ᠴᠣᠪᠣᠭᠣ ᠬᠦᠦЦовоо хүү
1064ᠴᠣᠪᠣᠭᠣ ᠬᠦᠦ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠭᠠᠭᠴᠠ ᠬᠦᠦ ᠲᠡᠢ ᠨᠢᠭᠡᠨ ᠠᠢᠯ ᠪᠠᠢᠵᠠᠢ᠂ ᠭᠡᠲᠡᠯᠡ ᠨᠢᠭᠡ ᠡᠳᠦᠷ ᠬᠦᠦ ᠨᠢ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠠᠳ ᠡᠵᠢ ᠠᠪᠤ ᠨᠢ ᠡᠯᠢᠭᠡᠨ ᠦ᠌ ᠪᠡᠨ ᠮᠢᠬᠠ ᠶ᠋ᠢ ᠪᠠᠷᠠᠵᠤ ᠡᠩ ᠦᠭᠡᠢ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠶ᠋ᠢ ᠰᠡᠮᠡᠷᠡᠲᠡᠯᠡ ᠬᠠᠷᠠᠵᠤ ᠬᠦᠯᠢᠶᠡᠵᠦ ᠰᠠᠭᠤᠳᠠᠭ ᠪᠣᠯᠪᠠ ᠭᠡᠨᠡ᠃
ᠴᠢᠩᠭᠢᠲᠡᠯᠡ ᠭᠤᠷᠪᠠᠨ ᠵᠢᠯ ᠦ᠋ᠨ ᠳᠠᠷᠠᠭᠠᠬᠢ ᠨᠢᠭᠡᠨ ᠰᠠᠢᠬᠠᠨ ᠡᠳᠦᠷ᠂ ᠬᠦᠦ ᠨᠢ ᠭᠡᠷ ᠡᠷᠭᠦᠮᠡ ᠥᠨᠳᠥᠷ ᠪᠣᠯᠴᠢᠬᠠᠭᠰᠠᠨ᠂ ᠭᠡᠷᠡᠯ ᠰᠠᠴᠤᠷᠠᠮᠠ ᠥᠩᠭᠡ ᠵᠢᠪᠬᠤᠭᠠ ᠲᠠᠢ ᠪᠣᠯᠴᠢᠬᠠᠭᠰᠠᠨ ᠡᠷᠭᠢᠵᠦ ᠬᠠᠷᠢᠵᠤ ᠢᠷᠡᠵᠡᠢ᠂ ᠡᠵᠢ ᠠᠪᠤ ᠶ᠋ᠢᠨ ᠬᠢᠨᠢ ᠮᠠᠩᠨᠠᠢ ᠶ᠋ᠢᠨ ᠦᠷᠴᠢᠯᠡᠭᠡ ᠲᠡᠨᠢᠢᠵᠦ᠂ ᠮᠠᠨ ᠤ᠋ ᠬᠦᠦ ᠢᠷᠡᠯᠡ᠂ ᠶᠠᠭᠠᠬᠢᠵᠤ ᠡᠢᠵᠦ ᠶᠠᠪᠤᠪᠠ ᠭᠡᠲᠡᠯᠡ ᠬᠦᠦ ᠨᠢ᠂
— ᠠᠯᠤᠰ ᠭᠠᠵᠠᠷ ᠠᠮᠤᠷ ᠮᠡᠨᠳᠦ ᠶᠠᠪᠤᠭᠠᠳ ᠢᠷᠡᠯᠡ᠂ ᠬᠦᠦ ᠴᠢᠨᠢ ᠨᠢᠭᠡ ᠵᠢᠯ ᠳᠠᠭᠤᠤ ᠬᠤᠭᠤᠷ᠂ ᠨᠢᠭᠡ ᠵᠢᠯ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ᠂ ᠨᠢᠭᠡ ᠵᠢᠯ ᠰᠢᠳᠡᠷᠡ ᠨᠡᠭᠦᠬᠦ ᠶ᠋ᠢ ᠰᠤᠷᠤᠯᠠ ᠭᠡᠵᠦ ᠭᠡᠨᠡ᠃
ᠨᠠᠷᠠ ᠰᠠᠷᠠ ᠭᠡᠷᠡᠯᠲᠦᠭᠰᠡᠨ ᠨᠠᠪᠲᠠᠷᠬᠠᠢ ᠪᠣᠷᠣ ᠭᠡᠷ ᠲᠡᠢ᠂ ᠲᠠᠭᠤᠬᠤ ᠮᠠᠯ ᠦᠭᠡᠢ᠂ ᠳᠠᠭᠤ ᠭᠡᠬᠦ ᠨᠣᠬᠠᠢ ᠦᠭᠡᠢ ᠶᠠᠳᠠᠭᠤ ᠠᠢᠯ ᠶᠤᠮᠰᠠᠨᠵᠠᠢ᠂ ᠲᠡᠳᠡᠨ ᠦ᠌ ᠬᠢ᠃
ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠪᠣᠷᠣ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠶᠠᠭᠠ ᠳ᠋ᠤ᠌ ᠠᠯᠤᠰ ᠤ᠋ᠨ ᠪᠠᠷᠠ ᠬᠠᠷᠠᠭᠰᠠᠨ ᠰᠢᠭ᠋ ᠰᠠᠭᠤᠭᠰᠠᠨ ᠬᠦᠦ ᠨᠢ᠂
