ᠲᠤᠰᠠ ᠶ᠋ᠢ ᠠᠴᠢ ᠪᠠᠷ ᠬᠠᠷᠢᠭᠤᠯᠠᠭᠰᠠᠨ ᠨᠢ Тусыг ачаар хариулсан нь
930ᠲᠤᠰᠠ ᠶ᠋ᠢ ᠠᠴᠢ ᠪᠠᠷ ᠬᠠᠷᠢᠭᠤᠯᠠᠭᠰᠠᠨ ᠨᠢ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠠᠮᠢᠳᠤᠷᠠᠵᠤ ᠪᠠᠢᠵᠤ ᠭᠡᠨᠡ᠂ ᠨᠢᠭᠡ ᠡᠳᠦᠷ ᠡᠪᠦᠭᠡᠨ ᠨᠢ ᠠᠷᠭᠠᠯ ᠲᠡᠭᠦᠭᠡᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠰᠤᠭ ᠰᠤᠭ ᠶᠠᠪᠤᠳᠠᠯ ᠲᠠᠢ ᠰᠤᠬᠠᠢ ᠰᠢᠷᠠ ᠵᠢᠰᠦᠲᠦ ᠦᠨᠡᠭᠡ ᠭᠦᠶᠦᠵᠦ ᠢᠷᠡᠭᠡᠳ᠂
— ᠡᠪᠦᠭᠡᠨ ᠭᠤᠸᠠᠢ᠂ ᠡᠪᠦᠭᠡᠨ ᠭᠤᠸᠠᠢ ᠤᠲᠠᠰᠤᠨ ᠴᠢᠨᠡᠭᠡᠨ ᠠᠮᠢ ᠶ᠋ᠢ ᠮᠢᠨᠢ ᠠᠪᠤᠷᠠᠵᠤ ᠬᠠᠢᠷᠠᠯᠠ ᠭᠡᠳ ᠰᠢᠷᠪᠠᠯᠵᠠᠭᠠᠳ ᠭᠢᠶᠡᠨᠡᠭᠡᠳ ᠤᠨᠠᠵᠠᠢ᠃
ᠥᠲᠡᠯᠦᠭᠡ ᠡᠪᠦᠭᠡᠨ ᠪᠢ ᠴᠢᠮᠠ ᠶ᠋ᠢ ᠶᠠᠭᠠᠬᠢᠵᠤ ᠠᠪᠤᠷᠠᠬᠤ ᠪᠢᠯᠡ ᠭᠡᠮᠡᠨ ᠰᠠᠨᠳᠤᠷᠲᠠᠯᠠ᠂
— ᠬᠡᠳᠦᠨ ᠫᠤᠤ ᠲᠠᠢ ᠬᠥᠮᠦᠨ ᠨᠠᠮᠠ ᠶ᠋ᠢ ᠬᠥᠭᠡᠭᠡᠵᠦ ᠶᠠᠪᠤᠨᠠ᠂ ᠪᠢ ᠲᠠᠨ ᠤ᠋ ᠲᠡᠭᠦᠭᠰᠡᠨ ᠠᠷᠭᠠᠯ ᠳᠣᠣᠷᠠ ᠣᠷᠣᠵᠤ ᠬᠡᠪᠲᠡᠶᠡ ᠭᠡᠵᠦ ᠭᠡᠨᠡ᠃
ᠡᠪᠦᠭᠡᠨ ᠴᠦ᠍ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠦᠨᠡᠭᠡ ᠶ᠋ᠢ ᠨᠢᠭᠤᠵᠤ ᠣᠷᠬᠢᠪᠠ᠂ ᠭᠡᠲᠡᠯᠡ ᠫᠤᠤ ᠰᠢᠳᠡᠮ ᠡᠭᠦᠷᠦᠭᠰᠡᠨ ᠬᠡᠳᠦᠨ ᠭᠥᠷᠥᠭᠡᠴᠢᠨ ᠠᠷᠤ ᠠ᠋ᠴᠠ ᠨᠢ ᠳᠠᠪᠬᠢᠵᠤ ᠢᠷᠡᠭᠡᠳ᠂
