ᠨᠠᠰᠤᠨ ᠪᠠᠶᠠᠷ ᠤ᠋ᠨ ᠪᠡᠯᠭᠡᠳᠡᠯ-ᠪᠠᠶᠠᠨ᠌ᠠᠡᠭᠤᠯᠠНасан баярын бэлгэдэл- Баян-уул
1000ᠨᠠᠰᠤᠨ ᠪᠠᠶᠠᠷ ᠤ᠋ᠨ ᠪᠡᠯᠭᠡᠳᠡᠯ
ᠪᠠᠶᠠᠨ᠌ᠠᠡᠭᠤᠯᠠ
ᠵᠠ!
ᠡᠩᠬᠡ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ
ᠡᠰᠡᠷᠸᠠ ᠲᠩᠷᠢ ᠶ᠋ᠢᠨ ᠥᠷᠥᠰᠢᠶᠡᠯᠲᠦ
ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠢᠪᠡᠭᠡᠯᠲᠦ
ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠵᠠᠷᠯᠢᠭ ᠶᠣᠰᠣᠭᠠᠷ
ᠡᠷᠬᠢᠮ ᠮᠣᠩᠭᠣᠯ ᠤ᠋ᠨ ᠵᠤᠷᠰᠢᠯ ᠶᠣᠰᠣᠭᠠᠷ
ᠡᠷᠲᠡᠨ ᠦ᠌ ᠡᠪᠦᠭᠡᠳ ᠦ᠋ᠨ ᠰᠤᠷᠭᠠᠯ ᠶᠣᠰᠣᠭᠠᠷ
ᠦᠳᠡᠯᠦᠭᠡ ᠪᠤᠭᠤᠷᠤᠯ ᠨᠠᠰᠤᠲᠠᠨ ᠤ᠋
ᠥᠨᠳᠥᠷ ᠨᠠᠰᠤᠨ ᠤ᠋ ᠪᠠᠶᠠᠷ
ᠥᠨᠢᠷ ᠣᠯᠠᠨ ᠤ᠋ ᠬᠤᠷᠠ
ᠦᠷᠡ ᠬᠡᠦᠬᠡᠳ ᠦ᠋ᠨ ᠬᠢᠨ ᠴᠤᠭᠯᠠᠭᠠ
ᠥᠯᠵᠡᠢᠲᠦ ᠨᠠᠢᠷ ᠤ᠋ᠨ ᠬᠢᠨᠢ ᠴᠢᠮᠡᠭᠡ ᠪᠡᠷ
ᠬᠣᠯᠠ ᠣᠢᠷᠠ ᠶ᠋ᠢᠨ ᠬᠢᠨᠢ ᠴᠤᠭᠯᠠᠭᠰᠠᠨ
ᠬᠣᠲᠠ ᠤᠰᠤᠨ ᠤ᠋ ᠬᠢᠨᠢ ᠬᠤᠷᠠᠭᠰᠠᠨ
ᠬᠣᠪᠣᠩ ᠲᠥᠷᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠭᠤᠯᠵᠠᠭᠰᠠᠨ
ᠬᠣᠲᠠᠯᠠ ᠪᠦᠭᠦᠳᠡ ᠶ᠋ᠢ ᠪᠠᠶᠠᠰᠬᠠᠭᠴᠢ
ᠬᠤᠷᠢᠮ ᠨᠠᠢᠷ ᠢ᠋ᠶ᠋ᠠᠨ ᠡᠬᠢᠯᠡᠭᠦᠯᠦᠶᠡ!
ᠠᠬᠠ ᠳᠡᠭᠦᠦ ᠰᠠᠳᠤᠨ ᠲᠥᠷᠥᠯ ᠨᠢ
ᠠᠢᠯ ᠤᠰᠤᠨ ᠤ᠋ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ
ᠠᠢᠮᠠᠭ ᠲᠥᠷᠥᠯ ᠦ᠋ᠨ ᠣᠯᠠᠭᠤᠯᠠ ᠪᠠᠨ
ᠠᠴᠢ ᠂ ᠵᠢᠴᠢ ᠣᠮᠪᠣᠯᠣ ᠨᠢ
ᠠᠴᠢᠷ ᠦᠷᠡᠰ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ
ᠠᠬᠠᠮᠠᠳ ᠨᠠᠰᠤᠲᠠᠨ ᠲᠠᠨ ᠳ᠋ᠤ᠌ ᠪᠠᠨ
ᠠᠷᠢᠭᠤᠨ ᠴᠠᠭᠠᠨ ᠬᠠᠳᠠᠭ ᠢ᠋ᠶ᠋ᠠᠨ ᠡᠷᠭᠦᠵᠦ
ᠠᠰᠢᠳᠠ ᠶ᠋ᠢᠨ ᠪᠡᠯᠭᠡᠳᠡᠯ ᠢ᠋ᠶ᠋ᠡᠨ ᠳᠡᠪᠰᠢᠭᠦᠯᠦᠶᠡ!
