ᠰᠢᠷᠭᠠ ᠠᠳᠤᠭᠤᠨ ᠤ᠋ ᠮᠠᠭᠲᠠᠭᠠᠯ -ᠠᠨᠠᠷШарга адууны магтаал-Анар
1432ᠰᠢᠷᠭᠠ ᠠᠳᠤᠭᠤᠨ ᠤ᠋ ᠮᠠᠭᠲᠠᠭᠠᠯ
ᠵᠠ!
ᠡᠩᠬᠡ ᠰᠠᠢᠨ ᠵᠢᠷᠭᠠᠯᠠᠩ ᠪᠣᠯᠲᠤᠭᠠᠢ
ᠥᠷᠭᠡᠨ ᠳᠡᠯᠡᠬᠡᠢ ᠶ᠋ᠢᠨ ᠵᠠᠶ᠋ᠢᠴᠠᠨ ᠳ᠋ᠤ᠌
ᠥᠪᠡᠷᠮᠢᠴᠡ ᠲᠡᠦᠬᠡ ᠪᠡᠨ ᠪᠦᠲᠦᠭᠡᠭᠰᠡᠨ
ᠥᠨᠢᠷ ᠣᠯᠠᠨ ᠤ᠋ ᠪᠠᠨ ᠳᠤᠮᠳᠠ
ᠥᠪᠡᠷ ᠦ᠋ᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠠᠮᠢᠳᠤᠷᠠᠭᠰᠠᠨ
ᠦᠵᠦᠮ ᠦ᠋ᠨ ᠰᠦᠮᠪᠦᠷ ᠠᠭᠤᠯᠠᠨ ᠡᠴᠡ ᠪᠡᠨ
ᠦᠨᠳᠦᠰᠦ ᠨᠠᠮᠠᠭᠠ ᠵᠠᠯᠭᠠᠭᠰᠠᠨ
ᠦᠷᠡ ᠬᠣᠶ᠋ᠢᠴᠢᠰ ᠵᠤᠯᠵᠠᠭᠠ ᠨᠤᠭᠤᠳ ᠨᠢ
ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠡᠨ ᠳᠡᠯᠭᠡᠷᠡᠭᠰᠡᠨ
ᠲᠠᠯᠠ ᠶ᠋ᠢᠨ ᠮᠠᠯᠴᠢᠨ ᠠᠯᠳᠠᠷ ᠢ᠋ᠶ᠋ᠠᠨ
ᠠᠷᠪᠢᠴᠢ ᠰᠤᠷᠲᠠᠯ ᠢ᠋ᠶ᠋ᠠᠷ ᠡᠷᠭᠦᠭᠰᠡᠨ
ᠲᠠᠩᠰᠤᠭ ᠠᠮᠢᠳᠤᠷᠠᠯ ᠤ᠋ᠨ ᠳᠥᠷᠦᠭᠡᠨ ᠳᠡᠭᠡᠷᠡ
ᠠᠵᠢᠯᠴᠢ ᠰᠢᠷᠭᠠᠭᠤ ᠪᠠᠷ ᠥᠨᠳᠡᠢᠭᠰᠡᠨ
ᠬᠡᠰᠢᠭᠲᠦ ᠲᠠᠪᠤᠨ ᠰᠦᠷᠦᠭ ᠦ᠋ᠨ ᠢ᠋ᠶ᠋ᠡᠨ
ᠦᠯᠡᠮᠵᠢ ᠶ᠋ᠢᠨ ᠪᠤᠶᠠᠨ ᠢ᠋ ᠴᠣᠭᠴᠠᠯᠠᠭᠰᠠᠨ
ᠬᠡᠢᠮᠣᠷᠢᠲᠤ ᠰᠢᠷᠭᠠ ᠠᠳᠤᠭᠤᠨ ᠤ᠋ ᠪᠠᠨ
ᠥᠯᠵᠡᠢ ᠳᠡᠮᠪᠡᠷᠡᠢ ᠶ᠋ᠢ ᠳᠠᠯᠠᠯᠤᠭᠰᠠᠨ
ᠵᠡᠭᠦᠨ ᠦᠵᠦᠮᠦᠴᠢᠨ ᠦ᠌ ᠮᠠᠯᠴᠢᠳ ᠭᠡᠵᠦ
