ᠱᠠᠭᠠᠵᠠᠭᠠᠢ ᠳᠡᠪᠡᠯ ᠲᠡᠢ ᠬᠦᠦШаазгай дээлтэй хүү
1408ᠱᠠᠭᠠᠵᠠᠭᠠᠢ ᠳᠡᠪᠡᠯ ᠲᠡᠢ ᠬᠦᠦ
ᠭᠠᠳᠠᠭᠠᠳᠤ ᠳᠠᠯᠠᠢ ᠶ᠋ᠢ ᠪᠠᠯᠴᠢᠭ ᠪᠠᠢᠬᠤ ᠳ᠋ᠤ᠌
ᠭᠠᠯᠪᠠᠷᠠᠨᠽᠠ ᠽᠠᠨᠳᠠᠨ ᠮᠣᠳᠣ ᠶ᠋ᠢ
ᠭᠠᠭᠴᠠ ᠰᠠᠪᠠᠭᠠᠨ ᠨᠠᠢᠯᠵᠠᠭᠤᠷ ᠪᠠᠢᠬᠤ ᠳ᠋ᠤ᠌
ᠠᠶᠠᠭᠠ ᠶ᠋ᠢᠨ ᠴᠢᠨᠡᠭᠡ ᠨᠠᠷᠠᠨ
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠠᠩᠬᠠ ᠮᠠᠨᠳᠤᠵᠤ ᠪᠠᠢᠬᠤ ᠳ᠋ᠤ᠌
ᠠᠴᠢᠲᠤ ᠪᠤᠭᠤᠷᠤᠯ ᠡᠵᠢ ᠲᠡᠢ ᠪᠡᠨ ᠨᠢᠭᠡᠨ ᠬᠥᠪᠡᠭᠦᠨ ᠠᠮᠢᠳᠤᠷᠠᠨ ᠰᠠᠭᠤᠳᠠᠭ ᠪᠠᠢᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠲᠡᠷᠡ ᠬᠦᠦ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠤ᠋ᠨ ᠭᠡᠷ ᠨᠡᠪᠲᠡ ᠭᠡᠷᠡᠯ ᠲᠡᠢ ᠭᠡᠭᠡᠨ ᠰᠠᠢᠬᠠᠨ ᠴᠢᠷᠠᠢ ᠲᠠᠢ᠂
ᠲᠤᠭᠤᠷᠭᠠ ᠨᠡᠪᠲᠡ ᠭᠡᠷᠡᠯ ᠲᠡᠢ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠵᠢᠰᠦ ᠲᠡᠢ ᠪᠦᠰᠡᠭᠦᠢ ᠶ᠋ᠢ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠴᠤ ᠠᠮᠢᠳᠤᠷᠠᠨ ᠰᠠᠭᠤᠵᠠᠢ᠃
