ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠮᠡᠳᠡᠯᠭᠡ᠂ ᠵᠥᠪ ᠪᠢᠴᠢᠬᠦ ᠶ᠋ᠢᠨ ᠲᠤᠰᠠᠯᠠᠮᠵᠢБага сургуулийн хэлний зүйн мэдлэг, зөв бичхийн тусламж
4632
ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠮᠡᠳᠡᠯᠭᠡ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠡᠷᠡ ᠦᠭᠡ ᠬᠤᠪᠢᠯᠭᠠᠬᠤ ᠶᠣᠰᠣ
ᠦᠭᠡ ᠬᠤᠪᠢᠯᠭᠠᠬᠤ ᠳᠠᠭᠠᠪᠤᠷᠢ ᠨᠤᠭᠤᠳ ᠢ᠋ ᠬᠡᠷᠡᠭᠯᠡᠵᠦ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠤᠳᠬᠠ ᠶ᠋ᠢ ᠢᠯᠡᠳᠬᠡᠬᠦ ᠶᠣᠰᠣ ᠶ᠋ᠢ ᠦᠭᠡ ᠬᠤᠪᠢᠯᠭᠠᠬᠤ ᠶᠣᠰᠣ ᠭᠡᠨᠡ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠡᠷᠡ ᠦᠭᠡ ᠳ᠋ᠦ᠍ ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠬᠤᠪᠢᠯᠭᠠᠬᠤ᠂ ᠣᠯᠠᠨ ᠲᠣᠭᠠ ᠪᠠᠷ ᠬᠤᠪᠢᠯᠭᠠᠬᠤ᠂ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠪᠠᠷ ᠬᠤᠪᠢᠯᠭᠠᠬᠤ ᠭᠡᠬᠦ ᠵᠡᠷᠭᠡ ᠬᠡᠳᠦᠨ ᠵᠦᠢᠯ ᠦ᠋ᠨ ᠶᠣᠰᠣᠨ ᠪᠠᠢᠳᠠᠭ᠃
( ᠨᠢᠭᠡ) ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠬᠤᠪᠢᠯᠭᠠᠬᠤ
ᠦᠭᠡ ᠨᠦ᠍ᠭᠦᠳ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠬᠠᠷᠢᠴᠠᠭᠠ ᠪᠠ ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠᠬᠢ ᠦᠭᠡᠰ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠬᠠᠷᠢᠴᠠᠭᠠ ᠶ᠋ᠢ ᠢᠯᠡᠳᠬᠡᠳᠡᠭ ᠨᠡᠷᠡ ᠦᠭᠡ ᠶ᠋ᠢᠨ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢ ᠲᠡᠢᠨ ᠢᠯᠭᠠᠯ ᠭᠡᠨᠡ᠃
ᠲᠡᠢᠨ ᠢᠯᠭᠠᠯ ᠭᠡᠳᠡᠭ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠬᠡᠯᠪᠡᠷᠢ ᠨᠢ ᠨᠡᠷᠡ ᠦᠭᠡ ᠶ᠋ᠢᠨ ᠵᠦᠢᠯ ᠳ᠋ᠦ᠍ ᠬᠣᠯᠪᠣᠭᠳᠠᠬᠤ ᠪᠥᠭᠡᠳ ᠲᠡᠮᠳᠡᠭ ᠦᠭᠡ᠂ ᠲᠣᠭᠠᠨ ᠤ᠋ ᠦᠭᠡ ᠨᠢ ᠮᠥᠨ ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠢᠯᠭᠠᠯᠯᠠᠭᠳᠠᠬᠤ ᠪᠣᠯᠪᠠᠴᠤ ᠵᠥᠪᠬᠡᠨ ᠨᠡᠷᠡ ᠦᠭᠡ ᠶ᠋ᠢᠨ ᠤᠳᠬᠠ ᠪᠠᠷ ᠬᠡᠷᠡᠭᠯᠡᠭᠳᠡᠪᠡᠯ ᠰᠠᠶᠢ ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠢᠯᠭᠠᠯᠯᠠᠭᠳᠠᠵᠤ ᠪᠠᠢᠨᠠ᠃ ᠲᠡᠢᠨ ᠢᠯᠭᠠᠯ ᠳ᠋ᠤ᠌ ᠨᠡᠷᠡᠯᠡᠬᠦ᠂ ᠬᠠᠷᠢᠶᠠᠯᠠᠬᠤ᠂ ᠥᠭᠬᠦ ᠣᠷᠣᠰᠢᠬᠤ᠂ ᠵᠢᠭᠠᠬᠤ᠂ ᠭᠠᠷᠬᠤ᠂ ᠦᠢᠯᠡᠳᠬᠦ᠂ ᠬᠠᠮᠲᠤᠷᠠᠬᠤ ᠵᠡᠷᠭᠡ ᠳᠣᠯᠣᠭᠠᠨ ᠬᠡᠯᠪᠡᠷᠢ ᠪᠠᠢᠳᠠᠭ᠃ ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠵᠠᠷᠢᠮ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢᠨ ᠳᠡᠭᠡᠷᠡ ᠪᠤᠰᠤᠳ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢ ᠳᠠᠪᠬᠤᠷᠯᠠᠨ ᠬᠡᠷᠡᠭᠯᠡᠵᠦ ᠪᠣᠯᠤᠨᠠ᠃ ᠡᠢᠮᠦ ᠡᠴᠡ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠲᠡᠢᠨ ᠢᠯᠭᠠᠯ ᠢ᠋ ᠡᠩ ᠦ᠋ᠨ ᠲᠡᠢᠨ ᠢᠯᠭᠠᠯ ᠪᠠ ᠳᠠᠪᠬᠤᠷ ᠲᠡᠢᠨ ᠢᠯᠭᠠᠯ ᠭᠡᠵᠦ ᠬᠣᠶᠠᠷ ᠵᠦᠢᠯ ᠳ᠋ᠦ᠍ ᠬᠤᠪᠢᠶᠠᠵᠤ ᠪᠣᠯᠤᠨᠠ᠃
1 ᠡᠩ ᠦ᠋ᠨ ᠲᠡᠢᠨ ᠢᠯᠭᠠᠯ
ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠨᠡᠷᠡᠯᠡᠬᠦ᠂ ᠬᠠᠷᠢᠶᠠᠯᠠᠬᠤ᠂ ᠥᠭᠬᠦ ᠣᠷᠣᠰᠢᠬᠤ᠂ ᠵᠢᠭᠠᠬᠤ᠂ ᠭᠠᠷᠬᠤ᠂ ᠦᠢᠯᠡᠳᠬᠦ᠂ ᠬᠠᠮᠲᠤᠷᠠᠬᠤ ᠵᠡᠷᠭᠡ ᠳᠣᠯᠣᠭᠠᠨ ᠣᠷᠣᠨ ᠤ᠋ ᠬᠡᠯᠪᠡᠷᠢ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠢ᠋ ᠡᠩ ᠦ᠋ᠨ ᠲᠡᠢᠨ ᠢᠯᠭᠠᠯ ᠭᠡᠨᠡ᠃
( 1) ᠨᠡᠷᠡᠯᠡᠬᠦ ᠶ᠋ᠢᠨ ᠲᠡᠢᠨ ᠢᠯᠭᠠᠯ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠨᠡᠷᠡᠯᠡᠬᠦ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠨᠡᠷᠡ ᠦᠭᠡ ᠨᠢ ᠲᠤᠰᠬᠠᠢ ᠳᠠᠭᠠᠪᠤᠷᠢ ᠦᠭᠡᠢ᠃ ᠵᠥᠪᠬᠡᠨ ᠬᠡᠨ ᠪᠣᠢ? ᠶᠠᠭᠤ ᠪᠤᠢ? ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠤᠭᠳᠠᠨᠠ᠃ ᠡᠭᠦᠨ ᠳ᠋ᠦ᠍《᠊᠊ᠨ 》 ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ《᠊᠊ᠨ》 ᠨᠢ ᠨᠡᠷᠡᠯᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠡᠭᠡᠭᠳᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ (1) ᠨᠠᠷᠠ ᠮᠠᠨᠳᠤᠪᠠ᠃ (2) ᠳᠣᠷᠣᠨᠠ ᠵᠦᠭ ᠲᠦ᠍ ᠤᠯᠠᠭᠠᠨ ᠨᠠᠷᠠ ᠮᠠᠨᠳᠤᠪᠠ᠃
( 2) ᠬᠠᠷᠢᠶᠠᠯᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ
ᠬᠠᠷᠢᠶᠠᠯᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠨᠢ ᠬᠡᠨ ᠦ᠌? ᠶᠠᠭᠤᠨ ᠤ᠋? ᠬᠡᠵᠢᠶᠡᠨ ᠦ᠌? ᠬᠠᠮᠢᠭᠠᠬᠢ ᠶ᠋ᠢᠨ? ᠭᠡᠬᠦ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠤᠭᠳᠠᠬᠤ ᠪᠥᠭᠡᠳ《ᠶ᠋ᠢᠨ᠂ ᠦ᠋ᠨ᠂ ᠦ᠌ 》 ᠭᠡᠳᠡᠭ ᠭᠤᠷᠪᠠᠨ ᠳᠠᠭᠠᠪᠤᠷᠢ ᠲᠠᠢ᠃
(1) ᠶ᠋ᠢᠨ— ᠳᠠᠭᠠᠪᠤᠷᠢ ᠶ᠋ᠢ ᠡᠭᠡᠰᠢᠭ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠠᠬᠠ ᠶ᠋ᠢᠨ᠂ ᠳᠡᠭᠦᠦ ᠶ᠋ᠢᠨ᠂ ᠪᠠᠭᠰᠢ ᠶ᠋ᠢᠨ᠂ ᠳᠠᠯᠠᠢ ᠶ᠋ᠢᠨ᠂ ᠪᠠᠷᠢᠮᠵᠢᠶᠠᠯᠠᠬᠤ ᠶ᠋ᠢᠨ ᠭᠡᠬᠦ ᠮᠡᠲᠦ᠃
(2) ᠦ᠋ᠨ— ᠳᠠᠭᠠᠪᠤᠷᠢ ᠶ᠋ᠢ《᠊᠊ᠨ》 ᠡᠴᠡ ᠪᠤᠰᠤᠳ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠠᠷᠠᠳ ᠤᠨ᠂ ᠤᠯᠤᠰ ᠤᠨ᠂ ᠶᠠᠪᠤᠳᠠᠯ ᠤᠨ᠂ ᠬᠡᠷᠡᠭ ᠦ᠋ᠨ ᠭᠡᠬᠦ ᠮᠡᠲᠦ᠃
(3) ᠤ — ᠳᠠᠭᠠᠪᠤᠷᠢ ᠶ᠋ᠢ《᠊᠊ᠨ》ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠡᠭᠦᠨ ᠳ᠋ᠦ᠍ ᠲᠣᠭᠲᠠᠪᠤᠷᠢ ᠦᠭᠡᠢ《᠊᠊ᠨ》 ᠭᠡᠢᠭᠦᠯᠦᠭᠴᠢ ᠨᠢ ᠬᠠᠷᠢᠶᠠᠯᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠳ᠋ᠤ᠌ ᠲᠣᠭᠲᠠᠪᠤᠷᠢ ᠲᠠᠢ ᠪᠣᠯᠤᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠲᠦᠮᠡᠨ ᠦ᠌᠂ ᠠᠭᠤᠯᠠᠨ ᠤ᠋᠂ ᠤᠰᠤᠨ ᠤ᠋᠂ ᠨᠠᠷᠠᠨ ᠤ᠋᠂ ᠲᠠᠨ ᠤ᠋᠂ ᠪᠢᠳᠡᠨ ᠦ᠌ ᠭᠡᠬᠦ ᠮᠡᠲᠦ᠃
( 3) ᠥᠭᠬᠦ ᠣᠷᠣᠰᠢᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠥᠭᠬᠦ ᠣᠷᠣᠰᠢᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠨᠢ ᠬᠡᠨ ᠳ᠋ᠦ᠍? ᠶᠠᠭᠤᠨ ᠳ᠋ᠤ᠌? ᠬᠡᠵᠢᠶᠡ? ᠬᠠᠮᠢᠭᠠ? ᠶᠠᠭᠠᠬᠢᠭᠰᠠᠨ ᠳ᠋ᠤ᠌? ᠶᠠᠭᠠᠬᠢᠬᠤ ᠳ᠋ᠤ᠌? ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠤᠭᠳᠠᠬᠤ ᠪᠥᠭᠡᠳ《 ᠳ᠋ᠤ᠌ ᠂ ᠲᠤ᠌ 》 ᠭᠡᠰᠡᠨ ᠬᠣᠶᠠᠷ ᠳᠠᠭᠠᠪᠤᠷᠢ ᠲᠠᠢ᠃ ᠡᠭᠦᠨ ᠳ᠋ᠦ᠍《ᠡ》 ᠭᠡᠰᠡᠨ ᠬᠡᠯᠪᠡᠷᠢ ᠬᠠᠭᠤᠴᠢᠨ ᠪᠢᠴᠢᠭ ᠲᠦ᠍ ᠠᠷᠪᠢᠨ ᠦᠵᠡᠭᠳᠡᠬᠦ ᠪᠣᠯᠪᠠᠴᠤ ᠣᠳᠣ ᠪᠠᠰᠠ《᠊᠊ᠨ᠂᠊᠊ᠷ》 ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨᠡ ᠮᠠᠰᠢ ᠬᠣᠪᠣᠷ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃ ᠮᠥᠨ ᠴᠦ᠍ ᠥᠭᠬᠦ ᠣᠷᠣᠰᠢᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠨᠢ ᠳᠠᠭᠠᠪᠤᠷᠢ ᠦᠭᠡᠢ ᠪᠡᠷ ᠢᠯᠡᠷᠡᠵᠦ ᠪᠣᠯᠬᠤ ᠪᠥᠭᠡᠳ ᠲᠣᠭᠲᠠᠪᠤᠷᠢ ᠦᠭᠡᠢ《᠊᠊ᠨ》 ᠭᠡᠢᠭᠦᠯᠦᠭᠴᠢ ᠨᠢ ᠥᠭᠬᠦ ᠣᠷᠣᠰᠢᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠳ᠋ᠤ᠌ ᠰᠡᠷᠭᠦᠨ ᠭᠠᠷᠴᠤ ᠢᠷᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ— ᠲᠠᠨᠠ᠂ ᠬᠣᠲᠠᠨᠠ᠂ ᠭᠠᠵᠠᠷᠠ᠂ ᠰᠤᠮᠤ— ᠰᠤᠮᠤᠨ ᠳ᠋ᠤ᠌᠂ ᠮᠣᠷᠢ— ᠮᠣᠷᠢᠨ ᠳ᠋ᠤ᠌ ᠭᠡᠬᠦ ᠮᠡᠲᠦ᠃
