠵᠡᠷᠭᠡ ᠴᠠᠭᠠᠨ ᠲᠣᠯᠣᠭᠠᠢ ᠪᠣᠯᠤᠨ ᠬᠤᠪᠢᠷᠠᠵᠤ ᠬᠥᠭᠵᠢᠭᠰᠡᠨ ᠶᠦᠮ ᠃
ᠡᠭᠦᠨ ᠳ᠋ᠦ᠍ ᠡᠷᠲᠡᠨ ᠦ᠌ ᠠᠷᠠᠮᠢ ᠴᠠᠭᠠᠨ ᠲᠣᠯᠣᠭᠠᠢ （ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡ 10 - ᠡᠮᠦᠨᠡ 6 ᠳ᠋ᠤᠭᠠᠷ ᠵᠠᠭᠤᠨ) ᠨᠢ ᠮᠠᠨ ᠤ᠋ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠡᠭᠦᠰᠦᠯ ᠭᠠᠷᠤᠯ ᠲᠠᠢ ᠬᠣᠯᠪᠣᠭᠠ ᠲᠠᠢ ᠪᠠᠢᠳᠠᠭ ᠃
ᠳᠣᠣᠷᠠᠬᠢ ᠵᠢᠷᠤᠭ ᠪᠣᠯ ᠲᠸᠯ ᠹᠸᠺᠾᠷᠶᠸ TELL FEKHERYE ᠡᠴᠡ ᠣᠯᠳᠠᠭᠰᠠᠨ ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡᠬᠢ 9 ᠳ᠋ᠦ᠍ᠭᠡᠷ ᠵᠠᠭᠤᠨ ᠤ᠋ ᠳᠤᠮᠳᠠᠴᠢ ᠦᠶᠡ ᠶ᠋ᠢᠨ ᠲᠢᠺᠣᠨᠲ᠋ᠢ - ᠨᠢᠨᠣᠷᠲ᠋ᠠ ᠬᠡᠮᠡᠬᠦ ᠨᠡᠷᠡ ᠲᠡᠢ ᠠᠯᠳᠠᠷᠲᠤ ᠵᠠᠩᠵᠤᠨ ᠤ᠋ ᠴᠢᠯᠠᠭᠤᠨ ᠰᠡᠢᠯᠦᠮᠡᠯ ᠬᠥᠷᠥᠭ ᠪᠣᠯᠤᠨᠠ ᠃ ᠲᠡᠭᠦᠨ ᠦ᠌ ᠳᠡᠪᠡᠯ ᠦ᠋ᠨ ᠳᠣᠣᠷᠠᠲᠤ ᠬᠡᠰᠡᠭ ᠲᠦ᠍ ᠡᠷᠲᠡᠨ ᠦ᠌ ᠠᠺᠺᠳ᠋ ᠴᠠᠭᠠᠨ ᠲᠣᠯᠣᠭᠠᠢ ᠪᠣᠯᠤᠨ ᠡᠷᠲᠡᠨ ᠦ᠌ ᠠᠷᠠᠮᠢ （PHOENICIAN ALPHABET） ᠴᠠᠭᠠᠨ ᠲᠣᠯᠣᠭᠠᠢ ᠪᠠᠷ ᠰᠡᠢᠯᠦᠭᠰᠡᠨ 20 ᠮᠥᠷᠲᠦ ᠠᠭᠤᠯᠭᠠ ᠪᠠᠢᠳᠠᠭ ᠃
ᠡᠷᠲᠡᠨ ᠦ᠌ ᠠᠷᠠᠮᠢ ᠴᠠᠭᠠᠨ ᠲᠣᠯᠣᠭᠠᠢ ᠠ᠋ᠴᠠ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠠᠷᠠᠮᠢ ᠴᠠᠭᠠᠨ ᠲᠣᠯᠣᠭᠠᠢ (ᠮᠠᠨ ᠤ᠋ ᠡᠷᠡᠨ ᠡᠴᠡ ᠡᠮᠦᠨᠡ 6 - ᠡᠮᠦᠨᠡ 3 ᠳ᠋ᠤᠭᠠᠷ ᠵᠠᠭᠤᠨ) ᠪᠣᠯᠤᠨ ᠰᠸᠷᠢᠶᠠ ᠴᠠᠭᠠᠨ ᠲᠣᠯᠣᠭᠠᠢ ᠭᠡᠵᠦ ᠬᠣᠶᠠᠷ ᠰᠠᠯᠪᠤᠷᠢ ᠰᠠᠯᠪᠤᠷᠢᠯᠠᠭᠰᠠᠨ ᠶᠤᠮ ᠃ ᠡᠭᠦᠨ ᠳ᠋ᠦ᠍ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠠᠷᠠᠮᠢ ᠴᠠᠭᠠᠨ ᠲᠣᠯᠣᠭᠠᠢ ᠪᠣᠯ ᠳᠠᠷᠤᠢ ᠰᠣᠭᠳᠠ ᠦᠰᠦᠭ ᠦ᠋ᠨ ᠡᠬᠢ ᠡᠭᠦᠰᠪᠦᠷᠢ ᠶᠤᠮ ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠰᠣᠭᠳᠠ ᠴᠠᠭᠠᠨ ᠲᠣᠯᠣᠭᠠᠢ ᠨᠢ ᠰᠢᠭᠤᠳ ᠮᠠᠨ ᠤ᠋ ᠡᠷᠡᠨ ᠦ᠌ ᠡᠮᠦᠨᠡᠬᠢ 3 ᠳ᠋ᠤᠭᠠᠷ ᠵᠠᠭᠤᠨ ᠠ᠋ᠴᠠ ᠡᠭᠦᠰᠦᠭᠰᠡᠨ ᠪᠢᠰᠢ ᠂ ᠬᠠᠷᠢᠨ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠣᠭᠳᠠᠨᠢᠶᠠ ᠬᠡᠮᠡᠬᠦ （SOGDIANA） ᠭᠠᠵᠠᠷ ᠲᠤ᠌ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠠᠷᠠᠮᠢ ᠴᠠᠭᠠᠨ ᠲᠣᠯᠣᠭᠠᠢ ᠨᠢ ᠤᠷᠲᠤ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠨᠤᠲᠤᠭᠰᠢᠨ ᠬᠤᠪᠢᠷᠠᠭᠠᠳ ᠂ ᠮᠠᠨ ᠤ᠋ ᠡᠷᠡᠨ ᠦ᠌ 1- 2 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠠᠭᠤᠯᠵᠠᠷ ᠲᠤ᠌ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠦᠭᠡ ᠬᠡᠯᠡ ᠳ᠋ᠦ᠍ ᠵᠣᠬᠢᠴᠠᠭᠰᠠᠨ ᠰᠣᠭᠳᠠ ᠴᠠᠭᠠᠨ ᠲᠣᠯᠣᠭᠠᠢ ᠪᠣᠯᠤᠨ ᠪᠦᠷᠢᠯᠳᠦᠵᠡᠢ᠃
ᠳᠣᠣᠷᠠᠬᠢ ᠵᠢᠷᠤᠭ ᠪᠣᠯ ᠮᠠᠨ ᠤ᠋ ᠡᠷᠡᠨ ᠦ᠌ 2 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠶ᠋ᠢᠨ ᠺᠠᠷᠠ- ᠢ -ᠮᠠᠽᠠᠷ （KARA‑I‑MAZAR INSCRIPTION） ᠬᠡᠮᠡᠬᠦ ᠰᠣᠭᠳᠠ ᠴᠠᠭᠠᠨ ᠲᠣᠯᠣᠭᠠᠢ ᠪᠠᠷ ᠰᠡᠢᠯᠦᠭᠰᠡᠨ ᠲᠡᠦᠬᠡᠨ ᠣᠯᠳᠠᠪᠤᠷᠢ ᠪᠣᠯᠤᠨᠠ᠃
