ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷӨвгөн эмгэн хоёр
3567ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠤᠤᠭᠠᠯ ᠨᠤᠲᠤᠭ ᠲᠦ᠍ ᠪᠠᠨ ᠡᠪ ᠨᠠᠢᠷ ᠲᠠᠢ ᠰᠠᠢᠬᠠᠨ ᠠᠮᠢᠳᠤᠷᠠᠵᠤ ᠪᠠᠢᠵᠠᠢ᠃ ᠲᠡᠭᠡᠲᠡᠯᠡ ᠬᠥᠮᠦᠨ ᠪᠠᠷᠢᠵᠤ ᠢᠳᠡᠳᠡᠭ ᠬᠦᠴᠦ ᠶᠡᠬᠡᠲᠦ ᠮᠢᠬᠠᠴᠢᠨ ᠡᠭᠦᠪᠡᠷ ᠲᠡᠭᠦᠪᠡᠷ ᠶᠠᠪᠤᠭᠠᠳ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠬᠦ ᠪᠡᠨ ᠪᠠᠢᠯᠠ᠃ ᠠᠮᠢ ᠪᠠᠨ ᠪᠣᠳᠣᠬᠤ ᠮᠠᠨᠢ ᠭᠡᠳ ᠨᠤᠲᠤᠭ ᠤ᠋ᠨ ᠠᠢᠯ ᠤ᠋ᠳ ᠨᠢ ᠳᠦᠷᠪᠡᠵᠦ ᠨᠡᠭᠦᠭᠡᠳ ᠶᠠᠪᠤᠴᠢᠬᠠᠵᠠᠢ᠃ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠯᠠ ᠠᠴᠢᠯᠭᠠ ᠣᠨᠣᠯᠭᠠ ᠦᠭᠡᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠠᠷᠭᠠ ᠦᠭᠡᠢ ᠬᠠᠷᠠ ᠨᠤᠲᠤᠭ ᠰᠠᠬᠢᠭᠠᠳ ᠬᠣᠴᠣᠷᠤᠯᠠ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠡᠪᠦᠭᠡᠨ ᠨᠢ ᠡᠮᠡᠭᠡᠨ ᠳ᠋ᠦ᠍ ᠪᠡᠨ ᠡᠢᠨ ᠬᠡᠯᠡᠪᠡᠢ᠃
— ᠵᠠ ᠡᠮᠡᠭᠡᠨ ᠮᠢᠨᠢ᠂ ᠴᠢ ᠬᠡᠳᠦᠨ ᠢᠮᠠᠭᠠᠨ ᠤ᠋ ᠪᠠᠨ ᠰᠦ ᠪᠡᠷ ᠲᠠᠷᠠᠭ ᠪᠦᠷᠢᠭᠡᠳ ᠬᠤᠷᠢᠶᠠᠭᠠᠳ ᠪᠠᠢᠭᠠᠷᠠᠢ᠃ ᠨᠢᠭᠡ ᠯᠡ ᠡᠳᠦᠷ ᠪᠢᠳᠡ ᠬᠣᠶᠠᠷ ᠲᠤ᠌ ᠬᠡᠷᠡᠭ ᠪᠣᠯᠤᠨᠠ ᠰᠢᠦ ᠭᠡᠵᠦ ᠭᠡᠨᠡ᠃ ᠡᠮᠡᠭᠡᠨ ᠴᠦ᠍ ᠬᠡᠳᠦᠨ ᠢᠮᠠᠭᠠ ᠪᠠᠨ ᠰᠠᠭᠠᠭᠠᠳ ᠲᠠᠷᠠᠭ ᠪᠦᠷᠢᠭᠡᠳ ᠬᠤᠷᠢᠶᠠᠭᠠᠳ ᠯᠠ ᠪᠠᠢᠵᠠᠢ᠂ ᠬᠤᠷᠢᠶᠠᠭᠠᠳ ᠯᠠ ᠪᠠᠢᠵᠠᠢ᠃ ᠡᠪᠦᠭᠡᠨ ᠨᠢᠭᠡ ᠥᠷᠯᠥᠭᠡ ᠲᠡᠷᠡ ᠲᠠᠷᠠᠭ ᠢ᠋ ᠨᠢ ᠭᠤᠷᠪᠠᠨ ᠭᠦᠵᠡᠭᠡᠨ ᠳ᠋ᠦ᠍ ᠬᠢᠭᠡᠳ ᠠᠪᠤᠭᠠᠳ ᠶᠠᠪᠤᠵᠤ ᠭᠡᠨᠡ᠂ ᠶᠠᠪᠤᠵᠤ ᠶᠠᠪᠤᠵᠤ ᠡᠵᠡᠭᠦᠢ ᠪᠣᠢᠳᠠ ᠭᠠᠵᠠᠷ ᠣᠴᠢᠭᠠᠳ ᠪᠤᠯᠠᠵᠤ ᠣᠷᠬᠢᠪᠠ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠨᠥᠭᠦᠭᠡ ᠠᠶᠤᠮᠰᠢᠭᠲᠤ ᠮᠢᠬᠠᠴᠢᠨ ᠭᠡᠷ ᠦ᠋ᠨ ᠬᠢᠨᠢ ᠭᠠᠳᠠᠭᠠ ᠢᠷᠡᠭᠡᠳ ᠲᠣᠭᠣᠭᠠ ᠬᠠᠩ ᠬᠢᠲᠡᠯᠡ᠂ ᠳᠣᠲᠣᠷᠠ ᠫᠠᠯ ᠬᠢᠲᠡᠯᠡ ᠬᠠᠰᠬᠢᠷᠴᠤ ᠭᠣᠭᠣᠴᠢᠯᠠᠵᠤ ᠭᠠᠷᠴᠠᠢ᠃ ᠡᠪᠦᠭᠡᠨ ᠴᠦ᠍ ᠭᠡᠷ ᠡᠴᠡ ᠪᠡᠨ ᠭᠠᠷᠴᠤ ᠢᠷᠡᠭᠡᠳ ᠠᠶᠤᠵᠤ ᠡᠮᠢᠶᠡᠭᠰᠡᠨ ᠰᠢᠨᠵᠢ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠮᠠᠭᠤ ᠬᠥᠮᠦᠨ ᠦ᠌ ᠳᠠᠭᠤ ᠶᠡᠬᠡ ᠭᠡᠳᠡᠭ ᠪᠢᠯᠡ ᠤᠤ᠂ ᠳᠡᠭᠦᠦ ᠲᠡᠢ ᠶᠡᠷᠦ ᠨᠢ ᠨᠢᠭᠡ ᠪᠢᠷᠠ ᠪᠠᠨ ᠦᠵᠡᠶᠡ ᠪᠠᠢᠵᠠ ᠭᠡᠵᠦ ᠭᠡᠨᠡ᠃ ᠨᠥᠭᠦᠭᠡ ᠮᠢᠬᠠᠴᠢᠨ ᠡᠪᠦᠭᠡᠨ ᠢ᠋ ᠰᠣᠨᠵᠢᠩᠭᠦᠢ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠶᠠᠭᠠᠬᠢᠵᠤ ᠦᠵᠡᠬᠦ ᠶᠦᠮ ᠭᠡᠵᠦ ᠠᠰᠠᠭᠤᠪᠠᠢ᠃
— ᠭᠠᠵᠠᠷ ᠤ᠋ᠨ ᠪᠡᠲᠡᠭᠢ ᠶ᠋ᠢ ᠬᠠᠭᠠ ᠳᠡᠯᠡᠰᠦᠭᠰᠡᠨ ᠨᠢ ᠨᠥᠭᠦᠭᠡ ᠪᠡᠨ ᠪᠠᠷᠢᠵᠤ ᠢᠳᠡᠰᠦᠭᠡᠢ ᠭᠡᠵᠦ ᠡᠪᠦᠭᠡᠨ ᠬᠡᠯᠡᠬᠦᠯᠡ᠂ ᠡᠨᠡ ᠡᠪᠦᠭᠡᠨ ᠨᠠᠮᠠ ᠶ᠋ᠢ ᠪᠠᠷᠢᠵᠤ ᠢᠳᠡᠲᠡᠯᠡ ᠴᠦ᠍ ᠡᠳᠦᠢ ᠪᠢᠵᠡ ᠭᠡᠵᠦ ᠮᠢᠬᠠᠴᠢᠨ ᠶᠡᠬᠡ ᠶᠠᠭᠤᠮᠠ ᠪᠣᠳᠣᠭᠠᠳ᠂
