ᠡᠪᠦᠭᠡᠨ ᠲᠠᠭᠲᠠᠭᠠ ᠪᠠ ᠦᠷᠴᠢᠬᠡᠷ ᠡᠮᠡᠭᠡᠨ -ᠶᠦᠩᠰᠢᠶᠠᠪᠦ ᠂ ᠲᠣᠨᠣᠯᠵᠢᠩᠭᠣᠸᠠ Өвгөн тагтаа ба үрчгэр эмгэн-Юншаав,Тонолжингоо
1142ᠡᠪᠦᠭᠡᠨ ᠲᠠᠭᠲᠠᠭᠠ ᠪᠠ ᠦᠷᠴᠢᠬᠡᠷ ᠡᠮᠡᠭᠡᠨ
ᠵᠣᠬᠢᠶᠠᠭᠴᠢ᠄ ᠶᠦᠩᠰᠢᠶᠠᠪᠦ ᠂ ᠲᠣᠨᠣᠯᠵᠢᠩᠭᠣᠸᠠ
ᠤᠶᠠᠩᠭᠠᠯᠠᠭᠴᠢ᠄ ᠶᠦᠩᠰᠢᠶᠠᠪᠦ ᠂ ᠲᠣᠨᠣᠯᠵᠢᠩᠭᠣᠸᠠ
ᠬᠠᠭᠳᠠ ᠴᠤᠬᠤᠢᠬᠤ ᠠ᠋ᠴᠠ ᠡᠮᠦᠨᠡᠬᠢ ᠬᠠᠪᠤᠷ ᠤ᠋ᠨ ᠨᠢᠭᠡᠨ ᠥᠷᠯᠥᠭᠡ ᠡᠪᠦᠭᠡᠨ ᠲᠠᠭᠲᠠᠭᠠ ᠦᠷᠴᠢᠬᠡᠷ ᠡᠮᠡᠭᠡᠨ ᠬᠣᠶᠠᠷ ᠲᠠᠨᠢᠯᠴᠠᠵᠤ ᠪᠢᠯᠡ᠃
ᠡᠪᠦᠭᠡᠨ ᠲᠠᠭᠲᠠᠭᠠ ᠥᠷᠥᠭᠡᠨ ᠦ᠌ ᠬᠢᠨᠢ ᠴᠣᠩᠬᠣ ᠪᠠᠷ ᠱᠠᠭᠠᠢᠭᠠᠳ᠄《 ᠦᠷᠴᠢᠬᠡᠷ ᠡᠮᠡᠭᠡᠨ ᠠ᠋᠂ ᠡᠪᠦᠭᠡᠨ᠂ ᠦᠷᠡ ᠬᠡᠦᠬᠡᠳ ᠲᠡᠢ ᠪᠡᠨ ᠴᠣᠭ ᠬᠥᠭᠡᠷᠦᠯᠳᠦᠵᠦ ᠰᠠᠭᠤᠬᠤ ᠦᠭᠡᠢ᠂ ᠦᠷ ᠢ᠋ᠶ᠋ᠡᠷ ᠭᠠᠭᠴᠠᠭᠠᠷ ᠥᠴᠥᠭᠡᠨᠡᠬᠦ ᠴᠢᠨᠢ ᠶᠠᠭᠤᠨ ᠪᠢᠯᠡ》 ᠭᠡᠬᠦ ᠶᠦᠮ᠃
ᠡᠪᠦᠭᠡᠨ ᠲᠠᠭᠲᠠᠭᠠ ᠴᠢ ᠥᠨᠳᠡᠭᠡ ᠲᠥᠷᠥᠵᠦ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠᠳ ᠬᠣᠩᠭᠣᠷ ᠠᠯᠠᠭ ᠬᠣᠶᠠᠷ ᠦᠷᠡ ᠲᠥᠷᠥᠭᠰᠡᠨ ᠨᠠᠳᠠ ᠶ᠋ᠢ ᠬᠣᠱᠣᠩᠨᠠᠬᠤ ᠴᠢᠨᠢ ᠶᠠᠭᠤᠨ ᠪᠢᠯᠡ ᠭᠡᠵᠦ ᠦᠷᠴᠢᠬᠡᠷ ᠡᠮᠡᠭᠡᠨ ᠤᠴᠠᠭᠠᠷᠳᠠᠩᠭᠤᠢ ᠶᠠᠷᠢᠨᠠ᠃
ᠡᠪᠦᠭᠡᠨ ᠲᠠᠭᠲᠠᠭᠠ ᠰᠥᠭᠡᠩᠭᠢ ᠨᠠᠮ ᠳᠠᠭᠤ ᠪᠠᠷ ᠡᠮᠡᠭᠡᠨ ᠤᠷᠤᠭᠤ᠄《 ᠶᠢᠷᠲᠢᠨᠴᠦ ᠳ᠋ᠦ᠍ ᠬᠥᠮᠦᠨ ᠥᠪᠡᠷ ᠢ᠋ᠶ᠋ᠡᠨ ᠮᠥᠩᠬᠡᠷᠡᠳᠡᠭ ᠦᠭᠡᠢ᠂ ᠦᠷᠡ ᠪᠡᠨ ᠦᠯᠡᠳᠡᠭᠡᠵᠦ ᠮᠥᠩᠬᠡᠷᠡᠳᠡᠭ ᠵᠢᠮᠡ ᠲᠡᠢ ᠬᠣᠢᠨᠠ᠂ ᠴᠢ ᠪᠢᠳᠡ ᠬᠣᠶᠠᠷ ᠥᠷᠥᠭᠡᠰᠦᠨ ᠪᠤᠷᠤᠭᠤ ᠬᠣᠶᠠᠷ ᠦᠭᠡ ᠪᠡᠷ ᠵᠥᠷᠢᠯᠳᠦᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌᠂ ᠥᠪᠡᠷ ᠥᠪᠡᠷ ᠦ᠋ᠨ ᠥᠩᠭᠡ ᠪᠡᠷ ᠢ᠋ᠶ᠋ᠡᠨ ᠢᠯᠭᠠᠷᠠᠵᠤ ᠠᠮᠢᠳᠤᠷᠠᠳᠠᠭ ᠢ᠋ᠶ᠋ᠠᠨ ᠲᠣᠭᠠᠴᠢᠬᠤ ᠪᠢᠰᠢᠦ》 ᠭᠡᠬᠦ ᠶᠦᠮ