ᠦᠵᠡᠰᠬᠦᠯᠡᠩᠲᠦ ᠡᠬᠡᠨᠡᠷ ᠨᠢ ᠬᠠᠷᠢᠨ《 ᠴᠢ ᠭᠡᠬᠦ ᠠᠯᠪᠠᠲᠤ ᠦᠭᠡᠢ᠂ ᠴᠠ ᠭᠡᠬᠦ ᠮᠠᠯ ᠦᠭᠡᠢ ᠪᠢᠳᠡ ᠬᠣᠶᠠᠷ ᠶᠠᠭᠠᠬᠢᠵᠤ ᠢᠩᠭᠢᠵᠦ ᠶᠠᠳᠠᠮᠠᠭ ᠵᠦᠳᠡᠮᠡᠭ ᠠᠮᠢᠳᠤᠷᠠᠬᠤ ᠪᠣᠢ᠂ ᠶᠠᠪᠤᠵᠤ ᠨᠢᠭᠡ ᠠᠵᠢᠯ ᠲᠥᠷᠥᠯ ᠬᠢᠵᠦ ᠠᠮᠢᠨ ᠵᠢᠭᠤᠯᠭᠠ ᠪᠠᠨ ᠵᠣᠯᠭᠠᠭᠤᠯᠲᠤᠭᠠᠢ》 ᠭᠡᠵᠦ ᠨᠥᠬᠥᠷ ᠲᠤ ᠪᠡᠨ ᠬᠡᠯᠡᠳᠡᠭ ᠶᠤᠮᠰᠠᠨᠵᠠᠢ᠂ ᠭᠡᠲᠡᠯᠡ ᠨᠥᠬᠥᠷ ᠨᠢ《 ᠵᠠ ᠲᠡᠭᠡᠪᠡᠯ ᠴᠢ ᠨᠠᠳᠠ ᠳ᠋ᠤ᠌ ᠵᠢᠷᠤᠭ ᠢ᠋ᠶ᠋ᠠᠨ ᠪᠦᠲᠦᠭᠡᠯᠭᠡᠵᠦ ᠥᠭ᠂ ᠵᠢᠷᠤᠭ ᠢ᠋ ᠴᠢᠨᠢ ᠡᠪᠦᠷᠳᠦᠯᠡᠭᠡᠳ ᠶᠠᠪᠤᠪᠠᠰᠤ ᠬᠠᠮᠢᠭᠠ ᠴᠤ᠌ ᠶᠠᠮᠠᠷ ᠴᠤ᠌ ᠠᠵᠢᠯ ᠬᠢᠵᠦ ᠶᠠᠪᠤᠭᠰᠠᠨ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ》 ᠭᠡᠵᠦ ᠭᠡᠨᠡ᠂ ᠡᠬᠡᠨᠡᠷ ᠨᠢ ᠵᠢᠷᠤᠭ ᠢ᠋ᠶ᠋ᠠᠨ ᠪᠦᠳᠦᠭᠡᠯᠭᠡᠵᠦ ᠥᠭᠪᠡ᠃
ᠲᠡᠭᠡᠩᠭᠦᠲᠡ ᠨᠥᠬᠥᠷ ᠨᠢ ᠬᠣᠯᠠ ᠣᠢᠷᠠ ᠶᠠᠪᠤᠵᠤ ᠬᠣᠨᠣᠭ ᠡᠳᠦᠷ ᠦ᠋ᠨ ᠭᠠᠵᠠᠷ ᠢ᠋ ᠬᠡᠷᠡᠵᠦ ᠬᠠᠪᠢ ᠶ᠋ᠢᠨ ᠬᠥᠮᠦᠨ ᠲᠡᠢ ᠤᠴᠠᠷᠠᠵᠤ ᠬᠠᠷᠠ ᠪᠣᠷᠣ ᠠᠵᠢᠯ ᠬᠢᠵᠦ ᠡᠬᠢᠯᠡᠵᠡᠢ᠂ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠡᠬᠡᠨᠡᠷ ᠢ᠋ᠶ᠋ᠡᠨ ᠰᠠᠨᠠᠭᠠᠳ ᠡᠯᠢᠭᠡ ᠵᠢᠷᠦᠬᠡ ᠨᠢ ᠡᠭᠰᠢᠭᠡᠳ ᠵᠢᠷᠤᠭ ᠢ᠋ ᠬᠠᠷᠠᠭᠠᠳ ᠰᠠᠭᠤᠵᠤ ᠪᠠᠢᠲᠠᠯᠠ ᠰᠠᠯᠬᠢ ᠰᠡᠷ ᠰᠡᠷ ᠬᠢᠭᠡᠳ ᠰᠠᠭᠠᠬᠠᠯᠲᠠ ᠶ᠋ᠢᠨ ᠭᠠᠵᠠᠷ ᠬᠡᠢᠰᠬᠡᠵᠦ ᠣᠳᠪᠠ ᠭᠡᠨᠡ᠂ ᠠᠷᠤ ᠠ᠋ᠴᠠ ᠨᠢ ᠭᠦᠶᠦᠭᠡᠳ ᠠᠪᠴᠤ ᠡᠰᠡ ᠴᠢᠳᠠᠪᠠ᠃
