ᠵᠠᠷᠤᠳ ᠤ᠋ᠨ ᠡᠭᠦᠰᠦᠯ ᠭᠠᠷᠤᠯ ᠤ᠋ᠨ ᠲᠤᠬᠠᠢ-ᠪᠣᠷᠵᠢᠭᠢᠳᠠᠢ ᠣᠶᠤᠨᠪᠢᠯᠢᠭ᠌Заруудын үүсэл гарлын тухай-Боржигидай Оюунбилэг
578ᠵᠠᠷᠤᠳ ᠤ᠋ᠨ ᠡᠭᠦᠰᠦᠯ ᠭᠠᠷᠤᠯ ᠤ᠋ᠨ ᠲᠤᠬᠠᠢ
ᠪᠣᠷᠵᠢᠭᠢᠳᠠᠢ ᠣᠶᠤᠨᠪᠢᠯᠢᠭ᠌
ᠶᠠᠫᠣᠨ ᠡᠷᠳᠡᠮᠲᠡᠨ ᠾ ᠤᠺᠠᠳᠡ ᠮᠣᠩᠭᠣᠯ ᠤ᠋ᠨ ᠵᠢᠷᠭᠤᠭᠠᠨ ᠲᠦᠮᠡᠨ ᠦ᠌ ᠢᠷᠡᠯ ᠭᠠᠷᠤᠯ ᠢ᠋ ᠥᠭᠦᠯᠡᠬᠦ ᠳ᠋ᠦ᠍ ᠪᠡᠨ ᠬᠠᠯᠬᠠ ᠲᠦᠮᠡᠨ ᠢ᠋ ᠶᠤᠸᠠᠨ ᠤᠯᠤᠰ ᠤ᠋ᠨ ᠦᠶᠡ ᠶ᠋ᠢᠨ ᠵᠠᠯᠠᠢᠷ ᠲᠡᠷᠢᠭᠦᠲᠡᠢ ᠵᠡᠭᠦᠨ ᠭᠠᠷ ᠤ᠋ᠨ ᠲᠠᠪᠤᠨ ᠠᠢᠮᠠᠭ ᠠ᠋ᠴᠠ ᠪᠦᠷᠢᠯᠳᠦᠭᠰᠡᠨ ᠭᠡᠵᠦ ᠦᠵᠡᠭᠰᠡᠨ ᠤᠴᠢᠷ ᠠ᠋ᠴᠠ ᠮᠣᠷᠢᠺᠸᠠ ᠨᠠᠷ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠵᠦ᠂ ᠵᠠᠯᠭᠠᠭᠠᠳ ᠬᠥᠮᠦᠰ ᠪᠠᠷᠤᠭ ᠪᠦᠷ ᠲᠡᠭᠡᠵᠦ ᠦᠵᠡᠳᠡᠭ ᠪᠣᠯᠪᠠ᠃ ᠬᠠᠯᠬᠠ ᠶ᠋ᠢᠨ ᠨᠢᠭᠡ ᠪᠦᠷᠢᠯᠳᠦᠬᠦᠨ ᠪᠣᠯᠤᠭᠰᠠᠨ ᠵᠠᠷᠤᠳ ᠢ᠋ ᠮᠥᠨ ᠲᠠᠪᠤᠨ ᠠᠢᠮᠠᠭ ᠠ᠋ᠴᠠ ᠭᠠᠷᠤᠯᠲᠠᠢ ᠭᠡᠵᠦ ᠦᠵᠡᠳᠡᠭ᠃ ᠬᠠᠯᠬᠠ ᠲᠦᠮᠡᠨ ᠦ᠌ ᠢᠷᠡᠯ ᠭᠠᠷᠤᠯ ᠵᠡᠭᠦᠨ ᠲᠠᠪᠤᠨ ᠠᠢᠮᠠᠭ ᠲᠠᠢ ᠨᠢᠭᠲᠠ ᠬᠣᠯᠪᠣᠭᠠᠲᠠᠢ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠪᠦᠬᠦ ᠣᠲᠣᠭ ᠲᠡᠨᠳᠡ ᠡᠴᠡ ᠢᠷᠡᠯᠲᠡᠢ ᠭᠡᠰᠡᠨ ᠶᠠᠪᠤᠳᠠᠯ ᠪᠠᠢᠬᠤ ᠦᠭᠡᠢ᠃ ᠭᠡᠪᠡᠴᠦ᠂ ᠣᠯᠳᠣᠢ ᠪᠢ ᠪᠠᠰᠠ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠡᠨᠡ ᠦᠵᠡᠯᠲᠡ ᠳ᠋ᠦ᠍ ᠨᠥᠯᠥᠭᠡᠯᠡᠭᠳᠡᠵᠦ᠂ ᠬᠥᠮᠦᠰ ᠢ᠋ ᠳᠠᠭᠠᠵᠤ ᠥᠭᠦᠯᠡᠭᠰᠡᠨ ᠵᠦᠢᠯ ᠪᠣᠢ᠃ ᠡᠢᠮᠦ ᠡᠴᠡ ᠵᠣᠬᠢᠶᠠᠭᠴᠢ ᠲᠤᠰ ᠥᠭᠦᠯᠡᠯ ᠳ᠋ᠦ᠍ ᠪᠡᠨ ᠵᠠᠷᠤᠳ ᠠᠢᠮᠠᠭ ᠤ᠋ᠨ ᠡᠭᠦᠰᠦᠯ ᠭᠠᠷᠤᠯ ᠤ᠋ᠨ ᠤᠴᠢᠷ ᠢ᠋ ᠨᠡᠯᠢᠶᠡᠳ ᠨᠠᠷᠢᠨ ᠰᠤᠳᠤᠯᠤᠨ ᠦᠵᠡᠪᠡ᠃ ᠮᠡᠷᠭᠡᠳ ᠲᠣᠯᠢᠳᠠᠮᠤ᠃
ᠨᠢᠭᠡ᠂
ᠵᠠᠷᠤᠳ ᠭᠡᠳᠡᠭ ᠨᠡᠷᠡ ᠮᠣᠩᠭᠣᠯ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠦ᠍ 1662 ᠣᠨ ᠳ᠋ᠤ᠌ ᠵᠣᠬᠢᠶᠠᠭᠳᠠᠭᠰᠠᠨ ᠰᠠᠭᠠᠩ ᠰᠡᠴᠡᠨ ᠦ᠌ ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ ᠳ᠋ᠤ᠌ ᠳᠠᠶᠠᠨ ᠬᠠᠭᠠᠨ ᠤ᠋ ᠦᠢᠯᠡ ᠬᠡᠷᠡᠭ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠬᠡᠰᠡᠭ ᠲᠦ᠍ ᠠᠩᠬᠠ ᠤᠳᠠᠭᠠ ᠵᠠᠷᠤᠭᠤᠳ ᠪᠢᠴᠢᠯᠭᠡ ᠪᠡᠷ ᠢᠯᠡᠷᠡᠭᠰᠡᠨ ᠶᠦ᠍ᠮ᠃ ᠲᠡᠭᠦᠨ ᠳ᠋ᠦ᠍ ᠥᠭᠦᠯᠡᠭᠰᠡᠨ ᠨᠢ ᠄ ᠳᠠᠶᠠᠨ ᠬᠠᠭᠠᠨ ᠬᠥᠪᠡᠭᠦᠨ ᠤᠯᠤᠰ ᠪᠠᠢᠬᠤ ᠶ᠋ᠢ ᠣᠷᠳᠣᠰ᠂ ᠲᠦᠮᠡᠳ᠂ ᠶᠦᠩᠰᠢᠶᠡᠪᠤ ᠪᠠᠷᠠᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠦ᠌ ᠲᠥᠷᠥ ᠶ᠋ᠢ ᠵᠠᠰᠠᠭᠤᠯᠠᠷᠠ ᠢᠯᠡᠭᠡᠭᠰᠡᠨᠡ᠂ᠪᠠᠷᠠᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠦ᠌ ᠦᠢᠭᠤᠳ ᠤ᠋ᠨ ᠢᠪᠷᠠᠢ ᠲᠠᠢᠰᠢ᠂ ᠣᠷᠳᠣᠰ ᠤ᠋ᠨ ᠯᠠᠭᠦᠰᠢ ᠠᠬᠠᠯᠠᠬᠤ ᠨᠠᠷ ᠤᠷᠪᠠᠵᠤ᠂ ᠤᠯᠤᠰ ᠪᠠᠢᠬᠤ ᠶ᠋ᠢ ᠬᠣᠷᠣᠭᠠᠵᠠᠢ᠃ ᠳᠠᠶᠠᠨ ᠬᠠᠭᠠᠨ ᠲᠡᠷᠡ ᠤᠷᠪᠠᠭᠠᠨ ᠢ᠋ ᠳᠠᠷᠤᠬᠤ ᠪᠠᠷ ᠴᠠᠬᠠᠷ᠂ ᠬᠠᠯᠬᠠ᠂ ᠣᠷᠢᠶᠠᠩᠬᠠᠨ ᠵᠡᠷᠭᠡ ᠵᠡᠭᠦᠨ ᠭᠤᠷᠪᠠᠨ ᠲᠦᠮᠡᠨ ᠪᠠ ᠬᠣᠷᠴᠢᠨ ᠲᠦᠮᠡᠨ ᠦ᠌ ᠴᠡᠷᠢᠭ ᠢ᠋ ᠳᠠᠢᠴᠢᠯᠠᠵᠤ ᠪᠠᠷᠠᠭᠤᠨ ᠭᠤᠷᠪᠠᠨ ᠳ᠋ᠤ᠌ ᠴᠡᠷᠢᠭ ᠮᠣᠷᠳᠠᠵᠤ᠂ ᠳᠠᠯᠠᠨ ᠲᠡᠷᠢᠭᠦᠨ ᠳ᠋ᠦ᠍ ᠶᠡᠬᠡᠳᠡ ᠪᠠᠢᠯᠳᠤᠪᠠ᠃ ᠲᠡᠢᠨ ᠡᠬᠢᠯᠡᠬᠦ ᠦᠶᠡ ᠳ᠋ᠦ᠍᠂ ᠳᠠᠶᠠᠨ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠵᠤ ᠥᠭᠦᠯᠡᠭᠰᠡᠨ ᠠᠨᠤ ᠄ ᠣᠷᠳᠣᠰ ᠡᠵᠡᠨ ᠦ᠌ ᠨᠠᠢ᠍ᠮᠠᠨ ᠴᠠᠭᠠᠨ ᠭᠡᠷ ᠢ᠋ ᠬᠠᠳᠠᠭᠠᠯᠠᠭᠰᠠᠨ ᠶᠡᠬᠡ ᠵᠠᠶᠠᠭᠠᠲᠤ ᠤᠯᠤᠰ ᠪᠥᠯᠥᠭᠡ᠂ ᠲᠡᠭᠦᠨ ᠯᠦ᠍ᠭᠡ ᠤᠷᠢᠶᠠᠩᠬᠠᠨ ᠮᠥᠨ ᠡᠵᠡᠨ ᠦ᠌ ᠠᠯᠲᠠᠨ ᠬᠥᠮᠥᠷᠭᠡ ᠶ᠋ᠢ ᠰᠠᠬᠢᠭᠰᠠᠨ ᠪᠠᠰᠠ ᠶᠡᠬᠡ ᠵᠠᠶᠠᠭᠠᠲᠤ ᠤᠯᠤᠰ᠂ ᠬᠣᠣᠷᠴᠢᠨ (ᠬᠣᠷᠴᠢᠨ) ᠠᠪᠠᠭᠠ ᠳ᠋ᠤᠷ ᠲᠤᠰᠠᠯᠠᠲᠤᠭᠠᠢ ᠠᠷᠪᠠᠨ ᠬᠣᠶᠠᠷ ᠲᠦᠮᠡᠳ ᠲᠡᠢ ᠠᠷᠪᠠᠨ ᠬᠣᠶᠠᠷ ᠣᠲᠣᠭ ᠬᠠᠯᠬᠠ᠂ ᠲᠦᠩ ᠶᠡᠬᠡ ᠶᠤᠩᠰᠢᠶᠠᠪᠤ ᠲᠠᠢ ᠨᠠᠢ᠍ᠮᠠᠨ ᠣᠲᠣᠭ ᠴᠠᠬᠠᠷ ᠲᠤᠰ ᠲᠤᠰ ᠪᠠᠢᠯᠳᠤ ᠬᠡᠮᠡᠪᠡᠢ᠃ ᠲᠡᠭᠡᠬᠦ ᠳ᠋ᠦ᠍᠂ ᠬᠣᠷᠴᠢᠨ ᠤ᠋ ᠪᠤᠷᠬᠠᠢ ᠪᠠᠭᠠᠲᠤᠷ ᠲᠠᠢᠵᠢ᠂ ᠣᠷᠢᠶᠠᠩᠬᠠᠨ ᠤ᠋ ᠪᠠᠭᠠᠲᠤᠷ ᠪᠠᠶᠠᠬᠠᠢ᠂ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠭᠡᠬᠦ ᠮᠡᠲᠦᠴᠢᠯᠡᠨ ᠪᠠᠭᠠᠲᠤᠳ ᠡᠷᠡᠯᠬᠡᠭᠯᠡᠨ ᠳᠠᠭᠠᠷᠢᠵᠠᠢ (ᠶᠡᠬᠡ ᠬᠦᠷᠢᠶᠡ ᠶ᠋ᠢᠨ ᠭᠠᠷ ᠬᠠᠭᠤᠯᠤᠮᠠᠯ 66 ) ᠡᠨᠡ ᠬᠦ᠌ ᠲᠡᠢᠨ ᠳ᠋ᠦ᠍ ᠳᠠᠶᠠᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠪᠠᠷᠠᠭᠤᠨ ᠲᠦᠮᠡᠨ ᠢ᠋ ᠳᠠᠷᠤᠭᠠᠳ᠂ ᠵᠢᠷᠭᠤᠭᠠᠨ ᠲᠦᠮᠡᠨ ᠢ᠋ ᠨᠢᠭᠡᠨ ᠵᠢᠯᠤᠭᠤᠨ ᠳ᠋ᠤ᠌ ᠣᠷᠣᠭᠤᠯᠤᠨ ᠠᠪᠴᠠᠢ᠃
ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠲᠡᠢᠨ ᠬᠠᠭᠠᠨ ᠤ᠋ ᠦᠢᠯᠡᠰ ᠲᠦ᠍ ᠰᠢᠢᠳᠪᠦᠷᠢᠲᠦ ᠦᠢᠯᠡᠳᠦᠯ ᠭᠠᠷᠭᠠᠭᠰᠠᠨ ᠪᠣᠯᠬᠣᠷ᠂ ᠲᠡᠷᠡ ᠲᠡᠢᠨ ᠦ᠌ ᠢᠯᠠᠯᠲᠠ ᠶ᠋ᠢᠨ ᠳᠠᠷᠠᠭᠠ᠂ ᠳᠠᠶᠠᠨ ᠬᠠᠭᠠᠨ ᠲᠡᠭᠦᠨ ᠳ᠋ᠦ᠍ ᠬᠦᠴᠦᠨ ᠦᠭᠭᠦᠭᠰᠡᠨ ᠭᠠᠪᠢᠶᠠᠲᠤ ᠰᠠᠢᠳ ᠨᠠᠷ ᠢ᠋ᠶ᠋ᠠᠨ ᠦᠪᠡᠳᠡᠭᠰᠢ ᠲᠠᠩᠰᠤᠭ ᠱᠠᠩᠨᠠᠭᠰᠠᠨ ᠠᠵᠢ᠃ ᠲᠡᠳᠡᠭᠡᠷ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠠᠩᠬᠠᠷᠤᠭᠤᠰᠢᠲᠠᠢ ᠨᠢ᠂ ᠵᠠᠷᠤᠭᠤᠳ ᠤ᠋ᠨ ᠪᠠᠭᠠᠰᠤᠨ ᠳᠠᠷᠬᠠᠨ ᠲᠠᠪᠤᠨᠠᠩ ᠳ᠋ᠤᠷ᠂ ᠮᠠᠨᠳᠤᠬᠠᠢ ᠬᠠᠲᠤᠨ ᠤ᠋ ᠭᠠᠭᠴᠠ ᠠᠪᠠᠬᠠᠢ ᠲᠥᠷᠥᠯᠲᠦ ᠭᠦᠩᠵᠦ ᠶ᠋ᠢ ᠥᠭᠪᠡᠢ᠃ ᠰᠠᠭᠠᠩ ᠰᠡᠴᠡᠨ ᠄ ᠬᠠᠳ ᠤ᠋ᠨ ᠦᠨᠳᠦᠰᠦᠨ ᠦ᠌ ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ᠂(ᠶᠡᠬᠡ ᠬᠦᠷᠢᠶᠡᠨ ᠦ᠌ ᠭᠠᠷ ᠪᠢᠴᠢᠮᠡᠯ᠂ 66 ) ᠭᠡᠰᠡᠨ ᠶᠠᠪᠤᠳᠠᠯ ᠶᠤᠮ᠃ ᠡᠨᠳᠡ ᠮᠠᠨ ᠤ᠋ ᠭᠣᠣᠯ ᠰᠡᠳᠦᠪ ᠪᠣᠯᠤᠭᠰᠠᠨ ᠵᠠᠷᠤᠳ ᠮᠠᠨᠢ ( ᠵᠠᠷᠤᠭᠤᠳ) ᠪᠢᠴᠢᠯᠭᠡ ᠲᠡᠢ ᠠᠩᠬᠠ ᠤᠳᠠᠭᠠ ᠭᠠᠷᠴᠤ ᠪᠣᠢ᠃ ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠪᠠᠢᠯᠳᠤᠭᠠᠨ ᠤ᠋ ᠲᠤᠬᠠᠢ ᠠᠩᠬᠠ ᠲᠡᠮᠳᠡᠭᠯᠡᠭᠰᠡᠨ ᠮᠣᠩᠭᠣᠯ ᠰᠤᠷᠪᠤᠯᠵᠢ ᠪᠢᠴᠢᠭ ᠪᠣᠯ ᠶᠡᠬᠡ ᠲᠥᠯᠥᠪ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠵᠠᠭᠤᠨ ᠤ᠋ ᠡᠬᠢ ᠪᠡᠷ ᠵᠣᠬᠢᠶᠠᠭᠳᠠᠭᠰᠠᠨ ᠵᠣᠬᠢᠶᠠᠭᠴᠢ ᠶ᠋ᠢᠨ ᠨᠡᠷᠡ ᠨᠢ ᠮᠡᠳᠡᠭᠳᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠬᠠᠳ ᠤ᠋ᠨ ᠦᠨᠳᠦᠰᠦᠨ ᠦ᠌ ᠬᠤᠷᠢᠶᠠᠩᠭᠤᠢ ᠠᠯᠲᠠᠨ ᠲᠣᠪᠴᠢ ( ᠪᠠᠭᠠ ᠠᠯᠲᠠᠨ ᠲᠣᠪᠴᠢ) ᠶᠤᠮ᠃ ᠴᠠᠬᠠᠷ ᠤ᠋ᠨ ᠪᠣᠷᠪᠤᠭ ᠤ᠋ᠨ ᠪᠠᠶᠠᠨ ᠥᠷᠮᠡᠭᠡᠷ ᠭᠡᠳᠡᠭ ᠬᠥᠮᠦᠨ ᠳᠠᠶᠠᠨ ᠬᠠᠭᠠᠨ ᠤ᠋ ᠲᠤᠭ ᠢ᠋ ᠨᠢᠭᠤᠵᠤ ᠣᠷᠣᠨ ᠳ᠋ᠤ᠌ ᠨᠢ ᠤᠷᠢᠶᠠᠩᠬᠠᠨ ᠤ᠋ ᠲᠤᠭ ᠢ᠋ ᠪᠤᠰᠬᠠᠭᠰᠠᠨ ᠳ᠋ᠤ᠌᠂ ᠪᠠᠷᠠᠭᠤᠨ ᠲᠦᠮᠡᠨ ᠦ᠌ ᠴᠡᠷᠢᠭ ᠤ᠋ᠳ ᠬᠠᠭᠤᠷᠲᠠᠵᠤ᠂ ᠣᠷᠢᠶᠠᠩᠬᠠᠨ ᠤ᠋ ᠵᠦᠭ ᠳᠠᠭᠠᠷᠢᠵᠠᠢ᠃ ᠲᠡᠷᠡ ᠳᠠᠢᠰᠤᠨ ᠢ᠋ ᠬᠣᠷᠴᠢᠨ ᠤ᠋ ᠣᠷᠳᠤᠬᠠᠢ ᠸᠠᠩ ᠬᠢᠭᠡᠳ ᠬᠥᠪᠡᠭᠦᠨ ᠨᠢ ᠪᠤᠷᠬᠠᠢ᠂ ᠤᠷᠢᠶᠠᠩᠬᠠᠨ ᠤ᠋ ᠪᠠᠶᠠᠬᠠᠢ ᠪᠠᠭᠠᠲᠤᠷ᠂ ᠬᠣᠷᠴᠢᠨ ᠲᠠᠪᠤᠨ ᠤ᠋ ᠰᠠᠢᠨ ᠴᠠᠬᠢᠴᠠ ᠪᠠᠭᠠᠲᠤᠷ᠂ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠤᠷᠤᠭ ᠤ᠋ᠨ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠲᠠᠪᠤᠭᠤᠯᠠ ᠬᠣᠰᠢᠭᠤ ᠤᠳᠤᠷᠢᠳᠤᠨ ᠲᠣᠰᠴᠤ ᠪᠠᠢᠯᠳᠤᠵᠠᠢ᠃ ᠲᠡᠢᠨ ᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠶᠠᠨ ᠬᠠᠭᠠᠨ᠄ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠳ᠋ᠤᠷ ᠰᠠᠢᠨ ᠮᠠᠨᠳᠤᠬᠠᠢ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠭᠠᠭᠴᠠᠬᠠᠨ ᠥᠬᠢᠨ ᠢ᠋ᠶ᠋ᠡᠨ ᠥᠭᠪᠡ᠃
ᠳᠠᠭᠠᠯᠳᠤᠭᠤᠯᠤᠯ᠂( ᠴᠢᠤᠸᠠᠨ ᠷᠦᠩ ᠲᠤᠯᠭᠠᠨ ᠬᠠᠷᠢᠭᠤᠴᠠᠵᠤ ᠲᠠᠢᠯᠪᠤᠷᠢᠯᠠᠭᠰᠠᠨ ᠄ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠰᠤᠳᠤᠷ᠂ ᠦᠨᠳᠦᠰᠦᠲᠡᠨ ᠦ᠌ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 2013 ᠣᠨ᠂ ᠭᠡᠷᠡᠯ ᠵᠢᠷᠤᠭ ᠡᠬᠡ᠂ 513 ~ 514 ᠳ᠋ᠦ᠍ᠭᠡᠷ ᠬᠠᠭᠤᠳᠠᠰᠤ᠂)( ᠮᠣᠩᠭᠣᠯ ᠡᠬᠡ᠂ 197᠂ 198 ᠳ᠋ᠤᠭᠠᠷ ᠬᠠᠭᠤᠳᠠᠰᠤ᠂) ᠯᠤᠪᠰᠠᠨᠳᠠᠨᠵᠢᠨ ᠤ᠋ ᠠᠯᠲᠠᠨ ᠲᠣᠪᠴᠢ ᠂ ᠪᠠᠭᠠ ᠠᠯᠲᠠᠨ ᠲᠣᠪᠴᠢ ᠲᠠᠢ ᠡᠭᠡᠭᠡ ᠠᠳᠠᠯᠢ ᠃ᠡᠷᠲᠡᠨ ᠦ᠌ ᠬᠠᠳ ᠤ᠋ᠨ ᠦᠨᠳᠦᠰᠦᠯᠡᠭᠰᠡᠨ ᠲᠥᠷᠥ ᠶᠣᠰᠣᠨ ᠤ᠋ ᠵᠣᠬᠢᠶᠠᠯ ᠢ᠋ ᠲᠣᠪᠴᠢᠯᠠᠨ ᠬᠤᠷᠢᠶᠠᠭᠰᠠᠨ ᠠᠯᠲᠠᠨ ᠲᠣᠪᠴᠢ ᠬᠡᠮᠡᠬᠦ ᠣᠷᠣᠰᠢᠪᠠᠢ ᠂ᠤᠯᠠᠭᠠᠨᠪᠠᠭᠠᠲᠤᠷ᠂ 1990 ᠣᠨ᠂ 1677 ᠣᠨ ᠳ᠋ᠤ᠌ ᠬᠠᠯᠬᠠ ᠱᠠᠮᠪᠠ ᠲᠠᠢᠵᠢ ᠶ᠋ᠢᠨ ᠪᠢᠴᠢᠭᠰᠡᠨ ᠠᠰᠠᠷᠠᠭᠴᠢ ᠨᠡᠷᠡᠲᠦ ᠶ᠋ᠢᠨ ᠲᠡᠦᠬᠡ ᠳ᠋ᠦ᠍ ᠄ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠪᠠᠭᠠᠰᠤᠨ᠂ ᠪᠠᠭᠠᠰᠤᠨ ᠳ᠋ᠤᠷ ᠮᠠᠨᠳᠤᠬᠠᠢ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠭᠠᠭᠴᠠ ᠥᠬᠢᠨ ᠢ᠋ᠶ᠋ᠡᠨ ᠥᠭᠪᠡ ᠭᠡᠵᠦ ᠬᠡᠯᠡᠳᠡᠭ᠃ ᠵᠠᠷᠤᠳ ᠭᠦᠦᠰᠢ ᠳ᠋ᠸᠷᠮᠡ ᠶ᠋ᠢᠨ 1739 ᠣᠨ ᠳ᠋ᠤ᠌ ᠪᠢᠴᠢᠭᠰᠡᠨ ᠠᠯᠲᠠᠨ ᠬᠦᠷᠳᠦᠨ ᠮᠢᠩᠭᠠᠨ ᠬᠡᠭᠡᠰᠦᠲᠦ ᠳ᠋ᠦ᠍ ᠲᠡᠮᠳᠡᠭᠯᠡᠭᠰᠡᠨ ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠪᠠᠢᠯᠳᠤᠭᠠᠨ ᠤ᠋ ᠬᠣᠢᠨᠠ ᠡᠮᠦᠨᠡᠬᠢ ᠪᠠᠢᠳᠠᠯ ᠤ᠋ᠨ ᠲᠡᠮᠳᠡᠭᠯᠡᠯ ᠡᠮᠦᠨᠡᠬᠢ ᠪᠢᠴᠢᠭ ᠤ᠋ᠳ ᠠ᠋ᠴᠠ ᠶᠡᠬᠡ ᠢᠯᠭᠠᠭᠠ ᠦᠭᠡᠢ᠂ ᠬᠠᠷᠢᠨ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠢ᠋ ᠳᠤᠷᠠᠳᠬᠤ ᠳ᠋ᠤ᠌ ᠪᠠᠨ ᠣᠷᠢᠶᠠᠩᠬᠠᠨ ᠤ᠋ ᠪᠠᠭᠠᠰᠤᠨ ᠳ᠋ᠤᠷ ᠰᠠᠢᠨ ᠮᠠᠨᠳᠤᠬᠠᠢ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠭᠡᠭᠡᠨ ᠭᠦᠩᠵᠦ ᠶ᠋ᠢ ᠥᠭᠪᠡ ᠭᠡᠰᠡᠨ ᠪᠠ ᠪᠠᠰᠠ ᠨᠢᠭᠡ ᠥᠭᠡᠷᠡ ᠭᠠᠵᠠᠷ ᠲᠤ᠌ ᠮᠠᠨᠳᠤᠬᠠᠢ ᠰᠡᠴᠡᠨ ᠬᠠᠲᠤᠨ ᠤ᠋ ᠭᠠᠭᠴᠠᠬᠠᠨ ᠥᠬᠢᠨ ᠭᠡᠭᠡᠨ ᠭᠦᠩᠵᠦ ᠶ᠋ᠢ ᠤᠷᠢᠶᠠᠩᠬᠠᠨ ᠤ᠋ ᠵᠢᠮᠡ (ᠵᠠᠯᠮᠠ ᠶ᠋ᠢᠨ ᠡᠨᠳᠡᠭᠦᠦ ᠪᠢᠴᠢᠯᠭᠡ ) ᠶ᠋ᠢᠨ ᠦᠷᠡ ᠪᠠᠭᠠᠰᠤᠨ ᠪᠠᠭᠠᠲᠤᠷ ᠲᠤ᠌ ᠥᠭᠭᠦᠭᠡᠳ ᠲᠠᠪᠤᠨᠠᠩ ᠪᠣᠯᠭᠠᠪᠠᠢ ( ᠳ᠋ᠧᠷᠮᠠ ᠵᠣᠬᠢᠶᠠᠵᠤ᠂ ᠴᠣᠢᠵᠢ ᠬᠠᠷᠭᠤᠭᠤᠯᠵᠤ ᠲᠠᠢᠯᠪᠤᠷᠢᠯᠠᠭᠰᠠᠨ ᠠᠯᠲᠠᠨ ᠬᠦᠷᠳᠦᠨ ᠮᠢᠩᠭᠠᠨ ᠬᠡᠭᠡᠰᠦᠲᠦ᠂ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 1987 ᠣᠨ᠂ 128 ᠳ᠋ᠤᠭᠠᠷ ᠬᠠᠭᠤᠳᠠᠰᠤ ) ᠭᠡᠵᠦ ᠪᠠᠢᠨᠠ᠃ ᠬᠢᠨᠠᠪᠠᠰᠤ᠂ ᠵᠠᠷᠤᠳ ᠭᠦᠦᠰᠢ ᠶ᠋ᠢᠨ ᠰᠡᠭᠦᠯ ᠦ᠋ᠨ ᠦᠭᠡ ᠨᠢ 1725 ᠣᠨ ᠳ᠋ᠤ᠌ ᠵᠣᠬᠢᠶᠠᠭᠳᠠᠭᠰᠠᠨ ᠦᠵᠦᠮᠦᠴᠢᠨ ᠲᠠᠢᠵᠢ ᠭᠣᠮᠪᠣᠵᠠᠪ ᠤ᠋ᠨ ᠭᠠᠩᠭᠠ ᠶ᠋ᠢᠨ ᠤᠷᠤᠰᠬᠠᠯ ᠠ᠋ᠴᠠ ᠢᠷᠡᠯᠲᠡᠢ ᠠᠵᠢ᠃ ᠭᠣᠮᠪᠣᠵᠠᠪ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠄ ᠰᠠᠢᠨ ᠲᠠᠶᠠᠨ ᠬᠠᠭᠠᠨ ᠤ᠋ ᠭᠠᠭᠴᠠ ᠤᠰᠤᠨ (ᠥᠬᠢᠨ ᠦ᠌ ᠠᠳᠡᠭᠦᠤ ᠬᠠᠭᠤᠯᠪᠤᠷᠢ) ᠬᠠ (ᠭᠡᠭᠡᠨ ᠦ᠌ ᠪᠤᠷᠤᠭᠤ ᠪᠢᠴᠢᠯᠭᠡ ) ᠭᠦᠩᠵᠦ ᠶ᠋ᠢ ᠣᠷᠢᠶᠠᠩᠬᠠᠨ ᠵᠡᠯᠮᠡ ( ᠤᠤᠯ ᠵᠡᠭᠦᠯᠲᠡ ᠄ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠶᠢᠰᠦᠨ ᠥᠷᠯᠥᠭ ᠦ᠋ᠨ ᠨᠢᠭᠡᠨ ᠪᠣᠢ) ᠶ᠋ᠢᠨ ᠦᠷᠡ ᠳ᠋ᠦ᠍ᠷ ᠥᠭᠭᠦᠭᠡᠳ ᠲᠠᠪᠤᠨᠠᠩ ᠪᠣᠯᠭᠠᠭᠰᠠᠨ ᠠ᠋ᠴᠠ ᠦᠷᠡᠵᠢᠭᠰᠡᠨ ᠠᠨᠤ᠂ ᠬᠠᠷᠠᠴᠢᠨ ᠤ᠋ ᠨᠣᠶᠠᠳ ᠲᠠᠪᠤᠨᠠᠩ ᠣᠪᠣᠭᠲᠤ ᠮᠥᠨ ᠭᠡᠮᠡᠨ ᠵᠠᠷᠢᠮ ᠤ᠋ᠳ ᠣᠯᠠᠩᠬᠢ ᠳ᠋ᠤᠷ ᠥᠭᠦᠯᠡᠵᠦᠬᠦᠢ᠃ (ᠭᠣᠮᠪᠣᠵᠠᠪ ᠵᠣᠬᠢᠶᠠᠵᠤ᠂ ᠴᠣᠢᠵᠢ ᠬᠠᠷᠭᠤᠭᠤᠯᠵᠤ ᠲᠠᠢᠯᠪᠤᠷᠢᠯᠠᠭᠰᠠᠨ ᠄ ᠭᠠᠩᠭᠠ ᠶ᠋ᠢᠨ ᠤᠷᠤᠰᠬᠠᠯ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 1980 ᠣᠨ᠂)( ᠷᠠᠰᠢᠫᠦᠩᠰᠤᠭ ᠤ᠋ᠨ ᠪᠣᠯᠣᠷ ᠡᠷᠢᠭᠡ ᠳ᠋ᠦ᠍ ᠪᠠᠰᠠ ᠭᠡᠭᠡᠨ ᠭᠦᠩᠵᠦ ᠶ᠋ᠢ ᠤᠷᠢᠶᠠᠩᠬᠠᠨ ᠤ᠋ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠳ᠋ᠤᠷ ᠥᠭᠯᠦᠭᠡ ) ( ᠷᠠᠰᠢᠫᠦᠩᠰᠣᠭ ᠵᠣᠬᠢᠶᠠᠵᠤ᠂ ᠬᠦᠬᠡᠬᠣᠨᠳᠤᠷ ᠤ᠋ᠨ ᠬᠠᠷᠭᠤᠭᠤᠯᠵᠤ ᠲᠤᠯᠭᠠᠭᠰᠠᠨ ᠄ ᠪᠣᠯᠣᠷ ᠡᠷᠢᠭᠡ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠬᠣᠷᠢᠶᠠ᠂ 1985 ᠣᠨ᠂ 848 ᠳ᠋ᠤᠭᠠᠷ ᠬᠠᠭᠤᠳᠠᠰᠤ)᠃
ᠮᠣᠩᠭᠣᠯ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠦ᠍ ᠭᠠᠷᠤᠭᠰᠠᠨ ᠪᠠᠭᠠᠰᠤᠨ( ᠪᠠᠭᠠᠰᠤᠳ )ᠲᠠᠪᠤᠨᠠᠩ ᠤ᠋ᠨ ᠲᠤᠬᠠᠢ ᠮᠡᠳᠡᠭᠡ ᠨᠦ᠍ᠭᠦᠳ ᠢ᠋ ᠬᠤᠷᠢᠶᠠᠩᠭᠤᠢᠯᠠᠪᠠᠯ ᠳᠠᠷᠠᠭᠠᠬᠢ ᠳ᠋ᠦᠩᠨᠡᠯᠲᠡ ᠳ᠋ᠦ᠍ ᠬᠦᠷᠦᠨᠡ ᠃
ᠪᠠᠭᠠᠰᠤᠨ ᠪᠣᠯ ᠤᠷᠢᠶᠠᠩᠬᠠᠨ ᠤ᠋ ᠪᠠᠭᠠᠲᠤᠷ᠃
ᠪᠠᠭᠠᠰᠤᠨ ᠪᠣᠯ ᠤᠷᠢᠶᠠᠩᠬᠠᠨ ᠵᠡᠯᠮᠡ ᠶ᠋ᠢᠨ ᠦᠷᠡ᠃
ᠪᠠᠭᠠᠰᠤᠨ ᠪᠣᠯ ᠵᠠᠷᠤᠭᠤᠳ ᠣᠲᠣᠭ ᠤ᠋ᠨ ᠬᠥᠮᠦᠨ᠃
ᠪᠠᠭᠠᠰᠤᠨ ᠪᠣᠯ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠤᠷᠤᠭ ᠤ᠋ᠨ ᠬᠥᠮᠦᠨ᠃
ᠪᠠᠭᠠᠰᠤᠨ ᠪᠣᠯ ᠳᠠᠶᠠᠨ ᠬᠠᠭᠠᠨ ᠮᠠᠨᠳᠤᠬᠠᠢ ᠪᠣᠯᠤᠨ ᠰᠡᠴᠡᠨ ᠬᠠᠲᠤᠨ ᠤ᠋ ᠭᠠᠭᠴᠠ ᠥᠬᠢᠨ ᠭᠡᠭᠡᠨ ᠭᠦᠩᠵᠦ ᠶ᠋ᠢ ᠠᠪᠤᠭᠰᠠᠨ ᠲᠠᠪᠤᠨᠠᠩ᠃
ᠡᠨᠡ ᠬᠦ᠌ ᠮᠡᠳᠡᠭᠡ ᠨᠦ᠍ᠭᠦᠳ ᠢ᠋ ᠴᠢᠨᠠᠭᠰᠢᠳᠠ ᠰᠢᠨᠵᠢᠯᠡᠨ ᠦᠵᠡᠪᠡᠯ᠂ ᠤᠷᠢᠶᠠᠩᠬᠠᠨ ᠵᠠᠷᠤᠭᠤᠳ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠭᠡᠰᠡᠨ ᠳ᠋ᠦᠩ ᠭᠠᠷᠤᠨᠠ᠃
ᠡᠨᠡ ᠶᠠᠮᠠᠷ ᠤᠴᠢᠷ ᠪᠣᠯᠴᠢᠪᠠ?
ᠡᠨᠡ ᠬᠦ᠌ ᠠᠰᠠᠭᠤᠳᠠᠯ ᠢ᠋ ᠠᠪᠴᠤ ᠶᠠᠷᠢᠯᠴᠠᠬᠤ ᠠ᠋ᠴᠠ ᠡᠮᠦᠨᠡ᠂ ᠤᠷᠢᠳᠠᠪᠡᠷ ᠤᠯᠠᠮᠵᠢᠯᠠᠯ ᠰᠤᠷᠪᠤᠯᠵᠢ ᠳ᠋ᠤ᠌ ᠬᠠᠮᠢᠶᠠᠷᠤᠭᠳᠠᠬᠤ ᠰᠤᠷᠪᠤᠯᠵᠢ ᠪᠢᠴᠢᠭ ᠤ᠋ᠳ ᠤ᠋ᠨ ᠬᠡᠰᠡᠭ ᠶᠠᠪᠤᠳᠠᠯ ᠢ᠋ ᠲᠡᠮᠳᠡᠭᠯᠡᠬᠦ ᠨᠢᠭᠡᠨ ᠣᠨᠴᠠᠯᠢᠭ ᠢ᠋ ᠴᠤᠬᠤᠰ ᠳᠤᠷᠠᠳᠬᠤ ᠬᠡᠷᠡᠭᠲᠡᠢ᠃ ᠲᠡᠷᠡ ᠨᠢ ᠶᠠᠭᠤ ᠪᠣᠢ ᠭᠡᠪᠡᠯ᠂ ᠬᠥᠮᠦᠨ᠂ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠲᠡᠮᠳᠡᠭᠯᠡᠬᠦ ᠳ᠋ᠦ᠍ ᠪᠡᠨ ᠰᠡᠭᠦᠯᠴᠢ ᠶ᠋ᠢᠨ ᠵᠣᠬᠢᠶᠠᠭᠴᠢᠳ ᠲᠡᠦᠬᠡᠨ ᠬᠡᠷᠡᠭ ᠦ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠦᠷᠡ ᠳ᠋ᠦᠩ ᠢ᠋ ᠦᠨᠳᠦᠰᠦᠯᠡᠵᠦ᠂ ᠡᠰᠡᠪᠡᠯ ᠪᠦᠷ ᠴᠦ᠍ ᠲᠡᠦᠬᠡᠨ ᠪᠢᠴᠢᠭ ᠢ᠋ᠶ᠋ᠡᠨ ᠪᠢᠴᠢᠭᠰᠡᠨ ᠲᠤᠬᠠᠢ ᠶ᠋ᠢᠨ ᠴᠠᠭ ᠤ᠋ᠨ ᠢ᠋ᠶ᠋ᠠᠨ ᠪᠠᠢᠳᠠᠯ ᠪᠠ ᠣᠢᠯᠠᠭᠠᠯᠲᠠ ᠪᠠᠷ ᠡᠷᠲᠡ ᠬᠠᠭᠤᠴᠢᠨ ᠴᠠᠭ ᠲᠤ᠌ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠲᠡᠦᠬᠡᠨ ᠶᠠᠪᠤᠳᠠᠯ ᠢ᠋ ᠨᠡᠬᠡᠨ ᠲᠡᠮᠳᠡᠭᠯᠡᠬᠦ ᠨᠢ ᠵᠥᠩᠳᠡᠭᠡᠨ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠲᠡᠢᠨ ᠦ᠌ ᠦᠶᠡ ᠶ᠋ᠢᠨ ᠪᠠᠭᠠᠰᠤᠨ ᠢ᠋ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠡᠨᠡ ᠬᠥᠮᠦᠨ ᠲᠡᠢᠨ ᠡᠴᠡ ᠰᠡᠭᠦᠯᠡᠷ ᠲᠠᠪᠤᠨᠠᠩ ᠪᠣᠯᠤᠭᠰᠠᠨ ᠠ᠋ᠴᠠ ᠪᠣᠯᠵᠠᠢ᠃ ᠶᠣᠰᠣᠨ ᠳ᠋ᠤ᠌ ᠪᠠᠨ ᠲᠡᠷᠡ ᠦᠶᠡ ᠶ᠋ᠢᠨ ᠪᠠᠭᠠᠰᠤᠨ ᠢ᠋ ᠪᠠᠭᠠᠰᠤᠨ ᠪᠠᠭᠠᠲᠤᠷ ᠭᠡᠵᠦ ᠨᠡᠷᠡᠯᠡᠬᠦ ᠶᠣᠰᠣᠲᠠᠢ᠃ ᠠᠳᠠᠯᠢ ᠪᠠᠷ᠂ ᠪᠠᠭᠠᠰᠤᠨ ᠢ᠋ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠬᠥᠮᠦᠨ ᠭᠡᠰᠡᠨ ᠨᠢ ᠮᠥᠨ ᠬᠣᠵᠢᠮ ᠤ᠋ᠨ ᠲᠡᠦᠬᠡᠨ ᠳ᠋ᠦ᠍ ᠰᠠᠭᠤᠷᠢᠯᠠᠵᠤ ᠪᠢᠴᠢᠭᠰᠡᠨ ᠬᠡᠷᠡᠭ᠂ ᠤᠴᠢᠷ ᠨᠢ ᠵᠠᠷᠤᠳ (ᠵᠠᠷᠤᠭᠤᠳ)᠂ ᠪᠠᠭᠠᠷᠢᠨ᠂ ᠦᠵᠢᠶᠠᠳ᠂ ᠪᠠᠶᠠᠭᠤᠳ᠂ ᠬᠣᠩᠭᠢᠷᠠᠳ ᠲᠠᠪᠤᠨ ᠣᠲᠣᠭ ᠪᠣᠢ ᠪᠣᠯᠵᠤ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠨᠡᠷᠡ ᠬᠠᠳᠠᠭᠤᠯᠤᠭᠰᠠᠨ ᠨᠢ ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠲᠡᠢᠨ ᠡᠴᠡ ᠠᠳᠠᠭ ᠲᠤ᠌ ᠪᠠᠨ ᠬᠠᠭᠠᠰ ᠵᠠᠭᠤᠨ ᠵᠢᠯ ᠦ᠋ᠨ ᠳᠠᠷᠠᠭᠠᠬᠢ ᠶᠠᠪᠤᠳᠠᠯ ᠪᠢᠯᠡ᠃ ᠡᠳᠡᠭᠡᠷ ᠨᠢ ᠪᠦᠷ ᠰᠠᠭᠠᠩ ᠰᠡᠴᠡᠨ᠂ ᠵᠠᠷᠤᠳ ᠭᠦᠦᠰᠢ ᠵᠡᠷᠭᠡ ᠲᠡᠦᠬᠡᠴᠢᠳ ᠥᠪᠡᠷ ᠦ᠋ᠨ ᠴᠠᠭ ᠦᠶᠡ ᠶ᠋ᠢᠨ ᠲᠡᠦᠬᠡᠨ ᠪᠠᠢᠳᠠᠯ ᠳ᠋ᠤ᠌ ᠪᠠᠨ ᠦᠨᠳᠦᠰᠦᠯᠡᠵᠦ ᠪᠢᠴᠢᠭᠰᠡᠨ ᠦ᠌ ᠦᠷᠡ ᠳ᠋ᠦᠩ ᠶᠦ᠍ᠮ᠃ ᠪᠠᠭᠠᠰᠤᠨ ᠪᠣᠯ ᠲᠠᠶᠠᠨ ᠬᠠᠭᠠᠨ ᠪᠣᠯᠤᠨ ᠮᠠᠨᠳᠤᠬᠠᠢ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠭᠠᠭᠴᠠ ᠥᠬᠢᠨ ᠲᠥᠷᠥᠯᠲᠦ ᠭᠡᠭᠡᠨ ᠭᠦᠩᠵᠦ ᠶ᠋ᠢ ᠠᠪᠤᠭᠰᠠᠨ᠃ ᠲᠡᠭᠡᠬᠦᠯᠡᠷ᠂ ᠤᠷᠢᠶᠠᠩᠬᠠᠨ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠭᠡᠳᠡᠭ ᠳ᠋ᠦᠩ ᠪᠤᠷᠤᠭᠤ ᠪᠣᠯᠤᠨᠠ᠃ ᠡᠭᠦᠨ ᠢ᠋ ᠬᠠᠷᠢᠨ ᠣᠷᠢᠶᠠᠩᠬᠠᠨ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠵᠠᠷᠤᠭᠤᠳ ᠭᠡᠵᠦ ᠦᠵᠡᠪᠡᠯ ᠵᠥᠪ᠃ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠢ᠋ ᠣᠷᠢᠶᠠᠩᠬᠠᠨ ᠵᠠᠯᠮᠠ ᠶ᠋ᠢᠨ ᠦᠷᠡ ᠭᠡᠰᠡᠨ ᠪᠠ ᠪᠠᠰᠠ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠤᠷᠤᠭ ᠤ᠋ᠨ ᠬᠥᠮᠦᠨ ᠭᠡᠰᠡᠨ ᠨᠢ ᠡᠭᠦᠨ ᠦ᠌ ᠳᠠᠪᠬᠤᠷ ᠭᠡᠷᠡᠴᠢ᠃ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠣᠲᠣᠭ ᠤ᠋ᠨ ᠬᠥᠮᠦᠨ ᠭᠡᠰᠡᠨ ᠨᠢ ᠬᠡᠷᠡᠭ ᠳᠡᠭᠡᠷᠡ ᠪᠡᠨ (ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠶ᠋ᠢᠨ ᠳᠣᠲᠣᠷᠠᠬᠢ ) ᠵᠠᠷᠤᠳ ᠤ᠋ᠨ ᠨᠣᠶᠠᠳ ᠣᠲᠣᠭ ᠤ᠋ᠨ ᠬᠥᠮᠦᠨ ᠭᠡᠰᠡᠨ ᠦᠭᠡ᠃ ᠡᠨᠡ ᠨᠢ ᠪᠠᠰᠠ ᠵᠠᠷᠤᠳ ᠨᠢ ᠠᠯᠲᠠᠨ ᠣᠷᠣᠭᠳᠠᠨ ᠤ᠋ ᠥᠮᠴᠢ ᠢᠷᠭᠡᠳ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠤ᠋ᠨ ᠡᠵᠡᠮᠰᠢᠯ ᠢᠷᠭᠡᠳ ᠪᠠᠢᠭᠰᠠᠨ ᠭᠡᠰᠡᠨ ᠬᠡᠷᠡᠭ᠃ ᠡᠭᠦᠨ ᠢ᠋ ᠴᠠᠭᠠᠰᠢᠳᠠ ᠬᠢᠨᠠᠨ ᠦᠵᠡᠪᠡᠯ᠂ ᠤᠷᠢᠶᠠᠩᠬᠠᠨ ᠤ᠋ ᠵᠡᠯᠮᠡ ᠶ᠋ᠢᠨ ᠦᠷᠡᠰ ᠪᠠ ᠵᠠᠷᠤᠳ ( ᠵᠠᠷᠤᠭᠤᠳ) ᠤ᠋ᠨ ᠨᠣᠶᠠᠳ ᠨᠢ ᠨᠢᠭᠡᠯᠡ ᠣᠲᠣᠭ ᠤᠭᠰᠠᠭᠠ ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠵᠠᠷᠤᠳ ᠪᠣᠯ ᠣᠷᠢᠶᠠᠩᠬᠠᠨ ᠣᠲᠣᠭ ᠠᠵᠤᠭᠤ ᠃
ᠬᠣᠶᠠᠷ
ᠰᠠᠶᠢ ᠥᠭᠦᠯᠡᠭᠰᠡᠨ ᠵᠦᠢᠯ ᠪᠣᠯ ᠰᠤᠷᠪᠤᠯᠵᠢ ᠪᠢᠴᠢᠭ ᠦ᠋ᠨ ᠮᠡᠳᠡᠭᠡᠨ ᠳ᠋ᠦ᠍ ᠦᠨᠳᠦᠰᠦᠯᠡᠭᠰᠡᠨ ᠶᠦ᠍ᠮ᠃ᠪᠢᠳᠡ ᠰᠤᠷᠪᠤᠯᠵᠢ ᠶ᠋ᠢ ᠶᠠᠷᠢᠬᠤ ᠳ᠋ᠤ᠌ ᠪᠠᠨ ᠦᠯᠡᠳᠡᠮᠡᠯ ᠪᠠ ᠤᠯᠠᠮᠵᠢᠯᠠᠯ ᠭᠡᠵᠦ ᠬᠤᠪᠢᠶᠠᠳᠠᠭ᠃ ᠡᠮᠦᠨᠡ ᠥᠭᠦᠯᠡᠭᠰᠡᠨ ᠮᠣᠩᠭᠣᠯ ᠤ᠋ᠨ ᠣᠨ ᠳᠠᠷᠠᠭᠠᠯᠠᠭᠰᠠᠨ ᠲᠡᠦᠬᠡᠨ ᠪᠢᠴᠢᠭ ᠤ᠋ᠳ ᠪᠣᠯ ᠤᠯᠠᠮᠵᠢᠯᠠᠯ ᠰᠤᠷᠪᠤᠯᠵᠢ ᠳ᠋ᠤ᠌ ᠲᠣᠭᠠᠴᠠᠭᠳᠠᠨᠠ᠂ ᠵᠣᠬᠢᠶᠠᠭᠴᠢᠳ ᠨᠢ ᠬᠥᠮᠦᠰ ᠲᠦ᠍ ᠲᠡᠦᠬᠡᠨ ᠮᠡᠳᠡᠯᠭᠡ ᠤᠯᠠᠮᠵᠢᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠤᠷᠢᠳᠠᠬᠢ ᠬᠥᠮᠦᠰ ᠦ᠋ᠨ ᠪᠢᠴᠢᠭ ᠪᠠᠷᠢᠮᠲᠠ᠂ ᠠᠮᠠᠨ ᠤᠯᠠᠮᠵᠢᠯᠠᠯ ᠪᠠ ᠥᠪᠡᠷ ᠦ᠋ᠨ ᠦᠵᠡᠵᠦ ᠰᠣᠨᠣᠰᠤᠭᠰᠠᠨ ᠵᠦᠢᠯᠡᠰ ᠲᠦ᠍ ᠪᠡᠨ ᠦᠨᠳᠦᠰᠦᠯᠡᠵᠦ᠂ ᠲᠡᠦᠬᠡᠨ ᠬᠡᠷᠡᠭ ᠢ᠋ ᠲᠣᠭᠠᠴᠢᠨ ᠥᠭᠦᠯᠡᠵᠡᠢ᠂ ᠲᠡᠢᠨ ᠬᠦ᠌ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠡᠨᠳᠡᠭᠦᠦ ᠬᠠᠵᠠᠭᠠᠢ ᠵᠦᠢᠯᠡᠰ ᠵᠥᠩᠳᠡᠭᠡᠨ ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ᠂ ᠲᠡᠦᠬᠡᠴᠢᠳ ᠲᠡᠭᠦᠨ ᠳ᠋ᠦ᠍ ᠨᠠᠷᠢᠨ ᠮᠠᠭᠠᠳᠯᠠᠯ ᠰᠢᠭᠦᠮᠵᠢᠯᠡᠯ ᠬᠢᠯᠭᠦᠢ ᠭᠠᠷ ᠤ᠋ᠨ ᠠᠶᠠ ᠪᠠᠷ ᠠᠪᠴᠤ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠭᠡᠪᠡᠴᠦ ᠦᠯᠡᠳᠡᠮᠡᠯ ᠰᠤᠷᠪᠤᠯᠵᠢ ᠳ᠋ᠤ᠌ ᠴᠣᠭᠴᠠᠲᠤ ᠦᠯᠡᠳᠡᠮᠡᠯ (ᠵᠢᠱ᠌ᠢᠶᠡᠯᠡᠪᠡᠯ᠂ ᠬᠠᠭᠤᠴᠢ ᠣᠯᠳᠠᠪᠤᠷᠢ ᠨᠤᠭᠤᠳ ᠭᠡᠬᠦ ᠮᠡᠲᠦ)᠂ ᠪᠢᠴᠢᠭ ᠦ᠋ᠨ ᠦᠯᠡᠳᠡᠮᠡᠯ(ᠵᠢᠱ᠌ᠢᠶᠡᠯᠡᠪᠡᠯ᠂ ᠦᠨᠡᠮᠯᠡᠬᠦ ᠪᠢᠴᠢᠭ᠂ ᠳᠠᠩᠰᠠ ᠬᠠᠷᠠ ᠵᠡᠷᠭᠡ)᠂ ᠬᠡᠢᠰᠪᠦᠷᠢ ᠦᠯᠡᠳᠡᠮᠡᠯ ᠭᠡᠵᠦ ᠭᠤᠷᠪᠠᠨ ᠲᠥᠷᠥᠯ ᠵᠦᠢᠯ ᠪᠠᠢᠳᠠᠭ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠬᠡᠢᠰᠪᠦᠷᠢ ᠦᠯᠡᠳᠡᠮᠡᠯ ᠭᠡᠳᠡᠭ ᠨᠢ ᠵᠠᠩ ᠳᠠᠳᠬᠠᠯ᠂ ᠶᠣᠰᠣ ᠰᠤᠷᠲᠠᠬᠤᠨ᠂ ᠨᠡᠷᠡ ᠣᠪᠣᠭ ᠭᠡᠬᠦᠴᠢᠯᠡᠨ ᠭᠠᠷ ᠲᠤ᠌ ᠪᠠᠷᠢᠭᠳᠠᠬᠤ ᠦᠭᠡᠢ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠶᠠᠭᠤᠮᠠᠰ ᠪᠣᠯᠪᠠᠴᠤ ᠡᠷᠲᠡᠨ ᠦ᠌ ᠮᠡᠳᠡᠭᠡ ᠵᠠᠩᠭᠢ ᠶ᠋ᠢ ᠵᠣᠷᠢᠯᠭᠠ ᠦᠭᠡᠢ ᠪᠡᠷ ᠲᠡᠷᠡᠴᠢᠯᠡᠨ ᠨᠠᠢᠳᠠᠪᠤᠷᠢᠲᠠᠢ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠮᠠᠲ᠋ᠧᠷᠢᠶᠠᠯ ᠤ᠋ᠳ ᠢ᠋ ᠵᠢᠭᠠᠳᠠᠭ ᠶᠤᠮ᠃
ᠵᠠᠷᠤᠳ ᠪᠣᠯ ᠤᠷᠢᠶᠠᠩᠬᠠᠨ ᠠᠢᠮᠠᠭ ᠠ᠋ᠴᠠ ᠡᠭᠦᠰᠦᠯᠲᠡᠢ ᠭᠡᠳᠡᠭ ᠢ᠋ ᠭᠡᠷᠡᠴᠢᠯᠡᠬᠦ ᠴᠢᠬᠤᠯᠠ ᠬᠡᠢᠰᠪᠦᠷᠢ ᠦᠯᠡᠳᠡᠮᠡᠯ ᠮᠠᠨ ᠳ᠋ᠤ᠌ ᠣᠯᠳᠠᠵᠤ ᠪᠠᠢᠨᠠ᠃ ᠲᠡᠷᠡ ᠨᠢ ᠶᠠᠭᠤ ᠪᠣᠢ? ᠭᠡᠪᠡᠯ᠂ ᠵᠠᠷᠤᠳ ᠤ᠋ᠨ ᠤᠵᠠᠭᠤᠷ ᠡᠷᠲᠡᠨ ᠡᠴᠡ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠴᠠᠬᠢᠯᠭᠠᠨ ᠲᠡᠭᠷᠢ ᠶ᠋ᠢᠨ ᠲᠠᠬᠢᠯᠭᠠ᠃ ᠡᠨᠡᠬᠦ ᠲᠠᠬᠢᠯᠭᠠ ᠶ᠋ᠢᠨ ᠲᠤᠬᠠᠢ ᠪᠥᠬᠡ ᠶ᠋ᠢᠨ ᠰᠤᠳᠤᠯᠤᠯ ᠳ᠋ᠤ᠌ ᠮᠡᠷᠭᠡᠰᠢᠭᠰᠡᠨ ᠵᠠᠷᠤᠳ ᠡᠷᠳᠡᠮᠲᠡᠨ ᠨᠢᠮᠠ ᠳᠠᠷᠠᠭᠠᠬᠢ ᠮᠡᠲᠦ ᠮᠡᠳᠡᠭᠡᠯᠡᠭᠰᠡᠨ ᠪᠠᠢᠨᠠ ᠄ ᠴᠠᠬᠢᠯᠭᠠᠨ ᠲᠡᠭᠷᠢ ᠶ᠋ᠢᠨ ᠲᠠᠬᠢᠯᠭᠠ ᠶ᠋ᠢ ᠪᠥᠬᠡ ᠶ᠋ᠢᠨ ᠳᠣᠲᠣᠷᠠᠬᠢ ᠤᠳᠤᠮ ᠤ᠋ᠨ ᠪᠥᠬᠡ ᠬᠢᠵᠦ ᠭᠦᠢᠴᠡᠳᠬᠡᠳᠡᠭ᠃ ᠤᠳᠤᠮ ᠤ᠋ᠨ ᠪᠥᠬᠡ ᠭᠡᠳᠡᠭ ᠨᠢ ᠪᠥᠬᠡ ᠶ᠋ᠢᠨ ᠰᠠᠬᠢᠭᠤᠰᠤ ᠨᠢᠭᠡᠨ ᠣᠪᠣᠭ ᠤ᠋ᠨ ᠳᠣᠲᠣᠷᠠ ᠦᠶᠡ ᠤᠯᠠᠷᠢᠨ ᠣᠷᠣᠰᠢᠨ ᠰᠠᠭᠤᠳᠠᠭ ᠢ᠋ ᠬᠡᠯᠡᠨᠡ᠃ ᠤᠳᠤᠮ ᠤ᠋ᠨ ᠪᠥᠬᠡ ᠶ᠋ᠢᠨ ᠳᠣᠲᠣᠷᠠ ᠦᠶᠡ ᠠᠯᠤᠰᠯᠠᠬᠤ ᠦᠭᠡᠢ ᠡᠴᠢᠭᠡ ᠬᠥᠪᠡᠭᠦᠨ ᠵᠠᠯᠭᠠᠵᠤ ᠰᠠᠭᠤᠭᠰᠠᠨ ᠨᠢ ᠨᠡᠩ ᠶᠡᠬᠡ ᠬᠦᠨᠳᠦᠲᠡᠢ᠃ ᠡᠢᠮᠦᠷᠬᠦᠦ ᠪᠥᠬᠡ ᠨᠢ ᠪᠥᠬᠡ ᠶ᠋ᠢᠨ ᠪᠦᠬᠦ ᠠᠵᠢᠯᠯᠠᠭᠠ ᠶ᠋ᠢ ᠭᠦᠢᠴᠡᠳᠬᠡᠬᠦ ᠡᠴᠡ ᠭᠠᠳᠠᠨᠠ ᠣᠯᠠᠩᠬᠢ ᠳ᠋ᠤ᠌ ᠪᠠᠨ ᠲᠡᠭᠷᠢ ᠲᠠᠬᠢᠬᠤ ᠠᠵᠢᠯ ᠢ᠋ ᠬᠢᠳᠡᠭ᠃ ᠲᠡᠭᠷᠢ ᠶ᠋ᠢ ᠪᠤᠷᠤᠭᠤᠰᠢᠶᠠᠨ ᠳᠣᠩᠭᠣᠳᠬᠤ ᠣᠨᠴᠠ ᠡᠷᠬᠡ ᠲᠡᠢ᠃ ᠴᠠᠬᠢᠯᠭᠠᠨ ᠲᠡᠭᠷᠢ ᠶ᠋ᠢ ᠲᠡᠳᠡ ᠳᠠᠬᠢᠳᠠᠭ᠃ ᠴᠠᠬᠢᠯᠭᠠᠨ ᠲᠡᠭᠷᠢ ᠶ᠋ᠢᠨ ᠲᠠᠬᠢᠯᠭᠠ ᠣᠯᠠᠩᠬᠢ ᠳ᠋ᠤ᠌ ᠪᠠᠨ ᠵᠤᠨ ᠤ᠋ ᠵᠢᠷᠭᠤᠭᠠ᠂ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠬᠤᠷᠠ ᠪᠣᠷᠣᠭᠠᠨ ᠶᠡᠬᠡ᠂ ᠠᠶᠤᠩᠭᠠ ᠲᠣᠭᠰᠢᠨ ᠦᠶᠡ ᠳ᠋ᠦ᠍ ᠲᠣᠬᠢᠶᠠᠯᠳᠤᠳᠠᠭ᠃ ᠬᠡᠵᠢᠶᠡ ᠬᠠᠮᠢᠭᠠ ᠲᠡᠭᠷᠢ ᠪᠠᠭᠤᠭᠰᠠᠨ ᠪᠣᠯ ᠮᠥᠨ ᠲᠡᠷᠡ ᠡᠳᠦᠷ᠂ ᠮᠥᠨ ᠲᠡᠷᠡ ᠭᠠᠵᠠᠷ ᠨᠢ ᠪᠥᠬᠡ ᠵᠠᠯᠠᠵᠤ ᠲᠠᠬᠢᠯᠭᠠ ᠬᠢᠳᠡᠭ ᠶᠣᠰᠣ ᠲᠠᠢ᠃ ᠡᠢᠮᠦ ᠲᠠᠬᠢᠯᠭᠠ ᠪᠠᠷ ᠪᠥᠬᠡ ᠵᠠᠯᠠᠬᠤ ᠬᠥᠮᠦᠨ ᠪᠥᠬᠡ ᠶ᠋ᠢᠨ ᠡᠭᠦᠳᠡᠨ ᠳᠡᠭᠡᠷᠡ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠣᠴᠢᠵᠤ ᠮᠣᠷᠢ ᠪᠠᠨ ᠦᠭᠡ ᠳᠠᠭᠤᠨ ᠦᠭᠡᠢ ᠭᠠᠳᠠᠨᠠ ᠨᠢ ᠤᠶᠠᠵᠤ ᠥᠭᠭᠦᠭᠡᠳ ᠱᠣᠩ ᠳᠡᠭᠡᠷᠡ ᠨᠢ ᠬᠠᠳᠠᠭ ᠡᠯᠭᠦᠭᠡᠳ ᠭᠡᠷ ᠲᠦ᠍ ᠨᠢ ᠣᠷᠣᠬᠤ ᠦᠭᠡᠢ ᠪᠤᠴᠠᠵᠤ ᠶᠠᠪᠤᠨᠠ᠃ ᠡᠨᠡ ᠪᠠᠢᠳᠠᠯ ᠢ᠋ ᠦᠵᠡᠮᠡᠭᠴᠡ ᠪᠥᠬᠡ ᠤᠴᠢᠷ ᠢ᠋ ᠮᠡᠳᠡᠵᠦ ᠲᠡᠷᠡ ᠳᠣᠣᠷᠠ ᠪᠠᠨ ᠲᠠᠬᠢᠯᠭᠠ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠲᠠᠷᠠᠭ (ᠡᠭᠡᠳᠡᠭᠰᠡᠨ ᠰᠦ ᠪᠠ ᠲᠦᠭᠦᠬᠡᠢ ᠰᠦ ᠶ᠋ᠢᠨ ᠬᠣᠯᠢᠮᠠᠯ)ᠬᠣᠶᠠᠷ ᠮᠣᠳᠣᠨ ᠠᠶᠠᠭᠠ᠂ ᠵᠢᠳᠠ (ᠬᠢᠲᠤᠭᠠ) ᠠᠪᠴᠤ ᠰᠠᠶᠢ ᠶ᠋ᠢᠨ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠮᠣᠷᠢ ᠶ᠋ᠢ ᠤᠨᠤᠭᠠᠳ ᠡᠯᠭᠦᠭᠰᠡᠨ ᠬᠠᠳᠠᠭ ᠢ᠋ ᠨᠢ ᠲᠠᠰᠢᠭᠤᠷ ᠤ᠋ᠨ ᠡᠰᠢ ᠪᠡᠷ ᠡᠯᠭᠦᠨ ᠠᠪᠴᠤ ᠡᠪᠦᠷᠲᠦᠯᠡᠭᠡᠳ ᠢᠷᠡᠭᠰᠡᠨ ᠬᠥᠮᠦᠨ ᠦ᠌ ᠠᠷᠤ ᠠ᠋ᠴᠠ ᠰᠢᠷᠦᠭᠦᠨ ᠳᠠᠪᠬᠢᠭᠤᠯᠵᠤ ᠣᠳᠤᠨᠠ᠃ ᠪᠥᠬᠡ ᠲᠡᠭᠷᠢ ᠪᠠᠭᠤᠭᠰᠠᠨ ᠭᠠᠵᠠᠷ ᠳᠠᠪᠬᠢᠭᠤᠯᠵᠤ ᠬᠦᠷᠪᠡᠯ ᠮᠣᠷᠢᠨ ᠠ᠋ᠴᠠ ᠪᠠᠨ ᠶᠡᠬᠡᠯᠡ ᠠᠭᠤᠷ ᠬᠢᠯᠢᠩ ᠲᠡᠢ ᠰᠢᠷᠦᠭᠦᠨ ᠪᠠᠭᠤᠵᠤ (ᠶᠡᠷᠡ ᠶᠢᠰᠦᠨ ᠲᠡᠭᠷᠢ ᠶ᠋ᠢᠨ ᠠᠯᠢ ᠲᠡᠭᠷᠢ ᠨᠢ ᠪᠠᠭᠤᠭᠰᠠᠨ ᠶᠤᠮ? ᠭᠡᠵᠦ ᠪᠠᠷᠬᠢᠷᠠᠵᠤ ᠬᠠᠰᠬᠢᠷᠳᠠᠭ ᠪᠥᠭᠡᠳ᠄ ᠪᠣᠷᠣᠭᠠᠨ ᠬᠤᠷᠠ ᠣᠷᠣᠭᠤᠯᠬᠤ ᠪᠠᠷ ᠢ᠋ᠶ᠋ᠠᠨ ᠤᠷᠤᠭᠤᠯ ᠳᠠ ᠪᠠᠭᠤᠬᠤ ᠦᠭᠡᠢ ᠭᠠᠵᠠᠷ ᠪᠠᠭᠤᠵᠤ ᠪᠦᠭᠦᠳᠡ ᠣᠯᠠᠨ ᠢ᠋ ᠦᠢᠮᠡᠭᠦᠯᠳᠡᠭ ᠨᠢ ᠶᠠᠭᠤ ᠶᠤᠮ? ᠭᠡᠵᠦ ᠲᠡᠭᠷᠢ ᠶ᠋ᠢ ᠵᠢᠮᠡᠯᠡᠨᠡ᠃ ᠪᠥᠬᠡ ᠨᠢ ᠲᠡᠭᠷᠢ ᠪᠠᠭᠤᠬᠤ ᠶ᠋ᠢ ᠲᠡᠭᠷᠢ ᠲᠠᠭᠠᠯᠠᠵᠤ ᠪᠠᠢᠨᠠ ᠭᠡᠵᠦ ᠴᠦ᠍ ᠬᠡᠯᠡᠳᠡᠭ᠃ ᠲᠡᠭᠷᠢ ᠶ᠋ᠢ ᠪᠤᠷᠤᠭᠤᠰᠢᠶᠠᠨ ᠵᠢᠮᠡᠯᠡᠵᠦ ᠪᠠᠷᠠᠪᠠᠯ ᠡᠷᠭᠢᠭᠡᠳ ᠠᠪᠠᠴᠢᠭᠰᠠᠨ ᠰᠠᠪᠠ ᠲᠠᠢ ᠲᠠᠷᠠᠭ ᠠ᠋ᠴᠠ ᠪᠠᠨ ᠬᠣᠶᠠᠷ ᠮᠣᠳᠣᠨ ᠠᠶᠠᠭᠠ ᠬᠢᠵᠦ ᠠᠪᠤᠭᠠᠳ ᠄ ᠵᠠ᠂ ᠲᠠᠭᠠᠯᠠᠬᠤ ᠶ᠋ᠢᠨ ᠴᠢᠨᠢ ᠲᠠᠪᠠ ᠪᠠᠷ ᠲᠠᠷᠠᠭ ᠡᠷᠭᠦᠶᠡ! ᠭᠡᠵᠦ ᠬᠣᠶᠠᠷ ᠠᠶᠠᠭᠠ ᠲᠠᠢ ᠲᠠᠷᠠᠭ ᠢ᠋ᠶ᠋ᠠᠨ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠨᠢ᠂ ᠬᠠᠢ᠂ ᠬᠠᠢ ᠭᠡᠵᠦ ᠠᠰ ᠳᠡᠭᠡᠭᠰᠢ ᠰᠢᠳᠡᠳᠡᠭ᠃ ᠡᠨᠡ ᠨᠢ ᠲᠡᠭᠷᠢ ᠳ᠋ᠦ᠍ ᠥᠭᠴᠦ ᠪᠠᠢᠬᠤ ᠤᠬᠠᠭᠠᠨ ᠲᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠥᠨᠥᠬᠢ ᠬᠣᠶᠠᠷ ᠠᠶᠠᠭᠠ ᠢᠷᠣᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠭᠤᠵᠤ ᠢᠷᠡᠭᠡᠳ ᠪᠥᠬᠡ ᠶ᠋ᠢᠨ ᠡᠮᠦᠨᠡ ᠤᠨᠠᠬᠤ ᠳ᠋ᠤ᠌ ᠳᠣᠲᠣᠷᠠᠬᠢ ᠲᠠᠷᠠᠭ ᠨᠢ ᠠᠰᠠᠭᠳᠠᠭ ᠦᠭᠡᠢ ᠭᠡᠨᠡ᠃ ᠡᠭᠦᠨ ᠡᠴᠡ ᠨᠢ ᠦᠵᠡᠪᠡᠯ᠂ ᠲᠡᠷᠡ ᠪᠥᠬᠡ ᠵᠣᠬᠢᠬᠤ ᠪᠣᠯᠪᠠᠰᠤᠷᠠᠯ ᠬᠦᠷᠲᠡᠭᠰᠡᠨ ᠪᠠᠢᠨᠠ᠃ ᠁ ᠲᠠᠬᠢᠯᠭᠠ ᠬᠢᠵᠦ ᠪᠠᠢᠭᠠ ᠦᠶᠡᠰ ᠣᠢᠷᠠ ᠣᠷᠴᠢᠮ ᠤ᠋ᠨ ᠬᠥᠮᠦᠰ ᠠᠷᠪᠢᠨ ᠴᠤᠭᠯᠠᠷᠠᠵᠤ ᠬᠤᠪᠢ ᠬᠤᠪᠢ ᠪᠠᠷ ᠢ᠋ᠶ᠋ᠠᠨ ᠴᠠᠭᠠᠨ ᠤᠯᠠᠭᠠᠨ ᠢᠳᠡᠭᠡᠨ ᠦ᠌ ᠳᠡᠭᠡᠵᠢ ᠡᠷᠭᠦᠵᠦ ᠲᠡᠭᠷᠢ ᠳ᠋ᠦ᠍ ᠵᠠᠯᠪᠠᠷᠢᠨ ᠮᠥᠷᠭᠥᠨᠡ᠃ ᠲᠡᠭᠷᠢ ᠶ᠋ᠢᠨ ᠭᠠᠯ ᠳ᠋ᠤ᠌ ᠠᠯᠠᠭᠳᠠᠭᠰᠠᠨ ᠬᠥᠮᠦᠨ᠂ ᠮᠠᠯ ᠤ᠋ᠨ ᠭᠡᠷ ᠦ᠋ᠨ ᠡᠵᠡᠨ ᠬᠣᠨᠢᠨ ᠰᠢᠭᠦᠰᠦ ᠭᠠᠷᠭᠠᠵᠤ ᠲᠠᠬᠢᠯ ᠲᠠᠯᠪᠢᠳᠠᠭ ᠪᠥᠭᠡᠳ ᠬᠣᠶᠠᠷ ᠠᠶᠠᠭᠠ ᠲᠠᠢ ᠲᠠᠷᠠᠭ ᠢ᠋ᠶ᠋ᠠᠨ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌ ᠰᠠᠴᠤᠭᠠᠳ ᠲᠠᠬᠢᠯᠭᠠ ᠶ᠋ᠢ ᠲᠡᠭᠦᠰᠬᠡᠳᠡᠭ ᠶᠦ᠍ᠮ᠃ ᠡᠢᠮᠦᠷᠬᠦᠦ ᠲᠠᠬᠢᠯᠭᠠ ᠵᠠᠷᠤᠳ᠂ ᠪᠠᠭᠠᠷᠢᠨ᠂ ᠬᠣᠷᠴᠢᠨ ᠪᠠ ᠣᠷᠳᠣᠰ ᠲᠤ᠌ ᠪᠠᠢᠳᠠᠭ᠃ ᠤᠷᠳᠤᠰᠴᠤᠳ ᠲᠡᠳᠡᠨ ᠢ᠋ ᠳᠠᠭᠤᠳᠠᠭᠠᠴᠢ ᠭᠡᠵᠦ᠂ ᠬᠣᠷᠴᠢᠨᠴᠣᠳ ᠬᠤᠸᠠᠨ ᠲᠢᠶᠠᠨ ᠭᠡᠳᠡᠭ᠃ ᠪᠠᠭᠠᠷᠢᠨ ᠤ᠋ ᠤᠳᠤᠮ ᠤ᠋ᠨ ᠪᠥᠬᠡ ᠨᠠᠷ ᠴᠠᠬᠢᠯᠭᠠᠨ ᠲᠡᠭᠷᠢ ᠶ᠋ᠢᠨ ᠲᠠᠬᠢᠯᠭᠠ ᠳ᠋ᠤ᠌ ᠲᠡᠭᠷᠢ ᠨᠠᠷ ᠢ᠋ ᠪᠤᠷᠤᠭᠤᠰᠢᠶᠠᠨ ᠵᠢᠮᠡᠯᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠬᠠᠶᠠ ᠵᠠᠷᠢᠮ ᠳ᠋ᠤ᠌ ᠪᠠᠨ ᠬᠠᠷᠢᠶᠠᠬᠤ ᠤᠳᠠᠭᠠ ᠭᠠᠷᠳᠠᠭ ᠭᠡᠨᠡ᠃ ᠨᠢᠮᠠ ᠄ ᠪᠥᠬᠡ ᠮᠥᠷᠭᠥᠯ ᠦ᠋ᠨ ᠲᠤᠬᠠᠢ ᠬᠡᠳᠦᠨ ᠠᠰᠠᠭᠤᠳᠠᠯ᠂ ᠪᠣᠷᠵᠢᠭᠢᠳᠠᠢ ᠣᠶᠣᠨᠪᠢᠯᠢᠭ᠌᠂ ᠯ ᠨᠠᠷᠠᠩᠭᠤᠸᠠ ᠨᠠᠢᠷᠠᠭᠤᠯᠤᠭᠰᠠᠨ ᠄ ᠡᠯᠪᠡᠭ ᠪᠦᠲᠦᠭᠡᠯ ᠫᠷᠣᠹᠧᠰᠰᠣᠷ ᠳ᠋ᠣᠺᠲ᠋ᠣᠷ ᠵᠠᠭᠴᠢᠳ ᠰᠡᠴᠡᠨ ᠦ᠌ ᠨᠠᠶᠠᠨ ᠨᠠᠰᠤᠨ ᠤ᠋ ᠣᠢ ᠳ᠋ᠤ᠌᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 1996 ᠣᠨ᠂(271 ᠡᠴᠡ 275 ᠳ᠋ᠤᠭᠠᠷ ᠬᠠᠭᠤᠳᠠᠰᠤ)᠃
ᠪᠢ ᠥᠪᠡᠷ ᠢ᠋ᠶ᠋ᠡᠨ ᠵᠠᠷᠤᠳ ᠲᠤ᠌ ᠬᠢᠭᠰᠡᠨ ᠪᠠᠢᠴᠠᠭᠠᠯᠲᠠ ᠶ᠋ᠢ ᠦᠨᠳᠦᠰᠦᠯᠡᠪᠡᠯ᠂ ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠬᠡᠯᠡᠳᠡᠭ ᠤᠳᠤᠮ ᠤ᠋ᠨ ᠪᠥᠬᠡ ᠶ᠋ᠢ ᠵᠠᠷᠤᠳ ᠲᠤ᠌ ᠠᠳᠠᠯᠢᠬᠠᠨ ᠳᠠᠭᠤᠳᠠᠭᠠᠴᠢᠨ ᠭᠡᠳᠡᠭ ᠪᠠᠢᠨᠠ᠃ ᠵᠠᠷᠤᠳ ᠬᠤᠰᠢᠭᠤᠨ ᠤ᠋ ᠤᠯᠠᠭᠠᠨᠬᠠᠳᠠ ᠰᠤᠮᠤᠨ ᠤ᠋ ᠰᠠᠢᠪᠤᠷ ᠭᠠᠴᠠᠭᠠᠨ ᠳ᠋ᠤ᠌ ᠨᠢᠭᠡᠨ ᠳᠠᠭᠤᠳᠠᠭᠠᠴᠢᠨ᠌ ᠠᠢᠯ ᠪᠠᠢᠭᠰᠠᠨ᠂ ᠦᠷᠡ ᠬᠡᠦᠬᠡᠳ ᠨᠢ ᠣᠳᠣ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠨ ᠠᠮᠢᠳᠤᠷᠠᠬᠤ ᠨᠢ ᠠᠮᠢᠳᠤᠷᠠᠵᠤ᠂ ᠬᠥᠬᠡᠬᠣᠲᠠ ᠳ᠋ᠤ᠌ ᠪᠠᠢᠬᠤ ᠨᠢ ᠪᠠᠢᠨᠠ᠃ ᠲᠡᠳᠡ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠨ ᠳᠠᠭᠤᠳᠠᠭᠠᠴᠢᠨ ᠶᠠᠪᠤᠭᠰᠠᠨ ᠢ᠋ ᠮᠠᠰᠢ ᠲᠣᠳᠣᠷᠬᠠᠢ ᠳᠤᠷᠠᠰᠤᠨ ᠶᠠᠷᠢᠵᠤ ᠪᠣᠢ ᠪᠥᠭᠡᠳ ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠬᠢ ᠨᠢ ᠪᠢᠴᠢᠵᠦ ᠦᠯᠡᠳᠡᠭᠡᠭᠰᠡᠨ ᠵᠦᠢᠯ ᠢ᠋ ᠴᠦ᠍ ᠪᠠᠭᠠ ᠰᠠᠭᠠ ᠬᠠᠳᠠᠭᠠᠯᠠᠵᠤ ᠪᠣᠢ᠃ ᠡᠨᠡᠬᠦ ᠠᠢᠯ ᠤᠷᠢᠶᠠᠩᠬᠠᠨ ᠣᠪᠣᠭ ᠲᠠᠢ᠂ ᠦᠶᠡ ᠦᠶᠡ ᠪᠡᠷ ᠢ᠋ᠶ᠋ᠡᠨ ᠳᠠᠭᠤᠳᠠᠭᠠᠴᠢᠨ ᠶᠠᠪᠤᠭᠰᠠᠨ ᠠᠵᠢ᠃ ᠲᠡᠳᠡᠨ ᠦ᠌ ᠡᠪᠦᠭᠡ ᠳᠡᠭᠡᠳᠦᠰ ᠤᠤᠯ ᠳ᠋ᠤ᠌ ᠪᠠᠨ ᠮᠣᠳᠣ ᠰᠤᠮᠤᠨ ᠤ᠋ ᠨᠠᠷᠠᠨ ᠭᠠᠴᠠᠭᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠭᠡᠳᠡᠭ᠃ ᠲᠡᠳᠡᠨ ᠦ᠌ ᠳᠡᠭᠡᠳᠦᠰ ᠦ᠋ᠨ ᠣᠩᠭᠣᠨ ᠨᠢ ᠪᠠᠶᠠᠷᠳᠤᠬᠣᠰᠢᠭᠤ ᠰᠤᠮᠤᠨ ᠤ᠋ ᠡᠮᠦᠨᠡ ᠪᠡᠶᠡ ᠶ᠋ᠢᠨ ᠪᠤᠷᠤᠯᠵᠢᠨ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠳ᠋ᠤ᠌ ᠪᠠᠢᠳᠠᠭ᠃ ᠰᠡᠭᠦᠯᠡᠷ ᠨᠢ᠂ ᠤᠯᠠᠭᠠᠨᠬᠠᠳᠠ ᠶ᠋ᠢᠨ ᠬᠣᠷᠣᠭᠠ ᠶ᠋ᠢᠨ ᠠᠢᠯ ᠳ᠋ᠤ᠌ ᠨᠡᠭᠦᠵᠦ᠂ ᠲᠡᠨᠳᠡ ᠭᠠᠳᠠᠨᠠ ᠬᠤᠰᠢᠭᠤᠨ ᠤ᠋ ᠬᠥᠮᠦᠰ ᠣᠯᠠᠰᠢᠷᠠᠬᠤ ᠪᠠᠷ ᠨᠢ ᠪᠠᠰᠠ ᠨᠡᠭᠦᠵᠦ᠂ ᠥᠪᠥᠷ ᠬᠥᠨᠳᠡᠯᠡᠨ ᠭᠣᠣᠯ ᠤ᠋ᠨ ᠬᠣᠢᠲᠤ ᠬᠥᠪᠡᠭᠡᠨ ᠦ᠌ ᠰᠠᠢᠪᠤᠷ ᠭᠠᠴᠠᠭᠠᠨ ᠳ᠋ᠤ᠌ ᠢᠷᠡᠵᠡᠢ᠃ ᠮᠢᠨᠦ ᠰᠤᠷᠪᠤᠯᠵᠢᠯᠠᠭᠰᠠᠨ ᠡᠨᠡ ᠭᠡᠷ ᠦ᠋ᠨ ᠬᠥᠮᠦᠰ ᠦ᠋ᠨ ᠬᠡᠯᠡᠬᠦ ᠪᠡᠷ᠂ ᠨᠠᠭᠠᠴᠤ ᠡᠮᠡᠭᠡ ᠪᠠ ᠡᠯᠦᠨᠴᠡ ᠡᠮᠡᠭᠡ ᠨᠢ ᠪᠦᠷ ᠳᠠᠷᠬᠠᠨ ᠬᠤᠰᠢᠭᠤᠨ ᠤ᠋ ᠪᠣᠷᠵᠢᠭᠢᠨ ᠣᠪᠣᠭᠲᠤ ᠤᠯᠤᠰ ᠪᠥᠭᠡᠳ ᠲᠡᠳᠡᠨ ᠢ᠋ ᠪᠠᠭᠠ ᠪᠠᠢᠬᠤ ᠳ᠋ᠤ᠌ ᠨᠢ ᠲᠠᠨᠠᠢᠬᠢ ᠪᠣᠯ ᠬᠠᠭᠤᠴᠢᠨ ᠵᠠᠷᠤᠳ ᠤᠯᠤᠰ᠂ ᠳᠠᠭᠤᠳᠠᠭᠠᠴᠢᠨ ᠠᠢᠮᠠᠭ᠂ ᠡᠪᠦᠭᠡ ᠠᠪᠤ ᠠ᠋ᠴᠠ ᠴᠢᠨᠢ ᠳᠡᠭᠡᠭᠰᠢ ᠦᠶᠡ ᠤᠯᠠᠷᠢᠨ ᠳᠠᠭᠤᠳᠠᠭᠠᠴᠢᠨ ᠶᠠᠪᠤᠭᠰᠠᠨ᠃ ᠲᠠᠨᠠᠢᠬᠢᠨ ᠬᠡᠯᠡ ᠠᠮᠠ ᠬᠠᠲᠠᠭᠤ ᠲᠠᠢ ᠤᠯᠤᠰ᠂ ᠪᠤᠰᠤᠳ ᠠᠢᠯ ᠠᠢᠮᠠᠭ ᠤ᠋ᠨ ᠬᠥᠮᠦᠰ ᠲᠠᠨᠠᠢᠬᠢᠨ ᠲᠠᠢ ᠦᠭᠡ ᠠᠮᠠ ᠵᠥᠷᠢᠬᠦ ᠡᠴᠡ ᠪᠡᠨ ᠠᠶᠤᠵᠤ ᠵᠢᠷᠦᠬᠡᠰᠢᠶᠡᠳᠡᠭ ᠶᠦ᠍ᠮ᠃ ᠲᠡᠭᠷᠢ ᠳᠤᠤᠭᠠᠷᠴᠤ ᠠᠶᠤᠩᠭᠠ ᠪᠠᠭᠤᠭᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠳᠠᠭᠤᠳᠠᠭᠠᠴᠢᠨ ᠮᠣᠷᠢᠲᠠᠢ ᠳᠠᠪᠬᠢᠭᠤᠯᠵᠤ ᠲᠡᠭᠷᠢ ᠶ᠋ᠢ ᠵᠠᠩᠨᠠᠨ ᠵᠢᠮᠡᠯᠡᠵᠦ ᠬᠠᠷᠢᠶᠠᠨ ᠳᠣᠩᠭᠣᠳᠳᠠᠭ᠃ ᠡᠨᠡ ᠨᠢ ᠲᠡᠳᠡᠨ ᠦ᠌ ᠣᠨᠴᠠ ᠡᠷᠬᠡ᠃ ᠲᠡᠭᠷᠢ ᠪᠠᠭᠤᠭᠰᠠᠨ ᠭᠠᠵᠠᠷ ᠣᠴᠢᠵᠤ ᠳᠣᠩᠭᠣᠳᠤᠨ ᠵᠢᠮᠡᠯᠡᠵᠦ ᠶᠣᠰᠣᠯᠠᠯ ᠬᠢᠭᠰᠡᠨ ᠬᠣᠢᠨᠠ ᠰᠠᠢᠬᠠᠨ ᠪᠣᠷᠣᠭᠠᠨ ᠣᠷᠣᠳᠠᠭ ᠭᠡᠵᠦ ᠬᠡᠯᠡᠵᠦ ᠥᠭᠴᠦ ᠪᠠᠢᠪᠠ᠃ ᠲᠡᠳᠡᠨ ᠦ᠌ ᠬᠡᠯᠡᠬᠦ ᠪᠡᠷ᠂ 1975 ᠣᠨ ᠤ᠋ ᠵᠤᠨ ᠬᠤᠤᠯᠢᠨ ᠭᠣᠣᠯ ᠬᠠᠪᠢ ᠶ᠋ᠢᠨ ᠣᠲᠣᠷ ᠨᠡᠭᠦᠳᠡᠯ ᠳᠡᠭᠡᠷᠡ ᠡᠨᠡ ᠠᠢᠯ ᠤ᠋ᠨ ᠬᠠᠰᠠᠭ ᠲᠡᠷᠭᠡᠨ ᠳᠡᠭᠡᠷᠡ ᠠᠶᠤᠩᠭᠠ ᠳᠠᠭᠠᠷᠢᠵᠤ (ᠲᠡᠭᠷᠢ ᠪᠠᠭᠤᠭᠰᠠᠨ ᠭᠡᠵᠦ ᠬᠡᠯᠡᠵᠦ ᠪᠣᠢ)᠂ ᠲᠡᠷᠭᠡᠨ ᠳᠣᠣᠷᠠ ᠪᠣᠷᠣᠭᠠᠨ ᠠ᠋ᠴᠠ ᠳᠠᠯᠳᠠᠯᠠᠵᠤ ᠪᠠᠢᠭᠰᠠᠨ ᠭᠡᠷ ᠦ᠋ᠨ ᠬᠥᠮᠦᠰ ᠢ᠋ ᠨᠢ ᠬᠣᠯᠠ ᠰᠢᠳᠡᠨ ᠭᠠᠷᠭᠠᠵᠤ᠂ ᠨᠢᠭᠡ ᠡᠷᠡᠭᠲᠡᠢ ᠬᠡᠦᠬᠡᠳ ᠠᠮᠢ ᠡᠨᠳᠡᠭᠰᠡᠨ ᠪᠠᠢᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠡᠨᠡ ᠶᠠᠪᠤᠳᠠᠯ ᠭᠠᠷᠤᠭᠰᠠᠨ ᠤ᠋ ᠰᠢᠯᠲᠠᠭᠠᠨ ᠪᠣᠯ ᠰᠣᠶᠣᠯ ᠤ᠋ᠨ ᠬᠤᠪᠢᠰᠬᠠᠯ ᠠ᠋ᠴᠠ ᠰᠡᠭᠦᠯᠡᠷ ᠡᠨᠡ ᠠᠢᠯ ᠤ᠋ᠨ ᠬᠢᠨ ᠳᠠᠭᠤᠳᠠᠭᠠᠴᠢᠨ ᠤ᠋ ᠴᠡᠭᠡᠷ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠠ᠋ᠴᠠ ᠪᠣᠯᠵᠠᠢ ᠭᠡᠵᠦ ᠨᠠᠭᠠᠴᠤ ᠨᠠᠷ ᠨᠢ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠭᠡᠳᠡᠭ᠃ ᠲᠡᠳᠡᠨ ᠦ᠌ ᠬᠡᠯᠡᠬᠦ ᠪᠡᠷ ᠳᠠᠭᠤᠳᠠᠭᠠᠴᠢᠨ ᠠᠢᠮᠠᠭ ᠤ᠋ᠨ ᠬᠢᠨ ᠳᠡᠯᠢᠭᠦᠦ ᠢᠳᠡᠪᠡᠯ ᠳᠡᠯᠪᠡᠷᠡᠵᠦ ᠦᠬᠦᠨᠡ᠂ ᠣᠯᠣᠭᠠᠢ ᠢᠳᠡᠪᠡᠯ ᠣᠭᠰᠢᠭᠤᠯᠵᠤ ᠦᠬᠦᠨᠡ ᠭᠡᠵᠦ ᠮᠠᠯ ᠤ᠋ᠨ ᠳᠡᠯᠢᠭᠦᠦ ᠣᠯᠣᠭᠠᠢ ᠢᠳᠡᠬᠦ ᠦᠭᠡᠢ ᠴᠢᠩᠭᠠ ᠴᠡᠭᠡᠷ ᠲᠡᠢ ᠭᠡᠨᠡ᠃ ᠣᠯᠠᠨ ᠤ᠋ ᠮᠡᠳᠡᠭᠡᠵᠢ ᠪᠡᠷ᠂ ᠥᠨᠥᠳᠥᠷ ᠦ᠋ᠨ ᠵᠠᠷᠤᠳ ᠬᠤᠰᠢᠭᠤᠨ ᠤ᠋ ᠤᠯᠠᠭᠠᠨᠬᠠᠳᠠ ᠰᠤᠮᠤᠨ ᠤ᠋ ᠶᠡᠬᠡᠩᠬᠢ ᠬᠡᠰᠡᠭ ᠨᠢ ᠬᠣᠷᠴᠢᠨ ᠵᠡᠭᠦᠨ ᠭᠠᠷ ᠤ᠋ᠨ ᠳᠤᠮᠳᠠᠳᠤ ᠬᠤᠰᠢᠭᠤᠨ ᠤ᠋ ᠨᠤᠲᠤᠭ᠂ 1947 ᠣᠨ ᠠ᠋ᠴᠠ ᠰᠡᠭᠦᠯᠡᠷ ᠵᠠᠷᠤᠳ ᠬᠤᠰᠢᠭᠤᠨ ᠳ᠋ᠤ᠌ ᠬᠤᠪᠢᠶᠠᠭᠳᠠᠨ ᠣᠷᠣᠵᠤ᠂ ᠥᠨᠥᠳᠥᠷ ᠦ᠋ᠨ ᠤᠯᠠᠭᠠᠨᠬᠠᠳᠠ ᠰᠤᠮᠤ ᠶ᠋ᠢ ᠪᠦᠷᠢᠯᠳᠦᠭᠦᠯᠵᠡᠢ᠃ ᠭᠡᠪᠡᠴᠦ᠂ ᠤᠯᠠᠭᠠᠨᠬᠠᠳᠠ ᠶ᠋ᠢᠨ ᠬᠥᠮᠦᠰ ᠪᠦᠭᠦᠳᠡ ᠭᠠᠳᠠᠷ ᠬᠤᠰᠢᠭᠤᠨ ᠠ᠋ᠴᠠ ᠢᠷᠡᠭᠰᠡᠨ ᠪᠢᠰᠢ᠂ ᠡᠨᠡ ᠳᠠᠭᠤᠳᠠᠭᠠᠴᠢᠨ ᠠᠢᠯ ᠰᠢᠭ᠋ ᠵᠠᠷᠤᠳ ᠰᠠᠭᠤᠭᠠᠯᠢ ᠤᠯᠤᠰ ᠪᠠᠰᠠ ᠨᠡᠯᠢᠶᠡᠳ ᠪᠣᠢ᠃
ᠪᠠᠶᠠᠷᠲᠤᠬᠣᠰᠢᠭᠤ ᠪᠠᠯᠭᠠᠰᠤᠨ ᠤ᠋ ᠪᠠᠷᠢᠮᠲᠠ ᠭᠠᠴᠠᠭᠠᠨ ᠳ᠋ᠤ᠌ ᠪᠠᠰᠠ ᠳᠠᠭᠤᠳᠠᠭᠠᠴᠢᠨ ᠠᠢᠮᠠᠭ ᠤ᠋ᠨ ᠬᠥᠮᠦᠰ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃ ᠲᠡᠳᠡ ᠨᠠᠷ ᠢᠷᠭᠡᠨ ᠤᠯᠤᠰ ᠤ᠋ᠨ ᠦᠶᠡ ᠶ᠋ᠢᠨ ᠵᠠᠷᠤᠳ ᠤ᠋ᠨ ᠴᠤᠤᠲᠠᠢ ᠰᠢᠰᠦ ᠮᠡᠢᠷᠡᠨ ᠦ᠌ ᠬᠣᠢᠴᠢᠰ ᠭᠡᠵᠦ ᠬᠡᠯᠡᠳᠡᠭ᠃ ᠲᠡᠳᠡᠨ ᠥᠪᠡᠷ ᠢ᠋ ᠪᠡᠨ ᠳᠠᠭᠤᠳᠠᠭᠠᠴᠢᠨ ᠠᠢᠮᠠᠭ ᠭᠡᠳᠡᠭ ᠪᠥᠭᠡᠳ ᠪᠠᠰᠠ ᠲᠢᠶᠠᠨ ᠣᠪᠣᠭᠲᠠᠢ ᠭᠡᠵᠦ ᠪᠠᠢᠨᠠ᠃ ᠮᠢᠨᠦ ᠦᠵᠡᠬᠦ ᠪᠡᠷ᠂ ᠡᠨᠡᠬᠦ ᠲᠢᠶᠠᠨ ᠣᠪᠣᠭ ᠨᠢ ᠶᠠᠭ ᠳᠠᠭᠤᠳᠠᠭᠠᠴᠢᠨ ᠢ᠋ ᠬᠢᠲᠠᠳ ᠢ᠋ᠶ᠋ᠠᠷ ᠬᠤᠸᠠᠨ ᠲᠢᠶᠠᠨ ᠭᠡᠵᠦ ᠣᠷᠴᠢᠭᠤᠯᠤᠭᠠᠳ᠂ ᠲᠡᠭᠦᠨ ᠢ᠋ᠶ᠋ᠡᠨ ᠲᠢᠶᠠᠨ ᠭᠡᠵᠦ ᠳᠥᠭᠥᠮᠴᠢᠯᠡᠵᠦ᠂ ᠤᠯᠠᠮ ᠢ᠋ᠶ᠋ᠠᠷ ᠬᠢᠲᠠᠳ ᠣᠪᠣᠭ ᠢ᠋ ᠳᠠᠭᠠᠭᠤᠯᠤᠨ ᠨᠥᠭᠦᠭᠡ ᠬᠢᠲᠠᠳ ᠣᠪᠣᠭ ᠤ᠋ᠨ ᠲᠢᠶᠠᠨ ᠢ᠋ ᠠᠪᠤᠭᠰᠠᠨ ᠪᠣᠯᠤᠯᠲᠠᠢ᠃ ᠡᠨᠡ ᠨᠢ ᠣᠷᠴᠢᠨ ᠦᠶᠡ ᠶ᠋ᠢᠨ ᠮᠣᠩᠭᠣᠯᠴᠤᠳ ᠤ᠋ᠨ ᠬᠢᠲᠠᠳ ᠣᠪᠣᠭ ᠠᠪᠬᠤ ᠵᠠᠩᠰᠢᠯ ᠲᠠᠢ ᠨᠡᠢᠴᠡᠵᠦ ᠪᠠᠢᠨᠠ᠃
ᠪᠢᠳᠡ ᠳᠠᠬᠢᠭᠠᠳ ᠰᠤᠳᠤᠷ ᠪᠢᠴᠢᠭ ᠦ᠋ᠨ ᠲᠡᠮᠳᠡᠭᠯᠡᠯ ᠳᠡᠭᠡᠷᠡ ᠪᠡᠨ ᠪᠤᠴᠠᠶᠠ᠃ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠵᠠᠭᠤᠨ ᠤ᠋ ᠡᠬᠢ ᠪᠡᠷ ᠫᠧᠸ᠋ᠷᠰ ᠲᠦ᠍ ᠵᠣᠬᠢᠶᠠᠭᠳᠠᠭᠰᠠᠨ ᠷᠠᠰᠢᠳ᠋ ᠠᠳ᠋ ᠳ᠋ᠢᠨ ᠦ᠌ ᠲᠡᠦᠬᠡᠨ ᠦ᠌ ᠴᠢᠭᠤᠯᠭᠠᠨ ᠪᠣᠯ ᠮᠣᠩᠭᠣᠯ ᠤ᠋ᠨ ᠲᠡᠦᠬᠡ ᠵᠠᠩ ᠢᠷᠭᠡᠨᠰᠢᠯ ᠢ᠋ ᠳᠡᠯᠭᠡᠷᠡᠩᠭᠦᠢ ᠪᠥᠭᠡᠳ ᠢᠲᠡᠭᠡᠭᠦᠰᠢᠲᠡᠢ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠤᠤᠲᠠᠢ ᠰᠤᠷᠪᠤᠯᠵᠢ ᠪᠢᠴᠢᠭ ᠪᠣᠯᠬᠤ ᠶᠤᠮ᠃ ᠲᠤᠰ ᠨᠣᠮ ᠤ᠋ᠨ ᠨᠢᠭᠡᠳᠦᠭᠡᠷ ᠪᠣᠳᠢ ᠳ᠋ᠤ᠌ ᠮᠣᠩᠭᠣᠯ ᠠᠢᠮᠠᠭ ᠤ᠋ᠳ ᠤ᠋ᠨ ᠣᠢᠯᠠᠪᠤᠷᠢ ᠪᠣᠢ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠮᠣᠩᠭᠣᠯ ᠣᠷᠢᠶᠠᠩᠬᠠᠨ ᠬᠡᠮᠡᠬᠦ ᠬᠡᠰᠡᠭ ᠲᠦ᠍ ᠪᠡᠨ ᠡᠢᠨ ᠬᠦ᠌ ᠲᠡᠮᠳᠡᠭᠯᠡᠵᠡᠢ᠃ ᠣᠷᠢᠶᠠᠩᠬᠠᠨᠴᠤᠳ ᠥᠪᠡᠷ ᠢ᠋ᠶ᠋ᠡᠨ ᠡᠷᠭᠦᠨᠡ ᠬᠤᠨ ᠤ᠋ ᠳᠣᠯᠣᠭᠠᠨ ᠵᠤᠤᠬᠠ ᠶ᠋ᠢ ᠨᠣᠴᠣᠭᠠᠬᠤ ᠳ᠋ᠤ᠌ ᠣᠷᠣᠯᠴᠠᠭᠰᠠᠨ ᠭᠡᠵᠦ ᠬᠡᠯᠡᠳᠡᠭ (ᠡᠨᠡ ᠨᠢ ᠮᠣᠩᠭᠣᠯᠴᠤᠳ ᠡᠷᠭᠦᠨᠡ ᠬᠤᠨ ᠤ᠋ ᠠᠰᠬᠠ ᠬᠠᠳᠠ ᠶ᠋ᠢ ᠳᠣᠯᠣᠭᠠᠨ ᠵᠤᠤᠬᠠ ᠪᠠᠷ ᠬᠠᠢᠯᠤᠭᠤᠯᠤᠨ ᠰᠡᠲᠡᠯᠵᠦ᠂ ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ᠂ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠲᠦ᠍ ᠢᠷᠡᠭᠰᠡᠨ ᠢ᠋ ᠳᠤᠷᠠᠰᠤᠭᠰᠠᠨ ᠦᠯᠢᠭᠡᠷ ᠢ᠋ ᠬᠡᠯᠡᠵᠦ ᠪᠣᠢ ᠡᠰᠢᠯᠡᠭᠴᠢ)᠃ ᠲᠡᠳᠡ ᠨᠠᠷ ᠲᠤ᠌ ᠡᠢᠮᠦ ᠨᠢᠭᠡᠨ ᠵᠠᠩᠰᠢᠯ ᠪᠣᠢ ᠄ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠮᠠᠰᠢ ᠰᠦᠷᠡᠬᠡᠢ ᠭᠠᠷᠬᠤ ᠦᠶᠡ ᠳ᠋ᠦ᠍ ᠲᠡᠳᠡ ᠨᠠᠷ ᠲᠡᠭᠷᠢ ᠶ᠋ᠢ ᠬᠠᠷᠢᠶᠠᠵᠤ᠂ ᠡᠭᠦᠯᠡ ᠶ᠋ᠢ ᠬᠠᠷᠢᠶᠠᠵᠤ᠂ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠢ᠋ ᠬᠠᠷᠢᠶᠠᠵᠤ᠂ ᠲᠡᠳᠡᠭᠡᠷ ᠦ᠋ᠨ ᠵᠦᠭ ᠪᠠᠷᠬᠢᠷᠠᠵᠤ ᠬᠠᠰᠬᠢᠷᠳᠠᠭ᠃ ᠮᠠᠯ ᠢ᠋ ᠠᠶᠤᠩᠭᠠ ᠨᠢᠷᠭᠡᠵᠦ ᠠᠯᠠᠭᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠲᠡᠳᠡ ᠲᠡᠭᠦᠨ ᠡᠴᠡ ᠵᠠᠢᠯᠠᠵᠤ ᠮᠢᠬᠠ ᠶ᠋ᠢ ᠨᠢ ᠢᠳᠡᠳᠡᠭ ᠦᠭᠡᠢ᠃ ᠢᠩᠭᠢᠪᠡᠯ ᠰᠠᠶᠢ ᠠᠶᠤᠩᠭᠠ ᠳᠤᠤᠭᠠᠷᠬᠤ ᠪᠠᠨ ᠪᠣᠯᠢᠨᠠ ᠭᠡᠵᠦ ᠢᠲᠡᠭᠡᠳᠡᠭ᠃ ᠪᠤᠰᠤᠳ ᠮᠣᠩᠭᠣᠯᠴᠤᠳ ᠪᠣᠯ ᠲᠡᠳᠡᠨ ᠡᠴᠡ ᠠᠰᠲᠠᠭᠠᠨ᠂ ᠠᠶᠤᠩᠭᠠ ᠳᠤᠤᠭᠠᠷᠬᠤ ᠦᠶᠡ ᠳ᠋ᠦ᠍ ᠭᠡᠷ ᠡᠴᠡ ᠪᠡᠨ ᠭᠠᠷᠳᠠᠭ ᠦᠭᠡᠢ ᠠᠶᠤᠵᠤ ᠰᠠᠭᠤᠳᠠᠭ᠂ ᠲᠡᠳᠡᠨᠡᠷ ᠦ᠋ᠨ ᠪᠠᠰᠠ ᠬᠡᠯᠡᠬᠦ ᠪᠡᠷ᠂ ᠵᠦᠢᠯ ᠵᠦᠢᠯ ᠦ᠋ᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠵᠤ᠂ ᠴᠢᠳᠬᠥᠷ ᠰᠢᠮᠨᠤᠰ ᠲᠡᠳᠡᠨ ᠲᠡᠢ ᠢᠷᠡᠵᠦ ᠬᠡᠯᠡᠯᠴᠡᠳᠡᠭ᠃ ᠲᠡᠷᠡ ᠨᠤᠲᠤᠭ ᠲᠤ᠌ ᠡᠢᠮᠦᠷᠬᠦᠦ ᠳᠡᠮᠡᠢ ᠪᠠᠯᠠᠢ ᠦᠭᠡ ᠶᠠᠷᠢᠶᠠ ᠵᠥᠩᠳᠡᠭᠡᠨ ᠪᠠᠢᠳᠠᠭ(ᠣᠯᠠᠨ ᠤ᠋ ᠮᠡᠳᠡᠭᠡᠵᠢ ᠪᠡᠷ᠂ ᠴᠢᠳᠬᠥᠷ ᠰᠢᠮᠨᠤᠰ ᠲᠡᠳᠡᠨ ᠲᠡᠢ ᠦᠷᠭᠦᠯᠵᠢ ᠬᠡᠯᠡᠯᠴᠡᠵᠦ ᠪᠠᠢᠳᠠᠭ) ᠪᠥᠭᠡᠳ ᠲᠣᠭᠠᠯᠠᠭᠠᠳ ᠪᠠᠷᠠᠬᠤ ᠦᠭᠡᠢ ᠪᠥᠬᠡ ᠨᠠᠷ ᠪᠠᠢᠳᠠᠭ ᠶᠤᠮ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠬᠠᠮᠤᠭ ᠤ᠋ᠨ ᠠᠯᠤᠰ ᠬᠣᠯᠠ ᠬᠢᠵᠠᠭᠠᠷ ᠭᠠᠵᠠᠷ ᠲᠤ᠌ ᠰᠠᠭᠤᠳᠠᠭ ᠬᠥᠮᠦᠰ ᠲᠡᠢ ᠵᠠᠬᠠ ᠬᠢᠯᠢ ᠵᠠᠯᠭᠠᠭᠰᠠᠨ ᠭᠠᠵᠠᠷ ᠢ᠋ ᠪᠠᠭᠲᠠᠭᠠᠨᠠ᠃ ᠲᠡᠷᠡ ᠭᠠᠵᠠᠷ ᠢ᠋ ᠪᠠᠷᠭᠤ ᠪᠤᠶᠤ ᠪᠠᠷᠭᠤᠵᠢᠨ ᠳᠥᠭᠥᠮ ᠭᠡᠨᠡ᠃ ᠲᠡᠨᠳᠡ ᠪᠥᠬᠡ ᠨᠠᠷ ᠮᠠᠰᠢ ᠣᠯᠠᠨ (ᠷᠠᠰᠢᠳ᠋ - ᠠᠳ᠋ - ᠳ᠋ᠢᠨ ᠦ᠌ ᠄ ᠲᠡᠦᠬᠡ ᠶ᠋ᠢᠨ ᠴᠢᠭᠤᠯᠭᠠᠨ᠂ ᠢᠦᠢ ᠳᠡ ᠵᠢᠶᠦ᠋ᠨ ᠨᠠᠷ ᠤ᠋ᠨ ᠬᠢᠲᠠᠳᠴᠢᠯᠠᠭᠠ᠂ ᠨᠢᠭᠡᠳᠦᠭᠡᠷ ᠪᠣᠳᠢ᠂ ᠨᠢᠭᠡᠳᠦᠭᠡᠷ ᠬᠤᠪᠢᠶᠠᠷᠢ ᠳᠡᠪᠲᠡᠷ᠂ ᠱᠠᠩ ᠡᠦ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 255 ᠠ᠋ᠴᠠ 256 ᠳ᠋ᠤᠭᠠᠷ ᠬᠠᠭᠤᠳᠠᠰᠤ) ᠭᠡᠵᠡᠢ᠃ ᠲᠣᠳᠣᠷᠬᠠᠢᠯᠠᠭᠤᠰᠢᠲᠠᠢ ᠨᠢ᠂ ᠡᠨᠳᠡ ᠬᠡᠯᠡᠵᠦ ᠪᠠᠢᠭᠠ ᠴᠢᠳᠬᠥᠷ ᠰᠢᠮᠨᠤᠰ ᠭᠡᠭᠴᠢ ᠨᠢ ᠮᠦᠰᠯᠢᠮᠴᠤᠳ ᠤ᠋ᠨ ᠦᠭᠡ᠂ ᠮᠣᠩᠭᠣᠯᠴᠤᠳ ᠤ᠋ᠨ ᠪᠥᠬᠡ ᠤᠤᠯ ᠤ᠋ᠨ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠢ᠋ ᠵᠢᠭᠠᠵᠠᠢ᠃ ᠪᠠᠰᠠ᠂ ᠡᠨᠳᠡ ᠭᠠᠷᠤᠭᠰᠠᠨ ᠪᠠᠷᠭᠤᠵᠢᠨ ᠳᠥᠭᠥᠮ ᠦ᠋ᠨ ᠤᠷᠢᠶᠠᠩᠬᠠᠭᠴᠤᠳ ᠭᠡᠰᠡᠨ ᠨᠢ ᠴᠦ᠍ ᠪᠤᠷᠤᠭᠤ ᠬᠡᠯᠡᠯᠭᠡ᠂ ᠤᠷᠢᠶᠠᠩᠬᠠᠭᠴᠤᠳ ᠪᠤᠷᠬᠠᠨ ᠬᠠᠯᠳᠤᠨ ᠳ᠋ᠤ᠌ ᠪᠠᠢᠭᠰᠠᠨ ᠠ᠋ᠴᠠ ᠪᠢᠰᠢ ᠪᠠᠷᠭᠤᠵᠢᠨ ᠳᠥᠭᠥᠮ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ(ᠵᠢᠭᠠᠴᠢᠲᠠᠢ ᠪᠤᠶᠠᠨᠳᠠᠯᠭᠡᠷ ᠄ ᠤᠷᠢᠶᠠᠩᠬᠠᠨ ᠤ᠋ ᠲᠤᠬᠠᠢ᠂ ᠪᠣᠷᠵᠢᠭᠢᠳᠠᠢ ᠣᠶᠣᠨᠪᠢᠯᠢᠭ᠌᠂ ᠯ ᠨᠠᠷᠠᠩᠭᠤᠸᠠ ᠨᠠᠢᠷᠠᠭᠤᠯᠤᠭᠰᠠᠨ ᠄ ᠡᠯᠪᠡᠭ ᠪᠦᠲᠦᠭᠡᠯ ᠫᠷᠣᠹᠧᠰᠰᠣᠷ ᠳ᠋ᠣᠺᠲ᠋ᠣᠷ ᠵᠠᠭᠴᠢᠳ ᠰᠡᠴᠡᠨ ᠦ᠌ ᠨᠠᠶᠠᠨ ᠨᠠᠰᠤᠨ ᠤ᠋ ᠣᠢ ᠳ᠋ᠤ᠌᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 1996 ᠣᠨ᠂ ᠠᠳᠠ ᠯᠠᠪᠯᠠᠭᠠᠷᠠᠢ) ᠲᠡᠢᠨ ᠬᠦ᠌᠂ ᠪᠥᠬᠡ ᠦᠯᠡᠨ ᠭᠡᠰᠡᠨ ᠭᠠᠵᠠᠷ ᠨᠢ ᠮᠥᠨ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠣᠷᠢᠶᠠᠩᠬᠠᠨ ᠤ᠋ ᠭᠠᠵᠠᠷ ᠢ᠋ ᠬᠡᠯᠡᠭᠰᠡᠨ ᠨᠢ ᠶᠠᠷᠢᠶᠠᠨ ᠦᠭᠡᠢ᠃
ᠡᠨᠡᠬᠦ ᠲᠡᠮᠳᠡᠭᠯᠡᠯ ᠡᠴᠡ ᠦᠵᠡᠪᠡᠯ᠂ ᠲᠡᠭᠷᠢ ᠶ᠋ᠢ ᠬᠠᠷᠢᠶᠠᠵᠤ ᠵᠢᠮᠡᠯᠡᠳᠡᠭ ᠣᠨᠴᠠ ᠡᠷᠬᠡ ᠪᠦᠬᠦᠢ ᠪᠥᠬᠡ ᠨᠠᠷ ᠤᠤᠯ ᠨᠢ ᠤᠷᠢᠶᠠᠩᠬᠠᠨ ᠨᠠᠷ ᠤ᠋ᠨ ᠪᠥᠬᠡ ᠪᠠᠢᠭᠰᠠᠨ ᠶᠤᠮ ᠪᠠᠢᠨᠠ᠃ ᠲᠡᠷᠡ ᠨᠢ ᠤᠷᠢᠶᠠᠩᠬᠠᠨ ᠨᠠᠷ ᠤ᠋ᠨ ᠪᠤᠰᠤᠳ ᠮᠣᠩᠭᠣᠯᠴᠤᠳ ᠠ᠋ᠴᠠ ᠢᠯᠭᠠᠭᠳᠠᠬᠤ ᠣᠨᠴᠠᠭᠠᠢ ᠵᠠᠩᠰᠢᠯ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠷᠢ ᠶ᠋ᠢ ᠳᠣᠩᠭᠣᠳᠴᠤ ᠬᠠᠷᠢᠶᠠᠬᠤ ᠡᠷᠬᠡ ᠪᠦᠬᠦᠢ ᠡᠳᠡᠭᠡᠷ ᠪᠥᠬᠡ ᠶ᠋ᠢ ᠤᠷᠢᠶᠠᠩᠬᠠᠭᠴᠤᠳ ᠤᠤᠯ ᠠ᠋ᠴᠠ ᠪᠠᠨ ᠳᠠᠭᠤᠳᠠᠭᠠᠴᠢᠨ ᠭᠡᠳᠡᠭ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ᠃ ᠡᠮᠦᠨᠡ ᠥᠭᠦᠯᠡᠭᠰᠡᠨ ᠵᠠᠷᠤᠳ ᠬᠤᠰᠢᠭᠤᠨ ᠤ᠋ ᠤᠯᠠᠭᠠᠨᠬᠠᠳᠠ ᠰᠤᠮᠤᠨ ᠤ᠋ ᠤᠳᠤᠮ ᠤ᠋ᠨ ᠪᠥᠬᠡ ᠳᠠᠭᠤᠳᠠᠭᠠᠴᠢᠨ ᠨᠢ ᠤᠷᠢᠶᠠᠩᠬᠠᠨ ᠣᠪᠣᠭᠲᠠᠢ᠂ ᠲᠡᠭᠡᠬᠦᠯᠡᠷ ᠤᠷᠢᠶᠠᠩᠬᠠᠨ ᠢᠵᠠᠭᠤᠷᠲᠠᠢ ᠨᠢ ᠶᠠᠮᠠᠷ ᠴᠤ᠌ ᠮᠠᠳᠠᠭ ᠦᠭᠡᠢ᠃ ᠳᠠᠭᠠᠤ ᠳ᠋ᠤ᠌ ᠨᠢ ᠥᠭᠦᠯᠡᠬᠦ ᠳ᠋ᠦ᠍᠂ ᠪᠠᠭᠠᠷᠢᠨ᠂ ᠣᠷᠳᠣᠰ ᠪᠠ ᠬᠣᠷᠴᠢᠨ ᠳ᠋ᠤ᠌ ᠴᠤ᠌ ᠳᠠᠭᠤᠳᠠᠭᠠᠴᠢᠨ ᠪᠠᠢᠭᠰᠠᠨ ᠨᠢ ᠮᠥᠨ ᠯᠡ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠲᠡᠢ ᠬᠠᠮᠢᠶᠠᠲᠠᠢ᠃ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠳ᠋ᠤ᠌ ᠪᠤᠰᠤᠳ ᠲᠠᠪᠤᠨ ᠲᠦᠮᠡᠨ ᠳ᠋ᠦ᠍ ᠲᠠᠯᠬᠠᠭᠳᠠᠭᠰᠠᠨ ᠲᠡᠦᠬᠡ ᠶ᠋ᠢ ᠠᠩᠬᠠᠷᠬᠤ ᠬᠡᠷᠡᠭᠲᠡᠢ᠂ ᠡᠭᠦᠨ ᠦ᠌ ᠲᠤᠬᠠᠢ ᠳᠠᠷᠠᠭᠠ ᠪᠠᠷ ᠪᠠᠰᠠ ᠥᠭᠦᠯᠡᠨᠡ᠃ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠳ᠋ᠤ᠌᠂ ᠵᠠᠷᠤᠳ ᠪᠠᠭᠠᠷᠢᠨ ᠬᠣᠶᠠᠷ ᠪᠦᠷ ᠶᠡᠬᠡ ᠬᠠᠯᠬᠠ ᠲᠦᠮᠡᠨ ᠳ᠋ᠦ᠍ ᠪᠠᠭᠲᠠᠵᠤ ᠪᠠᠢᠭᠰᠠᠨ᠂ ᠬᠠᠯᠬᠠ ᠲᠦᠮᠡᠨ ᠪᠣᠯ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠢ᠋ ᠤᠰᠠᠳᠬᠠᠬᠤ ᠳ᠋ᠤ᠌ ᠬᠣᠰᠢᠭᠤᠴᠢᠯᠠᠵᠤ ᠪᠠᠢᠭᠰᠠᠨ ᠲᠦᠮᠡᠨ᠃ ᠣᠷᠳᠣᠰ ᠲᠦᠮᠡᠨ ᠨᠢ ᠴᠦ᠍ ᠣᠷᠢᠶᠠᠩᠬᠠᠨ ᠢ᠋ ᠰᠥᠨᠥᠭᠡᠬᠦ ᠠᠶᠠᠨ ᠲᠡᠢᠨ ᠳ᠋ᠦ᠍ ᠢᠳᠡᠪᠬᠢᠲᠡᠢ ᠣᠷᠣᠯᠴᠠᠵᠤ ᠪᠠᠢᠭᠰᠠᠨ᠃ ᠲᠡᠳᠡ ᠨᠠᠷ ᠤᠷᠢᠶᠠᠩᠬᠠᠨ ᠢ᠋ ᠰᠥᠨᠥᠭᠡᠭᠰᠡᠨ ᠦ᠌ ᠳᠠᠷᠠᠭᠠ ᠣᠷᠢᠶᠠᠩᠬᠠᠨ ᠠ᠋ᠴᠠ ᠣᠯᠠᠨ ᠬᠥᠮᠦᠨ ᠢᠷᠭᠡᠳ ᠬᠤᠪᠢᠶᠠᠨ ᠠᠪᠴᠠᠢ᠃
ᠬᠣᠷᠴᠢᠨ ᠲᠦᠮᠡᠨ ᠨᠢ ᠤᠷᠢᠶᠠᠩᠬᠠᠨ ᠢ᠋ ᠰᠥᠨᠥᠭᠡᠬᠦ ᠠᠶᠠᠨ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠵᠠᠭᠤᠨ ᠤ᠋ ᠬᠣᠷᠢᠭᠠᠳ ᠣᠨ ᠳ᠋ᠤ᠌ ᠥᠪᠥᠷ ᠲᠠᠪᠤᠨ ᠬᠠᠯᠬᠠ ᠮᠠᠨᠵᠤ ᠨᠠᠷ ᠲᠤ᠌ ᠡᠪᠳᠡᠭᠳᠡᠬᠦ ᠦᠶᠡ ᠳ᠋ᠦ᠍ ᠵᠠᠷᠤᠳ᠂ ᠪᠠᠭᠠᠷᠢᠨ ᠵᠠᠷᠤᠳ ᠵᠠᠰᠠᠭ ᠬᠣᠶᠠᠷ ᠣᠲᠣᠭ 1628 ᠣᠨ ᠨᠤᠭᠤᠳ ᠲᠤ᠌ ᠨᠢᠭᠡ ᠦᠶᠡ ᠬᠣᠷᠴᠢᠨ ᠳ᠋ᠤ᠌ ᠣᠷᠣᠵᠤ ᠲᠦᠰᠢᠭᠰᠡᠨ ᠪᠥᠭᠡᠳ ᠬᠣᠵᠢᠮ ᠨᠢ ᠬᠣᠷᠴᠢᠨ ᠲᠠᠢ ᠡᠪᠳᠡᠷᠠᠯᠴᠡᠭᠡᠨ ᠪᠣᠯᠤᠭᠠᠳ ᠰᠠᠶᠢ ᠮᠠᠨᠵᠤ ᠳ᠋ᠤ᠌ ᠳᠠᠭᠠᠷᠠ ᠣᠷᠣᠵᠤ᠂ ᠪᠠᠭᠠᠷᠢᠨ ᠵᠠᠷᠤᠳ ᠵᠠᠰᠠᠭ ᠬᠣᠰᠢᠭᠤ ᠪᠣᠯᠪᠠ᠃ ᠡᠨᠡᠬᠦ ᠶᠠᠪᠤᠴᠠ ᠳ᠋ᠤ᠌ ᠬᠣᠷᠴᠢᠨ ᠳ᠋ᠤ᠌ ᠨᠡᠯᠢᠶᠡᠳ ᠣᠯᠠᠨ ᠵᠠᠷᠤᠳ ᠪᠠᠭᠠᠷᠢᠨ ᠣᠲᠣᠭ ᠤ᠋ᠨ ᠠᠷᠠᠳ ᠢᠷᠭᠡᠨ ᠬᠣᠴᠣᠷᠤᠨ ᠦᠯᠡᠳᠡᠵᠡᠢ᠂ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠳᠠᠭᠤᠳᠠᠭᠠᠴᠢᠨ ᠪᠥᠬᠡ ᠨᠢ ᠪᠠᠢᠯᠴᠠᠭᠰᠠᠨ ᠯᠠ ᠪᠠᠢᠯᠭᠦᠢ᠃ ᠲᠡᠢᠨ ᠬᠦ᠌᠂ ᠬᠣᠷᠴᠢᠨ ᠳ᠋ᠤ᠌ ᠣᠷᠢᠶᠠᠩᠬᠠᠨ ᠣᠪᠣᠭᠲᠤ ᠳᠠᠭᠤᠳᠠᠭᠠᠴᠢᠳ ᠪᠠᠢᠭᠰᠠᠨ ᠨᠢ ᠶᠠᠭ ᠡᠨᠡ ᠦᠶᠡ ᠶ᠋ᠢᠨ ᠲᠡᠦᠬᠡᠨ ᠡᠴᠡ ᠤᠯᠪᠠᠭᠠ ᠲᠠᠢ᠃ ᠡᠢᠮᠦ ᠤᠴᠢᠷ ᠠ᠋ᠴᠠ᠂ ᠪᠠᠭᠠᠷᠢᠨ᠂ ᠣᠷᠳᠣᠰ ᠪᠠ ᠬᠣᠷᠴᠢᠨ ᠳ᠋ᠤ᠌ ᠪᠠᠰᠠ ᠳᠠᠭᠤᠳᠠᠭᠠᠴᠢᠳ ᠪᠠᠢᠭᠰᠠᠨ ᠨᠢ ᠪᠦᠷ ᠣᠷᠢᠶᠠᠩᠬᠠᠨ ᠠ᠋ᠴᠠ ᠤᠯᠠᠮᠵᠢᠯᠠᠵᠤ ᠣᠴᠢᠭᠰᠠᠨ ᠬᠡᠷᠡᠭ ᠮᠥᠨ᠃ ᠬᠣᠷᠴᠢᠨ ᠭᠡᠵᠦ ᠳᠠᠭᠤᠳᠠᠭᠠᠴᠢᠨ ᠪᠥᠬᠡ ᠶ᠋ᠢ ᠬᠤᠸᠠᠩᠳᠠᠨ ᠭᠡᠵᠦ ᠬᠡᠯᠡᠳᠡᠭ ᠨᠢ ᠳᠠᠭᠤᠳᠠᠭᠠᠴᠢᠨ ᠢ᠋ ᠬᠢᠲᠠᠳ ᠬᠡᠯᠡᠨ ᠳ᠋ᠦ᠍ ᠣᠷᠴᠢᠭᠤᠯᠵᠤ ᠳᠠᠭᠤᠳᠠᠭᠰᠠᠨ ᠲᠡᠳᠦᠢ᠂ ᠤᠤᠯ ᠬᠢᠲᠠᠳ ᠦᠭᠡ ᠬᠤᠸᠠᠨ ᠲᠢᠶᠠᠨ ᠪᠠᠢᠭᠰᠠᠨ ᠪᠠᠢᠭᠠ᠃ ᠲᠡᠷᠡ ᠨᠢ ᠶᠠᠭ ᠲᠡᠭᠷᠢ ᠳᠠᠭᠤᠳᠠᠨᠠ ᠭᠡᠰᠡᠨ ᠦᠭᠡ ᠪᠠᠢᠨᠠ᠃
ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠮᠥᠨ ᠵᠠᠷᠤᠳ ᠬᠤᠰᠢᠭᠤᠨ ᠤ᠋ ᠪᠠᠶᠠᠷᠳᠤᠬᠣᠰᠢᠭᠤ ᠰᠤᠮᠤᠨ ᠤ᠋ ᠪᠠᠷᠢᠮᠲᠠ ᠠᠢᠯ ᠳ᠋ᠤ᠌ ᠪᠠᠰᠠ ᠦ ᠣᠪᠣᠭ ᠲᠠᠢ ᠬᠥᠮᠦᠰ ᠪᠣᠢ᠃ ᠲᠡᠳᠡ ᠥᠪᠡᠷ ᠢ᠋ ᠪᠡᠨ ᠣᠷᠢᠶᠠᠬᠤᠨ ᠭᠡᠳᠡᠭ ᠦ ᠣᠪᠣᠭ ᠢ᠋ᠶ᠋ᠠᠨ ᠤᠷᠢᠶᠠᠬᠤᠨ ᠤ᠋ ᠬᠢᠲᠠᠳ ᠠᠪᠢᠶᠠᠨ ᠤ᠋ ᠨᠢᠭᠡᠳᠦᠭᠡᠷ ᠦᠰᠦᠭ ᠭᠡᠵᠦ ᠦᠵᠡᠵᠦ ᠪᠣᠢ᠃ ᠪᠠᠰᠠ ᠬᠡᠷᠴᠢᠯᠠᠭᠤ ᠰᠤᠮᠤᠨ ᠤ᠋ ᠬᠠᠳᠠᠨ ᠠᠢᠯ ᠭᠠᠴᠠᠭᠠᠨ ᠳ᠋ᠤ᠌ ᠦ ᠣᠪᠣᠭᠲᠠᠢ ᠤᠯᠤᠰ ᠪᠣᠢ᠃ ᠲᠡᠳᠡ ᠨᠠᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠣᠩᠭᠣᠯ ᠣᠪᠣᠭ ᠢ᠋ ᠲᠠᠪᠤᠯᠠᠬᠤ ᠭᠡᠵᠦ ᠬᠡᠯᠡᠳᠡᠭ ᠪᠥᠭᠡᠳ ᠣᠪᠣᠭ ᠨᠢ ᠲᠠᠪᠤ ᠭᠡᠰᠡᠨ ᠲᠣᠭᠠ ᠶ᠋ᠢ ᠣᠷᠴᠢᠭᠤᠯᠤᠭᠰᠠᠨ ᠬᠢᠲᠠᠳ ᠦᠭᠡ᠂ ᠲᠡᠭᠦᠨ ᠡᠴᠡ ᠬᠢᠲᠠᠳ ᠣᠪᠣᠭ ᠤ᠋ᠨ ᠦ ᠪᠣᠯᠤᠭᠰᠠᠨ ᠭᠡᠵᠦ ᠦᠵᠡᠵᠦ ᠪᠠᠢᠨᠠ᠃ ᠣᠯᠳᠣᠢ ᠮᠢᠨᠦ ᠦᠵᠡᠬᠦ ᠪᠡᠷ᠂ ᠨᠢᠭᠡᠳᠡᠬᠢ ᠦ ᠣᠪᠣᠭ ᠨᠢ ᠣᠷᠢᠶᠠᠬᠠᠳ ᠭᠡᠳᠡᠭ ᠨᠢ ᠣᠷᠢᠶᠠᠩᠬᠠᠨ ᠤ᠋ ᠭᠠᠵᠢᠭᠰᠠᠨ ᠳᠠᠭᠤᠳᠠᠯᠭᠠ ᠪᠣᠯᠬᠤ ᠨᠢ ᠮᠠᠭᠠᠳ᠂ ᠬᠠᠷᠢᠨ ᠬᠣᠶᠠᠳᠤᠭᠠᠷ ᠦ ᠣᠪᠣᠭ ᠲᠠᠪᠤᠯᠠᠬᠤ ᠭᠡᠰᠡᠨ ᠮᠣᠩᠭᠣᠯ ᠣᠪᠣᠭ ᠤ᠋ᠨ ᠬᠢᠲᠠᠳᠴᠢᠯᠠᠭᠠ ᠲᠠᠢ ᠬᠠᠮᠢᠶᠠᠲᠠᠢ ᠭᠡᠰᠡᠨ ᠨᠢ ᠰᠢᠨᠡᠬᠡᠨ ᠲᠠᠢᠯᠪᠤᠷᠢ ᠠᠵᠢ᠃ ᠡᠭᠦᠨ ᠢ᠋ ᠬᠠᠷᠠᠭᠠᠳ ᠪᠢᠳᠡ ᠮᠣᠩᠭᠣᠯᠴᠤᠳ ᠲᠠᠪᠤᠨᠠᠩ ᠭᠡᠰᠡᠨ ᠦᠭᠡᠨ ᠳ᠋ᠦ᠍ ᠬᠢᠭᠰᠡᠨ ᠬᠦᠴᠢᠷ ᠲᠠᠢᠯᠪᠤᠷᠢ ᠶ᠋ᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠨᠠ᠃ ᠠᠷᠤ ᠬᠠᠯᠬᠠ ᠶ᠋ᠢᠨ ᠲᠡᠦᠬᠡᠴᠢᠨ ᠭᠠᠯᠳᠠᠨ ᠲᠤᠰᠠᠯᠠᠭᠴᠢ ᠶ᠋ᠢᠨ 1841 ᠣᠨ ᠳ᠋ᠤ᠌ ᠪᠢᠴᠢᠭᠰᠡᠨ ᠡᠷᠳᠡᠨᠢ ᠶ᠋ᠢᠨ ᠡᠷᠢᠭᠡ ᠭᠡᠳᠡᠭ ᠦ᠋ᠨ ᠳᠠᠷᠠᠭᠠᠯᠠᠭᠰᠠᠨ ᠪᠢᠴᠢᠭ ᠲᠦ᠍᠂ ᠤᠷᠢᠳᠠ ᠪᠥᠷᠲᠡ ᠦᠵᠢᠨ ᠢ᠋ ᠮᠣᠳᠣᠨ ᠬᠣᠲᠠ ᠶ᠋ᠢ ᠡᠵᠡᠯᠡᠭᠴᠢ ᠮᠤᠬᠤᠷ ᠪᠣᠷᠣ ᠬᠡᠮᠡᠭᠴᠢ ᠪᠤᠯᠢᠶᠠᠨ ᠠᠪᠠᠴᠢᠭᠰᠠᠨ ᠳ᠋ᠤ᠌᠂ ᠣᠷᠢᠶᠠᠩᠬᠠᠨ ᠤ᠋ ᠵᠡᠯᠮᠡ ᠠᠷᠭᠠ ᠪᠠᠷ ᠪᠤᠯᠢᠶᠠᠨ ᠠᠪᠴᠤ᠂ ᠪᠤᠴᠠᠵᠤ ᠢᠷᠡᠬᠦ ᠵᠠᠮ ᠳ᠋ᠤ᠌ ᠪᠠᠨ ᠦᠵᠢᠨ ᠲᠡᠢ ᠠᠮᠤᠭᠤᠯᠠᠩ ᠢ᠋ ᠡᠭᠦᠰᠬᠡᠵᠦ ᠳᠠᠪᠬᠤᠷ ᠪᠣᠯᠭᠠᠭᠰᠠᠨ ᠳ᠋ᠤ᠌᠂ ᠴᠢᠩᠭᠢᠰ ᠬᠠᠭᠠᠨ ᠥᠷᠥᠰᠢᠶᠡᠵᠦ᠂ ᠲᠡᠷᠡ ᠬᠥᠪᠡᠭᠦᠨ ᠮᠢᠨᠦ ᠪᠤᠰᠤ ᠪᠣᠯᠪᠠᠴᠤ ᠮᠥᠨ ᠮᠢᠨᠦ ᠶᠡᠬᠡ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠲᠤᠯᠠ ᠡᠩ ᠦ᠋ᠨ ᠬᠥᠮᠦᠨ ᠡᠴᠡ ᠥᠭᠡᠷᠡ ᠪᠣᠯᠭᠠᠵᠤ ᠣᠨᠴᠠ ᠬᠡᠰᠢᠭ ᠬᠦᠷᠲᠡᠭᠡᠵᠦ ᠮᠥᠨ ᠮᠢᠨᠦ ᠶᠡᠬᠡ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠵᠥᠴᠢ᠂ ᠴᠠᠭᠠᠲᠠᠢ᠂ ᠥᠭᠡᠳᠡᠢ᠂ ᠲᠤᠯᠤᠢ ᠳᠥᠷᠪᠡ ᠶ᠋ᠢᠨ ᠳᠠᠷᠠᠭᠠ ᠲᠠᠪᠤᠳᠤᠭᠠᠷ ᠨᠣᠶᠠᠨ ᠭᠡᠮᠡᠨ ᠨᠡᠷᠡᠢᠳᠴᠦ ᠶᠠᠪᠤ ᠭᠡᠮᠡᠨ ᠠᠢᠯᠠᠳᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠡᠭᠦᠨ ᠦ᠌ ᠦᠷᠡ ᠶ᠋ᠢ ᠴᠥᠮ ᠲᠠᠪᠤᠳᠤᠭᠠᠷ ᠨᠣᠶᠠᠨ ᠬᠡᠮᠡᠭᠰᠡᠨ ᠢᠨᠤ ᠦᠶᠡ ᠰᠤᠩᠬᠣᠢ ᠳ᠋ᠤᠷ ᠲᠠᠪᠤᠨᠠᠩ ᠭᠡᠮᠡᠨ ᠠᠯᠳᠠᠷᠰᠢᠭᠰᠠᠨ ᠲᠡᠷᠡ ᠪᠣᠢᠠ (ᠴ ᠂ᠨᠠᠰᠤᠨᠪᠠᠯᠵᠤᠷ ᠬᠠᠷᠭᠤᠭᠤᠯᠵᠤ ᠬᠡᠪᠯᠡᠯ ᠳ᠋ᠦ᠍ ᠪᠡᠯᠡᠳᠬᠡᠭᠰᠡᠨ ᠄ ᠡᠷᠳᠡᠨᠢ ᠶ᠋ᠢᠨ ᠡᠷᠢᠭᠡ ᠤᠯᠠᠭᠠᠨᠪᠠᠭᠠᠲᠤᠷ᠂) ᠡᠨᠡ ᠨᠢ ᠲᠠᠪᠤᠨᠠᠩ ᠢ᠋ ᠪᠤᠷᠤᠭᠤ ᠣᠢᠯᠠᠭᠠᠵᠤ ᠭᠠᠵᠢᠭᠤ ᠲᠠᠢᠯᠪᠤᠷᠢᠯᠠᠭᠰᠠᠨ ᠬᠡᠷᠡᠭ ᠶᠦ᠍ᠮ᠃ ᠲᠡᠦᠬᠡᠨ ᠦᠨᠡᠨ ᠲᠡᠢ ᠶᠠᠮᠠᠷ ᠴᠤ᠌ ᠬᠣᠯᠪᠣᠭᠠ ᠦᠭᠡᠢ᠃ ᠲᠠᠪᠤᠯᠠᠬᠤ ᠭᠡᠳᠡᠭ ᠨᠢ ᠡᠭᠦᠨ ᠲᠡᠢ ᠠᠳᠠᠯᠢ ᠪᠠᠷ ᠲᠠᠪᠤᠨᠠᠩ ᠭᠡᠳᠡᠭ ᠦᠭᠡ ᠶ᠋ᠢ ᠠᠪᠢᠶᠠ ᠰᠡᠯᠭᠦᠵᠦ ᠲᠠᠪᠤᠯᠠᠬᠤ ᠭᠡᠵᠦ ᠬᠠᠵᠠᠢᠯᠭᠠᠭᠰᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠪᠢᠵᠡ᠃ ᠦ ᠣᠪᠣᠭ ᠨᠢ ᠲᠠᠪᠤᠯᠠᠬᠤ ᠶ᠋ᠢᠨ ᠲᠠᠪᠤ ᠶ᠋ᠢ ᠣᠷᠴᠢᠭᠤᠯᠤᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠲᠠᠪᠤᠨᠠᠩ (ᠤᠭ ᠤᠳᠬᠠ ᠨᠢ ᠲᠠᠪᠤᠨ ᠤᠩ᠂ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠠ᠋ᠴᠠ ᠬᠣᠢᠰᠢ ᠠᠯᠲᠠᠨ ᠤᠷᠤᠭᠲᠠᠨ ᠢᠵᠠᠭᠤᠷᠲᠠᠳ ᠤ᠋ᠨ ᠬᠦᠷᠭᠡᠳ ᠢ᠋ ᠲᠠᠪᠤᠨ ᠤᠩ ᠭᠡᠳᠡᠭ ᠪᠣᠯᠵᠠᠢ) ᠶ᠋ᠢᠨ ᠲᠠᠪᠤ ᠶ᠋ᠢ ᠣᠷᠴᠢᠭᠤᠯᠤᠭᠰᠠᠨ ᠶᠤᠮ ᠪᠠᠢᠨᠠ᠃ ᠣᠷᠢᠶᠠᠩᠬᠠᠨ ᠠᠢᠮᠠᠭ ᠤ᠋ᠨ ᠲᠦᠷᠦᠭᠦᠦ ᠨᠢ ᠠᠳᠠᠭ ᠲᠤ᠌ ᠪᠠᠨ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠤ᠋ᠨ ᠦᠶᠡ ᠡᠴᠡ ᠬᠠᠭᠠᠳ ᠤ᠋ᠨ ᠬᠦᠷᠭᠡᠳ ᠪᠣᠯᠵᠤ ᠲᠠᠪᠤᠨᠠᠩ ᠭᠡᠭᠳᠡᠬᠦ ᠪᠣᠯᠤᠭᠰᠠᠨ ᠶᠤᠮ᠃ ᠲᠡᠢᠨ ᠬᠦ᠌᠂ ᠡᠨᠡᠬᠦ ᠦ ᠣᠪᠣᠭᠲᠠᠨ ᠨᠢ ᠮᠥᠨ ᠤᠷᠢᠶᠠᠩᠬᠠᠨ ᠤ᠋ ᠨᠣᠶᠠᠳ ᠢᠵᠠᠭᠤᠷᠲᠠᠨ ᠤ᠋ ᠬᠣᠢᠴᠢᠰ ᠪᠣᠯᠵᠤ ᠲᠠᠭᠠᠷᠠᠨᠠ᠃
ᠡᠳᠡᠭᠡᠷ ᠢ᠋ ᠬᠠᠮᠤᠷᠤᠨ ᠥᠭᠦᠯᠡᠪᠡᠯ᠂ ᠵᠠᠷᠤᠳ ᠲᠤ᠌ ᠤᠷᠢᠶᠠᠩᠬᠠᠨ ᠠᠢᠮᠠᠭ ᠲᠠᠢ ᠬᠠᠮᠢᠶᠠ ᠪᠦᠬᠦᠢ ᠣᠷᠢᠶᠠᠬᠠᠳ ᠂ ᠳᠠᠭᠤᠳᠠᠭᠠᠴᠢᠨ᠂ ᠲᠠᠪᠤᠨᠠᠩ ᠵᠡᠷᠭᠡ ᠣᠪᠣᠭ ᠠᠢᠮᠠᠭ ᠮᠠᠰᠢ ᠣᠯᠠᠨ ᠪᠠᠢᠬᠤ ᠠᠵᠢ᠃ ᠡᠳᠡᠭᠡᠷ ᠨᠢ ᠬᠡᠢᠰᠪᠦᠷᠢ ᠦᠯᠡᠳᠡᠮᠡᠯ ᠰᠤᠷᠪᠤᠯᠵᠢ ᠶ᠋ᠢᠨ ᠬᠤᠪᠢ ᠪᠠᠷ ᠵᠠᠷᠤᠳ ᠪᠣᠯ ᠣᠷᠢᠶᠠᠩᠬᠠᠨ ᠭᠠᠷᠤᠯᠲᠠᠢ ᠭᠡᠳᠡᠭ ᠢ᠋ ᠪᠠᠲᠤᠲᠠᠢ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃
ᠭᠤᠷᠪᠠ
ᠵᠠᠷᠤᠳ ᠠᠢᠮᠠᠭ ᠤᠷᠢᠶᠠᠩᠬᠠᠨ ᠠ᠋ᠴᠠ ᠡᠭᠦᠰᠦᠯᠲᠡᠢ᠂ ᠡᠨᠡ ᠨᠢ ᠴᠦ᠍ ᠲᠣᠳᠣᠷᠬᠠᠢ᠃ ᠭᠡᠪᠡᠴᠦ᠂ ᠠᠰᠠᠭᠤᠳᠠᠯ ᠠᠳᠠ ᠬᠦᠷᠦᠭᠡᠳ ᠰᠢᠢᠳᠪᠦᠷᠢᠯᠡᠭᠳᠡᠴᠢᠬᠡᠬᠦ ᠶᠠᠪᠤᠳᠠᠯ ᠪᠢᠰᠢ᠃ ᠮᠡᠳᠡᠭᠡᠵᠢ ᠪᠡᠷ᠂ ᠤᠷᠢᠶᠠᠩᠬᠠᠨ ᠪᠣᠯ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠡᠷᠲᠡᠨ ᠦ᠌ ᠠᠢᠮᠠᠭ᠃ 《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠳ᠋ᠤ᠌ ᠥᠭᠦᠯᠡᠬᠦ ᠪᠡᠷ ᠣᠷᠢᠶᠠᠩᠬᠠᠨ ᠨᠠᠷ ᠪᠣᠳᠣᠨᠴᠠᠷ ᠤ᠋ᠨ ᠦᠶᠡ ᠡᠴᠡ ᠪᠣᠷᠵᠢᠭᠢᠨ ᠤ᠋ ᠡᠵᠡᠮᠰᠢᠯ ᠦ᠋ᠨ ᠢᠷᠭᠡᠨ ᠪᠣᠯᠤᠭᠰᠠᠨ᠂ ᠲᠡᠳᠡᠨ ᠦ᠌ ᠳᠣᠲᠣᠷᠠ 《ᠵᠠᠷᠴᠢᠭᠤᠳ ᠠᠲᠠᠩᠬᠠᠨ ᠤᠷᠢᠶᠠᠩᠬᠠᠨ》 ᠭᠡᠵᠦ ᠪᠠᠢᠵᠠᠢ᠃ （38 ᠳ᠋ᠤᠭᠠᠷ ᠪᠠᠳᠠᠭ ᠲᠤ᠌）ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠶᠡ ᠪᠣᠯᠬᠤ ᠳ᠋ᠤ᠌᠂ ᠲᠡᠮᠦᠵᠢᠨ ᠡᠴᠢᠭᠡ ᠡᠴᠡ ᠪᠡᠨ ᠥᠨᠥᠴᠢᠨ ᠬᠣᠴᠣᠷᠤᠭᠠᠳ ᠭᠠᠴᠢᠭᠳᠠᠯᠲᠠᠢ ᠪᠠᠢᠭᠰᠠᠨ ᠦᠶᠡ ᠳ᠋ᠦ᠍᠂ 《ᠪᠤᠷᠬᠠᠨ ᠬᠠᠯᠳᠤᠨ ᠠ᠋ᠴᠠ ᠣᠷᠢᠶᠠᠩᠬᠠᠭᠲᠠᠢ ᠬᠥᠮᠦᠨ ᠵᠠᠷᠴᠢᠭᠤᠲᠠᠢ ᠡᠪᠦᠭᠡᠨ ᠬᠥᠭᠡᠷᠭᠡ ᠪᠡᠨ ᠡᠭᠦᠷᠴᠦ ᠵᠠᠯᠮᠠ ᠨᠡᠷᠡᠲᠦ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠤᠳᠤᠷᠢᠳᠴᠤ ᠢᠷᠡᠵᠦ ᠥᠭᠦᠯᠡᠷᠦᠨ ᠄ ᠤᠨᠤᠨ ᠤ᠋ ᠳᠡᠯᠢᠭᠦᠨ ᠪᠣᠯᠳᠤᠬᠠ ᠪᠦᠬᠦᠢ ᠳ᠋ᠦ᠍ᠷ᠂ ᠲᠡᠮᠦᠵᠢᠨ ᠢ᠋ ᠲᠥᠷᠥᠬᠦᠢ ᠳ᠋ᠦ᠍ᠷ ᠪᠤᠯᠠᠭᠠᠨ ᠨᠡᠬᠡᠢ ᠥᠭᠭᠦᠯᠡ ᠪᠢ᠃ ᠡᠨᠡ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠵᠡᠯᠮᠡ ᠶ᠋ᠢ ᠥᠭᠭᠦᠯᠡ ᠪᠢ᠃ ᠥᠴᠦᠬᠡᠨ ᠭᠡᠮᠡᠨ ᠠᠪᠴᠤ ᠣᠳᠤᠯᠠ᠃ ᠡᠳᠦᠭᠡ ᠵᠡᠯᠮᠡ ᠶ᠋ᠢ ᠡᠮᠡᠭᠡᠯ ᠢ᠋ᠶ᠋ᠡᠨ ᠲᠣᠬᠣᠭᠤᠯ᠂ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠭᠦᠯ ᠬᠡᠮᠡᠵᠦ ᠥᠭᠪᠡ 》（97 ᠳ᠋ᠤᠭᠠᠷ ᠪᠠᠳᠠᠭ ᠲᠤ᠌）᠃ ᠡᠨᠡᠬᠦ ᠵᠠᠷᠴᠢᠭᠤᠲᠠᠢ ᠡᠪᠦᠭᠡᠨ ᠪᠣᠯ ᠵᠡᠯᠮᠡ᠂ ᠰᠦᠪᠡᠭᠡᠲᠡᠢ ᠴᠠᠭᠤᠷᠬᠠᠨ ᠨᠠᠷ ᠤ᠋ᠨ ᠡᠴᠢᠭᠡ᠃ ᠲᠡᠭᠦᠨ ᠦ᠌ ᠬᠥᠪᠡᠭᠦᠳ ᠲᠡᠮᠦᠵᠢᠨ ᠢ᠋ ᠬᠠᠮᠵᠢᠨ ᠤᠯᠤᠰ ᠪᠠᠢᠭᠤᠯᠵᠤ᠂ ᠳᠡᠯᠡᠬᠡᠢ ᠳᠠᠬᠢᠨ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠵᠤ ᠶᠡᠬᠡ ᠭᠠᠪᠢᠶᠠ ᠪᠠᠢᠭᠤᠯᠤᠭᠠᠳ ᠬᠣᠵᠢᠮ ᠨᠢ ᠤᠷᠢᠶᠠᠩᠬᠠᠨ ᠤ᠋ ᠨᠣᠶᠠᠳ ᠡᠳᠡ ᠨᠠᠷ ᠪᠣᠯᠵᠠᠢ᠃ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠪᠠ ᠶᠤᠸᠠᠨ ᠤᠯᠤᠰ ᠢ᠋ ᠥᠩᠭᠡᠷᠡᠭᠡᠵᠦ ᠳᠠᠶᠠᠨ ᠬᠠᠭᠠᠨ ᠤ᠋ ᠦᠶᠡ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍ ᠤᠷᠢᠶᠠᠩᠬᠠᠨ ᠨᠢ ᠬᠣᠶᠠᠷ ᠬᠤᠪᠢᠶᠠᠭᠳᠠᠭᠠᠳ᠂ ᠨᠢᠭᠡ ᠪᠦᠯᠦᠭ ᠨᠢ ᠲᠡᠷᠡ ᠴᠠᠭ ᠲᠤ᠌ ᠶᠡᠬᠡᠳᠡ ᠠᠯᠳᠠᠷᠰᠢᠭᠰᠠᠨ ᠵᠢᠷᠭᠤᠭᠠᠨ ᠲᠦᠮᠡᠨ ᠦ᠌ ᠨᠢᠭᠡ ᠨᠢ ᠪᠣᠯᠵᠤ᠂ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠭᠡᠵᠦ ᠨᠠᠷᠠᠰᠢᠨ᠂ ᠨᠥᠭᠦᠭᠡ ᠨᠢ ᠵᠢᠷᠭᠤᠭᠠᠨ ᠲᠦᠮᠡᠨ ᠡᠴᠡ ᠠᠩᠭᠢᠳᠠ ᠣᠷᠣᠰᠢᠬᠤ ᠥᠯᠭᠡ ᠲᠦᠮᠡᠨ ᠳ᠋ᠦ᠍ ᠪᠠᠭᠲᠠᠯᠴᠠᠭᠰᠠᠨ ᠳᠣᠶᠣᠨ ᠣᠢ ᠶ᠋ᠢᠨ ᠣᠷᠢᠶᠠᠩᠬᠠᠨ ᠪᠣᠯᠵᠠᠢ᠃ ᠲᠡᠭᠡᠪᠡᠯ᠂ ᠵᠠᠷᠤᠳ ᠨᠢ ᠴᠣᠬᠣᠮ ᠬᠣᠶᠠᠷ ᠤᠷᠢᠶᠠᠩᠬᠠᠨ ᠤ᠋ ᠠᠯᠢ ᠪᠦᠯᠦᠭ》 ᠲᠦ᠍ ᠨᠢ ᠪᠠᠭᠲᠠᠭᠳᠠᠵᠤ ᠪᠠᠢᠭᠰᠠᠨ ᠪᠣᠢ? ᠬᠡᠵᠢᠶᠡ ᠶᠠᠭᠠᠬᠢᠵᠤ ᠲᠠᠪᠤᠨ ᠣᠲᠣᠭ ᠬᠠᠯᠬᠠ ᠳ᠋ᠤ᠌ ᠣᠷᠣᠴᠢᠬᠠᠭᠰᠠᠨ ᠪᠣᠢ?ᠤᠷᠢᠶᠠᠩᠬᠠᠨ ᠲᠦᠮᠡᠨ ᠢ᠋ ᠳ᠋ᠣᠺᠲ᠋ᠣᠷ ᠵᠢᠭᠠᠴᠢᠲᠠᠢ ᠪᠤᠶᠠᠨᠳᠠᠯᠭᠡᠷ ᠨᠡᠯᠢᠶᠡᠳ ᠰᠠᠢᠨ ᠰᠤᠳᠤᠯᠵᠠᠢ᠃ ᠲᠡᠭᠦᠨ ᠦ᠌ ᠰᠤᠳᠤᠯᠭᠠᠨ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠨᠢ ᠬᠡᠨᠲᠡᠢ ᠨᠢᠷᠤᠭᠤᠨ ᠤ᠋ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠤᠷᠢᠶᠠᠩᠬᠠᠨ ᠠ᠋ᠴᠠ ᠢᠷᠡᠯᠲᠡᠢ᠃ ᠠᠯᠢ ᠡᠷᠲᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠷᠪᠠᠳᠤᠭᠠᠷ ᠦᠶᠡ ᠶ᠋ᠢᠨ ᠡᠯᠦᠨᠴᠡ ᠪᠣᠳᠣᠨᠴᠠᠷ ᠤ᠋ᠨ ᠦᠶᠡ ᠳ᠋ᠦ᠍ ᠤᠷᠢᠶᠠᠩᠬᠠᠨ ᠨᠢ ᠪᠣᠷᠵᠢᠭᠢᠨ ᠨᠣᠶᠠᠳ ᠤ᠋ᠨ ᠡᠭᠦᠳᠡᠨ ᠪᠣᠭᠣᠯ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠪᠠᠢᠭᠤᠯᠬᠤ ᠦᠶᠡ ᠳ᠋ᠦ᠍᠂ ᠤᠷᠢᠶᠠᠩᠬᠠᠨ ᠤ᠋ ᠵᠠᠯᠮᠠ᠂ ᠰᠦᠪᠡᠭᠡᠲᠡᠢ᠂ ᠤᠷᠢᠶᠠᠩᠬᠠᠨᠲᠠᠢ ᠠᠬᠠ ᠳᠡᠭᠦᠦᠰ ᠶᠡᠬᠡ ᠬᠦᠴᠦ ᠥᠭᠭᠦᠭᠰᠡᠨ ᠪᠥᠭᠡᠳ ᠬᠣᠵᠢᠮ ᠨᠢ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠭᠠᠳᠠᠭᠰᠢ ᠥᠷᠭᠡᠳᠬᠡᠬᠦ ᠲᠡᠢᠨ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠣᠷᠢᠶᠠᠩᠬᠠᠨ ᠴᠡᠷᠢᠭ ᠲᠡᠳᠡᠨ ᠦ᠌ ᠳᠠᠭᠠᠭᠤᠯᠭᠠ ᠪᠠᠷ ᠠᠽᠢᠶᠠ ᠧᠦ᠋ᠷᠣᠫᠠ ᠶ᠋ᠢᠨ ᠣᠯᠠᠨ ᠤᠯᠤᠰ ᠠᠢᠮᠠᠭ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠵᠠᠢ᠃ ᠡᠨᠡᠬᠦ ᠭᠠᠪᠢᠶᠠᠨ ᠠ᠋ᠴᠠ ᠪᠣᠯᠵᠤ᠂ ᠡᠭᠦᠳᠡᠨ ᠪᠣᠭᠣᠯ ᠭᠠᠷᠤᠯᠲᠠᠢ ᠤᠷᠢᠶᠠᠩᠬᠠᠨ ᠤ᠋ ᠲᠦᠷᠦᠭᠦᠴᠦᠳ ᠦ᠋ᠨ ᠪᠠᠢᠷᠢ ᠰᠠᠭᠤᠷᠢ ᠬᠤᠪᠢᠷᠠᠵᠤ᠂ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠤᠯᠤᠰ ᠤ᠋ᠨ ᠭᠠᠪᠢᠶᠠᠲᠤ ᠰᠠᠢᠳ ᠶᠡᠬᠡ ᠨᠣᠶᠠᠳ ᠪᠣᠯᠤᠭᠰᠠᠨ ᠶᠤᠮ᠃ ᠴᠢᠩᠭᠢᠰ ᠬᠠᠭᠠᠨ ᠤᠯᠤᠰ ᠪᠠᠢᠭᠤᠯᠤᠭᠰᠠᠨ ᠬᠣᠢᠨᠠ᠂ ᠵᠡᠯᠮᠡ ᠶ᠋ᠢ ᠮᠢᠩᠭᠠᠨ ᠡᠷᠭᠦᠮᠵᠢᠯᠡᠵᠦ᠂ ᠵᠡᠭᠦᠨ ᠭᠠᠷ ᠤ᠋ᠨ ᠲᠦᠮᠡᠨ ᠦ᠌ ᠳᠡᠳ᠋ ᠨᠣᠶᠠᠨ ᠪᠣᠯᠭᠠᠵᠤ᠂ ᠲᠡᠭᠦᠨ ᠦ᠌ ᠳᠡᠭᠦᠦ ᠰᠦᠪᠡᠭᠡᠲᠡᠢ ᠪᠠ ᠴᠠᠭᠤᠷᠬᠠᠨ ᠢ᠋ ᠪᠠᠰᠠ ᠮᠢᠩᠭᠠᠨ ᠡᠷᠭᠦᠮᠵᠢᠯᠡᠵᠡᠢ᠃ ᠡᠳᠡᠭᠡᠷ ᠨᠣᠶᠠᠳ ᠤ᠋ᠨ ᠬᠠᠷᠢᠶᠠᠲᠤ ᠤᠷᠢᠶᠠᠩᠬᠠᠨ ᠨᠠᠷ ᠴᠢᠩᠭᠢᠰ ᠦ᠋ᠨ ᠦᠶᠡ ᠡᠴᠡ ᠠᠪᠤᠭᠠᠳ ᠪᠤᠷᠬᠠᠨ ᠬᠠᠯᠳᠤᠨ ᠳ᠋ᠤ᠌ ᠠᠮᠢᠳᠤᠷᠠᠵᠤ᠂ ᠪᠠᠰᠠ ᠴᠢᠩᠭᠢᠰ ᠬᠠᠭᠠᠨ ᠠ᠋ᠴᠠ ᠰᠡᠭᠦᠯᠡᠷ ᠲᠡᠭᠦᠨ ᠦ᠌ ᠠᠯᠲᠠᠨ ᠬᠡᠭᠦᠷ ᠶᠡᠬᠡ ᠬᠣᠷᠢᠭ ᠢ᠋ ᠰᠠᠬᠢᠬᠤ ᠡᠭᠦᠷᠭᠡ ᠲᠡᠢ ᠪᠣᠯᠪᠠ᠃ ᠡᠳᠡ ᠨᠠᠷ 15 ᠠ᠋ᠴᠠ 16 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠳ᠋ᠦ᠍ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠪᠣᠯᠵᠤ ᠪᠦᠷᠢᠯᠳᠦᠭᠡᠳ ᠮᠥᠨ ᠬᠠᠭᠤᠴᠢᠨ ᠨᠤᠲᠤᠭ ᠪᠤᠷᠬᠠᠨ ᠬᠠᠯᠳᠤᠨ ᠳ᠋ᠤ᠌ ᠪᠠᠨ ᠪᠠᠢᠵᠠᠢ（ᠵᠢᠭᠠᠴᠢᠲᠠᠢ ᠪᠤᠶᠠᠨᠳᠠᠯᠭᠡᠷ ᠄ 《ᠣᠷᠢᠶᠠᠩᠬᠠᠨ ᠤ᠋ ᠲᠤᠬᠠᠢ》᠂ ᠪᠣᠷᠵᠢᠭᠢᠳᠠᠢ ᠣᠶᠣᠨᠪᠢᠯᠢᠭ᠌᠂ ᠯ ᠨᠠᠷᠠᠩᠭᠤᠸᠠ ᠨᠠᠢᠷᠠᠭᠤᠯᠤᠭᠰᠠᠨ ᠄ 《ᠡᠯᠪᠡᠭ ᠪᠦᠲᠦᠭᠡᠯ - ᠫᠷᠣᠹᠧᠰᠰᠣᠷ ᠳ᠋ᠣᠺᠲ᠋ᠣᠷ ᠵᠠᠭᠴᠢᠳ ᠰᠡᠴᠡᠨ ᠦ᠌ ᠨᠠᠶᠠᠨ ᠨᠠᠰᠤᠨ ᠤ᠋ ᠣᠢ ᠳ᠋ᠤ᠌》᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 1996 ᠣᠨ᠃
ᠦᠯᠭᠡ ᠲᠦᠮᠡᠨ ᠦ᠌ ᠣᠷᠢᠶᠠᠩᠬᠠᠨ ᠪᠤᠶᠤ ᠳᠣᠶᠣᠨ ᠣᠢ ᠶ᠋ᠢᠨ ᠣᠷᠢᠶᠠᠩᠬᠠᠨ ᠪᠣᠯ ᠶᠤᠸᠠᠨ ᠤᠯᠤᠰ ᠤ᠋ᠨ ᠶᠠᠨ ᠶᠠᠤ ᠭᠤᠲᠠᠭᠠᠷ ᠣᠨ ᠪᠤᠶᠤ 1316 ᠣᠨ ᠳ᠋ᠤ᠌ ᠪᠠᠢᠭᠤᠯᠤᠭᠳᠠᠭᠰᠠᠨ ᠳᠣᠶᠣᠨ ᠥᠨᠳᠥᠷ ᠦ᠋ᠨ ᠣᠷᠢᠶᠠᠩᠬᠠᠨ ᠮᠢᠩᠭᠠᠨ ᠠ᠋ᠴᠠ ᠢᠷᠡᠯᠲᠡᠢ᠃ ᠲᠡᠳᠡᠨ ᠦ᠌ ᠨᠣᠶᠠᠯᠠᠭᠴᠢᠳ ᠨᠢ ᠣᠷᠢᠶᠠᠩᠬᠠᠨ ᠵᠠᠯᠮᠠ ᠶ᠋ᠢᠨ ᠦᠷᠡᠳᠦᠰ᠃ ᠮᠢᠩ ᠤᠯᠤᠰ ᠤ᠋ᠨ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠣᠳᠬᠣᠨ ᠳᠡᠭᠦᠦ ᠤᠳᠴᠢᠬᠢᠨ ᠤ᠋ ᠦᠷᠡ ᠯᠢᠶᠣᠣ ᠣᠩ ᠠᠵᠠᠰᠢᠷᠢ ᠮᠢᠩ ᠤᠯᠤᠰ ᠳᠠᠭᠠᠭᠰᠠᠨᠠ᠂ ᠮᠢᠩ ᠤᠯᠤᠰ ᠲᠡᠭᠦᠨ ᠦ᠌ ᠡᠵᠡᠮᠰᠢᠯ ᠨᠤᠲᠤᠭ ᠲᠤ᠌ ᠤᠩᠯᠢᠭᠤᠳ᠂ ᠦᠵᠢᠶᠡᠳ᠂ ᠣᠷᠢᠶᠠᠩᠬᠠᠨ ᠭᠤᠷᠪᠠᠨ ᠣᠢ ᠪᠠᠢᠭᠤᠯᠵᠤ᠂ ᠯᠢᠶᠣᠣ ᠣᠩ ᠢ᠋ᠶ᠋ᠠᠷ ᠮᠡᠳᠡᠭᠦᠯᠦᠭᠰᠡᠨ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠᠬᠢ ᠤᠷᠢᠶᠠᠩᠬᠠᠢᠴᠤᠳ ᠪᠣᠯ ᠳᠣᠶᠣᠨ ᠤ᠋ ᠤᠷᠢᠶᠠᠩᠬᠠᠨ ᠮᠢᠩᠭᠠᠨ ᠠ᠋ᠴᠠ ᠬᠥᠭᠵᠢᠵᠦ ᠢᠷᠡᠭᠰᠡᠨ ᠤᠯᠤᠰ᠂ ᠲᠡᠳᠡᠨ ᠦ᠌ ᠨᠣᠶᠠᠯᠠᠭᠴᠢᠳ ᠨᠢ ᠣᠷᠢᠶᠠᠩᠬᠠᠨ ᠵᠠᠯᠮᠠ ᠶ᠋ᠢᠨ ᠦᠷᠡ ᠠᠴᠢᠨᠠᠷ᠃ ᠡᠨᠡᠬᠦ ᠭᠤᠷᠪᠠᠨ ᠣᠢ ᠶ᠋ᠢ ᠮᠢᠩ ᠤᠯᠤᠰ ᠤ᠋ᠨ ᠲᠡᠦᠬᠡᠨ ᠳ᠋ᠦ᠍ 《ᠤᠷᠢᠶᠠᠩᠬᠠᠨ ᠬᠢᠭᠡᠳ ᠭᠤᠷᠪᠠᠨ ᠣᠢ》 ᠭᠡᠵᠦ᠂ ᠳᠣᠶᠣᠨ ᠤᠷᠢᠶᠠᠩᠬᠠᠭᠴᠤᠳ ᠢ᠋ 《ᠤᠷᠢᠶᠠᠩᠬᠠᠨ ᠣᠢ 》 《ᠳᠣᠶᠣᠨ ᠣᠢ 》 ᠭᠡᠬᠦᠴᠢᠯᠡᠨ ᠨᠡᠷᠡᠢᠳᠵᠦ ᠪᠠᠢᠪᠠ᠃ 《ᠣᠢ 》 ᠭᠡᠳᠡᠭ ᠨᠢ ᠮᠢᠩ ᠤᠯᠤᠰ ᠤ᠋ᠨ ᠬᠢᠯᠢ ᠳᠠᠭᠠᠤ ᠴᠡᠷᠢᠭ ᠦ᠋ᠨ ᠪᠠᠢᠭᠤᠯᠤᠮᠵᠢ᠂ ᠮᠣᠩᠭᠣᠯᠴᠤᠳ ᠪᠣᠯ ᠬᠠᠷᠢᠨ ᠲᠡᠳᠡᠨ ᠢ᠋ ᠵᠦᠭᠡᠷ ᠯᠡ ᠤᠷᠢᠶᠠᠩᠬᠠᠢᠴᠤᠳ ᠭᠡᠳᠡᠭ᠃ ᠡᠨᠡ ᠪᠦᠯᠦᠭ ᠤᠷᠢᠶᠠᠩᠬᠠᠢᠴᠤᠳ ᠳᠣᠶᠣᠨ ᠠᠭᠤᠯᠠ᠂ ᠴᠣᠭᠣᠷ ᠭᠣᠣᠯ ᠳᠠᠭᠠᠤ ᠪᠠᠢᠵᠤ ᠪᠠᠢᠭᠠᠳ᠂ ᠰᠡᠭᠦᠯᠳᠡᠵᠦ ᠬᠢᠩᠭᠠᠨ ᠳᠠᠪᠠᠭᠠᠨ ᠤ᠋ ᠡᠮᠦᠨᠡ ᠨᠡᠭᠦᠭᠡᠳ᠂ ᠤᠳᠴᠢᠬᠢᠨ ᠨᠣᠶᠠᠨ ᠤ᠋ ᠬᠣᠢᠴᠢᠰ ᠤ᠋ᠨ ᠨᠣᠶᠠᠯᠠᠯ ᠳ᠋ᠠᠬᠢ 《ᠦᠯᠭᠡ ᠲᠦᠮᠡᠨ 》（ᠬᠢᠩᠭᠠᠨ ᠳᠠᠪᠠᠭᠠᠨ ᠤ᠋ ᠦᠯᠭᠡ ᠪᠤᠶᠤ ᠡᠩᠭᠡᠷ ᠦ᠋ᠨ ᠲᠦᠮᠡᠨ） ᠪᠣᠯᠵᠤ ᠪᠦᠷᠢᠯᠳᠦᠵᠡᠢ᠃ ᠥᠯᠭᠡ ᠲᠦᠮᠡᠨ ᠨᠢ ᠤᠳᠴᠢᠬᠢᠨ ᠨᠣᠶᠠᠨ ᠤ᠋ ᠬᠣᠢᠴᠢᠰ ᠤ᠋ᠨ ᠨᠣᠶᠠᠯᠠᠯ ᠳ᠋ᠤ᠌ ᠪᠠᠢᠵᠤ ᠪᠠᠢᠭᠠᠳ᠂ ᠠᠯᠢ ᠨᠢᠭᠡᠨ ᠦᠶᠡ ᠳ᠋ᠦ᠍ ᠤᠷᠢᠶᠠᠩᠬᠠᠨ ᠤ᠋ ᠡᠵᠡᠮᠰᠢᠯ ᠳ᠋ᠦ᠍ ᠣᠷᠣᠭᠰᠠᠨ ᠪᠠᠢᠪᠠ᠃
ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠤ᠋ ᠳᠥᠴᠢᠭᠡᠳ ᠣᠨ ᠠ᠋ᠴᠠ ᠡᠬᠢᠯᠡᠭᠡᠳ᠂ ᠶᠡᠬᠡ ᠬᠠᠭᠠᠨ ᠲᠡᠷᠠᠴᠠᠬᠠᠷ ᠲᠦᠮᠡᠨ ᠢ᠋ᠶ᠋ᠡᠨ ᠠᠪᠴᠤ ᠬᠡᠷᠦᠯᠦᠨ ᠭᠣᠣᠯ ᠤ᠋ᠨ 《ᠬᠠᠪᠢ ᠭᠠᠵᠠᠷ ᠠ᠋ᠴᠠ ᠬᠢᠩᠭᠠᠨ ᠳᠠᠪᠠᠭᠠ ᠳᠠᠪᠠᠨ ᠡᠮᠦᠨᠡᠰᠢ ᠪᠠᠭᠤᠵᠤ᠂ ᠣᠷᠢᠶᠠᠩᠬᠠᠨ ᠣᠢ ᠶ᠋ᠢᠨ ᠬᠣᠢᠲᠤ ᠬᠡᠰᠡᠭ ᠢ᠋ ᠡᠵᠡᠯᠡᠨ ᠠᠪᠬᠤ ᠳ᠋ᠤ᠌᠂ ᠬᠠᠭᠠᠨ ᠤ᠋ ᠬᠠᠮᠲᠤ ᠪᠠᠷ ᠬᠠᠯᠬᠠ ᠲᠦᠮᠡᠨ ᠦ᠌ ᠵᠡᠭᠦᠨ ᠭᠠᠷ ᠬᠤᠷᠬᠠᠴᠢ ᠪᠠᠭᠠᠲᠤᠷ ᠤ᠋ᠨ ᠤᠳᠤᠷᠢᠳᠤᠯᠭᠠ ᠪᠠᠷ᠂ ᠬᠣᠷᠴᠢᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠬᠦᠢ ᠮᠥᠩᠬᠡ ᠳᠠᠰᠬᠠᠷᠠ ᠶ᠋ᠢᠨ ᠳᠠᠭᠠᠭᠤᠯᠭᠠ ᠪᠠᠷ ᠲᠤᠰ ᠲᠤᠰ ᠬᠢᠩᠭᠠᠨ ᠳᠠᠪᠠᠭᠠᠨ ᠤ᠋ ᠦᠯᠭᠡ ᠳ᠋ᠦ᠍ ᠪᠠᠭᠤᠵᠤ᠂ ᠦᠵᠢᠶᠡᠳ᠂ ᠤᠩᠯᠢᠭᠤᠳ ᠬᠣᠶᠠᠷ ᠣᠢ ᠶ᠋ᠢ ᠪᠦᠷᠢᠮᠦᠰᠦᠨ ᠡᠵᠡᠮᠳᠡᠵᠦ ᠠᠪᠴᠠᠢ᠃ ᠡᠨᠡ ᠦᠶᠡ ᠳ᠋ᠦ᠍᠂ ᠪᠠᠷᠠᠭᠤᠨ ᠲᠦᠮᠡᠨ ᠦ᠌ ᠲᠦᠷᠦᠭᠦᠦ ᠲᠦᠮᠡᠳ ᠦ᠋ᠨ ᠠᠯᠲᠠᠨ ᠬᠠᠭᠠᠨ ᠲᠡᠰᠴᠦ ᠶᠠᠳᠠᠨ ᠵᠡᠭᠦᠨᠰᠢ ᠴᠡᠷᠢᠭᠯᠡᠵᠦ᠂ ᠤᠷᠢᠶᠠᠩᠬᠠᠨ ᠣᠢ ᠶ᠋ᠢᠨ ᠡᠮᠦᠨᠡ ᠬᠡᠰᠡᠭ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠠᠳ᠂ ᠲᠡᠳᠡᠨ ᠢ᠋ ᠬᠠᠷᠠᠴᠢᠨ ᠤ᠋ ᠨᠣᠶᠠᠳ ᠲᠤ᠌ ᠬᠤᠪᠢᠶᠠᠨ ᠥᠮᠴᠢᠯᠡᠭᠦᠯᠵᠡᠢ᠃ ᠡᠳᠡᠭᠡᠷ ᠴᠡᠷᠢᠭ ᠲᠡᠢᠨ ᠦ᠌ ᠠᠵᠢᠯᠯᠠᠭᠠ ᠨᠤᠭᠤᠳ ᠤ᠋ᠨ ᠦᠷᠡ ᠳ᠋ᠦᠩ ᠳ᠋ᠦ᠍᠂ ᠤᠷᠢᠶᠠᠩᠬᠠᠨ ᠣᠢ ᠶ᠋ᠢᠨ ᠤᠷᠢᠶᠠᠩᠬᠠᠭᠴᠤᠳ ᠴᠠᠬᠠᠷ᠂ ᠬᠠᠷᠠᠴᠢᠨ ᠬᠣᠶᠠᠷ ᠠᠢᠮᠠᠭ ᠤ᠋ᠨ ᠠᠯᠲᠠᠨ ᠣᠷᠣᠭᠳᠠᠨ ᠤ᠋ ᠡᠵᠡᠮᠰᠢᠯ ᠳ᠋ᠦ᠍ ᠣᠷᠣᠵᠤ᠂ ᠲᠡᠳᠡᠨ ᠦ᠌ ᠲᠦᠷᠦᠭᠦᠴᠦᠳ ᠨᠢ ᠴᠠᠬᠠᠷ ᠪᠠ ᠲᠠᠢᠵᠢ ᠨᠠᠷ ᠤ᠋ᠨ ᠲᠠᠪᠤᠨᠠᠩ ᠨᠠᠷ ᠪᠣᠯᠵᠤ᠂ ᠬᠠᠷᠠᠴᠢᠨ ᠳ᠋ᠤ᠌ 《ᠲᠠᠢᠵᠢ ᠲᠠᠪᠤᠨᠠᠩ 》 ᠬᠡᠮᠡᠬᠦ ᠨᠣᠶᠠᠯᠠᠬᠤ ᠳᠠᠪᠬᠤᠷᠭᠠ ᠪᠣᠢ ᠪᠣᠯᠵᠠᠢ᠃ ᠡᠳᠡᠭᠡᠷ ᠲᠠᠪᠤᠨᠠᠩ ᠨᠠᠷ ᠪᠣᠯ ᠬᠣᠵᠢᠮ ᠤ᠋ᠨ ᠲᠠᠢᠴᠢᠩ ᠭᠦᠷᠦᠨ ᠦ᠌ ᠦᠶᠡ ᠶ᠋ᠢᠨ ᠵᠣᠰᠣᠲᠤ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠬᠠᠷᠠᠴᠢᠨ ᠭᠤᠷᠪᠠᠨ ᠬᠣᠰᠢᠭᠤ ᠪᠠ ᠲᠦᠮᠡᠳ ᠵᠡᠭᠦᠨ ᠬᠤᠰᠢᠭᠤᠨ ᠤ᠋ ᠵᠠᠰᠠᠭ ᠲᠠᠪᠤᠨᠠᠩ ᠨᠠᠷ ᠤ᠋ᠨ ᠳᠡᠭᠡᠳᠦᠰ ᠶᠦ᠍ᠮ᠃ ᠡᠨᠡ ᠲᠤᠬᠠᠢ ᠣᠯᠳᠣᠢ ᠪᠢ 《ᠬᠠᠷᠠᠴᠢᠨ ᠲᠦᠮᠡᠨ ᠦ᠌ ᠰᠤᠳᠤᠯᠤᠯ 》ᠭᠡᠳᠡᠭ ᠵᠣᠬᠢᠶᠠᠯ ᠳ᠋ᠤ᠌ ᠪᠠᠨ ᠨᠡᠯᠢᠶᠡᠳ ᠳᠡᠯᠭᠡᠷᠡᠩᠭᠦᠢ ᠥᠭᠦᠯᠡᠭᠰᠡᠨ ᠪᠣᠯᠬᠣᠷ ᠠᠳᠠ ᠨᠤᠷᠰᠢᠬᠤ ᠪᠠᠨ ᠪᠣᠯᠢᠶᠠ᠃
