ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠊᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠳᠤ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠶᠠᠷ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 2
360ᠪᠣᠭᠳᠠ ᠶᠢᠨ ᠬᠦᠷᠢᠶᠡ
ᠠᠶᠠᠨ ᠵᠢᠩ ᠦ᠋ᠨ ᠶᠠᠪᠤᠳᠠᠯ ᠢ᠋ ᠠᠮᠤᠷ ᠬᠥᠩᠭᠡᠨ ᠳ᠋ᠦ᠍ ᠪᠢᠲᠡᠭᠡᠢ ᠪᠣᠳᠣ᠂ ᠦᠦᠷ ᠡᠴᠡ ᠡᠮᠦᠨᠡ ᠠᠴᠢᠶᠠᠯᠠᠨ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠪᠠᠭᠤᠨ ᠲᠡᠮᠡᠭᠡ ᠪᠡᠨ ᠢᠳᠡᠭᠦᠯᠬᠦ ᠪᠣᠯᠪᠠᠴᠤ ᠨᠠᠷᠠ ᠬᠡᠯᠪᠡᠢᠬᠦ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠳᠠᠬᠢᠨ ᠠᠴᠢᠶᠠᠯᠠᠵᠤ ᠰᠥᠨᠢ ᠳᠤᠮᠳᠠ ᠶ᠋ᠢ ᠥᠩᠭᠡᠷᠡᠨ ᠲᠩᠷᠢ ᠶ᠋ᠢᠨ ᠵᠡᠭᠦᠨ ᠬᠠᠶᠠᠭᠠ ᠠ᠋ᠴᠠ ᠭᠠᠷᠬᠤ ᠮᠡᠴᠢᠳ ᠮᠠᠷᠠᠯ ᠢ᠋ ᠪᠠᠷᠠᠭᠤᠨᠠ ᠲᠣᠩᠭᠣᠢᠯᠭᠠᠨ ᠪᠠᠭᠤᠨᠠ᠃ ᠡᠨᠡ ᠵᠠᠭᠤᠷᠠ ᠪᠠᠨ ᠡᠷᠡᠭᠦᠯ ᠠᠭᠠᠷ ᠲᠤ ᠪᠦᠬᠦ ᠪᠡᠶᠡ ᠵᠦᠯᠭᠦᠭᠳᠡᠨ᠂ ᠢᠳᠡᠵᠦ ᠤᠤᠭᠤᠬᠤ ᠳ᠋ᠤ᠌ ᠰᠢᠨᠤᠭ ᠬᠣᠪᠳᠣᠭ ᠪᠣᠯᠤᠭᠰᠠᠨ ᠪᠠᠢᠳᠠᠭ ᠪᠥᠭᠡᠳ ᠢᠩᠭᠢᠬᠦ ᠶ᠋ᠢᠨ ᠴᠠᠭ ᠲᠤ ᠬᠡᠷᠬᠢᠪᠡᠴᠦ ᠪᠠᠷᠠᠰᠢ ᠦᠭᠡᠢ ᠶᠡᠬᠡ ᠶ᠋ᠢ ᠢᠳᠡᠬᠦ ᠪᠢᠯᠡ᠃ ᠲᠡᠭᠡᠭᠡᠳ ᠤᠨᠲᠠᠬᠤ ᠨᠣᠢᠷ ᠲᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠳᠠᠷᠤᠭᠳᠠᠬᠤ ᠪᠣᠯᠪᠠᠴᠤ ᠲᠦᠯᠡᠭᠰᠡᠨ ᠭᠠᠯ ᠤ᠋ᠨ ᠴᠣᠭ ᠤᠨᠲᠠᠷᠠᠵᠤ ᠭᠦᠢᠴᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠣᠰᠤᠨ ᠠᠴᠢᠶᠠᠯᠠᠬᠤ ᠶ᠋ᠢ ᠶᠠᠭᠠᠬᠢᠨᠠ᠃
ᠳᠡᠭᠡᠷᠡᠬᠢ ᠵᠢᠷᠤᠮ ᠢ᠋ᠶ᠋ᠠᠷ ᠬᠣᠶᠠᠷ ᠬᠣᠨᠣᠭ ᠶᠠᠪᠤᠭᠰᠠᠨ ᠤ᠋ ᠥᠷᠯᠥᠭᠡ ᠶᠡᠬᠡ ᠣᠢ ᠮᠣᠳᠣ ᠲᠠᠢ ᠳᠠᠪᠠᠭᠠ ᠪᠠᠷ ᠳᠠᠪᠠᠨᠠ᠃ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠲᠦᠷᠭᠡᠨ ᠤᠷᠤᠰᠬᠠᠯᠲᠤ ᠨᠠᠷᠢᠨ ᠭᠣᠣᠯ ᠲᠠᠢ᠂ ᠤᠷᠲᠤ ᠬᠣᠭᠣᠯᠠᠢ ᠤᠷᠤᠭᠤᠳᠠᠵᠠᠢ᠃ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠮᠣᠳᠣ ᠲᠠᠢ ᠠᠭᠤᠯᠠᠰ ᠦᠷᠭᠦᠯᠵᠢᠯᠡᠨᠡ᠃ ᠲᠡᠭᠦᠨ ᠢ᠋ ᠳᠠᠭᠠᠨ ᠶᠠᠪᠤᠭᠰᠠᠭᠠᠷ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠴᠢᠭ ᠬᠣᠢᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠬᠦ ᠠᠵᠢ᠃ ᠳ᠋ᠨᠨᠽᠡᠨ ᠰᠡᠳᠬᠢᠯ ᠶᠡᠬᠡᠳᠡ ᠬᠥᠳᠡᠯᠦᠨ ᠵᠢᠩ ᠦ᠋ᠨ ᠢ᠋ᠶ᠋ᠡᠨ ᠰᠡᠭᠦᠯ ᠡᠴᠡ ᠬᠥᠯ ᠦ᠋ᠨ ᠳᠥᠷᠥᠭᠡ ᠶ᠋ᠢ ᠪᠣᠷᠪᠢ ᠲᠡᠨᠢᠢᠯᠭᠡᠨ ᠪᠣᠰᠤᠨ ᠬᠠᠷᠠᠬᠤ ᠳ᠋ᠤ᠌ ᠠᠯᠲᠠᠨ ᠳᠡᠭᠡᠪᠦᠷᠲᠦ ᠳᠤᠭᠠᠩ ᠨᠤᠭᠤᠳ ᠤ᠋ᠨ ᠣᠷᠣᠢ ᠨᠢᠳᠦ ᠭᠢᠯᠪᠠᠮᠠ ᠭᠢᠯᠠᠯᠵᠠᠵᠤ᠂ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤᠨ ᠬᠦᠩᠭᠢᠨᠡᠨ ᠬᠠᠩᠭᠢᠨᠠᠨ ᠰᠣᠨᠣᠰᠳᠠᠨᠠ᠃ ᠲᠡᠨᠳᠡ ᠡᠴᠡ ᠵᠢᠭᠠᠬᠠᠨ ᠣᠷᠣᠭᠰᠢ ᠶᠠᠪᠤᠭᠰᠠᠭᠠᠷ ᠠᠭᠠᠷ ᠤ᠋ᠨ ᠪᠠᠢᠳᠠᠯ ᠥᠳᠬᠡᠷᠡᠨ ᠥᠭᠡᠷᠡᠴᠢᠯᠡᠭᠳᠡᠵᠦ ᠲᠦᠯᠡᠭᠳᠡᠮᠡᠯ ᠪᠣᠣᠪᠣ᠂ ᠰᠢᠬᠢᠷ ᠦ᠋ᠨ ᠦᠨᠦᠷ ᠰᠢᠭ ᠶᠠᠭᠤᠮᠠ ᠬᠠᠩᠬᠤᠯᠤᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠲᠡᠷᠡ ᠶᠠᠭᠤᠨ ᠪᠣᠣᠪᠣ ᠰᠢᠬᠢᠷ ᠦ᠋ᠨ ᠦᠨᠦᠷ ᠪᠠᠢᠬᠤ ᠪᠢᠯᠡ᠂ ᠡᠯᠳᠡᠪ ᠪᠤᠰᠤ ᠶ᠋ᠢᠨ ᠪᠤᠵᠠᠷ ᠪᠤᠷᠲᠠᠭ ᠲᠠᠢ ᠬᠣᠯᠢᠯᠳᠤᠭᠰᠠᠨ ᠭᠤᠳᠤᠮᠵᠢ ᠶ᠋ᠢᠨ ᠨᠤᠨᠲᠠᠭ ᠰᠢᠷᠣᠢ ᠨᠢ ᠭᠠᠵᠠᠷ ᠤ᠋ᠨ ᠬᠣᠯᠠ ᠠ᠋ᠴᠠ ᠲᠡᠢᠨ ᠬᠦ᠌ ᠦᠨᠦᠷᠲᠦᠳᠡᠭ ᠪᠠᠢᠯᠠ᠃ ᠬᠠᠰᠢᠶᠠᠨ ᠤ᠋ ᠪᠤᠯᠤᠩ ᠲᠣᠬᠣᠢ ᠪᠠᠷ ᠶᠠᠪᠤᠭᠠ ᠬᠥᠮᠦᠰ ᠦ᠋ᠨ ᠬᠤᠪᠴᠠᠰᠤᠨ ᠤ᠋ ᠥᠩᠭᠡ ᠢᠯᠭᠠᠷᠠᠨ᠂ ᠯᠠᠮᠠ ᠬᠠᠷᠠ ᠨᠢ ᠲᠠᠨᠢᠭᠳᠠᠬᠤᠢᠴᠠ ᠣᠢᠷᠠᠲᠤᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠬᠦᠷᠡᠯ ᠲᠡᠮᠡᠭᠡᠨ ᠡᠴᠡ ᠪᠠᠭᠤᠨ ᠬᠠᠷᠠᠢᠵᠤ᠂ ᠲᠦᠷᠦᠭᠦᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠮᠡᠭᠡ ᠶ᠋ᠢ ᠭᠡᠪᠲᠡᠭᠦᠯᠪᠡ᠃ ᠡᠨᠡ ᠪᠣᠯ ᠡᠨᠳᠡ ᠪᠠᠭᠤᠳᠠᠯᠯᠠᠬᠤ ᠶ᠋ᠢᠨ ᠰᠢᠨᠵᠢ ᠲᠡᠮᠳᠡᠭ ᠪᠣᠯᠬᠤ ᠲᠤᠯᠠ ᠬᠣᠶᠠᠷ ᠨᠥᠬᠥᠷ ᠨᠢ ᠶᠠᠭᠠᠷᠠᠨ ᠪᠠᠭᠤᠨ ᠬᠠᠷᠠᠢᠵᠤ᠂ ᠲᠡᠮᠡᠭᠡ ᠪᠦᠷᠢ ᠶ᠋ᠢ ᠬᠡᠪᠲᠡᠭᠦᠯᠦᠨ ᠲᠠᠲᠠᠯᠭᠠ ᠲᠠᠢᠯᠵᠤ᠂ ᠱᠣᠷ ᠢ᠋ ᠨᠢ ᠮᠤᠯᠲᠤᠯᠤᠨ ᠬᠠᠶᠠᠨᠠ᠃ ᠳ᠋ᠨᠨᠽᠡᠨ ᠰᠡᠭᠦᠯᠴᠢ ᠶ᠋ᠢᠨ ᠲᠡᠮᠡᠭᠡᠨ ᠳ᠋ᠦ᠍ ᠵᠡᠭᠦᠯᠲᠡᠲᠡᠢ ᠶᠠᠪᠤᠳᠠᠭ ᠭᠠᠤᠯᠢᠨ ᠳᠠᠰᠢᠮᠠᠭ ᠢ᠋ ᠠᠪᠤᠨ ᠤᠰᠤᠨ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤ᠌ ᠳᠣᠷᠵᠢ ᠵᠡᠯᠡ ᠲᠡᠳᠡᠨ ᠲᠡᠮᠡᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠤᠶᠠᠵᠤ ᠪᠠᠢᠪᠠ᠃ ᠡᠨᠡ ᠵᠠᠭᠤᠷᠠ ᠬᠦᠷᠡᠯ ᠮᠠᠢᠬᠠᠨ ᠢ᠋ᠶ᠋ᠠᠨ ᠠᠯᠢ ᠬᠡᠳᠦᠢᠨ ᠪᠣᠰᠬᠠᠨ ᠪᠢᠴᠢᠬᠠᠨ ᠲᠤᠯᠭᠠᠨ ᠭᠠᠯ ᠠᠰᠠᠭᠠᠨ ᠳᠡᠭᠡᠷᠡ ᠨᠢ ᠲᠡᠮᠦᠷ ᠲᠣᠭᠣᠭᠠ ᠲᠠᠯᠪᠢᠬᠤ ᠭᠡᠵᠦ ᠤᠰᠤ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠨᠡ᠃ ᠳ᠋ᠨᠨᠽᠡᠨ ᠣᠷᠣᠵᠤ ᠢᠷᠡᠩᠭᠦᠲᠡ ᠪᠡᠨ ᠠᠪᠴᠢᠷᠠᠭᠰᠠᠨ ᠤᠰᠤ ᠪᠠᠨ ᠲᠣᠭᠣᠭᠠ ᠤᠷᠤᠭᠤ ᠬᠢᠬᠦ ᠳ᠋ᠦ᠍ ᠬᠠᠯᠠᠭᠤᠨ ᠲᠣᠭᠣᠭᠠ ᠨᠢ ᠴᠢᠰ ᠨᠢᠰ ᠳᠤᠤᠭᠠᠷᠤᠨ᠂ ᠠᠭᠤᠷ ᠮᠠᠨᠠᠨ ᠳᠡᠭᠡᠭᠰᠢ ᠬᠠᠶᠠᠭᠠᠳ ᠨᠠᠮ ᠭᠦᠮ ᠪᠣᠯᠤᠨᠠ᠃ ᠳᠣᠷᠵᠢ ᠭᠠᠳᠠᠨᠠᠬᠢ ᠠᠵᠢᠯ ᠢ᠋ᠶ᠋ᠠᠨ ᠳᠠᠭᠤᠰᠴᠤ ᠪᠣᠭᠴᠣ ᠲᠠᠢ ᠶᠠᠭᠤᠮᠠ ᠰᠠᠨᠵᠢᠭᠢᠨᠠᠭᠤᠯᠤᠨ ᠣᠷᠣᠵᠤ ᠢᠷᠡᠪᠡ᠃
— ᠬᠦᠷᠡᠯ ᠭᠤᠸᠠᠢ ᠮᠢᠨᠢ᠂ ᠶᠠᠭᠤ ᠪᠣᠯᠤᠭᠠᠳ ᠡᠢᠮᠦ ᠡᠷᠲᠡ ᠦᠳᠡᠯᠡᠨᠡ ᠪᠢᠯᠡ ᠭᠡᠬᠦ ᠳ᠋ᠦ᠍᠂ ᠬᠦᠷᠡᠯ᠄
— ᠳᠡᠭᠦᠦ ᠨᠠᠷ ᠮᠢᠨᠢ ᠬᠠᠷᠠᠬᠤ ᠦᠭᠡᠢ ᠪᠠᠢᠨᠠ ᠤᠤ ᠳᠠ᠂ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ᠂ ᠠᠴᠢᠲᠤ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠷᠢᠶᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠦᠳᠡᠯᠡᠬᠦ ᠪᠠᠢᠲᠤᠭᠠᠢ ᠬᠣᠨᠣᠬᠤ ᠦᠭᠡᠢ ᠥᠩᠭᠡᠷᠡᠵᠦ ᠪᠣᠯᠳᠠᠭ ᠰᠠᠨ ᠤᠤ ᠳᠠ᠃
— ᠶᠠᠭᠠᠬᠢᠭᠠᠳ ᠲᠡᠷᠡ ᠪᠢᠯᠡ ᠳᠠ?
— ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠣᠷᠴᠢᠯᠠᠩ ᠤ᠋ᠨ ᠬᠠᠮᠤᠭ ᠰᠠᠢᠨ ᠰᠠᠢᠬᠠᠨ ᠡᠨᠳᠡ ᠪᠠᠢᠳᠠᠭ ᠶᠤᠮ ᠬᠣᠢᠨᠠ ᠳᠠ᠃ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠠᠲᠠᠭᠳᠠᠨᠠ᠃
— ᠲᠠ ᠬᠠᠷᠢᠨ ᠢᠩᠭᠢᠵᠦ ᠪᠠᠢᠭᠠᠳ ᠪᠦᠷ ᠶᠠᠪᠤᠬᠤ ᠪᠠᠨ ᠪᠣᠯᠴᠢᠬᠠᠬᠤ ᠶᠤᠮ ᠪᠢᠰᠢ ᠪᠠᠢᠭᠠ ᠳᠠ ᠭᠡᠵᠦ ᠳᠣᠷᠵᠢ ᠶ᠋ᠢᠨ ᠬᠣᠱᠣᠩᠨᠠᠨ ᠬᠡᠯᠡᠬᠦ ᠳ᠋ᠦ᠍᠂ ᠬᠦᠷᠡᠯ ᠰᠠᠨᠠᠭᠠ ᠠᠯᠳᠠᠨ᠄
— ᠠᠢ ᠳᠠ ᠠᠷᠤ ᠳ᠋ᠤ᠌ ᠮᠢᠨᠢ ᠠᠵᠢᠯ ᠲᠥᠷᠥᠯ᠂ ᠡᠬᠡᠨᠡᠷ ᠬᠡᠦᠬᠡᠳ ᠪᠠᠢᠳᠠᠭ ᠦᠭᠡᠢ ᠰᠠᠨ ᠴᠦ᠍ ᠪᠣᠯ ᠬᠥᠭᠡᠷᠦᠬᠦᠢ ᠶᠣᠰᠣᠲᠠᠢ ᠲᠡᠭᠡᠭᠰᠡᠨ ᠭᠡᠵᠦ ᠬᠤᠤᠵᠠ ᠰᠠᠬᠠᠯ ᠢ᠋ᠶ᠋ᠠᠨ ᠮᠠᠭᠠᠵᠢᠯᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠠᠨᠢᠨ ᠨᠠᠮᠠᠨᠴᠢᠯᠠᠪᠠ᠃
— ᠪᠢᠳᠡᠨ ᠳ᠋ᠦ᠍ ᠡᠨᠳᠡ ᠬᠣᠷᠭᠣᠳᠠᠬᠤ ᠶ᠋ᠢᠨ ᠬᠡᠷᠡᠭ ᠳᠠᠩᠴᠤ ᠠᠯᠠᠭᠠ᠂ ᠵᠦᠭᠡᠷ ᠬᠠᠯᠠᠭᠤᠨ ᠬᠠᠷᠠ ᠪᠠᠨ ᠤᠤᠭᠤᠵᠤ ᠠᠪᠤᠭᠠᠳ ᠠᠴᠢᠶᠠᠯᠠᠬᠤ ᠪᠠᠨ ᠪᠣᠳᠣᠶᠠ ᠭᠡᠵᠦ ᠴᠢᠨᠠᠭᠰᠢᠯᠠᠭᠤᠯᠬᠤ ᠳ᠋ᠤ᠌ ᠬᠦᠷᠡᠯ ᠰᠣᠴᠢᠨ᠄
— ᠦᠭᠡᠢ ᠠ᠋ ᠬᠡᠦᠬᠡᠳ ᠦ᠋ᠳ ᠮᠢᠨᠢ᠂ ᠥᠨᠥ ᠮᠠᠷᠭᠠᠰᠢ ᠳ᠋ᠠᠭᠠᠨ ᠥᠨᠵᠢᠶᠡ᠂ ᠪᠤᠷᠬᠠᠨ ᠰᠠᠬᠢᠭᠤᠰᠤᠨ ᠳ᠋ᠤ᠌ ᠮᠥᠷᠭᠥᠵᠦ᠂ ᠪᠠᠭᠰᠢ ᠨᠠᠷ ᠲᠤ ᠳᠠᠭᠠᠳᠬᠠᠬᠤ ᠠᠵᠢᠯ ᠪᠣᠢ ᠭᠡᠳ ᠭᠠᠩᠰᠠ ᠲᠠᠢ ᠲᠠᠮᠠᠬᠢ ᠪᠠᠨ ᠲᠤᠯᠭᠠᠨ ᠤ᠋ ᠭᠠᠯ ᠠ᠋ᠴᠠ ᠠᠰᠠᠭᠠᠨ ᠬᠡᠳᠦ ᠳᠠᠬᠢᠨ ᠰᠣᠷᠣᠵᠤ ᠨᠣᠭᠣᠭᠠᠨ ᠨᠢᠳᠦ ᠰᠣᠨᠢᠬᠠᠨ ᠢ᠋ᠶ᠋ᠠᠷ ᠴᠠᠪᠴᠢᠯᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠄
— ᠲᠠ ᠬᠣᠶᠠᠷ ᠴᠦ᠍ ᠭᠡᠰᠡᠨ ᠵᠠᠮ ᠮᠥᠷ ᠢ᠋ᠶ᠋ᠡᠨ ᠳᠠᠭᠠᠳᠬᠠᠭᠤᠰᠢᠲᠠᠢ ᠭᠡᠯᠡ᠃ ᠡᠨᠡ ᠦᠭᠡ ᠳ᠋ᠨᠨᠽᠡᠨ ᠳ᠋ᠦ᠍ ᠲᠤᠩ ᠠᠶᠠᠲᠠᠢᠬᠠᠨ ᠰᠣᠨᠣᠰᠳᠠᠬᠤ ᠪᠣᠯᠪᠠᠴᠤ ᠡᠨᠳᠡ ᠮᠥᠷᠭᠥᠬᠦ ᠪᠠᠭᠰᠢ ᠪᠠᠢᠲᠤᠭᠠᠢ ᠲᠠᠨᠢᠬᠤ ᠬᠥᠮᠦᠨ ᠦᠭᠡᠢ ᠪᠡᠨ ᠰᠠᠨᠠᠨ ᠭᠤᠳᠤᠷᠠᠪᠠ᠃ ᠬᠦᠷᠡᠯ ᠬᠠᠯᠠᠭᠤᠨ ᠴᠠᠢ ᠤᠷᠤᠭᠤ ᠳᠠᠪᠤᠰᠤ ᠪᠠᠨ ᠰᠠᠮᠤᠷᠴᠤ᠂ ᠳ᠋ᠸᠴᠢᠩᠭᠠᠯᠪᠤ ᠥᠨᠳᠥᠷ ᠵᠠᠩᠷᠠᠢᠰᠠᠭ ᠬᠣᠶᠠᠷ ᠲᠤ ᠮᠥᠷᠭᠥᠭᠡᠳ ᠪᠣᠱᠣᠭᠠᠨ ᠤ᠋ ᠬᠢᠨᠢ ᠰᠢᠷᠣᠢ ᠠ᠋ᠴᠠ ᠠᠪᠤᠭᠠᠳ ᠶᠠᠪᠤᠪᠠᠯ ᠰᠠᠢᠨ ᠰᠢᠦ᠃ ᠶᠠᠳᠠᠵᠤ ᠬᠠᠮᠠᠷ ᠤ᠋ᠨ ᠱᠤᠤᠬᠢᠨᠠᠭᠠ ᠬᠦᠷᠬᠦ ᠦᠭᠡᠢ ᠭᠡᠭᠴᠢ᠂ ᠲᠡᠭᠡᠭᠡᠳ ᠪᠦᠷ ᠪᠣᠭᠳᠠ ᠯᠠᠮᠠ ᠳ᠋ᠤ᠌ ᠮᠥᠷᠭᠥᠭᠡᠳ ᠶᠠᠪᠤᠭᠰᠠᠨ ᠪᠠᠢᠪᠠᠯ ᠴᠦ᠍ ᠬᠥᠭᠡᠷᠦᠬᠦᠢ ᠠᠯᠳᠠᠬᠤ ᠦᠭᠡᠢ ᠳᠡ ᠭᠡᠵᠦ ᠴᠣᠬᠣᠮ ᠬᠡᠨ ᠳ᠋ᠦ᠍ ᠬᠡᠯᠡᠵᠦ ᠪᠠᠢᠭᠠ ᠨᠢ ᠦᠯᠦ ᠮᠡᠳᠡᠭᠳᠡᠮᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠯᠠ᠃ ᠡᠨᠡ ᠦᠭᠡ ᠨᠢ ᠲᠥᠷᠥᠯᠬᠢ ᠶ᠋ᠢᠨ ᠰᠦᠰᠦᠭ ᠪᠢᠰᠢᠷᠡᠯ ᠮᠠᠭᠤᠲᠠᠢ ᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠦᠯᠦ ᠨᠠᠭᠠᠯᠳᠤᠬᠤ ᠲᠤᠯᠠ᠄
— ᠵᠠ ᠲᠠ ᠮᠢᠨᠢ ᠲᠡᠷᠡ ᠡᠷᠭᠢᠯ ᠮᠥᠷᠭᠥᠯ ᠴᠦ᠍ ᠶᠠᠭᠠᠮᠠᠢ᠂ ᠵᠦᠭᠡᠷ ᠤᠨᠤᠭᠠ ᠬᠥᠰᠬᠡ ᠪᠠᠨ ᠯᠠ ᠳᠡᠮᠡᠢ ᠤᠶᠠᠵᠤ ᠡᠴᠡᠭᠡᠬᠦ ᠦᠭᠡᠢ ᠶ᠋ᠢ ᠪᠣᠳᠣᠭᠰᠠᠨ ᠨᠢ ᠳᠡᠭᠡᠷᠡ ᠪᠠ ᠭᠡᠬᠦ ᠳ᠋ᠦ᠍᠂ ᠬᠠᠷᠢᠭᠤ ᠳ᠋ᠤ᠌ ᠨᠢ ᠬᠦᠷᠡᠯ᠄
— ᠵᠦᠭᠡᠷ! ᠠᠶᠠᠨ ᠤ᠋ ᠲᠡᠮᠡᠭᠡ ᠶ᠋ᠢ ᠭᠠᠷᠤᠭᠰᠠᠨ ᠡᠳᠦᠷ ᠨᠢ ᠬᠣᠶᠠᠷ ᠬᠣᠨᠣᠭ ᠠᠮᠠᠷᠠᠭᠠᠨ ᠤᠶᠠᠬᠤ ᠳ᠋ᠤ᠌ ᠪᠡᠶᠡ ᠨᠢ ᠰᠢᠪᠬᠠᠷᠠᠨ ᠰᠠᠢᠨ ᠪᠠᠢᠳᠠᠭ ᠭᠡᠪᠡ᠃ ᠳᠣᠷᠵᠢ ᠠᠶᠠᠨ ᠵᠢᠩ ᠦ᠋ᠨ ᠳᠠᠳᠤᠯᠭᠠ ᠦᠭᠡᠢ ᠬᠥᠮᠦᠨ ᠪᠣᠯᠬᠤ ᠲᠤᠯᠠ ᠶᠠᠭᠤ ᠴᠦ᠍ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠪᠢᠯᠡ᠃ᠬᠦᠷᠡᠯ ᠦ᠋ᠨ ᠡᠷᠭᠢᠯ ᠮᠥᠷᠭᠥᠯ ᠦ᠋ᠨ ᠠᠵᠢᠯ ᠥᠨᠥ ᠮᠠᠷᠭᠠᠰᠢ ᠳ᠋ᠠᠭᠠᠨ ᠪᠠᠭᠲᠠᠮᠠ ᠦᠭᠡᠢ ᠪᠠᠢᠪᠠᠴᠤ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠶᠠᠭᠠᠷᠠᠵᠤ ᠪᠠᠢᠭᠠ ᠶ᠋ᠢ ᠰᠠᠨᠠᠨ ᠲᠦᠷᠭᠡᠯᠡᠬᠦ ᠶ᠋ᠢ ᠰᠢᠢᠳᠪᠦᠷᠢᠯᠡᠪᠡ᠃ ᠣᠷᠭᠢᠯᠤᠨ ᠪᠤᠴᠠᠯᠵᠤ ᠪᠠᠢᠭᠠ ᠴᠠᠢ ᠪᠠᠨ ᠣᠳᠬᠣᠨ ᠠᠪᠴᠤ ᠲᠣᠮᠣ ᠬᠠᠷᠠ ᠠᠶᠠᠭᠠᠨ ᠳ᠋ᠠᠭᠠᠨ ᠬᠢᠵᠦ ᠶᠠᠭᠠᠷᠠᠨ ᠤᠤᠭᠤᠭᠠᠳ᠄
— ᠬᠡᠦᠬᠡᠳ ᠦ᠋ᠳ ᠮᠢᠨᠢ᠂ ᠬᠦᠷᠢᠶᠡ ᠣᠷᠣᠵᠠᠭᠠᠶᠠ! ᠭᠡᠳ ᠪᠣᠰᠤᠯᠠ᠃ ᠳ᠋ᠠᠨᠽᠡᠨ ᠲᠡᠭᠦᠨ ᠦ᠌ ᠡᠷᠭᠢᠯ ᠮᠥᠷᠭᠥᠯ ᠦ᠋ᠨ ᠶᠠᠪᠤᠳᠠᠯ ᠢ᠋ ᠠᠯᠢ ᠲᠦᠷᠦᠭᠦᠴᠢ ᠡᠴᠡ ᠠᠪᠤᠨ ᠵᠥᠪᠰᠢᠶᠡᠷᠡᠵᠦ ᠪᠠᠢᠭᠰᠠᠨ ᠪᠥᠭᠡᠳ ᠭᠠᠭᠴᠠ ᠬᠦ᠌ ᠪᠤᠷᠬᠠᠨ ᠳ᠋ᠤ᠌ ᠡᠷᠭᠦᠬᠦ ᠬᠠᠳᠠᠭ ᠦᠭᠡᠢ ᠳ᠋ᠡᠭᠡᠨ ᠪᠣᠭᠣᠭᠳᠠᠵᠤ ᠪᠠᠢᠵᠠᠢ᠃ ᠬᠦᠷᠡᠯ ᠡᠴᠡ ᠬᠣᠶᠠᠷ ᠬᠠᠳᠠᠭ ᠵᠢᠭᠡᠯᠡᠨ ᠬᠠᠮᠲᠤ ᠭᠠᠷᠪᠠ᠃ ᠳᠣᠷᠵᠢ ᠨᠢ ᠡᠨᠡ ᠵᠠᠪᠰᠢᠶᠠᠨ ᠳ᠋ᠤ᠌ ᠰᠡᠭᠦᠯ ᠦ᠋ᠨ ᠬᠡᠳᠦ ᠬᠣᠨᠣᠭ ᠲᠤ ᠳᠤᠲᠠᠭᠤ ᠠᠪᠤᠭᠰᠠᠨ ᠨᠣᠢᠷ ᠢ᠋ᠶ᠋ᠠᠨ ᠭᠦᠢᠴᠡᠭᠡᠬᠦ ᠭᠡᠰᠡᠨ ᠮᠡᠲᠦ ᠪᠦᠰᠡ ᠪᠡᠨ ᠲᠠᠢᠯᠤᠨ ᠬᠠᠵᠠᠭᠤᠯᠳᠠᠨ ᠤᠨᠠᠪᠠ᠃ ᠬᠦᠷᠡᠯ ᠮᠠᠢᠬᠠᠨ ᠠ᠋ᠴᠠ ᠪᠠᠨ ᠭᠠᠷᠤᠨ ᠬᠦᠷᠢᠶᠡᠨ ᠦ᠌ ᠵᠦᠭ ᠠᠯᠬᠤᠬᠤ ᠳᠣᠳᠣᠮ ᠵᠠᠯᠪᠠᠷᠢᠬᠤ ᠨᠢ ᠣᠯᠠᠰᠢᠷᠠᠵᠤ᠄
— ᠶᠣᠰᠣᠲᠠᠢ ᠪᠤᠷᠬᠠᠨ ᠤ᠋ ᠣᠷᠣᠨ ᠮᠠᠨᠢ ᠡᠨᠡ ᠰᠢᠦ ᠳᠡ ᠭᠡᠳ ᠳ᠋ᠠᠨᠽᠡᠨ ᠳ᠋ᠦ᠍ ᠵᠠᠯᠪᠠᠷᠢᠬᠤ ᠶ᠋ᠢ ᠱᠠᠭᠠᠷᠳᠠᠨᠠ᠃ ᠳ᠋ᠠᠨᠽᠡᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠬᠠᠪᠰᠤᠷᠭᠠᠨ ᠨᠠᠮᠠᠨᠴᠢᠯᠠᠬᠤ ᠭᠡᠲᠡᠯᠡ ᠬᠠᠵᠠᠭᠤᠬᠠᠨ ᠲᠠᠢ ᠠᠷᠪᠠᠭᠠᠳ ᠬᠤᠩᠰᠠ ᠴᠠᠢ ᠠᠴᠢᠭᠰᠠᠨ ᠳᠠ ᠴᠧ ᠲᠡᠷᠭᠡ ᠰᠢᠪᠡᠷ ᠲᠤ ᠵᠠᠭᠤᠭᠳᠠᠭᠰᠠᠨ ᠦᠵᠡᠭᠳᠡᠯᠡ᠃ ᠮᠣᠷᠢ ᠨᠢ ᠪᠦᠬᠦ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠷᠣᠭᠰᠢ ᠲᠡᠮᠡᠦᠯᠦᠨ ᠵᠢᠳᠬᠦᠵᠦ ᠪᠠᠢᠬᠤ ᠳ᠋ᠤ᠌ ᠬᠥᠲᠥᠯᠦᠨ ᠶᠠᠪᠤᠭᠠ ᠣᠭᠳᠣᠷᠬᠠᠨ ᠨᠡᠬᠡᠢ ᠪᠣᠰᠢᠨᠵᠠ ᠲᠠᠢ᠂ ᠲᠣᠮᠣ ᠦᠨᠡᠭᠡᠨ ᠮᠠᠯᠠᠭᠠᠢ ᠲᠠᠢ ᠬᠥᠮᠦᠨ᠂ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠬᠠᠢᠷᠠ ᠨᠠᠢᠷ ᠦᠭᠡᠢ ᠴᠣᠬᠢᠵᠤ ᠪᠠᠢᠭᠠ ᠳ᠋ᠤ᠌ ᠳᠣᠲᠣᠷᠠ ᠨᠢ ᠠᠶᠠ ᠦᠭᠡᠢ ᠪᠣᠯᠵᠤ ᠵᠠᠯᠪᠠᠷᠢᠬᠤ ᠪᠠᠨ ᠮᠠᠷᠲᠠᠪᠠ᠃ ᠭᠡᠲᠡᠯᠡ ᠬᠦᠷᠡᠯ ᠬᠠᠵᠠᠭᠤ ᠠ᠋ᠴᠠ ᠲᠡᠳᠡᠨ᠄
— ᠵᠠ ᠬᠡᠦᠬᠡ ᠠ᠋᠂ ᠬᠣᠶᠠᠭᠤᠯᠠ ᠪᠠᠨ ᠡᠨᠳᠡ ᠡᠴᠡ ᠰᠠᠯᠤᠶᠠ ᠭᠡᠳ ᠭᠠᠷ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠲᠠᠢᠰᠢ ᠰᠤᠩᠭᠠᠨ᠄
— ᠴᠢ ᠲᠡᠷᠡ ᠥᠨᠳᠥᠷ ᠬᠣᠭ ᠤ᠋ᠨ ᠬᠣᠢᠭᠤᠷ ᠣᠷᠣᠨ ᠴᠠᠭᠠᠳᠤ ᠳᠣᠣᠷᠠ ᠨᠢ ᠪᠠᠢᠭᠠ ᠬᠡᠳᠦᠨ ᠴᠠᠭᠠᠨ ᠰᠤᠪᠤᠷᠭᠠᠨ ᠲᠡᠨᠳᠡ ᠡᠴᠡ ᠤᠷᠤᠭᠰᠢ ᠪᠠᠨ ᠡᠷᠭᠢᠨᠡ ᠰᠢᠦ ᠳᠡ᠃ ᠲᠡᠭᠡᠬᠦ ᠳ᠋ᠦ᠍ ᠴᠢᠨᠢ ᠨᠢᠭᠡ ᠥᠷᠭᠡᠨ ᠭᠤᠳᠤᠮᠵᠢ ᠲᠣᠰᠣᠨ ᠠᠪᠤᠨᠠ ᠪᠣᠢ᠃ ᠲᠡᠭᠦᠨ ᠢ᠋ ᠤᠷᠤᠭᠤᠳᠠᠨ ᠶᠠᠪᠤᠬᠤ ᠪᠠᠷ ᠳ᠋ᠸᠴᠢᠩᠭᠠᠯᠪᠤ ᠶ᠋ᠢᠨ ᠳᠤᠭᠠᠩ᠂ ᠪᠢ ᠡᠨᠳᠡ ᠪᠠᠢᠨᠠ ᠭᠡᠳ ᠲᠠᠭᠠᠷᠠᠯᠳᠤᠨᠠ ᠭᠡᠵᠦ ᠮᠡᠳᠡ!