— ᠠᠭᠤᠯᠠ ᠶ᠋ᠢᠨ ᠤᠯᠠᠭᠠᠨ ᠦᠨᠡᠭᠡ ᠡᠭᠦᠪᠡᠷ ᠥᠩᠭᠡᠷᠡᠪᠡ ᠦᠦ᠂ ᠡᠪᠦᠭᠡᠨ ᠭᠤᠸᠠᠢ᠂ ᠦᠵᠡᠪᠡ ᠦᠦ ᠳᠠ ᠭᠡᠵᠦ ᠠᠰᠠᠭᠤᠪᠠᠰᠤ᠂
— ᠦᠭᠡᠢ᠂ ᠦᠭᠡᠢ᠂ ᠨᠠᠳᠠ ᠳ᠋ᠤ᠌ ᠯᠠᠪ ᠶᠠᠭᠤᠮᠠ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ ᠭᠡᠵᠦ ᠬᠡᠯᠡᠭᠡᠳ ᠴᠢᠯᠠᠭᠤ ᠬᠥᠭᠡᠭᠡᠯᠭᠡᠵᠦ ᠣᠷᠬᠢᠵᠠᠢ᠂ ᠦᠨᠡᠭᠡ ᠠᠷᠭᠠᠯ ᠳᠣᠣᠷᠠ ᠠ᠋ᠴᠠ ᠭᠠᠷᠴᠤ ᠢᠷᠡᠭᠡᠳ ᠳᠡᠭᠡᠷᠡ ᠳᠡᠭᠡᠷᠡ ᠴᠣᠪᠬᠣᠷᠠᠵᠤ᠂ ᠳᠡᠯᠢᠮ ᠪᠡᠶᠡ ᠪᠡᠨ ᠰᠡᠪ ᠰᠡᠪ ᠰᠢᠯᠭᠡᠭᠡᠭᠡᠳ᠂
— ᠲᠠ ᠠᠮᠢᠨ ᠳ᠋ᠤ᠌ ᠮᠢᠨᠢ ᠣᠷᠣᠯᠠ᠂ ᠮᠠᠷᠭᠠᠰᠢ ᠮᠠᠨ ᠤ᠋ ᠬᠢ ᠪᠡᠷ ᠠᠢᠯᠴᠢᠯᠠᠵᠤ ᠣᠴᠢᠭᠠᠷᠠᠢ᠂ ᠡᠨᠡ ᠬᠣᠢᠲᠤ ᠠᠭᠤᠯᠠ ᠶ᠋ᠢᠨ ᠠᠷᠤ ᠳᠣᠣᠷᠠ ᠡᠯᠢᠭᠡᠨ ᠤᠯᠠᠭᠠᠨ ᠬᠠᠳᠠ ᠪᠣᠢ᠂ ᠲᠡᠷᠡ ᠬᠠᠳᠠᠨ ᠤ᠋ ᠳᠣᠣᠷᠠ ᠣᠴᠢᠭᠠᠳ《 ᠠᠭᠤᠯᠠ ᠶ᠋ᠢᠨ ᠤᠯᠠᠭᠠᠨ ᠦᠨᠡᠭᠡ ᠤᠷᠢᠶᠠ ᠤᠷᠢᠶᠠ》 ᠭᠡᠭᠡᠷᠡᠢ᠂ ᠲᠡᠭᠡᠬᠦ ᠪᠡᠷ ᠨᠢᠭᠡ ᠬᠥᠮᠦᠨ ᠭᠠᠷᠴᠤ ᠢᠷᠡᠨᠡ ᠭᠡᠵᠦ ᠭᠡᠨᠡ᠂ ᠡᠪᠦᠭᠡᠨ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠭᠠᠳ ᠡᠮᠡᠭᠡᠨ ᠳ᠋ᠦ᠍ ᠪᠡᠨ ᠡᠳᠦᠷ ᠦ᠋ᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ᠂ ᠦᠨᠡᠭᠡ ᠲᠡᠢ ᠠᠭᠤᠯᠵᠠᠭᠰᠠᠨ ᠢ᠋ᠶ᠋ᠠᠨ᠂ ᠨᠢᠭᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠡᠢ᠂ ᠡᠮᠡᠭᠡᠨ ᠨᠢ ᠭᠠᠢᠬᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠭᠠᠢᠬᠠᠵᠤ᠂