ᠥᠩᠭᠡᠲᠦ ᠳᠡᠯᠡᠬᠡᠢ ᠶ᠋ᠢᠨ ᠵᠢᠮᠡ ᠶᠣᠰᠣᠭᠠᠷ
ᠥᠷᠯᠥᠭ ᠮᠣᠩᠭᠣᠯ ᠤ᠋ᠨ ᠵᠠᠩᠰᠢᠯ ᠶᠣᠰᠣᠭᠠᠷ
ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠤ᠋ ᠳᠠᠳᠬᠠᠯ ᠶᠣᠰᠣᠭᠠᠷ
ᠥᠯᠵᠡᠢ ᠬᠤᠲᠤᠭ ᠣᠷᠣᠰᠢᠭᠠᠰᠠᠢ ᠭᠡᠵᠦ
ᠦᠯᠡᠮᠵᠢ ᠬᠠᠢᠷᠠ ᠨᠢ ᠲᠣᠭᠲᠠᠭ ᠭᠡᠵᠦ
ᠥᠨᠢ ᠡᠭᠦᠷᠢᠳᠡ ᠵᠢᠷᠭᠠᠰᠠᠢ ᠭᠡᠵᠦ
ᠥᠯᠵᠡᠢ ᠪᠡᠯᠭᠡᠲᠦ ᠦᠭᠡᠰ ᠢ᠋
ᠥᠷᠭᠡᠨ ᠲᠦᠮᠡᠨ ᠦ᠌ ᠪᠡᠨ ᠴᠢᠮᠡᠭ
ᠥᠩᠭᠡᠲᠦ ᠨᠠᠢᠷ ᠤ᠋ᠨ ᠡᠵᠡᠨ
ᠦᠳᠡᠯᠦᠭᠡ ᠨᠠᠰᠤᠲᠠᠨ ᠲᠠᠨ ᠳ᠋ᠠᠭᠠᠨ
ᠡᠷᠭᠦᠨ ᠡᠷᠭᠦᠨ ᠳᠡᠪᠰᠢᠭᠦᠯᠦᠶᠡ!
ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠢᠪᠡᠭᠡᠯ ᠢ᠋ᠶ᠋ᠡᠷ
ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ
ᠪᠤᠶᠠᠨᠲᠤ ᠳᠡᠭᠡᠳᠦᠰ ᠦ᠋ᠨ ᠢᠷᠦᠭᠡᠯ ᠢ᠋ᠶ᠋ᠡᠷ
ᠪᠤᠢᠷ ᠭᠣᠯᠣᠮᠲᠠ ᠪᠠᠨ ᠬᠥᠭᠵᠢᠭᠡᠭᠰᠡᠨ
ᠪᠤᠭᠤᠷᠤᠯ ᠨᠠᠰᠤᠲᠠᠨ ᠤ᠋ ᠨᠠᠢᠷ ᠲᠤ᠌
ᠪᠤᠯᠲᠤ ᠣᠯᠠᠨ ᠢ᠋ᠶ᠋ᠠᠨ ᠲᠥᠯᠥᠭᠡᠯᠡᠨ
ᠬᠦᠨᠳᠦᠲᠦ ᠨᠠᠰᠤᠲᠠᠨ ᠤ᠋ ᠨᠠᠢᠷ ᠲᠤ᠌
ᠬᠦᠷᠦᠯᠴᠡᠵᠦ ᠢᠷᠡᠭᠰᠡᠳ ᠢ᠋ᠶ᠋ᠡᠨ ᠲᠥᠯᠥᠭᠡᠯᠡᠨ
ᠡᠩ ᠦ᠋ᠨ ᠨᠢᠭᠡᠨ ᠦᠭᠡ ᠪᠡᠷ
ᠦᠯᠡᠮᠵᠢ ᠶ᠋ᠢᠨ ᠪᠤᠶᠠᠨ ᠢ᠋ ᠬᠤᠷᠤᠢᠯᠠᠵᠤ
ᠵᠢᠷ ᠦ᠋ᠨ ᠨᠢᠭᠡᠨ ᠬᠡᠯᠡᠯᠭᠡ ᠪᠡᠷ
ᠵᠢᠯ ᠦ᠋ᠨ ᠢᠷᠦᠭᠡᠯ ᠢ᠋ ᠳᠡᠪᠰᠢᠭᠦᠯᠦᠶᠡ!