— ᠨᠥᠭᠦᠭᠡ ᠵᠠᠩᠷᠠᠢᠰᠠᠭ ᠭᠡᠳᠡᠭ ᠨᠢ ᠬᠠᠮᠢᠭᠠ ᠪᠢᠯᠡ ᠭᠡᠬᠦ ᠳ᠋ᠦ᠍᠄
— ᠠ ᠲᠡᠢᠮᠦ᠂ ᠵᠠ ᠲᠡᠷᠡ ᠳᠠ᠂ ᠲᠡᠷᠡ ᠪᠦᠭᠦᠳᠡ ᠶ᠋ᠢᠨ ᠳᠡᠭᠡᠭᠦᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠦᠨᠳᠡᠷᠯᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠ ᠭᠡᠳ᠂ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠪᠣᠯᠭᠠᠨ ᠳᠠᠬᠢᠨ ᠵᠢᠭᠠᠵᠤ᠂ ᠲᠡᠨᠳᠡ ᠴᠢ ᠨᠠᠮᠠᠶ᠋ᠢ ᠬᠦᠯᠢᠶᠡᠨᠡ ᠰᠢᠦ ᠳᠡ᠃ ᠵᠠ ᠡᠢᠮᠦ ᠪᠠᠢᠨᠠ ᠭᠡᠳ ᠴᠠᠭᠠᠰᠢ ᠨᠢ ᠣᠯᠠᠨ ᠲᠠᠪᠤᠨ ᠦᠭᠡ ᠬᠡᠯᠡᠯ ᠦᠭᠡᠢ ᠤᠷᠤᠭᠰᠢ ᠡᠷᠭᠢᠨ ᠰᠠᠯᠤᠨ ᠶᠠᠪᠤᠯᠠ᠃
ᠳ᠋ᠠᠨᠽᠡᠨ᠂ ᠥᠨᠳᠥᠷ ᠵᠠᠩᠷᠠᠢᠰᠠᠭ ᠤ᠋ᠨ ᠳᠤᠭᠠᠩ ᠢ᠋ ᠰᠢᠷᠳᠡᠨ ᠶᠠᠪᠤᠬᠤ ᠳ᠋ᠠᠭᠠᠨ ᠳᠣᠲᠣᠷᠠ ᠨᠢ ᠨᠠᠶᠠᠨ ᠲᠣᠬᠣᠢ ᠥᠨᠳᠥᠷ᠂ ᠶᠣᠰᠣᠲᠠᠢ ᠣᠷᠴᠢᠯᠠᠩ ᠬᠣᠷᠸᠠ ᠳ᠋ᠤ᠌ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠠᠯᠲᠠᠨ ᠵᠠᠩᠷᠠᠢᠰᠠᠭ ᠪᠤᠷᠬᠠᠨ ᠪᠠᠢᠳᠠᠭ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠨ ᠲᠡᠭᠦᠨ ᠳ᠋ᠦ᠍ ᠣᠳᠣ ᠮᠥᠷᠭᠥᠬᠦ ᠭᠡᠵᠦ ᠶᠠᠪᠤᠭᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠨᠠ᠃ ᠬᠣᠭ ᠤ᠋ᠨ ᠬᠣᠢᠭᠤᠷ ᠭᠠᠷᠤᠭᠠᠷᠠᠢ ᠭᠡᠰᠡᠨ ᠬᠦᠷᠡᠯ ᠦ᠋ᠨ ᠦᠭᠡ ᠶ᠋ᠢ ᠰᠠᠨᠠᠨ ᠲᠡᠷᠡ ᠬᠣᠭ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠮᠠᠰᠢ ᠲᠣᠮᠣ᠂ ᠪᠢᠴᠢᠬᠠᠨ ᠲᠣᠯᠣᠭᠠᠢ ᠰᠢᠭ᠋ ᠥᠨᠳᠥᠷ ᠪᠠᠢᠬᠤ ᠲᠤᠯᠠ ᠳ᠋ᠠᠨᠽᠡᠨ ᠦ᠌ ᠪᠣᠳᠣᠯ ᠥᠭᠡᠷᠡᠴᠢᠯᠡᠭᠳᠡᠪᠡ᠃《ᠡᠨᠡ ᠪᠠᠰᠠ ᠲᠣᠮᠣ ᠠ᠋᠂ ᠡᠢᠮᠦ ᠲᠣᠮᠣ ᠬᠣᠭ ᠴᠦ᠍ ᠬᠠᠷᠢᠨ ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠦᠭᠡᠢ ᠪᠠᠢᠬᠠ》 ᠭᠡᠵᠦ ᠭᠠᠢᠬᠠᠨᠠ᠃ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠲᠡᠨ ᠳᠡᠷᠭᠡᠳᠡ ᠨᠢ ᠣᠴᠢᠲᠠᠯᠠ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠠᠷᠠ ᠭᠢᠴᠢᠢ ᠭᠡᠨᠡᠳᠲᠡ ᠬᠠᠷ ᠶᠠᠷ ᠬᠤᠴᠠᠨ ᠳᠠᠭᠠᠷᠢᠪᠠ᠃ ᠭᠠᠢᠲᠠᠢ ᠬᠣᠭ ᠤ᠋ᠨ ᠲᠣᠮᠣ ᠶ᠋ᠢ ᠭᠠᠢᠬᠠᠨ ᠶᠠᠪᠤᠭᠠᠳ ᠣᠯᠠᠨ ᠭᠥᠯᠥᠭᠡ ᠲᠡᠢ ᠭᠢᠴᠢᠢ ᠶ᠋ᠢᠨ ᠡᠭᠦᠷ ᠳᠡᠭᠡᠷᠡ ᠣᠷᠣᠭᠰᠠᠨ ᠠᠵᠢ᠃ ᠭᠢᠴᠢᠢ ᠶ᠋ᠢ ᠬᠡᠳᠦ ᠳᠠᠬᠢᠨ ᠢᠰᠬᠦᠯᠦᠭᠡᠳ ᠣᠨᠣᠭᠰᠨ ᠦᠭᠡᠢ᠃ ᠰᠠᠨᠳᠤᠷᠬᠤ ᠳ᠋ᠤ᠌ ᠪᠠᠰᠠ ᠵᠦᠭ ᠪᠦᠷᠢ ᠡᠴᠡ ᠬᠡᠳᠦᠨ ᠠᠷᠪᠠᠨ ᠨᠣᠬᠠᠳ ᠱᠤᠤᠭᠢᠶᠠᠨ ᠲᠠᠯᠪᠢᠨ ᠬᠠᠷᠠ ᠬᠤᠷᠳᠤ ᠪᠠᠷ ᠠᠢᠰᠤᠢ ᠶᠠᠪᠤᠨᠠ᠃ ᠭᠢᠴᠢᠢ ᠶ᠋ᠢᠨ ᠣᠮᠣᠭ ᠤᠯᠠᠮ ᠢ᠋ᠶ᠋ᠠᠷ ᠳᠣᠭᠰᠢᠷᠠᠭᠰᠠᠨ ᠪᠥᠭᠡᠳ ᠳ᠋ᠠᠨᠽᠡᠨ ᠳ᠋ᠦ᠍ ᠲᠡᠭᠦᠨ ᠢ᠋ ᠬᠣᠷᠢᠭᠯᠠᠬᠤ ᠶᠠᠭᠤᠮᠠ ᠶᠠᠭᠤ ᠴᠦ᠍ ᠠᠯᠠᠭᠠ᠂ ᠥᠭᠡᠷᠡ ᠨᠣᠬᠠᠳ ᠢ᠋ ᠠᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠬᠦᠷᠦᠯᠴᠡᠨ ᠢᠷᠡᠵᠦ ᠭᠠᠯᠵᠠᠭᠤ ᠮᠡᠲᠦ ᠳᠠᠭᠠᠷᠢᠵᠤ ᠡᠬᠢᠯᠡᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠪᠠᠰᠠ ᠡᠳᠦᠢ ᠲᠡᠳᠦᠢ ᠨᠣᠬᠠᠳ ᠨᠡᠮᠡᠨ ᠠᠢᠰᠤᠢ ᠦᠵᠡᠭᠳᠡᠨᠡ᠃ ᠳ᠋ᠠᠨᠽᠡᠨ ᠬᠠᠰᠬᠢᠷᠤᠯᠠ᠂ ᠰᠢᠷᠣᠢ ᠰᠠᠴᠤᠯᠠ᠂ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠰᠠᠪᠠᠯᠠ᠂ ᠢᠰᠬᠦᠯᠦᠯᠡ᠂ ᠡᠨᠡ ᠪᠦᠬᠦᠨ ᠶᠠᠮᠠᠷ ᠴᠦ᠍ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠂ ᠭᠠᠵᠠᠷ ᠳᠡᠯᠡᠬᠡᠢ ᠳᠦᠭᠦᠷᠡᠩ ᠨᠣᠬᠠᠢ᠂ ᠳᠡᠭᠡᠭᠰᠢ ᠬᠠᠷᠠᠪᠠᠴᠤ ᠨᠣᠬᠠᠢ᠂ ᠨᠣᠬᠠᠢ᠂ ᠨᠣᠬᠠᠢ᠁ ᠵᠠᠩᠴᠢᠬᠦᠦ ᠬᠣᠲᠠ ᠪᠠ ᠥᠨᠳᠥᠷ ᠵᠠᠩᠷᠠᠢᠰᠠᠭ᠂ ᠳ᠋ᠸᠴᠢᠩᠭᠠᠯᠪᠤ ᠬᠢᠭᠡᠳ ᠣᠯᠵᠠ ᠣᠮᠣᠭ ᠣᠯᠤᠨ᠂ ᠡᠬᠡ ᠡᠭᠡᠴᠢ ᠨᠠᠷ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠪᠦᠭᠦᠳᠡ ᠮᠠᠷᠲᠠᠭᠳᠠᠪᠠ᠃ ᠡᠴᠦᠰ ᠲᠦ᠋ᠨᠢ ᠥᠪᠡᠷ ᠦ᠋ᠨ ᠪᠡᠶᠡ ᠴᠣᠬᠣᠮ ᠬᠠᠮᠢᠭᠠ ᠶᠠᠭᠤᠨ ᠳᠡᠭᠡᠷᠡ ᠪᠠᠢᠭᠠ ᠪᠠᠨ ᠴᠦ᠍ ᠮᠡᠳᠡᠬᠦ ᠪᠡᠨ ᠪᠣᠯᠢᠪᠠ᠃ ᠮᠡᠳᠡᠬᠦ ᠡᠴᠡ ᠵᠥᠪᠬᠡᠨ ᠠᠮᠢ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠬᠤ ᠪᠠᠢᠪᠠᠴᠤ᠂ ᠴᠣᠬᠣᠮ ᠬᠡᠷᠬᠢᠨ ᠶᠠᠭᠤ ᠪᠠᠷ ᠭᠡᠳᠡᠭ ᠨᠢ ᠠᠯᠠᠭᠠ᠂ ᠰᠡᠭᠦᠯ ᠳ᠋ᠡᠭᠡᠨ ᠪᠦᠷ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠬᠦ ᠪᠡᠨ ᠪᠣᠯᠢᠪᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠨᠢᠭᠤᠷ ᠥᠭᠡᠳᠡ ᠲᠣᠮᠣ ᠬᠠᠷᠠ ᠶᠠᠭᠤᠮᠠ ᠦᠰᠦᠷᠦᠨ ᠢᠷᠡᠯᠡ᠃ ᠰᠢᠭᠦᠷᠡᠨ ᠠᠪᠴᠤ ᠭᠠᠵᠠᠷ ᠫᠢᠰ ᠪᠠᠭᠤᠯᠭᠠᠨ ᠰᠢᠲᠠᠪᠠ᠃ ᠲᠡᠷᠡ ᠨᠢ ᠨᠣᠬᠠᠢ ᠪᠠᠢᠯᠠ᠃ ᠨᠣᠬᠠᠢ ᠶ᠋ᠢᠨ ᠭᠠᠰᠠᠯᠬᠤ ᠰᠣᠨᠣᠰᠳᠠᠪᠠ᠃ ᠪᠠᠰᠠ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠤᠨᠢ ᠨᠢᠭᠡ ᠨᠣᠬᠠᠢ ᠨᠣᠴᠣᠨ ᠵᠡᠭᠦᠭᠳᠡᠪᠡ᠃ ᠲᠡᠷᠡ ᠨᠢ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠦ ᠳᠠᠭᠠᠷᠢᠭᠰᠠᠨ ᠠᠶᠤᠯᠲᠤ ᠬᠠᠷᠠ ᠭᠢᠴᠢᠢ ᠪᠠᠢᠵᠠᠢ᠃ ᠲᠣᠷᠭᠠ ᠪᠣᠯᠲᠠᠯᠠ ᠨᠢ ᠡᠯᠳᠡᠭᠰᠡᠨ ᠨᠡᠬᠡᠢ ᠳ᠋ᠦ᠍ ᠬᠤᠷᠴᠠ ᠰᠣᠶᠣᠭᠠ ᠲᠡᠭᠡᠭᠳᠡᠭᠦᠯᠦᠨ ᠤᠭᠵᠠᠷᠠᠵᠤ ᠪᠠᠢᠭᠰᠠᠨ ᠢ᠋ ᠳ᠋ᠠᠨᠽᠡᠨ ᠣᠪᠣᠭᠠᠳᠠᠨ ᠠᠪᠴᠤ ᠬᠡᠳᠦ ᠳᠠᠬᠢᠨ ᠭᠠᠵᠠᠷ ᠰᠠᠪᠠᠨ ᠬᠠᠶᠠᠪᠠ᠃ ᠬᠠᠷᠠ ᠭᠢᠴᠢᠢ ᠨᠢᠷᠤᠭᠤ ᠪᠠᠷ ᠭᠠᠵᠠᠷ ᠤᠨᠠᠵᠤ ᠳᠥᠷᠪᠡᠨ ᠮᠥᠴᠢ ᠪᠡᠨ ᠰᠠᠷᠪᠠᠯᠵᠠᠭᠤᠯᠤᠨ ᠠᠷᠠᠢᠬᠠᠨ ᠪᠣᠰᠤᠭᠠᠳ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠭᠤᠲᠠᠪᠠ᠃ ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠪᠤᠰᠤᠳ ᠨᠢ ᠰᠡᠭᠦᠯ ᠬᠠᠪᠴᠢᠨ ᠲᠠᠯᠠ ᠲᠠᠯᠠ ᠲᠠᠢᠰᠢ ᠪᠠᠨ ᠵᠢᠭᠤᠲᠠᠵᠠᠢ᠃ ᠳ᠋ᠠᠨᠽᠡᠨ ᠣᠳᠣ ᠥᠪᠡᠷ ᠦ᠋ᠨ ᠤᠬᠠᠭᠠᠨ ᠲᠠᠢ ᠪᠣᠯᠤᠭᠠᠳ᠂ ᠪᠡᠶᠡ ᠪᠡᠨ ᠠᠵᠢᠬᠤ ᠳ᠋ᠤ᠌ ᠵᠢᠷᠦᠬᠡ ᠨᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠠᠭᠲᠠᠵᠤ ᠶᠠᠳᠠᠨ ᠴᠣᠬᠢᠯᠠᠨᠠ᠃ ᠪᠥᠭᠰᠡ ᠪᠡᠶᠡ ᠱᠠᠷᠬᠢᠷᠠᠨ ᠬᠦᠨᠳᠦᠭᠦᠷᠯᠡᠬᠦ ᠮᠡᠲᠦ《ᠡᠨᠡ ᠴᠦ᠍ ᠯᠠᠪ ᠰᠡᠭ ᠪᠣᠯᠤᠭᠰᠠᠨ ᠪᠠᠢᠬᠠ》 ᠭᠡᠵᠦ ᠪᠣᠳᠣᠨ ᠰᠢᠯᠭᠠᠨ ᠦᠵᠡᠬᠦ ᠳ᠋ᠦ᠍ ᠠᠷᠤ ᠬᠣᠷᠮᠣᠢ ᠨᠢᠭᠡᠨ ᠬᠡᠰᠡᠭ ᠤᠷᠠᠭᠳᠠᠨ ᠤᠨᠵᠢᠢᠵᠤ᠂ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠤ᠌ ᠬᠣᠶᠠᠷ ᠪᠢᠴᠢᠬᠠᠨ ᠨᠦᠬᠡ ᠭᠠᠷᠤᠭᠰᠠᠨ ᠠ᠋ᠴᠠ ᠥᠭᠡᠷᠡ ᠪᠡᠶᠡ ᠳ᠋ᠦ᠍ ᠬᠦᠷᠦᠭᠰᠡᠨ ᠶᠠᠭᠤᠮᠠ ᠠᠯᠠᠭᠠ᠃ ᠡᠢᠮᠦ ᠳ᠋ᠦ᠍ ᠰᠡᠳᠬᠢᠯ ᠨᠢ ᠪᠦᠷᠢᠨ ᠲᠠᠢᠪᠤᠰᠢᠷᠠᠭᠰᠠᠨ ᠪᠥᠭᠡᠳ ᠬᠠᠷᠠ ᠭᠢᠴᠢᠢ ᠶ᠋ᠢ ᠭᠠᠵᠠᠷ ᠭᠤᠶᠠᠳᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠳ᠋ᠤ᠌ ᠮᠥᠨ ᠴᠦ᠍ ᠥᠰᠢᠶᠡ ᠠᠪᠤᠭᠰᠠᠨ ᠰᠢᠭ᠋ ᠪᠤᠳᠤᠭᠳᠠᠨ ᠢᠨᠢᠶᠡᠳᠦ ᠬᠦᠷᠦᠨᠡ᠃ ᠪᠤᠰᠤᠳ ᠨᠣᠬᠠᠳ ᠤ᠋ᠨ ᠵᠢᠭᠤᠲᠠᠭᠰᠠᠨ ᠢ᠋ ᠬᠦᠴᠦᠲᠦ ᠰᠠᠬᠢᠭᠤᠯᠰᠤᠨ ᠳ᠋ᠸᠴᠢᠩᠭᠠᠯᠪᠤ᠂ ᠥᠨᠳᠥᠷ ᠵᠠᠩᠷᠠᠢᠰᠠᠭ ᠤ᠋ᠨ ᠠᠪᠤᠷᠠᠯ ᠭᠡᠵᠦ ᠦᠵᠡᠪᠡ᠃ ᠲᠡᠨᠳᠡ ᠡᠴᠡ ᠭᠤᠷᠪᠠᠨ ᠰᠤᠪᠤᠷᠭᠠ ᠶ᠋ᠢ ᠴᠢᠭᠯᠡᠨ ᠶᠠᠪᠤᠯᠠ᠃ ᠬᠠᠵᠠᠭᠤ ᠠ᠋ᠴᠠ ᠪᠠᠰᠠ ᠨᠣᠬᠠᠢ ᠳᠠᠭᠠᠷᠢᠬᠤ ᠴᠢᠮᠡᠭᠡ ᠭᠠᠷᠤᠭᠰᠠᠨ ᠳ᠋ᠤ᠌ ᠳᠠᠪ ᠬᠢᠨ ᠰᠣᠴᠢᠨ ᠬᠠᠷᠠᠬᠤ ᠳ᠋ᠤ᠌ ᠨᠣᠬᠠᠢ ᠪᠢᠰᠢ᠂ ᠢᠳᠡ ᠨᠠᠰᠤᠨ ᠤ᠋ ᠬᠣᠶᠠᠷ ᠯᠠᠮᠠ ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠢᠨᠢᠶᠡᠨ ᠰᠠᠭᠤᠨᠠ᠃ ᠲᠡᠳᠡ ᠥᠪᠡᠷ ᠢ᠋ ᠨᠢ ᠱᠣᠣᠯᠠᠬᠤ ᠠᠵᠢ᠃ ᠳ᠋ᠠᠨᠽᠡᠨ ᠦᠭᠡ ᠳᠠᠭᠤ ᠦᠭᠡᠢ ᠳᠠᠭᠠᠷᠢᠨ ᠭᠠᠷᠬᠤ ᠶ᠋ᠢ ᠪᠣᠳᠣᠪᠠ᠃ ᠭᠡᠪᠡᠴᠦ ᠲᠡᠷᠡ ᠬᠣᠶᠠᠷ ᠤ᠋ᠨ ᠣᠷᠬᠢᠮᠵᠢ ᠪᠠᠨ ᠪᠦᠰᠡᠯᠡᠨ ᠤᠷᠲᠤ ᠪᠠᠨ ᠵᠠᠩᠭᠢᠳᠤᠭᠰᠠᠨ ᠲᠦᠨᠲᠦᠭᠡᠷ ᠲᠣᠯᠣᠭᠠᠢ ᠲᠠᠢ ᠬᠦᠷᠡᠩ ᠬᠠᠷᠠ ᠨᠢᠭᠤᠷ ᠲᠠᠢ ᠨᠢ᠄
— ᠬᠠᠷᠠ ᠬᠦᠦ ᠴᠢ ᠬᠠᠷᠢᠨ ᠦᠵᠡᠭᠡ ᠦᠭᠡᠢ ᠶᠠᠭᠤᠮᠠ ᠪᠠᠨ ᠦᠵᠡᠨ᠂ ᠦᠬᠡᠷ ᠴᠠᠮ ᠬᠠᠷᠠᠢᠵᠤ ᠰᠢᠪ ᠳᠡ ᠭᠡᠳ ᠬᠡ ᠬᠠ ᠢᠨᠢᠶᠡᠯᠡ᠃ ᠳ᠋ᠠᠨᠽᠡᠨ ᠦ᠌ ᠵᠢᠪᠡᠭᠦᠦ ᠬᠦᠷᠪᠡ᠃
— ᠲᠠ ᠨᠠᠷ ᠴᠢᠨᠢ ᠨᠠᠮᠠᠶ᠋ᠢ ᠨᠣᠬᠠᠢ ᠳ᠋ᠤ᠌ ᠪᠠᠷᠢᠭᠤᠯᠴᠢᠬᠠᠬᠤ ᠭᠡᠵᠦ ᠪᠠᠢᠬᠤ ᠳ᠋ᠤ᠌᠂ ᠡᠨᠳᠡ ᠪᠠᠢᠭᠰᠠᠨ ᠤᠯᠤᠰ ᠤᠤ?
— ᠲᠡᠢᠮᠦ ᠠ᠋᠂ ᠴᠢ ᠴᠦ᠍ ᠮᠥᠨ ᠳᠤᠮᠳᠠ ᠨᠢ ᠰᠠᠷᠯᠤᠭ ᠤ᠋ᠨ ᠪᠤᠬᠠ ᠠᠶᠠᠲᠠᠢ ᠰᠠᠢᠬᠠᠨ ᠦᠵᠡᠯᠴᠡᠯᠡ ᠰᠢᠦ ᠳᠡ ᠭᠡᠵᠦ ᠴᠡᠪᠡᠷᠬᠡᠨ ᠴᠢᠷᠠᠢ ᠲᠠᠢ ᠨᠢ ᠬᠡᠯᠡᠪᠡ᠃
ᠬᠠᠷᠢᠭᠤ ᠳ᠋ᠤᠨᠢ ᠳ᠋ᠠᠨᠽᠡᠨ᠄
— ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ ᠯᠠᠮᠠ ᠨᠠᠷ ᠪᠣᠯ ᠳᠠ ᠭᠡᠯᠡ᠃ ᠡᠭᠦᠨ ᠡᠴᠡ ᠮᠠᠭᠤ ᠦᠭᠡ ᠲᠡᠷᠡ ᠦᠶᠡ ᠳ᠋ᠦ᠍ ᠡᠰᠡ ᠣᠯᠳᠠᠪᠠ᠃
— ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ ᠯᠠᠮᠠ ᠪᠣᠯ ᠭᠡᠨᠡ ᠬᠦ᠌᠂ ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠬᠣᠶᠠᠭᠤᠯᠠ ᠪᠠᠨ ᠪᠣᠰᠤᠭᠠᠳ ᠢᠷᠡᠪᠡ᠃
— ᠲᠡᠢᠮᠦ ᠠ᠋᠂ ᠬᠥᠮᠦᠨ ᠢ᠋ ᠠᠪᠤᠷᠠᠬᠤ ᠰᠡᠳᠬᠢᠯ ᠦᠭᠡᠢ ᠪᠣᠯᠬᠣᠷ ᠴᠢᠨᠢ ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ ᠯᠠᠮᠠ ᠨᠠᠷ ᠪᠣᠯ ᠳᠠ ᠭᠡᠰᠡᠨ ᠶᠦᠮ ᠭᠡᠳ ᠳ᠋ᠠᠨᠽᠡᠨ ᠲᠡᠰᠢᠶᠡ ᠲᠤᠯᠤᠨ ᠲᠡᠳᠡᠨ ᠢ᠋ ᠬᠦᠯᠢᠶᠡᠪᠡ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠲᠡᠳᠡᠨ ᠲᠡᠢ ᠦᠵᠡᠯᠴᠡᠬᠦ ᠳ᠋ᠦ᠍ ᠰᠠᠶᠢ ᠶ᠋ᠢᠨ ᠣᠯᠠᠨ ᠨᠣᠬᠠᠢ ᠲᠠᠢ ᠦᠵᠡᠯᠴᠡᠬᠦ ᠡᠴᠡ ᠠᠶᠤᠯᠲᠠᠢ ᠪᠢᠰᠢ ᠪᠣᠳᠣᠭᠳᠠᠪᠠ᠃ ᠳᠥᠨᠳᠥᠭᠡᠷ ᠲᠣᠯᠣᠭᠠᠢᠲᠤ ᠯᠠᠮᠠ ᠳ᠋ᠠᠨᠽᠡᠨ ᠦ᠌ ᠤᠷᠲᠤ ᠢᠷᠡᠭᠡᠳ ᠬᠠᠮᠠᠷ ᠢ᠋ᠶ᠋ᠠᠨ ᠰᠠᠷᠲᠠᠢᠯᠭᠠᠨ ᠬᠠᠨᠴᠤᠢ ᠰᠢᠮᠠᠯᠠᠪᠠ᠃
— ᠴᠢ ᠶᠡᠷᠦ ᠨᠢ ᠶᠠᠭᠠᠬᠢᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠨᠠ ᠪᠣᠢ? ᠭᠡᠬᠦ ᠳ᠋ᠦ᠍᠄
— ᠶᠠᠭᠠᠬᠢᠬᠤ ᠶ᠋ᠢ ᠪᠡᠨ ᠪᠢ ᠣᠳᠣᠬᠠᠨ ᠦᠵᠡᠭᠦᠯᠦᠨᠡ ᠳᠡ ᠭᠡᠵᠦ ᠨᠢᠭᠤᠷ ᠲᠤ ᠲᠤᠯᠤᠨ ᠢᠷᠡᠨᠡ᠃ ᠬᠣᠶᠠᠳᠠᠬᠢ ᠯᠠᠮᠠ ᠪᠠᠰᠠ ᠮᠥᠷᠦᠨ ᠳ᠋ᠡᠬᠢ ᠶᠠᠭᠠᠨ ᠳᠤᠷᠳᠤᠩ ᠣᠷᠬᠢᠮᠵᠢ ᠪᠠᠨ ᠪᠠᠭᠤᠯᠭᠠᠨ ᠪᠦᠰᠡᠯᠡᠭᠡᠳ᠄
— ᠲᠡᠨᠡᠭ ᠮᠢᠨᠢ! ᠰᠣᠨᠣᠰ! ᠬᠡᠷᠪᠡ ᠪᠢᠳᠡ ᠴᠢᠨᠦ ᠦᠮᠡᠬᠡᠢ ᠬᠡᠭᠦᠷ ᠢ᠋ ᠲᠡᠷᠡ ᠣᠯᠠᠨ ᠨᠣᠬᠠᠳ ᠠ᠋ᠴᠠ ᠰᠠᠯᠭᠠᠬᠤ ᠭᠡᠵᠦ ᠣᠷᠣᠯᠳᠣᠪᠠᠰᠤ ᠥᠯᠥᠰᠬᠦᠯᠡᠩ ᠠᠮᠢᠲᠠᠨ ᠤ᠋ ᠬᠣᠭᠣᠯᠠ ᠶ᠋ᠢ ᠪᠤᠯᠢᠶᠠᠭᠰᠠᠨ ᠨᠢᠭᠦᠯ ᠳ᠋ᠦ᠍ ᠤᠨᠠᠬᠤ ᠪᠢᠰᠢ ᠤᠤ᠃ ᠡᠢᠮᠦ ᠳ᠋ᠦ᠍ ᠴᠢ ᠪᠢᠳᠡᠨ ᠳ᠋ᠦ᠍ ᠭᠣᠮᠣᠳᠠᠬᠤ ᠬᠡᠷᠡᠭ ᠦᠭᠡᠢ᠃ ᠮᠡᠳᠡᠪᠡ ᠤᠤ? ᠵᠠ ᠶᠠᠪᠤ ᠴᠠᠭᠠᠰᠢ ᠪᠠᠨ᠂ ᠲᠡᠷᠡ ᠦᠭᠡᠢ ᠪᠣᠯ ᠡᠭᠦᠨ ᠦ᠌ ᠠᠮᠲᠠ ᠶ᠋ᠢ ᠦᠵᠡᠨᠡ ᠭᠡᠵᠦ ᠮᠡᠳᠡ ᠭᠡᠵᠦ ᠵᠠᠩᠭᠢᠳᠤᠨ ᠦᠵᠡᠭᠦᠯᠪᠡ᠃ ᠳ᠋ᠠᠨᠽᠡᠨ ᠲᠡᠳᠡᠨ ᠳ᠋ᠦ᠍ ᠪᠠᠭᠤᠵᠤ ᠥᠭᠭᠦᠭᠰᠡᠨ ᠪᠠᠢᠳᠠᠯ ᠦᠵᠡᠭᠦᠯᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠯᠡ᠃
— ᠪᠢᠲᠡᠭᠡᠢ ᠰᠠᠭᠰᠠᠭᠤᠷᠠ᠂ ᠪᠢ ᠲᠠ ᠬᠣᠶᠠᠷ ᠠ᠋ᠴᠠ ᠪᠠᠢᠲᠤᠭᠠᠢ ᠵᠠᠭᠤᠨ ᠬᠠᠷᠠ ᠵᠠᠭᠤᠳᠠᠭ ᠬᠠᠯᠲᠠᠷ ᠠ᠋ᠴᠠ ᠠᠶᠤᠬᠤ ᠦᠭᠡᠢ ᠬᠥᠮᠦᠨ ᠭᠡᠳ ᠵᠠᠮ ᠢ᠋ᠶ᠋ᠠᠨ ᠬᠥᠭᠡᠭᠡᠲᠡᠯᠡ᠂ ᠠᠷᠤ ᠳ᠋ᠤᠨᠢ᠄
— ᠨᠠᠷᠮᠠᠢᠯᠭᠠᠶᠠ᠃
— ᠲᠡᠭᠡᠶᠡ᠂ ᠨᠠᠮᠠᠯᠳᠠᠭ ᠢ᠋ ᠨᠢ ᠴᠠᠭᠠᠰᠢ ᠨᠢ ᠣᠷᠣᠭᠤᠯᠤᠭᠠᠳ ᠶᠠᠪᠤᠭᠤᠯᠴᠢᠬᠠᠶᠠ ᠭᠡᠵᠦ ᠬᠡᠯᠡᠯᠴᠡᠬᠦ ᠰᠣᠨᠣᠰᠳᠠᠵᠠᠢ᠃ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠥᠨᠥ ᠯᠠᠮᠠ ᠨᠠᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠳᠣᠬᠣᠳᠠᠭᠤᠯᠤᠨ ᠲᠠᠯᠪᠢᠭᠰᠠᠨ ᠪᠢᠴᠢᠬᠠᠨ ᠱᠣᠪᠣᠭᠣᠷ ᠤ᠋ᠳ ᠢ᠋ᠶ᠋ᠠᠨ ᠡᠪᠦᠷ ᠲᠡᠭᠡᠨ ᠬᠢᠵᠦ ᠠᠢᠰᠤᠢ ᠠᠵᠢ᠃ ᠬᠦᠷᠢᠶᠡ ᠪᠠᠨᠳᠢ ᠨᠠᠷ ᠵᠣᠳᠣᠭᠠᠨ ᠳ᠋ᠤ᠌ ᠬᠡᠴᠡᠭᠦᠦ᠂ ᠬᠥᠳᠡᠭᠡᠨ ᠦ᠌ ᠬᠥᠮᠦᠨ ᠢ᠋ ᠶᠠᠭᠤ ᠴᠦ᠍ ᠦᠭᠡᠢ ᠪᠣᠯᠭᠠᠳᠠᠭ ᠭᠡᠵᠦ ᠣᠯᠠᠨ ᠤ᠋ ᠬᠡᠯᠡᠯᠴᠡᠳᠡᠭ ᠢ᠋ ᠳ᠋ᠠᠨᠽᠡᠨ ᠰᠠᠨᠠᠨ ᠬᠠᠯᠠᠰᠢᠷᠠᠪᠠ᠃ ᠭᠡᠪᠡᠴᠦ ᠪᠥᠰᠡᠨ ᠳ᠋ᠡᠭᠡᠨ ᠬᠢᠲᠤᠭᠠ ᠲᠠᠢ ᠶᠠᠪᠤᠭᠠ ᠪᠠᠨ ᠰᠠᠨᠠᠨ ᠵᠣᠷᠢᠭ ᠣᠷᠣᠪᠠ᠃
— ᠠᠮᠢᠨ ᠳ᠋ᠠᠭᠠᠨ ᠬᠠᠢᠷᠠ ᠦᠭᠡᠢ ᠪᠣᠯ ᠢᠷᠡᠵᠡᠭᠡ! ᠭᠡᠵᠦ ᠬᠠᠰᠬᠢᠷᠤᠨ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠬᠤ ᠳ᠋ᠤ᠌᠂ ᠯᠠᠮᠠ ᠨᠠᠷ ᠤ᠋ᠨ ᠣᠮᠣᠭ ᠳᠠᠷᠤᠭᠳᠠᠪᠠ᠃
— ᠵᠠ ᠶᠠᠷᠰᠢᠭ ᠬᠥᠳᠡᠭᠡ ᠶ᠋ᠢᠨ ᠮᠠᠭᠤ ᠬᠦᠳᠡᠰᠦᠨ ᠳᠡᠪᠡᠯ ᠦ᠋ᠨ ᠭᠣᠣᠯ ᠢ᠋ᠶ᠋ᠠᠷ ᠶᠠᠭᠤ ᠬᠢᠨᠡ᠃
— ᠲᠡᠢᠮᠦ ᠳᠡ ᠨᠡᠷᠡ ᠶ᠋ᠢᠨ ᠬᠣᠣᠷᠠ ᠭᠠᠷ ᠤ᠋ᠨ ᠭᠠᠷᠤᠵᠠ ᠭᠡᠵᠦ ᠪᠡᠶᠡ ᠪᠡᠶᠡ ᠪᠡᠨ ᠬᠣᠷᠢᠭᠯᠠᠨ ᠢᠳᠬᠠᠪᠠ᠃ ᠳ᠋ᠠᠨᠽᠡᠨ ᠴᠦ᠍ ᠲᠡᠷᠢᠭᠦᠨ᠂ ᠠᠩᠬᠠ ᠭᠠᠭᠴᠠ ᠭᠢᠴᠢᠢ ᠳᠠᠭᠠᠷᠢᠭᠰᠠᠨ ᠨᠢ ᠳᠣᠣᠷᠠ ᠪᠠᠨ ᠦᠢ ᠲᠦᠮᠡᠨ ᠨᠣᠬᠠᠢ ᠪᠣᠯᠤᠨ ᠪᠠᠷᠢᠵᠤ ᠢᠳᠡᠬᠦ ᠰᠢᠬᠠᠭᠰᠠᠨ ᠢ᠋ ᠰᠠᠨᠠᠨ ᠲᠡᠭᠦᠨ ᠰᠢᠭ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠳᠦᠢ ᠲᠡᠳᠦᠢ ᠯᠠᠮᠠ ᠨᠠᠷ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠬᠡᠨ ᠪᠠᠢᠭ ᠭᠡᠬᠦ ᠪᠣᠢ ᠭᠡᠵᠦ ᠰᠠᠨᠠᠭᠠᠳ ᠬᠢᠲᠤᠭᠠ ᠪᠠᠨ ᠪᠤᠴᠠᠭᠠᠨ ᠬᠤᠢ ᠳ᠋ᠤᠨᠢ ᠬᠢᠨ ᠶᠠᠭᠠᠷᠠᠨ ᠬᠣᠯᠠᠳᠬᠤ ᠶ᠋ᠢ ᠮᠥᠷᠥᠭᠡᠳᠦᠭᠰᠡᠨ ᠪᠣᠯᠪᠠ᠃ ᠰᠤᠪᠤᠷᠭᠠ ᠨᠤᠭᠤᠳ ᠲᠤ ᠣᠢᠷᠠᠲᠤᠨ ᠣᠴᠢᠬᠤ ᠳ᠋ᠤ᠌ ᠢᠷᠣᠭᠠᠷ ᠲᠤ ᠨᠢ ᠪᠠᠰᠠ ᠯᠠ ᠣᠯᠠᠨ ᠲᠣᠮᠣ ᠨᠣᠬᠠᠳ ᠴᠠᠭᠠᠷᠢᠭᠯᠠᠨ ᠬᠡᠪᠲᠡᠨᠡ᠃ ᠳᠠᠭᠠᠷᠢᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ ᠬᠡᠳᠦᠨ ᠴᠢᠯᠠᠭᠤ ᠠᠪᠴᠤ ᠰᠠᠮ ᠰᠠᠮ ᠠᠯᠬᠤᠪᠠ᠃ ᠨᠣᠬᠠᠳ ᠶᠡᠷᠦ ᠬᠥᠳᠡᠯᠬᠦ ᠰᠢᠨᠵᠢ ᠦᠭᠡᠢ ᠰᠢᠭ᠃ ᠲᠡᠭᠡᠬᠦ ᠪᠡᠷ ᠰᠡᠳᠬᠢᠯ ᠲᠠᠢᠳᠬᠤᠷᠠᠪᠠ᠃ ᠭᠡᠲᠡᠯᠡ ᠰᠤᠪᠤᠷᠭᠠ ᠶ᠋ᠢᠨ ᠢᠷᠣᠭᠠᠷ ᠲᠠᠬᠢ ᠬᠣᠶᠠᠷ ᠬᠠᠮᠠᠭᠤ ᠲᠠᠢ ᠨᠣᠬᠠᠢ ᠶ᠋ᠢᠨ ᠳᠤᠮᠳᠠ ᠲᠠᠮᠲᠤᠭ ᠪᠣᠯᠤᠭᠰᠠᠨ ᠨᠡᠬᠡᠢ ᠳᠡᠪᠡᠯ᠂ ᠰᠢᠷᠠ ᠢᠰᠡᠭᠡᠢ ᠲᠡᠢ ᠬᠥᠭᠯᠡᠷᠡᠨ ᠬᠡᠪᠲᠡᠭᠰᠡᠨ ᠦ᠌ ᠳᠣᠣᠷᠠ ᠠ᠋ᠴᠠ ᠬᠥᠮᠦᠨ ᠦ᠌ ᠥᠷᠥᠭᠡᠰᠦᠨ ᠬᠥᠯ ᠴᠤᠬᠤᠢᠵᠤ ᠬᠠᠷᠠᠭᠳᠠᠪᠠ᠃ ᠳ᠋ᠠᠨᠽᠡᠨ ᠲᠡᠭᠦᠨ ᠢ᠋ ᠬᠠᠷᠠᠩᠭᠤᠲᠠ ᠪᠠᠨ ᠠᠶᠤᠵᠤ ᠰᠣᠴᠢᠬᠤ ᠵᠡᠷᠭᠡᠴᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠵᠣᠭ ᠲᠣᠰᠣᠨ ᠰᠢᠷᠳᠡᠪᠡ᠃ ᠦᠬᠦᠭᠰᠡᠨ ᠬᠥᠮᠦᠨ ᠶᠦᠮ ᠪᠣᠯᠪᠠ ᠤᠤ? ᠬᠥᠳᠡᠭᠡ ᠬᠡᠭᠡᠷᠡ ᠪᠢᠰᠢ᠂ ᠬᠦᠷᠢᠶᠡ ᠵᠦᠭᠡᠷ ᠴᠦ᠍ ᠦᠭᠡᠢ ᠶᠡᠬᠡ ᠬᠦᠷᠢᠶᠡ ᠤᠴᠢᠷ ᠬᠠᠮᠢᠭᠠ ᠠ᠋ᠴᠠ ᠡᠨᠳᠡ ᠦᠬᠦᠭᠰᠡᠨ ᠬᠥᠮᠦᠨ ᠬᠡᠪᠲᠡᠭᠡ ᠠᠵᠢ ᠳᠠ ᠭᠡᠵᠦ ᠪᠣᠳᠣᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠪᠠᠰᠠ᠂ ᠠᠮᠢᠳᠤ ᠬᠥᠮᠦᠨ ᠪᠣᠯᠪᠠ ᠤᠤ? ᠬᠠᠮᠢᠭᠠ ᠠ᠋ᠴᠠ᠂ ᠡᠨᠡ ᠪᠣᠯ ᠵᠢᠷᠭᠠᠯ ᠤ᠋ᠨ ᠣᠷᠣᠨ ᠰᠢᠦ ᠳᠡ ᠭᠡᠵᠦ ᠪᠣᠳᠣᠪᠠ᠃ ᠭᠠᠢᠬᠠᠬᠤ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠶ᠋ᠢ ᠲᠠᠰᠢᠶᠠᠷᠠᠨ ᠬᠠᠷᠠᠵᠤ ᠪᠠᠢᠨᠠ ᠭᠡᠵᠦ ᠪᠣᠳᠣᠨ ᠣᠢᠷᠠᠲᠤᠰᠬᠢᠵᠤ ᠣᠴᠢᠪᠠ᠃ ᠲᠡᠭᠡᠭᠡᠳ ᠯᠠᠪᠯᠠᠨ ᠬᠠᠷᠠᠪᠠ᠃ ᠶᠠᠭᠠᠬᠢᠭᠰᠠᠨ ᠴᠦ᠍ ᠬᠥᠮᠦᠨ ᠪᠠᠢᠬᠤ ᠶᠣᠰᠣ ᠦᠭᠡᠢ ᠭᠡᠵᠦ ᠪᠣᠳᠣᠨ ᠬᠡᠴᠢᠨᠡᠭᠡᠨ ᠳᠠᠬᠢᠨ ᠯᠠᠪᠯᠠᠨ ᠬᠠᠷᠠᠬᠤ ᠳᠣᠳᠣᠮ ᠦᠨᠡᠬᠡᠷ ᠬᠥᠮᠦᠨ ᠬᠡᠪᠲᠡᠵᠦ ᠪᠠᠢᠭᠠ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠠᠢ ᠬᠥᠭᠡᠷᠦᠬᠦᠢ ᠶᠠᠳᠠᠷᠠᠯ ᠤ᠋ᠨ ᠲᠤᠢᠯ ᠳ᠋ᠤ᠌ ᠣᠷᠣᠭᠰᠠᠨ ᠬᠥᠮᠦᠨ ᠠᠷᠠᠢ ᠶᠠᠳᠠᠨ ᠢᠨᠴᠠᠭᠯᠠᠵᠤ ᠠᠮᠠᠨ ᠳᠣᠲᠣᠷᠠ ᠪᠠᠨ ᠨᠣᠮ ᠤᠩᠰᠢᠵᠤ ᠪᠣᠢ ᠰᠣᠨᠣᠰᠳᠠᠪᠠ᠃ ᠣᠳᠣ ᠬᠡᠳᠦᠢᠪᠡᠷ ᠤᠷᠢᠨ ᠳᠤᠯᠠᠭᠠᠨ ᠪᠠᠢᠭᠠ ᠪᠣᠯᠪᠠᠴᠤ ᠡᠪᠦᠯ ᠦ᠋ᠨ ᠡᠬᠢᠨ ᠵᠤᠯᠠ ᠰᠠᠷᠠ᠂ ᠴᠠᠰᠤ ᠮᠥᠰᠥ ᠴᠠᠷᠴᠠᠮᠠᠯᠠᠭᠰᠠᠨ ᠵᠢᠬᠡᠭᠦᠨ ᠳᠤᠮᠳᠠᠭᠤᠷ ᠲᠡᠷᠡ ᠬᠥᠮᠦᠨ ᠦ᠌ ᠵᠢᠭᠢᠨ ᠭᠠᠷᠭᠠᠭᠰᠠᠨ ᠬᠥᠯ ᠦ᠋ᠨ ᠲᠤᠷᠠᠩᠬᠠᠢ ᠨᠢ ᠵᠢᠭᠲᠡᠢᠬᠡᠨ ᠪᠥᠭᠡᠳ ᠦᠶᠡᠨ ᠦ᠌ ᠬᠢᠨᠢ ᠶᠠᠰᠤ ᠪᠣᠯᠭᠠᠨ ᠳᠣᠪᠣᠢᠵᠤ ᠮᠢᠬᠠ ᠪᠠᠢᠳᠠᠭ ᠭᠠᠵᠠᠷ ᠪᠣᠯᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠠᠭᠠᠰᠢ ᠪᠠᠨ ᠬᠣᠩᠬᠣᠢᠵᠤ᠂ ᠥᠩᠭᠡ ᠨᠢ ᠭᠡᠪᠡᠯ ᠡᠭᠡᠭᠡ ᠯᠡ ᠲᠤᠷᠠᠵᠤ ᠦᠬᠦᠭᠰᠡᠨ ᠲᠡᠮᠡᠭᠡᠨ ᠦ᠌ ᠰᠢᠷᠢ ᠰᠢᠭ ᠠᠵᠢ᠃ ᠲᠡᠷᠡ ᠬᠥᠮᠦᠨ ᠳᠡᠷᠭᠡᠳᠡ ᠪᠡᠨ ᠬᠥᠮᠦᠨ ᠢᠷᠡᠬᠦ ᠶ᠋ᠢ ᠮᠡᠳᠡᠨ ᠤᠩᠰᠢᠯᠭᠠ ᠪᠠᠨ ᠲᠠᠰᠤᠯᠵᠤ᠄
— ᠲᠦᠮᠡᠨ! ᠶᠠᠭᠤᠮᠠ ᠬᠠᠢᠷᠠᠯᠠ! ᠭᠡᠵᠦ ᠦᠬᠦᠩᠭᠢ ᠳᠠᠭᠤ ᠪᠠᠷ ᠠᠷᠠᠢ ᠭᠡᠵᠦ ᠠᠮᠢᠰᠬᠤᠭᠠ ᠲᠠᠢ ᠥᠭᠦᠯᠡᠭᠡᠳ ᠲᠣᠯᠣᠭᠠᠢ ᠴᠤᠬᠤᠢᠯᠭᠠᠨᠠ᠃ ᠳᠠᠪ ᠪᠣᠯᠤᠨ ᠰᠢᠷᠢᠯᠳᠦᠭᠰᠡᠨ ᠭᠡᠵᠢᠭᠡ᠂ ᠤᠬᠤᠷᠬᠠᠢ ᠳ᠋ᠠᠭᠠᠨ ᠰᠢᠭᠢᠳ ᠰᠢᠷᠭᠢᠭᠰᠡᠨ ᠬᠣᠬᠢᠮᠠᠢ ᠨᠢᠳᠦ᠂ ᠬᠥᠭᠡᠩᠭᠢ ᠴᠠᠢᠪᠤᠷ ᠴᠢᠷᠠᠢ᠂ ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠶᠣᠰᠣᠲᠠᠢ ᠵᠡᠭᠦᠳᠦᠨ ᠳ᠋ᠦ᠍ ᠣᠷᠣᠮᠠ ᠠᠶᠤᠮᠰᠢᠭᠲᠠᠢ ᠶ᠋ᠢ ᠶᠠᠭᠠᠬᠢᠨᠠ᠃ ᠨᠠᠷᠢᠪᠴᠢᠯᠠᠨ ᠠᠵᠢᠬᠤ ᠳ᠋ᠤ᠌ ᠰᠢᠨᠡ ᠶ᠋ᠢᠨ ᠬᠢᠨᠢ ᠶᠠᠰᠤ ᠶᠣᠷᠳᠣᠢᠨ᠂ ᠬᠠᠮᠠᠷ ᠨᠢ ᠬᠠᠪᠴᠢᠢᠵᠤ᠂ ᠬᠥᠯᠥᠰᠥ ᠲᠡᠢ ᠨᠢ ᠵᠢᠭᠤᠷᠠᠯᠳᠤᠨ ᠬᠠᠲᠠᠭᠰᠠᠨ ᠥᠯᠥᠩ ᠰᠢᠷᠣᠢ ᠨᠢᠭᠤᠷ ᠤ᠋ᠨ ᠬᠢᠨᠢ ᠵᠢᠷᠤᠭᠠᠰᠤ ᠪᠣᠯᠭᠠᠨ ᠢ᠋ ᠵᠢᠷᠤᠮᠠᠯ ᠶᠠᠭᠤᠮᠠ ᠰᠢᠭ᠋ ᠲᠣᠳᠣᠳᠬᠠᠭᠰᠠᠨ ᠠᠵᠢ᠃
— ᠲᠠ ᠶᠠᠭᠠᠬᠢᠭᠰᠠᠨ ᠬᠥᠮᠦᠨ ᠪᠣᠢ? ᠭᠡᠬᠦ ᠳ᠋ᠦ᠍᠄
— ᠠ᠂ ᠪᠢ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠬᠥᠮᠦᠨ᠃ ᠶᠠᠭᠤᠮᠠ ᠬᠠᠢᠷᠠᠯᠠ! ᠭᠡᠵᠦ ᠬᠠᠲᠠᠭᠰᠠᠨ ᠰᠢᠪᠡᠷ ᠦ᠋ᠨ ᠥᠩᠭᠡᠲᠦ ᠨᠢᠮᠭᠡᠨ ᠤᠷᠤᠭᠤᠯ ᠥᠮᠥᠯᠵᠡᠭᠦᠯᠦᠨ ᠬᠡᠯᠡᠭᠡᠳ᠂ ᠬᠣᠬᠢᠮᠠᠢ ᠶ᠋ᠢᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠲᠩᠷᠢ ᠰᠢᠷᠲᠡᠨ ᠭᠥᠯᠢᠷᠡᠨᠡ᠃
— ᠲᠠ ᠶᠠᠭᠠᠬᠢᠭᠠᠳ ᠡᠢᠮᠦ ᠪᠣᠯᠴᠢᠬᠠᠪᠠ᠂ ᠬᠥᠭᠡᠷᠦᠬᠦᠢ ᠮᠢᠨᠢ ᠭᠡᠳ ᠳ᠋ᠠᠨᠽᠡᠨ ᠢ᠋ ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌᠄
— ᠠ ᠪᠢ ᠤᠭ ᠨᠢ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠠᠢᠮᠠᠭ ᠤ᠋ᠨ ᠬᠥᠮᠦᠨ᠃ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ᠂ ᠶᠣᠬᠣ! ᠣᠯᠠᠨ ᠠᠪᠤ ᠶ᠋ᠢᠨ ᠬᠥᠪᠡᠭᠦᠳ ᠲᠡᠢ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠢ᠋ ᠦᠵᠡᠭᠰᠡᠨ ᠮᠢᠨᠢ ᠣᠯᠠᠨ᠁ ᠭᠡᠰᠡᠨ ᠢ᠋ᠶ᠋ᠡᠨ ᠨᠢᠭᠡᠨ ᠬᠡᠰᠡᠭ ᠠᠮᠢᠰᠬᠤᠯ ᠬᠣᠷᠢᠶᠠᠨ ᠲᠠᠭ ᠴᠢᠭ ᠪᠣᠯᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠲᠡᠷᠡ ᠬᠣᠢᠨᠠ ᠴᠢ ᠮᠡᠳᠡᠬᠦ ᠤᠤ? ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ ᠭᠡᠵᠦ ᠪᠠᠢᠭᠰᠠᠨ ᠢ᠋ ᠭᠠᠮᠢᠩ ᠢᠷᠡᠭᠡᠳ ᠪᠢᠳᠡᠨ ᠢ᠋ ᠲᠠᠷᠠᠭᠠᠭᠰᠠᠨ᠂ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠬᠤ ᠭᠡᠲᠡᠯᠡ ᠤᠨᠤᠭᠠ ᠬᠠᠮᠢᠭᠠ ᠪᠠᠢᠬᠤ ᠪᠢᠯᠡ᠃ ᠣᠯᠬᠤ ᠶ᠋ᠢᠨ ᠲᠥᠯᠥᠭᠡ ᠵᠢᠳᠬᠦᠯᠡ᠃ ᠬᠣᠭ ᠠᠷᠢᠯᠭᠠᠭᠰᠠᠨ᠂ ᠲᠦᠯᠡᠭᠡ ᠬᠢᠷᠥᠭᠡᠳᠡᠭᠰᠡᠨ᠂ ᠮᠢᠬᠠ ᠡᠷᠭᠦᠪᠡ᠂ ᠶᠣᠬᠣ! ᠬᠦᠷᠢᠶᠡ ᠭᠡᠳᠡᠭ ᠬᠥᠮᠦᠨ ᠦ᠌ ᠭᠠᠷ ᠳᠠᠬᠢ ᠶ᠋ᠢ ᠰᠠᠯᠭᠠᠬᠤ ᠠ᠋ᠴᠠ ᠪᠢᠰᠢ ᠬᠥᠮᠦᠨ ᠦ᠌ ᠭᠠᠷ ᠳᠡᠭᠡᠷᠡ ᠶᠠᠭᠤᠮᠠ ᠭᠢᠯᠠᠢᠯᠭᠠᠳᠠᠭ ᠭᠠᠵᠠᠷ ᠪᠢᠰᠢ ᠪᠣᠯᠵᠤ ᠶᠤᠮ᠃ ᠵᠠ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠥᠩᠭᠡᠷᠡᠭᠰᠡᠨ ᠴᠠᠭ ᠲᠤ ᠪᠢ ᠡᠨᠡ ᠪᠡᠶᠡ ᠪᠡᠨ ᠦᠬᠦᠯ ᠦᠭᠡᠢ ᠮᠥᠩᠬᠡ ᠶ᠋ᠢ ᠰᠠᠨᠠᠨ ᠡᠯᠳᠡᠪ ᠠᠮᠢᠲᠠᠨ ᠢ᠋ ᠠᠯᠠᠨ ᠬᠢᠳᠤᠵᠤ ᠶᠠᠪᠤᠭᠰᠠᠨ ᠤ᠋ ᠨᠢᠭᠦᠯ ᠪᠢᠵᠡ ᠳᠡ᠃ ᠭᠡᠳᠡᠰᠦᠨ ᠦ᠌ ᠡᠪᠡᠳᠴᠢᠨ ᠬᠦᠷᠪᠡ᠃ ᠨᠢᠭᠡ ᠠᠢᠯ ᠳ᠋ᠤ᠌ ᠲᠣᠯᠣᠭᠠᠢ ᠬᠣᠷᠭᠣᠳᠠᠵᠤ ᠪᠠᠢᠭᠰᠠᠨ ᠶᠤᠮ ᠰᠠᠨ᠂ ᠡᠮ ᠳᠠᠩ ᠤ᠋ᠨ ᠶᠠᠪᠤᠳᠠᠯ ᠳ᠋ᠤ᠌ ᠭᠠᠷ ᠤ᠋ᠨ ᠪᠡᠯᠡ ᠲᠠᠰᠤᠷᠠᠬᠤ ᠲᠠᠢ ᠵᠡᠷᠭᠡ ᠡᠨᠳᠡ ᠲᠠᠯᠪᠢᠯᠠ᠃ ᠣᠳᠣ᠂ ᠣᠳᠣ᠂ ᠶᠣᠬᠣ! ᠭᠡᠰᠡᠨ ᠢ᠋ᠶ᠋ᠡᠨ ᠪᠦᠷᠢᠮᠦᠰᠦᠨ ᠳᠠᠭᠤ ᠲᠠᠰᠤᠷᠠᠵᠤ ᠨᠢᠳᠦ ᠠᠨᠢᠪᠠ᠃ ᠭᠡᠪᠡᠴᠦ ᠦᠬᠦᠭᠡ ᠦᠭᠡᠢ ᠪᠠᠢᠯᠠ᠃ ᠳᠠᠬᠢᠨ ᠨᠢᠳᠦ ᠨᠡᠭᠡᠭᠡᠨ ᠬᠣᠶᠠᠷ ᠳᠣᠯᠣᠭᠠᠨ ᠬᠣᠨᠣᠭ ᠭᠡᠵᠦ ᠳᠥᠩᠭᠡᠵᠦ ᠲᠤᠭᠤᠯᠳᠠᠬᠤᠢᠴᠠ ᠬᠡᠯᠡᠭᠡᠳ᠂ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠬᠥᠳᠡᠯᠭᠡᠨ ᠳᠠᠬᠢᠨ ᠴᠡᠯᠮᠡᠭ ᠲᠩᠷᠢ ᠶ᠋ᠢ ᠰᠢᠷᠲᠡᠪᠡ᠃ ᠰᠠᠶᠢ ᠶ᠋ᠢᠨ ᠶᠠᠷᠢᠶᠠᠨ ᠳ᠋ᠠᠭᠠᠨ ᠶᠠᠳᠠᠷᠠᠨ ᠨᠢᠳᠦ ᠪᠡᠨ ᠴᠠᠪᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠠᠵᠢ᠃ ᠮᠠᠩᠨᠠᠢ ᠳ᠋ᠤᠨᠢ ᠬᠥᠯᠥᠰᠥ ᠴᠢᠬᠠᠷᠠᠵᠤ᠂ ᠨᠢᠭᠤᠷ ᠤ᠋ᠨ ᠵᠢᠷᠤᠭᠠᠰᠤ ᠪᠣᠯᠭᠠᠨ ᠳ᠋ᠤ᠌ ᠰᠢᠭᠢᠳᠦᠭᠰᠡᠨ ᠥᠯᠥᠩ ᠰᠢᠷᠣᠢ ᠤᠯᠠᠮ ᠲᠣᠳᠣᠷᠠᠪᠠ᠃
ᠳ᠋ᠠᠨᠽᠡᠨ ᠣᠭᠲᠣ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠡᠢᠮᠦ ᠬᠥᠭᠡᠷᠦᠬᠦᠢ ᠠᠮᠢᠲᠠᠨ ᠲᠠᠢ ᠭᠡᠨᠡᠳᠲᠡ ᠤᠴᠠᠷᠠᠭᠰᠠᠨ ᠠ᠋ᠴᠠ ᠡᠯᠢᠭᠡ ᠡᠮᠲᠡᠷᠡᠨ ᠶᠠᠭᠠᠬᠢᠵᠤ ᠡᠢᠭᠡᠳ ᠶᠠᠭᠤ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠲᠤᠰᠠᠯᠠᠬᠤ ᠰᠠᠨ ᠯᠠ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠰᠠᠨᠠᠵᠤ ᠪᠣᠳᠣᠭᠰᠠᠨ ᠦᠭᠡᠢ᠃ ᠡᠪᠦᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠬᠦ ᠳ᠋ᠦ᠍ ᠬᠦᠷᠡᠯ ᠡᠴᠡ ᠵᠢᠭᠡᠯᠡᠨ ᠠᠪᠤᠭᠰᠠᠨ ᠬᠣᠶᠠᠷ ᠮᠠᠭᠤ ᠬᠠᠯᠲᠠᠷ ᠬᠠᠳᠠᠭ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠪᠠᠷᠢᠭᠳᠠᠭᠰᠠᠨ ᠦᠭᠡᠢ᠃ ᠥᠭᠭᠦ ᠶᠠᠭᠤᠮᠠ ᠠᠯᠠᠭᠠ ᠭᠡᠳ ᠶᠠᠪᠤᠶᠠ ᠭᠡᠲᠡᠯᠡ ᠥᠨᠳᠡᠢᠬᠦ ᠴᠦ᠍ ᠴᠢᠳᠠᠯ ᠦᠭᠡᠢ ᠪᠣᠯᠵᠤ ᠳᠠᠷᠳᠠᠭ ᠲᠠᠭᠠᠨ ᠲᠤᠯᠤᠭᠰᠠᠨ ᠲᠡᠷᠡ ᠬᠥᠭᠡᠷᠦᠬᠦᠢ ᠬᠥᠮᠦᠨ ᠦ᠌ ᠶᠠᠳᠠᠬᠤ ᠳ᠋ᠠᠭᠠᠨ ᠴᠠᠪᠴᠢᠯᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠨᠢᠳᠦ ᠨᠢ ᠳ᠋ᠠᠨᠽᠡᠨ ᠢ᠋ ᠭᠠᠷ ᠢ᠋ᠶ᠋ᠠᠨ ᠡᠪᠦᠷ ᠲᠡᠭᠡᠨ ᠬᠢᠬᠦ ᠶ᠋ᠢ ᠬᠠᠷᠠᠭᠰᠠᠨ ᠲᠤᠯᠠ ᠬᠥᠭᠡᠷᠦᠬᠦᠢ ᠲᠡᠭᠦᠨ ᠢ᠋ ᠭᠣᠮᠣᠳᠠᠨ ᠭᠤᠲᠤᠷᠠᠬᠤ ᠠ᠋ᠴᠠ ᠠᠶᠤᠨ ᠵᠣᠪᠠᠪᠠ᠃ ᠡᠨᠡ ᠨᠢ ᠳ᠋ᠠᠨᠽᠡᠨ ᠢ᠋ ᠪᠦᠷ ᠰᠠᠨᠳᠤᠷᠤᠯ ᠳ᠋ᠤ᠌ ᠣᠷᠣᠭᠤᠯᠵᠠᠢ᠃
— ᠲᠠᠨ ᠳ᠋ᠤ᠌ ᠶᠠᠭᠤ ᠬᠡᠷᠡᠭᠲᠡᠢ ᠪᠠᠢᠨᠠ ᠭᠡᠬᠦ ᠳ᠋ᠦ᠍᠄
— ᠬᠣᠭᠣᠯᠠ᠂ ᠬᠣᠭᠣᠯᠠ᠂ ᠬᠣᠭᠣᠯᠠᠢ ᠤᠷᠤᠭᠤ ᠵᠥᠭᠡᠯᠡᠨ ᠪᠣᠯ ᠶᠠᠭᠤ ᠴᠦ᠍ ᠶᠠᠭᠠᠬᠢᠬᠤᠪ ᠭᠡᠯᠡ᠃ ᠳ᠋ᠠᠨᠽᠡᠨ ᠬᠠᠳᠠᠭ ᠢ᠋ᠶ᠋ᠠᠨ ᠢᠳᠡᠬᠦ ᠵᠦᠢᠯ ᠢ᠋ᠶ᠋ᠡᠷ ᠪᠣᠷᠣᠯᠠᠭᠤᠯᠤᠨ ᠥᠭᠭᠦ ᠶ᠋ᠢ ᠪᠣᠳᠣᠪᠠ᠃
— ᠪᠢ ᠡᠢᠰᠢ ᠪᠡᠨ ᠶᠠᠪᠤᠵᠤ ᠪᠤᠷᠬᠠᠨ ᠳ᠋ᠤ᠌ ᠮᠥᠷᠭᠥᠭᠡᠳ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠬᠥᠭᠡᠷᠦᠬᠦᠢ ᠲᠠᠨ ᠳ᠋ᠤ᠌ ᠶᠠᠭᠤᠮᠠ ᠠᠪᠴᠢᠷᠠᠶᠠ ᠭᠡᠳ ᠶᠠᠭᠠᠷᠠᠨ ᠴᠠᠭᠠᠰᠢ ᠠᠯᠬᠤᠯᠠᠯᠠ᠃ ᠬᠦᠷᠡᠯ ᠢ᠋ᠶ᠋ᠡᠷ ᠵᠢᠭᠠᠯᠭᠠᠭᠰᠠᠨ ᠵᠠᠮ ᠢ᠋ᠶ᠋ᠠᠨ ᠮᠥᠷᠳᠡᠨ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠳᠡᠷᠭᠡᠳᠡᠬᠢ ᠨᠢᠭᠡᠨ ᠭᠤᠳᠤᠮᠵᠢᠨ ᠤ᠋ ᠪᠤᠯᠤᠩ ᠢ᠋ ᠲᠣᠭᠣᠷᠢᠨ ᠪᠠᠭ ᠬᠥᠮᠦᠰ ᠭᠦᠶᠦᠯᠳᠦᠨ ᠭᠠᠷᠴᠤ ᠢᠷᠡᠯᠡ᠃ ᠶᠠᠭᠤ ᠪᠣᠯᠤᠭᠰᠠᠨ ᠠ᠋ᠴᠠ ᠡᠢᠨ ᠬᠦ᠌ ᠰᠡᠩᠳᠡ ᠮᠡᠩᠳᠡ ᠭᠦᠶᠦᠯᠳᠦᠬᠦ ᠶ᠋ᠢ ᠬᠡᠨ ᠮᠡᠳᠡᠬᠦ ᠪᠣᠢ? ᠪᠠᠢᠨ ᠪᠠᠢᠨ ᠡᠷᠭᠢᠨ ᠬᠠᠷᠠᠵᠠᠭᠠᠬᠤ ᠶ᠋ᠢ ᠨᠢ ᠦᠵᠡᠪᠡᠯ ᠶᠠᠮᠠᠷ ᠨᠢᠭᠡᠨ ᠠᠶᠤᠯᠲᠠᠢ ᠶᠠᠭᠤᠮᠠ ᠠ᠋ᠴᠠ ᠯᠠ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠮᠢ ᠲᠡᠮᠡᠴᠡᠨ ᠵᠢᠭᠤᠲᠠᠵᠤ ᠶᠠᠪᠤᠭᠠ ᠨᠢ ᠢᠯᠡᠷᠬᠡᠢ᠃ ᠥᠷᠭᠡᠨ ᠤᠯᠠ ᠲᠠᠢ ᠬᠦᠨᠳᠦ ᠬᠦᠨᠳᠦ ᠭᠤᠲᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠯᠥᠨ ᠰᠢᠷᠣᠢ ᠶ᠋ᠢ ᠮᠠᠨᠠᠷᠠᠭᠤᠯᠤᠨ ᠬᠠᠷᠠᠢᠯᠠᠭᠠᠬᠤ ᠶ᠋ᠢ ᠨᠢ ᠠᠵᠢᠬᠤ ᠳ᠋ᠤ᠌ ᠳ᠋ᠠᠨᠽᠡᠨ ᠳ᠋ᠦ᠍ ᠪᠠᠰᠠ ᠴᠦ᠍ ᠰᠣᠨᠢᠷᠬᠠᠯ ᠲᠠᠢ ᠦᠵᠡᠭᠳᠡᠨᠡ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠴᠢ ᠶ᠋ᠢᠨ ᠭᠤᠷᠪᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠶᠠᠪᠤᠭᠠ ᠳᠡᠰ ᠦ᠋ᠨ ᠳᠠᠯᠠᠪᠴᠢ ᠰᠢᠭ᠋ ᠳᠡᠷᠡᠭᠡᠷ ᠦᠰᠦ ᠲᠡᠢ ᠭᠣᠶᠣ ᠡᠬᠡᠨᠡᠷ ᠤᠷᠳᠤᠬᠢ ᠬᠥᠮᠦᠰ ᠢ᠋ᠶ᠋ᠡᠨ ᠶᠠᠭᠠᠬᠢᠬᠤ ᠡᠢᠬᠦ ᠶ᠋ᠢᠨ ᠵᠠᠭᠤᠷᠠ ᠭᠦᠢᠴᠡᠵᠦ ᠠᠪᠤᠭᠠᠳ᠂ ᠳᠡᠷᠡᠭᠡᠷ ᠦᠰᠦ ᠪᠡᠨ ᠭᠡᠨᠡᠳᠲᠡ ᠮᠤᠯᠲᠤᠷᠠᠨ ᠤᠨᠠᠬᠤ ᠳ᠋ᠤ᠌ ᠲᠡᠭᠦᠨ ᠢ᠋ ᠪᠡᠨ ᠭᠠᠵᠠᠷ ᠤᠨᠠᠬᠤ ᠠ᠋ᠴᠠ ᠨᠢ ᠡᠮᠦᠨᠡ ᠰᠢᠭᠦᠷᠡᠨ ᠠᠪᠴᠤ ᠰᠤᠭᠤᠪᠴᠢᠯᠠᠨ ᠤᠯᠠᠮ ᠢ᠋ᠶ᠋ᠠᠷ ᠬᠤᠷᠳᠤᠯᠠᠬᠤ ᠳ᠋ᠤᠨᠢ ᠳ᠋ᠠᠨᠽᠡᠨ ᠲᠡᠰᠬᠡᠯ ᠦᠭᠡᠢ ᠢᠨᠢᠶᠡᠳᠦ ᠠᠯᠳᠠᠯᠠ᠃ ᠲᠡᠭᠡᠭᠡᠳ ᠶᠠᠭᠤ ᠶᠠᠭᠤ ᠦᠭᠡᠢ ᠳᠡᠷᠭᠡᠳᠡ ᠪᠡᠨ ᠢᠷᠡᠬᠦ ᠳ᠋ᠦ᠍ᠨᠢ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠵᠤ ᠬᠣᠢᠲᠤᠬᠢ ᠬᠥᠮᠦᠰ ᠨᠢ ᠳᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠥᠩᠭᠡᠷᠡᠬᠦ ᠳ᠋ᠦ᠍ᠨᠢ᠄
— ᠲᠠ ᠮᠢᠨᠢ ᠠ᠋! ᠳ᠋ᠸᠴᠢᠩᠭᠠᠯᠪᠤ ᠶ᠋ᠢᠨ ᠳᠤᠭᠠᠩ ᠬᠠᠮᠢᠭᠠ ᠪᠠᠢᠨᠠ ᠪᠣᠢ? ᠭᠡᠵᠦ ᠳᠠᠬᠢᠨ ᠳᠠᠪᠲᠠᠨ ᠠᠰᠠᠭᠤᠯᠠ᠃ ᠤᠷᠤᠯᠳᠤᠵᠤ ᠪᠠᠢᠭᠠ ᠮᠡᠲᠦ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠭᠦᠶᠦᠯᠳᠦᠵᠦ ᠶᠠᠪᠤᠭᠠ ᠬᠥᠮᠦᠰ ᠬᠠᠷᠢᠭᠤ ᠬᠡᠯᠡᠬᠦ ᠪᠠᠢᠲᠤᠭᠠᠢ ᠲᠤᠭᠤᠯᠬᠤ ᠰᠡᠭᠡᠭᠡ ᠦᠭᠡᠢ ᠳᠡᠭᠳᠡᠨ ᠠᠯᠠᠭᠠ ᠪᠣᠯᠤᠯᠠ᠃ ᠳ᠋ᠠᠨᠽᠡᠨ ᠲᠡᠳᠡᠨ ᠢ᠋ ᠭᠠᠢᠬᠠᠯᠠ᠃ ᠬᠠᠮᠤᠭ ᠤ᠋ᠨ ᠡᠴᠦᠰ ᠲᠦ᠍ ᠲᠠᠪᠢ ᠣᠷᠴᠢᠮ ᠨᠠᠰᠤᠨ ᠤ᠋ ᠰᠡᠷᠪᠡᠭᠡ ᠬᠠᠷᠠ ᠰᠠᠬᠠᠯ ᠲᠠᠢ ᠬᠥᠮᠦᠨ ᠭᠦᠶᠦᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠪᠠᠬᠠᠷᠳᠠᠨ ᠳ᠋ᠠᠨᠽᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠬᠤ ᠳ᠋ᠤ᠌᠄
— ᠡᠪᠦᠭᠡᠨ ᠭᠤᠸᠠᠢ! ᠳ᠋ᠸᠴᠢᠩᠭᠠᠯᠪᠤ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠠᠰᠠᠭᠤᠪᠠ᠃
— ᠳ᠋ᠸᠴᠢᠩᠭᠠᠯᠪᠤ ᠪᠠᠷ ᠴᠢ ᠶᠠᠮᠠᠷ ᠡᠯᠦᠨᠴᠡ ᠪᠡᠨ ᠬᠢᠬᠦ ᠴᠢᠨᠢ ᠪᠣᠢ? ᠭᠡᠵᠦ ᠲᠡᠷᠡ ᠬᠥᠮᠦᠨ ᠨᠢᠭᠤᠷ ᠥᠭᠡᠳᠡ ᠭᠡᠨᠡᠳᠲᠡ ᠰᠢᠷᠦᠭᠦᠨ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ ᠶᠠᠪᠤ ᠲᠠᠢᠰᠢ ᠪᠠᠨ ᠭᠡᠵᠦ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳ᠋ᠠᠨᠽᠡᠨ ᠢ᠋ ᠰᠢᠭᠦᠷᠡᠵᠦ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠶ᠋ᠢ ᠰᠢᠭᠤᠨ ᠪᠠᠷᠢᠵᠤ ᠠᠪᠤᠭᠠᠳ ᠮᠥᠨ ᠯᠡ ᠭᠦᠶᠦᠬᠦ ᠭᠡᠵᠦ ᠲᠡᠮᠡᠦᠯᠪᠡ᠃
— ᠦᠭᠡᠢ ᠮᠥᠷᠭᠥᠬᠦ ᠭᠡᠰᠡᠨ ᠶᠦᠮ ᠭᠡᠵᠦ ᠳ᠋ᠠᠨᠽᠡᠨ ᠬᠣᠢᠰᠢ ᠰᠠᠭᠤᠬᠤ ᠳ᠋ᠤ᠌᠄
— ᠶᠠᠭᠤᠨ ᠤ᠋ ᠴᠢᠨᠢ ᠮᠥᠷᠭᠥᠬᠦ᠂ ᠢᠩᠭᠢᠵᠦ ᠶᠠᠪᠤᠵᠤ ᠦᠷᠡᠭᠳᠡᠬᠦ ᠨᠢ ᠤᠤ ᠭᠡᠵᠦ ᠲᠡᠷᠡ ᠬᠥᠮᠦᠨ ᠡᠴᠢᠭᠡ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠵᠠᠩᠳᠤᠴᠢᠬᠠᠭᠰᠠᠨ ᠲᠤᠯᠠ ᠳ᠋ᠠᠨᠽᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠥᠲᠥᠯᠦᠭᠳᠡᠨ ᠶᠠᠪᠤᠯᠠ᠃
— ᠴᠢ ᠮᠡᠳᠡᠵᠦ ᠪᠠᠢᠨᠠ ᠤᠤ? ᠴᠠᠭᠠᠨᠠ ᠴᠢᠨᠢ ᠭᠠᠮᠢᠩ ᠤ᠋ᠳ᠁
— ᠶᠠᠭᠠᠬᠢᠵᠤ ᠪᠠᠢᠨᠠ?
— ᠪᠠᠷᠢᠵᠤ ᠪᠠᠢᠨᠠ᠂ ᠬᠢᠳᠤᠵᠤ ᠪᠠᠢᠨᠠ᠃
— ᠶᠠᠭᠠᠬᠢᠬᠤ ᠭᠡᠵᠦ?
— ᠶᠠᠭᠠᠬᠢᠬᠤ ᠶᠠᠭᠤ ᠪᠠᠢᠬᠤ ᠪᠣᠢ᠂ ᠪᠠᠯᠠᠯᠬᠤ ᠭᠡᠵᠦ ᠪᠠᠢᠭᠠ ᠪᠢᠵᠡ!
— ᠵᠦᠭᠡᠷ ᠶᠠᠪᠤᠭᠠ ᠬᠥᠮᠦᠰ ᠢ᠋ ᠤᠤ?
— ᠲᠡᠭᠡᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠂ ᠵᠦᠭᠡᠷ ᠬᠥᠮᠦᠨ ᠢ᠋ ᠪᠠᠢᠲᠤᠭᠠᠢ᠂ ᠵᠦᠭᠡᠷ ᠪᠠᠢᠭᠰᠠᠨ ᠤᠯᠤᠰ ᠢ᠋ ᠪᠠᠯᠠᠯᠤᠭᠰᠠᠨ ᠶᠤᠮ ᠴᠢᠨᠢ ᠳᠡ!
— ᠦᠭᠡᠢ᠂ ᠶᠠᠭᠠᠬᠢᠯᠠ ᠭᠡᠵᠦ ᠲᠡᠷᠡ ᠪᠢᠯᠡ? ᠭᠡᠵᠦ ᠳ᠋ᠠᠨᠽᠡᠨ ᠳᠠᠬᠢᠨ ᠯᠠᠪᠯᠠᠨ ᠠᠰᠠᠭᠤᠬᠤ ᠳ᠋ᠤ᠌᠂ ᠡᠪᠦᠭᠡᠨ ᠤᠴᠠᠭᠠᠷᠯᠠᠵᠤ᠄
— ᠠ᠋? ᠴᠢ ᠶᠠᠭᠠᠬᠢᠭᠰᠠᠨ ᠦᠭᠡᠨ ᠳ᠋ᠦ᠍ ᠳᠤᠷᠠ ᠲᠠᠢ ᠬᠠᠷᠠᠯᠠᠮᠠᠷ ᠪᠣᠢ? ᠵᠦᠭᠡᠷ ᠨᠠᠮᠠᠶ᠋ᠢ ᠳᠠᠭᠠᠭᠠᠳ ᠡᠨᠳᠡ ᠡᠴᠡ ᠬᠣᠯᠠᠳᠠᠵᠤ ᠦᠵᠡ! ᠭᠡᠳ ᠪᠦᠷ ᠬᠦᠴᠦᠯᠡᠨ ᠣᠷᠣᠭᠰᠢ ᠬᠤᠷᠳᠤᠯᠠᠪᠠ᠃ ᠬᠣᠷᠢᠶᠠᠨ ᠤ᠋ ᠵᠠᠬᠠ ᠳ᠋ᠤ᠌ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠡᠪᠦᠭᠡᠨ ᠡᠨᠳᠡ ᠡᠴᠡ ᠪᠢ ᠭᠡᠷ ᠢ᠋ᠶ᠋ᠡᠨ ᠪᠠᠷᠠᠳᠠᠬᠤ ᠶ᠋ᠢ ᠪᠣᠳᠣᠶᠠ᠂ ᠴᠢ ᠲᠡᠷᠡ ᠳ᠋ᠸᠴᠢᠩᠭᠠᠯᠪᠤ ᠪᠠᠨ ᠰᠡᠭᠦᠯ ᠳ᠋ᠦ᠍ ᠪᠣᠯ᠂ ᠮᠡᠳᠡᠪᠡ ᠤᠤ᠂ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠥᠨᠥᠳᠥᠷ ᠳᠣᠲᠣᠷᠠ ᠣᠷᠣᠵᠤ ᠶᠠᠭᠠᠬᠢᠭᠰᠠᠨ ᠴᠦ᠍ ᠪᠣᠯᠬᠤ ᠦᠭᠡᠢ ᠭᠡᠳ ᠶᠠᠪᠤᠯᠠ᠃
ᠬᠦᠷᠢᠶᠡ ᠳᠦᠭᠦᠷᠡᠩ ᠭᠠᠮᠢᠩ᠂ ᠬᠡᠴᠡᠭᠦᠦ ᠵᠢᠪᠡᠭᠦᠨ ᠴᠠᠭ ᠢᠷᠡᠯᠡ ᠭᠡᠵᠦ ᠬᠥᠳᠡᠭᠡ ᠪᠠᠷ ᠯᠠ ᠨᠢᠭᠡ ᠶᠠᠷᠢᠶᠠᠨ ᠳᠡᠭᠳᠡᠵᠦ ᠪᠠᠢᠭᠰᠠᠨ ᠢ᠋ ᠳ᠋ᠠᠨᠽᠡᠨ ᠶᠠᠭᠠᠬᠢᠨ ᠰᠣᠨᠣᠰᠬᠤ ᠦᠭᠡᠢ ᠥᠩᠭᠡᠷᠡᠭᠦᠯᠦᠭᠰᠡᠨ ᠪᠠᠢᠬᠤ ᠪᠢᠯᠡ᠃ ᠭᠡᠪᠡᠴᠦ ᠲᠡᠷᠡ ᠨᠢ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠠ ᠨᠠᠳᠠ ᠶᠠᠭᠤᠨ ᠤ᠋ ᠬᠠᠮᠢᠶᠠ ᠲᠠᠢ ᠪᠢᠯᠡ ᠭᠡᠰᠡᠨ ᠰᠢᠦ ᠠᠵᠢᠭ ᠦᠭᠡᠢ ᠶᠠᠪᠤᠭᠰᠠᠨ ᠪᠥᠭᠡᠳ ᠣᠳᠣ ᠴᠦ᠍ ᠭᠡᠰᠡᠨ ᠡᠨᠡ ᠲᠤᠬᠠᠢ ᠨᠠᠭᠠᠨᠠ ᠴᠠᠭᠠᠨᠠ ᠨᠢ ᠪᠣᠳᠣᠭᠰᠠᠨ ᠦᠭᠡᠢ᠂ ᠵᠥᠪᠬᠡᠨ ᠳ᠋ᠸᠴᠢᠩᠭᠠᠯᠪᠤ᠂ ᠵᠠᠩᠷᠠᠢᠰᠠᠭ ᠬᠣᠶᠠᠷ ᠲᠤ ᠮᠥᠷᠭᠥᠵᠦ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠬᠠᠷᠠᠮᠰᠠᠨᠠ᠃ ᠨᠥᠭᠦᠭᠡ ᠰᠤᠪᠤᠷᠭᠠ ᠶ᠋ᠢᠨ ᠤᠷᠢᠳ ᠢᠷᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠬᠥᠭᠡᠷᠦᠬᠦᠢ ᠶᠠᠳᠠᠷᠠᠭᠰᠠᠨ ᠥᠨᠥ ᠬᠥᠮᠦᠨ ᠳ᠋ᠦ᠍ ᠬᠣᠭᠣᠯᠠ ᠥᠭᠭᠦ ᠭᠡᠵᠦ ᠠᠮᠠᠯᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠪᠠ᠃ ᠲᠡᠭᠡᠬᠦ ᠲᠡᠢ ᠵᠡᠷᠭᠡ ᠬᠠᠮᠠᠭᠤ ᠲᠠᠢ ᠨᠣᠬᠠᠳ ᠤ᠋ᠨ ᠳᠤᠮᠳᠠ ᠨᠢᠭᠡ ᠬᠥᠯ ᠢ᠋ᠶ᠋ᠡᠨ ᠪᠢᠰᠢ᠂ ᠪᠦᠷ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠭᠠᠷᠭᠠᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠬᠥᠭᠡᠷᠦᠬᠦᠢ ᠲᠡᠷᠡ ᠬᠥᠮᠦᠨ ᠨᠢ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠪᠡ᠃ ᠳ᠋ᠠᠨᠽᠡᠨ ᠶᠠᠭᠤ ᠴᠦ᠍ ᠠᠲᠤᠭᠠᠢ ᠬᠠᠳᠠᠭ ᠢ᠋ᠶ᠋ᠠᠨ ᠥᠭᠴᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠷᠢᠭᠤᠳᠬᠠᠬᠤ ᠶ᠋ᠢ ᠪᠣᠳᠣᠪᠠ᠃ ᠳᠡᠷᠭᠡᠳᠡ ᠨᠢ ᠣᠴᠢᠬᠤ ᠳ᠋ᠤ᠌ ᠬᠥᠭᠡᠷᠦᠬᠦᠢ ᠡᠪᠡᠳᠴᠢᠲᠡᠨ ᠭᠥᠯᠢᠷᠡᠭᠰᠡᠨ ᠨᠢᠳᠦ ᠪᠡᠨ ᠴᠠᠪᠴᠢᠬᠤ ᠦᠭᠡᠢ ᠲᠩᠷᠢ ᠶ᠋ᠢᠨ ᠭᠦᠨ ᠢ᠋ ᠰᠢᠷᠲᠡᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠪᠠ᠃
— ᠪᠢ ᠳᠣᠲᠣᠭᠰᠢ ᠣᠷᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠳ ᠬᠠᠳᠠᠭ ᠢ᠋ᠶ᠋ᠠᠨ ᠭᠠᠷᠭᠠᠨ ᠬᠠᠨᠳᠤᠭᠤᠯᠬᠤ ᠳ᠋ᠤ᠌《ᠪᠢ ᠴᠢᠨᠢ ᠡᠨᠡ ᠮᠠᠭᠤ ᠬᠠᠳᠠᠭ ᠢ᠋ᠶ᠋ᠠᠷ ᠶᠠᠭᠠᠬᠢᠬᠤ ᠶᠤᠮ ᠪᠣᠢ?》 ᠭᠡᠰᠡᠨ ᠰᠢᠭ ᠦᠯᠦ ᠬᠥᠳᠡᠯᠦᠨ ᠡᠭᠦᠯᠡ ᠦᠭᠡᠢ ᠬᠥᠬᠡ ᠲᠣᠷᠭᠠᠨ ᠲᠩᠷᠢ ᠶ᠋ᠢ ᠰᠢᠷᠲᠡᠭᠰᠡᠭᠡᠷ ᠪᠠᠢᠪᠠ᠃ ᠳ᠋ᠠᠨᠽᠡᠨ ᠡᠨᠡ ᠬᠥᠮᠦᠨ ᠦ᠌ ᠬᠡᠷᠬᠢᠪᠡᠴᠦ ᠰᠡᠷᠭᠦᠬᠦ ᠦᠭᠡᠢ ᠶ᠋ᠢ ᠲᠦᠷᠦᠭᠦᠨ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠦᠬᠦᠬᠦ ᠡᠴᠡ ᠨᠢ ᠡᠮᠦᠨᠡ ᠬᠣᠭᠣᠯᠠᠢ ᠤᠷᠤᠭᠤ ᠨᠢ ᠶᠠᠭᠤᠮᠠ ᠬᠢᠬᠦ ᠶ᠋ᠢ ᠪᠣᠳᠣᠭᠰᠠᠨ ᠪᠢᠯᠡ᠃ ᠲᠡᠭᠡᠭᠡᠳ ᠲᠤᠰᠠᠯᠠᠬᠤ ᠲᠤᠰᠠᠯᠠᠭᠤᠯᠬᠤ ᠬᠣᠶᠠᠷ ᠤ᠋ᠨ ᠠᠯᠢ ᠠᠯᠢᠨ ᠨᠢ ᠥᠩᠭᠡᠷᠡᠵᠦ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠳᠠᠷᠤᠢ ᠬᠣᠯᠠᠳᠠᠬᠤ ᠬᠡᠷᠡᠭᠲᠡᠢ ᠪᠣᠯᠵᠤ ᠡᠷᠭᠢᠵᠦ ᠬᠠᠷᠠᠬᠤ ᠶ᠋ᠢᠨ ᠴᠦ᠍ ᠬᠡᠷᠡᠭ ᠦᠭᠡᠢ ᠭᠡᠵᠦ ᠪᠣᠳᠣᠪᠠ᠃ ᠭᠡᠪᠡᠴᠦ ᠥᠩᠭᠡᠷᠡᠭᠰᠡᠨ ᠡᠷᠡ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠰᠠᠮ ᠰᠢᠷᠲᠡᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠭᠣᠷᠢᠳᠠᠨ ᠪᠠᠢᠬᠤ ᠰᠢᠭ᠋᠃ ᠢᠯᠠᠩᠭᠤᠶᠠ ᠬᠠᠲᠠᠭᠰᠠᠨ ᠤᠷᠤᠭᠤᠯ ᠤ᠋ᠨ ᠬᠢᠨᠢ ᠴᠠᠭᠠᠨᠠ ᠠ᠋ᠴᠠ ᠬᠠᠷᠠᠯᠠᠨ ᠴᠤᠬᠤᠢᠭᠰᠠᠨ ᠬᠡᠯᠡ ᠶ᠋ᠢ ᠨᠢ ᠠᠵᠢᠬᠤ ᠳ᠋ᠤ᠌《ᠬᠣᠭᠣᠯᠠ᠂ ᠬᠣᠭᠣᠯᠠ ᠶᠠᠭᠤ ᠴᠦ᠍ ᠶᠠᠭᠠᠬᠢᠬᠤᠪ᠂ ᠬᠣᠭᠣᠯᠠᠢ ᠤᠷᠤᠭᠤ ᠵᠥᠭᠡᠯᠡᠨ ᠶᠠᠭᠤᠮᠠ》 ᠭᠡᠳ ᠪᠠᠢᠬᠤ ᠰᠢᠭ᠋᠃ ᠬᠠᠳᠠᠭ ᠤ᠋ᠨ ᠨᠢᠭᠡ ᠶ᠋ᠢ ᠰᠤᠪᠤᠷᠭᠠᠨᠠ ᠤᠶᠠᠭᠠᠳ ᠨᠥᠭᠦᠭᠡ ᠪᠡᠷ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠪᠦᠲᠡᠭᠡᠬᠦ ᠳ᠋ᠦ᠍ ᠦᠯᠦ ᠮᠡᠳᠡᠭᠬᠡᠨ ᠰᠡᠪᠡᠯᠵᠡᠵᠦ ᠪᠠᠢᠭᠠ ᠰᠠᠯᠬᠢ ᠬᠠᠳᠠᠭ ᠢ᠋ ᠬᠡᠢᠰᠬᠡᠨ ᠲᠠᠯᠢᠢᠭᠴᠢ ᠶ᠋ᠢᠨ ᠲᠣᠯᠣᠭᠠᠢ ᠲᠠᠢ ᠣᠷᠢᠶᠠᠯᠳᠤᠭᠤᠯᠪᠠ᠃ ᠲᠡᠭᠦᠨ ᠳ᠋ᠦ᠍ ᠳ᠋ᠠᠨᠽᠡᠨ ᠦ᠌ ᠰᠡᠳᠬᠢᠯ ᠪᠠᠭᠠ ᠵᠡᠷᠭᠡ ᠲᠠᠢᠳᠬᠤᠷᠠᠨ ᠶᠠᠪᠤᠯᠠ᠃ ᠭᠡᠪᠡᠴᠦ ᠠᠮᠢᠳᠤᠷᠠᠯ ᠳ᠋ᠤᠨᠢ ᠲᠣᠬᠢᠶᠠᠯᠳᠤᠭᠰᠠᠨ ᠡᠯᠳᠡᠪ ᠠᠶᠤᠮᠰᠢᠭᠲᠤ ᠵᠦᠢᠯᠡᠰ ᠬᠡᠳᠦᠨ ᠠᠷᠪᠠᠨ ᠶᠠᠩᠵᠤ ᠪᠠᠷ ᠰᠡᠳᠬᠢᠯ ᠳ᠋ᠦ᠍ ᠡᠷᠭᠢᠯᠳᠦᠨᠡ᠃ ᠵᠠᠮ ᠵᠠᠭᠤᠷᠠ ᠪᠠᠨ ᠥᠨᠥ ᠭᠠᠢᠬᠠᠯᠲᠠᠢ ᠲᠣᠮᠣ ᠬᠣᠭ ᠤ᠋ᠨ ᠬᠣᠢᠭᠤᠷ ᠬᠡᠷᠬᠢᠨ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠴᠦ᠍ ᠡᠰᠡ ᠮᠡᠳᠡᠪᠡ᠃ ᠪᠠᠰᠠ ᠲᠠᠯᠠ ᠲᠠᠯᠠ ᠠ᠋ᠴᠠ ᠲᠠᠭᠠᠷᠢᠭᠠᠴᠢ ᠣᠯᠠᠨ ᠨᠣᠬᠠᠳ ᠪᠠᠢᠳᠠᠭ ᠢ᠋ ᠴᠦ᠍ ᠮᠠᠷᠲᠠᠭᠰᠠᠨ ᠠᠵᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠮᠠᠢᠬᠠᠨ ᠤ᠋ ᠪᠠᠨ ᠡᠮᠦᠨᠡ ᠢᠷᠡᠭᠰᠡᠨ ᠪᠠᠢᠯᠠ᠃ ᠮᠠᠢᠬᠠᠨ ᠳ᠋ᠤ᠌ ᠳᠣᠷᠵᠢ ᠵᠠᠩᠭᠢᠷᠠᠯᠳᠤᠭᠰᠠᠨ ᠪᠦᠳᠦᠭᠦᠨ ᠪᠤᠯᠴᠢᠩ ᠲᠠᠢ ᠭᠠᠷ ᠢ᠋ᠶ᠋ᠠᠨ ᠳᠡᠷᠡᠯᠡᠨ ᠲᠠᠴᠢᠭᠢᠨᠠᠲᠠᠯᠠ ᠬᠤᠷᠬᠢᠷᠠᠨᠠ᠃ ᠳ᠋ᠠᠨᠽᠡᠨ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ ᠮᠥᠨ ᠤᠨᠲᠠᠬᠤ ᠭᠡᠵᠦ ᠬᠠᠵᠠᠭᠤᠯᠠᠪᠠ᠃ ᠲᠡᠭᠡᠲᠡᠯᠡ ᠨᠥᠭᠦᠭᠡ ᠨᠠᠰᠤ ᠡᠴᠦᠰᠯᠡᠭᠰᠡᠨ ᠬᠥᠮᠦᠨ ᠦ᠌ ᠠᠶᠤᠮᠰᠢᠭᠲᠤ ᠳᠦᠷᠰᠦ ᠰᠡᠳᠬᠢᠯ ᠳ᠋ᠦ᠍ᠨᠢ ᠡᠷᠭᠢᠯᠳᠦᠨ ᠨᠣᠢᠷ ᠢ᠋ ᠨᠢ ᠬᠤᠯᠵᠢᠭᠠᠨᠠ᠃
ᠮᠠᠷᠲᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠳᠬᠠᠨ ᠨᠢᠳᠦ ᠪᠡᠨ ᠠᠨᠢᠬᠤ ᠳ᠋ᠤ᠌ ᠲᠡᠭᠡᠬᠦ ᠡᠴᠡ ᠲᠡᠭᠡ ᠭᠡᠰᠡᠨ ᠶᠦᠮ ᠰᠢᠭ ᠲᠣᠳᠣᠷᠠᠨ ᠦᠵᠡᠭᠳᠡᠵᠦ《ᠬᠣᠭᠣᠯᠠ᠂ ᠬᠣᠭᠣᠯᠠ》 ᠭᠡᠵᠦ ᠪᠠᠢᠭᠰᠠᠨ ᠨᠢ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠤᠭᠳᠠᠨᠠ᠃ ᠭᠡᠲᠡᠯᠡ ᠠᠰᠢᠭᠦᠢ ᠬᠦᠷᠡᠯ ᠢᠷᠡᠯᠡ᠃ ᠭᠡᠪᠡᠴᠦ ᠮᠥᠨ ᠯᠡ ᠨᠢᠭᠡ ᠠᠶᠤᠮᠰᠢᠭᠲᠠᠢ ᠶᠠᠭᠤᠮᠠ ᠦᠵᠡᠭᠰᠡᠨ ᠪᠤᠶᠤ ᠲᠤᠭᠤᠯᠤᠭᠰᠠᠨ ᠮᠡᠲᠦ᠂ ᠨᠣᠭᠣᠭᠠᠨ ᠨᠢᠳᠦ ᠨᠢ ᠣᠷᠣᠢ ᠳᠡᠭᠡᠷᠡ ᠨᠢ ᠭᠢᠯᠠᠯᠵᠠᠨᠠ᠃
— ᠠᠰᠢᠭᠦᠢ ᠴᠢ ᠢᠷᠡᠭᠰᠡᠨ ᠤᠤ? ᠴᠢᠨᠠᠳᠤ ᠳᠣᠷᠵᠢ ᠪᠠᠨ ᠰᠡᠷᠡᠭᠡᠵᠦ ᠦᠵᠡ!
— ᠲᠡᠢᠮᠦ ᠠ᠋᠂ ᠰᠠᠶᠢᠬᠠᠨ ᠢᠷᠡᠯᠡ ᠭᠡᠳ ᠳᠣᠷᠵᠢ ᠶ᠋ᠢᠨ ᠲᠣᠬᠣᠢ ᠠ᠋ᠴᠠ ᠲᠠᠲᠠᠪᠠ᠃ ᠳᠣᠷᠵᠢ ᠠᠮᠠ ᠪᠠᠨ ᠲᠠᠮᠰᠢᠶᠠᠯᠠᠨ ᠥᠨᠳᠡᠢᠵᠦ᠄
— ᠲᠠ ᠨᠠᠷ ᠤ᠋ᠨ ᠨᠥᠭᠦᠭᠡ ᠡᠷᠭᠦᠯ ᠮᠥᠷᠭᠥᠯ ᠶᠠᠭᠠᠬᠢᠯᠠ?