ᠭᠡᠪᠡᠴᠦ᠂ ᠦᠵᠦᠮᠦᠴᠢᠨ ᠲᠠᠢᠵᠢ ᠭᠣᠮᠪᠣᠵᠠᠪ 《ᠭᠠᠩᠭᠠ ᠶ᠋ᠢᠨ ᠤᠷᠤᠰᠬᠠᠯ》 ᠳ᠋ᠤ᠌ ᠪᠠᠨ ᠣᠷᠢᠶᠠᠩᠬᠠᠨ ᠵᠠᠯᠮᠠ ᠶ᠋ᠢᠨ ᠦᠷᠡ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠠ᠋ᠴᠠ ᠦᠷᠡᠵᠢᠭᠰᠡᠨ ᠨᠢ 《ᠬᠠᠷᠠᠴᠢᠨ ᠤ᠋ ᠨᠣᠶᠠᠳ ᠲᠠᠪᠤᠨᠠᠩ ᠣᠪᠣᠭᠲᠤ ᠮᠥᠨ ᠭᠡᠮᠡᠨ ᠵᠠᠷᠢᠮ ᠤ᠋ᠳ ᠣᠯᠠᠩᠬᠢ ᠳ᠋ᠤᠷ ᠥᠭᠦᠯᠡᠵᠦᠬᠦᠢ 》 ᠭᠡᠵᠦ ᠳᠠᠮ ᠬᠡᠯᠡᠯᠭᠡ ᠶ᠋ᠢ ᠲᠡᠮᠳᠡᠭᠯᠡᠭᠰᠡᠨ ᠡᠴᠡ ᠪᠣᠯᠵᠤ᠂ ᠬᠥᠮᠦᠰ ᠵᠠᠷᠤᠳ ᠨᠣᠶᠠᠳ ᠢ᠋ ᠬᠠᠷᠠᠴᠢᠨ ᠲᠦᠮᠡᠳ ᠦ᠋ᠨ ᠤᠷᠢᠶᠠᠩᠬᠠᠨ ᠨᠣᠶᠠᠳ ᠲᠠᠢ ᠨᠢᠭᠡᠯᠡ ᠭᠡᠷ ᠦ᠋ᠨ ᠭᠡᠵᠦ ᠦᠵᠡᠭᠡᠳ ᠵᠠᠷᠤᠳ ᠢ᠋ ᠥᠯᠭᠡ ᠲᠦᠮᠡᠨ ᠦ᠌ ᠣᠷᠢᠶᠠᠩᠬᠠᠨ ᠠ᠋ᠴᠠ ᠢᠷᠡᠯᠲᠡᠢ ᠭᠡᠵᠦ ᠦᠵᠡᠬᠦ ᠪᠣᠯᠤᠭᠰᠠᠨ ᠶᠤᠮ᠃ ᠡᠨᠡ ᠪᠣᠯ ᠡᠨᠳᠡᠭᠦᠷᠡᠯ᠂ ᠡᠨᠡᠬᠦ ᠡᠨᠳᠡᠭᠦᠷᠡᠯ ᠨᠠᠭᠠᠳᠤ ᠵᠠᠬᠠ ᠳ᠋ᠤ᠌ ᠪᠠᠨ ᠭᠣᠮᠪᠣᠵᠠᠪ ᠤ᠋ᠨ ᠦᠶᠡ ᠳ᠋ᠦ᠍ ᠨᠢᠭᠡᠨᠲᠡ ᠪᠣᠢ ᠪᠣᠯᠤᠭᠠᠳ᠂ ᠵᠠᠷᠤᠳ ᠭᠦᠦᠰᠢ ᠲᠡᠭᠦᠨ ᠢ᠋ ᠢᠳᠡᠭᠡᠨ ᠲᠡᠮᠳᠡᠭᠯᠡᠭᠰᠡᠨ ᠡᠴᠡ ᠡᠨᠡᠬᠦ ᠬᠡᠯᠡᠯᠭᠡ ᠤᠯᠠᠮ ᠳᠡᠯᠭᠡᠷᠡᠵᠡᠢ᠃ ᠡᠨᠡᠬᠦ ᠬᠡᠯᠡᠯᠭᠡ ᠡᠨᠳᠡᠭᠦᠷᠡᠯ ᠪᠣᠯᠬᠤ ᠨᠢ ᠡᠷᠡᠭᠡᠯᠵᠡᠰᠢ ᠦᠭᠡᠢ᠃
ᠬᠠᠮᠤᠭ ᠲᠦᠷᠦᠭᠦᠨ ᠳ᠋ᠦ᠍᠂ ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠲᠡᠢᠨ ᠪᠣᠯᠤᠭᠰᠠᠨ 1509 ᠣᠨ ᠳ᠋ᠤ᠌᠂ ᠬᠠᠯᠬᠠ ᠲᠦᠮᠡᠨ ᠣᠳᠣ ᠶ᠋ᠢᠨ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠪᠡᠶᠡ ᠪᠠ ᠮᠠᠨ ᠤ᠋ ᠬᠥᠯᠥᠨ ᠪᠤᠢᠷ ᠨᠤᠲᠤᠭ ᠢ᠋ᠶ᠋ᠠᠷ ᠤᠷᠤᠰᠴᠤ ᠪᠠᠢᠭᠠ ᠬᠠᠯᠬᠠ ᠭᠣᠣᠯ ᠳᠠᠭᠠᠤ ᠪᠠᠢᠭᠰᠠᠨ ᠪᠥᠭᠡᠳ ᠪᠠᠷᠠᠭᠤᠨ ᠵᠡᠭᠦᠨ ᠭᠠᠷ ᠲᠤ᠌ ᠬᠤᠪᠢᠶᠠᠭᠳᠠᠭᠰᠠᠨ ᠶᠡᠬᠡ ᠲᠦᠮᠡᠨ ᠪᠠᠢᠵᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠥᠪᠥᠷ ᠲᠠᠪᠤᠨ ᠬᠠᠯᠬᠠ ᠭᠡᠵᠦ ᠭᠠᠷᠤᠭᠠᠳᠤᠢ᠂ ᠥᠪᠥᠷ ᠲᠠᠪᠤᠨ ᠬᠠᠯᠬᠠ ᠪᠣᠢ ᠪᠣᠯᠤᠭᠰᠠᠨ ᠨᠢ ᠲᠡᠭᠦᠨ ᠡᠴᠡ ᠬᠠᠭᠠᠰ ᠵᠠᠭᠤᠨ ᠤ᠋ ᠳᠠᠷᠠᠭᠠ ᠶᠤᠮ᠃ ᠡᠢᠮᠦ ᠡᠴᠡ᠂ ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠲᠡᠢᠨ ᠳ᠋ᠦ᠍ ᠣᠷᠣᠭᠰᠠᠨ ᠬᠠᠯᠬᠠ ᠪᠠᠭᠠᠰᠤᠨ ᠪᠠᠭᠠᠲᠤᠷ ᠭᠡᠭᠴᠢ ᠶᠡᠬᠡ ᠬᠠᠯᠬᠠ ᠲᠦᠮᠡᠨ ᠦ᠌ ᠨᠣᠶᠠᠯᠠᠭᠴᠢ ᠶ᠋ᠢᠨ ᠨᠢᠭᠡ ᠨᠢ ᠪᠣᠯᠵᠤ ᠲᠠᠭᠠᠷᠠᠨᠠ᠃ ᠡᠨᠡ ᠬᠥᠮᠦᠨ ᠢ᠋ ᠵᠠᠷᠤᠳ ᠤ᠋ᠨ ᠨᠣᠶᠠᠨ ᠤᠳᠤᠮ ᠤ᠋ᠨ ᠭᠡᠰᠡᠨ ᠡᠴᠡ ᠦᠵᠡᠪᠡᠯ᠂ ᠵᠠᠷᠤᠳ ᠨᠢ ᠶᠡᠬᠡ ᠬᠠᠯᠬᠠ ᠲᠦᠮᠡᠨ ᠦ᠌ ᠨᠢᠭᠡ ᠣᠲᠣᠭ ᠪᠠᠢᠭᠰᠠᠨ ᠪᠥᠭᠡᠳ ᠪᠠᠭᠠᠰᠤᠨ ᠨᠢ ᠡᠨᠡᠬᠦ ᠵᠠᠷᠤᠳ ᠣᠲᠣᠭ ᠤ᠋ᠨ ᠨᠣᠶᠠᠨ ᠪᠠᠢᠵᠠᠢ᠃ ᠰᠠᠭᠠᠩ ᠰᠡᠴᠡᠨ᠂ ᠵᠠᠷᠤᠳ ᠭᠦᠦᠰᠢ ᠨᠠᠷ ᠥᠪᠡᠷ ᠦ᠋ᠨ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠦᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠳᠠᠯ ᠪᠠ ᠮᠡᠳᠡᠯᠭᠡ ᠳ᠋ᠦ᠍ ᠳᠣᠯᠳᠣᠢᠳᠴᠤ᠂ 1509 ᠣᠨ ᠤ᠋ ᠦᠶᠡ ᠶ᠋ᠢᠨ ᠵᠠᠷᠤᠳ ᠤ᠋ᠨ ᠪᠠᠭᠠᠰᠤᠨ ᠢ᠋ 《ᠥᠪᠥᠷ ᠲᠠᠪᠤᠨ ᠬᠠᠯᠬᠠ ᠶ᠋ᠢᠨ ᠪᠠᠭᠠᠰᠤᠨ ᠲᠠᠪᠤᠨᠠᠩ 》ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠵᠥᠪ ᠪᠢᠰᠢ᠃
ᠬᠣᠶᠠᠳᠤᠭᠠᠷ ᠲᠤ᠌᠂ ᠳᠠᠯᠠᠨ ᠲᠡᠷᠢᠭᠦᠨ ᠦ᠌ ᠲᠡᠢᠨ ᠳ᠋ᠦ᠍ ᠣᠷᠣᠵᠤ ᠶᠡᠬᠡ ᠭᠠᠪᠢᠶᠠ ᠪᠠᠢᠭᠤᠯᠤᠭᠰᠠᠨ ᠣᠷᠢᠶᠠᠩᠬᠠᠭᠴᠤᠳ ᠪᠣᠯ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠦ᠌ ᠴᠡᠷᠢᠭ᠂ ᠬᠠᠷᠢᠨ ᠥᠯᠭᠡ ᠲᠦᠮᠡᠨ ᠦ᠌ ᠣᠷᠢᠶᠠᠩᠬᠠᠨ ᠣᠲᠣᠭ（ᠮᠢᠩ ᠤᠯᠤᠰ ᠤ᠋ᠨ ᠬᠡᠯᠡᠳᠡᠭ ᠣᠷᠢᠶᠠᠩᠬᠠᠨ ᠣᠢ）ᠪᠢᠰᠢ᠃ 《ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ》 ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠳᠠᠶᠠᠨ ᠬᠠᠭᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠯᠠᠭᠳᠠᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ᠄ 《ᠡᠵᠡᠨ ᠲᠡᠭᠷᠢ ᠳ᠋ᠦ᠍ ᠵᠠᠷᠭᠤ ᠪᠠᠨ ᠵᠢᠭᠠᠨ ᠰᠠᠴᠤᠯᠢ ᠰᠠᠴᠤᠵᠤ ᠮᠥᠷᠭᠥᠭᠡᠳ ᠵᠡᠭᠦᠨ ᠭᠤᠷᠪᠠᠨ ᠲᠦᠮᠡᠨ᠂ ᠠᠪᠠᠭᠠ ᠬᠣᠣᠷᠴᠢᠨ（ᠬᠣᠷᠴᠢᠨ）ᠬᠢᠭᠡᠳ ᠢ᠋ ᠠᠪᠤᠨ ᠮᠣᠷᠢᠯᠠᠪᠠᠢ》᠂ ᠲᠡᠭᠡᠭᠡᠳ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠪᠠᠨ 《ᠣᠷᠳᠣᠰ ᠡᠵᠡᠨ ᠦ᠌ ᠨᠠᠢ᠍ᠮᠠᠨ ᠴᠠᠭᠠᠨ ᠭᠡᠷ ᠢ᠋ ᠬᠠᠳᠠᠭᠠᠯᠠᠭᠰᠠᠨ ᠶᠡᠬᠡ ᠵᠠᠶᠠᠭᠠᠲᠤ ᠤᠯᠤᠰ ᠪᠥᠯᠥᠭᠡ᠂ ᠲᠡᠭᠦᠨ ᠯᠦᠭᠡ ᠤᠷᠢᠶᠠᠩᠬᠠᠨ ᠮᠥᠨ ᠡᠵᠡᠨ ᠦ᠌ ᠠᠯᠲᠠᠨ ᠬᠥᠮᠥᠷᠭᠡ ᠶ᠋ᠢ ᠰᠠᠬᠢᠭᠰᠠᠨ ᠪᠠᠰᠠ ᠶᠡᠬᠡ ᠵᠠᠶᠠᠭᠠᠲᠤ ᠤᠯᠤᠰ᠂ ᠬᠣᠣᠷᠴᠢᠨ ᠠᠪᠠᠭᠠ ᠲᠠᠢ ᠲᠤᠰᠠᠯᠠᠲᠤᠭᠠᠢ 》 ᠭᠡᠵᠡᠢ᠃ 《ᠡᠵᠡᠨ ᠦ᠌ ᠠᠯᠲᠠᠨ ᠬᠥᠮᠥᠷᠭᠡ 》ᠭᠡᠭᠴᠢ ᠨᠢ ᠡᠵᠡᠨ ᠴᠢᠩᠭᠢᠰ ᠦ᠋ᠨ ᠠᠯᠲᠠᠨ ᠬᠡᠭᠦᠷ ᠢ᠋ ᠪᠤᠮᠪᠠᠯᠠᠭᠰᠠᠨ ᠠᠪᠰᠠ ᠶ᠋ᠢ ᠬᠡᠯᠡᠵᠡᠢ᠃ ᠡᠭᠦᠨ ᠡᠴᠡ ᠪᠢᠳᠡ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠪᠣᠯ ᠡᠵᠡᠨ ᠦ᠌ ᠶᠡᠬᠡ ᠬᠣᠷᠢᠭ ᠢ᠋ ᠰᠠᠬᠢᠭᠰᠠᠨ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠣᠷᠢᠶᠠᠩᠬᠠᠨ ᠤ᠋ ᠬᠥᠮᠦᠨ᠂ ᠵᠡᠭᠦᠨ ᠭᠤᠷᠪᠠᠨ ᠲᠦᠮᠡᠨ ᠦ᠌ ᠨᠢᠭᠡ ᠨᠢ ᠪᠣᠯᠤᠭᠰᠠᠨ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠦ᠌ ᠪᠠᠭᠠᠲᠤᠷ ᠭᠡᠭᠴᠢ ᠶ᠋ᠢ ᠬᠢᠯᠪᠠᠷᠬᠠᠨ ᠮᠡᠳᠡᠵᠦ ᠪᠣᠯᠤᠨᠠ᠃
ᠭᠤᠷᠪᠠ ᠳ᠋ᠤ᠌ ᠪᠠᠭᠠᠰᠤᠨ ᠨᠢ ᠥᠯᠭᠡ ᠶ᠋ᠢᠨ ᠤᠷᠢᠶᠠᠩᠬᠠᠨ ᠤ᠋ ᠬᠥᠮᠦᠨ ᠭᠡᠵᠦ ᠵᠢᠱ᠌ᠢᠬᠦ ᠪᠣᠯᠤᠮᠵᠢ ᠶᠡᠷᠦᠳᠡᠭᠡᠨ ᠠᠯᠠᠭᠠ᠃ ᠤᠴᠢᠷ ᠨᠢ ᠡᠳᠡᠭᠡᠷ ᠣᠷᠢᠶᠠᠩᠬᠠᠨ ᠨᠠᠷ ᠴᠠᠬᠠᠷ ᠪᠠ ᠬᠠᠷᠠᠴᠢᠨ ᠤ᠋ ᠲᠠᠢᠵᠢ ᠨᠠᠷ ᠲᠤ᠌ ᠬᠤᠪᠢᠶᠠᠭᠳᠠᠭᠰᠠᠨ ᠪᠥᠭᠡᠳ ᠮᠠᠨᠵᠤ ᠨᠠᠷ ᠡᠵᠡᠯᠡᠨ ᠠᠪᠬᠤ ᠪᠣᠯᠲᠠᠯᠠ ᠴᠠᠬᠠᠷ ᠬᠠᠷᠠᠴᠢᠨ ᠬᠣᠶᠠᠷ ᠨᠢ ᠲᠠᠪᠤᠨ ᠬᠠᠯᠬᠠ ᠳ᠋ᠤ᠌ ᠢᠯᠠᠭᠳᠠᠵᠤ ᠠᠯᠪᠠᠲᠤ ᠬᠠᠷᠢᠶᠠᠲᠤ ᠪᠠᠨ ᠬᠤᠷᠢᠶᠠᠯᠭᠠᠭᠰᠠᠨ ᠶᠠᠪᠤᠳᠠᠯ ᠦᠭᠡᠢ ᠪᠣᠯᠬᠣᠷ᠂ ᠲᠡᠳᠡ ᠳᠠᠬᠢᠭᠠᠳ ᠵᠠᠷᠤᠳ ᠤ᠋ᠨ ᠲᠠᠢᠵᠢ ᠨᠠᠷ ᠤ᠋ᠨ ᠠᠯᠪᠠᠲᠤ ᠪᠣᠯᠵᠤ ᠬᠤᠪᠢᠷᠠᠬᠤ ᠶᠣᠰᠣ ᠦᠭᠡᠢ ᠶᠦ᠍ᠮ᠃ ᠮᠢᠩ ᠤᠯᠤᠰ ᠤ᠋ᠨ ᠬᠦ᠌ ᠶᠢᠩ ᠲᠡᠢ ᠭᠡᠭᠴᠢ ᠬᠥᠮᠦᠨ᠂ ᠣᠷᠢᠶᠠᠩᠬᠠᠨ ᠣᠢ ᠶ᠋ᠢᠨ ᠲᠦᠷᠦᠭᠦᠦ ᠬᠤᠸᠠᠳᠠᠩ ᠤ᠋ᠨ ᠤᠳᠠᠭᠠᠬᠢ ᠬᠥᠪᠡᠭᠦᠨ ᠪᠠᠷᠰᠤᠨ ᠶᠡᠬᠡ ᠬᠠᠭᠠᠨ ᠲᠠᠢ ᠤᠷᠤᠭ ᠪᠣᠯᠤᠯᠴᠠᠵᠤ ᠮᠢᠩ ᠤᠯᠤᠰ ᠤ᠋ᠨ ᠳᠠᠢᠰᠤᠨ ᠪᠣᠯᠵᠤ ᠪᠠᠢᠨᠠ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠵᠦᠢᠯ ᠪᠣᠢ᠃ ᠡᠭᠦᠨ ᠢ᠋ ᠦᠨᠳᠦᠰᠦᠯᠡᠵᠦ ᠵᠠᠷᠢᠮ ᠡᠷᠳᠡᠮᠲᠡᠨ ᠪᠠᠭᠠᠰᠤᠨ ᠲᠠᠪᠤᠨᠠᠩ ᠢ᠋ ᠡᠨᠡ ᠪᠠᠷᠰᠤᠨ ᠭᠡᠭᠴᠢ ᠲᠡᠢ ᠦᠯᠢᠳᠬᠡᠨ ᠦᠵᠡᠵᠦ᠂ ᠤᠯᠠᠮ ᠢ᠋ᠶ᠋ᠠᠷ ᠵᠠᠷᠤᠳ ᠢ᠋ ᠣᠷᠢᠶᠠᠩᠬᠠᠨ ᠣᠢ ᠶ᠋ᠢᠨ ᠢᠷᠭᠡᠳ ᠭᠡᠮᠡᠨ ᠦᠵᠡᠭᠰᠡᠨ ᠨᠢ ᠢᠲᠡᠭᠡᠮᠡᠷ ᠪᠢᠰᠢ᠃ ᠡᠭᠦᠨ ᠡᠴᠡ ᠪᠢᠳᠡ ᠵᠠᠷᠤᠳ ᠪᠣᠯ 《ᠡᠵᠡᠨ ᠦ᠌ ᠠᠯᠲᠠᠨ ᠬᠥᠮᠥᠷᠭᠡ 》 ᠶ᠋ᠢ ᠰᠠᠬᠢᠭᠰᠠᠨ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠦ᠌ ᠨᠢᠭᠡᠨ ᠣᠲᠣᠭ ᠪᠠᠢᠪᠠ ᠭᠡᠰᠡᠨ ᠢ᠋ ᠤᠯᠠᠮ ᠭᠡᠷᠡᠴᠢᠯᠡᠵᠦ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠪᠤᠷᠬᠠᠨ ᠬᠠᠯᠳᠤᠨ ᠤ᠋ ᠵᠠᠷᠤᠳ ᠨᠠᠷ ᠬᠡᠵᠢᠶᠡ ᠨᠢ ᠬᠠᠯᠬᠠ ᠲᠦᠮᠡᠨ ᠳ᠋ᠦ᠍ ᠪᠠᠭᠲᠠᠬᠤ ᠪᠣᠯᠤᠭᠰᠠᠨ ᠪᠣᠢ? ᠡᠨᠡᠬᠦ ᠠᠰᠠᠭᠤᠯᠲᠠ ᠶ᠋ᠢ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠬᠢᠯᠪᠠᠷ᠃ ᠳᠠᠶᠠᠨ ᠬᠠᠭᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠡᠭᠦᠨ ᠦ᠌ ᠣᠮᠪᠣᠯ ᠪᠥᠭᠡᠳ ᠶᠡᠬᠡ ᠬᠠᠭᠠᠨ ᠪᠣᠳᠢ ᠠᠯᠠᠭ ᠨᠢ ᠴᠠᠬᠠᠷ᠂ ᠬᠠᠯᠬᠠ ᠪᠠ ᠪᠠᠷᠠᠭᠤᠨ ᠭᠤᠷᠪᠠᠨ ᠵᠡᠷᠭᠡ ᠲᠠᠪᠤᠨ ᠲᠦᠮᠡᠨ ᠢ᠋ ᠳᠠᠢᠴᠢᠯᠠᠵᠤ᠂ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠳ᠋ᠦ᠍ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠴᠡᠷᠢᠭᠯᠡᠵᠡᠢ᠃ ᠲᠦᠮᠡᠳ ᠦ᠋ᠨ ᠠᠯᠲᠠᠨ ᠬᠠᠭᠠᠨ ᠤ᠋ ᠨᠠᠮᠲᠠᠷ ᠢ᠋ ᠦᠨᠳᠦᠰᠦᠯᠡᠪᠡᠯ᠂ 1524 ᠣᠨ ᠳ᠋ᠤ᠌ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠦ᠌ ᠳᠥᠷᠥᠢ ᠨᠣᠶᠠᠨ ᠪᠠ ᠬᠡᠷᠡᠪᠦᠯᠤᠳ ᠴᠢᠩᠰᠠᠩ ᠬᠣᠶᠠᠭᠤᠯᠠ ᠬᠠᠯᠬᠠ ᠲᠦᠮᠡᠨ ᠦ᠌ ᠪᠤᠰᠤᠳ ᠬᠦᠷᠢᠶᠡ ᠬᠣᠶᠠᠷ ᠣᠲᠣᠭ ᠢ᠋ ᠳᠠᠢᠯᠠᠭᠰᠠᠨ ᠳ᠋ᠤ᠌᠂ ᠪᠤᠰᠤᠳ ᠲᠦᠮᠡᠨ ᠣᠳ ᠤ᠋ᠨ ᠬᠣᠯᠪᠣᠭᠠᠲᠤ ᠴᠡᠷᠢᠭ ᠣᠷᠢᠶᠠᠩᠬᠠᠨ ᠳ᠋ᠤ᠌ ᠴᠡᠷᠢᠭᠯᠡᠵᠡᠢ᠃ ᠲᠡᠭᠦᠨ ᠡᠴᠡ ᠰᠡᠭᠦᠯᠡᠷ ᠪᠠᠰᠠ 1531᠂ 1532᠂ 1538᠂ 1541᠂ 1544 ᠣᠨ ᠨᠤᠭᠤᠳ ᠲᠤ᠌ ᠳᠠᠷᠠᠭᠠᠯᠠᠨ ᠲᠠᠪᠤᠨᠲᠠ ᠠᠶᠠᠯᠠᠵᠤ᠂ ᠡᠴᠦᠰ ᠲᠡᠭᠡᠨ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠢ᠋ ᠮᠥᠬᠥᠭᠡᠭᠡᠳ᠂ 《ᠲᠤᠰ ᠲᠤᠰ ᠪᠦᠷᠢ ᠣᠷᠣᠭᠰᠠᠨ ᠢ᠋ ᠪᠠᠷᠢᠵᠤ ᠵᠠᠰᠠᠭᠯᠠᠭᠠᠳ᠂ ᠲᠣᠭᠳᠠᠯᠠ ᠣᠯᠵᠠ ᠪᠣᠯᠭᠠᠪᠠᠢ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠢ᠋᠂ ᠥᠪᠡᠷᠢᠳᠬᠦ ᠮᠡᠲᠦᠰ ᠢ᠋ ᠥᠪᠡᠷᠢᠳᠦᠭᠡᠳ ᠲᠣᠭᠠ ᠦᠭᠡᠢ ᠣᠯᠠᠨ ᠢ᠋ ᠡᠭᠦᠳᠡ ᠪᠦᠬᠦᠨ ᠳ᠋ᠦ᠍ ᠣᠷᠣᠭᠤᠯᠤᠭᠰᠠᠨ 》 《（ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠᠢ）᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠨᠡᠢᠭᠡᠮ ᠦ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠦᠷᠢᠶᠡᠯᠡᠩ ᠦ᠋ᠨ ᠨᠣᠮ ᠤ᠋ᠨ ᠰᠠᠩ ᠤ᠋ᠨ ᠬᠠᠳᠠᠭᠠᠯᠠᠮᠵᠢ᠂ ᠬᠤᠯᠤᠰᠤᠨ ᠦᠵᠦᠭ ᠦ᠋ᠨ ᠬᠠᠭᠤᠯᠤᠮᠠᠯ 》 ᠭᠡᠵᠡᠢ᠃ ᠡᠨᠡ ᠮᠡᠲᠦ᠂ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠪᠤᠰᠤᠳ ᠲᠠᠪᠤᠨ ᠲᠦᠮᠡᠨ ᠳ᠋ᠦ᠍ ᠬᠤᠪᠢᠶᠠᠭᠳᠠᠨ ᠣᠷᠣᠵᠠᠢ᠃ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠦ᠌ ᠵᠠᠷᠤᠳ ᠣᠲᠣᠭ ᠬᠠᠯᠬᠠ ᠲᠦᠮᠡᠨ ᠳ᠋ᠦ᠍ ᠬᠤᠪᠢᠶᠠᠭᠳᠠᠨ ᠣᠷᠣᠭᠰᠠᠨ ᠨᠢ ᠶᠠᠭ ᠡᠨᠡ ᠦᠶᠡ ᠶ᠋ᠢᠨ ᠶᠠᠪᠤᠳᠠᠯ ᠪᠣᠯᠬᠤ ᠶᠣᠰᠣᠲᠠᠢ᠃
