ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠡᠯᠴᠢ ᠪᠡᠷ ᠠᠨᠵᠢᠰᠤ ᠲᠠᠲᠠᠭᠤᠯᠵᠤ ᠲᠠᠷᠢᠶᠠ ᠲᠠᠷᠢᠭᠤᠯᠤᠭᠰᠠᠨ ᠨᠢ-ᠪᠠᠯᠭᠠᠨᠰᠠᠩ ᠤᠨ ᠦᠯᠢᠭᠡᠷҮхэр морин толгойт элчээр анжис татуулж тариа дариулсан нь-Балгансангийн үлгэр
708 一 ᠡᠷᠯᠢᠭ ᠬᠠᠭᠠᠨ ᠲᠠᠢ ᠲᠡᠮᠡᠴᠡᠯᠳᠦᠭᠰᠡᠨ ᠦ᠌ ᠬᠣᠶᠠᠷ ᠤ᠋ᠨ ᠬᠤᠪᠢᠯᠪᠤᠷᠢ
ᠡᠷᠯᠢᠭ ᠬᠠᠭᠠᠨ ᠤ᠋ ᠡᠯᠴᠢ ᠬᠢᠢ ᠰᠦᠨᠡᠰᠦᠨ ᠴᠢᠳᠬᠥᠷ᠂ ᠪᠠᠯᠭᠠᠨᠰᠠᠩ ᠤ᠋ᠨ ᠤᠷᠠᠬᠠ ᠳ᠋ᠤ᠌ ᠤᠨᠠᠵᠤ ᠭᠠᠬᠠᠢ ᠶ᠋ᠢᠨ ᠳᠠᠪᠤᠰᠠᠩ ᠳ᠋ᠤ᠌ ᠬᠣᠷᠢᠭᠳᠠᠵᠤ᠂ ᠬᠠᠮᠤᠭ ᠪᠡᠶᠡ ᠪᠡᠨ ᠬᠠᠷᠠ ᠨᠥᠵᠢ ᠪᠣᠯᠲᠠᠯᠠ ᠢᠰᠬᠦᠯᠦᠭᠦᠯᠦᠭᠡᠳ᠂ ᠬᠠᠯᠠᠭᠤᠨ ᠭᠣᠣᠯ ᠢ᠋ᠶ᠋ᠠᠨ ᠲᠠᠰᠤᠯᠤᠭᠤᠯᠬᠤ ᠰᠢᠬᠠᠵᠤ᠂ ᠠᠷᠠᠢ ᠴᠢᠷᠠᠢ ᠵᠢᠭᠤᠲᠠᠨ ᠡᠷᠭᠢᠵᠦ ᠢᠷᠡᠭᠡᠳ᠂ ᠡᠷᠯᠢᠭ ᠬᠠᠭᠠᠨ ᠳ᠋ᠠᠭᠠᠨ ᠡᠯᠳᠡᠭᠳᠡᠭᠰᠡᠨ ᠤᠴᠢᠷ ᠢ᠋ᠶ᠋ᠠᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍᠂ ᠡᠷᠯᠢᠭ ᠬᠠᠭᠠᠨ ᠲᠤᠢᠯ ᠢ᠋ᠶ᠋ᠠᠷ ᠠᠭᠤᠷᠯᠠᠵᠤ᠂ ᠦᠬᠡᠷ ᠲᠣᠯᠣᠭᠠᠢᠲᠤ᠂ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠣᠶᠠᠷ ᠴᠢᠳᠬᠥᠷ ᠢ᠋ᠶ᠋ᠠᠨ ᠳᠠᠭᠤᠳᠠᠵᠤ᠄
《ᠪᠠᠯᠭᠠᠨᠰᠠᠩ ᠢ᠋ ᠪᠠᠷᠢᠵᠤ ᠢᠷᠡ!》 ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠶᠠᠪᠤᠭᠤᠯᠵᠤ ᠭᠡᠨᠡ᠃
ᠵᠠ ᠣᠳᠣ᠂ ᠦᠬᠡᠷ ᠲᠣᠯᠣᠭᠠᠢᠲᠤ᠂ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠣᠶᠠᠷ ᠴᠢᠳᠬᠥᠷ ᠦ᠋ᠨ ᠪᠠᠯᠭᠠᠨᠰᠠᠩ ᠢ᠋ ᠪᠠᠷᠢᠬᠤ ᠪᠠᠷ ᠮᠣᠷᠢᠯᠠᠵᠤ ᠶᠠᠪᠤᠭᠠ ᠶ᠋ᠢ ᠬᠡᠯᠡᠬᠦ ᠦᠭᠡᠢ᠂ ᠪᠠᠯᠭᠠᠨᠰᠠᠩ ᠤ᠋ᠨ ᠪᠠᠢᠳᠠᠯ ᠢ᠋ ᠶᠠᠷᠢᠶᠠ᠃ ᠪᠠᠯᠭᠠᠨᠰᠠᠩ᠂ᠬᠡᠢ ᠰᠦᠨᠡᠰᠦᠨ ᠴᠢᠳᠬᠥᠷ ᠢ᠋ ᠶᠠᠪᠤᠭᠤᠯᠤᠭᠰᠠᠨ ᠤ᠋ ᠬᠣᠢᠨᠠ᠂ ᠣᠳᠣ ᠯᠠᠪ ᠦᠬᠡᠷ ᠲᠣᠯᠣᠭᠠᠢᠲᠤ᠂ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠣᠶᠠᠷ ᠴᠢᠳᠬᠥᠷ ᠨᠢ ᠢᠷᠡᠬᠦ ᠪᠠᠢᠬᠠ ᠭᠡᠵᠦ ᠮᠡᠳᠡᠭᠡᠳ᠂ ᠬᠠᠰᠠᠭ ᠲᠡᠷᠭᠡᠨ ᠳ᠋ᠡᠭᠡᠨ ᠬᠠᠷᠠ ᠪᠤᠳᠠᠭᠠ ᠶ᠋ᠢᠨ ᠦᠷᠡ ᠬᠠᠮᠬᠠᠷᠬᠠᠢ ᠠᠨᠵᠢᠰᠤ ᠪᠠᠨ ᠲᠡᠭᠡᠭᠡᠵᠦ᠂ ᠡᠬᠡᠨᠡᠷ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠵᠢᠳᠬᠦᠭᠰᠡᠭᠡᠷ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠢᠷᠡᠭᠡᠳ᠂ ᠲᠠᠷᠢᠶᠠ ᠪᠠᠨ ᠲᠠᠷᠢᠵᠤ ᠭᠡᠨᠡ᠃
ᠤᠨᠤᠭᠠ ᠬᠥᠯᠦᠭ ᠦᠭᠡᠢ ᠪᠣᠯᠬᠣᠷ᠂ ᠡᠬᠡᠨᠡᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠨᠵᠢᠰᠤ ᠪᠠᠨ ᠪᠠᠷᠢᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠠᠨᠵᠢᠰᠤ ᠪᠠᠨ ᠴᠢᠷᠦᠭᠰᠡᠭᠡᠷ ᠲᠠᠷᠢᠶᠠᠯᠠᠵᠤ ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠣᠶᠠᠷ ᠴᠢᠳᠬᠥᠷ ᠦ᠋ᠨ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠵᠠᠢ!
ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠣᠶᠠᠷ ᠴᠢᠳᠬᠥᠷ᠂ ᠪᠠᠯᠭᠠᠨᠰᠠᠩ ᠤ᠋ᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠬᠦᠯᠡ᠂ ᠪᠠᠯᠭᠠᠨᠰᠠᠩ ᠪᠠᠷᠠ ᠲᠤᠷᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠠᠢᠯ ᠠᠢᠮᠠᠭ ᠤ᠋ᠨ ᠬᠥᠮᠦᠰ ᠡᠴᠡ ᠨᠢ ᠰᠤᠷᠠᠭᠰᠠᠭᠠᠷ᠂ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠵᠤ ᠲᠠᠷᠢᠶᠠ ᠪᠠᠨ ᠲᠠᠷᠢᠬᠤ ᠪᠠᠷ ᠶᠠᠪᠤᠯᠠ ᠭᠡᠵᠦ ᠰᠣᠨᠣᠰᠤᠭᠠᠳ ᠬᠠᠩᠭᠠᠢ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠨᠡᠬᠡᠵᠦ ᠢᠷᠡᠭᠡᠳ᠄
《ᠬᠦᠢ ᠪᠠᠯᠭᠠᠨᠰᠠᠩ! ᠡᠷᠡᠯᠬᠡᠭ ᠬᠠᠭᠠᠨ ᠴᠠᠮᠠᠢᠢ ᠬᠤᠷᠳᠤᠨ ᠢᠷᠡ ᠭᠡᠵᠦ ᠳᠠᠭᠤᠳᠠᠵᠤ ᠪᠠᠢᠨᠠ!》 ᠭᠡᠪᠡ᠃ ᠪᠠᠯᠭᠠᠨᠰᠠᠩ ᠪᠠᠬᠠᠨ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠪᠠᠢᠳᠠᠯᠢᠶᠠᠷ᠄
《ᠪᠠᠶ᠋ᠢᠵᠨ ᠪᠠᠶ᠋ᠢᠵᠨ! ᠪᠢ ᠡᠨᠡ ᠲᠠᠷᠢᠶᠠ ᠪᠠᠨ ᠲᠠᠷᠢᠵᠤ ᠳᠠᠭᠤᠰᠤᠭᠠᠳ ᠶᠠᠪᠤᠶᠠ!》 ᠭᠡᠵᠡᠢ᠃ ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠶ᠋ᠢᠲᠤ ᠴᠢᠳᠬᠥᠷ ᠠᠭᠤᠷᠯᠠᠨ᠄
《ᠡᠷᠯᠢᠭ ᠬᠠᠭᠠᠨ ᠳᠠᠭᠤᠳᠠᠵᠤ ᠪᠠᠶ᠋ᠢᠬᠤ ᠳ᠋ᠤ ᠪᠠᠰᠠ ᠶᠠᠭᠤᠨ ᠤ ᠬᠢᠨᠢ ᠲᠠᠷᠢᠶᠠ ᠲᠠᠷᠢᠴᠢᠬᠠᠭᠰᠠᠨ ᠶᠤᠮ? ᠬᠤᠷᠳᠤᠨ ᠶᠠᠪᠤᠶᠠ!》 ᠭᠡᠵᠦ ᠰᠢᠬᠠᠮᠳᠠᠭᠤᠯᠤᠭᠰᠠᠨ ᠳ᠋ᠤ ᠪᠠᠯᠭᠠᠨᠰᠠᠩ᠄
