ᠪᠤᠳᠤᠷᠤᠯ - ᠱ᠂ ᠭᠦᠷᠦᠪᠠᠽᠠᠷ Бодорол - Ш᠂ Гүрбазар
304ᠪᠤᠳᠤᠷᠤᠯ
ᠬᠠᠷᠠᠮᠰᠠᠯ᠂ ᠪᠠᠶᠠᠷ᠂ ᠳᠣᠭᠳᠣᠯᠤᠯ
ᠶᠡᠷᠦ ᠡᠴᠡ ᠪᠡᠨ ᠶᠢᠷᠲᠢᠨᠴᠦ ᠶ᠋ᠢᠨ ᠠᠳᠠ ᠬᠦᠷᠲᠡᠯᠡ ᠰᠢᠦ
ᠡᠭᠦᠨ ᠢ᠋ ᠪᠡᠨ ᠪᠢ ᠥᠪᠡᠷ ᠲᠡᠭᠡᠨ ᠯᠡ ᠪᠢᠴᠢᠳᠡᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ
ᠦᠭᠡᠢ ᠶᠡᠷᠦ ᠨᠢ
ᠬᠥᠮᠦᠰ ᠲᠡᠢ ᠬᠤᠪᠢᠶᠠᠯᠴᠠᠪᠠᠯ ᠭᠡᠵᠦ ᠪᠣᠳᠣᠭᠰᠠᠨ ᠮᠢᠨᠢ
ᠬᠠᠴᠢᠨ ᠬᠠᠴᠢᠨ ᠪᠣᠳᠣᠯ ᠡᠷᠭᠢᠯᠳᠦᠭᠰᠡᠨ
ᠬᠠᠭᠠᠰ ᠵᠠᠭᠤᠨ ᠳᠥᠷᠪᠡᠨ ᠮᠥᠷᠲᠦ ᠪᠡᠨ
ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠣᠢᠯᠠᠭᠠᠭᠠ ᠦᠭᠡᠢ ᠲᠡᠮᠳᠡᠭᠯᠡᠯᠡ
ᠥᠪᠡᠷ ᠲᠦ᠍ ᠴᠢᠨᠢ ᠣᠳᠣ ᠳᠡᠯᠭᠡᠶᠡ ᠳᠡ᠃
᠅᠅᠅
《ᠠᠯᠲᠠᠨ ᠭᠠᠳᠠᠰᠤᠨ》 ᠤ᠋ ᠨᠠᠢᠷ ᠣᠷᠣᠢᠵᠢᠨ ᠢ᠋ᠶ᠋ᠠᠨ ᠨᠢᠵᠢᠭᠢᠨᠡᠪᠡ
ᠨᠢᠵᠢᠭᠢᠨᠡᠭᠰᠡᠨ ᠨᠠᠢᠷ ᠠ᠋ᠴᠠ ᠨᠢ ᠴᠢᠬᠢ ᠤᠢᠳᠤᠯᠠ
ᠤᠢᠳᠤᠭᠰᠠᠨ ᠴᠢᠬᠢ ᠪᠡᠨ ᠳᠠᠷᠤᠭᠠᠳ ᠤᠨᠲᠠᠶᠤ ᠳᠠ ᠭᠡᠲᠡᠯᠡ
ᠤᠳᠠᠬᠤ ᠦᠭᠡᠢ ᠪᠣᠯᠬᠤ ᠪᠠᠢᠭᠤᠯᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠢ ᠶ᠋ᠢ ᠪᠣᠳᠣᠪᠠ ᠰᠢᠦ ᠁
ᠪᠢ ᠯᠡ ᠬᠤᠪᠢ ᠳ᠋ᠠᠭᠠᠨ ᠪᠤᠰᠤᠳ ᠠ᠋ᠴᠠ ᠤᠷᠮᠠ ᠬᠦᠰᠡᠳᠡᠭ ᠠ᠋᠃
ᠲᠡᠨᠡᠭ ᠪᠠᠢᠨᠠ ᠤᠤ?
᠅᠅᠅
ᠠᠳᠤᠭᠤᠨ ᠤ᠋ ᠬᠣᠮᠣᠯ ᠤᠭᠤᠭᠢᠬᠤ ᠳ᠋ᠤ᠌ ᠪᠦᠭᠰᠢᠵᠦ ᠳᠠᠪᠴᠢᠭᠤᠳᠠᠨᠠ
ᠳᠠᠪᠴᠢᠭᠤᠳᠠᠬᠤ ᠳ᠋ᠠᠭᠠᠨ ᠳᠠᠭᠠᠨᠠ ᠳ᠋ᠤ᠌ ᠠᠭᠰᠤᠷᠤᠨᠠ
ᠠᠭᠰᠤᠷᠤᠭᠰᠠᠨ ᠠᠭᠠᠰᠢ ᠶ᠋ᠢ ᠮᠢᠨᠢ ᠨᠠᠮᠤᠷ ᠨᠣᠮᠣᠬᠠᠳᠬᠠᠵᠤ
ᠠᠬᠢᠭᠠᠳ ᠳᠣᠭᠰᠢᠷᠠᠶᠠ ᠭᠡᠪᠡᠴᠦ《ᠡᠪᠦᠯ》 ᠳ᠋ᠦ᠍ ᠵᠢᠮᠡᠯᠡᠭᠦᠯᠦᠨᠡ
᠁ ᠡᠢᠮᠦ ᠰᠠᠢᠬᠠᠨ ᠡᠬᠡ ᠣᠷᠣᠨ ᠳ᠋ᠠᠭᠠᠨ
ᠡᠷᠬᠡᠯᠡᠵᠦ ᠯᠡ ᠬᠥᠮᠦᠨ ᠪᠣᠯᠵᠠᠢ ᠳᠠ᠃
᠅᠅᠅
ᠪᠤᠬᠠᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠬᠥᠮᠦᠨ
ᠦᠨᠢᠶᠡ ᠲᠤᠭᠤᠯᠯᠠᠭᠰᠠᠨ ᠬᠣᠢᠨᠠ ᠢᠷᠡᠬᠦ
ᠢᠷᠡᠬᠦ ᠳ᠋ᠡᠭᠡᠨ ᠶᠡᠬᠡ ᠣᠯᠠᠨ ᠰᠢᠯᠲᠠᠭ ᠲᠣᠭᠠᠴᠢᠬᠤ
ᠲᠣᠭᠠᠴᠢᠭᠰᠠᠨ ᠰᠢᠯᠲᠠᠭ ᠢ᠋ ᠨᠢ ᠬᠣᠯᠠ ᠰᠢᠳᠡᠲᠡᠯᠡ
ᠲᠣᠪᠴᠢ ᠶ᠋ᠢ ᠨᠢ ᠣᠶᠣᠬᠤ ᠰᠠᠨ᠂ ᠪᠦᠰᠡᠭᠦᠢ ᠶ᠋ᠢᠨ ᠢᠨᠢᠶᠡᠳᠦ ᠬᠠᠭᠠ ᠦᠰᠦᠷᠪᠡ
᠁ ᠠᠳᠤᠭᠤ ᠪᠠᠨ ᠣᠯᠤᠭᠠ ᠦᠭᠡᠢ ᠴᠦ᠍
ᠠᠮᠠᠷᠠᠭ ᠢ᠋ᠶ᠋ᠠᠨ ᠣᠯᠬᠤ ᠠ᠋ ᠭᠡᠵᠢ᠃
᠅᠅᠅
ᠪᠣᠷᠣ ᠲᠤᠯᠤᠭᠠᠳ ᠤ᠋ᠨ ᠰᠡᠭᠦᠳᠡᠷ ᠦᠷᠭᠡᠯᠡᠨᠡ ᠤᠤ
ᠦᠷᠭᠡᠯᠡᠬᠦ ᠳ᠋ᠡᠭᠡᠨ ᠤᠰᠤ ᠵᠡᠭᠦᠳᠦᠯᠡᠨᠡ ᠤᠤ
ᠵᠡᠭᠦᠳᠦᠨ ᠦ᠌ ᠳᠠᠯᠠᠢ ᠳ᠋ᠠᠭᠠᠨ ᠨᠣᠷᠴᠤ ᠵᠢᠷᠭᠠᠬᠤ ᠳ᠋ᠤ᠌ ᠴᠢᠨᠢ
ᠵᠡᠭᠦᠨ ᠪᠦᠷᠢᠳᠦ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠭᠣᠮᠣᠳᠠᠨᠠ ᠳᠠ
᠁ ᠰᠤᠭᠤᠳᠠᠭᠰᠠᠨ ᠪᠦᠰᠡᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠭᠦᠷ
ᠰᠠᠢᠬᠠᠨ ᠬᠡᠦᠬᠡᠨ ᠰᠢᠷᠲᠡᠪᠡ ᠳᠡ᠃
᠅᠅᠅
ᠪᠥᠰᠡᠨ ᠬᠡᠩᠭᠡᠷᠭᠡ ᠲᠦᠵᠢᠭᠢᠨᠡᠨᠡ
ᠲᠦᠵᠢᠭᠢᠨᠡᠬᠦ ᠳ᠋ᠡᠭᠡᠨ ᠬᠥᠬᠡ ᠬᠦᠳᠡᠩ ᠢ᠋ ᠳᠡᠭᠳᠡᠭᠡᠨᠡ
ᠳᠡᠭᠳᠡᠭᠰᠡᠨ ᠡᠭᠦᠯᠡᠨ ᠡᠴᠡ ᠪᠣᠷᠣᠭᠠ ᠰᠢᠪᠡᠷᠡᠬᠦᠢ
ᠳᠡᠭᠡᠳᠦ ᠲᠩᠷᠢ ᠳ᠋ᠦ᠍ ᠭᠠᠵᠠᠷ ᠡᠷᠬᠡᠯᠡᠨᠡ
᠁ ᠶᠢᠷᠲᠢᠨᠴᠦ ᠶ᠋ᠢᠨ ᠴᠢᠮᠡᠭᠡ ᠭᠡᠵᠦ ᠪᠠᠢᠳᠠᠭ ᠪᠠᠢᠬᠠ ᠠ᠋᠃
᠅᠅᠅
ᠪᠥᠪᠡᠭᠡᠯᠵᠢᠨ ᠴᠡᠴᠡᠭ ᠦ᠋ᠨ ᠣᠷᠣᠢ ᠪᠥᠭᠲᠥᠢᠵᠦ
ᠪᠥᠭᠲᠥᠢᠭᠰᠡᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠦᠨᠦᠰᠪᠡ
ᠦᠨᠦᠰᠦᠭᠦᠯᠦᠭᠰᠡᠨ ᠭᠠᠵᠠᠷ ᠤ᠋ᠨ ᠨᠢᠯᠬᠠ ᠰᠡᠷᠪᠡᠭᠡ᠃
ᠦᠨᠳᠦᠰᠦ ᠪᠡᠨ ᠢᠷᠡᠵᠦ ᠬᠤᠴᠢᠯᠭᠠ ᠪᠠᠨ ᠨᠢᠬᠡᠰᠬᠡᠪᠡ᠃
᠁ ᠬᠥᠮᠦᠨ ᠤᠶᠠᠷᠠᠬᠤ ᠵᠦᠭ ᠤᠷᠤᠭᠤ ᠪᠠᠨ ᠤᠷᠭᠤᠳᠠᠭ ᠪᠠᠢᠬᠠ᠃
᠅᠅᠅
ᠸᠩᠭᠣ᠋ ᠨᠠᠮᠠᠶ᠋ᠢ ᠳᠠᠭᠤᠳᠠᠬᠤ ᠰᠢᠭ᠋ ᠳᠠᠭᠤᠳᠠᠩᠭᠤᠲᠠ ᠪᠠᠨ
ᠥᠪᠡᠷ ᠢ᠋ᠶ᠋ᠡᠨ ᠵᠢᠭᠤᠲᠠᠬᠤ ᠰᠢᠭ᠋
ᠵᠢᠭᠤᠲᠠᠭᠰᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠡᠯᠳᠡᠯᠲᠡᠢ ᠴᠦ᠍ ᠪᠢᠰᠢ ᠳᠡ
ᠵᠠᠭᠤᠨ ᠲᠠᠩᠳᠠ ᠬᠣᠢᠴᠢ ᠦᠶᠡ ᠪᠡᠨ ᠳᠠᠭᠠᠵᠢᠩᠨᠠᠳᠠᠭ ᠬᠣᠢᠨᠠ ᠳᠠ
᠁ ᠡᠶᠸᡁᠢ᠍ᠯᠢ ᠶ᠋ᠢᠨ ᠱᠠᠪᠢ ᠨᠢ ᠪᠢ ᠭᠡᠪᠡᠯ ᠡᠨᠡ ᠬᠥᠮᠦᠰ ᠶᠠᠭᠠᠬᠢᠬᠤ ᠪᠣᠯ!