ᠵᠢᠷ ᠦ᠋ᠨ ᠪᠤᠰᠤ ᠬᠥᠮᠦᠰ ᠶᠤᠮ
ᠵᠢᠳᠬᠦᠯ ᠴᠢᠷᠮᠠᠶ᠋ᠢᠯᠭᠠ ᠪᠠᠨ ᠭᠠᠷᠭᠠᠭᠰᠠᠨ
ᠵᠦᠩ ᠪᠢᠯᠢᠭ ᠲᠡᠢ ᠲᠦᠮᠡᠨ ᠶᠤᠮ᠃
ᠬᠣᠷᠸᠠ ᠳ᠋ᠤ᠌ ᠠᠯᠳᠠᠷ ᠢ᠋ ᠨᠢ ᠮᠥᠩᠬᠡᠯᠡᠭᠰᠡᠨ
ᠬᠣᠩᠭᠣᠷ ᠰᠢᠷᠭᠠ ᠠᠳᠤᠭᠤ ᠲᠠᠢ ᠶᠤᠮ
ᠬᠣᠲᠠᠯᠠ ᠳᠠᠶᠠᠭᠠᠷ ᠲᠤ᠌ ᠳᠠᠭᠤᠷᠢᠰᠬᠤ
ᠬᠣᠪᠣᠷᠬᠠᠨ ᠪᠢᠴᠢᠭᠳᠡᠬᠦ ᠰᠤᠳᠤᠷ ᠲᠠᠢ ᠶᠤᠮ᠃
ᠲᠡᠨᠢᠭᠡᠷ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ
ᠨᠠᠷᠠᠨ ᠲᠠᠯᠠ ᠡᠴᠡ ᠡᠭᠦᠰᠦᠯ ᠲᠡᠢ
ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠤ᠋ᠨ
ᠨᠠᠢ᠍ᠮᠠᠨ ᠰᠢᠷᠭᠠ ᠡᠴᠡ ᠤᠭᠰᠢᠯ ᠲᠠᠢ
ᠵᠢᠷᠭᠠᠯᠠᠩᠲᠤ ᠨᠠᠢ᠍ᠮᠠᠨ ᠠᠵᠢᠨᠠᠢ ᠶ᠋ᠢᠨ
ᠬᠣᠩᠭᠣᠷ ᠮᠣᠷᠢᠨ ᠤ᠋ ᠤᠳᠤᠮ ᠲᠠᠢ
ᠵᠠᠶᠠᠭᠠ ᠨᠢᠭᠡᠲᠡᠢ ᠲᠦᠮᠡᠨ ᠳ᠋ᠡᠭᠡᠨ
ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠤᠯᠪᠠᠭᠠ ᠲᠠᠢ
ᠠᠶᠠᠨ ᠲᠡᠢᠨ ᠦ᠌ ᠤᠨᠤᠭᠠ ᠪᠠᠢᠨᠠᠮ
ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠬᠥᠷᠥᠩᠭᠡ ᠪᠠᠢᠨᠠᠮ
ᠠᠩ ᠭᠥᠷᠦᠭᠡᠨ ᠦ᠌ ᠭᠠᠨᠵᠤᠭᠠ ᠪᠠᠢᠨᠠᠮ
ᠠᠴᠢᠯᠭᠠ ᠵᠥᠭᠡᠭᠡᠪᠦᠷᠢ ᠶ᠋ᠢᠨ ᠬᠥᠯᠦᠰᠢ ᠪᠠᠢᠨᠠᠮ
ᠡᠷᠡᠯᠬᠡᠭ ᠳᠠᠶ᠋ᠢᠴᠢᠳ ᠤ᠋ᠨ ᠬᠦᠯᠦᠭ ᠪᠠᠢᠨᠠᠮ