ᠭᠡᠲᠡᠯᠡ ᠨᠢᠭᠡ ᠭᠥᠷᠥᠭᠡᠴᠢᠨ ᠠᠷᠤ ᠶ᠋ᠢᠨ ᠠᠭᠤᠯᠠ ᠶ᠋ᠢ ᠠᠷᠤᠯᠠᠨ ᠥᠪᠥᠷ ᠦ᠋ᠨ ᠠᠭᠤᠯᠠ ᠶ᠋ᠢ ᠥᠪᠥᠷᠯᠡᠨ ᠠᠩ ᠭᠥᠷᠥᠭᠡ ᠬᠥᠭᠡᠭᠡᠵᠦ ᠶᠠᠪᠤᠭᠠᠳ ᠠᠪᠠᠭᠠᠢ ᠶ᠋ᠢᠨ ᠬᠢ ᠨᠢ ᠨᠥᠬᠥᠭᠡ ᠵᠢᠷᠤᠭ ᠢ᠋ ᠣᠯᠤᠭᠠᠳ ᠠᠪᠴᠠᠢ᠂ ᠬᠠᠩᠭᠠᠢ ᠶ᠋ᠢᠨ ᠬᠡᠰᠢᠭ ᠢ᠋ᠶ᠋ᠡᠷ ᠪᠣᠯᠭᠠᠳᠠᠭ ᠬᠠᠷᠠᠴᠤ ᠨᠠᠳᠠ ᠳ᠋ᠤ᠌ ᠬᠠᠮᠢᠶᠠ ᠶᠠᠭᠤᠨ ᠭᠡᠳ ᠬᠡᠭᠡᠷᠡ ᠡᠴᠡ ᠣᠯᠤᠭᠰᠠᠨ ᠨᠥᠬᠥᠭᠡ ᠬᠡᠦᠬᠡᠨ ᠦ᠌ ᠵᠢᠷᠤᠭ ᠢ᠋ᠶ᠋ᠠᠨ ᠬᠠᠭᠠᠨ ᠳ᠋ᠤ᠌ ᠪᠠᠨ ᠠᠪᠠᠴᠢᠵᠤ ᠡᠷᠭᠦᠪᠡ᠃
ᠬᠠᠭᠠᠨ ᠵᠢᠷᠤᠭ ᠢ᠋ ᠬᠠᠷᠠᠵᠤ ᠬᠠᠷᠠᠵᠤ᠂
— ᠪᠢ ᠡᠨᠡ ᠬᠡᠦᠬᠡᠨ ᠢ᠋ ᠬᠠᠲᠤᠨ ᠢ᠋ᠶ᠋ᠠᠨ ᠪᠣᠯᠭᠠᠵᠤ ᠠᠪᠤᠨᠠ᠂ ᠬᠠᠮᠢᠭᠠ ᠪᠠᠢᠭᠠ ᠭᠠᠵᠠᠷ ᠠ᠋ᠴᠠ ᠨᠢ ᠣᠯᠵᠤ ᠮᠢᠨᠦ ᠦᠷᠭᠦᠭᠡᠨ ᠳ᠋ᠦ᠍ ᠠᠪᠴᠢᠷᠠᠲᠤᠭᠠᠢ᠂ ᠡᠰᠡ ᠠᠪᠴᠢᠷᠠᠪᠠᠰᠤ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠤᠨᠠ ᠭᠡᠵᠦ ᠭᠡᠨᠡ᠂ ᠠᠩᠴᠢᠨ ᠡᠷᠡ ᠴᠦ᠍ ᠠᠷᠭᠠ ᠦᠭᠡᠢ ᠶᠢᠨ ᠡᠷᠬᠡᠨ ᠳ᠋ᠦ᠍ ᠬᠠᠮᠰᠠᠭᠠ ᠨᠥᠬᠥᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠬᠡᠭᠡᠷᠡ ᠬᠣᠨᠣᠵᠤ ᠬᠡᠴᠡ ᠳᠡᠷᠡᠯᠡᠵᠦ ᠶᠠᠪᠤᠭᠰᠠᠭᠠᠷ ᠨᠥᠬᠥᠭᠡ ᠬᠡᠦᠬᠡᠨ ᠦ᠌ ᠭᠡᠷ ᠢ᠋ ᠣᠯᠤᠭᠠᠳ ᠣᠴᠢᠵᠠᠢ᠂ ᠭᠡᠷ ᠲᠤ ᠨᠢ ᠣᠷᠣᠲᠠᠯᠠ ᠨᠥᠬᠥᠷ ᠨᠢ ᠡᠵᠡᠭᠦᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠠᠭᠤᠵᠤ ᠪᠠᠢᠬᠤ ᠶᠤᠮ᠃
ᠠᠰᠢᠭᠦᠢ ᠭᠡᠳ ᠨᠥᠭᠥᠭᠡ ᠬᠡᠦᠬᠡᠨ ᠢ᠋ ᠠᠪᠤᠭᠠᠳ ᠣᠳᠴᠠᠢ᠃ ᠪᠠᠯᠠᠮᠠᠭᠳᠠᠵᠤ ᠰᠠᠨᠳᠤᠷᠤᠭᠰᠠᠨ ᠬᠡᠦᠬᠡᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠡᠷᠡᠬᠡᠢ ᠬᠤᠷᠤᠭᠤ ᠶ᠋ᠢ ᠬᠠᠭᠠᠯᠤᠨ ᠴᠢᠰᠤ ᠪᠠᠷ ᠢ᠋ᠶ᠋ᠠᠨ ᠨᠥᠬᠥᠷ ᠲᠤ ᠪᠡᠨ ᠵᠠᠬᠢᠶᠠ ᠪᠢᠴᠢᠵᠦ ᠣᠷᠬᠢᠪᠠ᠂ ᠨᠥᠬᠥᠷ ᠨᠢ ᠭᠡᠷ ᠲᠤ ᠪᠡᠨ ᠢᠷᠡᠲᠡᠯᠡ ᠣᠷᠣᠨ ᠭᠡᠷ ᠨᠢ ᠤᠨᠳᠤᠢ ᠰᠤᠨᠳᠤᠢ᠂ ᠡᠬᠡᠨᠡᠷ ᠨᠢ ᠡᠵᠡᠭᠦᠢ ᠪᠠᠢᠯᠠ᠂ ᠰᠢᠩᠬᠤᠨ ᠤᠯᠠᠭᠠᠨ ᠴᠢᠰᠤ ᠪᠠᠷ ᠢ᠋ᠶ᠋ᠠᠨ ᠰᠠᠨᠳᠤᠷᠤᠨ ᠲᠠᠲᠠᠯᠠᠭᠰᠠᠨ ᠵᠠᠬᠢᠶᠠ ᠶ᠋ᠢ ᠣᠯᠵᠤ ᠤᠩᠰᠢᠪᠠᠰᠤ
《ᠴᠢ ᠱᠠᠭᠠᠵᠠᠭᠠᠢ ᠠᠯᠠᠵᠤ ᠳᠡᠪᠡᠯ ᠬᠢᠵᠦ ᠡᠮᠦᠰᠦᠭᠡᠳ ᠠᠷᠤ ᠠ᠋ᠴᠠ ᠣᠴᠢᠭᠠᠷᠠᠢ》 ᠭᠡᠰᠡᠨ ᠪᠠᠢᠯᠠ᠃
ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠳᠠᠵᠤ ᠪᠡᠲᠡᠭᠢᠷᠡᠭᠰᠡᠨ ᠡᠷᠡ ᠠᠯᠠᠭ ᠪᠤᠯᠠᠭ ᠵᠢᠰᠦ ᠲᠡᠢ᠂ ᠠᠢᠯ ᠤ᠋ᠨ ᠭᠠᠳᠠᠭᠤᠷ ᠶᠠᠪᠤᠳᠠᠯ ᠲᠠᠢ ᠱᠠᠭᠠᠵᠠᠭᠠᠢ ᠪᠠᠬᠠᠨ ᠢ᠋ ᠠᠯᠠᠵᠤ ᠳᠡᠪᠡᠯ ᠬᠢᠵᠦ ᠡᠮᠦᠰᠦᠭᠡᠳ ᠠᠪᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠰᠡᠩᠳᠡ ᠮᠡᠩᠳᠡ ᠮᠣᠷᠳᠠᠵᠤ ᠭᠡᠨᠡ᠃