— ᠡᠨᠡ ᠡᠪᠦᠭᠡᠨ ᠦ᠌ ᠤᠬᠠᠭᠠᠨ ᠰᠣᠯᠢᠭᠤ ᠭᠠᠵᠢᠭᠤ ᠪᠣᠯᠵᠤ᠂ ᠦᠨᠡᠭᠡ ᠬᠥᠮᠦᠨ ᠬᠠᠷᠠ ᠳᠡᠭᠡᠷᠡ ᠢᠷᠡᠵᠦ᠂ ᠬᠥᠮᠦᠨ ᠦ᠌ ᠬᠡᠯᠡ ᠪᠡᠷ ᠥᠭᠦᠯᠡᠨᠡ ᠭᠡᠵᠦ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ ᠭᠡᠮᠡᠨ ᠱᠣᠭᠰᠢᠷᠠᠵᠤ ᠭᠠᠷᠴᠠᠢ᠂ ᠭᠡᠲᠡᠯᠡ ᠤᠭ ᠨᠢ ᠡᠪᠦᠭᠡᠨ ᠨᠢ ᠠᠮᠢᠲᠠᠨ ᠤ᠋ ᠬᠡᠯᠡ ᠤᠰᠤ ᠶ᠋ᠢ ᠠᠨᠳᠠᠬᠤ ᠦᠭᠡᠢ ᠮᠡᠳᠡᠳᠡᠭ ᠨᠢᠭᠡᠨ ᠶᠤᠮᠰᠠᠨᠵᠠᠢ᠂ ᠮᠠᠷᠭᠠᠰᠢ ᠨᠢ ᠦᠨᠡᠭᠡᠨ ᠦ᠌ ᠬᠡᠯᠡᠭᠰᠡᠨ ᠭᠠᠵᠠᠷ ᠣᠴᠢᠭᠠᠳ᠂
ᠠᠭᠤᠯᠠ ᠶ᠋ᠢᠨ ᠦᠨᠡᠭᠡ ᠤᠷᠢᠶᠠ ᠤᠷᠢᠶᠠ ᠭᠡᠲᠡᠯᠡ ᠨᠢᠭᠡ ᠬᠡᠦᠬᠡᠨ ᠭᠠᠷᠴᠤ ᠢᠷᠡᠭᠡᠳ ᠲᠣᠮᠣ ᠠᠭᠤᠢ ᠤᠷᠤᠭᠤ ᠳᠠᠭᠠᠭᠤᠯᠵᠤ ᠣᠷᠣᠪᠠ᠃
ᠳᠣᠲᠣᠷᠠ ᠨᠢ ᠣᠭᠣᠰᠣᠷ ᠪᠦᠴᠡ ᠦᠭᠡᠢ ᠤᠷᠲᠤ ᠴᠠᠭᠠᠨ ᠥᠷᠭᠥᠭᠡ ᠭᠡᠷ ᠪᠠᠷᠢᠴᠢᠬᠠᠭᠰᠠᠨ ᠪᠠᠢᠯᠠ᠂ ᠡᠪᠦᠭᠡᠨ ᠢ᠋ ᠭᠡᠷ ᠲᠦ᠍ ᠪᠡᠨ ᠣᠷᠣᠭᠤᠯᠤᠭᠠᠳ ᠳᠠᠢᠯᠠᠵᠤ ᠴᠠᠢᠯᠠᠪᠠ᠃ ᠲᠡᠭᠡᠵᠦ ᠲᠡᠭᠡᠵᠦ ᠡᠪᠦᠭᠡᠨ ᠴᠦ᠍ ᠶᠠᠪᠤᠬᠤ ᠤᠤ ᠳᠠ ᠭᠡᠳ ᠪᠣᠰᠲᠠᠯᠠ ᠬᠡᠦᠬᠡᠨ᠂
— ᠵᠠ ᠡᠪᠦᠭᠡᠨ ᠭᠤᠸᠠᠢ᠂ ᠲᠠ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠭᠠᠳ ᠬᠦᠷᠡᠭᠴᠢ ᠦᠨᠢᠶᠡ ᠰᠠᠭᠠᠷ ᠰᠠᠭᠠᠷ ᠭᠡᠵᠦ ᠬᠡᠯᠡᠭᠡᠷᠡᠢ᠂ ᠲᠡᠭᠡᠬᠦ ᠪᠡᠷ ᠰᠦ ᠨᠢ ᠬᠤᠪᠢᠩ ᠬᠤᠪᠢᠩ ᠢ᠋ᠶ᠋ᠠᠷ ᠠᠰᠬᠠᠷᠠᠨᠠ᠂ ᠲᠣᠰᠤᠭᠠᠳ ᠠᠪᠤᠭᠠᠷᠠᠢ ᠭᠡᠳ ᠡᠪᠦᠭᠡᠨ ᠳ᠋ᠦ᠍ ᠨᠢᠭᠡ ᠬᠦᠷᠡᠭᠴᠢ ᠦᠨᠢᠶᠡ ᠥᠭᠭᠦᠭᠡᠳ ᠶᠠᠪᠤᠭᠤᠯᠵᠠᠢ᠃