— ᠪᠢ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠠᠯᠬᠠᠯᠠ ᠭᠡᠰᠡᠨ ᠢ᠋ᠶ᠋ᠡᠨ᠂ ᠬᠦᠷᠡᠯ᠂
— ᠦᠭᠡᠢ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤᠪ᠃ ᠴᠠᠭᠠᠨᠠ ᠴᠢᠨᠢ ᠬᠦᠷᠢᠶᠡ ᠳᠦᠭᠦᠷᠡᠩ ᠭᠠᠮᠢᠩ᠂ ᠠᠶᠠᠨ ᠵᠠᠮ ᠤ᠋ᠨ ᠬᠥᠮᠦᠰ ᠦ᠋ᠨ ᠤᠨᠤᠭᠠ ᠬᠥᠰᠬᠡ ᠶ᠋ᠢ ᠳᠡᠭᠡᠷᠡᠮᠳᠡᠬᠦ ᠪᠣᠯᠤᠭᠰᠠᠨ ᠭᠡᠨᠡ ᠴᠦ᠍ ᠭᠡᠬᠦ ᠰᠢᠭ᠂ ᠬᠡᠨ ᠬᠥᠮᠦᠨ ᠦ᠌ ᠡᠪᠦᠷ ᠲᠦᠷᠡᠢ ᠶ᠋ᠢ ᠨᠡᠩᠵᠢᠨ ᠮᠥᠩᠭᠥ ᠵᠣᠭᠣᠰ ᠢ᠋ ᠨᠢ ᠪᠤᠯᠢᠶᠠᠨᠠ ᠴᠦ᠍ ᠭᠡᠬᠦ ᠰᠢᠭ ᠠᠶᠤᠮᠰᠢᠭ ᠪᠦᠬᠦᠨ ᠳᠤᠭᠤᠯᠳᠠᠨᠠ ᠰᠢᠦ ᠭᠡᠰᠡᠨ ᠢ᠋ᠶ᠋ᠡᠨ ᠴᠣᠬᠣᠮ ᠴᠣᠬᠣᠮ ᠭᠡᠵᠦ ᠤᠶᠠᠩᠭᠠᠯᠠᠭᠤᠯᠤᠨ ᠵᠠᠯᠪᠠᠷᠢᠭᠠᠳ ᠪᠤᠷᠬᠠᠨ ᠮᠢᠨᠢ ᠴᠣᠬᠣᠮ ᠶᠠᠭᠤ ᠴᠦ᠍ ᠭᠡᠵᠦ ᠬᠡᠯᠡᠬᠦ ᠪᠣᠢ? ᠮᠣᠩᠭᠣᠯ ᠤᠯᠤᠰ ᠮᠠᠨᠢ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠰᠢᠷᠣᠢ ᠡᠮᠬᠦᠭᠡᠳ ᠪᠠᠢᠨᠠ ᠰᠢᠦ ᠭᠡᠵᠦ ᠳᠠᠭᠤ ᠠᠯᠳᠠᠪᠠ᠃ ᠶᠠᠭᠤ ᠪᠣᠯᠪᠠ ᠭᠡᠵᠦ ᠳᠣᠷᠵᠢ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌᠄
— ᠪᠣᠭᠳᠠ ᠯᠠᠮᠠᠲᠠᠨ ᠢ᠋ ᠴᠢᠷᠴᠦ ᠠᠪᠠᠴᠢᠨ ᠬᠠᠴᠢᠨ ᠮᠠᠶᠢᠭ ᠤ᠋ᠨ ᠬᠤᠪᠴᠠᠰᠤ ᠲᠠᠢ ᠭᠠᠵᠢ ᠪᠤᠷᠤᠭᠤ ᠬᠥᠮᠦᠨ ᠦ᠌ ᠵᠢᠷᠤᠭ ᠲᠤ ᠮᠥᠷᠭᠥᠭᠦᠯᠦᠭᠰᠡᠨ ᠭᠡᠨᠡ ᠭᠡᠳ ᠭᠠᠰᠠᠯᠤᠨ ᠱᠠᠭᠰᠢᠷᠠᠵᠤ ᠳᠠᠭᠤ ᠦᠭᠡᠢ ᠪᠣᠯᠤᠯᠠ᠃
— ᠪᠢ ᠳ᠋ᠸᠴᠢᠩᠭᠠᠯᠪᠤ ᠬᠦᠷᠬᠦ ᠭᠡᠵᠦ ᠶᠠᠪᠤᠭᠠᠳ ᠭᠠᠮᠢᠩ ᠠ᠋ᠴᠠ ᠵᠢᠭᠤᠲᠠᠭᠰᠠᠨ ᠪᠠᠬᠠᠨ ᠤᠯᠤᠰ ᠲᠠᠢ ᠲᠠᠭᠠᠷᠠᠯᠳᠤᠭᠠᠳ ᠪᠤᠴᠠᠨ ᠢᠷᠡᠯᠡ ᠭᠡᠵᠦ ᠳ᠋ᠠᠨᠽᠡᠨ ᠥᠭᠦᠯᠡᠬᠦ ᠳ᠋ᠦ᠍ ᠬᠦᠷᠡᠯ᠄
— ᠠ ᠲᠡᠢᠮᠦ ᠭᠡᠵᠦ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠤᠨ ᠬᠠᠮᠢᠭᠠ ᠠ᠋ᠴᠠ ᠶᠠᠮᠠᠷ ᠭᠡᠭᠴᠢ ᠭᠠᠢ ᠲᠠᠢ ᠬᠡᠨ ᠭᠡᠭᠴᠢ ᠪᠣᠯᠬᠤ ᠶ᠋ᠢ ᠪᠦᠦ ᠮᠡᠳᠡ᠃ ᠬᠡᠳᠦᠨ ᠬᠥᠮᠦᠨ ᠪᠠᠰᠠ᠂ ᠲᠦᠮᠡᠨ ᠠᠮᠢᠲᠠᠨ ᠳᠦᠴᠢᠭᠢᠨᠡᠵᠦ᠂ ᠪᠤᠮᠠᠨ ᠠᠮᠢᠲᠠᠨ ᠪᠤᠵᠢᠭᠢᠨᠠᠭᠰᠠᠨ ᠵᠡᠭᠡᠯᠢ ᠳᠡᠭᠡᠷᠡ《ᠦᠨᠡᠰᠦᠨ ᠰᠠᠷᠠᠯ ᠭᠠᠮᠢᠩ ᠤ᠋ᠳ ᠢ᠋ ᠣᠷᠣᠨ ᠨᠤᠲᠤᠭ ᠲᠤᠨᠢ ᠬᠥᠭᠡᠭᠡᠨ ᠲᠣᠨᠢᠯᠭᠠᠶᠠ》 ᠭᠡᠰᠡᠨ ᠤᠳᠬᠠ ᠲᠠᠢ ᠨᠣᠮ ᠬᠠᠭᠤᠳᠠᠰᠤ ᠨᠠᠭᠠᠵᠤ ᠣᠷᠬᠢᠭᠠᠳ ᠠᠯᠠᠭᠠ ᠪᠣᠯᠴᠢᠬᠠᠭᠰᠠᠨ ᠭᠡᠨᠡ᠃ ᠲᠡᠭᠦᠨ ᠦ᠌ ᠤᠯᠠᠮ ᠠ᠋ᠴᠠ ᠭᠠᠮᠢᠩ ᠤ᠋ᠳ ᠬᠠᠪᠢ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠢ᠋ ᠪᠠᠷᠢᠵᠤ ᠴᠢᠷᠴᠦ ᠪᠠᠢᠭᠠ ᠶᠤᠮ ᠭᠡᠨᠡ ᠭᠡᠳ ᠴᠠᠭᠠᠰᠢ ᠨᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠵᠢᠯ ᠤ᠋ᠨ ᠲᠤᠬᠠᠢ ᠶᠠᠷᠢᠪᠠ᠃ ᠢᠩᠭᠢᠬᠦ ᠳ᠋ᠦ᠍ ᠬᠦᠷᠡᠯ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠠᠯᠬᠠᠵᠤ ᠵᠠᠮ ᠮᠥᠷ ᠢ᠋ᠶ᠋ᠡᠨ ᠵᠠᠰᠠᠭᠤᠯᠤᠭᠰᠠᠨ ᠠᠵᠢ᠃ ᠪᠠᠭᠰᠢ ᠶ᠋ᠢᠨ ᠬᠢᠨᠢ ᠲᠥᠯᠭᠡ ᠳ᠋ᠦ᠍ ᠠᠰᠢᠭᠦᠢ ᠪᠢᠳᠡᠨ ᠦ᠌ ᠵᠠᠮ ᠮᠥᠷ ᠠᠶᠤᠯ ᠦᠭᠡᠢ ᠭᠡᠵᠦ ᠪᠠᠭᠤᠭᠰᠠᠨ ᠰᠢᠦ ᠭᠡᠵᠦ ᠣᠯᠵᠠᠭᠤᠷᠬᠠᠨ ᠲᠠᠢᠪᠤᠩ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠦᠭᠡᠢ ᠲᠠ ᠮᠢᠨᠢ ᠦᠭᠡ ᠣᠯᠠᠳᠠᠵᠤ᠂ ᠦᠬᠡᠷ ᠬᠣᠯᠠᠳᠠᠪᠠ ᠰᠢᠦ᠃ ᠪᠣᠰᠤᠨ ᠬᠠᠷᠠᠢᠵᠤ《ᠣᠳᠣ ᠠᠴᠢᠶᠠᠯᠠᠶᠠ》 ᠭᠡᠳ ᠭᠦᠶᠦᠨ ᠭᠠᠷᠤᠩᠭᠤᠲᠠ ᠪᠠᠨ ᠮᠠᠢᠬᠠᠨ ᠤ᠋ ᠭᠠᠳᠠᠰᠤ ᠨᠤᠭᠤᠳ ᠢ᠋ ᠰᠤᠭᠤᠴᠢᠨ ᠬᠠᠶᠠᠪᠠ᠃ ᠳᠣᠷᠵᠢ᠂ ᠳ᠋ᠠᠨᠽᠡᠨ ᠬᠣᠶᠠᠷ ᠮᠥᠨ ᠪᠣᠰᠴᠤ ᠠᠵᠢᠯ ᠳ᠋ᠠᠭᠠᠨ ᠣᠷᠣᠪᠠ᠃ ᠠᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠪᠦᠬᠦ ᠲᠡᠮᠡᠭᠡ ᠪᠡᠨ ᠠᠴᠢᠶᠠᠯᠠᠵᠤ ᠳᠠᠭᠤᠰᠤᠮᠠᠭᠴᠠ ᠬᠦᠷᠡᠯ ᠰᠤᠪᠠᠢ ᠰᠢᠷᠠᠭᠴᠢ ᠢᠩᠭᠡ ᠪᠡᠨ ᠬᠡᠪᠲᠡᠭᠦᠯᠵᠦ ᠮᠣᠷᠳᠠᠭᠠᠳ᠄
— ᠠᠢ ᠳᠠ ᠲᠠ ᠮᠢᠨᠢ᠂ ᠰᠦᠰᠦᠭ ᠪᠢᠰᠢᠷᠡᠯ ᠢ᠋ᠶ᠋ᠡᠨ ᠬᠢᠴᠢᠶᠡᠨᠡ ᠰᠢᠦ ᠳᠡ ᠭᠡᠵᠦ ᠬᠠᠰᠬᠢᠷᠤᠭᠠᠳ ᠵᠡᠭᠦᠨ ᠵᠦᠭ ᠢ᠋ ᠪᠠᠷᠢᠨ ᠭᠦᠪᠦᠯᠵᠡᠭᠦᠯᠦᠨ ᠠᠯᠬᠤᠯᠠᠭᠤᠯᠪᠠ᠃ ᠬᠦᠷᠢᠶᠡᠨ ᠦ᠌ ᠵᠡᠭᠦᠨ ᠵᠠᠬᠠ ᠪᠣᠯᠬᠤ ᠣᠷᠣᠰ ᠤ᠋ᠨ ᠥᠨᠳᠥᠷ ᠨᠣᠭᠣᠭᠠᠨ ᠣᠷᠣᠢ ᠲᠠᠢ ᠪᠠᠢᠰᠢᠩ ᠤ᠋ᠨ ᠠᠷᠤ ᠪᠠᠷ ᠣᠷᠣᠨ᠂ ᠮᠠᠬᠤᠷ ᠬᠡᠮᠡᠬᠦ ᠲᠣᠯᠣᠭᠠᠢ ᠶ᠋ᠢᠨ ᠡᠩᠭᠡᠷ ᠬᠦᠷᠦᠭᠡᠳ ᠲᠡᠨᠳᠡ ᠡᠴᠡ ᠪᠡᠨ ᠣᠷᠣᠭᠰᠢ ᠡᠷᠭᠢᠵᠦ ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠢ᠋ᠶ᠋ᠠᠷ ᠣᠷᠣᠨ᠂ ᠵᠡᠭᠦᠨ ᠤᠷᠤᠭᠰᠢ ᠴᠢᠭᠯᠡᠯᠡ᠃ ᠲᠡᠷᠡ ᠵᠠᠭᠤᠷᠠ ᠪᠠᠨ ᠵᠢᠩᠴᠢᠳ ᠠᠯᠢ ᠵᠦᠭ ᠡᠴᠡ ᠶᠠᠮᠠᠷ ᠠᠶᠤᠯᠲᠠᠢ ᠠᠮᠢᠲᠠᠨ ᠭᠠᠷᠴᠤ ᠢᠷᠡᠨ ᠤᠨᠤᠭᠠ ᠬᠥᠰᠬᠡ ᠶ᠋ᠢ ᠳᠡᠭᠡᠷᠡᠮᠳᠡᠬᠦ ᠪᠣᠯ ᠭᠡᠵᠦ ᠦᠷᠭᠦᠯᠵᠢ ᠰᠡᠳᠬᠢᠯ ᠲᠦᠭᠰᠢᠨ ᠶᠠᠪᠤᠯᠠ᠃ ᠬᠠᠵᠠᠭᠤ ᠪᠠᠷ ᠤᠨᠤᠭᠠ ᠲᠠᠢ ᠤᠨᠤᠭᠠ ᠦᠭᠡᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠥᠮᠦᠰ ᠨᠠᠭᠠᠰᠢ ᠴᠠᠭᠠᠰᠢ ᠲᠠᠰᠤᠷᠠᠯᠲᠠ ᠦᠭᠡᠢ ᠶᠠᠪᠤᠬᠤ ᠪᠣᠯᠪᠠᠴᠤ ᠥᠨᠥᠬᠢ ᠭᠠᠮᠢᠩ ᠤ᠋ᠳ ᠠ᠋ᠴᠠ ᠨᠢᠭᠡ ᠴᠦ᠍ ᠳᠠᠭᠠᠷᠢᠯᠳᠤᠭᠠ ᠦᠭᠡᠢ ᠠᠵᠢ᠃ ᠲᠤᠩᠭᠠᠯᠠᠭ ᠤᠷᠤᠰᠬᠠᠯᠲᠤ ᠲᠤᠤᠯᠠ ᠭᠣᠣᠯ ᠤ᠋ᠨ ᠵᠠᠬᠠ ᠳ᠋ᠤ᠌ ᠢᠷᠡᠭᠡᠳ ᠬᠣᠢᠰᠢ ᠬᠠᠷᠠᠬᠤ ᠳ᠋ᠤ᠌ ᠬᠦᠷᠢᠶᠡᠨ ᠦ᠌ ᠪᠠᠷᠠ ᠪᠠᠷᠠᠭᠠᠨᠠᠨ ᠰᠡᠭᠦᠳᠡᠷᠲᠦᠵᠦ ᠪᠦᠷᠢᠶᠡᠨ ᠦ᠌ ᠳᠠᠭᠤ ᠳᠤᠭᠤᠯᠳᠠᠬᠤ ᠲᠠᠢ ᠦᠭᠡᠢ ᠲᠡᠢ ᠰᠣᠨᠣᠰᠳᠠᠨᠠ᠃ ᠭᠣᠣᠯ ᠤ᠋ᠨ ᠤᠰᠤ ᠶ᠋ᠢ ᠭᠠᠲᠤᠯᠬᠤ ᠳ᠋ᠤ᠌ ᠤᠭ ᠠ᠋ᠴᠠ ᠪᠠᠨ ᠭᠣᠪᠢ ᠴᠦᠯ ᠡᠴᠡ ᠭᠠᠷᠤᠯ ᠲᠠᠢ ᠲᠡᠮᠡᠭᠡ ᠨᠦ᠍ᠭᠦᠳ ᠬᠠᠮᠠᠷ ᠱᠤᠤᠬᠢᠲᠤᠨᠠᠭᠤᠯᠤᠨ ᠬᠠᠪᠲᠠᠭᠠᠢ ᠴᠠᠭᠠᠨ ᠲᠠᠪᠠᠬᠠᠢ ᠪᠠᠨ ᠳᠡᠭᠡᠷᠡ ᠳᠡᠭᠡᠷᠡ ᠡᠷᠭᠦᠨ ᠫᠥᠯ ᠫᠠᠯᠬᠢᠯᠠᠨ ᠭᠢᠰᠬᠢᠯᠡᠨᠡ᠃ ᠬᠡᠵᠢᠶᠡ ᠢᠮᠠᠭᠲᠠ ᠵᠢᠩ ᠦ᠋ᠨ ᠳᠤᠮᠳᠠ ᠶ᠋ᠢ ᠪᠠᠷᠢᠨ ᠶᠠᠪᠤᠳᠠᠭ ᠳᠣᠷᠵᠢ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠭᠣᠣᠯ ᠭᠠᠲᠤᠯᠤᠨ ᠭᠠᠷᠤᠭᠠᠳ ᠲᠡᠮᠡᠭᠡ ᠨᠢᠭᠡ ᠪᠦᠷᠢ ᠶ᠋ᠢ ᠠᠵᠢᠭᠯᠠᠨ ᠬᠥᠭ ᠬᠥᠭ ᠭᠡᠵᠦ ᠬᠠᠰᠬᠢᠷᠤᠭᠠᠳ᠂ ᠰᠡᠭᠦᠯᠴᠢ ᠶ᠋ᠢᠨ ᠬᠥᠮᠦᠨ ᠳ᠋ᠠᠨᠽᠡᠨ ᠢ᠋ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍᠄
— ᠣᠳᠣ ᠠᠶᠤᠯ ᠪᠦᠬᠦᠨ ᠠᠷᠤ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠪᠢᠵᠡ ᠳᠡ ᠭᠡᠳ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠲᠡᠢᠮᠦ ᠴᠦ᠍ ᠪᠢᠵᠡ ᠭᠡᠵᠦ ᠳ᠋ᠠᠨᠽᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍᠂ ᠲᠡᠷᠡ ᠤᠷᠢᠳ ᠠ᠋ᠴᠠ ᠬᠦᠷᠡᠯ᠄
— ᠠᠴᠢᠲᠤ ᠯᠠᠮᠠ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠠᠶᠤᠯ ᠪᠦᠬᠦᠨ ᠠᠷᠤ ᠳ᠋ᠤ᠌ ᠬᠠᠶᠠᠭᠳᠠᠭᠰᠠᠨ ᠰᠢᠦ ᠭᠡᠵᠦ ᠣᠪᠣᠭᠠ ᠴᠣᠪᠣᠭᠣᠳᠠᠬᠤ ᠳᠠᠭᠤ ᠪᠠᠷ ᠢᠨᠢᠶᠡᠳᠦ ᠠᠯᠲᠠᠨ ᠬᠠᠰᠬᠢᠷᠤᠭᠠᠳ᠂ ᠴᠠᠭᠠᠰᠢ ᠡᠷᠭᠢᠨ ᠠᠯᠤᠰ ᠢ᠋ ᠰᠢᠷᠲᠡᠨ᠂ ᠲᠡᠰᠢᠶᠡ ᠲᠤᠯᠵᠤ《ᠪᠣᠭᠳᠠ ᠶ᠋ᠢᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠪᠣᠷᠣᠭᠠᠨ ᠤ᠋ ᠮᠠᠨᠠᠨ ᠲᠠᠲᠠᠨᠠ᠃ ᠪᠤᠴᠠᠭᠠᠳ ᠬᠣᠢᠰᠢ ᠪᠠᠨ ᠬᠠᠷᠠᠬᠤ ᠳ᠋ᠤ᠌ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠢᠯᠡᠬᠡᠨ》 ᠭᠡᠵᠦ ᠰᠦᠷᠡᠬᠡᠢ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠲᠡᠩᠬᠡ ᠮᠡᠳᠡᠨ ᠳᠠᠭᠤᠯᠠᠵᠤ ᠭᠠᠷᠪᠠ᠃ ᠭᠡᠪᠡᠴᠦ ᠣᠳᠣ ᠪᠣᠯ ᠵᠤᠨ ᠪᠢᠰᠢ ᠡᠪᠦᠯ᠂ ᠪᠣᠭᠳᠠ ᠶ᠋ᠢᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠪᠣᠷᠣᠭᠠᠨ ᠤ᠋ ᠪᠤᠳᠠᠩ ᠶᠠᠭᠠᠬᠢᠨ ᠲᠠᠲᠠᠬᠤ ᠪᠢᠯᠡ ᠳᠠ᠃ ᠬᠠᠷᠢᠨ ᠪᠤᠴᠠᠭᠠᠳ ᠬᠣᠢᠰᠢ ᠪᠠᠨ ᠬᠠᠷᠠᠬᠤ ᠳ᠋ᠤ᠌ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠢᠯᠡᠬᠡᠨ ᠬᠠᠷᠠᠭᠳᠠᠬᠤ ᠨᠢ ᠴᠦ᠍ ᠬᠠᠷᠠᠭᠳᠠᠵᠤ ᠯᠠ ᠪᠠᠢᠨᠠ᠃