ᠦᠯᠢᠭᠡᠷ ᠶᠠᠷᠢᠭᠰᠠᠨ ᠨᠢҮлгэрярьсан нь
2484ᠦᠯᠢᠭᠡᠷ ᠶᠠᠷᠢᠭᠰᠠᠨ ᠨᠢ
ᠣᠯᠠᠨ ᠢ᠋ ᠬᠡᠰᠦᠵᠦ
ᠣᠯᠣᠭᠠᠢ ᠪᠠᠨ ᠳᠦᠭᠦᠷᠭᠡᠳᠡᠭ
ᠲᠦᠮᠡᠨ ᠢ᠋ ᠬᠡᠰᠦᠵᠦ
ᠲᠡᠩᠭᠡᠷᠴᠡᠭ ᠢ᠋ᠶ᠋ᠡᠨ ᠳᠦᠭᠦᠷᠭᠡᠳᠡᠭ ᠲᠡᠨᠦᠮᠡᠯ ᠪᠠᠳᠢᠷᠴᠢᠨ ᠯᠠᠮᠠ ᠪᠠᠢᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠬᠡᠭᠡᠷᠡ ᠪᠡᠷ ᠭᠡᠷ ᠬᠢᠵᠦ ᠬᠡᠴᠡ ᠪᠡᠷ ᠳᠡᠷᠡ ᠬᠢᠵᠦ ᠶᠠᠪᠤᠭᠠᠳ ᠨᠢᠭᠡ ᠠᠢᠯ ᠬᠠᠷᠠᠭᠳᠠᠬᠤ ᠪᠠᠷ ᠨᠢ ᠰᠠᠢᠬᠠᠨ ᠭᠡᠳᠡᠰᠦ ᠭᠠᠷᠴᠤ ᠤᠨᠲᠠᠵᠤ ᠠᠮᠠᠷᠠᠬᠤ ᠪᠠᠷ ᠰᠢᠢᠳᠦᠭᠡᠳ ᠶᠠᠪᠤᠭᠠᠳ ᠣᠴᠢᠵᠠᠢ᠃ ᠭᠡᠲᠡᠯᠡ ᠲᠡᠷᠡ ᠠᠢᠯ ᠤ᠋ᠨ ᠬᠢᠨ《 ᠦᠯᠢᠭᠡᠷ ᠶᠠᠷᠢᠵᠤ ᠥᠭᠪᠡᠯ ᠤᠨᠲᠠᠭᠤᠯᠤᠨᠠ᠂ ᠡᠰᠡ ᠶᠠᠷᠢᠵᠤ ᠦᠭᠪᠡᠰᠦ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠨᠠ》 ᠭᠡᠮᠡᠨ ᠬᠠᠲᠠᠭᠤ ᠦᠭᠡ ᠬᠡᠯᠡᠵᠦ ᠭᠡᠨᠡ᠃
ᠪᠡᠯᠡᠨ ᠠᠮᠠᠲᠤ ᠪᠠᠳᠢᠷᠴᠢᠨ ᠤᠤᠬᠠᠢ ᠶ᠋ᠢᠨ ᠲᠠᠰᠤ《 ᠰᠥᠨᠢᠵᠢᠨ ᠰᠠᠢᠬᠠᠨ ᠦᠯᠢᠭᠡᠷ ᠶᠠᠷᠢᠵᠤ ᠥᠭᠭᠦᠨᠡ ᠰᠢᠦ》 ᠭᠡᠵᠦ ᠠᠮᠠᠯᠠᠭᠠᠳ ᠲᠡᠳᠡᠨ ᠦ᠌ ᠳ᠋ᠦ᠍ ᠰᠠᠢᠬᠠᠨ ᠬᠣᠭᠣᠯᠠ ᠴᠠᠢ ᠬᠢᠯᠭᠡᠵᠦ ᠠᠮᠠᠷᠠᠵᠤ ᠲᠤᠬᠠᠯᠠᠵᠤ ᠰᠠᠭᠤᠪᠠ᠃