(1) ᠳ᠋ᠦ᠍ ( ᠳ᠋ᠤᠷ)— ᠳᠠᠭᠠᠪᠤᠷᠢ ᠶ᠋ᠢ ᠡᠭᠡᠰᠢᠭ ᠪᠠ ᠵᠥᠭᠡᠯᠡᠨ ᠳᠡᠪᠢᠰᠬᠡᠷ《 ᠊᠊ᠨ᠂ ᠊᠊ᠮ᠂ ᠊᠊ᠯ᠂᠊᠊ᠩ》 ᠵᠡᠷᠭᠡ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠠᠬᠠ ᠳ᠋ᠤ᠌᠂ ᠣᠷᠣᠯᠴᠠᠬᠤ ᠳ᠋ᠤ᠌᠂ ᠶᠠᠪᠤᠳᠠᠯ ᠳ᠋ᠤ᠌᠂ ᠡᠭᠦᠨ ᠳ᠋ᠦ᠍᠂ ᠨᠡᠢᠭᠡᠮ ᠳ᠋ᠦ᠍᠂ ᠮᠣᠩᠭᠣᠯ ᠳ᠋ᠤ᠌᠂ ᠬᠦᠷᠢᠶᠡᠯᠡᠩ ᠳ᠋ᠦ᠍᠂ ᠢᠷᠡᠬᠦᠢ ᠳ᠋ᠦ᠍ᠷ ᠭᠡᠬᠦ ᠮᠡᠲᠦ᠃
(2) ᠲᠦ ( ᠲᠤᠷ)— ᠳᠠᠭᠠᠪᠤᠷᠢ ᠶ᠋ᠢ ᠬᠠᠲᠠᠭᠤ ᠳᠡᠪᠢᠰᠬᠡᠷ《᠊᠊ᠪ᠂ ᠊᠊ᠭ ᠊᠊ᠭ᠌᠂᠊᠊ᠷ᠂᠊᠊ᠰ᠂ ᠊᠊ᠳ》 ᠵᠡᠷᠭᠡ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠰᠡᠳᠦᠪ ᠲᠦ᠍᠂ ᠠᠷᠤᠭ ᠲᠤ᠌᠂ ᠴᠡᠷᠢᠭ ᠲᠦ᠍᠂ ᠲᠡᠮᠦᠷ ᠲᠦ᠍᠂ ᠤᠯᠤᠰ ᠲᠤ᠌᠂ ᠬᠡᠦᠬᠡᠳ ᠲᠦ᠍᠂ ᠬᠡᠷᠡᠭᠯᠡᠭᠴᠢᠳ ᠲᠣᠷ ᠭᠡᠬᠦ ᠮᠡᠲᠦ᠃
( 4) ᠵᠢᠭᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ
ᠵᠢᠭᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠨᠢ ᠬᠡᠨ ᠢ᠋? ᠶᠠᠭᠤ ᠶ᠋ᠢ? ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠤᠭᠳᠠᠬᠤ ᠪᠥᠭᠡᠳ《 ᠢ᠋᠂ ᠶ᠋ᠢ》 ᠭᠡᠳᠡᠭ ᠬᠣᠶᠠᠷ ᠳᠠᠭᠠᠪᠤᠷᠢ ᠲᠠᠢ᠃ ᠡᠭᠦᠨ ᠳ᠋ᠦ᠍ ᠲᠣᠭᠲᠠᠪᠤᠷᠢ ᠦᠭᠡᠢ《᠊᠊ᠨ》 ᠭᠡᠢᠭᠦᠯᠦᠭᠴᠢ ᠵᠢᠭᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠳ᠋ᠤ᠌ ᠭᠡᠭᠡᠭᠳᠡᠬᠦ ᠪᠥᠭᠡᠳ ᠰᠢᠭᠤᠳ ᠲᠤᠰᠬᠤ ᠦᠢᠯᠡ ᠦᠭᠡ ᠪᠡᠷ ᠢᠯᠡᠷᠡᠪᠡᠯ ᠵᠢᠭᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠨᠢ ᠳᠠᠭᠠᠪᠤᠷᠢ ᠦᠭᠡᠢ ᠪᠡᠷ ᠪᠠᠢᠵᠤ ᠪᠣᠯᠤᠨᠠ᠃
(1) ᠶ᠋ᠢ — ᠳᠠᠭᠠᠪᠤᠷᠢ ᠶ᠋ᠢ ᠡᠬᠡᠰᠢᠭ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄
ᠤᠳᠬᠠ ᠶ᠋ᠢ᠂ ᠮᠣᠷᠢᠨ— ᠮᠣᠷᠢ ᠶ᠋ᠢ᠂ ᠬᠣᠨᠢᠨ— ᠬᠣᠨᠢ ᠶ᠋ᠢ᠂ ᠰᠤᠷᠤᠭᠴᠢ ᠶ᠋ᠢ᠂ ᠨᠠᠰᠤ ᠶ᠋ᠢ᠂ ᠶᠡᠬᠡ ᠶ᠋ᠢ᠂ ᠠᠩᠭᠢ ᠶ᠋ᠢ᠂ ᠬᠥᠳᠡᠯᠮᠦᠷᠢ ᠬᠢᠪᠡ᠂ ᠨᠣᠭᠣᠭᠠ ᠳᠠᠷᠢᠪᠠ᠂ ᠴᠠᠭᠠᠰᠤ ᠠᠪᠤᠪᠠ᠂ ᠦᠰᠦᠭ ᠪᠢᠴᠢᠪᠡ ᠭᠡᠬᠦ ᠮᠡᠲᠦ᠃
(2) ᠊ᠢ — ᠳᠠᠭᠠᠪᠤᠷᠢ ᠶ᠋ᠢ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄
ᠠᠷᠠᠳ ᠢ᠋᠂ ᠤᠯᠤᠰ ᠢ᠋᠂ ᠨᠣᠮ ᠢ᠋᠂ ᠪᠢᠴᠢᠭ ᠢ᠋ ᠦᠨᠳᠦᠰᠦᠲᠡᠨ ᠢ᠋ ᠭᠡᠬᠦ ᠮᠡᠲᠦ᠃
( 5) ᠭᠠᠷᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠭᠠᠷᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠨᠢ ᠬᠡᠨ ᠡᠴᠡ? ᠶᠠᠭᠤᠨ ᠠ᠋ᠴᠠ? ᠬᠠᠮᠢᠭᠠ ᠠ᠋ᠴᠠ? ᠬᠡᠵᠢᠶᠡᠨ ᠡᠴᠡ? ᠬᠡᠳᠦᠢ ᠡᠴᠡ? ᠶᠠᠭᠠᠬᠢᠭᠰᠠᠨ ᠠ᠋ᠴᠠ? ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠤᠭᠳᠠᠬᠤ ᠪᠥᠭᠡᠳ《 ᠡᠴᠡ》 ᠭᠡᠳᠡᠭ ᠳᠠᠭᠠᠪᠤᠷᠢ ᠲᠠᠢ᠃
(1) ᠡᠴᠡ— ᠳᠠᠭᠠᠪᠤᠷᠢ ᠶ᠋ᠢ ᠶᠠᠮᠠᠷᠴᠤ ᠦᠭᠡ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠪᠦᠷ ᠬᠡᠷᠡᠭᠯᠡᠵᠦ ᠪᠣᠯᠤᠨᠠ᠃ ᠡᠭᠦᠨ ᠳ᠋ᠦ᠍ ᠲᠣᠭᠲᠠᠪᠤᠷᠢ ᠦᠭᠡᠢ《᠊᠊ᠨ》 ᠭᠡᠢᠭᠦᠯᠦᠭᠴᠢ ᠨᠢ ᠭᠠᠷᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠳ᠋ᠤ᠌ ᠭᠡᠭᠡᠭᠳᠡᠬᠦ ᠦᠭᠡᠢ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠭᠡᠷ ᠡᠴᠡ᠂ ᠭᠠᠷ ᠠ᠋ᠴᠠ᠂ ᠬᠣᠲᠠ ᠠ᠋ᠴᠠ᠂ ᠬᠥᠳᠡᠭᠡ ᠡᠴᠡ᠂ ᠪᠠᠭᠰᠢ ᠠ᠋ᠴᠠ᠂ ᠰᠤᠷᠤᠭᠴᠢ ᠠ᠋ᠴᠠ᠂ ᠬᠣᠯᠠ ᠠ᠋ᠴᠠ᠂ ᠣᠢᠷᠠ ᠠ᠋ᠴᠠ᠂ ᠨᠢᠳᠦ— ᠨᠢᠳᠦᠨ ᠡᠴᠡ᠂ ᠵᠢᠷᠦᠬᠡ— ᠵᠢᠷᠦᠬᠡᠨ ᠡᠴᠡ ᠭᠡᠬᠦ ᠮᠡᠲᠦ᠃
( 6) ᠦᠢᠯᠡᠳᠬᠦ ᠶ᠋ᠢᠨ ᠲᠡᠢᠨ ᠢᠯᠭᠠᠯ
ᠦᠢᠯᠡᠳᠬᠦ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠨᠢ ᠬᠡᠨ ᠢ᠋ᠶ᠋ᠡᠷ? ᠶᠠᠭᠤ ᠪᠠᠷ? ᠬᠠᠮᠢᠭᠠᠭᠤᠷ? ᠬᠡᠳᠦᠢ ᠪᠡᠷ? ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠤᠭᠳᠠᠬᠤ ᠪᠥᠭᠡᠳ《 ᠪᠡᠷ᠂ ᠢ᠋ᠶ᠋ᠡᠷ》 ᠭᠡᠰᠡᠨ ᠬᠣᠶᠠᠷ ᠳᠠᠭᠠᠪᠤᠷᠢ ᠲᠠᠢ᠃ ᠡᠭᠦᠨ ᠳ᠋ᠦ᠍ ᠲᠣᠭᠲᠠᠪᠤᠷᠢ ᠦᠭᠡᠢ 《᠊᠊ᠨ》 ᠭᠡᠢᠭᠦᠯᠦᠭᠴᠢ ᠨᠢ ᠦᠢᠯᠡᠳᠬᠦ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠳ᠋ᠤ᠌ ᠭᠡᠭᠡᠭᠳᠡᠨᠡ᠃
(1) ᠪᠡᠷ — ᠳᠠᠭᠠᠪᠤᠷᠢ ᠶ᠋ᠢ ᠡᠭᠡᠰᠢᠭ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠵᠢᠭᠠᠪᠤᠷᠢ ᠪᠠᠷ᠂ ᠬᠠᠳᠠ ᠪᠠᠷ᠂ ᠠᠭᠤᠯᠠ ᠪᠠᠷ᠂ ᠬᠥᠳᠡᠭᠡ ᠪᠡᠷ᠂ ᠨᠢᠳᠦᠨ— ᠨᠢᠳᠦ ᠪᠡᠷ᠂ ᠮᠣᠷᠢᠨ— ᠮᠣᠷᠢ ᠪᠠᠷ᠂ ᠭᠡᠬᠦ ᠮᠡᠲᠦ᠃
(2) ᠢ᠋ᠶ᠋ᠠᠷ — ᠳᠠᠭᠠᠪᠤᠷᠢ ᠶ᠋ᠢ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠷᠠᠳ ᠢ᠋ᠶ᠋ᠠᠷ᠂ ᠤᠯᠤᠰ ᠢ᠋ᠶ᠋ᠠᠷ᠂ ᠨᠣᠮ ᠢ᠋ᠶ᠋ᠠᠷ ᠲᠤᠭ ᠢ᠋ᠶ᠋ᠠᠷ ᠬᠥᠮᠦᠨ ᠢ᠋ᠶ᠋ᠡᠷ᠂ ᠮᠠᠯ ᠢ᠋ᠶ᠋ᠠᠷ ᠭᠡᠬᠦ ᠮᠡᠲᠦ᠃
( 7 ) ᠬᠠᠮᠲᠤᠷᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠬᠠᠮᠲᠤᠷᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠨᠢ ᠬᠡᠨ ᠲᠡᠢ? ᠶᠠᠭᠤ ᠲᠠᠢ? ᠭᠡᠰᠡᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠬᠠᠷᠢᠭᠤᠯᠤᠭᠳᠠᠬᠤ ᠪᠥᠭᠡᠳ《 ᠲᠡᠢ᠂ ᠯᠤᠭᠠ᠂ ᠯᠤᠭᠡ》 ᠭᠡᠰᠡᠨ ᠳᠠᠭᠠᠪᠤᠷᠢ ᠲᠠᠢ᠃
(1) ᠲᠡᠢ — ᠳᠠᠭᠠᠪᠤᠷᠢ ᠶ᠋ᠢ ᠡᠭᠡᠰᠢᠭ᠂ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠴᠢᠩᠭᠠ ᠬᠥᠨᠳᠡᠢ ᠦᠭᠡᠨ ᠳ᠋ᠦ᠍ ᠪᠦᠷ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠷᠠᠳ ᠲᠠᠢ᠂ ᠴᠡᠷᠢᠭ ᠲᠡᠢ᠂ ᠨᠥᠬᠥᠳ ᠲᠡᠢ᠂ ᠬᠥᠮᠦᠨ ᠲᠡᠢ᠂ ᠭᠠᠵᠠᠷ ᠲᠠᠢ᠂ ᠠᠭᠤᠯᠠ ᠲᠠᠢ᠂
(2) ᠯᠤᠭᠠ — ᠳᠠᠭᠠᠪᠤᠷᠢ ᠶ᠋ᠢ ᠡᠭᠡᠰᠢᠭ᠂ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠴᠢᠩᠭᠠ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠬᠠ ᠯᠤᠭᠠ᠂ ᠪᠠᠭᠰᠢ ᠯᠤᠭᠠ᠂ ᠰᠤᠷᠤᠭᠴᠢ ᠯᠤᠭᠠ᠂ ᠨᠣᠮ ᠯᠤᠭᠠ ᠭᠡᠬᠦ ᠮᠡᠲᠦ᠃
(3) ᠯᠤᠭᠡ — ᠳᠠᠭᠠᠪᠤᠷᠢ ᠶ᠋ᠢ ᠡᠭᠡᠰᠢᠭ᠂ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠬᠥᠨᠳᠡᠢ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠨᠥᠬᠥᠷ ᠯᠤᠭᠡ᠂ ᠬᠥᠮᠦᠨ ᠯᠤᠭᠡ᠂ ᠡᠭᠡᠴᠢ ᠯᠤᠭᠡ᠂ ᠳᠡᠭᠦᠦ ᠯᠤᠭᠡ ᠭᠡᠬᠦ ᠮᠡᠲᠦ᠃
2 ᠳᠠᠪᠬᠤᠷ ᠲᠡᠢᠨ ᠢᠯᠭᠠᠯ
ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠵᠠᠷᠢᠮ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢᠨ ᠳᠡᠭᠡᠷᠡ ᠥᠭᠡᠷᠡ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢ ᠳᠠᠪᠬᠤᠷᠯᠠᠨ ᠬᠡᠷᠡᠭᠯᠡᠵᠦ ᠦᠭᠡᠰ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠨᠠᠷᠢᠨ ᠪᠤᠳᠤᠯᠢᠶᠠᠨ ᠲᠠᠢ ᠬᠠᠷᠢᠴᠠᠭᠠ ᠶ᠋ᠢᠨ ᠤᠳᠬᠠ ᠶ᠋ᠢ ᠢᠯᠡᠳᠬᠡᠵᠦ ᠪᠣᠯᠳᠠᠭ᠃ ᠡᠳᠡᠭᠡᠷ ᠳᠠᠪᠬᠤᠷᠯᠠᠨ ᠬᠡᠷᠡᠭᠯᠡᠭᠰᠡᠨ ᠲᠡᠢᠨ ᠢᠯᠭᠠᠯ ᠦ᠋ᠳ ᠢ᠋ ᠳᠠᠪᠬᠤᠷ ᠲᠡᠢᠨ ᠢᠯᠭᠠᠯ ᠭᠡᠨᠡ᠃
