ᠪᠣᠳᠢᠰᠠᠳ᠋ᠸ᠎ᠠ ᠶ᠋ᠢᠨ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠬᠤᠢБодьсадвын явдалд орохуй ᠱᠠᠰᠢᠨ ᠰᠢᠲᠦᠯᠭᠡ

Монголчуудын дунд зургаан ерөөл гэж хэлэгддэг ерөөлүүдийн нэг, Шантидева гэгээний туурвисан Бодьсадвын явдалд орохуй номын сүүлийн бүлэг “Явдалд орохуйн ерөөл” оршвой.
Бодийн явдалд би бээр
Орохуйг тийн турвисан учир
Алин буянаар амьтан бүхэн
Бодийн явдалд орох болтугай.
Зүг бүхэнд бие, сэтгэлийн
Зовлонт өвчтөн хэдий буй
Миний буянаар тэд баясан
Амгалангийн далайг олох болтугай.
Орчлонд тэд хэдий хүртэл
Амгалангаас хэзээ ч үл доройтон
Яван явсаар үргэлж мөнхийн
Ханьцашгүй амгаланг олох болтугай.
Ертөнцийн оронд олон тамууд
Хэдий чинээ алин буй
Тэд бүхэнд амьтан нугууд
Энхжингийн амгалангаар баясах болтугай.
Хүйтнээр зовогч нь дулааныг олтугай.
Бодьсадвын их үүлнээс
Үүссэн хязгааргүй их мөрнөөр
Халуунаар энэлэгч нь сэрүүнийг олтугай.
Илдэн навчит ой шугуй нь ч
Цэнгэлдэх үзэсгэлэнт цэцэрлэг болтугай.
Шалмалигийн гол мод нь ч
Галбирваас модонд мэндлэх болтугай.
Нугас хийгээд олон галуу, ангирууд болон
Хун тэргүүтэн яруу дуугаар чимэх болтугай.
Ихэд анхилам төгөлдөр лянхуат нуур цөөрмөөр
Тамын газрууд баясал тааламжит болох болтугай.
Халуун нурмын цогц нь ч эрдэнийн цогц болтугай.
Улаасан шатах газар нь болорын суурь болтугай.
Хураан дарагч тамын аюулт их уулс нь ч
Тахилын харшид хувиран бурхадаар дүүрэх болтугай.
Шатмал галт чулуу, мэсэн бороо мөндөр нь
Өнөө цагаас эхлэн цэцгэн хурд хувирч
Харилцан нэгнээ мэсээр дүрэгч тэд нь мөн
Өнөөгөөс эхлэн энэрэлийн цэцэгсийг шидлэх болтугай.
Гал адил, гатлах аргагүй нурман мөрөнд мах бүгд нь
Гуужрин унаж, гүнда цэцгийн өнгөт ястай живигч амьтад
Миний үйлдсэн буяны хүчээр үзэсгэлэнт тэнгэрийн биеийг олоод
Тэнгэрийн охидтой хамт цуг амгалан тайван орших болтугай.
Баршгүй их эрлэгийн элч хүн, хэрээ, тас шувууд юуны учир айн үйлднэм?
Түнэр харанхуй бүхнээс арилан жаргалан төрөх сайн хүч нь хэнийх? хэмээн
Дээш харваас огторгуйн төвд жавхаа бадарсан Очирваань оршихыг үзэн хараад
Машид баяссан баяслын хүчээр хилэнцээс хагацан түүнтэй хамт нөхөрлөх болтугай.
Цэцгийн хур нь хүжийн устай холилдон бууснаар
Дүрэлзэн асах тамын гал унтрахыг хараад
Гэнэт амгалангаар ханасан нь юуных хэмээн санахтай
Тамын амьтад Манибадмаг харах болтугай.
Нөхөд минь! айдсаа орхиод түргэн цуглацгаа! Бидний зүгт
Алины хүчээр зовлон бүхнээс хагацсан баясал туйлдаа хүрлээ
Амьтан бүхнийг огоот аврагч энэрэлийг төрүүлсэн бодь сэтгэлтэн
Идэр залуу цог нь бадарсан, аюулгүй болгогч Манзуширт очмуй.
Зуун тэнгэрс оройн титмээрээ өлмийн лянхуаг нь тахин үйлдэж
Нигүүлслээр чийгтсэн мэлмийтийн оройд цэцэгсийн хурыг машид буулгах
Үзэмжит харшын охин тэнгэрүүд аялгуулан магтахыг хараач хэмээхэд
Тийм гайхамшигт Манзуширыг харан тамын амьтад шагших болтугай.
Тэр мэт миний буянаар Самандабадра тэргүүтэй
Түйтгэр үгүй бодьсадвын үүлнээс амгалан бөгөөд
Сэрүүн, анхлим үнэрт хур буухыг хараад
Тамын амьтан тэдгээр илхэн баясах болтугай.
Адгуус амьтад нэгнээ идэх
Аюул зовлонгоос хагацах болтугай
Муу дуутын хүмүүн мэт
Бирд бүхэн амгалан болж
Хутагт итгэл Логэшурагийн
Мутраас урсах сүүн урсгалаар
Бирдийн амьтад ханаж цадан
Угаагдан мөнхөд жаргах болтугай.
Нүдгүй сохоруудын нүд нь харж
Дүлий нь үргэлж сонсох болтугай
Махамаяа хатан эх мэт
Жиримсэн нь өвчингүй төрөх болтугай.
Нүцгэн нугууд хиргүй хувцас
Өлссөн нугууд идээ болон
Цангасан нугууд цэвэр ус
Амтат унд олох болтугай.
Ядуус эдтэй золгох болтугай
Энэлэн гаслагч нь баясах болтугай.
Сэтгэл гансрагчидын сэтгэл нь ч эдгэж
Хотол төгс хувиршгүй болтугай.
Хэдий буй өвдсөн амьтад
Өвчнөөс түргэн хагацах болтугай.
Амьтны өвчин нэг нь ч үлдэлгүй
Мөнхөд үл дэгдэх болтугай.
Айсан нугууд нь аюулгүй болтугай
Хүлэгдсэн нугуудын хүлээс тайларч
Хүчгүй нугууд нь хүчтэй болж
Сэтгэл нь харилцан садансах болтугай.
Аянчин зочидын явдал бүгдэд
Зүг бүхнээ амгалан болтугай.
Алины тусд явж буй
Хэрэг нь шамдалгүй бүтэх болтугай.
Завь болон онгоцонд зорчигчийн
Сэтгэлд санасан нь биелэн бүтээд
Усны гарамд амгалан хүрээд
Садантай хамт баясах болтугай.
Замаа андуурч гаслан тэнэгчид
Аянчин зочидтой учран золгоод
Хулгай, дээрэм, араатны аюулгүй
Алжаалгүй амар зорчих болтугай.
Замгүй түгшүүртэй аглаг тэргүүтэнд
Итгэл авралгүй нялхс, хөгшид
Унтсан, зөнөсөн, дэмийрч галзуурсанг
Тэнгэрүүд сахин хамгаалах болтугай.