ᠲᠡᠭᠡᠵᠦ ᠪᠠᠢᠲᠠᠯᠠ ᠦᠳᠡᠰᠢ ᠴᠦ᠍ ᠪᠣᠯᠵᠤ ᠠᠢᠯ ᠤ᠋ᠨ ᠤᠯᠤᠰ《 ᠪᠠᠳᠢᠷᠴᠢᠨ ᠭᠤᠸᠠᠢ᠂ ᠦᠯᠢᠭᠡᠷ ᠢ᠋ᠶ᠋ᠡᠨ ᠡᠬᠢᠯᠡᠬᠦ ᠦᠭᠡᠢ ᠤᠤ》 ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠪᠡᠷ《 ᠣᠷᠣᠨ ᠳ᠋ᠤ᠌ ᠪᠠᠨ ᠣᠷᠣᠭᠠᠳ ᠡᠬᠢᠯᠡᠶᠡ᠂ ᠣᠯᠠᠨ ᠰᠠᠢᠬᠠᠨ ᠦᠯᠢᠭᠡᠷ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠢᠨᠠ》 ᠭᠡᠵᠦ ᠭᠡᠨᠡ᠃ ᠲᠡᠳᠡ ᠪᠠᠳᠢᠷᠴᠢᠨ ᠳ᠋ᠤ᠌ ᠰᠠᠢᠬᠠᠨ ᠣᠷᠣ ᠵᠠᠰᠠᠵᠤ ᠥᠭᠭᠦᠭᠡᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠣᠷᠣᠨ ᠳ᠋ᠤ᠌ ᠪᠠᠨ ᠣᠷᠣᠵᠤ ᠬᠡᠪᠲᠡᠵᠡᠢ᠃《 ᠣᠳᠣ ᠦᠯᠢᠭᠡᠷ ᠢ᠋ᠶ᠋ᠡᠨ ᠡᠬᠢᠯᠡᠶᠡ》 ᠭᠡᠲᠡᠯᠡ ᠪᠠᠳᠢᠷᠴᠢᠨ᠂
— ᠤᠷᠢᠳ ᠪᠢ ᠴᠠᠭ ᠤ᠋ᠨ ᠰᠠᠢᠬᠠᠨ ᠵᠤᠨ ᠤ᠋ ᠳᠡᠯᠭᠡᠷ ᠲᠦ᠍᠂ ᠽᠠᠨᠳᠠᠨ ᠵᠣᠣ ᠣᠷᠣᠳᠠᠭ ᠵᠠᠮ ᠢ᠋ᠶ᠋ᠠᠷ ᠵᠠᠩᠬᠠᠭ ᠵᠠᠩᠬᠠᠭ ᠭᠡᠳ ᠠᠯᠬᠤᠵᠤ ᠶᠠᠪᠤᠲᠠᠯᠠ ᠭᠡᠬᠦ ᠳ᠋ᠦ᠍᠂
— ᠵᠠ ᠲᠡᠭᠡᠭᠡᠳ ᠭᠡᠮᠡᠨ ᠤᠯᠤᠰ ᠤᠤᠬᠠᠢᠯᠠᠵᠠᠢ᠃
— ᠵᠠᠮ ᠤ᠋ᠨ ᠬᠠᠵᠠᠭᠤ ᠪᠠᠷ ᠽᠠᠨᠳᠠᠨ ᠴᠤ᠌ ᠤᠷᠭᠤᠭᠰᠠᠨ ᠪᠠᠢᠬᠤ ᠶᠤᠮ᠂ ᠵᠠᠮᠪᠠᠭᠠ ᠴᠤ᠌ ᠤᠷᠭᠤᠭᠰᠠᠨ ᠪᠠᠢᠬᠤ ᠶᠤᠮ᠃
— ᠽᠠᠮᠪᠤᠲᠢᠪ ᠭᠡᠳᠡᠭ ᠮᠥᠨ ᠰᠠᠢᠬᠠᠨ ᠠ᠋ ᠭᠡᠳ ᠪᠠᠳᠢᠷᠴᠢᠨ ᠲᠠᠭ ᠳᠤᠭᠤᠢ ᠪᠤᠯᠬᠤᠢ ᠳ᠋ᠤ᠌᠂
— ᠵᠠ ᠲᠡᠭᠡᠭᠡᠳ ᠴᠢᠨᠠᠭᠰᠢ ᠨᠢ ᠰᠣᠨᠢᠷᠬᠠᠨ ᠳᠠᠭᠤ ᠠᠯᠳᠠᠬᠤ ᠳ᠋ᠤ᠌ ᠪᠠᠳᠢᠷᠴᠢᠨ᠂
— ᠵᠠᠯᠠᠭᠤ ᠪᠠᠢᠬᠤ ᠳ᠋ᠤ᠌ ᠮᠥᠨ ᠴᠦ᠍ ᠲᠣᠮᠣᠭᠠ ᠦᠭᠡᠢ ᠪᠠᠢᠵᠤ ᠳᠠ ᠭᠡᠳ ᠪᠠᠰᠠ ᠯᠠ ᠠᠵᠢᠨ ᠳᠥᠵᠢᠨ ᠪᠣᠯᠵᠠᠢ᠃
— ᠲᠡᠭᠡᠭᠡᠳ ᠲᠡᠭᠡᠭᠡᠳ ᠭᠡᠮᠡᠨ ᠤᠯᠤᠰ ᠠᠮᠠ ᠪᠤᠯᠢᠶᠠᠯᠳᠤᠬᠤᠢ ᠳ᠋ᠤ᠌᠂
— ᠵᠠᠮ ᠳᠠᠭᠠᠭᠠᠳ ᠶᠠᠪᠤᠭᠠᠳ ᠯᠠ ᠪᠠᠢᠯᠠ᠂ ᠶᠠᠪᠤᠭᠠᠳ ᠯᠠ ᠪᠠᠢᠯᠠ ᠭᠡᠵᠦ ᠠᠮᠠ ᠶ᠋ᠢ ᠨᠢ ᠲᠠᠭᠯᠠᠪᠠ᠃
— ᠵᠠ ᠲᠡᠭᠡᠭᠡᠳ ᠶᠠᠭᠠᠬᠢᠭᠰᠠᠨ ᠪᠣᠢ ᠭᠡᠮᠡᠨ ᠤᠯᠤᠰ ᠲᠡᠪᠴᠢᠶᠡᠷᠢ ᠠᠯᠳᠠᠬᠤ ᠳ᠋ᠤ᠌᠂
— ᠵᠠ ᠲᠡᠭᠡᠲᠡᠯᠡ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠨᠢᠭᠡ ᠭᠣᠵᠣᠢᠭᠰᠠᠨ ᠰᠢᠷᠠ ᠶᠠᠭᠤᠮᠠ ᠭᠠᠷᠤᠭᠠᠳ ᠢᠷᠡᠯᠡ ᠰᠢᠦ ᠭᠡᠳ ᠪᠠᠳᠢᠷᠴᠢᠨ ᠪᠠᠰᠠ ᠯᠠ ᠠᠨᠢᠷ ᠭᠦᠮ ᠪᠣᠯᠤᠯᠠ᠃
— ᠶᠠᠭᠤ ᠪᠣᠢ ᠲᠡᠷᠡ ᠴᠢᠨᠢ ᠭᠡᠵᠦ ᠤᠯᠤᠰ ᠤ᠋ᠨ ᠳᠠᠭᠤ ᠴᠢᠩᠭᠠᠷᠠᠭᠠᠳ ᠢᠷᠡᠬᠦᠢ ᠳ᠋ᠦ᠍᠂
— ᠵᠠ᠂ ᠵᠠ ᠶᠠᠭᠤ ᠪᠠᠢᠳᠠᠭ ᠶᠤᠮ ᠪᠣᠢ᠂ ᠵᠤᠷᠠᠮᠠ ᠯᠠ ᠪᠠᠢᠬᠤ ᠦᠭᠡᠢ ᠤᠤ! ᠲᠡᠭᠡᠭᠡᠳ ᠨᠦᠬᠡᠨ ᠳ᠋ᠦ᠍ ᠪᠡᠨ ᠡᠷᠭᠢᠭᠡᠳ ᠰᠢᠷᠭᠤᠭᠠ ᠯᠠ ᠪᠢᠵᠡ ᠳᠡ᠂ ᠵᠤᠨ ᠤ᠋ ᠰᠥᠨᠢ ᠪᠣᠭᠣᠨᠢ ᠭᠡᠳᠡᠭ ᠢ᠋ ᠲᠠ ᠨᠠᠷ ᠶᠠᠭᠤ ᠡᠰᠡ ᠠᠨᠳᠠᠬᠤ ᠪᠣᠢ᠂ ᠵᠠ ᠣᠳᠣ ᠲᠦᠷᠭᠡᠨ ᠤᠨᠲᠠᠵᠠᠭᠠᠶᠠ ᠭᠡᠳ ᠪᠠᠳᠢᠷᠴᠢᠨ ᠭᠡᠷ ᠳᠣᠷᠭᠢᠲᠠᠯᠠ ᠳᠡᠭᠡᠪᠦᠷ ᠭᠦᠪᠦᠯᠵᠡᠲᠡᠯᠡ ᠬᠤᠷᠬᠢᠷᠠᠵᠤ ᠭᠠᠷᠴᠤ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠦᠩᠭᠠᠷ