ᠡᠪᠦᠭᠡᠳ ᠦ᠋ᠨ ᠠᠭᠤᠯᠵᠠᠷ -ᠨᠠᠮᠵᠢᠯ ᠦᠨ ᠮᠥᠩᠬᠡᠪᠠᠶᠠᠷӨвгөдийн уулзар-Намжлын Мөнхбаяр
673ᠡᠪᠦᠭᠡᠳ ᠦ᠋ᠨ ᠠᠭᠤᠯᠵᠠᠷ
ᠵᠣᠬᠢᠶᠠᠭᠴᠢ᠄ ᠨᠠᠮᠵᠢᠯ ᠤ᠋ᠨ ᠮᠥᠩᠬᠡᠪᠠᠶᠠᠷ
ᠰᠠᠴᠤᠷᠠᠯᠲᠤ ᠤᠩᠰᠢᠪᠠ
ᠮᠢᠨᠦ ᠪᠠᠭᠠ ᠨᠠᠰᠤ ᠬᠠᠬᠢᠷ ᠤ᠋ᠨ ᠬᠥᠪᠡᠭᠦᠨ ᠡᠴᠡ ᠡᠬᠢᠯᠡᠳᠡᠭ᠂ ᠬᠠᠬᠢᠷ ᠤ᠋ᠨ ᠭᠣᠣᠯ ᠬᠠᠮᠢᠭᠠ ᠬᠦᠷᠲᠡᠯᠡ ᠬᠠᠷᠭᠢᠯᠠᠨ ᠪᠤᠷᠭᠢᠯᠤᠨ ᠤᠷᠤᠰᠳᠠᠭ ᠢ᠋ ᠪᠢ ᠲᠥᠰᠦᠭᠡᠯᠡᠭᠡ ᠦᠭᠡᠢ᠂ ᠲᠥᠰᠦᠭᠡᠯᠡᠬᠦ ᠶ᠋ᠢ ᠴᠦ᠍ ᠶᠡᠷᠦ ᠡᠴᠡ ᠪᠡᠨ ᠰᠠᠨᠠᠭᠠ ᠦᠭᠡᠢ ᠯᠡ ᠶᠠᠪᠤᠭᠰᠠᠨ ᠳᠠ! ᠬᠣᠯᠠ ᠶᠠᠪᠤᠳᠠᠭ ᠭᠡᠵᠦ ᠠᠪᠤ ᠮᠢᠨᠢ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠂ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠬᠥᠪᠡᠭᠡ ᠲᠣᠬᠣᠢ ᠪᠠᠷ ᠨᠢ ᠨᠡᠭᠦᠵᠦ ᠰᠠᠭᠤᠵᠤ ᠠᠮᠢᠳᠤᠷᠠᠭᠰᠠᠨ ᠪᠣᠯᠬᠣᠷ ᠬᠠᠬᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠪᠠᠨ ᠪᠢ ᠡᠯᠢᠭᠡ ᠵᠢᠷᠦᠬᠡᠨ ᠡᠴᠡ ᠪᠡᠨ ᠬᠠᠢᠷᠠᠲᠠᠢ᠃ ᠬᠠᠬᠢᠷ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠬᠣᠯᠬᠣᠴᠢᠨ ᠬᠡᠮᠡᠬᠦ ᠨᠠᠮᠬᠠᠨ ᠣᠷᠣᠢ ᠶ᠋ᠢᠨ ᠡᠩᠭᠡᠷ ᠲᠦ᠍ ᠪᠠᠢᠷᠢᠯᠠᠳᠠᠭ ᠡᠪᠦᠭᠡᠳ ᠦ᠋ᠨ ᠠᠭᠤᠯᠵᠠᠷ ᠭᠡᠳᠡᠭ ᠥᠨᠳᠥᠷ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠨ ᠪᠤᠩᠬᠤᠨ ᠳ᠋ᠤ᠌ ᠠᠪᠤ ᠶ᠋ᠢ ᠪᠡᠨ ᠨᠤᠲᠤᠭᠯᠠᠭᠤᠯᠤᠭᠰᠠᠨ ᠲᠡᠷᠡ ᠡᠳᠦᠷ᠂ ᠬᠠᠬᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠬᠠᠷᠭᠢᠶᠠ ᠶᠠᠭ ᠯᠠ ᠮᠢᠨᠦ ᠥᠨᠥᠴᠢᠷᠡᠭᠰᠡᠨ ᠰᠡᠳᠬᠢᠯ ᠦ᠋ᠨ ᠭᠠᠰᠠᠯᠤᠯ ᠤ᠋ᠨ ᠳᠠᠭᠤᠨ ᠰᠢᠭ᠋ ᠳᠤᠭᠤᠯᠳᠠᠵᠤ ᠪᠠᠢᠭᠰᠠᠨ ᠢ᠋ ᠬᠡᠯᠡᠭᠡᠳ ᠶᠠᠭᠠᠬᠢᠬᠤᠪ!