᠅᠅᠅
ᠬᠥᠩᠭᠡᠷ ᠤᠯᠠᠭᠠᠨ ᠰᠢᠪᠠᠭᠤ ᠨᠢᠰᠴᠦ
ᠨᠢᠰᠦᠩᠭᠦᠲᠡ ᠪᠡᠨ ᠭᠦᠮᠦᠳᠠ ᠴᠡᠴᠡᠭ ᠦ᠋ᠨ ᠳᠡᠭᠡᠷᠡ ᠡᠷᠭᠢᠯᠳᠦᠨᠡᠮ
ᠡᠷᠭᠢᠯᠳᠦᠨ ᠪᠣᠢ ᠭᠠᠢᠬᠠᠯᠲᠠᠶᠠ ᠣᠷᠴᠢᠨ ᠳ᠋ᠤᠨᠢ
ᠡᠷᠲᠡ ᠴᠠᠭ ᠤ᠋ᠨ ᠲᠤᠤᠯᠢᠰ ᠲᠠᠢ ᠰᠠᠳᠤᠨᠰᠠᠨᠠ
᠁ ᠶᠡᠬᠡ ᠢᠯᠭᠤᠮ ᠴᠢᠨᠠᠳᠤ ᠶᠠᠭᠤᠮᠠᠨ ᠤ᠋ ᠲᠥᠯᠥᠭᠡ ᠪᠣᠳᠣᠬᠤ ᠡᠳᠦᠷ
ᠥᠪᠡᠷ ᠲᠡᠭᠡᠨ ᠭᠠᠷᠭᠠᠮᠠᠷ ᠰᠢᠦ᠃
᠅᠅᠅
ᠳ᠋ᠠᠴᠢᠨ᠂ ᠨᠠᠴᠢᠨ᠂ ᠬᠠᠷᠴᠠᠭᠠᠢ ᠭᠤᠷᠪᠠ ᠬᠥᠭᠡᠭᠡᠴᠡᠯᠳᠦᠨᠡ
ᠬᠥᠭᠡᠭᠡᠴᠡᠯᠳᠦᠬᠦ ᠳ᠋ᠡᠭᠡᠨ ᠬᠥᠬᠡ ᠲᠩᠷᠢ ᠶ᠋ᠢ ᠭᠤᠷᠢᠶᠠᠯᠠᠨᠠ
ᠭᠤᠷᠢᠶᠠᠯᠠᠭᠰᠠᠨ ᠰᠢᠷᠭᠠᠯ ᠬᠦᠷᠢᠶᠡ ᠪᠡᠷ ᠨᠢ
ᠭᠠᠯᠪᠠ ᠴᠠᠭ ᠤ᠋ᠨ ᠲᠣᠭᠠᠯᠠᠯ ᠵᠣᠬᠢᠶᠠᠭᠳᠠᠨᠠ
᠁《 ᠳᠥᠷᠪᠡᠨ ᠴᠠᠭ》 ᠢ᠋ ᠳᠠᠭᠤᠯᠠᠵᠤ ᠰᠠᠭᠤᠭᠠᠳ ᠥᠲᠡᠯᠬᠦ ᠰᠠᠨ᠃
᠅᠅᠅
ᠳᠡᠪᠡᠷᠡᠭᠰᠡᠨ ᠰᠦᠨ ᠦ᠌ ᠬᠥᠭᠡᠰᠦ ᠲᠠᠭ ᠢ᠋ᠶ᠋ᠠᠨ ᠬᠥᠯᠥᠷᠡᠭᠡᠨᠡ
ᠬᠥᠯᠥᠷᠡᠯᠡ ᠬᠥᠯᠥᠷᠡᠯᠡ ᠭᠡᠳ ᠲᠦᠯᠡᠭᠡ ᠨᠣᠷᠭᠠᠬᠤ ᠦᠭᠡᠢ
ᠨᠣᠷᠤᠭᠠ ᠦᠭᠡᠢ ᠠᠷᠭᠠᠯ ᠬᠣᠷᠮᠣᠢᠯᠠᠭᠰᠠᠨ ᠳᠡᠪᠡᠯ ᠦ᠋ᠨ ᠮᠢᠨᠢ
ᠨᠣᠢᠲᠠᠨ ᠰᠡᠷᠪᠡᠭᠡ ᠬᠡᠵᠢᠶᠡ ᠬᠠᠲᠠᠭᠠ ᠪᠣᠯ ᠳᠠ
᠁ ᠨᠣᠴᠣᠵᠤ ᠪᠠᠢᠭᠠ ᠳ᠋ᠠᠭᠠᠨ ᠡᠷᠡᠮᠰᠢᠭᠰᠡᠨ ᠭᠠᠯ ᠪᠦᠬᠦᠨ
ᠰᠠᠭᠰᠠᠭᠤ ᠨᠣᠷᠮᠠ ᠪᠣᠯᠬᠤ ᠦᠭᠡᠢ ᠶᠦᠮ ᠰᠢᠭ ᠭᠠᠯᠵᠠᠭᠤ ᠳᠦᠷᠡᠯᠵᠡᠬᠦ ᠶ᠋ᠢ ᠨᠢ
ᠬᠠᠷᠠᠬᠤ ᠰᠠᠢᠬᠠᠨ ᠪᠠᠢᠳᠠᠭ ᠶᠤᠮ᠃
᠅᠅᠅
ᠳᠠᠯᠠᠩ ᠰᠠᠪᠢᠷᠠᠭᠰᠠᠨ ᠰᠦ
ᠰᠦ ᠲᠤᠰᠤᠭᠰᠠᠨ ᠬᠤᠪᠢᠩ
ᠬᠤᠪᠢᠩ ᠤ᠋ᠨ ᠢᠷᠣᠭᠠᠯ ᠳ᠋ᠤ᠌ ᠰᠦ ᠲᠡᠢ ᠬᠠᠷᠠᠴᠠ
ᠬᠠᠷᠠᠴᠠᠨ ᠳ᠋ᠤᠨᠢ ᠢᠰᠡᠭᠡᠢ ᠦᠨᠡᠭᠡ ᠲᠡᠢᠴᠢᠭᠢᠨᠡᠨᠡ
᠁ ᠡᠵᠢ ᠡᠴᠡ ᠪᠡᠨ ᠬᠣᠢᠰᠢ
ᠨᠤᠲᠤᠭ ᠲᠠᠭᠠᠨ ᠣᠴᠢᠬᠤ ᠠ᠋ᠴᠠ ᠯᠠ ᠵᠢᠷᠦᠬᠡᠰᠢᠶᠡᠳᠡᠭ ᠶᠦᠮ
ᠡᠨᠡᠭᠦᠬᠡᠨ ᠤᠷᠢᠳᠤ ᠬᠥᠲᠥᠯ ᠡᠴᠡ ᠭᠠᠷᠤᠭᠠᠳ ᠴᠦ᠍ ᠢᠷᠡᠬᠦ ᠶᠦᠮ ᠰᠢᠭ᠁
᠅᠅᠅
ᠳᠠᠭᠤ ᠠᠯᠲᠠᠨ ᠵᠢᠩᠭᠢᠨᠡᠭᠰᠡᠭᠡᠷ ᠯᠡ᠁
ᠬᠥᠷᠰᠢ ᠶ᠋ᠢᠨ ᠬᠣᠩᠬᠣ ᠬᠣᠩᠬᠣᠨ ᠤ᠋ ᠪᠠᠨ ᠭᠤᠶᠤᠯᠲᠠ ᠪᠠᠷ
ᠬᠠᠭᠠᠯᠭᠠ ᠣᠩᠭᠣᠢᠭᠰᠠᠨ ᠦᠭᠡᠢ
ᠣᠩᠭᠣᠢᠬᠤ ᠦᠭᠡᠢ ᠬᠠᠭᠠᠯᠭᠠᠨ ᠤ᠋ ᠬᠢᠨᠢ ᠬᠠᠲᠠᠪᠴᠢ ᠶ᠋ᠢ ᠰᠠᠬᠢᠨ
ᠣᠷᠣᠢᠲᠠᠭᠰᠠᠨ ᠬᠦᠷᠭᠡᠨ ᠨᠢ ᠭᠡᠭᠡᠨ ᠡᠴᠡ ᠢᠴᠢᠬᠦ ᠳ᠋ᠡᠭᠡᠨ ᠭᠡᠷ ᠲᠡᠭᠡᠨ ᠬᠠᠷᠢᠯᠠ
᠁ ᠨᠢᠭᠡ ᠯᠡ ᠥᠷᠯᠥᠭᠡ ᠬᠠᠨᠢ ᠳ᠋ᠠᠭᠠᠨ ᠪᠠᠢᠲᠤᠭᠠᠢ
ᠪᠤᠷᠬᠠᠨ ᠳ᠋ᠤ᠌ ᠴᠦ᠍ ᠭᠣᠯᠣᠭᠳᠠᠬᠤ ᠡᠳᠦᠷ ᠭᠠᠷᠤᠨᠠ ᠳᠠ᠃
᠅᠅᠅
ᠵᠣᠭᠰᠣᠬᠤ ᠠ᠋ᠴᠠ ᠪᠤᠰᠤ ᠶᠠᠪᠤᠵᠤ ᠦᠯᠦ ᠴᠢᠳᠠᠬᠤ
ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠡᠰᠡ ᠴᠢᠬᠤᠯᠳᠠᠬᠤ
ᠴᠢᠬᠤᠯᠳᠠᠯ ᠦᠭᠡᠢ ᠠᠮᠤᠭᠤᠯᠠᠩ ᠲᠥᠷᠬᠦ ᠨᠢ
ᠴᠢᠯᠠᠭᠤᠨ ᠬᠥᠰᠢᠶᠡᠨ ᠦ᠌ ᠰᠦᠷ ᠢ᠋ ᠨᠡᠷᠡᠯᠡᠬᠦ
᠁ ᠶᠡᠬᠡ ᠴᠢᠮᠡᠭᠡ ᠦᠭᠡᠢ ᠲᠥᠷᠬᠦ ᠠᠢᠳᠠᠰ ᠲᠥᠷᠥᠭᠦᠯᠳᠡᠭ ᠯᠡ ᠳᠡ᠃
᠅᠅᠅
ᠢᠯᠡᠭᠦᠦ ᠭᠡᠷ ᠦ᠋ᠨ ᠬᠠᠯᠲᠠᠷ ᠬᠠᠨᠠ ᠶ᠋ᠢ ᠲᠣᠮᠣ ᠬᠥᠬᠦᠦᠷ ᠳᠠᠷᠤᠨᠠ
ᠳᠠᠷᠤᠭᠳᠠᠭᠰᠠᠨ ᠬᠠᠨᠠᠨ ᠤ᠋ ᠲᠣᠯᠣᠭᠠᠢ ᠰᠢᠭᠢᠷᠡ ᠪᠡᠨ ᠲᠡᠢᠷᠦᠨᠡ
ᠲᠡᠢᠷᠦᠭᠰᠡᠨ ᠬᠥᠬᠡ ᠪᠤᠷᠭᠠᠰᠤ ᠬᠥᠮᠦᠨ ᠪᠠᠢᠭᠰᠠᠨ ᠪᠣᠯ
ᠲᠠᠮᠠᠭᠠ ᠶ᠋ᠢᠨ ᠨᠠᠢᠷ ᠳᠡᠭᠡᠷᠡ ᠭᠡᠭᠦᠦ ᠳ᠋ᠦ᠍ ᠠᠭᠰᠤᠷᠤᠨᠠ ᠳᠠ
᠁ ᠵᠢᠷᠭᠠᠯ ᠢ᠋ ᠣᠢᠷᠠᠬᠠᠨ ᠠ᠋ᠴᠠ ᠴᠤᠭᠯᠠᠭᠤᠯᠤᠭᠰᠠᠨ ᠬᠥᠮᠦᠨ
ᠠᠷᠠᠳ ᠤ᠋ᠨ ᠳᠠᠭᠤᠤ ᠶ᠋ᠢ ᠠᠮᠠᠷᠴᠢᠯᠠᠵᠤ ᠠᠶᠠᠯᠳᠠᠭ ᠪᠠᠢᠬᠠ ᠳᠠ᠃
᠅᠅᠅
ᠮᠥᠬᠥᠯ ᠦᠭᠡᠢ ᠶᠡᠬᠡ ᠳᠡᠭᠡᠳᠦ ᠲᠩᠷᠢ
ᠲᠩᠷᠢ ᠶ᠋ᠢᠨ ᠳᠣᠣᠷᠠᠬᠢ ᠲᠠᠭᠱᠠᠯ
ᠲᠠᠭᠱᠠᠨ ᠪᠦᠬᠦᠨ ᠦ᠌ ᠵᠤᠯᠠᠢ ᠶ᠋ᠢ ᠠᠷᠭᠠᠳᠠᠶᠠ
ᠳᠠᠬᠢᠨ ᠲᠥᠷᠥᠯ ᠳ᠋ᠦ᠍ ᠮᠢᠨᠢ ᠨᠠᠮᠠᠶ᠋ᠢ
ᠨᠠᠢᠷᠠᠭᠴᠢ ᠯᠠ ᠪᠢᠲᠡᠭᠡᠢ ᠪᠣᠯᠭᠠᠭᠠᠷᠠᠢ
᠁ ᠰᠢᠪᠠᠭᠤ ᠰᠠᠭᠤᠭᠰᠠᠨ ᠠᠷᠭᠠᠯ ᠢ᠋ ᠢᠯᠢᠬᠦ ᠳ᠋ᠦ᠍
ᠰᠣᠯᠢᠶᠠᠲᠠᠢ ᠬᠥᠮᠦᠨ ᠭᠡᠵᠦ ᠪᠣᠳᠣᠵᠠᠭᠠᠨᠠ ᠪᠢᠯᠡ᠂ ᠲᠡᠳᠡ᠃
᠅᠅᠅
ᠳᠣᠮᠣᠭ ᠤ᠋ᠨ ᠥᠷᠯᠥᠭᠡᠨ ᠦ᠌ ᠶᠠᠭᠠᠨ ᠰᠢᠭᠦᠳᠡᠷᠢ ᠶ᠋ᠢ
ᠬᠥᠯ ᠨᠢᠴᠦᠭᠦᠨ ᠲᠠᠭᠤᠴᠢᠵᠤ
ᠳᠣᠭᠳᠣᠯᠵᠤ ᠶᠠᠪᠤᠭᠠ ᠪᠠᠨ ᠯᠠ
ᠬᠥᠮᠦᠨ ᠦ᠌ ᠵᠢᠷᠭᠠᠯ ᠭᠡᠵᠦ ᠵᠠᠯᠪᠠᠷᠢᠶᠠ
᠁ ᠰᠠᠢᠬᠠᠨ ᠰᠢᠦ᠃
᠅᠅᠅
ᠮᠥᠰᠥᠨ ᠦ᠌ ᠴᠢᠮᠡᠭᠡ ᠮᠥᠩᠭᠥᠨ ᠱᠠᠨᠵᠠ ᠰᠢᠭ᠋
ᠮᠥᠩᠭᠥᠨ ᠱᠠᠨᠵᠠ ᠪᠠᠷ ᠨᠢ ᠬᠠᠢᠷᠠ ᠶ᠋ᠢᠨ ᠠᠶᠠᠯᠭᠤ ᠳᠠᠷᠤᠪᠠ
ᠳᠠᠷᠤᠭᠰᠠᠨ ᠠᠶᠠᠯᠭᠤ ᠨᠢ ᠬᠠᠷᠢᠨ
《ᠳᠠᠩ ᠳᠡᠪᠡᠯ ᠲᠡᠢ ᠭᠠᠷᠤᠭᠰᠠᠨ ᠯᠠ》᠁ ᠳᠠᠷᠤᠪᠠ
᠁ ᠠᠯᠤᠰ ᠶᠠᠪᠤᠬᠤ ᠳ᠋ᠤ᠌ ᠠᠷᠠᠳ ᠤ᠋ᠨ ᠳᠠᠭᠤᠤ ᠯᠠ
ᠠᠮᠠᠨ ᠳ᠋ᠤ᠌ ᠬᠦᠯᠬᠦᠭᠳᠡᠬᠦ ᠶᠦᠮ ᠳᠡ᠃
᠅᠅᠅
ᠮᠢᠨᠦ ᠡᠮᠦᠨᠡᠭᠦᠷ ᠰᠠᠯᠬᠢ ᠬᠥᠭᠡᠷᠦᠨᠡ
ᠬᠥᠭᠡᠷᠦᠭᠰᠡᠨ ᠠᠭᠠᠰᠢᠨ ᠳ᠋ᠤᠨᠢ ᠬᠠᠮᠬᠤᠤᠯ ᠭᠡᠯᠮᠡᠭᠳᠡᠨᠡ
ᠭᠡᠯᠮᠡᠭᠳᠡᠭᠰᠡᠨ ᠬᠠᠮᠬᠤᠤᠯ ᠳ᠋ᠤ᠌ ᠬᠥᠰᠢᠶᠡ ᠪᠤᠰᠬᠠᠬᠤᠢ
ᠬᠡᠭᠡᠷᠡ ᠶ᠋ᠢᠨ ᠰᠠᠯᠬᠢ ᠨᠠᠷᠠᠨ ᠳ᠋ᠤ᠌ ᠴᠠᠭᠠᠵᠠᠯᠠᠭᠤᠯᠤᠨᠠ
᠁《 ᠬᠥᠮᠦᠨ ᠮᠡᠳᠡᠬᠦ ᠦᠭᠡᠢ ᠶᠠᠭᠤᠮᠠᠨ ᠤ᠋ ᠪᠠᠨ ᠳᠠᠢᠰᠤᠨ》 ᠭᠡᠰᠡᠨ
ᠳ᠂ ᠨᠠᠮᠳᠠᠭ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠦᠷᠭᠦᠯᠵᠢ ᠪᠣᠳᠣᠵᠤ ᠶᠠᠪᠤᠳᠠᠭ ᠶᠤᠮ ᠠ᠋᠂ ᠪᠢ᠃
᠅᠅᠅
ᠬᠥᠭᠡᠷᠬᠦ ᠴᠦ᠍ ᠭᠡᠵᠦ ᠳᠡ᠂ ᠥᠲᠥᠯᠡᠴᠢᠬᠡᠵᠡᠢ
ᠥᠲᠥᠯᠡᠭᠰᠡᠨ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠪᠠᠷ
ᠦᠷᠭᠡᠯᠡᠨ ᠰᠡᠷᠡᠬᠦ ᠳ᠋ᠡᠭᠡᠨ ᠥᠪᠡᠷ ᠡᠴᠡ ᠪᠡᠨ ᠠᠶᠤᠨᠠ
᠁ ᠴᠠᠭ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠣᠷᠢᠶᠠᠯᠭᠠᠭᠤᠯᠬᠤ ᠠ᠋ᠴᠠ
ᠵᠠᠷᠢᠮ ᠳ᠋ᠠᠭᠠᠨ ᠶᠡᠬᠡ ᠬᠠᠯᠭᠠᠬᠤ ᠶᠤᠮ᠃
᠅᠅᠅
ᠨᠠᠢᠷ ᠨᠠᠢᠷ ᠤ᠋ᠨ ᠥᠨᠳᠥᠷ ᠲᠦ᠍ ᠡᠪᠦᠭᠡᠨ ᠰᠢᠪᠠᠭᠤ
ᠡᠪᠦᠭᠡᠨ ᠰᠢᠪᠠᠭᠤ ᠶ᠋ᠢ ᠰᠣᠨᠣᠰᠬᠤ ᠲᠩᠷᠢ ᠬᠠᠷᠠᠭᠤᠯᠳᠠᠨᠠ
ᠬᠠᠷᠠᠭᠤᠯᠳᠠᠭᠰᠠᠨ ᠲᠩᠷᠢ ᠶ᠋ᠢᠨ ᠴᠢᠨᠠᠳᠤ ᠠ᠋ᠴᠠ
ᠬᠠᠵᠠᠭᠠᠷ ᠤ᠋ᠨ ᠲᠣᠨᠣᠭ ᠰᠢᠭ᠋ ᠳᠣᠯᠣᠭᠠᠨ ᠪᠤᠷᠬᠠᠨ ᠱᠠᠷᠬᠢᠨᠠ
᠁ ᠵᠢᠷᠭᠠᠯᠲᠠᠢ ᠨᠠᠢᠷ ᠢ᠋ ᠬᠣᠯᠠ ᠠ᠋ᠴᠠ ᠰᠣᠨᠣᠰᠴᠤ᠂
ᠬᠠᠴᠠᠷ ᠨᠢ ᠤᠯᠠᠢᠭᠰᠠᠨ ᠬᠡᠦᠬᠡᠨ ᠨᠦ᠍ᠭᠦᠳ
ᠳᠡᠰ ᠳᠡᠰ ᠬᠥᠬᠥᠷᠡᠬᠦ ᠶ᠋ᠢ ᠴᠢᠩᠨᠠᠵᠤ ᠰᠠᠭᠤᠬᠤ ᠳ᠋ᠤ᠌
ᠣᠳᠣ᠂ ᠴᠠᠬᠢᠭᠤᠷ ᠬᠣᠶᠠᠷ ᠢ᠋ ᠠᠳᠠᠯᠢᠬᠠᠨ ᠪᠣᠳᠣᠳᠠᠭ ᠶᠤᠮ᠃
᠅᠅᠅
ᠨᠣᠭᠣᠭᠠᠨ ᠤ᠋ ᠶᠡᠬᠡ ᠤᠨᠢᠶᠠᠷ ᠲᠤ
ᠨᠢᠯᠬᠠ ᠤᠨᠠᠭᠠ ᠰᠣᠭᠲᠣᠭᠤ
ᠰᠣᠭᠲᠣᠭᠤ ᠤᠨᠠᠭᠠᠨ ᠤ᠋ ᠲᠤᠭᠤᠷᠠᠢ ᠳ᠋ᠤ᠌
ᠬᠥᠬᠡ ᠪᠢᠯᠡᠭᠦᠦ ᠭᠠᠯᠵᠠᠭᠤ
ᠭᠠᠯᠵᠠᠭᠤ ᠪᠢᠯᠡᠭᠦᠦ ᠶ᠋ᠢᠨ ᠣᠴᠢᠨ ᠳ᠋ᠤ᠌
ᠭᠠᠳᠠᠭᠠ ᠳᠡᠯᠭᠡᠷ ᠵᠤᠨ ᠨᠣᠴᠣᠨᠠ
᠁ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠶᠠᠭᠠ ᠪᠠᠷ