— ᠴᠢ ᠡᠬᠢᠯᠡᠭᠡᠳ ᠭᠠᠵᠠᠷ ᠤ᠋ᠨ ᠪᠡᠲᠡᠭᠢ ᠶ᠋ᠢ ᠬᠠᠭᠠ ᠳᠡᠯᠡᠰᠦᠭᠡᠳ ᠣᠷᠭᠢ᠂ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠳᠡᠭᠦᠦ ᠪᠢᠯᠡ᠂ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠳᠠᠭᠤ ᠶᠡᠬᠡ ᠲᠡᠢ ᠪᠢᠯᠡ ᠭᠡᠵᠡᠢ᠃ ᠮᠢᠬᠠᠴᠢᠨ ᠤᠴᠢᠷ ᠵᠦᠭ ᠦᠭᠡᠢ ᠭᠠᠵᠠᠷ ᠳᠡᠯᠡᠳᠦᠭᠰᠡᠨ ᠴᠦ᠍ ᠭᠠᠷ ᠢ᠋ᠶ᠋ᠠᠨ ᠡᠪᠡᠳᠬᠡᠭᠰᠡᠨ ᠡᠴᠡ ᠬᠡᠲᠦᠷᠡᠭᠰᠡᠨ ᠦᠭᠡᠢ᠂ ᠰᠡᠭᠦᠯ ᠳ᠋ᠦ᠍ ᠪᠡᠨ ᠲᠠᠮᠢᠷ ᠨᠢ ᠲᠠᠰᠤᠷᠠᠵᠤ ᠡᠪᠦᠭᠡᠨ ᠢ᠋ ᠮᠠᠭᠤᠬᠠᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠵᠠ ᠣᠳᠣ ᠴᠢ ᠳᠠᠯᠠᠳ ᠭᠡᠵᠦ ᠬᠡᠯᠡᠯᠡ᠃ ᠲᠡᠭᠡᠬᠦ ᠪᠡᠷ ᠨᠢ ᠡᠪᠦᠭᠡᠨ ᠭᠠᠵᠠᠷ ᠲᠤ᠌ ᠪᠤᠯᠠᠭᠰᠠᠨ ᠨᠢᠭᠡ ᠭᠦᠵᠡᠭᠡ ᠤᠷᠤᠭᠤ ᠪᠠᠨ ᠳᠡᠯᠡᠰᠴᠦ ᠲᠠᠷᠠᠭ ᠢ᠋ᠶ᠋ᠠᠨ ᠣᠷᠭᠢᠯᠤᠭᠤᠯᠵᠤ ᠣᠷᠬᠢᠭᠠᠳ ᠮᠢᠬᠠᠴᠢᠨ ᠲᠠᠢ ᠬᠤᠪᠢᠶᠠᠵᠤ ᠤᠤᠭᠤᠪᠠ᠃ ᠳᠠᠷᠠᠭᠠ ᠨᠢ ᠨᠥᠭᠦᠭᠡ ᠮᠢᠬᠠᠴᠢᠨ ᠳᠠᠬᠢᠭᠠᠳ ᠭᠠᠵᠠᠷ ᠳᠡᠯᠡᠳᠦᠭᠰᠡᠨ ᠴᠦ᠍ ᠪᠠᠰᠠ ᠯᠠ ᠭᠠᠷ ᠢ᠋ᠶ᠋ᠠᠨ ᠡᠪᠡᠳᠬᠡᠭᠰᠡᠨ ᠡᠴᠡ ᠬᠡᠲᠦᠷᠡᠭᠰᠡᠨ ᠦᠭᠡᠢ᠃ ᠠᠭᠤᠷ ᠲᠦ᠍ ᠪᠠᠨ ᠲᠠᠯᠠ ᠬᠥᠨᠳᠡᠢ ᠪᠡᠷ ᠨᠢᠭᠡ ᠪᠠᠷᠬᠢᠷᠠᠬᠤ ᠳ᠋ᠤ᠌ ᠭᠠᠵᠠᠷ ᠳᠣᠷᠭᠢᠵᠤ ᠤᠰᠤ ᠴᠠᠯᠭᠢᠵᠤ ᠭᠡᠨᠡ᠃ ᠲᠡᠭᠡᠩᠭᠦᠲᠡ ᠡᠪᠦᠭᠡᠨ ᠳᠠᠬᠢᠭᠠᠳ ᠨᠢᠭᠡ ᠲᠠᠷᠠᠭ ᠢ᠋ᠶ᠋ᠠᠨ ᠬᠠᠭᠠ ᠳᠡᠯᠡᠳᠴᠦ ᠮᠢᠬᠠᠴᠢᠨ ᠲᠠᠢ ᠬᠤᠪᠢᠶᠠᠵᠤ ᠤᠤᠭᠤᠪᠠ᠃ ᠮᠢᠬᠠᠴᠢᠨ ᠲᠠᠷᠠᠭ ᠵᠠᠯᠭᠢᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠨᠡ ᠮᠠᠭᠤ ᠡᠪᠦᠭᠡᠨ ᠳ᠋ᠦ᠍ ᠢᠩᠭᠢᠵᠦ ᠳᠡᠢᠯᠦᠭᠳᠡᠬᠦ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠳᠣᠲᠣᠷᠠ ᠨᠢ ᠬᠣᠷᠣᠰᠤᠨ ᠶᠡᠬᠡ ᠳᠠᠭᠤ ᠪᠠᠷ ᠪᠠᠷᠬᠢᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠡᠪᠦᠭᠡᠨ᠂ ᠲᠡᠷᠡ ᠪᠡᠲᠡᠭᠢ ᠪᠡᠨ ᠣᠳᠣᠬᠠᠨ ᠨᠠᠳᠠ ᠳ᠋ᠤ᠌ ᠵᠢᠭᠠᠭᠠᠳ ᠠᠯᠢ ᠭᠡᠵᠦ ᠭᠡᠨᠡ᠃ ᠡᠪᠦᠭᠡᠨ ᠰᠡᠭᠦᠯᠴᠢ ᠶ᠋ᠢᠨ ᠭᠦᠵᠡᠭᠡ ᠲᠡᠢ ᠲᠠᠷᠠᠭ ᠢ᠋ᠶ᠋ᠠᠨ ᠪᠤᠯᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠵᠢᠭᠠᠲᠠᠯᠠ ᠮᠢᠬᠠᠴᠢᠨ ᠭᠠᠭᠴᠠ ᠳᠡᠯᠡᠰᠦᠭᠡᠳ ᠲᠠᠷᠠᠭ ᠢ᠋ ᠲᠠᠯᠠ ᠪᠠᠷ ᠨᠢᠭᠡ ᠣᠷᠭᠢᠯᠤᠭᠤᠯᠵᠤ ᠣᠷᠬᠢᠪᠠ᠃ ᠲᠡᠭᠡᠭᠡᠳ ᠡᠪᠦᠭᠡᠨ ᠡᠴᠡ ᠤᠷᠢᠲᠠᠭᠠᠳ ᠤᠬᠤᠰᠬᠢᠭᠡᠳ ᠵᠠᠯᠭᠢᠯᠠᠵᠤ ᠭᠠᠷᠲᠠᠯᠠ ᠬᠣᠣᠷ ᠲᠠᠢ ᠲᠠᠷᠠᠭ ᠪᠠᠢᠭᠰᠠᠨ ᠶᠤᠮᠰᠠᠨᠵᠠᠢ᠂ ᠬᠣᠭᠣᠯᠠᠢ ᠨᠢ ᠬᠤᠷᠴᠢᠭᠢᠨᠠᠨ ᠲᠡᠷᠡᠢᠵᠦ ᠣᠢᠴᠢᠭᠠᠳ ᠲᠡᠢᠴᠢᠭᠢᠨᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠮᠢ ᠲᠠᠯᠪᠢᠵᠠᠢ᠃ ᠮᠢᠬᠠᠴᠢᠨ ᠢ᠋ ᠳᠠᠷᠤᠵᠤ ᠨᠤᠲᠤᠭ ᠣᠷᠣᠨ ᠢ᠋ᠶ᠋ᠠᠨ ᠠᠮᠤᠭᠤᠯᠠᠩ ᠪᠣᠯᠭᠠᠭᠰᠠᠨ ᠡᠪᠦᠭᠡᠨ ᠴᠦ᠍ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠵᠤ᠂ ᠡᠮᠡᠭᠡᠨ ᠲᠡᠢ ᠪᠡᠨ ᠠᠶᠤᠬᠤ ᠠᠶᠤᠯ ᠦᠭᠡᠢ ᠠᠮᠤᠷ ᠰᠠᠢᠬᠠᠨ ᠳ᠋ᠤ᠌ ᠪᠠᠨ ᠵᠢᠷᠭᠠᠭᠰᠠᠨ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠠᠰᠬᠠ
ᠤᠩᠰᠢᠭᠰᠠᠨ ᠨᠢ᠄ ᠰᠠᠷᠠᠨᠭᠡᠷᠡᠯ