— ᠡᠵᠢ ᠠ᠋ ᠡᠵᠢ ᠠ᠋᠂ ᠠᠪᠤ ᠠ᠋ ᠠᠪᠤ ᠠ᠋᠂ ᠨᠢᠭᠡ ᠪᠠᠶᠠᠨ ᠠᠢᠯ ᠤ᠋ᠨ ᠨᠡᠭᠦᠳᠡᠯ ᠠᠢᠰᠤᠢ᠂ ᠪᠠᠷᠠᠳᠠᠵᠤ ᠬᠥᠪᠥᠷᠡᠭᠰᠡᠨ ᠶᠡᠬᠡ ᠨᠡᠭᠦᠳᠡᠯ᠂ ᠨᠠᠢᠷ ᠲᠠᠢ ᠰᠠᠢᠬᠠᠨ ᠲᠣᠰᠴᠤ ᠣᠴᠢᠭᠠᠳ ᠮᠠᠢᠮᠠᠢ ᠠᠷᠠᠯᠵᠢᠶᠠ ᠬᠢᠵᠦ ᠦᠵᠡᠶᠡ ᠭᠡᠵᠦ ᠬᠡᠯᠡᠵᠦ ᠭᠡᠨᠡ᠃
ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠮᠠᠢᠮᠠᠢ ᠬᠢᠳᠡᠭ ᠪᠢᠯᠡ᠂ ᠲᠠᠭᠤᠬᠤ ᠮᠠᠯ ᠦᠭᠡᠢ᠂ ᠲᠣᠭᠠᠯᠠᠬᠤ ᠵᠣᠭᠣᠰ ᠦᠭᠡᠢ ᠤᠯᠤᠰ ᠴᠢᠨᠢ ᠭᠡᠲᠡᠯᠡ ᠬᠦᠦ ᠨᠢ ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠳᠤᠰᠤᠭᠠᠳ ᠠᠭᠤᠯᠵᠠᠶᠠ ᠭᠡᠳ ᠨᠡᠭᠦᠳᠡᠯ ᠥᠭᠡᠳᠡ ᠶᠠᠪᠤᠭᠠᠳ ᠥᠭᠭᠦᠯᠡ᠃
ᠣᠴᠢᠭᠰᠠᠨ ᠴᠢᠨᠢ ᠬᠦᠷᠦᠨ ᠦ᠌ ᠶᠡᠬᠡ ᠬᠠᠭᠠᠨ ᠤ᠋ ᠬᠢ ᠨᠡᠭᠦᠵᠦ᠂ ᠬᠥᠰᠬᠡ ᠶ᠋ᠢᠨ ᠬᠢ ᠨᠢ ᠲᠣᠭᠣᠰᠣ ᠲᠩᠷᠢ ᠳ᠋ᠦ᠍ ᠬᠠᠲᠠᠵᠤ ᠠᠪᠠᠢ᠃
ᠬᠦᠦ ᠴᠦ᠍ ᠤᠭᠲᠤᠵᠤ ᠣᠴᠢᠭᠠᠳ᠂
— ᠬᠠᠭᠠᠨ ᠭᠤᠸᠠᠢ᠂ ᠬᠠᠭᠠᠨ ᠭᠤᠸᠠᠢ᠂ ᠠᠶᠠᠨ ᠵᠠᠮ ᠳ᠋ᠤ᠌ ᠪᠠᠨ ᠠᠯᠵᠢᠶᠠᠯ ᠦᠭᠡᠢ ᠰᠠᠢᠨ ᠶᠠᠪᠤᠨᠠ ᠤᠤ ᠬᠡᠳᠦ ᠨᠤᠲᠤᠭ ᠬᠠᠮᠢᠭᠠ ᠪᠣᠢ᠂ ᠬᠠᠮᠢᠭᠠᠰᠢ ᠪᠠᠨ ᠨᠡᠭᠦᠵᠦ ᠶᠠᠪᠤᠨᠠ ᠭᠡᠮᠡᠨ ᠠᠰᠠᠭᠤᠵᠠᠢ᠃
— ᠬᠣᠲᠠᠯᠠ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠨ ᠯᠠ ᠨᠡᠭᠦᠵᠦ ᠶᠠᠪᠤᠨᠠ ᠭᠡᠵᠦ ᠬᠠᠭᠠᠨ ᠬᠠᠷᠢᠭᠤᠯᠵᠤ ᠭᠡᠨᠡ᠃
— ᠬᠠᠭᠠᠨ ᠭᠤᠸᠠᠢ ᠬᠠᠭᠠᠨ ᠭᠤᠸᠠᠢ᠂ ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ ᠬᠢᠬᠦ ᠪᠡᠷ ᠶᠠᠭᠤᠮᠠ ᠪᠠᠢᠨᠠ ᠤᠤ ᠭᠡᠵᠦ ᠬᠦᠦ ᠶ᠋ᠢ ᠠᠰᠠᠭᠤᠪᠠᠰᠤ᠂
— ᠴᠢ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ ᠬᠢᠳᠡᠭ ᠬᠥᠮᠦᠨ ᠪᠣᠢ ᠳᠠ ᠭᠡᠵᠡᠢ᠃
— ᠠᠯᠲᠠ ᠪᠡᠶᠡ ᠪᠡᠨ ᠠᠷᠠᠯᠵᠢᠵᠤ ᠬᠤᠳᠠᠯᠳᠤᠬᠤ ᠭᠡᠵᠦ ᠶᠠᠪᠤᠭᠠ ᠬᠥᠮᠦᠨ ᠪᠠᠢᠨᠠ ᠠ᠋᠃
— ᠠᠪᠤ ᠡᠵᠢᠡᠴᠡ ᠵᠠᠶᠠᠭᠠᠭᠰᠠᠨ ᠠᠯᠲᠠ ᠪᠡᠶᠡ ᠪᠡᠨ ᠲᠡᠭᠡᠭᠡᠳ ᠶᠠᠭᠤ ᠪᠠᠷ ᠠᠷᠠᠯᠵᠢᠬᠤ ᠶᠤᠮ?
— ᠨᠢᠭᠡ ᠲᠤᠯᠤᠮ ᠠᠯᠲᠠ ᠪᠠᠷ ᠭᠡᠵᠦ ᠬᠦᠦ ᠬᠠᠷᠢᠭᠤ ᠬᠡᠯᠡᠪᠡ᠃
ᠨᠠᠮᠠ ᠶ᠋ᠢ ᠠᠯᠲᠠ ᠮᠥᠩᠭᠥ ᠦᠭᠡᠢ ᠭᠡᠵᠦ ᠳᠠᠭᠠᠷᠢᠵᠤ ᠪᠠᠢᠬᠤ ᠨᠢ ᠠ᠋ ᠭᠡᠵᠦ ᠵᠢᠪᠡᠭᠦᠦ ᠨᠢ ᠬᠦᠷᠦᠭᠰᠡᠨ ᠬᠠᠭᠠᠨ᠂
— ᠴᠢᠨᠦ ᠥᠷᠲᠡᠭ ᠢ᠋ ᠬᠡᠨ ᠳ᠋ᠦ᠍ ᠥᠭᠬᠦ ᠶᠦ᠍ᠮ᠂ ᠲᠡᠭᠡᠭᠡᠳ ᠭᠡᠰᠡᠨ ᠳ᠋ᠦ᠍᠂
— ᠮᠢᠨᠦ ᠠᠪᠤ ᠡᠵᠢ ᠬᠣᠶᠠᠷ ᠲᠤ᠌ ᠥᠭᠭᠦᠭᠡᠷᠡᠢ᠂ ᠲᠡᠨᠳᠡ ᠪᠠᠢᠭᠠ ᠭᠡᠳ ᠠᠯᠤᠰ ᠲᠤ᠌ ᠠᠷᠤᠭ ᠬᠥᠮᠥᠷᠢᠭᠰᠡᠨ ᠶᠦ᠍ᠮ ᠰᠢᠭ ᠬᠠᠷᠠᠭᠳᠠᠬᠤ ᠵᠢᠵᠢᠭ ᠬᠠᠷᠠ ᠭᠡᠷ ᠢ᠋ ᠵᠢᠭᠠᠵᠤ ᠭᠡᠨᠡ᠃
— ᠠ᠋ ᠳᠠ᠂ ᠡᠢᠮᠦ ᠬᠣᠭᠣᠰᠣᠨ ᠠᠢᠯ ᠤ᠋ᠨ ᠬᠦᠦ ᠪᠠᠢᠬᠤ ᠨᠢ ᠠ᠋᠂ ᠡᠵᠢ ᠠᠪᠤ ᠪᠠᠨ ᠡᠨᠡᠷᠢᠵᠦ ᠲᠡᠵᠢᠭᠡᠬᠦ ᠭᠡᠵᠦ ᠡᠨᠡ ᠪᠡᠶᠡ ᠪᠡᠨ ᠵᠠᠷᠤᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠮᠡᠨ ᠬᠠᠭᠠᠨ ᠦᠷᠦ ᠡᠪᠡᠳᠴᠦ᠂ ᠦᠬᠡᠷ ᠦ᠋ᠨ ᠬᠡᠭᠡᠯ ᠦ᠋ᠨ ᠲᠤᠯᠤᠮ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠠᠯᠲᠠ ᠬᠢᠭᠡᠳ ᠠᠯᠪᠠᠲᠤ ᠠᠷᠠᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠪᠤ ᠡᠵᠢ ᠳ᠋ᠦ᠍ ᠨᠢ ᠥᠭᠭᠦᠭᠦᠯᠵᠦ᠂《 ᠬᠦᠦ ᠶ᠋ᠢ ᠴᠢᠨᠢ ᠠᠪᠤᠯᠠ᠂ ᠡᠨᠡ ᠠᠯᠲᠠ ᠮᠥᠩᠭᠥ ᠪᠡᠷ ᠠᠮᠢ ᠵᠢᠭᠤᠲᠤᠭᠠᠢ》 ᠭᠡᠮᠡᠨ ᠬᠡᠯᠡᠭᠦᠯᠵᠡᠢ᠃
ᠲᠡᠢᠨ ᠬᠦ᠌ ᠬᠠᠭᠠᠨ ᠤ᠋ ᠬᠢ ᠨᠡᠭᠦᠭᠰᠡᠭᠡᠷ ᠠᠭᠤᠯᠠ ᠤᠰᠤ ᠲᠡᠭᠰᠢ ᠥᠨᠢ ᠳᠡᠯᠭᠡᠷ ᠰᠠᠢᠬᠠᠨ ᠨᠤᠲᠤᠭ ᠲᠤ᠌ ᠪᠠᠭᠤᠵᠤ ᠬᠠᠭᠠᠨᠲᠠᠨ᠂
ᠨᠢᠳᠦᠨ ᠳ᠋ᠦ᠍ ᠪᠡᠨ ᠭᠠᠯ ᠲᠠᠢ᠂ ᠨᠢᠭᠤᠷ ᠲᠤ᠌ ᠪᠠᠨ ᠴᠣᠭ ᠲᠠᠢ ᠡᠨᠡ ᠬᠦᠦ ᠠᠢᠬᠤᠪᠲᠤᠷ ᠰᠦᠷᠡᠬᠡᠢ ᠬᠥᠮᠦᠨ ᠪᠣᠯᠤᠨᠠ ᠰᠢᠦ᠂ ᠶᠠᠯᠠᠲᠠᠨ ᠤ᠋ ᠶᠣᠰᠣ ᠪᠠᠷ ᠴᠢᠩᠳᠠ ᠬᠠᠷᠠᠵᠤ ᠬᠠᠷᠠᠭᠠᠯᠵᠠᠵᠤ ᠪᠠᠢᠭᠲᠤᠨ ᠭᠡᠵᠦ ᠠᠯᠪᠠᠲᠤ ᠨᠠᠷ ᠲᠤ᠌ ᠪᠠᠨ ᠵᠠᠷᠯᠢᠭ ᠪᠣᠯᠪᠠ᠂ᠲᠡᠭᠡᠩᠭᠦᠲᠡ ᠠᠯᠪᠠᠲᠤ ᠨᠠᠷ ᠨᠢ ᠠᠯᠲᠠ ᠪᠡᠶᠡ ᠪᠡᠨ ᠬᠠᠭᠠᠨ ᠳ᠋ᠤ᠌ ᠬᠤᠳᠠᠯᠳᠤᠭᠰᠠᠨ ᠠᠢᠬᠤᠪᠲᠤᠷ ᠬᠦᠦ ᠶ᠋ᠢ ᠦᠬᠡᠷ ᠦ᠋ᠨ ᠲᠤᠯᠤᠮ ᠳ᠋ᠤ᠌ ᠬᠢᠵᠦ ᠠᠮᠠ ᠶ᠋ᠢ ᠨᠢ ᠳᠠᠩᠭᠢᠨᠠᠲᠠᠯᠠ ᠪᠣᠭᠣᠭᠠᠳ᠂ ᠴᠠᠭ ᠴᠠᠭ ᠲᠤ᠌ ᠭᠠᠷᠭᠠᠵᠤ ᠬᠣᠭᠣᠯᠠᠯᠠᠵᠤ ᠤᠮᠳᠠᠯᠠᠳᠠᠭ ᠪᠣᠯᠵᠠᠢ᠃
ᠭᠡᠲᠡᠯᠡ ᠬᠦᠦ ᠲᠤᠯᠤᠮ ᠳᠣᠲᠣᠷᠠᠠᠴᠠ ᠪᠠᠨ ᠦᠷᠦ ᠥᠮᠥᠷᠡᠲᠡᠯᠡ ᠰᠠᠢᠬᠠᠨ ᠳᠠᠭᠤᠯᠠᠨᠠ᠂ ᠥᠷᠭᠡᠨ ᠣᠯᠠᠨ ᠲᠦᠮᠡᠨ ᠳᠠᠭᠤᠯᠠᠵᠤ ᠪᠣᠢ ᠳᠠᠭᠤᠤ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ ᠠᠮᠢᠲᠠᠨ ᠤ᠋ ᠠᠯᠠᠭ ᠦᠷᠡ ᠠᠪᠤ ᠡᠵᠢᠡᠴᠡ ᠪᠡᠨ ᠬᠣᠯᠠ ᠡᠯᠢᠭᠡᠨ ᠦ᠌ ᠪᠡᠨ ᠮᠢᠬᠠ ᠶ᠋ᠢ ᠪᠠᠷᠢᠵᠤ ᠪᠠᠢᠨᠠ ᠭᠡᠮᠡᠨ ᠶᠡᠬᠡᠳᠡ ᠦᠷᠦ ᠡᠪᠡᠳᠦᠨᠡ᠃
ᠦᠢᠯᠡ ᠪᠡᠨ ᠦᠵᠡᠵᠦ ᠦᠰᠦ ᠪᠡᠨ ᠲᠣᠭᠠᠯᠠᠵᠤ ᠰᠠᠭᠤᠨᠠ ᠳᠠ᠂ ᠵᠠᠢᠯᠠᠭᠤᠯ ᠭᠡᠮᠡᠨ ᠬᠠᠢᠷᠠᠯᠠᠨᠠ᠂ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠲᠤᠯᠤᠮᠠᠴᠠ ᠨᠢ ᠭᠠᠷᠭᠠᠵᠤ ᠰᠤᠯᠠ ᠳᠠᠭᠤᠯᠠᠭᠤᠯᠳᠠᠭ ᠪᠣᠯᠪᠠ ᠭᠡᠨᠡ᠂ ᠳᠠᠭᠤᠤ ᠶ᠋ᠢ ᠨᠢ ᠰᠣᠨᠣᠰᠤᠭᠠᠳ ᠤᠬᠢᠯᠠᠵᠤ ᠰᠠᠭᠤᠳᠠᠭ ᠤᠯᠤᠰ ᠴᠤ᠌ ᠣᠯᠠᠨ ᠪᠣᠯᠪᠠ᠂ ᠰᠡᠭᠦᠯ ᠳ᠋ᠦ᠍ ᠪᠡᠨ ᠲᠡᠷᠡ ᠬᠦᠦ ᠶ᠋ᠢ ᠡᠷᠬᠡᠯᠡᠭᠦᠯᠵᠦ ᠬᠠᠢᠷᠠᠯᠠᠳᠠᠭ ᠪᠣᠯᠵᠠᠢ᠃