ᠰᠠᠯᠬᠢ ᠳᠣᠭᠣᠭᠢᠯᠠᠵᠤ ᠵᠢᠷᠭᠠᠳᠠᠭ ᠰᠠᠨ
ᠡᠵᠢ ᠲᠡᠢ ᠪᠡᠨ ᠪᠠᠢᠬᠤ ᠳ᠋ᠤ᠌
ᠨᠠᠷᠠ ᠰᠠᠯᠬᠢ ᠪᠠᠷ ᠳᠠᠭᠠᠵᠢᠩᠨᠠᠳᠠᠭ ᠪᠠᠢᠵᠠᠢ᠃
᠅᠅᠅
ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠪᠣᠷᠣᠭᠠᠨ ᠳ᠋ᠤ᠌
ᠨᠠᠪᠴᠢ ᠤᠢᠳᠤᠨᠠ ᠤᠢᠳᠬᠤ ᠳ᠋ᠠᠭᠠᠨ
ᠤᠳᠠ ᠶ᠋ᠢᠨ ᠮᠥᠴᠢᠷ ᠢ᠋ᠶ᠋ᠡᠨ ᠳᠠᠷᠤᠨᠠ
ᠳᠠᠷᠤᠯᠠ ᠳᠠᠷᠤᠯᠠ ᠭᠡᠳ ᠭᠤᠳᠤᠢᠬᠤ ᠨᠢ ᠴᠦ᠍ ᠶᠠᠭᠤ ᠪᠣᠢ ᠳᠠ
ᠳᠠᠷᠠᠭᠠ ᠬᠠᠪᠤᠷ ᠢ᠋ ᠦᠵᠡᠬᠦ ᠦᠭᠡᠢ ᠳ᠋ᠡᠭᠡᠨ ᠯᠡ ᠭᠤᠨᠳᠠᠨᠠ
᠁ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠥᠲᠡᠯᠵᠦ ᠪᠠᠢᠨᠠ ᠳᠠ ᠭᠡᠳᠡᠭ ᠢ᠋ᠶ᠋ᠡᠨ
ᠨᠠᠮᠤᠷ ᠯᠠ ᠶᠡᠬᠡ ᠮᠡᠳᠡᠷᠡᠳᠡᠭ ᠪᠣᠯᠤᠯᠲᠠᠢ᠃
᠅᠅᠅
ᠰᠠᠷᠠ ᠲᠠᠢ ᠰᠥᠨᠢ ᠴᠢᠮᠠ ᠲᠠᠢ ᠪᠠᠨ
ᠴᠢᠩᠭᠡᠯᠢᠭ ᠳᠡᠭᠡᠷᠡ ᠤᠨᠲᠠᠬᠤ ᠰᠠᠨ
ᠤᠨᠲᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋
ᠴᠢᠮᠡᠭᠡ ᠦᠭᠡᠢᠬᠡᠨ ᠳᠤᠭᠵᠢᠷᠠᠬᠤ ᠰᠠᠨ
ᠳᠤᠭᠵᠢᠷᠠᠬᠤ ᠠᠮᠢᠰᠬᠤᠭᠠ ᠶ᠋ᠢ ᠴᠢᠨᠢ ᠠᠷᠭᠠᠳᠠᠨ ᠠᠮᠢᠰᠬᠤᠯᠯᠠᠭᠰᠠᠨ ᠢ᠋ᠶ᠋ᠠᠨ
ᠳᠠᠭᠤ ᠦᠭᠡᠢᠬᠡᠨ ᠡᠷᠭᠢᠭᠡᠳ ᠬᠠᠷᠠᠭᠠᠳ ᠭᠡᠵᠢᠭᠡ ᠶ᠋ᠢ ᠴᠢᠨᠢ ᠵᠠᠳᠠᠯᠬᠤ ᠰᠠᠨ
᠁ ᠪᠢ ᠥᠪᠡᠷ ᠡᠴᠡ ᠪᠡᠨ ᠣᠭᠲᠣ ᠢᠴᠢᠳᠡᠭ ᠦᠭᠡᠢ᠂
ᠬᠠᠷᠢᠨ ᠮᠥᠷᠥᠭᠡᠳᠦᠯ ᠡᠴᠡ ᠪᠡᠨ ᠯᠡ ᠢᠴᠢᠳᠡᠭ᠃
᠅᠅᠅
ᠣᠷᠣᠢ ᠤᠷᠤᠭᠰᠠ ᠪᠣᠷᠣᠭᠠᠨ ᠳ᠋ᠤ᠌ ᠲᠤᠭᠤᠷᠭᠠ ᠬᠦᠨᠳᠦᠷᠡᠨᠡ
ᠬᠦᠨᠳᠦᠷᠡᠭᠰᠡᠨ ᠲᠤᠭᠤᠷᠭᠠᠨ ᠤ᠋ ᠳᠤᠰᠤᠯ ᠰᠢᠯᠪᠢᠭᠦᠷ ᠦ᠋ᠨ ᠬᠤᠢᠪᠢ ᠨᠣᠷᠭᠠᠨᠠ
ᠨᠣᠷᠤᠭᠰᠠᠨ ᠬᠤᠢᠪᠢ ᠲᠠᠢ ᠰᠢᠯᠪᠢᠭᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠰᠢᠭᠡ ᠰᠢᠪᠬᠠᠭᠤᠷᠳᠠᠬᠤᠢ
ᠨᠢᠷᠤᠭᠤᠨ ᠳ᠋ᠤ᠌ ᠮᠢᠨᠢ ᠭᠤᠷᠪᠢ ᠰᠠᠭᠤᠬᠤ ᠮᠡᠲᠦ ᠬᠣᠳᠤᠰᠬᠢᠨᠡ
᠁ ᠵᠠᠯᠬᠠᠭᠤᠷᠠᠬᠤ ᠳ᠋ᠠᠭᠠᠨ ᠰᠠᠯᠬᠢᠳᠠᠭᠰᠠᠨ ᠮᠠᠯ ᠤ᠋ᠨ ᠦᠵᠦᠭᠦᠷ ᠢ᠋
ᠴᠢᠯᠠᠭᠤ ᠪᠠᠷ ᠡᠷᠭᠢᠭᠦᠯᠵᠦ᠂
ᠪᠢᠲᠡᠭᠦᠦ ᠬᠥᠬᠡ ᠴᠢᠯᠠᠭᠤ ᠤᠬᠤᠨᠠ ᠶ᠋ᠢᠨ ᠡᠪᠡᠷ ᠲᠦ᠍ ᠲᠠᠷ ᠬᠢᠬᠦ ᠳ᠋ᠦ᠍
ᠦᠬᠦᠲᠡᠯᠡ ᠪᠡᠨ ᠢᠨᠢᠶᠡᠳᠡᠭ ᠰᠠᠨ᠂ ᠲᠡᠨᠡᠭ ᠴᠦ᠍ ᠪᠠᠢᠵᠠᠢ ᠳᠠ᠃
᠅᠅᠅
ᠥᠷᠯᠥᠭᠡᠨ ᠦ᠌ ᠰᠤᠷᠠᠭ ᠢ᠋ᠶ᠋ᠠᠷ ᠵᠡᠭᠦᠳᠦ ᠴᠣᠭᠤᠯᠤᠭᠳᠠᠪᠠ
ᠴᠤᠭᠤᠯᠤᠭᠰᠠᠨ ᠵᠡᠭᠦᠳᠦ ᠪᠡᠨ ᠴᠤᠭᠯᠠᠭᠤᠯᠵᠤ ᠠᠳᠬᠤᠬᠤᠢ
ᠠᠳᠬᠤᠭᠰᠠᠨ ᠬᠠᠯᠠᠭᠤᠨ ᠪᠣᠳᠣᠯ ᠤ᠋ᠨ ᠴᠠᠷᠪᠠᠭᠤ ᠪᠠᠷ
ᠠᠯᠢ ᠬᠡᠳᠦᠢᠨ ᠥᠪᠡᠷ ᠢ᠋ᠶ᠋ᠡᠨ ᠰᠠᠪᠢᠷᠠᠵᠠᠢ
᠁ ᠬᠡᠢ ᠬᠣᠭᠣᠰᠣᠨ᠂ ᠪᠣᠳᠢ ᠴᠢᠨᠠᠷ ᠪᠣᠯᠬᠤ ᠡᠳᠦᠷ ᠭᠠᠷᠤᠨᠠ ᠰᠢᠦ᠃
᠅᠅᠅
ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠲᠡᠢ ᠪᠡᠨ ᠬᠤᠨᠳᠠᠭᠠ ᠲᠤᠯᠭᠠᠪᠠ
ᠲᠤᠯᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠡᠭᠡᠨ ᠢᠷᠦᠭᠡᠯ ᠡᠷᠢᠪᠡ
ᠡᠷᠢᠵᠦ ᠣᠯᠤᠭᠰᠠᠨ ᠢᠷᠦᠭᠡᠯ ᠮᠢᠨᠢ
《ᠡᠭᠦᠨ ᠡᠴᠡ ᠬᠣᠢᠰᠢ ᠤᠤᠭᠤᠬᠤ ᠦᠭᠡᠢ ᠰᠢᠦ》
᠁ ᠬᠥᠮᠦᠨ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠲᠡᠭᠡᠨ ᠪᠣᠯ