ᠡᠨᠡ ᠬᠠᠷᠢᠨ ᠴᠢᠬᠢᠨ ᠳ᠋ᠦ᠍ ᠳᠤᠯᠠᠭᠠᠬᠠᠨ ᠰᠢᠭ᠋ ᠬᠣᠶᠠᠷ ᠦᠭᠡ ᠰᠣᠨᠣᠰᠳᠠᠬᠤ ᠰᠢᠭ᠋ ᠪᠣᠯᠤᠯᠠ ᠭᠡᠵᠦ ᠦᠷᠴᠢᠬᠡᠷ ᠡᠮᠡᠭᠡᠨ ᠠᠮᠠᠨ ᠳ᠋ᠠᠭᠠᠨ ᠳᠦᠳᠦᠨᠡᠨᠡ᠃
ᠡᠪᠦᠭᠡᠨ ᠲᠠᠭᠲᠠᠭᠠ᠄《 ᠡᠪᠦᠭᠡᠨ ᠮᠢᠨᠦ ᠡᠷᠡ ᠶ᠋ᠢᠨ ᠭᠠᠭᠴᠠᠬᠠᠨ ᠬᠠᠷᠢᠭᠤᠴᠠᠯᠭᠠ ᠪᠣᠯ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠵᠢ ᠶ᠋ᠢ ᠰᠠᠨᠠᠭᠠ ᠶ᠋ᠢ ᠨᠢ ᠠᠮᠠᠷᠠᠭᠠᠵᠤ ᠬᠠᠨᠢ ᠲᠠᠢ ᠪᠠᠨ ᠬᠠᠮᠵᠢᠯᠴᠠᠵᠤ᠂ ᠥᠨᠳᠡᠭᠡ ᠵᠤᠯᠵᠠᠭᠠ ᠪᠠᠨ ᠥᠰᠬᠡᠵᠦ ᠪᠣᠢᠵᠢᠭᠤᠯᠬᠤ ᠬᠡᠷᠡᠭ ᠪᠠᠢᠳᠠᠭ ᠪᠣᠯᠬᠣᠷ ᠭᠠᠴᠢᠭ ᠬᠠᠭᠰᠠᠷᠠᠭᠠᠨ ᠲᠠᠢ᠂ ᠡᠨᠡ ᠴᠠᠭ ᠳᠤ ᠭᠠᠳᠠᠨᠠ ᠠ᠋ᠴᠠ ᠴᠢᠨᠢ ᠡᠮᠬᠦ ᠬᠣᠭᠣᠯᠠ ᠣᠯᠵᠤ᠂ ᠥᠨᠳᠡᠭᠡ ᠳᠠᠷᠤᠭᠰᠠᠨ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠵᠢ ᠶ᠋ᠢ ᠨᠢ ᠲᠡᠵᠢᠭᠡᠶᠡ ᠭᠡᠵᠦ ᠡᠭᠦᠳᠡ ᠪᠡᠷ ᠴᠢᠨᠢ ᠡᠳᠦᠷᠵᠢᠨ ᠡᠷᠭᠢᠴᠡᠵᠦ ᠪᠠᠢᠭᠠ ᠨᠢ ᠡᠨᠡ ᠪᠢᠰᠢᠦ》 ᠭᠡᠬᠦ ᠶᠦᠮ᠃
ᠦᠷᠴᠢᠬᠡᠷ ᠡᠮᠡᠭᠡᠨ ᠬᠠᠨᠢ ᠳ᠋ᠠᠭᠠᠨ ᠬᠠᠶᠠᠭᠳᠠᠭᠠᠳ᠂ ᠬᠠᠢᠷᠠᠲᠠᠢ ᠬᠣᠶᠠᠷ ᠦᠷᠡ ᠶ᠋ᠢ ᠪᠡᠨ ᠰᠠᠬᠢᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠭᠠᠭᠴᠠᠬᠠᠨ ᠠᠶᠠᠭᠠ ᠲᠦᠭᠦᠬᠡᠢ ᠭᠤᠯᠢᠷ᠂ ᠬᠠᠭᠠᠰ ᠠᠯᠠᠭᠠᠨ ᠴᠢᠨᠡᠭᠡᠬᠡᠨ ᠬᠠᠢᠯᠭᠠᠭᠰᠠᠨ ᠢᠮᠠᠭᠠᠨ ᠥᠭᠡᠬᠦ ᠲᠡᠢ ᠬᠣᠴᠣᠷᠴᠤ ᠥᠷᠯᠥᠭᠡ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠰᠢᠢᠳᠪᠦᠷᠢᠯᠡᠴᠢᠬᠡᠭᠡᠳ ᠂ᠦᠳᠡ᠂ ᠣᠷᠣᠢ ᠬᠣᠭᠣᠯᠠ ᠦᠭᠡᠢ ᠬᠣᠭᠣᠰᠣᠨ ᠬᠣᠨᠣᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ᠂ ᠬᠠᠮᠠᠷ ᠢ᠋ᠶ᠋ᠠᠨ ᠲᠠᠲᠠᠵᠤ᠂ ᠳᠠᠭᠤ ᠦᠭᠡᠢ ᠰᠠᠭᠤᠵᠤ᠂ ᠥᠨᠳᠡᠭᠡ ᠡᠴᠡ ᠨᠡᠪᠴᠢᠳᠡᠭ ᠥᠴᠦᠬᠡᠨ ᠲᠠᠭᠲᠠᠭᠠ ᠬᠦᠷᠲᠡᠯᠡ ᠡᠴᠢᠭᠡ ᠶ᠋ᠢᠨ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠡᠢᠨᠬᠦ ᠡᠷᠡᠰ ᠢ᠋ᠶ᠋ᠡᠷ ᠮᠥᠷᠦᠨ ᠳ᠋ᠡᠭᠡᠨ ᠡᠭᠦᠷᠭᠡᠯᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ᠂ ᠡᠷᠬᠡ ᠦᠭᠡᠢ ᠢᠲᠡᠭᠡᠵᠦ ᠪᠢᠰᠢᠷᠡᠭᠰᠡᠨ ᠬᠠᠷᠠᠴᠠ ᠪᠠᠷ ᠡᠪᠦᠭᠡᠨ ᠲᠠᠭᠲᠠᠭᠠ ᠶ᠋ᠢ ᠠᠰ ᠡᠮᠦᠨᠡ ᠡᠴᠡ ᠨᠢ ᠴᠣᠭᠣᠷᠠᠲᠠᠯᠠ ᠪᠠᠨ ᠰᠢᠷᠲᠡᠯᠡ᠃
ᠲᠡᠷᠡ ᠲᠠᠭᠲᠠᠭᠠ ᠲᠡᠢᠮᠦ ᠯᠡ ᠰᠦᠷᠯᠢᠭ᠂ ᠲᠡᠢᠮᠦ ᠯᠡ ᠠᠭᠤᠤ᠂ ᠲᠡᠢᠮᠦ ᠯᠡ ᠬᠠᠩᠬᠠᠭᠠᠷ᠂ ᠲᠡᠢᠮᠦ ᠯᠡ ᠲᠦᠰᠢᠭ ᠲᠡᠢ ᠬᠠᠷᠠᠭᠳᠠᠨᠠ᠃
ᠦᠷᠴᠢᠬᠡᠷ ᠡᠮᠡᠭᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠵᠤ᠂ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠲᠣᠯᠣᠭᠠᠢ ᠶ᠋ᠢᠨ ᠦᠰᠦ ᠨᠢ ᠴᠡᠯ ᠪᠤᠭᠤᠷᠤᠯ ᠪᠣᠯᠵᠤ᠂ ᠢᠳᠡᠬᠦ ᠬᠣᠭᠣᠯᠠ ᠦᠭᠡᠢ᠂ ᠤᠨᠲᠠᠬᠤ ᠨᠣᠢᠷ ᠦᠭᠡᠢ ᠡᠮᠰᠡᠢᠵᠦ ᠬᠠᠮᠰᠠᠭᠠᠳ᠂ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠭᠠᠯ ᠤ᠋ᠨ ᠣᠪᠣᠭᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠴᠦ ᠶᠣᠢᠯᠠᠵᠤ ᠬᠡᠪᠲᠡᠳᠡᠭ ᠪᠠᠢᠯᠠ᠃
ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠡᠵᠢ ᠨᠢ ᠬᠠᠵᠠᠭᠤ ᠳ᠋ᠤ᠌ ᠨᠢ ᠬᠦᠷᠦᠭᠡᠳ᠄《 ᠬᠡᠦᠬᠡᠨ ᠮᠢᠨᠢ ᠠ᠋· ᠴᠢ ᠬᠡᠨ ᠳ᠋ᠦ᠍ ᠬᠡᠷᠡᠭ ᠦᠭᠡᠢ ᠴᠣ ᠬᠣᠶᠠᠷ ᠬᠡᠦᠬᠡᠳ ᠪᠢᠳᠡ ᠭᠤᠷᠪᠠ ᠳ᠋ᠤ᠌ ᠬᠡᠷᠡᠭᠲᠡᠢ ᠰᠢᠦ᠂ ᠲᠡᠭᠡᠬᠦ ᠪᠡᠷ ᠴᠢ ᠵᠠᠪᠠᠯ ᠵᠣᠷᠢᠭᠯᠠᠵᠤ᠂ ᠡᠳᠡᠭᠡᠷᠡᠵᠦ ᠪᠣᠰᠴᠤ ᠵᠣᠭᠰᠣᠬᠤ ᠬᠡᠷᠡᠭᠲᠡᠢ ᠰᠢᠦ》 ᠭᠡᠳ ᠡᠩᠭᠡᠷ ᠢ᠋ᠶ᠋ᠡᠨ ᠳᠡᠪᠲᠦᠲᠡᠯᠡ ᠤᠬᠢᠯᠠᠵᠤ ᠵᠣᠭᠰᠣᠨᠠ᠃
ᠦᠷᠴᠢᠬᠡᠷ ᠡᠮᠡᠭᠡᠨ ᠦ᠌᠄《 ᠪᠢ ᠨᠢᠭᠡ ᠬᠠᠨᠲᠠᠯᠠ ᠪᠠᠨ ᠤᠨᠲᠠᠬᠤ ᠶᠤᠮᠰᠠᠨ᠂ ᠴᠠᠳᠲᠠᠯᠠ ᠪᠠᠨ ᠢᠳᠡᠬᠦ ᠶᠤᠮᠰᠠᠨ》 ᠭᠡᠵᠦ ᠪᠠᠢᠨ ᠳᠠᠬᠢᠨ ᠳᠦᠳᠦᠨᠡᠬᠦ ᠶ᠋ᠢ ᠬᠠᠷᠠᠭᠰᠠᠨ ᠡᠪᠦᠭᠡᠨ ᠲᠠᠭᠲᠠᠭᠠ ᠲᠦᠷᠭᠡᠨ ᠭᠡᠭᠴᠢ ᠦᠷᠴᠢᠬᠡᠷ ᠡᠮᠡᠭᠡᠨ ᠦ᠌ ᠡᠮᠦᠨᠡ ᠨᠢ ᠨᠢᠰᠴᠦ ᠬᠦᠷᠦᠭᠡᠳ᠄《 ᠲᠤᠭ ᠭᠡᠪᠡᠯ ᠨᠣᠢᠷ᠂ ᠳᠤᠨᠳᠠᠭᠤᠷ ᠢᠳᠡᠪᠡᠯ ᠬᠣᠭᠣᠯᠠ᠂ ᠬᠠᠨᠠᠨ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠬᠠᠳᠠᠨ ᠭᠡᠷ ᠲᠡᠭᠡᠨ ᠬᠠᠷᠠᠴᠢᠬᠠᠪᠠᠯ᠂ ᠴᠢ ᠳᠠᠬᠢᠨ ᠰᠡᠷᠢᠬᠦ ᠦᠭᠡᠢ ᠤᠨᠲᠠᠬᠤ ᠯᠠ ᠬᠡᠷᠡᠭ ᠳᠡ᠂ ᠪᠠᠰᠠ ᠶᠠᠭᠤᠨ ᠤ᠋ ᠬᠢᠨᠢ ᠶᠠᠭᠠᠷᠠᠴᠢᠬᠠᠭᠰᠠᠨ ᠪᠣᠢ》 ᠭᠡᠵᠦ ᠵᠠᠩᠳᠤᠷᠤᠩᠭᠤᠢ ᠥᠨᠳᠥᠷ ᠳᠠᠭᠤ ᠪᠠᠷ ᠶᠠᠷᠢᠵᠤ ᠭᠠᠷᠤᠯᠠ᠃