《ᠡᠷᠯᠢᠭ ᠬᠠᠭᠠᠨ ᠤ ᠵᠠᠬᠢᠶᠠ ᠢᠷᠡᠨᠡ ᠭᠡᠰᠡᠨ ᠊ᠢ ᠠᠯᠢ ᠡᠷᠲᠡᠨ ᠡᠴᠡ ᠮᠡᠳᠡᠭᠰᠡᠨ ᠪᠣᠯᠬᠣᠷ᠂ ᠠᠯᠤᠰ ᠤᠨ ᠵᠠᠮ ᠡᠳᠦᠷ ᠬᠣᠨᠣᠭ ᠤᠳᠠᠬᠤ ᠲᠤᠯᠠ᠂ ᠵᠠᠮ ᠤᠨ ᠶ᠋ᠢᠠᠨ ᠬᠦᠨᠡᠰᠦ ᠶ᠋ᠢ ᠪᠡᠯᠡᠳᠬᠡᠭᠡᠳ ᠶᠠᠪᠤᠶᠠ ᠭᠡᠰᠡᠨ ᠶᠤᠮ᠃ ᠳᠠᠬᠢᠭᠠᠳ ᠬᠡᠯᠡᠪᠡᠯ᠂ ᠪᠢ ᠶᠠᠪᠤᠬᠤ ᠳ᠋ᠤ ᠭᠡᠷ ᠲᠦ ᠪᠠᠰᠠ ᠡᠬᠡᠨᠡᠷ ᠬᠡᠦᠬᠡᠳ ᠮᠢᠨᠢ ᠦᠯᠡᠳᠡᠨᠡ᠃ ᠪᠢ ᠵᠠᠮ ᠳ᠋ᠠᠭᠠᠨ ᠬᠣᠶᠠᠭᠤᠯᠠ ᠬᠦᠨᠡᠰᠦ ᠬᠡᠷᠡᠭ ᠲᠡᠢ ᠭᠡᠲᠡᠯᠡ᠂ ᠭᠡᠷ ᠲᠦ ᠦᠯᠡᠳᠡᠭᠰᠡᠨ ᠬᠥᠮᠦᠰ ᠲᠦ ᠴᠦ᠍ ᠪᠤᠳᠠᠭᠠ ᠲᠠᠷᠢᠶᠠ ᠬᠡᠷᠡᠭᠲᠡᠢ ᠰᠢᠦ᠃ ᠲᠠ ᠬᠣᠶᠠᠷ ᠴᠦ᠍ ᠪᠠᠰᠠ ᠲᠠᠪᠤᠨ ᠲᠠᠷᠢᠶᠠᠨ ᠤ ᠦᠷᠡ ᠶ᠋ᠢ ᠠᠮᠲᠠᠯᠠᠵᠤ ᠦᠵᠡᠪᠡᠯ ᠬᠡᠳᠦᠢ ᠰᠠᠶ᠋ᠢᠬᠠᠨ ᠪᠤᠢ⁈》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃
ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠶ᠋ᠢᠲᠤ ᠬᠣᠶᠠᠷ ᠴᠢᠳᠬᠥᠷ᠄
《ᠲᠡᠭᠡᠪᠡᠯ ᠡᠨᠡ ᠲᠠᠷᠢᠶᠠ ᠪᠠᠨ ᠴᠢ ᠬᠡᠵᠢᠶᠡ ᠲᠠᠷᠢᠵᠤ ᠳᠠᠭᠤᠰᠬᠠᠬᠤ ᠪᠤᠢ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠂
《ᠤᠨᠤᠭᠠᠷᠢ ᠬᠦᠯᠦᠭ ᠲᠡᠢ ᠶᠤᠮ ᠪᠣᠯ ᠦᠵᠡᠬᠦ ᠶ᠋ᠢᠨ ᠵᠠᠭᠤᠷᠠ ᠲᠠᠷᠢᠭᠠᠳ ᠳᠠᠭᠤᠰᠬᠠᠴᠢᠬᠠᠬᠤ ᠶᠤᠮ᠃ ᠠᠨᠵᠢᠰᠤ ᠵᠢᠳᠬᠦᠵᠦ ᠲᠠᠷᠢᠬᠤ ᠪᠣᠯᠬᠣᠷ ᠠᠯᠢ ᠬᠤᠷᠳᠤᠨ ᠳ᠋ᠠᠭᠠᠨ ᠠᠷᠪᠠᠭᠠᠳ ᠡᠳᠦᠷ ᠪᠣᠯᠤᠨᠠ᠂ ᠬᠡᠯᠳᠡᠰᠬᠡᠪᠡᠯ ᠬᠣᠷᠢᠭᠠᠳ ᠬᠣᠨᠣᠬᠤ ᠴᠤ ᠮᠠᠭᠠᠳ》 ᠭᠡᠵᠦ ᠬᠡᠯᠡᠵᠡᠢ᠃
《ᠲᠡᠭᠡᠭᠡᠳ ᠶᠠᠭᠠᠬᠢᠵᠤ ᠪᠣᠯᠬᠤ ᠶᠤᠮ!》 ᠬᠣᠶᠠᠷ ᠴᠢᠳᠬᠥᠷ ᠪᠠᠬᠠᠨ ᠰᠠᠨᠳᠤᠷᠴᠤ
《ᠴᠠᠭ ᠰᠠᠭᠠᠲᠠᠪᠠᠯ᠂ ᠡᠷᠯᠢᠭ ᠬᠠᠭᠠᠨ ᠬᠦᠯᠢᠶᠡᠬᠦ ᠦᠭᠡᠢ ᠰᠢᠦ?》 ᠭᠡᠵᠡᠢ᠃
ᠪᠠᠯᠭᠠᠨᠰᠠᠩ ᠤᠯᠠᠮ ᠰᠦᠷᠳᠡᠭᠦᠯᠵᠦ᠄
《ᠲᠠᠷᠢᠶᠠ ᠪᠠᠨ ᠲᠠᠷᠢᠵᠤ ᠪᠠᠷᠠᠬᠤ ᠦᠭᠡᠢ ᠪᠣᠯ ᠪᠢ ᠴᠦ᠍ ᠶᠠᠪᠤᠬᠤ ᠦᠭᠡᠢ ᠳ᠋ᠠ! ᠲᠠ ᠬᠣᠶᠠᠭᠤᠯᠠ ᠲᠣᠩ ᠶᠠᠭᠠᠷᠠᠵᠤ ᠪᠠᠶ᠋ᠢᠪᠠᠯ ᠬᠠᠪᠰᠤᠷᠴᠤ ᠪᠠᠶ᠋ᠢᠭᠠᠳ ᠬᠤᠷᠳᠤᠬᠠᠨ ᠲᠠᠷᠢᠵᠤ ᠳᠠᠭᠤᠰᠬᠠᠭᠠᠳ ᠶᠠᠪᠤᠵᠠᠭᠠᠶᠠ᠃ ᠲᠡᠭᠡᠪᠡᠯ ᠲᠠ ᠬᠣᠶᠠᠷ ᠲᠤ ᠲᠠᠪᠤᠨ ᠲᠠᠷᠢᠶᠠ ᠠᠮᠲᠠᠯᠠᠭᠤᠯᠤᠶᠠ》 ᠭᠡᠵᠡᠢ᠃ ᠴᠢᠩᠭᠢᠭᠡᠳ ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠶ᠋ᠢᠲᠤ ᠬᠣᠶᠠᠷ ᠴᠢᠳᠬᠥᠷ᠄
《ᠬᠦᠯᠢᠶᠡᠪᠡᠴᠦ ᠴᠠᠭ ᠢ᠋ᠶ᠋ᠠᠨ ᠲᠠᠯᠠᠭᠠᠷ ᠪᠠᠷᠠᠨᠠ᠂ ᠲᠡᠭᠡᠬᠦ ᠪᠡᠷ ᠢ᠋ᠶ᠋ᠡᠨ ᠡᠨᠡ ᠡᠷᠡ ᠡᠮᠡ ᠬᠣᠶᠠᠷ ᠢ᠋ ᠬᠠᠪᠰᠤᠷᠴᠤ ᠲᠠᠷᠢᠶᠠ ᠶ᠋ᠢ ᠨᠢ ᠪᠤᠰᠢᠭᠤᠬᠠᠨ ᠲᠠᠷᠢᠭᠠᠳ ᠳᠠᠭᠤᠰᠬᠠᠴᠢᠬᠠᠪᠠᠯ᠂ ᠪᠢᠳᠡ ᠴᠦ᠍ ᠲᠠᠪᠤᠨ ᠲᠠᠷᠢᠶᠠ ᠶ᠋ᠢ ᠨᠢ ᠠᠮᠲᠠᠯᠠᠭᠠᠳ ᠡᠷᠲᠡᠬᠡᠨ ᠬᠠᠷᠢᠵᠤ ᠠᠯᠪᠠ ᠪᠠᠨ ᠲᠤᠰᠢᠶᠠᠬᠤ ᠪᠢᠰᠢ ᠦᠦ?》 ᠭᠡᠵᠦ ᠬᠣᠭᠣᠷᠣᠨᠳᠣ ᠪᠠᠨ ᠵᠥᠪᠳᠡᠭᠡᠳ᠂ ᠪᠠᠯᠭᠠᠨᠰᠠᠩ ᠢ᠋ ᠬᠠᠪᠰᠤᠷᠴᠤ ᠲᠠᠷᠢᠶᠠ ᠶ᠋ᠢ ᠨᠢ ᠲᠠᠷᠢᠵᠤ ᠥᠭᠬᠦ ᠪᠡᠷ ᠲᠣᠭᠲᠠᠵᠠᠢ ᠭᠡᠨᠡ᠃
