ᠳᠠᠨᠠᠪᠠᠯДанавалDanaval-ᠤᠮᠠᠷᠠᠲᠤ ᠶ᠋ᠢᠨ ᠴᠥᠭᠡᠨ ᠲᠣᠭᠠᠲᠤ ᠦᠨᠳᠦᠰᠦᠲᠡᠨ ᠦ᠌ ᠤᠷᠠᠨ ᠵᠣᠬᠢᠶᠠᠯ
647ᠳᠠᠨᠠᠪᠠᠯ
ᠲᠥᠷᠥᠭᠰᠡᠨ ᠭᠠᠵᠠᠷ ᠨᠤᠲᠤᠭ ᠢ᠋ ᠴᠢᠨᠢ
ᠬᠡᠯᠡᠳᠡᠭ ᠪᠣᠯᠪᠠᠯ ᠳᠠᠨᠠᠪᠠᠯ ᠠ᠋
ᠪᠣᠳᠣᠯᠭᠠᠲᠤ ᠶ᠋ᠢᠨ ᠬᠣᠰᠢᠭᠤ
ᠵᠢᠯᠲᠦ ᠶ᠋ᠢᠨ ᠠᠢᠯ ᠠ᠋
ᠲᠦᠪᠡᠭᠳᠡᠵᠦ ᠠᠯᠪᠠ ᠬᠢᠭᠰᠡᠨ
ᠭᠠᠵᠠᠷ ᠢ᠋ ᠴᠢᠨᠢ ᠬᠡᠯᠡᠪᠡᠯ ᠳᠠ
ᠠ ᠬᠠ ᠬᠦ
ᠥᠨᠳᠥᠷ ᠬᠤᠰᠤᠨ ᠠᠢᠯ ᠤ᠋ᠨ
ᠡᠷᠳᠡᠨᠢᠪᠢᠯᠢᠭ* ᠦ᠋ᠨ ᠴᠡᠷᠢᠭ ᠳᠡᠭᠡᠷᠡ ᠠ᠋᠃
ᠤᠤᠭᠤᠭᠳᠠᠭᠰᠠᠨ ᠤᠰᠤ ᠶ᠋ᠢ ᠴᠢᠨᠢ
ᠬᠡᠯᠡᠳᠡᠭ ᠪᠣᠯᠪᠠᠯ ᠲᠠᠨᠠᠪᠠᠯ ᠠ᠋
ᠤᠷᠳᠤᠭᠤᠷ ᠨᠢ ᠤᠷᠤᠰᠴᠤ ᠪᠠᠢᠬᠤ
ᠶᠣᠣ ᠶ᠋ᠢᠨ ᠭᠣᠣᠯ ᠠ᠋
ᠤᠴᠠᠷᠠᠵᠤ ᠠᠯᠪᠠ ᠬᠢᠭᠰᠡᠨ
ᠭᠠᠵᠠᠷ ᠢ᠋ ᠴᠢᠨᠢ ᠬᠡᠯᠡᠪᠡᠯ ᠳᠡ
ᠠ ᠬᠠ ᠬᠦ
ᠥᠨᠳᠥᠷ ᠬᠤᠰᠤᠨ ᠠᠢᠯ ᠤ᠋ᠨ
ᠡᠷᠳᠡᠨᠢᠪᠢᠯᠢᠭ ᠦ᠋ᠨ ᠴᠡᠷᠢᠭ ᠳᠡᠭᠡᠷᠡ᠃
ᠪᠣᠳᠣᠯᠭᠠᠲᠤ ᠶ᠋ᠢᠨ ᠬᠣᠰᠢᠭᠤ ᠵᠢᠯᠲᠦ ᠶ᠋ᠢᠨ ᠠᠢᠯ ᠤ᠋ᠨ ᠠᠯᠳᠠᠷᠲᠤ ᠡᠮᠴᠢ ᠮᠡᠩᠭᠦᠢ ᠡᠴᠡ ᠭᠠᠭᠴᠠᠬᠠᠨ ᠬᠦᠦ ᠲᠡᠢ ᠶᠤᠮᠰᠠᠨ᠂ ᠨᠡᠷᠡ ᠨᠢ ᠳᠠᠨᠠᠪᠠᠯ ᠭᠡᠳᠡᠭ᠂ ᠡᠨᠡ ᠵᠢᠯ ᠨᠢᠭᠡᠨᠲᠡ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤᠯᠠᠪᠠ᠃ ᠳᠠᠨᠠᠪᠠᠯ ᠦᠷᠭᠦᠯᠵᠢ ᠠᠪᠤ ᠪᠠᠨ ᠳᠠᠭᠠᠵᠤ ᠠᠪᠠ ᠬᠦᠷᠦᠭᠡ ᠬᠢᠬᠦ ᠪᠡᠷ ᠭᠠᠷᠬᠤ ᠲᠤᠯᠠ᠂ ᠮᠣᠷᠢ ᠫᠤᠤ ᠳ᠋ᠠᠭᠠᠨ ᠶᠡᠬᠡᠯᠡ ᠰᠢᠯᠭᠠᠷᠠᠨ ᠮᠡᠷᠭᠡᠵᠢᠵᠦ᠂ ᠣᠢᠷᠠ ᠣᠷᠴᠢᠮ ᠤ᠋ᠨ ᠮᠡᠷᠭᠡᠨ ᠫᠤᠤᠴᠢ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠪᠢᠯᠡ᠃
ᠲᠤᠰ ᠠᠢᠯ ᠤ᠋ᠨ ᠨᠢᠭᠡᠨ ᠶᠠᠳᠠᠭᠤ ᠲᠠᠷᠢᠶᠠᠴᠢᠨ ᠤ᠋ ᠭᠡᠷ ᠲᠦ᠍ ᠵᠢᠨᠰᠢᠶᠠᠩ ᠭᠡᠳᠡᠭ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤ ᠲᠠᠢ ᠥᠬᠢᠨ ᠪᠠᠢᠵᠠᠢ᠃ ᠳᠠᠨᠠᠪᠠᠯ ᠵᠢᠨᠰᠢᠶᠠᠩ ᠬᠣᠶᠠᠭᠤᠯᠠ ᠬᠠᠷᠠᠬᠠᠨ ᠪᠠᠭᠠ ᠠ᠋ᠴᠠ ᠪᠠᠨ ᠬᠠᠮᠲᠤ ᠨᠠᠭᠠᠳᠤᠨ ᠥᠰᠴᠦ᠂ ᠥᠭᠡᠯᠡᠢ ᠥᠨᠳᠥᠷ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠠᠷᠢᠯᠴᠠᠨ ᠢᠨᠠᠭ ᠳᠤᠷᠠᠯᠠᠯ ᠤ᠋ᠨ ᠰᠡᠳᠬᠢᠯ ᠡᠭᠦᠰᠴᠦ ᠮᠠᠰᠢ ᠳᠣᠲᠣᠨᠣ ᠶᠠᠪᠤᠯᠴᠠᠳᠠᠭ ᠪᠢᠯᠡ᠃
ᠨᠢᠭᠡ ᠡᠳᠦᠷ᠂ ᠡᠷᠳᠡᠨᠢᠪᠢᠯᠢᠭ ᠨᠣᠶᠠᠨ ᠬᠤᠰᠢᠭᠤᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠢᠴᠢᠯᠠᠵᠤ ᠵᠢᠯᠲᠦ ᠶ᠋ᠢᠨ ᠠᠢᠯ ᠳ᠋ᠤ᠌ ᠪᠠᠭᠤᠭᠰᠠᠨ ᠳ᠋ᠤ᠌ ᠳᠠᠨᠠᠪᠠᠯ ᠦᠵᠡᠭᠡᠳ ᠳᠣᠲᠣᠷᠠ ᠪᠠᠨ ᠶᠡᠬᠡᠯᠡ ᠪᠠᠬᠠᠷᠠᠵᠤ ᠴᠡᠷᠢᠭ ᠲᠦ᠍ ᠣᠷᠣᠬᠤ ᠰᠠᠨᠠᠭᠠ ᠡᠭᠦᠰᠦᠭᠰᠡᠨ ᠪᠠᠢᠨᠠ᠃
ᠵᠢᠵᠢᠭᠢᠨᠠᠨ ᠳᠤᠤᠭᠠᠷᠬᠤ
ᠵᠢᠦ ᠶᠢᠨ ᠬᠣᠣ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ
ᠵᠢᠷᠦᠬᠡ ᠴᠡᠭᠡᠵᠢᠨ ᠦ᠌ ᠳᠣᠲᠣᠷᠠ ᠨᠢ
ᠬᠥᠪᠦᠯᠵᠡᠨᠡ ᠰᠢᠦ ᠳᠠᠨᠠᠪᠠᠯ ᠠ᠋
ᠵᠡᠷᠭᠡᠴᠡ ᠵᠣᠭᠰᠣᠭᠠᠳ
ᠫᠤᠤ ᠡᠭᠦᠷᠦᠭᠰᠡᠨ ᠢ᠋ ᠨᠢ ᠦᠵᠡᠭᠡᠳ
ᠠ ᠬᠠ ᠬᠦ
ᠵᠢᠭᠰᠠᠭᠠᠯ ᠳ᠋ᠤᠨᠢ ᠣᠷᠣᠭᠠᠳ
ᠳᠠᠭᠠᠵᠤ ᠶᠠᠪᠤᠮᠠᠷ ᠰᠠᠨᠠᠭᠳᠠᠨᠠ᠃
ᠦᠨᠳᠡᠪᠡᠯᠵᠡᠨ ᠳᠤᠤᠭᠠᠷᠬᠤ
ᠡᠦ ᠶᠢᠩ ᠬᠣᠣ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ
ᠡᠪᠴᠢᠭᠦᠦ ᠴᠡᠭᠡᠵᠡᠨ ᠳᠣᠲᠣᠷᠠ ᠨᠢ
ᠬᠥᠪᠦᠯᠵᠡᠨᠡ ᠰᠢᠦ ᠳᠠᠨᠠᠪᠠᠯ
ᠥᠩᠭᠡᠲᠦ ᠲᠤᠭ ᠢ᠋ᠶ᠋ᠠᠨ ᠮᠠᠨᠳᠤᠭᠤᠯᠵᠤ
ᠮᠣᠷᠳᠠᠭᠠᠳ ᠭᠠᠷᠬᠤ ᠶ᠋ᠢ ᠨᠢ ᠦᠵᠡᠭᠡᠳ
ᠠ ᠬᠠ ᠬᠦ
ᠦᠷᠢᠶᠡ ᠮᠣᠷᠢ ᠪᠠᠨ ᠤᠨᠤᠭᠠᠳ
ᠳᠠᠭᠠᠵᠤ ᠶᠠᠪᠤᠮᠠᠷ ᠰᠠᠨᠠᠭᠳᠠᠨᠠ᠃
ᠳᠠᠨᠠᠪᠠᠯ᠂ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠲᠦ᠍ ᠣᠷᠣᠬᠤ ᠶ᠋ᠢ ᠬᠦᠰᠡᠵᠦ ᠠᠪᠤ ᠳ᠋ᠠᠭᠠᠨ ᠬᠡᠴᠢᠨᠡᠨ ᠤᠳᠠᠭᠠ ᠬᠡᠯᠡᠭᠰᠡᠨ ᠴᠦ᠍ ᠠᠪᠤ ᠨᠢ ᠬᠠᠷᠢᠨ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠶᠦ᠍ᠮ᠃ ᠡᠢᠮᠦ ᠡᠴᠡ ᠳᠠᠨᠠᠪᠠᠯ ᠠᠷᠭᠠ ᠶᠠᠳᠠᠬᠤ ᠳ᠋ᠠᠭᠠᠨ ᠭᠡᠷ ᠡᠴᠡ ᠪᠡᠨ ᠤᠷᠭᠤᠵᠤ ᠭᠠᠷᠴᠤ ᠴᠡᠷᠢᠭ ᠲᠦ᠍ ᠮᠣᠷᠳᠠᠬᠤ ᠪᠠᠷ ᠰᠢᠢᠳᠪᠡ᠃
ᠠᠭᠲᠠ ᠬᠦᠯᠦᠭ ᠣᠭᠣᠨᠣᠨ ᠬᠤᠸᠠ ᠪᠠᠨ
ᠠᠳᠤᠭᠤᠨ ᠠ᠋ᠴᠠ ᠪᠠᠨ ᠪᠠᠷᠢᠴᠢᠬᠠᠯᠠ
ᠠᠷᠪᠠ ᠳᠤᠤᠭᠠᠷᠬᠤ ᠽᠢᠯᠠᠢᠳᠠᠢ ᠪᠠᠨ
ᠠᠷᠤ ᠳ᠋ᠠᠭᠠᠨ ᠠᠪᠤᠭᠠᠳ ᠵᠡᠭᠦᠴᠢᠬᠡᠯᠡ
ᠠᠯᠪᠠᠨ ᠴᠡᠷᠢᠭ ᠲᠦ᠍ ᠣᠷᠣᠬᠤ ᠭᠡᠵᠦ
ᠠᠳᠠᠯ ᠭᠡᠷ ᠡᠴᠡ ᠪᠡᠨ ᠤᠷᠭᠤᠬᠤᠯᠠᠷ
ᠠ ᠬᠠ ᠬᠦ
ᠠᠮᠠᠷᠠᠭ ᠪᠠᠭᠠ ᠵᠢᠨᠰᠢᠶᠠᠩ ᠨᠢ
ᠠᠶᠤᠤᠯᠢᠬᠠᠢ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠪᠣᠳᠣᠭᠳᠠᠨᠠ᠃
ᠦᠷᠢᠶᠡ ᠬᠦᠯᠦᠭ ᠣᠭᠣᠨᠣᠨ ᠬᠤᠸᠠ ᠪᠠᠨ
ᠠᠳᠤᠭᠤᠨ ᠠ᠋ᠴᠠ ᠪᠠᠨ ᠪᠠᠷᠢᠴᠢᠬᠠᠯᠠ
ᠥᠨᠳᠥᠷ ᠫᠤᠤ ᠤᠶᠢᠨᠴᠢᠶᠠᠩ ᠢ᠋ᠶ᠋ᠠᠨ
ᠡᠷᠭᠦᠨ ᠠᠪᠤᠭᠠᠳ ᠡᠭᠦᠷᠴᠢᠬᠡᠯᠡ
ᠡᠵᠡᠨ ᠦ᠌ ᠴᠡᠷᠢᠭ ᠲᠦ᠍ ᠣᠷᠣᠬᠤ ᠭᠡᠵᠦ
ᠡᠷᠦᠬᠡ ᠭᠡᠷ ᠡᠴᠡ ᠪᠡᠨ ᠤᠷᠭᠤᠬᠤᠯᠠᠷ
ᠠ ᠬᠠ ᠬᠦ
ᠦᠶᠡ ᠶ᠋ᠢᠨ ᠠᠮᠠᠷᠠᠭ ᠵᠢᠨᠰᠢᠶᠠᠩ ᠨᠢ
ᠡᠪᠴᠢᠭᠦᠦ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠰᠠᠨᠠᠭᠳᠠᠨᠠ᠃
ᠪᠦᠭᠴᠢᠮ ᠬᠠᠯᠠᠭᠤᠨ ᠵᠤᠨ ᠤ᠋ ᠴᠠᠭ᠂ ᠪᠦᠬᠦ ᠠᠢᠯ ᠤ᠋ᠨ ᠡᠷᠡᠭᠲᠡᠢᠴᠦᠳ ᠴᠥᠮ ᠲᠠᠷᠢᠶᠠᠨ ᠠᠵᠢᠯ ᠳ᠋ᠤ᠌ ᠶᠠᠭᠠᠷᠠᠯᠳᠤᠨ ᠦᠳᠡ ᠶ᠋ᠢᠨ ᠠᠮᠠᠷᠠᠯᠲᠠ ᠬᠣᠭᠣᠯᠠᠨ ᠤ᠋ ᠴᠠᠭ ᠪᠣᠯᠬᠤ ᠳ᠋ᠤ᠌ ᠠᠢᠯ ᠤ᠋ᠨ ᠡᠮᠡᠭᠲᠡᠢᠴᠦᠳ ᠠᠵᠢᠯ ᠤ᠋ᠨ ᠬᠥᠮᠦᠰ ᠲᠡᠭᠡᠨ ᠬᠦᠨᠡᠰᠦ ᠬᠣᠭᠣᠯᠠ ᠬᠦᠷᠭᠡᠬᠦ ᠭᠡᠵᠦ᠂ ᠠᠢᠷᠠᠭ᠂ ᠪᠤᠳᠠᠭᠠ ᠪᠠᠨ ᠸᠠᠭᠠᠷ ᠰᠠᠪᠠ ᠳ᠋ᠤ᠌ ᠬᠢᠵᠦ ᠳᠠᠮᠨᠠᠭᠠᠳ᠂ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠳᠠᠭᠠᠯᠳᠤᠵᠤ ᠬᠠᠩᠭᠢᠨᠠᠲᠠᠯᠠ ᠳᠠᠭᠤᠯᠠᠵᠤ ᠶᠠᠪᠤᠳᠠᠭ ᠶᠤᠮᠰᠠᠨ᠃ ᠡᠨᠡ ᠡᠳᠦᠷ ᠵᠢᠨᠰᠢᠶᠠᠩ ᠤ᠋ᠨ ᠡᠵᠢ ᠨᠢ ᠴᠦ᠍ ᠮᠥᠨ ᠬᠦᠨᠡᠰᠦ ᠳᠠᠮᠨᠠᠵᠤ ᠬᠥᠳᠡᠭᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠠ᠋ᠴᠠ ᠵᠢᠨᠰᠢᠶᠠᠩ ᠭᠠᠭᠴᠠᠭᠠᠷ ᠦᠯᠡᠳᠡᠵᠦ ᠭᠡᠷ ᠢ᠋ᠶ᠋ᠡᠨ ᠰᠠᠬᠢᠨ ᠣᠶᠣᠳᠠᠯ ᠣᠶᠣᠵᠤ ᠰᠠᠭᠤᠬᠤ ᠶ᠋ᠢ ᠳᠠᠯᠢᠮᠳᠠᠭᠤᠯᠵᠤ ᠳᠠᠨᠠᠪᠠᠯ ᠲᠡᠭᠦᠨ ᠢ᠋ ᠡᠷᠢᠵᠦ ᠢᠷᠡᠬᠦ ᠳ᠋ᠦ᠍ ᠵᠢᠨᠰᠢᠶᠠᠩ ᠰᠣᠴᠢᠰᠬᠢᠵᠦ ᠣᠶᠣᠵᠤ ᠪᠠᠢᠭᠰᠠᠨ ᠶᠠᠭᠤᠮᠠ ᠪᠠᠨ ᠰᠠᠨᠳᠤᠷᠤᠨ ᠨᠢᠭᠤᠵᠤ᠂ ᠪᠣᠰᠴᠤ ᠯᠠᠪᠯᠠᠨ ᠦᠵᠡᠬᠦ ᠳ᠋ᠦ᠍ ᠬᠠᠷᠢᠨ ᠳᠠᠨᠠᠪᠠᠯ ᠢᠷᠡᠭᠰᠡᠨ ᠪᠠᠢᠨᠠ᠃
ᠴᠢᠩᠭᠢᠭᠡᠳ ᠵᠢᠨᠰᠢᠶᠠᠩ᠄
ᠠᠯᠲᠠ ᠤᠷᠲᠤ ᠭᠡᠵᠢᠭᠡ ᠪᠡᠨ
ᠠᠷᠤ ᠥᠭᠡᠳᠡ ᠪᠡᠨ ᠰᠠᠵᠢᠴᠢᠬᠠᠯᠠ
ᠠᠯᠠᠭ ᠬᠣᠶᠠᠷ ᠨᠢᠳᠦ ᠪᠡᠨ
ᠠᠮᠠᠷᠠᠭ ᠤ᠋ᠨ ᠢ᠋ᠶ᠋ᠠᠨ ᠵᠦᠭ ᠲᠤᠨᠤᠷᠠᠭᠤᠯᠤᠯᠠ
ᠠᠪᠤ ᠡᠵᠢ ᠬᠣᠶᠠᠷ ᠠ᠋ᠴᠠ ᠪᠠᠨ
ᠨᠢᠭᠤᠵᠤ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠰᠢᠦ
ᠠᠮᠠᠷᠠᠭ ᠬᠣᠩᠭᠣᠷ ᠠᠬᠠ ᠴᠢᠮᠠ ᠳ᠋ᠠᠭᠠᠨ
ᠪᠡᠯᠡᠭ ᠪᠣᠯᠭᠠᠵᠤ ᠬᠢᠭᠰᠡᠨ ᠶᠦᠮ ᠠ᠋᠃
ᠮᠣᠢᠯ ᠬᠠᠷᠠ ᠭᠡᠵᠢᠭᠡ ᠪᠡᠨ
ᠮᠥᠷᠥ ᠤᠷᠤᠭᠤ ᠪᠠᠨ ᠰᠠᠵᠢᠴᠢᠬᠠᠯᠠ
ᠮᠥᠰᠥᠨ ᠴᠠᠭᠠᠨ ᠰᠢᠲᠦ ᠨᠢ
ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠠᠭᠠᠭᠠᠳ ᠴᠠᠢᠯᠵᠠᠨᠠ
ᠮᠥᠮᠥ ᠠᠪᠤ ᠬᠣᠶᠠᠷ ᠠ᠋ᠴᠠ ᠪᠠᠨ
ᠨᠢᠭᠤᠵᠤ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠰᠢᠦ
ᠮᠥᠩᠬᠡ ᠶ᠋ᠢᠨ ᠰᠠᠨᠠᠭᠰᠠᠨ ᠬᠣᠩᠭᠣᠷ ᠴᠢᠮᠠ ᠳ᠋ᠠᠭᠠᠨ
ᠪᠡᠯᠡᠭ ᠪᠣᠯᠭᠠᠵᠤ ᠬᠢᠭᠰᠡᠨ ᠶᠦᠮ ᠠ᠋᠃
ᠭᠡᠬᠦ ᠳ᠋ᠦ᠍᠂ ᠳᠠᠨᠠᠪᠠᠯ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠲᠦ᠍ ᠮᠣᠷᠳᠠᠬᠤ ᠪᠠᠷ ᠭᠡᠷ ᠡᠴᠡ ᠪᠡᠨ ᠤᠷᠭᠤᠵᠤ ᠶᠠᠪᠤᠬᠤ ᠭᠡᠰᠡᠨ ᠤᠴᠢᠷ ᠢ᠋ᠶ᠋ᠠᠨ ᠵᠢᠨᠰᠢᠶᠠᠩ ᠳ᠋ᠤ᠌ ᠬᠡᠯᠡᠵᠦ ᠪᠠᠢᠨᠠ᠃ ᠭᠡᠲᠡᠯᠡ ᠵᠢᠨᠰᠢᠶᠠᠩ᠂ ᠳᠠᠨᠠᠪᠠᠯ ᠢ᠋ᠶ᠋ᠠᠨ ᠴᠡᠷᠢᠭ ᠲᠦ᠍ ᠶᠠᠪᠤᠭᠤᠯᠬᠤ ᠳᠤᠷᠠ ᠦᠭᠡᠢ ᠲᠤᠯᠠ ᠨᠢᠳᠦᠨ ᠨᠢᠯᠪᠤᠰᠤ ᠤᠨᠠᠭᠠᠨᠠ᠃ ᠳᠠᠨᠠᠪᠠᠯ ᠡᠭᠦᠨ ᠢ ᠦᠵᠡᠵᠦ ᠵᠢᠨᠰᠢᠶᠠᠩ ᠳ᠋ᠠᠭᠠᠨ ᠬᠡᠯᠡᠵᠦ ᠪᠠᠢᠬᠤ ᠨᠢ᠄
ᠠᠭᠲᠠ ᠬᠦᠯᠦᠭ ᠣᠨᠣᠭᠣᠨ ᠬᠤᠸᠠ ᠶ᠋ᠢᠨ
ᠠᠯᠬᠤᠭᠠ ᠭᠢᠰᠬᠢᠭᠡ ᠶ᠋ᠢ ᠨᠢ ᠣᠯᠤᠭᠠᠳᠤᠢ ᠰᠢᠦ
ᠠᠷᠤ ᠳ᠋ᠠᠭᠠᠨ ᠡᠭᠦᠷᠦᠭᠰᠡᠨ ᠥᠨᠳᠥᠷ ᠫᠤᠤ ᠶ᠋ᠢᠨ
ᠣᠨᠣᠯᠲᠠ ᠲᠤᠰᠤᠯᠲᠠ ᠶ᠋ᠢ ᠨᠢ ᠮᠡᠳᠡᠭᠡᠳᠦᠢ ᠰᠢᠦ
ᠠᠳᠠᠯ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠪᠠᠢᠭᠠᠳ
ᠡᠨᠡ ᠨᠠᠰᠤ ᠶ᠋ᠢ ᠪᠠᠷᠠᠬᠤ ᠪᠠᠷ
ᠠ ᠬᠠ ᠬᠦ
ᠠᠯᠪᠠᠨ ᠴᠡᠷᠢᠭ ᠲᠦ᠍ ᠮᠥᠷᠳᠡᠵᠦ ᠪᠠᠢᠭᠠᠳ
ᠠᠯᠲᠠᠨ ᠳᠡᠯᠡᠬᠡᠢ ᠪᠡᠷ ᠡᠷᠭᠢᠭᠦᠯᠳᠡᠶᠡ᠃
ᠦᠷᠢᠶᠡ ᠬᠦᠯᠦᠭ ᠣᠨᠣᠭᠣᠨ ᠬᠤᠸᠠ ᠶ᠋ᠢᠨ
ᠥᠷᠭᠥᠭᠡ ᠠᠳᠬᠤᠭᠠ ᠶ᠋ᠢ ᠨᠢ ᠣᠯᠤᠭᠠᠳᠤᠢ
ᠥᠨᠳᠥᠷ ᠫᠤᠤ ᠤᠶᠢᠨᠴᠢᠶᠠᠩ ᠤ᠋ᠨ ᠢ᠋ᠶ᠋ᠠᠨ
ᠣᠨᠣᠯᠲᠠ ᠲᠤᠰᠤᠯᠲᠠ ᠶ᠋ᠢ ᠨᠢ ᠮᠡᠳᠡᠭᠡᠳᠦᠢ
ᠡᠷᠦᠬᠡ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠪᠠᠢᠭᠠᠳ
ᠡᠨᠡ ᠨᠠᠰᠤ ᠶ᠋ᠢ ᠪᠠᠷᠠᠬᠤ ᠪᠠᠷ
ᠠ ᠬᠠ ᠬᠦ
ᠡᠷᠳᠡᠨᠢᠪᠢᠯᠢᠭ ᠢ ᠳᠠᠭᠠᠵᠤ ᠪᠠᠢᠭᠠᠳ
ᠶᠢᠷᠲᠢᠨᠴᠦ ᠳᠡᠯᠡᠬᠡᠢ ᠪᠡᠷ ᠲᠣᠭᠣᠷᠢᠶᠠ
ᠵᠢᠨᠰᠢᠶᠠᠩ ᠡᠭᠦᠨ ᠢ ᠰᠣᠨᠣᠰᠤᠭᠠᠳ ᠬᠡᠯᠡᠵᠦ ᠪᠠᠢᠨᠠ᠄
ᠡᠦ ᠲᠦᠩᠱᠦ ᠮᠣᠳᠣ ᠴᠢᠨᠢ
ᠢᠯᠵᠢᠷᠡᠭᠡᠳ ᠤᠨᠠᠬᠤ ᠳ᠋ᠤ᠌ ᠭᠠᠢᠭᠤᠢ ᠳᠠ ᠬᠦ
ᠥᠲᠥᠨ ᠵᠢᠭᠦᠷ ᠲᠡᠢ ᠢᠩᠭᠡᠷ ᠰᠢᠪᠠᠭᠤ ᠴᠢᠨᠢ
ᠬᠠᠮᠢᠭᠠ ᠪᠠᠨ ᠰᠠᠭᠤᠵᠤ ᠳᠣᠩᠭᠣᠳᠤᠶᠠ ᠳᠠ
ᠦᠶᠡᠷᠬᠡᠵᠦ ᠨᠠᠠᠭᠠᠳᠣᠭᠰᠠᠨ ᠳᠠᠨᠠᠪᠠᠯ ᠠᠬᠠ ᠮᠢᠨᠢ
ᠡᠵᠡᠨ ᠦ᠌ ᠴᠡᠷᠢᠭ ᠲᠦ᠍ ᠮᠣᠷᠳᠠᠪᠠᠯ ᠳᠠ
ᠠ ᠬᠠ ᠬᠦ
ᠦᠯᠡᠳᠡᠵᠦ ᠬᠣᠴᠣᠷᠠᠭᠰᠠᠨ ᠶᠢᠨᠰᠢᠶᠠᠩ ᠴᠢᠨᠢ
ᠬᠡᠨ ᠢ᠋ᠶ᠋ᠡᠨ ᠬᠠᠷᠠᠵᠤ ᠰᠠᠭᠤᠶᠠ ᠳᠠ
ᠬᠠᠢᠯᠠᠰᠤ ᠮᠠᠢᠯᠠᠰᠤᠨ ᠮᠣᠳᠣ ᠴᠢᠨᠢ
ᠬᠠᠢᠪᠠᠢᠭᠠᠳ ᠯᠠ ᠤᠨᠠᠪᠠᠯ
ᠬᠠᠢᠴᠢᠨ ᠵᠢᠭᠦᠷ ᠲᠡᠢ ᠢᠩᠭᠡᠷ ᠰᠢᠪᠠᠭᠤ ᠴᠢᠨᠢ
ᠬᠠᠮᠢᠭᠠ ᠨᠢ ᠰᠠᠭᠤᠵᠤ ᠳᠣᠩᠭᠣᠳᠤᠶᠠ ᠳᠠ
ᠬᠠᠢᠷᠠᠯᠠᠵᠤ ᠰᠠᠨᠠᠭᠰᠠᠨ ᠳᠠᠨᠠᠪᠠᠯ ᠠᠬᠠ ᠮᠢᠨᠢ
ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠮᠣᠷᠳᠠᠪᠠᠯ
ᠠ ᠬᠠ ᠬᠦ
ᠬᠣᠴᠣᠷᠤᠭᠠᠳ ᠦᠯᠡᠳᠡᠭᠰᠡᠨ ᠵᠢᠨᠰᠢᠶᠠᠩ ᠴᠢᠨᠢ
ᠬᠡᠨ ᠢ᠋ᠶ᠋ᠡᠨ ᠬᠠᠷᠠᠵᠤ ᠰᠠᠭᠤᠶᠠ ᠳᠠ᠃
ᠳᠠᠨᠠᠪᠠᠯ ᠵᠢᠨᠰᠢᠶᠠᠩ ᠢ᠋ᠶ᠋ᠠᠨ ᠢᠳᠬᠠᠵᠤ ᠬᠡᠯᠡᠵᠦ ᠪᠠᠢᠬᠤ ᠨᠢ᠄
ᠡᠦ ᠲᠦᠩᠱᠦ ᠮᠣᠳᠣ ᠴᠢᠨᠢ
ᠢᠯᠵᠢᠷᠡᠭᠡᠳ ᠤᠨᠠᠪᠠᠯ ᠳᠠ ᠬᠦ
ᠥᠲᠥᠨ ᠵᠢᠭᠦᠷ ᠲᠡᠢ ᠢᠩᠭᠡᠷ ᠰᠢᠪᠠᠭᠤ ᠴᠢᠨᠢ
ᠥᠨᠳᠥᠷ ᠠᠭᠤᠯᠠᠨ ᠳ᠋ᠠᠭᠠᠨ ᠳᠣᠩᠭᠣᠳᠬᠤ ᠦᠭᠡᠢ ᠤᠤ ᠳᠠ
ᠦᠶᠡᠷᠬᠡᠵᠦ ᠨᠠᠭᠠᠳᠤᠭᠰᠠᠨ ᠳᠠᠨᠠᠪᠠᠯ ᠠᠬᠠ ᠴᠢᠨᠢ
ᠡᠵᠡᠨ ᠦ᠌ ᠴᠡᠷᠢᠭ ᠲᠦ᠍ ᠮᠣᠷᠳᠠᠪᠠᠴᠤ
ᠠ ᠬᠠ ᠬᠦ
ᠡᠷᠭᠢᠬᠦ ᠵᠢᠯ ᠦ᠋ᠨ ᠭᠤᠷᠪᠠᠨ ᠰᠠᠷᠠ ᠳ᠋ᠠᠭᠠᠨ
ᠴᠢᠯᠥᠭᠡ ᠭᠤᠶᠤᠵᠤ ᠢᠷᠡᠬᠦ ᠦᠭᠡᠢ ᠤᠤ ᠳᠠ᠃
ᠬᠠᠢᠯᠠᠰᠤ ᠮᠠᠢᠯᠠᠰᠤ ᠮᠣᠳᠣ ᠴᠢᠨᠢ
ᠬᠠᠢᠪᠠᠢᠭᠠᠳ ᠤᠨᠠᠪᠠᠯ
ᠬᠠᠢᠴᠢᠨ ᠵᠢᠭᠦᠷ ᠲᠡᠢ ᠢᠩᠭᠡᠷ ᠰᠢᠪᠠᠭᠤ
ᠬᠠᠳᠠᠨ ᠤ᠋ ᠳᠡᠭᠡᠷᠡ ᠪᠡᠨ ᠳᠣᠩᠭᠣᠳᠬᠤ ᠦᠭᠡᠢ ᠤᠤ ᠳᠠ
ᠬᠠᠢᠷᠠᠯᠠᠵᠤ ᠰᠠᠨᠠᠭᠰᠠᠨ ᠳᠠᠨᠠᠪᠠᠯ ᠠᠬᠠ ᠴᠢᠨᠢ
ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠮᠣᠷᠳᠠᠪᠠᠴᠤ
ᠠ ᠬᠠ ᠬᠦ
ᠬᠣᠢᠲᠤ ᠶ᠋ᠢᠨ ᠵᠢᠯ ᠦ᠋ᠨ ᠭᠤᠷᠪᠠᠨ ᠰᠠᠷᠠ ᠳ᠋ᠠᠭᠠᠨ
ᠴᠢᠯᠥᠭᠡ ᠭᠤᠶᠤᠵᠤ ᠢᠷᠡᠬᠦ ᠦᠭᠡᠢ ᠤᠤ ᠳᠠ᠃
ᠵᠢᠨᠰᠢᠶᠠᠩ᠂ ᠳᠠᠨᠠᠪᠠᠯ ᠤ᠋ᠨ ᠬᠡᠵᠢᠶᠡ ᠶᠠᠪᠤᠬᠤ ᠶ᠋ᠢ ᠯᠠᠪᠯᠠᠭᠰᠠᠨ ᠳ᠋ᠤ᠌ ᠳᠠᠨᠠᠪᠠᠯ᠄《 ᠡᠨᠡ ᠰᠥᠨᠢ ᠬᠦᠵᠢ ᠶ᠋ᠢᠨ ᠭᠠᠯ ᠤᠨᠲᠠᠷᠠᠵᠤ᠂ ᠬᠥᠮᠦᠨ ᠦ᠌ ᠬᠥᠯ ᠬᠤᠷᠢᠶᠠᠬᠤ ᠴᠠᠭ ᠲᠤ᠌ ᠮᠣᠷᠳᠠᠨᠠ》 ᠭᠡᠴᠦ ᠬᠡᠯᠡᠪᠡ ᠃ ᠵᠢᠨᠰᠢᠶᠠᠩ᠄ 《 ᠲᠡᠢᠮᠦ ᠪᠣᠯ ᠪᠢ ᠴᠢᠮᠠ ᠶ᠋ᠢ ᠬᠦᠷᠭᠡᠶᠡ ᠂ ᠠᠬᠠ ᠮᠢᠨᠢ ᠴᠢ ᠨᠠᠮᠠ ᠶ᠋ᠢ ᠴᠤᠪᠤᠭᠠ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠬᠠᠢᠯᠠᠰᠤᠨ ᠮᠣᠳᠣᠨ ᠤ᠋ ᠳᠣᠣᠷᠠ ᠠᠩᠬᠠᠷᠴᠤ ᠪᠠᠢᠭᠠᠷᠠᠢ》 ᠭᠡᠵᠦ ᠪᠣᠯᠵᠣᠭᠠ ᠲᠣᠭᠲᠠᠭᠰᠠᠨ ᠪᠠᠢᠨᠠ ᠃
ᠰᠠᠷᠠᠭᠤᠯ ᠰᠥᠨᠢ ᠂ ᠳᠠᠨᠠᠪᠠᠯ ᠮᠣᠷᠢ ᠪᠠᠨ ᠬᠥᠲᠥᠯᠵᠦ ᠂ ᠪᠣᠯᠵᠣᠭᠰᠠᠨ ᠶᠣᠰᠣ ᠪᠠᠷ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠵᠢᠨᠰᠢᠶᠠᠩ ᠬᠠᠷᠢᠨ ᠬᠡᠳᠦᠢᠨᠡᠢ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃ ᠴᠢᠩᠭᠢᠭᠡᠳ ᠬᠣᠶᠠᠭᠤᠯᠠ ᠬᠠᠢᠯᠠᠰᠤᠨ ᠮᠣᠳᠣᠨ ᠳᠣᠣᠷᠠ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠰᠠᠯᠬᠤ ᠶ᠋ᠢᠨ ᠦᠭᠡ ᠪᠡᠨ ᠰᠠᠢᠲᠤᠷ ᠶᠠᠷᠢᠯᠴᠠᠵᠤ ᠵᠢᠨᠰᠢᠶᠠᠩ ᠂ ᠡᠪᠦᠷ ᠡᠴᠡ ᠪᠡᠨ ᠨᠢᠭᠡᠨ ᠪᠠᠭᠯᠠᠭᠠ ᠵᠠᠭᠤᠮᠠ ᠭᠠᠷᠭᠠᠵᠤ ᠳᠠᠨᠠᠪᠠᠯ ᠳ᠋ᠠᠭᠠᠨ ᠳᠤᠷᠠᠰᠬᠠᠯ ᠪᠣᠯᠭᠠᠵᠤ ᠦᠭᠭᠦᠭᠰᠡᠨ ᠳ᠋ᠦ᠍ ᠳᠠᠨᠠᠪᠠᠯ ᠲᠡᠭᠦᠨ ᠢ᠋ ᠠᠯᠳᠠᠷᠠᠭᠠᠵᠤ ᠦᠵᠡᠭᠰᠡᠨ ᠴᠢᠨᠢ ᠄
ᠡᠷᠪᠡᠬᠡᠢ ᠪᠣᠯᠤᠨ ᠴᠢᠩᠴᠤᠬᠡᠢ ᠪᠡᠨ
ᠡᠷᠭᠢᠭᠦᠯᠵᠦ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠠ᠋
ᠸᠧᠢ ᠳᠠᠩ ᠯᠢᠩᠬᠤᠠ ᠴᠡᠴᠡᠭ ᠬᠤᠸᠠᠷ ᠢ᠋ᠶ᠋ᠠᠨ
ᠳᠡᠯᠭᠡᠷᠡᠭᠦᠯᠵᠦ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠠ᠋
ᠦᠨᠡᠨ ᠰᠡᠳᠬᠢᠯ ᠤᠬᠠᠭᠠᠨ ᠰᠠᠭᠠᠭᠠ ᠪᠠᠨ
ᠰᠢᠩᠭᠡᠭᠡᠵᠦ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠠ᠋
ᠠ ᠬᠠ ᠺᠣᠨ
ᠦᠶᠡ ᠶ᠋ᠢᠨ ᠬᠣᠩᠭᠣᠷ ᠠᠬᠠ ᠴᠢᠮᠠ ᠳ᠋ᠠᠭᠠᠨ
ᠪᠡᠯᠡᠭ ᠪᠣᠯᠭᠠᠭᠰᠠᠨ ᠠᠯᠴᠢᠭᠤᠷ ᠠ᠋᠃
ᠬᠠᠨ ᠭᠠᠷᠤᠳᠢ ᠰᠢᠪᠠᠭᠤ ᠪᠠᠨ
ᠳᠣᠩᠭᠣᠳᠤᠭᠤᠯᠵᠤ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠠ᠋
ᠬᠠᠢᠲᠠᠩ ᠯᠢᠩᠬᠤᠠ ᠴᠡᠴᠡᠭ ᠢ᠋ᠶ᠋ᠡᠨ
ᠬᠠᠷᠠᠭᠤᠯᠵᠤ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠠ᠋
ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ ᠬᠠᠯᠠᠭᠤᠨ ᠰᠠᠨᠠᠭᠠ ᠪᠠᠨ
ᠰᠢᠩᠭᠡᠭᠡᠵᠦ ᠣᠶᠣᠭᠰᠠᠨ ᠠᠯᠴᠢᠭᠤᠷ ᠠ᠋
ᠠ ᠬᠠ ᠬᠦ
ᠬᠠᠢᠷᠠᠲᠤ ᠠᠮᠠᠷᠠᠭ ᠠᠬᠠ ᠴᠢᠮᠠ ᠳ᠋ᠠᠭᠠᠨ
ᠪᠡᠯᠡᠭ ᠪᠣᠯᠭᠠᠭᠰᠠᠨ ᠠᠯᠴᠢᠭᠤᠷ ᠠ᠋᠃
ᠳᠠᠨᠠᠪᠯ ᠠᠯᠴᠢᠭᠤᠷ ᠢ᠋ ᠲᠣᠰᠴᠤ ᠠᠪᠤᠭᠠᠳ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠳ᠋ᠡᠭᠡᠨ ᠢᠩᠭᠢᠵᠦ ᠬᠡᠯᠡᠵᠦ ᠪᠠᠢᠨᠠ᠄
ᠬᠥᠬᠡ ᠲᠣᠷᠭᠠᠨ ᠠᠯᠴᠢᠭᠤᠷ ᠢ᠋ ᠴᠢᠨᠢ
ᠬᠥᠪᠡᠭᠡ ᠶ᠋ᠢ ᠨᠢ ᠪᠠᠷᠠᠭᠳᠠᠲᠠᠯᠠ ᠬᠠᠳᠠᠭᠠᠯᠠᠶᠠ
ᠬᠥᠭᠡᠷᠦᠬᠦᠨ ᠪᠠᠭᠠ ᠵᠢᠨᠰᠢᠶᠠᠩ ᠴᠢᠮᠠ ᠪᠠᠨ
ᠬᠥᠨᠳᠡᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠣᠳᠣᠵᠤ ᠶᠠᠪᠤᠶᠠ
ᠵᠢᠨᠰᠢᠶᠠᠩ ᠬᠡᠯᠡᠭᠰᠡᠨ ᠨᠢ᠄
ᠪᠣᠷᠣ ᠲᠣᠷᠭᠠᠨ ᠠᠯᠴᠢᠭᠤᠷ ᠢ᠋ ᠮᠢᠨᠢ
ᠪᠣᠳᠣᠭ ᠢ᠋ ᠨᠢ ᠤᠨᠠᠲᠠᠯᠠ ᠬᠠᠳᠠᠭᠠᠯᠠᠭᠠᠷᠠᠢ ᠳᠠ
ᠠ ᠬᠠ ᠬᠦ
ᠪᠣᠯᠪᠠᠷᠬᠠᠨ ᠲᠥᠷᠥᠭᠰᠡᠨ ᠵᠢᠨᠰᠢᠶᠠᠩ ᠴᠢᠨᠢ
ᠪᠤᠭᠤᠷᠤᠯ ᠪᠣᠯᠲᠠᠯᠠ ᠪᠠᠨ ᠬᠦᠯᠢᠶᠡᠶᠡ ᠳᠠ᠃
ᠳᠠᠨᠠᠪᠠᠯ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠵᠢᠨᠰᠢᠶᠠᠩ ᠠ᠋ᠴᠠ ᠪᠠᠨ ᠰᠠᠯᠵᠤ ᠶᠠᠪᠤᠯᠠ᠂ ᠵᠢᠨᠰᠢᠶᠠᠩ ᠭᠠᠭᠴᠠᠭᠠᠷ ᠬᠣᠴᠣᠷᠴᠤ ᠠᠮᠠᠷᠠᠭ ᠤ᠋ᠨ ᠢ᠋ᠶ᠋ᠠᠨ ᠬᠣᠢᠨᠠ ᠠ᠋ᠴᠠ ᠳᠠᠯᠠᠯᠵᠤ
ᠵᠣᠭᠰᠣᠨᠠ᠃
ᠠᠷᠤ ᠶ᠋ᠢᠨ ᠰᠠᠢᠬᠠᠨ ᠭᠡᠵᠢᠭᠡ ᠶ᠋ᠢ ᠪᠡᠨ
ᠠᠶᠠ ᠲᠠᠢ ᠬᠣᠯᠪᠣᠭᠰᠠᠨ ᠴᠤ᠌ ᠪᠣᠯᠤᠶᠠ ᠳᠠ
ᠠᠳᠠᠯ ᠭᠡᠷ ᠲᠦ᠍ ᠪᠡᠨ ᠰᠠᠭᠤᠵᠤ ᠪᠠᠢᠮᠠᠨᠵᠢᠨ
ᠠᠬᠠ ᠴᠢᠮᠠ ᠪᠠᠨ ᠬᠦᠯᠢᠶᠡᠬᠦ ᠦᠭᠡᠢ ᠤᠤ ᠳᠠ
ᠠᠯᠠᠭ ᠬᠣᠶᠠᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ
ᠠᠮᠠᠷᠠᠭᠯᠠᠵᠤ ᠳᠠᠰᠤᠯᠴᠠᠭᠰᠠᠨ ᠲᠤᠯᠠᠳᠠ
ᠠ ᠬᠠ ᠬᠦ
ᠠᠮᠠᠷᠠᠭ ᠬᠣᠩᠭᠣᠷ ᠤ᠋ᠨ ᠢ᠋ᠶ᠋ᠠᠨ ᠬᠣᠢᠨᠠ ᠠ᠋ᠴᠠ
ᠠᠰᠬᠠᠷᠠᠭᠤᠯᠵᠤ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠥᠨᠳᠥᠷ ᠰᠠᠢᠬᠠᠨ ᠭᠡᠵᠢᠭᠡ ᠶ᠋ᠢ ᠪᠡᠨ
ᠡᠪᠬᠡᠵᠦ ᠬᠣᠯᠪᠣᠭᠰᠠᠨ ᠴᠤ᠌ ᠪᠣᠯᠤᠶᠠ ᠳᠠ
ᠡᠷᠦᠬᠡ ᠭᠡᠷ ᠲᠦ᠍ ᠴᠢᠨᠢ ᠰᠠᠭᠤᠵᠤ ᠪᠠᠢᠭᠠᠳ
ᠠᠬᠠ ᠴᠢᠮᠠ ᠪᠠᠨ ᠬᠦᠯᠢᠶᠡᠬᠦ ᠦᠭᠡᠢ ᠤᠤ ᠳᠠ
ᠡᠷᠢᠶᠡᠨ ᠠᠯᠠᠭ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ
ᠡᠶᠡᠰᠡᠵᠦ ᠳᠠᠰᠤᠯᠴᠠᠭᠰᠠᠨ ᠲᠤᠯᠠᠳᠠ
ᠠ ᠬᠠ ᠬᠦ
ᠦᠶᠡ ᠶ᠋ᠢᠨ ᠬᠣᠩᠭᠣᠷ ᠤ᠋ᠨ ᠢ᠋ᠶ᠋ᠠᠨ ᠬᠣᠢᠨᠠ ᠠ᠋ᠴᠠ
ᠡᠪᠬᠡᠷᠡᠭᠦᠯᠵᠦ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠬᠠᠪᠤᠷ ᠤ᠋ᠨ ᠨᠠᠷᠠᠨ ᠤ᠋
ᠬᠠᠯᠠᠭᠤᠨ ᠨᠢ ᠰᠠᠢᠬᠠᠨ ᠠ᠋
ᠬᠠᠭᠳᠠ ᠨᠣᠭᠣᠭᠠ ᠶ᠋ᠢᠨ
ᠬᠥᠬᠡᠷᠡᠵᠦ ᠴᠡᠯᠭᠡᠷᠡᠭᠰᠡᠨ ᠨᠢ ᠰᠠᠢᠬᠠᠨ ᠠ᠋
ᠬᠠᠢᠷᠬᠠᠨ ᠲᠥᠷᠥᠭᠰᠡᠨ ᠵᠢᠨᠰᠢᠶᠠᠩ ᠢ᠋ᠶ᠋ᠠᠨ
ᠪᠣᠳᠣᠵᠤ ᠰᠠᠨᠠᠭᠠᠳ ᠢᠷᠡᠪᠡᠯ ᠳᠠ
ᠠ ᠬᠠ ᠬᠦ
ᠬᠠᠷᠠᠬᠤ ᠨᠢᠳᠦᠨ ᠦ᠌ ᠬᠠᠯᠠᠭᠤᠨ ᠨᠢᠯᠪᠤᠰᠤ
ᠬᠠᠮᠠᠷ ᠤᠷᠤᠭᠤ ᠤᠷᠤᠰᠤᠨᠠ ᠃
ᠡᠳᠦᠷ ᠦ᠋ᠨ ᠨᠠᠷᠠᠨ ᠤ᠋
ᠢᠯᠴᠢ ᠲᠡᠢ ᠨᠢ ᠰᠠᠢᠬᠠᠨ ᠠ᠋
ᠥᠩᠭᠡ ᠪᠦᠷᠢ ᠶ᠋ᠢᠨ ᠴᠡᠴᠡᠭ ᠬᠤᠸᠠᠷ ᠤ᠋ᠨ
ᠳᠡᠯᠭᠡᠷᠡᠬᠦ ᠨᠢ ᠰᠠᠢᠬᠠᠨ ᠠ᠋
ᠦᠶᠡ ᠶ᠋ᠢᠨ ᠠᠮᠠᠷᠠᠭ ᠠᠮᠠᠷᠠᠭ ᠵᠢᠨᠰᠢᠶᠠᠩ ᠢ᠋ᠶ᠋ᠠᠨ
ᠪᠣᠳᠣᠵᠤ ᠰᠠᠨᠠᠭᠠᠳ ᠢᠷᠡᠪᠡᠯ ᠳᠠ
ᠠ ᠬᠠ ᠬᠦ
ᠦᠵᠡᠬᠦ ᠨᠢᠳᠦᠨ ᠦ᠌ ᠬᠠᠯᠠᠭᠤᠨ ᠨᠢᠯᠪᠤᠰᠤ
ᠡᠩᠭᠡᠷ ᠤᠷᠤᠭᠤ ᠪᠥᠮᠪᠥᠷᠢᠨᠡ᠃
ᠬᠠᠪᠤᠷ ᠤ᠋ᠨ ᠴᠠᠭ᠂ ᠨᠢᠭᠡᠨ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠡᠳᠦᠷ ᠳᠠᠨᠠᠪᠠᠯ᠂ ᠬᠥᠳᠡᠭᠡ ᠲᠠᠯᠠ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠬᠠᠯᠠᠭᠤᠨ ᠨᠠᠷᠠᠨ ᠤ᠋ ᠢᠯᠴᠢᠨ ᠳ᠋ᠦ᠍ ᠬᠠᠮᠤᠭ ᠪᠣᠳᠠᠰ ᠤ᠋ᠨ ᠠᠮᠢᠯᠠᠨ ᠰᠡᠷᠭᠦᠬᠦ ᠪᠠᠢᠳᠠᠯ ᠢ᠋ ᠦᠵᠡᠵᠦ᠂ ᠠᠮᠠᠷᠠᠭ ᠵᠢᠨᠰᠢᠶᠠᠩ ᠨᠢ ᠰᠠᠨᠠᠭᠳᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠵᠢᠷᠦᠬᠡ ᠨᠢ ᠤᠶᠠᠷᠠᠨᠠ᠃
ᠳᠠᠨᠠᠪᠠᠯ ᠬᠤᠰᠢᠭᠤᠨ ᠴᠡᠷᠢᠭ ᠲᠦ᠍ ᠣᠷᠣᠭᠠᠳ ᠤᠳᠠᠯ ᠦᠭᠡᠢ ᠭᠤᠷᠪᠠᠨ ᠵᠢᠯ ᠥᠩᠭᠡᠷᠡᠭᠰᠡᠨ ᠪᠠᠢᠨᠠ᠂ ᠡᠨᠡ ᠬᠣᠭᠣᠷᠣᠨᠳᠣ ᠳᠠᠨᠠᠪᠠᠯ ᠬᠠᠷᠭᠢᠰ ᠨᠣᠶᠠᠨ ᠡᠷᠳᠡᠨᠢᠪᠢᠯᠢᠭ ᠦ᠋ᠨ ᠠᠷᠠᠳ ᠢ᠋ ᠳᠠᠷᠤᠯᠠᠵᠤ᠂ ᠴᠡᠷᠢᠭ ᠦ᠋ᠳ ᠢ᠋ ᠵᠣᠪᠠᠭᠠᠬᠤ ᠪᠠᠢᠳᠠᠯ ᠢ᠋ ᠦᠵᠡᠭᠰᠡᠭᠡᠷ ᠨᠢᠭᠡᠨᠲᠡ ᠤᠷᠮᠠ ᠬᠤᠭᠤᠷᠠᠵᠤ ᠠᠭᠤᠷ ᠬᠥᠳᠡᠯᠦᠭᠰᠡᠨ ᠲᠤᠯᠠ᠂ ᠬᠤᠰᠢᠭᠤᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠳᠠᠬᠢᠵᠤ ᠰᠠᠭᠤᠬᠤ ᠰᠠᠨᠠᠭᠠ ᠣᠭᠲᠣ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠬᠡᠭᠡᠷᠡ ᠲᠠᠯᠠ ᠪᠠᠷ ᠲᠣᠭᠣᠷᠢᠨ ᠤᠢᠳᠬᠠᠷ ᠰᠡᠷᠭᠦᠭᠡᠵᠦ ᠭᠣᠣᠯ ᠭᠣᠷᠣᠬᠠ ᠬᠠᠷᠴᠢᠭᠢᠨᠠᠨ ᠤᠷᠤᠰᠴᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠳᠠᠨᠠᠪᠠᠯ᠂ ᠥᠪᠡᠷ ᠦ᠋ᠨ ᠥᠰᠴᠦ ᠲᠥᠷᠥᠭᠰᠡᠨ ᠨᠤᠲᠤᠭ ᠣᠷᠣᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠳ᠋ᠠᠭᠠᠨ ᠪᠠᠰᠠ ᠢᠩᠭᠢᠵᠦ ᠳᠠᠭᠤᠯᠠᠨᠠ᠄
ᠵᠢᠷᠪᠢᠰ ᠵᠢᠷᠪᠢᠰ ᠤᠷᠤᠰᠤᠭᠠᠳ ᠪᠠᠢᠬᠤ ᠨᠢ
ᠵᠡᠭᠦᠨ ᠪᠤᠯᠠᠭ ᠤ᠋ᠨ ᠤᠰᠤ ᠶᠤᠮ ᠪᠠ
ᠵᠦᠢᠯ ᠦ᠋ᠨ ᠬᠣᠶᠠᠷ ᠢ᠋ᠶ᠋ᠠᠷ ᠳᠣᠩᠭᠣᠳᠤᠭᠠᠳ ᠪᠠᠢᠬᠤ ᠨᠢ
ᠵᠢᠭᠦᠷ ᠨᠢ ᠠᠯᠠᠭ ᠰᠢᠪᠠᠭᠤᠳ ᠪᠠ
ᠵᠦᠢᠲᠡᠢ ᠲᠥᠷᠥᠭᠰᠡᠨ ᠵᠢᠨᠰᠢᠶᠠᠩ ᠢ᠋ᠶ᠋ᠠᠨ
ᠪᠣᠳᠣᠵᠤ ᠰᠠᠨᠠᠭᠠᠳ ᠢᠷᠡᠪᠡᠯ ᠳᠠ
ᠠ ᠬᠠ ᠬᠦ
ᠵᠢᠷᠦᠬᠡ ᠭᠣᠣᠯ ᠬᠣᠶᠠᠷ ᠢ᠋ ᠮᠢᠨᠢ
ᠵᠣᠷᠭᠣᠵᠤ ᠪᠠᠢᠮᠠᠷ ᠡᠪᠡᠳᠦᠨᠡ ᠰᠢᠦ᠃
ᠤᠷᠪᠠᠰ ᠤᠷᠪᠠᠰ ᠤᠷᠤᠰᠤᠭᠠᠳ ᠪᠠᠢᠬᠤ ᠨᠢ
ᠤᠷᠲᠤ ᠭᠣᠷᠣᠬᠠ ᠶ᠋ᠢᠨ ᠤᠰᠤ ᠶᠤᠮ ᠪᠠ
ᠤᠷᠠᠯᠠᠭᠤᠯᠵᠤ ᠢᠷᠡᠭᠡᠳ ᠳᠣᠩᠭᠣᠳᠤᠭᠠᠳ ᠪᠠᠢᠬᠤ ᠨᠢ
ᠤᠩᠭᠤᠯᠠᠢ ᠨᠢ ᠠᠯᠠᠭ ᠰᠢᠪᠠᠭᠤᠳ ᠪᠠ
ᠤᠷᠢᠬᠠᠨ ᠪᠠᠭᠠ ᠵᠢᠨᠰᠢᠶᠠᠩ ᠢ᠋ᠶ᠋ᠠᠨ
ᠪᠣᠳᠣᠵᠤ ᠰᠠᠨᠠᠭᠠᠳ ᠢᠷᠡᠪᠡᠯ ᠳᠠ
ᠠ ᠬᠠ ᠬᠦ
ᠠᠭᠤᠰᠬᠢ ᠵᠢᠷᠦᠬᠡ ᠬᠣᠶᠠᠷ ᠢ᠋ ᠮᠢᠨᠢ
ᠣᠭᠲᠣᠯᠵᠤ ᠪᠠᠢᠮᠠᠷ ᠡᠪᠡᠳᠦᠨᠡ ᠰᠢᠦ᠃
ᠡᠨᠡ ᠮᠡᠲᠦ ᠨᠢᠭᠡᠨ ᠵᠡᠷᠭᠡ ᠤᠶᠠᠷᠠᠨ ᠳᠠᠭᠤᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠨᠠᠪᠠᠯ᠂ ᠥᠪᠡᠷ ᠦ᠋ᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ ᠠᠪᠤ ᠡᠵᠢ ᠪᠡᠨ ᠦᠵᠡᠵᠦ ᠠᠮᠠᠷᠠᠭ ᠵᠢᠨᠰᠢᠶᠠᠩ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠪᠠᠷ ᠰᠢᠢᠳᠪᠡ᠄
ᠠᠯᠪᠠᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠠᠭᠠᠨ
ᠡᠷᠭᠢᠭᠡᠳ ᠪᠤᠴᠠᠯᠠ ᠳᠠᠨᠠᠪᠠᠯ ᠠ᠋
ᠠᠬᠠᠮᠠᠳ ᠨᠣᠶᠠᠨ ᠡᠷᠳᠡᠨᠢᠪᠢᠯᠢᠭ ᠢ᠋ᠶ᠋ᠡᠨ
ᠡᠷᠢᠭᠡᠳ ᠢᠷᠡᠯᠡ ᠳᠠᠨᠠᠪᠠᠯ ᠠ᠋
ᠠᠭᠰᠢᠷᠠᠭᠠ ᠪᠣᠯᠤᠭᠰᠠᠨ ᠠᠪᠤ ᠡᠵᠢ
ᠪᠡᠶᠡ ᠮᠠᠭᠤ ᠭᠡᠰᠡᠨ ᠴᠢᠮᠡᠭᠡ ᠲᠡᠢ
ᠠ ᠬᠠ ᠬᠦ
ᠠᠳᠠᠯ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠦᠵᠡᠬᠦ ᠪᠡᠷ
ᠴᠢᠯᠥᠭᠡ ᠭᠤᠶᠤᠴᠢᠯᠠᠵᠠᠢ ᠳᠠᠨᠠᠪᠠᠯ ᠠ᠋ ᠃
ᠡᠵᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠠᠭᠠᠨ
ᠡᠷᠭᠢᠭᠡᠳ ᠪᠤᠴᠠᠯᠠ ᠳᠠᠨᠠᠪᠠᠯ ᠠ᠋
ᠡᠷᠳᠡᠨᠢᠪᠢᠯᠢᠭ ᠲᠦᠩᠯᠢᠩ ᠨᠣᠶᠠᠨ ᠳ᠋ᠠᠭᠠᠨ
ᠡᠦ ᠵᠤᠸᠠᠩ ᠤ᠋ᠨ ᠶᠣᠰᠣ ᠪᠠᠷ ᠮᠡᠳᠡᠭᠦᠯᠵᠡᠢ
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠠᠪᠤ ᠶ᠋ᠢ ᠪᠡᠨ
ᠡᠪᠡᠳᠦᠯᠡ ᠭᠡᠮᠡᠨ ᠰᠣᠨᠣᠰᠴᠠᠢ
ᠠ ᠬᠡᠨ ᠬᠦ
ᠡᠷᠦᠬᠡ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠦᠵᠡᠬᠦ ᠪᠡᠷ
ᠴᠢᠯᠥᠭᠡ ᠭᠤᠶᠤᠴᠢᠯᠠᠵᠠᠢ ᠳᠠᠨᠠᠪᠠᠯ ᠠ᠋᠃
ᠢᠷᠪᠢᠯᠢᠭ ᠲᠦᠩᠯᠢᠩ᠂ ᠳᠠᠨᠠᠪᠠᠯ ᠤ᠋ᠨ ᠴᠢᠯᠥᠭᠡ ᠭᠤᠶᠤᠬᠤ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠳᠤᠷᠠ ᠦᠭᠡᠢᠴᠡᠵᠦ ᠴᠢᠷᠠᠢ ᠪᠠᠷᠤᠢᠯᠭᠠᠨ ᠬᠡᠯᠡᠵᠦ ᠪᠠᠢᠨᠠ᠄
ᠠᠯᠲᠠ ᠪᠣᠯᠤᠨ ᠮᠥᠩᠭᠥ ᠬᠣᠶᠠᠷ ᠢ᠋
ᠠᠪᠴᠤ ᠵᠠᠷᠤᠬᠤ ᠳ᠋ᠤ᠌ ᠲᠠᠨᠠᠪᠠᠯ ᠠ᠋
ᠠᠷᠪᠠᠨ ᠠᠬᠠ ᠶᠢᠰᠦᠨ ᠳᠡᠭᠦᠦ ᠡᠴᠡ
ᠠᠯᠢ ᠨᠢᠭᠡ ᠡᠴᠡ ᠨᠢ ᠳᠤᠲᠠᠭᠤ ᠪᠣᠢ
ᠠᠲᠠᠭᠠᠲᠠᠨ ᠳᠠᠢᠰᠤᠨ ᠠᠷᠪᠢᠳᠴᠤ
ᠠᠷᠤ ᠥᠪᠥᠷ ᠢ᠋ᠶ᠋ᠡᠷ ᠰᠠᠮᠠᠭᠤᠷᠠᠵᠤ ᠪᠠᠢᠬᠤ ᠳ᠋ᠤ᠌
ᠠ ᠬᠠ ᠬᠦ
ᠠᠳᠠᠯ ᠭᠡᠷ ᠲᠡᠭᠡᠨ ᠪᠤᠴᠠᠨᠠ ᠭᠡᠳᠡᠭ ᠨᠢ
ᠡᠨᠡ ᠴᠢᠨᠢ ᠶᠠᠮᠠᠷ ᠰᠠᠨᠠᠭᠠ ᠪᠣᠢ᠃
ᠡᠳ᠋ ᠮᠥᠩᠭᠥ ᠬᠣᠶᠠᠷ ᠠ᠋ᠴᠠ
ᠡᠳ᠋ᠯᠠᠡᠵᠦ ᠵᠠᠷᠤᠬᠤ ᠳ᠋ᠤ᠌ ᠳᠠᠨᠠᠪᠠᠯ ᠠ᠋
ᠶᠢᠰᠦᠨ ᠠᠬᠠ ᠠᠷᠪᠠᠨ ᠳᠡᠭᠦᠦ ᠡᠴᠡ
ᠠᠯᠢ ᠨᠢᠭᠡ ᠡᠴᠡ ᠨᠢ ᠳᠤᠲᠠᠭᠤ ᠪᠣᠢ
ᠥᠰᠢᠶᠡᠲᠡᠨ ᠳᠠᠢᠰᠤᠨ ᠠᠷᠪᠢᠳᠴᠤ
ᠥᠪᠥᠷ ᠠᠷᠤ ᠪᠠᠷ ᠰᠠᠮᠠᠭᠤᠷᠠᠵᠤ ᠪᠠᠢᠬᠤ ᠳ᠋ᠤ᠌
ᠠ ᠬᠠ ᠬᠦ
ᠡᠷᠦᠬᠡ ᠭᠡᠷ ᠲᠡᠭᠡᠨ ᠪᠤᠴᠠᠨᠠ ᠭᠡᠳᠡᠭ ᠨᠢ
ᠡᠨᠡ ᠴᠢᠨᠢ ᠶᠠᠮᠠᠷ ᠰᠠᠨᠠᠭᠠ ᠪᠣᠢ᠃ ᠳᠠᠨᠠᠪᠠᠯ ᠴᠤ᠌ ᠠᠭᠤᠷᠯᠠᠵᠤ ᠡᠷᠳᠡᠨᠢᠪᠢᠯᠢᠭ ᠲᠦᠩᠯᠢᠩ ᠦ᠋ᠨ ᠵᠦᠭ ᠢᠩᠭᠢᠵᠦ ᠬᠠᠷᠢᠭᠤᠯᠤᠭᠰᠠᠨ ᠪᠠᠢᠨᠠ᠄
ᠠᠯᠪᠠᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠴᠢᠨᠢ
ᠢᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠦᠩᠯᠢᠩ ᠠ᠋
ᠠᠪᠤ ᠶ᠋ᠢᠨ ᠪᠤᠶᠠᠨ ᠮᠣᠷᠢ ᠫᠤᠤ ᠲᠠᠢ
ᠠᠰ ᠤ᠋ᠨ ᠰᠠᠢᠨ ᠳᠤᠷᠠ ᠪᠠᠷ ᠢᠷᠡᠯᠡ ᠰᠢᠦ
ᠠᠭᠰᠢᠷᠠᠭᠠ ᠪᠣᠯᠤᠭᠰᠠᠨ ᠠᠪᠤ ᠮᠢᠨᠢ ᠡᠪᠡᠳᠬᠦ ᠳ᠋ᠦ᠍
ᠠᠳᠠᠯ ᠭᠡᠷ ᠲᠦ᠍ ᠮᠢᠨᠢ ᠪᠤᠴᠠᠭᠤᠯᠬᠤ ᠦᠭᠡᠢ ᠪᠣᠯ
ᠠ ᠬᠠ ᠬᠦ
ᠠᠩᠬᠠᠨ ᠤ᠋ ᠢᠷᠡᠭᠰᠡᠨ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ
ᠡᠷᠭᠢᠵᠦ ᠪᠤᠴᠠᠨᠠ ᠪᠡᠶᠡ ᠮᠢᠨᠢ ᠠ᠋᠃
ᠡᠵᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠴᠢᠨᠢ
ᠢᠷᠡᠬᠦ ᠶ᠋ᠢᠨ ᠦᠶᠡᠰ ᠲᠦ᠍ ᠲᠦᠩᠯᠢᠶᠩ ᠠ᠋
ᠡᠴᠢᠭᠡ ᠶ᠋ᠢᠨ ᠪᠤᠶᠠᠨ ᠮᠣᠷᠢ ᠫᠤᠤ ᠲᠠᠢ ᠪᠠᠨ
ᠥᠪᠡᠷ ᠦ᠋ᠨ ᠰᠠᠢᠨ ᠳᠤᠷᠠ ᠪᠠᠷ ᠢᠷᠡᠯᠡ ᠰᠢᠦ
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠠᠪᠤ ᠮᠢᠨᠢ ᠡᠪᠡᠳᠬᠦ ᠳ᠋ᠦ᠍
ᠡᠷᠦᠬᠡ ᠭᠡᠷ ᠲᠦ᠍ ᠮᠢᠨᠢ ᠬᠠᠷᠢᠭᠤᠯᠬᠤ ᠦᠭᠡᠢ ᠪᠣᠯ
ᠠ ᠬᠠ ᠬᠦ
ᠡᠷᠲᠡ ᠶ᠋ᠢᠨ ᠢᠷᠡᠭᠰᠡᠨ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ
ᠡᠷᠭᠢᠵᠦ ᠪᠤᠴᠠᠨᠠ ᠪᠡᠶᠡ ᠮᠢᠨᠢ ᠠ᠋᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠳᠠᠨᠠᠪᠠᠯ ᠰᠥᠨᠢ ᠳᠦᠯᠢ ᠪᠡᠷ ᠰᠡᠮᠡᠭᠡᠷᠬᠡᠨ ᠪᠣᠰᠴᠤ ᠴᠡᠷᠢᠭ ᠦ᠋ᠨ ᠬᠤᠪᠴᠠᠰᠤ ᠪᠠᠨ ᠬᠠᠯᠠᠭᠠᠳ᠂ ᠫᠤᠤ ᠡᠭᠦᠷᠦᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠠ᠋ᠴᠠ ᠤᠷᠭᠤᠨ ᠭᠠᠷᠪᠠ᠃
ᠡᠷᠳᠡᠨᠢᠪᠢᠯᠢᠭ ᠲᠦᠩᠯᠢᠩ᠂ ᠳᠠᠨᠠᠪᠠᠯ ᠤ᠋ᠨ ᠤᠷᠭᠤᠭᠰᠠᠨ ᠢ᠋ ᠮᠡᠳᠡᠵᠦ ᠲᠡᠰᠬᠡᠯ ᠦᠭᠡᠢ ᠠᠭᠤᠷᠯᠠᠨ᠂ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠪᠠᠷᠢᠬᠤ ᠪᠠᠷ ᠨᠡᠬᠡᠵᠦ ᠭᠠᠷᠤᠭᠰᠠᠨ ᠪᠠᠢᠨᠠ᠃
ᠳᠠᠨᠠᠪᠠᠯ ᠴᠤ᠌ ᠴᠡᠷᠢᠭ ᠦ᠋ᠳ ᠨᠢᠭᠡᠨᠲᠡ ᠬᠣᠢᠨᠠ ᠠ᠋ᠴᠠ ᠨᠢ ᠨᠡᠬᠡᠵᠦ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠡᠳ ᠳᠠᠭᠤᠯᠠᠵᠤ ᠪᠠᠢᠬᠤ ᠨᠢ᠄
ᠠᠷᠪᠠ ᠲᠠᠪᠤᠨ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ
ᠨᠡᠬᠡᠭᠡᠳ ᠬᠦᠷᠦᠭᠡᠳ ᠢᠷᠡᠪᠡᠯ ᠳᠠ
ᠠᠶᠤᠤᠯᠢᠬᠠᠢ ᠴᠡᠭᠡᠵᠢᠨ ᠦ᠌ ᠬᠡᠳᠦᠨ ᠦᠭᠡ ᠪᠡᠨ
ᠬᠡᠯᠡᠵᠦ ᠪᠠᠢᠭᠠᠳ ᠡᠷᠭᠢᠭᠦᠯᠦᠶᠡ
ᠠᠯᠪᠠᠨ ᠨᠣᠶᠠᠨ ᠡᠷᠳᠡᠨᠢᠪᠢᠯᠢᠭ
ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠦᠷᠦᠭᠡᠳ ᠢᠷᠡᠪᠡᠯ
ᠳᠠ ᠠ ᠬᠠ ᠬᠦ
ᠠᠷᠤ ᠳ᠋ᠠᠭᠠᠨ ᠡᠭᠦᠷᠦᠭᠰᠡᠨ ᠫᠤᠤ ᠪᠠᠷ ᠢ᠋ᠶ᠋ᠠᠨ
ᠫᠤᠤᠳᠠᠵᠤ ᠪᠠᠢᠭᠠᠳ ᠡᠷᠭᠢᠭᠦᠯᠦᠶᠡ᠃
ᠶᠢᠰᠦ ᠠᠷᠪᠠᠨ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ
ᠡᠷᠭᠢᠭᠡᠳ ᠨᠡᠬᠡᠭᠡᠳ ᠢᠷᠡᠪᠡᠯ ᠳᠠ
ᠦᠷᠢᠶᠡ ᠬᠦᠯᠦᠭ ᠤᠨᠤᠭᠠᠨ ᠬᠤᠸᠠ ᠶ᠋ᠢᠨ
ᠭᠦᠶᠦᠳᠡᠯ ᠨᠢ ᠮᠡᠳᠡᠭ ᠠ᠋
ᠡᠷᠳᠡᠨᠢᠪᠢᠯᠢᠭ ᠲᠦᠩᠯᠢᠩ ᠨᠣᠶᠠᠨ
ᠥᠪᠡᠷ ᠢ᠋ᠶ᠋ᠡᠨ ᠨᠡᠬᠡᠭᠡᠳ ᠢᠷᠡᠪᠡᠯ ᠳᠠ
ᠠ ᠬᠠ ᠬᠦ
ᠥᠨᠳᠥᠷ ᠫᠤᠤ ᠥᠢᠨᠴᠢᠶᠠᠩ ᠤ᠋ᠨ ᠮᠢᠨᠢ
ᠣᠨᠣᠯᠲᠠ ᠶ᠋ᠢ ᠮᠡᠳᠡᠭ ᠠ᠋᠃
ᠳᠠᠨᠠᠪᠠᠯ ᠂ ᠡᠷᠳᠡᠨᠢᠪᠢᠯᠢᠭ ᠦ᠋ᠨ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠨᠡᠬᠡᠵᠦ ᠣᠢᠷᠠᠲᠤᠭᠰᠠᠨ ᠢ᠋ ᠦᠵᠡᠮᠡᠭᠴᠡ ᠳᠠᠷᠤᠢ ᠫᠤᠤ ᠪᠠᠨ ᠠᠪᠴᠤ ᠭᠡᠳᠡᠷᠭᠦ ᠬᠠᠨᠳᠤᠵᠤ ᠨᠢᠭᠡ ᠫᠤᠤᠳᠠᠭᠰᠠᠨ ᠳ᠋ᠤ᠌᠂ ᠡᠷᠳᠡᠨᠢᠪᠢᠯᠢᠭ ᠲᠦᠩᠯᠢᠩ ᠦ᠋ᠨ ᠮᠠᠯᠠᠭᠠᠢ ᠨᠢ ᠣᠨᠣᠭᠳᠠᠵᠤ ᠳᠡᠭᠡᠷᠡ ᠦᠰᠦᠷᠴᠦ ᠭᠠᠵᠠᠷ ᠲᠤ᠌ ᠤᠨᠠᠪᠠ᠃ ᠡᠭᠦᠨ ᠳ᠋ᠦ᠍ ᠡᠷᠳᠡᠨᠢᠪᠢᠯᠢᠭ ᠲᠦᠩᠯᠢᠩ ᠥᠩᠭᠦᠯᠴᠢᠭ ᠢ᠋ᠶ᠋ᠡᠨ ᠬᠠᠭᠠᠷᠠᠲᠠᠯᠠ ᠠᠶᠤᠵᠤ ᠴᠡᠷᠢᠭ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ ᠪᠣᠷᠣ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠴᠠᠭᠰᠠᠨ ᠲᠤᠯᠠ᠂ ᠳᠠᠨᠠᠪᠠᠯ ᠴᠤ᠌ ᠡᠷᠳᠡᠨᠢᠪᠢᠯᠢᠭ ᠦ᠋ᠨ ᠭᠠᠷ ᠠ᠋ᠴᠠ ᠮᠤᠯᠲᠤᠷᠠᠨ ᠭᠠᠷᠪᠠ᠃
ᠳᠠᠨᠠᠪᠠᠯ ᠨᠢ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠵᠢᠨᠰᠢᠶᠠᠩ ᠤ᠋ᠨ ᠭᠡᠷ ᠲᠦ᠍ ᠡᠳᠦᠷ ᠪᠦᠷᠢ ᠤᠷᠤᠭ ᠬᠡᠯᠡᠯᠴᠡᠬᠦ ᠬᠥᠮᠦᠨ ᠲᠠᠰᠤᠷᠠᠯ ᠦᠭᠡᠢ ᠢᠷᠡᠳᠡᠭ ᠪᠣᠯᠪᠠᠴᠤ ᠡᠵᠢ ᠨᠢ ᠥᠬᠢᠨ ᠦ᠌ ᠪᠡᠨ ᠳᠠᠨᠠᠪᠠᠯ ᠢ᠋ ᠨᠢᠭᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠦᠯᠢᠶᠡᠵᠦ ᠪᠠᠢᠬᠤ ᠶ᠋ᠢ ᠮᠡᠳᠡᠬᠦ ᠲᠤᠯᠠ᠂ ᠠᠯᠢ ᠶ᠋ᠢ ᠨᠢ ᠴᠦ᠍ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠯᠠ᠃