ᠠᠯᠲᠠ ᠤᠷᠲᠤ ᠬᠠᠳᠠᠭ
ᠠᠯᠲᠠ ᠮᠥᠩᠭᠥᠨ ᠦ᠌ ᠵᠠᠰᠠᠯ
ᠠᠮᠪᠠᠨ ᠢᠷᠭᠡ ᠶ᠋ᠢᠨ ᠰᠢᠭᠦᠰᠦ
ᠠᠷᠢᠭᠤᠨ ᠴᠠᠭᠠᠨ ᠢᠳᠡᠭᠡ
ᠠᠮᠤ ᠪᠤᠳᠠᠭᠠᠨ ᠤ᠋ ᠣᠬᠢ
ᠠᠮᠲᠠᠲᠤ ᠰᠠᠷᠬᠤᠳ ᠤ᠋ᠨ ᠳᠡᠭᠡᠵᠢ
ᠠᠯᠢᠮᠠ ᠵᠢᠮᠢᠰ ᠨᠣᠭᠣᠭᠠ
ᠠᠯᠢ ᠪᠦᠬᠦᠨ ᠢ᠋ᠶ᠋ᠡᠨ ᠪᠠᠷᠢᠵᠤ
ᠠᠷᠠᠳ ᠣᠯᠠᠨ ᠳ᠋ᠤ᠌ ᠪᠠᠨ ᠬᠦᠷᠢᠶᠡᠯᠡᠯ ᠲᠡᠢ
ᠠᠴᠢᠷ ᠦᠷᠡᠰ ᠲᠦ᠍ ᠪᠡᠨ ᠬᠦᠨᠳᠦᠳᠬᠡᠯᠲᠡᠢ
ᠠᠢᠮᠠᠭ ᠬᠣᠲᠠᠨ ᠳ᠋ᠤ᠌ ᠪᠠᠨ ᠨᠡᠷᠡᠲᠡᠢ
ᠠᠢᠯ ᠤᠰᠤᠨ ᠳ᠋ᠤ᠌ ᠪᠠᠨ ᠠᠴᠢᠲᠠᠢ
ᠠᠬᠠᠮᠠᠳ ᠪᠤᠭᠤᠷᠤᠯ ᠲᠠᠨ ᠳ᠋ᠠᠭᠠᠨ
ᠠᠰᠢᠳᠠ ᠶ᠋ᠢᠨ ᠪᠡᠯᠭᠡᠳᠡᠯ ᠪᠣᠯᠭᠠᠵᠤ
ᠠᠮᠠᠨ ᠢᠷᠦᠭᠡᠯ ᠡᠷᠭᠦᠵᠦ
ᠠᠮᠤᠷ ᠪᠠᠶᠠᠰᠬᠤᠯᠠᠩ ᠢ᠋ ᠵᠥᠩᠨᠡᠶᠡ!
ᠵᠣᠬᠢᠶᠠᠵᠤ᠂ ᠤᠩᠰᠢᠭᠰᠠᠨ ᠂ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨ᠌ᠠᠠᠭᠤᠯᠠ
ᠦᠰᠦᠭ ᠬᠠᠲᠠᠭᠴᠢ᠄ ᠬᠣᠨᠢᠴᠢᠨ ᠪᠦᠰᠡᠭᠦᠢ
ᠬᠢᠨᠠᠭᠴᠢ᠄ ᠠᠯᠲᠠᠨᠴᠡᠴᠡᠭ