ᠭᠡᠲᠡᠯᠡ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠦ᠌ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠥᠨᠳᠥᠷ ᠰᠦᠷᠯᠢᠭ ᠮᠣᠳᠣ ᠲᠠᠢ ᠠᠭᠤᠯᠠ ᠪᠠᠢᠳᠠᠭ ᠶᠤᠮᠰᠠᠨᠵᠠᠢ᠂ ᠬᠦᠦ ᠳᠠᠭᠤᠤ ᠳᠠᠭᠤᠯᠠᠨ ᠭᠠᠳᠠᠭᠤᠷ ᠭᠦᠶᠦᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠂
ᠠᠬᠠ ᠠ᠋᠂ ᠡᠭᠡᠴᠢ ᠠ᠋᠂ ᠲᠡᠷᠡ ᠪᠠᠷᠠᠭᠤᠨ ᠠᠭᠤᠯᠠᠨ ᠳ᠋ᠤ᠌ ᠨᠢᠭᠡ ᠶᠠᠪᠠᠭᠠᠨ ᠨᠢᠴᠦᠭᠦᠨ ᠬᠥᠮᠦᠨ ᠶᠠᠪᠤᠭᠠ ᠬᠠᠷᠠᠭᠳᠠᠨᠠ᠂ ᠶᠠᠮᠠᠷ ᠵᠢᠭᠲᠡᠢ ᠬᠥᠮᠦᠨ ᠪᠣᠢ? ᠶᠠᠮᠠᠷ ᠬᠥᠮᠦᠨ ᠲᠡᠭᠡᠵᠦ ᠶᠠᠪᠤᠳᠠᠭ ᠶᠤᠮ ᠪᠣᠯ ᠭᠡᠵᠦ ᠤᠯᠤᠰᠠᠴᠠ ᠠᠰᠠᠭᠤᠵᠤ ᠭᠡᠨᠡ᠃
— ᠴᠢ ᠲᠡᠭᠦᠪᠡᠷ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠲᠡᠭᠦᠪᠡᠷ ᠴᠢᠨᠢ ᠨᠢᠭᠡ ᠰᠢᠳᠠᠷᠴᠢᠨ ᠰᠢᠮᠨᠤᠰ ᠰᠠᠭᠠᠷᠠᠭ ᠰᠠᠭᠠᠷᠠᠭ ᠶᠠᠪᠤᠳᠠᠭ ᠶᠤᠮ᠂ ᠲᠡᠢᠰᠢ ᠪᠡᠨ ᠪᠤᠤ ᠵᠦᠭᠯᠡᠲᠤᠭᠡᠢ ᠭᠡᠮᠡᠨ ᠠᠮᠢᠲᠠᠨ ᠱᠤᠤᠬᠢᠯᠳᠤᠵᠠᠢ᠃
ᠭᠡᠲᠡᠯᠡ ᠬᠦᠦ ᠮᠠᠷᠭᠠᠰᠢ ᠨᠢ ᠮᠥᠨᠥᠬᠡᠨ ᠪᠠᠷᠠᠭᠤᠨ ᠬᠠᠷᠠ ᠠᠭᠤᠯᠠ ᠶ᠋ᠢᠨ ᠵᠦᠭ ᠰᠡᠮᠬᠡᠨ ᠱᠣᠣᠷᠠᠭ ᠱᠣᠣᠷᠠᠭ ᠭᠦᠶᠦᠵᠦ ᠣᠳᠪᠠᠢ᠃