ᠳᠠᠨᠠᠪᠠᠯ ᠭᠠᠳᠠᠭᠰᠢ ᠶᠠᠪᠤᠭᠠᠳ ᠭᠤᠷᠪᠠᠨ ᠵᠢᠯ ᠪᠣᠯᠲᠠᠯᠠ ᠨᠢᠭᠡ ᠴᠦ᠍ ᠤᠳᠠᠭᠠ ᠬᠠᠷᠢᠵᠤ ᠢᠷᠡᠭᠰᠡᠨ ᠦᠭᠡᠢ ᠮᠥᠷᠲᠡᠭᠡᠨ ᠪᠠᠰᠠ ᠴᠢᠮᠡᠭᠡ ᠰᠤᠷᠠᠭ ᠲᠠᠰᠤᠷᠠᠭᠰᠠᠨ ᠠ᠋ᠴᠠ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ ᠬᠥᠮᠦᠨ ᠦ᠌ ᠠᠮᠢᠳᠤ ᠡᠰᠡᠬᠦ ᠶ᠋ᠢ ᠪᠠᠲᠤᠯᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠤ᠂ ᠵᠢᠨᠰᠢᠶᠠᠩ ᠤ᠋ᠨ ᠠᠪᠤ ᠨᠢ ᠡᠷᠬᠡ ᠮᠡᠳᠡᠵᠦ ᠥᠬᠢᠨ ᠢ᠋ᠶ᠋ᠡᠨ ᠮᠠᠩᠬᠠᠨ ᠠᠢᠯ ᠤ᠋ᠨ ᠵᠢᠨᠰᠡᠷᠮᠠ ᠡᠮᠡᠭᠡᠨ ᠦ᠌ ᠣᠮᠪᠣᠯᠣ ᠬᠦᠦ ᠪᠠᠯᠳᠠᠨᠫᠠᠷᠡᠡᠩᠯᠡᠢ ᠳ᠋ᠦ᠍ ᠥᠭᠬᠦ ᠪᠡᠷ ᠬᠡᠯᠡᠯᠴᠡᠨ ᠲᠣᠭᠲᠠᠭᠰᠠᠨ ᠪᠢᠯᠡ᠃ ᠵᠢᠨᠰᠢᠶᠠᠩ ᠳᠤᠷᠠ ᠦᠭᠡᠢ ᠲᠤᠯᠠ ᠡᠳᠦᠷ ᠪᠣᠯᠭᠠᠨ ᠡᠰᠡᠷᠭᠦᠴᠡᠨ ᠤᠬᠢᠯᠠᠭᠰᠠᠨ ᠴᠤ᠌ ᠠᠪᠤ ᠶ᠋ᠢᠨ ᠰᠡᠳᠬᠢᠯ ᠢ᠋ ᠤᠶᠠᠷᠠᠭᠤᠯᠤᠨ ᠴᠢᠳᠠᠭᠰᠠᠨ ᠦᠭᠡᠢ ᠂ ᠲᠤᠰ ᠵᠢᠯ ᠦ᠋ᠨ ᠬᠠᠪᠤᠷ ᠵᠢᠨᠰᠢᠶᠠᠩ ᠢ᠋ ᠪᠠᠯᠳᠠᠨᠫᠡᠷᠡᠩᠯᠡᠢ ᠳ᠋ᠦ᠍ ᠮᠥᠷᠭᠥᠯᠡᠪᠡ᠃
ᠵᠢᠨᠰᠢᠶᠠᠩ ᠪᠠᠯᠳᠠᠨᠫᠡᠷᠡᠩᠯᠡᠢ ᠲᠡᠢ ᠤᠷᠤᠭᠯᠠᠵᠤ ᠠᠩᠬᠠᠨ ᠠᠢᠯ ᠳ᠋ᠤ᠌ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠤᠭ ᠤ᠋ᠨ ᠠᠮᠠᠷᠠᠭ ᠳᠠᠨᠠᠪᠠᠯ ᠠᠬᠠ ᠪᠠᠨ ᠡᠭᠦᠷᠢᠳᠡ ᠰᠠᠨᠠᠵᠤ ᠪᠣᠳᠣᠬᠤ ᠲᠤᠯᠠ ᠡᠳᠦᠷ ᠪᠦᠷᠢ ᠰᠠᠨᠠᠭᠠ ᠵᠣᠪᠠᠨᠢᠵᠤ ᠪᠠᠶᠠᠷ ᠬᠥᠷ ᠦᠭᠡᠢ ᠠᠮᠢᠳᠤᠷᠠᠳᠠᠭ ᠪᠠᠢᠵᠠᠢ ᠃
ᠵᠢᠷᠭᠤᠭᠠᠨ ᠲᠠᠯᠠ ᠲᠠᠢ ᠳᠡᠷᠡ ᠶ᠋ᠢ ᠪᠡᠨ
ᠳᠡᠷᠡᠯᠡᠵᠦ ᠬᠡᠪᠲᠡᠪᠡᠴᠦ ᠵᠢᠨᠰᠢᠶᠠᠩ ᠠ᠋
ᠵᠦᠢᠯ ᠦ᠋ᠨ ᠬᠣᠶᠠᠷ ᠢ ᠪᠣᠳᠣᠭᠠᠳ
ᠤᠷᠪᠠᠵᠤ ᠬᠥᠷᠪᠡᠨᠡ ᠵᠢᠨᠰᠢᠶᠠᠩ ᠠ᠋
ᠵᠢᠷᠦᠬᠡᠨ ᠦ᠌ ᠠᠮᠠᠷᠠᠭ ᠳᠠᠨᠠᠪᠠᠯ ᠠᠬᠠ ᠪᠠᠨ
ᠪᠣᠳᠣᠵᠤ ᠰᠠᠨᠠᠭᠰᠠᠭᠠᠷ ᠵᠡᠭᠦᠳᠦᠯᠡᠯᠡ
ᠠ ᠬᠠ ᠬᠦ
ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠮᠲᠡᠷᠢᠭᠡᠳ
ᠭᠣᠮᠣᠳᠠᠵᠤ ᠪᠠᠢᠨᠠ ᠵᠢᠨᠰᠢᠶᠠᠩ ᠠ᠋᠃
ᠪᠠᠳᠮᠠ ᠬᠤᠸᠠᠷ ᠲᠠᠢ ᠳᠡᠷᠡ ᠶ᠋ᠢ ᠪᠡᠨ
ᠳᠡᠷᠡᠯᠡᠵᠦ ᠬᠡᠪᠲᠡᠪᠡᠴᠦ ᠵᠢᠨᠰᠢᠶᠠᠩ ᠠ᠋
ᠪᠠᠢᠭᠰᠠᠨ ᠬᠣᠶᠠᠷ ᠢ᠋ ᠪᠣᠳᠣᠭᠠᠳ
ᠤᠷᠪᠠᠵᠤ ᠬᠥᠷᠪᠡᠨᠡ ᠵᠢᠨᠰᠰᠢᠶᠠᠩ ᠠ᠋
ᠪᠠᠭᠠ ᠶ᠋ᠢᠨ ᠠᠮᠠᠷᠠᠭ ᠳᠠᠨᠠᠪᠠᠯ ᠠᠬᠠ ᠪᠠᠨ
ᠪᠣᠳᠣᠵᠤ ᠰᠠᠨᠠᠭᠰᠠᠭᠠᠷ ᠵᠡᠭᠦᠳᠦᠯᠡᠯᠡ
ᠠ ᠬᠠ ᠬᠦ
ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠮᠲᠡᠷᠢᠭᠡᠳ
ᠭᠤᠲᠤᠷᠠᠵᠤ ᠪᠠᠢᠨᠠ ᠵᠢᠨᠰᠢᠶᠠᠩ ᠠ᠋᠃
ᠵᠢᠨᠰᠢᠶᠠᠩ᠂ ᠵᠡᠭᠦᠳᠦ ᠪᠡᠷ ᠢ᠋ᠶ᠋ᠡᠨ ᠬᠠᠵᠠᠭᠤ ᠲᠠᠯᠠ ᠳ᠋ᠠᠭᠠᠨ ᠬᠡᠪᠲᠡᠵᠦ ᠪᠠᠢᠭᠠ ᠵᠢᠨᠰᠡᠷᠮᠠ ᠨᠠᠢᠨᠠᠢ ᠪᠠᠨ ᠢᠰᠬᠦᠯᠵᠦ ᠰᠡᠷᠭᠦᠭᠡᠭᠰᠡᠨ ᠳ᠋ᠦ᠍ ᠨᠠᠢᠨᠠᠢ ᠨᠢ ᠠᠭᠤᠷᠯᠠᠵᠤ ᠵᠢᠨᠰᠢᠶᠠᠩ ᠢ᠋ ᠬᠠᠷᠢᠶᠠᠵᠤ ᠪᠠᠢᠬᠤ ᠨᠢ᠄
ᠳᠠᠭᠤᠤᠷᠢᠯᠢᠭ ᠳᠠᠭᠠᠷᠢᠭᠰᠠᠨ ᠬᠥᠮᠦᠨ ᠦ᠌ ᠥᠬᠢᠨ ᠴᠢᠨᠢ
ᠳᠠᠢᠰᠤᠨ ᠪᠣᠯᠵᠠᠢ ᠮᠠᠨ ᠳ᠋ᠠᠭᠠᠨ ᠠ᠋
ᠲᠡᠢᠨ ᠳ᠋ᠦ᠍ ᠶᠠᠪᠤᠭᠰᠠᠨ ᠳᠠᠨᠠᠪᠠᠯ
ᠳ᠋ᠠᠶᠧ ᠠᠪᠤ ᠴᠢᠨᠢ ᠪᠣᠯᠤᠨᠠ ᠤᠤ ᠳᠠ
ᠳᠠᠨᠠᠪᠠᠯ ᠳ᠋ᠠᠶᠧ ᠠᠪᠤ ᠪᠠᠨ
ᠵᠡᠭᠦᠳᠦᠯᠡᠬᠦ ᠪᠡᠷ ᠢ᠋ᠶ᠋ᠡᠨ ᠵᠡᠭᠦᠳᠦᠯᠡᠭᠡᠷᠡᠢ ᠳᠠ
ᠠ ᠬᠠ ᠬᠦ
ᠳᠠᠯᠠ ᠬᠦᠷᠦᠭᠰᠡᠨ ᠨᠠᠢᠨᠠᠢ ᠨᠠᠮᠠᠢ ᠪᠠᠨ
ᠳᠠᠬᠢᠨ ᠳᠠᠬᠢᠨ ᠢᠰᠬᠦᠯᠦᠭᠡᠳ ᠶᠠᠭᠤ ᠬᠢᠨᠡ ᠳᠡ᠃
ᠦᠬᠦᠯ ᠳᠠᠭᠠᠷᠢᠭᠰᠠᠨ ᠬᠥᠮᠦᠨ ᠦ᠌ ᠥᠬᠢᠨ ᠴᠢᠨᠢ
ᠡᠪᠡᠳᠴᠢᠨ ᠪᠣᠯᠵᠤ ᠮᠠᠨ ᠳ᠋ᠠᠭᠠᠨ ᠠ᠋
ᠡᠵᠡᠨ ᠦ᠌ ᠴᠡᠷᠢᠭ ᠦ᠋ᠨ ᠳᠠᠨᠠᠪᠠᠯ
ᠡᠪᠦᠭᠡ ᠠᠪᠤ ᠴᠢᠨᠢ ᠪᠣᠯᠤᠨᠠ ᠤᠤ ᠳᠠ
ᠥᠰᠢᠶᠡᠲᠡᠨ ᠬᠤᠯᠠᠭᠠᠢ ᠳᠠᠨᠠᠪᠠᠯ ᠢ᠋ᠶ᠋ᠠᠨ
ᠵᠡᠭᠦᠳᠦᠯᠡᠬᠦ ᠪᠡᠷ ᠢ᠋ᠶ᠋ᠡᠨ ᠵᠡᠭᠦᠳᠦᠯᠡᠭᠡᠷᠡᠢ ᠳᠠ
ᠠ ᠬᠠ ᠬᠦ
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠨᠠᠢᠨᠠᠢ ᠨᠠᠮᠠᠢ ᠪᠠᠨ
ᠡᠷᠭᠢᠨ ᠡᠷᠭᠢᠨ ᠢᠰᠬᠦᠯᠬᠦ ᠨᠢ ᠶᠠᠭᠤ ᠶᠤᠮ ᠪᠣᠢ᠃
ᠵᠢᠨᠰᠢᠶᠠᠩ ᠪᠠᠰᠠ ᠵᠡᠭᠦᠳᠦ ᠪᠡᠨ ᠨᠠᠢᠨᠠᠢ ᠳ᠋ᠠᠭᠠᠨ ᠬᠡᠯᠡᠵᠦ ᠪᠠᠢᠨᠠ᠄
ᠥᠨᠳᠥᠷ ᠳᠡᠭᠡᠷᠡ ᠪᠡᠨ ᠤᠷᠭᠤᠭᠰᠠᠨ
ᠸᠧᠢ ᠳᠠᠩ ᠯᠢᠩᠬᠤᠠ ᠬᠤᠸᠠᠷ ᠢ᠋
ᠦᠲᠦᠷᠮᠡ ᠶ᠋ᠢᠨ ᠥᠨᠴᠥᠭ ᠲᠦ᠍
ᠳᠡᠯᠭᠡᠷᠡᠯᠡ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ
ᠡᠵᠡᠨ ᠦ᠌ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ
ᠳᠠᠨᠠᠪᠠᠯ ᠠᠬᠠ ᠶ᠋ᠢ
ᠠ ᠬᠠ ᠬᠦ
ᠡᠷᠬᠡ ᠭᠡᠷ ᠲᠦ᠍ ᠮᠢᠨᠢ
ᠦᠳᠡᠯᠡᠯᠡ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ᠃
ᠬᠠᠳᠠᠨ ᠳᠡᠭᠡᠷᠡ ᠨᠢ ᠤᠷᠭᠤᠭᠰᠠᠨ
ᠬᠠᠢᠲᠠᠩ ᠯᠢᠩᠬᠤᠠ ᠬᠤᠸᠠᠷ ᠢ᠋
ᠬᠠᠰᠢᠶᠠᠨ ᠤ᠋ ᠮᠢᠨᠢ ᠳᠤᠮᠳᠠ
ᠳᠡᠯᠭᠡᠷᠡᠯᠡ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ
ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ
ᠳᠠᠨᠠᠪᠠᠯ ᠠᠬᠠ ᠶ᠋ᠢ
ᠠ ᠬᠠ ᠬᠦ
ᠬᠠᠷᠢ ᠶ᠋ᠢᠨ ᠭᠠᠵᠠᠷ ᠲᠤ᠌ ᠮᠢᠨᠢ
ᠪᠠᠭᠤᠳᠠᠯᠯᠠᠯᠠ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ᠃ ᠵᠢᠨᠰᠡᠷᠮᠡ ᠨᠠᠢᠨᠠᠢ᠂ ᠵᠢᠨᠰᠢᠶᠠᠩ ᠤ᠋ᠨ ᠵᠡᠭᠦᠳᠦ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠢᠨᠢᠶᠡᠭᠡᠳ᠄《 ᠠᠢ ᠳᠠ ᠬᠥᠭᠡᠷᠦᠬᠦᠢ᠂ ᠨᠠᠢᠨᠠᠢ ᠴᠢᠨᠢ ᠪᠢ ᠪᠠᠰᠠ ᠨᠢᠭᠡᠨ ᠰᠣᠨᠢᠨ ᠵᠡᠭᠦᠳᠦ ᠵᠡᠭᠦᠳᠦᠯᠡᠭᠰᠡᠨ ᠶᠦ᠍ᠮ 》ᠭᠡᠳ᠄
ᠥᠨᠳᠥᠷ ᠳᠡᠭᠡᠷᠡ ᠨᠢ ᠤᠷᠭᠤᠭᠰᠠᠨ
ᠸᠧᠢ ᠳᠠᠩ ᠯᠢᠩᠬᠤᠠ ᠬᠤᠸᠠᠷ ᠢ᠋
ᠡᠪᠦᠯ ᠦ᠋ᠨ ᠴᠠᠭ ᠤ᠋ᠨ ᠬᠦᠢᠲᠡᠨ ᠳ᠋ᠡᠭᠡᠨ
ᠬᠥᠯᠲᠡᠯᠡ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ
ᠡᠵᠡᠨ ᠦ᠌ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ
ᠳᠠᠨᠠᠪᠠᠯ ᠲᠡᠷᠡ ᠠᠮᠢᠲᠠᠨ ᠢ᠋
ᠠ ᠬᠠ ᠬᠦ
ᠥᠰᠢᠶᠡᠲᠡᠨ ᠳᠠᠢᠰᠤᠨ ᠤ᠋ ᠫᠤᠤ ᠳ᠋ᠤ᠌
ᠠᠪᠲᠠᠭᠳᠠᠯᠠ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠥᠭᠵᠢᠯᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠲᠣᠳᠣᠭᠡᠷᠡᠯ᠂ ᠣᠳᠬᠠᠨᠰᠣᠠ71
ᠬᠠᠳᠠᠨ ᠳᠡᠭᠡᠷᠡ ᠨᠢ ᠤᠷᠭᠤᠭᠰᠠᠨ
ᠬᠠᠢᠲᠠᠩ ᠯᠢᠩᠬᠤᠠ ᠬᠤᠸᠠᠷ ᠢ᠋
ᠬᠠᠬᠢᠷ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍
ᠬᠥᠯᠲᠡᠯᠡ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ
ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ
ᠳᠠᠨᠠᠪᠠᠯ ᠲᠡᠷᠡ ᠠᠮᠢᠲᠠᠨ ᠢ᠋
ᠠ ᠬᠠ ᠬᠦ
ᠬᠠᠷᠭᠢᠰ ᠳᠠᠢᠰᠤᠨ ᠤ᠋ ᠫᠤᠤ ᠶ᠋ᠢᠨ ᠰᠤᠮᠤ ᠳ᠋ᠤ᠌
ᠳᠠᠭᠠᠷᠢᠭᠳᠠᠯᠠ ᠭᠡᠮᠡᠨ ᠵᠡᠭᠦᠳᠦᠯᠡᠵᠡᠢ᠃
ᠵᠢᠨᠰᠢᠶᠠᠩ ᠡᠷᠲᠡ ᠥᠷᠯᠥᠭᠡ ᠪᠣᠰᠴᠤ ᠦᠨᠢᠶᠡ ᠪᠡᠨ ᠰᠠᠭᠠᠵᠤ ᠪᠠᠢᠭᠠᠳ᠂ ᠳᠠᠮᠵᠢᠭᠤᠷ ᠢ᠋ᠶ᠋ᠠᠨ ᠳᠠᠮᠨᠠᠵᠤ ᠬᠤᠳᠳᠤᠭ ᠵᠦᠭ ᠶᠠᠪᠤᠯᠠ᠃
*** *** *** *** ***
ᠦᠳᠡ ᠪᠣᠯᠬᠤ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠳᠠᠨᠠᠪᠠᠯ ᠳᠠᠪᠬᠢᠭᠤᠯᠤᠭᠰᠠᠭᠠᠷ ᠮᠠᠩᠬᠠᠨ ᠠᠢᠯ ᠳ᠋ᠤ᠌ ᠬᠦᠷᠴᠦ ᠢᠷᠡᠭᠡᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠠᠢᠯ ᠤ᠋ᠨ ᠭᠠᠳᠠᠨᠠᠬᠢ ᠮᠣᠳᠣᠨ ᠰᠡᠭᠦᠳᠡᠷ ᠲᠦ᠍ ᠨᠢᠭᠡᠨ ᠵᠡᠷᠭᠡ ᠠᠮᠤᠰᠬᠢᠭᠡᠳ᠂ ᠮᠣᠷᠢ ᠪᠠᠨ ᠤᠰᠤᠯᠠᠬᠤ ᠪᠠᠷ ᠬᠤᠳᠳᠤᠭ ᠵᠦᠭ ᠢᠷᠡᠬᠦ ᠳ᠋ᠦ᠍ ᠨᠢᠭᠡᠨ ᠵᠠᠯᠠᠭᠤ ᠪᠡᠷᠢ ᠳᠠᠮᠵᠢᠭᠤᠷ ᠳᠠᠮᠨᠠᠵᠤ ᠤᠰᠤ ᠠᠪᠬᠤ ᠪᠠᠷ ᠬᠤᠳᠳᠤᠭ ᠵᠦᠭ ᠠᠢᠰᠤᠢ ᠪᠠᠢᠯᠠ᠂ ᠳᠠᠨᠠᠪᠠᠯ ᠲᠡᠷᠡ ᠵᠠᠯᠠᠭᠤ ᠪᠡᠷᠢ ᠡᠴᠡ ᠰᠠᠭᠤᠯᠠᠭᠠ ᠵᠢᠭᠡᠯᠡᠨ ᠮᠣᠷᠢ ᠪᠠᠨ ᠤᠰᠤᠯᠠᠰᠤᠭᠠᠢ ᠭᠡᠵᠦ ᠪᠣᠳᠣᠭᠠᠳ ᠥᠭᠡᠳᠡ ᠡᠴᠡ ᠨᠢ ᠠᠩᠬᠠᠷᠤᠭᠰᠠᠨ ᠳ᠋ᠤ᠌ ᠵᠠᠯᠠᠭᠤ ᠪᠡᠷᠢ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠤᠩ ᠬᠠᠯᠠᠭᠤᠨ ᠬᠠᠷᠠᠭᠳᠠᠭᠰᠠᠨ ᠪᠠᠢᠨᠠ᠃
ᠳᠠᠮᠵᠢᠭᠤᠷ ᠰᠠᠭᠤᠯᠠᠭᠠ ᠪᠠᠨ ᠳᠠᠮᠨᠠᠭᠠᠳ
ᠳᠠᠩᠬᠢᠯᠵᠠᠭᠤᠯᠵᠤ ᠢᠷᠡᠬᠦ ᠲᠡᠷᠡ ᠡᠭᠡᠴᠢ ᠳᠡᠭᠦᠦ
ᠳᠠᠪᠬᠤᠷ ᠠᠯᠠᠭ ᠨᠢᠳᠦᠨ ᠳ᠋ᠦ᠍ ᠮᠢᠨᠢ
ᠳᠠᠩᠴᠤ ᠬᠠᠯᠠᠭᠤᠨ ᠬᠠᠷᠠᠭᠳᠠᠨᠠ
ᠳᠠᠷᠤᠵᠤ ᠵᠡᠭᠦᠭᠰᠡᠨ ᠳᠠᠪᠠᠭᠠ ᠬᠠᠳᠬᠤᠤᠷ
ᠲᠠᠢᠯᠠᠩ ᠰᠦᠬᠡ ᠦᠭᠡᠢ ᠪᠣᠯ
ᠠ ᠬᠠ ᠬᠦ
ᠳᠠᠪᠠᠭᠤᠬᠠᠨ ᠲᠥᠷᠥᠭᠰᠡᠨ ᠵᠢᠨᠰᠢᠶᠠᠩ ᠲᠠᠢ ᠮᠢᠨᠢ
ᠠᠪ ᠠᠳᠠᠯᠢᠬᠠᠨ ᠪᠢᠰᠢᠦ ᠳᠠ᠃
ᠥᠨᠥ ᠵᠠᠯᠠᠭᠤ ᠪᠡᠷᠢ ᠴᠦ᠍ ᠮᠣᠷᠢ ᠬᠥᠲᠥᠯᠵᠦ ᠵᠣᠭᠰᠣᠵᠤ ᠪᠠᠢᠭᠠ ᠬᠥᠮᠦᠨ ᠢ᠋ ᠠᠵᠢᠭᠯᠠᠭᠠᠳ ᠳᠣᠲᠣᠷᠠ ᠪᠠᠨ ᠢᠩᠭᠢᠵᠦ ᠪᠣᠳᠣᠵᠠᠢ᠃
ᠠᠭᠲᠠ ᠮᠣᠷᠢ ᠪᠠᠨ ᠬᠥᠲᠥᠯᠵᠦ
ᠵᠣᠭᠰᠣᠵᠤ ᠪᠠᠢᠬᠤ ᠲᠡᠷᠡ ᠬᠥᠮᠦᠨ
ᠠᠯᠠᠭ ᠬᠣᠶᠠᠷ ᠨᠢᠳᠦᠨ ᠳ᠋ᠦ᠍ ᠮᠢᠨᠢ
ᠠᠰᠤᠷᠤ ᠴᠤ᠌ ᠬᠠᠯᠠᠭᠤᠨ ᠬᠠᠷᠠᠭᠳᠠᠨᠠ
ᠠᠯᠪᠠᠨ ᠴᠡᠷᠢᠭ ᠦ᠋ᠨ ᠬᠤᠪᠴᠠᠰᠤ ᠪᠠᠨ
ᠡᠮᠦᠰᠦᠭᠰᠡᠨ ᠪᠣᠯᠪᠠᠯ ᠳᠠ
ᠠ ᠬᠠ ᠬᠦ
ᠠᠩᠬᠠᠨ ᠤ᠋ ᠰᠠᠨᠠᠭᠰᠠᠨ ᠳᠠᠨᠠᠪᠠᠯ ᠲᠠᠢ ᠮᠢᠨᠢ
ᠠᠪ ᠠᠳᠠᠯᠢᠬᠠᠨ ᠪᠢᠰᠢᠦ ᠳᠠ᠃
ᠵᠠᠯᠠᠭᠤ ᠪᠡᠷᠢ ᠬᠤᠳᠳᠤᠭ ᠤ᠋ᠨ ᠠᠮᠠᠰᠠᠷ ᠲᠤ᠌ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠳᠠᠨᠠᠪᠠᠯ ᠲᠡᠭᠦᠨ ᠦ᠌ ᠵᠦᠭ ᠢᠩᠭᠢᠵᠦ ᠬᠡᠯᠡᠵᠦ ᠪᠠᠢᠨᠠ᠄
ᠬᠤᠷᠮᠤᠰᠲᠠ ᠲᠩᠷᠢ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠ
ᠬᠠᠯᠠᠭᠤᠨ ᠪᠠᠢᠨᠠ ᠰᠢᠦ ᠡᠭᠡᠴᠢ ᠳᠡᠭᠦᠦ ᠠ᠋
ᠬᠣᠯᠠ ᠵᠠᠮ ᠬᠥᠭᠡᠭᠡᠭᠰᠡᠨ ᠪᠡᠶᠡ ᠮᠢᠨᠢ
ᠬᠠᠷᠠᠲᠠᠢ ᠴᠤ᠌ ᠤᠮᠳᠠᠭᠠᠰᠴᠠᠢ ᠡᠭᠡᠴᠢ ᠳᠡᠭᠦᠦ ᠠ᠋
ᠬᠤᠳᠳᠤᠭ ᠤ᠋ᠨ ᠤᠰᠤ ᠶ᠋ᠢ ᠴᠢᠨᠢ
ᠬᠠᠨᠲᠠᠯᠠ ᠪᠠᠨ ᠤᠤᠭᠤᠶᠠ ᠳᠠ
ᠠ ᠬᠠ ᠬᠦ
ᠬᠠᠷᠢᠨ ᠴᠢᠨᠦ ᠰᠠᠭᠤᠯᠠᠭᠠ ᠶ᠋ᠢ
ᠵᠢᠭᠡᠯᠡᠵᠦ ᠵᠠᠷᠤᠶᠠ ᠪᠣᠯᠤᠨᠠ ᠤᠤ?