ᠰᠣᠭᠳᠠ ᠴᠠᠭᠠᠨ ᠲᠣᠯᠣᠭᠠᠢ ᠨᠢ ᠮᠠᠨ ᠤ᠋ ᠡᠷᠡᠨ ᠦ᠌ 100 - 1200 ᠣᠨ ᠪᠣᠯᠲᠠᠯᠠ ᠳᠤᠮᠳᠠᠳᠤ ᠠᠽᠢᠶᠠ ᠳ᠋ᠤ᠌ ᠬᠡᠷᠡᠭᠯᠡᠭᠳᠡᠭᠡᠳ ᠢᠷᠡᠭᠰᠡᠨ ᠠᠪᠠᠴᠤ ᠂ 800 - 1200 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠪᠣᠯ ᠰᠡᠭᠦᠯ ᠦ᠋ᠨ ᠬᠤᠭᠤᠴᠠᠭᠠ ᠨᠢ ᠪᠠᠢᠵᠤ ᠂ ᠠᠭᠠᠵᠢᠮ ᠢ᠋ᠶ᠋ᠠᠷ ᠬᠠᠭᠤᠴᠢᠨ ᠤᠢᠭᠤᠷ ᠴᠠᠭᠠᠨ ᠲᠣᠯᠣᠭᠠᠢ ᠳ᠋ᠤ᠌ ᠣᠷᠣᠯᠠᠭᠳᠠᠭᠰᠠᠨ ᠶᠤᠮ ᠃ ᠬᠠᠭᠤᠴᠢᠨ ᠤᠢᠭᠤᠷ ᠴᠠᠭᠠᠨ ᠲᠣᠯᠣᠭᠠᠢ ᠨᠢ 8 -15 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠰᠡᠭᠦᠯᠴᠢ ᠦᠶᠡ ᠪᠣᠯᠲᠠᠯᠠ ᠬᠡᠷᠡᠭᠯᠡᠭᠳᠡᠭᠡᠳ ᠢᠷᠡᠭᠰᠡᠨ ᠶᠤᠮ ᠃
ᠳᠣᠣᠷᠠᠬᠢ ᠵᠢᠷᠤᠭ ᠪᠣᠯ ᠮᠣᠩᠭᠣᠯ ᠤᠯᠤᠰ ᠠ᠋ᠴᠠ ᠣᠯᠳᠠᠭᠰᠠᠨ ᠮᠠᠨ ᠤ᠋ ᠡᠷᠡᠨ ᠦ᠌ 750- 760 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠰᠡᠢᠯᠦᠭᠰᠡᠨ ᠰᠢᠨᠡ ᠤᠰᠤ ᠴᠢᠯᠠᠭᠤᠨ ᠬᠥᠰᠢᠶᠡ ᠪᠣᠯᠤᠨᠠ ᠂ ᠤᠢᠭᠤᠷ ᠤ᠋ᠨ ᠪᠠᠶᠠᠨ ᠴᠣᠷᠣ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠪᠣᠰᠬᠠᠭᠰᠠᠨ ᠥᠪᠡᠷ ᠢ᠋ ᠪᠡᠨ ᠲᠠᠨᠢᠯᠴᠠᠭᠤᠯᠵᠤ ᠂ ᠬᠥᠬᠡ ᠲᠥᠷᠥᠭ ᠢ᠋ ᠢᠯᠠᠭᠰᠠᠨ ᠂ ᠶᠢᠰᠦᠨ ᠣᠭᠣᠰ ᠢ᠋ ᠬᠣᠷᠢᠶᠠᠨ ᠨᠢᠭᠡᠳᠬᠡᠭᠰᠡᠨ ᠂ ᠬᠠᠤᠯᠢ ᠶᠣᠰᠣᠨ ᠤ᠋ ᠳᠥᠷᠦᠲᠦ ᠤᠯᠤᠰ ᠢ᠋ ᠪᠠᠢᠭᠤᠯᠤᠭᠰᠠᠨ ᠪᠠ ᠳᠠᠩ ᠤᠯᠤᠰ ᠯᠤᠭᠠ ᠶᠢᠨ ᠭᠠᠳᠠᠭᠠᠳᠤ ᠬᠠᠷᠢᠯᠴᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠪᠢᠴᠢᠭᠰᠡᠨ 50 ᠮᠥᠷᠲᠦ ᠬᠠᠭᠤᠴᠢᠨ ᠤᠢᠭᠤᠷ ᠪᠢᠴᠢᠭ ᠦ᠋ᠨ ᠬᠥᠰᠢᠶᠡ ᠪᠣᠯᠤᠨᠠ ᠃