ᠶᠡᠬᠡ ᠭᠡᠮᠰᠢᠩᠭᠦᠢ ᠠᠮᠢᠲᠠᠨ ᠰᠢᠦ᠃
᠅᠅᠅
ᠥᠪᠡᠷ ᠢ᠋ ᠪᠡᠨ ᠯᠡ ᠥᠮᠥᠭᠡᠷᠡᠵᠦ ᠤᠬᠢᠯᠠᠪᠠ ᠤᠤ ᠳᠠ᠂
ᠪᠢ ᠤᠬᠢᠯᠠᠯᠠ ᠭᠡᠳ ᠲᠠᠢᠳᠬᠤᠷᠠᠬᠤ ᠮᠢᠨᠢ ᠳᠠᠩᠴᠤ ᠬᠣᠯᠠ
ᠬᠣᠯᠠ ᠶ᠋ᠢᠨ ᠬᠣᠯᠠ ᠴᠦ᠍ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ
ᠬᠣᠶᠠᠷᠬᠠᠨ ᠦᠭᠡ ᠯᠡ ᠬᠦᠯᠢᠶᠡᠵᠦ ᠪᠠᠢᠬᠤ ᠦᠭᠡᠢ ᠤᠤ
᠁ ᠶᠡᠬᠡ ᠬᠠᠢᠷᠠᠲᠠᠢ ᠬᠥᠮᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠷᠭᠠᠳᠠᠭᠤᠯᠬᠤ ᠭᠡᠬᠦ ᠳ᠋ᠡᠭᠡᠨ
ᠦᠬᠦᠯ ᠢ᠋ ᠬᠦᠷᠲᠡᠯᠡ ᠵᠣᠬᠢᠶᠠᠵᠤ ᠳᠦᠪᠴᠢᠬᠢᠨᠡᠯᠡ᠃
ᠦᠨᠡᠬᠡᠷ ᠠᠷᠭᠠᠳᠠᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠬᠤ ᠪᠠᠢᠭᠰᠠᠨ ᠪᠣᠯ ᠠ᠋᠃
᠅᠅᠅
ᠦᠢᠯᠡ ᠶ᠋ᠢᠨ ᠦᠷᠡ ᠥᠪᠡᠷ ᠲᠡᠭᠡᠨ ᠢᠴᠢᠨᠡ
ᠢᠴᠢᠭᠰᠡᠨ ᠨᠢᠭᠤᠷ ᠢ᠋ᠶ᠋ᠠᠨ ᠦᠨᠡᠨ ᠢ᠋ᠶ᠋ᠡᠷ ᠳᠠᠯᠳᠠᠯᠠᠨᠠ
ᠳᠠᠯᠳᠠᠯᠠᠭᠰᠠᠨ ᠦᠨᠡᠨ ᠦ᠌ ᠴᠠᠭᠠᠨᠠ ᠠ᠋ᠴᠠ ᠴᠦ᠍
ᠳᠠᠬᠢᠭᠠᠳ ᠯᠠ ᠥᠪᠡᠷ ᠢ᠋ᠶ᠋ᠡᠨ ᠭᠡᠷᠡᠯᠲᠦᠨᠡ
᠁ ᠡᠬᠡᠨᠡᠷ ᠲᠡᠢ ᠪᠡᠨ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠪᠠᠢᠬᠤ ᠳ᠋ᠠᠭᠠᠨ
ᠥᠭᠡᠷᠡ ᠪᠦᠰᠡᠭᠦᠢ ᠪᠣᠳᠣᠪᠠ ᠳᠠ᠃
᠅᠅᠅
ᠦᠢ ᠣᠯᠠᠨ ᠰᠢᠪᠠᠭᠤᠳ ᠱᠤᠯᠤᠭᠠᠨᠠᠯᠳᠤᠨᠠ
ᠱᠤᠯᠤᠭᠠᠨᠠᠬᠤ ᠨᠢ ᠲᠩᠷᠢ ᠶ᠋ᠢᠨ ᠬᠡᠯᠡᠨ ᠦ᠌ ᠱᠠᠭᠰᠢᠷᠠᠭᠠ
ᠱᠠᠭᠰᠢᠷᠠᠬᠤ ᠴᠢᠮᠡᠭᠡᠨ ᠳ᠋ᠦ᠍ᠨᠢ ᠨᠠᠭᠤᠷ ᠴᠢᠯᠡᠵᠦ
ᠱᠠᠯᠳᠠᠩ ᠬᠡᠦᠬᠡᠨ ᠮᠠᠨᠳᠠᠯ ᠳ᠋ᠤᠨᠢ ᠤᠮᠪᠠᠬᠤ ᠶ᠋ᠢ ᠬᠦᠯᠢᠶᠡᠨᠡ
᠁ ᠵᠢᠷᠭᠠᠯ ᠢ᠋ᠶ᠋ᠠᠨ ᠠᠷᠠᠢ ᠴᠢᠨᠠᠳᠤ ᠠ᠋ᠴᠠ ᠡᠷᠢᠮᠡᠷ᠃
᠅᠅᠅
ᠦᠦᠷ ᠴᠦᠤᠷ ᠢ᠋ᠶ᠋ᠠᠷ ᠥᠬᠢᠨ ᠮᠢᠨᠢ ᠢᠷᠠᠭᠯᠯᠠ
ᠢᠷᠠᠭᠯᠠᠬᠤ ᠨᠢ ᠴᠦ᠍ ᠶᠠᠭᠤ ᠪᠠᠢᠬᠤ ᠪᠣᠢ᠂ ᠬᠠᠷᠠ ᠳᠠᠷᠤᠯᠠ
ᠬᠠᠷᠠ ᠳᠠᠷᠤᠬᠤ ᠳ᠋ᠤᠨᠢ ᠬᠠᠵᠠᠭᠠᠷ ᠤ᠋ᠨ ᠠᠮᠠᠭᠠᠢ ᠦᠨᠦᠷᠯᠡᠭᠦᠯᠦᠯᠡ
ᠬᠠᠮᠢᠭᠠ ᠶᠠᠪᠤᠭᠠ ᠶᠤᠮ ᠪᠣᠯ᠂ ᠮᠢᠨᠦ ᠠᠪᠤ ᠶ᠋ᠢᠨ ᠠᠳᠤᠭᠤ
᠁ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠦᠰᠡ ᠶ᠋ᠢ ᠳᠡᠷᠡᠯᠡᠵᠦ᠂
ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠪᠦᠷ ᠲᠦ᠍ ᠡᠷᠬᠡᠯᠡᠬᠦ ᠳ᠋ᠡᠭᠡᠨ
ᠪᠢ ᠮᠠᠩᠭᠤᠰ ᠢ᠋ ᠬᠦᠯᠢᠶᠡᠳᠡᠭ ᠰᠠᠨ᠃
᠅᠅᠅
ᠲᠡᠪᠴᠢᠵᠦ ᠴᠢᠳᠠᠭᠠ ᠦᠭᠡᠢ ᠳ᠋ᠡᠭᠡᠨ ᠯᠡ ᠪᠢ ᠲᠡᠨᠡᠭ
ᠲᠡᠨᠡᠭᠯᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠭᠡᠳ ᠥᠪᠡᠷ ᠲᠡᠭᠡᠨ ᠡᠯᠡᠭᠰᠡᠨ
ᠡᠯᠡᠵᠦ ᠶᠠᠪᠤᠭᠠ ᠪᠠᠨ ᠮᠡᠳᠡᠳᠡᠭ ᠰᠠᠨ ᠪᠣᠯ
ᠢᠩᠭᠢᠵᠦ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠠᠮᠠᠷᠬᠠᠨ
ᠥᠲᠡᠯᠬᠦ ᠴᠦ᠍ ᠪᠠᠢᠭᠰᠠᠨ ᠤᠤ ᠳᠠ᠂ ᠮᠡᠳᠡᠬᠦ ᠦᠭᠡᠢ ᠶᠦᠮ
᠁ ᠥᠪᠡᠷ ᠢ᠋ ᠪᠡᠨ ᠦᠷᠦ ᠡᠪᠡᠳᠦᠭᠡᠳ ᠤᠬᠢᠯᠠᠵᠤ ᠪᠠᠢᠭᠠ ᠬᠥᠮᠦᠨ ᠢ᠋
ᠠᠷᠭᠠᠳᠠᠬᠤ ᠦᠭᠡ ᠣᠯᠳᠠᠳᠠᠭ ᠦᠭᠡᠢ ᠶᠦᠮ᠃
᠅᠅᠅
ᠲᠡᠷᠡ ᠭᠦᠦᠷ ᠥᠭᠡᠳᠡ ᠯᠡ ᠨᠠᠮᠠᠶ᠋ᠢ ᠪᠢᠲᠡᠭᠡᠢ ᠬᠦᠷᠭᠡᠭᠡᠷᠡᠢ
ᠬᠦᠷᠭᠡᠵᠦ ᠪᠠᠢᠭᠠ ᠴᠢᠨᠢ ᠰᠡᠭᠦᠯᠴᠢ ᠶ᠋ᠢᠨ ᠦᠳᠡᠯᠲᠡ ᠰᠢᠭ
ᠠᠢᠳᠠᠰ ᠢ᠋ ᠰᠤᠪᠢᠩ ᠳᠠᠭᠠᠳᠠᠭ ᠨᠢ ᠦᠨᠡᠨ ᠪᠣᠯ