ᠶᠠᠪᠤᠭᠠᠳ ᠯᠠ ᠪᠠᠢᠵᠠᠢ᠂ ᠶᠠᠪᠤᠭᠠᠳ ᠯᠠ ᠪᠠᠢᠵᠠᠢ᠂ ᠲᠡᠭᠡᠵᠦ ᠲᠡᠭᠡᠵᠦ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠦ᠌ ᠡᠮᠦᠨᠡ ᠬᠦᠷᠴᠦ ᠢᠷᠡᠭᠡᠳ ᠤᠷᠳᠤᠭᠤᠷ ᠨᠢ ᠤᠷᠤᠭᠰᠢ ᠬᠣᠢᠰᠢ ᠠᠯᠬᠤᠵᠤ ᠭᠠᠷᠴᠤ ᠭᠡᠨᠡ᠃
ᠬᠠᠭᠠᠨ ᠤ᠋ ᠬᠠᠲᠤᠨ ᠪᠣᠯᠤᠭᠰᠠᠨ ᠡᠬᠡᠨᠡᠷ ᠨᠢ ᠪᠠᠷᠠ ᠶ᠋ᠢ ᠨᠢ ᠬᠠᠷᠠᠭᠠᠳ᠂ ᠠᠯᠠᠭ ᠡᠷᠢᠶᠡᠨ ᠳᠡᠪᠡᠯ ᠢ᠋ ᠨᠢ ᠦᠵᠡᠭᠡᠳ ᠮᠠᠩᠨᠠᠢ ᠲᠡᠨᠢᠢᠨ ᠪᠠᠶᠠᠷᠯᠠᠵᠤ ᠢᠨᠢᠶᠡᠵᠦ ᠬᠥᠭᠡᠷᠴᠦ ᠭᠠᠷᠴᠠᠢ᠂ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠢᠷᠡᠭᠰᠡᠨ ᠡᠴᠡ ᠪᠡᠨ ᠬᠣᠢᠰᠢ ᠦᠭᠡ ᠳᠤᠤᠭᠠᠷᠤᠭᠠ ᠦᠭᠡᠢ᠂ ᠢᠨᠢᠶᠡᠵᠦ ᠦᠵᠡᠭᠡ ᠦᠭᠡᠢ ᠬᠠᠲᠤᠨ ᠨᠢ ᠪᠡᠶᠡᠰᠴᠦ ᠬᠥᠭᠡᠷᠬᠦ ᠶ᠋ᠢ ᠬᠠᠷᠠᠭᠠᠳ ᠬᠠᠭᠠᠨ᠂
— ᠮᠠᠨ ᠤ᠋ ᠬᠠᠲᠤᠨ ᠪᠡᠶᠡᠰᠴᠦ ᠬᠥᠭᠡᠷᠳᠡᠭ ᠨᠢ ᠶᠠᠮᠠᠷ ᠪᠡᠯᠭᠡ ᠲᠠᠢ ᠶᠤᠮ ᠪᠣᠢ ᠭᠡᠳ ᠨᠥᠭᠥᠭᠡ ᠡᠷᠡ ᠶ᠋ᠢᠨ ᠱᠠᠭᠠᠵᠠᠭᠠᠢ ᠠᠯᠠᠭ ᠳᠡᠪᠡᠯ ᠢ᠋ ᠠᠪᠴᠤ ᠡᠮᠦᠰᠬᠦ ᠪᠡᠷ ᠪᠣᠯᠪᠠ᠃
ᠲᠡᠢᠨ ᠬᠦ᠌ ᠱᠠᠭᠠᠵᠠᠭᠠᠢ ᠠᠯᠠᠭ ᠳᠡᠪᠡᠯ ᠡᠮᠦᠰᠦᠭᠡᠳ ᠱᠠᠯ ᠥᠭᠡᠷᠡ ᠬᠥᠮᠦᠨ ᠰᠢᠭ ᠪᠣᠯᠤᠭᠰᠠᠨ ᠬᠠᠭᠠᠨᠲᠠᠨ ᠵᠠᠬᠠ ᠵᠡᠭᠡᠯᠢ ᠶ᠋ᠢᠨ ᠭᠠᠵᠠᠷ ᠢ᠋ᠶ᠋ᠠᠷ ᠡᠯᠳᠡᠪ ᠢ᠋ ᠰᠣᠨᠢᠷᠬᠠᠬᠣ ᠪᠠᠷ ᠣᠳᠴᠠᠢ᠃
ᠲᠡᠷᠡ ᠬᠣᠭᠣᠷᠣᠨᠳᠣ ᠨᠥᠬᠥᠭᠡ ᠬᠡᠦᠬᠡᠨ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠭᠠᠨ ᠤ᠋ ᠬᠤᠪᠴᠠᠰᠤ ᠪᠠᠷ ᠥᠪᠴᠢ ᠪᠦᠷᠢᠨ ᠬᠤᠪᠴᠠᠰᠤᠯᠠᠵᠤ ᠥᠷᠭᠡᠨ ᠰᠡᠩᠲᠡᠢ ᠳ᠋ᠦ᠍ ᠵᠠᠯᠠᠭᠠᠳ᠂ ᠠᠯᠪᠠᠲᠤ ᠨᠠᠷ ᠢ᠋ ᠨᠢ ᠳᠠᠭᠤᠳᠠᠭᠤᠯᠵᠤ᠂
— ᠱᠠᠭᠠᠵᠠᠭᠠᠢ ᠠᠯᠠᠭ ᠳᠡᠪᠡᠯ ᠲᠡᠢ ᠲᠡᠷᠡ ᠬᠥᠮᠦᠨ ᠢ᠋ ᠴᠠᠭᠠᠵᠠ ᠪᠠᠷ ᠠᠪᠬᠠᠭᠤᠯᠬᠤ ᠪᠠᠷ ᠮᠢᠩᠭᠠᠲᠤ ᠶ᠋ᠢᠨ ᠴᠡᠷᠢᠭ ᠦᠳᠲᠡᠷ ᠲᠦᠷᠭᠡᠨ ᠮᠣᠷᠳᠠᠭᠤᠯᠲᠤᠭᠠᠢ ᠭᠡᠮᠡᠨ ᠵᠠᠷᠯᠢᠭᠯᠠᠪᠠ᠃
ᠲᠡᠢᠨ ᠬᠦ᠌ ᠲᠡᠷᠡ ᠬᠡᠦᠬᠡᠨ ᠬᠠᠭᠠᠨ ᠢ᠋ ᠠᠯᠠᠭᠠᠳ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠭᠠᠳ ᠵᠢᠷᠠᠨ ᠵᠢᠯ ᠦ᠋ᠨ ᠵᠢᠷᠭᠠᠯ᠂ ᠨᠠᠶᠠᠨ ᠵᠢᠯ ᠦ᠋ᠨ ᠨᠠᠢᠷ ᠬᠢᠵᠦ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠭᠰᠠᠨ ᠭᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵᠢᠩᠯᠢᠬᠤᠸᠠᠷ
ᠬᠢᠨᠠᠭᠴᠢ᠄ ᠬᠡᠷᠡᠢᠳ ᠨᠠᠷᠠᠰᠤ᠂ ᠰᠣᠳᠣᠪᠢᠯᠢᠭ᠌ ᠂ ᠨᠠᠰᠤᠨ᠋ᠦ᠌ᠯᠵᠡᠢ
ᠦᠰᠦᠭ ᠬᠠᠲᠠᠭᠴᠢ᠄ ᠮᠣᠳᠣᠲᠤ ᠬᠠᠪᠤᠷᠵᠢᠶᠠ