ᠣᠭᠲᠠᠷᠭᠤᠢ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠ
ᠣᠨᠴᠣᠭᠣᠢ ᠬᠠᠯᠠᠭᠤᠨ ᠪᠠᠢᠨᠠ ᠡᠭᠡᠴᠢ ᠳᠡᠭᠦᠦ ᠠ᠋
ᠤᠳᠠᠭᠠᠨ ᠶᠠᠪᠤᠭᠰᠠᠨ ᠬᠦᠯᠦᠭ ᠮᠣᠷᠢ ᠮᠢᠨᠢ
ᠤᠨᠲᠠᠭᠠᠰᠤᠭᠰᠠᠨ ᠭᠡᠵᠦ ᠳᠠ ᠡᠭᠡᠴᠢ ᠳᠡᠭᠦᠦ ᠠ᠋
ᠤᠨᠤᠭᠰᠠᠨ ᠮᠣᠷᠢ ᠣᠨᠣᠭᠣᠨ ᠬᠤᠸᠠ ᠪᠠᠨ
ᠤᠰᠤᠯᠠᠭᠠᠳ ᠭᠠᠷᠬᠤ ᠶ᠋ᠢᠨ ᠲᠥᠯᠥᠭᠡ
ᠠ ᠬᠠ ᠬᠦ
ᠤᠰᠤᠨ ᠰᠠᠭᠤᠯᠠᠭᠠ ᠶ᠋ᠢ ᠴᠢᠨᠢ
ᠵᠢᠭᠡᠯᠡᠭᠡᠳ ᠵᠠᠷᠤᠶᠠ ᠪᠣᠯᠤᠨᠠ ᠤᠤ?
ᠵᠠᠯᠠᠭᠤ ᠪᠡᠷᠢ᠂ ᠰᠠᠭᠤᠯᠠᠭᠠ ᠳᠠᠮᠵᠢᠭᠤᠷ ᠢ᠋ᠶ᠋ᠠᠨ ᠲᠠᠯᠪᠢᠵᠤ ᠳᠠᠨᠠᠪᠠᠯ ᠵᠦᠭ᠄《 ᠰᠠᠭᠤᠯᠠᠭᠠ ᠵᠢᠭᠡᠯᠡᠬᠦ ᠳ᠋ᠦ᠍ ᠤᠴᠢᠷ ᠲᠠᠢ᠂ ᠰᠤᠷᠠᠭᠯᠠᠵᠤ ᠠᠰᠠᠭᠤᠬᠤ ᠬᠡᠳᠦᠨ ᠦᠭᠡ ᠪᠠᠢᠨᠠ 》 ᠭᠡᠳ ᠠᠰᠠᠭᠤᠵᠤ ᠪᠠᠢᠨᠠ᠄
ᠠᠪᠤ ᠳᠡᠭᠡᠳᠦ ᠶ᠋ᠢᠨ ᠬᠣᠰᠢᠭᠤ ᠨᠤᠲᠤᠭ ᠴᠢᠨᠢ
ᠠᠯᠢ ᠪᠣᠯᠤᠨᠠ ᠪᠣᠢ
ᠠᠵᠤ ᠰᠠᠭᠤᠭᠰᠠᠨ ᠠᠢᠯ ᠭᠡᠷ ᠴᠢᠨᠢ
ᠬᠠᠮᠢᠭᠠ ᠪᠣᠯᠤᠨᠠ ᠪᠣᠢ
ᠠᠭᠰᠢᠷᠠᠭᠠ ᠪᠣᠯᠤᠭᠰᠠᠨ ᠠᠪᠤ ᠶ᠋ᠢᠨ ᠠᠯᠳᠠᠷ
ᠬᠡᠨ ᠪᠣᠯᠤᠨᠠ ᠪᠣᠢ
ᠠ ᠬᠠ ᠬᠦ
ᠠᠰ ᠤ᠋ᠨ ᠪᠡᠶᠡ ᠶ᠋ᠢᠨ ᠳᠠᠭᠤᠳᠠᠬᠤ ᠨᠡᠷᠡ ᠴᠢᠨᠢ
ᠬᠡᠨ ᠪᠣᠯᠤᠨᠠ ᠪᠣᠢ ᠠᠬᠠ ᠮᠢᠨᠢ ᠠ᠋᠃
ᠡᠪᠦᠭᠡ ᠳᠡᠭᠡᠳᠦ ᠶ᠋ᠢᠨ ᠬᠣᠰᠢᠭᠤ ᠨᠤᠲᠤᠭ ᠴᠢᠨᠢ
ᠠᠯᠢ ᠪᠣᠯᠤᠨᠠ ᠪᠣᠢ
ᠥᠰᠴᠦ ᠲᠥᠷᠥᠭᠰᠡᠨ ᠠᠢᠯ ᠭᠡᠷ ᠴᠢᠨᠢ
ᠬᠠᠮᠢᠭᠠ ᠪᠣᠯᠤᠨᠠ ᠪᠣᠢ
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠠᠪᠤ ᠶ᠋ᠢᠨ ᠠᠯᠳᠠᠷ
ᠬᠡᠨ ᠪᠣᠯᠤᠨᠠ ᠪᠣᠢ
ᠠ ᠬᠠ ᠬᠦ
ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠳᠠᠭᠤᠳᠠᠬᠤ ᠨᠡᠷᠡ ᠴᠢᠨᠢ
ᠬᠡᠨ ᠪᠣᠯᠤᠨᠠ ᠪᠣᠢ ᠠᠬᠠ ᠮᠢᠨᠢ ᠠ᠋ ᠃
ᠳᠠᠨᠠᠪᠠᠯ ᠬᠠᠷᠢᠭᠤᠯᠵᠤ ᠪᠠᠢᠬᠤ ᠨᠢ ᠄
ᠠᠪᠤ ᠳᠡᠭᠡᠳᠦ ᠶ᠋ᠢᠨ ᠬᠣᠰᠢᠭᠤ ᠨᠤᠲᠤᠭ
ᠪᠣᠳᠣᠯᠭᠠᠲᠤ ᠳᠡᠭᠡᠷᠡ ᠪᠡᠨ ᠬᠣᠰᠢᠭᠤ ᠲᠠᠢ
ᠠᠵᠤ ᠰᠠᠭᠤᠭᠰᠠᠨ ᠠᠢᠯ ᠭᠡᠷ ᠮᠢᠨᠢ
ᠵᠢᠯᠲᠦ ᠳᠡᠭᠡᠷᠡ ᠪᠡᠨ ᠠᠢᠯ ᠲᠠᠢ
ᠠᠭᠰᠢᠷᠠᠭᠠ ᠪᠣᠯᠤᠭᠰᠠᠨ ᠠᠪᠤ ᠶ᠋ᠢᠨ ᠮᠢᠨᠢ ᠠᠯᠳᠠᠷ
ᠮᠡᠩᠭᠦᠢ ᠳᠡᠭᠡᠷᠡ ᠪᠡᠨ ᠡᠮᠴᠢ ᠲᠡᠢ
ᠠ ᠬᠠ ᠬᠦ
ᠠᠰ ᠤ᠋ᠨ ᠪᠡᠶᠡ ᠶ᠋ᠢᠨ ᠳᠠᠭᠤᠳᠠᠬᠤ ᠨᠡᠷᠡ
ᠲᠡᠨᠡ ᠳᠡᠭᠡᠷᠡ ᠪᠡᠨ ᠪᠠᠯ ᠲᠠᠢ ᠰᠢᠦ᠃
ᠡᠪᠦᠭᠡ ᠳᠡᠭᠡᠳᠦ ᠶ᠋ᠢᠨ ᠬᠣᠰᠢᠭᠤ ᠨᠤᠲᠤᠭ
ᠪᠣᠳᠣᠯᠭᠠᠲᠤ ᠳᠡᠭᠡᠷᠡ ᠪᠡᠨ ᠬᠣᠰᠢᠭᠤ ᠲᠠᠢ
ᠥᠰᠴᠦ ᠲᠥᠷᠥᠭᠰᠡᠨ ᠠᠢᠯ ᠭᠡᠷ ᠮᠢᠨᠢ
ᠵᠢᠯᠲᠦ ᠳᠡᠭᠡᠷᠡ ᠪᠡᠨ ᠠᠢᠯ ᠲᠠᠢ
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠠᠪᠤ ᠶ᠋ᠢᠨ ᠠᠯᠳᠠᠷ
ᠮᠡᠩᠭᠦᠢ ᠳᠡᠭᠡᠷᠡ ᠪᠡᠨ ᠡᠮᠴᠢ ᠲᠡᠢ
ᠠ ᠬᠠ ᠬᠦ
ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠳᠠᠭᠤᠳᠠᠬᠤ ᠨᠡᠷᠡ
ᠲᠡᠨᠡ ᠳᠡᠭᠡᠷᠡ ᠪᠡᠨ ᠪᠠᠯ ᠲᠠᠢ ᠰᠢᠦ᠃
ᠵᠢᠨᠰᠢᠶᠠᠩ᠄
ᠰᠤᠷᠠᠭᠯᠠᠭᠰᠠᠨ ᠢ᠋ᠶ᠋ᠠᠨ ᠰᠣᠨᠣᠰᠤᠮᠠᠭᠴᠠ
ᠰᠤᠯᠠᠷᠠᠴᠢᠬᠠᠯᠠ ᠰᠢᠦ ᠵᠢᠨᠰᠢᠶᠠᠩ ᠠ᠋
ᠰᠠᠭᠤᠯᠠᠭᠠ ᠳᠠᠮᠵᠢᠭᠤᠷ ᠢ᠋ᠶ᠋ᠠᠨ ᠲᠠᠯᠪᠢᠭᠠᠳ
ᠮᠡᠯᠡᠷᠡᠴᠢᠬᠡᠯᠡ ᠰᠢᠦ ᠵᠢᠨᠰᠢᠶᠠᠩ ᠠ᠋
ᠰᠤᠪᠤᠳ ᠤ᠋ᠨ ᠬᠡᠯᠬᠢᠶᠡ ᠲᠠᠰᠤᠷᠠᠭᠰᠠᠨ ᠮᠡᠲᠦ
ᠨᠢᠳᠦᠨ ᠨᠢᠯᠪᠤᠰᠤ ᠨᠢ ᠪᠥᠮᠪᠥᠷᠢᠭᠰᠡᠭᠡᠷ
ᠠ ᠬᠠ ᠬᠦ
ᠰᠤᠮᠤᠨ ᠴᠠᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠨ
ᠱᠠᠯ ᠨᠣᠢᠲᠠᠨ ᠪᠣᠯᠭᠠᠯᠠ ᠰᠢᠦ᠃
ᠳᠠᠨᠠᠪᠠᠯ ᠢ᠋ᠶ᠋ᠠᠨ ᠭᠡᠵᠦ ᠮᠡᠳᠡᠮᠡᠭᠴᠡ
ᠬᠠᠷᠠᠯᠠᠴᠢᠬᠠᠯᠠ ᠰᠢᠦ ᠵᠢᠨᠰᠢᠶᠩ ᠠ᠋
ᠳᠠᠮᠵᠢᠭᠤᠷ ᠰᠠᠭᠤᠯᠠᠭᠠ ᠪᠠᠨ ᠲᠠᠯᠪᠢᠭᠠᠳ
ᠮᠡᠯᠡᠷᠡᠴᠢᠬᠡᠯᠡ ᠰᠢᠦ ᠵᠢᠨᠰᠢᠶᠠᠩ ᠠ᠋
ᠳᠠᠪᠬᠤᠷ ᠠᠯᠠᠭ ᠨᠢᠳᠦᠨ ᠦ᠌ ᠨᠢᠯᠪᠤᠰᠤ ᠨᠢ
ᠲᠠᠪᠠᠯᠠᠨ ᠳᠠᠪᠠᠯᠠᠨ ᠤᠷᠤᠰᠤᠭᠰᠠᠭᠠᠷ
ᠠ ᠬᠠ ᠬᠦ
ᠳᠠᠪᠤᠤ ᠪᠥᠰ ᠦ᠋ᠨ ᠬᠣᠷᠮᠣᠢᠪᠴᠢ ᠪᠠᠨ
ᠱᠠᠯ ᠨᠣᠢᠲᠠᠨ ᠪᠣᠯᠭᠠᠯᠠ ᠰᠢᠦ᠃
ᠳᠠᠨᠠᠪᠠᠯ ᠵᠢᠨᠰᠢᠶᠠᠩ ᠬᠣᠶᠠᠭᠤᠯᠠ ᠡᠨᠡ ᠮᠡᠲᠦ ᠪᠡᠷ ᠲᠠᠨᠢᠯᠴᠠᠵᠤ ᠮᠠᠩᠬᠠᠨ ᠠᠢᠯ ᠤ᠋ᠨ ᠬᠤᠳᠳᠤᠭ ᠳᠡᠭᠡᠷᠡ ᠵᠣᠭᠰᠣᠭᠠᠳ ᠵᠢᠨᠰᠢᠶᠠᠩ᠂ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠯᠪᠠᠳᠠᠯᠭᠠ ᠪᠠᠷ ᠠᠷᠭᠠ ᠪᠤᠰᠤ ᠪᠠᠯᠳᠠᠨᠫᠡᠷᠡᠩᠯᠡᠢ ᠲᠡᠢ ᠬᠤᠷᠢᠮᠯᠠᠭᠰᠠᠨ ᠭᠤᠨᠢᠭᠲᠤ ᠤᠴᠢᠷ ᠢ᠋ᠶ᠋ᠠᠨ ᠬᠡᠯᠡᠵᠦ ᠤᠯᠠᠮ ᠴᠤ᠌ ᠲᠡᠰᠬᠡᠯ ᠦᠭᠡᠢ ᠭᠤᠳᠤᠷᠠᠨ ᠤᠬᠢᠯᠠᠪᠠ᠃
ᠳᠠᠨᠠᠪᠠᠯ ᠰᠠᠨᠠᠮᠰᠠᠷ ᠦᠭᠡᠢ ᠡᠨᠡᠬᠦ ᠬᠦᠨᠳᠦ ᠴᠣᠬᠢᠯᠲᠠ ᠳ᠋ᠤ᠌ ᠰᠡᠳᠬᠢᠯ ᠰᠠᠨᠠᠭᠠ ᠵᠣᠪᠠᠵᠤ ᠵᠢᠷᠦᠬᠡ ᠭᠣᠣᠯ ᠨᠢ ᠰᠢᠮᠰᠢᠷᠡᠭᠡᠳ ᠠᠭᠠᠵᠢᠮ ᠢ᠋ᠶ᠋ᠠᠷ ᠡᠪᠦᠷ ᠡᠴᠡ ᠪᠡᠨ ᠪᠠᠭᠯᠠᠭᠠ ᠲᠠᠢ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠬᠡᠯᠡᠵᠦ ᠪᠠᠢᠬᠤ ᠨᠢ᠄
ᠬᠥᠬᠡ ᠲᠣᠷᠭᠠᠨ ᠠᠯᠴᠢᠭᠤᠷ ᠴᠢᠨᠢ
ᠬᠥᠪᠡᠭᠡ ᠨᠢ ᠪᠠᠷᠠᠭᠳᠠᠪᠠ ᠤᠤ ᠠ᠋
ᠬᠥᠭᠡᠷᠦᠬᠦᠨ ᠪᠠᠭᠠ ᠶ᠋ᠢᠨ ᠪᠡᠶᠡ ᠴᠢᠨᠢ
ᠬᠥᠭᠰᠢᠷᠡᠴᠢᠬᠡᠪᠡ ᠤᠤ ᠵᠢᠨᠰᠢᠶᠠᠩ ᠠ᠋
ᠬᠦᠰᠡᠵᠦ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠳ᠋ᠡᠭᠡᠨ
ᠤᠷᠭᠤᠵᠤ ᠳᠤᠲᠠᠭᠠᠵᠤ ᠢᠷᠡᠬᠦᠯᠡᠷ
ᠠ ᠬᠠ ᠬᠦ
ᠬᠥᠳᠡᠭᠡ ᠠᠢᠯ ᠤ᠋ᠨ ᠬᠤᠳᠳᠤᠭ ᠤ᠋ᠨ ᠠᠮᠠᠰᠠᠷ
ᠤᠴᠠᠷᠠᠨᠠ ᠭᠡᠵᠦ ᠰᠠᠨᠠᠪᠠ ᠤᠤ ᠳᠠ᠃
ᠪᠣᠷᠣ ᠲᠣᠷᠭᠠᠨ ᠠᠯᠴᠢᠭᠤᠷ ᠴᠢᠨᠢ
ᠪᠣᠳᠣᠭ ᠨᠢ ᠤᠨᠠᠪᠠ ᠤᠤ ᠵᠢᠨᠰᠢᠶᠠᠩ
ᠪᠣᠯᠪᠠᠷᠬᠠᠨ ᠲᠥᠷᠥᠭᠰᠡᠨ ᠪᠡᠶᠡ ᠴᠢᠨᠢ
ᠪᠤᠭᠤᠷᠤᠯ ᠪᠣᠯᠪᠠᠴᠤ ᠵᠢᠨᠰᠢᠶᠠᠩ ᠠ᠋
ᠪᠣᠳᠣᠵᠤ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠳ᠋ᠡᠭᠡᠨ
ᠪᠤᠷᠤᠭᠤᠯᠠᠵᠤ ᠳᠤᠲᠠᠭᠠᠵᠤ ᠢᠷᠡᠬᠦᠯᠡᠷ
ᠠ᠋ ᠬᠠ ᠬᠦ
ᠪᠠᠯᠳᠠᠨᠫᠡᠷᠡᠩᠯᠡᠢ ᠲᠡᠢ ᠤᠷᠤᠭᠯᠠᠨᠠ ᠭᠡᠵᠦ
ᠬᠡᠨ ᠰᠠᠨᠠᠪᠠ ᠳᠠ ᠵᠢᠨᠰᠢᠶᠠᠩ ᠠ᠋᠃
ᠵᠢᠨᠰᠢᠶᠠᠩ᠄
ᠤᠷᠲᠤ ᠡᠰᠢ ᠲᠡᠢ ᠰᠦᠬᠡ ᠪᠡᠷ ᠨᠢ
ᠣᠭᠲᠣᠴᠢᠭᠠᠳ ᠯᠠ ᠪᠠᠢᠪᠠᠯ ᠳᠠ
ᠤᠯᠠᠪᠢᠷ ᠽᠠᠨᠳᠠᠨ ᠮᠣᠳᠣ ᠪᠣᠯᠪᠠᠴᠤ
ᠤᠨᠠᠬᠤ ᠦᠭᠡᠢ ᠪᠠᠢᠵᠤ ᠲᠡᠰᠦᠨᠡ ᠤᠤ ᠳᠠ᠃
ᠤᠷᠰᠢᠭ ᠲᠠᠲᠠᠭᠰᠠᠨ ᠠᠪᠤ ᠮᠢᠨᠢ
ᠡᠷᠬᠡ ᠮᠡᠳᠡᠵᠦ ᠥᠭᠭᠦᠭᠰᠡᠨ ᠰᠢᠦ
ᠤᠷᠢᠬᠠᠨ ᠪᠠᠭᠠ ᠵᠢᠨᠰᠢᠶᠠᠩ ᠴᠢᠨᠢ
ᠶᠠᠮᠠᠷ ᠠᠷᠭᠠ ᠪᠠᠢᠨᠠ ᠳᠠ᠃
ᠬᠦᠨᠳᠦ ᠢᠷ ᠲᠡᠢ ᠰᠦᠬᠡ ᠪᠡᠷ ᠨᠢ
ᠴᠠᠪᠴᠢᠭᠠᠳ ᠯᠠ ᠪᠠᠢᠪᠠᠯ ᠳᠠ
ᠬᠥᠬᠡ ᠽᠠᠨᠳᠠᠨ ᠮᠣᠳᠣ ᠪᠣᠯᠪᠠᠴᠤ
ᠬᠥᠨᠳᠡᠯᠢᠰᠴᠦ ᠤᠨᠠᠬᠤ ᠦᠭᠡᠢ ᠭᠡᠵᠦ ᠪᠠᠢᠨᠠ ᠤᠤ ᠳᠠ
ᠬᠥᠭᠰᠢᠷᠡᠭᠡ ᠪᠣᠯᠤᠭᠰᠠᠨ ᠠᠪᠤ ᠮᠢᠨᠢ
ᠬᠥᠰᠢᠵᠦ ᠪᠠᠢᠭᠠᠳ ᠦᠭᠭᠦᠭᠰᠡᠨ ᠰᠢᠦ
ᠬᠥᠭᠡᠷᠦᠬᠦᠨ ᠪᠠᠭᠠ ᠵᠢᠨᠰᠢᠶᠠᠩ ᠴᠢᠨᠢ
ᠶᠠᠮᠠᠷ ᠠᠷᠭᠠ ᠪᠠᠢᠨᠠ ᠤᠤ ᠳᠠ᠃
ᠳᠠᠨᠠᠪᠠᠯ᠄
ᠪᠣᠯᠭᠠᠴᠢᠬᠠᠭᠰᠠᠨ ᠰᠦ ᠶ᠋ᠢ ᠪᠡᠨ
ᠪᠤᠯᠠᠭ ᠤ᠋ᠨ ᠤᠰᠤᠨ ᠳ᠋ᠤ᠌ ᠴᠢᠳᠬᠤᠶᠠ
ᠪᠣᠳᠣᠵᠤ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ
ᠪᠥᠭᠲᠥᠷ ᠮᠣᠳᠣᠨ ᠳ᠋ᠤ᠌ ᠡᠯᠭᠦᠶᠡ
ᠬᠥᠭᠡᠷᠦᠭᠦᠯᠦᠭᠰᠡᠨ ᠰᠦ ᠶ᠋ᠢ ᠪᠡᠨ
ᠬᠤᠳᠳᠤᠭ ᠤ᠋ᠨ ᠤᠰᠤᠨ ᠳ᠋ᠤ᠌ ᠴᠢᠳᠬᠤᠶᠠ
ᠠ ᠬᠠ ᠬᠦ
ᠬᠦᠰᠡᠵᠦ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ
ᠬᠥᠨᠳᠡᠢ ᠮᠣᠳᠣᠨ ᠳ᠋ᠤ᠌ ᠡᠯᠭᠦᠶᠡ᠃
ᠳᠠᠨᠠᠪᠠᠯ᠂ ᠮᠣᠷᠢ ᠪᠠᠨ ᠤᠰᠤᠯᠠᠵᠤ ᠪᠠᠷᠠᠭᠠᠳ ᠶᠠᠪᠤᠰᠤᠭᠠᠢ ᠭᠡᠬᠦ ᠳ᠋ᠦ᠍ ᠵᠢᠨᠰᠢᠶᠠᠩ᠂ ᠳᠠᠨᠠᠪᠠᠯ ᠳ᠋ᠠᠭᠠᠨ ᠭᠤᠶᠤᠵᠤ ᠬᠡᠯᠡᠭᠰᠡᠨ ᠨᠢ᠄
ᠬᠠᠨ ᠭᠠᠷᠤᠳᠢ ᠰᠢᠪᠠᠭᠤ ᠴᠢᠨᠢ
ᠬᠠᠮᠤᠭ ᠠ᠋ᠴᠠ ᠳᠡᠭᠡᠭᠦᠷ ᠨᠢᠰᠪᠡᠴᠦ
ᠬᠠᠳᠠᠨ ᠪᠣᠯᠤᠨ ᠠᠭᠤᠯᠠᠨ ᠣᠷᠭᠢᠯ ᠳ᠋ᠤ᠌
ᠰᠠᠭᠤᠳᠠᠭ ᠪᠢᠰᠢᠦ ᠳᠡ ᠠᠬᠠ ᠮᠢᠨᠢ ᠠ᠋᠃
ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ ᠬᠠᠯᠠᠭᠤᠨ ᠰᠠᠨᠠᠭᠠ ᠪᠠᠨ
ᠬᠥᠨᠳᠡᠢ ᠮᠣᠳᠣᠨ ᠳ᠋ᠤ᠌ ᠡᠯᠭᠦᠪᠡᠴᠦ
ᠠ ᠬᠠ ᠬᠦ
ᠬᠠᠷᠠᠬᠠᠨ ᠪᠠᠭᠠ ᠶ᠋ᠢᠨ ᠲᠠᠨᠢᠯ ᠤ᠋ᠨ ᠬᠤᠪᠢ ᠪᠠᠷ
ᠭᠡᠷ ᠲᠡᠭᠡᠨ ᠵᠠᠯᠠᠵᠤ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠡᠷᠡ ᠬᠠᠷᠴᠠᠭᠠᠢ ᠰᠢᠪᠠᠭᠤ ᠴᠢᠨᠢ
ᠡᠭᠦᠯᠡᠨ ᠳᠡᠭᠡᠭᠦᠷ ᠨᠢᠰᠪᠡᠴᠦ
ᠥᠨᠳᠥᠷ ᠠᠭᠤᠯᠠᠨ ᠤ᠋ ᠣᠷᠭᠢᠯ ᠳᠡᠭᠡᠷᠡ