ᠤᠢᠭᠤᠷ ᠤ᠋ᠨ ᠡᠪᠦᠭᠡ ᠳᠡᠭᠡᠳᠦᠰ ᠨᠢ 744 - 840 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠢ᠋ ᠡᠵᠡᠯᠡᠨ ᠣᠷᠬᠣᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠤᠷᠲᠤ ᠪᠠᠯᠢᠭ ᠬᠣᠲᠠᠨᠠ ᠨᠡᠢᠰᠯᠡᠵᠦ ᠲᠥᠷᠥ ᠭᠦᠷᠦᠨ ᠲᠡᠢ ᠪᠠᠢᠭᠰᠠᠨ ᠠ᠋ᠴᠠ 840 ᠣᠨ ᠳ᠋ᠤ᠌ ᠬᠢᠷᠭᠢᠰᠴᠤᠳ ᠲᠤ᠌ ᠡᠵᠡᠯᠡᠭᠳᠡᠭᠡᠳ ᠲᠦᠷᠹᠠᠨ ᠵᠦᠭ ᠨᠢᠭᠡ ᠬᠡᠰᠡᠭ ᠨᠢ ᠨᠡᠭᠦᠵᠦ ᠤᠢᠭᠤᠷ ᠸᠠᠩᠲᠤ ᠤᠯᠤᠰ ᠢ᠋ ᠪᠠᠢᠭᠤᠯᠵᠠᠢ ᠃ ᠦᠯᠡᠳᠡᠭᠰᠡᠨ ᠬᠢᠷᠭᠢᠰᠴᠤᠳ ᠨᠢ ᠬᠡᠳᠦᠢᠪᠡᠷ ᠤᠢᠭᠤᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠢ᠋ ᠡᠵᠡᠯᠡᠭᠰᠡᠨ ᠴᠦ᠍ ᠠᠷᠪᠠᠬᠠᠨ ᠵᠢᠯ ᠥᠩᠭᠡᠷᠡᠭᠡᠳ ᠮᠣᠩᠭᠣᠯ ᠤ᠋ᠨ ᠡᠯᠡ ᠠᠢᠮᠠᠭ ᠪᠠ ᠬᠢᠳᠠᠨᠴᠤᠳ ᠢ᠋ ᠬᠠᠮᠢᠶᠠᠷᠴᠤ ᠳᠡᠢᠯᠬᠦ ᠦᠭᠡᠢ ᠪᠣᠯᠵᠤ ᠶᠸᠨᠢᠰᠠᠢ ᠮᠥᠷᠡᠨ ᠦ᠌ ᠨᠤᠲᠤᠭ ᠳᠡᠪᠢᠰᠬᠡᠷ ᠲᠦ᠍ ᠪᠡᠨ ᠪᠤᠴᠠᠭᠰᠠᠨ ᠪᠠᠢᠨᠠ ᠃ ᠲᠡᠢᠮᠦ ᠡᠴᠡ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠮᠣᠩᠭᠣᠯ ᠤ᠋ᠨ ᠡᠯᠡ ᠠᠢᠮᠠᠭ ᠥᠪᠡᠷ ᠥᠪᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠨᠤᠲᠤᠭ ᠬᠤᠪᠢᠶᠠᠨ ᠡᠵᠡᠯᠡᠭᠡᠳ ᠬᠢᠳᠠᠨ（ᠯᠢᠶᠣᠣ 907–1125） ᠤᠯᠤᠰ ᠤ᠋ᠨ ᠪᠦᠷᠢᠨ ᠪᠤᠰᠤ ᠡᠷᠬᠡᠰᠢᠶᠡᠯ ᠳᠣᠣᠷᠠ ᠬᠠᠷᠢᠯᠴᠠᠨ ᠬᠡᠰᠡᠭᠯᠡᠨ ᠨᠣᠶᠠᠷᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠠᠢᠵᠤ ᠂ ᠴᠢᠩᠭᠢᠰ ᠬᠠᠭᠠᠨ ᠠ᠋ᠴᠠ ᠶᠡᠬᠡ ᠮᠣᠩᠭᠣᠯ ᠬᠠᠭᠠᠨᠲᠤ ᠤᠯᠤᠰ ᠢ᠋ （1206 ᠣᠨ ） ᠪᠠᠢᠭᠤᠯᠬᠤ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠡᠯᠡ ᠠᠢᠮᠠᠭ ᠨᠢᠭᠡᠳᠴᠦ ᠬᠠᠤᠯᠢ ᠶᠣᠰᠣᠨ ᠤ᠋ ᠳᠥᠷᠦᠲᠦ ᠤᠯᠤᠰ ᠪᠣᠯᠵᠠᠢ ᠃