ᠡᠷᠡᠮᠡᠬᠡᠢ ᠬᠥᠪᠡᠭᠦᠳ ᠦ᠋ᠨ ᠵᠢᠭᠦᠷ ᠪᠠᠢᠨᠠᠮ
ᠡᠷᠡ ᠬᠥᠮᠦᠨ ᠦ᠌ ᠵᠣᠷᠢᠭ ᠪᠠᠢᠨᠠᠮ
ᠡᠷᠳᠡᠮ ᠲᠡᠢ ᠬᠥᠮᠦᠨ ᠦ᠌ ᠵᠢᠷᠤᠭ ᠪᠠᠢᠨᠠᠮ ᠠ᠋᠃
ᠬᠠᠩᠭᠠᠢ ᠭᠣᠪᠢ ᠪᠠᠨ ᠳᠦᠭᠦᠷᠭᠡᠭᠡᠳ
ᠬᠠᠪᠤᠷ ᠤ᠋ᠨ ᠴᠠᠭ ᠲᠠᠭᠠᠨ ᠦᠷᠡᠵᠢᠩᠬᠡᠨ
ᠬᠠᠷᠢᠭᠤᠯᠵᠤ ᠮᠠᠯᠵᠢᠭᠰᠠᠨ ᠡᠵᠡᠨ ᠦ᠌ ᠬᠢᠨᠢ
ᠬᠠᠷᠢᠭᠤᠴᠠᠯᠭᠠ ᠡᠭᠦᠷᠭᠡ ᠨᠢ ᠬᠦᠨᠳᠦᠬᠡᠨ
ᠵᠤᠰᠠᠭᠠᠯ ᠤ᠋ᠨ ᠳᠡᠨᠵᠢᠨ ᠳ᠋ᠦ᠍ ᠰᠡᠷᠢᠭᠦᠴᠡᠭᠡᠳ
ᠵᠤᠨ ᠤ᠋ ᠰᠥᠨᠢ ᠢᠳᠡᠰᠢᠯᠡᠭᠰᠡᠨ
ᠵᠢᠷᠤᠭ ᠤ᠋ᠨ ᠪᠠᠢᠭᠠᠯᠢ ᠪᠠᠨ ᠴᠢᠮᠡᠭᠯᠡᠭᠡᠳ
ᠬᠥᠷᠥᠭ ᠦ᠋ᠨ ᠶᠤᠮ ᠰᠢᠭ ᠬᠠᠷᠠᠭᠳᠠᠭᠰᠠᠨ
ᠨᠠᠯᠠᠵᠤ ᠵᠤᠤᠯᠠᠵᠤ ᠬᠥᠷᠪᠡᠭᠡᠳ
ᠨᠠᠮᠤᠷ ᠤ᠋ᠨ ᠭᠣᠪᠢ ᠳ᠋ᠤ᠌ ᠪᠠᠨ ᠥᠶᠥᠭᠬᠡᠨ
ᠨᠠᠷᠠ ᠬᠤᠷᠠ ᠲᠠᠢ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ
ᠨᠠᠪᠴᠢ ᠨᠠᠮᠠᠭᠠ ᠪᠠᠷ ᠬᠣᠭᠣᠯᠠᠯᠠᠭᠰᠠᠨ
ᠤᠨᠠᠭᠠ ᠰᠠᠷᠪᠠ ᠨᠢ ᠲᠣᠭᠯᠠᠯᠳᠤᠭᠠᠳ
ᠡᠪᠦᠯ ᠦ᠋ᠨ ᠲᠠᠯᠠ ᠳ᠋ᠤ᠌ ᠪᠠᠨ ᠦᠯᠴᠢᠷᠬᠡᠨ
ᠤᠷᠤᠭᠤᠳᠠᠬᠤ ᠰᠢᠭᠤᠷᠭᠠᠨ ᠢ᠋ ᠰᠥᠷᠦᠭᠡᠳ
ᠥᠩᠭᠡ ᠭᠡᠷᠡᠯ ᠨᠢ ᠪᠠᠳᠠᠷᠠᠩᠬᠠᠨ᠂᠂᠂
ᠠᠢᠷᠠᠭ ᠰᠦ ᠰᠢᠭ ᠴᠠᠭᠠᠨ ᠰᠢᠷᠭᠠ
ᠠᠷᠠᠨᠵᠠᠯ ᠭᠠᠯ ᠰᠢᠭ᠋ ᠤᠯᠠᠭᠠᠨ ᠰᠢᠷᠭᠠ
ᠠᠶᠠᠯᠭᠤᠲᠤ ᠯᠢᠩᠪᠦ ᠰᠢᠭ ᠬᠤᠯᠤᠰᠤᠨ ᠰᠢᠷᠭᠠ
ᠠᠮᠠᠷᠠᠭ ᠰᠡᠳᠬᠢᠯ ᠰᠢᠭ ᠬᠣᠩᠭᠣᠷ ᠰᠢᠷᠭᠠ