ᠡᠪᠦᠭᠡᠨ ᠭᠠᠢᠬᠠᠵᠤ ᠭᠠᠢᠬᠠᠵᠤ ᠬᠠᠷᠢᠬᠤ ᠵᠠᠮ ᠳ᠋ᠤ᠌ ᠪᠠᠨ《 ᠬᠦᠷᠡᠭᠴᠢ ᠦᠨᠢᠶᠡ ᠰᠠᠭᠠᠷ ᠰᠠᠭᠠᠷ》 ᠭᠡᠰᠡᠨ ᠳ᠋ᠦ᠍ ᠳᠠᠯᠠᠩ ᠠ᠋ᠴᠠ ᠨᠢ ᠤᠴᠢᠷ ᠦᠭᠡᠢ ᠶᠡᠬᠡ ᠰᠦ ᠰᠡᠳ ᠰᠡᠳ ᠠᠰᠬᠠᠷᠠᠵᠤ ᠨᠡᠯᠦᠢᠭᠡᠳ ᠴᠠᠢᠷᠠᠭᠠᠳ ᠪᠠᠭᠤᠬᠤ ᠨᠢ ᠲᠡᠷᠡ ᠠ᠋᠂ ᠡᠪᠦᠭᠡᠨ ᠰᠠᠪᠠ ᠦᠭᠡᠢ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠪᠤᠰᠢᠭᠤᠬᠠᠨ ᠦᠨᠢᠶᠡ ᠪᠡᠨ ᠲᠠᠭᠤᠵᠤ ᠬᠠᠷᠢᠭᠠᠳ ᠰᠡᠩᠳᠡᠨ ᠮᠡᠩᠳᠡᠨ ᠪᠠᠢᠵᠤ᠂
— ᠡᠮᠡᠭᠡᠨ᠂ ᠡᠮᠡᠭᠡᠨ ᠠ᠋᠂ ᠰᠠᠪᠠ ᠰᠠᠭᠤᠯᠠᠭᠠ ᠪᠠᠨ ᠭᠠᠷᠭᠠᠭᠠᠳ ᠢᠷᠡᠭᠡᠷᠡᠢ᠂ ᠠᠯᠢᠪ ᠪᠤᠰᠢᠭᠤᠯᠠᠭᠠᠷᠠᠢ ᠭᠡᠵᠡᠢ᠃
ᠡᠮᠡᠭᠡᠨ ᠴᠦ᠍ ᠭᠠᠷᠴᠤ ᠢᠷᠡᠭᠡᠳ ᠰᠠᠪᠠ ᠳᠦᠭᠦᠷᠡᠩ ᠰᠦ ᠰᠠᠭᠠᠵᠤ ᠠᠪᠤᠭᠠᠳ ᠪᠥᠭᠡᠮ ᠪᠠᠶᠠᠷ ᠪᠣᠯᠵᠤ᠂
— ᠡᠢᠮᠦ ᠰᠠᠢᠬᠠᠨ ᠶᠠᠭᠤᠮᠠ ᠪᠠᠢᠳᠠᠭ ᠠ᠋ ᠪᠠᠰᠠ᠂ ᠬᠠᠭᠠᠨ ᠳ᠋ᠤ᠌ ᠪᠠᠨ ᠦᠵᠡᠭᠦᠯᠦᠶᠡ ᠪᠠᠢᠵᠠ ᠭᠡᠳ ᠬᠠᠭᠠᠨ ᠤ᠋ ᠥᠷᠭᠥᠭᠡ ᠤᠷᠤᠭᠤ ᠦᠨᠢᠶᠡ ᠪᠡᠨ ᠬᠥᠲᠥᠯᠵᠦ ᠣᠳᠪᠠ᠃
— ᠬᠠᠭᠠᠨ ᠮᠢᠨᠢ᠂ ᠬᠠᠭᠠᠨ ᠮᠢᠨᠢ᠂ ᠬᠠᠲᠤᠨ ᠠᠯᠪᠠᠲᠤ ᠨᠠᠷ ᠲᠠᠢ ᠪᠠᠨ ᠭᠠᠷᠤᠭᠠᠳ ᠢᠷᠡᠭᠡᠷᠡᠢ᠂ ᠬᠠᠴᠢᠨ ᠰᠣᠨᠢᠨ ᠶᠠᠭᠤᠮᠠ ᠦᠵᠡᠭᠦᠯᠦᠶᠡ ᠭᠡᠪᠡᠰᠦ ᠬᠠᠭᠠᠨ ᠴᠤ᠌ ᠭᠠᠷᠤᠭᠠᠳ ᠢᠷᠡᠵᠦ᠂ ᠡᠮᠡᠭᠡᠨ ᠴᠦ᠍《 ᠬᠦᠷᠡᠭᠴᠢ ᠦᠨᠢᠶᠡ ᠰᠠᠭᠠᠷ ᠰᠠᠭᠠᠷ》 ᠭᠡᠬᠦ ᠳ᠋ᠦ᠍᠂ ᠰᠦ ᠨᠢ ᠠᠰᠬᠠᠷᠠᠭᠠᠳ ᠪᠠᠭᠤᠵᠠᠢ᠂ ᠡᠨᠡ ᠶᠡᠬᠡ ᠰᠦ ᠶ᠋ᠢ ᠲᠣᠰᠤᠭᠠᠳ ᠠᠪᠤᠭᠠᠷᠠᠢ᠂ ᠲᠠ ᠮᠢᠨᠢ ᠭᠡᠵᠦ ᠡᠮᠡᠭᠡᠨ ᠳᠠᠭᠤ ᠠᠯᠳᠠᠪᠠ᠂ ᠲᠡᠢᠨ ᠬᠦ᠌ ᠬᠠᠭᠠᠨ ᠤ᠋ ᠰᠠᠩ ᠤ᠋ᠨ ᠬᠠᠮᠤᠭ ᠰᠠᠪᠠ ᠰᠠᠭᠤᠯᠠᠭᠠ ᠶ᠋ᠢ ᠰᠦ ᠪᠡᠷ ᠴᠡᠯᠡᠯᠵᠡᠲᠡᠯᠡ ᠳᠦᠭᠦᠷᠭᠡᠵᠦ ᠣᠷᠬᠢᠵᠠᠢ᠃
— ᠡᠢᠮᠦ ᠠᠴᠢᠲᠠᠢ ᠡᠪᠦᠭᠡᠨ ᠪᠠᠢᠳᠠᠭ ᠠ᠋ ᠪᠠᠰᠠ ᠭᠡᠳ ᠬᠠᠭᠠᠨᠲᠠᠨ ᠡᠪᠦᠭᠡᠨ ᠢ᠋ ᠳᠠᠢᠯᠠᠵᠤ ᠴᠡᠢᠯᠡᠵᠦ᠂ ᠰᠠᠷᠬᠤᠳ ᠢ᠋ᠶ᠋ᠠᠷ ᠰᠢᠬᠠᠭᠰᠠᠭᠠᠷ ᠪᠠᠢᠭᠠᠳ ᠰᠣᠭᠲᠣᠭᠠᠵᠤ ᠤᠬᠠᠭᠠᠨ ᠢ᠋ ᠨᠢ ᠠᠯᠳᠠᠭᠤᠯᠤᠭᠠᠳ᠂ ᠦᠨᠢᠶᠡ ᠶ᠋ᠢ ᠨᠢ ᠨᠢᠭᠤᠵᠤ ᠥᠪᠡᠷᠲᠡᠭᠡᠨ ᠠᠪᠴᠠᠢ᠂ ᠣᠷᠣᠢ ᠨᠢ ᠡᠪᠦᠭᠡᠨ ᠢ᠋ ᠰᠡᠷᠡᠬᠦ ᠳ᠋ᠦ᠍ ᠥᠭᠡᠷᠡ ᠨᠢᠭᠡ ᠬᠦᠷᠡᠭᠴᠢ ᠦᠨᠢᠶᠡ ᠥᠭᠭᠦᠭᠡᠳ ᠭᠡᠷ ᠲᠦ᠍ ᠨᠢ ᠬᠠᠷᠢᠭᠤᠯᠵᠠᠢ᠃
ᠡᠮᠡᠭᠡᠨ ᠬᠠᠷᠢᠭᠠᠳ ᠰᠠᠪᠠ ᠪᠠᠨ ᠠᠪᠴᠤ ᠭᠠᠷᠴᠤ ᠢᠷᠡᠭᠡᠳ《 ᠬᠦᠷᠡᠭᠴᠢ ᠦᠨᠢᠶᠡ ᠰᠠᠭᠠᠷ ᠰᠠᠭᠠᠷ》 ᠭᠡᠲᠡᠯᠡ ᠰᠦ ᠭᠠᠷᠤᠭᠰᠠᠨ ᠦᠭᠡᠢ᠂ ᠳᠠᠯᠠᠩ ᠢ᠋ ᠨᠢ ᠰᠢᠪᠲᠤᠷᠠᠭᠠᠳ ᠰᠠᠭᠤᠭᠠᠳ ᠯᠠ ᠪᠠᠢᠵᠠᠢ᠂ ᠰᠠᠭᠤᠭᠠᠳ ᠯᠠ ᠪᠠᠢᠵᠠᠢ᠃ ᠠᠷᠪᠢᠲᠠᠢ ᠰᠦ ᠭᠠᠷᠤᠭᠰᠠᠨ ᠦᠭᠡᠢ᠂ ᠡᠨᠡ ᠦᠨᠢᠶᠡᠨ ᠡᠴᠡ ᠶᠠᠭᠤᠮᠠ ᠭᠠᠷᠬᠤ ᠪᠠᠨ ᠪᠠᠢᠵᠠᠢ᠂ ᠶᠠᠮᠠᠷ ᠬᠠᠴᠢᠨ ᠶᠤᠮ ᠪᠣᠢ ᠭᠡᠳ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠨᠥᠬᠥᠭᠡ ᠬᠦᠷᠡᠭᠴᠢ ᠦᠨᠢᠶᠡ ᠪᠡᠨ ᠠᠯᠠᠭᠠᠳ ᠢᠳᠡᠴᠢᠬᠡᠵᠡᠢ᠃
ᠮᠠᠷᠭᠠᠰᠢ ᠨᠢ ᠡᠪᠦᠭᠡᠨ ᠳᠠᠬᠢᠭᠠᠳ ᠦᠨᠡᠭᠡ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ᠂
— ᠠᠭᠤᠯᠠ ᠶ᠋ᠢᠨ ᠤᠯᠠᠭᠠᠨ ᠦᠨᠡᠭᠡ ᠤᠷᠢᠶᠠ ᠤᠷᠢᠶᠠ ᠭᠡᠵᠦ ᠳᠠᠭᠤᠳᠠᠲᠠᠯᠠ ᠨᠥᠬᠥᠭᠡ ᠬᠡᠦᠬᠡᠨ ᠭᠠᠷᠴᠤ ᠢᠷᠡᠭᠡᠳ᠂ ᠳᠠᠢᠯᠠᠵᠤ ᠴᠡᠢᠯᠡᠵᠦ ᠨᠢᠭᠡ ᠳᠤᠭᠤᠢ ᠥᠭᠭᠦᠭᠡᠳ᠂
— ᠲᠡᠭᠡᠷᠮᠡ ᠲᠡᠭᠡᠷᠮᠡ ᠭᠡᠵᠦ ᠬᠡᠯᠡᠭᠡᠷᠡᠢ᠂ ᠲᠡᠷᠭᠡ ᠲᠡᠷᠭᠡ ᠪᠡᠷ ᠪᠤᠳᠠᠭᠠ ᠭᠤᠯᠢᠷ ᠭᠠᠷᠳᠠᠭ ᠶᠤᠮ ᠭᠡᠵᠦ ᠭᠡᠨᠡ᠂ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠬᠤ ᠵᠠᠮ ᠳ᠋ᠤ᠌ ᠪᠠᠨ ᠡᠪᠦᠭᠡᠨ ᠳᠠᠰᠤᠯ ᠦᠭᠡᠢ《 ᠲᠡᠭᠡᠷᠮᠡ ᠲᠡᠭᠡᠷᠮᠡ》 ᠭᠡᠳ ᠬᠡᠯᠡᠵᠦ ᠣᠷᠬᠢᠲᠠᠯᠠ ᠤᠴᠢᠷ ᠦᠭᠡᠢ ᠶᠡᠬᠡ ᠪᠤᠳᠠᠭᠠ ᠱᠠᠷ ᠱᠠᠷ ᠬᠢᠨ ᠠᠰᠬᠠᠷᠠᠪᠠ ᠭᠡᠨᠡ᠃ ᠪᠤᠰᠢᠭᠤᠬᠠᠨ ᠬᠠᠷᠢᠭᠠᠳ ᠡᠮᠡᠭᠡᠨ ᠢ᠋ᠶ᠋ᠡᠨ ᠰᠠᠨᠳᠤᠷᠤᠨ ᠳᠠᠭᠤᠳᠠᠵᠤ ᠬᠠᠮᠤᠭ ᠰᠠᠪᠠ ᠰᠠᠭᠤᠯᠠᠭᠠ ᠳ᠋ᠤ᠌ ᠪᠠᠨ ᠲᠠᠷᠢᠶᠠ ᠪᠤᠳᠠᠭᠠ ᠳᠦᠭᠦᠷᠭᠡᠵᠦ ᠢᠳᠡᠬᠦ ᠤᠤᠭᠤᠬᠤ ᠪᠠᠷ ᠡᠯᠪᠡᠭ ᠳᠡᠯᠪᠡᠭ ᠰᠠᠭᠤᠬᠤ ᠪᠣᠯᠵᠠᠢ᠂ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠲᠡᠭᠡᠷᠮᠡ ᠪᠡᠨ ᠬᠠᠭᠠᠨ ᠳ᠋ᠤ᠌ ᠪᠠᠨ ᠦᠵᠡᠭᠦᠯᠦᠮᠡᠷ ᠰᠠᠨᠠᠭᠳᠠᠭᠠᠳ ᠪᠣᠯᠳᠠᠭ ᠦᠭᠡᠢ ᠠᠪᠴᠤ ᠣᠴᠢᠲᠠᠯᠠ᠂ ᠠᠴᠢ ᠪᠤᠶᠠᠨ ᠢ᠋ ᠨᠢ ᠳᠠᠭᠤᠳᠠᠵᠤ ᠢᠳᠡᠭᠡ ᠪᠤᠳᠠᠭᠠ ᠲᠠᠯᠪᠢᠵᠤ ᠶᠡᠬᠡ ᠯᠡ ᠬᠦᠨᠳᠦᠯᠡᠨ ᠳᠠᠢᠯᠠᠵᠤ ᠪᠠᠰᠠ ᠯᠠ ᠰᠣᠭᠲᠣᠭᠠᠵᠤ ᠣᠷᠬᠢᠪᠠ᠂ ᠲᠡᠭᠡᠭᠡᠳ ᠰᠠᠩ ᠢ᠋ᠶ᠋ᠠᠨ ᠲᠠᠷᠢᠶᠠ ᠪᠤᠳᠠᠭᠠ ᠪᠠᠷ ᠰᠠᠢᠬᠠᠨ ᠳᠦᠭᠦᠷᠭᠡᠵᠦ ᠠᠪᠴᠢᠬᠠᠭᠠᠳ ᠡᠪᠦᠭᠡᠨ ᠳ᠋ᠦ᠍ ᠥᠭᠡᠷᠡ ᠨᠢᠭᠡ ᠳᠤᠭᠤᠢ ᠥᠭᠭᠦᠭᠡᠳ ᠭᠡᠷ ᠤᠷᠤᠭᠤ ᠨᠢ ᠶᠠᠪᠤᠭᠤᠯᠵᠠᠢ᠂ ᠡᠪᠦᠭᠡᠨ ᠬᠠᠷᠢᠵᠤ ᠢᠷᠡᠭᠰᠡᠨ ᠦ᠌ ᠪᠡᠨ ᠮᠠᠷᠭᠠᠰᠢ ᠲᠡᠭᠡᠷᠮᠡ ᠳ᠋ᠦ᠍ ᠪᠡᠨ ᠨᠥᠭᠥᠭᠡ ᠦᠭᠡ ᠪᠡᠨ ᠬᠡᠯᠡᠲᠡᠯᠡ ᠰᠢᠷᠬᠡᠭ ᠴᠦ᠍ ᠪᠤᠳᠠᠭᠠ ᠭᠠᠷᠤᠭᠰᠠᠨ ᠦᠭᠡᠢ᠂ ᠲᠡᠭᠡᠭᠡᠳ ᠲᠡᠭᠡᠷᠮᠡ ᠪᠡᠨ ᠬᠡᠮᠬᠡ ᠴᠣᠬᠢᠭᠠᠳ ᠪᠣᠯᠴᠢᠬᠠᠵᠠᠢ᠃
ᠮᠠᠷᠭᠠᠰᠢ ᠨᠢ ᠳᠠᠬᠢᠭᠠᠳ ᠦᠨᠡᠭᠡ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ ᠪᠠᠷ ᠡᠪᠦᠭᠡᠨ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠴᠤ ᠭᠡᠨᠡ᠂ ᠦᠨᠡᠭᠡ ᠪᠠᠰᠠ ᠳᠠᠢᠯᠠᠵᠤ ᠴᠡᠢᠯᠡᠵᠦ ᠬᠦᠨᠳᠦᠯᠡᠭᠡᠳ ᠨᠢᠭᠡ ᠡᠷᠢᠶᠡᠨ ᠮᠣᠳᠣ ᠪᠠᠷᠢᠭᠤᠯᠤᠭᠠᠳ᠂
— ᠡᠷᠢᠶᠡᠨ ᠮᠣᠳᠣ ᠵᠣᠲᠣ ᠵᠣᠲᠣ ᠭᠡᠵᠦ ᠬᠡᠯᠡᠭᠡᠷᠡᠢ ᠭᠡᠵᠦ ᠵᠠᠬᠢᠵᠤ ᠵᠠᠬᠢᠵᠤ ᠶᠠᠪᠤᠭᠤᠯᠵᠠᠢ᠃
ᠡᠪᠦᠭᠡᠨ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠵᠤ ᠢᠷᠡᠭᠡᠳ᠂
— ᠡᠷᠢᠶᠡᠨ ᠮᠣᠳᠣ ᠵᠣᠲᠣ ᠵᠣᠲᠣ ᠭᠡᠲᠡᠯᠡ ᠨᠥᠭᠥᠭᠡ ᠮᠣᠳᠣ ᠨᠢ ᠡᠮᠡᠭᠡᠨ ᠢ᠋ ᠤᠨᠠᠵᠤ ᠲᠤᠰᠲᠠᠯᠠ ᠨᠢ ᠴᠣᠬᠢᠵᠤ ᠭᠠᠷᠬᠤ ᠨᠢ ᠲᠡᠷᠡ᠃
ᠡᠮᠡᠭᠡᠨ ᠨᠢ ᠠᠷᠠᠢ ᠭᠡᠵᠦ ᠵᠠᠢᠯᠠᠵᠤ ᠬᠣᠯᠠᠳᠠᠭᠠᠳ᠂
— ᠭᠠᠢ ᠲᠠᠢ ᠲᠦᠢ ᠲᠡᠢ ᠶᠠᠭᠤᠮᠠ ᠭᠠᠵᠠᠷ ᠤ᠋ᠨ ᠬᠠᠮᠢᠭᠠ ᠠ᠋ᠴᠠ ᠣᠯᠤᠭᠠᠳ ᠢᠷᠡᠪᠡ ᠭᠡᠵᠦ ᠬᠠᠰᠬᠢᠷᠤᠭᠰᠠᠭᠠᠷ ᠭᠡᠷ ᠲᠦ᠍ ᠪᠡᠨ ᠣᠷᠣᠭᠠᠳ ᠡᠭᠦᠳᠡ ᠪᠡᠨ ᠬᠠᠭᠠᠴᠢᠬᠠᠪᠠ᠂ ᠲᠡᠭᠡᠬᠦ ᠪᠡᠷ ᠨᠢ ᠡᠪᠦᠭᠡᠨ ᠪᠠᠰᠠ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠣᠴᠢᠵᠤ ᠬᠠᠭᠠᠨ᠂ ᠬᠠᠲᠤᠨ ᠢ᠋ ᠠᠯᠪᠠᠲᠤ ᠨᠠᠷ ᠲᠠᠢ ᠨᠢ ᠳᠠᠭᠤᠳᠠᠵᠤ ᠭᠠᠷᠭᠠᠭᠠᠳ᠂
— ᠡᠷᠢᠶᠡᠨ ᠮᠣᠳᠣ ᠵᠣᠲᠣ ᠵᠣᠲᠣ ᠭᠡᠲᠡᠯᠡ ᠬᠠᠭᠠᠨ ᠢ᠋ ᠨᠦᠳᠦᠵᠦ ᠭᠠᠷᠤᠯᠠ᠂ ᠪᠦᠷ ᠶᠠᠰᠤ ᠶ᠋ᠢ ᠨᠢ ᠶᠠᠩᠭᠢᠨᠠᠲᠠᠯᠠ ᠨᠢᠳᠦ ᠶ᠋ᠢ ᠨᠢ ᠬᠠᠷᠠᠩᠭᠤᠢᠯᠠᠲᠠᠯᠠ ᠳᠡᠯᠡᠰᠴᠦ ᠨᠦᠳᠦᠵᠦ ᠭᠡᠨᠡ᠂ ᠰᠡᠭᠦᠯ ᠳ᠋ᠦ᠍ ᠪᠡᠨ ᠬᠦᠷᠦᠨ ᠦ᠌ ᠬᠠᠭᠠᠨ ᠲᠡᠰᠬᠦ ᠪᠡᠨ ᠪᠠᠢᠭᠠᠳ《 ᠪᠣᠯᠢ ᠂ᠪᠣᠯᠢ! ᠡᠨᠡ ᠮᠣᠳᠣ ᠪᠠᠨ ᠲᠠᠲᠠᠵᠤ ᠬᠠᠢᠷᠠᠯᠠ᠂ ᠦᠨᠢᠶᠡ᠂ ᠲᠡᠭᠡᠷᠮᠡ ᠶ᠋ᠢᠨ ᠳᠤᠭᠤᠢ ᠬᠣᠶᠠᠷ ᠢ᠋ ᠴᠢᠨᠢ ᠣᠳᠣᠬᠠᠨ ᠥᠭᠭᠦᠶᠡ᠂ ᠶᠠᠰᠤ ᠶᠠᠢᠷᠠᠭᠤᠯᠬᠤ ᠨᠢ》 ᠭᠡᠵᠦ ᠬᠡᠯᠡᠵᠦ ᠪᠢᠯᠡ᠂ ᠡᠪᠦᠭᠡᠨ ᠴᠦ᠍ ᠥᠪᠡᠷ ᠦ᠋ᠨ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠵᠤ ᠠᠮᠤᠷ ᠰᠠᠢᠬᠠᠨ ᠳ᠋ᠤ᠌ ᠪᠠᠨ ᠵᠢᠷᠭᠠᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠤᠭᠠᠨᠵᠢᠳ
ᠬᠢᠨᠠᠭᠴᠢ᠄ ᠳᠠᠯᠠᠨᠲᠠᠢ᠂ ᠠᠯᠲᠠᠨᠴᠢᠮᠡᠭ᠂ ᠵᠢᠷᠠᠨᠲᠠᠢ