ᠳᠠᠪᠬᠤᠷ ᠲᠡᠢᠨ ᠢᠯᠭᠠᠯ ᠨᠢ᠄
(1) ᠬᠠᠷᠢᠶᠠᠯᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢᠨ ᠳᠡᠭᠡᠷᠡ ᠥᠭᠬᠦ ᠣᠷᠣᠰᠢᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢ ᠳᠠᠪᠬᠤᠷᠯᠠᠨ ᠬᠡᠷᠡᠭᠯᠡᠵᠦ ᠳᠠᠪᠬᠤᠷ ᠲᠡᠢᠨ ᠢᠯᠭᠠᠯ ᠡᠭᠦᠰᠬᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠪᠠᠭᠰᠢ ᠶ᠋ᠢᠨ ᠳ᠋ᠦ᠍᠂ ᠴᠡᠴᠡᠭ ᠦ᠋ᠨ ᠳ᠋ᠦ᠍᠂ ᠲᠦᠮᠡᠨ ᠦ᠌ ᠳ᠋ᠦ᠍ ᠭᠡᠬᠦ ᠮᠡᠲᠦ᠃
(2) ᠥᠭᠬᠦ ᠣᠷᠣᠰᠢᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢᠨ ᠳᠡᠭᠡᠷᠡ ᠭᠠᠷᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢ ᠳᠠᠪᠬᠤᠷᠯᠠᠨ ᠬᠡᠷᠡᠭᠯᠡᠵᠦ ᠳᠠᠪᠬᠤᠷ ᠲᠡᠢᠨ ᠢᠯᠭᠠᠯ ᠡᠭᠦᠰᠬᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠭᠡᠷ ᠲᠦ᠍ ᠡᠴᠡ᠂ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠠ᠋ᠴᠠ ᠭᠡᠬᠦ ᠮᠡᠲᠦ᠃
(3) ᠬᠠᠮᠲᠤᠷᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢᠨ ᠳᠡᠭᠡᠷᠡ ᠪᠤᠰᠤᠳ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢ ᠳᠠᠪᠬᠤᠷᠯᠠᠨ ᠬᠡᠷᠡᠭᠯᠡᠵᠦ ᠳᠠᠪᠬᠤᠷ ᠲᠡᠢᠨ ᠢᠯᠭᠠᠯ ᠡᠭᠦᠰᠬᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠳᠡᠪᠲᠡᠷ ᠲᠡᠢ ᠶ᠋ᠢᠨ᠂ ᠳᠡᠪᠲᠡᠷ ᠲᠡᠢ ᠳ᠋ᠦ᠍᠂ ᠰᠠᠨᠳᠠᠯᠢ ᠲᠠᠢ ᠶ᠋ᠢ᠂ ᠨᠣᠮ ᠲᠠᠢ ᠠ᠋ᠴᠠ᠂ ᠮᠣᠷᠢ ᠲᠠᠢ ᠪᠠᠷ᠂ ᠭᠡᠬᠦ ᠮᠡᠲᠦ᠃
(ᠬᠣᠶᠠᠷ) ᠣᠯᠠᠨ ᠲᠣᠭᠠ ᠪᠠᠷ ᠬᠤᠪᠢᠯᠭᠠᠬᠤ
ᠪᠣᠳᠠᠲᠤ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠰᠢᠬᠤ ᠨᠢᠭᠡᠨ ᠲᠥᠷᠥᠯ ᠦ᠋ᠨ ᠣᠯᠠᠨ ᠬᠥᠮᠦᠨ᠂ ᠶᠠᠭᠤᠮᠠ ᠶ᠋ᠢᠨ ᠭᠠᠭᠴᠠ ᠪᠠ ᠣᠯᠠᠨ ᠲᠣᠭᠠ ᠶ᠋ᠢ ᠲᠤᠰᠬᠠᠨ ᠦᠵᠡᠭᠦᠯᠵᠦ᠂ ᠭᠠᠭᠴᠠ ᠶ᠋ᠢ ᠨᠢ ᠭᠠᠭᠴᠠ ᠪᠤᠰᠤ ᠲᠠᠢ ᠬᠠᠷᠢᠴᠠᠭᠤᠯᠤᠨ ᠢᠯᠭᠠᠬᠤ ᠶᠣᠰᠣ ᠶ᠋ᠢ ᠭᠠᠭᠴᠠ ᠪᠠ ᠣᠯᠠᠨ ᠤ᠋ ᠲᠤᠬᠠᠢ ᠶᠣᠰᠣᠨ ᠭᠡᠨᠡ᠃ ᠭᠠᠭᠴᠠ ᠪᠠ ᠣᠯᠠᠨ ᠤ᠋ ᠲᠤᠬᠠᠢ ᠶᠣᠰᠣᠨ ᠨᠡᠷᠡ ᠦᠭᠡ ᠳ᠋ᠦ᠍ ᠬᠡᠷᠡᠭᠯᠡᠭᠳᠡᠬᠦ ᠪᠥᠭᠡᠳ ᠲᠡᠮᠳᠡᠭ ᠦᠭᠡ᠂ ᠲᠣᠭᠠᠨ ᠤ᠋ ᠦᠭᠡ ᠶ᠋ᠢ ᠨᠡᠷᠡ ᠦᠭᠡ ᠶ᠋ᠢᠨ ᠤᠳᠬᠠ ᠪᠠᠷ ᠬᠡᠷᠡᠭᠯᠡᠪᠡᠯ ᠪᠠᠰᠠ ᠭᠠᠭᠴᠠ ᠪᠠ ᠣᠯᠠᠨ ᠲᠣᠭᠠᠨ ᠤ᠋ ᠶᠣᠰᠣ ᠪᠠᠷ ᠢᠯᠡᠷᠡᠵᠦ ᠪᠣᠯᠤᠨᠠ᠃
ᠮᠣᠩᠭᠣᠯ ᠬᠡᠯᠡᠨ ᠳ᠋ᠦ᠍ ᠣᠯᠠᠨ ᠲᠣᠭᠠ ᠪᠠᠷ ᠬᠤᠪᠢᠯᠭᠠᠬᠤ ᠳ᠋ᠤ᠌ ᠢᠯᠡᠷᠡᠭᠦᠯᠬᠦ ᠳᠠᠭᠠᠪᠤᠷᠢ ᠨᠢ᠄
1《ᠨᠠᠷ》— ᠳᠠᠭᠠᠪᠤᠷᠢ ᠶ᠋ᠢ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋ ᠵᠢᠭᠠᠭᠰᠠᠨ ᠨᠡᠷᠡ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠡᠬᠡᠰᠢᠭ᠂ ᠭᠡᠢᠭᠦᠯᠦᠭᠴᠢ ᠭᠡᠵᠦ ᠢᠯᠭᠠᠯ ᠦᠭᠡᠢ᠂ ᠰᠠᠯᠤᠩᠭᠢ ᠪᠢᠴᠢᠵᠦ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡ᠄ ᠠᠬᠠ ᠨᠠᠷ᠂ ᠳᠡᠭᠦᠦ ᠨᠠᠷ᠂ ᠡᠵᠢ ᠨᠠᠷ᠂ ᠪᠠᠭᠰᠢ ᠨᠠᠷ᠂ ᠲᠣᠭᠣᠭᠠᠴᠢ ᠨᠠᠷ᠂ ᠵᠢᠯᠣᠭᠣᠴᠢ ᠨᠠᠷ᠂ ᠭᠦᠨ ᠤᠬᠠᠭᠠᠨᠲᠠᠨ ᠨᠠᠷ᠂ ᠰᠡᠬᠡᠭᠡᠲᠡᠨ ᠨᠠᠷ ᠭᠡᠬᠦ ᠮᠡᠲᠦ᠃
