ᠳᠦᠯᠡᠢ – ᠱ᠂ ᠭᠦᠷᠦᠪᠠᠽᠠᠷ Дүлий - Ш᠂ Гүрбазар
242 ᠬᠣᠶᠠᠳᠤᠭᠠᠷ ᠪᠠᠭ ᠤ᠋ᠨ ᠳᠦᠯᠡᠢ ᠳ᠋ᠠᠮᠪᠠ
ᠬᠣᠲᠠ ᠠ᠋ᠴᠠ ᠠᠪᠠᠭᠠᠢ ᠠᠪᠴᠠᠢ ᠭᠡᠵᠦ ᠱᠤᠤᠭᠢᠯᠳᠤᠯᠠ
ᠳᠠᠭᠤᠯᠠᠬᠤ ᠨᠢ ᠪᠠᠢᠲᠤᠭᠠᠢ᠂ ᠶᠠᠷᠢᠬᠤ ᠨᠢ ᠳᠤᠯᠳᠤᠷᠢᠭᠠᠳ
ᠳᠤᠷᠠᠯᠠᠳᠠᠭ ᠬᠥᠮᠦᠨ ᠪᠠᠢᠭᠠ ᠳᠠ ᠭᠡᠵᠦ ᠰᠢᠪᠡᠨᠡᠯᠳᠦᠯᠡ
ᠦᠨᠡᠨ ᠯᠡ ᠳᠡ᠂ ᠬᠥᠭᠡᠷᠦᠬᠦᠢ᠂ ᠦᠨᠡᠨ
ᠳᠦᠯᠡᠢ ᠠᠪᠠᠭᠠᠢ ᠲᠠᠢ ᠪᠠᠨ ᠺᠢᠨᠣ᠋ ᠦᠵᠡᠵᠦ ᠶᠠᠪᠤᠨᠠ ᠯᠠ ᠭᠡᠨᠡ
ᠳᠦᠩᠭᠢᠨᠡᠲᠡᠯᠡ ᠬᠥᠭᠡᠷᠦᠯᠳᠦᠭᠡᠳ ᠤᠨᠲᠠᠳᠠᠭ ᠦᠭᠡᠢ ᠭᠡᠨᠡ ᠯᠡ ᠭᠡᠨᠡ
ᠳᠠᠭᠤᠤ ᠬᠦᠷᠲᠡᠯᠡ ᠠᠶᠠᠯᠬᠤ ᠭᠡᠳ ᠮᠣᠷᠢ ᠦᠷᠭᠦᠭᠡᠭᠰᠡᠨ ᠯᠡ ᠭᠡᠨᠡ
ᠳᠠᠭᠤᠰᠤᠭᠠ ᠦᠭᠡᠢ ᠣᠯᠠᠨ ᠬᠣᠴᠢᠯᠠᠯ ᠰᠤᠮᠤ ᠪᠠᠷ ᠨᠢᠭᠡ ᠡᠷᠭᠢᠯᠳᠦᠨᠡ
ᠵᠠᠭᠤᠭᠰᠠᠨ ᠰᠣᠷᠣᠭᠤᠯ ᠢ᠋ ᠨᠢ ᠱᠣᠣᠯᠠᠳᠠᠭ
ᠪᠣᠷᠵᠢᠭᠢᠨ ᠤ᠋ ᠠᠮᠠ ᠲᠠᠢ ᠬᠡᠦᠬᠡᠨ ᠨᠦ᠍ᠭᠦᠳ
ᠵᠤᠨ ᠤ᠋ ᠭᠤᠷᠪᠠᠨ ᠰᠠᠷᠠ
ᠳᠦᠯᠡᠢ ᠶ᠋ᠢ ᠶᠠᠷᠢᠭᠠᠳ ᠵᠤᠭᠠᠲᠠᠢ
ᠬᠣᠪ ᠰᠣᠨᠣᠰᠬᠤ ᠠ᠋ᠴᠠ ᠬᠣᠯᠠᠳᠬᠤ ᠭᠡᠵᠦ
ᠳᠦᠯᠡᠢ ᠲᠥᠷᠥᠭᠰᠡᠨ ᠦ᠌ ᠪᠡᠨ ᠵᠠᠪᠠᠭ ᠢ᠋ᠶ᠋ᠠᠷ
ᠬᠣᠯᠠ ᠣᠢᠷᠠ ᠶ᠋ᠢᠨ ᠭᠣᠣᠴᠢ ᠶ᠋ᠢ
ᠮᠠᠭᠲᠠᠭᠠᠯ ᠳ᠋ᠤ᠌ ᠪᠣᠳᠣᠭᠰᠠᠨ ᠳ᠋ᠠᠮᠪᠠ
ᠬᠣᠲᠠ ᠠ᠋ᠴᠠ ᠳᠠᠭᠠᠭᠤᠯᠤᠭᠰᠠᠨ ᠬᠠᠨᠢ ᠲᠠᠢ ᠪᠠᠨ
ᠺᠯᠦ᠋ᠪ ᠲᠦ᠍ ᠭᠣᠣᠯᠳᠠᠭᠤ ᠣᠷᠣᠢᠲᠠᠵᠤ
ᠬᠣᠷᠰᠢᠶᠠᠨ ᠤ᠋ ᠬᠠᠭᠤᠴᠢᠨ ᠭᠡᠷ ᠢ᠋
ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠰᠤᠷᠠᠭ ᠲᠠᠢ
ᠨᠡᠷᠡᠮᠡᠯ ᠦ᠋ᠨ ᠣᠬᠢ ᠵᠠᠢᠳᠠᠩ ᠪᠣᠯ
ᠣᠭᠣᠴᠢᠯᠠᠭᠠᠳ ᠣᠭᠣᠴᠢᠯᠠᠭᠠᠳ ᠨᠡᠮᠡᠷᠢ ᠦᠭᠡᠢ ᠯᠡ ᠳᠡ
ᠨᠢᠭᠡᠨᠲᠡ ᠳᠠᠰᠤᠭᠰᠠᠨ ᠰᠡᠳᠬᠢᠯ ᠢ᠋
ᠭᠣᠣᠴᠢᠯᠠᠭᠠᠳ ᠭᠣᠣᠴᠢᠯᠠᠭᠠᠳ ᠬᠡᠷᠡᠭ ᠦᠭᠡᠢ ᠯᠡ ᠳᠡ
ᠵᠠᠶᠠᠭᠠᠭᠰᠠᠨ ᠪᠡᠶᠡ ᠶ᠋ᠢᠨ ᠵᠢᠷᠭᠠᠯ ᠢ᠋
ᠵᠠᠢᠴᠢᠯᠠᠭᠠᠳ ᠵᠠᠢᠴᠢᠯᠠᠭᠠᠳ ᠵᠠᠪᠰᠠᠷ ᠦᠭᠡᠢ ᠯᠡ ᠳᠡ
ᠵᠢᠮᠡ ᠲᠡᠢ ᠦᠨᠡᠨ ᠦ᠌ ᠣᠬᠢ ᠶ᠋ᠢ
ᠵᠠᠢᠯᠠᠭᠤᠯᠤᠭᠠᠳ ᠵᠠᠢᠯᠠᠭᠤᠯᠤᠭᠠᠳ ᠨᠡᠮᠡᠷᠢ ᠦᠭᠡᠢ ᠯᠡ ᠳᠡ
ᠴᠢᠬᠢ ᠲᠡᠢ ᠪᠣᠯᠭᠠᠨ ᠢ᠋ ᠰᠢᠪᠡᠨᠡᠯᠳᠦᠭᠦᠯᠦᠭᠰᠡᠨ
ᠳᠦᠯᠡᠢ ᠳᠡᠮᠪᠡᠷᠢᠯ ᠦ᠋ᠨ ᠳᠤᠷᠠᠯᠠᠯ
ᠴᠢᠮᠡᠭᠡᠨ ᠳ᠋ᠦ᠍ ᠬᠥᠭᠡᠷᠴᠦᠭᠯᠡᠳᠡᠭ ᠰᠤᠮᠤ ᠶ᠋ᠢᠨ ᠬᠢᠨ ᠦ᠌
ᠬᠡᠯᠡ ᠦᠭᠡᠢ ᠪᠣᠯᠲᠠᠯᠠ ᠨᠢ ᠨᠠᠮᠵᠢᠭᠠᠯᠠ
ᠴᠢᠭᠢᠭ ᠬᠥᠯᠥᠷᠡᠭᠰᠡᠨ ᠲᠠᠯᠠ ᠳ᠋ᠠᠭᠠᠨ
ᠠᠢᠯ ᠤ᠋ᠨ ᠭᠣᠯᠣᠮᠲᠠ ᠪᠠᠨ ᠠᠰᠠᠭᠠᠵᠤ
ᠰᠢᠪᠡᠭᠡᠨᠡᠭᠰᠡᠨ ᠪᠣᠯᠭᠠᠨ ᠤ᠋ ᠠᠮᠠ ᠶ᠋ᠢ
ᠠᠷᠠᠳ ᠤ᠋ᠨ ᠳᠠᠭᠤᠤ ᠪᠠᠷ ᠵᠠᠢᠯᠤᠯᠠ
ᠡᠪᠦᠭᠡᠨ ᠴᠢᠨᠢ ᠴᠢᠮᠠ ᠳ᠋ᠠᠭᠠᠨ
ᠰᠡᠳᠬᠢᠯ ᠦ᠋ᠨ ᠵᠢᠮᠡ ᠲᠡᠢ ᠶᠠᠪᠤᠭᠰᠠᠨ ᠴᠦ᠍
ᠬᠠᠢᠷᠠ᠂ ᠦᠨᠡᠨ ᠬᠣᠶᠠᠷ ᠢ᠋ ᠴᠢᠨᠢ ᠴᠢᠮᠠ ᠠ᠋ᠴᠠ ᠪᠢᠰᠢ
ᠪᠤᠰᠤᠳ ᠠ᠋ᠴᠠ ᠯᠠ ᠤᠬᠠᠭᠠᠷᠠᠭᠰᠠᠨ ᠳᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