ᠥᠨᠳᠥᠷ ᠰᠢᠮᠨᠤᠰ ᠳᠡᠭᠡᠷᠡ ᠭᠦᠶᠦᠵᠦ ᠣᠴᠢᠭᠠᠳ᠂
— ᠲᠠ ᠶᠠᠭᠤ ᠬᠠᠷᠠᠭᠠᠳ ᠬᠠᠢᠭᠠᠳ ᠶᠠᠪᠤᠭᠠ ᠶᠤᠮ ᠪᠣᠢ ᠭᠡᠵᠦ ᠠᠰᠠᠭᠤᠵᠤ ᠭᠡᠨᠡ᠃
— ᠳᠥᠷᠪᠡᠯᠵᠢᠨ ᠪᠡᠶᠡ ᠳ᠋ᠦ᠍ ᠲᠥᠷᠥ ᠪᠤᠯᠢᠶᠠᠯᠳᠤᠳᠠᠭ᠂ ᠲᠥᠷᠥᠭᠰᠡᠨ ᠪᠡᠶᠡ ᠳ᠋ᠦ᠍ ᠤᠬᠠᠭᠠᠨ ᠪᠤᠯᠢᠶᠠᠯᠳᠤᠳᠠᠭ ᠰᠢᠳᠡᠷᠡ ᠬᠡᠮᠡᠭᠴᠢ ᠶ᠋ᠢ ᠲᠠᠯᠪᠢᠬᠤ ᠬᠥᠮᠦᠨ ᠬᠠᠢᠭᠠᠳ ᠢᠩᠭᠢᠵᠦ ᠶᠠᠪᠤᠳᠠᠭ ᠶᠤᠮ ᠭᠡᠵᠦ ᠰᠢᠮᠨᠤᠰ ᠥᠭᠡᠳᠡᠡᠴᠡ ᠨᠢ ᠥᠭᠦᠯᠡᠪᠡᠰᠦ ᠬᠦᠦ᠂
— ᠲᠡᠭᠡᠪᠡᠯ ᠬᠣᠶᠠᠭᠤᠯᠠ ᠪᠠᠨ ᠳᠡᠪᠲᠡᠷ ᠦ᠋ᠨ ᠴᠢᠨᠡᠭᠡᠨ ᠭᠠᠵᠠᠷ ᠲᠤ᠌ ᠳᠡᠯᠡᠬᠡᠢ ᠶ᠋ᠢᠨ ᠠᠮᠢᠲᠠᠨ ᠢ᠋ ᠳᠠᠢᠲᠤᠭᠤᠯᠵᠤ ᠨᠠᠭᠠᠳᠤᠶᠠ ᠭᠡᠵᠦ ᠭᠡᠨᠡ᠃
— ᠠᠮᠠᠨ ᠤ᠋ ᠰᠠᠯᠠᠢ ᠨᠢ ᠠᠷᠢᠯᠤᠭᠠ ᠦᠭᠡᠢ ᠠᠯᠳᠠᠷᠠᠢ ᠴᠢ ᠶᠠᠭᠤ ᠬᠡᠯᠡᠨᠡ ᠪᠣᠢ? ᠪᠠᠰᠠ ᠰᠢᠳᠡᠷᠡ ᠲᠠᠯᠪᠢᠳᠠᠭ ᠪᠠᠢᠬᠤ ᠨᠢ ᠠ᠋᠂ ᠴᠢ ᠭᠡᠳ ᠰᠢᠮᠨᠤᠰ ᠶᠡᠷᠦ ᠲᠣᠭᠣᠭᠰᠠᠨ ᠦᠭᠡᠢ᠃
ᠭᠡᠲᠡᠯᠡ ᠬᠦᠦ ᠱᠠᠯᠠᠭᠠᠳ ᠰᠠᠯᠬᠤ ᠦᠭᠡᠢ ᠳᠠᠭᠠᠭᠠᠳ ᠤᠨᠠᠬᠤ ᠨᠢ ᠲᠡᠷᠡ᠂ ᠬᠣᠶᠠᠭᠤᠯᠠ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠭᠡᠷ ᠲᠦ ᠣᠷᠣᠪᠠᠰᠤ ᠰᠢᠳᠡᠷᠡ ᠥᠷᠦᠭᠡᠲᠡᠢ ᠪᠡᠯᠡᠨ ᠪᠠᠢᠵᠤ ᠪᠠᠢᠬᠤ ᠶᠤᠮ᠂ ᠲᠣᠭᠯᠠᠭᠠᠳ ᠣᠷᠬᠢᠭᠰᠠᠨ ᠳ᠋ᠤ᠌ ᠬᠣᠶᠠᠭᠤᠯᠠ ᠬᠠᠢᠨᠴᠠᠴᠢᠬᠠᠵᠤ ᠭᠡᠨᠡ᠃