2《ᠴᠣᠳ ᠴᠤᠤᠯ》— ᠳᠠᠭᠠᠪᠤᠷᠢ ᠶ᠋ᠢ ᠡᠬᠡᠰᠢᠭ ᠪᠠ《᠊᠊ᠨ ᠂ ᠊᠊ᠯ᠂ ᠊᠊ᠷ》 ᠳᠡᠪᠢᠰᠬᠡᠷ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ ᠳ᠋ᠦ᠍ ᠵᠠᠯᠭᠠᠵᠤ ᠪᠢᠴᠢᠨᠡ᠃ ᠡᠭᠦᠨ ᠳ᠋ᠦ᠍《᠊᠊ᠨ》 ᠳᠡᠪᠢᠰᠬᠡᠷ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ ᠳ᠋ᠦ᠍ ᠵᠠᠯᠭᠠᠬᠤ ᠳ᠋ᠤ᠌《᠊᠊ᠨ》 ᠨᠢ ᠬᠠᠰᠤᠭᠳᠠᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠪᠠᠭᠠ+ ᠴᠣᠳ ᠴᠤᠤᠯ — ᠪᠠᠭᠠᠴᠤᠳ᠂ ᠪᠠᠭᠠᠴᠤᠤᠯ
ᠪᠠᠭᠠᠲᠤᠷ+ ᠴᠣᠳ— ᠪᠠᠭᠠᠲᠤᠷᠴᠤᠳ᠂
ᠮᠣᠩᠭᠣᠯ+ ᠴᠣᠳ— ᠮᠣᠩᠭᠣᠯᠴᠤᠳ
ᠰᠠᠢᠨ+ ᠴᠣᠳ ᠴᠤᠤᠯ— ᠰᠠᠢᠴᠤᠳ᠂ ᠰᠠᠢᠴᠤᠤᠯ᠃
ᠡᠷᠡᠭᠲᠡᠢ+ ᠴᠣᠳ— ᠡᠷᠡᠭᠲᠡᠢᠴᠦᠳ
ᠵᠠᠯᠠᠭᠤ+ ᠴᠣᠳ— ᠵᠠᠯᠠᠭᠤᠴᠤᠳ
ᠨᠠᠰᠤᠲᠠᠢ+ ᠴᠤᠤᠯ— ᠨᠠᠰᠤᠲᠠᠢᠴᠤᠤᠯ
ᠡᠮᠡᠭᠲᠡᠢ+ ᠴᠣᠳ— ᠡᠮᠡᠭᠲᠡᠢᠴᠦᠳ
ᠤᠷᠠᠨ+ ᠴᠤᠤᠯ ᠴᠣᠳ— ᠤᠷᠠᠴᠤᠤᠯ᠂ ᠤᠷᠠᠴᠤᠳ
ᠶᠡᠬᠡ+ ᠴᠤᠤᠯ— ᠶᠡᠬᠡᠴᠦᠦᠯ ᠭᠡᠬᠦ ᠮᠡᠲᠦ᠃
3《᠊᠊ᠳ》— ᠳᠠᠭᠠᠪᠤᠷᠢ ᠶ᠋ᠢ ᠡᠬᠡᠰᠢᠭ ᠪᠠ 《᠊᠊ᠨ᠂ ᠊᠊ᠯ᠂᠊᠊ᠷ》 ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ ᠳ᠋ᠦ᠍ ᠵᠠᠯᠭᠠᠵᠤ ᠪᠢᠴᠢᠵᠦ ᠬᠡᠷᠡᠭᠯᠡᠨᠡ᠃ ᠭᠡᠬᠦ ᠳ᠋ᠡᠭᠡᠨ᠄ ᠦᠭᠡ ᠶ᠋ᠢᠨ ᠡᠴᠦᠰ ᠦ᠋ᠨ ᠬᠣᠣᠰ ᠡᠬᠡᠰᠢᠭ《ᠢ》 ᠪᠠ《᠊᠊ᠨ᠂ ᠊᠊ᠯ᠂ ᠊᠊ᠷ》— ᠳᠡᠪᠢᠰᠬᠡᠷ ᠢ᠋ ᠨᠢ ᠬᠠᠰᠤᠵᠤ ᠵᠠᠯᠭᠠᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠨᠥᠬᠥᠷ+ ᠊ᠳ— ᠨᠥᠬᠥᠳ
ᠡᠪᠦᠭᠡᠨ ᠊ᠳ— ᠡᠪᠦᠭᠡᠳ
ᠪᠠᠶᠠᠨ+ ᠊ᠳ— ᠪᠠᠶᠠᠳ
ᠲᠦᠰᠢᠮᠡᠯ+ ᠊ᠳ— ᠲᠦᠰᠢᠮᠡᠳ
ᠮᠣᠳᠣ+ ᠊ᠳ— ᠮᠣᠳᠣᠳ
ᠰᠤᠷᠤᠭᠴᠢ+ ᠊ᠳ— ᠰᠤᠷᠤᠭᠴᠢᠳ
ᠨᠣᠬᠠᠢ+— ᠨᠣᠬᠠᠳ ᠭᠡᠬᠦ ᠮᠡᠲᠦ᠃
4《᠊ᠰ》— ᠳᠠᠭᠠᠪᠤᠷᠢ ᠶ᠋ᠢ ᠡᠬᠡᠰᠢᠭ ᠪᠠ《᠊᠊ᠨ》 ᠳᠡᠪᠢᠰᠬᠡᠷ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ ᠳ᠋ᠦ᠍ ᠵᠣᠯᠭᠠᠵᠤ ᠪᠢᠴᠢᠵᠦ ᠬᠡᠷᠡᠭᠯᠡᠨᠡ᠃ ᠭᠡᠬᠦ ᠳ᠋ᠡᠭᠡᠨ᠄《᠊᠊ᠨ》 ᠳᠡᠪᠢᠰᠭᠡᠷ ᠪᠠ《ᠢ》 ᠶ᠋ᠢᠨ ᠬᠣᠣᠰ ᠡᠬᠡᠰᠢᠭ ᠨᠢ ᠬᠠᠰᠤᠭᠳᠠᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠠᠬᠠ+ ᠊ᠰ— ᠠᠬᠠᠰ
ᠶᠡᠬᠡ+ ᠊ᠰ— ᠶᠡᠬᠡᠰ
ᠦᠭᠡ+ ᠊ᠰ— ᠦᠭᠡᠰ
ᠠᠭᠤᠯᠠ+ ᠊ᠰ— ᠠᠭᠤᠯᠠᠰ
ᠬᠥᠮᠦᠨ+ ᠊ᠰ— ᠬᠥᠮᠦᠰ
ᠨᠣᠬᠠᠢ+ ᠊ᠰ— ᠨᠣᠬᠠᠰ ᠭᠡᠬᠦ ᠮᠡᠲᠦ᠃
5 ᠦ᠋ᠳ— ᠳᠠᠭᠠᠪᠤᠷᠢ ᠶ᠋ᠢ《᠊᠊ᠨ》 ᠡᠴᠡ ᠪᠤᠰᠤᠳ ᠭᠡᠢᠭᠦᠯᠦᠭᠴᠢ ᠪᠡᠷ
ᠲᠡᠭᠦᠰᠦᠭᠰᠡᠨ ᠦᠭᠡᠨ ᠦ᠌ ᠳᠠᠷᠠᠭᠠ ᠰᠠᠯᠤᠩᠭᠢᠳᠠ ᠪᠢᠴᠢᠵᠦ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠭᠡᠷ ᠦ᠋ᠳ᠂ ᠨᠣᠮ ᠦ᠋ᠳ᠂ ᠪᠠᠢᠰᠢᠩ ᠦ᠋ᠳ᠂ ᠠᠰᠠᠷ ᠦ᠋ᠳ᠂ ᠬᠢᠴᠢᠶᠡᠯ ᠦ᠋ᠳ ᠭᠡᠬᠦ ᠮᠡᠲᠦ᠃
6 ᠨᠤᠭᠤᠳ ᠨᠤᠭᠦᠳ — ᠳᠠᠭᠠᠪᠤᠷᠢ ᠶ᠋ᠢ ᠡᠬᠡᠰᠢᠭ ᠪᠠ《᠊᠊ᠨ》 ᠳᠡᠪᠢᠰᠬᠡᠷ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡᠨ ᠦ᠌ ᠳᠠᠷᠠᠭᠠ ᠰᠠᠯᠤᠩᠭᠢ ᠪᠢᠴᠢᠵᠦ ᠬᠡᠷᠡᠭᠯᠡᠨᠡ᠃ ᠡᠭᠦᠨ ᠳ᠋ᠦ᠍ ᠨᠤᠭᠤᠳ ᠢ᠋ ᠴᠢᠩᠭᠠ ᠦᠭᠡ ᠶ᠋ᠢᠨ ᠳᠠᠷᠠᠭᠠ᠂ ᠨᠤᠭᠦᠳ ᠢ᠋ ᠬᠥᠨᠳᠡᠢ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠲᠤᠰ ᠲᠤᠰ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠠᠳᠤᠭᠤ ᠨᠤᠭᠤᠳ᠂ ᠳᠠᠢᠰᠤᠨ ᠨᠤᠭᠤᠳ᠂ ᠰᠤᠷᠭᠠᠭᠤᠯᠢ ᠨᠤᠭᠤᠳ᠂ ᠮᠥᠷᠡᠨ ᠨᠤᠭᠦᠳ᠂ ᠡᠪᠡᠰᠦ ᠨᠤᠭᠦᠳ᠂ ᠰᠢᠷᠡᠭᠡ ᠨᠤᠭᠦᠳ᠂ ᠲᠡᠮᠡᠭᠡ ᠨᠤᠭᠦᠳ ᠭᠡᠬᠦ ᠮᠡᠲᠦ᠃
ᠣᠯᠠᠨ ᠲᠣᠭᠠᠨ ᠤ᠋ ᠳᠠᠭᠠᠪᠤᠷᠢ ᠶ᠋ᠢ ᠬᠡᠷᠡᠭᠯᠡᠬᠦ ᠳ᠋ᠦ᠍᠄
(1) ᠬᠥᠮᠦᠨ ᠶᠠᠭᠤᠮᠠ ᠶ᠋ᠢ ᠲᠣᠭᠠᠨ ᠤ᠋ ᠦᠭᠡ ᠪᠡᠷ ᠲᠣᠳᠣᠳᠬᠠᠭᠰᠠᠨ ᠪᠠᠢᠪᠠᠯ ᠣᠯᠠᠨ ᠲᠣᠭᠠᠨ ᠤ᠋ ᠳᠠᠭᠠᠪᠤᠷᠢ ᠶ᠋ᠢ ᠬᠡᠷᠡᠭᠯᠡᠬᠦ ᠬᠡᠷᠡᠭ ᠦᠭᠡᠢ᠃
(2) ᠬᠥᠮᠦᠨ ᠶᠠᠭᠤᠮᠠ ᠶ᠋ᠢ ᠣᠯᠠᠨ ᠴᠥᠭᠡᠨ ᠦ᠌ ᠦᠭᠡ ᠪᠡᠷ ᠲᠣᠳᠣᠳᠬᠠᠭᠰᠠᠨ ᠪᠠᠢᠪᠠᠯ ᠣᠯᠠᠨ ᠲᠣᠭᠠᠨ ᠤ᠋ ᠳᠠᠭᠠᠪᠤᠷᠢ ᠬᠡᠷᠡᠭᠯᠡᠬᠦ ᠬᠡᠷᠡᠭ ᠦᠭᠡᠢ᠃