ᠰᠠᠭᠤᠳᠠᠭ ᠪᠢᠰᠢ ᠤᠤ ᠠᠬᠠ ᠮᠢᠨᠢ ᠠ᠋
ᠦᠶᠡᠷᠬᠡᠵᠦ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ
ᠤᠷᠭᠤᠭᠠ ᠮᠣᠳᠣᠨ ᠳ᠋ᠤ᠌ ᠡᠯᠭᠦᠪᠡᠴᠦ
ᠠ ᠬᠠ ᠬᠦ
ᠦᠶᠡ ᠲᠠᠨᠢᠯ ᠤ᠋ᠨ ᠶᠣᠰᠣ ᠪᠠᠷ
ᠡᠷᠦᠬᠡ ᠭᠡᠷ ᠲᠡᠭᠡᠨ ᠵᠠᠯᠠᠵᠤ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠳᠠᠨᠠᠪᠠᠯ᠂ ᠵᠢᠨᠰᠢᠶᠠᠩ ᠤ᠋ᠨ ᠵᠠᠯᠠᠯᠭᠠ ᠪᠠᠷ ᠭᠡᠷ ᠲᠦ᠋ᠨᠢ ᠪᠠᠭᠤᠭᠰᠠᠨ ᠳ᠋ᠤ᠌ ᠵᠢᠨᠰᠡᠷᠮᠠ ᠨᠠᠢᠨᠠᠢ ᠨᠢ ᠬᠦᠦ ᠪᠡᠷᠢ ᠪᠣᠯᠤᠨ ᠳᠠᠭᠠᠵᠤ ᠢᠷᠡᠭᠰᠡᠨ ᠵᠠᠯᠠᠭᠤ ᠶ᠋ᠢᠨ ᠴᠢᠷᠠᠢ ᠶ᠋ᠢ ᠠᠵᠢᠭᠯᠠᠭᠠᠳ ᠳᠣᠲᠣᠷᠠ ᠪᠠᠨ ᠰᠡᠵᠢᠭ ᠲᠥᠷᠥᠵᠦ ᠢᠩᠭᠢᠵᠦ ᠬᠡᠯᠡᠵᠦ ᠪᠠᠢᠨᠠ᠄
ᠠᠯᠬᠤᠵᠤ ᠭᠢᠰᠬᠢᠬᠦ ᠪᠠᠢᠳᠠᠯ ᠢ ᠴᠢᠨᠢ
ᠠᠪᠤᠭᠠᠳ ᠦᠵᠡᠬᠦᠯᠡᠷ
ᠠᠯᠪᠠᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌
ᠰᠤᠷᠭᠠᠯ ᠬᠢᠭᠰᠡᠨ ᠮᠠᠶᠢᠭ ᠲᠠᠢ
ᠠᠯᠠᠭ ᠬᠣᠶᠠᠷ ᠨᠢᠳᠦᠨ ᠦ᠌ ᠴᠢᠨᠢ
ᠬᠠᠷᠠᠴᠠ ᠪᠠᠷ ᠨᠢ ᠦᠵᠡᠬᠦᠯᠡᠷ
ᠠ ᠬᠠ ᠬᠦ
ᠠᠩᠭᠠ ᠪᠠᠭᠠ ᠵᠢᠨᠰᠢᠶᠠᠩ ᠲᠠᠢ ᠮᠢᠨᠢ
ᠠᠩᠬᠠᠨ ᠠ᠋ᠴᠠ ᠪᠠᠨ ᠲᠠᠨᠢᠯᠴᠠᠬᠤ ᠪᠠᠢᠳᠠᠯ ᠲᠠᠢ᠃
ᠥᠨᠳᠥᠷ ᠫᠤᠤ ᠦᠶᠢᠨᠴᠢᠶᠠᠩ ᠢ᠋ᠶ᠋ᠠᠨ
ᠡᠭᠦᠷᠦᠭᠰᠡᠨ ᠢ᠋ᠶ᠋ᠡᠷ ᠴᠢᠨᠢ ᠦᠵᠡᠬᠦᠯᠡᠷ
ᠡᠵᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌
ᠠᠯᠪᠠ ᠬᠢᠭᠰᠡᠨ ᠪᠠᠢᠳᠠᠯ ᠲᠠᠢ
ᠡᠷᠢᠶᠡᠨ ᠠᠯᠠᠭ ᠨᠢᠳᠦ ᠶ᠋ᠢᠨ ᠴᠢᠨᠢ
ᠬᠠᠷᠠᠴᠠ ᠪᠠᠷ ᠨᠢ ᠦᠵᠡᠬᠦᠯᠡᠷ
ᠠ ᠬᠠ ᠬᠦ
ᠥᠪᠡᠷ ᠦ᠋ᠨ ᠪᠡᠷᠢ ᠵᠢᠨᠰᠢᠶᠠᠩ ᠲᠠᠢ ᠮᠢᠨᠢ
ᠡᠷᠲᠡᠨ ᠡᠴᠡ ᠲᠠᠨᠢᠯᠴᠠᠬᠤ ᠪᠠᠢᠳᠠᠯ ᠲᠠᠢ᠃
ᠳᠠᠨᠠᠪᠠᠯ ᠵᠢᠨᠰᠢᠶᠠᠩ ᠤ᠋ᠨ ᠭᠡᠷ ᠲᠦ᠍ ᠴᠠᠢ ᠤᠰᠤ ᠤᠤᠭᠤᠵᠤ ᠪᠠᠬᠠᠨ ᠠᠮᠤᠰᠬᠢᠵᠦ ᠵᠠᠮ ᠢ᠋ᠶ᠋ᠠᠨ ᠬᠥᠭᠡᠭᠡᠬᠦ ᠪᠡᠷ ᠭᠠᠷᠤᠭᠰᠠᠨ ᠳ᠋ᠤ᠌ ᠵᠢᠨᠰᠢᠶᠠᠩ ᠳᠠᠨᠠᠪᠠᠯ ᠢ᠋ ᠠᠢᠯ ᠤ᠋ᠨ ᠭᠠᠳᠠᠨᠠ ᠭᠠᠷᠲᠠᠯᠠ ᠮᠣᠷᠳᠠᠭᠤᠯᠬᠤ ᠳ᠋ᠤ᠌ ᠳᠠᠨᠠᠪᠠᠯ ᠪᠣᠭᠴᠣᠨᠠ᠋ᠴᠠ ᠪᠠᠨ ᠨᠢᠭᠡᠨ ᠵᠠᠬᠠ ᠲᠣᠷᠭᠠᠨ ᠴᠠᠮᠴᠠ ᠭᠠᠷᠭᠠᠵᠤ ᠳᠤᠷᠠᠰᠬᠠᠯ ᠪᠣᠯᠭᠠᠨ ᠥᠭᠭᠦᠭᠰᠡᠨ ᠪᠢᠯᠡ᠃
ᠬᠠᠢ ᠩᠠᠩ ᠭᠠᠵᠠᠷᠠ᠋ᠴᠠ ᠭᠠᠷᠤᠭᠰᠠᠨ
ᠬᠠᠯᠠ ᠲᠣᠷᠭᠠᠨ ᠴᠠᠮᠴᠠ ᠶᠤᠮ ᠠ᠋
ᠬᠠᠳᠠᠭ ᠲᠠᠯᠪᠢᠬᠤ ᠬᠤᠷᠢᠮ ᠳᠡᠭᠡᠷᠡ ᠪᠡᠨ
ᠪᠡᠯᠡᠭ ᠪᠣᠯᠭᠠᠬᠤ ᠪᠠᠷ ᠠᠪᠤᠭᠰᠠᠨ ᠶᠤᠮ ᠠ᠋
ᠬᠠᠷᠢ ᠤᠷᠤᠭ ᠤ᠋ᠨ ᠭᠠᠵᠠᠷ ᠲᠤ᠌ ᠴᠢᠨᠢ
ᠬᠣᠶᠠᠭᠤᠯᠠ ᠤᠴᠠᠷᠠᠭᠰᠠᠨ ᠲᠤᠯᠠᠳᠠ
ᠠ ᠬᠠ ᠬᠦ
ᠬᠠᠢᠷᠠᠬᠠᠨ ᠪᠠᠭᠠ ᠵᠢᠨᠰᠢᠶᠠᠩ ᠴᠢᠮᠠ ᠳ᠋ᠤ᠌
ᠳᠤᠷᠠᠰᠬᠠᠯ ᠪᠣᠯᠭᠠᠵᠤ ᠦᠯᠡᠳᠡᠭᠡᠶᠡ᠃
ᠬᠤᠨᠠᠨ ᠭᠠᠵᠠᠷ ᠠ᠋ᠴᠠ ᠭᠠᠷᠤᠭᠰᠠᠨ
ᠬᠣᠢᠰᠤᠩ ᠲᠣᠷᠭᠠᠨ ᠴᠠᠮᠴᠠ ᠶᠤᠮ ᠠ᠋
ᠬᠤᠷᠮᠤᠰᠲᠠ ᠲᠩᠷᠢ ᠳ᠋ᠦ᠍ ᠮᠥᠷᠭᠥᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍
ᠬᠣᠪᠴᠠᠯᠠᠭᠤᠯᠤᠶᠠ ᠭᠡᠵᠦ ᠠᠪᠤᠭᠰᠠᠨ ᠶᠤᠮ ᠠ᠋
ᠬᠣᠲᠠ ᠬᠦᠷᠢᠶᠡᠨ ᠳ᠋ᠦ᠍ ᠴᠢᠨᠢ ᠪᠠᠭᠤᠳᠠᠯᠯᠠᠭᠠᠳ
ᠬᠣᠶᠠᠭᠤᠯᠠ ᠤᠴᠠᠷᠠᠭᠰᠠᠨ ᠲᠤᠯᠠᠳᠠ
ᠠ ᠬᠠ ᠬᠦ
ᠬᠣᠪᠢᠨ ᠤ᠋ ᠰᠠᠨᠠᠭᠰᠠᠨ ᠵᠢᠨᠰᠢᠶᠠᠩ ᠴᠢᠮᠠ ᠳ᠋ᠤ᠌
ᠳᠤᠷᠠᠰᠬᠠᠯ ᠪᠣᠯᠭᠠᠵᠤ ᠥᠭᠭᠦᠶᠡ᠃
ᠠᠯᠪᠠᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠠ᠋ᠴᠠ
ᠤᠷᠭᠤᠵᠤ ᠳᠤᠲᠠᠭᠠᠭᠠᠳ ᠭᠠᠷᠴᠢᠬᠠᠯᠠ
ᠠᠪᠤ ᠶ᠋ᠢᠨ ᠨᠤᠲᠤᠭ ᠵᠢᠯᠲᠦ ᠶ᠋ᠢᠨ ᠠᠢᠯ ᠳ᠋ᠠᠭᠠᠨ
ᠤᠳᠠᠯ ᠦᠭᠡᠢ ᠪᠤᠴᠠᠭᠠᠳ ᠢᠷᠡᠯᠡ ᠳᠠ
ᠠᠭᠰᠢᠷᠠᠭᠠ ᠪᠣᠯᠤᠭᠰᠠᠨ ᠠᠪᠤ ᠡᠵᠢ ᠨᠢ
ᠠᠩᠭᠠ ᠪᠠᠨ ᠦᠵᠡᠭᠡᠳ ᠤᠬᠢᠯᠠᠴᠢᠬᠠᠯᠠ ᠰᠢᠦ
ᠠ ᠬᠠ ᠬᠦ
ᠠᠶᠤᠤᠯᠢᠬᠠᠢ ᠴᠡᠭᠡᠵᠢᠨ ᠳᠣᠲᠣᠷᠠ ᠪᠠᠨ
ᠦᠨᠡᠬᠡᠷ ᠴᠦ᠍ ᠪᠠᠶᠠᠷᠯᠠᠯᠠ ᠳᠠ᠃
ᠡᠵᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨᠠ᠋ᠴᠠ
ᠤᠷᠪᠠᠵᠤ ᠳᠤᠲᠠᠭᠠᠭᠠᠳ ᠭᠠᠷᠴᠢᠬᠠᠯᠠ
ᠡᠴᠢᠭᠡ ᠶ᠋ᠢᠨ ᠨᠤᠲᠤᠭ ᠵᠢᠯᠲᠦ ᠶ᠋ᠢᠨ ᠠᠢᠯ ᠳ᠋ᠠᠭᠠᠨ
ᠡᠷᠭᠢᠵᠦ ᠪᠤᠴᠠᠭᠠᠳ ᠢᠷᠡᠯᠡ ᠳᠠ
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠡᠵᠢ ᠠᠪᠤ ᠨᠢ
ᠦᠷᠡ ᠬᠦᠦ ᠪᠡᠨ ᠦᠵᠡᠭᠡᠳ ᠤᠬᠢᠯᠠᠴᠢᠬᠠᠯᠠ ᠰᠢᠦ
ᠠ ᠬᠠ ᠬᠦ
ᠡᠪᠴᠢᠭᠦᠦ ᠴᠡᠭᠡᠵᠢᠨ ᠳᠣᠲᠣᠷᠠ ᠪᠠᠨ
ᠦᠨᠡᠬᠡᠷ ᠴᠦ᠍ ᠰᠦᠷᠡᠬᠡᠢ ᠪᠠᠶᠠᠷᠯᠠᠯᠠ ᠳᠠ᠃
ᠳᠠᠨᠠᠪᠠᠯ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ ᠢᠷᠡᠭᠡᠳ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠬᠣᠶᠠᠷ ᠰᠠᠷᠠ ᠰᠢᠬᠠᠮ ᠪᠣᠯᠪᠠ᠃ ᠨᠢᠭᠡ ᠤᠳᠠᠭᠠ ᠠᠢᠯ ᠤ᠋ᠨ ᠬᠤᠷᠢᠮ ᠳᠡᠭᠡᠷᠡ ᠳᠠᠨᠠᠪᠠᠯ ᠤ᠋ᠨ ᠠᠪᠤ ᠶ᠋ᠢ ᠲᠦᠷᠦᠭᠦᠦ ᠬᠣᠲᠠ ᠪᠠᠷ ᠵᠠᠯᠠᠭᠰᠠᠨ ᠪᠠᠢᠨᠠ᠃ ᠮᠡᠩᠭᠦᠢ ᠡᠮᠴᠢ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠢᠨᠰᠢᠶᠠᠩ ᠤ᠋ᠨ ᠬᠣᠢᠨᠠᠠ᠋ᠴᠠ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠬᠤ ᠶ᠋ᠢ ᠮᠡᠳᠡᠬᠦ ᠲᠤᠯᠠ᠂ ᠬᠦᠦ ᠪᠡᠨ ᠪᠠᠶᠠᠷ ᠬᠥᠷ ᠲᠡᠢ ᠬᠤᠷᠢᠮ ᠨᠠᠢᠷ ᠲᠤ᠌ ᠣᠷᠣᠯᠴᠠᠭᠤᠯᠵᠤ᠂ ᠤᠢᠳᠬᠠᠷ ᠢ ᠨᠢ ᠰᠡᠷᠭᠦᠭᠡᠵᠦ ᠰᠡᠳᠬᠢᠯ ᠢ ᠨᠢ ᠠᠭᠤᠵᠢᠷᠠᠭᠤᠯᠬᠤ ᠶ᠋ᠢ ᠪᠣᠳᠣᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠣᠴᠢᠭᠰᠠᠨ ᠦᠭᠡᠢ᠂ ᠳᠠᠨᠠᠪᠠᠯ ᠢ᠋ᠶ᠋ᠠᠨ ᠶᠠᠪᠤᠭᠤᠯᠬᠤ ᠪᠠᠷ ᠪᠣᠯᠪᠠ᠃ ᠡᠢᠮᠦ ᠡᠴᠡ ᠳᠠᠨᠠᠪᠠᠯ ᠮᠣᠷᠢ ᠪᠠᠨ ᠤᠨᠤᠵᠤ ᠫᠤᠤ ᠪᠠᠨ ᠡᠭᠦᠷᠦᠭᠡᠳ ᠬᠤᠷᠢᠮ ᠤ᠋ᠨ ᠭᠠᠵᠠᠷ ᠬᠦᠷᠴᠦ ᠣᠴᠢᠭᠰᠠᠨ ᠪᠢᠯᠡ᠃
ᠬᠤᠷᠢᠮ ᠤ᠋ᠨ ᠭᠠᠵᠠᠷ ᠵᠠᠯᠠᠭᠳᠠᠭᠰᠠᠨ ᠪᠣᠯᠪᠠᠴᠤ
ᠬᠥᠷ ᠨᠠᠢᠷ ᠭᠡᠵᠦ ᠪᠠᠢᠨᠠ ᠤᠤ ᠳᠠ
ᠬᠣᠲᠠ ᠨᠣᠶᠠᠨ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ
ᠤᠷᠮᠠ ᠪᠠᠬᠠ ᠭᠡᠵᠦ ᠪᠠᠢᠨᠠ ᠤᠤ ᠳᠠ
ᠬᠣᠯᠠ ᠣᠢᠷᠠ ᠶ᠋ᠢᠨ ᠵᠣᠴᠢᠳ ᠤ᠋ᠨ
ᠬᠥᠭᠡᠷᠦᠯᠳᠦᠵᠦ ᠨᠠᠢᠷᠯᠠᠬᠤ ᠶ᠋ᠢ ᠦᠵᠡᠭᠡᠳ
ᠠ ᠬᠠ ᠬᠦ
ᠬᠣᠪᠢᠨ ᠤ᠋ ᠰᠠᠨᠠᠭᠰᠠᠨ ᠵᠢᠨᠰᠢᠶᠠᠩ ᠢ᠋ᠶ᠋ᠠᠨ ᠪᠣᠳᠣᠭᠠᠳ
ᠬᠥᠨᠳᠡᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠭᠣᠮᠣᠳᠠᠨᠠ᠃
ᠲᠥᠷᠥ ᠶ᠋ᠢᠨ ᠬᠤᠷᠢᠮ ᠳ᠋ᠤ᠌ ᠰᠠᠭᠤᠭᠰᠠᠨ ᠪᠣᠯᠪᠠᠴᠤ
ᠳᠤᠷᠠ ᠪᠠᠬᠠ ᠭᠡᠵᠦ ᠪᠠᠢᠨᠠ ᠤᠤ ᠳᠠ
ᠲᠦᠷᠦᠭᠦᠦ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠭᠰᠠᠨ ᠪᠣᠯᠪᠠᠴᠤ
ᠳᠤᠤᠭᠠᠷᠬᠤ ᠦᠭᠡ ᠭᠡᠵᠦ ᠪᠠᠢᠨᠠ ᠤᠤ ᠳᠠ
ᠲᠥᠷᠬᠥᠮ ᠬᠠᠳᠠᠮ ᠤ᠋ᠨ ᠵᠣᠴᠢᠳ ᠤ᠋ᠨ
ᠲᠦᠷᠴᠢᠭᠢᠨᠡᠵᠦ ᠦᠢᠮᠡᠯᠳᠦᠬᠦ ᠶ᠋ᠢ ᠦᠵᠡᠭᠡᠳ
ᠠ ᠬᠠ ᠬᠦ
ᠲᠦᠪᠲᠡᠢ ᠰᠠᠢᠬᠠᠨ ᠵᠢᠨᠰᠢᠶᠶᠠᠩ ᠢ᠋ᠶ᠋ᠠᠨ ᠰᠠᠨᠠᠵᠤ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠴᠢᠮᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠴᠡᠴᠡᠭ᠂ ᠨᠠᠷᠠᠨᠲᠣᠭᠣᠰ᠂ ᠣᠳᠬᠠᠨᠰᠣᠠ
ᠵᠠᠶᠠᠭᠠ ᠮᠠᠭᠤ ᠳ᠋ᠠᠭᠠᠨ ᠭᠣᠮᠣᠳᠠᠨᠠ᠃
ᠳᠠᠨᠠᠪᠠᠯ ᠤ᠋ᠨ ᠬᠤᠷᠢᠮ ᠳ᠋ᠤ᠌ ᠵᠠᠯᠠᠭᠳᠠᠭᠰᠠᠨ ᠴᠢᠮᠡᠭᠡ ᠶ᠋ᠢ ᠡᠷᠳᠡᠨᠢᠪᠢᠯᠢᠭ ᠲᠦᠩᠯᠢᠩ ᠣᠯᠵᠤ ᠮᠡᠳᠡᠭᠡᠳ ᠥᠪᠡᠷ ᠦ᠋ᠨ ᠭᠠᠷ ᠳᠣᠣᠷᠠᠬᠢ ᠬᠡᠳᠦᠨ ᠢᠲᠡᠭᠡᠯᠲᠡᠢ ᠬᠥᠮᠦᠨ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ᠂ ᠲᠡᠳᠡᠨᠦᠰ ᠢ᠋ ᠳᠡᠭᠡᠷᠡᠮ ᠦ᠋ᠨ ᠶᠠᠩᠵᠤ ᠪᠠᠷ ᠬᠤᠪᠴᠠᠯᠠᠭᠤᠯᠵᠤ᠂ ᠴᠢ ᠯᠠᠩ᠂ ᠪᠠ ᠬᠤ᠌ ᠶ᠋ᠢᠨ ᠳᠡᠭᠡᠷᠡᠮ ᠦ᠋ᠨ ᠪᠦᠯᠦᠭ ᠦ᠋ᠨ ᠨᠡᠷᠡ ᠶ᠋ᠢ ᠠᠰᠢᠭᠯᠠᠵᠤ᠂ ᠳᠠᠨᠠᠪᠠᠯ ᠢ᠋ ᠪᠠᠷᠢᠭᠤᠯᠬᠤ ᠪᠠᠷ ᠬᠤᠷᠢᠮ ᠤ᠋ᠨ ᠭᠠᠵᠠᠷ ᠲᠣᠮᠢᠯᠠᠭᠰᠠᠨ ᠠᠵᠢ᠃ ᠳᠠᠨᠠᠪᠠᠯ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠭᠠ ᠲᠠᠢ ᠲᠤᠯᠠ᠂ ᠬᠤᠷᠢᠮ ᠤ᠋ᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠠᠷᠢᠬᠢ ᠶ᠋ᠢ ᠨᠢ ᠳᠡᠮᠡᠢ ᠴᠦ᠍ ᠤᠤᠭᠤᠭᠰᠠᠨ ᠦᠭᠡᠢ ᠪᠡᠷ ᠰᠣᠭᠲᠣᠭᠠᠳ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠭᠠᠳᠠᠨᠠ ᠫᠤᠤ ᠳᠤᠤᠭᠠᠷᠴᠤ ᠡᠬᠢᠯᠡᠪᠡ᠃