ᠬᠠᠬᠢᠷ ᠮᠢᠨᠢ ᠴᠦ᠍ ᠦᠷᠡ ᠪᠡᠨ ᠠᠯᠳᠠᠬᠤ ᠶ᠋ᠢ ᠬᠦᠰᠡᠳᠡᠭ ᠦᠭᠡᠢ ᠪᠠᠢᠬᠠ᠂ ᠬᠠᠬᠢᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠲᠠ ᠨᠠᠮᠠ ᠶ᠋ᠢ ᠠᠪᠴᠢᠷᠠᠭᠰᠠᠨ ᠬᠠᠬᠢᠷ ᠤ᠋ᠨ ᠢ᠋ᠶ᠋ᠠᠨ ᠬᠥᠪᠡᠭᠡᠨ ᠳ᠋ᠦ᠍ ᠲᠠᠨ ᠢ᠋ ᠪᠡᠨ ᠪᠢ ᠪᠤᠩᠬᠤᠯᠠᠭᠰᠠᠨ ᠭᠡᠮᠡᠨ ᠭᠤᠨᠢᠭᠲᠤ ᠰᠡᠳᠬᠢᠯ ᠳ᠋ᠦ᠍ ᠠᠪᠲᠠᠨ᠂ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠩᠬᠤᠨ ᠤ᠋ ᠡᠩᠭᠡᠷ ᠲᠦ᠍ ᠡᠬᠡᠷ ᠲᠡᠳᠡᠨ ᠣᠬᠢᠯᠠᠴᠤ ᠤᠬᠢᠯᠠᠭᠠᠳ ᠪᠤᠴᠠᠭᠰᠠᠨ ᠢ᠋ ᠬᠠᠬᠢᠷ᠂ ᠬᠣᠯᠬᠣᠴᠢᠨ ᠬᠣᠶᠠᠷ ᠮᠢᠨᠢ ᠯᠡ ᠮᠡᠳᠡᠨᠡ ᠬᠣᠯᠬᠣᠴᠢᠨ ᠤ᠋ ᠪᠠᠷᠠᠭᠤᠨ ᠰᠤᠭᠤ ᠪᠠᠷ ᠬᠠᠬᠢᠷ ᠤ᠋ᠨ ᠭᠣᠣᠯ ᠮᠢᠷᠠᠯᠵᠠᠨ ᠤᠷᠤᠰᠤᠨᠠ᠂ ᠥᠴᠢ ᠲᠥᠴᠢᠨᠡᠨ ᠣᠨ ᠵᠢᠯ ᠦ᠋ᠨ ᠲᠤᠷᠰᠢ ᠡᠪᠦᠭᠡ ᠳᠡᠭᠡᠳᠦᠰ ᠮᠢᠨᠢ ᠬᠠᠬᠢᠷ ᠤ᠋ᠨ ᠭᠣᠣᠯ ᠠ᠋ᠴᠠ ᠪᠠᠨ ᠤᠰᠤ ᠳᠠᠮᠨᠠᠵᠤ᠂ ᠬᠠᠬᠢᠷ ᠤ᠋ᠨ ᠬᠥᠨᠳᠡᠢ ᠡᠴᠡ ᠪᠡᠨ ᠲᠦᠯᠡᠭᠡ ᠲᠡᠭᠡᠭᠰᠡᠨ ᠢ᠋ ᠣᠨ ᠴᠠᠭ ᠯᠠ ᠭᠡᠷᠡᠴᠢᠯᠡᠨᠡ᠃ ᠬᠠᠬᠢᠷ ᠤ᠋ᠨ ᠦᠷᠡᠰ ᠬᠠᠬᠢᠷ ᠲᠤ᠌ ᠯᠠ ᠪᠤᠴᠠᠨᠠ᠃
ᠠᠪᠤ ᠮᠢᠨᠢ ᠠᠪᠰᠠᠨ ᠳᠣᠲᠣᠷᠠ ᠪᠠᠢᠬᠤ ᠳ᠋ᠤ᠌ ᠨᠢ ᠪᠢ ᠬᠠᠴᠠᠷ ᠢ᠋ ᠨᠢ ᠢᠯᠠᠵᠤ ᠦᠵᠡᠭᠰᠡᠨ ᠶᠤᠮ᠂ ᠴᠢᠪ ᠬᠦᠢᠲᠡᠨ᠂ ᠶᠢᠷᠲᠢᠨᠴᠦ ᠳ᠋ᠦ᠍ ᠡᠨᠡ ᠡᠴᠡ ᠬᠦᠢᠲᠡᠨ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠶᠤᠮ ᠰᠢᠭ ᠯᠡ ᠮᠡᠳᠡᠷᠡᠮᠵᠢ ᠥᠭᠭᠦᠭᠰᠡᠨ᠂ ᠦᠬᠦᠯ ᠬᠦᠢᠲᠡᠨ ᠤᠤ᠂ ᠡᠷᠯᠢᠭ ᠬᠦᠢᠲᠡᠨ ᠤᠤ ᠭᠡᠳᠡᠭ ᠢ᠋ ᠡᠨᠡ ᠦᠶᠡ ᠪᠣᠳᠣᠬᠤ ᠰᠡᠭᠡᠭᠡ ᠪᠠᠢᠭᠠ ᠦᠭᠡᠢ᠂ ᠠᠪᠤ ᠮᠢᠨᠢ ᠥᠭᠡᠳᠡ ᠪᠣᠯᠤᠭᠠᠳ ᠠᠭᠤᠯᠠ ᠮᠢᠨᠢ ᠨᠤᠷᠠᠭᠰᠠᠨ ᠶᠤᠮ ᠰᠢᠭ᠋ ᠶᠠᠮᠠᠷ ᠴᠦ᠍ ᠨᠥᠮᠥᠷᠢ ᠨᠥᠯᠥᠭ ᠦᠭᠡᠢ ᠪᠣᠯᠤᠭᠰᠠᠨ ᠯᠠ ᠳᠠ᠂ ᠠᠪᠤ ᠠ᠋ᠴᠠ ᠪᠠᠨ ᠬᠣᠢᠰᠢ ᠣᠯᠠᠨ ᠵᠢᠯ ᠰᠡᠳᠬᠢᠯ ᠬᠦᠨᠳᠦ ᠶᠠᠪᠤᠯᠠ᠂ ᠬᠠᠶᠠ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠥᠯᠳᠡᠭᠡᠭᠰᠡᠨ ᠵᠢᠷᠤᠭ ᠢ᠋ ᠬᠠᠷᠠᠵᠤ᠂ ᠬᠥᠮᠦᠨ ᠦ᠌ ᠨᠢᠳᠦᠨ ᠡᠴᠡ ᠳᠠᠯᠳᠠᠭᠤᠷ ᠨᠢᠯᠪᠤᠰᠤ ᠤᠨᠠᠭᠠᠳᠠᠭ ᠪᠠᠢᠯᠠ᠂ ᠲᠡᠭᠡᠭᠡᠳ ᠯᠡ ᠠᠪᠤ ᠲᠠᠢ ᠪᠠᠨ ᠪᠢ ᠭᠠᠭᠴᠠ ᠨᠢᠭᠡ ᠵᠢᠷᠤᠭ ᠠᠪᠬᠠᠭᠤᠯᠤᠭᠰᠠᠨ ᠦᠭᠡᠢ ᠪᠡᠨ ᠮᠡᠳᠡᠭᠡᠳ ᠤᠯᠠᠮ ᠴᠦ᠍ ᠪᠦᠷ ᠭᠤᠨᠢᠬᠤ ᠪᠣᠯᠤᠭᠰᠠᠨ ᠶᠤᠮ᠃ ᠲᠡᠷᠡ ᠡᠴᠡ ᠬᠣᠢᠰᠢ ᠡᠵᠢ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠯᠴᠠᠭᠰᠠᠨ ᠮᠥᠴᠡ ᠪᠦᠷᠢ ᠳ᠋ᠤ᠌ ᠪᠠᠢᠩᠭᠤ ᠯᠠ ᠬᠠᠮᠲᠤ ᠶ᠋ᠢᠨ ᠵᠢᠷᠤᠭ ᠠᠪᠳᠠᠭ ᠪᠠᠢᠳᠠᠭ ᠪᠣᠯᠤᠭᠰᠠᠨ᠂ ᠠᠪᠤ ᠲᠠᠢ ᠪᠠᠨ ᠠᠪᠬᠠᠭᠤᠯᠤᠭᠠ ᠦᠭᠡᠢ ᠵᠢᠷᠤᠭ ᠢ᠋ᠶ᠋ᠠᠨ ᠡᠵᠢ ᠲᠡᠢ ᠪᠡᠨ ᠠᠪᠴᠤ ᠭᠦᠢᠴᠡᠶᠡ ᠯᠡ ᠭᠡᠰᠡᠨ ᠪᠣᠳᠣᠯ ᠢᠯᠡᠭᠦᠦ ᠵᠠᠢᠴᠢᠯᠠᠭᠰᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠬᠠ ᠳᠠ ᠡᠵᠢ ᠮᠢᠨᠢ ᠵᠥᠩᠳᠡᠭᠡᠨ ᠯᠡ ᠨᠠᠳᠠ ᠲᠠᠢ ᠵᠢᠷᠤᠭ ᠠᠪᠬᠠᠭᠤᠯᠬᠤ ᠳᠤᠷᠠᠲᠠᠢ ᠂ ᠠᠪᠤ ᠲᠠᠢ ᠪᠠᠨ ᠪᠢ ᠭᠠᠭᠴᠠ ᠴᠦ᠍ ᠵᠢᠷᠤᠭ ᠠᠪᠬᠠᠭᠤᠯᠤᠭᠠ ᠦᠭᠡᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠯᠡ ᠪᠠᠢᠭᠠᠰᠠᠢ ᠭᠡᠵᠦ ᠵᠠᠯᠪᠠᠷᠢᠳᠠᠭ᠃ ᠨᠠᠳᠠ ᠲᠠᠢ ᠵᠢᠷᠤᠭ ᠳᠠᠷᠤᠭᠤᠯᠬᠤ ᠪᠣᠯᠭᠠᠨ ᠡᠵᠢ ᠶ᠋ᠢᠨ ᠮᠢᠨᠢ ᠨᠢᠳᠦᠨ ᠳ᠋ᠤ᠌ ᠵᠠᠢᠷ ᠲᠠᠢ ᠪᠠᠢᠳᠠᠭ ᠢ᠋ ᠪᠢ ᠡᠷᠲᠡ ᠡᠴᠡ ᠠᠩᠵᠠᠭᠠᠷᠠᠵᠤ ᠪᠢᠯᠡ᠂
ᠴᠠᠰᠤ ᠲᠤᠢᠯᠠᠯᠠ᠂ ᠡᠪᠦᠯᠵᠢᠩᠬᠡᠨ ᠬᠦᠯᠢᠶᠡᠯᠭᠡᠭᠰᠡᠨ ᠴᠠᠰᠤ ᠬᠠᠪᠤᠷ ᠲᠠᠢᠰᠢ ᠪᠠᠨ ᠬᠠᠶᠠᠯᠠᠵᠤ ᠡᠬᠢᠯᠡᠬᠦ ᠪᠡᠷ ᠶᠠᠭ ᠯᠠ ᠣᠷᠴᠢᠯᠠᠩ ᠤ᠋ᠨ ᠮᠠᠷᠲᠠᠭᠳᠠᠭᠰᠠᠨ ᠵᠡᠭᠦᠳᠦ ᠶ᠋ᠢ ᠳᠠᠬᠢᠨ ᠰᠠᠨᠠᠭᠤᠯᠬᠤ ᠰᠢᠭ᠋ ᠴᠠᠭᠠᠨᠠ ᠪᠠᠨ ᠨᠢᠭᠡ ᠯᠡ ᠭᠤᠨᠢᠭᠲᠠᠢ᠂ ᠴᠠᠰᠤ ᠮᠠᠯᠠᠭᠠᠢᠯᠠᠭᠰᠠᠨ ᠬᠠᠬᠢᠷ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠬᠥᠬᠡ ᠠᠭᠤᠯᠠᠰ ᠢ᠋ᠶ᠋ᠠᠨ ᠪᠠᠷᠠᠯᠠᠬᠤ ᠳ᠋ᠤ᠌ ᠠᠪᠤ ᠮᠢᠨᠢ ᠳᠤᠷᠠᠰᠤᠭᠳᠠᠨᠠ᠃ ᠶᠠᠭ ᠯᠠ ᠮᠠᠭᠤ ᠡᠷᠡ ᠶ᠋ᠢᠨ ᠮᠠᠯᠠᠭᠠᠢ ᠶ᠋ᠢᠨ ᠴᠢᠨᠡᠭᠡ ᠲᠣᠮᠣ ᠲᠣᠮᠣ ᠯᠠᠪᠰᠠ ᠬᠠᠶᠠᠯᠠᠭᠰᠠᠨ ᠡᠳᠦᠷ ᠠᠪᠤ ᠮᠠᠨᠢ ᠬᠠᠯᠢᠶᠠᠪᠦᠷᠢ ᠪᠡᠨ ᠭᠡᠳᠡᠷᠭᠡᠯᠡᠵᠦ᠂ ᠪᠢ ᠳᠡᠭᠦᠵᠢᠩ ᠪᠢᠯᠠᠭᠤ ᠪᠠᠨ ᠰᠣᠢᠯᠠᠭᠠᠳ ᠲᠠᠤᠯᠠᠢ ᠶ᠋ᠢᠨ ᠠᠪᠠ ᠳ᠋ᠤ᠌ ᠭᠠᠷᠳᠠᠭ ᠪᠠᠢᠭᠰᠠᠨ ᠯᠠ ᠳᠠ ᠂ ᠠᠪᠤ ᠮᠢᠨᠢ ᠠᠩᠴᠢᠨ ᠪᠢᠰᠢ᠂ ᠵᠦᠭᠡᠷ ᠯᠡ ᠠᠩ ᠳ᠋ᠤ᠌ ᠬᠣᠷᠣᠬᠠᠢ ᠲᠠᠢ ᠨᠢᠭᠡᠨ᠂ ᠣᠳᠣ ᠭᠡᠬᠦ ᠳ᠋ᠦ᠍ ᠠᠩ ᠤ᠋ᠨ ᠳᠤᠷᠠᠰᠤᠮᠵᠢ ᠶ᠋ᠢ ᠨᠢᠭᠡ ᠦᠯᠡᠳᠡᠭᠡᠵᠦ ᠠᠪᠤ ᠮᠢᠨᠢ ᠬᠠᠬᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠤ᠌ ᠪᠡᠨ ᠪᠤᠴᠠᠵᠠᠢ᠃
ᠴᠠᠰᠤ ᠬᠠᠶᠠᠯᠠᠵᠤ ᠯᠠ ᠪᠠᠢᠨᠠ᠂ ᠴᠠᠰᠤ ᠶ᠋ᠢ ᠪᠢ ᠡᠭᠳᠡᠭᠦᠴᠡᠳᠡᠭ ᠦᠭᠡᠢ ᠪᠠᠰᠠ ᠨᠢᠭᠡ ᠶᠡᠬᠡ ᠬᠦᠰᠡᠳᠡᠭ ᠦᠭᠡᠢ᠂ ᠶᠠᠭᠤ ᠭᠡᠪᠡᠰᠦ᠂ ᠴᠠᠰᠤ ᠬᠠᠷᠠᠮᠠᠭᠴᠠ ᠯᠠ ᠠᠪᠤ ᠲᠠᠢ ᠪᠠᠨ ᠪᠠᠢᠭᠰᠠᠨ ᠡᠳᠦᠷ ᠬᠣᠨᠣᠭ ᠤ᠋ᠳ ᠨᠢᠳᠦᠨ ᠳ᠋ᠤ᠌ ᠲᠣᠳᠣᠷᠠᠨ ᠰᠡᠳᠬᠢᠯ ᠦ᠋ᠨ ᠰᠢᠷᠬᠠ ᠶ᠋ᠢ ᠡᠪᠡᠳᠬᠡᠬᠦ ᠨᠢ ᠬᠡᠴᠡᠭᠦᠦ᠂ ᠬᠣᠯᠬᠣᠴᠢᠨ ᠤ᠋ ᠡᠩᠭᠡᠷ ᠠᠩᠬᠠ ᠬᠦᠷᠬᠦ ᠳ᠋ᠦ᠍ ᠪᠡᠨ ᠠᠪᠤ ᠶ᠋ᠢ ᠪᠡᠨ ᠬᠦᠷᠭᠡᠵᠦ ᠣᠴᠢᠨᠠ ᠭᠡᠮᠡᠨ ᠠᠷᠪᠠᠨ ᠵᠡᠭᠦᠳᠦᠨ ᠳ᠋ᠦ᠍ ᠴᠦ᠍ ᠪᠠᠢᠭᠠ ᠦᠭᠡᠢ ᠪᠠᠢᠭᠰᠠᠨ᠂ ᠠᠪᠤ ᠶ᠋ᠢ ᠪᠡᠨ ᠡᠪᠦᠭᠡᠳ ᠲᠦ᠍ ᠨᠢ ᠪᠤᠴᠠᠭᠠᠵᠤ ᠭᠠᠩᠰᠠᠷᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠡᠪᠦᠷᠯᠡᠨ ᠡᠷᠭᠢᠨ ᠡᠷᠭᠢᠨ ᠬᠠᠷᠠᠭᠰᠠᠭᠠᠷ ᠪᠤᠴᠠᠨᠠ ᠴᠦ᠍ ᠭᠡᠵᠦ ᠶᠡᠷᠦ ᠪᠣᠳᠣᠭᠠ ᠦᠭᠡᠢ ᠯᠡ ᠶᠠᠪᠤᠯᠠ ᠡᠪᠦᠭᠡᠳ ᠦ᠋ᠨ ᠠᠭᠤᠯᠵᠠᠷ ᠲᠤ᠌ ᠰᠢᠨᠡ ᠪᠤᠩᠬᠤᠨ ᠨᠡᠮᠡᠭᠳᠡᠯᠡ᠂
ᠲᠡᠷᠡ ᠮᠥᠴᠡ ᠡᠴᠡ ᠡᠬᠢᠯᠡᠨ ᠬᠣᠯᠬᠣᠴᠢᠨ ᠪᠢᠳᠡ ᠬᠣᠶᠠᠷ ᠵᠡᠭᠦᠳᠦᠨ ᠦ᠌ ᠪᠠᠷᠢᠯᠳᠤᠯᠭᠠ ᠲᠠᠢ ᠪᠣᠯᠤᠭᠰᠠᠨ ᠶᠤᠮ᠂ ᠬᠠᠬᠢᠷ ᠤ᠋ᠨ ᠤᠷᠤᠰᠬᠠᠯ ᠣᠨ ᠴᠠᠭ ᠢ᠋ ᠳᠠᠭᠠᠭᠤᠯᠤᠨ ᠤᠷᠤᠰᠤᠨ ᠤᠷᠤᠰᠤᠭᠰᠠᠭᠠᠷ ᠣᠯᠠᠨ ᠵᠢᠯ ᠥᠩᠭᠡᠷᠡᠵᠡᠢ᠂ ᠭᠡᠰᠡᠨ ᠬᠡᠳᠦᠢ ᠴᠦ᠍ ᠬᠣᠯᠬᠣᠴᠢᠨ ᠠ᠋ᠴᠠ ᠢᠷᠡᠬᠦ ᠵᠡᠭᠦᠳᠦ ᠮᠢᠨᠢ ᠰᠢᠨᠡ ᠯᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠂ ᠡᠪᠦᠭᠡᠳ ᠦ᠋ᠨ ᠠᠭᠤᠯᠵᠠᠷ ᠲᠤ᠌ ᠪᠠᠨ ᠡᠪᠦᠭᠡᠳ ᠮᠢᠨᠢ ᠠᠭᠤᠯᠵᠠᠨᠠ ᠡᠪᠦᠭᠡᠳ ᠲᠡᠢ ᠪᠡᠨ ᠪᠢ ᠠᠭᠤᠯᠵᠠᠨᠠ᠂
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