ᠲᠠᠬᠢᠶᠠ ᠶᠠᠭᠠᠬᠢᠭᠠᠳ ᠦᠤᠷ ᠴᠦᠤᠷ ᠢ᠋ᠶ᠋ᠠᠷ ᠳᠣᠩᠭᠣᠳᠳᠠᠭ ᠪᠣᠯᠤᠭᠰᠠᠨ ᠪᠣᠢТахиа яагаад үүр чүүрээр донгоддог болсон бэ
2629ᠲᠠᠬᠢᠶᠠ ᠶᠠᠭᠠᠬᠢᠭᠠᠳ ᠦᠤᠷ ᠴᠦᠤᠷ ᠢ᠋ᠶ᠋ᠠᠷ ᠳᠣᠩᠭᠣᠳᠳᠠᠭ ᠪᠣᠯᠤᠭᠰᠠᠨ ᠪᠣᠢ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠤᠯᠠᠭᠠᠨ ᠵᠠᠯᠠᠭᠠᠲᠤ ᠲᠠᠬᠢᠶᠠ ᠮᠣᠷᠢ ᠲᠠᠢ ᠬᠥᠮᠦᠨ ᠪᠠᠭᠤᠵᠤ ᠬᠠᠷᠠᠮᠠᠷ᠂ ᠶᠠᠪᠠᠭᠠᠨ ᠬᠥᠮᠦᠨ ᠰᠠᠭᠤᠵᠤ ᠬᠠᠷᠠᠮᠠᠷ ᠤᠷᠲᠤ ᠰᠠᠢᠬᠠᠨ ᠰᠡᠭᠦᠯ ᠲᠡᠢ ᠦᠵᠡᠰᠬᠦᠯᠡᠩ ᠲᠡᠭᠦᠯᠳᠡᠷ ᠰᠢᠪᠠᠭᠤ ᠪᠠᠢᠵᠠᠢ᠃ ᠰᠡᠭᠦᠯ ᠦ᠋ᠨ ᠬᠢ ᠨᠢ ᠰᠠᠢᠬᠠᠨ ᠢ᠋ ᠶᠠᠭᠠᠬᠢᠨᠠ᠂ ᠳᠣᠯᠣᠭᠠᠨ ᠥᠩᠭᠡ ᠪᠡᠷ ᠰᠣᠯᠣᠩᠭᠠᠷᠠᠨ ᠭᠢᠯᠠᠯᠵᠠᠬᠤ ᠠᠭᠠᠳ ᠳᠡᠭᠡᠷᠡ ᠪᠡᠨ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠨᠢᠳᠦ ᠲᠡᠢ᠃
ᠭᠡᠲᠡᠯᠡ ᠲᠣᠭᠣᠰ ᠰᠢᠪᠠᠭᠤ ᠲᠠᠬᠢᠶᠠ ᠶ᠋ᠢ ᠬᠠᠷᠠᠭᠠᠳ ᠥᠩᠭᠡᠲᠦ ᠭᠣᠶᠣ ᠰᠡᠭᠦᠯ ᠳ᠋ᠦ᠍ ᠨᠢ ᠤᠨᠠᠵᠤ᠂ ᠲᠣᠭᠲᠠᠵᠤ ᠰᠠᠭᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠠᠲᠠᠭᠠ ᠬᠣᠷᠣᠰᠣᠯ ᠳ᠋ᠤ᠌ ᠠᠪᠲᠠᠵᠠᠢ᠃ ᠠᠯᠠᠭ ᠨᠢᠳᠦ ᠨᠢ ᠡᠷᠭᠢᠯᠳᠦᠨ ᠠᠯᠢᠪᠠ ᠪᠦᠬᠦᠨ ᠢ᠋ᠶ᠋ᠡᠨ ᠮᠠᠷᠲᠠᠵᠤ᠂ ᠭᠠᠭᠴᠠ ᠲᠠᠬᠢᠶᠠᠨ ᠤ᠋ ᠰᠡᠭᠦᠯ ᠦ᠋ᠨ ᠲᠤᠬᠠᠢ ᠪᠣᠳᠣᠭᠰᠠᠭᠠᠷ ᠠᠪᠠᠢ᠂ ᠰᠡᠭᠦᠯ ᠳ᠋ᠦ᠍ ᠪᠡᠨ ᠶᠠᠭᠠᠬᠢᠵᠤ ᠥᠪᠡᠷ ᠦ᠋ᠨ ᠪᠣᠯᠭᠠᠬᠤ ᠪᠣᠢ ᠭᠡᠮᠡᠨ ᠥᠨᠵᠢᠨ ᠬᠣᠨᠣᠨ ᠪᠣᠳᠣᠵᠤ ᠥᠭᠡᠳᠡ ᠦᠭᠡᠢ ᠵᠠᠯᠢᠲᠤ ᠠᠷᠭᠠ ᠰᠡᠳᠦᠵᠡᠢ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠲᠡᠭᠦᠨ ᠳᠡᠭᠡᠷᠡ ᠣᠴᠢᠵᠤ᠄