ᠠᠮᠢᠳᠤᠷᠠᠬᠤ ᠪᠠᠨ ᠦᠬᠦᠬᠦ ᠲᠡᠢ ᠰᠠᠴᠠᠭᠤᠯᠠᠵᠤ ᠪᠣᠳᠣᠬᠤ ᠮᠢᠨᠦ ᠠᠭᠠᠰᠢ ᠶ᠋ᠢ ᠠᠭᠤᠴᠢᠯᠠᠭᠠᠴᠢ ᠳᠠ
᠁ ᠬᠠᠷᠠ ᠳᠠᠷᠤᠭᠰᠠᠨ ᠳᠣᠯᠣᠭᠠ ᠬᠣᠨᠣᠭ ᠮᠠᠷᠲᠠᠭᠳᠠᠳᠠᠭ ᠦᠭᠡᠢ ᠬᠢᠷᠢᠨᠡ
ᠵᠢᠷᠭᠠᠯ ᠲᠠᠢ ᠵᠡᠭᠦᠳᠦ ᠪᠡᠨ ᠰᠥᠨᠢ ᠪᠣᠯᠭᠠᠨ ᠮᠠᠨᠠᠭᠠᠳ ᠴᠦ᠍ ᠢᠷᠡᠬᠦ ᠦᠭᠡᠢ ᠶᠦᠮ ᠳᠡ᠃
᠅᠅᠅
ᠲᠡᠨᠡᠭ ᠶᠦᠮ ᠰᠢᠭ ᠶᠠᠪᠤᠬᠤ ᠰᠠᠢᠬᠠᠨ
ᠰᠠᠢᠬᠠᠨ ᠴᠦ᠍ ᠭᠡᠵᠦ ᠳᠡ᠂ ᠠᠮᠤᠭᠤᠯᠠᠩ
ᠠᠮᠤᠭᠤᠯᠠᠩ ᠰᠠᠨᠠᠭᠠᠨ ᠳ᠋ᠠᠭᠠᠨ ᠬᠠᠭᠤᠷᠲᠠᠵᠤ ᠶᠠᠪᠤᠲᠠᠯᠠ
ᠠᠯᠢ ᠬᠡᠳᠦᠢᠨ ᠵᠢᠷᠠᠨ ᠨᠠᠮᠤᠷ ᠥᠩᠭᠡᠷᠡᠴᠢᠬᠡᠵᠡᠢ
᠁ ᠬᠠᠷᠠᠭᠤᠰᠬᠤ ᠳ᠋ᠤ᠌ ᠣᠷᠣᠢᠲᠠᠬᠤ ᠨᠢ
ᠦᠬᠦᠬᠦ ᠡᠴᠡ ᠴᠦ᠍ ᠳᠣᠣᠷᠠ ᠶᠤᠮ ᠤᠤ ᠳᠠ᠃
᠅᠅᠅
ᠲᠠᠷᠨᠢ ᠲᠠᠢ ᠰᠠᠯᠬᠢ ᠪᠠᠷ ᠰᠦᠮᠡ ᠪᠣᠰᠬᠤᠢ
ᠪᠣᠰᠬᠠᠭᠰᠠᠨ ᠰᠦᠮᠡ ᠳ᠋ᠦ᠍ ᠰᠢᠪᠠᠭᠤ ᠲᠣᠩᠭᠣᠯᠵᠠᠨᠠ
ᠲᠣᠩᠭᠣᠯᠵᠠᠨ ᠲᠣᠩᠭᠣᠯᠵᠠᠨ ᠭᠤᠶᠤᠬᠤ ᠪᠤᠶᠠᠨ ᠨᠢ
ᠲᠣᠭᠠᠲᠠᠢ ᠬᠡᠳᠦᠬᠡᠨ ᠪᠤᠳᠠᠭᠠ ᠯᠠ ᠳᠠ
᠁ ᠦᠨᠡᠨ ᠳ᠋ᠡᠭᠡᠨ ᠬᠥᠮᠦᠨ ᠶᠡᠬᠡ ᠬᠣᠯᠠ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ
ᠪᠤᠷᠬᠠᠨ ᠠ᠋ᠴᠠ ᠭᠣᠶᠣᠳᠠᠭ ᠤᠤ᠂ ᠦᠭᠡᠢ ᠴᠦ᠍ ᠤᠤ?
᠅᠅᠅
ᠬᠠᠨᠢ ᠳ᠋ᠠᠭᠠᠨ ᠴᠦ᠍ ᠶᠠᠷᠢᠭᠠ ᠦᠭᠡᠢ ᠦᠨᠡᠨ ᠢ᠋ᠶ᠋ᠡᠨ ᠴᠢᠮᠠ ᠳ᠋ᠤ᠌ ᠬᠡᠯᠡᠭᠰᠡᠨ
ᠬᠡᠯᠡᠭᠰᠡᠨ ᠦᠨᠡᠨ ᠢ᠋ᠶ᠋ᠡᠷ ᠮᠢᠨᠢ ᠴᠢ ᠨᠠᠮᠠᠶ᠋ᠢ ᠴᠢᠳᠥᠷᠯᠡᠭᠰᠡᠨ
ᠴᠢᠳᠥᠷ ᠲᠡᠢ ᠰᠠᠳᠠᠭᠠ ᠳ᠋ᠤ᠌ ᠴᠢᠨᠢ ᠰᠡᠳᠬᠢᠯ ᠳᠣᠭᠣᠨᠴᠠᠬᠤ ᠳ᠋ᠠᠭᠠᠨ
ᠴᠢᠳᠬᠥᠷ ᠲᠦ᠍ ᠢᠲᠡᠭᠡᠭᠰᠡᠨ ᠥᠪᠡᠷ ᠢ᠋ ᠪᠡᠨ ᠵᠢᠮᠡᠯᠡᠭᠰᠡᠨ
᠁ ᠬᠠᠨᠢ ᠪᠠᠨ ᠮᠠᠭᠤᠯᠠᠵᠤ ᠬᠡᠦᠬᠡᠨ ᠲᠡᠢ ᠲᠠᠨᠢᠯᠴᠠᠬᠤ ᠰᠢᠭ᠋
ᠰᠢᠪᠰᠢᠭ ᠪᠠᠢᠬᠤ ᠦᠭᠡᠢ᠃
᠅᠅᠅
《᠁ ᠬᠥᠯᠴᠥᠭᠦᠦ ᠪᠠᠶᠠᠨ ᠤ᠋ ᠭᠡᠭᠡᠭᠰᠡᠨ ᠲᠦᠷᠡᠢᠪᠴᠢ ᠣᠯᠬᠤ ᠰᠠᠨ
ᠣᠯᠤᠭᠰᠠᠨ ᠲᠦᠷᠡᠢᠪᠴᠢᠨ ᠳ᠋ᠦ᠍ᠨᠢ ᠮᠥᠩᠭᠥ ᠯᠡ ᠪᠠᠢᠭᠠᠰᠠᠢ
ᠪᠠᠢᠭᠠ ᠮᠥᠩᠭᠥ ᠪᠡᠷ ᠨᠢ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠠ ᠶ᠋ᠢ ᠵᠠᠢᠯᠵᠤ
ᠪᠠᠷᠢᠭᠳᠠᠭᠠᠳ ᠶᠠᠪᠤᠬᠤ ᠳ᠋ᠠᠭᠠᠨ
ᠰᠠᠨᠠᠭᠠ ᠴᠠᠩᠭᠠᠬᠤ ᠦᠭᠡᠢ ᠠᠯᠬᠤᠬᠤ ᠰᠠᠨ》 ᠭᠡᠵᠦ ᠶᠠᠳᠠᠷᠠᠬᠤ ᠶᠤᠮ ᠳᠠ
᠁ ᠨᠠᠮᠠᠶ᠋ᠢ ᠠᠷᠪᠠᠳᠤᠭᠠᠷ ᠠᠩᠭᠢ ᠳ᠋ᠤ᠌ ᠣᠷᠣᠬᠤ ᠵᠢᠯ
ᠠᠪᠤ ᠮᠢᠨᠢ ᠮᠠᠨᠠᠭᠠ ᠪᠠᠨ ᠳᠤᠯᠠᠭᠠ ᠪᠣᠯᠭᠠᠵᠤ ᠪᠢᠯᠡ᠂
ᠶᠡᠬᠡ ᠯᠡ ᠶᠠᠳᠠᠷᠠᠭᠰᠠᠨ ᠪᠠᠢᠬᠠ ᠳᠠ᠃
᠅᠅᠅
ᠬᠥᠥᠭ ᠬᠥᠥᠭ ᠠᠴᠢᠶᠠ ᠪᠠᠨ ᠬᠥᠳᠡᠯᠭᠡ
ᠬᠥᠳᠡᠯᠦᠭᠰᠡᠨ ᠬᠥᠰᠬᠡ ᠪᠡᠨ ᠵᠤᠭᠤᠤᠬᠠᠨ ᠠᠯᠬᠤᠭᠤᠯ
ᠠᠯᠬᠤᠭᠠᠨ ᠳᠤᠮᠳᠠ ᠴᠢᠨᠢ ᠨᠡᠭᠦᠳᠡᠯ ᠢᠪᠢᠯᠵᠦ
ᠠᠴᠢᠶᠠᠨ ᠳᠡᠭᠡᠷᠡᠬᠢ ᠲᠣᠭᠣᠨᠣ ᠲᠣᠷᠣᠯᠵᠠᠳᠠᠭ ᠶᠤᠮ ᠠ᠋
᠁ ᠠᠪᠤ ᠠ᠋ᠴᠠ ᠪᠠᠨ ᠠᠳᠬᠤ ᠠᠳᠬᠤ ᠠᠭᠠᠷᠤᠤᠯ ᠢ᠋ᠶ᠋ᠠᠷ ᠱᠠᠩᠨᠠᠭᠤᠯᠤᠨ ᠪᠠᠢᠵᠤ ᠰᠠᠶᠢ ᠯᠠ
ᠨᠢᠭᠡ ᠬᠥᠰᠬᠡ ᠬᠥᠲᠥᠯᠵᠦ ᠪᠢᠯᠡ᠂ ᠰᠠᠢᠬᠠᠨ ᠰᠢᠦ᠃
᠅᠅᠅
ᠬᠤᠤᠱᠤᠤᠷ ᠤ᠋ᠨ ᠴᠠᠭᠠᠰᠤ ᠬᠡᠢᠰᠦᠨ ᠨᠠᠭᠠᠳᠤᠮ ᠲᠠᠷᠠᠨᠠ
ᠨᠠᠭᠠᠳᠤᠮ ᠲᠠᠷᠬᠠᠤ ᠳ᠋ᠤ᠌ ᠠᠰᠠᠷ ᠭᠤᠨᠳᠠᠨᠠ
ᠭᠤᠨᠳᠠᠭᠰᠠᠨ ᠠᠰᠠᠷ ᠢ᠋ᠶ᠋ᠠᠨ ᠪᠠᠭᠤᠯᠭᠠᠭᠰᠠᠨ ᠰᠤᠮᠤ ᠶ᠋ᠢᠨ ᠵᠠᠬᠢᠷᠭᠠᠨ ᠤ᠋ ᠬᠢᠨ