ᠲᠡᠭᠡᠭᠡᠳ ᠪᠠᠯᠭᠠᠨᠰᠠᠩ᠂ ᠪᠥᠭᠲᠥᠭᠡᠷ ᠠᠨᠵᠢᠰᠤᠨ ᠳ᠋ᠠᠭᠠᠨ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠶ᠋ᠢ ᠬᠥᠯᠵᠦ᠂ᠦᠬᠡᠷ ᠲᠣᠯᠣᠭᠠᠢᠲᠤ ᠶ᠋ᠢ ᠨᠢ ᠥᠩᠬᠥᠷᠢᠭᠦᠯ ᠪᠤᠯᠤ ᠳ᠋ᠠᠭᠠᠨ ᠬᠥᠯᠦᠭᠡᠳ ᠡᠬᠡᠨᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠲᠥᠯᠦᠭᠦᠯᠵᠦ ᠲᠠᠷᠢᠶᠠ ᠪᠠᠨ ᠲᠠᠷᠢᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠰᠢᠯᠪᠢᠭᠦᠷ ᠢ᠋ᠶ᠋ᠡᠨ ᠰᠠᠭᠤ ᠲᠡᠳᠡᠨ ᠭᠠᠷᠭᠠᠵᠤ᠂ ᠬᠣᠶᠠᠷ ᠴᠢᠳᠬᠥᠷ ᠪᠠᠭᠠ ᠯᠠ ᠤᠳᠠᠭᠠᠨ ᠠᠯᠬᠤᠪᠠᠯ᠂ ᠬᠣᠩᠭᠣ ᠶ᠋ᠢᠨ ᠮᠢᠬᠠ ᠶ᠋ᠢ ᠨᠢ ᠢᠵᠠᠷᠠᠲᠠᠯᠠ ᠭᠤᠶᠠᠳᠠᠵᠤ ᠬᠢᠩᠭᠠᠨ ᠰᠢᠯᠪᠢ ᠶ᠋ᠢ ᠨᠢ ᠶᠠᠩᠭᠢᠨᠠᠲᠠᠯᠠ ᠰᠢᠪᠬᠠᠷᠳᠠᠭᠰᠠᠭᠠᠷ ᠠᠨᠵᠢᠰᠤ ᠪᠠᠨ ᠴᠢᠩᠭᠠᠭᠠᠯᠭᠠᠨ ᠲᠠᠷᠢᠶᠠ ᠪᠠᠨ ᠲᠠᠷᠢᠭᠤᠯᠵᠤ ᠭᠡᠨᠡ᠃ ᠥᠨᠥ ᠬᠣᠶᠠᠷ ᠴᠢᠳᠬᠥᠷ᠂ ᠠᠨᠵᠢᠰᠤ ᠪᠠ ᠪᠤᠯᠤ ᠶ᠋ᠢ ᠨᠢ ᠵᠢᠳᠬᠦᠨ ᠴᠢᠩᠭᠠᠭᠠᠵᠤ ᠵᠦᠳᠡᠷᠡᠵᠦ ᠶᠠᠳᠠᠷᠠᠬᠤ ᠲᠠᠢ᠂ ᠳᠡᠭᠡᠷᠡ ᠡᠴᠡ ᠨᠢ ᠪᠠᠯᠭᠠᠨᠰᠠᠩ ᠤ᠋ᠨ ᠰᠢᠯᠬᠢᠭᠦᠷ ᠲᠦ ᠴᠢᠰᠤ ᠨᠥᠵᠢ ᠪᠡᠨ ᠭᠠᠷᠲᠠᠯᠠ ᠴᠣᠬᠢᠭᠳᠠᠵᠤ ᠲᠡᠰᠴᠦ ᠶᠠᠳᠠᠬᠤ ᠳ᠋ᠠᠭᠠᠨ᠄
《ᠪᠠᠯᠭᠠᠨᠰᠠᠩ ᠪᠠᠭᠰᠢ ᠮᠢᠨᠢ ᠠ᠋! ᠪᠢᠳᠡ ᠬᠣᠶᠠᠷ ᠢ᠋ ᠰᠤᠯᠠᠯᠠᠨ ᠲᠠᠯᠪᠢᠬᠤ ᠪᠣᠯᠪᠠ ᠦᠦ? ᠲᠠᠨ ᠤ᠋ ᠲᠠᠷᠢᠶᠠ ᠲᠠᠷᠢᠬᠤ ᠶ᠋ᠢ ᠬᠣᠷᠢᠭᠠᠳ ᠬᠣᠨᠣᠭ ᠬᠦᠯᠢᠶᠡᠬᠦ ᠪᠠᠢᠲᠤᠭᠠᠢ᠂ ᠬᠣᠶᠠᠷ ᠰᠠᠷᠠ ᠬᠦᠯᠢᠶᠡᠪᠡᠴᠦ ᠪᠣᠯᠤᠨᠠ! ᠲᠠᠪᠤᠨ ᠲᠠᠷᠢᠶᠠ ᠶ᠋ᠢ ᠴᠢᠨᠢ ᠴᠦ᠍ ᠠᠮᠲᠠᠯᠠᠬᠤ ᠦᠭᠡᠢ!》 ᠭᠡᠵᠦ ᠭᠤᠶᠤᠵᠠᠢ᠃ ᠭᠡᠲᠡᠯᠡ ᠪᠠᠯᠭᠠᠨᠰᠠᠩ ᠣᠭᠲᠣ ᠬᠦᠯᠢᠶᠡᠬᠦ ᠦᠭᠡᠢ᠄