— ᠡᠷᠡ ᠶ᠋ᠢ ᠪᠤᠤ ᠪᠠᠰᠤ᠂ ᠳᠠᠯᠠᠢ ᠶ᠋ᠢ ᠪᠤᠤ ᠶᠠᠨᠳᠠ ᠭᠡᠳᠡᠭ ᠰᠠᠨ᠂ ᠵᠢᠷᠠᠨ ᠳᠥᠷᠪᠡᠨ ᠬᠤᠪᠢᠷᠠᠯ ᠢ᠋ ᠵᠢᠭᠠᠯ ᠵᠢᠭᠤᠯ ᠮᠡᠳᠡᠳᠡᠭ ᠰᠦᠷᠡᠬᠡᠢ ᠬᠦᠦ ᠪᠠᠢᠨᠠ᠂ ᠣᠳᠣ ᠮᠥᠷᠥᠢ ᠲᠡᠢ ᠲᠣᠭᠯᠠᠨᠠ ᠠ᠋ ᠬᠥ ᠭᠡᠳ ᠰᠢᠮᠨᠤᠰ ᠬᠦᠦ ᠳ᠋ᠦ᠍ ᠨᠢᠭᠡ ᠬᠠᠭᠤᠴᠢᠨ ᠰᠡᠯᠡᠮᠡ ᠭᠠᠷᠭᠠᠵᠤ ᠥᠭᠪᠡ᠂ ᠭᠡᠲᠡᠯᠡ ᠥᠪᠡᠷ ᠦ᠋ᠨ ᠬᠢ ᠨᠢ ᠰᠡᠯᠡᠮᠡ ᠰᠠᠢᠬᠠᠨ᠂ ᠰᠢᠪ ᠰᠢᠨᠡᠬᠡᠨ ᠶᠦ᠍ᠮ᠂ ᠲᠡᠭᠡᠭᠡᠳ ᠬᠡᠨ ᠬᠣᠨᠵᠢᠭᠰᠠᠨ ᠨᠢ ᠬᠣᠨᠵᠢᠭᠳᠠᠭᠰᠠᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠠᠪᠬᠤ ᠪᠣᠯᠪᠠ᠃
ᠲᠡᠭᠡᠭᠡᠳ ᠲᠣᠬᠣᠮ ᠤ᠋ᠨ ᠴᠢᠨᠡᠭᠡ ᠳᠥᠷᠪᠡᠯᠵᠢᠨ ᠳᠡᠭᠡᠷᠡ ᠲᠣᠭᠯᠠᠵᠤ ᠭᠠᠷᠤᠯᠠ ᠲᠡᠷᠡ ᠬᠣᠶᠠᠷ᠃
ᠲᠡᠭᠡᠲᠡᠯᠡ ᠴᠣᠪᠣᠭᠣ ᠬᠦᠦ ᠲᠡᠷᠡ ᠳᠣᠣᠷᠠ ᠪᠠᠨ ᠰᠢᠮᠨᠤᠰ ᠢ᠋ ᠬᠣᠨᠵᠢᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠠᠰᠤ ᠴᠠᠪᠴᠢᠵᠤ ᠬᠠᠶᠠᠴᠢᠬᠠᠭᠠᠳ ᠬᠠᠭᠠᠨ ᠤ᠋ ᠬᠢ ᠤᠷᠤᠭᠤ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠭᠦᠶᠦᠵᠦ ᠣᠳᠴᠠᠢ᠃
— ᠠᠬᠠ ᠠ᠋ ᠠᠬᠠ ᠠ᠋᠂ ᠡᠭᠡᠴᠢ ᠠ᠋ ᠡᠭᠡᠴᠢ ᠠ᠋᠂ ᠪᠢ ᠨᠥᠬᠥᠭᠡ ᠰᠢᠮᠨᠤᠰ ᠤ᠋ᠨ ᠴᠢᠨᠢ ᠲᠣᠯᠣᠭᠠᠢ ᠶ᠋ᠢ ᠠᠪᠴᠤ ᠬᠠᠶᠠᠴᠢᠬᠠᠭᠠᠳ ᠬᠥᠷᠥᠭᠡᠳ ᠢᠷᠡᠯᠡ ᠭᠡᠵᠦ ᠭᠡᠨᠡ᠃
— ᠶᠠᠭᠤ ᠭᠡᠨᠡ᠂ ᠬᠤᠳᠠᠯ ᠪᠠᠢ ᠯᠠ ᠦᠭᠡᠢ ᠳᠡ᠂ ᠬᠠᠮᠢᠭᠠ ᠲᠡᠭᠡᠵᠦ ᠲᠣᠯᠣᠭᠠᠢ ᠶ᠋ᠢ ᠨᠢ ᠠᠪᠤᠭᠠ ᠪᠣᠢ ᠬᠠᠭᠠᠨ᠂ ᠶᠠᠪᠤᠵᠤ ᠦᠵᠡᠶᠡ ᠭᠡᠳ ᠤᠯᠤᠰ ᠠᠮᠢᠲᠠᠨ ᠰᠦᠢᠳ ᠮᠠᠢ ᠳᠠ᠃
