ᠲᠡᠮᠡᠭᠡ ᠦᠨᠡᠰᠦᠨ ᠳ᠋ᠦ᠍ ᠬᠥᠷᠪᠡᠭᠡᠬᠦ ᠪᠣᠯᠤᠭᠰᠠᠨ ᠤ᠋ ᠤᠴᠢᠷ-ᠳᠣᠮᠣᠭ ᠦᠯᠢᠭᠡᠷТэмээ үнсэнд хөрвөөх болсны учир-Домог үлгэр
1652ᠲᠡᠮᠡᠭᠡ ᠦᠨᠡᠰᠦᠨ ᠳ᠋ᠦ᠍ ᠬᠥᠷᠪᠡᠭᠡᠬᠦ ᠪᠣᠯᠤᠭᠰᠠᠨ ᠤ᠋ ᠤᠴᠢᠷ
ᠳᠣᠮᠣᠭ ᠦᠯᠢᠭᠡᠷ
ᠤᠷᠢᠳᠤ ᠪᠤᠷᠬᠠᠨ ᠮᠣᠩᠭᠣᠯ ᠲᠣᠭᠠᠯᠠᠯ ᠤ᠋ᠨ ᠠᠷᠪᠠᠨ ᠬᠣᠶᠠᠷ ᠵᠢᠯ ᠳ᠋ᠦ᠍ ᠠᠳᠤᠭᠤᠰᠤ ᠠᠮᠢᠲᠠᠨ ᠤ᠋ ᠨᠡᠷᠡ ᠶ᠋ᠢ ᠥᠭᠴᠦ ᠪᠠᠢᠬᠤ ᠳ᠋ᠠᠭᠠᠨ ᠠᠷᠪᠠᠨ ᠨᠢᠭᠡᠨ ᠠᠮᠢᠲᠠᠨ ᠤ᠋ ᠨᠡᠷᠡ ᠶ᠋ᠢ ᠰᠢᠯᠤᠭᠤᠬᠠᠨ ᠵᠣᠬᠢᠶᠠᠭᠠᠳ᠂ ᠠᠷᠪᠠᠨ ᠬᠣᠶᠠᠳᠠᠬᠢ ᠪᠤᠶᠤ ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠬᠠᠮᠤᠭ ᠡᠬᠢᠨ ᠦ᠌ ᠵᠢᠯ ᠳ᠋ᠦ᠍ ᠶᠠᠮᠠᠷ ᠠᠮᠢᠲᠠᠨ ᠤ᠋ ᠨᠡᠷᠡ ᠥᠭᠬᠦ ᠪᠣᠢ ᠭᠡᠲᠡᠯᠡ ᠂ᠲᠡᠮᠡᠭᠡ ᠬᠤᠯᠤᠭᠠᠨᠠ ᠬᠣᠶᠠᠷ ᠨᠡᠷᠡ ᠪᠡᠨ ᠣᠷᠣᠭᠤᠯᠬᠤ ᠭᠡᠵᠦ ᠪᠤᠯᠢᠶᠠᠯᠳᠤᠵᠠᠢ᠂ ᠪᠤᠷᠬᠠᠨ ᠠᠯᠢ ᠠᠯᠢ ᠶ᠋ᠢ ᠨᠢ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠰᠠᠢᠳ ᠭᠡᠮᠡᠨ ᠠᠢᠯᠠᠳᠴᠠᠢ᠂ ᠲᠡᠷᠡ ᠬᠣᠶᠠᠷ ᠮᠠᠷᠭᠠᠰᠢ ᠥᠷᠯᠥᠭᠡ ᠶ᠋ᠢᠨ ᠮᠠᠨᠳᠤᠬᠤ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠬᠡᠨ ᠲᠦᠷᠦᠭᠦᠯᠡᠵᠦ ᠦᠵᠡᠭᠰᠡᠨ ᠨᠢ ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠲᠦᠷᠦᠭᠦᠴᠢ ᠳ᠋ᠦ᠍ ᠲᠣᠬᠢᠶᠠᠭᠳᠠᠬᠤ ᠪᠣᠯᠵᠤ᠂ ᠮᠡᠯᠵᠢᠭᠡ ᠲᠣᠭᠲᠠᠭᠠᠭᠰᠠᠨ ᠠᠵᠠᠢ᠂ ᠲᠡᠮᠡᠭᠡ ᠨᠠᠷᠠ ᠭᠠᠷᠬᠤ ᠳᠣᠷᠣᠨᠠ ᠵᠦᠭ ᠤᠷᠤᠭᠤ ᠬᠠᠷᠠᠵᠤ᠂ ᠨᠠᠷᠠ ᠭᠠᠷᠬᠤ ᠶ᠋ᠢ ᠬᠦᠯᠢᠶᠡᠵᠦ ᠵᠣᠭᠰᠣᠪᠠ᠂ ᠬᠤᠯᠤᠭᠠᠨᠠ ᠲᠡᠮᠡᠭᠡᠨ ᠦ᠌ ᠪᠦᠬᠦᠨ ᠳᠡᠭᠡᠷᠡ ᠭᠠᠷᠴᠤ ᠪᠠᠢᠭᠠᠳ ᠂ᠪᠠᠷᠠᠭᠤᠨ ᠵᠦᠭ ᠬᠠᠷᠠᠨ ᠂ ᠴᠠᠭ ᠢᠮᠠᠭᠲᠠ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠰᠢᠷᠲᠡᠵᠦ ᠪᠠᠢᠪᠠ᠂ ᠲᠡᠭᠡᠵᠦ ᠪᠠᠢᠲᠠᠯᠠ ᠨᠠᠷᠠ ᠭᠠᠷᠬᠤ ᠴᠠᠭ ᠪᠣᠯᠵᠤ ᠂ ᠤᠷᠭᠤᠬᠤ ᠨᠠᠷᠠᠨ ᠤ᠋ ᠠᠩᠬᠠᠨ ᠤ᠋ ᠲᠤᠶᠠᠭᠠ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠲᠤᠰᠤᠭᠰᠠᠨ ᠳ᠋ᠤ᠌ ᠂ᠬᠤᠯᠤᠭᠠᠨᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠢ᠋ ᠲᠦᠷᠦᠭᠦᠯᠡᠵᠦ ᠦᠵᠡᠯᠡ ᠭᠡᠮᠡᠨ ᠬᠠᠰᠬᠢᠷᠴᠠᠢ᠂ ᠲᠡᠮᠡᠭᠡ ᠮᠡᠯᠵᠢᠭᠡ ᠪᠡᠨ ᠠᠯᠳᠠᠭᠰᠠᠨ ᠳ᠋ᠠᠭᠠᠨ ᠠᠭᠤᠷᠯᠠᠨ ᠬᠤᠯᠤᠭᠠᠨᠠ ᠶ᠋ᠢ ᠳᠡᠪᠰᠡᠵᠦ ᠠᠯᠠᠬᠤ ᠭᠡᠵᠦ ᠤᠬᠤᠰᠬᠢᠲᠡᠯᠡ ᠬᠤᠯᠤᠭᠠᠨᠠ ᠣᠪᠣᠭᠠᠯᠠᠭᠤᠰᠢᠲᠠᠢ ᠦᠨᠡᠰᠦᠨ ᠳᠣᠣᠭᠤᠷ ᠭᠦᠶᠦᠨ ᠣᠷᠣᠵᠤ᠂ ᠠᠮᠢ ᠪᠠᠨ ᠬᠣᠷᠢᠭᠳᠠᠵᠤ ᠭᠡᠨᠡ᠂ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠲᠡᠮᠡᠭᠡ ᠦᠨᠡᠰᠦ ᠠᠰᠬᠠᠭᠰᠠᠨ ᠭᠠᠵᠠᠷ ᠬᠠᠷᠠᠭᠳᠠᠬᠤ ᠪᠦᠷᠢ ᠳ᠋ᠦ᠍ ᠥᠨᠥᠬᠢ ᠥᠰᠢᠶᠡᠲᠡᠨ ᠳᠠᠢᠰᠤᠨ ᠬᠤᠯᠤᠭᠠᠨᠠ ᠶ᠋ᠢ ᠨᠢᠴᠠ ᠳᠠᠷᠤᠬᠤ ᠰᠠᠨᠠᠭᠠᠲᠠᠢ ᠦᠨᠡᠰᠦ ᠶ᠋ᠢ ᠳᠡᠪᠰᠡᠵᠦ ᠬᠥᠷᠪᠡᠭᠡᠳᠡᠭ ᠪᠣᠯᠤᠭᠰᠠᠨ ᠭᠡᠨᠡ᠃
ᠢᠩᠭᠢᠭᠡᠳ ᠬᠤᠯᠤᠭᠠᠨᠠ ᠠᠷᠪᠠᠨ ᠬᠣᠶᠠᠷ ᠵᠢᠯ ᠳ᠋ᠦ᠍ ᠪᠠᠭᠲᠠᠵᠤ᠂ ᠲᠡᠮᠡᠭᠡ ᠬᠠᠰᠤᠭᠳᠠᠭᠰᠠᠨ ᠭᠡᠨᠡ᠂ ᠭᠡᠪᠡᠴᠦ ᠲᠡᠮᠡᠭᠡ ᠠᠷᠪᠠᠨ ᠬᠣᠶᠠᠷ ᠵᠢᠯ ᠳ᠋ᠦ᠍ ᠪᠠᠭᠲᠠᠭᠠ ᠦᠭᠡᠢ ᠪᠣᠯᠪᠠᠴᠤ᠂ ᠠᠷᠪᠠᠨ ᠬᠣᠶᠠᠷ ᠵᠢᠯ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠪᠦᠬᠦ ᠠᠮᠢᠲᠠᠨ ᠤ᠋ ᠰᠢᠨᠵᠢ ᠶ᠋ᠢ ᠴᠥᠮ ᠢ᠋ ᠪᠡᠶᠡ ᠳ᠋ᠡᠭᠡᠨ ᠠᠬᠢᠭᠤᠯᠤᠭᠰᠠᠨ ᠪᠠᠢᠳᠠᠭ ᠠᠵᠠᠢ᠃
ᠤᠭ ᠰᠢᠨᠵᠢ ᠨᠢ ᠂ᠬᠤᠯᠤᠭᠠᠨᠠ ᠴᠢᠬᠢ ᠲᠡᠢ᠂ ᠦᠬᠡᠷ ᠭᠡᠳᠡᠰᠦ ᠲᠡᠢ᠂ ᠪᠠᠷᠰ ᠲᠠᠪᠠᠭ ᠲᠠᠢ᠂ ᠲᠠᠤᠯᠠᠢ ᠬᠠᠮᠠᠷ ᠲᠠᠢ᠂ ᠯᠤᠤ ᠪᠡᠶᠡ ᠲᠡᠢ᠂ ᠮᠣᠭᠠᠢ ᠨᠢᠳᠦ ᠲᠡᠢ᠂ ᠮᠣᠷᠢᠨ ᠳᠡᠯ ᠲᠡᠢ᠂ ᠬᠣᠨᠢᠨ ᠨᠣᠣᠰᠣ ᠲᠠᠢ᠂ ᠪᠡᠴᠢᠨ ᠪᠦᠬᠦ ᠲᠡᠢ᠂ ᠲᠠᠬᠢᠶᠠᠨ ᠥᠷᠪᠥᠢᠯᠭᠡ ᠲᠡᠢ᠂ ᠨᠣᠬᠠᠢ ᠭᠤᠶᠠ ᠲᠠᠢ᠂ ᠭᠠᠬᠠᠢ ᠰᠡᠭᠦᠯ ᠲᠡᠢ ᠶᠤᠮᠰᠠᠨᠵᠠᠢ᠃
ᠦᠰᠦᠭ ᠬᠠᠳᠠᠭᠴᠢ᠄ ᠵᠢᠷᠠᠨᠲᠠᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠤᠭᠠᠨᠵᠢᠳ
ᠬᠢᠨᠠᠭᠴᠢ᠄ ᠮᠡᠷᠭᠡᠨᠪᠢᠯᠢᠭ