《ᠡᠷᠯᠢᠭ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠬᠡᠨ ᠬᠥᠮᠦᠨ ᠳᠤᠷᠠ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠵᠥᠷᠢᠴᠡᠵᠦ ᠪᠣᠯᠬᠤ ᠪᠣᠢ? ᠡᠯᠳᠡᠪ ᠬᠣᠶᠠᠷ ᠢ᠋ᠶ᠋ᠠᠷ ᠪᠢᠲᠡᠭᠡᠢ ᠪᠠᠰᠢᠷᠯᠠᠭᠠᠳ ᠪᠠᠢ! ᠬᠦᠴᠦ ᠪᠡᠨ ᠰᠢᠪᠬᠠᠵᠤ᠂ ᠬᠤᠷᠳᠤᠨ ᠶᠠᠪᠤ! 》ᠭᠡᠳ ᠤᠯᠠᠮ ᠰᠢᠷᠦᠭᠦᠨ ᠰᠢᠯᠪᠡᠭᠦᠷᠳᠡᠨ ᠵᠠᠨᠴᠢᠵᠤ ᠭᠡᠨᠡ᠃ ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠣᠶᠠᠷ ᠬᠥᠯᠦᠯᠭᠡ ᠶ᠋ᠢᠨ ᠬᠦᠯᠢᠶᠡᠰᠦ ᠡᠴᠡ ᠮᠤᠯᠲᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠥᠯ ᠨᠤᠭᠤᠯᠵᠤ ᠠᠮᠤᠰᠬᠢᠬᠦ ᠶ᠋ᠢᠨ ᠴᠦ᠍ ᠵᠠᠪ ᠴᠢᠯᠥᠭᠡ ᠦᠭᠡᠢ᠃ ᠠᠨᠵᠢᠰᠤ ᠪᠠ ᠪᠤᠯᠤ ᠶ᠋ᠢ ᠬᠥᠯᠥᠰᠥ ᠪᠠᠭᠠᠰᠤ ᠪᠠᠨ ᠭᠠᠷᠲᠠᠯᠠ ᠬᠦᠴᠦ ᠮᠡᠳᠡᠨ ᠲᠠᠲᠠᠭᠰᠠᠭᠠᠷ᠂ ᠨᠠᠷᠠ ᠲᠠᠰᠢᠬᠤ ᠶ᠋ᠢᠨ ᠪᠠᠷᠤᠭ ᠲᠤ᠌ ᠰᠠᠶᠢ ᠳᠥᠩᠭᠡᠵᠦ ᠲᠠᠷᠢᠶᠠ ᠶ᠋ᠢ ᠨᠢ ᠲᠠᠷᠢᠵᠤ ᠳᠠᠭᠤᠰᠤᠭᠠᠳ᠄
《ᠣᠳᠣ ᠪᠢᠳᠡ ᠶᠠᠪᠤᠬᠤ ᠤᠤ?》 ᠭᠡᠰᠡᠨ ᠳ᠋ᠦ᠍᠂ ᠪᠠᠯᠭᠠᠨᠰᠠᠩ ᠨᠢᠳᠦ ᠪᠡᠨ ᠡᠷᠢᠶᠡᠯᠭᠡᠵᠦ᠄