ᠦᠷᠴᠢᠬᠡᠷ ᠡᠮᠡᠭᠡᠨ ᠭᠤᠲᠤᠷᠠᠵᠤ ᠭᠤᠨᠢᠭᠰᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠡᠪᠦᠭᠡᠨ ᠲᠠᠭᠲᠠᠭᠠ ᠳ᠋ᠤ᠌᠄《 ᠪᠢ ᠭᠡᠵᠦ ᠱᠠᠯ ᠲᠤᠰᠠ ᠦᠭᠡᠢ ᠠᠮᠢᠲᠠᠨ ᠶᠤᠮ᠂ ᠬᠠᠨᠢ ᠳ᠋ᠠᠭᠠᠨ ᠬᠠᠶᠠᠭᠳᠠᠭᠠᠳ᠂ ᠬᠠᠮᠤᠭ ᠲᠠᠷ ᠢ᠋ᠶ᠋ᠠᠨ ᠪᠠᠷᠠᠭᠠᠳ᠂ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠪᠤ ᠳ᠋ᠤ᠌ ᠭᠣᠯᠣᠭᠳᠠᠴᠢᠬᠠᠭᠠᠳ᠂ ᠥᠩᠭᠡ ᠵᠢᠰᠦ ᠪᠠᠭᠤᠷᠠᠭᠠᠳ᠂ ᠬᠠᠲᠤᠨ ᠭᠣᠣᠯ ᠣᠢᠷᠠ ᠪᠣᠯ ᠬᠠᠷᠠᠢᠵᠤ ᠦᠬᠦᠮᠡᠷ᠂ ᠭᠠᠵᠠᠷ ᠠᠩ ᠭᠠᠷᠪᠠᠯ ᠣᠷᠣᠭᠠᠳ ᠳᠠᠭᠤᠰᠴᠢᠬᠠᠮᠠᠷ》 ᠭᠡᠬᠦ ᠳ᠋ᠦ᠍᠂ ᠡᠪᠦᠭᠡᠨ ᠲᠠᠭᠲᠠᠭᠠ ᠲᠠᠢᠪᠤᠭᠤᠬᠠᠨ ᠢ᠋ᠶ᠋ᠠᠷ ᠡᠮᠡᠭᠡᠨ ᠦ᠌ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠡᠷᠭᠢᠯᠳᠦᠵᠦ ᠡᠷᠭᠢᠯᠳᠦᠴᠢᠬᠡᠭᠡᠳ᠄《 ᠴᠢ ᠰᠢᠭ ᠲᠡᠩᠬᠡ ᠪᠡᠨ ᠪᠠᠷᠠᠭᠰᠠᠨ ᠡᠮᠡᠭᠡᠨ ᠳ᠋ᠦ᠍ ᠬᠠᠲᠤᠨ ᠭᠣᠣᠯ ᠬᠠᠨᠵᠤᠨ ᠳᠡᠭᠡᠷᠡ ᠴᠢᠨᠢ ᠤᠷᠤᠰᠴᠤ ᠢᠷᠡᠬᠦ ᠦᠭᠡᠢ ᠪᠣᠯ ᠪᠡᠶᠡᠯᠡᠭᠳᠡᠵᠦ ᠳᠡᠢᠯᠦᠰᠢ ᠦᠭᠡᠢ ᠵᠡᠭᠦᠳᠦ ᠪᠠᠢᠨᠠ ᠰᠢᠦ ᠳᠡ᠂ ᠥᠪᠡᠷ ᠢ᠋ ᠪᠡᠨ ᠪᠢᠲᠡᠭᠡᠢ ᠮᠠᠭᠤᠯᠠ᠂ ᠥᠭᠡᠷᠡ ᠪᠤᠰᠤᠳ ᠬᠥᠮᠦᠨ ᠴᠢᠮᠠ ᠶ᠋ᠢ ᠰᠠᠨᠠᠭᠠ ᠶ᠋ᠢ ᠴᠢᠨᠢ ᠬᠠᠩᠭᠠᠲᠠᠯᠠ ᠮᠠᠭᠤᠯᠠᠬᠤ ᠶᠤᠮ ᠰᠢᠦ》 ᠭᠡᠵᠦ ᠰᠡᠷᠡᠩ ᠬᠠᠩᠭᠠᠢ ᠶᠠᠷᠢᠬᠤ ᠶᠤᠮ
ᠵᠢᠷᠦᠬᠡ ᠶ᠋ᠢ ᠪᠠᠵᠠᠭᠰᠠᠨ ᠡᠨᠡ ᠦᠭᠡᠨ ᠳ᠋ᠦ᠍ ᠦᠷᠴᠢᠬᠡᠷ ᠡᠮᠡᠭᠡᠨ ᠰᠡᠬᠡᠭᠡᠷᠡᠨ ᠰᠡᠷᠡᠵᠦ᠂ ᠡᠪᠦᠭᠡᠨ ᠲᠠᠭᠲᠠᠭᠠ ᠵᠦᠭ ᠬᠠᠷᠠᠭᠠᠳ᠄《 ᠲᠡᠭᠡᠪᠡᠯ ᠪᠢ ᠴᠣᠬᠣᠮ ᠶᠠᠭᠠᠬᠢᠪᠠᠯ ᠵᠣᠬᠢᠬᠤ ᠪᠣᠢ?》 ᠭᠡᠬᠦ ᠳ᠋ᠦ᠍᠂ ᠡᠪᠦᠭᠡᠨ ᠲᠠᠭᠲᠠᠭᠠ ᠡᠷᠡᠰ ᠰᠢᠭᠤᠷᠬᠠᠢ ᠪᠠᠷ᠄《 ᠢᠰᠢᠭᠡ ᠢᠬᠡᠷᠡᠯᠡᠬᠦ ᠳ᠋ᠦ᠍ ᠡᠪᠡᠰᠦ ᠢᠯᠡᠭᠦᠦ ᠨᠢᠭᠡ ᠨᠠᠪᠴᠢ ᠤᠷᠭᠤᠳᠠᠭ ᠶᠤᠮ᠃ ᠡᠢᠮᠦ ᠴᠤᠪᠤᠭᠠ ᠬᠣᠶᠠᠷ ᠦᠷᠡ ᠴᠢᠨᠢ ᠶᠢᠷᠲᠢᠨᠴᠦ ᠳ᠋ᠦ᠍ ᠢᠷᠡᠬᠦ ᠳ᠋ᠡᠭᠡᠨ ᠠᠮᠢ ᠠᠮᠢᠨ ᠤ᠋ ᠪᠠᠨ ᠠᠮᠠᠨ ᠬᠡᠰᠡᠭ ᠢ᠋ᠶ᠋ᠡᠨ ᠠᠪᠴᠤ ᠲᠥᠷᠥᠭᠰᠡᠨ ᠳᠡ᠂ ᠠᠢᠪᠤᠭᠤ ᠲᠠᠢᠪᠤᠭᠤ ᠪᠠᠷ ᠥᠪᠡᠷ ᠦ᠋ᠨ ᠴᠢᠳᠠᠳᠠᠭ ᠦᠢᠯᠡ ᠪᠡᠨ ᠬᠢᠵᠦ᠂ ᠦᠢᠯᠡᠷ ᠢ᠋ᠶ᠋ᠡᠨ ᠪᠠᠷᠠᠭᠠᠪᠠᠯ᠂ ᠭᠠᠷ ᠢ᠋ᠶ᠋ᠠᠨ ᠬᠥᠳᠡᠯᠭᠡᠵᠦ ᠭᠠᠢ ᠪᠠᠨ ᠳᠠᠭᠤᠰᠬᠠᠪᠠᠯ ᠡᠷᠡ ᠥᠰᠴᠦ᠂ ᠢᠰᠡᠭᠡᠢ ᠰᠤᠨᠵᠤ᠂ ᠲᠥᠷᠥ ᠰᠠᠬᠢᠬᠤ ᠬᠦᠦ ᠲᠡᠢ᠂ ᠲᠥᠷᠥᠯ ᠲᠠᠲᠠᠬᠤ ᠥᠬᠢᠨ ᠲᠡᠢ᠂ ᠭᠣᠯᠣᠮᠲᠠ ᠰᠠᠬᠢᠬᠤ ᠬᠦᠦ ᠲᠡᠢ᠂ ᠭᠠᠯ ᠮᠠᠨᠠᠬᠤ ᠥᠬᠢᠨ ᠲᠡᠢ᠂ ᠴᠢ ᠴᠢᠨᠢ ᠬᠣᠷᠸᠠ ᠶ᠋ᠢᠨ ᠬᠠᠮᠤᠭ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠨᠡ ᠰᠢᠦ ᠳᠡ》 ᠭᠡᠳ ᠬᠠᠨᠤᠮᠵᠢᠲᠠᠢᠬᠠᠨ ᠢᠨᠢᠶᠡᠯᠡ᠃
ᠦᠷᠴᠢᠬᠡᠷ ᠡᠮᠡᠭᠡᠨ ᠣᠷᠣᠢ ᠶ᠋ᠢᠨ ᠦᠰᠦ ᠨᠢ ᠣᠪᠣᠯᠵᠠᠨ ᠱᠦᠷᠦᠭᠦᠰᠴᠦ ᠪᠣᠰᠤᠯᠠ᠂ ᠤᠯᠠᠭᠠᠨ ᠠᠯᠠᠭ ᠵᠢᠷᠦᠬᠡ ᠨᠢ ᠠᠭᠤᠵᠢᠭᠤ ᠲᠠᠢᠪᠤᠭᠤᠬᠠᠨ ᠴᠣᠬᠢᠯᠬᠤ ᠪᠣᠯᠤᠯᠠ᠃ ᠤᠰᠬᠠᠯ ᠬᠣᠶᠠᠷ ᠨᠢᠳᠦ ᠡᠴᠡ ᠨᠢ ᠣᠴᠢ ᠶ᠋ᠢᠨ ᠭᠠᠯ ᠳᠦᠷᠡᠯᠵᠡᠯᠡ᠃
ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠦᠷᠴᠢᠬᠡᠷ ᠡᠮᠡᠭᠡᠨ ᠡᠷᠡ ᠪᠣᠰᠤᠭᠠ ᠡᠮᠡ ᠬᠥᠮᠦᠨ ᠪᠣᠯᠤᠯᠠ᠂ ᠡᠷᠡᠯᠬᠡᠭ ᠳᠠᠢᠴᠢᠨ ᠠᠮᠢᠳᠤᠷᠠᠯ ᠤ᠋ᠨ ᠴᠣᠭᠴᠠᠯᠠᠭᠴᠢ ᠪᠣᠯᠤᠯᠠ᠃《 ᠪᠢ ᠬᠡᠨ ᠪᠣᠢ》 ᠭᠡᠳᠡᠭ ᠢ᠋ᠶ᠋ᠡᠨ ᠵᠢᠩᠬᠢᠨᠢ ᠤᠬᠠᠭᠠᠷᠠᠵᠤ᠂ ᠶᠢᠷᠲᠢᠨᠴᠦ ᠳ᠋ᠦ᠍ ᠨᠡᠷᠡ ᠪᠡᠨ ᠳᠠᠭᠤᠷᠢᠰᠤᠭᠤᠯᠵᠤ᠂ ᠮᠥᠷ ᠢ᠋ᠶ᠋ᠡᠨ ᠲᠠᠮᠠᠭᠠᠯᠠᠵᠤ ᠶᠠᠪᠤᠯᠠ᠃
ᠪᠢ ᠬᠡᠨ ᠪᠣᠢ
ᠲᠡᠮᠳᠡᠭ ᠢ᠋ᠶ᠋ᠡᠨ ᠳᠡᠯᠭᠡᠪᠡᠯ ᠣᠶᠤᠲᠠᠨ