ᠳᠥᠷᠪᠡ
ᠢᠩᠭᠢᠭᠡᠳ ᠦᠵᠡᠬᠦᠯᠡᠷ᠂ ᠵᠠᠷᠤᠳ ᠨᠢ ᠣᠷᠢᠶᠠᠩᠬᠠᠨ ᠲᠦᠮᠡᠨ ᠦ᠌ ᠨᠢᠭᠡᠨ ᠣᠲᠣᠭ ᠪᠠᠢᠭᠰᠠᠨ ᠶᠤᠮ᠃ ᠤᠷᠢᠶᠠᠩᠬᠠᠨ ᠢ᠋ ᠲᠠᠪᠤᠨ ᠲᠦᠮᠡ ᠬᠤᠪᠢᠶᠠᠨ ᠠᠪᠬᠤ ᠦᠶᠡ ᠳ᠋ᠦ᠍᠂ 1544 ᠣᠨ ᠤ᠋ ᠣᠷᠴᠢᠮ ᠢ᠋ᠶ᠋ᠠᠷ ᠵᠠᠷᠤᠳ ᠣᠲᠣᠭ ᠨᠢ ᠬᠠᠯᠬᠠ ᠲᠦᠮᠡᠨ ᠳ᠋ᠦ᠍ ᠬᠤᠪᠢᠶᠠᠭᠳᠠᠵᠤ᠂ ᠬᠠᠯᠬᠠ ᠲᠦᠮᠡᠨ ᠦ᠌ ᠵᠡᠭᠦᠨ ᠭᠠᠷ ᠲᠤ᠌ ᠣᠷᠣᠭᠠᠳ᠂ ᠲᠠᠶᠠᠨ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠠᠯᠴᠤᠪᠤᠯᠣᠳ ᠤ᠋ᠨ ᠥᠮᠴᠢ ᠢᠷᠭᠡᠳ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠳᠡᠮᠡᠢ ᠤᠳᠠᠯ ᠦᠭᠡᠢ᠂ ᠬᠠᠯᠬᠠ ᠲᠦᠮᠡᠨ ᠦ᠌ ᠵᠡᠭᠦᠨ ᠭᠠᠷ ᠨᠢ ᠠᠯᠴᠤᠪᠤᠯᠣᠳ ᠤ᠋ᠨ ᠭᠠᠭᠴᠠ ᠬᠥᠪᠡᠭᠦᠨ ᠬᠤᠷᠠᠭᠴᠢ ᠬᠠᠰᠠᠷ ᠨᠣᠶᠠᠨ ᠤ᠋ ᠳᠠᠭᠠᠭᠤᠯᠭᠠ ᠪᠠᠷ ᠶᠡᠬᠡ ᠬᠠᠭᠠᠨ ᠲᠡᠷᠠᠢᠰᠤᠨ ᠬᠦᠳᠡᠩ ᠢ᠋ ᠳᠠᠭᠠᠵᠤ ᠬᠢᠩᠭᠠᠨ ᠳᠠᠪᠠᠭᠠᠨ ᠤ᠋ ᠦᠯᠭᠡ ᠳ᠋ᠦ᠍ ᠨᠡᠭᠦᠵᠦ ᠢᠷᠡᠵᠡᠢ᠃ ᠲᠡᠳᠡ ᠨᠠᠷ ᠦᠯᠭᠡ ᠲᠦᠮᠡᠨ ᠦ᠌ ᠵᠠᠷᠢᠮ ᠣᠲᠣᠭ ᠢᠷᠭᠡᠳ ᠢ᠋ ᠡᠵᠡᠯᠡᠨ ᠠᠪᠴᠤ ᠡᠷᠬᠡᠰᠢᠶᠡᠯ ᠳ᠋ᠦ᠍ ᠪᠡᠨ ᠣᠷᠣᠭᠤᠯᠤᠭᠠᠳ ᠤᠯᠠᠮ ᠬᠦᠴᠦᠵᠢᠨ ᠲᠣᠮᠣᠷᠠᠵᠠᠢ᠃ ᠰᠡᠭᠦᠯᠡᠷ ᠨᠢ ᠬᠤᠷᠬᠠᠴᠢ ᠨᠣᠶᠠᠨ ᠨᠠᠰᠤ ᠪᠠᠷᠠᠬᠤ ᠦᠶᠡ ᠳ᠋ᠦ᠍᠂ ᠦᠯᠭᠡ ᠶ᠋ᠢᠨ ᠬᠠᠯᠬᠠ ᠶ᠋ᠢᠨ ᠢᠷᠭᠡᠳ ᠢ᠋ᠶ᠋ᠡᠨ ᠲᠠᠪᠤᠨ ᠬᠥᠪᠡᠭᠦᠳ ᠲᠦ᠍ ᠪᠡᠨ ᠬᠤᠪᠢᠶᠠᠨ ᠥᠮᠴᠢᠯᠡᠭᠦᠯᠦᠭᠰᠡᠨ ᠳ᠋ᠦ᠍᠂ ᠥᠯᠭᠡ ᠶ᠋ᠢᠨ ᠬᠠᠯᠬᠠ ᠨᠢ ᠲᠠᠪᠤᠨ ᠬᠠᠯᠬᠠ ᠪᠣᠯᠤᠨ ᠪᠦᠷᠢᠯᠳᠦᠵᠡᠢ᠃ ᠡᠨᠡ ᠪᠣᠯ ᠰᠠᠶᠢ 《ᠥᠪᠥᠷ ᠲᠠᠪᠤᠨ ᠬᠠᠯᠬᠠ》 ᠶ᠋ᠢᠨ ᠡᠭᠦᠰᠦᠯ ᠶᠦ᠍ᠮ᠃ ᠶᠡᠬᠡ ᠬᠠᠯᠬᠠ ᠲᠦᠮᠡᠨ ᠦ᠌ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠲᠦᠷᠦᠭᠦᠦ ᠬᠡᠷᠡᠠᠰᠠᠨᠵᠠ ᠬᠣᠩ ᠲᠠᠢᠵᠢ ᠶ᠋ᠢ 《ᠵᠠᠯᠠᠢᠷ ᠬᠣᠩ ᠲᠠᠢᠵᠢ 》 ᠭᠡᠵᠦ᠂ ᠵᠡᠭᠦᠨ ᠭᠠᠷ ᠤ᠋ᠨ ᠲᠦᠷᠦᠭᠦᠦ ᠬᠤᠷᠬᠠᠴᠢ ᠬᠠᠰᠠᠷ ᠨᠣᠶᠠᠨ ᠢ᠋ 《ᠵᠠᠷᠤᠳ ᠬᠤᠷᠬᠠᠴᠢ ᠨᠣᠶᠠᠨ 》 ᠭᠡᠳᠡᠭ ᠶᠦ᠍ᠮ᠃ ᠡᠨᠡ ᠨᠢ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠠᠮᠤᠭ ᠲᠣᠮᠣ ᠣᠲᠣᠭ ᠪᠣᠯ ᠵᠠᠯᠠᠢᠷ᠂ ᠵᠡᠭᠦᠨ ᠭᠠᠷ ᠤ᠋ᠨ ᠬᠠᠮᠤᠭ ᠲᠣᠮᠣ ᠣᠲᠣᠭ ᠨᠢ ᠵᠠᠷᠤᠳ ᠪᠠᠢᠭᠰᠠᠨ ᠢ᠋ ᠦᠵᠡᠭᠦᠯᠵᠡᠢ᠃ ᠣᠯᠠᠨ ᠤ᠋ ᠮᠡᠳᠡᠭᠡᠵᠢ ᠪᠡᠷ᠂ ᠵᠠᠯᠠᠢᠷ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠨᠢᠭᠡᠳᠦᠭᠡᠷ ᠶᠡᠬᠡ ᠭᠠᠪᠢᠶᠠᠲᠤ ᠲᠦᠰᠢᠮᠡᠯ ᠬᠦᠢ ᠣᠩ ᠮᠤᠬᠤᠯᠢ ᠶ᠋ᠢᠨ ᠦᠷᠡᠳᠦᠰ ᠦ᠋ᠨ ᠠᠢᠮᠠᠭ᠂ ᠶᠤᠸᠠᠨ ᠤᠯᠤᠰ ᠤ᠋ᠨ ᠦᠶᠡ ᠶ᠋ᠢᠨ ᠵᠡᠭᠦᠨ ᠭᠠᠷ ᠤ᠋ᠨ ᠲᠠᠪᠤᠨ ᠠᠢᠮᠠᠭ ᠤ᠋ᠨ ᠠᠬᠠᠯᠠᠬᠤ ᠠᠢᠮᠠᠭ᠂ ᠲᠡᠷᠡ ᠨᠢ ᠬᠣᠵᠢᠮ ᠤ᠋ᠨ ᠬᠠᠯᠬᠠ ᠲᠦᠮᠡᠨ ᠦ᠌ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠳᠣᠯᠣᠭᠠᠨ ᠬᠠᠯᠬᠠ ᠶ᠋ᠢᠨ ᠠᠬᠠᠯᠠᠬᠤ ᠣᠲᠣᠭ ᠪᠣᠯᠵᠤ᠂ ᠬᠡᠷᠡᠰᠠᠨᠵᠠ ᠶ᠋ᠢᠨ ᠤᠤᠭᠠᠨ ᠬᠥᠪᠡᠭᠦᠨ ᠦ᠌ ᠥᠮᠴᠢ ᠪᠣᠯᠵᠠᠢ᠃ ᠵᠠᠷᠤᠳ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠮᠤᠬᠤᠯᠢ ᠶ᠋ᠢ ᠯᠡ ᠳᠡᠳ᠋ᠯᠡᠭᠰᠡᠨ ᠵᠡᠭᠦᠨ ᠭᠠᠷ ᠤ᠋ᠨ ᠬᠣᠶᠠᠳᠤᠭᠠᠷ ᠶᠡᠬᠡ ᠨᠣᠶᠠᠨ ᠵᠡᠯᠮᠡ ᠶ᠋ᠢᠨ ᠠᠢᠮᠠᠭ᠂ ᠬᠡᠳᠦᠢᠪᠡᠷ ᠪᠣᠳᠢ ᠬᠠᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠲᠠᠪᠤᠨ ᠲᠦᠮᠡᠨ ᠳ᠋ᠦ᠍ ᠲᠠᠯᠬᠢᠳᠠᠭᠰᠠᠨ ᠪᠣᠯᠪᠠᠴᠤ᠂ ᠤᠷᠢᠶᠠᠩᠬᠠᠨ ᠤ᠋ ᠨᠣᠶᠠᠨ ᠠᠢᠮᠠᠭ ᠤ᠋ᠨ ᠬᠠᠷᠢᠶᠠ ᠪᠣᠯᠤᠭᠰᠠᠨ ᠵᠠᠷᠤᠳ ᠨᠢ ᠮᠥᠨ ᠯᠡ ᠬᠠᠯᠬᠠ ᠵᠡᠭᠦᠨ ᠭᠠᠷ ᠤ᠋ᠨ ᠬᠠᠮᠤᠭ ᠲᠣᠮᠣ ᠣᠲᠣᠭ ᠪᠣᠯᠵᠠᠢ᠃ ᠲᠡᠢᠮᠦ ᠤᠴᠢᠷ ᠠ᠋ᠴᠠ᠂ ᠬᠤᠷᠠᠭᠴᠢ ᠨᠣᠶᠠᠨ ᠲᠠᠪᠤᠨ ᠬᠥᠪᠡᠭᠦᠨ ᠳ᠋ᠦ᠍ ᠪᠡᠨ ᠥᠮᠴᠢ ᠬᠤᠪᠢᠶᠠᠬᠤ ᠳ᠋ᠤ᠌ ᠵᠠᠷᠤᠳ ᠣᠲᠣᠭ ᠢ᠋ ᠤᠤᠭᠠᠨ ᠬᠥᠪᠡᠭᠦᠨ ᠤᠪᠠᠰᠢ ᠣᠢᠵᠠᠩ ᠳ᠋ᠤ᠌ ᠪᠠᠨ ᠦᠭᠭᠦᠭᠰᠡᠨ ᠪᠠᠢᠨᠠ᠂ ᠡᠭᠦᠨ ᠡᠴᠡ ᠵᠠᠷᠤᠳ ᠨᠢ ᠥᠪᠥᠷ ᠲᠠᠪᠤᠨ ᠣᠲᠣᠭ ᠤ᠋ᠨ ᠠᠬᠠᠯᠠᠬᠤ ᠣᠲᠣᠭ ᠪᠣᠯᠵᠠᠢ᠃ ᠵᠠᠷᠤᠳ ᠤ᠋ᠨ ᠨᠤᠲᠤᠭ ᠤᠰᠤ ᠶ᠋ᠢ ᠬᠤᠷᠢᠶᠠᠩᠭᠤᠢ ᠥᠭᠦᠯᠡᠪᠡᠰᠦ᠂ ᠵᠠᠷᠤᠳ ᠨᠠᠷ ᠣᠷᠢᠶᠠᠩᠬᠠᠨ ᠤ᠋ ᠪᠦᠷᠢᠯᠳᠦᠬᠦᠨ ᠪᠣᠯᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠪᠣᠳᠣᠨᠴᠠᠷ ᠤ᠋ᠨ ᠦᠶᠡ ᠡᠴᠡ ᠨᠠᠰᠢ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠪᠣᠯᠲᠠᠯᠠ ᠦᠶᠡ ᠤᠯᠠᠷᠢᠨ ᠬᠡᠨᠲᠡᠢ ᠨᠢᠷᠤᠭᠤᠨ ᠤ᠋ ᠪᠤᠷᠬᠠᠨ ᠬᠠᠯᠳᠤᠨ ᠢ᠋ᠶ᠋ᠠᠷ ᠲᠥᠪ ᠪᠣᠯᠭᠠᠭᠰᠠᠨ ᠣᠷᠣᠨ ᠳ᠋ᠤ᠌ ᠠᠮᠢᠳᠤᠷᠠᠵᠤ᠂ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠬᠡᠨᠲᠡᠢ ᠨᠢᠷᠤᠭᠤᠨ ᠠ᠋ᠴᠠ ᠤᠨᠤᠨ ᠮᠥᠷᠡᠨ ᠦ᠌ ᠳᠤᠮᠳᠠ ᠬᠠᠪᠢ ᠬᠦᠷᠲᠡᠯᠡ ᠲᠡᠯᠡᠵᠦ ᠥᠷᠭᠡᠵᠢᠵᠡᠢ᠃ （ᠵᠢᠭᠠᠴᠢᠲᠡᠢ ᠪᠤᠶᠠᠨᠳᠠᠯᠭᠡᠷ᠂ ᠮᠥᠨ ᠲᠡᠨᠳᠡ᠂47 ᠳ᠋ᠤᠭᠠᠷ ᠬᠠᠭᠤᠳᠠᠰᠤ ）᠃ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠤ᠋ ᠳᠤᠮᠳᠠ ᠣᠷᠴᠢᠮ ᠬᠠᠯᠬᠠ ᠲᠦᠮᠡᠨ ᠳ᠋ᠦ᠍ ᠣᠷᠣᠭᠠᠳ ᠬᠠᠯᠬᠠ ᠭᠣᠣᠯ ᠳᠠᠭᠠᠤ ᠬᠡᠰᠡᠭ ᠬᠤᠭᠤᠴᠠᠭᠠ ᠪᠠᠢᠵᠤ᠂ ᠤᠳᠠᠯ ᠦᠭᠡᠢ ᠬᠢᠩᠭᠠᠨ ᠳᠠᠪᠠᠭᠠᠨ ᠤ᠋ ᠡᠮᠦᠨᠡ ᠢᠷᠡᠵᠦ᠂ ᠵᠡᠭᠦᠨ ᠯᠢᠶᠣᠣ ᠾᠧᠦ ᠭᠣᠣᠯ ᠤ᠋ᠨ ᠬᠣᠢᠭᠤᠷ᠂ ᠵᠡᠭᠦᠨᠰᠢ ᠬᠣᠢᠭᠤᠷ ᠵᠤᠷᠴᠢᠤᠨ ᠲᠠᠢ᠂ ᠵᠡᠭᠦᠨ ᠬᠣᠢᠭᠤᠷ ᠢ᠋ᠶ᠋ᠠᠨ ᠬᠣᠷᠴᠢᠨ ᠲᠠᠢ᠂ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠬᠣᠩᠭᠢᠷᠠᠳ ᠣᠲᠣᠭ ᠲᠠᠢ ᠲᠤᠰ ᠲᠤᠰ ᠵᠠᠬᠠᠯᠠᠵᠤ ᠪᠠᠢᠵᠠᠢ᠃ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠵᠠᠭᠤᠨ ᠤ᠋ ᠡᠬᠢᠨ ᠦ᠌ ᠦᠶᠡ ᠪᠡᠷ ᠭᠡᠨᠡᠳᠲᠡ ᠬᠦᠴᠦᠷᠬᠡᠭᠵᠢᠭᠰᠡᠨ ᠵᠦᠷᠴᠢᠨ ᠦ᠌ ᠠᠢᠰᠢᠨ ᠭᠦᠷᠦᠨ ᠮᠣᠩᠭᠣᠯ ᠠᠢᠮᠠᠭ ᠤ᠋ᠳ ᠢ᠋ ᠡᠵᠡᠩᠨᠡᠵᠦ ᠡᠬᠢᠯᠡᠭᠡᠳ᠂ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠬᠠᠭᠠᠨ ᠯᠢᠭᠳᠡᠨ ᠬᠤᠲᠤᠭᠲᠤ ᠲᠠᠢ ᠡᠰᠡᠷᠭᠦᠴᠡᠯᠳᠦᠪᠡ᠃ ᠯᠢᠭᠳᠡᠨ ᠬᠠᠭᠠᠨ ᠪᠠ ᠵᠦᠷᠴᠢᠨ ᠨᠠᠷ ᠥᠪᠥᠷ ᠲᠠᠪᠤᠨ ᠬᠠᠯᠬᠠ ᠶ᠋ᠢ ᠰᠢᠷᠦᠭᠦᠨ ᠪᠤᠯᠢᠶᠠᠯᠳᠤᠵᠤ ᠪᠠᠢᠪᠠ᠃1626 ᠣᠨ ᠳ᠋ᠤ᠌᠂ ᠪᠠᠭᠠᠷᠢᠨ ᠵᠠᠷᠤᠳ ᠬᠣᠶᠠᠷ ᠠᠢᠮᠠᠭ ᠠᠢᠰᠢᠨ ᠭᠦᠷᠦᠨ ᠦ᠌ ᠴᠣᠬᠢᠯᠲᠠ ᠳ᠋ᠤ᠌ ᠤᠴᠠᠷᠠᠵᠤ᠂ ᠵᠠᠯᠭᠠᠭᠠᠳ ᠪᠠᠰᠠ ᠯᠢᠭᠳᠡᠨ ᠬᠠᠭᠠᠨ ᠤ᠋ ᠳᠠᠭᠠᠷᠢᠯᠲᠠ ᠳ᠋ᠤ᠌ ᠥᠷᠲᠥᠵᠦ᠂ ᠠᠷᠭᠠ ᠪᠤᠰᠤ ᠨᠤᠨ ᠬᠣᠷᠴᠢᠨ ᠳ᠋ᠤ᠌ ᠣᠴᠢᠵᠤ ᠲᠦᠰᠢᠵᠡᠢ᠃ ᠭᠡᠪᠡᠴᠦ᠂ ᠲᠡᠳᠡ ᠨᠠᠷ ᠨᠤᠨ ᠬᠣᠷᠴᠢᠨ ᠤ᠋ ᠳᠠᠷᠤᠯᠠᠯ ᠭᠠᠳᠠᠭᠤᠷᠴᠢᠯᠠᠯ ᠢ᠋ ᠦᠵᠡᠵᠦ᠂ ᠬᠣᠷᠴᠢᠨ ᠳ᠋ᠤ᠌ ᠰᠢᠬᠠᠮᠳᠠᠭᠳᠠᠬᠤ ᠳ᠋ᠤ᠌ ᠪᠠᠨ1628 ᠣᠨ ᠳ᠋ᠤ᠌ ᠬᠣᠷᠴᠢᠨ ᠠ᠋ᠴᠠ ᠰᠠᠯᠵᠤ ᠵᠦᠷᠴᠢᠨ ᠦ᠌ ᠠᠢᠰᠢᠨ ᠭᠦᠷᠦᠨ ᠳ᠋ᠦ᠍ ᠳᠠᠭᠠᠷᠠ ᠣᠷᠣᠪᠠ᠃ ᠲᠡᠳᠡ ᠠᠢᠰᠢᠨ ᠭᠦᠷᠦᠨ ᠦ᠌ ᠲᠡᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠭᠠᠪᠢᠶᠠ ᠲᠠᠢ ᠪᠣᠯᠬᠣᠷ᠂ 1636 ᠣᠨ ᠳ᠋ᠤ᠌ ᠲᠠᠢᠴᠢᠩ ᠭᠦᠷᠦᠨ ᠢ᠋ ᠪᠠᠢᠭᠤᠯᠬᠤ ᠦᠶᠡ ᠳ᠋ᠦ᠍᠂ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠳ᠋ᠤ᠌ ᠣᠷᠣᠭᠰᠠᠨ ᠵᠠᠷᠤᠳ ᠨᠠᠷ ᠠ᠋ᠴᠠ ᠪᠤᠰᠤᠳ ᠢ᠋ ᠨᠢ ᠬᠣᠶᠠᠷ ᠬᠣᠰᠢᠭᠤ ᠪᠣᠯᠭᠠᠨ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ᠂ ᠲᠡᠳᠡᠨ ᠦ᠌ ᠠᠯᠪᠠᠲᠤ ᠢᠷᠭᠡᠳ ᠢ᠋ᠶ᠋ᠡᠨ ᠦᠶᠡ ᠤᠯᠠᠷᠢᠨ ᠨᠣᠶᠠᠯᠠᠬᠤ ᠡᠷᠬᠡ ᠶ᠋ᠢ ᠨᠢ ᠦᠯᠡᠳᠡᠭᠡᠵᠦ᠂ ᠰᠢᠷᠠ ᠮᠥᠷᠡᠨ ᠡᠴᠡ ᠬᠣᠢᠰᠢ ᠬᠤᠤᠯᠢᠨ ᠭᠣᠣᠯ ᠬᠦᠷᠬᠦ ᠭᠠᠵᠠᠷ ᠢ᠋ᠶ᠋ᠠᠷ ᠨᠤᠲᠤᠭ ᠵᠢᠭᠠᠵᠤ ᠰᠠᠭᠤᠯᠭᠠᠪᠠ᠃ ᠲᠡᠷᠡ ᠨᠢ ᠥᠪᠥᠷ ᠳᠥᠴᠢ ᠶᠢᠰᠦᠨ ᠬᠤᠰᠢᠭᠤᠨ ᠤ᠋ ᠵᠠᠷᠤᠳ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠭᠠᠷ ᠤ᠋ᠨ ᠬᠣᠰᠢᠭᠤ ᠪᠣᠯᠵᠠᠢ᠃ ᠬᠤᠷᠢᠶᠠᠩᠭᠤᠢᠯᠠᠪᠠᠯ᠂ ᠵᠠᠷᠤᠳ ᠪᠣᠯ ᠤᠷᠢᠶᠠᠩᠬᠠᠨ ᠭᠠᠷᠤᠯᠲᠠᠢ᠂ ᠬᠡᠨᠲᠡᠢ ᠨᠢᠷᠤᠭᠤ ᠤᠨᠤᠨ ᠭᠣᠣᠯ ᠤ᠋ᠨ ᠬᠣᠭᠣᠷᠣᠨᠳᠣ ᠨᠤᠲᠤᠭᠲᠠᠢ ᠤᠷᠢᠶᠠᠩᠬᠠᠨ ᠲᠦᠮᠡᠨ ᠳ᠋ᠦ᠍ ᠬᠠᠷᠢᠶᠠᠯᠠᠭᠳᠠᠬᠤ ᠠᠢᠮᠠᠭ ᠪᠠᠢᠭᠠᠳ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠤ᠋ ᠳᠥᠴᠢᠭᠡᠳ ᠣᠨ ᠳ᠋ᠤ᠌ ᠬᠠᠯᠬᠠ ᠲᠦᠮᠡᠨ ᠳ᠋ᠦ᠍ ᠳᠠᠭᠠᠭᠤᠯᠤᠭᠳᠠᠵᠠᠢ᠃ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠵᠠᠭᠤᠨ ᠤ᠋ ᠰᠡᠭᠦᠯ ᠦ᠋ᠨ ᠬᠠᠭᠠᠰ ᠲᠤ᠌ ᠬᠤᠷᠬᠠᠴᠢ ᠬᠠᠰᠠᠷ ᠨᠣᠶᠠᠨ ᠤ᠋ ᠠᠬᠠᠮᠠᠳ ᠬᠥᠪᠡᠭᠦᠨ ᠦ᠌ ᠥᠮᠴᠢ ᠳ᠋ᠦ᠍ ᠭᠠᠷᠴᠤ᠂ ᠥᠪᠥᠷ ᠲᠠᠪᠤᠨ ᠬᠠᠯᠬᠠ ᠶ᠋ᠢᠨ ᠠᠬᠠᠯᠠᠬᠤ ᠣᠲᠣᠭ ᠪᠣᠯᠪᠠ᠃ ᠳᠠᠢᠴᠢᠩ ᠭᠦᠷᠦᠨ ᠦ᠌ ᠦᠶᠡ ᠳ᠋ᠦ᠍ ᠴᠥᠭᠡᠨ ᠵᠠᠷᠤᠳ ᠨᠠᠷ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠳ᠋ᠤ᠌ ᠣᠷᠣᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠪᠤᠰᠤᠳ ᠵᠠᠷᠤᠳ ᠨᠠᠷ ᠨᠢ ᠬᠣᠶᠠᠷ ᠵᠠᠰᠠᠭ ᠬᠤᠰᠢᠭᠤᠨ ᠳ᠋ᠤ᠌ ᠬᠤᠪᠢᠶᠠᠭᠳᠠᠨ ᠠᠮᠢᠳᠤᠷᠠᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ
ᠬᠢᠨᠠᠭᠴᠢ᠄ ᠲᠦᠮᠡᠨᠴᠡᠴᠡᠭ ᠠ᠊᠂ ᠰᠠᠷᠠᠨᠭᠡᠷᠡᠯ
ᠳᠡᠯᠡᠬᠡᠢ ᠶ᠋ᠢᠨ ᠨᠣᠮ ᠤᠩᠰᠢᠬᠤ ᠡᠳᠦᠷ 2025.4.23 ᠡᠳᠦᠷ