ᠭᠤᠷᠪᠠᠬᠠᠨ ᠬᠣᠨᠣᠭᠠᠳ ᠯᠠ ᠥᠨᠳᠥᠷ ᠤᠷᠭᠤᠭᠰᠠᠨ ᠡᠪᠡᠰᠦᠨ ᠳ᠋ᠦ᠍ ᠠᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠨᠠ ᠳᠠ᠃
᠁ ᠰᠠᠢᠬᠠᠨ ᠳᠠᠭᠤᠤ ᠶ᠋ᠢᠨ ᠳᠡᠷᠭᠡᠳᠡ ᠤᠳᠠᠭᠠᠨ ᠰᠠᠭᠤᠭᠰᠠᠨ ᠠ᠋ᠴᠠ
ᠬᠣᠯᠠᠬᠠᠨ ᠣᠴᠢᠭᠠᠳ ᠠᠶᠠᠯᠬᠤ ᠨᠢ ᠵᠢᠷᠭᠠᠯ ᠳᠠ᠃
᠅᠅᠅
ᠬᠠᠷᠠ ᠴᠢᠭᠢᠭ ᠲᠦ᠍ ᠮᠥᠩᠭᠥᠨ ᠪᠠᠭᠠᠪᠤᠷ ᠬᠠᠷᠠᠯᠠᠨᠠ
ᠬᠠᠷᠠᠯᠠᠭᠰᠠᠨ ᠬᠠᠵᠠᠭᠠᠷ ᠨᠣᠷᠤᠭᠰᠠᠨ ᠴᠢᠳᠥᠷ ᠲᠡᠢ ᠢᠵᠢᠯᠢᠬᠡᠨ
ᠢᠵᠢᠯᠢᠬᠡᠨ ᠬᠠᠷᠠ ᠬᠠᠷᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ
ᠶᠡᠬᠡ ᠴᠠᠭᠠᠨ ᠭᠡᠭᠡ ᠶ᠋ᠢ ᠮᠣᠷᠢᠨ ᠤ᠋ ᠳᠡᠯ ᠦ᠋ᠨ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠡᠷᠢᠨᠡ
᠁ ᠪᠢ ᠭᠠᠭᠴᠠᠭᠠᠷᠳᠠᠬᠤ ᠳ᠋ᠠᠭᠠᠨ ᠴᠢᠳᠬᠥᠷ ᠢ᠋ ᠴᠦ᠍ ᠬᠠᠨᠢ ᠲᠠᠲᠠᠨᠠ᠃
᠅᠅᠅
ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ ᠪᠢ ᠨᠥᠭᠴᠢᠨᠡ
ᠨᠥᠭᠴᠢᠬᠦ ᠳ᠋ᠡᠭᠡᠨ ᠢᠵᠢᠢ ᠳ᠋ᠡᠭᠡᠨ ᠯᠡ ᠣᠴᠢᠨᠠ
ᠣᠴᠢᠬᠤ ᠭᠡᠵᠦ ᠵᠦᠳᠡᠷᠡᠭᠰᠡᠭᠡᠷ ᠶᠠᠪᠤᠲᠠᠯᠠ
ᠥᠬᠢᠳ ᠲᠦ᠍ ᠮᠢᠨᠢ ᠪᠤᠴᠠᠭᠠᠳ ᠢᠷᠡᠴᠢᠬᠡᠨᠡ ᠳᠡ
᠁ ᠬᠣᠢᠲᠤ ᠲᠥᠷᠥᠯ ᠳ᠋ᠦ᠍ ᠢᠲᠡᠭᠡᠬᠦ ᠨᠢ
ᠬᠣᠷᠸᠠ ᠠ᠋ᠴᠠ ᠵᠣᠪᠠᠯᠠᠩ ᠬᠤᠭᠤᠰᠯᠠᠬᠤ ᠮᠡᠲᠦ᠃
᠅᠅᠅
ᠬᠡᠷᠡᠮᠦ ᠦᠷᠭᠦᠬᠦ ᠳ᠋ᠦ᠍ ᠰᠠᠮᠤᠷ
ᠰᠠᠮᠤᠷ ᠤᠨᠠᠬᠤ ᠳ᠋ᠤ᠌ ᠨᠠᠮᠤᠷ
ᠨᠠᠮᠤᠷ ᠪᠣᠯᠬᠤ ᠳ᠋ᠤ᠌ ᠵᠢᠪᠠᠷ
ᠵᠢᠪᠠᠷ ᠵᠦᠬᠡᠬᠦ ᠳ᠋ᠦ᠍ ᠡᠪᠦᠯ
᠁ ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠠ᠋ᠴᠠ ᠯᠠ
ᠬᠣᠯᠠ ᠶ᠋ᠢᠨ ᠴᠢᠮᠠ ᠠ᠋ᠴᠠ ᠪᠠᠨ ᠰᠤᠷᠠᠭ ᠢᠯᠡᠭᠦᠦ ᠬᠦᠯᠢᠶᠡᠳᠡᠭ ᠰᠠᠨ᠃
᠅᠅᠅
ᠤᠢᠳᠬᠤ ᠶ᠋ᠢᠨ ᠵᠠᠪᠳᠤᠯ ᠭᠠᠷᠭᠠᠵᠤ ᠥᠭᠭᠦᠭᠡᠴᠢ ᠳᠡ
ᠥᠭᠬᠦ ᠳ᠋ᠡᠭᠡᠨ ᠤᠳᠠᠭᠠᠨ ᠬᠠᠢᠷᠠᠯᠠᠭᠠᠴᠢ
ᠬᠠᠢᠷᠠᠯᠠᠭᠰᠠᠨ ᠲᠡᠷᠡ ᠬᠤᠭᠤᠴᠠᠭᠠ ᠪᠠᠷ ᠴᠢᠨᠢ
ᠬᠠᠮᠤᠭ ᠤ᠋ᠨ ᠴᠢᠩᠭᠠ ᠲᠡᠪᠴᠢᠶᠡᠷᠢ ᠵᠠᠩᠭᠢᠳᠤᠶᠠ ᠳᠠ
᠁ ᠤᠢᠳᠬᠤ ᠴᠦ᠍ ᠵᠠᠪ ᠦᠭᠡᠢ ᠴᠥᠭᠴᠥᠭᠡᠨᠡᠨᠡ ᠭᠡᠳᠡᠭ
ᠤᠳᠬᠠ ᠦᠭᠡᠢ ᠴᠦ᠍ ᠶᠤᠮ ᠰᠢᠭ᠋᠃
᠅᠅᠅
ᠤᠴᠢᠷ ᠦᠭᠡᠢ ᠶᠡᠬᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠤᠢᠮᠤᠷᠠᠯᠠ
ᠤᠢᠮᠤᠷᠠᠬᠤ ᠳ᠋ᠠᠭᠠᠨ ᠴᠢᠮᠠᠶ᠋ᠢ ᠯᠠ ᠦᠭᠡᠢᠯᠡᠯᠡ
ᠦᠭᠡᠢᠯᠡᠭᠰᠡᠨ ᠰᠠᠨᠠᠭᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠪᠥᠷᠲᠥᠯᠵᠡᠬᠦ ᠴᠢ ᠮᠢᠨᠢ
ᠦᠭᠡᠢ᠂ ᠶᠠᠳᠠᠬᠤ ᠳ᠋ᠠᠭᠠᠨ ᠨᠠᠮᠠᠶ᠋ᠢ ᠮᠠᠭᠤᠯᠠᠬᠤ ᠦᠭᠡᠢ ᠶᠠᠪᠤᠭᠠᠴᠢ ᠳᠠ
᠁ ᠨᠡᠭᠦᠭᠰᠡᠨ ᠠᠢᠯ ᠤ᠋ᠨ ᠪᠠᠭᠤᠷᠢ ᠶ᠋ᠢ ᠪᠢᠲᠡᠭᠡᠢ ᠰᠢᠷᠲᠡᠭᠡᠷᠡᠢ᠃
᠅᠅᠅
ᠲᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠪᠢ ᠢᠴᠢᠯᠡ
ᠢᠴᠢᠭᠰᠡᠨ ᠨᠢᠭᠤᠷ ᠲᠠᠭᠠᠨ ᠭᠠᠷᠤᠯᠠ
ᠭᠠᠷᠤᠭᠠᠳ ᠭᠠᠷᠤᠭᠠᠳ ᠬᠠᠮᠢᠭᠠ ᠣᠴᠢᠬᠤ ᠴᠦ᠍ ᠪᠢᠯᠡ
ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠮᠠᠷ ᠢᠨᠢᠶᠡᠯᠲᠡᠢ ᠴᠦ᠍ ᠪᠢᠰᠢ
᠁ ᠡᠷᠭᠢᠨ ᠲᠣᠭᠣᠷᠢᠨ ᠲᠠᠩᠳᠠ ᠦᠨᠡᠨ ᠭᠡᠪᠡᠯ
