ᠨᠠᠪᠴᠢ ᠴᠡᠴᠡᠭ ᠡᠪᠡᠰᠦ ᠵᠠᠩᠭᠤᠤ – ᠳᠣᠷᠵᠢᠰᠡᠷᠡᠩ Navch tsetseg övs zanguu – Dorjseren Навч цэцэг өвс зангуу – Доржсэрэн
419ᠨᠠᠪᠴᠢ ᠴᠡᠴᠡᠭ ᠡᠪᠡᠰᠦ ᠵᠠᠩᠭᠤᠤ
ᠲᠤᠷᠵᠢᠰᠠᠷᠠᠩ
ᠨᠣᠭᠣᠭᠠᠨ ᠨᠠᠪᠴᠢ ᠪᠡᠶᠡ ᠪᠡᠶᠡ ᠲᠡᠢ ᠪᠡᠨ ᠥᠷᠢᠰᠦᠯᠳᠦᠨ ᠭᠠᠳᠠᠭᠰᠢ ᠲᠡᠯᠡᠵᠦ᠂ ᠬᠤᠪᠠᠬᠠᠢ ᠰᠠᠯᠠᠭᠠᠨ ᠳ᠋ᠤ᠌ ᠨᠣᠭᠣᠭᠠᠨ ᠬᠦᠷᠮᠡ ᠡᠮᠦᠰᠦᠭᠦᠯᠦᠭᠡᠳ᠂ ᠬᠣᠷᠭᠣᠢ ᠰᠢᠭ᠋ ᠨᠠᠮᠢᠯᠵᠠᠬᠤ ᠨᠣᠭᠣᠭᠠᠨ ᠲᠤᠭ ᠨᠠᠮᠢᠷᠠᠭᠤᠯᠵᠤ᠂ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠠᠮᠢᠰᠬᠤᠯᠯᠠᠨ᠂ ᠨᠣᠮᠢᠨ ᠲᠠᠯᠠ ᠳ᠋ᠤ᠌ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠪᠥᠵᠢᠭᠯᠡᠨᠡ᠃ ᠵᠢᠷ ᠵᠢᠷ ᠵᠢᠷᠭᠢᠬᠦ ᠪᠣᠯᠵᠣᠮᠣᠷ ᠫᠣᠷ ᠫᠣᠷ ᠨᠢᠰᠦᠨ ᠨᠠᠪᠴᠢᠨ ᠠ᠋ᠴᠠ ᠨᠠᠪᠴᠢᠨ ᠳ᠋ᠤ᠌ ᠰᠢᠯᠵᠢᠨ ᠬᠥᠭᠡᠭᠡᠴᠡᠯᠳᠦᠵᠦ᠂ ᠱᠠᠭ ᠱᠠᠭ ᠱᠠᠭᠰᠢᠬᠤ ᠱᠠᠭᠠᠵᠠᠭᠠᠢ ᠰᠠᠯᠠᠭᠠᠨ ᠠ᠋ᠴᠠ ᠰᠠᠯᠠᠭᠠᠨ ᠳ᠋ᠤ᠌ ᠨᠡᠭᠦᠨ ᠢᠨᠠᠭᠰᠢᠨᠠ᠃ ᠤᠷᠢᠨ ᠰᠠᠯᠬᠢᠨ ᠳ᠋ᠤ᠌ ᠤᠶᠠᠨ ᠵᠥᠭᠡᠯᠡᠨ ᠨᠠᠢᠭᠤᠯᠵᠠᠬᠤ ᠮᠣᠳᠣᠨ ᠤ᠋ ᠨᠠᠪᠴᠢ᠂ ᠴᠡᠴᠡᠭ ᠦ᠋ᠨ ᠨᠠᠪᠴᠢ᠂ ᠴᠡᠴᠡᠭ ᠡᠴᠡ ᠨᠢ ᠤᠷᠢᠳᠴᠢᠯᠠᠵᠤ ᠤᠷᠭᠤᠭᠰᠠᠨ ᠴᠤ᠌ ᠳᠤᠷᠠᠲᠠᠶᠠ ᠴᠡᠴᠡᠭ ᠦ᠋ᠨ ᠳᠡᠪᠢᠰᠬᠡᠷ ᠪᠣᠯᠵᠤ᠂ ᠨᠡᠷᠡ ᠭᠡᠵᠦ ᠬᠥᠭᠡᠭᠡᠴᠡᠯᠳᠦᠬᠦ ᠦᠭᠡᠢ᠂ ᠪᠠᠢᠷᠢ ᠭᠡᠵᠦ ᠪᠤᠯᠢᠶᠠᠯᠳᠤᠬᠤ ᠦᠭᠡᠢ᠂ ᠠᠰᠢᠭ ᠭᠡᠵᠦ ᠰᠣᠬᠤᠭᠤᠷᠬᠠᠬᠤ ᠦᠭᠡᠢ ᠳᠠᠷᠤᠤ ᠨᠣᠮᠣᠬᠠᠨ ᠢ᠋ᠶ᠋ᠠᠷ ᠣᠷᠣ ᠪᠠᠨ ᠡᠵᠡᠯᠡᠵᠦ᠂ ᠬᠡᠷᠰᠡᠦ ᠪᠣᠯᠭᠣᠮᠵᠢᠲᠠᠢ ᠪᠠᠷ ᠬᠠᠷᠢᠭᠤᠴᠠᠯᠭᠠ ᠪᠠᠨ ᠪᠡᠶᠡᠯᠡᠭᠦᠯᠦᠨ᠂ ᠴᠡᠴᠡᠭ ᠢ᠋ ᠨᠡᠩ ᠭᠣᠶᠣ᠂ ᠨᠡᠩ ᠰᠠᠢᠬᠠᠨ ᠪᠣᠯᠭᠠᠨ ᠳᠤᠷᠠᠢᠯᠭᠠᠵᠤ᠂ ᠨᠡᠩ ᠬᠤᠷᠴᠠ᠂ ᠨᠡᠩ ᠰᠣᠷᠭᠣᠭ ᠪᠣᠯᠭᠠᠨ ᠪᠣᠳᠣᠭᠰᠢᠭᠤᠯᠤᠨᠠ᠃
ᠥᠩᠭᠡᠲᠦ ᠴᠡᠴᠡᠭ ᠵᠢᠰᠦ ᠵᠢᠰᠦ ᠲᠡᠢ ᠪᠡᠨ ᠵᠢᠲᠥᠭᠡᠷᠬᠡᠨ ᠤᠯᠠᠭᠠᠨ᠂ ᠶᠠᠭᠠᠨ᠂ ᠬᠣᠨᠳᠣᠨ᠂ ᠬᠥᠬᠡ ᠁ ᠳᠡᠯᠪᠢ ᠪᠡᠨ ᠰᠡᠬᠦᠵᠦ᠂ ᠤᠷᠲᠤ᠂ ᠣᠬᠣᠷ᠂ ᠭᠤᠷᠪᠠᠯᠵᠢᠨ᠂ ᠵᠢᠰᠢᠭᠦᠯᠵᠢᠨ ᠁ ᠬᠡᠯᠪᠡᠷᠢ ᠪᠡᠨ ᠭᠠᠢᠬᠠᠭᠤᠯᠤᠨ᠂ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠨᠠᠮᠪᠠᠲᠠᠢᠬᠠᠨ ᠳᠡᠯᠭᠡᠷᠡᠵᠦ᠂ ᠨᠠᠢ᠍ᠮᠠᠨ ᠵᠦᠭ ᠦ᠋ᠨ ᠭᠡᠢᠴᠢᠳ ᠢ᠋ ᠣᠮᠣᠭᠲᠠᠢᠬᠠᠨ ᠤᠭᠲᠤᠨ᠂ ᠰᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠰᠠᠴᠤᠷᠠᠩᠬᠠᠨ ᠮᠦᠰᠢᠶᠡᠵᠦ᠂ ᠶᠢᠰᠦᠨ ᠵᠣᠪᠬᠢᠰ ᠲᠤ᠌ ᠠᠩᠬᠢᠯᠤᠮᠠ ᠦᠨᠦᠷ ᠢ᠋ᠶ᠋ᠡᠨ ᠬᠠᠩᠬᠤᠯᠤᠭᠤᠯᠤᠨ᠂ ᠰᠣᠯᠣᠩᠭᠠ ᠶ᠋ᠢ ᠭᠠᠵᠠᠷ ᠳᠡᠪᠢᠰᠦᠭᠰᠡᠨ ᠰᠢᠭ ᠰᠣᠳᠣᠨ ᠥᠩᠭᠡ ᠪᠡᠷ ᠢ᠋ᠶ᠋ᠡᠨ᠂ ᠬᠡᠪᠢᠰ ᠢ᠋ ᠠᠭᠠᠷ ᠲᠤ᠌ ᠡᠯᠭᠦᠭᠰᠡᠨ ᠰᠢᠭ ᠰᠣᠨᠢᠨ ᠦᠵᠡᠮᠵᠢ ᠪᠡᠷ ᠢ᠋ᠶ᠋ᠡᠨ ᠡᠷᠢᠶᠡᠨ ᠪᠠᠩᠵᠡᠯᠲᠦ ᠡᠷᠪᠡᠭᠬᠡᠢ ᠶ᠋ᠢ ᠰᠣᠷᠢᠨᠵᠢᠨ ᠰᠢᠭ᠋ ᠲᠡᠳᠡᠨ᠂ ᠦᠩᠭᠢᠨᠡᠨ ᠨᠢᠰᠬᠦ ᠵᠥᠭᠡᠢ ᠶ᠋ᠢ ᠪᠠᠯ ᠰᠢᠭ ᠰᠤᠷᠤᠨᠠ᠃ 《ᠨᠣᠭᠣᠭᠠᠨ ᠨᠠᠪᠴᠢ ᠳᠤᠷᠠᠯᠠᠯ ᠲᠠᠢ ᠪᠣᠯᠬᠤ ᠳ᠋ᠤ᠌ ᠪᠠᠨ ᠴᠡᠴᠡᠭ ᠪᠣᠯᠤᠨᠠ᠂ ᠰᠠᠢᠬᠠᠨ ᠴᠡᠴᠡᠭ ᠰᠦᠰᠦᠭ ᠲᠡᠢ ᠪᠣᠯᠬᠤ ᠪᠠᠷ ᠵᠢᠮᠢᠰ ᠬᠤᠪᠢᠯᠤᠨᠠ》 (ᠳᠠᠭᠤᠷ ᠤ᠋ᠨ ᠦᠭᠡ》 ᠭᠡᠳᠡᠭ᠃ ᠲᠡᠢᠮᠦ ᠪᠣᠯᠬᠣᠷ ᠴᠡᠴᠡᠭ ᠰᠠᠢᠬᠠᠨ᠂ ᠴᠡᠴᠡᠭ ᠴᠡᠪᠡᠷᠬᠡᠨ ᠭᠡᠳ ᠴᠢᠮᠬᠢᠵᠦ ᠲᠠᠰᠤᠳᠠᠭᠠᠳ ᠪᠡᠯᠡᠭ ᠭᠡᠵᠦ ᠨᠠᠳᠠ ᠭᠠᠷᠳᠠᠭᠤᠯᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ᠂ ᠬᠠᠢᠷᠠ ᠭᠡᠵᠦ ᠨᠠᠳᠠ ᠵᠡᠭᠦᠯᠭᠡᠬᠦ ᠶ᠋ᠢ ᠪᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ !
ᠨᠢᠯᠬᠠ ᠡᠪᠡᠰᠦ ᠨᠢᠭᠡ ᠨᠢᠭᠡ ᠲᠡᠢ ᠪᠡᠨ ᠠᠲᠠᠭᠠᠷᠬᠠᠨ᠂ ᠬᠥᠷᠥᠰᠥᠨ ᠡᠴᠡ ᠪᠡᠨ ᠰᠠᠯᠤᠶᠠ ᠭᠡᠬᠦ ᠰᠢᠭ᠂ ᠬᠥᠯᠵᠢᠵᠦ ᠳᠡᠭᠡᠭᠰᠢ ᠪᠡᠨ ᠰᠤᠭᠤᠷᠠᠨ᠂ ᠬᠥᠳᠡᠭᠡ ᠲᠠᠯᠠ ᠶ᠋ᠢ ᠴᠢᠮᠡᠶᠡ ᠭᠡᠬᠦ ᠰᠢᠭ ᠬᠥᠬᠡ ᠲᠡᠭᠷᠢ ᠶ᠋ᠢ ᠴᠢᠭᠯᠡᠵᠦ᠂ ᠬᠦᠰᠡᠯ ᠦ᠋ᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ᠂ ᠬᠥᠭᠵᠢᠯ ᠦ᠋ᠨ ᠠᠶᠠ ᠪᠠᠨ ᠴᠢᠪᠠᠭᠳᠠᠵᠤ᠂ ᠵᠢᠵᠢᠭ ᠪᠣᠯᠪᠠᠴᠤ ᠶᠡᠷᠦᠮᠳᠡᠭ ᠪᠣᠯᠬᠤ ᠦᠭᠡᠢ ᠶ᠋ᠢᠨ ᠲᠥᠯᠥᠭᠡ᠂ ᠪᠢᠴᠢᠬᠠᠨ ᠪᠣᠯᠪᠠᠴᠤ ᠪᠢᠴᠠᠷᠠᠲᠠᠯᠠ ᠭᠢᠰᠬᠢᠭᠦᠯᠬᠦ ᠦᠭᠡᠢ ᠶ᠋ᠢᠨ ᠲᠥᠯᠥᠭᠡ ᠰᠢᠭᠵᠢᠷᠡᠨ ᠤᠷᠭᠤᠵᠤ ᠰᠢᠭᠯᠡᠷᠡᠨ ᠬᠥᠭᠯᠡᠭᠡᠳ᠂ ᠲᠠᠯᠠ ᠴᠠᠢᠳᠠᠮ ᠤ᠋ᠨ ᠵᠢᠩᠬᠢᠨᠢ ᠡᠵᠡᠨ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠥᠩᠰᠢᠭ ᠪᠡᠯᠴᠢᠭᠡᠷ᠂ ᠲᠠᠪᠤᠨ ᠲᠠᠷᠢᠶᠠᠨ ᠢᠳᠡᠰᠢᠲᠡᠨ ᠦ᠌ ᠲᠠᠩᠰᠤᠭ ᠠᠬᠤᠢ ᠪᠣᠯᠤᠭᠠᠳ᠂ ᠠᠮᠢ ᠨᠠᠰᠤᠨ ᠤ᠋ ᠬᠤᠪᠢ ᠨᠡᠮᠡᠷᠢ ᠪᠡᠨ ᠠᠭᠠᠷ᠂ ᠭᠡᠷᠡᠯ᠂ ᠬᠦᠴᠢᠯᠲᠦ᠋ᠷᠦᠭᠴᠢ ᠲᠡᠢ ᠬᠠᠮᠲᠤ ᠠᠮᠢᠲᠠᠨ ᠪᠦᠬᠦᠨ ᠳ᠋ᠦ᠍ ᠠᠯᠠᠭ ᠦᠭᠡᠢ ᠬᠦᠷᠲᠡᠭᠡᠨᠡ᠃
ᠥᠷᠭᠡᠰᠦᠲᠦ ᠵᠠᠩᠭᠤᠤ ᠵᠡᠯᠡ ᠵᠡᠯᠡ ᠪᠡᠨ ᠬᠣᠯᠪᠣᠨ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠵᠡᠯᠡᠯᠡᠵᠦ᠂ ᠵᠥᠭᠡᠯᠡᠨ ᠨᠠᠪᠴᠢ ᠪᠢᠰᠢ ᠬᠠᠲᠠᠭᠤ ᠥᠷᠭᠡᠰᠦ ᠪᠡᠷ ᠢ᠋ᠶ᠋ᠡᠨ ᠬᠡᠢᠰᠬᠦ ᠰᠢᠷᠣᠢ ᠶ᠋ᠢ ᠬᠥᠯ ᠳᠣᠣᠷᠠ ᠪᠠᠨ ᠳᠠᠷᠤᠵᠤ᠂ ᠬᠡᠪᠡᠷᠡᠭᠬᠡᠨ ᠬᠥᠷᠥᠰᠥ ᠶ᠋ᠢ ᠪᠡᠶᠡ ᠴᠣᠭᠴᠠ ᠪᠠᠷ ᠢ᠋ᠶ᠋ᠠᠨ ᠬᠠᠯᠬᠠᠯᠠᠨ᠂ ᠬᠥᠨᠳᠡᠬᠦ ᠪᠡᠷ ᠢᠷᠡᠭᠰᠡᠨ ᠮᠠᠯ ᠢ᠋ ᠬᠠᠢᠷᠠ ᠭᠠᠮ ᠦᠭᠡᠢ ᠬᠠᠳᠬᠤᠵᠤ᠂ ᠬᠥᠨᠥᠭᠡᠬᠦ ᠪᠡᠷ ᠢᠷᠡᠭᠰᠡᠨ ᠬᠥᠮᠦᠨ ᠢ᠋ ᠨᠠᠢᠷ ᠲᠠᠯᠠ ᠦᠭᠡᠢ ᠰᠢᠪᠠᠨ᠂ ᠠᠷᠤ ᠲᠦᠰᠢᠭ ᠪᠣᠯᠤᠭᠰᠠᠨ ᠬᠥᠷᠥᠰᠥ ᠰᠢᠷᠣᠢ ᠪᠠᠨ ᠠᠶᠤᠯ ᠲᠦᠭᠰᠢᠭᠦᠷᠢ ᠡᠴᠡ ᠵᠠᠢᠯᠠᠭᠤᠯᠵᠤ᠂ ᠭᠠᠢ ᠪᠠᠷᠴᠢᠳ ᠠ᠋ᠴᠠ ᠵᠠᠢᠳᠠᠭᠤᠯᠤᠨ᠂ ᠠᠮᠢ ᠠᠬᠤᠢ ᠶ᠋ᠢᠨ ᠬᠠᠮᠠᠭᠠᠯᠠᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ 《ᠴᠠᠭᠳᠠᠭᠠ》 ᠪᠣᠯᠵᠤ ᠂ 《ᠬᠠᠷᠠᠭᠤᠯ》 ᠵᠣᠭᠰᠣᠨᠠ᠃ ᠲᠡᠭᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠬᠣᠨᠢᠨ ᠵᠠᠩᠭᠤᠤ ᠪᠠᠷ (ᠣᠯᠠᠨ ᠥᠷᠭᠡᠰᠦ ᠲᠡᠢ ᠂ ᠪᠥᠨᠲᠥᠭᠡᠷ ᠬᠡᠯᠪᠡᠷᠢ ᠲᠡᠢ) ᠰᠢᠭᠡᠰᠦ ᠬᠠᠭᠠᠭᠳᠠᠭᠰᠠᠨ ᠡᠪᠡᠳᠴᠢᠨ ᠢ᠋ ᠡᠮᠨᠡᠳᠡᠭ ᠭᠡᠨᠡ᠃ ᠡᠨᠡ ᠲᠤᠬᠠᠢ ᠮᠠᠨᠳᠤᠬᠤ ᠪᠠᠭᠰᠢ ᠮᠢᠨᠢ᠄《ᠳᠣᠯᠣᠭᠠᠨ ᠬᠣᠨᠢᠨ ᠵᠠᠩᠭᠤᠤ ᠣᠯᠤᠭᠠᠳ ᠰᠢᠷᠡᠮᠦᠨ ᠲᠣᠭᠣᠭᠠᠨ ᠳ᠋ᠤ᠌ ᠳᠣᠯᠣᠭᠠᠨ ᠬᠤᠪᠢ ᠪᠣᠯᠲᠠᠯᠠ ᠬᠠᠭᠤᠷᠤᠭᠠᠳ ᠠᠮᠠᠨ ᠳ᠋ᠤ᠌ ᠪᠠᠨ ᠬᠢᠵᠦ ᠵᠠᠵᠢᠯᠤᠭᠠᠳ ᠢᠳᠡᠴᠢᠬᠡᠪᠡᠯ ᠳᠣᠣᠷᠠ ᠪᠠᠨ ᠰᠢᠭᠡᠴᠢᠬᠡᠳᠡᠭ》 ᠭᠡᠯᠡ᠃ ᠡᠭᠦᠨ ᠡᠴᠡ ᠠᠰᠲᠠᠭᠠᠨ ᠪᠠᠰᠠ ᠦᠬᠡᠷ ᠵᠠᠩᠭᠤᠤ(ᠦᠬᠡᠷ ᠦ᠋ᠨ ᠡᠪᠡᠷ ᠰᠢᠭ ᠬᠣᠶᠠᠷ ᠥᠷᠭᠡᠰᠦ ᠲᠡᠢ)᠂ ᠢᠮᠠᠭᠠᠨ ᠵᠠᠩᠭᠤᠤ(ᠬᠣᠨᠢᠨ ᠵᠠᠩᠭᠤᠤ ᠲᠠᠢ ᠬᠠᠷᠢᠴᠠᠭᠤᠯᠪᠠᠯ ᠪᠥᠨᠲᠥᠭᠡᠷ ᠪᠢᠰᠢ᠂ ᠤᠷᠲᠤᠯᠢᠭ᠂ ᠡᠰᠡᠬᠦᠯᠡ ᠵᠤᠤᠪᠠᠩ ᠬᠡᠯᠪᠡᠷᠢ ᠲᠡᠢ) ᠭᠡᠵᠦ ᠪᠠᠢᠳᠠᠭ ᠭᠡᠨᠡ᠃ ᠡᠳᠡᠭᠡᠷ ᠨᠢ ᠶᠠᠮᠠᠷ ᠡᠪᠡᠳᠴᠢᠨ ᠵᠠᠰᠠᠳᠠᠭ ᠢ᠋ ᠪᠠᠭᠰᠢ ᠮᠢᠨᠢ ᠨᠠᠳᠠ ᠬᠡᠯᠡᠭᠡ ᠦᠭᠡᠢ᠂ ᠠᠷᠠᠢ ᠨᠢᠭᠤᠴᠠ ᠵᠣᠷ ᠭᠡᠳ ᠨᠢᠭᠤᠵᠤ ᠪᠠᠢᠭᠠ ᠪᠢᠰᠢ ᠪᠠᠢᠬᠠ ᠠ᠋!