《ᠲᠠᠷᠢᠶᠠ ᠭᠡᠳᠡᠭ ᠴᠢᠨᠢ ᠲᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠩᠨᠡᠵᠦ᠂ ᠦᠷᠡᠯᠡᠭᠰᠡᠨ ᠦ᠌ ᠳᠠᠷᠠᠭᠠ ᠬᠠᠳᠤᠵᠤ᠂ ᠬᠠᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠦᠲᠦᠷᠮᠡᠳᠡᠳᠡᠭ ᠢ᠋ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠦᠦ? ᠨᠠᠮᠤᠷ ᠥᠩᠭᠡᠷᠡᠵᠦ ᠡᠪᠦᠯᠰᠢᠬᠦ ᠡᠴᠡ ᠨᠡᠰᠢ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠠ ᠬᠣᠶᠠᠷ ᠲᠤᠩ ᠶᠠᠭᠠᠷᠠᠵᠤ ᠪᠠᠢᠪᠠᠯ᠂ ᠨᠠᠮᠤᠷ ᠲᠠᠷᠢᠶᠠ ᠬᠠᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠥᠲᠥᠷᠮᠡᠳᠡᠵᠦ ᠥᠭᠭᠦᠭᠡᠳ ᠶᠠᠪᠤ ᠳᠠ!》 ᠦᠬᠡᠷ ᠮᠣᠷᠢᠨ ᠲᠣᠯᠣᠭᠠᠢᠲᠤ ᠬᠣᠶᠠᠷ ᠴᠢᠳᠬᠥᠷ᠂ ᠳᠠᠬᠢᠵᠤ ᠪᠠᠯᠭᠠᠨᠰᠠᠩ ᠤ᠋ᠨ ᠠᠷᠭᠠ ᠮᠡᠬᠡ ᠳ᠋ᠦ᠍ ᠤᠨᠠᠵᠤ᠂ ᠠᠷᠠᠰᠤ ᠮᠢᠬᠠ ᠪᠠᠨ ᠬᠠᠭᠠᠷᠠᠲᠠᠯᠠ ᠵᠣᠳᠣᠭᠳᠠᠬᠤ ᠠ᠋ᠴᠠ ᠠᠶᠤᠵᠤ᠂ ᠲᠡᠷᠡ ᠳᠣᠣᠷᠠ ᠪᠠᠨ ᠡᠷᠯᠢᠭ ᠦ᠋ᠨ ᠣᠷᠣᠨ ᠳ᠋ᠠᠭᠠᠨ ᠳᠤᠲᠠᠭᠠᠨ ᠬᠠᠷᠢᠵᠤ ᠭᠡᠨᠡ᠃
ᠴᠤᠭᠯᠠᠭᠤᠯᠤᠭᠰᠠᠨ ᠣᠷᠣᠨ᠄ ᠵᠡᠭᠦᠨ ᠰᠥᠨᠢᠳ
ᠶᠠᠷᠢᠭᠰᠠᠨ ᠨᠢ᠄ ᠪᠠᠲᠤ
ᠲᠡᠮᠳᠡᠭᠯᠡᠵᠦ ᠡᠮᠬᠢᠳᠬᠡᠭᠰᠡᠨ ᠨᠢ᠄ ᠮᠠᠩ᠊᠊· ᠮᠥᠷᠡᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠢᠬᠤᠸᠠᠷ᠂ ᠤᠶᠤᠨᠴᠢᠮᠡᠭ᠂ ᠲᠣᠳᠣᠭᠡᠷᠡᠯ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠰᠣᠠ᠂ ᠣᠳᠬᠠᠨᠴᠡᠴᠡᠭ