ᠰᠢᠮᠨᠤᠰ ᠢ᠋ ᠠᠯᠠᠭᠰᠠᠨ ᠢ᠋ ᠦᠵᠡᠭᠡᠳ ᠲᠡᠳᠡ ᠬᠠᠭᠠᠨ ᠳ᠋ᠤ᠌ ᠪᠠᠨ ᠣᠴᠢᠵᠤ ᠬᠠᠮᠤᠭ ᠤᠴᠢᠷ ᠢ᠋ ᠨᠢ ᠬᠡᠯᠡᠬᠦ ᠪᠡᠷ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠪᠤᠪᠠ ᠭᠡᠨᠡ᠂ ᠬᠠᠭᠠᠨ ᠠᠯᠪᠠᠲᠤ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠦᠭᠡ ᠶ᠋ᠢ ᠲᠤᠭᠤᠯᠤᠭᠠᠳ᠂
— ᠠᠯᠢᠪ ᠲᠦᠷᠭᠡᠨ ᠣᠭᠣᠰᠣᠷ ᠪᠦᠴᠡ ᠦᠭᠡᠢ ᠤᠷᠲᠤ ᠴᠠᠭᠠᠨ ᠥᠷᠭᠥᠭᠡ ᠭᠡᠷ ᠪᠠᠷᠢᠭᠲᠤᠨ ᠭᠡᠵᠦ ᠭᠡᠨᠡ᠂ ᠲᠡᠢᠨ ᠬᠦ᠌ ᠴᠣᠪᠣᠭᠣ ᠬᠦᠦ ᠳ᠋ᠦ᠍ ᠰᠢᠨᠡ ᠭᠡᠷ᠂ ᠲᠠᠯᠠ ᠳᠦᠭᠦᠷᠡᠩ ᠪᠡᠯᠴᠢᠭᠴᠢ ᠲᠠᠪᠤᠨ ᠬᠣᠰᠢᠭᠤ ᠮᠠᠯ᠂ ᠮᠠᠯ ᠢ᠋ ᠨᠢ ᠬᠠᠷᠠᠵᠤ ᠬᠠᠷᠢᠭᠤᠯᠬᠤ ᠳᠠᠭᠠᠭᠠᠮᠠᠯ ᠬᠦᠷᠲᠡᠯᠡ ᠭᠠᠷᠭᠠᠵᠤ ᠥᠭᠴᠦ᠂ ᠠᠪᠤ ᠡᠵᠢ ᠶ᠋ᠢ ᠨᠢ ᠠᠯᠤᠰ ᠨᠤᠲᠤᠭᠠᠴᠠ ᠨᠡᠭᠦᠯᠭᠡᠨ ᠠᠪᠴᠢᠷᠠᠵᠤ ᠡᠯᠢᠭᠡ ᠪᠦᠲᠦᠨ ᠪᠣᠯᠭᠠᠪᠠ᠂ ᠭᠠᠭᠴᠠ ᠬᠦᠦ ᠨᠢ ᠬᠠᠭᠠᠨ ᠳ᠋ᠤ᠌ ᠥᠪᠡᠷ ᠢ᠋ ᠪᠡᠨ ᠬᠤᠳᠠᠯᠳᠤᠵᠤ ᠲᠤᠯᠤᠮ ᠠᠯᠲᠠ ᠲᠡᠳᠡᠨ ᠳ᠋ᠦ᠍ ᠥᠭᠭᠦᠭᠦᠯᠦᠭᠰᠡᠨ ᠨᠢ ᠳᠤᠮᠳᠠᠷᠠᠭᠠ ᠴᠤ᠌ ᠦᠭᠡᠢ ᠪᠠᠢᠵᠠᠢ᠃
ᠲᠡᠢᠨ ᠬᠦ᠌ ᠴᠣᠪᠣᠭᠣ ᠬᠦᠦ ᠠᠪᠤ ᠡᠵᠢ ᠲᠡᠢ ᠪᠡᠨ ᠠᠮᠤᠷ ᠰᠠᠢᠬᠠᠨ ᠳ᠋ᠤ᠌ ᠪᠠᠨ ᠵᠢᠷᠭᠠᠵᠠᠢ᠃
ᠱ· ᠰᠠᠷᠠᠨᠭᠡᠷᠡᠯ ᠦᠯᠢᠭᠡᠷᠴᠢᠯᠡᠨ ᠤᠩᠰᠢᠪᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠤᠭᠠᠨᠵᠢᠳ
ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