— ᠵᠠ᠂ ᠲᠠᠬᠢᠶᠠ ᠨᠠᠢᠵᠠ ᠮᠢᠨᠢ᠂ ᠡᠨᠡ ᠦᠳᠡᠰᠢ ᠶ᠋ᠢᠨ ᠬᠤᠷᠢᠮ ᠳ᠋ᠤ᠌ ᠡᠨᠡ ᠰᠠᠢᠬᠠᠨ ᠰᠡᠭᠦᠯ ᠢ᠋ᠶ᠋ᠡᠷ ᠴᠢᠨᠢ ᠭᠣᠶᠣᠯᠠᠴᠢᠬᠠᠭᠠᠳ ᠡᠷᠲᠡ ᠦᠤᠷ ᠢ᠋ᠶ᠋ᠠᠷ ᠬᠠᠮᠤᠭ ᠠᠮᠢᠲᠠᠨ ᠨᠣᠢᠷᠰᠤᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠭᠦᠶᠦᠭᠰᠡᠭᠡᠷ ᠠᠪᠴᠢᠷᠠᠵᠤ ᠥᠭᠭᠦᠶᠡ ᠭᠡᠳ ᠭᠤᠶᠤᠵᠤ ᠭᠤᠪᠰᠢᠵᠤ ᠭᠠᠷᠴᠠᠢ᠂ ᠲᠠᠬᠢᠶᠠ ᠨᠢᠭᠡ ᠶᠡᠬᠡ ᠴᠠᠭᠠᠷᠠᠭᠤᠯᠵᠤ ᠰᠦᠢᠳ ᠪᠣᠯᠤᠭᠰᠠᠨ ᠦᠭᠡᠢ᠂ ᠰᠡᠭᠦᠯ ᠢ᠋ᠶ᠋ᠡᠨ ᠥᠭᠭᠦᠭᠡᠳ ᠶᠠᠪᠤᠭᠤᠯᠴᠢᠬᠠᠵᠠᠢ᠂ ᠭᠡᠲᠡᠯᠡ ᠪᠠᠰᠢᠷ ᠰᠠᠨᠠᠭᠠᠲᠤ ᠲᠣᠭᠣᠰ ᠮᠠᠷᠭᠠᠰᠢ ᠨᠢ ᠦᠤᠷ ᠢ᠋ᠶ᠋ᠠᠷ ᠴᠤ᠌ ᠢᠷᠡᠭᠰᠡᠨ ᠦᠭᠡᠢ᠂ ᠦᠳᠡᠰᠢ ᠴᠦ᠍ ᠢᠷᠡᠭᠰᠡᠨ ᠦᠭᠡᠢ᠂ ᠲᠡᠷᠡ ᠴᠢᠭ ᠲᠦ ᠪᠡᠨ ᠵᠤᠯᠠᠷᠠᠵᠤ ᠵᠢᠭᠤᠲᠠᠵᠤ ᠠᠯᠠᠭᠠ ᠪᠣᠯᠵᠠᠢ᠃
ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠲᠠᠬᠢᠶᠠ ᠲᠣᠮᠣ ᠰᠠᠢᠬᠠᠨ ᠰᠡᠭᠦᠯ ᠢ᠋ ᠮᠢᠨᠢ ᠠᠪᠴᠢᠷᠠᠵᠤ ᠥᠭ ᠭᠡᠮᠡᠨ ᠲᠣᠭᠣᠰ ᠢ᠋ ᠳᠠᠭᠤᠳᠠᠵᠤ ᠥᠷᠯᠥᠭᠡ ᠪᠣᠯᠭᠠᠨ ᠥᠤᠷ ᠢ᠋ᠶ᠋ᠠᠷ ᠬᠠᠰᠬᠢᠷᠴᠤ ᠳᠣᠩᠭᠣᠳᠳᠠᠭ ᠪᠣᠯᠤᠭᠰᠠᠨ ᠭᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠵᠢᠩᠯᠢᠬᠤᠸᠠᠷ