ᠴᠢᠩᠭᠢᠰ ᠬᠠᠭᠠᠨ 1204 ᠣᠨ ᠳ᠋ᠤ᠌ ᠨᠠᠢ᠍ᠮᠠᠨ ᠠᠢᠮᠠᠭ ᠢ᠋ ᠡᠷᠬᠡᠰᠢᠶᠡᠯ ᠳ᠋ᠦ᠍ ᠪᠡᠨ ᠣᠷᠣᠭᠤᠯᠵᠤ ᠂ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠲᠠᠲᠠᠲᠤᠩᠭᠠ ᠶ᠋ᠢ ᠵᠠᠷᠯᠢᠭᠳᠠᠨ ᠲᠡᠳᠡᠨ ᠦ᠌ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠬᠠᠭᠤᠴᠢᠨ ᠤᠢᠭᠤᠷ ᠴᠠᠭᠠᠨ ᠲᠣᠯᠣᠭᠠᠢ ᠶᠢᠨ ᠰᠠᠭᠤᠷᠢᠨ ᠳ᠋ᠤ᠌ ᠬᠡᠳᠦᠨ ᠡᠭᠡᠰᠢᠭ ᠭᠡᠢᠭᠦᠯᠦᠭᠴᠢ ᠨᠡᠮᠡᠭᠦᠯᠵᠦ ᠂ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠣᠶᠢᠭᠣᠷᠵᠢᠨ ᠮᠣᠩᠭᠣᠯ ᠪᠢᠴᠢᠭ ᠦ᠋ᠨ ᠴᠠᠭᠠᠨ ᠲᠣᠯᠣᠭᠠᠢ ᠶ᠋ᠢ ᠵᠣᠬᠢᠶᠠᠯᠭᠠᠪᠠ ᠃
ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠮᠣᠩᠭᠣᠯᠴᠤᠳ ᠲᠣᠭᠲᠠᠪᠤᠷᠢᠲᠠᠢ ᠰᠢᠰᠲ᠋ᠧᠮᠵᠢᠭᠰᠡᠨ ᠥᠪᠡᠷ ᠦ᠋ᠨ ᠭᠡᠰᠡᠨ ᠦᠰᠦᠭ ᠪᠢᠴᠢᠭ ᠲᠡᠢ ᠪᠣᠯᠤᠭᠰᠠᠨ ᠪᠠᠢᠨᠠ ᠃
ᠳᠣᠣᠷᠠᠬᠢ ᠵᠢᠷᠤᠭ ᠪᠣᠯ 1224-1225 ᠣᠨ ᠤ᠋ ᠦᠶᠡ ᠶ᠋ᠢᠨ ᠴᠢᠩᠭᠢᠰ ᠦ᠋ᠨ ᠴᠢᠯᠠᠭᠤᠨ ᠪᠢᠴᠢᠭ (ᠶᠢᠰᠦᠩᠭᠡ ᠶ᠋ᠢᠨ ᠬᠥᠰᠢᠶᠡ ᠭᠡᠵᠦ ᠪᠠᠰᠠ ᠬᠡᠯᠡᠳᠡᠭ ) ᠪᠣᠯᠤᠨᠠ ᠃
ᠠᠭᠤᠯᠭᠠ ᠄
ᠴᠢᠩᠭᠢᠰ ᠬᠠᠭᠠᠨ ᠢ
ᠰᠠᠷᠲᠠᠭᠤᠯ ᠢᠷᠭᠡᠨ ᠲᠠᠭᠤᠵᠤ ᠬᠠᠮᠤᠭ ᠮᠣᠩᠭᠣᠯ ᠤᠯᠤᠰ ᠤ᠋ᠨ
ᠨᠣᠶᠠᠳ ᠢ᠋ ᠪᠤᠬᠠ ᠰᠣᠷᠬᠠᠢ ᠬᠤᠷᠠᠭᠰᠠᠨ ᠳ᠋ᠤ᠌
ᠶᠢᠰᠦᠩᠭᠡ ᠥᠨᠥᠳᠥᠷ ᠦ᠋ᠨ ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠲᠠᠪᠤᠨ ᠠᠯᠲᠠᠨ
ᠳ᠋ᠤᠷ ᠣᠨᠣᠭᠠᠯᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ
25-07-01