ᠲᠡᠭᠦᠨ ᠰᠢᠭ ᠬᠤᠳᠠᠯ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠯᠡ ᠳᠡ᠃
᠅᠅᠅
ᠲᠡᠨᠦᠭᠦᠯ ᠦᠨᠦᠷ ᠰᠠᠮᠰᠠ ᠥᠳᠥᠭᠡᠨᠡ
ᠥᠳᠥᠭᠡᠭᠰᠡᠨ ᠠᠳᠠ ᠨᠢ ᠳᠤᠷᠠ ᠡᠰᠬᠡᠨᠡ
ᠡᠰᠬᠡᠭᠰᠡᠨ ᠲᠠᠴᠢᠶᠠᠯ ᠳ᠋ᠠᠭᠠᠨ ᠰᠣᠭᠲᠣᠬᠤ ᠨᠢ
ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠴᠦ᠍ ᠶᠤᠮ ᠤᠤ ᠳᠠ
᠁ ᠳᠡᠮᠡᠢ ᠶᠠᠭᠤᠮᠠ ᠭᠡᠵᠦ ᠳᠡᠯᠡᠬᠡᠢ ᠳᠡᠭᠡᠷᠡ ᠪᠠᠢᠬᠤ ᠦᠭᠡᠢ ᠳᠡ᠃
᠅᠅᠅
ᠰᠢᠷᠡᠮᠦᠨ ᠲᠣᠭᠣᠭᠠ ᠪᠠᠨ ᠬᠠᠪᠤᠷᠵᠢᠶᠠᠨ ᠳ᠋ᠤ᠌ ᠮᠠᠷᠲᠠᠴᠢᠬᠠᠵᠠᠢ
ᠮᠠᠷᠲᠠᠭᠰᠠᠨ ᠪᠢᠰᠢ᠂ ᠪᠡᠷᠢ ᠨᠢ ᠵᠠᠪᠰᠢᠪᠠ
ᠵᠠᠪᠰᠢᠬᠤ ᠵᠠᠪᠰᠢᠬᠤ ᠳ᠋ᠠᠭᠠᠨ ᠪᠦᠷ
ᠵᠤᠨ ᠤ᠋ ᠭᠤᠷᠪᠠᠨ ᠰᠠᠷᠠ ᠪᠦᠷᠬᠦᠭᠡᠷ ᠢ᠋ᠶ᠋ᠡᠨ ᠭᠠᠩᠳᠠᠲᠠᠯᠠ《ᠰᠠᠯᠬᠢᠯᠠᠵᠠᠢ》
᠁ ᠪᠣᠯᠵᠤ ᠯᠠ ᠥᠭᠪᠡᠯ ᠣᠢᠷᠠᠬᠠᠨ ᠠ᠋ᠴᠠ
ᠭᠡᠷᠯᠡᠮᠡᠷ ᠦᠭᠡᠢ ᠶᠦᠮ ᠰᠢᠭ ᠰᠠᠨᠠᠭᠳᠠᠳᠠᠭ ᠰᠢᠦ᠃
᠅᠅᠅
ᠡᠷᠭᠢ ᠶ᠋ᠢᠨ ᠴᠣᠬᠢᠶᠠ ᠨᠢᠪ ᠨᠢᠴᠦᠭᠦᠨ
ᠨᠢᠴᠦᠭᠦᠨ ᠴᠡᠭᠡᠵᠢ ᠶ᠋ᠢ ᠨᠢ ᠳᠠᠯᠠᠢ ᠢᠯᠢᠨᠡ
ᠢᠯᠢᠭᠰᠡᠨ ᠳᠠᠪᠠᠯᠭᠠ ᠡᠷᠭᠢᠵᠦ ᠬᠠᠯᠢᠷᠠᠬᠤ ᠳ᠋ᠠᠭᠠᠨ
ᠡᠴᠦᠰ ᠦ᠋ᠨ ᠤᠳᠠᠭᠠ ᠦᠨᠦᠰᠦᠭᠰᠡᠨ ᠮᠡᠲᠦ ᠨᠡᠪᠰᠡᠢᠨᠡ
᠁ ᠴᠥᠬᠥᠷᠡᠯᠲᠡ ᠦᠭᠡᠢ ᠶᠠᠪᠤᠭᠰᠠᠨ ᠤ᠋ ᠪᠠᠨ ᠱᠠᠩ ᠳ᠋ᠤ᠌
ᠥᠪᠡᠷ ᠢ᠋ᠶ᠋ᠡᠨ ᠡᠯᠡᠬᠦ ᠡᠳᠦᠷ ᠪᠣᠢ᠃
᠅᠅᠅
ᠡᠰᠬᠡᠭᠰᠡᠨ ᠬᠠᠲᠠᠭᠤ ᠦᠭᠡ ᠪᠡᠨ ᠰᠢᠳᠡ
ᠰᠢᠳᠡᠭᠰᠡᠨ ᠭᠣᠮᠣᠷᠬᠠᠯ ᠢ᠋ ᠴᠢᠨᠢ ᠵᠠᠯᠭᠢᠶᠠ
ᠵᠠᠯᠭᠢᠵᠤ ᠬᠠᠨᠤᠭᠠ ᠦᠭᠡᠢ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠴᠠᠩᠭᠠᠭᠠ ᠶ᠋ᠢ
ᠵᠡᠭᠦᠳᠦᠨ ᠳ᠋ᠡᠭᠡᠨ ᠦᠨᠦᠰᠦᠭᠦᠯᠵᠦ ᠲᠠᠢᠯᠬᠤ ᠠ᠋ᠴᠠ
᠁ ᠭᠣᠷᠢᠳᠠᠯᠭᠠ ᠶ᠋ᠢᠨ ᠡᠮᠦᠨᠡ ᠪᠢ
ᠡᠷᠡ ᠬᠥᠮᠦᠨ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠳᠠᠭ᠃
ᠨᠢᠭᠤᠭᠠᠳ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠣᠳᠣ ᠴᠦ᠍ ᠭᠡᠰᠡᠨ
ᠰᠠᠢᠬᠠᠨ ᠢᠨᠢᠶᠡᠳᠦᠨ ᠦ᠌ ᠳᠡᠷᠭᠡᠳᠡ᠁
᠅᠅᠅
ᠡᠯᠪᠡᠭ ᠤᠶᠠᠭᠠ ᠪᠠᠨ ᠶᠢᠰᠦ ᠲᠣᠭᠣᠷᠢᠯᠠ
ᠲᠣᠭᠣᠷᠢᠭ ᠰᠢᠷᠭᠢᠬᠦ ᠳ᠋ᠦ᠍ ᠮᠣᠷᠢᠳ ᠬᠥᠳᠡᠯᠦᠯᠡ
ᠬᠥᠳᠡᠯᠬᠦ ᠳ᠋ᠡᠭᠡᠨ ᠯᠡ ᠬᠥᠯ ᠨᠢ ᠬᠥᠩᠭᠡᠷᠡᠭᠰᠡᠨ ᠬᠦᠯᠦᠭ
ᠬᠥᠭᠰᠢᠳ ᠦ᠋ᠨ ᠡᠮᠦᠨᠡ ᠡᠪᠰᠢᠶᠡᠬᠦ ᠳ᠋ᠡᠭᠡᠨ ᠨᠣᠮᠣᠬᠠᠷᠠᠨᠠ
᠁ ᠨᠠᠭᠠᠳᠤᠮ ᠤ᠋ᠨ ᠬᠡᠢ ᠮᠣᠷᠢ
ᠤᠶᠠᠭᠠᠨ ᠳᠡᠭᠡᠷᠡ ᠪᠡᠨ ᠪᠠᠢᠳᠠᠭ ᠢ᠋ ᠤᠬᠠᠭᠠᠷᠠᠨᠠᠮ᠃
᠅᠅᠅
ᠡᠬᠡ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠬᠦᠢᠲᠡᠨ ᠪᠣᠷᠣᠭᠠᠨ ᠳ᠋ᠤᠨᠢ ᠴᠦ᠍ ᠳᠤᠯᠠᠭᠠᠴᠠᠨᠠ
ᠳᠤᠯᠠᠭᠠᠴᠠᠭᠰᠠᠨ ᠪᠡᠶᠡ ᠡᠴᠡ ᠮᠢᠨᠢ ᠬᠡᠢ ᠮᠣᠷᠢ ᠰᠠᠪᠰᠠᠨᠠ
ᠰᠠᠪᠰᠠᠭᠰᠠᠨ ᠣᠮᠣᠭ ᠤ᠋ᠨ ᠮᠢᠨᠢ ᠨᠢᠴᠦᠭᠦᠨ ᠮᠠᠨᠠᠨ ᠳ᠋ᠤ᠌ ᠰᠠᠶᠢ
ᠲᠡᠨᠵᠢᠭᠰᠡᠨ ᠤᠨᠠᠭᠠ ᠮᠣᠩᠭᠣᠯ ᠢ᠋ᠶ᠋ᠠᠨ ᠡᠷᠢᠨᠡ
᠁ ᠮᠣᠩᠭᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠡᠮᠰᠢᠬᠦ ᠳ᠋ᠦ᠍
ᠮᠢᠨᠦ ᠪᠣᠳᠣᠷᠣᠯ ᠦᠷᠭᠦᠯᠵᠢᠯᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