ᠪᠠᠶᠠᠷ ᠤ᠋ᠨ ᠬᠤᠷᠢᠮ ᠳᠡᠭᠡᠷᠡ ᠨᠢ
ᠪᠠᠷᠴᠢᠳ ᠠᠶᠤᠯ ᠲᠣᠬᠢᠶᠠᠯᠳᠤᠯᠠ
ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠᠠ᠋ᠴᠠ ᠨᠢ
ᠫᠤᠤ ᠶ᠋ᠢᠨ ᠳᠠᠭᠤᠨ ᠲᠠᠴᠢᠭᠢᠨᠠᠯᠠ
ᠪᠠᠯᠠᠮᠠᠳ ᠳᠡᠭᠡᠷᠡᠮ ᠢᠷᠡᠯᠡ ᠭᠡᠵᠦ
ᠪᠠᠷᠬᠢᠷᠠᠯᠳᠤᠨ ᠭᠦᠶᠦᠯᠳᠦᠨᠡ ᠳᠡ
ᠠ ᠬᠠ ᠬᠦ
ᠪᠠᠭᠠ ᠶᠡᠬᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ
ᠪᠤᠲᠠᠷᠠᠨ ᠳᠤᠲᠠᠭᠠᠯᠴᠠᠯᠠ᠃
ᠥᠯᠵᠡᠢ ᠮᠥᠷ ᠲᠡᠢ ᠬᠤᠷᠢᠮ ᠳ᠋ᠤᠨᠢ
ᠦᠬᠦᠯ ᠦ᠋ᠨ ᠠᠶᠤᠯ ᠲᠠᠭᠠᠷᠠᠯᠳᠤᠯᠠ
ᠥᠪᠥᠷ ᠠᠷᠤ ᠲᠠᠯᠠ ᠪᠠᠷ ᠨᠢ
ᠥᠨᠳᠥᠷ ᠫᠤᠤ ᠲᠠᠴᠢᠭᠢᠨᠠᠯᠠ
ᠥᠰᠢᠶᠡᠲᠡᠨ ᠳᠡᠭᠡᠷᠡᠮ ᠢᠷᠡᠯᠡ ᠭᠡᠵᠦ
ᠦᠢᠮᠡᠯᠳᠦᠨ ᠭᠦᠶᠦᠯᠳᠦᠨᠡ ᠳᠡ
ᠠ ᠬᠠ ᠬᠦ
ᠥᠲᠡᠯᠦᠭᠰᠡᠨ ᠵᠠᠯᠠᠭᠤ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ
ᠡᠮᠦᠨᠡ ᠬᠣᠢᠨᠠ ᠦᠭᠡᠢ ᠳᠤᠲᠠᠭᠠᠯᠴᠠᠯᠠ᠃
ᠡᠨᠡ ᠦᠶᠡ ᠳ᠋ᠦ᠍᠂ ᠳᠠᠨᠠᠪᠠᠯ ᠴᠤ᠌ ᠨᠢᠭᠡᠨᠲᠡ ᠠᠷᠢᠬᠢᠨᠠ᠋ᠴᠠ ᠰᠡᠷᠭᠦᠵᠦ᠂ ᠫᠤᠤ ᠪᠠᠨ ᠠᠪᠴᠤ ᠳᠡᠭᠡᠷᠡᠮᠴᠦᠳ ᠲᠡᠢ ᠫᠤᠤᠳᠠᠯᠴᠠᠨ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠠᠶᠤᠵᠤ ᠮᠡᠩᠳᠡᠭᠦᠷᠡᠭᠰᠡᠨ ᠬᠥᠮᠦᠰ ᠢ ᠬᠠᠮᠠᠭᠠᠯᠠᠨ ᠵᠠᠢᠯᠠᠭᠤᠯᠵᠤ ᠪᠠᠢᠨᠠ᠃
ᠠᠷᠪᠠ ᠳᠤᠤᠭᠠᠷᠬᠤ ᠽᠢᠯᠠᠢᠳᠠᠢ ᠪᠠᠷ
ᠫᠤᠤᠳᠠᠵᠤ ᠪᠠᠢᠨᠠ ᠳᠠᠨᠠᠪᠠᠯ ᠠ᠋
ᠠᠲᠠᠭᠠᠲᠠᠨ ᠬᠤᠯᠠᠭᠠᠢ ᠳᠡᠭᠡᠷᠡᠮᠴᠦᠳ ᠲᠡᠢ
ᠠᠯᠠᠯᠳᠤᠨ ᠲᠤᠯᠤᠯᠳᠤᠯᠠ ᠳᠠᠨᠠᠪᠠᠯ ᠠ᠋
ᠠᠭᠰᠢᠷᠠᠭᠠ ᠵᠠᠯᠠᠭᠤ ᠪᠦᠭᠦᠳᠡ ᠶ᠋ᠢ ᠪᠡᠨ
ᠠᠮᠤᠷ ᠮᠡᠨᠳᠦ ᠵᠠᠢᠯᠠᠭᠤᠯᠤᠯᠠ ᠳᠠ
ᠠ ᠬᠠ ᠬᠦ
ᠠᠰ ᠤ᠋ᠨ ᠪᠡᠶᠡ ᠨᠢ ᠭᠠᠷᠤᠶᠠ ᠭᠡᠲᠡᠯᠡ
ᠠᠶᠤᠤᠯᠢᠬᠠᠢ ᠴᠡᠭᠡᠵᠢ ᠨᠢ ᠣᠨᠣᠭᠳᠠᠯᠠ ᠰᠢᠦ᠃
ᠥᠨᠳᠥᠷ ᠫᠤᠤ ᠪᠠᠨ ᠪᠠᠷᠢᠭᠠᠳ
ᠬᠠᠷᠪᠤᠵᠤ ᠯᠠ ᠪᠠᠢᠨᠠ ᠳᠠᠨᠠᠪᠠᠯ ᠠ᠋
ᠥᠰᠢᠶᠡᠲᠡᠨ ᠬᠤᠯᠠᠭᠠᠢ ᠳᠡᠭᠡᠷᠡᠮᠴᠦᠳ ᠲᠡᠢ
ᠦᠬᠦᠨ ᠲᠤᠯᠤᠯᠳᠤᠯᠠ ᠳᠠᠨᠠᠪᠠᠯ ᠠ᠋ ᠥᠲᠡᠯᠦᠭᠰᠡᠨ ᠵᠠᠯᠠᠭᠤ ᠪᠦᠭᠦᠳᠡ ᠶ᠋ᠢ ᠪᠡᠨ
ᠦᠯᠡᠳᠡᠯ ᠦᠭᠡᠢ ᠵᠠᠢᠯᠠᠭᠤᠯᠤᠯᠠ ᠳᠠ
ᠠ ᠬᠠ ᠬᠦ
ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠭᠠᠷᠤᠶᠠ ᠭᠡᠲᠡᠯᠡ
ᠡᠪᠴᠢᠭᠦᠦ ᠴᠡᠭᠡᠵᠢ ᠨᠢ ᠣᠨᠣᠭᠳᠠᠯᠠ ᠰᠢᠦ᠃
ᠳᠠᠨᠠᠪᠠᠯ ᠬᠤᠷᠢᠮ ᠳ᠋ᠤ᠌ ᠣᠴᠢᠭᠠᠳ ᠴᠢ ᠯᠠᠩ᠂ ᠪᠠ ᠬᠤ᠌ ᠶ᠋ᠢᠨ ᠳᠡᠭᠡᠷᠡᠮ ᠦ᠋ᠨ ᠪᠦᠯᠦᠭ ᠲᠦ᠍ ᠠᠯᠠᠭᠳᠠᠭᠰᠠᠨ ᠴᠢᠮᠡᠭᠡ ᠤᠳᠠᠯ ᠦᠭᠡᠢ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠷ ᠳᠡᠯᠭᠡᠷᠡᠭᠰᠡᠨ ᠪᠠᠢᠯᠠ᠃
× × ×
ᠨᠢᠭᠡᠨ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠵᠢᠨᠰᠢᠶᠠᠩ ᠦᠨᠢᠶᠡ ᠪᠡᠨ ᠰᠠᠭᠠᠵᠤ ᠪᠠᠢᠲᠠᠯᠠ᠂ ᠠᠢᠯ ᠤ᠋ᠨ ᠬᠡᠦᠬᠡᠳ ᠬᠠᠵᠠᠭᠤ ᠪᠠᠷ ᠨᠢ ᠭᠠᠷᠬᠤ ᠳ᠋ᠠᠭᠠᠨ ᠢᠩᠭᠢᠵᠦ ᠳᠠᠭᠤᠯᠠᠵᠤ ᠪᠠᠢᠨᠠ᠃
ᠡᠦ ᠲᠦᠩᠱᠦ ᠮᠣᠳᠣ ᠴᠢᠨᠢ
ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠬᠤᠪᠠᠬᠠᠢᠷᠠᠭᠠᠳ ᠤᠨᠠᠪᠠᠯ
ᠥᠲᠥᠨ ᠵᠢᠭᠦᠷ ᠲᠡᠢ ᠢᠩᠭᠡᠷ ᠰᠢᠪᠠᠭᠤ
ᠬᠠᠮᠢᠭᠠ ᠪᠠᠨ ᠰᠠᠭᠤᠮᠠᠨᠵᠢᠨ ᠳᠣᠩᠭᠣᠳᠤᠶᠠ ᠳᠠ
ᠦᠶᠡᠷᠬᠡᠵᠦ ᠰᠠᠭᠤᠭᠰᠠᠨ ᠳᠠᠨᠠᠪᠠᠯ ᠨᠢ
ᠥᠰᠢᠶᠡᠲᠡᠨ ᠳᠡᠭᠡᠷᠡᠮ ᠳ᠋ᠦ᠍ ᠠᠯᠠᠭᠳᠠᠯᠠ ᠰᠢᠦ
ᠠ ᠬᠠ ᠬᠦ
ᠦᠯᠡᠳᠡᠵᠦ ᠬᠣᠴᠣᠷᠤᠭᠰᠠᠨ ᠵᠢᠨᠰᠢᠶᠠᠩ ᠴᠢᠨᠢ
ᠬᠡᠨ ᠢ᠋ᠶ᠋ᠡᠨ ᠭᠡᠵᠦ ᠰᠠᠭᠤᠶᠠ ᠳᠠ᠃
ᠬᠠᠢᠯᠠᠰᠤ ᠮᠠᠢᠯᠠᠰᠤᠨ ᠮᠣᠳᠣ ᠴᠢᠨᠢ
ᠬᠢᠪᠠᠷᠠᠭᠠᠳ ᠯᠠ ᠤᠨᠠᠪᠠᠯ
ᠬᠠᠢᠴᠢᠨ ᠵᠢᠭᠦᠷ ᠲᠡᠢ ᠢᠩᠭᠡᠷ ᠰᠢᠪᠠᠭᠤ
ᠬᠠᠮᠢᠭᠠ ᠰᠠᠭᠤᠮᠠᠨᠵᠢᠨ ᠳᠣᠩᠭᠣᠳᠤᠶᠠ
ᠬᠠᠢᠷᠠᠯᠠᠵᠤ ᠰᠠᠨᠠᠭᠰᠠᠨ ᠳᠠᠨᠠᠪᠠᠯ ᠨᠢ
ᠬᠠᠷᠭᠢᠰ ᠳᠡᠭᠡᠷᠡᠮ ᠳ᠋ᠦ᠍ ᠠᠯᠠᠭᠳᠠᠯᠠ ᠰᠢᠦ
ᠠ ᠬᠠ ᠬᠦ
ᠬᠣᠴᠣᠷᠤᠭᠠᠳ ᠰᠠᠭᠤᠭᠰᠠᠨ ᠵᠢᠨᠰᠢᠶᠠᠩ ᠴᠢᠨᠢ
ᠬᠡᠨ ᠢ᠋ᠶ᠋ᠡᠨ ᠭᠡᠵᠦ ᠰᠠᠭᠤᠶᠠ ᠳᠠ᠃
ᠵᠢᠨᠰᠢᠶᠠᠩ᠂ᠠᠢᠯ ᠤ᠋ᠨ ᠬᠡᠦᠬᠡᠳ ᠦ᠋ᠨ ᠢᠩᠭᠢᠵᠦ ᠳᠠᠭᠤᠯᠠᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠳᠣᠲᠣᠷᠠ ᠨᠢ ᠪᠠᠬᠠᠨ ᠰᠡᠵᠢᠭ ᠲᠥᠷᠥᠵᠦ᠂ ᠵᠠᠪ ᠴᠢᠯᠥᠭᠡ ᠪᠡᠷ ᠢ᠋ᠶ᠋ᠡᠨ ᠭᠠᠷᠴᠤ ᠠᠢᠯ ᠤ᠋ᠨ ᠡᠭᠡᠴᠢ ᠳᠡᠭᠦᠦ ᠨᠠᠷ ᠠ᠋ᠴᠠ ᠰᠤᠷᠠᠭᠯᠠᠭᠰᠠᠨ ᠳ᠋ᠤ᠌ ᠳᠠᠨᠠᠪᠠᠯ ᠳᠡᠭᠡᠷᠡᠮ ᠳ᠋ᠦ᠍ ᠠᠯᠠᠭᠳᠠᠭᠰᠠᠨ ᠭᠡᠨᠡ᠃
ᠵᠢᠨᠰᠢᠶᠠᠩ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠮᠡᠭᠴᠡ ᠤᠬᠢᠯᠠᠵᠤ ᠡᠬᠢᠯᠡᠯᠡ᠂ ᠪᠠᠯᠳᠠᠨᠫᠡᠷᠡᠩᠯᠡᠢ ᠡᠭᠦᠨ ᠢ᠋ ᠦᠵᠡᠵᠦ ᠠᠭᠤᠷᠯᠠᠭᠰᠠᠨ ᠳ᠋ᠠᠭᠠᠨ ᠵᠢᠨᠰᠢᠶᠠᠩ ᠢ᠋ ᠨᠠᠢᠨᠠᠢ ᠳ᠋ᠠᠭᠠᠨ ᠵᠠᠭᠠᠯᠳᠤᠵᠤ ᠪᠠᠢᠨᠠ᠄
ᠬᠠᠨᠲᠠᠭᠠᠵᠠ ᠶ᠋ᠢᠨ ᠬᠠᠭᠠᠷᠬᠠᠢ ᠶ᠋ᠢ ᠣᠶᠣ ᠭᠡᠬᠦ ᠳ᠋ᠦ᠍
ᠬᠠᠢᠬᠤᠷᠬᠤ ᠴᠤ᠌ ᠦᠭᠡᠢ ᠵᠢᠨᠰᠢᠶᠠᠩ ᠴᠢᠨᠢ ᠠ᠋
ᠬᠠᠷᠠ ᠥᠷᠯᠥᠭᠡ ᠪᠣᠰᠴᠤ ᠰᠠᠭᠤᠭᠠᠳ
ᠬᠠᠢᠯᠠᠭᠤᠯᠵᠤ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋
ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠳᠠᠨᠠᠪᠠᠯ ᠢ᠋
ᠬᠠᠷᠠᠲᠠᠢ ᠴᠤ᠌ ᠰᠠᠨᠠᠵᠤ ᠭᠡᠨᠡ ᠵᠢᠨᠰᠢᠶᠠᠩ ᠴᠢᠨᠢ ᠠ᠋
ᠠ ᠬᠠ ᠬᠦ
ᠬᠠᠮᠲᠤᠷᠠᠭᠰᠠᠨ ᠬᠥᠮᠦᠨ ᠪᠠᠯᠳᠠᠨᠫᠡᠷᠡᠩᠯᠡᠢ ᠪᠡᠨ
ᠬᠥᠮᠦᠨ ᠢ᠋ᠶ᠋ᠡᠷ ᠦᠵᠡᠬᠦ ᠦᠭᠡᠢ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠦᠮᠦᠳᠦᠨ ᠬᠠᠭᠠᠷᠬᠠᠢ ᠶ᠋ᠢ ᠨᠥᠬᠥ ᠭᠡᠬᠦ ᠳ᠋ᠦ᠍
ᠣᠢᠰᠢᠶᠠᠬᠤ ᠴᠤ᠌ ᠦᠭᠡᠢ ᠵᠢᠨᠰᠢᠶᠠᠩ ᠴᠢᠨᠢ ᠠ᠋
ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠰᠠᠭᠤᠭᠠᠳ
ᠤᠬᠢᠯᠠᠭᠠᠳ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋
ᠡᠵᠡᠨ ᠦ᠌ ᠴᠡᠷᠢᠭ ᠦ᠋ᠨ ᠳᠠᠨᠠᠪᠠᠯ ᠢ᠋
ᠦᠨᠡᠬᠡᠷ ᠴᠦ᠍ ᠰᠠᠨᠠᠵᠤ ᠭᠡᠨᠡ ᠵᠢᠨᠰᠢᠶᠠᠩ ᠴᠢᠨᠢ ᠠ᠋
ᠠ ᠬᠠ ᠬᠦ
ᠥᠪᠡᠷ ᠦ᠋ᠨ ᠡᠷᠡ ᠪᠠᠯᠳᠠᠨᠫᠡᠷᠡᠩᠯᠡᠢ ᠪᠡᠨ
ᠬᠥᠮᠦᠨ ᠢ᠋ᠶ᠋ᠡᠷ ᠦᠵᠡᠬᠦ ᠦᠭᠡᠢ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠵᠢᠨᠰᠢᠶᠠᠩ ᠪᠠᠰᠠ ᠨᠠᠢᠨᠠᠢ ᠳ᠋ᠠᠭᠠᠨ ᠬᠡᠯᠡᠵᠦ ᠪᠠᠢᠬᠤ ᠨᠢ᠄
ᠦᠨᠡᠰᠦ ᠪᠡᠨ ᠭᠡᠭᠡᠬᠦ ᠪᠡᠷ ᠭᠠᠷᠬᠤᠯᠠᠷ
ᠥᠪᠡᠷ ᠦ᠋ᠨ ᠲᠠᠨᠢᠯ ᠲᠠᠢ ᠤᠴᠠᠷᠠᠴᠢᠬᠠᠵᠠᠢ
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠠᠪᠤ ᠶ᠋ᠢ ᠪᠡᠨ
ᠡᠪᠡᠳᠴᠢᠨ ᠲᠡᠢ ᠪᠣᠯᠵᠤ ᠭᠡᠮᠡᠨ ᠰᠣᠨᠣᠰᠪᠠ
ᠥᠪᠡᠷ ᠦ᠋ᠨ ᠪᠡᠶᠡ ᠮᠢᠨᠢ ᠲᠥᠷᠬᠥᠮ ᠳ᠋ᠡᠭᠡᠨ ᠬᠠᠷᠢᠵᠤ
ᠦᠵᠡᠵᠦ ᠠᠩᠬᠠᠷᠵᠤ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ
ᠠ ᠬᠠ ᠬᠦ
ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠰᠠᠭᠤᠭᠠᠳ
ᠤᠬᠢᠯᠠᠵᠤ ᠰᠠᠭᠤᠯᠠ ᠰᠢᠦ ᠪᠡᠶᠡ ᠮᠢᠨᠢ ᠠ᠋᠃
ᠲᠦᠯᠡᠭᠡ ᠡᠭᠦᠷᠬᠦ ᠪᠡᠷ ᠶᠠᠪᠤᠬᠤ ᠳ᠋ᠤ᠌
ᠲᠠᠨᠢᠯ ᠤ᠋ᠨ ᠬᠥᠮᠦᠨ ᠲᠡᠢ ᠲᠠᠭᠠᠷᠠᠴᠢᠬᠠᠵᠠᠢ
ᠲᠥᠷᠥᠭᠰᠡᠨ ᠠᠪᠤ ᠶ᠋ᠢᠨ ᠪᠡᠶᠡ
ᠲᠣᠮᠣᠭᠣ ᠳ᠋ᠤ᠌ ᠳᠠᠭᠠᠷᠢᠭᠳᠠᠯᠠ ᠭᠡᠵᠦ ᠰᠣᠨᠣᠰᠪᠠ
ᠲᠥᠷᠬᠥᠮ ᠳ᠋ᠡᠭᠡᠨ ᠪᠤᠴᠠᠵᠤ ᠬᠠᠷᠢᠭᠠᠳ
ᠲᠤᠰᠠ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ
ᠠ ᠬᠠ ᠬᠦ
ᠲᠦᠪᠡᠭᠳᠡᠵᠦ ᠵᠣᠪᠠᠨᠢᠵᠤ ᠭᠠᠴᠢᠭᠳᠠᠭᠠᠳ
ᠤᠬᠢᠯᠠᠵᠤ ᠪᠠᠢᠨᠠ ᠰᠢᠦ ᠪᠡᠶᠡ ᠮᠢᠨᠢ ᠠ᠋᠃
ᠵᠢᠨᠰᠡᠷᠮᠡ ᠨᠠᠢᠨᠠᠢ᠂ ᠳᠠᠨᠠᠪᠯ ᠤ᠋ᠨ ᠳᠡᠭᠡᠷᠡᠮ ᠳ᠋ᠦ᠍ ᠠᠯᠠᠭᠳᠠᠭᠰᠠᠨ ᠴᠢᠮᠡᠭᠡ ᠶ᠋ᠢ ᠬᠡᠳᠦᠢᠨᠡᠢ ᠣᠯᠵᠤ ᠰᠣᠨᠣᠰᠤᠭᠠᠳ᠂ ᠵᠢᠨᠰᠢᠶᠠᠩ ᠤ᠋ᠨ ᠤᠬᠢᠯᠠᠵᠤ ᠪᠠᠢᠬᠤ ᠤᠴᠢᠷ ᠢ᠋ ᠣᠢᠯᠭᠠᠵᠤ ᠮᠡᠳᠡᠭᠡᠳ᠂ ᠬᠦᠦ ᠪᠡᠷᠢ ᠪᠡᠨ ᠲᠥᠷᠬᠥᠮ ᠳ᠋ᠦ᠍ᠨᠢ ᠬᠠᠷᠢᠭᠤᠯᠵᠤ ᠳᠠᠨᠠᠪᠠᠯ ᠤ᠋ᠨ ᠦᠬᠦᠭᠰᠡᠨ ᠢ᠋ ᠨᠢᠳᠦ ᠪᠡᠷ ᠨᠢ ᠦᠵᠡᠭᠦᠯᠵᠦ ᠰᠡᠳᠬᠢᠯ ᠢ᠋ ᠨᠢ ᠮᠣᠬᠣᠭᠠᠰᠤᠭᠠᠢ ᠭᠡᠵᠦ ᠪᠣᠳᠣᠭᠠᠳ᠄ 《 ᠠᠪᠤ ᠴᠢᠨᠢ ᠡᠪᠡᠳᠦᠭᠰᠡᠨ ᠪᠣᠯ ᠴᠢ ᠮᠠᠷᠭᠠᠰᠢ ᠲᠥᠷᠬᠥᠮ ᠳ᠋ᠡᠭᠡᠨ ᠬᠠᠷᠢᠵᠤ ᠠᠪᠤ ᠪᠠᠨ ᠰᠤᠪᠢᠯᠠᠭᠠᠷᠠᠢ᠂ ᠠᠪᠤ ᠴᠢᠨᠢ ᠬᠡᠵᠢᠶᠡ ᠡᠷᠡᠭᠦᠯ ᠲᠡᠩᠬᠡᠯᠡᠭᠦᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠰᠠᠶᠢ ᠬᠠᠷᠢᠵᠤ ᠢᠷᠡ 》ᠭᠡᠪᠡ᠃
ᠵᠠ᠂ ᠵᠢᠨᠰᠢᠶᠠᠩ ᠲᠥᠷᠬᠥᠮᠴᠢᠯᠡᠬᠦ ᠪᠡᠷ ᠵᠢᠯᠲᠦ ᠶ᠋ᠢᠨ ᠠᠢᠯ ᠳ᠋ᠠᠭᠠᠨ ᠪᠤᠴᠠᠨ ᠢᠷᠡᠵᠦ ᠵᠡᠭᠦᠨ ᠪᠠᠷᠠᠭᠤᠨ ᠭᠡᠷ ᠦ᠋ᠨ ᠡᠭᠡᠴᠢ ᠳᠡᠭᠦᠦ ᠨᠠᠷᠠ᠋ᠴᠠ ᠪᠠᠨ ᠳᠠᠨᠠᠪᠠᠯ ᠤ᠋ᠨ ᠠᠯᠠᠭᠳᠠᠭᠰᠠᠨ ᠦᠨᠡᠨ ᠪᠣᠳᠠᠲᠠᠢ ᠪᠠᠢᠳᠠᠯ ᠢ᠋ ᠯᠠᠪᠯᠠᠵᠤ ᠮᠡᠳᠡᠭᠡᠳ ᠢᠩᠭᠢᠵᠦ ᠳᠠᠭᠤᠯᠠᠵᠤ ᠪᠠᠢᠨᠠ᠄
ᠠᠯᠪᠠᠨ ᠴᠡᠷᠢᠭ ᠦ᠋ᠨ ᠡᠷᠳᠡᠨᠢᠪᠢᠯᠢᠭ
ᠬᠥᠮᠦᠨ ᠪᠢᠰᠢ ᠠᠳᠤᠭᠤᠰᠤ ᠠ᠋
ᠠᠮᠠᠷᠠᠭ ᠬᠣᠩᠭᠣᠷ ᠢ᠋ ᠮᠢᠨᠢ ᠠᠯᠠᠭᠰᠠᠨ ᠨᠢ
ᠳᠡᠭᠡᠷᠡᠮ ᠪᠢᠰᠢ ᠴᠡᠷᠢᠭ ᠦ᠋ᠳ ᠠ᠋
ᠠᠩᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠠᠪᠤᠭᠰᠠᠨ ᠪᠣᠯ
ᠠᠶᠤᠯ ᠲᠠᠭᠠᠷᠠᠨᠠ ᠤᠤ ᠠᠬᠠ ᠮᠢᠨᠢ ᠠ᠋
ᠠ ᠬᠠ ᠬᠦ
ᠠᠯᠲᠠᠨ ᠳᠡᠯᠡᠬᠡᠢ ᠪᠡᠷ ᠲᠣᠭᠣᠷᠢᠨᠠ ᠭᠡᠭᠰᠡᠭᠡᠷ
ᠠᠮᠢ ᠪᠡᠶᠡ ᠪᠡᠨ ᠠᠯᠳᠠᠯᠠ ᠰᠢᠦ᠃
ᠡᠵᠡᠷᠬᠡᠭ ᠬᠤᠯᠠᠭᠠᠢ ᠡᠷᠳᠡᠨᠢᠪᠢᠯᠢᠭ
ᠬᠥᠮᠦᠨ ᠪᠢᠰᠢ ᠠᠳᠤᠭᠤᠰᠤ ᠠ᠋
ᠦᠶᠡ ᠶ᠋ᠢᠨ ᠬᠣᠩᠭᠣᠷ ᠢ᠋ ᠮᠢᠨᠢ ᠠᠯᠠᠭᠰᠠᠨ ᠨᠢ
ᠳᠡᠭᠡᠷᠡᠮ ᠪᠢᠰᠢ ᠴᠡᠷᠢᠭ ᠦ᠋ᠳ ᠠ᠋
ᠡᠷᠦᠬᠡ ᠭᠡᠷ ᠲᠡᠭᠡᠨ ᠰᠠᠭᠤᠭᠰᠠᠨ ᠪᠣᠯ
ᠦᠬᠦᠯ ᠦ᠋ᠨ ᠠᠶᠤᠯ ᠲᠤᠯᠭᠠᠷᠠᠨᠠ ᠤᠤ ᠳᠠ ᠠᠬᠠ ᠮᠢᠨᠢ ᠠ᠋
ᠠ ᠬᠠ ᠬᠦ
ᠶᠢᠷᠲᠢᠨᠴᠦ ᠳᠡᠯᠡᠬᠡᠢ ᠪᠡᠷ ᠡᠷᠭᠢᠯᠳᠦᠨᠡ ᠭᠡᠭᠰᠡᠭᠡᠷ
ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠪᠠᠷᠠᠭᠰᠠᠨ ᠰᠢᠦ᠃
ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠵᠢᠨᠰᠢᠶᠠᠩ ᠢᠳᠡᠭᠡᠨ ᠤᠮᠳᠠᠭᠠᠨ ᠠᠪᠴᠤ ᠳᠠᠨᠠᠪᠠᠯ ᠳ᠋ᠠᠭᠠᠨ ᠲᠦᠯᠡᠰᠢ ᠡᠷᠭᠦᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠭᠦᠢᠴᠡᠳᠬᠡᠬᠦ ᠪᠡᠷ ᠦᠬᠦᠭᠡᠷ ᠳᠡᠭᠡᠷᠡ ᠨᠢ ᠢᠷᠡᠵᠦ ᠲᠠᠬᠢᠯᠭᠠ ᠲᠠᠯᠪᠢᠨ ᠰᠥᠭᠥᠳᠴᠦ ᠮᠥᠷᠭᠥᠭᠡᠳ ᠤᠬᠢᠯᠠᠨ ᠬᠡᠯᠡᠵᠦ ᠪᠠᠢᠨᠠ᠄
ᠬᠦᠨᠳᠦ ᠲᠥᠷᠥ ᠶ᠋ᠢᠨ ᠶᠣᠰᠣ ᠪᠠᠷ
ᠬᠣᠯᠪᠣᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ
ᠬᠦᠰᠡᠵᠦ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ
ᠬᠣᠶᠠᠭᠤᠯᠠ ᠪᠠᠨ ᠮᠡᠳᠡᠯᠴᠡᠳᠡᠭ ᠪᠢᠰᠢ ᠤᠤ ᠳᠠ
ᠬᠦᠴᠦᠷᠬᠡᠭ ᠬᠤᠯᠠᠭᠠᠢ ᠡᠷᠳᠡᠨᠢᠪᠢᠯᠢᠭ ᠲᠦ᠍
ᠠᠯᠠᠭᠳᠠᠭᠰᠠᠨ ᠢ᠋ ᠴᠢᠨᠢ ᠰᠣᠨᠣᠰᠤᠭᠠᠳ
ᠠ ᠬᠠ ᠬᠦ
ᠬᠥᠭᠡᠷᠦᠬᠦᠨ ᠪᠠᠭᠠ ᠵᠢᠨᠰᠢᠶᠠᠩ ᠴᠢᠨᠢ
ᠬᠦᠷᠦᠭᠡᠳ ᠢᠷᠡᠵᠡᠢ ᠠᠬᠠ ᠮᠢᠨᠢ ᠠ᠋ ᠃
ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠵᠣᠬᠢᠶᠠᠭᠰᠠᠨ ᠢ᠋ᠶ᠋ᠠᠷ
ᠪᠣᠭᠲᠣᠯᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ
ᠪᠣᠳᠣᠵᠤ ᠰᠠᠨᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ
ᠪᠣᠳᠠᠲᠠᠢ ᠬᠣᠶᠠᠭᠤᠯᠠ ᠪᠠᠨ ᠮᠡᠳᠡᠯᠴᠡᠳᠡᠭ ᠰᠢᠦ
ᠪᠤᠷᠤᠩᠬᠤᠢ ᠨᠣᠶᠠᠨ ᠡᠷᠳᠡᠨᠢᠪᠢᠯᠢᠭ ᠲᠦ᠍
ᠠᠯᠠᠭᠳᠠᠭᠰᠠᠨ ᠢ᠋ ᠴᠢᠨᠢ ᠰᠣᠨᠣᠰᠤᠭᠠᠳ
ᠠ ᠬᠠ ᠬᠦ
ᠪᠣᠯᠪᠠᠷᠠᠬᠠᠨ ᠲᠥᠷᠥᠭᠰᠡᠨ ᠵᠢᠨᠰᠢᠶᠠᠩ ᠴᠢᠨᠢ
ᠪᠡᠶᠡ ᠪᠡᠷ ᠢᠷᠡᠵᠡᠢ ᠠᠬᠠ ᠮᠢᠨᠢ ᠠ᠋ ᠃
ᠨᠢᠭᠡᠨ ᠵᠡᠷᠭᠡ ᠭᠠᠰᠢᠭᠤᠳᠠᠨ ᠤᠬᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠢᠨᠰᠢᠶᠠᠩ᠂ ᠳᠠᠨᠠᠪᠠᠯ ᠤ᠋ᠨ ᠳᠤᠷᠠᠰᠬᠠᠯ ᠪᠣᠯᠭᠠᠵᠤ ᠥᠭᠭᠦᠭᠰᠡᠨ ᠲᠣᠷᠭᠠᠨ ᠴᠠᠮᠴᠠ ᠶ᠋ᠢ ᠭᠠᠷᠭᠠᠵᠤ ᠬᠡᠯᠡᠵᠦ ᠪᠠᠢᠬᠤ ᠨᠢ᠄
ᠬᠠᠷᠠ ᠲᠣᠷᠭᠠᠨ ᠴᠠᠮᠴᠠ ᠴᠢᠨᠢ
ᠳᠤᠷᠠᠰᠬᠠᠯ ᠪᠢᠰᠢ ᠭᠡᠷᠢᠶᠡᠰ ᠪᠣᠯᠤᠯᠠ
ᠬᠠᠪᠤᠲᠠᠢ ᠰᠠᠢᠬᠠᠨ ᠪᠡᠶᠡ ᠴᠢᠨᠢ
ᠬᠠᠷᠠ ᠰᠢᠷᠣᠢ ᠶ᠋ᠢᠨ ᠣᠩᠭᠣᠨ ᠳ᠋ᠤ᠌ ᠣᠷᠣᠯᠠ
ᠬᠠᠷᠠᠬᠠᠨ ᠪᠠᠭᠠ ᠵᠢᠨᠰᠢᠶᠠᠩ ᠨᠠᠮᠠᠢ ᠪᠠᠨ
ᠬᠠᠶᠠᠭᠠᠳ ᠶᠠᠪᠤᠬᠤ ᠨᠢ ᠶᠠᠭᠤ ᠪᠣᠯᠪᠠ ᠳᠠ
ᠠ ᠬᠠ ᠬᠦ
ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ ᠬᠠᠯᠠᠭᠤᠨ ᠰᠠᠨᠠᠭᠠ ᠮᠢᠨᠢ
ᠡᠨᠡ ᠨᠠᠰᠤᠨ ᠤ᠋ ᠭᠣᠮᠣᠳᠠᠯ ᠪᠣᠯᠤᠯᠠ᠃
ᠥᠩᠭᠡᠲᠦ ᠲᠣᠷᠭᠠᠨ ᠴᠠᠮᠴᠠ ᠴᠢᠨᠢ
ᠦᠯᠡᠳᠡᠭᠡᠵᠦ ᠦᠭᠭᠦᠭᠰᠡᠨ ᠭᠡᠷᠢᠶᠡᠰ ᠪᠣᠯᠤᠯᠠ
ᠥᠨᠳᠥᠷ ᠰᠠᠢᠬᠠᠨ ᠪᠡᠶᠡ ᠴᠢᠨᠢ
ᠥᠷᠭᠡᠨ ᠲᠠᠯᠠ ᠶ᠋ᠢᠨ ᠣᠩᠭᠣᠨ ᠳ᠋ᠤ᠌ ᠣᠷᠣᠯᠠ
ᠦᠶᠡ ᠶ᠋ᠢᠨ ᠬᠣᠩᠭᠣᠷ ᠵᠢᠨᠰᠢᠶᠠᠩ ᠨᠠᠮᠠᠢ ᠪᠠᠨ
ᠥᠨᠥᠴᠢᠷᠡᠲᠡᠯᠡ ᠬᠠᠶᠠᠬᠤ ᠨᠢ ᠶᠠᠭᠤ ᠪᠣᠯᠪᠠ ᠳᠠ
ᠠ ᠬᠠ ᠬᠦ
ᠦᠨᠡᠨ ᠰᠡᠳᠬᠢᠯ ᠤᠬᠠᠭᠠᠨ ᠰᠠᠨᠠᠭᠠ ᠮᠢᠨᠢ
ᠡᠨᠡ ᠨᠠᠰᠤᠨ ᠤ᠋ ᠭᠣᠮᠣᠳᠠᠯ ᠪᠣᠯᠤᠯᠠ᠃
ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ
ᠪᠠᠢᠳᠠᠭ ᠪᠣᠯᠤᠶᠠ ᠳᠠ ᠠᠬᠠ ᠮᠢᠨᠢ ᠠ᠋
ᠠᠷᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠣᠴᠢᠵᠤ ᠪᠠᠢᠭᠠᠳ
ᠠᠯᠲᠠᠨ ᠭᠠᠨᠵᠤᠤᠷ ᠠᠢᠯᠠᠳᠤᠭᠤᠯᠬᠤ ᠦᠭᠡᠢ ᠤᠤ ᠳᠠ
ᠠᠷᠭᠠ ᠦᠭᠡᠢ ᠬᠥᠮᠦᠨ ᠦ᠌ ᠭᠠᠵᠠᠷ
ᠵᠠᠶᠠᠭᠠᠴᠢᠬᠠᠭᠰᠠᠨ ᠲᠤᠯᠠᠳᠠ
ᠠ ᠬᠠ ᠬᠦ
ᠠᠷᠢᠬᠢ ᠰᠦᠷᠴᠢᠵᠦ ᠢᠳᠡᠭᠡᠨ ᠡᠷᠭᠦᠵᠦ
ᠮᠥᠷᠭᠥᠵᠦ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠡᠵᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ
ᠪᠠᠢᠳᠠᠭ ᠪᠣᠯᠤᠶᠠ ᠳᠠ ᠠᠬᠠ ᠮᠢᠨᠢ ᠠ᠋
ᠡᠮᠦᠨᠡᠲᠦ ᠰᠦᠮᠡ ᠳ᠋ᠦ᠍ ᠣᠴᠢᠵᠤ ᠪᠠᠢᠭᠠᠳ
ᠡᠷᠳᠡᠨᠢ ᠶ᠋ᠢᠨ ᠭᠠᠨᠵᠤᠤᠷ ᠠᠢᠯᠠᠳᠤᠭᠤᠯᠬᠤ ᠦᠭᠡᠢ ᠤᠤ ᠳᠠ
ᠡᠷᠬᠡ ᠦᠭᠡᠢ ᠬᠥᠮᠦᠨ ᠦ᠌ ᠭᠠᠵᠠᠷ ᠲᠤ᠌
ᠵᠠᠶᠠᠭᠠᠴᠢᠬᠠᠭᠰᠠᠨ ᠲᠤᠯᠠᠳᠠ
ᠠ ᠬᠠ ᠬᠦ
ᠡᠷᠭᠦᠵᠦ ᠠᠷᠢᠬᠢ ᠰᠦᠷᠴᠢᠵᠦ
ᠮᠥᠷᠭᠥᠵᠦ ᠪᠠᠢᠨᠠ ᠵᠢᠨᠰᠢᠶᠠᠩ ᠴᠢᠨᠢ ᠠ᠋᠃
ᠵᠢᠨᠰᠢᠶᠠᠩ᠂ ᠬᠠᠮᠤᠭ ᠰᠡᠭᠦᠯ ᠦ᠋ᠨ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠢ᠋ᠶ᠋ᠡᠨ ᠬᠡᠯᠡᠵᠦ ᠪᠠᠢᠬᠤ ᠨᠢ᠄
ᠶᠢᠰᠦᠨ ᠥᠩᠭᠡ ᠶ᠋ᠢᠨ ᠭᠬᠢᠪ ᠬᠠᠳᠠᠭ ᠢ᠋ᠶ᠋ᠠᠷ
ᠰᠤᠮᠤ ᠪᠠᠨ ᠴᠢᠮᠡᠭᠰᠡᠨ ᠦᠭᠡᠢ ᠪᠣᠯᠪᠠᠴᠤ
ᠥᠪᠡᠷ ᠦ᠋ᠨ ᠵᠡᠭᠦᠭᠰᠡᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠰᠦᠨᠡᠰᠦ ᠮᠥᠷ ᠢ᠋ ᠴᠢᠨᠢ ᠳᠠᠯᠠᠯᠵᠤ ᠪᠠᠢᠨᠠ
ᠡᠷᠯᠢᠭ ᠲᠠᠮᠤ ᠶ᠋ᠢᠨ ᠭᠠᠵᠠᠷ ᠲᠠᠭᠠᠨ
ᠬᠦᠷᠦᠭᠰᠡᠨ ᠦ᠌ ᠰᠡᠭᠦᠯᠡᠷ ᠠᠬᠠ ᠮᠢᠨᠢ
ᠠ ᠬᠠ ᠬᠦ
ᠡᠷᠭᠢᠬᠦ ᠲᠥᠷᠥᠯ ᠦ᠋ᠨ ᠬᠤᠪᠢ ᠵᠠᠶᠠᠭᠠᠨ ᠳ᠋ᠠᠭᠠᠨ
ᠡᠷᠡ ᠡᠮᠡ ᠪᠣᠯᠬᠤ ᠶ᠋ᠢ ᠭᠤᠶᠤᠴᠢᠯᠠᠭᠠᠷᠠᠢ ᠳᠠ᠃
ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠭᠬᠢᠪ ᠬᠠᠳᠠᠭ ᠢ᠋ᠶ᠋ᠠᠷ
ᠰᠤᠮᠤ ᠪᠠᠨ ᠴᠢᠮᠡᠭᠰᠡᠨ ᠦᠭᠡᠢ ᠪᠣᠯᠪᠠᠴᠤ
ᠲᠠᠲᠠᠵᠤ ᠪᠣᠭᠣᠭᠰᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠰᠦᠨᠡᠰᠦ ᠮᠥᠷ ᠢ᠋ ᠴᠢᠨᠢ ᠳᠠᠯᠠᠯᠵᠤ ᠪᠠᠢᠨᠠ
ᠲᠠᠮᠤ ᠡᠷᠯᠢᠭ ᠦ᠋ᠨ ᠭᠠᠵᠠᠷ ᠲᠠᠭᠠᠨ
ᠬᠦᠷᠦᠭᠰᠡᠨ ᠦ᠌ ᠰᠡᠭᠦᠯᠡᠷ ᠠᠬᠠ ᠮᠢᠨᠢ ᠠ᠋
ᠠ ᠬᠠ ᠬᠦ
ᠲᠠᠬᠢᠬᠤ ᠲᠥᠷᠥᠯ ᠦ᠋ᠨ ᠬᠤᠪᠢ ᠵᠠᠶᠠᠭᠠᠨ ᠳ᠋ᠠᠭᠠᠨ
ᠡᠷᠡ ᠡᠮᠡ ᠪᠣᠯᠬᠤ ᠶ᠋ᠢ ᠭᠤᠶᠤᠴᠢᠯᠠᠭᠠᠷᠠᠢ ᠳᠠ᠃
ᠵᠡᠭᠦᠯᠲᠡ᠄
* ᠡᠷᠳᠡᠨᠢᠪᠢᠯᠢᠭ —ᠬᠣᠷᠴᠢᠨ ᠵᠡᠭᠦᠨ ᠭᠠᠷ ᠤ᠋ᠨ ᠬᠣᠢᠲᠤ ᠬᠤᠰᠢᠭᠤᠨ ᠤ᠋ ᠲᠡᠷᠰᠯᠡᠭᠦᠦ ᠴᠡᠷᠢᠭ ᠦ᠋ᠨ ᠲᠦᠩᠯᠢᠩ ᠨᠣᠶᠠᠨ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠠ᠊· ᠮᠢᠬᠤᠸᠠᠷ᠂ ᠣᠶᠤᠨᠴᠢᠮᠡᠭ᠂ ᠨᠠᠷᠠᠨᠲᠣᠭᠣᠰ᠂ ᠠ᠊· ᠴᠠᠭᠠᠨ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠰᠣᠠ᠂ ᠲᠣᠳᠣᠭᠡᠷᠡᠯ᠂ ᠣᠳᠬᠠᠨᠴᠡᠴᠡᠭ