ᠲᠡᠷᠭᠡ ᠪᠡᠨ ᠲᠦᠯᠬᠢᠪᠡᠯ ᠠᠵᠢᠯᠴᠢᠨ
ᠠᠶᠠᠭᠠ ᠪᠠᠨ ᠤᠬᠢᠶᠠᠪᠠᠯ ᠦᠢᠯᠡᠴᠢᠯᠡᠭᠴᠢ
ᠠᠯᠤᠬᠠ ᠪᠠᠨ ᠪᠠᠷᠢᠪᠠᠯ ᠳᠠᠷᠬᠠᠨ
ᠪᠢᠷ ᠢ᠋ᠶ᠋ᠡᠨ ᠪᠠᠷᠢᠪᠠᠯ ᠪᠠᠭᠰᠢ
ᠪᠦᠯᠢᠭᠦᠷ ᠢ᠋ᠶ᠋ᠡᠨ ᠪᠠᠷᠢᠪᠠᠯ ᠰᠠᠭᠠᠯᠢᠴᠢᠨ
ᠬᠠᠢᠴᠢ ᠪᠠᠨ ᠪᠠᠷᠢᠪᠠᠯ ᠣᠶᠣᠳᠠᠯᠴᠢᠨ
ᠬᠠᠳᠤᠭᠤᠷ ᠢ᠋ᠶ᠋ᠠᠨ ᠪᠠᠷᠢᠪᠠᠯ ᠲᠠᠷᠢᠶᠠᠴᠢᠨ
ᠬᠣᠭᠣᠯᠠᠢ ᠪᠠᠨ ᠭᠠᠷᠭᠠᠪᠠᠯ ᠳᠠᠭᠤᠴᠢᠨ
ᠬᠣᠷᠭᠣᠯ ᠢ᠋ᠶ᠋ᠠᠨ ᠱᠦᠭᠦᠷᠳᠡᠪᠡᠯ ᠮᠠᠯᠴᠢᠨ
ᠬᠤᠷᠤᠳ ᠢ᠋ᠶ᠋ᠠᠨ ᠵᠠᠰᠠᠪᠠᠯ ᠠᠷᠠᠯᠵᠢᠶᠠᠴᠢᠨ
ᠬᠣᠭᠣᠯᠠᠨ ᠭᠡᠷ ᠦ᠋ᠨ ᠡᠷᠬᠢᠯᠡᠭᠴᠢ
ᠬᠦᠷᠵᠡ ᠪᠡᠨ ᠮᠥᠷᠥᠯᠡᠪᠡᠯ ᠬᠥᠳᠡᠯᠮᠦᠷᠢᠴᠢᠨ
ᠬᠦᠨᠳᠦᠲᠦ ᠪᠤᠭᠤᠷᠤᠯ ᠤ᠋ᠨ ᠢ᠋ᠶ᠋ᠠᠨ ᠥᠬᠢᠨ
ᠬᠥᠭᠡᠷᠦᠬᠦᠨ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠡᠵᠢ
ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠤ᠋ᠨ ᠢᠨᠵᠧᠨᠧᠷᠢᠩ
ᠲᠣᠰᠣᠨ ᠵᠢᠷᠦᠬᠡ ᠶ᠋ᠢᠨ ᠡᠵᠡᠨᠲᠡᠨ
ᠳᠤᠯᠠᠭᠠᠨ ᠠᠮᠢᠳᠤᠷᠠᠯ ᠤ᠋ᠨ ᠴᠣᠭᠴᠠᠯᠠᠭᠴᠢ
ᠲᠣᠯᠪᠣᠲᠤ ᠮᠣᠩᠭᠣᠯ ᠤ᠋ᠨ ᠬᠣᠢᠴᠢᠰ
ᠳᠤᠷᠠᠢᠭᠰᠠᠨ ᠮᠥᠷ ᠲᠡᠢ ᠡᠮᠡᠭᠲᠡᠢ
ᠠᠰᠢᠳᠠ ᠦᠢᠯᠡᠳᠪᠦᠷᠢ ᠶ᠋ᠢᠨ ᠡᠵᠡᠭᠲᠡᠢ
ᠠᠯᠠᠭ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠲᠦᠰᠢᠭ
ᠬᠥᠷ ᠢᠨᠢᠶᠡᠳᠦ ᠴᠠᠯᠭᠢᠮᠠ ᠠᠮᠢᠳᠤᠷᠠᠳᠠᠭ
ᠬᠥᠬᠡ ᠲᠣᠯᠪᠣᠲᠤ ᠮᠣᠩᠭᠣᠯ ᠪᠠᠭᠰᠢ ᠠ᠋
