ᠠᠯᠲᠠ ᠮᠥᠩᠭᠥ ᠪᠣᠯ ᠴᠢᠯᠠᠭᠤ ᠠᠷᠪᠠᠢ ᠪᠤᠭᠤᠳᠠᠢ ᠪᠣᠯ ᠠᠮᠢᠳᠤᠷᠠᠯАлд мөнгө бол чулууАрвай боодой бол амьдрал
3130ᠠᠯᠲᠠ ᠮᠥᠩᠭᠥ ᠪᠣᠯ ᠴᠢᠯᠠᠭᠤ ᠠᠷᠪᠠᠢ ᠪᠤᠭᠤᠳᠠᠢ ᠪᠣᠯ ᠠᠮᠢᠳᠤᠷᠠᠯ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠭᠡᠨᠡ᠂ ᠰᠦᠨ ᠳᠠᠯᠠᠢ ᠶ᠋ᠢ ᠱᠠᠯᠪᠠᠭ ᠪᠠᠢᠬᠤ ᠶ᠋ᠢᠨ ᠴᠠᠭ ᠲᠤ᠌ ᠭᠡᠨᠡ᠃ ᠰᠦᠮᠪᠦᠷ ᠠᠭᠤᠯᠠ ᠶ᠋ᠢ ᠳᠣᠪᠣ ᠪᠠᠢᠬᠤ ᠶ᠋ᠢᠨ ᠴᠠᠭ ᠲᠤ᠌ ᠭᠡᠨᠡ᠃
ᠡᠨᠡ ᠽᠠᠮᠪᠤᠯᠢᠩ ᠤ᠋ᠨ ᠣᠷᠣᠨ ᠳ᠋ᠤ᠌ ᠰᠢᠨᠤᠯ ᠶᠡᠬᠡᠳᠡ ᠨᠢᠭᠡᠨ ᠬᠠᠭᠠᠨ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠬᠠᠭᠠᠨ ᠠᠯᠠᠭ ᠬᠣᠷᠸᠠ ᠳ᠋ᠤ᠌ ᠠᠯᠲᠠ ᠮᠥᠩᠭᠥᠨ ᠡᠴᠡ ᠦᠨᠡᠲᠡᠢ ᠶᠠᠭᠤᠮᠠ ᠦᠭᠡᠢ ᠭᠡᠵᠦ ᠪᠣᠳᠣᠳᠠᠭ ᠶᠤᠮᠰᠠᠨᠵᠠᠢ᠂ ᠠᠯᠠᠭ ᠬᠣᠷᠸᠠ ᠶ᠋ᠢᠨ ᠠᠯᠲᠠ ᠮᠥᠩᠭᠥ ᠪᠦᠬᠦᠨ ᠢ᠋ ᠠᠪᠬᠤ ᠰᠠᠨ᠂ ᠬᠤᠷᠢᠶᠠᠬᠤ ᠰᠠᠨ ᠭᠡᠬᠦ ᠡᠴᠡ ᠡᠳᠦᠷ ᠦ᠋ᠨ ᠪᠣᠳᠣᠯ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠪᠣᠯᠤᠨᠠ᠂ ᠲᠡᠭᠡᠭᠡᠳ ᠠᠯᠪᠠᠲᠤ ᠣᠯᠠᠨ ᠢ᠋ᠶ᠋ᠠᠨ ᠠᠯᠪᠠ ᠭᠤᠪᠴᠢᠭᠤᠷ ᠢ᠋ᠶ᠋ᠠᠷ ᠳᠠᠷᠤᠵᠤ᠂ ᠠᠷᠢᠭᠤᠨ ᠬᠥᠳᠡᠯᠮᠦᠷᠢ ᠪᠡᠷ ᠣᠯᠵᠤ ᠠᠪᠤᠭᠰᠠᠨ ᠠᠯᠲᠠ ᠮᠥᠩᠭᠥ ᠶ᠋ᠢ ᠨᠢ ᠨᠢᠳᠦ ᠦᠵᠡᠲᠡᠯᠡ ᠪᠤᠯᠢᠶᠠᠵᠤ ᠳᠡᠭᠡᠷᠡᠮᠳᠡᠵᠦ ᠡᠬᠢᠯᠡᠵᠡᠢ᠃
ᠠᠪᠤᠭᠠᠳ ᠯᠠ ᠪᠠᠢᠵᠠᠢ᠂ ᠠᠪᠤᠭᠠᠳ ᠯᠠ ᠪᠠᠢᠵᠠᠢ᠂ ᠰᠡᠭᠦᠯ ᠳ᠋ᠦ᠍ ᠪᠡᠨ ᠡᠭᠡᠯ ᠣᠯᠠᠨ ᠤ᠋ ᠭᠠᠷ ᠲᠤ᠌ ᠭᠢᠯᠠᠢᠬᠤ ᠠᠯᠲᠠ᠂ ᠴᠢᠬᠢᠨ ᠳ᠋ᠦ᠍ ᠴᠠᠢᠷᠠᠬᠤ ᠮᠥᠩᠭᠥ ᠦᠭᠡᠢ ᠪᠣᠯᠵᠤ ᠬᠦᠢ ᠪᠡᠷ ᠢ᠋ᠶ᠋ᠡᠨ ᠬᠣᠭᠣᠰᠣᠷᠠᠵᠤ ᠳᠠᠭᠤᠰᠪᠠ ᠭᠡᠨᠡ ᠰᠡᠳᠬᠢᠯ ᠨᠢ ᠬᠠᠨᠤᠭᠰᠠᠨ ᠬᠠᠭᠠᠨᠲᠠᠨ᠂
—ᠮᠥᠩᠭᠥᠨ ᠳᠡᠭᠡᠪᠦᠷ ᠲᠡᠢ᠂ ᠠᠯᠲᠠᠨ ᠲᠤᠭᠤᠷᠭᠠ ᠲᠠᠢ᠂ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤᠨ ᠴᠢᠮᠡᠭ ᠲᠡᠢ᠂ ᠡᠩ ᠦᠭᠡᠢ ᠠᠯᠤᠰ ᠠ᠋ᠴᠠ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠭᠴᠢ ᠰᠠᠢᠬᠠᠨ ᠤᠷᠲᠤ ᠬᠠᠷᠰᠢ ᠪᠠᠷᠢᠲᠤᠭᠠᠢ ᠭᠡᠮᠡᠨ ᠲᠤᠰᠢᠶᠠᠵᠤ ᠭᠡᠨᠡ᠃ ᠭᠡᠲᠡᠯᠡ ᠲᠡᠷᠡ ᠵᠤᠨ ᠨᠤᠲᠤᠭ ᠲᠤ᠌ ᠨᠢ ᠭᠠᠩ ᠭᠠᠴᠢᠭ ᠨᠢᠭᠤᠷᠯᠠᠵᠤ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠭᠠᠯ ᠮᠡᠲᠦ ᠤᠯᠠᠢᠭᠠᠳ ᠤᠰᠤ ᠮᠥᠷᠡᠨ ᠠᠭᠤᠷᠰᠢᠵᠤ ᠤᠷᠭᠤᠮᠠᠯ ᠮᠣᠳᠣ ᠬᠠᠲᠠᠵᠤ ᠠᠮᠢᠲᠠᠨ ᠬᠥᠮᠦᠨ ᠠᠮᠢ ᠲᠡᠮᠡᠴᠡᠨ ᠠᠮᠤᠭᠤᠯᠠᠩ ᠠᠮᠢᠳᠤᠷᠠᠬᠤ ᠶ᠋ᠢ ᠨᠢ ᠪᠤᠤ ᠬᠡᠯᠡ ᠠᠮᠢᠰᠬᠤᠭᠠ ᠠᠪᠬᠤ ᠦᠭᠡᠢ ᠪᠣᠯᠵᠤ ᠭᠡᠨᠡ᠃
ᠡᠭᠡᠯ ᠵᠤᠨ ᠣᠯᠠᠨ ᠡᠢᠮᠦ ᠭᠠᠩ ᠵᠤᠳ ᠦᠵᠡᠬᠦ ᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠪᠣᠯᠤᠭᠰᠠᠨ ᠬᠣᠢᠨᠠ ᠠᠶᠠᠭᠠ ᠪᠤᠳᠠᠭᠠ ᠪᠠᠨ ᠬᠦᠷᠲᠡᠯᠡ ᠨᠥᠭᠡᠵᠦ᠂ ᠨᠢᠭᠡ ᠢᠳᠡᠬᠦ ᠪᠡᠨ ᠬᠣᠶᠠᠷ ᠪᠣᠯᠭᠠᠵᠤ᠂ ᠨᠢᠭᠡ ᠡᠳᠦᠷ ᠭᠠᠩ ᠲᠠᠢᠯᠤᠭᠳᠠᠬᠤ ᠪᠣᠢ ᠭᠡᠮᠡᠨ ᠪᠦᠰᠡ ᠪᠡᠨ ᠴᠢᠩᠭᠠᠯᠠᠵᠤ ᠬᠥᠯᠥᠰᠥ ᠪᠡᠨ ᠠᠷᠴᠢᠭᠰᠠᠭᠠᠷ ᠠᠪᠠᠢ᠃
ᠴᠢᠩᠭᠢᠲᠡᠯᠡ ᠭᠠᠵᠠᠷ ᠬᠣᠪᠬᠠᠢᠷᠠᠭᠤᠯᠤᠭᠰᠠᠨ ᠭᠠᠩ ᠭᠠᠴᠢᠭ ᠪᠦᠷ ᠴᠦ᠍ ᠰᠤᠨᠵᠢᠷᠠᠵᠤ ᠲᠤᠷᠠᠩᠬᠠᠢ ᠲᠥᠯᠥᠭᠡ᠂ ᠬᠡᠪᠡᠭ ᠲᠡᠢ ᠪᠤᠳᠠᠭᠠᠨ ᠤ᠋ ᠦᠨᠡ ᠲᠡᠭᠷᠢ ᠳ᠋ᠦ᠍ ᠬᠠᠲᠠᠯᠠ᠂ ᠲᠠᠷᠠᠭ ᠲᠣ᠌ ᠪᠠᠨ ᠲᠤᠯᠤᠭᠰᠠᠨ ᠲᠦᠮᠡᠨ ᠣᠯᠠᠨ ᠠᠯᠢ ᠪᠠᠢᠳᠠᠭ ᠢ᠋ᠶ᠋ᠠᠨ ᠰᠢᠪᠬᠠᠵᠤ ᠡᠭᠡᠮᠦᠭ ᠪᠥᠭᠡᠵᠢ᠂ ᠳᠡᠪᠡᠯ ᠦ᠋ᠨ ᠮᠥᠩᠭᠥᠨ ᠲᠣᠪᠴᠢ ᠪᠠᠨ ᠬᠦᠷᠲᠡᠯᠡ ᠠᠶᠠᠭᠠᠨ ᠤ᠋ ᠬᠢᠴᠡ ᠪᠡᠷ ᠠᠷᠠᠯᠵᠢᠵᠤ ᠡᠬᠢᠯᠡᠪᠡᠢ᠃
ᠭᠠᠭᠴᠠ ᠬᠣᠮᠣᠬᠠᠢ ᠬᠠᠭᠠᠨ ᠤ᠋ ᠯᠠ ᠨᠠᠷᠠ ᠭᠠᠷᠪᠠ᠃ ᠪᠠᠶᠠᠷᠯᠠᠬᠤ ᠶ᠋ᠢᠨ ᠳᠡᠭᠡᠳᠦ ᠪᠡᠷ ᠪᠠᠶᠠᠷᠯᠠᠵᠤ ᠲᠡᠮᠦᠷ ᠰᠦᠷᠦᠭ ᠦ᠋ᠨ ᠢ᠋ᠶ᠋ᠡᠨ ᠮᠠᠯ ᠢ᠋ ᠲᠣᠯᠣᠭᠠᠢ ᠲᠣᠯᠣᠭᠠᠢ ᠪᠠᠷ ᠨᠢ᠂ ᠰᠠᠩ ᠤ᠋ᠨ ᠢ᠋ᠶ᠋ᠠᠨ ᠲᠠᠷᠢᠶᠠ ᠪᠤᠳᠠᠭᠠ ᠶ᠋ᠢ ᠲᠣᠭᠣᠭᠠ ᠲᠣᠭᠣᠭᠠ ᠪᠠᠷ ᠨᠢ ᠠᠯᠲᠠ ᠮᠥᠩᠭᠥ ᠪᠡᠷ ᠠᠷᠠᠯᠵᠢᠪᠠ᠃ ᠠᠷᠠᠯᠵᠢᠭᠠᠳ ᠯᠠ ᠪᠠᠢᠵᠠᠢ᠂ ᠠᠷᠠᠯᠵᠢᠭᠠᠳ ᠯᠠ ᠪᠠᠢᠵᠠᠢ᠂ ᠨᠢᠭᠡ ᠮᠡᠳᠡᠭᠰᠡᠨ ᠠᠷᠪᠢᠨ ᠰᠠᠩ ᠨᠢ ᠬᠣᠭᠣᠰᠣᠷᠠᠵᠤ ᠲᠠᠭᠤᠬᠤ ᠮᠠᠯ ᠦᠭᠡᠢ᠂ ᠳᠠᠭᠤ ᠭᠡᠬᠦ ᠨᠣᠬᠠᠢ ᠦᠭᠡᠢ᠂ ᠲᠣᠭᠣᠭᠠ ᠴᠤ᠌ ᠪᠤᠳᠠᠭᠠ ᠦᠭᠡᠢ ᠬᠣᠭᠣᠰᠣᠨ ᠪᠣᠯᠪᠠ
ᠡᠩ ᠦᠭᠡᠢ ᠶᠡᠬᠡ ᠠᠯᠲᠠ ᠮᠥᠩᠭᠥ ᠬᠤᠷᠢᠶᠠᠭᠰᠠᠨ ᠬᠠᠭᠠᠨ ᠡᠨᠡ ᠶᠡᠬᠡ ᠠᠯᠲᠠ ᠮᠥᠩᠭᠥ ᠪᠡᠷ ᠢ᠋ᠶ᠋ᠡᠨ ᠠᠮᠠ ᠬᠥᠳᠡᠯᠭᠡᠬᠦ ᠶᠠᠭᠤᠮᠠ ᠠᠷᠠᠯᠵᠢᠵᠤ ᠠᠪᠤᠯ ᠦᠭᠡᠢ ᠳᠡ ᠳᠠᠩᠴᠤ ᠭᠡᠮᠡᠨ ᠪᠣᠳᠣᠭᠠᠳ ᠶᠡᠬᠡ ᠠᠷᠠᠯᠵᠢᠶᠠ ᠬᠢᠨᠡ ᠭᠡᠵᠦ ᠵᠠᠷ ᠲᠠᠷᠬᠠᠭᠠᠲᠠᠯᠠ ᠬᠡᠨ ᠴᠦ᠍ ᠢᠷᠡᠭᠰᠡᠨ ᠦᠭᠡᠢ᠂ ᠠᠯᠲᠠ ᠪᠠᠨ ᠢᠳᠡᠵᠦ ᠮᠥᠩᠭᠥ ᠪᠡᠨ ᠮᠠᠷᠠᠭ ᠭᠡᠳ ᠭᠠᠭᠴᠠ ᠲᠥᠯᠥᠭᠡ᠂ ᠭᠠᠭᠴᠠ ᠲᠣᠭᠣᠭᠠ ᠠᠷᠪᠠᠢ ᠪᠤᠭᠤᠳᠠᠢ ᠠᠷᠠᠯᠵᠢᠬᠤ ᠬᠥᠮᠦᠨ ᠣᠯᠳᠠᠭᠰᠠᠨ ᠦᠭᠡᠢ᠃
ᠲᠦᠮᠡᠨ ᠣᠯᠠᠨ ᠲᠤᠯᠤᠮ ᠲᠠᠢ ᠠᠯᠲᠠ ᠪᠠᠨ ᠢᠳᠡ ᠭᠡᠳ ᠶᠡᠷᠦ ᠬᠠᠯᠭᠠᠭᠰᠠᠨ ᠦᠭᠡᠢ᠂ ᠠᠯᠲᠠ ᠬᠤᠪᠢᠯᠵᠠ ᠰᠣᠷᠣᠵᠤ᠂ ᠮᠥᠩᠭᠥᠨ ᠮᠣᠭᠠᠢ ᠪᠠᠭᠠᠯᠵᠠᠭᠤᠷᠳᠠᠨᠠ ᠪᠣᠢ ᠴᠢᠮᠠ ᠶ᠋ᠢ ᠭᠡᠳ ᠠᠯᠢ ᠪᠠᠢᠳᠠᠭ ᠢ᠋ᠶ᠋ᠠᠨ ᠳᠡᠭᠡᠷᠡᠮᠳᠡᠭᠦᠯᠦᠭᠰᠡᠨ ᠣᠯᠠᠨ ᠰᠢᠳᠦ ᠵᠠᠭᠤᠨ ᠬᠠᠭᠠᠨ ᠢ᠋ᠶ᠋ᠠᠨ ᠵᠠᠨᠤᠭᠰᠠᠨ ᠨᠢ ᠲᠡᠷᠡ ᠶᠤᠮᠰᠠᠨᠵᠠᠢ᠂ ᠲᠦᠳᠡᠯ ᠦᠭᠡᠢ ᠰᠢᠨᠤᠯᠲᠤ ᠬᠠᠭᠠᠨ ᠤ᠋ ᠬᠣᠳᠣᠭᠣᠳᠣ ᠬᠣᠩᠬᠣᠯᠵᠠᠵᠤ᠂ ᠨᠢᠳᠦ ᠨᠢ ᠪᠦᠷᠦᠯᠵᠡᠵᠦ ᠡᠬᠢᠯᠡᠪᠡ᠃ ᠲᠡᠭᠡᠩᠭᠦᠲᠡ ᠣᠷᠳᠣᠨ ᠳ᠋ᠤ᠌ ᠪᠠᠨ ᠣᠷᠣᠭᠠᠳ ᠰᠠᠩ ᠤ᠋ᠨ ᠢ᠋ᠶ᠋ᠠᠨ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠵᠦ ᠬᠠᠶᠠᠭᠠᠳ᠂
— ᠠᠷᠠᠳ ᠣᠯᠠᠨ ᠮᠢᠨᠢ ᠠᠯᠲᠠ ᠠ᠋ᠴᠠ ᠳᠤᠷᠠ ᠪᠠᠷ ᠠᠪᠴᠤ ᠭᠠᠭᠴᠠ ᠲᠥᠯᠥᠭᠡ ᠭᠠᠭᠴᠠ ᠰᠢᠭᠤᠳᠠᠢ ᠠᠷᠪᠠᠢ ᠦᠭᠭᠦᠭᠡᠴᠢ ᠭᠡᠮᠡᠨ ᠬᠠᠰᠬᠢᠷᠴᠤ ᠭᠠᠷᠤᠯᠠ᠂ ᠨᠢᠭᠡ ᠴᠦ᠍ ᠬᠥᠮᠦᠨ ᠢᠷᠡᠭᠰᠡᠨ ᠦᠭᠡᠢ᠂ ᠨᠢᠭᠡ ᠴᠦ᠍ ᠬᠥᠮᠦᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠬᠠᠭᠠᠯᠭᠠ ᠪᠠᠨ ᠨᠡᠬᠡᠭᠡᠳ᠂
— ᠠᠷᠠᠳ ᠤ᠋ᠳ ᠠ᠋᠂ ᠠᠯᠲᠠ ᠮᠥᠩᠭᠥ ᠪᠡᠨ ᠠᠶᠠᠭᠠ ᠭᠤᠯᠢᠷ ᠢ᠋ᠶ᠋ᠠᠷ ᠥᠭᠭᠦᠯᠡ ᠰᠢᠦ ᠠᠪᠲᠤᠭᠠᠢ᠂ ᠠᠪᠲᠤᠭᠠᠢ ᠭᠡᠲᠡᠯᠡ ᠪᠠᠰᠠ ᠯᠠ ᠲᠣᠭᠣᠭᠰᠠᠨ ᠦᠭᠡᠢ᠂ ᠬᠠᠷᠠᠭᠰᠠᠨ ᠴᠤ᠌ ᠦᠭᠡᠢ᠃
ᠮᠠᠷᠭᠠᠰᠢ ᠨᠢ ᠨᠢᠳᠦ ᠨᠢ ᠭᠠᠷᠠᠬᠠᠯᠠᠵᠤ᠂ ᠭᠡᠳᠡᠰᠦ ᠨᠢ ᠬᠣᠩᠬᠣᠯᠵᠠᠭᠰᠠᠨ ᠰᠢᠨᠤᠯᠲᠤ ᠬᠠᠭᠠᠨ᠂
— ᠪᠦᠬᠦ ᠬᠥᠷᠥᠩᠭᠡ ᠪᠡᠨ ᠪᠦᠬᠦ ᠠᠯᠲᠠ ᠮᠥᠩᠭᠥ ᠪᠡᠨ ᠵᠢᠰᠦᠮ ᠲᠠᠯᠬᠠ ᠪᠠᠷ ᠥᠭᠭᠦᠯᠡ ᠰᠢᠦ ᠭᠡᠮᠡᠨ ᠪᠠᠷᠬᠢᠷᠠᠵᠤ ᠭᠠᠷᠴᠤ ᠭᠡᠨᠡ᠃
ᠭᠡᠲᠡᠯᠡ ᠭᠠᠩᠭᠠ ᠶ᠋ᠢᠨ ᠬᠠᠯᠠᠭᠤᠨ ᠳ᠋ᠤ᠌ ᠬᠠᠷᠠᠰᠢᠵᠤ ᠶᠠᠳᠠᠷᠠᠭᠰᠠᠨ ᠣᠯᠠᠨ ᠠᠯᠲᠠ ᠮᠥᠩᠭᠥ ᠶ᠋ᠢ ᠢᠳᠡᠯᠲᠡᠢ ᠨᠢ ᠪᠢᠰᠢ᠂ ᠠᠩᠭᠠᠭᠰᠠᠨ ᠮᠠᠯ ᠳ᠋ᠤ᠌ ᠪᠠᠨ ᠥᠭᠭᠦᠯᠲᠡᠢ ᠨᠢ ᠪᠢᠰᠢ᠂ ᠠᠷᠪᠠᠢ ᠪᠤᠭᠤᠳᠠᠢ ᠶ᠋ᠢᠨ ᠦᠷᠡ ᠪᠣᠯᠭᠠᠬᠤ ᠴᠤ᠌ ᠪᠢᠰᠢ ᠭᠡᠳ ᠶᠡᠷᠦ ᠲᠣᠭᠣᠭᠰᠠᠨ ᠦᠭᠡᠢ᠂ ᠲᠡᠢᠨ ᠬᠦ ᠰᠢᠨᠤᠯᠲᠤ ᠬᠠᠭᠠᠨ ᠠᠯᠲᠠ ᠮᠥᠩᠭᠥᠨ ᠣᠷᠳᠣᠨ ᠳ᠋ᠤ᠌ ᠪᠠᠨ ᠥᠯᠪᠡᠷᠴᠦ ᠦᠬᠦᠵᠡᠢ᠃ ᠦᠬᠦᠭᠰᠡᠨ ᠦ᠌ ᠬᠢᠨᠢ ᠳᠠᠷᠠᠭᠠ ᠬᠠᠷᠢᠨ ᠠᠷᠠᠳ ᠣᠯᠠᠨ ᠰᠢᠨᠤᠯᠲᠠ ᠨᠤᠭᠤᠳ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠠᠯᠲᠠᠨ ᠣᠷᠳᠣᠨ ᠤ᠋ ᠬᠢᠨᠢ ᠳᠣᠪᠵᠢᠶᠠᠨ ᠳᠡᠭᠡᠷᠡ《 ᠠᠯᠲᠠ ᠮᠥᠩᠭᠥ ᠪᠣᠯ ᠴᠢᠯᠠᠭᠤ᠂ ᠠᠷᠪᠠᠢ ᠪᠤᠭᠤᠳᠠᠢ ᠪᠣᠯ ᠠᠮᠢᠳᠤᠷᠠᠯ》 ᠭᠡᠮᠡᠨ ᠰᠡᠢᠯᠵᠦ ᠦᠯᠡᠳᠡᠭᠡᠭᠰᠡᠨ ᠭᠡᠳᠡᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠤᠤᠭᠠᠨᠵᠢᠳ