ᠮᠠᠩᠨᠠᠢ ᠳᠤᠮᠳᠠ ᠪᠠᠨ ᠰᠠᠷᠠ ᠲᠠᠢ ᠰᠢᠷᠭᠠ
ᠮᠠᠨᠢᠲᠤ ᠶ᠋ᠢᠨ ᠬᠤᠰᠤ ᠰᠢᠭ᠋ ᠤᠢᠰᠤᠨ ᠰᠢᠷᠭᠠ
ᠮᠠᠷᠠᠯ ᠮᠡᠴᠢᠳ ᠰᠢᠭ ᠴᠣᠬᠣᠷ ᠰᠢᠷᠭᠠ
ᠮᠠᠩᠬᠠᠢᠬᠤ ᠦᠷ ᠰᠢᠭ ᠬᠠᠯᠢᠭᠤᠨ ᠰᠢᠷᠭᠠ᠂᠂᠂᠂
ᠠᠷᠠᠳ ᠤ᠋ᠨ ᠳᠠᠭᠤᠨ ᠤ᠋ ᠵᠢᠭᠠᠬᠠᠨ ᠰᠢᠷᠭᠠ
ᠠᠲᠠᠷ ᠤ᠋ᠨ ᠰᠢᠪᠠᠭᠤᠨ ᠤ᠋ ᠥᠨᠳᠡᠭᠡᠨ ᠰᠢᠷᠭᠠ
ᠠᠯᠲᠠᠨ ᠨᠠᠮᠤᠷ ᠤ᠋ᠨ ᠵᠡᠭᠡᠷᠡ ᠶ᠋ᠢᠨ ᠰᠢᠷᠭᠠ᠂᠂᠂
ᠠᠭᠯᠠᠭ ᠭᠣᠪᠢ ᠶ᠋ᠢᠨ ᠬᠤᠯᠠᠨ ᠰᠢᠷᠭᠠ᠂᠂᠂᠂
ᠭᠠᠯᠳᠠᠨ ᠬᠠᠭᠠᠨ ᠤ᠋ ᠠᠯᠲᠠᠨ ᠰᠢᠷᠭᠠ
ᠭᠠᠯ ᠳ᠋ᠤ᠌ ᠰᠡᠲᠡᠷᠯᠡᠭᠰᠡᠨ ᠣᠩᠭᠣᠨ ᠰᠢᠷᠭᠠ
ᠰᠦᠪᠡᠭᠡᠲᠠᠢ ᠪᠠᠭᠠᠲᠤᠷ ᠤ᠋ᠨ ᠠᠮᠢᠨ ᠰᠢᠷᠭᠠ
ᠰᠦᠷᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠵᠢᠯᠬᠡᠨ
ᠵᠢᠰᠦᠮ ᠨᠢ ᠰᠢᠷᠭᠠ
ᠠᠯᠢᠶᠠ ᠰᠢᠷᠭᠠ᠂ ᠭᠠᠩᠭᠠᠩ ᠰᠢᠷᠭᠠ
ᠠᠭᠰᠤᠮ ᠰᠢᠷᠭᠠ᠂ ᠨᠣᠮᠣᠬᠠᠨ ᠰᠢᠷᠭᠠ
ᠣᠷᠣᠭᠠ ᠰᠢᠷᠭᠠ᠂ ᠵᠢᠷᠣᠭᠠ ᠰᠢᠷᠭᠠ
ᠤᠷᠤᠯᠳᠤᠭᠠᠨ ᠤ᠋ ᠰᠢᠷᠭᠠ ᠂ᠤᠷᠭᠠᠨ ᠤ᠋ ᠰᠢᠷᠭᠠ ᠭᠡᠳ
ᠥᠭᠡᠳᠡᠩ ᠰᠦᠷᠲᠦ᠂ ᠪᠣᠰᠤᠭᠠ ᠲᠠᠯᠲᠤ
ᠥᠰᠥᠭᠡᠢ ᠴᠠᠭᠠᠨ᠂ ᠥᠨᠳᠥᠷ ᠪᠣᠷᠪᠢᠲᠤ
ᠵᠥᠪ ᠡᠷᠭᠢᠯᠭᠡᠲᠦ᠂ ᠵᠢᠭᠦᠷ ᠳᠠᠯᠠᠪᠴᠢᠲᠤ
ᠵᠢᠳᠬᠦᠭᠦᠦ ᠭᠦᠶᠦᠳᠡᠯᠲᠦ᠂ ᠵᠥᠭᠡᠯᠡᠨ ᠶᠠᠪᠤᠲᠠᠯᠳᠤ
ᠠᠯᠬᠤᠳᠠᠭ᠂ ᠬᠠᠲᠠᠷᠢᠳᠠᠭ᠂ ᠶᠥᠷᠬᠥᠳᠡᠭ ᠭᠡᠳ
ᠠᠮᠤᠭᠤᠯᠠᠩ ᠂ ᠣᠮᠣᠭᠣᠯᠠᠩ᠂ ᠵᠢᠪᠬᠤᠯᠠᠩ ᠭᠡᠳ
ᠠᠳᠤᠭᠤ ᠨᠢ ᠰᠢᠷᠭᠠ ᠦᠵᠦᠮᠦᠴᠢᠨ ᠢ᠋ ᠪᠡᠨ
ᠠᠶᠠᠯᠠᠭᠤᠯᠤᠨ ᠮᠠᠭᠲᠠᠵᠤ ᠳᠠᠭᠤᠯᠠᠶᠠ
ᠰᠢᠷᠭᠠᠭᠤ ᠵᠢᠳᠬᠦᠯ ᠦ᠋ᠨ ᠬᠠᠷᠢᠭᠤ ᠶ᠋ᠢ ᠨᠢ
ᠰᠠᠢᠰᠢᠶᠠᠵᠤ ᠡᠨᠳᠡ ᠡᠴᠡ ᠳᠠᠭᠤᠳᠠᠶᠠ
ᠰᠢᠷᠭᠠ ᠠᠳᠤᠭᠤᠨ ᠤ᠋ ᠪᠠᠨ ᠠᠯᠳᠠᠷ ᠢ᠋
ᠱᠠᠭᠰᠢᠵᠤ ᠡᠨᠳᠡ ᠳᠠᠭᠤᠷᠢᠰᠬᠠᠶᠠ!
ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠠᠯᠳᠠᠷᠰᠢᠭᠤᠯᠤᠭᠠᠳ
ᠰᠢᠷᠭᠠ ᠠᠳᠤᠭᠤ ᠨᠢ ᠦᠷᠡᠵᠢᠵᠦ ᠪᠠᠢᠭ ᠠ᠋
ᠬᠣᠲᠠᠯᠠ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠪᠠᠶᠠᠰᠬᠠᠭᠠᠳ
ᠱᠠᠯᠠᠮᠠᠭᠤᠨ ᠦᠢᠯᠡᠰ ᠨᠢ ᠮᠠᠨᠳᠤᠵᠤ ᠪᠠᠢᠭ ᠠ᠋!
ᠦᠵᠦᠮᠦᠴᠢᠨ ᠳᠠᠶᠠᠭᠠᠷ ᠥᠯᠵᠡᠢᠲᠡᠢ ᠪᠣᠯᠲᠤᠭᠠᠢ!
ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠤ᠋ ᠪᠠᠬᠠᠷᠬᠠᠯ ᠪᠣᠯᠲᠤᠭᠠᠢ!
ᠦᠨᠡᠨ ᠮᠥᠨ ᠦ᠌ ᠥᠪ ᠲᠡᠢ ᠪᠣᠯᠲᠤᠭᠠᠢ!
ᠡᠭᠦᠷᠢᠳᠡ ᠪᠠᠳᠠᠷᠠᠬᠤ ᠶ᠋ᠢᠨ ᠬᠡᠢᠮᠣᠷᠢ ᠲᠠᠢ ᠪᠣᠯᠲᠤᠭᠠᠢ!
ᠤᠩᠰᠢᠬᠴᠢ᠄ ᠠᠨᠠᠷ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠽᠢᠶᠠ
ᠦᠰᠦᠭ ᠬᠠᠳᠠᠭᠴᠢ᠄ ᠥᠨᠢᠮᠦ᠋ᠩᠬᠡ
ᠬᠢᠨᠠᠭᠴᠢ᠄ ᠠᠯᠲᠠᠨᠴᠡᠴᠡᠭ