ᠦᠷᠴᠢᠬᠡᠷ ᠡᠮᠡᠭᠡᠨ ᠡᠷᠬᠢᠯᠡᠭᠰᠡᠨ ᠦᠢᠯᠡᠳᠪᠦᠷᠢ᠂ ᠳᠡᠯᠭᠡᠭᠦᠷ ᠪᠦᠬᠦᠨ ᠦ᠌ ᠪᠡᠨ ᠡᠭᠦᠳᠡᠨ ᠳ᠋ᠦ᠍ ᠡᠪᠦᠭᠡᠨ ᠲᠠᠭᠲᠠᠭᠠ ᠳ᠋ᠤ᠌ ᠬᠣᠭᠣᠯᠠ ᠪᠡᠯᠡᠳᠬᠡᠳᠡᠭ ᠪᠣᠯᠤᠯᠠ᠂ ᠡᠪᠦᠭᠡᠨ ᠲᠠᠭᠲᠠᠭᠠ ᠬᠦᠷᠬᠦ ᠪᠣᠯᠭᠠᠨ ᠳ᠋ᠠᠭᠠᠨ ᠦᠨᠡᠲᠦ ᠢᠷᠦᠭᠡᠯ ᠢ᠋ᠶ᠋ᠡᠨ ᠬᠠᠷᠠᠮ ᠦᠭᠡᠢ ᠬᠠᠢᠷᠠᠯᠠᠳᠠᠭ ᠪᠠᠢᠯᠠ᠃ ᠦᠷᠴᠢᠬᠡᠷ ᠡᠮᠡᠭᠡᠨ ᠦ᠌ ᠳ᠋ᠦ᠍ ᠡᠪᠦᠭᠡᠨ ᠲᠠᠭᠲᠠᠭᠠ ᠶ᠋ᠢᠨ ᠢᠷᠦᠭᠡᠯ ᠰᠢᠩᠭᠡᠵᠦ᠂ ᠡᠷᠦᠬᠡ ᠭᠡᠷ ᠲᠤᠨᠢ ᠨᠠᠷᠠ ᠭᠠᠷᠤᠯᠠ᠃
ᠦᠷᠴᠢᠬᠡᠷ ᠡᠮᠡᠭᠡᠨ ᠦ᠌ ᠦᠷᠡ ᠬᠡᠦᠬᠡᠳ ᠨᠢ ᠥᠪᠡᠷ ᠦ᠋ᠨ ᠭᠡᠰᠡᠨ ᠦᠢᠯᠡᠰ ᠲᠡᠢ᠂ ᠬᠠᠨᠢ ᠲᠠᠢ᠂ ᠢᠵᠢᠯᠢ ᠲᠡᠢ ᠪᠣᠯᠤᠯᠠ᠂ ᠦᠷᠴᠢᠬᠡᠷ ᠡᠮᠡᠭᠡᠨ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠢᠨ ᠳ᠋ᠤ᠌ ᠪᠠᠬᠠᠳᠤᠵᠤ᠂ ᠦᠢᠯᠡᠰ ᠦ᠋ᠨ ᠢ᠋ᠶ᠋ᠡᠨ ᠰᠠᠢᠬᠠᠨ ᠳ᠋ᠤ᠌ ᠪᠡᠶᠡᠰᠴᠦ ᠡᠳᠦᠷ ᠪᠣᠯᠭᠠᠨ ᠡᠷᠲᠡ ᠶ᠋ᠢᠨ ᠨᠠᠷᠠᠨ ᠢ᠋ᠶ᠋ᠠᠷ ᠡᠪᠦᠭᠡᠨ ᠲᠠᠭᠲᠠᠭᠠ ᠳ᠋ᠤ᠌ ᠬᠣᠭᠣᠯᠠ ᠶ᠋ᠢ ᠨᠢ ᠬᠢᠵᠦ ᠥᠭᠴᠢᠬᠡᠭᠡᠳ᠄《 ᠬᠥᠮᠦᠨ ᠠᠮᠢᠲᠠᠨ ᠪᠦᠬᠦᠨ ᠭᠡᠵᠦ ᠭᠠᠭᠴᠠᠬᠠᠨ ᠵᠣᠷᠢᠭ ᠢ᠋ᠶ᠋ᠠᠷ ᠭᠠᠯᠠᠪ ᠤ᠋ᠨ ᠭᠠᠢᠬᠠᠮᠰᠢᠭ ᠢ᠋ ᠡᠭᠦᠳᠳᠡᠭ ᠶᠦᠮ ᠪᠠᠢᠨᠠ》 ᠭᠡᠴᠢᠬᠡᠭᠰᠡᠨ ᠮᠠᠢᠵᠢᠭᠢᠨᠠᠨᠠ᠃
ᠡᠪᠦᠭᠡᠨ ᠲᠠᠭᠲᠠᠭᠠ ᠲᠠᠩᠳᠠ ᠡᠭᠦᠷ ᠥᠨᠳᠡᠭᠡ ᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠦᠷᠴᠢᠬᠡᠷ ᠡᠮᠡᠭᠡᠨ ᠢ᠋ ᠲᠣᠭᠣᠷᠢᠨ ᠰᠠᠭᠤᠵᠤ᠂ ᠥᠨᠳᠥᠷ ᠲᠠᠭᠲᠤ ᠶ᠋ᠢᠨ ᠳᠡᠭᠡᠳᠦ ᠣᠷᠣᠢ ᠳ᠋ᠤ᠌᠂ ᠡᠨᠡ ᠬᠣᠶᠠᠷ ᠠᠢᠯ ᠡᠳᠦᠷᠵᠢᠨ ᠨᠠᠢᠷᠰᠠᠭ ᠨᠠᠷᠭᠢᠵᠤ ᠵᠢᠷᠭᠠᠳᠠᠭ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵᠢᠷᠠᠨᠲᠠᠢ
ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠤᠤᠭᠠᠨᠵᠢᠳ