(3) ᠲᠣᠭᠲᠠᠭᠰᠠᠨ ᠲᠣᠭᠠ ᠬᠡᠮᠵᠢᠶᠡ ᠶ᠋ᠢᠨ ᠤᠬᠠᠭᠳᠠᠬᠤᠨ ᠢ᠋ ᠪᠠᠭᠲᠠᠭᠠᠭᠰᠠᠨ ᠦᠭᠡᠰ ᠲᠦ᠍ ᠣᠯᠠᠨ ᠲᠣᠭᠠᠨ ᠤ᠋ ᠳᠠᠭᠠᠪᠤᠷᠢ ᠬᠡᠷᠡᠭᠯᠡᠬᠦ ᠬᠡᠷᠡᠭ ᠦᠭᠡᠢ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠣᠭᠲᠠᠷᠭᠤᠢ᠂ ᠰᠡᠳᠬᠢᠯ᠂ ᠬᠣᠶᠠᠷ ᠨᠢᠳᠦ᠂ ᠬᠣᠶᠠᠷ ᠴᠢᠬᠢ᠂ ᠬᠣᠶᠠᠷ ᠭᠠᠷ᠂ ᠬᠣᠶᠠᠷ ᠬᠥᠯ ᠭᠡᠬᠦ ᠮᠡᠲᠦ᠃
( ᠭᠤᠷᠪᠠ) ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠪᠠᠷ ᠬᠤᠪᠢᠯᠭᠠᠬᠤ
ᠬᠥᠮᠦᠨ ᠶᠠᠭᠤᠮᠠ ᠶ᠋ᠢᠨ ᠬᠠᠮᠢᠶᠠᠳᠠᠬᠤ ᠡᠵᠡᠨ ᠪᠡᠶᠡ ᠶ᠋ᠢ ᠵᠢᠭᠠᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠲᠡᠳᠡᠭᠡᠷ ᠢ᠋ ᠨᠡᠢᠲᠡ ᠣᠯᠠᠨ ᠠ᠋ᠴᠠ ᠨᠢ ᠢᠯᠭᠠᠨ ᠦᠵᠡᠭᠦᠯᠬᠦ ᠭᠡᠰᠡᠨ ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠶᠣᠰᠣ ᠶ᠋ᠢ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠭᠡᠨᠡ᠃ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠨᠢ ᠨᠡᠷᠡ ᠦᠭᠡ ᠶ᠋ᠢᠨ ᠵᠦᠢᠯ ᠳ᠋ᠦ᠍ ᠬᠣᠯᠪᠣᠭᠳᠠᠬᠤ ᠪᠥᠭᠡᠳ ᠮᠥᠨ ᠨᠡᠷᠡ ᠦᠭᠡ ᠶ᠋ᠢᠨ ᠤᠳᠬᠠ ᠪᠠᠷ ᠬᠡᠷᠡᠭᠯᠡᠭᠳᠡᠭᠰᠡᠨ ᠲᠡᠮᠳᠡᠭ ᠦᠭᠡ᠂ ᠲᠣᠭᠠᠨ ᠤ᠋ ᠦᠭᠡ᠂ ᠲᠥᠯᠥᠭᠡᠨ ᠦ᠌ ᠦᠭᠡ᠂ ᠲᠡᠮᠳᠡᠭ ᠦᠢᠯᠡ ᠦᠭᠡ᠂ ᠵᠢᠴᠢ ᠨᠥᠬᠥᠴᠡᠯ ᠦᠢᠯᠡ ᠦᠭᠡ ᠶ᠋ᠢᠨ ᠵᠠᠷᠢᠮ ᠬᠡᠯᠪᠡᠷᠢ ᠳ᠋ᠦ᠍ ᠪᠠᠰᠠ ᠬᠣᠯᠪᠣᠭᠳᠠᠬᠤ ᠶᠤᠮ᠃ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠶ᠋ᠢ ᠶᠡᠷᠦᠩᠬᠡᠢᠯᠡᠨ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠪᠠ ᠭᠤᠷᠪᠠᠨ ᠪᠡᠶᠡ ᠳ᠋ᠦ᠍ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠭᠡᠵᠦ ᠬᠣᠶᠠᠷ ᠠᠩᠭᠢᠯᠠᠵᠤ ᠪᠣᠢ᠃
1 ᠶᠡᠷᠦᠩᠬᠡᠢᠯᠡᠨ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ
ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠶᠠᠭᠤᠮᠠ ᠳ᠋ᠤ᠌ ᠲᠤᠰᠬᠠᠢᠯᠠᠨ ᠬᠠᠮᠢᠶᠠᠳᠠᠭᠤᠯᠬᠤ ᠦᠭᠡᠢ᠂ ᠨᠡᠢᠲᠡ ᠳ᠋ᠦ᠍ᠨᠢ ᠬᠠᠮᠢᠶᠠᠲᠠᠢ ᠪᠣᠯᠭᠠᠬᠤ ᠶᠣᠰᠣ ᠶ᠋ᠢ ᠶᠡᠷᠦᠩᠬᠡᠢᠯᠡᠨ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠭᠡᠨᠡ᠃ ᠶᠡᠷᠦᠩᠬᠡᠢᠯᠡᠨ ᠬᠠᠮᠢᠶᠠᠳᠠᠭᠤᠯᠬᠤ ᠳ᠋ᠤ᠌《 ᠪᠠᠨ᠂ ᠢ᠋ᠶ᠋ᠠᠨ》 ᠭᠡᠰᠡᠨ ᠬᠣᠶᠠᠷ ᠳᠠᠭᠠᠪᠤᠷᠢ ᠲᠠᠢ᠃
(1) ᠪᠠᠨ— ᠳᠠᠭᠠᠪᠤᠷᠢ ᠶ᠋ᠢ ᠡᠭᠡᠰᠢᠭ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠬᠠ ᠪᠠᠨ᠂ ᠰᠤᠷᠭᠠᠭᠤᠯᠢ ᠪᠠᠨ᠂ ᠪᠠᠭᠰᠢ ᠲᠠᠢ ᠪᠠᠨ᠂ ᠪᠠᠲᠤ ᠶ᠋ᠢ ᠪᠡᠨ᠂ ᠬᠤᠪᠴᠠᠰᠤ ᠪᠠᠨ᠂ ᠬᠤᠪᠴᠠᠰᠤ ᠠ᠋ᠴᠠ ᠪᠠᠨ᠂ ᠮᠣᠷᠢ ᠪᠠᠨ᠂ ᠬᠥᠨᠵᠢᠯᠡ ᠪᠡᠨ ᠭᠡᠬᠦ ᠮᠡᠲᠦ᠃
(2) ᠢ᠋ᠶ᠋ᠠᠨ— ᠳᠠᠭᠠᠪᠤᠷᠢ ᠶ᠋ᠢ ᠭᠡᠢᠭᠦᠯᠦᠭᠴᠢ ᠪᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠳᠡᠪᠲᠡᠷ ᠢ᠋ᠶ᠋ᠡᠨ᠂ ᠬᠤᠳᠳᠤᠭ ᠢ᠋ᠶ᠋ᠠᠨ᠂ ᠨᠣᠮ ᠢ᠋ᠶ᠋ᠠᠨ᠂ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ᠂ ᠨᠣᠮ ᠤ᠋ᠨ ᠢ᠋ᠶ᠋ᠠᠨ᠂ ᠪᠢᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠂ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ᠂ ᠲᠡᠮᠡᠭᠡᠳ ᠢ᠋ᠶ᠋ᠡᠨ ᠭᠡᠬᠦ ᠮᠡᠲᠦ᠃
ᠵᠢᠭᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠶ᠋ᠢᠨ ᠳᠠᠷᠠᠭᠠ《 ᠪᠠᠨ᠂ ᠢ᠋ᠶ᠋ᠠᠨ》 ᠢ᠋ ᠬᠠᠪᠰᠤᠷᠭᠠᠪᠠᠯ《ᠶ᠋ᠢ᠂ ᠢ᠋ 》 ᠶ᠋ᠢ《ᠶᠣ 》 ᠪᠠᠷ ᠣᠷᠣᠯᠠᠭᠤᠯᠵᠤ᠂《 ᠪᠠᠨ᠂ ᠢ᠋ᠶ᠋ᠠᠨ》 ᠢ᠋ ᠨᠢ《᠊᠊ᠭᠠᠨ᠂ ᠊᠊ᠬᠡᠨ》 ᠢ᠋ᠶ᠋ᠡᠷ ᠰᠣᠯᠢᠵᠤ᠂ ᠥᠭᠬᠦ ᠣᠷᠣᠰᠢᠬᠤ᠂ ᠭᠠᠷᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠷᠠᠭᠠ ᠬᠡᠷᠡᠭᠯᠡᠪᠡᠯ《 ᠪᠠᠨ᠂ ᠢ᠋ᠶ᠋ᠡᠨ》 ᠢ᠋《᠊᠊ᠭᠠᠨ᠂ ᠊᠊ᠬᠡᠨ》 ᠢ᠋ᠶ᠋ᠡᠷ ᠰᠣᠯᠢᠵᠤ ᠪᠣᠯᠤᠨᠠ᠃
ᠵᠢᠭᠠᠬᠤ+《 ᠪᠠᠨ᠂ ᠢ᠋ᠶ᠋ᠠᠨ》—ᠶᠤᠭᠠᠨ᠂ᠶᠤᠭᠠᠨ ᠭᠡᠬᠦ ᠮᠡᠲᠦ᠃
ᠥᠭᠬᠦ ᠣᠷᠣᠰᠢᠬᠤ+《 ᠪᠠᠨ᠂ ᠢ᠋ᠶ᠋ᠠᠨ》— ᠳ᠋ᠠᠭᠠᠨ ᠳ᠋ᠡᠭᠡᠨ᠂ ᠲᠠᠭᠠᠨ ᠲᠡᠭᠡᠨ ᠭᠡᠬᠦ ᠮᠡᠲᠦ᠃
ᠭᠠᠷᠬᠤ+《 ᠪᠠᠨ᠂ ᠢ᠋ᠶ᠋ᠠᠨ》— ᠠ᠋ᠴᠠᠭᠠᠨ᠂ ᠠ᠋ᠴᠠᠭᠠᠨ ᠭᠡᠬᠦ ᠮᠡᠲᠦ ᠪᠡᠷ ᠰᠣᠯᠢᠭᠳᠠᠵᠤ ᠪᠣᠯᠤᠨᠠ᠃
2 ᠭᠤᠷᠪᠠᠨ ᠪᠡᠶᠡ ᠳ᠋ᠦ᠍ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ
ᠪᠡᠶᠡ ᠶ᠋ᠢᠨ ᠲᠥᠯᠥᠭᠡᠨ ᠦ᠌ ᠦᠭᠡ ᠶ᠋ᠢᠨ ᠬᠠᠷᠢᠶᠠᠯᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢ ᠶ᠋ᠢ ᠬᠡᠷᠡᠭᠯᠡᠬᠦ ᠦᠭᠡᠢ ᠪᠡᠷ ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ ᠶ᠋ᠢᠨ ᠠᠷᠭᠠ ᠪᠠᠷ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠶ᠋ᠢ ᠢᠯᠡᠷᠡᠭᠦᠯᠬᠦ ᠳ᠋ᠦ᠍ ᠤᠤᠯ ᠪᠡᠶᠡ ᠶ᠋ᠢᠨ ᠲᠥᠯᠥᠭᠡᠨ ᠦ᠌ ᠦᠭᠡ ᠶ᠋ᠢᠨ
ᠤᠳᠬᠠ ᠪᠠᠷ ᠭᠤᠷᠪᠠᠨ ᠪᠡᠶᠡ ᠶ᠋ᠢᠨ ᠠᠯᠢᠨ ᠪᠣᠯᠬᠤ ᠨᠢ ᠲᠣᠪ ᠲᠣᠳᠣᠷᠬᠠᠢ ᠪᠠᠢᠳᠠᠭ ᠲᠤᠯᠠ ᠡᠭᠦᠨ ᠢ᠋ ᠭᠤᠷᠪᠠᠨ ᠪᠡᠶᠡ ᠳ᠋ᠦ᠍ ᠬᠠᠮᠢᠶᠠᠳᠠᠭᠤᠯᠬᠤ ᠶᠣᠰᠣ ᠭᠡᠨᠡ᠃
ᠭᠤᠷᠪᠠᠨ ᠪᠡᠶᠡ ᠳ᠋ᠦ᠍ ᠬᠠᠮᠢᠶᠠᠳᠠᠭᠤᠯᠬᠤ ᠳᠠᠭᠠᠪᠤᠷᠢ ᠨᠢ᠄《ᠮᠢᠨᠢ᠂ ᠴᠢᠨᠢ᠂ ᠨᠢ》 ᠭᠤᠷᠪᠠᠨ ᠳᠠᠭᠠᠪᠤᠷᠢ ᠲᠠᠢ᠃
(1) ᠮᠢᠨᠢ— ᠳᠠᠭᠠᠪᠤᠷᠢ ᠶ᠋ᠢ ᠨᠢᠭᠡᠳᠦᠭᠡᠷ ᠪᠡᠶᠡ ᠳ᠋ᠦ᠍ ᠬᠠᠮᠢᠶᠠᠳᠠᠭᠤᠯᠬᠤ ᠳ᠋ᠤ᠌ ᠬᠡᠷᠡᠭᠯᠡᠨᠡ᠃
(2) ᠴᠢᠨᠢ— ᠳᠠᠭᠠᠪᠤᠷᠢ ᠶ᠋ᠢ ᠬᠣᠶᠠᠳᠤᠭᠠᠷ ᠪᠡᠶᠡ ᠳ᠋ᠦ᠍ ᠬᠠᠮᠢᠶᠠᠳᠠᠭᠤᠯᠬᠤ ᠳ᠋ᠤ᠌ ᠬᠡᠷᠡᠭᠯᠡᠨᠡ᠃
(3) ᠨᠢ— ᠳᠠᠭᠠᠪᠤᠷᠢ ᠶ᠋ᠢ ᠭᠤᠷᠪᠠᠳᠤᠭᠠᠷ ᠪᠡᠶᠡ ᠳ᠋ᠦ᠍ ᠬᠠᠮᠢᠶᠠᠳᠠᠭᠤᠯᠬᠤ ᠳ᠋ᠤ᠌ ᠬᠡᠷᠡᠭᠯᠡᠨᠡ᠃
ᠭᠤᠷᠪᠠᠨ ᠪᠡᠶᠡ ᠪᠡᠷ ᠬᠠᠮᠢᠶᠠᠳᠠᠭᠤᠯᠬᠤ《ᠮᠢᠨᠢ᠂ ᠴᠢᠨᠢ᠂ ᠨᠢ》 ᠶ᠋ᠢ ᠶᠠᠮᠠᠷ ᠴᠤ᠌ ᠦᠰᠦᠭ ᠢ᠋ᠶ᠋ᠡᠷ ᠲᠡᠭᠦᠰᠦᠭᠰᠡᠨ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠪᠦᠷ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠪᠥᠭᠡᠳ ᠶᠠᠮᠠᠷ ᠴᠤ᠌ ᠲᠡᠢᠨ ᠢᠯᠭᠠᠯ ᠤ᠋ᠨ ᠬᠡᠯᠪᠡᠷᠢᠲᠦ ᠦᠭᠡ ᠶ᠋ᠢᠨ ᠳᠠᠷᠠᠭᠠ ᠬᠡᠷᠡᠭᠯᠡᠬᠦ ᠳ᠋ᠦ᠍ ᠲᠡᠢᠨ ᠢᠯᠭᠠᠯ ᠤ᠋ᠨ ᠳᠠᠭᠠᠪᠤᠷᠢ ᠶ᠋ᠢ ᠨᠢ ᠭᠡᠭᠡᠬᠦ ᠦᠭᠡᠢ᠃
ᠵᠢᠱ᠌ᠢᠶᠡᠯᠡᠪᠡᠯ᠄
(1) ᠮᠢᠨᠢ— ᠨᠠᠮ ᠮᠢᠨᠢ᠂ ᠤᠯᠤᠰ ᠠ᠋ᠴᠠ ᠮᠢᠨᠢ᠂ ᠨᠣᠮ ᠢ᠋ᠶ᠋ᠠᠷ ᠮᠢᠨᠢ᠂ ᠡᠵᠢ ᠳ᠋ᠦ᠍ ᠮᠢᠨᠢ᠂ ᠮᠣᠷᠢ ᠶ᠋ᠢ ᠮᠢᠨᠢ ᠭᠡᠬᠦ ᠮᠡᠲᠦ᠃
(2) ᠴᠢᠨᠢ— ᠨᠣᠮ ᠴᠢᠨᠢ᠂ ᠨᠣᠮ ᠠ᠋ᠴᠠ ᠴᠢᠨᠢ᠂ ᠮᠣᠷᠢ ᠴᠢᠨᠢ᠂ ᠠᠪᠤ ᠴᠢᠨᠢ᠂ ᠠᠪᠤ ᠠ᠋ᠴᠠ ᠴᠢᠨᠢ᠂ ᠠᠬᠠ ᠳ᠋ᠤ᠌ ᠴᠢᠨᠢ᠂ ᠡᠭᠡᠴᠢ ᠶ᠋ᠢ ᠴᠢᠨᠢ᠂ ᠳᠡᠭᠦᠦ ᠪᠡᠷ ᠴᠢᠨᠢ ᠭᠡᠬᠦ ᠮᠡᠲᠦ
(3) ᠨᠢ— ᠲᠤᠭ ᠨᠢ᠂ ᠲᠤᠭ ᠢ᠋ᠶ᠋ᠠᠷ ᠨᠢ᠂ ᠡᠵᠢ ᠨᠢ᠂ ᠡᠵᠢ ᠡᠴᠡ ᠨᠢ᠂ ᠡᠭᠡᠵᠢ ᠨᠢ᠂ ᠶᠠᠪᠤᠬᠤ ᠠ᠋ᠴᠠ ᠨᠢ᠂ ᠡᠬᠡ ᠳ᠋ᠦ᠍ ᠨᠢ᠂ ᠳᠡᠭᠦᠦ ᠪᠡᠷ ᠨᠢ ᠭᠡᠬᠦ ᠮᠡᠲᠦ᠃
※ ᠢᠷᠡᠯᠲᠡ᠄ ᠶᠡᠷᠡᠭᠡᠳ ᠣᠨ ᠤ᠋ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠯᠡ ᠪᠢᠴᠢᠭ ᠦ᠋ᠨ ᠠᠭᠤᠯᠭᠠ ᠳ᠋ᠤ᠌ ᠰᠤᠷᠴᠤ ᠪᠠᠢᠭᠰᠠᠨ ᠬᠡᠯᠡᠨ ᠵᠦᠢ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢ ᠬᠡᠯᠡᠨ ᠦ ᠵᠦᠢ ᠡᠴᠡ ᠯᠠᠪᠯᠠᠵᠤ ᠡᠮᠬᠢᠳᠬᠡᠪᠡ᠃
ᠡᠮᠬᠢᠳᠬᠡᠨ ᠨᠠᠢᠷᠠᠭᠤᠯᠵᠤ᠂ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠳᠬᠠᠨᠰᠣᠠ